SPCD-KABUM-02-KHA-005

🚧 This website is under continued development. We appreciate your patience!

Previous Text Back to Volume Page Next Text

Wylie title
Location	'phags mchog bka' 'bum Volume 2, Text 5, Pages (Folios to )
Author	འཕགས་མཆོག་རྡོ་རྗེ་
Less details More details
Citation	'phags mchog rdo rje. '*. In Mtshungs med grub sras 'phags mchog rdo rje mchog gi gsung 'bum rin po che* , Vol. : . Kathmandu: Khenpo Shedup Tenzin & Lama Thinley Namgyal, 2004.**
Genre

[edit]

༄༅། །བསྐྱེད་རིམ་གྱི་ཁྲིད་ཡིག་ཡང་ཡིག་ཟབ་པའི་མན་ངག་ཅེས་བྱ་བ་བཞུགས་སོ།། དཔལ་ལྡན་བླ་མ་རྫོགས་པའི་སངས་རྒྱས་དངོས། །མཁྱེན་བརྩེ་ནུས་པས་གང་འདུལ་དེར་སྟོན་ཅིང་། །ཁྱད་པར་སྨིན་གྲོལ་ལམ་བཟང་འགོད་མཛད་པའི། །བཀའ་དྲིན་མཚུངས་མེད་རྣམས་ལ་གུས་ཕྱག་འཚལ། །རྒྱལ་བའི་ཆོས་སྒོ་མཐའ་ཡས་གསུངས་པ་ཀུན། །ཉམས་ལེན་སྐབས་སུ་བསྐྱེད་རྫོགས་གཉིས་སུ་འདུ། །གང་ཟག་གསར་བུ་སྤྲོས་བཅས་དགའ་བ་རྣམས། །མ་ཧཱ་ཡོ་གའི་བསྐྱེད་རིམ་བསྒོམ་པར་བྱ། །དེ་ཡང་ཚིག་ཚོགས་བཤད་པའི་རིམ་པ་རྣམས། །ཡན་དུ་བཞག་ནས་ཆོ་གའི་འགྲོས་དང་བསྟུན། །ལག་ལེན་སྙིང་པོ་ཤིན་ཏུ་འཇུག་བདེ་ཕྱིར། །མཁས་གྲུབ་རྣམས་ཀྱི་གསུང་སྒྲོས་ཡང་ཟབ་ལས། །གཅེས་པར་བཏུས་ཏེ་གཞན་ལའང་ཕན་སེམས་བཅས། །བདག་གིས་སོར་མོའི་ཟློས་གར་ཅུང་ཟད་བསྒྱུར། །དེའང་རྒྱལ་བ་རྡོ་རྗེ་འཆང་གིས་གདུལ་བྱ་སེམས་ཅན་གྱི་སྐལ་པ་དང་འཚམས་པའི་ཆོས་སྒོ་བསམ་གྱིས་མི་ཁྱབ་པ་ཞིག་གསུངས་པ་ཀུན་གྱི་སྐྱེལ་སོ་ནི་འབྲས་བུ་གསང་ཆེན་རྡོ་རྗེ་ཐེག་པ་ཉིད་ཡིན་ལ། དེའི་ལམ་ནི་ཐབས་བསྐྱེད་པའི་རིམ་པ་དང་། ཤེས་རབ་རྫོགས་པའི་རིམ་པ་གཉིས་སུ་འདུས་ཏེ། སྣང་བ་རྡོ་རྗེ་འཆར་བའི་རྒྱུད་ལས། གང་ཕྱིར་རྡོ་རྗེ་འཆང་ཆེན་གྱིས། །གསུང་པའི་དོན་ནི་རྣམ་མང་ངོ་། །མདོར་བསྡུས་རྣམ་པ་གཉིས་ཡིན་ཏེ། །སྨིན་པ་དང་ནི་གྲོལ་བའོ། །ཞེས་དང་། གསང་འདུས་ལས། སངས་རྒྱས་རྣམས་ཀྱི་ཆོས་བསྟན་པ། །རིམ་པ་གཉིས་ལ་ཡང་དག་བསྟེན། །བསྐྱེད་པའི་རིམ་པ་དང་པོ་སྟེ། །རྫོགས་པའི་རིམ་པ་གཉིས་པའོ། །ཞེས་གསུངས་པ་ལྟར། འདིར་བསྐྱེད་རིམ་སྒོམ་ཚུལ་ཆོ་གའི་འགྲོས་དང་སྦྱར་ནས་གོ་བདེར་བརྗོད་པ་ལ། ཐོག་མར་སྨིན་བྱེད་ཀྱི་དབང་ཐོབ་དགོས། དེ་མ་ཐོབ་ན་ཉན་པ་ཙམ་ཡང་མི་དབང་ན་སྒྲུབ་པ་སོགས་ལྟ་ཅི་སྨོས། དབང་དེ་ཡང་ཐོབ་པ་ཙམ་གྱིས་མི་ཆོག་དེའི་སྲོག་རྩ་བའི་བླ་མའི་སྐུ་གསུང་ཐུགས་སོགས་ཀྱི་དམ་ཚིག་རྣམས་ཚུལ་བཞིན་དུ་སྲུང་ནུས་ན་མ་བསྒོམས་ཀྱང་སྐྱེ་བ་བདུན་ན་གྲོལ་བར་གསུངས། མ་ནུས་ན་གང་བརྩམ་གྱི་འབྲས་བུ་ཕྱིན་ཅི་ལོག་ཏུ་འགྱུར་བས་ཚེ་འདིར་བཀྲ་མི་ཤིས་ཤིང་། ཕྱི་མ་རྡོ་རྗེའི་དམྱལ་བ་ལས་འགྲོ་ས་མེད་པས་རྣམ་ཀུན་བག་ཡོད་ཀྱི་གཞི་བཟུང་བ་གལ་ཆེའོ། །དང་པོ་སྦྱང་གཞི་ནི་མདོ་སྔགས་ཐུན་མོང་དུ་གྲགས་པ་ལྟར་ན། ཆོས་ཉིད་དེ་བཞིན་ཉིད་དེ་བདེ་བར་གཤེགས་པའི་སྙིང་པོ། སྦྱང་བྱ་ནི་དེ་ལྟར་མ་རྟོགས་པའི་རྩལ་སྣང་ལ་བདག་ཏུ་བཟུང་བས་གནས་དོན་ལུས་ཀྱི་འཁྲུལ་སྣང་སྟེ་ཀུན་འབྱུང་ལས་ཉོན་དང་ཟག་བཅས་འབྲས་བུ་ཆ་དང་བཅས་པའོ། །སྦྱོང་བྱེད་ནི་སྤྱིར་ཐེག་ཆེན་གྱི་དགེ་རྩ་ཆེ་ཕྲ་གང་རུང་དང་། གསང་སྔགས་ལྟར་ན་འཁོར་འདས་སྣང་སྲིད་ཐམས་ཅད་ཡེ་སངས་རྒྱས་པའི་རང་བཞིན་དུ་ལྟ་བས་ཐག་བཅད་དེ་ལམ་ཐབས་ཤེས་བསྐྱེད་རྫོགས་ཀྱི་རིམ་པ་དབྱེར་མེད་ཉིད་དུ་བརྩོན་པའོ། སྦྱང་འབྲས་ནི། གློ་བུར་གྱི་སྒྲིབ་པ་གཟུང་འཛིན་མཐའ་དག་ལས་གྲོལ་ཏེ་དག་པ་གཉིས་ལྡན་སངས་རྒྱས་སྐུ་གསུམ་གྱི་བདག་ཉིད་གཞི་ལ་གནས་པའི་ཡོན་ཏན་མཐའ་དག་མངོན་དུ་གྱུར་པ་འབྲས་བུའོ། །མདོར་ན་རང་བཞིན་གནས་པའི་གཞི་ཡེ་ནས་འཆིང་བ་ལས་འདས་པ་ནི་སྦྱང་གཞི། འཁྲུལ་བ་བཏགས་པའི་གཞི་མེད་སྣང་བ་གློ་བུར་རྣམས་ནི་སྦྱང་བྱ། དེའི་སྦྱོང་བྱེད་ཡེ་ཤེས་ལམ་བདེན་གྱི་ཆ་གྱུར་འཁོར་དང་བཅས་པ་ནི་སྦྱོང་བྱེད་ལམ། འཁྲུལ་བ་དག་པའི་ཆ་ནི་བྲལ་བའི་འབྲས་བུ་ཡིན་ནོ། །དེའང་དོན་བསྡུ་ན། སྦྱང་གཞི་འོད་གསལ་སྙིང་པོ། སྦྱང་བྱ་གློ་བུར་དྲི་མ། སྦྱོང་བྱེད་བསྐྱེད་རྫོགས་རིམ་པ། སྦྱང་འབྲས་སྐུ་དང་ཞིང་ཁམས་མཐུན་པ་ཡིན་པས། སྦྱང་གཞི། སྦྱང་བྱ། སྦྱོང་བྱེད། སྦྱང་འབྲས་རྣམས་གོ་མྱོང་ཅི་རིགས་པ་དང་འབྲེལ་བསྒྲུབ་བྱའི་ལྷ་ནི། ཆོས་ཉིད་དོན་གྱི་ལྷ་རང་བྱུང་གི་ཡེ་ཤེས་བྱང་ཆུབ་སེམས་ཀྱི་འཁོར་ལོ་སྟེ་དེའི་ངང་ན་སྣང་སྲིད་ཀྱི་ཆོས་ཐམས་ཅད་ཡེ་ནས་འདུ་འབྲལ་མེད་ཀྱང་། དེ་ལྟར་མ་རྟོགས་པའི་དབང་གིས་རང་དང་ལྷ་ཐ་དད་སྣང་ནས། བདག་འཆིང་བ་ཀུན་ལྡན་ལས་ཉོན་གྱི་སྦུབས་སུ་འཐུམ། ལྷ་ནི་རྣམ་གྲོལ་ཡེ་ཤེས་ཀྱི་སྐུ་ཅན་ཏེ་རང་དོན་མཐར་ཕྱིན་ལ་གཞན་དོན་མཁྱེན་བརྩེ་ནུས་པ་ཚད་མེད་པའི་སྒོ་ནས་སྐུ་ཚད་མ་དང་། གསུང་རིག་སྔགས་དང་། ཐུགས་ཏིང་ངེ་འཛིན་གྱི་འཇུག་པའི་སྒོ་ནས་དངོས་གྲུབ་ཡིད་བཞིན་སྩོལ་ཞིང་རྣམ་གྲོལ་གཏན་དུ་བདེ་བའི་གོ་འཕང་ལ་ངེས་པར་འགོད་པའི་ཕྲིན་ལས་བསླུ་མེད་མཛད་པ་ཡིན།། ༈ །།དེ་ལྟར་སྒྲུབ་ཚུལ་ལ་ཕྱི་ནང་གསང་གསུམ་སྟེ་འདི་ནི་ཕྱི་ལྟར་སྒྲུབ་ཚུལ་གྱི་དབང་དུ་བྱས་ལ། དང་པོ་སྐྱབས་འགྲོ་སེམས་བསྐྱེད་གཉིས་ཏེ། གང་ལ་སྐྱབས་སུ་འགྲོ་ན་བླ་མ་མཆོག་གསུམ་དཀྱིལ་འཁོར་གྱི་ལྷ་ཚོགས། གང་སྐྱབས་སུ་འགྲོ་ན་རང་གཞན་སེམས་ཅན་ཐམས་ཅད། རྒྱུ་ཅི་ཕྱིར་འགྲོ་ན་སྐྱབས་གནས་ཀྱི་ཡོན་ཏན་ཤེས་པ། སྤྱིར་འཁོར་བའི་སྡུག་བསྔལ། སྒོས་རང་དོན་ཡིད་བྱེད། ཡང་སྒོས་ཐ་མལ་འཁྲུལ་འཛིན་གྱི་ཞེན་རྟོག་ལས་སྐྱོབ་པའི་ཕྱིར། ཚུལ་ཇི་ལྟར་ན་ཀུན་རྫོབ་ཏུ་སྟོན་པ་ལམ་གྲོགས་སོགས་ཀྱི་ཚུལ་དང་། དུས་ཇི་སྲིད་བྱང་ཆུབ་ཀྱི་བར་ཏེ་སྐྱབས་ཡུལ་རང་རྒྱུད་དུ་མ་གྲུབ་བར་དུ་སྐྱབས་སུ་མཆི་སྙམ་ནས་སྐྱབས་ཡུལ་གསལ་བཏབ་དང་ངག་འདོན་ལན་གསུམ་འདོན་ནོ།། ༈ །།དེ་ནས་སེམས་བསྐྱེད་ལ། ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ་ཐོབ་བྱ་བླ་མེད་ཀྱི་འབྲས་བུ་ཉིད་ཐོབ་པར་འདོད་པས་འབྲས་བུ་ལ་དམ་བཅའ་བ་སྨོན་པ་སེམས་བསྐྱེད་དང་། རྒྱུ་ལ་དམ་བཅའ་བ་འཇུག་པ་སེམས་བསྐྱེད་དེ་ཀུན་རྫོབ་བརྡ་ལས་བྱུང་བ་ལྟར་བསྒོམ་མོ།། ༈ །།དེ་ནས་སྔོན་འགྲོ་ལ་འགལ་རྐྱེན་བགེགས་བསལ་བ་དང་། མཐུན་རྐྱེན་སྒྲུབ་པ་དང་གཉིས་ཡོད། དང་པོ་ལ་རང་སེམས་སྟོང་པ་ཉིད་ཀྱི་རང་རྩལ་ཆུ་ལས་ཉ་འཕར་བའི་ཚུལ་གྱིས་ཁྲོ་བོའི་རྒྱལ་པོ་རྟ་མགྲིན་སོགས་མཚམས་ལྷ་གང་ཡིན་གྱི་སྐུར་ལམ་གྱིས་གསལ་བཏབ་ནས། བགེགས་གཏོར་བསང་སྦྱང་གིས་སྟོང་པར་བྱས། སྟོང་པའི་ངང་ལས་རིན་པོ་ཆེའི་སྣོད་དུ་གཏོར་རྫས་འདོད་ཡོན་ལྔ་ལྡན་གྱི་བཅུད་ཀྱིས་ཁེངས་པར་མོས་ལ། ཨོཾ་གྱིས་མ་དག་པའི་དྲི་མ་སྦྱངས། ཨཱཿས་རྫས་རྣམས་མང་པོར་སྤེལ། ཧཱུྃ་གིས་རང་རང་གང་མོས་ཀྱི་ལོངས་སྤྱོད་འཆར་བར་བྱས། ཞེས་ཟག་བཅས་ཀྱི་དྲི་མ་བསལ་ནས་ཡེ་ཤེས་ཀྱི་བདུད་རྩིར་སྦར་ཏེ་བྱིན་གྱིས་བརླབ་བོ། །ཐུགས་རྗེའི་འོད་ཟེར་གྱིས་བགེགས་རྣམས་མདུན་དུ་བཀུག་ལ་གཏོར་མ་སྔགས་དང་ཕྱག་རྒྱས་བསྔོས། བདེན་པའི་ཚིག་བརྗོད་ལ་གཏོར་མ་ཕྱི་རོལ་དོར། གལ་ཏེ་བསྒོ་བའི་བཀའ་ལ་མི་ཉན་པ་བར་གཅོད་རྩོམ་པའི་རིགས་རྣམས་ལ། བདག་ཉིད་ཁྲོ་བོའི་རྒྱལ་པོ་གསལ་བའི་ཐུགས་ཀ་ནས་སྤྲུལ་པའི་ཁྲོ་མཚོན་མེ་དཔུང་གི་ཆར་མི་ཟད་པ་སྤྲོས་པས་བགེགས་རྣམས་རྒྱང་རིང་དུ་བསྐྲད་པར་མོས་ཏེ། གུ་གུལ་གྱིས་བདུག་ཡུངས་ཐུན་གྱིས་བྲབ། དྲག་སྔགས་བརྗོད་ཅིང་། དེ་ནས་མཚམས་བཅད་ཀྱི་རྐུན་པོ་ཕྱིར་ཕྱུང་ནས་སྒོ་བསྡམས་པ་ལྟར་སྤྲུལ་པའི་ཁྲོ་མཚོན་གྱི་ཚོགས་རྣམས་ཚུར་འདུས་ཞུ་ལུགས་སུ་འབྲེལ་བའི་རྣམ་པ་ཅན་གྱི་འོག་ཐམས་ཅད་རྡོ་རྗེའི་ས་གཞི། ཕྱོགས་མཚམས་ཐམས་ཅད་རྡོ་རྗེ་གྱེན་ལངས་དང་ཆུ་རྒྱུག་སྤེལ་མའི་བརྩེགས་པའི་རྭ་བ་དབྱིབས་ཟླུམ་པོ་མཐོ་ཞིང་ཡངས་པ་ལྕགས་རི་ལྟ་བུས་བསྐོར་བ། དེ་སྟེང་རྡོ་རྗེའི་གུར་དབུས་མཐོ་ཞིང་མཐའ་རིམ་གྱིས་གཞོལ་བ་ཕྱིར་འཕྱང་བ་སོགས་རྒྱ་གུར་གྱི་ཐོད་འདྲ་བ་རྭ་བ་ལ་ཁ་གཅོད་བཏབ་པ་ལྟར་ཕུབ་ཅིང་། རྭ་གུར་བསྒྲིལ་མཚམས་ནས་ནང་དུ་རྡོ་རྗེ་དྲྭ་བའི་སྟེང་ཁེབ་པའི་བླ་བྲེ་དང་། རྭ་གུར་གྱི་ཕྱི་རོལ་དུ་རྡོ་རྗེའི་ཕྲེང་བ་ཁོ་ན་བསྣོལ་ཞིང་སྒྲིལ་བ་རྡོ་རྗེ་རྭ་བས་གཡོགས་པ་གུར་གྱི་རྩེ་མོར་རྡོ་རྗེ་ཕྱེད་པའི་ཏོག་དང་། རྭ་བའི་སྐེད་པ་ལ་རྡོ་རྗེའི་ཕྲེང་བས་བཅིང་བ། རྡོ་རྗེ་ཐམས་ཅད་ཀྱི་མདོག་སྔོན་པོ། དེ་ལས་སྤྲུལ་པའི་ཁྲོ་མཚོན་མེ་དཔུང་རྡོ་རྗེའི་ཚྭ་ཚྭ་འཕྲོ་བས་བགེགས་དང་བར་ཆད་ཐམས་ཅད་བསྲུང་ཞིང་མདོར་ན་བསྐལ་པའི་རླུང་ཡང་མི་ཐར་བའི་ནང་དུ་བསྲུང་བྱ་མི་ནོར་འཁོར་བཅས་ཚུད་པར་བསྒོམ་མོ།། ༈ །།དེ་ནས་བྱིན་དབབ་པ་ནི། གང་དབབ་པར་བྱ་བ་ཡེ་ཤེས་ལྷ་ཡི་འབྲས་ཆོས་རྣམ་ལྔའི་གཟི་བརྗིད་བྱིན་རླབས་ཆེན་པོ། གང་ལ་དབབ་ན་བདག་སྒྲུབ་པ་དང་གནས་ཁང་སྒྲུབ་པའི་ཡོ་བྱད་དང་བཅས་པ་ལ། གང་གི་ཆེད་དུ་དབབ་ན་ཐོབ་བྱ་རང་གནས་ཀྱི་ཡེ་ཤེས་གཙོ་བོར་གྱུར་པ་དངོས་གྲུབ་ཐམས་ཅད་ཐོབ་རུང་བའི་ནུས་མཐུའི་གཟི་བྱིན་བསྐྱེད་པ། ཚུལ་ཇི་ལྟར་དབབ་ན་རང་ཉིད་ཀྱི་མོས་གུས་དྲག་པོས་བསྐུལ་བས་རྩ་བ་གསུམ་གྱི་ལྷ་ཚོགས་ཐམས་ཅད་ཏིལ་གྱི་གང་བུ་ཁ་ཕྱེས་པ་ལྟར་མཁའ་ཁྱབ་ཏུ་སད་པ་རྣམས་ཀྱི་རྡོ་རྗེ་གསུམ་གྱི་བྱིན་རླབས་དང་དངོས་གྲུབ་ཐམས་ཅད་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པ་མཚོ་ཆེན་པོ་ལ་ཁ་བ་བབ་པ་ལྟར་བདག་གནས་ཡོ་བྱད་རྣམས་ལ་ཐིམ་པས་བྱིན་གྱིས་རློབས་པར་བསམ་ལ་བྱིན་འབེབ་ཀྱི་ཚིག་དབྱངས་བཅས་བརྗོད་ཅིང་ཁྱད་པར་གྱི་རྫས་བདུག་ཅང་ཏེའུ་སོགས་འཁྲོལ་ལོ།། ༈ །།དེ་ནས་མཆོད་པ་བྱིན་རླབས་སྤྱིར་སྦྱོང་བ་ལ། རང་ཉིད་ལྷར་གསལ་བའི་ཐུགས་ཀ་ནས་རྃ་ཡྃ་ཁྃ་གསུམ་འཕྲོས་པས་རཾ་ལས་མེ་བྱུང་བས་མཆོད་རྫས་ཀྱི་མ་དག་པའི་ཉེས་སྐྱོན་བསྲེགས། ཡྃ་ལས་རླུང་བྱུང་བས་དངོས་འཛིན་གཏོར། ཁྃ་ལས་ཆུ་བྱུང་བས་བག་ཆགས་བཀྲུས། སྭ་བྷཱ་བའི་སྔགས་སོགས་ཀྱིས་རང་བཞིན་སྟོང་པར་སྦྱངས་ཏེ་སྟོང་ཉིད་ནམ་མཁའ་ལྟ་བུའི་ངང་ལས་མཉམ་པར་བཞག་ཅིང་། ཐུན་མོང་ཕྱི་ནང་གི་ཉེར་སྤྱོད་རྣམས། བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ཨོཾ་ལས་རང་རང་གི་ས་བོན་ལས་བྱུང་བའི་ཡིད་དུ་འོང་བའི་ལྷ་རྫས་ཀྱི་མེ་ཏོག་སོགས་ཕྱི་མཆོད་དང་། རང་བྱུང་གི་རྫས་དབང་པོ་ལྔའི་མེ་ཏོག་སོགས་ནང་གི་ཉེར་སྤྱོད། འདོད་ཡོན་ལྔ། བཀྲ་ཤིས་རྫས་རྟགས། རྒྱལ་སྲིད་བདུན་སོགས་མཆོད་རྫས་ཀྱི་རྣམ་པ་མ་ཚང་བ་མེད་པ་སོ་སོའི་མཆོད་རྫས་ཐོགས་པའི་ལྷ་མོ་དཔག་ཏུ་མེད་པ་སྤྲུལ་ནས་ནམ་མཁའི་ཁམས་གང་བར་དམིགས་ལ་སྔགས་སོགས་བརྗོད། ཁྱད་པར་སྨན་གཏོར་རཀྟ་གསུམ་སྟེ་སྨན་ཕུད་ནི། རང་བྱུང་བདེ་སྐྱོང་གི་སྣོད་ཀ་པཱ་ལར། བཅུད་བདེ་གཤེགས་རིགས་ལྔ་ཡབ་ཡུམ་གྱི་དམ་ཚིག་རྫས། དབུས་སུ་མི་ཤ་དང་དྲི་ཆེན། ཤར་དུ་བ་གླང་གི་ཤ་དང་ཁུ་བ། ལྷོར་ཁྱི་ཤ་དང་ཤ་ཆེན་གྱི་དྭངས་མ། ནུབ་ཏུ་རྟ་ཤ་དང་རྡུལ། བྱང་དུ་གླང་ཆེན་གྱི་ཤ་དང་དྲི་ཆུ་རྣམས་རིམ་བཞིན། ཧྲཱིཿཔཱྃ་ཧཱུྃ་ལཱྃ་ཏྲྃ་མཱྃ་ཨོཾ་མཱུྃ་ཨཱ་ཏཱྃ་རྣམས་ལས་རིགས་ལྔ་ཡབ་ཡུམ་བཅུ་བསྐྱེད། མཉམ་པར་སྦྱོར་བའི་མཚམས་ནས་བདེ་བའི་སྒྲ་དང་འོད་ཟེར་གྱིས་ཕྱོགས་དུས་ཀྱི་རྒྱལ་བ་སྲས་བཅས་སྤྱན་དྲངས། འདོད་ཆགས་ཆེན་པོའི་མེས་འོད་དུ་ཞུ་ནས་རིགས་ལྔ་ཡབ་ཡུམ་ལ་ཐིམ་པས་མཁའ་གསང་ནས་བདུད་རྩི་དཀར་དམར་གྱི་རྣམ་པ་བྱུང་། ཐོད་པའི་ནང་ཁེངས། མཐར་རིགས་ལྔ་ཡབ་ཡུམ་འོད་དུ་ཞུ་ནས་བདུད་རྩི་ལ་ཐིམ་པས་ཁ་དོག་དྲི་རོ་ནུས་མཐུ་ཕུན་སུམ་ཚོགས་པ་ཡེ་ཤེས་ལྔའི་ངོ་བོར་གྱུར་པར་བསམ་ལ་སྔགས་བརྗོད། གཏོར་མ་ནི། གཏོར་གཞོང་རིན་པོ་ཆེའི་སྣོད་ས་གཞི་དང་མཉམ་པར་གཏོར་རྫས་འདོད་ཡོན་གྱི་ཕུང་པོ་ལྷ་རྣམས་ཇི་ལྟར་དགྱེས་པའི་ལོངས་སྤྱོད་ཀྱི་རྣམ་པ་བསམ་གྱིས་མི་ཁྱབ་པ་མཁའ་ཁྱབ་ཏུ་སྤྲུལ་ཞིང་སྤེལ་བ་དང་། སྤྱིར་གཏོར་མ་ལ་ཤེས་པ་གསུམ་སོགས་བཤད་པ་ཡོད་ཀྱང་འདིར་མཆོད་རྫས་སུ་ཤེས་པར་བྱའོ། །རཀྟ་ནི། ཡུམ་གྱི་མཁའ་མཚོན་བྱེད་བྷནྡྷ་རློན་པ་སྐྲ་དང་བཅས་པའི་ནང་དུ། འདོད་གཟུགས་གཟུགས་མེད་ཀྱི་ཁམས་གསུམ་མམ། ལུས་སྣང་བ་འདོད་ཁམས། ངག་ཕྱེད་སྣང་གཟུགས་ཁམས། སེམས་སྣང་མེད་གཟུགས་མེད་ཀྱི་ཁམས་ཏེ་སྒོ་གསུམ་དུ་ཞེན་ཅིང་ཆགས་པའི་ཀུན་རྟོག་ཐམས་ཅད། བསྡུས་ཤིང་སྦྱང་བས་ཆགས་མེད་བདེ་བ་ཆེན་པོའི་རཀྟའི་རྒྱ་མཚོར་བསྐྱིལ་བ་འདོད་ཡོན་གྱི་ཡོན་ཏན་འཕྲོ་བའི་རང་བཞིན་མཁའ་ཁྱབ་ཏུ་སྤེལ་བའོ།། ༈ །།ད་ནི་དངོས་གཞིའི་རིམ་པ་ལ་སྐུ་གསུང་ཐུགས་ཏེ། དང་པོ་སྐུ་ལ་ཏིང་འཛིན་རྣམ་གསུམ། དཀྱིལ་འཁོར་བསྐྱེད་པ། ཡེ་ཤེས་སྤྱན་དྲངས། བཞུགས་གསོལ། ཕྱག་འཚལ་མཆོད་བསྟོད་ལ་སོགས་ཏེ། མདོར་ན་དེ་བཞིན་ཉིད་ཀྱི་ཏིང་ངེ་འཛིན་ནི། ད་ལྟར་རང་རེ་རྣམས་ཀྱི་སེམས་ཀྱི་ཆོས་ཉིད་སྟོང་གསལ་འགག་མེད་ཀྱི་ཡེ་ཤེས་སྤྲོས་པའི་མཚན་མ་དང་བྲལ་བའི་རང་བཞིན་མཉམ་པ་ཉིད་དུ་བཞག་པས་རྡོ་རྗེ་ནམ་མཁའི་དཀྱིལ་ལྟར་གདོད་མ་ནས་རྣམ་པར་དག་པའི་ངོ་བོ་མཐོང་བ་ནི་དེ་བཞིན་ཉིད་ཀྱི་ཏིང་ངེ་འཛིན་གྱི་ངང་ནས། ཀུན་སྣང་གི་ཏིང་ངེ་འཛིན་ནི། སྟོང་ཉིད་དེ་བཞིན་ཉིད་ཀྱི་གནས་ལུགས་ལ་འཁོར་འདས་གཉིས་སུ་མ་གྲུབ་པས་རང་རྩལ་ལ་སྒྱུ་མའི་མཚང་མ་ཤེས་པས་བསླུས་པ་ལྟར། འཁོར་བའི་གནས་སུ་རང་དབང་མེད་པར་འཁྱམས་པའི་འགྲོ་བ་འདི་དག་གཏན་དུ་སྡུག་བསྔལ་ལས་བསྒྲལ་བར་བྱའོ་སྙམ་ནས་སེམས་ཅན་གྱི་ཁམས་ཐམས་ཅད་ལ་ཁྱབ་པའི་སྙིང་རྗེ་འཛིན་མེད་སྒྱུ་མ་ལྟ་བུར་སྐྱེས་པ་ཀུན་སྣང་གི་ཏིང་ངེ་འཛིན་ནོ། །རྒྱུ་ཡི་ཏིང་ངེ་འཛིན་ནི། སྟོང་པ་དང་སྙིང་རྗེ་ཟུང་དུ་འཇུག་པའི་སྤྲུལ་པ་ནི་ཡི་གེ་ཨཱཿཧཱུྃ་ཧྲཱིཿསོགས་སོ་སོའི་ས་བོན་གཙོ་བོའི་སྐུ་མདོག་དང་མཐུན་པ་དྭངས་མའི་སྲོག་ཆེན་པོ་ཉིད་རྣམ་པ་ཤིན་ཏུ་དྭངས་ཤིང་གསལ་ལ་གང་དུའང་འགྱུར་བ་མེད་ཅིང་ཅིར་ཡང་འཆར་དུ་རུང་བའི་གསལ་བརྟན་མི་ཕྱེད་པར་བྱས་པ་དེ་རྒྱུའི་ཏིང་ངེ་འཛིན་རྣམ་གསུམ་འདིས་མདོར་ན་འཆི་བར་སྐྱེ་གསུམ་གྱི་བག་ཆགས་སྦྱང་བ་དང་། སྦྱང་འབྲས་སྐུ་གསུམ་གྱི་རྟེན་འབྲེལ་འགྲིགས་པ་དང་། སྦྱོང་བྱེད་ཁམས་རང་གི་ངོ་བོའང་སྟོང་ཉིད་སྙིང་རྗེའི་སྙིང་པོ་ཅན་ཏེ། འདི་ལ་གོ་མྱོང་ཅི་རིགས་སྐྱེས་ན་བསྐྱེད་རིམ་ཕྱི་མ་རྣམས་ཀྱི་དག་སྦྱོང་རེ་རེ་བཞིན་ཞིབ་པར་མ་གྲུབ་ཀྱང་འགལ་བ་ཆུང་སྟེ། དོན་གྱི་གནས་རྣམས་འདིར་ཚང་བ་ཡིན་པས་ཐོག་མར་འདི་ཁོ་ན་ལ་གོམས་འདྲིས་བྱ་རྒྱུ་གལ་ཆེ་གསུངས།། ༈ །།ད་ནི་འབྱུང་རིམ་བསྐྱེད་པ་ལ། གོང་གི་སྲུང་འཁོར་གྱི་ནང་དུ་ནམ་མཁའ་གནས་པའི་རྒྱུ་ཡི་ས་བོན་ལས་ཨེ་ཡྃ་སོགས་ཆད་པ་ལས་འོད་ཟེར་འཕྲོས་པས་འབྱུང་བ་ལྔ་དང་དེར་འཛིན་གྱི་ཞེན་རྟོག་སྦྱང་། འབྱུང་ལྔའི་དྭངས་མ་ཡེ་ཤེས་ལྔའི་ཡོན་ཏན་ཐམས་ཅད་བསྡུས་ཏེ་ཞུ་བ་ལས་ཨེ་ལས་ནམ་མཁའ་མཐིང་ནག་ཆོས་འབྱུང་གི་གདེངས་ཀ་གྱེན་དུ་རྒྱས་ཤིང་རྩ་བ་ཕྲ་བ་ཐུར་དུ་ཟུག་པ། དེའི་སྟེང་དུ་ཡྃ་ལས་རླུང་གི་དཀྱིལ་འཁོར་ལྗང་གུ་དབྱིབས་རྡོ་རྗེ་རྒྱ་གྲམ་གྱི་རྣམ་པ་ལ་འོད་ཟེར་ལྗང་ནག་གི་མུ་ཁྱུད་ཅན། རྃ་ལས་མེ་དཀྱིལ་དམར་པོ་གྲུ་གསུམ་པ་ལ་མེ་ལྕེ་འབར་བས་བསྐོར་བ། བྃ་ལས་ཆུ་དཀྱིལ་དཀར་པོ་ཟླུམ་པོའི་མཐའ་ལ་འོད་ཟེར་དཀར་པོས་བསྐོར་བ། ལྃ་ལས་ས་ཡི་དཀྱིལ་འཁོར་གསེར་གྱི་རང་བཞིན་གྲུ་བཞི་ལ་འོད་ཟེར་སེར་པོས་བསྐོར་བ། སུྃ་ལས་རིན་པོ་ཆེ་སྣ་བཞི་ལས་གྲུབ་པའི་རི་རབ་བང་རིམ་བཞི་པ་དབྱིབས་གྲུ་བཞི་ལ་མཐར་ལྕགས་རིས་བསྐོར་བ་རྣམས་རེག་ལ་མ་འབྱར་བ་བསྒོམ།། ༈ །།དེ་ནས་གཞལ་ཡས་ཁང་ལ་ས་བོན་ལས་ཡི་གེ་བྷྲཱུྃ་ཁ་དོག་ལྔ་ལྡན་ཆད་རི་རབ་ཀྱི་སྟེང་དུ་བབས་ནས་འཕྲོ་འདུས་འོད་དུ་ཞུ་བ་ལས། རྒྱུ་བསོད་ནམས་དང་ཡེ་ཤེས་ཀྱི་ཚོགས་གཉིས་ལས་གྲུབ་པ། ངོ་བོ་ཡེ་ཤེས་ལྔའི་རང་བཞིན་རྣམ་པ་དབྱིབས་དང་རྒྱན་བཀོད་པ་ཕུན་སུམ་ཚོགས་པ་སྟེ་རྒྱུ་རིན་པོ་ཆེ་སྣ་ཚོགས་པའི་རང་བཞིན་ཅན་གྱི་པདྨ་འདབ་མ་སྟོང་དང་ལྡན་པ་ལྟེ་བ་ཟླུམ་པོ་ལེབ་ཆགས་ཅན་ཁ་དོག་ལྗང་གུ་གེ་སར་དམར་པོ་ཟིལ་ཕོང་དང་བཅས་པ། དེ་སྟེང་ཉི་དཀྱིལ་དྭངས་ཤིང་གསལ་བ་གེ་སར་དང་མཉམ་པ་དེའི་དབུས་སུ་སྣ་ཚོགས་རྡོ་རྗེ་ལྟེ་བ་མཐིང་ག་གྲུ་བཞི་པ་ཤར་གྱི་ར་གསུམ་དཀར་པོ་སོགས་ཕྱོགས་མདོག་ཅན། དེའི་ལྟེ་བའི་གཞི་ལ་གཞལ་ཡས་ཁང་ཀུན་ནས་གྲུ་བཞི་པ་རིན་པོ་ཆེ་ལྔའི་རྩིག་པ་ཕྱི་རིམ་ནང་ནས་གཙོ་བོའི་ཁ་དོག་དང་མཚུངས་པའི་ཕྱི་རིམ་ལྔ་ཅན་ཕྱིའི་འགྲམ་སྨད་ན་འདོད་ཡོན་གྱི་སྣམ་བུ་རིན་པོ་ཆེ་དམར་པོའི་སྟེགས་བུས་བསྐོར་བ་ལ་ཤར་སྟོད་ནས་རིམ་པར་མཆོད་པའི་ལྷ་མོ་གཉིས་གཉིས་ཞལ་ནང་བསྟན་དུ་ཡོད་དེ་སྐུ་མདོག་ཕྱག་མཚན་ཀྱང་། པི་ཝཾ་མ་སྔོན་མོ། གླིང་བུ་མ་སེར་མོ། རྔ་ཟླུམ་མ་དམར་མོ། རྫ་རྔ་མ་ལྗང་གུ་རྣམས་རང་རང་གི་ཕྱག་མཚན་འཛིན་པ། དེ་བཞིན་དུ་ལྷོར་སྒེག་མོ་སྔོན་མོ་དང་བཞད་མ་དམར་མོ་གཉིས་རང་རྒྱ་ཅན། གླུ་མ་སེར་མོ་ཏིང་ཤག་འཛིན་པ། གར་མ་ལྗང་གུ་གར་རྒྱ་ཅན། ནུབ་ཏུ་མེ་ཏོག་མ་སེར་མོ། སྤོས་མ་དམར་མོ། སྣང་གསལ་མ་དམར་མོ། དྲི་མ་ལྗང་གུ་རྣམས་རང་རང་གི་ཕྱག་མཚན་འཛིན་པ། བྱང་དུ་གཟུགས་མ་དཀར་མོ་མེ་ལོང་། རོ་མ་དམར་མོ་ཟས་གཞོང་། རེག་མ་སེར་མོ་ན་བཟའ། ཆོས་དབྱིངས་མ་སྔོན་མོ་ཆོས་འབྱུང་འཛིན་པ་ཐམས་ཅད་ཀྱང་ཞི་ཚུལ་སྒེག་ཉམས་ཅན་དར་དང་རིན་པོ་ཆེས་བརྒྱན་པ་དང་། སྒོ་ཁྱུད་དང་ཤར་ལྷོའི་མཚམས་རྣམས་ཟླ་ཕྱེད་རྡོ་རྗེ་རེ་རེས་མཚན་པ། རྩིག་པའི་སྟེང་གི་ཕ་གུ་སེར་པོ་ལ་རིན་པོ་ཆེའི་ཕྲ་ཚོམ་གྱིས་མཛེས་པ་བད་ཀྱི་ཚུལ་དུ་འཕྱང་བ་དེའི་སྟེང་དུ་ཀ་ཐུང་གིས་བཏེགས་པའི་གདུང་མ། དེའི་སྟེང་དུ་ཐོག་ཕུབ་པའི་ཕྱམ་གྱི་སྣ་ལ་རྫི་པ་ཏྲའི་ཁ་ནས་རིན་པོ་ཆེའི་དྲྭ་བ་དྲྭ་ཕྱེད་དང་། གཞན་ཡང་མེ་ཏོག་གི་ཕྲེང་བ། དར་དཔྱངས། མེ་ལོང་། ཟླ་ཕྱེད། རྔ་ཡབ་རླུང་གིས་བསྐྱོད་པ་སོགས་དང་། ཁྱིམ་གྱི་སྟེང་རྒྱ་ཕིབས་འདོད་སྣམ་གྱི་ཕྱི་མཐའ་ཁེབ་པའི་འོག་ཏུ་རིན་པོ་ཆེ་དཀར་པོའི་ཤར་བུ་སྤྱི་བླུག་མགོ་ཐུར་བལྟས་ལྟ་བུ་བསྒྲིགས་པ། རྒྱ་ཕིབས་ཀྱི་འོག་ཏུ་དེའི་རྩ་བ་གནོད་སྦྱིན་རིན་པོ་ཆེའི་སྤང་ལེབ་དཀར་པོ་བང་རིམ་གསུམ་མམ་བཞི་ཡོད་པ་བསླངས་ནས་བསྒྲིག་པར་པུ་ཤུ་མཆོད་རྟེན་རིས་སུ་གྲགས། གཞལ་ཡས་ཁང་གི་ནང་དུ་ཀ་བ་བརྒྱད་ཀྱིས་བཏེགས་པའི་གདུང་བཞི་བསྣོལ་བའི་སྟེང་དུ་ཕྱམ་ཉི་ཤུ་རྩ་བརྒྱད་བཏང་བས་དབུས་ཀྱི་མཐོངས་ཀ་མ་གཏོགས་བཀབ་པའི་སྟེང་དུ་རིན་པོ་ཆེའི་སྤང་ལེབ་བསྒྲིགས་པ༑ ཐོག་རིན་པོ་ཆེའི་ཕྱམ་གཅལ་དུ་བཀྲམ་པ། དབུས་ཕྱུར་བུ་ཞེས་པའི་དོན་མཐོངས་ཀའི་ཟུར་བཞིར་ཀ་བའམ་ཤིང་བརྩེགས་ཀྱི་བཀོད་པས་བཏེགས་པའི་སྟེང་དུ་རྒྱ་ཕིབས་བཀལ་བའི་རྩེ་མོ་རྡོ་རྗེ་རིན་པོ་ཆེ་ཏོག་གིས་མཛེས་པར་བྱས་པ། ཕྱོགས་ཀྱི་སྒོ་བཞིའི་ཕྱི་རོལ་ཀ་བ་བཞི་བཞིའི་སྟེང་ན་གདུང་བཞི་བསྣོལ་མར་བཏང་བ་ནི་སྒོ་ཕིབས་སམ་རྟ་བབས་ཞེས་ཏེ། རྒྱུའི་རྟ་བབས་ནི་སྒོ་ཕུབ་གཡས་གཡོན་དང་། སྒོ་ངོས་ཀྱི་ཕྱི་མཚམས་སུ་ཐེམ་སྐས་བཞི་བཞི་སྟེ་བརྒྱད་དོ། །འབྲས་བུའི་རྟ་བབས་ནི། སྒོ་སྟེང་གདུང་བཞི་བསྣོལ་མའི་སྟེང་དུ་རྟ་བབས་སྣམ་བུ་བཞི་མའམ། བརྒྱད་ཀྱི་དབང་དུ་བྱས་ན་རིམ་པར། རྟ་རྐང་། ཆུ་སྐྱེས། ཟར་ཚགས། རྣ་འཕྱང་། ཆུན་འཕྱང་། ཤར་བུ། རྒྱ་ཕིབས་ཏེ་བརྒྱད་དོ། །རྒྱ་ཕིབས་ཀྱི་ཟུར་བཞིར་ཁྱུང་མགོའི་ལྐོག་མ་ནས་དྲིལ་བུ་རླུང་བསྐྱོད་དང་བཅས་པ་དཔྱངས་བ། སྟེང་དུ་པདྨའི་ལྟེ་བར་གསེར་གྱི་འཁོར་ལོ་དང་གཡས་གཡོན་གཉིས་སུ་ཐབས་ཤེས་རི་དྭགས་ཕོ་མོ་རྭ་ཡོད་མེད་གཉིས་ཀྱིས་བརྟེན་པའི་སྟེང་དུ་རིན་པོ་ཆེའི་གདུགས་དཀར་པོས་མཛེས་པ། གཞན་ཡང་རྒྱན་སྣ་ཚོགས་ཀྱིས་མཛེས་པར་སྤྲས་པར་ཕྱི་གསལ་ནང་གསལ་དྭངས་ཤིང་ཐོགས་པ་མེད་པ་སྟེ་སྤྱི་ཙམ་དུ་ཡིན་ལ། དེ་ལྟར་སྒོམ་པའི་ཚེ་སོ་སོའི་དག་པ་མ་དྲན་ན་བསྒོམ་བྱ་རང་རྒྱུད་པར་གོལ་བའི་ཕྱིར་སངས་རྒྱས་ཀྱི་ཡོན་ཏན་དང་བསམ་གྱིས་མི་ཁྱབ་པའི་ཐུགས་རྗེ་དང་ཕྲིན་ལས་ཀྱིས་བསྡུས་པའི་རྣམ་བྱང་སོགས་ཀྱི་ཆོས་རྣམས་གདུལ་བྱ་འདུལ་བའི་སླད་དུ་གཞལ་ཡས་ཁང་དང་ལྷ་སྐུའི་ཕྱག་རྒྱའི་རྣམ་པར་ཤར་བ་ཡིན་པས་དེ་ལྟར་དྲན་པ་བྱ་དགོས། དེ་ཡང་ལས་དང་པོ་པས་སྒོམ་ཐེངས་གཅིག་ལ་མཐའ་དག་དྲན་པར་མ་ནུས་ན་གཞལ་ཡས་ཁང་གི་ཆོས་དེ་དག་སངས་རྒྱས་ཀྱི་སྤངས་རྟོགས་བསམ་གྱིས་མི་ཁྱབ་པའི་ཡོན་ཏན་རྣམས་དེ་དང་དེའི་མཚོན་བྱེད་དུ་ཤར་བ་ཡིན་ནོ་སྙམ་པས་ཀྱང་དག་དྲན་རྗེས་མཐུན་པར་འགྱུར་རོ།། ༈ །།དེ་ནས་གདན་བསྐྱེད་པ་ལ། གཞལ་ཡས་ཁང་གི་དབུས་ཀྱི་ལྟེ་བར་པདྨ་དང་། དེའི་སྟེང་དུ་ཉི་མའི་དཀྱིལ་འཁོར་དམར་པོ་ཟླ་བའི་དཀྱིལ་འཁོར་དཀར་པོ་ཉ་གང་བ་གཉིས་བརྩེགས་སོགས་བསྒོམ་པ་སྟེ་དཔེར་ན་སྒྱུ་འཕྲུལ་ལྟར་ན་གཙོ་བོ་རིགས་ལྔ་ལ་སྲོག་ཆགས་དང་རིན་པོ་ཆེའི་ཁྲི་དང་ཉི་ཟླ་པདྨ་སྟེ་ལྔ་བརྩེགས། སེམས་དཔའ་རྣམས་ལ་ཉི་ཟླ་པདྨ་གསུམ་བརྩེགས། ཐུབ་དྲུག་ལ་པད་རྐྱང་། སྒོ་བ་ཁྲོ་བོ་ལ་ཉི་རྐྱང་། བྱ་བྱེད་གཉིས་ལ་ཉི་ཟླ་པདྨ་རིན་པོ་ཆེའི་ཁྲི་སྟེ་བཞི་བརྩེགས་གསུངས་པ་ལྟ་བུས་མཚོན་ཏེ་རང་གཞུང་སྐབས་ཐོབ་སྦྱར་ཤེས་དགོས་ཤིང་གང་ལྟར་ཡང་གདན་གྱི་དག་སྦྱོར་ལ། སེང་གེའི་ཁྲི་ནི་མི་འཇིགས་པ་བཞི། དེ་བཞིན་གླང་ཆེན་སྟོབས་བཅུ། རྟ་ནི་རྫུ་འཕྲུལ་གྱི་རྐང་པ་བཞི། རྨ་བྱ་དབང་བཅུ། ཤང་ཤང་ཕྲིན་ལས་བཞིས་འགྲོ་བ་འདུལ། ཉི་ཟླ་གཉིས་ནི་ཐུགས་རང་བཞིན་གྱི་རྣམ་པར་དག་པས་འོད་གསལ་ཞིང་ཐབས་ཤེས་ཟུང་དུ་འཇུག་པ། པདྨ་ནི་ཉེས་པའི་སྐྱོན་གྱི་མ་གོས་པ། རིན་ཆེན་ནི་གདུལ་བྱའི་རེ་བ་ཡོངས་སུ་སྐོང་བའི་བརྡའོ།། ༈ །།ད་ནི་ལྷ་བསྐྱེད་པའི་རིམ་པ་ལ་སྐྱེ་གནས་བཞིའི་བག་ཆགས་སྦྱང་ཚུལ་མང་སྟེ། དཔལ་སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་བཅས་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །དང་པོ་ཤིན་ཏུ་སྤྲོས་བཅས་སྒོང་སྐྱེས་སྦྱོང་བྱེད་ལ་བདག་སྲས་སུ་གཞན་བྱ་བ་ལ་ལྔ། གཞན་གྱི་སྲས་སུ་བདག་བྱ་བ་ལ་བརྒྱད་སོགས་ཀྱི་རྣམ་ཚུལ་མང་བས་འདིར་བསྡུས་པ་ཉིད་སྟོན་ཏེ་སྐྱབས་སེམས་ཀྱི་རྗེས་འདི་ལྟར་སྒོ་ང་ལས་སྐྱེ་བ་རྣམས་ལན་གཉིས་སུ་སྐྱེ་བ་ལྟར། རང་ཉིད་སྐད་ཅིག་གིས་གཙོ་བོ་ཡབ་ཡུམ་གསལ་བཏབ་ལ་མདུན་མཁར་བསྒོམ་བྱའི་དཀྱིལ་འཁོར་སྤྱན་དྲངས་པའོ། །གསལ་གཏབ་སྟེ་མཆོད་བསྟོད་གསལ་གདབ་སོགས་བྱས་རྗེས་སླར་ཡང་བཛྲ་མུས་སྟོང་པའི་ངང་དུ་མཉམ་པར་བཞག་པ་ཙམ་ཁྱད་པར་གྱི་ཆོས་སུ་ངེས་པར་བྱས་ནས། ཐུན་མོང་དུ་མངལ་སྐྱེས་སྦྱང་བྱེད་ལའང་མངོན་བྱང་ལྔ་བསྐྱེད་དང་མངོན་བྱང་བཞི་བསྐྱེད། །ཆོ་ག་གསུམ་བསྐྱེད། རིམ་པ་གསུམ་དུ་གསུངས་པ་དེའང་། དྲོད་སྐྱེས་སྦྱང་ཚུལ་ཨ་ནུ་ཡོ་ག་དང་རྫུས་སྐྱེས་སྦྱང་ཚུལ་སྤྲོས་མེད་ཨ་ཏི་ཡོ་གའི་དགོངས་པ་སོགས་མང་ཞིང་། བསྡུ་ན་སྔ་འགྱུར་རྙིང་མའི་ཕྱོགས་འདིར་མངལ་སྐྱེས་སྦྱོང་བྱེད་བསྡུས་པ་རྡོ་རྗེའི་ཆོ་ག་སུམ་བསྐྱེད་རང་བཤད་པ་ཡིན་ཞིང་། དེའང་ཉི་ཟླ་ས་བོན་ཡི་གེ། ཕྱག་མཚན་གནས་འགྱུར་གྱིས་སྐུ་ཡོངས་རྫོགས་གསལ་དགོས་ཤིང་། འདིའི་སྦྱང་བྱ་བར་དོའི་རྣམ་ཤེས་དེ་ཕ་མའི་ཁུ་ཁྲག་གི་དབུས་སུ་ཞུགས་ནས་རིམ་གྱིས་ལུས་རྫོགས་པ་དང་མཐུན་པར། གདན་ཉི་མ་མའི་རྡུལ། ཟླ་བ་ཕའི་ཁུ་བ། ས་བོན་རྒྱུའི་ཏིང་ངེ་འཛིན་ཡི་གེ་གདན་ལ་བབས་པ་བར་དོའི་རྣམ་ཤེས་མའི་མངལ་དུ་དཀར་དམར་ཚོགས་པ་ལ་འཇུག་མ་རག་གི་གནས་སྐབས་དེ་ཡིན། ས་བོན་ལྷ་གང་ཡིན་གྱི་ཕྱག་མཚན་དུ་བསྒྱུར་བ་ནི་ཁམས་དཀར་དམར་གྱི་དབུས་སུ་རྣམ་ཤེས་ཞུགས་ནས་ཁུ་རྡུལ་སེམས་གསུམ་གཅིག་ཏུ་འདྲེས་པ་དེ་སྦྱོང་། དེ་ལས་འོད་ཟེར་སྤྲོ་བསྡུ་ནི་མངལ་གྱི་ལུས་དེ་ཉིད་འབྱུང་བ་བཞིའི་བྱེད་ལས་ཀྱིས་ཕུང་ཁམས་སྐྱེ་མཆེད་རིམ་གྱིས་གྲུབ་པ་དང་། ཕྱག་མཚན་ཏེ་ཡོངས་སུ་གྱུར་པ་ལས་སྐུ་ཡོངས་སུ་རྫོགས་པ་ནི་མངལ་གྱི་སེམས་ཅན་དེ་རྣམས་ལུས་རྫོགས་ནས་བཙས་པའི་བར་གྱི་བག་ཆགས་རྣམས་སྦྱོང་བར་བྱེད་པ་ཡིན་ལ། དེ་ལྟར་བསྐྱེད་ཚུལ་འདིས་ནི་སྐྱེ་གནས་གཞན་གྱི་བག་ཆགས་རྣམས་ཀྱང་ཞར་ལ་སྦྱང་བར་ནུས་པའི་ཚུལ་རྣམས་གསུངས་འདུག་གོ། །སྦྱོང་བྱེད་ནི་ནམ་མཁར་གནས་པའི་རྒྱུའི་ས་བོན་ཡི་གེ་ཉིད་གདན་གྱི་སྟེང་དུ་བབས་པ་ནི་གསུང་ཡིག་འབྲུའི་ཆོ་ག་དེ་རིགས་ཀྱི་ཕྱག་མཚན་གང་ཡིན་ལ་སྙིང་པོ་ས་བོན་གྱི་ཡི་གེས་མཚན་པར་གྱུར་པ་ལས་འོད་ཟེར་དཔག་ཏུ་མེད་པ་འཕྲོས་པས་ཕྱོགས་བཅུའི་སངས་རྒྱས་རྣམས་མདུན་གྱི་ནམ་མཁར་སྤྱན་དྲངས་ནས་འོད་ཟེར་གྱི་ཚུལ་དུ་ཕྱག་མཚན་ས་བོན་དང་བཅས་པ་ལ་ཐིམ་པ་ནི་ཐུགས་ཕྱག་མཚན་གྱི་ཆོ་གའོ། །ཕྱག་མཚན་ས་བོན་དང་བཅས་པ་དེ་ཡོངས་སུ་གྱུར་པ་ལས་འབྲས་བུའི་རྡོ་རྗེ་འཛིན་པ་བསྐྱེད་བྱའི་ལྷ་གང་ཡིན་གྱི་སྐུ་མཚན་དཔེ་གསལ་རྫོགས་སུ་གྱུར་པ་ནི་སྐུ་ཡོངས་སུ་རྫོགས་པའི་ཆོ་གའོ།། ༈ །།དེ་ནས་བསྐྱེད་པ་ལྷའི་མཚན་ཉིད་ནི་ཡི་དམ་གང་ལ་བརྟེན་པའི་མངོན་རྟོགས་ལྟར་བསྒོམ་པར་བྱ་བ་ལས་མཐའ་གཅིག་ཏུ་ངོས་བཟུང་དཀའ་ཡང་། སྤྱི་ཙམ་དུ་བསྒོམ་བྱའི་ལྷ་ཞི་བ་དང་ཁྲོ་བོ་གཉིས་ཡིན་པས་ཞི་བ་རྣམས་ནི་ཞི་ཚུལ་དགུ་དང་སྔ་འགྱུར་ཕལ་ཆེར་ལ་ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་སོགས་དང་། ཁྲོ་བོ་རྣམས་ལ་གར་གྱི་ཉམས་དགུ་དང་། དཔལ་དང་དུར་ཁྲོད་དྲག་པོའི་ཆས་སོགས་ཏེ། དང་པོ་ཞི་ཚུལ་དགུ་ནི། ང་རྒྱལ་མ་སྤངས་གནས་སུ་དག་པའམ་སྐྱེ་བ་དག་པ་མཚོན་བྱེད་སྐུ་ཤ་དང་ཕྱག་ཞབས་མཉེན་ཤ་ཆགས་པ། དེ་བཞིན་དུ་ཞེ་སྡང་དང་ན་བ་གནས་སུ་དག་པས་དཀུ་སྐབས་ཕྱེད་ཅིང་རིམ་པར་མཚམས་པས་ལྕུག་པ། འདོད་ཆགས་དང་འཆི་བ་གནས་སུ་དག་པས་ཐབས་ཤེས་ཕན་ཚུན་འཁྲིལ་བའམ། འཁྲིལ་བག་ཆགས་པས་ལྷོད་པོར་མ་གྱུར་པ། ཕྲག་དོག་དག་པས་སྐུ་དྲངས་ཤིང་ཚིགས་མཚམས་སོགས་འཁྲིལ་ལྡེམ་ཆགས་པ། གཏི་མུག་དང་དགའ་བ་གནས་སུ་དག་པས་སྐུ་འཇམ་ཞིང་གཞོན་ཤ་ཆགས་པའི་ངང་ཚུལ་ཅན་ཏེ་ངོ་བོའི་ཡོན་ཏན་ལྔ་དང་། མ་རིག་པ་སྤངས་པས་སྐུ་གཙང་ཞིང་ཁ་དོག་མ་འདྲེས་པར་གསལ་བ། ཟད་པར་གྱི་སྐྱེ་མཆེད་རྫོགས་པའི་ཡེ་ཤེས་རྒྱས་པས་བཀྲག་ཅིང་མུ་མེད་པའི་འོད་ཟེར་འཕྲོ་བས་འཚེར་བ་མཚན་གྱི་མེ་ཏོག་ལ་དཔེ་བྱད་བཟང་པོའི་འབྲས་བུ་ཡོངས་སུ་རྫོགས་པར་བརྗིད་ཅིང་ཡིད་དུ་འོང་བའི་ལྷུན་སྟུག་པ། ཆེ་བའི་ཡོན་ཏན་རྫོགས་པས་གདུལ་བྱ་རྣམས་ཟིལ་གྱིས་གནོན་པའི་གཟི་བྱིན་དང་ལྡན་པ་སྟེ་རྣམ་པའི་ཡོན་ཏན་བཞིར་བཅས་དགུའོ། །རྒྱན་ཆས་བཅུ་གསུམ་ལས། གདུལ་བྱའི་ཉོན་མོངས་པའི་གདུང་བ་སེལ་བའི་རྟགས་ལྷ་རྫས་ལས་གྲུབ་པའི་དར་གྱི་ཆས་གོས་ལྔ་ནི། སྐུ་རྒྱབ་ཏུ་དར་མཐིང་ཁྲའི་ཟི་ལྡིར་ཐུར་དུ་དཔྱངས་པ། སྙན་གོང་ནས་དར་ལྔའི་ཅོད་པན་ནམ་དར་དཔྱངས་འཕྱར་བ། དཔུང་པའི་སྟོད་ཙམ་དུ་སླེབ་པའི་གར་གྱི་ཕུ་དུང་འདུང་མ། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས། ཚིག་གུ་ནི་ཁ་དོག་སྣ་ཚོགས་པའི་སྨད་དཀྲིས་ཏེ་འདི་ལ་འབའ་ཏི་སྨུག་པོའི་ཤམ་ཐབས་བྱ་བའང་སྣང་ངོ་། །འདོད་ཡོན་མ་སྤངས་རྒྱན་དུ་རྫོགས་པས་འགྲོ་བའི་རེ་བ་སྐོང་བའི་བརྡར་རིན་པོ་ཆེའི་རྒྱན་བརྒྱད་ནི། དབུ་ལ་རིན་པོ་ཆེའི་དབུ་རྒྱན་ཟེ་པྲོག་ཁང་པ་ནོར་བུའི་རྩེ་ཕྲན་ཅན། སྙན་གཉིས་སུ་རིན་པོ་ཆེའི་སྙན་རྒྱན་ནོར་བུའི་རྩེ་ཕྲན་ཅན། རིན་པོ་ཆེ་སྣ་ཚོགས་སྤེལ་མར་བརྒྱུས་པའི་མགུལ་རྒྱན་ཐུང་ངུ་། རྒྱུ་དེ་མཚུངས་ནུ་སྟེང་ཙམ་དུ་སླེབ་པའི་སེ་མོ་དོ། ལྟེ་འོག་ཏུ་སླེབ་པའི་དོ་ཤལ་ཏེ་རིམ་པ་གསུམ། དཔུང་རྒྱན་རིན་པོ་ཆེའི་ཕྲ་ཚོམ་ཅན། ཕྱག་གདུབ་གཉིས་དང་། ཞབས་གདུབ་གཉིས་དང་། ཕྱག་ཞབས་ཀྱི་སོར་མོའི་གདུ་བུ་རྣམས་བཀོད་པ་དེ་མཚུངས། སྐ་རགས་རིན་པོ་ཆེའི་ཕྲ་ཚོམ་གྱིས་མཛེས་པར་བྱས་པ་སྟེ། འདི་ལ་དོ་ཤལ་དང་སེ་མོ་དོ་དེ་གཉིས་གཅིག་ཏུ་རྩིས་པ་དང་། ཡང་ཕྱག་ཞབས་ཀྱི་གདུབ་བུ་རྣམས་གཅིག་ཏུ་བྱས་ཏེ་སོར་གདུབ་ཐ་དད་དུ་བགྲང་བ་དང་། ཡང་སོར་གདུབ་མེད་པས་སྔ་མ་བརྒྱད་པོར་བགྲང་བ་སོགས་བརྩི་ཚུལ་འདྲ་མིན་ཅུང་འདུག་ཀྱང་དོན་དུ་གོང་བཞིན་ནོ། །ཡུམ་རྣམས་ཀྱང་མཚན་མའི་རྟོག་པའི་སྒྲིབ་གཡོགས་དང་བྲལ་བ་མཚོན་བྱེད་སྐུ་གཅེར་བུ། མི་འགྱུར་བའི་བདེ་བ་ཆེན་པོ་དགའ་བ་བཅུ་དྲུག་མཚོན་བྱེད་བཅུ་དྲུག་ལོན་པའི་ན་ཚོད་ཅན། དབྱིངས་དང་ཡེ་ཤེས་ཕྱོགས་མེད་དུ་རྒྱས་པ་མཚོན་བྱེད་དབུ་སྐྲ་གྲོལ་བ། ཆོས་དབྱིངས་མཚོན་བྱེད་རུས་པའི་འཁོར་ལོ། མགུལ་རྒྱན་མཉམ་ཉིད། རྣ་ཆ་སོར་རྟོག །གདུབ་བུ་མེ་ལོང་། སྐ་རགས་བྱ་གྲུབ་སྟེ་རུས་པའི་ཕྱག་རྒྱ་ལྔས་སྤྲས་པ། སྟོང་ཉིད་དང་སྙིང་རྗེ་མི་འབྲལ་བའི་བརྡར་ཡབ་ཡུམ་གཉིས་སྐུ་ལ་ཕན་ཚུན་འཁྲིལ་བ། ཟག་མེད་ཀྱི་དགའ་བ་ཆེན་པོ་སྤྲོས་བྲལ་དང་རོ་གཅིག་པའི་བརྡར་ཞལ་སྦྱོར་ཞིང་ཕན་ཚུན་མཆུ་སྒྲོས་འཇིབ་པ། ཞི་ལྷག་ཟུང་དུ་འཇུག་པའི་བརྡར་རྡོ་རྗེ་དང་པདྨ་མཉམ་པར་སྦྱོར་བས་གཉིས་སུ་མེད་པར་བཞུགས་པ་ལ་སོགས་པ་གསལ་དག་དྲན་པར་བྱའོ།། །། དེ་ནས་ཁྲོ་བོའི་ཉམས་དགུ་ལས། སྒེག་པ་ནི་ཆགས་པའི་ཉམས་དང་ལྡན་པའོ། །དཔའ་བ་ནི་ཁྲོ་ཉམས་སོ། །མི་སྡུག་པ་ནི་རྨོངས་ཉམས་ཏེ་སྐུ་ཡི་ཉམས་གསུམ་དང་། བཞད་པ་ནི་ཧ་ཧ་དང་ཧེ་ཧེ་སོགས་བཞད་པའི་གད་མོ་འབྱིན་པ་དང་། དྲག་ཤུལ་ནི་ཟུང་ཞིག་རྒྱོབ་ཅིག་ཅེས་ཚིག་རྩུབ་མོ་དང་། འཇིགས་རུང་ནི་འབྲུག་སྒྲ་ལྟར་ང་རོ་དྲག་པོ་སྒྲོགས་པ་སྟེ་གསུང་གི་ཉམས་གསུམ་དང་། སྙིང་རྗེ་ནི་དམིགས་པ་མེད་པའི་ཐུགས་རྗེས་འགྲོ་ཁམས་རྗེས་སུ་འཛིན་པ་དང་། རྔམ་པ་ནི་མ་རུངས་པའི་སེམས་ཅན་ལ་ཁྲོ་བའི་ཚུལ་སྟོན་པ་དང་། ཞི་བ་ནི་ཐམས་ཅད་ཆོས་ཉིད་དུ་རོ་མཉམ་པས་རྣམ་པར་མི་རྟོག་པ་སྟེ། ཐུགས་ཀྱི་ཉམས་ཏེ་དགུའོ།། ༈ །།དཔལ་གྱི་ཆས་བརྒྱད་ནི་ཡེ་ནས་རང་ཆས་ཏེ། དབུ་སྐྲ་གྱེན་བརྫེས་འཁོར་བ་རུ་བཟློག་ཆས། །རྡོ་རྗེ་ཁྱུང་གཤོག་ཐབས་དང་ཤེས་རབ་ཆས། །མཐིང་ནག་ཅོད་པན་རྟག་ཆད་ཟིལ་གནོན་ཆས། །སྤྱི་གཙུག་རྡོ་རྗེ་ལྷག་པར་རིག་པའི་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱར་བ་ཤེས་རབ་ཡུམ་གྱི་ཆས། །གནོད་གདུག་ཟློག་བྱེད་དཔའ་བོ་སྔགས་ཀྱི་ཆས། །ཉོན་མོངས་སྲེག་བྱེད་རྡོ་རྗེ་མེ་ཡི་ཆས་ཏེ་བརྒྱད། དུར་ཁྲོད་ཀྱི་ཆས་བརྒྱད་ནི། སྔོན་རུ་ཏྲ་བསྒྲལ་བས་རྒྱན་རྣམས་དཔལ་ཆེན་པོའི་རྒྱལ་བྱེད་དཔའ་རྟགས་སུ་མནབས་པ་སྟེ། མི་ལྤགས་ཀྱི་གཡང་གཞི་ནང་གོས་དང་། གླང་ཆེན་གྱི་ཀོ་རློན་སྟོད་གཡོགས་དང་། སྟག་ལྤགས་ཀྱི་ཤམ་ཐབས་ཏེ་བསྒོ་བའི་གོས་གསུམ་དང་། ཐོད་པ་སྐམ་པོ་ལྔ་ཡི་དབུ་རྒྱན། རློན་པ་ལྔ་བཅུའི་དོ་ཤལ་དང་། ཚལ་བུའི་དཔུང་རྒྱན། ཕྱག་ཞབས་ཀྱི་གདུ་བུ་སོགས་དང་། སྦྲུལ་རྒྱལ་རིགས་དཀར་པོའི་སྐྲ་ཆིངས། རྗེའུ་རིགས་སེར་ཁྲའི་སྙན་ཆ། བྲམ་ཟེའི་རིགས་དམར་པོའི་མགུལ་ཆུ། དམངས་རིགས་ལྗང་གུའི་ཕྱག་ཞབས་ཀྱི་གདུབ་བུ། གདོལ་བའི་རིགས་ནག་པོའི་དོ་ཤལ་ཏེ་འདོག་པའི་རྒྱན་གཉིས་དང་། དཔྲལ་བར་ཐལ་ཆེན་གྱི་ཚོམ་བུ། མཁུར་ཚོས་སམ་འབུར་གསུམ་ལ་རཀྟའི་ཐིག་ལེ། ཨོག་མར་ཞག་གི་ཟོ་རིས་ཏེ་བྱུག་པའི་རྩི་གསུམ་སྟེ་དུར་ཁྲོད་ཀྱི་ཆས་བརྒྱད་དོ།། ༈ །།དེ་ནས་བྱིན་གྱིས་རླབས་པ་ལ། སྦྱོང་བྱེད་དམ་ཚིག་ལྷ་བསྐྱེད་ཟིན་པ་རྣམས་ཀྱི་སྤྱི་བོར་དུང་ཁང་གི་འཁོར་ལོ་ཨོཾ་དཀར་པོ་གསལ་ཞིང་དབང་བསྐུར་བ་སྐུ་རྡོ་རྗེ་དཀར་པོ་དང་། མགྲིན་པའི་འཁོར་ལོ་ཨཱཿཡིག་དམར་པོ་འབར་ཞིང་གསལ་བ་གསུང་རྡོ་རྗེ། སྙིང་ཁར་གཙོ་བོ་ཡབ་ཡུམ་གྱི་ཡེ་ཤེས་སེམས་དཔའི་མདུན་དང་། གཞན་རྣམས་ཀྱི་ཐུགས་སྲོག་ས་བོན་གྱི་མདུན་ཕྱོགས་སུ་ཧཱུྃ་མཐིང་ག་གསལ་ཞིང་འབར་བ་ཐུགས་རྡོ་རྗེ་སྟེ། འཁོར་ལོ་པདྨ་རྡོ་རྗེ་གདན་དུ་སྒོམ་པ་དང་། རྣམ་སྣང་། སྣང་མཐའ། མི་བསྐྱོད་པའི་སྐུར་སྒོམ་པ་སོགས་དབྱེ་བ་མང་བས་གཞུང་དང་བསྟུན་གང་ལྟར་ཡང་ལུས་ངག་ཡིད་གསུམ་རྣམ་པར་དག་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་དུ་མོས་པ་བརྟན་པོས་ང་རྒྱལ་བྱ། དེ་བཞིན་དུ་དབང་བསྐུར་བ་དངོས་ལ་ལྷ་ཚོགས་ཐམས་ཅད་ཀྱི་སྤྱི་བོ། དཔྲལ་བ། རྣ་ལྟག་གཡས། ལྟག་པ། རྣ་ལྟག་གཡོན་ཏེ་མགོ་བོའི་གནས་ལྔར་རང་རང་རིགས་ཀྱི་བདག་པོ་གཙོ་བོར་བྱས་ཏེ་དབུས་སུ་བཞག་པའི་ཤུལ་དུ་རྣམ་སྣང་ཉིད་བྱས་པའི་སྔགས་དང་ཕྱག་རྒྱའི་དབང་བསྐུར་བ་སྟེ། ས་བོན་རིགས་ལྔ་ཡབ་ཡུམ་མཉམ་པར་སྦྱོར་བའི་སྦྱོར་མཚམས་ནས་ཡེ་ཤེས་ལྔའི་རང་བཞིན། བྱང་ཆུབ་སེམས་ཀྱི་ཆུ་རྒྱུན་བབས་པས་རང་གི་ལུས་དང་སྒྲིབ་པ་སྦྱངས། དུག་ལྔ་ཡེ་ཤེས་ལྔར་དག་པར་བྱས། ཆུའི་ལྷག་མ་ཡར་ལུད་པ་ལས་རིགས་ཀྱི་བདག་པོ་རང་ཆས་སུ་ཞུགས་པ་ལ་ཐིམ་པས་ཐོབ་བྱ་རང་གནས་ཀྱི་ཡེ་ཤེས་མངོན་དུ་གྱུར་པའི་ང་རྒྱལ་འཛིན་པ་སྟེ། འདི་ལའང་དབང་ལྷ་རྣམས་སྤྱན་དྲངས་ཤིང་དབང་བསྐུར་བ་སོགས་ཀྱི་རྣམ་བཞག་ཡོད་པས་སྐབས་དང་བསྟུན་ནོ་གསུངས།། ༈ །།དེ་ནས་ཡེ་ཤེས་པ་སྤྱན་དྲངས་པ་དངོས་ལ། བདག་དམ་ཚིག་སེམས་དཔའི་ཐུགས་སྲོག་ས་བོན་ལས་འོད་ཟེར་ལྕགས་ཀྱུ་ལྟ་བུས་རང་བཞིན་ལྷུན་གྱིས་གྲུབ་པའི་ཞིང་ཁམས་ཐམས་ཅད་དུ་ཁྱབ་པར་འཕྲོས་པས། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཆོས་སྐུ་མཉམ་པ་ཆེན་པོ་ལས་མ་གཡོས་བཞིན་དུ་གཟུགས་སྐུ་གང་འདུལ་ཕྱག་རྒྱའི་རོལ་གར་རྟེན་དང་བརྟེན་པར་བཅས་པ་བསྒོམ་པའི་དཀྱིལ་འཁོར་གྱི་ལྷ་དེའི་རྣམ་པར་བཞེངས། མདུན་གྱི་ནམ་མཁར་མངོན་སུམ་དུ་བཞུགས་པར་མོས་ཏེ་ཁྱད་པར་གྱི་རྫས་བསྲེགས་པའི་སྤོས་བཏུལ་ཞིང་། རོལ་མོ་སྣ་ཚོགས་པའི་སྒྲ་དང་བཅས་ཏེ། ཡིད་རྩེ་གཅིག་པའི་དད་པས་སྤྱན་འདྲེན་གྱི་ཚིག་དབྱངས་སྙན་པོས་བརྗོད་ཅིང་བདག་དམ་ཚིག་པའི་དཀྱིལ་འཁོར་བསྒོམ་པའི་སྟེང་གི་ནམ་མཁར་སྲུང་འཁོར་གྱི་མེ་རི་འདབ་འབྱར་ཙམ་དུ་བཞུགས་པར་བསྒོམ་མོ།། ༈ །།དེ་ལྟར་བཞུགས་སུ་གསོལ་བ་ནི། སྤྱི་ཙམ་དུ་ཛཿཧཱུྃ་བཾ་ཧོཿཞེས་བརྗོད་དེ། ཛཿས་དམ་ཚིག་པ་ལ་ཡེ་ཤེས་པ་བཀུག་པ་དང་། ཧཱུྃ་གིས་གཉིས་སུ་མེད་པར་བསྟིམས་པ་དང་། བཾ་གྱིས་འདོད་པ་མ་གྲུབ་ཀྱི་བར་དུ་མི་ཤིགས་པར་བཅིང་པ་དང་། ཧོཿས་དགྱེས་ཤིང་བརྟན་པར་བཞུགས་སུ་གསོལ་བ་དང་། དེས་དམ་ཡེ་ལ་མཆོག་དམན་ཐ་དད་དུ་འཛིན་པའི་ཞེན་རྟོགས་སྤང་བའི་དགོས་ཆེད་ཡོད།། ༈ །།དེ་ནས་ཕྱག་འཚལ་བ་ནི། འཕྲུལ་དགའི་ལྷ་རྣམས་རང་གིས་སྤྲུལ་པའི་ལོངས་སྤྱོད་ལ་རྩེ་བའི་ཚུལ་གྱིས་རང་ཉིད་གཙོ་བོའི་ཐུགས་ཀ་ནས་སྐུ་གཉིས་པའི་རྣམ་པ་ཐོན་པའམ། ཡང་ན་ཐུགས་ཀ་ནས་སྤྲུལ་པའི་ལྷ་མོ་སོགས་ཀྱིས་ཕྱག་བྱས་པར་མོས་པ་སྟེ། ཨ་ཏི་པཱུ་ཧོཿཞེས་ཕྱག་འཚལ་བའི་བརྡ་དང་། པྲ་ཏཱིཙྪ་ཧོཿཞེས་པས་མཉེས་ནས་ལན་སྦྱིན་པར་མོས་པའོ།། ༈ །།དེ་ནས་དང་པོ་ཕྱི་མཆོད་ནི། བདག་ཉིད་གཙོ་བོའི་ཐུགས་ཀ་ནས་འདོད་ཡོན་ལྷ་མོའི་སྤྲིན་སྤྲོས་ནས་ལྷ་ལ་ལྷས་མཆོད་པའི་ཚུལ་གྱིས་ནམ་མཁའ་རབ་འབྱམས་གང་བར་དམིགས་ནས་འབུལ་བ་སྟེ། སོ་སོའི་མཆོད་རྫས་ཐོགས་པའི་སྤྲུལ་པའི་ལྷ་མོ་རྣམས་ཀྱིས་མཆོད་ཅིང་གནས་སོ་སོར་ཐིམ་པར་མོས་པ་སྟེ། དྭངས་བསིལ་མངར་བའི་ཞལ་སྐྱེམས་མཆོད་ཡོན། ཕྱག་ཞབས་བསིལ་བྱེད་རྙོགས་བྲལ་གྱི་ཞབས་བསིལ། རྣམ་བཀྲའི་མེ་ཏོག་སྤྱན། དྲི་ཞིམ་བདུག་སྤོས་ཤངས། སྣང་གསལ་མར་མེ་སྤྱན། དྲི་ཞིམ་བསིལ་ཆབ་ཐུགས་ཀ །བཅུད་ལྡན་ཞལ་ཟས་ལྗགས། སྙན་པའི་རོལ་མོ་སྙན་དབང་རྣམས་ལ་མཆོད་པ་དང་།། ༈ །།དེ་ནས་ནང་མཆོད་ཐུན་མོང་ལ། མཚོན་བྱེད་བམ་གཙང་ལ་རང་བྱུང་དུ་གནས་པའི་དམ་རྫས་མིག་ལྕེ་རྣ་བ་སྣ་སྙིང་སྟེ་དབང་པོ་ལྔའི་མེ་ཏོག །ཚིལ་ཆེན་བསྲེག་བསུར་གྱི་བདུག་སྤོས། ཞུན་ཆེན་རོ་སྐྲ་ལ་སྤར་བའི་མར་མེ། མཁྲིས་པའི་དྲི་ཆབ། ཤ་ཆེན་གྱི་ཞལ་ཟས་སོགས་དང་། གཞན་ཡང་ཕྱི་ནང་གི་འདོད་ཡོན་གྱི་མཆོད་རྫས་དངོས་སུ་བཤམས་པ་དང་། ཡིད་ཀྱིས་སྤྲུལ་པ་དང་། བདག་པོས་མ་བཟུང་བ་དང་། སྨོན་ལམ་གྱི་སྟོབས་ལས་བྱུང་བའི་མཆོད་སྤྲིན་བསམ་གྱིས་མི་ཁྱབ་པ་བློས་བཏགས་ཏེ་འབུལ་བའོ།། ༈ །།ནང་མཆོད་ཁྱད་པར་སྨན་ནི། འཁོར་འདས་ཀྱི་ཆོས་ཐམས་ཅད་མ་བཅོས་རང་བྱུང་གི་བདུད་རྩིར་གནས་པའི་ཕྱིར་རྩ་བརྒྱད་ཡན་ལག་སྟོང་སྦྱར་ཚུལ་བཞིན་བསྒྲུབས་པའི་དམ་རྫས་ཆོས་ཉིད་མཉམ་པའི་ངང་ལས་བྱུང་ཞིང་གཉིས་འཛིན་གྱི་རྟོག་པ་སེལ་བའི་བདུད་རྩི་སྨན་གྱི་བཅུད་ལེན་རིགས་ལྔ་ཡེ་ཤེས་ལྔ་ཡི་ངོ་བོར་གྲུབ་པ་ཉིད་མཐེབ་སྲིན་ཉི་ཟླའི་གྭ་འུས་བཅུས་ཏེ་ཕུལ་བས་ལྷ་རྣམས་མཉེས་པར་མོས་པ་དང་། ལྷ་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་ཡི་གེ་འབྲུ་གསུམ་གྱི་རྣམ་པར་འཕྲོས་ནས་བདུད་རྩིའི་སྟེང་དུ་གནས་པ་མཐེབ་སྲིན་གྱིས་བླང་སྟེ་རང་གི་གནས་གསུམ་དང་ལྕེ་ལ་བཞག་པས་རྡོ་རྗེ་གསུམ་གྱི་དངོས་གྲུབ་ཐོབ་པར་མོས་པ་སྟེ། སྦས་དོན་གྱི་དབང་དུ་བྱས་ན་བདུད་རྩི་ལྔ་ནི་ཕུང་ལྔའི་དྭངས་མ། ཤ་ལྔ་ནི་དབང་ལྔའི་དྭངས་མ་སྟེ། དེ་དག་འཛག་མེད་དུ་བཅིངས་པ་ལས་འཆི་མེད་འགྲུབ་པས་ན་བདུད་རྩིའོ།། ༈ །།གཏོར་མ་ནི། ཕྱི་སྣོད་རྣམ་དག་དབྱིངས་ཀྱི་གཏོར་གཞོང་དུ། ནང་བཅུད་གཏོར་རྫས་བཟའ་བཏུང་གི་དངོས་པོ་མཁོ་དགུའི་ལོངས་སྤྱོད་འདོད་ཡོན་ལྔའི་སྤྲིན་ཆེན་པོར་སྤྲོས་ཏེ་ཕུལ་བ་ལས། ལྷ་རྣམས་ཀྱི་ལྗགས་རྡོ་རྗེའི་རྣམ་པ་ཅན་ལས་བྱུང་བའི་འོད་ཀྱི་སྦུ་གུས་བཅུད་དྲངས་ཤིང་གསོལ་བས་ཐུགས་དམ་བསྐང་བར་མོས་པ་སྟེ། ངེས་དོན་དུ་ཡུལ་ལྔའི་བཟའ་བ་དང་རྣམ་ཤེས་ཀྱི་བཏུང་བ་རྣམས་འོད་གསལ་གྱི་ཀློང་དུ་གསོལ་ཞིང་ཐིམ་པར་མོས་པའོ།། ༈ །།རཀྟ་ནི། ཉོན་མོངས་པའི་རྩ་བ་ནི་ཁམས་གསུམ་དུ་ཆགས་ཤིང་ཞེན་པའི་ཀུན་རྟོག་སྟེ་དེས་འཁོར་བ་འགྲུབ་པར་བྱེད་པས་ན་འཁོར་བ་རྩད་ནས་གཅོད་པའི་ཕྱིར་ཆགས་རྟོག་ཐམས་ཅད་ཁྲག་གི་རྣམ་པར་བསྡུས་ནས་ཆགས་མེད་བདེ་ཆེན་གྱི་ངང་དུ་བཅོམ་སྟེ་དྭངས་མའི་རྒྱ་མཚོར་འཁྱིལ་བ་འཁོར་བ་སྐྱེ་མེད་ཀྱི་དབྱིངས་སུ་གྲོལ་བའི་དམ་རྫས་ཉིད། འཁོར་འདས་མཉམ་ཉིད་ཀྱི་དབྱིངས་སུ་འབུལ་བ་སྟེ། ངེས་དོན་དུ་མཁའ་གསང་གི་རྩེར་ཉི་ཟླའི་འགྲོས་བཅིང་ལ་འཁོར་བའི་རྒྱུན་གཅོད་པར་བྱེད་པའོ། །དེ་ལྟར་ཕུལ་བ་འཁོར་བ་ཁྲག་གི་རྒྱ་མཚོ་ལྷག་མེད་དུ་གསོལ་བས་འཁོར་བའི་གནས་སྟོང་པར་མོས་པའོ།། ༈ །།དེ་ནས་གསང་བའི་སྦྱོར་མཆོད་ནི། སེམས་ཉིད་སྐྱེ་མེད་ཀྱི་རྩལ་སྣང་རང་ཉིད་ལྷ་ཡབ་ཡུམ་དུ་གསལ་ཏེ་འདུ་ཤེས་གསུམ་ལྡན་གྱིས་མཉམ་པར་སྦྱོར་བས་ཡས་བབས་དང་མས་བརྟན་གྱི་དགའ་བཞི་ལུགས་འབྱུང་ལུགས་ལྡོག་གི་སྦྱོར་བས་བདེ་སྟོང་གཉིས་སུ་མེད་པའི་མཆོད་སྤྲིན་ཟག་བྲལ་སྒྱུ་མའི་བཀོད་པའི་ཕུང་ཁམས་སྐྱེ་མཆེད་གདོད་ནས་དག་པའི་ལྷ་ཡི་འཁོར་ལོར་རྫོགས་པ་རྣམས་མཉེས་པར་བྱེད་པའོ།། ༈ །།དེ་ནས་སྒྲོལ་བ་ནི། གཟུང་འཛིན་གཉིས་མེད་ཀྱི་རང་རྩལ་དེ་ལྟར་མ་རྟོགས་པའི་འགྲོ་བ་རྣམ་སྨིན་རྩུབ་མོས་འཕང་བའི་བདུད་དང་རུ་ཏྲ་མ་རུངས་ཞིང་བཅུའི་ཚོགས་རྣམས་ཀུན་སློང་སྙིང་རྗེ་ཆེན་པོས་རྣམ་པ་སྒྱུ་མ་ལྟ་བུའི་ཚུལ་གྱིས་བརྟེན་པ་དབྱིངས་སུ་བསྒྲལ་ཞིང་རྣམ་ཤེས་བདེ་བ་ཆེན་པོའི་འཁོར་ལོ་གྱུར་ནས་དུག་གསུམ་སྙིགས་མ་ཤ་ཁྲག་རུས་པའི་ཕུང་པོ་ལྷ་རྣམས་ཀྱི་ཞལ་དུ་ཕུལ་བས་དགྱེས་པར་མོས་པའོ།། ༈ །།ཡང་གསང་དེ་ཁོ་ན་ཉིད་ཀྱི་མཆོད་པ་ནི། སྣང་སྲིད་འཁོར་འདས་ཀྱི་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་སྤྲོས་བྲལ་ཐིག་ལེ་ཉག་གཅིག་གི་ངང་དུ་རྫོགས་པས། གང་ལ་མཆོད་པར་བྱ་བའི་ཡུལ་དང་། གང་གིས་མཆོད་པར་བྱེད་པའི་གང་ཟག་དང་། ཇི་ལྟར་མཆོད་པའི་ཚུལ་གསུམ་གཉིས་མེད་བྱང་ཆུབ་སེམས་ཀྱི་དཀྱིལ་འཁོར་དུ་དབྱེར་མེད་པར་རོ་མཉམ་པས་ཅིར་སྣང་ཀུན་བཟང་སྤྱོད་པའི་ཕྱག་རྒྱ་ཟུང་འཇུག་བདེ་བ་ཆེན་པོར་འབུལ་བ་སྟེ་མཆོད་པ་ཀུན་གྱི་ནང་ནས་བླ་ན་མེད་པའོ།། ༈ །།དེ་ནས་བསྟོད་པ་ནི། ཀརྨ་མཱ་ལེར། རྡོ་རྗེ་གསོར་ཞིང་དྲིལ་བུ་གསིལ། །རིགས་ལྔའི་ཕྱག་རྒྱ་དྲིལ་སྟབས་བྱ། །ཞེས་པ་ལྟར་སོ་སོའི་ཕྱག་རྒྱའི་མཐར་ཐལ་མོ་སྦྱར་བས་བཏུད་དེ་ཆེ་བའི་ཡོན་ཏན་རྗེས་སུ་དྲན་དགོས་ཏེ་དེ་ཡང་སྤྱི་ཙམ་དུ། གདོད་ནས་རང་བཞིན་དག་པའི་དབྱིངས་ཉིད་གློ་བུར་གཟུང་འཛིན་ཀུན་རྟོག་གི་སྤྲོས་པ་མཐའ་དག་དང་བྲལ་བས་དག་པ་གཉིས་ལྡན་སངས་རྒྱས་ཆོས་ཀྱི་སྐུ་མཉམ་པ་ཆེན་པོ་ལས་མ་གཡོས་བཞིན་དུ། གང་འདུལ་གདུལ་བྱའི་ངོ་ཁར་ཆེན་པོ་རྟགས་ཀྱི་ཕྱག་རྒྱར་ཤར་བ་ཞི་བ་མཚན་དཔེའི་བརྒྱན་པ་དང་ཁྲོ་བོ་འཇིགས་རུང་གར་གྱི་སྒེག་པ་སོགས་གཙོ་འཁོར་གྱི་བཀོད་པ་སྣ་ཚོགས་སུ་སྟོན་ཡང་དོན་དམ་པར་དེ་དང་དེའི་ངོ་བོར་རང་མཚན་དུ་གྲུབ་པ་རྡུལ་ཙམ་ཡང་མི་མངའ་བ་དེ་བཞིན་དུ་དབྱངས་ཀྱི་ཡན་ལག་རྫོགས་པའི་གསུང་གཅིག་གིས་མཐའ་ཀླས་པའི་གདུལ་བྱར་ཆོས་སྒོ་བསམ་ལས་འདས་པ་རང་རང་གི་མོས་པ་བཞིན་དུས་སྐད་ཅིག་མ་གཅིག་ལ་སྟོན་པ་དང་། ཐུགས་ཇི་ལྟ་ཇི་སྙེད་མཁྱེན་པའི་ཡེ་ཤེས་སྐད་ཅིག་མ་གཅིག་གིས་དུས་གསུམ་གྱི་ཤེས་བྱའི་རྣམ་པ་མཐའ་དག་མངོན་སུམ་དུ་གཟིགས་པ་དང་། ཡོན་ཏན་སྟོབས་བཅུ་མི་འཇིགས་མ་འདྲེས་ལ་སོགས་པའི་ཡོན་ཏན་གྱི་ཆོས་བསམ་གྱིས་མི་ཁྱབ་པ་དང་། གང་འདུལ་གྱི་ཕྲིན་ལས་བསམ་གྱིས་མི་ཁྱབ་སྟེ་ཇི་སྲིད་འཁོར་བའི་མཐའ་གཏུག་པ་དེ་སྲིད་དུ་མཐའ་ཀླས་གདུལ་བྱའི་ཡུལ་ལ་རྟག་ཁྱབ་ལྷུན་གྲུབ་ཏུ་འཇུག་པ་དང་། དེའི་རྩལ་ལས་སྣང་བའི་རྟེན་དང་བརྟེན་པའི་དཀྱིལ་འཁོར་ཡོངས་རྫོགས་ཀྱི་བརྡའ་དོན་རྟགས་ཀྱི་ཁྱད་པར་རྣམས་རང་རང་གི་གཞུང་ནས་ཇི་ལྟར་བསྟན་པ་བཞིན་རྗེས་སུ་དྲན་པའི་ངང་ནས་རྡོ་རྗེའི་གླུས་བསྟོད་པར་བྱའོ།། ༈ །།དེ་ནས་ལྷ་ཡི་སྣང་ཞེན་ལ་བསླབ་པ་ལ་བཞི་སྟེ། རྣམ་པ་གསལ་བ། ང་རྒྱལ་བརྟན་པ། དག་པ་དྲན་པ། བདེ་གསལ་མི་རྟོག་པ་ཉིད་དུ་འཆར་བ་ལ་བསླབ་པའོ། །ངེས་རྫོགས་མཚན་ཉིད་པའི་དབང་དུ་བྱས་ན། ལྷ་ལ་སེམས་བཟུང་བ། འགྱུར་བའི་སྐྱོན་བཅོས་པ། ལྷ་དང་དབྲལ་བ། ལྷ་ལམ་དུ་བསླང་བ། ལྷ་དང་བསྲེ་བ་སོགས། ལྷ་དོན་ལ་སྦྱར་བ། ལྷ་ལམ་དུ་ཁྱེར་བ་དང་བདུན་ཙམ་གསུངས་ཏེ། དོན་གྱི་མདོ་འགག །རྟེན་དང་བརྟེན་པའི་དཀྱིལ་འཁོར་ཡོངས་སུ་རྫོགས་པ་དུས་གཅིག་ཅར་དུ་གསལ་བཏབ་སྟེ་གཙོ་བོའི་སྐུའི་རྣམ་པ་སྤྱི་ལ་སེམས་འཛིན་པ་དང་། བྱེ་བྲག་དབུའི་གཙུག་ཏོར་ནས་གདན་ཁྲིའི་བར་སྐུ་དང་ཕྱག་མཚན་རྒྱན་ཆས་ཕྲ་མོ་རེ་རེ་བཞིན་སོ་སོ་ནས་གསལ་གདབ། དེ་ལ་གསལ་སྣང་སྐྱེས་པ་ན་ཐམས་ཅད་དུས་གཅིག་ཏུ་གསལ་གདབ་ནས་རིམ་གྱིས་རྟེན་དང་བརྟེན་པའི་དཀྱིལ་འཁོར་ཡོངས་སུ་རྫོགས་པ་དྭངས་བའི་མཚོ་ལ་གཟའ་སྐར་ཤར་བ་ལྟར་སེམས་རྩེ་གཅིག་ཏུ་གཏད་དེ་མཉམ་པར་འཇོག་དགོས་ཤིང་། དེ་ལྟར་གོམས་པའི་མཐར་གསལ་བརྟན་གྱི་ཚད་བརྒྱད་དང་ལྡན་པ་ལ་བསླབ་པར་བྱ་སྟེ། གསལ་བའི་ཚད་ནི་སྤྱན་གྱི་དཀར་ནག་ཚུན་ཆད་མ་འདྲེས་པར་གསལ་བས་སལ་ལེ། བྱིང་ཉམས་ཅན་མ་ཡིན་པར་གསལ་སྟོང་སིང་བག་དང་བཅས་པའི་རིག་པའི་ངར་དང་ལྡན་པས་སིང་ངེ་། སེམས་མེད་བེམ་པོའི་རྣམ་པ་འཇའ་ཚོན་ལྟ་བུ་མ་ཡིན་པར་བ་སྤུའི་ཁོང་བུ་སྐྲའི་ཉག་མ་ཚུན་ཆད་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་ཟིན་པས་དབང་ཤེས་དྭངས་པའི་ཡོན་ཏན་བརྒྱ་ཕྲག་ཏུ་འཆར་ཞིང་། བཀྲ་ཁྲིག་གེར་བཞུགས་པས་ལྷག་གེ། དེ་ལྟ་བུའི་སྐུ་དེ་ཡང་དེ་ལྟར་ཡིན་ནོ་དང་ཡོད་དོ་ཙམ་གྱིས་རྗེས་དཔག་གི་བློ་རྟོག་མ་ཡིན་པར་ཡིད་ངོར་མངོན་སུམ་ལྟ་བུར་འཆར་བས་ལྷང་ངེ་བ་སྟེ་བཞིའོ། །དེ་ནས་བརྟན་པའི་ཚད་བཞི་ནི། ལེ་ལོ་དང་བརྗེད་པ་སོགས་ཀྱིས་མི་གཡོ། རབ་རིབ་དང་མོག་མོག་པོར་གྱུར་པ་སོགས་ཀྱིས་མི་འགྱུར། ཡུན་རིང་དུ་མཉམ་པར་བཞག་ཀྱང་རྣམ་རྟོག་ཕྲ་མོ་ཙམ་གྱིས་ཀྱང་མི་བརྫི་བས་མངོན་པར་མི་འགྱུར་བ། སྐུ་མདོག་དང་ཞལ་ཕྱག་བྱོན་བཞུགས་འོད་ཟེར་སྤྲོ་བསྡུ་སོགས་ཇི་ལྟར་སྒོམ་ཡང་དེ་ལྟར་བསྒྱུར་དུ་བཏུབ་པ་སྟེ་བཞིའོ། །དེ་ལྟར་གསལ་བརྟན་གྱི་ཚད་བརྒྱད་དང་ལྡན་པ་ལ་རྣམ་པ་གསལ་བ་ཞེས་བྱའོ།། ༈ །།དེ་ནས་ང་རྒྱལ་བརྟན་པ་ནི། དོན་གྱི་མདོ་འགག་ལ། སྐྱོན་ཀུན་ཟད་ཡོན་ཏན་ཀུན་རྫོགས། སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྤྱི་དཔལ་བསྒོམ་བྱའི་ལྷ་གང་ཡིན་པ་དེ་ཉིད་ངའོ་སྙམ་སྟེ་ང་རྒྱལ་བཟུང་བ་སྟེ། དེ་ཡང་མ་ཡིན་པ་ལ་ཡིན་པར་བཟུང་བ་མིན། ཡིན་པ་ལ་ཡིན་པར་ཤེས་པས་ངེས་ཤེས་ཏེ་གཉུག་མའི་སྒོ་གསུམ་རྡོ་རྗེ་གསུམ་གྱི་ངོ་བོར་ཡེ་ནས་གནས་པས་དེ་ལ་ཤར་བའི་རྟོག་ཚོགས་ཕུང་ཁམས་སྐྱེ་མཆེད་ཀྱི་ཆོས་འདི་ཐམས་ཅད་ཡེ་ནས་དག་པ་ལྷ་ཡི་ཕྱག་རྒྱ་ལས་མི་འདའ་བས་ན། བསྒོམ་བྱའི་ལྷ་དང་སྒོམ་བྱེད་ཀྱི་མཁན་པོ་རང་བཞིན་གཉིས་སུ་མེད་པར་རྟོགས་པའི་ངེས་ཤེས་སམ། ང་རྒྱལ་གྱི་རྒྱུན་ལྷང་ངེ་བ་ལ་འཇིགས་མེད་ཀྱི་རྩིས་བཏབ་ནས་གཉུག་མར་ཁྱེར་ཤེས་ན་ཡང་དག་པའི་ཉེ་ལམ་དུ་འགྲོའོ།། ༈ །།དེ་ནས་དག་པ་དྲན་པ་ནི། གང་དུ་ལྷ་བསྐྱེད་པའི་སྐབས་སུ་བསྟན་པ་ལྟར་རྟེན་དང་བརྟེན་པའི་དག་པ་སྤྱི་དང་། བྱེ་བྲག་ཏུ་བསྒོམ་བྱའི་ལྷ་ཞལ་གཅིག་པ་ནི། ཆོས་སྐུ་ཐིག་ལེ་ཉག་གཅིག །གསུམ་པ་ནི་སྐུ་གསུམ་མམ་རྣམ་ཐར་གསུམ། ཕྱག་གཉིས་པ་ནི་ཐབས་དང་ཤེས་རབ་ཟུང་དུ་འཇུག་པ། བཞི་པ་ནི་ཚད་མེད་བཞིས་འགྲོ་བའི་དོན་མཛད་པ། དྲུག་པ་ནི་ཡེ་ཤེས་ལྔ་དང་བསམ་གྱིས་མི་ཁྱབ་པའི་ཡེ་ཤེས་དང་དྲུག །ཞབས་གཉིས་པ་ནི་སྲིད་ཞིའི་མཐའ་ལ་མི་གནས་པ། བཞི་པ་ནི་རྫུ་འཕྲུལ་གྱི་རྐང་པ་བཞི། སྐུ་མདོག་དཀར་པོ་ནི་ཉེས་པའི་སྐྱོན་གྱིས་མ་གོས་པ་དང་མེ་ལོང་ལྟ་བུའི་ཡེ་ཤེས། སེར་པོ་ནི་ཆེ་བའི་ཡོན་ཏན་རྒྱས་པ་དང་མཉམ་ཉིད་ཡེ་ཤེས། དམར་པོ་ནི་གདུལ་བྱའི་དོན་ལ་ཐུགས་རྗེས་རྗེས་སུ་ཆགས་པ་དང་སོར་རྟོག་ཡེ་ཤེས། ལྗང་གུ་ནི་ཐོགས་པ་མེད་པའི་ཕྲིན་ལས་ལྷུན་གྱིས་གྲུབ་པ་དང་བྱ་གྲུབ་ཡེ་ཤེས། མཐིང་ཀའམ་ནག་པོ་ནི་ཆོས་ཉིད་འགྱུར་བ་མེད་པ་དང་ཆོས་དབྱིངས་ཡེ་ཤེས། ཕྱག་མཚན་ཡང་རྡོ་རྗེ་འདུས་མ་བྱས་པ། འཁོར་ལོ་ཉོན་མོངས་གཅོད་པ། རིན་པོ་ཆེ་ནི་ཡོན་ཏན་འབྱུང་བ། པདྨ་སྐྱོན་གྱིས་མ་གོས་པ། རྒྱ་གྲམ་མམ་རལ་གྲི་ཕྲིན་ལས་ཐོགས་པ་མེད་པ། དྲིལ་བུ་ནི་དབྱིངས་སྐྱེ་མེད་སྟོང་པ་ཉིད། ཀ་པཱ་ལ་ནི་རྣམ་པར་མི་རྟོག་པའི་ཡེ་ཤེས་བདེ་བ་སྐྱོང་བྱེད། ཁ་ཊྭཱྃ་ག་ནི་དུག་གསུམ་སྐུ་གསུམ་གྱི་ཀློང་དུ་སྒྲོལ་བ། གྲི་གུག་ནི་སྐྱེ་འཆི་རྩད་ནས་གཅོད་པ། དུང་ཆེན་ནི་ཡེ་ཤེས་ཆེན་པོས་བདུད་བཞི་བཅོམ་ནས་འཁོར་བ་དབང་དུ་སྒྱུར་བའམ་ཞལ་དུ་སྟོབ་པ་སོགས་དང་། ལྷ་ཡབ་ཏུ་སྣང་བ་ནི་ཐབས་མི་འགྱུར་བའི་བདེ་བ་ཆེན་པོའོ། །ཡུམ་དུ་སྣང་བ་ནི་ཤེས་རབ་རྣམ་ཀུན་མཆོག་ལྡན་གྱི་སྟོང་པ་ཉིད། ཡབ་ཡུམ་ཞལ་སྦྱོར་བ་ནི་བདེ་སྟོང་འདུ་འབྲལ་མེད་པ་སོགས་སོ་སོའི་དག་སྦྱོར་རང་རང་གི་གཞུང་ལས་བསྟན་པ་ལྟར་བསྒོམ་མོ།། ༈ །།དེ་ནས་བདེ་གསལ་སྟོང་ཉིད་དུ་བསླབ་པ་ལ་གསལ་དག་བརྟན་པའི་བསྐྱེད་རིམ་དེ་ཉིད་བདེན་འཛིན་གྱི་ཞེན་རྟོག་དང་བྲལ་ཞིང་ངོ་བོ་སྟོང་པ། རང་བཞིན་ཆུ་ཟླའམ་འཇའ་ཚོན་ལྟ་བུ་སྣང་ཡང་མཚན་མར་མ་གྲུབ་པའི་ཤེས་རབ་ཀྱིས་རྩིས་ཟིན་པ་ལ་བསླབ་པ་གལ་ཆེ་སྟེ་བསྐྱེད་རིམ་ལ་རྫོགས་རིམ་གྱིས་རྒྱས་ཐེབས་པས་དཀྱིལ་འཁོར་ཐམས་ཅད་ཆོས་སྐུར་འཆར་བའི་ཐབས་ཏེ། དེ་ལྟར་ཀུན་རྫོབ་ཀྱི་བསྐྱེད་རིམ་སྣང་བཅས་ཀྱིས་བསོད་ནམས་ཀྱི་ཚོགས་དང་། དེ་ཉིད་རང་བཞིན་ཡོངས་ཤེས་ཀྱི་ལྟ་བས་རྩིས་ཟིན་པའི་ཡོངས་གྲུབ་འདུས་མ་བྱས་པ་ནི་དོན་དམ་ཡེ་ཤེས་ཀྱི་ཚོགས་ཏེ་ཚོགས་གཉིས་ཟུང་འབྲེལ་གྱི་ལམ་དང་། དེར་མ་ཟད་སྣང་བ་གཟུགས་སྐུ་དང་། སྟོང་པ་ཆོས་སྐུ་སྟེ་སྐུ་གཉིས་དང་། སྣང་བ་ཀུན་རྫོབ་ཐབས། སྟོང་པ་དོན་དམ་ཤེས་རབ་སྟེ་བདེན་གཉིས་ཐབས་ཤེས་ཟུང་དུ་འཇུག་པའི་ལམ་ཚང་ལ་མ་ནོར་བ་སྟེ། སྔགས་ཀྱི་མྱུར་ལམ་ཟབ་མོའི་ཁྱད་ཆོས་སུ་ཤེས་པར་བྱའོ། །དེ་ལྟར་མ་ཤེས་པ་བསྐྱེད་རིམ་རྐྱང་པ་ལ་དངོས་མཚན་རང་རྒྱུད་པར་བཟུང་ན། བྱང་ཆུབ་ཀྱི་ལམ་དུ་མི་འགྱུར་བའི་སྟེང་འཁོར་བར་འཁྱམས་བྱེད་ཀྱི་སྒྲིབ་པ་རྔམ་པོ་ཆེ་ཡིན་ཏེ། ཞི་བ་རང་རྒྱུད་པར་བཟུང་ནས་བསྒོམ་ན་གཟུགས་ཁམས་ཀྱི་ལྷ་དང་། ཁྲོ་བོ་རང་རྒྱུད་པར་བསྒོམས་པའི་ལས་ཀྱིས་སྲིན་པོ་དང་རུ་ཏྲར་སྐྱེས་པའི་ལོ་རྒྱུས་གསང་སྔགས་ཀྱི་གླེང་གཞི་རྣམས་སུ་འབྱུང་བ་བཞིན་དུ་ཡང་དག་པ་ལ་བརྩོན་འགྲུས་བསྐྱེད་པ་གལ་ཆེ་ཞིང་དེ་ལྟར་གསལ་དག་བརྟན་པའི་བསྐྱེད་རིམ་དེ་ཉིད་ཇི་སྲིད་སྐྱོ་ཞིང་ངལ་དུབ་ཏུ་མ་གྱུར་བར་བསྒོམ་ཞིང་བསྒོམས་པས་སྐྱོ་བར་གྱུར་ན་དེའི་ཚེ་བཟླས་པ་ལ་འཇུག་པར་བྱ་གསུངས།། ༈ །།དེ་ནས་གསུང་བཟླས་པའི་རྣལ་འབྱོར་ལ། གསང་རྫོགས་ཀྱི་རྒྱུད་ལེའུ་སོ་དགུ་པ་ལས། ཡེ་ཤེས་འཇིག་རྟེན་གང་ལ་ཡང་། །སྲོག་སྡོམ་གཟེར་བཞིས་མ་ཐེབས་ན། །ནམ་ཡང་དོན་མེད་ཡུག་པ་བརྐྱང་། །ཡོངས་རྫོགས་དཔལ་གྱི་སྲོག་འཕྲོག་ཐབས། །གཅིག་ཤེས་པས་ནི་ཀུན་སྲོག་ཐོབ། །དཔེར་ན་སྒྲ་གཅན་འཛིན་གྱི་ཁར། །ནམ་མཁའི་ཉི་མ་གཅིག་ཟིན་པས། །ཆུ་སྣོད་སྟོང་གི་ཉི་མ་ཀུན། །མ་བཟུང་བ་ཡང་སྟོང་སྲོག་ཐོབ། །དེ་ཕྱིར་སྲོག་སྡོམ་གཟེར་བཞི་གཅེས། །ཞེས་གསུངས་ཏེ། འདིར་ཡུག་པ་བརྐྱང་ནི་ལག་སྟོང་བྱིས་པ་འདྲིད་པ་སྟེ་ངལ་བ་དོན་མེད་དུ་འགྱུར་བའི་དོན་ནོ། །དེ་ལ་བསྐྱེད་རིམ་ཐམས་ཅད་ཀྱི་སྲོག་སྡོམ་གཟེར་བཞིར་འདྲ་སྟེ། དེའི་དོན་ཡང་རང་གི་སྒོ་གསུམ་བྱ་བྱེད་དང་བཅས་པ་བདེ་བར་གཤེགས་པའི་སྐུ་གསུང་ཐུགས་གསུམ་དང་མཛད་པ་ཕྲིན་ལས་སུ་བསྡོམས་པར་བྱེད་པའི་གཟེར་བུ་ལྟ་བུའི་མན་ངག་སྟེ།། ༈ །།དང་པོ་ཏིང་ངེ་འཛིན་གྱི་གཟེར་ནི། དམིགས་རྟེན་ཐང་སྐུ་སོགས་ལ་ཐོག་མར་བརྟེན་ནས་ལྷའི་རྣམ་པ་ལ་སེམས་རྩེ་གཅིག་ཏུ་གཏད་དེ་བསྒོམས་པས་སེམས་ཀྱི་ཉམས་ལྔ་མཐར་ཕྱིན་ཅིང་ཡུལ་གསུམ་གྱད་དུ་གྱུར་ནས་ལུས་ཐ་མལ་དུ་འཛིན་པའི་མངོན་ཞེན་ལྷའི་སྐུར་རྫོགས་པར་བྱེད་པ་སྟེ། ཉམས་ལྔ་ནི་ཐོག་མར་རྣམ་རྟོག་ངོས་ཟིན་པ་གཡོ་བའི་ཉམས་རི་གཟར་གྱི་འབབ་ཆུ་ལྟ་བུ་དང་། རྣམ་རྟོག་ཐང་ཆད་པ་མི་རྒན་གྱི་སྤྱོད་པ་ལྟ་བུ་དང་། རྣམ་རྟོག་ཅུང་ཟད་བསྐྱོད་དུ་ཡོད་པ་བརྟན་པའི་ཉམས་མཚོ་ཆུང་བསེར་བུས་བསྐྱོད་པ་ལྟ་བུ་དང་། བསྐྱོད་དུ་མེད་པས་རང་དབང་ཐོབ་པ་མཐར་ཕྱིན་པའི་ཉམས་མཚོ་ཆེན་རླབས་དང་བྲལ་བ་ལྟ་བུའོ། །དེ་ལྟར་གོམས་པས་ཡུལ་གསུམ་གྱད་དུ་གྱུར་པ་ནི། དང་པོ་བསམ་པ་ཡིད་ཀྱི་ཡུལ་དུ་གསལ་བ་སྟེ་ཡིད་ངོར་རྟེན་དང་བརྟེན་པའི་དཀྱིལ་འཁོར་བཀྲ་ལམ་གྱིས་གསལ་བ་དང་། དེ་ནས་མཐོང་བའི་ཡུལ་དུ་གསལ་བ་ཞེས་ཏིང་ངེ་འཛིན་གོམས་པའི་མཐུས་རང་གི་དབང་པོའི་སྤྱོད་ཡུལ་དུའང་ལྷ་སྐུའི་རྣམ་པ་འཆར་བ་དང་། དེ་ནས་རེག་པའི་ཡུལ་ལམ་ལུས་ཀྱི་ཡུལ་དུ་གསལ་བ་ཞེས་རླུང་སེམས་ལྷ་སྐུར་སྨིན་པའི་དབང་གིས་སྐབས་རེར་ཕྱི་རོལ་གཞན་གྱི་སྣང་ངོར་ཡང་རང་ལུས་བསྐྱོད་པས་ལྷ་སྐུར་མངོན་སུམ་དུ་མཐོང་བར་གྱུར། དེ་ནི་རྣམ་སྨིན་རིག་འཛིན་ལ་དངོས་སུ་སྦྱོར་བ་ཡིན་པར་བཤད་དོ། ༈ །གཉིས་པ་སྙིང་པོ་སྔགས་ཀྱི་ གཟེར་ནི། འཆད་འགྱུར་ལྟར་སེམས་དཔའ་སུམ་བརྩེགས་ཐུགས་སྲོག་ས་བོན་གྱི་མཐར་སྙིང་པོ་སྔགས་ཀྱིས་བསྐོར་བ་ལ་སེམས་རྩེ་གཅིག་ཏུ་གཏད་དེ་ངག་བཟླས་འབྲུ་འབུམ་ལྟ་བུའི་གྲངས་དང་། ལོ་ཟླ་ལྟ་བུའི་དུས་དང་། ཞལ་མཐོང་བ་སོགས་མཚན་མ་དང་སྦྱར་ནས་བཟླས་ཤིང་། ཁྱད་པར་རླུང་རྡོར་བཟླས་ལ་བརྩོན་པ་སོགས་འོག་ཏུ་གསལ། ༈ །གསུམ་པ་དགོངས་པ་མི་འགྱུར་བའི་གཟེར་ནི། ཕྱི་ནང་སྣོད་བཅུད་རྟེན་དང་བརྟེན་པའི་དཀྱིལ་འཁོར་དུ་གང་གསལ་བ་དེ་ཐམས་ཅད་རང་སེམས་ཀྱི་སྣང་ཆ་ཙམ་ལས་གཞན་དུ་མ་གྲུབ་ཅིང་། སེམས་ཉིད་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཤར་གྲོལ་འཛིན་མེད་སྤྲུལ་པའི་སྐུ་སྟེ། སྐུ་གསུམ་གྱི་ངོ་བོར་གདོད་ནས་གྲུབ་པ་དང་། དེའི་རྩལ་ལས་ཤར་བའི་ཐབས་ཀུན་རྫོབ་སྣང་བའི་ཆ་ཡབ། ཤེས་རབ་དོན་དམ་སྟོང་པའི་ཆ་ཡུམ། སྣང་སྟོང་དབྱེར་མེད་ཡེ་ཤེས་ཀྱི་སྐུ་ཅན་ཟུང་འཇུག་སྒྱུ་འཕྲུལ་དྲྭ་བའི་འཁོར་ལོ་སྟེ། མདོར་ན་དངོས་སྣང་སྐུ། སྒྲ་གྲགས་གསུང་། དྲན་རྟོག་ཐུགས། སྣང་སྲིད་གཞིར་བཞེངས་རང་བྱུང་གི་དཀྱིལ་འཁོར་དུ་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་རྟོགས་པའི་གནས་ལུགས་ལྟ་བས་རྩིས་ཟིན་པར་བྱས་ཏེ། བདག་གཞན་དམ་ཡེ་བསྒྲུབ་བྱ་སྒྲུབ་བྱེད་དག་མ་དག་སོགས་ཐ་དད་གཉིས་ཆོས་ཀྱི་འཛིན་རྟོག་མཐའ་དག་གཉིས་མེད་མཉམ་པའི་ཀློང་དུ་བསྡོམས་པ་འདི་ནི་བསྐྱེད་རིམ་ཙམ་དུ་མ་ཟད་རྫོགས་རིམ་གྱི་གྲོགས་ཀྱང་ཡིན་པས་བསྐྱེད་བཟླས་རྫོགས་གསུམ་གང་གི་སྐབས་སུའང་མེད་ཐབས་མེད་པའི་གཅེས་གནད་གཅིག་པོ་སྟེ། རྩ་རྒྱུད་པད་སྡོང་བརྩེགས་པ་ལས། དེ་ཉིད་ལྡན་པའི་རྣལ་འབྱོར་གྱིས༔ དུར་ཁྲོད་འདྲེ་ངན་བསྒྲུབས་གྱུར་ཀྱང་༔ མཆོག་དང་ཐུན་མོང་དངོས་སྒྲུབ་གང་༔ ཅི་འདོད་རང་བྱུང་ལྷུན་གྲུབ་འབྱུང་༔ དེ་ཉིད་མ་རྟོགས་ཨ་འཐས་བློས༔ ཡེ་ཤེས་སེམས་དཔའ་བསྒྲུབས་གྱུར་ཀྱང་༔ གནས་སྐབས་བདེ་འབྲས་ཕྲ་འུ་ལས༔ ཡང་དག་འབྲས་བུ་སྲིད་མཐའ་ཙམ༔ ཞེས་གསུངས་པ་ལྟར་འདོན་རྒྱུ་དང་སྒྲུབ་རྒྱུའི་ལྷའི་ཁྱད་པར་གཙོ་བོ་མིན་ཞིང་གནད་འདི་ཉིད་གལ་ཆེ་བ་ཡིན་པས་འདི་ཁོ་ནར་ལམ་གྱི་སྲོག་ཏུ་བཟུང་བར་མཛོད་ཅིག། ༈ །།བཞི་པ་འཕྲོ་འདུ་ཕྲིན་ལས་ཀྱི་གཟེར་ནི། གང་འདོད་ཀྱི་ལས་རབ་འབྱམས་ལ་དབང་དུ་བྱེད་པའི་ཆོ་འཕྲུལ་ཏེ། སྒྲུབ་གཞི་ལྷ་དང་དཀྱིལ་འཁོར་དུ་གསལ་བ་རང་ལྷའི་སྐུའི་ཆ་ཤས་དང་ཐུགས་ས་བོན་སྔགས་ཕྲེང་ལས་ལས་མཐུན་པའི་འོད་ཟེར་འཕྲོས་པས་དོན་གཉིས་བྱས། སྣོད་བཅུད་དཀྱིལ་འཁོར་གསུམ་དུ་སྦྱར་ཏེ། དེ་ཡང་འོད་ཟེར་དཀར་པོས་ཞི་བ། སེར་པོས་རྒྱས་པ། དམར་པོས་དབང་། ལྗང་གུའམ་ནག་པོས་དྲག་པོ། མཐིང་གའམ་སྣ་ལྔའི་འོད་ཟེར་གྱིས་ལས་ཐམས་ཅད་པའི་མཆོག་གི་དངོས་གྲུབ་སོགས་གང་འདོད་འགྲུབ་པའི་འཕྲོ་འདུའི་དམིགས་པའི་མདེའུ་ཁ་སྒྱུར་ཤེས་དགོས་སོ། །དེ་ལྟར་གཟེར་བཞིའི་མན་ངག་གནད་དུ་ཚུད་པས་སྐུ་དངོས་སུ་མཐོང་སྟེ་སྐུའི་སྲོག་འཕྲོག །ངག་ལ་བདེན་པ་འགྲུབ་པས་གསུང་གི་སྲོག་འཕྲོག །ཆོས་ཉིད་ལ་རང་དབང་ཐོབ་པས་ཐུགས་ཀྱི་སྲོག་འཕྲོག །བདེ་གཤེགས་ཞི་ཁྲོའི་སྐུ་གསུང་ཐུགས་དང་རང་གི་སྒོ་གསུམ་དུ་མ་རོ་གཅིག་ཏུ་འདྲེས་པས་འཁོར་འདས་ཀུན་ལ་སྟོང་སྲོག་ཐོབ་བོ།། ༈ །།དེ་ནས་སྔགས་བཟླ་བྱའི་རིམ་པ་ལ་རྒྱལ་བ་ཐམས་ཅད་ཀྱི་གསུང་གི་རྣམ་པ་ཡི་གེ་ཨཱཿཡིན་ཨ་ནི་འགག་པ་མེད་པའི་རྣམ་འཕྲུལ་ཀ་སོགས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡེ་ཤེས་རྡོ་རྗེའི་རང་བཞིན་ཡིན་ཏེ་རྒྱུད་ལས། སྔགས་ཉིད་རྣལ་འབྱོར་མ་ཡི་གཟུགས། །རྣལ་འབྱོར་མ་ཉིད་སྔགས་ཀྱི་གཟུགས། །ཅི་སྟེ་གོ་འཕང་མཆོག་འདོད་པས། །དེ་གཉིས་དབྱེ་བར་མི་བྱ་འོ། །ཞེས་གསུངས་པ་ལྟར། གྲུབ་པ་བཞིའི་ནུས་མཐུ་ཐོགས་པ་མེད་ཚུལ་དང་། མདོར་ན་སངས་རྒྱས་ཀྱི་ཡེ་ཤེས་ནི་གདུལ་བྱའི་བློ་ངོར་རྣམ་པ་ཐམས་ཅད་པར་འཆར་རུང་བ་ཡིན་ལ། དེ་ཡང་སངས་རྒྱས་ཀྱིས་འདུལ་བ་ལ་སངས་རྒྱས་དངོས་སུ་སྣང་བ་དང་། ཕལ་པས་འདུལ་བ་ལ་ཕལ་པར་སྟོན་པ་གཉིས་སངས་རྒྱས་གཅིག་གི་ཡེ་ཤེས་ཀྱི་རོལ་པར་ཁྱད་མེད་པས་དོན་ལ་བཟང་ངན་མེད་པ་ལྟར། འདིར་ཡང་སངས་རྒྱས་ཉིད་ཕལ་པའི་ངོར་སྔགས་ཀྱི་རྣམ་པར་སྟོན་པ་ཡིན་ཏེ། གསང་སྙིང་ལས། གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་ནི། །སྔགས་དང་ཕྱག་རྒྱ་རབ་བརྟེན་པས། །དངོས་གྲུབ་ཡ་མཚན་ཆེན་པོར་གྱུར། །ཞེས་དང་། གུར་ལས། སངས་རྒྱས་བྱང་ཆུབ་སེམས་དཔའ་དང་། །མཁའ་འགྲོ་མ་དང་བཙུན་མོ་དག །མངོན་པར་ཕྱོགས་པ་བྱ་ཕྱིར་ཏེ། །དཔེར་ན་སྐྱེས་ཆེན་འགའ་ཞིག་ལས། །ཆེ་ལ་མྱུར་བའི་སྒྲས་འབོད་ན། །ཐོས་པ་ཙམ་གྱིས་འོང་བ་ལྟར། །སངས་རྒྱས་སྐད་ཅིག་དེ་ལ་འབྱོན། །ཞེས་གསུངས་པ་ལྟར། སྔགས་གྲུབ་པས་ལྷ་མངོན་སུམ་དུ་བྱོན་པའམ། ལྷ་ཉིད་སྔགས་སུ་འཕྲུལ་བ་བསྒྲུབས་པས་སྔགས་ཉིད་ལྷར་འཕྲུལ་བའི་ཚུལ་གྱིས་གདུལ་བྱ་ལ་དངོས་གྲུབ་སྩོལ་བས་ལྷ་སྔགས་རང་སེམས་གསུམ་དབྱེར་མེད་པའི་ཚུལ་ལ་ངེས་ཤེས་བསྐྱེད་ནས་སྒྲུབ་པ་གལ་ཆེ།། ༈ །།དེ་ནས་སྔགས་གཞི་འགོད་ཚུལ་ནི། རང་ཉིད་དམ་ཚིག་སེམས་དཔའ་ཡི་དམ་གྱི་ལྷ་གང་ཡིན་གསལ་དག་བརྟན་གསུམ་དང་ལྡན་པར་སྒོམ་པའི་ཐུགས་ཙིཏྟ་རིན་པོ་ཆེ་འོད་ཀྱི་རང་བཞིན་མཆོང་གུར་ཕུབ་པ་ལྟ་བུ་སྟེ་ཁ་དོག་སྨུག་པོ་དབྱིབས་ཆ་ལང་ཁ་སྦྱར་བ་ལྟ་བུ་ཟུར་བརྒྱད་པ་ཕྱི་གསལ་ནང་གསལ་འོད་ཀྱི་རང་བཞིན་ཅན་ནམ། འོད་ལྔའི་ཐིག་ལེའི་ཀློང་དུ་ཉི་ཟླའི་གདན་ལ་ཡེ་ཤེས་སེམས་དཔའ་རང་འདྲ་བའམ། ཡང་ན་ཕྱག་ཚན་སྤངས་པ། ཁ་ཅིག་སྤྲུལ་པ་དང་སྤྲུལ་གཞིའི་དབང་དུ་བྱས་ཏེ་སྤྱན་རས་གཟིགས་ཀྱི་ཐུགས་ཀར་འོད་དཔག་མེད་དང་མཚོ་རྒྱལ་གྱི་ཐུགས་ཀར་ཕག་མོ་སྒོམ་པ་ལྟ་བུ་སྟེ་རང་གཞུང་དང་བསྟུན། དེའི་ཐུགས་ཀར་རིགས་སོ་སོའི་ཕྱག་མཚན་རྡོ་རྗེ་ལྟ་བུ་འགྲེང་སྟབས་སུ་གནས་པའི་ལྟེ་བར་ཉི་ཟླ་བརྩེགས་པའམ། ཞི་བ་ལ་ཟླ་བ། ཁྲོ་བོ་ལ་ཉི་མའི་གདན་སྲན་མ་བཀས་པ་ཙམ་གྱིས་ཏིང་ངེ་འཛིན་སེམས་དཔའ་རྩ་བའི་ཐུགས་སྲོག་ཧྲཱིཿདང་ཧཱུྃ་སོགས་ཡི་དམ་གང་ཡིན་གྱི་ས་བོན་ལྷ་ཡི་ཁ་དོག་དང་མཚུངས་པར་མར་མེ་ལྟར་གསལ་ཞིང་འཚེར་བ་ལངས་སྟབས་སུ་ལྷའི་ཞལ་བསྟན་ཕྱོགས་ལྟར་གནས་པའི་མཐའ་བསྐོར་དུ་སྔགས་ཕྲེང་བཀོད་པ་སྟེ། སྒྲུབ་ཐབས་ཁ་ཅིག་ཏུ་བདག་དམ་ཚིག་པའི་ཐུགས་ཀར་ས་བོན་དང་སྔགས་ཕྲེང་བསྒོམས་པ་ལས། ཡེ་ཤེས་སེམས་དཔའ་དང་ཕྱག་མཚན་མེད་པ་ཡང་བྱུང་བས་རང་གཞུང་དང་བསྟུན། བསྒོམ་བྱའི་ཡི་གེ་ཡང་། རྒྱ་བོད་ཀྱི་ཡིག་གཟུགས་ཁྱད་པར་ཙམ་ལ་བྱིན་གྱིས་རློབ་པར་ནུས་མ་ནུས་སོགས་ཀྱི་དབྱེ་གསལ་མ་དམིགས་པའི་ཕྱིར་གཤར་གཟབ་གང་རུང་རང་གི་བློ་ལ་འཆར་བ་གང་བདེར་བྱ་བ་ལས་གཞན་དུ་བསྒྱུར་མི་དགོས་སོ། །སྔགས་ཕྲེང་བཀོད་ཚུལ་ཡང་རྩ་བའི་ཐུགས་སྲོག་ས་བོན་གྱི་ཡི་གེ་དེའི་མདུན་ནས་བརྩམ་སྟེ་བཟླ་བྱའི་སྔགས་ཀྱི་ཡིག་འབྲུ་རྣམས་ཤིན་ཏུ་ཕྲ་བ་སྤུས་བྲིས་པ་བཞིན་གསལ་ཞིང་འབར་བའི་ཕྲེང་བས་བསྐོར་བ་སྟེ། དེ་ཡང་རང་གཞུང་དང་བསྟུན་སྔགས་ཕྲེང་གཡས་སུ་འཁོར་དགོས་པ་རྣམས་སྔགས་ངོ་ཕྱིར་བསྟན་པ་དང་། ཕྱི་ནས་བཀླག་ཕྱོགས་ལྟར་ཡིག་འབྲུ་རྣམས་ལངས་སྟབས་སུ་གཡོན་དུ་བཀོད་ལ་ཕྲེང་བ་ལྟར་འཁོར་བ་མགོ་འདྲེན་ཨོཾ་ལྟ་བུ་དང་ཧཱུྃ་ཧྲཱིཿསོགས་མཇུག་གི་སྔགས་འབྲུ་ཐུག་པ། དེ་ཡང་རིང་བའི་རིགས་ལ་མདུན་ནས་ཡིག་མགོ་བརྩམས་པའི་སྔགས་མགོ་ནང་བསྟན་དང་སྔགས་མཇུག་ཕྱི་རོལ་དུ་ཐད་ཀར་བསྒྲིགས་པའི་རིམ་པ་གཉིས་གསུམ་སྦྲུལ་འཁྱིལ་བ་ལྟར་བསྒོམ་ལ་བཟླས་པའི་དུས་གཡས་སུ་བཀླག་ཐབས་སུ་འཁོར་དགོས་པ་ཡིན། སྔགས་ཕྲེང་གཡོན་དུ་འཁོར་དགོས་པ་རྣམས་ཐུགས་སྲོག་གི་མདུན་ནས་སྔ་མ་ལྟར་ཡིག་འབྲུ་རྣམས་ལངས་སྟབས་སུ་སྔགས་ངོ་ནང་བསྟན། ནང་ནས་བཀླག་ཕྱོགས་སུ་གཡས་བསྐོར་དུ་བཀོད། སྔགས་རིགས་རྣམས་བཀོད་ལུགས་སྔ་མ་ལྟར་བྱ། བཟླས་པའི་སྐབས་གཡོན་དུ་འཁོར་དགོས་པ་ཡིན། སྔགས་ཕྲེང་གཡས་གཡོན་དུ་འཁོར་ཚུལ་སྤྱིར་བཏང་ནི། ལྷ་ཡབ་ཀྱི་རིགས་རྣམས་གཡས་འཁོར་དང་། ཡུམ་རྣམས་ལ་གཡོན་འཁོར་ལྟ་བུར་འདུག་ཀྱང་མཐའ་གཅིག་ཏུ་ངེས་པ་མེད་པས་རང་གཞུང་དང་བསྟུན། ཡང་སྔགས་ཕྲེང་དངོས་འཁོར་མི་དགོས་པར་དེ་ལས་འོད་ཟེར་སྤྲོ་བསྡུ་སོགས་བྱེད་པའི་རིགས་ལ་སྔགས་ངོ་བསྟན་ཕྱོགས་གོང་ལས་གོ་བཟློག་སྟེ། བཀོད་ལུགས་ཀྱི་གཡས་གཡོན་བསྐོར་ཕྱོགས་ཉིད་གཙོ་ཆེ་བས་དེ་ལྟར་སྐབས་དང་སྦྱར་ཤེས་པར་བྱའོ།། ༈ །།དེ་ནས་དང་པོ་བསྙེན་པའི་ཡན་ལག་བཀོད་པའི་བཟླས་པ་ཟླ་བ་སྐར་ཕྲེང་ལྟ་བུ་ནི། ས་བོན་སྔགས་ཕྲེང་འོད་ཟེར་འཕྲོ་བ་ལ་ཡང་ཡང་སེམས་བཟུང་། དེ་ནས་རིམ་པར་ལྷ་ཐམས་ཅད་ཀྱི་ཞལ་ནས་སྔགས་སྒྲ་སྒྲོགས་པ་དང་། སྔགས་འབྲུ་རྣམས་ཀྱང་རང་སྒྲ་དང་བཅས་གདན་ལས་ཅུང་ཟད་འཕར་ཏེ་ཐོག་མར་འོད་ཟེར་འཁོར། དེ་ནས་སྔགས་ཕྲེང་ཉིད་རིམ་གྱིས་ཇེ་མགྱོགས་སུ་འཁོར་བ་ལས་འོད་ཟེར་འཕྲོས་ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་བག་ཆགས་དང་བཅས་པ་སངས་ཀྱིས་བསལ་བར་མོས་པའོ།། ༈ །།གཉིས་པ་ཉེ་བར་བསྙེན་པ་མགལ་མེ་འཁོར་བ་ལྟ་བུའམ་ཁྱོགས་ཀྱི་བཟླས་པ་ནི། ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཞིག་འཕྲོས་པ་ཡིག་འབྲུ་རྣམས་གཅིག་རྗེས་གཉིས་ནོན་རེག་ལ་མ་འབྱར་ཞིང་བར་མ་ཆད་པའི་ཕྲེང་བ་སྔགས་ཀྱི་རང་སྒྲ་དང་བཅས་པ་མགལ་མེའི་འཁོར་ལོ་བསྐོར་བ་བཞིན་ཡེ་ཤེས་པ་དང་དམ་ཚིག་པའི་ཞལ་ནས་རིམ་པར་ཐོན་པ་ཡུམ་གྱི་ཞལ་དུ་ཞུགས་ཐུགས་རྒྱུད་བསྐུལ། སྐུའི་ནང་བརྒྱུད་པདྨ་ནས་བྱུང་སྟེ་ཡབ་དང་ཡེ་ཤེས་སེམས་དཔའ་གཉིས་ཀྱི་རྡོ་རྗེའི་ལམ་ནས་བརྒྱུད་བྱང་ཆུབ་ཀྱི་སེམས་བདེ་བ་ཆེན་པོའི་ངོ་བོར་བདེ་ཕྲིལ་ཕྲིལ་བྱུང་བ་ཐུགས་ཀའི་ས་བོན་ལ་ཐིམ་པས་མཆོག་གི་དངོས་གྲུབ་ཐོབ་པར་མོས་པ་ནི་ཡེ་ཤེས་ཀྱི་བཟླས་པ་སྟེ། དེས་ཐིག་ལེ་བརྟན་གསལ་ཉམས་སྐྱེ། ཐུར་སེལ་དབུ་མར་ཐིམ་པར་བྱེད། ཡང་སྔགས་ཕྲེང་ཕར་འཁོར་བར་བསྒོམ་པ་ནི་དོ་ལིའམ་ཁྱོགས་ཀྱིི་བཟླས་པ་སྟེ་དེས་མི་རྟོག་པའི་ཉམས་སྐྱེ། སྲོག་རླུང་དབུ་མར་ཐིམ། སྟོད་འཚང་གི་གེགས་སེལ་སྔ་དྲོ་དང་སྲོད་ལ་ཚུར་འཁོར་བ་དང་། ཉིན་གུང་དང་ཕྱི་དྲོ་ཕར་འཁོར་བར་བསྒོམ། མདུན་བསྐྱེད་ཡོད་པ་རྣམས་ལའང་དེ་བཞིན་བདག་མདུན་གྱི་བར་སྔགས་ཕྲེང་སྤྲོ་བསྡུ་བྱའོ།། ༈ །།གསུམ་པ་སྒྲུབ་པའི་ཡན་ལག་རྒྱལ་པོའི་ཕོ་ཉ་ལྟ་བུའམ་སྤྲོ་བསྡུའི་བཟླས་པ་ནི། སྔགས་བཟླས་པའི་རྐྱེན་གྱིས་ཐུགས་སྲོག་སྔགས་ཕྲེང་དང་བཅས་པ་ལས་འོད་ཟེར་ཁ་དོག་ལྔ་ལྡན་ནམ་མཁའ་གང་བར་འཕྲོས་པའི་རྩེ་ལས་མཆོད་པའི་ལྷ་མོ་མཆོད་རྫས་ཐོགས་པ་དཔག་ཏུ་མེད་པ་འཕྲོས། མཁའ་ཁྱབ་ཀྱི་རྒྱལ་བ་སྲས་དང་བཅས་པ་ལ་ཐུགས་མཉེས་པའི་མཆོད་པ་བསམ་གྱིས་མི་ཁྱབ་པར་ཕུལ། ལྷ་རྣམས་ཟག་མེད་ཀྱི་བདེ་བ་ཆེན་པོས་ཐུགས་མཉེས་པར་བྱས། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པར་རམ། འོད་ཟེར་དཀར་དམར་མཐིང་གསུམ་གྱི་རྣམ་པར་ཆར་བབས་པ་ལྟར་བྱུང་ནས་རང་གི་སྒོ་གསུམ་ལ་ཐིམ་པས་སྒྲིབ་གཉིས་བག་ཆགས་དང་བཅས་པ་དག །ཚོགས་གཉིས་ཡོངས་སུ་རྫོགས། དབང་བཞི་ཆིག་རྫོགས་སུ་ཐོབ་པར་བསམ་པ་ནི་བདག་དོན་བྱིན་རླབས་བསྡུས་པའི་དམིགས་པའོ། །ཡང་འོད་ཟེར་འཕྲོས་ཏེ་ཁམས་གསུམ་རིགས་དྲུག་གི་སེམས་ཅན་རྣམས་ལ་ཕོག་པས་ལས་ཉོན་སྡིག་སྒྲིབ་དང་སོ་སོའི་སྡུག་བསྔལ་ཐམས་ཅད་སྐད་ཅིག་ལ་སྦྱངས། ཉན་རང་བྱང་སེམས་རྣམས་ཀྱང་ཤེས་སྒྲིབ་ལས་གྲོལ་བར་བྱས། ཐམས་ཅད་ཀྱི་ལུས་ངག་ཡིད་གསུམ་རྡོ་རྗེ་གསུམ་གྱི་ངོ་བོར་གནས་གྱུར་པར་བསམ་པ་ནི་གཞན་དོན་ཕྲིན་ལས་ཀྱི་བཟླས་པ་སྟེ། འདིའི་སྐབས་སུ་ལས་བཞི་གང་འདོད་ཀྱི་དམིགས་པའང་འཕྲུལ་ཤེས་པར་བྱའོ།། ༈ །།བཞི་པ་སྒྲུབ་པ་ཆེན་པོའི་ཡན་ལག་བུང་བ་ཚང་ཞིག་ལྟ་བུ་ནི། ལྷ་སྔགས་ལས་སྤྲོས་པའི་འོད་ཟེར་གྱིས་སྣོད་གཞལ་ཡས་ཁང་། བཅུད་ལྷའི་འཁོར་ལོ། སྒྲ་གྲགས་སྔགས་ཀྱི་རང་བཞིན། དྲན་རྟོག་ཡེ་ཤེས་ཀྱི་རོལ་པར་བསྒྱུར་བར་མོས་ལ་འཛིན་མེད་ཀྱི་ངང་ནས་བཟླ་བ་ནི་བདག་གཞན་གཉིས་མེད་ཀྱི་བཟླས་པའོ།། ༈ །།འཛབ་དགོངས་བཞི་པོ་འདི་རིམ་ཅན་དུ་སྦྱོར་བ་དང་། གང་ཡང་རུང་བ་སྟེ་ཟུང་སྦྱོར་བ་སོགས་ཡོད་པ་ལས་རང་གཞུང་དངོས་བསྟན་ནི་གལ་ཆེའོ། །དེ་ནས་ངག་གིས་ཇི་ལྟར་བཟླ་ཚུལ་དངོས་ནི། སྤྱིར་ངག་བཟླས་སྐད་གསང་མཐོན་པོར་བཟླ་བ་དང་། མཆུ་དང་ལྕེ་རྩེ་འགུལ་ཙམ་གྱིས་ཤུབ་བུར་བཟླ་བ་དང་། རླུང་བཟུང་སྟེ་སྔགས་ཀྱི་གཟུགས་དང་སྒྲ་ལ་སེམས་གཏད་པ་འགོག་བཟླས་དང་། རླུང་འཛིན་པ་ཙམ་ཡང་མི་བྱ་བར་ཡིད་ཁོ་ནས་སྔགས་ཀྱི་གཟུགས་ཙམ་སྒྲ་གདངས་དྲན་པས་ཡིད་བཟླས་དང་། ས་བོན་ནཱ་ད་ལས་དབུགས་ཕྱིར་དབྱུང་བ་དང་ལྷན་ཅིག་ཧཱུྃ་གི་སྒྲས་སྐུའམ་འོད་ཟེར་སྤྲོས་ཏེ་དོན་གཉིས་བསྒྲུབས། ནང་དུ་འཇུག་པའི་ཚེ་ཨོཾ་གྱི་སྒྲས་ཚུར་བསྡུས། གནས་པའི་ཚེ་ཨཱཿའི་སྒྲས་ནཱ་ད་ལ་ཐིམ་པའོ། །ཡང་ན་རང་སྔགས་དང་སྦྱར་ཏེ་རྡོ་རྗེའི་བཟླས་པ་བྱ་བ་སོགས་ཡོད་ཀྱང་། འདིར་ངག་བཟླས་ཙམ་གྱི་དབང་དུ་བྱས་ཏེ། བགྲང་ཕྲེང་གི་མཚན་ཉིད་དང་། དེ་བྱིན་གྱིས་རླབས་པ་དང་། ལས་སོ་སོ་དང་བསྟུན་ཏེ་འདྲེན་ཚུལ་སོགས་ཀོང་སྤྲུལ་རིན་པོ་ཆེའི་མཛད་པའི་བསྙེན་སྤྱི་ཆེན་མོ་ཞེས་པའི་ནང་དུ་གསལ་ཞིང་། བཟླ་ཚུལ་དངོས་ནི། ཨུ་རྒྱན་ཆེན་པོས། མ་ཡེངས་ཏིང་འཛིན་ལྡན་པས་བཟླ། །གཞན་དུ་ཡེངས་པར་གྱུར་ན་ནི། །བསྐལ་པར་བཟླས་ཀྱང་འབྲས་མི་འབྱིན། །ཞེས་གསུངས་པས་སེམས་རྣམ་པར་གཡེང་བས་ཇི་ཙམ་བཟླས་ཀྱང་ངག་སྒྲིབ་ཅུང་ཟད་སྲབ་པ་ཙམ་ལས་འདོད་པའི་དངོས་གྲུབ་ཆེན་པོ་འབྱིན་པར་མི་འགྱུར་བས། ལྷའི་གསལ་སྣང་དང་སྔགས་ཕྲེང་འོད་ཟེར་སྤྲོ་བསྡུ་སོགས་ལ་སེམས་གཏད་དེ་ཏིང་ངེ་འཛིན་རྩེ་གཅིག་པའི་ངང་ནས་གཞན་དུ་མ་ཡེངས་པར་བཟླ་བ་གལ་ཆེའོ། །དེའང་ཤེས་ན་ཡི་གེའི་སྐྱེ་གནས་སྒྲའི་འབྱིན་ཚུལ་ལྕེ་མཆུའི་བྱེད་རྩོལ་སོགས་མ་འཁྲུགས་པར། ཡི་གེ་རེ་རེ་ནས་ཤིན་ཏུ་མྱུར་བ་དང་། ཧ་ཅང་བུལ་བ་མ་ཡིན་པ་དང་། ཡི་གེ་རིང་པོ་རྣམས་ཐུང་བ་དང་། ཐུང་ངུ་རྣམས་རིང་བ་མ་ཡིན་པ་དང་། ཡི་གེ་གཞན་ལྷག་པའམ་ཆད་པ་མ་ཡིན་པ་དང་། གཞན་ཡང་སྒྲ་ཧ་ཅང་ཆེ་བ་དང་ཆུང་བ་ལ་སོགས་པའི་སྐྱོན་རྣམས་སྤང་ལ། ཐུན་སྒང་གཞན་ལ་གཏམ་སྨྲ་བ་དང་། གླལ་བ་དང་ལུ་བ་སོགས་གཞན་གྱིས་བར་མ་ཆད་པར་བཟླ་བར་བྱ་སྟེ། རྔམ་གློག་ལས། སྒྲ་ཆེན་མ་ཡིན་ཆུང་བ་མིན། །མགྱོགས་པར་མ་ཡིན་བུལ་བ་མིན། །དྲག་པོར་མ་ཡིན་ཞན་པ་མིན། །ཡིག་འབྲུ་ཡན་ལག་ཉམས་པ་མིན། །ཡེངས་པ་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པ་མིན། །ཞེས་གསུངས་པ་ལྟར། སྤྱིར་གསང་སྔགས་ཀྱི་ཆོ་ག་སོགས་ལ་དཔྱད་པས་དངོས་གྲུབ་རིང་བར་བཤད་དེ། རྟོག་ཅིང་དཔྱོད་པའི་རྟོག་གེ་མཁས། །དེ་ལ་དངོས་གྲུབ་ཤིན་ཏུ་རིང་། །ཞེས་དང་། རྫས་དང་སྔགས་ཀྱི་སྦྱོར་བ་ལ། །དཔྱད་ན་དངོས་གྲུབ་མི་འབྱུང་སྟེ། །གལ་ཏེ་ཡིད་གཉིས་ཟ་གྱུར་ཏམ། །བསམ་པ་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་ལྡོག་འགྱུར་བར་གདོན་མི་ཟ། །ཞེས་གསུངས་པས་དེས་ན་དད་མོས་རྩེ་གཅིག་པས་བཟླ་བར་ཅི་ནས་གལ་ཆེ་བས་ཤེས་དགོས་སོ། །བཟླ་བྱའི་སྔགས་ཀྱང་ཕལ་ཆེར་ལྷ་ཡི་མཚན་ནས་བོས་པ་དང་ཐུགས་རྒྱུད་བསྐུལ་བ་དང་། ཡོན་ཏན་བརྗོད་པ་ཡིན་ཏེ་ཡིག་དྲུག་ལ་མཚོན་ན་བོད་སྐད་དུ་ཀྱེ་ནོར་བུ་པདྨ་ཞེས་མཚན་ནས་འབོད་པ་དང་། སིདྡྷི་ལྟ་བུ་ལ། རྡོ་རྗེའི་བླ་མ་པདྨ་དངོས་གྲུབ་སྩོལ། ཞེས་ཐུགས་དམ་བསྐུལ་བ་ལྟ་བུ་ཡིན་པས། དོན་ལ་ཡེ་ཤེས་ཀྱི་ལྷ་ལ་བོས་མ་བོས་ཀྱིས་གསན་མི་གསན་དང་ཉེ་རིང་གི་ཁྱད་པར་མ་དམིགས་ཀྱང་། སངས་རྒྱས་ཐམས་ཅད་ཀྱི་གསུང་ཆོས་སྐུའི་རང་བཞིན་ཡེ་ཤེས་ཀྱི་རིག་སྔགས་དེ་ཉིད་བཟླས་པས་རང་རྒྱུད་ཀྱི་སྒྲིབ་པ་རིམ་གྱིས་ཟད་པ་ན་འབྲས་བུ་ནི་ལྷ་དང་ཇེ་ཉེར་འགྱུར་བ་ཆོས་ཉིད་ཀྱིས་ཡེ་ཤེས་ལྷ་ཡི་བྱིན་རླབས་རྒྱུད་ལ་འཇུག་པར་འགྱུར་བ་ཡིན་ནོ། །གོང་དུ་ཕྱོགས་ཙམ་སྨོས་པ་ལྟར། རབ་མཚན་མའི་བསྙེན་པ་དངོས་ཉམས་རྨི་ལམ་གང་རུང་དུ་ལྷ་འགྲུབ་པའི་མཚན་མ་མཐོང་བ། འབྲིང་དུས་ཀྱི་བསྙེན་པ་ཟླ་དྲུག་སོགས་རང་གཞུང་ནས་བཤད་པ་དང་མཐུན་པ། ཐ་མ་གྲངས་བསྙེན་པའི་སྐབས་སུ་བྱས་ན། དཀྱིལ་འཁོར་གྱི་གཙོ་བོའི་སྔགས་འབྲུ་རེ་ལ་འབུམ་ཕྲག་རེ། འཁོར་གྱི་ལྷ་རྣམས་གཙོ་བོའི་བཅུ་ཆ་རེ། ཀུན་ལ་འབུམ་གྱི་རྗེས་སུ་ཁྲི་རེ། ཁྲིའི་རྗེས་སུ་སྟོང་། སྟོང་གི་རྗེས་སུ་བརྒྱ། བརྒྱའི་རྗེས་སུ་བཅུ། བཅུ་ལ་གཅིག་སྟེ་རང་གི་བཅུ་ཆ་ཁ་སྐོང་དུ་བཟླ། ཡང་ཡི་གེ་བཅོ་ལྔ་མན་ཆད་ལ་འབྲུ་འབུམ། སུམ་ཅུ་ཡན་ཆད་ལ་ཁྲིའི་ཚད་ཡིན་པར་ཡང་བཤད། ཐམས་ཅད་ཀྱང་རྫོགས་ལྡན་ལ་གྲངས་དངོས་བསྟན། གཉིས་ལྡན་དུས་གཉིས་འགྱུར། སུམ་ལྡན་དུས་སུ་སུམ་འགྱུར། རྩོད་ལྡན་དུས་སུ་བཞི་འགྱུར་དུ་བཟླ་དགོས་པར་གསུངས་པ་སོགས་ཡོད་དེ་གཙོ་བོར་རྣལ་འབྱོར་རང་གི་ནང་ཤེས་རིག་གི་ནུས་པ་དང་བསྟུན་པ་གཅེས་སོ། །སྔགས་སྟོང་ཕྲག་རེའི་མཚམས་སུ་སྟོང་ཚིག་གིས་མཆོད་བསྟོད་བྱ་དགོས་གསུངས་ཀྱང་བཟླས་པ་འགྲུབ་པའི་རྗེས་སུ་རུང་ཞིང་དབྱངས་གསལ་ཡིག་བརྒྱ་རྟེན་སྙིང་རྣམས་བརྗོད། སྐུ་གསུང་ཐུགས་ཀྱི་དམ་ཚིག་འགལ་བ་དང་སྔགས་ཆད་ལྷག་སོགས་ཀྱི་ཉེས་པ་བསྐང་ཞིང་ནུས་པ་བརྟན་པར་བྱ་བ་དང་། དངོས་གྲུབ་ལེན་པ་སོགས་རང་གཞུང་དང་བསྟུན་དགོས་སོ།། ༈ །།དེ་ནས་ཆོ་གའི་ཡན་ལག་དང་པོ་ཚོགས་མཆོད་ནི། སྤྱིར་ཚོགས་ཀྱི་འཁོར་ལོའི་ངོ་བོ་ཐབས་ཤེས་དབྱེར་མེད་ཀྱི་ཀུན་སྤྱོད་ཅན། ངེས་ཚིག་ག་ཎ་ཙཀྲའི་སྒྲ་ལས་བདེ་བ་ཆེན་པོ་ཚོགས་ཆེན་འདུས་པའི་འཁོར་ལོས་ཉོན་མོངས་པའི་དྲྭ་བ་གཅོད། དབྱེ་བ་སྐལ་ལྡན་མི་ཡི་ཚོགས་ཐབས་ཤེས་ཟུང་དུ་ཚོགས་པ། འབྱོར་ལྡན་ཡོ་བྱད་ཀྱི་ཚོགས་གསང་སྔགས་ནང་གི་དམ་རྫས་ཚང་བ་དང་། དགྱེས་ལྡན་ལྷ་ཡི་ཚོགས་དཀྱིལ་འཁོར་གྱི་ལྷ་རྣམས་བསྒོམས་ཞིང་སྤྱན་དྲངས་པ། དེ་གསུམ་འདུས་ཏེ་ལོངས་སྤྱོད་པ་ལས་ཐོབ་པའི་བསོད་ནམས་དང་ཡེ་ཤེས་ཀྱི་ཚོགས་ཏེ་བཞིའོ། །ཚོགས་ཀྱི་འཁོར་ལོ་ལ་སྒྲ་ཇི་བཞིན་པ་སྤྱོད་ནུས་པའི་གང་ཟག་དཀོན་ཞིང་། དེང་སང་སྔགས་པ་རྣམས་ཀྱི་ལག་ལེན་ཡིག་བརྒྱ་ལ་བརྟེན་པའི་མོས་སློབ་ཀྱི་ཚོགས་མཆོད་ལ། དཀྱིལ་འཁོར་གྱི་མདུན་དུ་ཕྱི་ནང་གསང་བའི་མཆོད་ཚོགས་དམ་རྫས་བཟའ་བཅའ་བཏུང་བའི་རིགས་རྣམས་ཅི་འབྱོར་གཙང་ཞིང་ཡིད་དུ་འོང་བ་ལག་ལེན་ལྟར་བཤམས་ལ། བདུད་རྩིས་བྲན་ཏེ། རང་ཉིད་གཙོ་བོའི་ང་རྒྱལ་ལ་གནས་པའི་ཐུགས་ཀ་ནས་ཡི་གེ་རྃ་ཡྃ་ཁྃ་གསུམ་འཕྲོས་ཡེ་ཤེས་ཀྱི་མེ་རླུང་ཆུར་གྱུར་པས་མ་དག་པའི་དངོས་འཛིན་ཐམས་ཅད་བསྲེག་གཏོར་བཀྲུས་ནས། སྟོང་པར་སྦྱངས། སྟོང་པའི་ངང་ལས་བྷྲཱུྃ་ལས་ཚོགས་གཞོང་རིན་པོ་ཆེའི་རང་བྱུང་བྷཉྫ་འབར་བའི་ནང་དུ་བཅུད་འབྲུ་གསུམ་སོགས་འོད་དུ་ཞུ་བ་ལས་བྱུང་བའི་བྱང་ཆུབ་སེམས་ཀྱི་ངོ་བོ་ཤ་ལྔ་བདུད་རྩི་ལྔ་ཡེ་ཤེས་ལྔའི་རང་བཞིན་འདོད་ཡོན་གྱི་རྣམ་པ་ཅིར་ཡང་འཆར་བར་མོས་ལ།། ༈ །།ཚོགས་ཞིང་སྤྱན་འདྲེན་པ་ནི། རང་ཉིད་རྩ་བའི་ལྷ་ཡབ་ཡུམ་དུ་གསལ་བའི་ཐུགས་སྲོག་གམ། མཉམ་པར་སྦྱོར་བའི་མཚམས་ནས་འོད་ཟེར་དཔག་ཏུ་མེད་པར་འཕྲོས་པས་འོག་མིན་གྱི་གནས་དང་རང་བཞིན་སྤྲུལ་པའི་ཞིང་རབ་འབྱམས་ནས། བླ་མ་རྩ་གསུམ་དཀྱིལ་འཁོར་གྱི་ཚོགས་རྣམས་ཏིལ་གྱི་གོང་བུ་ཁ་ཕྱེ་བ་ལྟར་ནམ་མཁའི་ཁྱོན་ཐམས་ཅད་ཁྱབ་ཅིང་གང་བར་སང་ངེ་མངོན་དུ་བྱོན་པར་མོས་པའོ།། ༈ །།དེ་ནས་མཆོད་པ་ནི། ཚོགས་ཕུད་ཆ་དང་པོ་དེ་ཉིད་ངོ་བོ་ཟག་མེད་ཡེ་ཤེས་ཀྱི་བདུད་རྩི་ལ་རྣམ་པ་འདོད་ཡོན་དྲུག་གི་ལྷ་མོ་དང་མཁོ་དགུའི་ལོངས་སྤྱོད་ཟད་མི་ཤེས་པ་ནམ་མཁའ་དང་མཉམ་པར་སྤྲུལ་ཏེ་འབུལ་བའོ།། ༈ །།དེ་ནས་བཤགས་པ་ནི། ཚོགས་བར་པ་ཆ་གཉིས་པ་དེ་ཉིད་བདུད་རྩི་ལྔ་ཡི་རྣམ་པར་དམིགས་ཏེ་ཕུལ་བས་ལྷ་རྣམས་དགྱེས་པར་བསྐྱེད། ཐུགས་དམ་བསྐང་། ཉམས་ཆགས་རྟོག་སྒྲིབ་བྱང་། ཡེ་ཤེས་ཆེན་པོས་བྱིན་གྱིས་རླབས་པར་མོས་ལ། ཡིག་བརྒྱ་སོགས་བརྗོད། ༈ །དེ་ནས་བསྒྲལ་བ་ནི། སྔར་བྱིན་རླབས་མ་བྱས་གོང་ཟུར་དུ་བཅད་པའི་ལིངྒ་སོགས་ཡོད་ན། མེད་ན་ཆ་གསུམ་པ་ཉིད་མདུན་དུ་བཀོད་ལ། འདོད་ཡོན་རྣམས་ལྷ་མོ་ཧཱུྃ་གི་རྣམ་པས་ཚུར་རང་ལ་བསྡུ། དེ་ཉིད་དམིགས་རྟེན་བྱས་ཏེ། རང་ཉིད་ལྷར་གསལ་བའི་ཐུགས་ཀ་ནས་འོད་ཟེར་དང་སྤྲུལ་པའི་ཕོ་ཉ་བསམ་གྱིས་མི་ཁྱབ་པ་འཕྲོས་ཏེ་བསྒྲལ་བྱ་ནི་ཞིང་བཅུ་ཚང་བ་སྟེ། རྒྱུད་ལས། སངས་རྒྱས་བསྟན་པ་བཤིགས་པ་དང་། །དཀོན་མཆོག་དབུ་འཕང་སྨད་པ་དང་། །དགེ་འདུན་འདུ་བའི་སྒོ་འཕྲོག་དང་། །ཐེག་ཆེན་ཆོས་ལ་སྨོད་པ་དང་། །བླ་མའི་སྐུ་ལ་བསྡོ་བ་དང་། །རྡོ་རྗེའི་ནང་དབྱེན་བྱེད་པ་དང་། །སྒྲུབ་ལ་བར་ཆད་བྱེད་པ་དང་། །གང་ཞིག་དམ་ལས་ལོག་པ་དང་། །སྙིང་རྗེ་མེད་པའི་སྲིན་པོ་དང་། །མུ་སྟེགས་ལོག་ལྟ་གཏོང་བ་དང་། །སྒྲུབ་པ་པོ་ལ་བསྡོ་བ་སྟེ། །འདི་རྣམས་བསྒྲལ་བའི་ཞིང་བཅུ་ཡིན། །ཞེས་གསུངས་པ་ལྟར་དེ་འདྲའི་དགྲ་བགེགས་རྣམས་རང་དབང་མེད་པར་བཀུགས་ཏེ་ལྕགས་ཀྱུས་སྙིང་ནས་བཟུང་། ཞགས་པས་རྐེ་ནས་དྲངས། ལྕགས་སྒྲོག་གིས་ཡན་ལག་བཅིངས། དྲིལ་བུས་མྱོས་པར་བྱས་ཏེ་མཚན་མའི་རྟེན་ལ་བསྟིམ། སྐྱོབ་བྱེད་ཀྱི་ལྷ་དང་བྲལ་ནས་ཉམ་ཐག་པའི་ཚུལ་ཅན་དུ་གནས་པར་མོས་པ། དོན་གྱི་སེམས་སྟོང་ཉིད་སྙིང་རྗེའི་སྙིང་པོ་ཅན་དེ། ཚད་མེད་པའི་སྙིང་རྗེ་ཆེན་པོ་དང་། སྒྱུ་མ་ལྟ་བུའི་ཏིང་ངེ་འཛིན་ཟུང་དུ་འཇུག་པའི་སྟོབས་ཀྱིས་སེམས་རྣམ་པ་ཞེ་སྡང་གི་གཟུགས་སུ་ཤར་བས། རང་ཉིད་དཔལ་ཆེན་པོ། ལག་གི་ཕུར་པསྲས་མཆོག་ཀཱི་ལ་ཡ། ལིང་ག་གནོད་བྱེད་ཀུན་འདུས་ཏེ་གསལ་བ་གསུམ་དང་ལྡན་པའི་ངང་ནས་ཕུར་པ་གཟས་པོའི་སྙིང་ཁར་བཏབ་པས་ཁོའི་ཚེ་བསོད་དཔལ་འབྱོར་བཀྲག་མདངས་གཟི་བརྗིད་ཐམས་ཅད་ཨཱཿཡིག་གི་རྣམ་པར་བསྡུས་ནས། རང་ལ་བསྟིམ་པས་བདག་གི་རྡོ་རྗེའི་ཚེ་སྲོག་དང་གཉིས་སུ་མེད་པའི་བྱང་ཆུབ་ཀྱི་སེམས་སུ་གྱུར་པར་བསམ་པ་ནི་ཚེ་ལུང་དང་། ཀུན་གཞིའི་རྣམ་པར་གནས་པ་ཕུར་རྩེ་ཧཱུྃ་གིས་བླངས་ཏེ་ཁོང་གསེང་བརྒྱུད། ཕཊ་ཀྱིས་འཕང་པས་གློ་བུར་གྱི་དྲི་མ་སྦྱངས་ནས་རྣམ་ཤེས་དྭངས་མའི་ཐིག་ལེར་གྱུར་པ་འོག་མིན་དུ་དཔལ་ཆེན་པོ་སོགས་རྩ་བའི་ལྷ་གང་ཡིན་གྱི་ཐུགས་ཀར་ཐིམ་ནས་སྲས་སུ་དབང་བསྐུར་བར་མོས་པ་ཁྲུས་ལུང་སྟེ། དེ་ལྟར་ཚེ་ཁྲུས་སྤར་གསུམ་གྱི་དགོངས་པ་དང་ལྡན་པས་བརྟེན་པ་དབྱིངས་སུ་བསྒྲལ། རྟེན་གཞི་བག་ཆགས་ཀྱི་ཕུང་པོ་ཕོ་རྐང་པ་གཡས་དང་། མོ་རྐང་པ་གཡོན་ནས་བཟུང་རིམ་པར་གཏུབ་སྟེ་ངོ་བོ་དུག་གསུམ་རྣམ་པ་ཤ་ཁྲག་རུས་པའི་ཕུང་པོར་བསམ་སྟེ་ལྷ་གཙོ་འཁོར་བཀའ་སྡོད་སྤྲུལ་པ་དང་བཅས་པའི་ཞལ་དུ་བསྟབ་པས། ཁམས་གསུམ་གྱི་འཁོར་བ་གནས་ནས་སྟོང་པར་མོས་པ་སྟེ། དེས་བདག་མི་ཕམ་སྟེ་དགྲའི་ཚེ་བསོད་རང་གི་ཚེ་བསོད་ཀྱི་གསོས་སུ་གྱུར་པས་འཚེང་། དགྲ་མི་ཕམ་སྟེ་རྣམ་སྨིན་ལས་ངན་གྱི་སྐྱེ་རྒྱུད་ཆད་ནས་དཔལ་ཆེན་པོའི་སྲས་སུ་གྱུར་པས་འཚེང་། ལྷ་མི་ཕམ་སྟེ་འཁོར་གྱི་བཀའ་སྡོད་སྲུང་མའི་ཚོགས་རྣམས། གཟུགས་ཕུང་ཤ་ཁྲག་ལོངས་སྤྱོད་ཀྱིས་ཚིམ་པས་འཚེང་བ་སྟེ་འབྲས་བུ་འཚེང་བ་སུམ་ལྡན་དུ་འགྱུར་རོ།། ༈ །།དེ་ནས་ཚོགས་ལ་རོལ་བ་ནི་ལས་ཀྱི་རྡོ་རྗེས་གུས་པས་གཙོ་བོ་ལ་ཕྱག་བྱས་ནས་ཐབས་ཤེས་ཀྱི་རྫས་བརྡའ་དང་བརྡའ་ཡིས་འབུལ་ལེན་བྱས་རྗེས་འདུས་པ་གཞན་རྣམས་ལའང་རྒན་གཞོན་གྱི་རིམ་པ་བཞིན་བྲིམ་ལ། ཚོགས་གྲལ་དུ་རྩོད་པ་དང་ཀུ་ཅོ་དང་། ཐ་མལ་གྱི་བདེན་ཞེན་སོགས་སྤངས་ཏེ། ཚིམ་པ་དང་དགའ་བ་དང་། འཛིན་ཞེན་མེད་པའི་སྒོ་ནས། བདུད་རྩིའི་མཆོད་རྫས་ལྟེ་བའི་གཏུམ་མོའི་མེས་ཞུ་བས་དྭངས་མའི་ལུས་དཀྱིལ་གྱི་ལྷ་རྣམས་མཆོད་པར་བསམ་པ་ནང་གི་སྲེག་བླུགས་ཀྱིས་ལོངས་སྤྱོད་ཅིང་། རྡོ་རྗེ་སློབ་དཔོན་ནམ་ལས་ཀྱི་རྡོ་རྗེས་གནང་བ་ཐོབ་ན་རྡོ་རྗེའི་གླུ་གར་སོགས་ཀྱང་རྣལ་འབྱོར་པའི་ཉམས་དང་སྦྱར་ཏེ་བྱའོ།། ༈ །།དེ་ནས་ལྷག་མ་རྣམས་གསོག་འཇོག་མེད་པར་བསྡུས་པའི་དཀྱིལ་འཁོར་མཆོད་པའི་རས་མ་དང་བཅས་པའི་སྟེང་དུ་ཕུད་ཆ་གསུམ་པའང་བསྣན་ཏེ། ལས་ཀྱི་རྡོ་རྗེས་བསྐུལ་ནས་སློབ་དཔོན་གྱི་ལྕེ་རྟ་མགྲིན་ཡབ་ཡུམ་རོལ་བ་མཛད་པའི་བྱང་སེམས་ཀྱི་བདུད་རྩི་བབ་པར་བསམ་ལ། སྔགས་རྒྱའི་ཛ་གད་ཀྱི་ཁ་ཕྲུ་བཏབ་སྟེ་བདུད་རྩི་སྤེལ་བ་དཀྱིལ་འཁོར་གྱི་ཤར་ལྷོའམ། བྱང་ཤར་དུ་ཞིང་ལྤགས་སོགས་གདན་ལ་བཀོད་ལྷག་མགྲོན་རྣམས་སྔགས་རྒྱས་བཀུག་ལ་མེ་ཏོག་ལ་སོགས་པས་མཆོད་ནས། སྔོན་ཚེ་དཔལ་ཆེན་པོའི་སྤྱན་སྔར་ཇི་ལྟར་ཞལ་གྱིས་བཞེས་པ་བཞིན་དུ་ལྷག་གཏོར་ཟག་མེད་འདོད་ཡོན་གྱི་དམ་རྫས་ཆེན་པོ་འདི་བཞེས་ལ་བདག་རྣལ་འབྱོར་པས་ཇི་ལྟར་བཅོལ་བའི་ལས་རྣམས་སྒྲུབ་པར་མཛོད་ཅིག །ཅེས་བསྒོས་ཏེ་སྒྲུབ་ཁང་གི་ཕྱི་རོལ་ནས་གོམ་པ་བདུན་ཅུ་བོར་བ་ན་སྲིན་མོའི་ཟ་ལམ་ཡིན་པས་དེར་བསྐྱལ་ཞིང་རྗེས་སྨོན་ལམ་གདབ་པ་སོགས་ཆོ་ག་རང་གཞུང་ལྟར་བྱའོ།། ༈ །།དེ་ནས་གཏོར་སྐྱོང་བྱ་བ་ནི། དཀྱིལ་འཁོར་གྱི་ལྷ་ཚོགས་རྣམས་དབྱིངས་ནས་ཐུགས་དམ་གྱི་རྒྱུད་བསྐུལ་ཞིང་། སྲུང་མའི་གཏོར་མ་རྣམས་གཏོར་གྲལ་ནས་ཕྱིར་དཔག་པར་བྱས་ལ། སྨན་རག་གིས་བྲན་གཏོར་རྫས་ངོ་བོ་དགྲ་བགེགས་ཀྱི་ཤ་ཁྲག་རུས་པ་ལ་རྣམ་པ་ཟག་མེད་ཡེ་ཤེས་ཀྱི་བདུད་རྩིར་སྤེལ་ཏེ་སྐྱེ་བ་མེད་པའི་དབྱིངས་ལས་རང་ཤར་བས་བརྒྱུད་གསུམ་དམ་ཅན་དྲེགས་པའི་ཚོགས་འཁོར་དང་བཅས་པ་རྣམས་ལ་སྔོན་གྱི་ཐ་ཚིག་གཉེན་པོ་བསྒྲགས་ཏེ། ལས་བཞིའི་ཕྲིན་ལས་ཐོགས་པ་མེད་པ་སྒྲུབས་ཤིག་ཅེས་ལས་བཅོལ་ཏེ་ཕྱིར་འབུལ།། ༈ །།སྐབས་འདིར་ཟོར་བསྐུལ་ཡོད་པའི་རིགས་ལ་གཏོར་རྫས་ནད་མཚོན་དུག་གི་ངོ་བོར་དམིགས་ཏེ་སྡང་དགྲ་གནོད་བྱེད་ཀྱི་ཕྱོགས་སུ་འཕང་པས་ཁ་ཕུང་རྗེས་མེད་དུ་བརླག་པར་མོས།། ༈ །།དེ་ནས་གཏོར་གཞོང་བཤལ་བའི་སྨན་ཕུད་ཀྱིས་བརྟན་མའི་གཏོར་མར་བྲན་ཞིང་། འབྲུ་གསུམ་གྱིས་བྱིན་གྱིས་རླབས། ནང་དུ་རྟེན་འབྲེལ་བཅུ་གཉིས་གནས་སུ་དག་པའི་རང་གཟུགས་ཕྱི་རོལ་དུ་བརྟན་ཞིང་ཆགས་པས་བོད་ཁམས་སྐྱོང་བའི་གཙོ་མོ་བཅུ་གཉིས་འཁོར་སྨན་ཕྲན་འབུམ་དང་བཅས་པ་ལ་འབུལ་ཞིང་གངས་ལྗོངས་མཐའ་དབུས་བདེ་བའི་ཕྲིན་ལས་བཅོལ་ལོ།། ༈ །།དེ་ནས་རྟ་བྲོ་བྱ་བ་ནི། གཏོར་གཞོང་ཁ་སྦུབ་པ་རི་རབ་ཏུ་གསལ་བའི་འོག་ཏུ་དམིགས་བྱ་མནན་ཞིང་། རྡོ་རྗེའི་རྒྱས་བཏབ་པའི་ཁར་བྲོ་ཡི་ལས་བྱ་བ་སྟེ་སྣོད་བཅུད་ཐམས་ཅད་དཔལ་རྟ་མཆོག་ཧེ་རུ་ཀ་སོགས་ལས་མཐུན་གྱི་ཁྲོ་བོ་དང་། ཁྲོ་མོའི་ཚོགས་ཀྱིས་གང་བས་ཐབས་ཤེས་གཉིས་སུ་མེད་པར་བྲོ་བརྡུང་བས་གནས་སྐབས་སུ་ཞི་རྒྱས་དབང་དྲག་གི་ལས་གང་ཡིན་འགྲུབ་ཅིང་། མཐར་ཐུག་རྟོག་ཚོགས་ཐམས་ཅད་སྐུ་དང་ཡེ་ཤེས་བདེ་བ་ཆེན་པོའི་རོལ་མོར་འཆར་བའི་དམིགས་པ་མེད་པའི་དབྱིངས་སུ་ཐིམ་པར་མོས་པའོ།། ༈ །།དེ་ནས་དངོས་གྲུབ་བླང་བ་ནི། སྤྱིར་བསྙེན་སྒྲུབ་མཐར་ཕྱིན་པ་སོགས་ཀྱི་སྐབས་སུ་བྱ་བ་ཡིན་ལ་སྒྲུབ་གཏོར་ལྷར་གསལ་ལ་མོས་གུས་ཀྱིས་གསོལ་བ་བཏབ་ཅིང་ཐུགས་དམ་བསྐུལ་བས་རྩ་བའི་ལྷ་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འབྲུ་གསུམ་དང་འོད་ཟེར་གྱི་རྣམ་པར་འཕྲོས་ཏེ་རང་གི་གནས་གསུམ་དུ་ཐིམ་པས། ལུས་ངག་ཡིད་གསུམ་གྱི་སྒྲིབ་པ་སྦྱངས། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐོབ་པར་མོས་ལ། སྒྲུབ་གཏོར་གནས་གསུམ་དུ་འཇོག་པའམ། ནང་མཆོད་ཀྱི་བདུད་རྩི་མྱོང་ཞིང་། གནས་གསུམ་དུ་ཐིག་ལེ་བྱ། མཐར་རོ་སྙོམས་གཉུག་མའི་ངང་དུ་མཉམ་པར་བཞག་པར་བྱའོ།། ༈ །།དེ་ནས་ནོངས་བཤགས་སོགས་བྱ་བ་ནི། གཏང་རག་གི་མཆོད་བསྟོད་སོགས་བྱས་རྗེས། དཀྱིལ་འཁོར་གྱི་ལྷ་རྣམས་ཀྱི་སྤྱན་སྔར་གདུང་བ་དྲག་པོའི་བདག་སྒྲུབ་པ་པོ་ཤེར་ཏིང་གི་ནུས་པ་དབེན་པས་དགོངས་སྤྱོད་རྒྱ་མཚོ་གདེང་མངོན་དུ་མ་གྱུར་པ་དང་། བྱིང་རྒོད་ཀྱི་དབང་དུ་གྱུར་ཏེ་ཏིང་ངེ་འཛིན་མི་གསལ་བ་དང་། འཛབ་བཟླས་མ་དག་ཅིང་ཆོ་གའི་ཡན་ལག་ཉམས་པ་དང་། རྫས་དང་ཡོ་བྱད་མ་འབྱོར་ཞིང་འབག་བཙོག་ཏུ་ཤོར་བ་སོགས་སྤྱི་དང་ཁྱད་པར་རྩ་བ་དང་ཡན་ལག་གི་དམ་ཚིག་དང་འགལ་བའི་ཉེས་པ་གང་དང་གང་བྱུང་བ་དེ་ཐམས་ཅད་བླ་མ་དང་དཀྱིལ་འཁོར་གྱི་ལྷ་ཚོགས་མཆེད་ལྕམ་འདུས་པ་རྒྱ་མཚོའི་སྤྱན་སྔར་མཐོལ་ཞིང་བཤགས་ན་འཕྲལ་དང་ཡུན་གྱི་སྒྲིབ་པ་མི་འགྱུར་བར་བྱང་ཞིང་དག་པར་མཛད་དུ་གསོལ་སྙམ་ནས་ཡིག་བརྒྱ་བཟླ་བར་བྱའོ།། ༈ །།དེ་ནས་ཡེ་ཤེས་པ་གཤེགས་སྟིམ་གང་འོས་བྱས་ནས་དམ་ཚིག་པར་བསྡུ་བའམ། ཡང་ན་ཡེ་ཤེས་ཀྱི་ལྷ་ལ་གཤེགས་གསོལ་མི་བྱ་བར་དམ་ཡེ་དབྱེར་མེད་དུ་བསྡུ་བ་ནི་བླ་མེད་ཀྱི་ཁྱད་ཆོས་ཐུན་མོང་མ་ཡིན་པའོ།། ༈ །།དེ་ནས་བསྡུ་རིམ་ནི། དེ་ཡང་གོང་དུ་བསྐྱེད་རིམ་གྱི་སྐབས་གྱ་ནོམ་ལྷར་ཞེན་གྱི་རྟོག་པ་མེད་ན་སྐབས་འདིར་ཡང་རྟེན་དང་བརྟེན་པའི་དཀྱིལ་འཁོར་ཐམས་ཅད་ནམ་མཁའ་ལ་འཇའ་ཡལ་བ་ལྟར་སྐད་ཅིག་གིས་སྦྱངས་ནས་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོའི་ངང་དུ་མི་དམིགས་པ་མཉམ་པར་བཞག་པ་རིལ་འཛིན་དང་། ཡོད་ན་རྗེས་ཞིག་གི་ཚུལ་དུ་རིམ་པར་བསྡུ་བར་གསུངས་པས། དེས་ན་རང་གི་སྙིང་གའི་འོད་ཀྱིས་ཕྱི་རོལ་དག་པའི་སྣོད་བཅུད་ཐམས་ཅད་འོད་དུ་ཞུ་ནས་སྲུང་འཁོར་ལ་ཐིམ། དེ་ནས་ནང་གི་སྲུང་འཁོར་དུར་ཁྲོད་སོགས་རིམ་པར་གཞལ་ཡས་ཁང་ལ། དེ་འཁོར་རྣམས། དེ་གཙོ་བོ་ཡབ་ཡུམ་ལ། ཡུམ་ཡབ་ལ། དེ་ཐུགས་ཀའི་ཡེ་ཤེས་སེམས་དཔའ་ལ། དེ་རིམ་བཞིན་ཏིང་འཛིན་སེམས་དཔའ་ཐུགས་སྲོག་ས་བོན་ལ། དེ་གྱེན་རྫོགས་ནཱ་དའི་བར་དུ་ཡལ་ནས་མཐར་དམིགས་བསམ་སྤྲོས་པ་དང་བྲལ་བའི་ཀ་དག་གི་ཀློང་དུ་མཉམ་པར་བཞག་པས་རྟག་མཐའ་བསལ།། ༈ །།དེ་ནས་སླར་ཡང་སྔགས་བརྗོད་པའི་རྐྱེན་གྱིས་ཆུ་ལས་ཉ་ལྡང་བའི་ཚུལ་དུ་རང་རྩ་བའི་སྐུར་ལྡང་སྟེ་གནས་གསུམ་བྱིན་རླབས་དང་གོ་བསྒོ་ལུས་སྲུང་སོགས་བྱས་རྗེས་སྣང་སྤྱོད་ཐམས་ཅད་སྐུ་དང་ཡེ་ཤེས་ཀྱི་རོལ་པར་ལམ་དུ་ཁྱེར་བས་ཆད་མཐའ་བསལ་སྟེ་སྤྱོད་ལམ་རྒྱུན་གྱི་རྣལ་འབྱོར་ལ་བརྩོན་པར་བྱའོ།། ༈ །།དེ་ནས་རྗེས་ཀྱི་བྱ་བ་དང་པོ་བསྔོ་བ་ནི། གང་བསྔོ་རྒྱུའི་དགེ་བ་དེ་ལྟར་བསྐྱེད་རྫོགས་ཀྱི་ལམ་རིམ་པ་གཉིས་ལ་སྦྱོར་དངོས་རྗེས་གསུམ་ཚང་བའི་སྒོ་ནས་ཚུལ་བཞིན་དུ་སློབ་པར་བྱས་པས་དེ་ཉིད་ཀྱི་གཙོས་མཚོན་བྱེད་བྱས་ཏེ་དུས་གསུམ་བྱས་ཡོད་ཀྱི་རྣམ་དཀར་མཐའ་དག་མཚོན་བྱ་གཅིག་ཏུ་བསྡོམས་པའི་བློས། གང་བསྔོ་ན་མཐའ་གཉིས་ལ་མི་གནས་པ་ཡང་དག་པར་རྫོགས་པའི་བྱང་ཆུབ་སྐུ་བཞི་ཡེ་ཤེས་ལྔ་ཡི་བདག་ཉིད་ཁྱབ་བདག་རིགས་དྲུག་པ་རྡོ་རྗེ་འཆང་གི་སར། སུའི་ཆེད་དུ་བསྔོ་ན་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བླ་མེད་ཡེ་ཤེས་ཀྱི་འབྲས་བུ་དེ་ལྟར་ཐོབ་པར་བྱ་བའི་ཕྱིར། ཚུལ་ལམ་རྣམ་པ་ཇི་ལྟ་བུའི་བསྔོ་ན། ཀུན་རྫོབ་ཐ་སྙད་ཙམ་དུ་ནང་གི་བྱེད་པ་པོ་དང་། གང་ལ་བྱ་བའི་ཡུལ་དང་། ཇི་ལྟར་བྱ་བའི་དགེ་བ་ཐམས་ཅད་རྨི་ལམ་སྒྱུ་མ་ལྟ་བུར་སྣང་ལ་རང་བཞིན་མེད་པའི་ཚུལ་གྱིས་ཇི་ལྟར་དུས་གསུམ་དུ་གཤེགས་པའི་རྒྱལ་བ་སྲས་དང་བཅས་པས་དགེ་རྩ་བླ་ན་མེད་པའི་བྱང་ཆུབ་ཏུ་ཇི་ལྟར་བསྔོ་བར་མཛད་པ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ་སྙམ་དུ་འདུན་པ་རྩེ་གཅིག་པས་བསྔོ་བའི་ཚིག་བརྗོད་དོ།། ༈ །།དེ་ནས་སྨོན་ལམ་ནི། བསམ་པ་བྱང་ཆུབ་སེམས་ཀྱིས་ཟིན་པས་རང་གཞན་གྱི་དོན་རྒྱ་ཆེན་པོར་འགྱུར་བའི་སྨོན་ལམ་རྣམ་པར་དག་པ་འདེབས་པ་སྟེ། རང་གཞུང་གི་སྨོན་ཚིག་རྣམས་དང་། གཞན་ཡང་སངས་རྒྱས་མཆོད་པ། དམ་ཆོས་འཛིན་པ། ལུང་ཀུན་སྟོན་པ། ཞིང་ཀུན་ཏུ་འཇུག་པ། ཕར་ཕྱིན་རྫོགས་པ། སེམས་ཅན་སྨིན་པར་བྱེད་པ། ཞིང་སྦྱོང་བ། བྱང་སེམས་རྣམས་དང་སྤྱོད་ཡུལ་མཐུན་པར་གནས་ལ། སྤྱོད་པ་ཀུན་ཏུ་དོན་ཡོད་པ། བྱང་ཆུབ་ཆེན་པོ་འཐོབ་པ་སྟེ་སྨོན་ལམ་ཆེན་པོ་བཅུ་དང་འཁོར་འབུམ་ཕྲག་གྲངས་མེད་པ་འཕགས་པ་ཀུན་ཏུ་བཟང་པོས་གསུངས་པའི་བཟང་པོ་སྤྱོད་པའི་སྨོན་ལམ་དང་། བྱེ་བྲག་བསྟན་པ་རྒྱས་པའི་སྨོན་ལམ་སོགས་ཇི་ལྟར་རིགས་པར་བྱའོ།། ༈ །།དེ་ནས་བཀྲ་ཤིས་ནི། ཕྱོགས་དུས་ཀྱི་རྒྱལ་བ་སྲས་བཅས་དཀྱིལ་འཁོར་གྱི་ལྷ་ཚོགས་རྣམས་ཀྱིས་བཀྲ་ཤིས་པའི་བདེན་ཚིག་བརྗོད། རྡོ་རྗེའི་གླུ་དབྱངས་ལེན། མེ་ཏོག་མནྡཱ་ར་བའི་ཆར་ཆེན་པོ་འབེབས་པར་བསམ་ལ་རང་ཉིད་ཀྱང་དེ་དང་མཐུན་པའི་ཤིས་བརྗོད་དབྱངས་རོལ་མེ་ཏོག་འཐོར་བ་སོགས་བྱ་སྟེ། ཕྱོགས་བཅུ་དུས་བཞིའི་གནས་སྐབས་ཇི་ལྟ་བུར་སྤྱོད་ཀྱང་ཀུན་ཏུ་མི་མཐུན་པའི་མིང་ཡང་མི་གྲགས་ཤིང་བསམ་དོན་ཡིད་བཞིན་དུ་འགྲུབ་པའི་དགེ་མཚན་དང་ལེགས་པའི་དཔལ་འབྱོར་གོང་དུ་སྤེལ་བར་བྱ་སྙམ་མོ།། ༈ །།ཚུལ་འདི་ལྟར་ཆོ་གའི་སྦྱོར་དངོས་རྗེས་གསུམ་ཚང་བར་སྟན་ཐོག་གཅིག་ལ་ཐུན་གཅིག་ཏུ་ཚུལ་བཞིན་ཉམས་སུ་བླངས་པས་ཀྱང་བསྐལ་པ་གཅིག་གི་ཚོགས་འདུམ་པར་གསུངས་པས་མཚོན་གསང་སྔགས་ཐབས་ཀྱི་ཆེ་བ་རྨད་དུ་བྱུང་བས་གྲངས་མེད་གསུམ་གྱི་ཚོགས་ཀྱང་དབང་རྣོན་ཤེར་བརྩོན་ཕུལ་ཕྱིན་གྱིས་སྙིགས་དུས་ཀྱི་ཚེ་གཅིག་ལའང་འདུམ་པའི་གནད་ཀྱང་དེ་ཡིན་པས་ཚུལ་འདི་ལྟ་བུ་ལ་གཅིག་ཏུ་བརྩོན་པར་བྱ་བ་གལ་ཆེའོ་གསུངས། དེའང་གོང་དུ་བཤད་པ་བཞིན་དབང་རབ་དམིགས་རྟེན་མེད་པར་ལྷ་སྐུ་རིམ་དང་གཅིག་ཆར་གསལ་ནུས་པ་ཡོང་ངོ་། །དབང་འབྲིང་གིས་དང་པོ་ཡི་དམ་གྱི་བྲིས་སྐུ་བཤམས་ནས། ཐོག་མར་མི་རྟོག་པའི་ངང་ལ་ཡུན་ཅིག་གི་ངང་བཞག་དེ་ནས་དབུ་ནས་ཞབས་དང་ཞབས་ནས་དབུ་ཡི་བར་ཡར་མར་ཞིབ་ཀྱིས་བལྟ། ཡང་སྐུ་ཧྲིལ་པོ་སྤྱི་ཁྱབ་ཏུ་བལྟ། སྐབས་རེ་མི་རྟོག་པའི་ངང་དུ་བཞག་གོ། །ཐ་མའི་འབུར་སྐུ་ལ་ཤེས་པ་རྩེ་གཅིག་གཏད། དེ་ནས་དེ་ལ་རིམ་གྱིས་འཇའ་ཚོན་དང་སྒྱུ་མ་ལྟ་བུ་ལ་བློ་སྦྱངས་ནས་རིམ་གྱིས་ཉིན་གཅིག་འབྱོང་བར་བསྒོམས། ནུབ་མོ་གཉིད་ཚིམ་པར་ལོག །དེ་བཞིན་ཡང་ཡང་སྒོམ་པའི་གོམས་སྟོབས་ཀྱིས་ཡིད་ཡུལ་དུ་བཀྲ་ལམ་མེར་འཆར་ཡོང་། དེ་དུས་དམིགས་རྟེན་མེད་པར་བསྒོམ། ལྷ་སྐུ་མི་གསལ་བའི་དུས་སུ་ཨུ་ཚུག་བྱས་ན་ཁམས་འཁྲུགས། སྣ་སུན་སླར་སྒོམ་སྙིང་མི་འདོད་པས་ལྷ་སྐུ་གསལ་འཕྲོ་བཅད་དེ་སྒོམ་དང་སླར་བསྒོམ་སྙིང་འདོད་ཅིང་རྐྱེན་རྣམས་སེལ་སླད། ཐུན་མཚམས་མི་རིང་བར་སྒོམ་གྲངས་མང་བས་ཡོན་ཏན་འཕེལ་སྐྱེད་ཆེ། གཉིད་ཀྱི་ཁམས་མ་སངས་བ་དང་། ལྟོ་འགྲང་བ་དང་། ས་རབ་རིབ་དང་གནས་ཁང་དཀར་རིབ་ནག་རིབ་ཏུ་མི་བསྒོམ། ཉིན་མོ་གཉིད་སངས་ངེས་ནམ་མཁའ་དྭངས་པའི་དུས་སུ། མཚན་མོ་ཕྱི་ཡི་རྣམ་གཡེང་རྣམས་ཞི་ནས་མར་མེའི་འོད་ཡོད་ས་སོགས་ལ་སྒོམས་དང་བྱིང་རྨུགས་ཤས་ཆུང་ཞིང་སྒོམ་པའི་དུས་གནད་སོགས་ཡོད་དོ།། ༈ །།ཐོག་མར་བསྙེན་པ་ལ་འཇུག་ཉེ་བའི་སྐབས་དཀོན་མཆོག་ལ་མཆོད་པ་འབུལ། མདོ་རྒྱུད་ཀྱི་གསུང་སྒྲོགས། དགེ་འདུན་ལ་བསྙེན་བསྐུར། སཙྪ་འདེབས། སྲོག་བསླུ། ཉེའུ་འདོན། མཁའ་འགྲོ་ཆོས་སྐྱོང་ལ་གཏོར་འབུལ་དང་གསོལ་སྐོང་། བསངས་བརྔན་གསེར་སྐྱེམས། ཆུ་སྦྱིན་དང་ལན་ཆགས་གཏོར་མ་གཏོང་། རླུང་བསྐྱེད་དང་ལམ་འཕྲང་བཅོས། ཕྱག་བསྐོར་དང་མཎྜལ། ཚོགས་སྐོང་དང་རྡོར་སེམས་བསྒོམ། བདག་འཇུག་བླང་། བླ་མའི་རྣལ་འབྱོར་སོགས་ཉིན་ཁ་ཤས་ལ་ཅི་འགྲུབ་བྱས་པས་བར་ཆད་མི་འབྱུང་ཞིང་དངོས་གྲུབ་མྱུར་བའི་དགོས་ཆེད་ཡོད་དོ། །དེ་ནས་ཕུན་སུམ་ཚོགས་པ་ལྔའི་གཞི་བཟུང་ནས་མཚམས་སྒྲུབ་སྐབས་བློ་མ་དྲེད་པ་གལ་ཆེ་བས། དགྲ་གཉེན་ནོར་ཟས། གཟུང་འཛིན་ཆགས་སྡང་། ཉོན་མོངས་རྣམ་རྟོག་ལ་སོགས་ཀྱི་དབང་དུ་སོང་ན་ངན་དྲེད་དུ་འགྲོ་བ་དང་། འབྲི་ཀློག །བློ་འཛིན་འཆད་རྩོད་བསམ་བློ་འདོན་པ་སོགས་ཀྱི་དབང་དུ་སོང་ན་བཟང་དྲེད་དུ་འགྲོ་བས་དོན་མི་འགྲུབ་པས་དེ་དག་གི་དབང་དུ་མ་སོང་བར་གང་སྒྲུབ་པ་དེ་ཉིད་ལ་ཤེས་པ་རྩེ་གཅིག་གཏད་དེ་འཁྱག་མོད། ལྟོགས་མོད། ན་མོད། ཤི་མོད། ཆད་མོད། སྒྲུབ་པ་མཐར་འདོན་བྱེད་སྙམ་ནས་སྡུག་བསྲན་སྙིང་ནས་བསྐྱེད།། ༈ །།སྐྱབས་འགྲོ་སེམས་བསྐྱེད་དང་ལྷའི་ང་རྒྱལ་ལྡན་པའི་ངང་ནས་གཏོར་མ་གསུམ་བཤམས་ཏེ་དང་པོ་བླ་མ་དཀོན་མཆོག་ལ་ཕུལ་ནས་གསོལ་བ་འདེབས། བར་པ་ཆོས་སྐྱོང་ལ་ཕུལ་ནས་བར་ཆད་མི་འོང་བའི་ཕྲིན་ལས་བཅོལ། ཐ་མ་གཞི་བདག་ལ་ཕུལ་ནས་གནས་པོ་ཞུ་ནས་མཐར་མཉམ་པར་བཞག་ཅིང་། སྡོད་ཚུགས་པའི་རྟེན་འབྲེལ་དུ་མལ་འོག་ས་དཀར་པོའི་གཡུང་དྲུང་བྲི། བར་ཆད་མི་འོང་བའི་རྟེན་འབྲེལ་དུ་ཐོ་དཀར་པོ་བརྩེགས་ཏེ་རྒྱལ་ཆེན་བཞིའི་སྐུའམ་སྔགས་བྱང་འཛུག །མདུན་དུ་མཆོད་གཏོར་བཤམས་ལ། ཨ་མྲྀ་ཏས་བསངས། སྭ་བྷཱ་ཝས་སྦྱངས། ཐམས་ཅད་སྟོང་ཉིད་ནམ་མཁའི་ངང་༔ བྷྲཱུྃ་ལས་རིན་ཆེན་སྣོད་ནང་དུ༔ ཨོཾ་ལས་ཕྱི་ནང་མཆོད་པའི་ཚོགས༔ སོ་སོའི་ལྷ་མོའི་རོལ་པ་བཅས༔ རབ་འབྱམས་ནམ་མཁའ་གང་བར་གྱུར༔ ཨོཾ་བཛྲ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་དྱེ་ཤབྟ་པཱུ་ཛ་ས་མ་ཡ་ཧཱུྃ། གཏོར་སྣོད་རིན་ཆེན་གཞལ་ཡས་སུ། །གཏོར་མ་འདོད་ཡོན་ཕུང་པོར་འབར། །ཨོཾ་ཨཱཿཧཱུྃ་ཧོས་བྱིན་བརླབས་ནས། ཐོ་བསང་སྦྱང་ནི། སྟོང་པའི་ངང་ལས་ཤར་དུ་རྒྱལ་པོ་ཆེན་པོ་ཡུལ་འཁོར་སྲུང་དཀར་པོ་པི་ཝཾ། ལྷོར་འཕགས་སྐྱེས་པོ་སྔོན་པོ་རལ་གྲི། ནུབ་ཏུ་སྤྱན་མི་བཟང་དམར་པོ་སྦྲུལ་ཞགས་དང་མཆོད་རྟེན། བྱང་དུ་རྣམ་ཐོས་སྲས་སེར་པོ་བེ་ཅོན་དང་ནེའུ་ལེ་འཛིན་པ་རྣམས་གསལ། རང་གི་སྙིང་ག་ནས་འོད་ཟེར་འཕྲོས་རི་རབ་ཀྱི་ཕྱོགས་བཞི་ནས་འཁོར་དང་བཅས་པ་བཛྲ་ས་མ་ཛས་སྤྱན་དྲངས། ཛཿཧཱུྃ་བཾ་ཧོས་བསྟིམ། ཨོཾ་དྷྲྀ་ཏ་རཥྚཱ་ཡེ་སྭཱ་ཧཱ། ཨོཾ་བི་རུ་ཌྷ་ཀཱ་ཡེ་སྭཱ་ཧཱ། ཨོཾ་བི་རུ་པཱ་ཀྵ་ཡེ་སྭཱ་ཧཱ། ཨོཾ་བཻ་ཤྲ་མ་ཎ་ཡེ་སྭཱ་ཧཱ། ཨརྒྷཾ་ནས་ ཤབྟའི་བར་གྱིས་མཆོད། ནམ་མཁའ་མཛོད་སྔགས་ཀྱིས་གཏོར་མ་འབུལ། ཟབ་ཅིང་རྒྱ་ཆེ་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །རྒྱལ་ཆེན་བཞི་ལ་ཕྱག་འཚལ་བསྟོད། །མཆོད་སྦྱིན་གཏོར་མ་འདི་བཞེས་ལ། །ཕྱོགས་བཞིའི་བགེགས་ཀྱི་མཚམས་ཆོད་ཅིག །ཅེས་སྔགས་མཐར། ཏིཥྛ་བཛྲ་ཧོས་བརྟན་བཞུགས་བྱས་ཏེ་སྒྲུབ་ཁང་ཕྱོགས་བཞི་དཔུང་དང་བཅས་ཏེ་སྲུང་བར་བསམ་ཞིང་སྲུང་འཁོར་རྣམས་བརྟན་པར་བསྒོམས་ནས་མཚམས་ལ་འཇུག་གོ། ༈ །འདི་སྐབས་མི་འཕྲད་ཀ་མེད་ཀྱི་མི་དང་། མཐུན་རྐྱེན་ཅ་ཟས་གོས་སྨན་སོགས་གཞན་ནས་འོང་དགོས་དང་མཚམས་གཡོག་ཀྱང་འདིས་མ་བྱུང་ན་འདི་འབོད་སྙམ་པ་དེ་རྣམས་དམིགས་རྡེལ་བཞག་ལ་སྲུང་འཁོར་དུ་བཅུག་པས་སླར་མཚམས་མི་རལ་བའི་དགོས་པ་ཡོད། ལོ་གསུམ་མཚམས་བྱེད་ན་ཞག་བདུན་གསུམ་ཙམ་ཁས་ལེན་བྱེད་ཅིང་གཞན་ལའང་དེ་ལྟར་སྨྲ། ཡི་དམ་འདི་སྒྲུབ་པ་ཡིན་ཞེས་དམ་གཙང་མཆེད་གྲོགས་ལའང་མི་བཤད། རྟགས་མཚན་བཟང་ངན་ཅི་བྱུང་གཞན་ལ་མི་བཤད། དངོས་གྲུབ་རྫས་རྣམས་དམ་ཚིག་མི་གཅིག་པ་ལ་སྦྱིན་པ་དང་སྟོན་པར་མི་བྱེད། སྒྲུབ་པ་མ་ཐོན་བར་གཞན་དོན་སྲུང་སྐྱོབ་འདྲེ་བརྡུང་། སྔགས་ཆུ་སྲུང་སྐུད་སྟེར་བ་སོགས་མི་བྱེད། ཆོས་མི་བཤད། གནས་མི་སྤོ། སྟན་མི་སྤྲུགས། གདོང་པ་དང་ལག་པ་མི་བཀྲུ། སྐྲ་སེན་ཁ་སྤུ་མི་བྲེག །སྒོག་ཙོང་དང་ལ་ཕུག །ལན་ཚྭ་ཆེ་བ་མི་ཟ། མཚོན་རྩེ་ཁ་ནང་མི་འཛུག །ལྕེ་ཤ་མི་ཟ། སྣོད་གས་ཆགས་དང་རྡོལ་བ་དྲི་མ་ཅན་སོགས་ལོངས་སུ་མི་སྤྱོད། མེ་ལ་ཕུ་མི་བྱེད། མཆིལ་སྣབས་དང་ཟག་པ་མིའི་མཐོང་བ་དང་འགྲོ་ལམ་དུ་མི་དོར། དམ་ཉམས་དང་སྡོམ་ཤོར། ཡུག་ས་དང་དམེ་མོ། མཛེ་ཕོ་དང་སྡིག་ཅན་གདོན་ཆེན་སོགས་ཀྱི་ལག་ནས་བྱུང་བའི་ཟས་མི་ཟ། ཞུམ་བུ་དང་ཁྱི་དང་བུད་མེད་ལ་མི་འགྲོགས། གཞན་གྱི་གོས་མི་གྱོན། ཉིན་མོར་གཉིད་མི་ཡོལ། དེ་དག་རྣམས་མ་འཛེམ་ན་བར་ཆད་འབྱུང་བ་དང་སྔགས་ཀྱི་ནུས་པ་ཉམས་པ་སོགས་སྐྱོན་དུ་མར་འབྱུང་ཡོང་། ལར་ཟས་ཟ་ཐལ་ན་ཉོན་མོངས་དབང་དུ་འགྲོ། ཉུང་ན་དཀའ་ཐུབ་སྤྱད་མི་ནུས་པས་ཚོད་ཟིན་པར་བྱེད། གཡེང་བ་རྣམས་ཀྱི་ནང་ནས་ལོང་གཏམ་སྨྲ་བ་དགེ་སྦྱོར་གྱི་སད་ཡིན་པས་མཚམས་སྡོད་རིང་ལ་སྨྲ་བ་བཅད། འགྲུལ་བ་བྱུང་མ་བྱུང་བའི་གོང་ནས་ལུས་སེམས་འཁྲུགས་པ་བྱུང་ན་གདོན་ཡིན་པས་སྲུང་འཁོར་བསྒོམ། རྗེས་ལ་བྱུང་ན་གྲིབ་ཡིན་པས་ཡིག་བརྒྱ་དང་ཁྲུས་བྱ། སྒྲུབ་པ་དབུ་འཛུགས་ཟིན་ནས་མ་གྲོལ་བར་ཅི་བྱུང་ཡང་མཚམས་ཧར་འདོན་མི་བྱེད། དེའང་མཚམས་འགོ་ལྷོད་པ་དང་། བར་དུ་དམ་པ་དང་། མཇུག་ཏུ་ཇེ་ལྷོད་བྱེད་ནས་གྲོལ་བ་དང་དམ་གཙང་སོགས་ལ་ངོ་གཏུག་ཅིང་། ཞག་འགའི་བར་མཚམས་རྗེས་སྲུང་ཞིང་གྲོང་ཡུལ་སོགས་ལ་མི་འཁྱམས་པར་ཁ་སྐོང་སཙྪ་གདབ་ཆུ་གཏོར་དང་ཚོགས་བསྐང་བརྒྱ་རྩ་གཏོང་། སྦྱིན་སྲེག་སོགས་གང་འགྲུབ་བྱ་ཞིང་ཐོ་དྲུང་དུ་ཕྱིན་ནས་རྒྱལ་ཆེན་ལ་མཆོད་གཏོར་ཕུལ་ནས་བསྟོད་པ་བྱས་རྗེས་སླར་ཕྲིན་བཅོལ་གཤེགས་གསོལ་བགྱིས་ཏེ་ཐོ་འགྲོལ་ལོ། །མཚམས་གྲོལ་མ་ཐག་མིག་དགྲ་ཕྱོགས་བལྟས་ན་མྱུར་དུ་ཐུལ་བ་དང་། རྟེན་གསུམ་ལ་ཕྱག་མཆོད་དང་སྤང་སྐོང་ཕྱག་རྒྱ་པ་ཀློག་ན་དོན་གཉིས་འགྲུབ་པའི་རྟེན་འབྲེལ་ཡོད་པ་དང་། སཙྪའི་ཆུ་སྦྱིན་སོགས་བྱས་ན་གཞན་དོན་རྒྱ་ཆེན་འབྱུང་བའི་རྟེན་འབྲེལ་ཡོད་པ་དང་། མིག་ཉི་ཟླའི་ཕྱོགས་ལ་བལྟས་ན་ཚེ་ཉི་ཟླ་དང་མཉམ་པའི་རྟེན་འབྲེལ་ཡོད་པའང་གསུངས་འདུག་གོ།། ༈ །།དེ་བཞིན་མཁས་གྲུབ་རྣམས་ཀྱི་གསུང་ཕལ་ཆེར་ཟབ་རྒྱས་ཆེ་བའི་རང་བཞིན་ལས། ཟེ་ཆེན་རྒྱལ་ཚབ་རིན་པོ་ཆེས་ཡོངས་ཀྱི་གནད་རྣམས་གཅིག་ཏུ་བསྡུས་པ། གང་ཟག་ལས་དང་པོ་པའི་སྐབས་སུ། གོ་ཐོས་དང་ཤེས་རབ་མྱོང་ཚོད་སོགས་ཇི་འདྲ་ཡོད་དར་ཐུགས་བརྗེད་མ་ཁུར་བར་ཉམས་ཕན་ཁོ་ནར་དགོངས་ཏེ་གསུངས་པའི། བསྐྱེད་རིམ་སྤྱིའི་རྣམ་བཞག་ནོར་བུའི་མེ་ལོང་འདི་ཉིད་བླུན་རྒན་བདག་ལྟ་བུ་ལ་བཀའ་དྲིན་ཤིན་ཏུ་ཆེ་བར་སྣང་བས་མཆེད་གྲོགས་ཁྱེད་རྣམས་ནས་ཀྱང་ཚིག་ཙམ་དུ་མ་ལུས་པར་དོན་སྣ་རེ་ཡིན་ཡང་རང་རྒྱུད་དུ་འབྱོར་བར་གྱིས་ཅི་ནས་ཞུའོ།། ༈ །།སླར་སྨྲས་པ། བསྐྱེད་རྫོགས་ལམ་གྱི་གལ་གནད་ཡང་ཟབ་ནི། །སྲོག་སྡོམ་གཟེར་བཞིའི་མན་ངག་མཆོག་ཏུ་གཅེས། །དེ་དང་བྲལ་བའི་བཟླས་སྒོམ་གང་བྱས་རུང་། །གནས་སྐབས་མཐར་ཐུག་རང་གཞན་དོན་གཉིས་སོགས། །ཡང་དག་འབྲས་བུ་སྲིད་མཐའ་ཙམ་དུ་ཟད། །བྱང་ཆུབ་སེམས་དང་བསྐྱེད་རྫོགས་རིམ་པ་ཡི། །གོ་ཡུལ་ཙམ་ཞིག་ལམ་དུ་མ་སློང་བས། །སྐད་རོ་དབྱངས་རོལ་སྒྲུབ་མཆོད་དུ་རློམས་ཏེ། །མངོན་པའི་

ང་རྒྱལ་བསྐྱེད་ལ་ཡ་མཚན་ཅི། །མ་ཟད་གཙོ་བོ་དོན་དམ་སྙིང་པོ་ཡི། །བསྐྱེད་རྫོགས་མན་ངག་ཟབ་མོ་ཡོད་བཞིན་དུ། །གླུ་ལེན་བྲོ་གར་འགྲན་པ་ལྟ་བུ་ཡི། །འབག་འཆམ་བླུན་པོའི་མགོ་སྐོར་ཤ་སྟག་ལ། །དགོས་ཆེད་ཡོད་པར་གཟིགས་སམ་ཐུགས་ཉམས་ཕོབས། །སྙིགས་མ་ལྔ་བདོའི་རང་རྟགས་ཕྱིར་ངོམ་པས། །ཆོ་ག་དབྱངས་དང་རོལ་མོའི་སྒྲ་ལ་རེ། །དུས་གསུམ་མཁྱེན་པ་པད་འབྱུང་ཉིད་ཀྱིས་གསུངས། །དེ་ཕྱིར་བྱེ་བྲག་ཕྱེད་པར་ཤིན་ཏུ་གཅེས། །དབེན་པའི་རི་ལ་སྒྲུབ་པའི་དམ་བཅས་ནས། །དགྲ་འདུལ་གཉེན་སྐྱོང་ཟས་གོས་དོན་གཉེར་ཞིང་། །དྲན་དང་ཤེས་བཞིན་བག་མེད་གཡེང་བས་ཁྱེར། །ཀུན་རྫོབ་ཆོས་བརྒྱད་ངན་པས་བསླུས་མེད་དམ། །ལྟར་སྣང་ཆོས་ལ་མངོན་པར་ཕྱོགས་པའི་དུས། །ཀུན་བྱེད་སེམས་ཀྱི་ལྟ་སྒོམ་ལྐོག་ཏུ་གྱུར། །གྱེར་མོ་བཤམས་བཀོད་འཛབ་བཟླས་ལ་སོགས་ཀྱང་། །བསྐྱེད་རྫོགས་དངོས་མིན་ལམ་གྱི་ཕྱི་ཤུན་ཙམ། །ཕལ་གྱིས་འདོན་བཟླས་གྲངས་ལ་གསང་སྔགས་རློམ། །བཤམས་བཀོད་དབྱངས་རོལ་ཙམ་ལ་ཡིད་རྟོན་འཆའ། །བསྐྱེད་རྫོགས་བསྟན་པ་ཡལ་ག་གསུམ་གྱིས་འཇིག །བསྟན་པའི་རྟགས་ཙམ་འགྲིབ་ལ་ཉེ་བའི་དུས། །གང་ཟག་གསར་བུ་གོ་གཞི་བསྐྱེད་པ་དང་། །བསྐྱེད་རྫོགས་ལམ་ལ་འཇུག་པ་བདེ་ཕྱིར་དུ། །བྱིས་པ་རྣམས་ལ་ཟས་སྤྱོད་རིམ་བསླབ་ལྟར། །མཁས་གྲུབ་རྣམས་ཀྱི་གསུང་གསང་གཅེས་བཏུས་ལས། །རང་བཟོས་ཚིག་གིས་མཁས་རློམ་བྱས་པ་མེད། །ལྷག་བསམ་ཆུ་བོའི་རྒྱུན་གྱི་རླབས་ཀྱིས་དྲངས། །ཆོ་གའི་འགྲོས་དང་བསྟུན་ནས་ཆ་ཤས་ཙམ། །གྲུབ་སྲས་མིང་དེས་བཀོད་པ་དགེ་ལེགས་འཕེལ།། །།དགེའོ། །དགེའོ། །དགེའོ། །བཀྲ་ཤིས།། །།