JKW-KABUM-22-ZA-012-054

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 12, sde tshan 54, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

དཔེ་དོན་དང་འབྲེལ་བའི་རྡོ་རྗེའི་ཐོལ་གླུ་གཞན་གསོས་མགྲིན་པའི་རོལ་མོ། དཔེ་དོན་དང་འབྲེལ་བའི་རྡོ་རྗེའི་ཐོལ་གླུ་གཞན་གསོས་མགྲིན་པའི་རོལ་མོ་ཞེས་བྱ་བ། ན་མོ་གུ་རུ་ཛྙཱ་ན་ཝེ། ཡར་གཅིག་བལྟས་པས་ནམ་མཁའ་དྭངས་པ་ཡི་དཀྱིལ་ན། །ཁྲི་གདུགས་ཉི་མས་གླིང་བཞི་བསྐོར་བ་དེ་མཐོང་ནས། །ད་ལྟ་དལ་འབྱོར་ཉིན་མོའི་སྣང་བ་དང་ལྡན་ཚེ། །བླ་མེད་ཐར་པའི་ཤུལ་ལམ་རྙོགས་དགོས་དེ་དྲན་བྱུང་། །ཕར་གཅིག་བལྟས་པས་ཞིང་ས་དུལ་མ་ཡི་ངོགས་སུ། །ཐ་དད་འབྲས་བུ་སོ་སོར་སྨིན་པ་དེ་མཐོང་བས། །དཀར་ནག་ལས་ཀྱི་འབྲས་བུ་བསླུ་མེད་དེ་འབྱུང་ཕྱིར། །ཐར་པ་ཆ་མཐུན་དགེ་ལ་གཞོལ་བ་དེ་དྲན་བྱུང་། །ཚུར་གཅིག་བལྟས་པས་སྨན་ལྗོངས་གཞོན་ནུ་ཡི་དོ་རར། །ཉེས་མེད་རི་དྭགས་རྔོན་པས་གཟིར་བ་དེ་མཐོང་བས། །མྱུར་དུ་ཐར་པ་དམ་པའི་ཐབས་ཚུལ་ལ་འགྱངས་ནས། །བཟློག་མེད་འཆི་བདག་ཞགས་པས་བཏབ་པ་དེ་དྲན་བྱུང་། །མར་གཅིག་བལྟས་པས་ལྷུང་ལྷུང་འབབ་པ་ཡི་ཆུ་རྒྱུན། །ཟད་མེད་སྣ་ཚོགས་རི་མོས་བཀྲ་བ་དེ་མཐོང་ནས། །འཁོར་བ་གང་དུ་སྐྱེས་ཀྱང་སྡུག་བསྔལ་གྱི་འཁོར་ལོ། །བཟོད་པར་དཀའ་བ་འཛད་དུ་མེད་པ་དེ་དྲན་བྱུང་། །ལྷོ་ནུབ་ནམ་མཁའི་ཁམས་སུ་འཇའ་ཚོན་གྱི་དཀྱིལ་འཁོར། །ཟླ་བ་ཞུན་མའི་མདོག་གིས་སྤུད་པ་དེ་མཐོང་ནས། །རྔ་ཡབ་དཔལ་རི་སྤྲུལ་པའི་ས་འཛིན་གྱི་སྤོ་ལ། །སྐྱབས་གཅིག་མཚོ་སྐྱེས་རྡོ་རྗེ་བཞུགས་པ་དེ་དྲན་བྱུང་། །གངས་རི་དཀར་པོ་དྲི་མེད་ལྷུན་ཆགས་ཀྱི་ངོས་སུ། །ན་བུན་འཁྲིགས་པའི་མགུལ་དར་བཀྲ་བ་དེ་མཐོང་ནས། །སྤྲོས་པ་ཀུན་བྲལ་འོད་གསལ་དབུ་མ་ཡི་ལྟ་བར། །རྟོག་གེའི་ཚིག་གིས་རང་ཞལ་བསྒྲིབས་པ་དེ་དྲན་བྱུང་། །སྤྲིན་དཀར་བར་ནས་གཡོ་བའི་ཆིལ་ཆིལ་གྱི་ཆུ་རྒྱུན། །ད་ལྟ་ཐན་པའི་གདུང་བས་འཕྲོག་བ་དེ་མཐོང་ནས། །ཡིད་བྱེད་ལས་འདས་བློ་བྲལ་ཕྱག་ཆེན་གྱི་སྒོམ་པར། །མི་བརྩོན་རང་གར་ཤོར་བའི་འཁྲུལ་འབྱམས་དེ་དྲན་བྱུང་། །འབྲས་ལྡན་ཤུགས་པའི་ཡལ་གར་ཁུ་བྱུག་གི་གླུ་དབྱངས། །སྙན་པར་སྒྲོགས་ཀྱང་སྙིང་པོས་དབེན་པ་དེ་མཐོང་ནས། །རྩེ་གཅིག་གཞན་དོན་ལ་གཞོལ་བྱང་ཆུབ་ཀྱི་སྤྱོད་པ། །རང་འདོད་ཚུལ་འཆོས་གསོབ་ཀྱིས་བསླུས་བ་དེ་དྲན་བྱུང་། །འོད་གསལ་ཟླ་བའི་བཞིན་རས་རྙོག་བྲལ་གྱི་ངོས་སུ། །གློ་བུར་ཆར་སྤྲིན་སྟུག་པོས་བཀབ་པ་དེ་མཐོང་ནས། །སྐུ་དང་ཡེ་ཤེས་ལྷུན་གྲུབ་རྫོགས་ཆེན་གྱི་འབྲས་བུར། །ཞེ་འདོད་མཚན་མའི་གོལ་སས་སྒྲིབ་པ་དེ་དྲན་བྱུང་། །སྣང་བ་ཡུལ་རྐྱེན་སྣ་ཚོགས་ཕོ་ཉ་ཡིས་བསྐུལ་ནས། །ངེས་འབྱུང་སྙིང་རྗེ་བྲལ་བའི་རང་རྒྱུད་ལ་བལྟས་པས། །སྐྱོ་ཤས་བཟོད་མེད་སྐྱེས་ཏེ་མ་བཅོས་ཀྱི་ཐོལ་གླུ། །གང་ཤར་རྡོ་རྗེའི་གླུ་ཡི་དཀོར་མཛོད་ནས་བླངས་སོ། །རང་གཞན་འགྲོ་ཀུན་ཐར་པ་བསྒྲུབ་པ་ལ་འདུག་ནས། །ཚེ་གཅིག་མཆོག་གི་གོ་འཕང་ཐོབ་པ་རུ་ཤོག་ཅིག ། ༈

[edit]

dpe don dang 'brel ba'i rdo rje'i thol glu gzhan gsos mgrin pa'i rol mo/__ dpe don dang 'brel ba'i rdo rje'i thol glu gzhan gsos mgrin pa'i rol mo zhes bya ba/__na mo gu ru dz+nyA na we/__yar gcig bltas pas nam mkha' dwangs pa yi dkyil na/__/khri gdugs nyi mas gling bzhi bskor ba de mthong nas/__/da lta dal 'byor nyin mo'i snang ba dang ldan tshe/__/bla med thar pa'i shul lam rnyogs dgos de dran byung /__/phar gcig bltas pas zhing sa dul ma yi ngogs su/__/tha dad 'bras bu so sor smin pa de mthong bas/__/dkar nag las kyi 'bras bu bslu med de 'byung phyir/__/thar pa cha mthun dge la gzhol ba de dran byung /__/tshur gcig bltas pas sman ljongs gzhon nu yi do rar/__/nyes med ri dwags rngon pas gzir ba de mthong bas/__/myur du thar pa dam pa'i thabs tshul la 'gyangs nas/__/bzlog med 'chi bdag zhags pas btab pa de dran byung /__/mar gcig bltas pas lhung lhung 'bab pa yi chu rgyun/__/zad med sna tshogs ri mos bkra ba de mthong nas/__/'khor ba gang du skyes kyang sdug bsngal gyi 'khor lo/__/bzod par dka' ba 'dzad du med pa de dran byung /__/lho nub nam mkha'i khams su 'ja' tshon gyi dkyil 'khor/__/zla ba zhun ma'i mdog gis spud pa de mthong nas/__/rnga yab dpal ri sprul pa'i sa 'dzin gyi spo la/__/skyabs gcig mtsho skyes rdo rje bzhugs pa de dran byung /__/gangs ri dkar po dri med lhun chags kyi ngos su/__/na bun 'khrigs pa'i mgul dar bkra ba de mthong nas/__/spros pa kun bral 'od gsal dbu ma yi lta bar/__/rtog ge'i tshig gis rang zhal bsgribs pa de dran byung /__/sprin dkar bar nas g.yo ba'i chil chil gyi chu rgyun/__/da lta than pa'i gdung bas 'phrog ba de mthong nas/__/yid byed las 'das blo bral phyag chen gyi sgom par/__/mi brtson rang gar shor ba'i 'khrul 'byams de dran byung /__/'bras ldan shugs pa'i yal gar khu byug gi glu dbyangs/__/snyan par sgrogs kyang snying pos dben pa de mthong nas/__/rtse gcig gzhan don la gzhol byang chub kyi spyod pa/__/rang 'dod tshul 'chos gsob kyis bslus ba de dran byung /__/'od gsal zla ba'i bzhin ras rnyog bral gyi ngos su/__/glo bur char sprin stug pos bkab pa de mthong nas/__/sku dang ye shes lhun grub rdzogs chen gyi 'bras bur/__/zhe 'dod mtshan ma'i gol sas sgrib pa de dran byung /__/snang ba yul rkyen sna tshogs pho nya yis bskul nas/__/nges 'byung snying rje bral ba'i rang rgyud la bltas pas/__/skyo shas bzod med skyes te ma bcos kyi thol glu/__/gang shar rdo rje'i glu yi dkor mdzod nas blangs so/__/rang gzhan 'gro kun thar pa bsgrub pa la 'dug nas/__/tshe gcig mchog gi go 'phang thob pa ru shog cig__/__!