JKW-KABUM-22-ZA-012-064

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 12, sde tshan 64, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

གཏད་མེད་གྲུབ་པའི་རྡོ་རྗེའི་ཐོལ་གླུ་ཟུང་འཇུག་རོལ་གར། གཏད་མེད་གྲུབ་པའི་རྡོ་རྗེའི་ཐོལ་གླུ་ཟུང་འཇུག་རོལ་གར་ཞེས་བྱ་བ། ཨེ་མ་ཧོ། ཚོགས་བརྒྱད་དབུ་མར་ཐིམ་པ་ཡི་རིག་གདངས། །ལྷོ་ནུབ་སྲིན་ཡུལ་ཟངས་མདོག་གི་དཔལ་རི། །སྐུ་གསུམ་རིགས་འདུས་བདེ་ཆེན་གྱི་གྲོང་ནས། །འཆི་མེད་རིགས་འདུས་མཚོ་སྐྱེས་ཀྱི་རྡོ་རྗེ། །དཔའ་བོ་ཌཱ་ཀིའི་ཚོམ་བུ་ཡིས་བསྐོར་བའི། །དག་པའི་ཞིང་ཁམས་རབ་འབྱམས་དེ་མཁྱེན་ནོ། །བླུན་རྨོངས་བདག་ལ་ཐུགས་རྗེ་ཡིས་གཟིགས་མཛོད། །སྣང་སྟོང་དབྱེར་མེད་རྡོ་རྗེ་ཡི་བྲོ་གར། །ཟུང་འཇུག་སྒྱུ་མའི་མཆོད་སྤྲིན་དུ་སྤྲོའོ། །ཕུང་ཁམས་སྐྱེ་མཆེད་འདུས་བྱས་ཀྱི་གྲོང་ཁྱེར། །གདན་གསུམ་ཞི་ཁྲོའི་བྲོ་གར་དུ་རོལ་པས། །ཀུན་བརྟགས་སྣང་བའི་བདེན་ཞེན་ཀུན་ཟད་ནས། །རིག་འཛིན་བཞི་ཡི་གསང་ལམ་དུ་ཆས་འགྲོ། །འགྲོ་འོང་རླུང་ཁམས་ཉི་ཁྲི་དང་ཆིག་སྟོང་། །ཁ་སྦྱོར་གསལ་སྟོང་བྲོ་གར་དུ་རོལ་པས། །ཐ་མལ་ཉོན་མོངས་འཁྲུལ་ཆོས་ཀུན་ཟད་ནས། །ཛ་ལནྡྷ་རའི་དགའ་ཚལ་དུ་ཆས་འགྲོ། །སྣ་ཚོགས་འཁྲུལ་པའི་གང་ཤར་གྱི་རྟོག་པ། །ཤར་གྲོལ་དུས་མཉམ་བྲོ་གར་ལ་རོལ་པས། །མ་རིག་གཟུང་འཛིན་འཁྲུལ་ཆོས་ཀུན་ཟད་ནས། །འོད་གསལ་ཆོས་སྐུའི་དཀྱིལ་འཁོར་དུ་ཆས་འགྲོ། །དབྱིངས་རིག་དབྱེར་མེད་ལུག་རྒྱུད་ཀྱི་ཐིག་ལེ། །སྣང་བཞི་གོང་འཕེལ་བྲོ་གར་དུ་རོལ་པས། །གདོས་བཅས་འབྱུང་བའི་ཞེན་པ་ཀུན་ཟད་ནས། །ཆོས་ཟད་བློ་འདས་ཕོ་བྲང་དུ་ཆས་འགྲོ། །སྔོན་སྨོན་དུས་སུ་སྨིན་པ་ཡི་རྣལ་འབྱོར། །སྐྱོ་ཤས་ངེས་འབྱུང་བྲོ་གར་ལ་རོལ་པས། །རེ་དོགས་མཐུན་འཇུག་དགག་སྒྲུབ་ཀུན་ཟད་ནས། །རི་ཁྲོད་དབེན་པར་ཏིང་འཛིན་ལ་ཆས་འགྲོ། །མདོ་མེད་ཤེས་བཞིན་དྲེད་པོ་ཡི་སྐལ་ངན། །སྣ་ཚོགས་ཆོས་བརྒྱད་བྲོ་གར་ལ་རོལ་པས། །དད་དང་མོས་གུས་བླང་དོར་ཀུན་ཟད་ནས། །ཐར་མེད་དམྱལ་བའི་གཏིང་རྡོ་རུ་ཆས་འགྲོ། །དེ་སྐད་ངེས་དོན་རྣལ་འབྱོར་གྱི་བྲོ་གར། །རིག་འཛིན་ཌཱ་ཀིར་མཆོད་དབྱངས་སུ་འབུལ་ལོ། །རང་རྒྱུད་རེངས་པའི་སྙིང་རྗེ་ཡི་སྐྱོ་གླུས། །ལེ་ལོ་སྙོམ་ལས་སེལ་བ་རུ་ཤོག་ཅིག །རྒྱལ་ཀུན་འདུས་ཞལ་དྲིན་ཆེན་གྱི་བླ་མ། །རྟག་ཏུ་མོས་པས་སྤྱི་གཙུག་ཏུ་བསྒོམས་ཏེ། །དད་གུས་བཟོད་མེད་བྲོ་གར་ལ་རོལ་ནས། །ཚུལ་བཞིན་དམ་པའི་སྤྱོད་ཚུལ་ལ་འཇུག་ཤོག ། ༈

[edit]

gtad med grub pa'i rdo rje'i thol glu zung 'jug rol gar/__ gtad med grub pa'i rdo rje'i thol glu zung 'jug rol gar zhes bya ba/__e ma ho/__tshogs brgyad dbu mar thim pa yi rig gdangs/__/lho nub srin yul zangs mdog gi dpal ri/__/sku gsum rigs 'dus bde chen gyi grong nas/__/'chi med rigs 'dus mtsho skyes kyi rdo rje/__/dpa' bo DA ki'i tshom bu yis bskor ba'i/__/dag pa'i zhing khams rab 'byams de mkhyen no/__/blun rmongs bdag la thugs rje yis gzigs mdzod/__/snang stong dbyer med rdo rje yi bro gar/__/zung 'jug sgyu ma'i mchod sprin du spro'o/__/phung khams skye mched 'dus byas kyi grong khyer/__/gdan gsum zhi khro'i bro gar du rol pas/__/kun brtags snang ba'i bden zhen kun zad nas/__/rig 'dzin bzhi yi gsang lam du chas 'gro/__/'gro 'ong rlung khams nyi khri dang chig stong /__/kha sbyor gsal stong bro gar du rol pas/__/tha mal nyon mongs 'khrul chos kun zad nas/__/dza lan+d+ha ra'i dga' tshal du chas 'gro/__/sna tshogs 'khrul pa'i gang shar gyi rtog pa/__/shar grol dus mnyam bro gar la rol pas/__/ma rig gzung 'dzin 'khrul chos kun zad nas/__/'od gsal chos sku'i dkyil 'khor du chas 'gro/__/dbyings rig dbyer med lug rgyud kyi thig le/__/snang bzhi gong 'phel bro gar du rol pas/__/gdos bcas 'byung ba'i zhen pa kun zad nas/__/chos zad blo 'das pho brang du chas 'gro/__/sngon smon dus su smin pa yi rnal 'byor/__/skyo shas nges 'byung bro gar la rol pas/__/re dogs mthun 'jug dgag sgrub kun zad nas/__/ri khrod dben par ting 'dzin la chas 'gro/__/mdo med shes bzhin dred po yi skal ngan/__/sna tshogs chos brgyad bro gar la rol pas/__/dad dang mos gus blang dor kun zad nas/__/thar med dmyal ba'i gting rdo ru chas 'gro/__/de skad nges don rnal 'byor gyi bro gar/__/rig 'dzin DA kir mchod dbyangs su 'bul lo/__/rang rgyud rengs pa'i snying rje yi skyo glus/__/le lo snyom las sel ba ru shog cig__/rgyal kun 'dus zhal drin chen gyi bla ma/__/rtag tu mos pas spyi gtsug tu bsgoms te/__/dad gus bzod med bro gar la rol nas/__/tshul bzhin dam pa'i spyod tshul la 'jug shog__/__!_