JKW-KABUM-23-'A-003-003

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 3, sde tshan 3, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

ཟབ་ལམ་སྙིང་པོར་དྲིལ་བའི་གཏམ། ཨོཾ་སྭ་སྟི་སིདྡྷཾ། རིགས་ཀུན་ཁྱབ་བདག་བླ་མ་ལ། །རྩེ་གཅིག་གུས་པས་ཕྱག་བཙལ་ནས། །ཟབ་ལམ་སྙིང་པོར་དྲིལ་བའི་གཏམ། །དད་ལྡན་ཉམས་ལེན་གསོས་སུ་སྦྱིན། །རང་རེ་རྣམས་ཀྱིས་རྙེད་པ་ཡི། །དལ་བརྒྱད་འབྱོར་བཅུ་ལྡན་པའི་ལུས། །འདི་འདྲ་རྙེད་དཀའ་དོན་ཆེ་བས། །སྙིང་པོ་ལེན་པའི་ཐབས་ལ་འབད། །དེ་ཡང་ངེས་པར་འཆི་བ་དང་། །ནམ་འཆི་ཆ་མེད་འཆི་བའི་ཚེ། །ཆོས་མིན་གང་གིས་མི་ཕན་པས། །དམ་ཆོས་མྱུར་དུ་བརྩོན་པས་བསྒྲུབ། །འཆི་བའི་འོག་ཏུ་དཀར་ནག་ལས། ཁོ་ནའི་རྗེས་སུ་འབྲང་བས་ན། །དགེ་སྒྲུབ་སྡིག་སྤང་དམ་བཅའ་ནི། །རྟག་ཏུ་སྙིང་ལ་རི་མོ་བྲིས། །འཁོར་བའི་གནས་རིས་གར་སྐྱེས་ཀྱང་། །སྡུག་བསྔལ་བསམ་གྱིས་མི་ཁྱབ་པས། །དེ་ལས་རང་གཞན་སེམས་ཅན་ཀུན། །མྱུར་དུ་ཐར་བར་འདོད་པའི་བློས། །དཀོན་མཆོག་གསུམ་ལ་སྐྱབས་འགྲོ་ཞིང་། །སྨོན་འཇུག་བྱང་ཆུབ་སེམས་གཉིས་བསྐྱེད། །སྒྲིབ་སྦྱོང་རྡོར་སེམས་སྒོམ་བཟླས་དང་། །ཚོགས་གསོག་མཎྜལ་རྣལ་འབྱོར་བྱ། །ཁྱད་པར་བྱིན་རླབས་མྱུར་འཇུག་པས། །ལྷན་སྐྱེས་ཡེ་ཤེས་རྟོགས་པའི་ཐབས། །མོས་གུས་བླ་མའི་རྣལ་འབྱོར་ནི། །དུས་རྣམས་ཀུན་ཏུ་བརྩོན་པས་བསྒོམ། །སྤྱི་བོར་པད་ཉི་ཟླ་བའི་སྟེང་། །སྐྱབས་གནས་ཀུན་འདུས་བླ་མར་གསལ། །གདུང་ཤུགས་དྲག་པོས་གསོལ་གདབ་ཅིང་། །དབང་བཞི་བླངས་ཤིང་ཐུགས་ཡིད་བསྲེ། །ལུས་གནད་རྣམ་སྣང་ཆོས་བདུན་ལ། །ངག་གི་རླུང་གནད་དལ་བར་བསླབ། །མིག་གནད་བར་སྣང་གཡོ་མེད་གཏད། །ཡིད་གནད་དུས་གསུམ་སྤྲོས་པ་བཅད། །དེ་ཚེ་འདས་པའི་རྣམ་རྟོག་འགགས། །མ་འོངས་རྣམ་རྟོག་མ་སྐྱེས་ཤིང་། །ད་ལྟའི་ཤེས་པ་སྐད་ཅིག་མ། །ཉམས་སུ་མྱོང་བཞིན་བསམ་བརྗོད་བྲལ། །གསལ་སྟོང་ཟུང་འཇུག་རིག་པའི་གཤིས། །འདི་ཀ་གདོད་མའི་གནས་ལུགས་ཏེ། །བཅོས་མའི་བློ་ཡིས་མ་བསླད་པར། །རང་བབས་སྤྲོ་བསྡུ་བྲལ་བར་བསྐྱང་། །དེ་ཡི་ངང་ལས་གཟུང་འཛིན་གྱི། །རྣམ་པར་རྟོག་པ་ཅི་ཤར་ཡང་། །དྭངས་པའི་ཤེལ་ལ་ཚོན་རིས་ལྟར། །མ་འདྲེས་འཛིན་མེད་རང་སར་གྲོལ། །དུས་དང་གནས་སྐབས་ཐམས་ཅད་དུ། །གསལ་རིག་དེ་ཀའི་རྒྱུན་བསྐྱངས་ནས། །བསྒོམ་མེད་ཡེངས་མེད་ཆེན་པོའི་ངང་།། མཐར་ཐུག་བཙན་ས་ཟིན་པར་མཛོད། །མདོར་ན་ཅིར་སྣང་ལྷ་ཡི་སྐུ། །སྒྲར་གྲགས་གསང་སྔགས་རྡོ་རྗེའི་སྒྲ། །དྲན་རྟོག་དབྱིངས་ལས་མ་གཡོས་ན། །མཆོག་དངོས་ཚེ་འདིར་འགྲུབ་པར་ངེས། །དེ་སྐད་དད་ལྡན་མོས་པའི་ངོར། །རྣལ་འབྱོར་འཇིགས་པ་མེད་པའི་སྡེས། །གང་ཤར་ཡི་གེར་སྤེལ་བའི་དགེས། །གདོད་མའི་གྲོལ་གཞི་མངོན་གྱུར་ཤོག །སརྦ་མངྒ་ལཾ།། །། ༈

[edit]

zab lam snying por dril ba'i gtam/ oM swa sti sid+d+haM/__rigs kun khyab bdag bla ma la/__/rtse gcig gus pas phyag btsal nas/__/zab lam snying por dril ba'i gtam/__/dad ldan nyams len gsos su sbyin/__/rang re rnams kyis rnyed pa yi/__/dal brgyad 'byor bcu ldan pa'i lus/__/'di 'dra rnyed dka' don che bas/__/snying po len pa'i thabs la 'bad/__/de yang nges par 'chi ba dang /__/nam 'chi cha med 'chi ba'i tshe/__/chos min gang gis mi phan pas/__/dam chos myur du brtson pas bsgrub/__/'chi ba'i 'og tu dkar nag las/__kho na'i rjes su 'brang bas na/__/dge sgrub sdig spang dam bca' ni/__/rtag tu snying la ri mo bris/__/'khor ba'i gnas ris gar skyes kyang /__/sdug bsngal bsam gyis mi khyab pas/__/de las rang gzhan sems can kun/__/myur du thar bar 'dod pa'i blos/__/dkon mchog gsum la skyabs 'gro zhing /__/smon 'jug byang chub sems gnyis bskyed/__/sgrib sbyong rdor sems sgom bzlas dang /__/tshogs gsog maN+Dal rnal 'byor bya/__/khyad par byin rlabs myur 'jug pas/__/lhan skyes ye shes rtogs pa'i thabs/__/mos gus bla ma'i rnal 'byor ni/__/dus rnams kun tu brtson pas bsgom/__/spyi bor pad nyi zla ba'i steng /__/skyabs gnas kun 'dus bla mar gsal/__/gdung shugs drag pos gsol gdab cing /__/dbang bzhi blangs shing thugs yid bsre/__/lus gnad rnam snang chos bdun la/__/ngag gi rlung gnad dal bar bslab/__/mig gnad bar snang g.yo med gtad/__/yid gnad dus gsum spros pa bcad/__/de tshe 'das pa'i rnam rtog 'gags/__/ma 'ongs rnam rtog ma skyes shing /__/da lta'i shes pa skad cig ma/__/nyams su myong bzhin bsam brjod bral/__/gsal stong zung 'jug rig pa'i gshis/__/'di ka gdod ma'i gnas lugs te/__/bcos ma'i blo yis ma bslad par/__/rang babs spro bsdu bral bar bskyang /__/de yi ngang las gzung 'dzin gyi/__/rnam par rtog pa ci shar yang /__/dwangs pa'i shel la tshon ris ltar/__/ma 'dres 'dzin med rang sar grol/__/dus dang gnas skabs thams cad du/_/gsal rig de ka'i rgyun bskyangs nas/__/bsgom med yengs med chen po'i ngang //_mthar thug btsan sa zin par mdzod/__/mdor na cir snang lha yi sku/__/sgrar grags gsang sngags rdo rje'i sgra/__/dran rtog dbyings las ma g.yos na/__/mchog dngos tshe 'dir 'grub par nges/__/de skad dad ldan mos pa'i ngor/__/rnal 'byor 'jigs pa med pa'i sdes/_/gang shar yi ger spel ba'i dges/__/gdod ma'i grol gzhi mngon gyur shog__/sarba mang+ga laM//___//___!_