གཞི་བཅུ་བདུན་གྱི་ཟིན་བྲིས།

🚧 This website is under continued development. We appreciate your patience!

Previous Text Back to Volume Page Next Text

Wylie title	gzhi bcu bdun gyi zin bris
Location	dpal sprul bka' 'bum Volume 2, Text 24, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Notes - zin bris

[edit]

༄༅། །གཞི་བཅུ་བདུན་གྱི་ཟིན་བྲིས་བཞུགས་སོ། །

ན་མོ་མ་ཧཱ་མུ་ན་ཡེ། ཐུགས་རྗེ་མཆོག་གི་སྤྲིན་དཀར་གཡོ་བ་ལས། །ཆོས་འདུལ་རྒྱ་ཆེན་སྙིང་པོའི་གྲུ་ཆར་གྱིས། །རིང་ནས་ཐ་བའི་རྒྱུད་མཁྲེགས་རླན་མཛད་པ། །ཐུབ་དབང་སྲས་བཅས་སྤྱི་བོའི་གཙུག་གིས་མཆོད། །གང་ཞིག་སྲིད་བདེས་འཕྲལ་སྣང་མེ་འོབས་ལྟར། ། མཐོང་ནས་ཤིན་ཏུ་ཞི་བའི་ལམ་གཉེར་ཏེ། །ལེགས་གསུང་ཁྲིམས་ཀྱི་རང་རྒྱུད་སྡོམ་བགྱིད་ལ། །བཅུ་བདུན་བླང་བྱའི་རྣམ་གྲངས་བསྡུས་ཏེ་གླེང་། །ཞེས་བརྗོད་ནས་སོ་སོར་ཐར་པའི་བསླབ་པའི་གནས་དག་ལས་བླང་བར་བྱ་བའི་བསླབ་བྱ་གཞི་བཅུ་བདུན་གྱི་དབྱེ་བ་ཅུང་ཟད་ཟིན་ཐོར་དགོད་པ་ལ་དང་པོ་སྡོམ་ནི། རབ་བྱུང་༡གསོ་སྦྱོའི་༢གཞི་དང་ནི། །དགག་དབྱེ་༣དབྱར་༤དང་ཀོ་ལྤགས་༥གཞི། །༦སྨན་དང་གོས་༧དང་སྲ་བརྐྱང་༨དང་། །ཀཽ་ཤཱམ་༩བཱི་དང་ལས་༡༠ཀྱི་གཞི། །དམར་སེར་༡༡ཅན་དང་གང་ཟག་༡༢དང་། །སྤོ་དང་༡༣གསོ་སྦྱོང་༡༤བཞག་པ་དང་། །གནས་༡༥མལ་དང་ནི་རྩོད་༡༦པ་དང་། །དགེ་འདུན་༡༧དབྱེན་རྣམས་བསྡུས་པ་ཡིན། །ཞེས་པ་སྟེ་དང་པོ། །རབ་བྱུང་གི་གཞི་ནི། སྡོམ་པ་མ་ཐོབ་པ་ཐོབ་པར་བྱེད་པའི་ཆོ་ག་དག་སྟེ། དེ་ཡང་འཇིག་རྟེན་ན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་མཁན་པོ་དང་སློབ་དཔོན་ལ་བརྟེན་པ་མེད་པར་རབ་བྱུང་དུ་བསྙེན་པར་རྫོགས་ནས་མངོན་པར་བྱང་ཆུབ་པའི་གོ་འཕང་བླ་ན་མེད་པ་བརྙེས་ཏེ་ཝ་ར་ཎ་སིར་འཁོར་ལྔ་སྡེ་བཟང་པོ་ལྷ་བརྒྱད་ཁྲི་དང་བཅས་པ་ལ་བདེན་པ་བཞི་བཟླས་ཏེ་བསྟན་པ་ཆོས་ཀྱི་འཁོར་ལོ་ཐོག་མར་བསྐོར་བའི་ཚེ་ཀུན་ཤེས་ཀོཎྜི་ཎ་ལ་སོགས་འཁོར་ལྔ་སྡེ་རྣམས་ཆོས་ཀྱི་མིག་དྲི་མ་མེད་པ་ཐོབ་ནས་ཡེ་ཤེས་ཁོང་དུ་ཆུད་པའི་དགེ་སློང་དུ་གྱུར་ལ། དེའི་ཚེ་ཉེ་བའི་ལྔ་སྡེ་དང་། གྲོང་པའི་ཁྱེའུ་ལྔ་བཅུ་དང་། རལ་པ་ཅན་སྟོང་ལ་སོགས་པ་ཡང་རབ་ཏུ་བྱུང་སྟེ་བྲམ་ཟེའི་ཁྱེའུ་ཉེ་རྒྱལ་དང་པང་ན་སྐྱེས་གཉིས་ཀྱང་ཚུར་ཤོག་གིས་རབ་ཏུ་འབྱིན་པར་མཛད་ཅིང་དགེ་སློང་དག་གི་དྲུང་དུ་རབ་ཏུ་འབྱུང་བར་འོང་བ་དག་ཀྱང་བཅོམ་ལྡན་འདས་ཀྱི་སྤྱན་སྔར་ཁྲིད་དེ་ཚུར་ཤོག་གི་རབ་བྱུང་གནང་བ་སྟེ། དེ་ཡང་། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པའི་ལུས་གཟུགས་བཀབ་པར་གྱུར། །ཞེས་པ་ལྟར་ཡིན་ལ་རེ་ཞིག་གི་ཚེ་དགེ་སློང་ཞིག་གི་གན་དུ་རབ་ཏུ་འབྱུང་བར་འདོད་པ་ཞིག་འོང་བ་ན། བཅོམ་ལྡན་འདས་ཀྱི་སྤྱན་སྔར་དགེ་སློང་དེས་ཁྲིད་དེ་འོང་བས་ལམ་ནས་ཤི་བ་དེའི་དགེ་སློང་གི་དངོས་པོར་གྱུར་བའི་བར་ཆད་དུ་འགྱུར་བའི་སྐབས་དེ་དགོངས་ནས་གསོལ་བཞིའི་ལས་ཀྱིས་ཅིག་ཆར་རབ་ཏུ་འབྱུང་བར་གནང་སྟེ། དེ་ཡང་དགེ་འདུན་ཐམས་ཅད་འདུས་ནས་རབ་ཏུ་འབྱུང་བར་འདོད་པ་དེས་རྒན་རིམ་ལ་ཕྱག་འཚལ་ཏེ་ཐལ་མོ་སྦྱར་ནས་ཙོག་ཙོག་པོར་འདུག་སྟེ་རབ་ཏུ་འབྱུང་བ་དང་བསྙེན་པར་རྫོགས་པར་གསོལ། དེའི་འོག་ཏུ་དགེ་སློང་གཅིག་གིས་གསོལ་བ་དང་ལས་སུ་བྱ་བ་ལན་གསུམ་གྱི་རབ་ཏུ་བྱུང་བ་ཡིན་ལ་དེའི་ཚེ་དེ་ལྟར་རབ་ཏུ་བྱུང་བ་དག་མཁན་པོ་དང་སློབ་དཔོན་མེད་པར་མ་བསྡམས་པར་གྲོང་ཏུ་རྒྱུ་བ་མཐོང་ནས་མུ་སྟེགས་ཅན་དག་འཕྱ་བར་བྱེད་པ་ལས་བཅོམ་ལྡན་འདས་ཀྱིས་མཁན་པོ་དང་སློབ་དཔོན་ལ་བརྟེན་ཏེ་རབ་ཏུ་བྱུང་བའི་ཚུལ་གནང་སྟེ་དེ་དག་ནི་ད་ལྟའི་འདུལ་བའི་ལས་ཆོག་དག་ལས་ཇི་ལྟར་བཤད་པ་བཞིན་རབ་ཏུ་བྱུང་ནས་མཁན་པོ། དེའི་དྲུང་དུ་ཉེ་བར་གནས་ནས་བསླབ་པའི་གཞི་མཐའ་དག་ལ་ཡོངས་སུ་སྦྱང་བར་བྱ་བ་ཡིན་ཏེ་དེ་ལྟ་བུས་མཁན་པོ་ཡང་རབ་ཏུ་བྱུང་ནས་ལོ་བཅུ་ལོན་པ། ཚུལ་ཁྲིམས་དང་ཐོས་པ་དང་ལྡན་པ། སྡེ་སྣོད་གསུམ་ལ་མཁས་ཤིང་གཞན་རྗེས་སུ་འཛིན་པ་ལ་མཁས་པ་དག་ཡིན་ཞིང་གང་རབ་ཏུ་འབྱུང་བའང་བར་ཆད་ཀྱི་ཆོས་ཐམས་ཅད་ལས་གྲོལ་ཞིང་མཁན་པོའི་ཅི་གསུང་བསྒྲུབས་པའོ། ། ༈ གསོ་སྦྱོང་ནི། བསླབ་པ་ཡོངས་སྦྱོང་གི་གཞི་གསུམ་གྱི་ནང་ཚན་དུ་གྱུར་པ་སྟེ་རྒྱལ་པོའི་ཁབ་འོད་མའི་ཚལ་དུ་དགེ་བསྙེན་མང་པོས་ཞུས་པ་ལ་གནང་། དེ་ལའང་ཞི་གནས་དང་མཐུན་པའི་གསོ་སྦྱོང་གཉིས་ལས་དང་པོ་ནི། དགེ་སློང་སྤོང་བའི་ཞལ་ཏ་བ་བསྐོས་ཏེ་དེ་ཉིས་ཀྱི་གཎྜིའི་སྒྲས་སྤོང་བ་ལས་སློང་བ་དང་གཙུག་ལག་ཁང་བྱི་དོར་བྱེད་པ་ལ་སོགས་པ་དེང་བཅས་པའི་དགེ་སློང་རྣམས་སྤོང་ཁང་དུ་འདོད་ཆགས་ཀྱི་གཉེན་པོར་མི་གཙང་བ་བསྒོམ་པ་ལ་སོགས་དང་ཞི་གནས་ཀྱི་ཏིང་ངེ་འཛིན་སྒྲུབ་པའོ། །གཉིས་པ་ལའང་། བཅུ་བཞི་པ་དང་། བཅོ་ལྔ་པ་དང་། བཀྲ་ཤིས་པའི། གནོད་པ་དབྱུང་བའི། བསྡུམ་པའི་གསོ་སྦྱོང་དང་ལྔའོ། །དང་པོ་གཉིས་ནི་དུས་ནམ་དུ་ཡང་ཟླ་བ་ཕྱེད་ཕྱེད་ནས་དགེ་འདུན་གྱི་གསོ་སྦྱོང་བྱེད་པ་སྟེ་བཅོ་ལྔ་པ་གསུམ་རེའི་མཚམས་སུ་བཅུ་བཞི་པ་རེ་རེ་སྟེ་རེས་མོས་སུ་འབྱུང་ངོ་། །གསུམ་པ་ནི་དགའ་སྟོན་དང་རབ་གནས་ལྟ་བུའི་ཚེ་དང་། བཞི་པ་ནི་བསྟན་པ་ལ་གནོད་པ་སུན་འབྱིན་པ་དང་། ལྔ་པ་ནི་དགེ་འདུན་གྱི་དབྱེན་བྱུང་བའི་ཚེ་ནའོ། །གང་ལྟར་ཡང་གསོལ་བ་དང་གཉིས་ཀྱི་ལས་ཀྱིས་གནས་ལ་བློ་མཐུན་པ་དང་། མཚམས་གཅད་པ་དང་བཅས་པའི་དགེ་སློང་སོགས་དགེ་འདུན་འདུས་ཏེ་གསོ་སྦྱོང་སྔ་མ་ཚུན་དུ་རང་ལ་ལྟུང་བ་བྱུང་བ་གང་དྲན་དགེ་སློང་སུ་ཡང་རུང་བ་ལ་ཆོས་བཞིན་དུ་བཤགས་ཤིང་ལྟུང་བ་མ་དག་པ་དང་ཡིད་གཉིས་ཟ་བར་གྱུར་ན་དགེ་སློང་སྡེ་སྣོད་འཛིན་པ་ལ་དྲིས་ནས་ཕྱིར་བཅོས་བྱ་བ་རྣམས་གྲུབ་ནས། གསོལ་བཞི་སྔོན་དུ་འགྲོ་བའི་དགེ་སློང་གནས་བརྟན་གྱིས་སོ་སོར་ཐར་བའི་མདོ་འདོན་པ་ལ་སོགས་པའོ། ། ༈ དགག་དབྱེ་ནི། གླེང་གཞི་མཉན་ཡོད་དུ་ལྗོངས་ཤིག་ཏུ་དབྱར་གནས་པའི་དགེ་སློང་མང་པོ་ལ་བརྟེན་ཏེ་བཅས་སོ། །དེ་ནི་དབྱར་གནས་ཚར་ནས་བྱ་བ་སྟེ་གཙུག་ལག་ཁང་ཕྱག་དར་དང་ཆག་ཆག་བྱ་བ་སོགས་དང་ཉི་མ་འདི་སྙེད་ནས་དགེ་འདུན་གྱི་དགག་དབྱེ་བྱེད་པར་འགྱུར་རོ་ཞེས་སྤྱོད་ཡུལ་གྱི་གྲོང་དུ་གོ་བར་བྱ་བ་སྔོན་དུ་སོང་ནས། དགག་དབྱེ་བྱེད་པའི་དགེ་སློང་བསྐོ་ཏེ་དེ་དང་པོ་རང་ཉིད་ལ་སྤྲོ་བ་དྲི་དེ་ནས་གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱ་ཞིང་བསྐོས་པའི་དགེ་སློང་གིས་འཇགས་མ་བྲིམ་པ་བྱས་ནས་དགེ་སློང་གནས་བརྟན་གྱིས་དགེ་འདུན་གྱི་དགག་དབྱེ་བྱེད་པར་གསོལ་པ་འབའ་ཞིག་པ་དང་དེ་ནས་རང་ཉིད་ཀྱི་མཐོང་ཐོས་དོགས་གསུམ་གྱི་དགག་དབྱེ་བརྗོད་ཅིང་གཞོན་རིམ་གྱི་མཐའི་བར་དུ་བྱ། དེ་ནས་དགག་དབྱེ་བྱེད་པའི་དགེ་སློང་རང་གིས་བྱ། དེ་ནས་དགེ་སློང་མ་དང་དགེ་སློང་ཕ། དགེ་ཚུལ་ཕ་མའི་བར་གྱི་དགག་དབྱེ་གྲུབ་པ་ནས་དགག་དབྱེ་བྱེད་པའི་དགེ་སློང་གིས་དགེ་འདུན་གྱི་དགག་དབྱེ་མཛད་ལགས་སོ། །ཞེས་བརྗོད་ཅིང་ཐམས་ཅད་ཀྱིས་དགག་དབྱེ་ལེགས་པར་མཛད་ཟིན་ཏོ་སོགས་བརྗོད། ལྟུང་པ་དྲན་ན་ཆོས་བཞིན་ཕྱིར་བཅོས་བྱ་བ་རྣམས་ཏེ་དབྱར་གྱི་ཚེ་དེར་བྱུང་བའི་འགལ་ལྟུང་ཕྱིར་བཅོས་པའི་བྱ་བ་སྟེ་དེ་གྲུབ་འཕྲལ་དབྱར་གྱི་རྙེད་པ་རྣམས་ལེགས་པར་བགོ་པར་བྱེད་པ་སོགས་སོ། ། ༈ དབྱར་གནས་ནི། མཉན་ཡོད་དུ་དགེ་སློང་རྣམས་དབྱར་ལྗོངས་རྒྱུ་བ་ལ་ཕྱི་རོལ་བ་རྣམས་འཕྱ་པ་བསལ་བའི་ཕྱིར་བཅས་ཏེ། དེ་ནི་དབྱར་ཟླ་འབྲིང་པོའི་ཚེས་བཅོ་ལྔ་ལ་གཙུག་ལག་ཁང་ཆག་ཆག་བྱ་བ་ལ་སོགས་སྔོན་དུ་སོང་ནས་གསོལ་བ་དང་གཉིས་ཀྱི་ལས་ཀྱིས་དགེ་སློང་གནས་མལ་གྱི་ཞལ་ཏ་བ་བསྐོས་ཏེ་དེས་ཚུལ་ཤིང་བྲིམ་ནས་གནས་མལ་སྟོབ་པ་དང་ཟླ་བ་ཕྱེད་ཅིང་གནས་མལ་ལ་བརྟགས་པར་བྱ་བ་དང་དགེ་འདུན་ཚོགས་ནས་སྦྱིན་བདག་ཞལ་ཏ་བ་སྤྱོད་ཡུལ་གྱི་གྲོང་སོགས་ཀྱང་གོ་བར་བྱ་ཞིང་དགེ་སློང་རྣམས་ཀྱང་ན་བའི་གཡོག་དང་ཆོས་སོགས་ཀྱི་སྐྱབས་ཡོད་པར་ཤེས་ན་དབྱར་གནས་པར་དམ་བཅའོ། །དེ་དམ་བཅས་ནས་དགོས་པ་ཆེན་པོའི་ཕྱིར་ཞག་བདུན་བྱིན་གྱིས་རླབས་ཏེ་འགྲོ་བ་ཙམ་མ་གཏོགས་པ་མཚམས་ཀྱི་ཕྱི་རོལ་ཏུ་ཡང་མི་འགྲོ་བས་གནས་པར་བྱ་བ་སོགས་སོ། ། ༈ ཀོ་ལྤགས་ཀྱི་གཞི་ནི། ཡུལ་མཐའ་འཁོབ་ཏུ་ཀོ་ལྤགས་ཀྱི་གདན་ཀ་ཏྱ་ན་ལ་གནང་། ཡུལ་དབུས་སུ་ཡང་སྦྱིན་བདག་གི་ཁྱིམ་དུ་གནང་ལ་ཉལ་བ་དང་གཙུག་ལག་ཁང་དུ་མ་གནང་ངོ་། །ན་བ་དང་རྒན་པ་ལ་ནི་བཞོན་པ་ཡང་གནང་ལ་ལྷམ་ཀྱང་རིམ་གཅིག་པ་དང་ཡུ་ཐུང་སོགས་ཀྱང་གནང་ལ་མཐའ་འཁོབ་ཁ་བ་འབབ་པའི་ཡུལ་དུ་ནི་ལྷམ་སྒྲོག་གུ་ཅན་ཡང་གནང་ཤིང་ཆུ་ལ་ནི་རྐྱལ་སྐྱ་དང་རྩིས་བསྐུས་པའི་རྐྱལ་བས་སྐྱལ་བར་གནང་ལ་ལྷམ་རིམ་པ་མང་པོ་ཅན་ཡང་ཁྱིམ་པས་ཅུང་ཟད་ལོངས་སྤྱད་པ་ཕུལ་ན་ནི་བཅང་ཤིང་ལྷམ་དྲུབ་བའི་སྐུད་པ་དང་ཁབ་ཡང་རྗེས་སུ་གནང་ངོ་། ། ༈ སྨན་གྱི་གཞི་ནི། རྒྱལ་བྱེད་ཀྱི་ཚལ་དུ་དགེ་སློང་མང་པོ་ལ་བརྟེན་ནས་སྨན་རྣམ་པ་བཞིར་ཕྱེ་ནས་གནང་སྟེ། དེ་ཡང་དུས་སུ་རུང་བ་དང་། ཐུན་ཚོད་དུ་རུང་བ་དང་། ཞག་བདུན་པ་དང་། འཚོ་བའི་བར་དུ་བཅང་བའོ། །དེ་ལ་དུས་སུ་རུང་བ་ནི་འདེ་གུ་དང་། འབྲས་ཆན་དང་། ཟན་དྲོན་དང་། ཤ་དང་། སྣུམ་ཁུར་རོ། ཐུན་ཚོད་དུ་རུང་བ་ནི། བཏུང་བ་བརྒྱད་པོ་རྣམས་སོ། །ཞག་བདུན་པ་ནི། ཏིལ་མར་དང་། བུ་རམ་གྱི་དབུ་བ་དང་། སྦྲང་རྩི་དང་། ཤ་ཁརའོ། །འཚོ་བའི་བར་དུ་བཅང་བ་ནི་རྩ་བ་དང་སྡོང་བུ་དང་མེ་ཏོག་ལ་སོགས་པའི་སྨན་གྱི་རིགས་ཟས་ཀྱི་དོན་དུ་མི་འགྱུར་བ་རྣམས་སོ། །དེ་དག་ཀྱང་བྱིན་གྱིས་བརླབས་ཏེ་བཅང་བའོ། །གཞན་ཡང་ཚིལ་དང་མིག་སྨན་དང་ཤ་ལ་སོགས་པ་གང་ཡང་ནད་ཀྱི་ཆེད་དུ་ནི་གནང་བ་སྟེ་ནད་མེད་པས་སྤྱད་པར་བྱ་བ་ནི་མ་ཡིན་ནོ། ། ༈ གོས་ཀྱི་གཞི་ནི། རྒྱལ་པོ་གཟུགས་ཅན་སྙིང་པོས་ཆེད་དུ་ཞུས་ཏེ་དྲས་ཤིང་གྲུབ་པའི་གོས་གནང་སྟེ། དེ་ཡང་ཆོས་གོས་སྣམ་སྦྱར་དང་། ཆོས་གོས་མཐང་གོས། ཆོས་གོས་བླ་གོས་དང་གསུམ་ནི་ཆོས་གོས་རྣམ་གསུམ་ཞེས་དགེ་སློང་རྣམས་ཀྱི་སྟེ་དགེ་ཚུལ་ལ་ནི་སྣམ་སྦྱར་མེད་དོ། །དེ་ལས་གཞན་ཆོས་གོས་བླ་གོས་ཀྱི་ནང་དུ་རྔུལ་གཟན་དང་མཚན་མོ་རྔུལ་གཟན་གྱི་གཟན། མཐང་གོས་ཀྱི་ནང་དུ་ཤམ་ཐབས་དང་དེའི་ནང་དུ་ཤམ་ཐབས་ཀྱི་གཟན་གཉིས་པོ་མཚན་མོ་བགོ་བར་བྱ་བ་དང་། གདིང་བ་ནི་སྟན་ནོ། །ས་ག་མས་ཞུས་པ་ལ་བརྟེན་ནས་རས་ཆེན་དང་། གཡན་པའི་ནད་ཀྱི་ཉེན་པ་ལ་གཡན་པ་དགབ་པ་རྣམས་ཀྱང་གནང་བ་ཡིན་ནོ། ། ༈ སྲ་བརྐྱང་གི་གཞི་ནི། གྲོང་གནས་བཅས་སུ་དབྱར་གནས་པའི་དགེ་སློང་མང་པོ་ལ་གནང་སྟེ་དེ་ཡང་སྲ་བརྐྱང་ལ་ཕན་ཡོན་ལྔ་ཡོད་དེ། ཞག་བཅུ་ཐལ་ན་མ་ཡིན་པ་དང་། ཟླ་བ་ལས་ཐལ་ན་མ་ཡིན་པ་དང་། ནུབ་མོ་བྲལ་བ་དང་། བླ་གོས་དང་མཐང་གོས་བཅས་པའི་ཆོས་གོས་ཀྱིས་ལྗོངས་རྒྱུར་འགྲོ་བ་དང་། ཆོས་གོས་རུང་བ་མ་ཡིན་པ་ཇི་ཙམ་འདོད་པ་འཆང་ན་མ་ཡིན་པའོ། །གཞན་ཡང་ཕན་ཡོན་ལྔ་ཡོད་དེ། ཚོགས་ཤིང་ཟན་མ་ཡིན་པ་དང་། ཡང་ཡང་ཟ་ན་མ་ཡིན་པ་དང་། ཁྱིམ་རྣམས་སུ་མགྲོན་དུ་མ་བོས་པར་འགྲོ་ན་མ་ཡིན་པ་དང་། ཇི་ཙམ་འདོད་པའི་ཆོས་གོས་བཙལ་བ་དང་། སྟོན་ཟླ་འབྲིང་པོའི་ནས་དཔྱིད་ཟླ་ར་བའི་བར་གྱི་ནང་དེར་སྲ་བརྐྱང་བཏིང་བ་རྣམས་ཀྱི་རྙེད་པ་ཡིན་ནོ། །ཞེས་གསུངས་པ་ལྟར་ཏེ་ཇི་ལྟར་བཏིང་ན། དབྱར་གྱི་ནང་དུ་རྙེད་པར་བྱུང་བའི་ཆོས་གོས་སམ་ཆོས་གོས་ཀྱི་རྒྱུ་གང་ཡང་རུང་བ་གསོལ་བའི་ལས་ཀྱིས་སྲ་བརྐྱང་དུ་བྱ། དེ་ནས་གསོལ་གཉིས་ཀྱི་ལས་ཀྱིས་སྲ་བརྐྱང་བཏིང་བའི་དགེ་སློང་བསྐོས་ཏེ་དེས་སྲ་བརྐྱང་དེ་བཀྲུ་བ་དང་བཙེམ་པ་དང་ཚོས་ཀྱི་བསྒྱུར་བ་ལ་སོགས་པ་བྱས་ནས། སྟོན་འབྲིང་པོའི་བཅོ་ལྔ་ལ་སང་སྲ་བརྐྱང་འདི་ངས་ཀྱིས་ཁྱེད་ཅག་སོ་སོའི་ཆོས་གོས་ཀྱི་སྔགས་ཕྱུང་ཞིག་ཅེས་གོ་བར་བྱ་ཞིང་། དེ་ནས་དེས་སྲ་བརྐྱང་དྲི་དང་མེ་ཏོག་གིས་གཏོར་ཞིང་དྲི་ཞིམ་པོའི་བདུག་པས་བདུག་ནས་དགེ་འདུན་བསྡུས་ཤིང་རྒན་རིམ་གྱི་མཐའ་ནས་སྲ་བརྐྱང་འདིང་བའི་ཚིག་བརྗོད་ཅིང་དེ་དག་གིས་ཀྱང་ལེགས་པར་བཏིང་ངོ་སོགས་བརྗོད། དེ་ནས་སྲ་བརྐྱང་བཏིང་བའི་དགེ་སློང་གིས་སྲ་བརྐྱང་ཐོག་ཏེ་གཤང་གཅི་སར་འགྲོ་བ་དང་སྲ་བརྐྱང་དང་ཞག་ཏུ་འབྲལ་བ་ལ་སོགས་པ་མི་བྱ་ཞིང་དགེ་འདུན་གྱི་ནི་སྔར་བཤད་པ་རྣམས་ལ་བག་ཡངས་སུ་སྤྱོད་དུ་རུང་བ་སྟེ་ཆོས་གོས་རྣམས་ཀྱི་བྱིན་རླབས་སྲ་བརྐྱང་ལ་སྤྲོས་པ་ཡིན་ནོ། །དེ་ནས་དཔྱིད་ཟླ་ར་བའི་ཡར་ངོས་བཅོ་ལྔ་ལ་སྲ་བརྐྱང་འབྱིན་ཞིང་ཆོས་གོས་གསུམ་བྱིན་གྱིས་རློབ་པའོ། ། ༈ ཀཽ་ཤཱམྦཱིའི་གཞི་ནི། བཅོམ་ལྡན་འདས་ཡུལ་ཀཽ་ཤཱམྦཱིའི་གཙུག་ལག་ཁང་ན་གནས་པའི་ཚེ། ཡངས་པ་ཅན་གྱི་དགེ་སློང་སྡེ་སྣོད་གསུམ་པ་དག་དང་ཀཽ་ཤཱམྦཱིའི་དགེ་སློང་སྡེ་སྣོད་གསུམ་པ་དག་ཕྲག་དོག་གི་དབང་གིས་འཁྲུགས་ཤིང་རྩོད་པ་ལ་བཅས་ཏེ། དེ་ཡང་དགེ་འདུན་གྱི་ཁྲིམས་སུ་བཅས་པ་རལ་བའམ་ལྟུང་བ་བྱུང་བའི་དགེ་སློང་ནི་གནས་ནས་དབྱུང་བའི་ལས་དག་བྱ་སྟེ་དེས་ཀྱང་ཉེས་པ་དེ་ཆོས་བཞིན་དུ་ཕྱིར་འཆོས་ཤིང་དགེ་འདུན་ལ་མཐུན་པ་གསོལ་བ་ལས་སླར་འཐབ་པ་དང་རྩོད་པ་སོགས་མི་བྱ་ཞིང་། གནས་ནས་འབྱིན་པའི་དགེ་སློང་གིས་ཀྱང་དེས་མི་འདོད་པར་གླེང་ནས་འཐབ་པ་སོགས་མི་བྱ་ཞིང་དགེ་འདུན་གྱི་གསོལ་བཞིའི་ལས་ཀྱིས་ཉེས་པ་བྱུང་བའི་དགེ་སློང་དེ་གནས་དབྱུང་གི་ལས་བྱ་ཞིང་། དེས་ཀྱང་ཆོས་བཞིན་དུ་ཉེས་པ་ལ་ཉེས་པར་མཐོང་བར་བྱ་ཞིང་སླར་ཡང་མཐུན་པ་གསོལ་ཏེ་དགེ་འདུན་གྱིས་ཀྱང་གསོལ་བཞིའི་ལས་ཀྱིས་མཐུན་པ་སྦྱིན་ཞིང་། དེ་ནས་མཐུན་པའི་གསོ་སྦྱོང་ཀྱང་གསོལ་ཞིང་གནང་སྟེ་ལེགས་པར་གནས་པར་བྱའོ། ། ༈ ལས་ཀྱི་གཞི་ནི། ཕལ་ཆེར་དྲུག་སྡེ་དག་ལ་བརྟེན་ནས་བཅས་ཏེ། དེ་ཡང་དགེ་འདུན་གྱི་ལས་སུ་བྱ་བ་མང་པོ་ཞིག་ཏེ། དགེ་སློང་གང་ཞིག་ལྟུང་བ་བྱུང་ཞིང་ལྟུང་བ་བྱུང་བ་དེ་གླེང་ཞིང་དྲན་པར་བྱས་ནས་ལྟུང་བ་ལ་ལྟུང་བར་ཁས་མ་བླངས་པར་གནས་ནས་དབྱུང་བ་མི་བྱ་བ་དང་། དགེ་འདུན་གྱི་ལས་རྣམས་ལས་དགེ་སློང་ལྔའི་ཚོགས་ཀྱི་དགག་དབྱེ་བྱ་ཞིང་དེ་ལས་ཉུང་བས་མི་བྱེད་པ་དང་། དེ་བཞིན་དུ་བཅུས་བསྙེན་པར་རྫོགས་པ་དང་ཉི་ཤུས་གནས་ནས་དབྱུང་བ་བྱ་ཞིང་དེ་ལས་གཞན་པའི་ལས་གང་བྱེད་ཀྱང་བཞིའི་ཚོགས་ཡན་ཆད་ཀྱིས་བྱ་ཡི། གཅིག་དང་། གཉིས་དང་། གསུམ་གྱིས་མི་བྱ་བ་དང་ཡང་གསོལ་གཉིས་དང་གསོལ་བཞི་ལ་སོགས་པའི་ལས་གང་བྱེད་ཀྱང་དེ་དག་མ་ཚང་བར་གསོལ་བ་མེད་པར་ལས་སུ་བྱ་བ་གཉིས་སམ་གསུམ་བཟླས་པ་ཙམ་དང་ལས་བྱ་བ་མེད་པར་གསོལ་བ་འབའ་ཞིག་གིས་བྱེད་པ་རྣམས་ཀྱང་མི་བྱ་ཞིང་ཁས་བླང་བའི་ལས་མི་བྱེད་པ་དང་སྡིག་པའི་ལྟ་བ་འཛིན་པ་མི་སྤོང་བར་གནས་དབྱུང་བྱེད་པ་དང་། གཤེ་བ་དང་བསྐྲད་པར་འོས་པ་ལ་དེ་ལྟར་མི་བྱེད་པ་དང་། གནས་ནས་དབྱུང་བར་འོས་པ་སོགས་བག་ཡངས་སུ་གཞག་པར་མི་བྱ་བ་ལ་སོགས་པ་མང་པོ་ཞིག་གོ། ༈ དམར་སེར་ཅན་གྱི་གཞི་ནི། མཉན་ཡོད་དུ་དམར་སེར་ཅན་གྱི་དགེ་སློང་མང་པོ་འཐབ་མོ་དང་རྩོད་པ་བྱེད་པ་ལ་སོགས་པ་མང་པོ་ལ་བཅས་ཏེ། དགེ་སློང་གང་དག་འཐབ་པ་དང་རྩོད་པ་དང་མཚངས་འབྲུ་བ་ལ་བརྩོན་པར་བྱེད་པ་དེ་དག་ལ་ནི་དགེ་འདུན་གྱི་བསྡིག་པའི་ལས་བྱེད་དེ་དེ་ཡང་གླེང་བ་དང་། དྲན་པར་བྱ་བ་དང་། གཞི་དང་བཅས་པ་དང་། ཁས་བླང་བ་དང་། མངོན་སུམ་དུ་གྱུར་བ་བྱེད་ནས་དེ་ནས་གསོལ་བ་དང་བཞིའི་ལས་ཀྱིས་བསྡིག་པའི་ལས་བྱས་ནས། དེས་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ། གནས་མི་སྦྱིན། དགེ་ཚུལ་གཞག་པར་མི་བྱ། དགེ་སློང་མ་ལ་གདམ་པར་མི་བྱ། དགེ་སློང་གཞན་ལ་ཚུལ་ཁྲིམས་ཉམས་པ་དང་། ལྟ་བ་དང་སྤྱོད་པ་དང་། འཚོ་བ་རྣམས་ཉམས་པ་གླེང་བར་མི་བྱ། དྲན་པར་མི་བྱ། གདམས་ངག་སྦྱིན་པར་མི་བྱ། གསོ་སྦྱོང་མ་ཡིན། དགག་དབྱེ་མ་ཡིན། གསོལ་བ་དང་གཉིས་པ་དང་། གསོལ་བ་དང་བཞིའི་ལས་ཀྱང་མི་བྱའོ། །དེ་འགྱོད་པས་ཕྱིས་ནས་བསླང་བར་གསོལ་ཞིང་ཉེས་པ་དེ་དག་གཏོང་ན་ནི་དགེ་འདུན་གྱི་གསོལ་བཞིའི་ལས་ཀྱིས་བསླང་བར་བྱའོ། །དེ་བཞིན་དུ་དགེ་འདུན་ལྷག་མའི་ལྟུང་བ་བྱུང་ཞིང་དེ་སྤོང་བ་སོགས་བགྱིས་ཀྱང་ཡང་ནས་ཡང་དུ་ལྷག་མའི་ལྟུང་བ་འབྱིན་པ་ནི་སྨད་པའི་ལས་བྱའོ། །དགེ་སློང་ཁྱིམ་པ་སུན་འབྱིན་པའི་ལས་དག་བྱེད་པ་ནི་བསྐྲད་པའི་ལས་བྱའོ། །ཁྱིམ་བདག་ལ་བརྙས་ཐབས་བྱེད་པ་ནི་ཕྱིར་འགྱེད་པའི་ལས་སོ། །ལྟུང་བ་བྱུང་བ་མ་མཐོང་ངོ་ཞེས་སྨྲ་བ་དང་སྡིག་པའི་ལྟ་བར་སོང་བ་ནི་གནས་ནས་དབྱུང་བའི་ལས་བྱའོ། །དགེ་འདུན་ལྷག་མའི་ལྟུང་བ་བྱུང་ནས་བཅང་བར་བྱེད་པ་ནི་ཟླ་བ་ཕྱེད་ཀྱི་སྤོ་བ་སྦྱིན་པ་སྟེ་དེ་དག་ཀྱང་གླེང་བ་སོགས་དང་། གསོལ་བཞིའི་ལས་དང་ཕྱིས་བསླང་བ་སོགས་ཆོ་ག་འདྲ་སྟེ་ཁྱིམ་བདག་ལ་བརྙས་ཐབ་བྱེད་པ་ནི་ཕྱིས་ཁྱིམ་བདག་ལ་བཟོད་པར་གསོལ་དུ་གཞུག་གོ། ༈ གང་ཟག་གི་གཞི་ནི། འཆར་ཀ་ལ་སོགས་མང་པོ་ལ་བརྟེན་ནས་བཅས་ཏེ་དེ་ཡང་དགེ་འདུན་ལྷག་མའི་ལྟུང་བ་བྱུང་ནས་ཟླ་བ་ཕྱེད་བཅས་པ་ལ་ནི་ཟླ་བ་ཕྱེད་ཀྱི་སྤོ་བ་སྦྱིན་པ་དང་། མ་བཅབ་པ་དེ་ལ་ཞག་དྲུག་གི་མགུ་བར་བྱ་བ་སྦྱིན་པ་དང་། ཡང་གང་ཟག་གང་ཞིག་ལྷག་མའི་ལྟུང་བ་གཉིས་བྱུང་བ་དེ་གཉིས་སུ་མ་ཤེས་ཏེ་ཟླ་བ་གཉིས་ལོན་ནས་ཤེས་པ་དང་། ཟླ་བ་གཉིས་བཅས་ཏེ་གཅིག་ནི་དགེ་སློང་རྣམས་ལ་སྨྲས། གཅིག་ནི་མ་སྨྲས་པ་དང་དགེ་འདུན་གྱི་དེར་ཟླ་བ་གཉིས་ཀྱི་སྤོ་བ་བྱིན་ཏེ། དེ་སྤོ་བ་བགྱིད་བཞིན་པ་ལས་དེས་དགེ་འདུན་གྱི་ནང་དུ་མ་སྨྲས་པའི་ལྟུང་བ་གང་ཡིན་པ་དེ་ཡང་ཤེས་ན་དེ་ལ་ཡང་ཟླ་བ་གཉིས་ཀྱི་སྤོ་བ་སྦྱིན་ནོ། །དེ་བཞིན་དུ་ཟླ་བ་གཅིག་ཏུ་བཅབ་པ་ལ་ནི་ཟླ་བ་གཅིག་གི་སྤོ་བ་སྦྱིན་ནོ། །དེ་ལ་བསླབ་པ་ཉམས་པ་ཕྱིར་བཅོས་ཀྱི་རྣམ་གྲངས་མི་འདྲ་བ་མང་པོ་ཞིག་གོ། ༈ སྤོ་བའི་གཞི་ནི། དགེ་སློང་གང་ཞིག་དགེ་འདུན་ལྷག་མའི་ལྟུང་བ་རྣམས་ཕྱིར་བཅོས་ཀྱི་ཆོ་ག་སྟེ་མཉན་ཡོད་དུ་དགེ་སློང་མང་པོ་ལྷག་མའི་ལྟུང་བ་བྱུང་བས་འགྱོད་དེ་བབས་པ་ལ་བརྟེན་ནས་བཅས་ཏེ་དེ་ཡང་ལྷག་མའི་ལྟུང་བ་བྱུང་ནས་ཟླ་བ་ཕྱེད་བཅབ་ན་ཟླ་ཕྱེད་ཀྱི་སྤོ་བ་སྦྱིན་པ་དང་། ཟླ་གཅིག་བཅབ་ན་ཟླ་བ་གཅིག་གི་སྤོ་བ་སྦྱིན་པ་དང་། མ་བཅབ་ན་ཞག་དྲུག་གི་མགུ་བ་སྦྱིན་པ་སོགས་གསང་སྔགས་ཀྱི་གཞིར་ཤེས་པར་བྱས་ནས་སྤོ་བ་དངོས་ནི་འདི་ལྟར་དགེ་སློང་གི་དགེ་འདུན་ཡོངས་སུ་དག་པ་བཞི་ཡན་རྨད་ཀྱི་ཚོགས་བསྡུས་ནས་དེའི་དྲུང་དུ་དང་པོ་རང་ཉིད་ཀྱི་སྤོ་བ་བསྩལ་བར་གསོལ། དེ་ནས་དགེ་སློང་གཞན་ཞིག་གིས་གསོལ་བཞིའི་ལས་ཀྱིས་སྤོ་བའི་ཆོ་ག་བྱ་སྟེ་དེ་ལྟར་བྱིན་པའི་དགེ་སློང་དེས་ཀྱང་དགེ་སློང་གཞན་གྱི་ཕྱག་དང་ལྡང་བ་ལ་སོགས་ཞེ་ས་བདག་གིར་མི་བྱ། སྟན་གཅིག་ཏུ་འདུག་པ་དང་། དགེ་སློང་གཞན་གྱི་སྟན་དང་མཉམ་པ་ལ་ཡང་མི་འདུག་སྟེ། སྟན་དམའ་བར་འདུག་པ་དང་། བསོད་སྙོམས་ཀྱི་ཕྱིར་གཞན་གྱི་ཁྱིམ་དུ་མི་འགྲོ་ཞིང་འགྲོ་ན་ཡང་ཕྱི་བཞིན་འབྲང་བའི་དགེ་སྦྱོང་གི་ཚུལ་དུ་བྱའོ། །དེས་གཞན་རབ་ཏུ་བྱུང་བ་ལ་སོགས་ཀྱང་མི་བྱ་གཞན་གྱི་སྐྱོན་གླེང་བར་མི་བྱ་ཅི་ནས་ཀྱང་དགེ་སློང་གཞན་རྣམས་ལ་ཞེ་ས་དང་བཀུར་སྟི་དང་རིམ་གྲོ་དང་མངག་གཞུགས་སོགས་ཅི་ལྟར་འཚམ་པ་བྱེད་ཅིང་གནས་པའོ། ། ༈ གསོ་སྦྱོང་གཞག་པའི་གཞི་ནི། གང་ན་དགེ་སློང་གི་དགེ་འདུན་ཡོངས་སུ་དག་ནས་དགེ་འདུན་གྱི་གནས་བརྟན་གྱིས་སོ་སོར་ཐར་བའི་མདོ་འདོན་པར་བྱ་བ་ལས་དེས་དགེ་སློང་གི་འཁོར་མ་དག་པ་མཐོང་ན་དེ་ལ་ལྐོག་ཏུ་གླེང་བར་བྱ་ཞིང་མི་དྲན་ནོ་ཟེར་ན་དྲན་པར་བྱ་ཞིང་དྲན་ནས་ཆོས་བཞིན་དུ་ཕྱིར་བཅོས་བགྱིད་ན་ལེགས་པར་གསོ་སྦྱོང་བྱ་ཞིང་གལ་ཏེ་ཁྲོ་བར་བགྱིད་ན་དེ་ལ་སྐབས་འབྱེད་དུ་བཅུག །འོན་ཀྱང་གཞན་དུ་སྒྱུར་བར་བྱེད་ན་མི་སྨྲ་བར་གཞུག་གོ། དེས་ཀྱང་མ་བཏུབ་ན་གསོ་སྦྱོང་དང་དགག་དབྱེ་གཞག་པར་བྱའོ། །དེ་ཡང་ཚུལ་ཁྲིམས་དང་ལྟ་བ་ཉམས་པ་དང་། བསླབ་པ་སྤོང་བ་ལ་སོགས་པའི་ཉེས་པ་དགེ་སློང་དེར་ཡོད་བཞིན་དུ་དེ་གླེང་བ་ན་ཁྲོ་བ་དང་། གཞན་དུ་སྒྱུར་བ་ལ་སོགས་བྱེད་ནས་གསོ་སྦྱོང་གཞག་པ་བྱས་ན་ནི་ཆོས་བཞིན་དུ་གསོ་སྦྱོང་བཞག་པར་བྱས་པ་ཡིན་གྱི། དགེ་སློང་དེ་ཉེས་པ་བྱས་པ་མེད་བཞིན་དུ་གླེང་ཞིང་གསོ་སྦྱོང་བཞག་པར་བྱས་ན་ནི་ཆོས་མ་ཡིན་པར་གསོ་སྦྱོང་བཞག་པར་བྱས་པ་ཡིན་ནོ། ། ༈ གནས་མལ་གྱི་གཞི་ནི། ཝཱརཱ་ཎ་སཱིར་ལྔ་སྡེ་ལ་ཁྱིམ་བདག་དགེ་བཟང་གི་ཆེད་དུ་གནང་སྟེ། དེ་ཡང་དགེ་འདུན་གྱི་གཙུག་ལག་བརྩིགས་པ་སྟེ། དེ་ཡང་དབུས་སུ་དྲི་གཙང་ཁང་དང་། དེའི་གཡས་གཡོན་དུ་གནས་ཁང་གཉིས་བྱ་ལ། དེ་བཞིན་གནས་ཁང་དགུ་ལ་སོགས་པ་བྱའོ། །དེ་ཡང་དགེ་སློང་གི་གཙུག་ལག་ཁང་ནི་ལྔ་རྩེག །དྲི་གཙང་ཁང་ནི་བདུན་རྩེག །སྒོ་ཁང་སྟེང་གི་བསིལ་ཁང་ཡང་བདུན་རྩེག་ཏུ་བྱ་ལ། དགེ་སློང་མའི་གཙུག་ལག་ཁང་ནི་སུམ་རྩེག་དྲི་གཙང་ཁང་ནི་ལྔ་རྩེག་སྒོ་ཁང་གི་སྟེང་གི་བསིལ་ཁང་ཡང་ལྔ་རྩེག་ཏུ་བྱའོ། །དེ་ནས་གནས་མལ་འབོག་པའི་དགེ་སློང་དག་བསྐོ་ཞིང་དེས་ཀྱང་རྒན་རིམ་བཞིན་གྱི་གནས་ཁང་བསྐོ་བར་བྱ་སྟེ། དེ་དག་གིས་ཀྱང་ཆག་ཆག་དང་ཕྱག་དར་བྱེད་པ་ལ་སོགས་པར་ལེགས་པས་སྤྱད་དོ། །གལ་ཏེ་གནས་ཁང་མང་ཞིང་དགེ་སློང་ཉུང་བར་གྱུར་ན་ནི་དགེ་སློང་རེ་རེ་ལ་གནས་ཁང་མང་པོ་དག་ཕོག་སྟེ་དེ་དག་ཁ་ཅིག་ཏུ་ནི་སྔ་དྲོ། ཁ་ཅིག་ཏུ་ནི་ཕྱི་དྲོ་ལ་སོགས་པར་གནས་ཤིང་ཕྱག་དར་སོགས་བགྱིད་ལ་དགེ་སློང་མང་ཞིང་གནས་ཁང་ཉུང་བར་གྱུར་ན་ནི་རེ་རེ་ཡང་བགོ་བར་བྱ་ལ་དེ་ལ་སོགས་པའོ། ། ༈ རྩོད་པའི་གཞི་ནི། སེངྒེ་ལའི་རྒྱལ་པོའི་བུ་མོས་མུ་ཏིག་བྲེ་གསུམ་སངས་རྒྱས་དང་ཆོས་དང་དགེ་འདུན་ལ་སྐྱེས་སུ་ཕུལ་བ་དེའི་ཚེ་བཅོམ་ལྡན་འདས་ཀྱིས་ཆོས་ཀྱི་སྐལ་བ་ནི་ཆོས་སྨྲ་བའི་དགེ་འདུན་རྣམས་ལ་དབང་བར་གསུང་ན་དགེ་སློང་འདུལ་བ་འཛིན་པ་དང་། མདོ་སྡེ་འཛིན་པ་དང་། མ་མོ་འཛིན་པ་རྣམས་འདུམ་སྟེ་རྒྱ་ཆེར་རྩོད་པ་དང་ལྗོངས་ཞིག་ཏུ་དབྱར་གནས་པའི་དགེ་འདུན་མང་པོ་ལ་བཅས་ཏེ། དེ་ཡང་དགེ་སློང་དག་ཕན་ཚུན་རྩོད་པ་ན་རྩོད་པ་དེའི་ནང་ན་མེད་ཅིང་བསླབ་པ་ཡོངས་སུ་དག་ལ་ཚུལ་ཁྲིམས་དང་ལྡན་པའི་དགེ་སློང་ཞིག་ལ་རྩོད་པ་དེ་སེལ་དུ་གཞུག་གོ། དེས་སེལ་མ་ནུས་ན་དགེ་འདུན་གྱིས་སེལ་བར་བྱ་ཞིང་དེས་ཀྱང་མ་ནུས་ན་སྤྲོ་བ་དྲི་བ་དང་གསོལ་བ་དང་གཉིས་ཀྱི་ལས་ཀྱིས་དགེ་སློང་གསལ་བ་བཅུ་འམ་བཅུ་གཉིས་བསྐོ་བར་བྱ་ལ་དེ་དག་གིས་རྩོད་པ་དེ་ཞི་བར་བྱ་ལ་དེ་དག་གིས་ཀྱང་ཞི་བར་བྱ་མ་ནུས་ན་གསལ་བ་བས་ཀྱང་གསལ་བ་བརྒྱད་དམ་དགུ་བསྐོས་ནས་རྩོད་པ་དེ་ཞི་བར་བྱའོ། །དེས་ཀྱང་ཞི་མ་ནུས་ན་དགེ་འདུན་གྱི་རྩོད་པ་སྦེད་པའི་དགེ་སློང་བསྐོ་སྟེ་དེས་ཀྱང་དགེ་འདུན་གྱི་གནས་བརྟན་དག་ལ་གཏད་དེ་དེས་ཞི་བར་བྱ་མ་ནུས་ན་དགེ་སློང་སྡེ་སྣོད་གསུམ་པ་དག་ལ་གཏད་དོ། །དེ་དག་གིས་ཀྱང་མ་ནུས་ན་ཕྱོགས་གཞན་ན་གནས་པའི་དགེ་སློང་གནས་བརྟན་དང་སྡེ་སྣོད་གསུམ་པ་ལ་གཏད་ཅིང་དེ་དག་གིས་ཀྱང་རྩོད་པ་བྱེད་པའི་དགེ་སློང་གིས་ཞེ་ས་དང་བཀུར་སྟི་བྱེད་ཀྱང་དང་དུ་མི་བླང་ཤིང་ཆོས་ཀྱང་མི་སྟོན་གདམས་ངག་ཀྱང་མི་འབོག་ལ་རྩོད་པ་དག་མ་བྱེད་ཅིག་ཅེས་ཡང་དང་ཡང་དུ་བསྒོ་བར་བྱ་ཞིང་དེ་དག་གིས་ཀྱང་ཞི་བར་བྱེད་མ་ནུས་ན་ཚུལ་ཤིང་མང་པོ་བྲིམ་པའི་ཞི་བར་བྱེད་པ་སོགས་སོ། ། ༈ དབྱེན་གྱི་གཞི་ནི། རྒྱལ་པོའི་ཁབ་ཏུ་ལྷ་སྦྱིན་དང་དེའི་གྲོགས་བྱེད་པའི་དགེ་སློང་བཞིས་དགེ་འདུན་གྱི་དབྱེན་བྱེད་པར་རྩོམ་པ་ན་བཅས་ཏེ། དེ་ཡང་དགེ་འདུན་གྱིས་དང་པོར་དབྱེན་བགྱིད་པའི་དགེ་སློང་དེ་ལ་དགེ་འདུན་མ་དབྱེ་ཞིག་ཅེས་བཞག་སྟེ་བསྒོ་བར་བྱ་ཞིང་དེས་ཀྱང་མ་བཏུབ་ན་གསོལ་བ་དང་བཞིའི་ལས་ཀྱིས་བཞག་ཏེ་བསྒོའོ། །གྲོགས་བྱེད་པ་རྣམས་ལ་ཡང་དགེ་འདུན་འབྱེད་པའི་གྲོགས་མ་བྱེད་ཅིག་ཅེས་བསྒོ་ཞིང་དེས་ཀྱང་མ་བཏུབ་ན་གསོལ་བཞིའི་ལས་ཀྱིས་བསྒོ་བར་བྱའོ། །ཞེས་གསུངས་པ་རྣམས་ཏེ་དགེ་འདུན་གྱི་དབྱེན་ནི་སངས་རྒྱས་མི་བཞུགས་པ་ན་མི་འབྱུང་ངོ་། །དེས་ནི་དགེ་འདུན་གྱི་སོ་སོར་ཐར་བའི་གཞི་བཅུ་བདུན་པོ་དག་ཚང་བ་ཡིན་ཏེ་དེ་ལས་ཁང་པ་དང་གོས་རྣམས་ཀྱི་ཚད་ནི་ཅི་ཞེ་ན། གནས་ཁང་ནི་སྲིད་དུ་བདེ་བར་གཤེགས་པའི་མཐོས་མཐོ་བཅུ་གཉིས་ཞིང་དུ་བདུན་ཏེ་ཕལ་བའི་ཁྲུས་སྲིད་དུ་བཅོ་བརྒྱད་དང་ཞིང་དུ་ཕྱེད་བཅུ་གཅིག་པའོ། །སྣམ་སྦྱར་ནི་གསུམ་སྟེ། ཚེ་ཚད་ནི་སྲིད་དུ་ཁྲུ་ལྔ་དང་ཞིང་དུ་གསུམ་མོ། །འབྲིང་ཚད་ནི་དེ་ལས་ཅུང་ཟད་ཆུང་བ་དང་། ཆུང་ཚད་ནི་ཞིང་དུ་ཁྲུ་ཕྱེད་གསུམ་དང་སྲིད་དུ་ཕྱེད་ལྔ་པ་སྟེ་དེ་ལ་སྣམ་ཕྲན་གྱི་གྲངས་ནི། དགུ་པ་དང་། བཅུ་གཅིག་པ་དང་། བཅུ་གསུམ་པ་ཆུང་སྐོར་གསུམ་པ་དང་། བཅོ་ལྔ་པ་དང་། བཅུ་བདུན་པ་དང་། བཅུ་དགུ་པ་སྟེ་འབྲིང་སྐོར་གསུམ་དང་། ཉེར་གཅིག་པ་དང་། ཉེར་གསུམ་པ་དང་། ཉེར་ལྔ་པ་སྟེ་ཆེ་སྐོར་གསུམ་གྱི་དགུ་པོ་གང་བྱས་ཀྱང་རུང་ལ། དེ་ཡང་སྣམ་ཕྲན་གྱི་ཚད་སྔ་མ་གསུམ་ཕྱེད་གསུམ་དང་། བར་བ་གསུམ་ཕྱེད་བཞི། ཕྱི་མ་གསུམ་ཕྱེད་ལྔ་པའོ། །བླ་གོས་ནི་ཚད་སྣམ་སྦྱར་དང་འདྲ་ལ་རྔུལ་གཟན་དང་དེས་གཟན་ཀྱང་ཚད་དེ་དང་འདྲ། མཐང་གོས་སྲིད་དུ་ཁྲུ་ལྔའམ་བཞི། ཞིང་དུ་དོའོ། །གདིང་བ་ནི་སྲིད་དུ་ཁྲུ་གསུམ་ཞིང་དུ་ཁྲུ་དོ་དང་སོར་དྲུག་གོ། དེ་ལ་སྲིད་དུ་ཁྲུད་གང་བསྲིང་ཀྱང་འགལ་བ་ནི་མེད་དོ། །གཡན་དགབ་ནི་སྲིད་དུ་ཁྲུ་དྲུག །ཞིང་དུ་ཁྲུ་གསུམ་མོ། །རས་ཆེན་ནི་སྲིད་དུ་ཁྲུ་དགུ་ཞིང་དུ་ཁྲུ་གསུམ་དང་སོར་བཅོ་བརྒྱད་དོ། །ཤམ་ཐབ་དང་དེའི་གཟན་ནི་མཐང་གོས་དང་འདྲ་བའོ། །

༈ གཞི་བཅུ་བདུན་པོའི་ངེས་ཚིག་ནི། ཁྱིམ་དང་འཁོར་བ་ལས་རབ་ཏུ་འབྱུང་བས་ན་རབ་བྱུང་། བསླབ་པ་ཉམས་པ་གསོ་ཞིང་ཉེས་པ་སྦྱོང་བ་གསོ་སྦྱོང་། དབྱར་ཟླ་བ་གསུམ་དུ་དགག་པ་བྱས་པའི་བསླབ་པ་ལ་སྐབས་ཕྱེ་བས་དགག་དབྱེ། དབྱར་ཟླ་བ་གསུམ་གནས་གཅིག་ཏུ་གནས་པས་དབྱར་གནས། ཀོ་བ་དང་ལྤགས་པའི་གདན་གོས་རུང་མི་རུང་བསྟན་པ་ཀོ་ལྤགས། བཀྲེས་སྐོམ་དང་ནད་ལ་སྨན་དུ་གྱུར་པའི་བཟའ་བཏུང་གི་བྱེ་བྲག་རུང་བ་དང་མི་རུང་བ་བསྟན་པ་སྨན་གྱི་གཞི། གོས་ཀྱི་བྱེ་བྲག་མཚན་མས་གདབ་པ་དང་ཁ་དོག་སོགས་སྟོན་པ་གོས། ཆོས་གོས་ཀྱི་གཞིར་སྤང་ལེབ་ལྟར་བཏིང་བ་སྲ་བརྐྱང་། ཀཽ་ཤཱམྦཱིའི་དགེ་སློང་མང་པོ་ལ་བཅས་པས་ཀཽ་ཤཱམྦཱི། དགེ་འདུན་གྱི་ལས་གཙོ་བོ་དག་སྟོན་པ་ལས་ཀྱི། དམར་སེར་ཅན་གྱི་དགེ་སློང་མང་པོ་ལ་བཅས་པ་དམར་སེར་ཅན། གང་ཟག་རེ་རེ་ལ་ལྟུང་བ་བཅབ་པ་དང་མ་བཅབ་པའི་བྱེ་བྲག་སྟོན་པ་གང་ཟག །དེ་དག་ལ་ཟླ་ཕྱེད་སོགས་ཀྱི་སྤོ་པ་སྦྱིན་པ་སྤོ། ཉེས་པ་དུ་མ་ལ་བརྟེན་དེ་གསོ་སྦྱོང་བཞག་པར་བྱ་བ་གསོ་སྦྱོང་བཞག །གནས་ཁང་པ་དང་མལ་ཁྲི་སྟན་སོགས་ཀྱི་བྱེ་བྲག་སྟོན་པ་གནས་མལ། དགེ་འདུན་གྱི་རྩོད་པ་ཕལ་ཞི་བར་བྱ་བ་རྩོད་པ། དགེ་འདུན་ལྟ་བ་དང་སྟོན་པ་ཐ་དད་དུ་གྱུར་ཏེ་ཆ་གཉིས་སུ་ཕྱེ་བ་བསྡུམ་པ་དབྱེན་གྱི་གཞིའོ། །ལེགས་གསུང་འདུལ་བ་བསྟན་པའི་གཞི་ཡིན་ཡང་། །སྙིགས་མའི་རྒུད་པས་བཀབ་པའི་རབ་བྱུང་ཁྱུར། །ཡང་དག་ཕྱག་བཞེས་མཐོང་ཐོས་སྤངས་དེས་ཕྱིར། །སྔ་འགྱུར་གཞུང་གི་དགོངས་པ་ལ་དཔྱད་ནས། །ཆག་བཞག་ཙམ་དུ་དཔལ་སྤྲུལ་སྨྱོ་རོས་བྲིས། །ནོར་འཁྲུལ་གྱུར་ན་མཁས་པས་བཅོས་འཚལ་ཞིང་། །འཕྱ་བར་མི་བྱ་སྙིགས་མའི་གདོན་ལ་རྟོགས། །མངྒལཾ། །