JKW-KABUM-22-ZA-012-045

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 12, sde tshan 45, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

རྫོགས་ཆེན་ཉེ་བརྒྱུད་ལ་གསོལ་འདེབས་རྡོ་རྗེའི་ཐོལ་གླུ་བདེ་སྟོང་གཉུག་མའི་རྒྱན། འོད་གསལ་རྫོགས་པ་ཆེན་པོའི་ཉེ་བརྒྱུད་ལ་གསོལ་བ་འདེབས་པའི་རྡོ་རྗེའི་ཐོལ་གླུ་བདེ་སྟོང་གཉུག་མའི་རྒྱན་ཅེས་བྱ་བ། ཨ་ཧོ། བདེ་སྟོང་ཟུང་འཇུག་ལྷན་སྐྱེས་དཀྱིལ་འཁོར་གྱི་ཀློང་ནས། །རྟག་ཆད་མཚན་མ་མ་དམིགས་གཞོན་ནུ་ཡི་བུམ་སྐུ། །རང་རིག་ཀུན་བཟང་གདོད་མའི་མགོན་པོ་དེ་མཁྱེན་ནོ། །གཟུང་འཛིན་གཉུག་མར་ཞིག་པར་བྱིན་གྱིས་རང་རློབས་ཤིག །ངེས་པ་ལྔ་ལྡན་འཇའ་ཟེར་ཐིག་ལེ་ཡི་ཀློང་ནས། །སྟོང་དང་སྙིང་རྗེ་ཟུང་འཇུག་བདེ་ཆེན་གྱི་ངོ་བོ། །རང་གསལ་ལོངས་སྤྱོད་རྫོགས་སྐུའི་སངས་རྒྱས་དེ་མཁྱེན་ནོ། །མཚན་འཛིན་དབུ་མར་ཞིག་པར་བྱིན་གྱིས་རང་རློབས་ཤིག །སྣང་སྟོང་ཟུང་འཇུག་གང་འདུལ་དེར་སྟོན་གྱི་ཀློང་ནས། །དགའ་ཆེན་སྒྱུ་མར་རོལ་པའི་ཡེ་ཤེས་ཀྱི་ངོ་བོ། །མཆོག་གི་སྤྲུལ་སྐུ་དགྱེས་པ་རྡོ་རྗེ་དེ་མཁྱེན་ནོ། །ཟག་བཅས་འོད་སྐུར་ཐིམ་པར་བྱིན་གྱིས་རང་རློབས་ཤིག །ཚོགས་བརྒྱད་དབུ་མར་བསྒྲལ་བའི་དུར་ཁྲོད་ཀྱི་ཀློང་ནས། །དགའ་བཞི་འཁོར་ལོར་སྦྱོར་བའི་རྣལ་འབྱོར་གྱི་དབང་ཕྱུག །རིག་འཛིན་ཀུན་གཙོ་ཤྲཱི་སིདྷ་དེ་མཁྱེན་ནོ། །སྣང་བཞི་གོང་དུ་བགྲོད་པར་བྱིན་གྱིས་རང་རློབས་ཤིག །ཀ་དག་གཏིང་མཐའ་བྲལ་བའི་ཆུ་གཏེར་གྱི་ཀློང་ནས། །ལྷུན་གྲུབ་ཟག་བྲལ་བདེ་ཆེན་པདྨོ་ཡི་སྦུབས་སུ། །རྡོ་རྗེའི་སྐུ་བརྙེས་པདྨ་འབྱུང་གནས་དེ་མཁྱེན་ནོ། །དོན་གཉིས་ལྷུན་གྱིས་གྲུབ་པར་བྱིན་གྱིས་རང་རློབས་ཤིག །ཨ་ཧཾ་འབར་འཛག་ཞུ་བདེའི་དཀྱིལ་འཁོར་གྱི་ཀློང་ནས། །བཅུ་དྲུག་དགའ་བའི་ཡེ་ཤེས་མཚན་དཔེ་རུ་བཞད་པའི། །ཌཱ་ཀིའི་གཙོ་མོ་ཛྙཱ་ན་སཱ་ར་དེ་མཁྱེན་ནོ། །བདེ་སྟོང་དབུ་མར་སྨིན་པར་བྱིན་གྱིས་རང་རློབས་ཤིག །རང་སྣང་རྣམ་པར་དག་པའི་དཀྱིལ་འཁོར་གྱི་ཀློང་ནས། །གཞན་སྣང་གང་ལ་གང་འདུལ་དེར་སྟོན་དུ་རོལ་པས། །གཉིས་སྣང་རྟོག་བྲལ་དྲིན་ཆེན་བླ་མ་དེ་མཁྱེན་ནོ། །སྣང་རིག་དབྱེར་མེད་རྟོགས་པར་བྱིན་གྱིས་རང་རློབས་ཤིག །དོན་དམ་སྟོང་ཉིད་བརྗོད་བྲལ་ཡེ་ཤེས་ཀྱི་ཀློང་ནས། །ཀུན་སྣང་སྙིང་རྗེར་རོལ་པའི་སྒྱུ་འཕྲུལ་དུ་ཤར་བའི། །སྐུ་གསུམ་ཟུང་འཇུག་དཀྱིལ་འཁོར་ལྷ་ཚོགས་དེ་མཁྱེན་ནོ། །གདན་གསུམ་དབྱེར་མེད་རྟོགས་པར་བྱིན་གྱིས་རང་རློབས་ཤིག །ཕྱི་སྣོད་རབ་འབྱམས་རྔ་ཡབ་དཔལ་རི་ཡི་གྲོང་ཁྱེར། །ནང་བཅུད་འགྲོ་ཀུན་ཟུང་འཇུག་མཚོ་སྐྱེས་ཀྱི་རྡོ་རྗེ། །གཞན་སྣང་རྟོག་བྲལ་དཀྱིལ་འཁོར་གསུམ་ལྡན་གྱི་ངང་ནས། །ཉམས་དགའི་རྡོ་རྗེའི་ཐོལ་གླུ་བླངས་པ་ཡི་དགེ་བས། །གཞི་རིག་འཁྲུལ་བྲལ་རང་བྱུང་གཉུག་མ་ཡི་གཤིས་སུ། །ལྟ་སྒོམ་སྤྱོད་པའི་མིང་འདོགས་ཐ་སྙད་ཀུན་བྲལ་ཏེ། །གློ་བུར་འཁྲུལ་པའི་ཚོགས་ཀུན་གཏད་མེད་དུ་དག་པས། །སྐུ་གསུམ་རང་རྩལ་རྫོགས་པའི་སྨོན་ལམ་ཞིག་ཞུའོ། །འོད་གསལ་རྫོགས་པ་ཆེན་པོའི་ཉེ་བརྒྱུད་ལ་གསོལ་བ་འདེབས་པའི་རྡོ་རྗེའི་ཐོལ་གླུ་བདེ་སྟོང་གཉུག་མའི་རྒྱན་ཅེས་བྱ་བ་འདི་ཡང་དུས་ཀྱི་རྒྱལ་པོའི་ཚེས་བཅུ་ལ་བརྗོད་པའོ།། །། ༈

[edit]

rdzogs chen nye brgyud la gsol 'debs rdo rje'i thol glu bde stong gnyug ma'i rgyan/__ 'od gsal rdzogs pa chen po'i nye brgyud la gsol ba 'debs pa'i rdo rje'i thol glu bde stong gnyug ma'i rgyan ces bya ba/__a ho/__bde stong zung 'jug lhan skyes dkyil 'khor gyi klong nas/__/rtag chad mtshan ma ma dmigs gzhon nu yi bum sku/__/rang rig kun bzang gdod ma'i mgon po de mkhyen no/__/gzung 'dzin gnyug mar zhig par byin gyis rang rlobs shig__/nges pa lnga ldan 'ja' zer thig le yi klong nas/__/stong dang snying rje zung 'jug bde chen gyi ngo bo/__/rang gsal longs spyod rdzogs sku'i sangs rgyas de mkhyen no/__/mtshan 'dzin dbu mar zhig par byin gyis rang rlobs shig__/snang stong zung 'jug gang 'dul der ston gyi klong nas/__/dga' chen sgyu mar rol pa'i ye shes kyi ngo bo/__/mchog gi sprul sku dgyes pa rdo rje de mkhyen no/__/zag bcas 'od skur thim par byin gyis rang rlobs shig__/tshogs brgyad dbu mar bsgral ba'i dur khrod kyi klong nas/__/dga' bzhi 'khor lor sbyor ba'i rnal 'byor gyi dbang phyug__/rig 'dzin kun gtso shrI sid+ha de mkhyen no/__/snang bzhi gong du bgrod par byin gyis rang rlobs shig__/ka dag gting mtha' bral ba'i chu gter gyi klong nas/__/lhun grub zag bral bde chen pad+mo yi sbubs su/__/rdo rje'i sku brnyes pad+ma 'byung gnas de mkhyen no/__/don gnyis lhun gyis grub par byin gyis rang rlobs shig__/a haM 'bar 'dzag zhu bde'i dkyil 'khor gyi klong nas/__/bcu drug dga' ba'i ye shes mtshan dpe ru bzhad pa'i/__/DA ki'i gtso mo dz+nyA na sA ra de mkhyen no/__/bde stong dbu mar smin par byin gyis rang rlobs shig__/rang snang rnam par dag pa'i dkyil 'khor gyi klong nas/__/gzhan snang gang la gang 'dul der ston du rol pas/__/gnyis snang rtog bral drin chen bla ma de mkhyen no/__/snang rig dbyer med rtogs par byin gyis rang rlobs shig__/don dam stong nyid brjod bral ye shes kyi klong nas/__/kun snang snying rjer rol pa'i sgyu 'phrul du shar ba'i/__/sku gsum zung 'jug dkyil 'khor lha tshogs de mkhyen no/__/gdan gsum dbyer med rtogs par byin gyis rang rlobs shig__/phyi snod rab 'byams rnga yab dpal ri yi grong khyer/__/nang bcud 'gro kun zung 'jug mtsho skyes kyi rdo rje/__/gzhan snang rtog bral dkyil 'khor gsum ldan gyi ngang nas/__/nyams dga'i rdo rje'i thol glu blangs pa yi dge bas/__/gzhi rig 'khrul bral rang byung gnyug ma yi gshis su/__/lta sgom spyod pa'i ming 'dogs tha snyad kun bral te/__/glo bur 'khrul pa'i tshogs kun gtad med du dag pas/__/sku gsum rang rtsal rdzogs pa'i smon lam zhig zhu'o/__/'od gsal rdzogs pa chen po'i nye brgyud la gsol ba 'debs pa'i rdo rje'i thol glu bde stong gnyug ma'i rgyan ces bya ba 'di yang dus kyi rgyal po'i tshes bcu la brjod pa'o//__//___!__