PJCW-KABUM-06-CHA-023

Previous Text Back to Volume Page Next Text

Wylie title
Location	dpal sprul bka' 'bum Volume 6, Text 23, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre

[edit]

༄༅། །འདི་སྣང་ཚུལ་འཆོས་སོགས་སྙིང་པོ་མེད་པའི་ཆོས་དང་ཆོས་འདྲའི་ཤན་འབྱེད་ལ་གདམས་པ།

གང་ཞིག་འཁོར་བར་འཁྱམས་པའི་འགྲོ་མང་ཁམས། །ཐུགས་བསྐྱེད་སྨོན་པས་དུས་ཀུན་མི་གཏོང་བའི། །བྱང་ཆུབ་སེམས་ཀྱི་མངའ་བདག་གདམ་པའི་མགོན། །ཀུན་མཁྱེན་ཡབ་སྲས་བརྒྱུད་པར་གསོལ་བ་འདེབས། །རིང་ནས་དྲིན་གྱིས་བསྐྱངས་པའི་མ་རྒན་འགྲོ། ། སྣ་ཚོགས་ལས་ངན་ཁུར་གྱིས་ཆེས་ནོན་ཞིང་། །བཟོད་དཀའི་སྡུག་བསྔལ་ཆར་བཞིན་འབབས་མཐོང་ནས། །བདག་གི་སྙིང་འདི་དུམ་བུར་གས་ལ་ཐུག །འཁྲུལ་རྟོག་གྱ་གྱུའི་བློ་སྣ་བསླུ་བྲིད་མཁས། །ལས་ངན་སྡིག་པའི་གྲོགས་པོ་སྤང་རེ་དཀའ། །རང་ཐག་དམ་པའི་ཆོས་སུ་མ་ཆོད་ནས། །བདག་ཀྱང་འཁོར་བའི་བཙོན་རར་ད་དུང་ཉལ། །ཆུང་ནས་གཞན་དབང་སོང་བས་ཆོས་མ་འགྲུབ། །དར་ནས་འདོད་པའི་རྩེ་དགས་ཆོས་མ་འགྲུབ། །རྒས་ནས་ལང་ཚོ་རྒུད་པས་ཆོས་མ་འགྲུབ། །ཀྱེ་མ་ཀྱི་ཧུད་ད་ནི་ཅི་ཞིག་བྱ། །དུས་ངན་སྐྱེ་བོའི་བསམ་སྤྱོད་གྱ་མ་གྱུ། །སུ་དང་བསྟུན་ཡང་དམ་པའི་ཆོས་དང་འགལ། །གང་ལྟར་བྱས་ཀྱང་ཀུན་ལ་མགུ་དུས་མེད། །ད་ནི་དབེན་པའི་རི་ཁྲོད་མི་སྙོགས་རེ། །ཅི་ཙམ་འབྱོར་ཡང་སེམས་ལ་ཁེངས་དུས་མེད། །གང་ཙམ་བསྒྲུབས་ཀྱང་ལས་ལ་འགྲུབ་དུས་མེད། །སུ་ངོ་ཟིན་ཡང་ཀུན་ངོ་ཟིན་དུས་མེད། །ད་ནི་མཐུན་འཇུག་བློ་སྣ་མི་བསྟུང་རེ། །ཅི་ཙམ་སྤྱོད་ཀྱང་འདོད་པར་ཆོག་ཤེས་མེད། ། གང་མང་ཤེས་ཀྱང་ཚིག་ལ་སྙིང་པོ་མེད། །ཚེ་གཅིག་ཟད་ཀྱང་རྣམ་གཡེངས་ཟད་དུས་མེད། ། ད་ནི་བློ་སྣ་འཕྲལ་ཆོད་མི་བྱེད་རེ། །ཉམས་སུ་མ་ལོན་ཐོས་པས་ཅི་ཞིག་བྱ། །འཁྲུལ་རྟོག་སྐྱེད་འཕེལ་བསམ་པས་ཅི་ཞིག་བྱ། །གཞི་མེད་རེ་དོགས་སྒོམ་པས་ཅི་ཞིག་བྱ། །ད་ནི་ཆོས་མེད་གཅེར་ཉལ་མི་བྱེད་རེ། །ཚུལ་འཆོས་གཟུགས་བཅོས་འདུལ་བས་ཅི་ཞིག་བྱ། །ཉམས་ལེན་ཁ་བཤད་མདོ་སྡེས་ཅི་ཞིག་བྱ། །དོན་མེད་སྟོང་འདིངས་མངོན་པས་ཅི་ཞིག་བྱ། །ད་ནི་སྨྱོན་པ་གང་བདེ་མི་བྱེད་རེ། །བསོག་དཀའ་བསྲུང་དཀའ་འབྱོར་པས་ཅི་ཞིག་བྱ། །མངགས་དཀའ་མགུ་དཀའ་འཁོར་གྱིས་ཅི་ཞིག་བྱ། །འགྲུབ་དཀའ་བསྐྱུར་དཀའ་ཁྱིམ་གྱིས་ཅི་ཞིག་བྱ། །ད་ནི་སྤྲང་པོ་ལམ་ཟན་མི་བསྒུག་རེ། །སྣང་བ་དགྲར་ལངས་ཉན་ཐོས་དེས་ཅི་བྱ། །རྒན་མོ་བསམ་བཟང་བྱང་སེམས་དེས་ཀོ་ཅི། །ཉོན་མོངས་འཆོལ་ཉོག་གསང་སྔགས་དེས་ཅི་བྱ། །ད་ནི་ གུ་ཡངས་ཐ་མལ་མི་སྡོད་རེ། །རང་སྤྱོད་བསམ་ན་རང་ལ་ཁྲེལ་རྒོད་འཆོར། །གཞན་སྤྱོད་བསམ་ན་གཞན་ལ་ཡི་མུག་སྐྱེ། །ད་ནི་གང་ལ་བསམས་ཀྱང་སྙིང་རླུང་ལྡང་། །ད་ནི་སུ་ལ་བསམས་ཀྱང་ཡི་ཆད་སྐྱེས། །འབྱུང་བ་དགྲར་ལངས་སྣོད་ལ་ཡི་རེ་ཆད། །གཡོ་སྒྱུ་ཟོལ་ཟོག་བཅུད་ལ་ཡི་རེ་ཆད། །ལས་ངན་རྒྱུན་རིང་འགྲོ་ལ་ཡི་རེ་ཆད། །ཚེ་གང་དོན་མེད་ཀུན་ལ་ཡི་རེ་ཆད། །ཡི་ཆད་ཉམས་ཐག་སྡུག་གི་མཆི་མ་འདི། །ཐུགས་རྗེ་ཡས་སྤྲུལ་མགོན་གྱིས་མ་ཕྱིས་ན། །འཁྲུལ་བ་རྒྱུན་རིང་འཁོར་བའི་སེམས་ཅན་ལ། །ལས་ངན་སྡུག་བསྔལ་ངལ་གསོ་སུ་ཡིས་སྦྱིན། །ཡོད་ཡོད་མེད་མེད་ཁ་འབྱམས་ཁ་ལ་ཁྱེར། །ཡིན་ཡིན་མིན་མིན་ཚིག་གིས་མགོ་བསྐོར་གཏོང་། །རྟོག་གེ་མགོ་མཁྲེགས་ལྟ་བས་བསླུས་མཐོང་ནས། །ད་ནི་ལྟ་བ་ཕྱགས་མས་འདེགས་སྙིང་འདོན། །ལྷ་མཐོང་འདྲེ་མཐོང་ཉམས་ཀྱིས་སྣང་བ་བྲིད། །ཁ་གདངས་མིག་བགྲད་ལྷ་བསྒོམ་འདྲེ་རུ་ལོག །ཨུ་ཚུགས་གླེན་སྒོམ་སྒོམ་པས་བསླུས་མཐོང་ནས། །ད་ནི་སྒོམ་པ་རླུང་ལ་བསྐུར་སྙིང་འདོད། །ཚེ་འདིར་དོན་གཉེར་འདུལ་སྤྱོད་རྟགས་ལ་རེ། །འདོད་ཆགས་དོན་གཉེར་སྔགས་སྤྱོད་རྐུབ་ལ་རེ། །གནད་མེད་སྟོང་རྒྱུག་སྤྱོད་པས་བསླུས་མཐོང་ནས། །ད་ནི་སྤྱོད་པ་ཆུ་ལ་བསྒྱུར་སྙིང་འདོད། །རང་འདོད་ཕུག་བཅུག་གཞན་ཕན་ཁ་ལ་རེ། །རང་ངོ་མ་འཕྲོད་ངོ་སྤྲོད་རོ་ལ་འདེབས། །རང་དོན་མ་འགྲུབ་གཞན་ཕན་བསླུས་མཐོང་ནས། །ད་ནི་འགྲོ་དོན་གཡང་ལ་བསྐུར་སྙིང་འདོད། །རྟོག་ངོ་རང་རིག་བཅོས་མའི་གཅེར་ལ་རེ། །གནས་ངོ་རྒྱ་ཡན་ཟིན་བུའི་ཉམས་ཀྱིས་བཅིངས། །ཡིན་རློམ་ང་རྒྱལ་འབྲས་བུས་བསླུས་མཐོང་ནས། ། ད་ནི་འབྲས་བུ་ཆུ་ལ་འཕེན་སྙིང་འདོད། །རང་ཉམས་མ་ལོན་གཞན་ལ་ཆོས་བཤད་བྱེད། ། ཐོས་པ་དགྲར་ལངས་ལོག་ལྟས་རང་རྒྱུད་སྦོས། །ཚིག་མཐའ་རྒྱང་དེད་ཐོས་པས་བསླུས་མཐོང་ ནས། །ད་ནི་ཐོས་བསམ་རྒྱུན་ཐག་བཅད་སྙིང་འདོད། །དབང་མེད་འཁོར་ངན་འཐབ་མོས་རང་སྐྱིད་ཕུད། །ལོག་ལྟ་སྐུར་འདེབས་མི་ཁས་རང་གཞན་ཕུང་། །དམ་པ་མདོ་མེད་ནག་མོས་ བསླུས་མཐོང་ནས། །ད་ནི་མཇེ་གོག་རྩད་ནས་བཅད་སྙིང་འདོད། །རང་ལུགས་མི་སྒྲུབ་གཞན་ ལུགས་སྒྲུབ་ལ་རྒྱུག །གཅིག་ཉམས་མ་ལོན་གཉིས་སྒྲུབ་ཟབ་ལ་རེ། །བློ་མང་སེམས་གཡེངས་ ཡིག་སྣས་བསླུས་མཐོང་ནས། །ད་ནི་ཉམས་ལེན་གཅིག་ལ་དྲིལ་སྙིང་འདོད། །གཏོང་ཕོད་མེད་པའི་ནོར་སྒྲུབ་བསེ་རག་འཁོར། །བྱང་སེམས་མེད་པའི་དབང་སྡུད་རང་དབང་འཆོར། ། མཆོག་བོར་ལས་སྒྲུབ་ལྷ་འདྲེས་བསླུས་མཐོང་ནས། །ད་ནི་རང་སེམས་དབང་དུ་སྡུད་སྙིང་འདོད། །གང་ལྟར་བསམས་ཀྱང་འགྲུབ་དུས་མི་འདུག་གི །ཇི་ལྟར་བྱས་ཀྱང་སྙིང་པོ་མི་འདུག་ གི །བྱས་བྱས་བསྒྲུབས་བསྒྲུབས་རང་གཞན་བསླུས་མཐོང་ནས། །ད་ནི་བྱར་མེད་འཆི་བ་སྒུགས་སྙིང་འདོད། །རྟོག་གེ་ཟོལ་ཟོག་གསར་མ་བྱེད་རེ་ཤི །ཟོག་པོ་གཏེར་རྫུན་རྙིང་མ་བྱེད་རེ་ཤི །ཚུལ་འཆོས་ངོམ་ཁྱེར་ཆོས་པ་བྱེད་རེ་ཤི །ང་རྒྱལ་མགོ་མཐོ་བླ་མ་བྱེད་རེ་ཤི །ཟ་འདོད་སྟོང་རྒྱུག་གྲྭ་བ་བྱེད་རེ་ཤི །ཕྱི་ཆེ་ནང་སྟོང་བླ་བྲང་བྱེད་རེ་ཤི །རྙེད་མང་ཡོད་ཉུང་གདུལ་བྱ་བྱེད་རེ་ཤི །རང་གཡེང་གཞན་བསླུ་ཆོས་བཤད་བྱེད་རེ་ཤི །མགོ་དམ་མཇུག་ལྷོད་དགེ་སློང་བྱེད་རེ་ཤི །ཁ་འཇམ་རྒྱུད་རྩུབ་བྱང་སེམས་བྱེད་རེ་ཤི །སྡོམ་ཤོར་སྟུ་དགའ་སྔགས་པ་བྱེད་རེ་ཤི །རེ་དོགས་ཟད་མེད་སྒྲུབ་པ་བྱེད་རེ་ཤི །ད་ནི་མི་བྱེད་བྱས་པས་བསླུས་ལ་ལྟོས། །ད་ནི་མི་བསམ་བསམ་པས་འཁྲུལ་ལ་ལྟོས། །ད་ནི་མི་བཤད་བཤད་པས་གཡེངས་ལ་ལྟོས། །ད་ནི་མི་སྒྲུབ་བསྒྲུབས་པས་བཅིངས་ལ་ལྟོས། །ད་ནི་ཁྱི་རྒན་གྲོང་མཐའ་ཉུལ་སྙིང་འདོད། །ད་ནི་བ་རྒན་སླས་སུ་ཉལ་སྙིང་འདོད། །ད་ནི་མདོ་མེད་ཅི་དགར་བྱེད་སྙིང་འདོད། །ད་ནི་མངོན་ཆུང་སྤྲང་འཁྱམས་བྱེད་སྙིང་འདོད། །བླ་མ་མི་དགོས་རང་རྒྱུས་རང་གིས་ཤེས། །གྲྭ་པ་མི་དགོས་རང་གཡོག་རང་གིས་ཐུབ། །བློ་རྩེ་མི་དགོས་སྐྱབས་འགྲོ་ཁ་ཏོན་ཤེས། །ད་ནི་ཅི་བྱུང་གང་བྱུང་ཡིན་པ་སྙམ། །མདོ་མེད་ཤི་རོའི་རང་ཚུགས་དེ་འདྲ་སྟེ། །ཁྱི་རྒན་རུལ་བའི་སྣང་ཚུལ་དེ་ལྟར་ལགས། །ང་རྗེས་མ་སློབ་བསྟན་འཛིན་དམ་པ་རྣམས། །ཡ་རབས་སྤྱོད་ལ་སྤྱན་མིག་ཡངས་པར་མཛོད། །ཕྱི་ཚུལ་སོ་ཐར་ཆོས་གོས་སེར་ཟང་ཟང་། །ནང་ཚུལ་བྱང་སེམས་གཏོང་སྡུད་འཚུབ་ཉིལ་ཉིལ། །གསང་བ་སྔགས་སྤྱོད་བརླ་ཁུག་རློན་ཅ་རེ། །དེ་འདྲའི་སྡོམ་པ་སུམ་ལྡན་མཛད་པར་ཞུ། །རང་དོན་ལྟ་སྒོམ་སྟ་སྟངས་མཐོ་ཅེར་ཅེར། །གཞན་དོན་ཆོས་བཤད་སྙན་འགྱུར་འུར་ཆེམ་ཆེམ། །གཉིས་དོན་འཁོར་སློབ་འདུ་བ་བྲེལ་ལིང་ལིང་། །དེ་འདྲའི་དོན་གཉིས་མཐར་ཕྱིན་མཛད་པར་ཞུ། ཆོས་ཕྱོགས་ཐོས་བསམ་སྒོམ་པའི་རྣམ་གྲངས་མང་། །འཇིག་རྟེན་གཡོ་སྒྱུ་སྐོར་མགོའི་བློ་སྣ་རྒོད། །ཟུང་འཇུག་བྱ་བ་ལས་ཀྱི་འཁོར་ལོ་རྒྱས། །དེ་འདྲའི་ལུགས་གཉིས་ཁྱད་འཕགས་མཛད་པར་ཞུ། །མཚན་ཉིད་གཞུང་བཤད་མཁས་མང་ཁ་ལས་ཉོས། ། གསང་སྔགས་ཟབ་དོན་ཟབ་གཏེར་རྡོ་ལས་བརྐོས། །སྣ་ཚོགས་ཉམས་དབྱངས་ཀློང་རྡོལ་ཐུགས་ལ་ཤར། །དེ་འདྲའི་མཁས་གྲུབ་གཏེར་སྟོན་མཛད་པར་ཞུ། །གྲུབ་མཐའ་ཀུན་ཤེས་ ཤེས་ཐོབ་ཡིག་ཚོགས་མང་། །ཡི་དམ་ཀུན་སྒྲུབ་ཐུགས་དམ་རྣམ་གྲངས་མང་། །ཆོས་སྐྱོང་ཀུན་ བསྟེན་གཏོར་བསྔོས་ཕོད་ཁ་མཐོ། །དེ་འདྲའི་བླ་མ་མཚན་ལྡན་མཛད་པར་ཞུ། །ཕྱི་ཚུལ་གཟུགས་མཛེས་སྤྱོད་ལམ་ཆ་ལུགས་གཙང་། །ནང་ཚུལ་བློ་རྣོ་ངོ་དགའ་རྙེད་ཚོལ་མཁས། ། བལྟ་དགའ་འགྲོགས་སྐྱིད་སེར་སྣའི་མདུད་པ་གྲོལ། །དེ་འདྲའི་གྲྭ་པ་མཚན་ལྡན་བསྟེན་པར་ཞུ། །ཆོས་ཕྱོགས་ལག་དམ་མཐུན་འཇུག་རྣམ་གྲངས་མཁས། །རང་དབང་མི་སྦྱིན་དཀོར་ཐོག་འགྱེད་ལ་མཁས། །རྙེད་ལོན་འཕྲལ་སྡུད་འཇའ་ཚོན་བྲིད་མཁས་པའི། །དེ་འདྲའི་ཕྱག་མཛོད་ཚད་ལྡན་བསྟེན་པར་ཞུ། །ཟད་བསྒོམ་མེད་བཟླས་ཐབས་མེད་གཏོང་སྒོ་ཡངས། །

བཟང་བཙོང་ངན་འཇོག་ཁེངས་དཀའ་སྟོང་པར་སླ། །བཞིན་སྡུད་སྡང་གཟིགས་དམན་ལ་ཕྱག་ཀྱང་འཐེབས། །དེ་འདྲའི་གཉེར་བ་ཚད་ལྡན་བསྟེན་པར་ཞུ། །དེ་ལྟར་མཛད་ན་སྤྲུལ་སྐུའི་གྱོང་མ་བརྡབས། །བསླུས་པ་ཁེབ་ཆེ་བླ་བྲང་རྐང་མ་སྟོང་། །གྲྭ་པའི་མགོ་བསྡུས་རང་གཞན་དོན་གཉིས་འགྲུབ། །དེ་འདྲའི་ཕུན་སུམ་ཚོགས་པའི་བཀྲ་ཤིས་ཤོག །