JKW-KABUM-22-ZA-012-019

🚧 This website is under continued development. We appreciate your patience!

Previous Section Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 12, sde tshan 19, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

ཀུན་མཁྱེན་སངས་རྒྱས་གཉིས་པ་ལ་གསོལ་འདེབས་རྡོ་རྗེའི་ཐོལ་གླུ་ལྷན་སྐྱེས་སྐུ་བཞིའི་སྒྲ་དབྱངས། ཀུན་མཁྱེན་སངས་རྒྱས་གཉིས་པ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་ལྷན་སྐྱེས་སྐུ་བཞིའི་སྒྲ་དབྱངས་ཞེས་བྱ་བ། ཨ་ཧོ། ཕྱི་ནང་གི་འབྱུང་བ་རྒྱུ་དང་བཅས། །འོད་གསལ་བའི་དབྱིངས་སུ་ཟད་ནས་སླར། །འཕོ་ཆེན་གྱི་ཕྱག་རྒྱར་ཡོངས་བཞེངས་པ། །རྗེ་སྐུ་ཡི་རྡོ་རྗེར་གསོལ་བ་འདེབས། །རྩ་གནས་ཀྱི་ཡི་གེའི་འཁོར་ལོ་ཀུན། །ཡེ་ཤེས་ཀྱི་དྲ་བར་བསྡོམས་ནས་སླར། །བརྗོད་མེད་ཀྱི་ཆོས་འཁོར་རྟག་བསྐོར་བའི། །རྗེ་གསུང་གི་རྡོ་རྗེར་གསོལ་བ་འདེབས། །སྐད་ཅིག་གི་རིག་པ་གདོད་མའི་སར། །རང་གྲོལ་གྱི་བཙན་ས་ཟིན་པ་ལས། །མཁྱེན་གཉིས་ཀྱི་ཡོན་ཏན་ཡོངས་རྫོགས་པ། །རྗེ་ཐུགས་ཀྱི་རྡོ་རྗེར་གསོལ་བ་འདེབས། །ནང་གསལ་གྱི་ངོ་བོ་བུམ་སྐུའི་སྦུབས། །ཞལ་ཕྱག་གི་སྤྲོས་པ་ཉེར་ཞི་ཡང་། །ཟུང་འཇུག་གི་སྒྱུ་འཕྲུལ་རྒྱུན་ཆད་མེད། །རྗེ་ཡེ་ཤེས་རྡོ་རྗེར་གསོལ་བ་འདེབས། །ཕྱི་བསྐྱེད་པ་རྡུལ་ཚོན་གྱི་དཀྱིལ་འཁོར་དུ། །ལུས་བུམ་པའི་དབང་གིས་སྨིན་བྱས་ནས། །དབྱིབས་ལྷ་སྐུར་བལྟ་བའི་རིམ་པ་ཡིས། །ཐ་མལ་གྱི་སྣང་ཞེན་དག་བྱིན་རློབས། །ནང་བྱང་ཆུབ་སེམས་ཀྱི་དཀྱིལ་འཁོར་དུ། །ངག་གསང་བའི་དབང་གིས་སྨིན་བྱས་ནས། །ལམ་རང་བྱིན་རླབས་པའི་རིམ་པ་ཡིས། །ཁམས་བདེ་དྲོད་འབར་བར་བྱིན་གྱིས་རློབས། །ཐབས་ཕྱག་རྒྱ་བྷ་གའི་དཀྱིལ་འཁོར་དུ། །ཡིད་ཤེས་རབ་དབང་གིས་སྨིན་བྱས་ནས། །ལམ་ཕོ་ཉའི་རེག་བྱ་དང་འགྲོགས་པ། །དཔེའི་ལྷན་སྐྱེས་ཡེ་ཤེས་འགྲུབ་བྱིན་རློབས། །མཆོག་སྙིང་པོ་འོད་གསལ་དཀྱིལ་འཁོར་དུ། །རླུང་བཞི་པའི་དབང་གིས་སྨིན་བྱས་ནས། །ལམ་རྡོ་རྗེའི་རྦ་རླབས་གོམས་པ་ལས། །དོན་མངོན་སུམ་རིག་པ་མཐོང་བྱིན་རློབས། །ཚིག་དེ་སྐད་ཀུན་མཁྱེན་ཆོས་ཀྱི་རྗེའི། །བྱིན་རླབས་ཀྱི་སྤྲིན་ཕུང་འཁྲིགས་པའི་གནས། །ཉམས་རབ་དགའ་དབེན་པའི་ནགས་ཁྲོད་ཆེར། །སྤྲང་གཏད་མེད་པདྨ་དགྱེས་པས་བྲིས། །ཞེས་པའང་གངས་རི་ཐོད་དཀར་ཨོ་རྒྱན་རྫོང་འོད་ཟེར་སྤྲིན་གྱི་སྐྱེད་མོས་ཚལ་དུ་གནས་འབྲེལ་ལ་ལྷགས་པའི་ཚེ་ཚོགས་ཀྱི་འཁོར་ལོ་སྟོང་ཕྲག་ཐལ་བར་བགྱིས་བའི་དགའ་སྟོན་དུ་དམར་ཕྱོགས་ཌཱ་ཀི་འདུ་བའི་དུས་ཀྱི་རྒྱལ་པོར་གླུ་བླངས་པའོ།། །། ༈

[edit]

kun mkhyen sangs rgyas gnyis pa la gsol 'debs rdo rje'i thol glu lhan skyes sku bzhi'i sgra dbyangs/__ kun mkhyen sangs rgyas gnyis pa la gsol ba 'debs pa'i rdo rje'i thol glu lhan skyes sku bzhi'i sgra dbyangs zhes bya ba/__a ho/__phyi nang gi 'byung ba rgyu dang bcas/__/'od gsal ba'i dbyings su zad nas slar/__/'pho chen gyi phyag rgyar yongs bzhengs pa/__/rje sku yi rdo rjer gsol ba 'debs/__/rtsa gnas kyi yi ge'i 'khor lo kun/__/ye shes kyi dra bar bsdoms nas slar/__/brjod med kyi chos 'khor rtag bskor ba'i/__/rje gsung gi rdo rjer gsol ba 'debs/__/skad cig gi rig pa gdod ma'i sar/__/rang grol gyi btsan sa zin pa las/__/mkhyen gnyis kyi yon tan yongs rdzogs pa/__/rje thugs kyi rdo rjer gsol ba 'debs/__/nang gsal gyi ngo bo bum sku'i sbubs/__/zhal phyag gi spros pa nyer zhi yang /__/zung 'jug gi sgyu 'phrul rgyun chad med/__/rje ye shes rdo rjer gsol ba 'debs/__/phyi bskyed pa rdul tshon gyi dkyil 'khor du/__/lus bum pa'i dbang gis smin byas nas/__/dbyibs lha skur blta ba'i rim pa yis/__/tha mal gyi snang zhen dag byin rlobs/__/nang byang chub sems kyi dkyil 'khor du/__/ngag gsang ba'i dbang gis smin byas nas/__/lam rang byin rlabs pa'i rim pa yis/__/khams bde drod 'bar bar byin gyis rlobs/__/thabs phyag rgya b+ha ga'i dkyil 'khor du/__/yid shes rab dbang gis smin byas nas/__/lam pho nya'i reg bya dang 'grogs pa/__/dpe'i lhan skyes ye shes 'grub byin rlobs/__/mchog snying po 'od gsal dkyil 'khor du/__/rlung bzhi pa'i dbang gis smin byas nas/__/lam rdo rje'i rba rlabs goms pa las/__/don mngon sum rig pa mthong byin rlobs/__/tshig de skad kun mkhyen chos kyi rje'i/__/byin rlabs kyi sprin phung 'khrigs pa'i gnas/__/nyams rab dga' dben pa'i nags khrod cher/__/sprang gtad med pad+ma dgyes pas bris/__/zhes pa'ang gangs ri thod dkar o rgyan rdzong 'od zer sprin gyi skyed mos tshal du gnas 'brel la lhags pa'i tshe tshogs kyi 'khor lo stong phrag thal bar bgyis ba'i dga' ston du dmar phyogs DA ki 'du ba'i dus kyi rgyal por glu blangs pa'o//__//__!_