JKW-KABUM-22-ZA-012-002

Previous Section Back to Volume PageNext Section

Wylie title		page=1
Location	mkhyen brtse'i bka' 'bum Volume 12, sde tshan 2, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

ཁྱབ་བདག་དཔལ་ལྡན་བླ་མ་རྗེས་སུ་དྲན་པའི་རྡོ་རྗེའི་ཐོལ་གླུ་ངེས་འབྱུང་གི་ཕོ་ཉ། ཁྱབ་བདག་དཔལ་ལྡན་བླ་མ་རྗེས་སུ་དྲན་པའི་རྡོ་རྗེའི་ཐོལ་གླུ་ངེས་འབྱུང་གི་ཕོ་ཉ་ཞེས་བྱ་བ། །ཨ་ཧོ། གདོད་ནས་སྤྲོས་པ་བྲལ་བའི་རང་བྱུང་གི་ཡེ་ཤེས། །བསལ་བཞག་བློ་ལས་འདས་པའི་འོད་གསལ་གྱི་སྦུབས་སུ། །བཅིངས་གྲོལ་ཆོས་ཀུན་ཟད་པའི་དཔལ་ལྡན་གྱི་བླ་མར། །ངང་བཞག་རང་གྲོལ་ངང་ནས་གུས་ཕྱག་ཞིག་འཚལ་ལོ། །ཟུང་འཇུག་བདེ་དང་སྟོང་པའི་ཐིག་ལེ་ཡི་གར་མཁན། །ཁ་སྦྱོར་མཚན་དཔེའི་ལང་ཚོ་མངོན་ཤར་གྱི་སྣང་ཆས། །མི་ཤིགས་ཧེ་རུ་ཀ་དངོས་དཔལ་ལྡན་གྱི་བླ་མར། །རླུང་སེམས་རྟོག་བྲལ་ངང་ནས་གུས་ཕྱག་ཞིག་འཚལ་ལོ། །སྲིད་གསུམ་ཟ་བྱེད་རྡོ་རྗེ་བཙུན་མོ་ཡི་མེ་ལྕེ། །ཨ་ཧཾ་ཟུང་འཇུག་འཁོར་ལྔའི་གྲོང་ཁྱེར་དུ་སྦར་བས། །འབར་འཛག་སྙོམས་འཇུག་སྤྲིན་སྤྲོ་དཔལ་ལྡན་གྱི་བླ་མར། །ཞུ་བདེ་ལྷན་སྐྱེས་ངང་ནས་གུས་ཕྱག་ཞིག་འཚལ་ལོ། །ཨ་ཧོ། སྙིགས་མའི་སྤྱོད་ཚུལ་ཡལ་གའི་རི་དྭགས་ཀྱི་ཟློས་གར། །སྣ་ཚོགས་ཟིན་མེད་གློག་གི་རྩེ་དགའ་ལྟར་མཐོང་ནས། །རང་ཕུང་གཞན་མགོ་བསྐོར་བའི་བཅའ་བསྒྲིགས་ཀུན་བོར་བར། །ཁྱབ་བདག་དཔལ་ལྡན་བླ་མས་བྱིན་གྱིས་རང་རློབས་ཤིག །ཕན་སྨྲས་ལོག་པར་བལྟ་བའི་ཉེ་དུ་དང་འབྲེལ་འཁོར། །གནོད་སྦྱོར་དགའ་བར་འགྱུར་བའི་ཅོལ་ཆུང་གི་སྐྱེས་བུ། །སྦྲུལ་གདུག་བསིལ་གཡབ་ལྟ་བུའི་གཉེན་བཤེས་ཀུན་སྤངས་པར། །ཁྱབ་བདག་དཔལ་ལྡན་བླ་མས་བྱིན་གྱིས་རང་རློབས་ཤིག །ཐ་སྙད་ཤེས་བྱའི་གནས་ནི་ནམ་མཁའ་ལྟར་ཡངས་ཤིང་། །དོན་དམ་རིག་སྟོང་རྗེན་པ་ཆུ་གཏེར་ལྟར་ཟབ་པས། །མཁས་གྲུབ་གཉིས་དང་ལྡན་པ་ཉིན་སྐར་ལས་དཀོན་ཕྱིར། །ལྟོ་དང་གྲགས་ཕྱིར་འབྲང་བར་དགོས་དོན་ནི་མི་འདུག །དབེན་གནས་བྱང་ཆུབ་ཤིང་ཁྲོད་ངེས་འབྱུང་གི་ཁང་བཟང་། །བསམ་གཏན་གྲུབ་པའི་དྲང་སྲོང་རྒན་པོ་ཡི་གནས་མལ། །རི་དྭགས་གཞོན་ནུའི་ཟློས་གར་སྐྱོ་གྲོགས་སུ་ཕེབས་པར། །རྩེ་གཅིག་སྒྲུབ་ལ་གཞོལ་བར་བྱིན་གྱིས་རང་རློབས་ཤིག །འབྲེལ་དང་དགྲ་གཉེན་འགྱུར་ལྡོག་དབྱར་སྤྲིན་ལས་མྱུར་བའི། །ངེས་མེད་གར་མཁན་ལག་པའི་གཉེན་ལྕུག་ལ་བལྟས་པས། །ཁྱིམ་ནས་ཁྱིམ་མེད་རབ་བྱུང་ངེས་འབྱུང་གི་བསམ་པས། །ཚུལ་ཁྲིམས་དོན་དུ་འགྱུར་བར་བྱིན་གྱིས་རང་རློབས་ཤིག །གཞན་ལ་སྨན་པར་འདོད་པའི་བསམ་པ་དང་བྲལ་ཡང་། །རང་གི་འདོད་པ་སྒྲུབ་སླབ་གཞན་དོན་དུ་བསྙད་པའི། །ངང་ཚུལ་ཀུན་ལ་ཡིད་འབྱུང་བློ་རྟག་ཏུ་སྐྱེས་ནས། །བཅོས་མིན་བྱང་སེམས་འབྱོངས་པར་བྱིན་གྱིས་རང་རློབས་ཤིག །མངོན་ཞེན་མཚན་འཛིན་མ་སྤངས་ཐེར་ཟུག་གི་བསྐྱེད་རྫོགས། །སྡུག་ཡུས་སྒྲུབ་པར་འདྲེན་པའི་རང་བཞིན་དུ་མཐོང་ནས། །རྩེ་གཅིག་བརྩོན་པ་དྲག་པོས་རིག་སྟོང་གི་ཡེ་ཤེས། །གཉུག་མ་བརྡར་ཤ་ཆོད་པར་བྱིན་གྱིས་རང་རློབས་ཤིག །དོ་ནུབ་ཙམ་ཡང་འཆི་བདག་ཕོ་ཉ་ཡིས་བཏབ་སྟེ། །སང་ནས་རོ་ལ་ལིང་གིས་སོང་བ་དེ་མཐོང་བས། །འབད་པ་ཐམས་ཅད་དོན་མེད་འཁྲུལ་པ་རུ་གོ་ནས། །མྱུར་དུ་སྙིང་པོ་ལེན་བར་བྱིན་གྱིས་རང་རློབས་ཤིག །དེ་མཐུས་འགྱུར་བཅས་བློ་ཡི་ཆོས་ཉིད་ཀུན་ཟད་པའི། །ཡོངས་གྲུབ་དོན་དམ་བདེན་པའི་རང་ཞལ་ཉིད་མཐོང་སྟེ། །སྤང་བླང་བྲལ་ཐོབ་མེད་པའི་དབུ་མ་ཡི་སྦུབས་སུ། །ས་ལམ་གཅིག་ཅར་རྫོགས་པར་བྱིན་གྱིས་རང་རློབས་ཤིག །དེ་སྐད་རིགས་ཀུན་ཁྱབ་བདག་འཁོར་ལོ་ཡི་མགོན་པོ། །ངང་བཞག་འོད་གསལ་རྡོ་རྗེའི་ཕོ་བྲང་དུ་མཇལ་ཚེ། །བཟོད་མེད་མོས་གུས་དྲག་པོའི་ཕོ་ཉ་ཡིས་བསྐུལ་ནས། །གང་ཤར་སྨོན་པའི་ཚིག་འདི་ཐོལ་བྱུང་དུ་ཐལ་ལོ། །ཞེས་པའང་རིག་འཛིན་གྱི་བཙུན་པ་པདྨ་དགྱེས་པའི་སྡེས་གྲུབ་པ་མཆོག་གི་བསྟི་གནས་སེང་གེ་གནམ་རྫོང་དུ་གྲགས་པའི་འདབས་རོལ་དུ་སྐད་ཅིག་ལ་བརྗོད་པའོ།། །། ༈

[edit]

khyab bdag dpal ldan bla ma rjes su dran pa'i rdo rje'i thol glu nges 'byung gi pho nya/ khyab bdag dpal ldan bla ma rjes su dran pa'i rdo rje'i thol glu nges 'byung gi pho nya zhes bya ba/__/a ho/__gdod nas spros pa bral ba'i rang byung gi ye shes/__/bsal bzhag blo las 'das pa'i 'od gsal gyi sbubs su/__/bcings grol chos kun zad pa'i dpal ldan gyi bla mar/__/ngang bzhag rang grol ngang nas gus phyag zhig 'tshal lo/__/zung 'jug bde dang stong pa'i thig le yi gar mkhan/__/kha sbyor mtshan dpe'i lang tsho mngon shar gyi snang chas/__/mi shigs he ru ka dngos dpal ldan gyi bla mar/__/rlung sems rtog bral ngang nas gus phyag zhig 'tshal lo/__/srid gsum za byed rdo rje btsun mo yi me lce/__/a haM zung 'jug 'khor lnga'i grong khyer du sbar bas/__/'bar 'dzag snyoms 'jug sprin spro dpal ldan gyi bla mar/_/zhu bde lhan skyes ngang nas gus phyag zhig 'tshal lo/__/a ho/__snyigs ma'i spyod tshul yal ga'i ri dwags kyi zlos gar/__/sna tshogs zin med glog gi rtse dga' ltar mthong nas/__/rang phung gzhan mgo bskor ba'i bca' bsgrigs kun bor bar/__/khyab bdag dpal ldan bla mas byin gyis rang rlobs shig__/phan smras log par blta ba'i nye du dang 'brel 'khor/__/gnod sbyor dga' bar 'gyur ba'i col chung gi skyes bu/__/sbrul gdug bsil g.yab lta bu'i gnyen bshes kun spangs par/__/khyab bdag dpal ldan bla mas byin gyis rang rlobs shig__/tha snyad shes bya'i gnas ni nam mkha' ltar yangs shing /__/don dam rig stong rjen pa chu gter ltar zab pas/__/mkhas grub gnyis dang ldan pa nyin skar las dkon phyir/__/lto dang grags phyir 'brang bar dgos don ni mi 'dug__/dben gnas byang chub shing khrod nges 'byung gi khang bzang /__/bsam gtan grub pa'i drang srong rgan po yi gnas mal/__/ri dwags gzhon nu'i zlos gar skyo grogs su phebs par/__/rtse gcig sgrub la gzhol bar byin gyis rang rlobs shig__/'brel dang dgra gnyen 'gyur ldog dbyar sprin las myur ba'i/__/nges med gar mkhan lag pa'i gnyen lcug la bltas pas/__/khyim nas khyim med rab byung nges 'byung gi bsam pas/__/tshul khrims don du 'gyur bar byin gyis rang rlobs shig__/gzhan la sman par 'dod pa'i bsam pa dang bral yang /__/rang gi 'dod pa sgrub slab gzhan don du bsnyad pa'i/__/ngang tshul kun la yid 'byung blo rtag tu skyes nas/__/bcos min byang sems 'byongs par byin gyis rang rlobs shig__/mngon zhen mtshan 'dzin ma spangs ther zug gi bskyed rdzogs/__/sdug yus sgrub par 'dren pa'i rang bzhin du mthong nas/__/rtse gcig brtson pa drag pos rig stong gi ye shes/__/gnyug ma brdar sha chod par byin gyis rang rlobs shig__/do nub tsam yang 'chi bdag pho nya yis btab ste/__/sang nas ro la ling gis song ba de mthong bas/__/'bad pa thams cad don med 'khrul pa ru go nas/__/myur du snying po len bar byin gyis rang rlobs shig__/de mthus 'gyur bcas blo yi chos nyid kun zad pa'i/_/yongs grub don dam bden pa'i rang zhal nyid mthong ste/__/spang blang bral thob med pa'i dbu ma yi sbubs su/__/sa lam gcig car rdzogs par byin gyis rang rlobs shig__/de skad rigs kun khyab bdag 'khor lo yi mgon po/__/ngang bzhag 'od gsal rdo rje'i pho brang du mjal tshe/__/bzod med mos gus drag po'i pho nya yis bskul nas/__/gang shar smon pa'i tshig 'di thol byung du thal lo/__/zhes pa'ang rig 'dzin gyi btsun pa pad+ma dgyes pa'i sdes grub pa mchog gi bsti gnas seng ge gnam rdzong du grags pa'i 'dabs rol du skad cig la brjod pa'o//____//__!