JKW-KABUM-23-'A-001-060

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 60, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

འཇིགས་མེད་གདོད་ནས་རྣམ་དག་ཅེས་པ་རྗེ་ཉིད་ཀྱི་ཨ་ནེ་ཨོ་རྒྱན་ཆོས་མཚོར་གནང་བ། སེམས་རིག་ཤན་འབྱེད་ཡིད་དཔྱོད་རང་གྲོལ་ཞེས་བྱ་བ། ཟག་པའི་ཆ་བཅས་ངོ་བོས་རབ་སྤངས་ཤིང་། །མྱང་འདས་ཡོན་ཏན་ལྷུན་གྱིས་གྲུབ་པ་ཅན། །མཉམ་རྗེས་མཐའ་གྲོལ་ཁོར་ཡུག་འོད་གསལ་ངང་། །འཛིན་མེད་བདེ་བ་ཆེན་པོས་ཕྱག་བགྱིའོ། །གཟོད་མ་ཉིད་ནས་བློ་ཡིས་མ་རེག་པའི། །དོན་དམ་བདེན་པ་མངོན་དུ་རྟོགས་པའི་ཚེ། །གཞན་དབང་འཁོར་བཅས་ཡོངས་སུ་ཟད་པའི་ཕྱིར། །སེམས་ལས་འདས་པའི་རིག་པ་མཁྱེན་པར་མཛོད། །དེ་ཡང་ཟབ་གསང་རྡོ་རྗེ་རྩེ་མོ་ཡི། །རྒྱུད་ཀྱི་རྡོ་རྗེའི་གནས་ཀྱི་ལུང་རྣམས་ལ། །རྡོ་རྗེའི་མིག་གིས་ལེགས་པར་བརྟགས་པའི་ཚེ། །མི་ཕྱེད་རྡོ་རྗེའི་རིགས་ལ་ངེས་པ་རྙེད། །སེམས་ནི་བྱུང་ཚོར་འགྲོ་འོང་དང་བཅས་ཤིང་། །ཕྱི་རོལ་ཡུལ་གྱི་རྣམ་ཆ་དང་འདྲེས་པས། །དེ་ཡིས་དེ་ལ་དཔྱད་པར་བཟོད་པའི་ཕྱིར། །བློ་ཡི་མདུན་ན་ཡོངས་སུ་གནས་པ་ཡིན། །རིག་པ་དྭངས་ཤིང་ཡུལ་མེད་ཀུན་ཏུ་གསལ། །ཐིམ་ལ་མ་རྨུགས་རྟག་ཆད་འཇུག་ལྡང་བྲལ། །བསམ་པའི་ཆོས་ཀྱིས་ཐ་དད་དབྱེར་མེད་ཕྱིར། །སོ་སོར་རྟོག་པའི་ཤེས་པས་དབང་དུ་འགྱུར། །ཁྱད་པར་ཡེ་ཤེས་སྐུ་ཅན་བླ་མ་ཡིས། །རྡོ་རྗེ་ཡེ་ཤེས་འཕོ་བའི་དབང་བསྐུར་གྱིས། །མངོན་སུམ་ཅར་ཕོག་ཉིད་དུ་ངོ་སྤྲད་པས། །སེམས་བྲལ་རིག་པ་རྗེན་པའི་དེ་ཉིད་མཐོང་། །རྣམ་པ་ཀུན་ཏུ་ལུས་སེམས་ཁོང་ལྷོད་ལ། །ཕྱི་རོལ་ནམ་མཁའི་ཁམས་སུ་ཤེས་པ་གཏད། །འདྲེན་བྱེད་གཡོ་མེད་ཧར་རེ་བཞག་པ་ཡིས། །ལམ་དུས་རིག་པའི་དྭངས་མ་ལྷུག་པར་འཆར། །དེ་ལྟར་མཐོང་བའི་ཉམས་སུ་མྱོང་བ་དེ། །བློ་དང་མིག་གི་རྣམ་འགྱུར་ཁོ་ན་ལ། །ལྟོས་མིན་རྟག་པར་ལམ་ཁྱེར་འབད་པ་ལས། །འདུ་འབྲལ་མེད་པའི་སངས་རྒྱས་ད་ལྟ་བརྙེས། །འདི་ནི་ཤིན་ཏུ་གསང་བའི་ཟབ་དོན་ཏེ། །སྙིང་ལ་ཕྱག་རྒྱས་བཏབ་པར་འོས་ན་ཡང་། །སྐལ་བཟང་རྣམ་དཔྱོད་ཅན་གྱི་བགོ་སྐལ་དུ། །དྲི་མེད་རིག་པའི་རྡོ་རྗེས་ཡུད་ལ་བསྟན། ། ༈

[edit]

'jigs med gdod nas rnam dag ces pa rje nyid kyi a ne o rgyan chos mtshor gnang ba/__ sems rig shan 'byed yid dpyod rang grol zhes bya ba/__zag pa'i cha bcas ngo bos rab spangs shing /__/myang 'das yon tan lhun gyis grub pa can/__/mnyam rjes mtha' grol khor yug 'od gsal ngang /__/'dzin med bde ba chen pos phyag bgyi'o/__/gzod ma nyid nas blo yis ma reg pa'i/__/don dam bden pa mngon du rtogs pa'i tshe/__/gzhan dbang 'khor bcas yongs su zad pa'i phyir/__/sems las 'das pa'i rig pa mkhyen par mdzod/__/de yang zab gsang rdo rje rtse mo yi/__/rgyud kyi rdo rje'i gnas kyi lung rnams la/__/rdo rje'i mig gis legs par brtags pa'i tshe/__/mi phyed rdo rje'i rigs la nges pa rnyed/__/sems ni byung tshor 'gro 'ong dang bcas shing /__/phyi rol yul gyi rnam cha dang 'dres pas/__/de yis de la dpyad par bzod pa'i phyir/__/blo yi mdun na yongs su gnas pa yin/__/rig pa dwangs shing yul med kun tu gsal/__/thim la ma rmugs rtag chad 'jug ldang bral/__/bsam pa'i chos kyis tha dad dbyer med phyir/__/so sor rtog pa'i shes pas dbang du 'gyur/__/khyad par ye shes sku can bla ma yis/__/rdo rje ye shes 'pho ba'i dbang bskur gyis/__/mngon sum car phog nyid du ngo sprad pas/__/sems bral rig pa rjen pa'i de nyid mthong /__/rnam pa kun tu lus sems khong lhod la/_/phyi rol nam mkha'i khams su shes pa gtad/__/'dren byed g.yo med har re bzhag pa yis/__/lam dus rig pa'i dwangs ma lhug par 'char/__/de ltar mthong ba'i nyams su myong ba de/__/blo dang mig gi rnam 'gyur kho na la/__/ltos min rtag par lam khyer 'bad pa las/__/'du 'bral med pa'i sangs rgyas da lta brnyes/__/'di ni shin tu gsang ba'i zab don te/__/snying la phyag rgyas btab par 'os na yang /__/skal bzang rnam dpyod can gyi bgo skal du/__/dri med rig pa'i rdo rjes yud la bstan/___/__!__