JKCL-KABUM-08-NYA-012-059

Previous Text Back to Volume PageNext Text

Wylie title
Location	chos kyi blo gros bka' 'bum Volume 8, sde tshan 12, Text 59, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: . Bir, H.P.: Khyentse Labrang, 2012.
Genre	Vajra Songs - rdo rje'i glu

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༈ ཨ་ཧོ། ཡེ་ཤེས་ཆེན་པོ་གྲུབ་པའི་རིག་འཛིན་གྱི་ཁྱུ་མཆོག། མ་ཧཱ་གུ་རུའི་རྒྱལ་ཚབ་བླ་མ་དེ་མཁྱེན་ནོ། །བདེ་ཆེན་ཡེ་ཤེས་རྡོ་རྗེའི་དབང་མཆོག་ཞིག་བསྐུར་དང་། །ང་ཅག་རང་གྲོལ་ཆེན་པོའི་ས་མཆོག་ལ་གཤེགས་འགྲོ། །སྙིང་དབུས་འོད་ལྔའི་གུར་ཁྱིམ་པད་དཀར་གྱི་ཟེའུ་འབྲུར། །རིགས་འདུས་སེམས་དཔའ་པདྨའི་མྱུ་གུ་དེ་བཞུགས་པས། །སྐུ་གསུམ་རིགས་འདུས་བླ་མ་རང་ཆས་སུ་ལྷུན་རྫོགས། །འབྲས་བུ་ཕྱི་དུས་ཡིད་སྨོན་མ་དགོས་པས་དགའོ། །རང་སྣང་རྔ་ཡབ་དཔལ་རི་པདྨ་ཡི་ཕོ་བྲང་། །དཀྱིལ་འཁོར་གཙོ་མཆོག་རྡོ་རྗེ་ཐོད་ཕྲེང་དང་དབྱེར་མེད། །མཁའ་འགྲོ་རྒྱ་མཚོའི་མིང་པོ་བླ་མ་དེ་མཁྱེན་ནོ། །ད་ལྟ་ཉིད་དུ་བདག་ལ་བྱིན་གྱིས་རང་རློབས་ཤིག། ཇི་བཞིན་མ་བཅོས་ཡེ་བབས་ཕྱོགས་ལྷུང་དང་བྲལ་ཞིང་། །སྤྲོས་པའི་རྙོག་པ་བྲལ་བའི་ཆོས་དབྱིངས་ཀྱི་ཀློང་དུ། །ཞལ་ཕྱག་མཚན་མ་ལས་འདས་མཆོག་གྱུར་གྱི་གླིང་པ། །རང་ངོ་ཤེས་པའི་ངང་ནས་གསོལ་བ་རང་འདེབས་སོ། །ཡིད་དཔྱོད་བློ་ཡི་སྒྲུབ་པའི་འཆིང་བ་ཀུན་དོར་ནས། །བྱར་མེད་གཉུག་མའི་ངང་དེར་ཉེ་ལམ་ཞིག་བསྒྲོད་པས། །དངོས་སྣང་འགྱུར་མེད་བདེ་ཆེན་བླ་མ་རུ་ཤར་བར། །གཉིས་འཛིན་བྲལ་བའི་ངང་ནས་གསོལ་བ་རང་འདེབས་སོ། །འཁོར་འདས་ཆོས་རྣམས་རིག་པའི་གཤིས་ལུགས་ལ་རྫོགས་པས། །སྤངས་ཐོབ་འཕེལ་འགྲིབ་ལས་འདས་འོད་གསལ་གྱི་ཐིག་ལེར། །ཞེན་མེད་ངང་ནས་འཁྲུལ་པའི་ཆོས་རྣམས་ཀུན་རང་ཞིག། རང་གྲོལ་རྒྱལ་པོ་འོད་གསལ་གླིང་པ་དེ་མཁྱེན་ནོ། །རང་སྣང་དབྱེར་མེད་ངང་ནས་གསོལ་བ་ཞིག་འདེབས་ན། །ང་ཡི་སྒོ་གསུམ་མ་རིག་སྦུབས་རྒྱ་ལས་གྲོལ་ནས། །འཇའ་ལུས་རྡོ་རྗེའི་སྐུ་རུ་ད་ལྟ་རང་སྨིན་ནས། །ཆོས་ཟད་ཆེན་པོའི་གླིང་དུ་རྣལ་འབྱོར་རང་སྐྱིད་དོ། །ཡེ་ཤེས་ལྷུན་གྲུབ་ཆེན་པོ་ཕྱིར་གསལ་དུ་ཤར་བས། །རང་སྣང་སྐུ་དང་ཞིང་ཁམས་བཀོད་པ་ནི་བསམ་ཡས། །དོན་གཉིས་ལྷུན་གྲུབ་འདོད་འབྱུང་བསམ་འཕེལ་གྱི་ནོར་བུ། །འགྲོ་ཀུན་བྱང་ཆུབ་མཆོག་ལ་འགོད་པ་རུ་གྱུར་ཅིག། །མདོར་ན་དེང་བཟུང་བྱང་ཆུབ་སྙིང་པོ་ཡི་བར་དུ། །དཔལ་ལྡན་བླ་མ་མཚོ་སྐྱེས་རྡོ་རྗེ་ཡི་རང་ཞལ། །དུས་གསུམ་འབྲལ་མེད་མཇལ་བའི་བྱིན་བརླབ་ཀྱི་མཐུ་ལས། །རྩ་རླུང་ཐིག་ལེའི་མདུད་པ་རང་གྲོལ་དུ་སོང་ནས། །ཡེ་ཤེས་རིག་པའི་རྩལ་ཁ་ཕྱོགས་མེད་དུ་རྒྱས་མཛོད། །སྐུ་གསུམ་ལམ་གྱི་སྣང་བ་ཚེ་འདི་ལ་རྫོགས་ནས། །རྣམ་ཤེས་ལས་འདས་ཡེ་ཤེས་ཆོས་སྐུ་ཡི་རྒྱལ་ཁམས། །ཚེ་འདི་ཉིད་ལ་སྙོགས་པའི་དངོས་གྲུབ་ཞིག་ཞུའོ། །མཁྱེན་ནོ་མཁྱེན་ནོ་གཏེར་ཆེན་བླ་མ་རང་མཁྱེན་ནོ། །ཀྱེ་མ་ཀྱེ་ཧུད་ལས་ངན་བདག་འདྲ་ལ་གཟིགས་ཤིག། གསོལ་བ་སྙིང་ནས་འདེབས་སོ་བྱིན་གྱིས་རང་རློབས་ཤིག། མཆོག་ཐུན་དངོས་གྲུབ་སྟན་ཐོག་འདི་ཉིད་དུ་སྩོལ་ཅིག། །འཆི་མེད་ཡེ་ཤེས་སྐུ་ཅན་བླ་མ་དེ་མཁྱེན་ནོ། །གསོལ་འདེབས་བུ་ལ་ཚེ་དང་ཡེ་ཤེས་ཀྱི་དངོས་གྲུབ། །མི་འགྱུར་མི་བཤིག་རྡོ་རྗེ་སེམས་དཔའ་ཡི་ལང་ཚོ། །དཀའ་བ་མེད་པ་འགྲུབ་པའི་སྨོན་ལམ་ཞིག་ཞུའོ། །ཅེས་པའང་པདྨ་ཡེ་ཤེས་རྡོ་རྗེས་གསོལ་བ་བཏབ་པ་ཡེ་ཤེས་གཟིགས་པའི་བྱིན་རླབས་སྙིང་དབུས་སུ་ཐིམ་པར་གྱུར་ཅིག། སརྦ་སིདྡྷི་རསྟུ། མངྒ་ལཾ།། །།

[edit]

!_a ho/__ye shes chen po grub pa'i rig 'dzin gyi khyu mchog/__ma hA gu ru'i rgyal tshab bla ma de mkhyen no/__/bde chen ye shes rdo rje'i dbang mchog zhig bskur dang /__/nga cag rang grol chen po'i sa mchog la gshegs 'gro/__/snying dbus 'od lnga'i gur khyim pad dkar gyi ze'u 'brur/__/rigs 'dus sems dpa' pad+ma'i myu gu de bzhugs pas/__/sku gsum rigs 'dus bla ma rang chas su lhun rdzogs/__/'bras bu phyi dus yid smon ma dgos pas dga'o/__/rang snang rnga yab dpal ri pad+ma yi pho brang /__/dkyil 'khor gtso mchog rdo rje thod phreng dang dbyer med/__/mkha' 'gro rgya mtsho'i ming po bla ma de mkhyen no/__/da lta nyid du bdag la byin gyis rang rlobs shig/__ji bzhin ma bcos ye babs phyogs lhung dang bral zhing /__/spros pa'i rnyog pa bral ba'i chos dbyings kyi klong du/__/zhal phyag mtshan ma las 'das mchog gyur gyi gling pa/__/rang ngo shes pa'i ngang nas gsol ba rang 'debs so/__/yid dpyod blo yi sgrub pa'i 'ching ba kun dor nas/__/byar med gnyug ma'i ngang der nye lam zhig bsgrod pas/__/dngos snang 'gyur med bde chen bla ma ru shar bar/__/gnyis 'dzin bral ba'i ngang nas gsol ba rang 'debs so/__/'khor 'das chos rnams rig pa'i gshis lugs la rdzogs pas/__/spangs thob 'phel 'grib las 'das 'od gsal gyi thig ler/__/zhen med ngang nas 'khrul pa'i chos rnams kun rang zhig/__rang grol rgyal po 'od gsal gling pa de mkhyen no/__/rang snang dbyer med ngang nas gsol ba zhig 'debs na/__/nga yi sgo gsum ma rig sbubs rgya las grol nas/__/'ja' lus rdo rje'i sku ru da lta rang smin nas/__/chos zad chen po'i gling du rnal 'byor rang skyid do/__/ye shes lhun grub chen po phyir gsal du shar bas/__/rang snang sku dang zhing khams bkod pa ni bsam yas/__/don gnyis lhun grub 'dod 'byung bsam 'phel gyi nor bu/__/'gro kun byang chub mchog la 'god pa ru gyur cig/__/mdor na deng bzung byang chub snying po yi bar du/__/dpal ldan bla ma mtsho skyes rdo rje yi rang zhal/__/dus gsum 'bral med mjal ba'i byin brlab kyi mthu las/__/rtsa rlung thig le'i mdud pa rang grol du song nas/__/ye shes rig pa'i rtsal kha phyogs med du rgyas mdzod/__/sku gsum lam gyi snang ba tshe 'di la rdzogs nas/__/rnam shes las 'das ye shes chos sku yi rgyal khams/__/tshe 'di nyid la snyogs pa'i dngos grub zhig zhu'o/__/mkhyen no mkhyen no gter chen bla ma rang mkhyen no/__/kye ma kye hud las ngan bdag 'dra la gzigs shig/__gsol ba snying nas 'debs so byin gyis rang rlobs shig/__mchog thun dngos grub stan thog 'di nyid du stsol cig/__/'chi med ye shes sku can bla ma de mkhyen no/__/gsol 'debs bu la tshe dang ye shes kyi dngos grub/__/mi 'gyur mi bshig rdo rje sems dpa' yi lang tsho/__/dka' ba med pa 'grub pa'i smon lam zhig zhu'o/__/ces pa'ang pad+ma ye shes rdo rjes gsol ba btab pa ye shes gzigs pa'i byin rlabs snying dbus su thim par gyur cig/__sarba sid+d+hi rastu/__mang+ga laM//___//