JKW-KABUM-21-ZHA-003-005

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 3, sde tshan 5, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

འོད་དཔག་མེད་ཀྱི་ཉལ་སྒོམ། སྣང་བ་མཐའ་ཡས་ཀྱི་ཉལ་སྒོམ་ཤིན་ཏུ་བསྡུས་པ་བཞུགས་སོ།། །།ཨོཾ་སྭསྟི། འཕགས་པ་བཟང་པོ་སྤྱོད་པའི་སྨོན་ལམ་གྱི་དགོངས་པ། གྲུབ་ཆེན་ཛེ་ཏཱ་རིའི་མན་ངག་སྣང་བ་མཐའ་ཡས་ཀྱི་ཉལ་སྒོམ་ཉམས་སུ་ལེན་པར་འདོད་ན་སྐྱབས་སེམས་ཇི་ལྟར་རིགས་པ་དང་། ས་ཕྱོགས་ཐམས་ཅད་བདེ་ཅན་ཞིང་། །བཀོད་པ་ཕུན་སུམ་ཚོགས་པའི་དབུས། །རང་ཉིད་འཕགས་པ་སྤྱན་རས་གཟིགས། །མདུན་དུ་པདྨ་ཟླ་བའི་སྟེང་། །སྣང་བ་མཐའ་ཡས་སྐུ་མདོག་དམར། །མཉམ་གཞག་བདུད་རྩིའི་ལྷུང་བཟེད་བསྣམས། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །དར་དང་རིན་ཆེན་རྒྱན་གྱིས་བརྒྱན། །དེ་མཐར་རྩ་བརྒྱུད་བླ་མ་དང་། །སངས་རྒྱས་བྱང་སེམས་ཚོགས་ཀྱིས་བསྐོར། །མངོན་སུམ་བཞིན་དུ་བཞུགས་པར་གྱུར། །ཅེས་གསལ་ལ་ཡིད་ཀྱིས་ཕྱག་གསུམ་བཙལ་ལ་བཟང་སྤྱོད་ལས་འབྱུང་བ་སོགས་ཡན་ལག་བདུན་པ་རྒྱས་བསྡུས་གང་རིགས་ཚར་གསུམ་བྱ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་མེད་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །བདག་སྡིག་པ་དང་སྒྲིབ་པ་ཐམས་ཅད་བྱང་ཞིང་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེས་ནས་མྱུར་དུ་བྱང་ཆུབ་ཏུ་ལུང་བསྟན་པ་ཐོབ་པར་མཛད་དུ་གསོལ། ལན་གསུམ་གྱིས་གསོལ་བ་བཏབ་པས་སྡིག་སྒྲིབ་ཐམས་ཅད་དག་པའི་ངེས་ཤེས་བསྐྱེད། ལུས་ལོངས་སྤྱོད་ཉེ་དུ་སོགས་ལ་ཆགས་ཞེན་སྤང་། ཤི་ནས་བདེ་བ་ཅན་དུ་འགྲོ་བའི་འདུན་པ་དང་སྤྲོ་བ་ཤུགས་དྲག་ཏུ་བསྐྱེད་ལ་འཆི་བས་མི་འཇིགས་པའི་གདེང་བསྐྱེད། དེ་ནས། དབུགས་ཕྱིར་རྒྱུ་དང་ལྷན་ཅིག་ཏུ། རང་སེམས་རྒྱལ་བའི་ཐུགས་ཀར་ཐིམ། །ནང་དུ་འཇུག་པའི་དུས་ཀྱི་ཚེ། །རྒྱལ་བའི་ཐུགས་ནས་རང་གི་སེམས། །འོད་ཀྱི་རྣམས་པ་སྙིང་གར་ཐིམ། །རྒྱལ་བའི་ཐུགས་དང་རང་གི་སེམས། །དབྱེར་མེད་རོ་གཅིག་ངང་དུ་བཞག །ཅེས་བརྗོད་པའི་དོན་བསམས་ལ་དམིགས་པ་གསལ་ངེས་པ་ལན་གསུམ་སོགས་བྱ། མདུན་གྱི་ཚོགས་ཞིང་འོད་དུ་ཞུ། །སྣང་བ་མཐའ་ཡས་ཉིད་ལ་ཐིམ། །དེ་ཡང་རང་ཐིམ་བདག་ཉིད་ཀྱང་། །འོད་ཞུ་སྤྲོས་བྲལ་དབྱིངས་སུ་ཐིམ། །ཞེས་བརྗོད་ཅིང་། སངས་རྒྱས་ཡི་དམ་རང་སེམས་གསུམ་དབྱེར་མེད་དུ་འདྲེས་པའི་ངང་ལ་བཞག །སླར་ཡང་རང་ཉིད་སྐད་ཅིག་གིས། །སྣང་བ་མཐའ་ཡས་སྐུ་རུ་གྱུར། །ཞེས་དང་། རྒྱས་པར་བཟང་སྤྱོད་སྨོན་ལམ་ཚང་བའམ། མི་ནུས་ན། རྒྱལ་བའི་དཀྱིལ་འཁོར་བཟང་ཞིང་སོགས་སྨོན་ལམ་གདབ་ནས། བདེ་བ་ཅན་གྱི་ཞིང་ཁམས་ཡིད་ལ་བྱེད་པ་དང་མི་འབྲལ་བའི་ངང་ནས་གཉིད་ལོག་པར་བྱའོ། །དེ་ལྟར་མ་ཆགས་པར་བསྒོམས་པའི་ཕན་ཡོན་ནི། དེ་ལ་ནད་དང་གདོན་མི་འབྱུང་། །འཆི་བའི་དུས་ན་སྡུག་བསྔལ་མེད། །བར་དོར་ཐུབ་པས་རྗེས་སུ་འཛིན། །ཕྱི་མའི་དུས་ན་ཐར་པ་ཐོབ། །ཅེས་གསུངས་སོ། །ཞེས་པའང་མཉྫུ་གྷོ་ཥཱས་སོ། །ཤུ བྷཾ།། །། ༈

[edit]

'od dpag med kyi nyal sgom/__ snang ba mtha' yas kyi nyal sgom shin tu bsdus pa bzhugs so//__//oM swasti/__'phags pa bzang po spyod pa'i smon lam gyi dgongs pa/__grub chen dze tA ri'i man ngag snang ba mtha' yas kyi nyal sgom nyams su len par 'dod na skyabs sems ji ltar rigs pa dang /__sa phyogs thams cad bde can zhing /__/bkod pa phun sum tshogs pa'i dbus/__/rang nyid 'phags pa spyan ras gzigs/__/mdun du pad+ma zla ba'i steng /__/snang ba mtha' yas sku mdog dmar/__/mnyam gzhag bdud rtsi'i lhung bzed bsnams/__/zhabs gnyis rdo rje'i skyil krung bzhugs/__/dar dang rin chen rgyan gyis brgyan/__/de mthar rtsa brgyud bla ma dang /__/sangs rgyas byang sems tshogs kyis bskor/__/mngon sum bzhin du bzhugs par gyur/__/ces gsal la yid kyis phyag gsum btsal la bzang spyod las 'byung ba sogs yan lag bdun pa rgyas bsdus gang rigs tshar gsum bya/__bcom ldan 'das de bzhin gshegs pa dgra bcom pa yang dag par rdzogs pa'i sangs rgyas mgon po 'od dpag med la phyag 'tshal lo/__/mchod do/__/skyabs su mchi'o/__/bdag sdig pa dang sgrib pa thams cad byang zhing bde ba can gyi 'jig rten gyi khams su skyes nas myur du byang chub tu lung bstan pa thob par mdzad du gsol/__lan gsum gyis gsol ba btab pas sdig sgrib thams cad dag pa'i nges shes bskyed/__lus longs spyod nye du sogs la chags zhen spang /__shi nas bde ba can du 'gro ba'i 'dun pa dang spro ba shugs drag tu bskyed la 'chi bas mi 'jigs pa'i gdeng bskyed/__de nas/__dbugs phyir rgyu dang lhan cig tu/__rang sems rgyal ba'i thugs kar thim/__/nang du 'jug pa'i dus kyi tshe/__/rgyal ba'i thugs nas rang gi sems/__/'od kyi rnams pa snying gar thim/__/rgyal ba'i thugs dang rang gi sems/__/dbyer med ro gcig ngang du bzhag__/ces brjod pa'i don bsams la dmigs pa gsal nges pa lan gsum sogs bya/__mdun gyi tshogs zhing 'od du zhu/__/snang ba mtha' yas nyid la thim/__/de yang rang thim bdag nyid kyang /__/'od zhu spros bral dbyings su thim/__/zhes brjod cing /__sangs rgyas yi dam rang sems gsum dbyer med du 'dres pa'i ngang la bzhag__/slar yang rang nyid skad cig gis/__/snang ba mtha' yas sku ru gyur/__/zhes dang /__rgyas par bzang spyod smon lam tshang ba'am/__mi nus na/__rgyal ba'i dkyil 'khor bzang zhing sogs smon lam gdab nas/__bde ba can gyi zhing khams yid la byed pa dang mi 'bral ba'i ngang nas gnyid log par bya'o/__/de ltar ma chags par bsgoms pa'i phan yon ni/__de la nad dang gdon mi 'byung /__/'chi ba'i dus na sdug bsngal med/__/bar dor thub pas rjes su 'dzin/__/phyi ma'i dus na thar pa thob/__/ces gsungs so/__/zhes pa'ang many+dzu g+ho ShAs so/__/shu_b+haM//___//__!_