JKW-KABUM-23-'A-001-026

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 26, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

ཉམས་ལེན་གྱི་གླུ་རིག་སྟོང་ངལ་གསོ། ཉམས་སུ་ལེན་པའི་གླུ་དབྱངས་རིག་སྟོང་ངལ་གསོ་ཞེས་བྱ་བ། ཨ་ཧོ། འཁོར་འདས་ཆོས་ཀུན་མི་འགྱུར་རྡོ་རྗེའི་ཁམས། །བསྐྱེད་རྫོགས་ཏིང་འཛིན་ཆོ་གས་སད་བགྱིད་པས། །སངས་རྒྱས་རང་ཞལ་ཉིད་དུ་རྟོགས་པ་ཡི། །ཆོས་ཉིད་ངོ་བོ་བླ་མའི་ཞབས་ལ་འདུད། །ཀུན་ལ་ཁྱབ་པའི་རང་བཞིན་ཆོས་སྐུ་ནི། །སྐྱེ་འགགས་གནས་བྲལ་འཕོ་མེད་བདེ་ཆེན་ཏེ། །ཡུལ་དང་ཡུལ་ཅན་སེམས་དང་སེམས་བྱུང་གིས། །གཟུང་འཛིན་འཁོར་བའི་རྒྱ་མཚོ་འདི་བྱུང་ངོ་། །དེ་ཡང་ངོ་བོས་སྟོང་ཡང་རང་བཞིན་གསལ། །སྐྱེ་བ་མེད་ཀྱང་དབྱིངས་ལས་ཚུལ་ཀུན་སྐྱེས། །འགགས་པ་མེད་ཀྱང་ངོ་བོའི་སྟེང་དུ་འགགས། །གནས་པ་མེད་ཀྱང་ངང་དུ་གནས་པའི་ཚུལ། །འདི་ནི་བློས་བྱས་འཛིན་པའི་དྲི་མ་འདྲ། །སྐྱེས་པའི་ཚུལ་ནི་དོན་ལ་སྐྱེ་བ་མེད། །སྒོ་ལྔའི་ཡུལ་ལས་སྐྱེས་པའི་རྩལ་དེ་ཉིད། །རོ་གཅིག་གཉུག་མ་རིག་སྟོང་ངང་དུ་འདུས། །དབྱེར་མེད་རང་སྣང་ཆོས་ཀྱི་སྐུ་རུ་གྲོལ། །བདེན་མེད་སྣང་བ་འཁྲུལ་འཁོར་བྱེད་པ་པོ། །རྣམ་རྟོག་དག་ནི་མ་རིག་རྒྱ་མཚོ་སྟེ། །ཡེ་ཤེས་རྟོག་ན་དེ་དོན་ཟིལ་གྱིས་གནོན། །འཁྲུལ་སྣང་རང་ཤར་རང་གྲོལ་དབྱིངས་སུ་ཐིམ། །འབྲལ་མེད་ཉམས་མྱང་ཤུགས་འབྱུང་གཉུག་མ་དང་། །བློས་བྱས་བཅོས་མའི་གཉུག་མ་རྣམ་པ་གཉིས། །ཁྱད་པར་རང་བཞིན་ཤིན་ཏུ་ཆེ་བ་སྟེ། །དེ་དོན་རྟོགས་དང་དབྱེ་བ་ལེགས་ཕྱེ་མཛོད། །དགའ་བྲལ་ལྷན་ཅིག་སྐྱེས་པའི་ཡེ་ཤེས་དང་། །འདིར་སྣང་རྟོག་མེད་བདེ་བའི་བསམ་གཏན་གཉིས། །གལ་འགག་ཕྱེ་བ་གནད་ཀྱི་དོན་དུ་དབབ། །དང་པོའི་ལས་ཅན་གོ་དང་བར་པས་མྱོང་། །ཐ་མ་མངོན་སུམ་རྟོགས་པའི་བར་དག་ཏུ། །མ་ཡེངས་དྲན་པས་རང་མདངས་བསྐྱང་བ་དང་། །གང་ཤར་རང་གྲོལ་བཅོས་བསྒྱུར་བྲལ་བར་གཅེས། །གསལ་སྟོང་ཤེས་བྱས་དཔྱད་གཟོད་ཐམས་ཅད་ཀུན། །ཉམས་ལས་མ་འདས་དེ་ཕྱིར་ཞེན་འཛིན་སྤོངས། །ནམ་ཞིག་རེ་དོག་བྲལ་བའི་རྟོགས་པ་མཆོག །མངོན་དུ་འཆར་ཚེ་གེགས་དང་གོལ་ས་བྲལ། །དེ་སྐད་བློ་འདས་དོན་ལ་བཤེས་མིན་ཡང་། །བློས་བྱས་ཚིག་གི་ཕྲེང་བ་ཟབ་མོའི་དོན། །ཅུང་ཟད་སྟོན་འདིས་རང་གཞན་འགྲོ་བ་ཀུན། །སྐད་ཅིག་རིག་སྟོང་རྗེན་པར་གྲོལ་བར་ཤོག ། ༈

[edit]

nyams len gyi glu rig stong ngal gso/__ nyams su len pa'i glu dbyangs rig stong ngal gso zhes bya ba/__a ho/__'khor 'das chos kun mi 'gyur rdo rje'i khams/__/bskyed rdzogs ting 'dzin cho gas sad bgyid pas/__/sangs rgyas rang zhal nyid du rtogs pa yi/__/chos nyid ngo bo bla ma'i zhabs la 'dud/__/kun la khyab pa'i rang bzhin chos sku ni/__/skye 'gags gnas bral 'pho med bde chen te/__/yul dang yul can sems dang sems byung gis/__/gzung 'dzin 'khor ba'i rgya mtsho 'di byung ngo /__/de yang ngo bos stong yang rang bzhin gsal/__/skye ba med kyang dbyings las tshul kun skyes/__/'gags pa med kyang ngo bo'i steng du 'gags/__/gnas pa med kyang ngang du gnas pa'i tshul/__/'di ni blos byas 'dzin pa'i dri ma 'dra/__/skyes pa'i tshul ni don la skye ba med/__/sgo lnga'i yul las skyes pa'i rtsal de nyid/__/ro gcig gnyug ma rig stong ngang du 'dus/__/dbyer med rang snang chos kyi sku ru grol/__/bden med snang ba 'khrul 'khor byed pa po/__/rnam rtog dag ni ma rig rgya mtsho ste/__/ye shes rtog na de don zil gyis gnon/__/'khrul snang rang shar rang grol dbyings su thim/__/'bral med nyams myang shugs 'byung gnyug ma dang /__/blos byas bcos ma'i gnyug ma rnam pa gnyis/__/khyad par rang bzhin shin tu che ba ste/__/de don rtogs dang dbye ba legs phye mdzod/__/dga' bral lhan cig skyes pa'i ye shes dang /__/'dir snang rtog med bde ba'i bsam gtan gnyis/__/gal 'gag phye ba gnad kyi don du dbab/__/dang po'i las can go dang bar pas myong /__/tha ma mngon sum rtogs pa'i bar dag tu/__/ma yengs dran pas rang mdangs bskyang ba dang /__/gang shar rang grol bcos bsgyur bral bar gces/__/gsal stong shes byas dpyad gzod thams cad kun/__/nyams las ma 'das de phyir zhen 'dzin spongs/__/nam zhig re dog bral ba'i rtogs pa mchog__/mngon du 'char tshe gegs dang gol sa bral/__/de skad blo 'das don la bshes min yang /__/blos byas tshig gi phreng ba zab mo'i don/__/cung zad ston 'dis rang gzhan 'gro ba kun/__/skad cig rig stong rjen par grol bar shog__/__!