SPCD-KABUM-01-KA-007
ཐུན་མིན་སྔོན་འགྲོའི་ཁྲིད་ཡིག་སྙིང་པོ་ཀུན་དྲིལ་མ་བཞུགས་སོ།། སྲིད་དང་ཞི་བའི་ཁམས་འདི་ན། །བདེ་བ་ཐམས་ཅད་འབྱུང་བའི་གནས། །སྐྱབས་ཀྱི་དམ་པ་དཀོན་མཆོག་གསུམ། །ཤེས་ནས་བྱང་ཆུབ་བར་དུ་འདུད། །རྨོངས་པ་རང་འདྲའི་ཡིད་ངོ་ལ། །བླ་མའི་ཞལ་ལུང་དྲི་མེད་རྣམས། །གསལ་བའི་ས་བོན་བསྐྲུན་ཕྱིར་དུ། །ཐུན་མིན་སྔོན་འགྲོའི་སྙིང་པོ་བྲི། །དེ་ཡང་ཁམས་གསུམ་རིགས་དྲུག་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཏེ་མེའི་འོབས་ལྟ་བུ། སྲིན་པོའི་གླིང་ལྟ་བུ། མཚོན་གྱི་རྩེ་ལྟ་བུར་མཐོང་ནས། དེའི་རྒྱུ་ངོ་མ་ཚེ་འདིར་སྣང་གི་དགྲ་འདུལ་གཉེན་སྐྱོང་། ཟས་གོས་དོན་གཉེར་འགྲོ་འདུག་བྱ་བཞག་འདུ་འཛི་གཡེང་བའི་རྣམ་པ་ཐམས་ཅད་སྙིང་པོ་ཅི་ཡང་མེད་པའི་རྒྱུ་མཚན་གྱིས་བློ་སྣ་ངེས་པ་ཅན་གྱིས་ཡོངས་སུ་མ་ལྡོག་ན། ཐུན་མིན་སྔོན་འགྲོའི་བསགས་སྦྱང་གི་རིམ་པ་ལ་ཚིག་ཙམ་རྗེས་ཟློས་ཀྱིས་གྲངས་གསོག་པ་དང་། འ་འུར་ཡལ་ཡོལ་གྱི་ངང་ནས་ཚེ་འདིའི་དཔོན་པོ་ལ་ཁྲལ་འཇལ་བྱེད་པ་ལྟ་བུའམ། གཡོག་ངན་ལ་ལའི་ལས་ཀ་ལྟ་བུ་བྱས་པས་དོན་ཅུང་ཟད་ཙམ་ནམ་དུའང་མི་འབྱུང་སྟེ། ཇི་སྐད་དུ། དཀོན་མཆོག་གི་རྟེན་སྡིག་སྡུག་གིས་བཞེངས། ཚེ་ཕྱི་མ་རླུང་ལ་བསྐུར། ཅེས་དང་། རྒྱལ་སྲས་ཐོགས་མེད་ཀྱིས། རང་གི་སྐྱོན་ལ་རང་གིས་མ་བརྟགས་ན། །ཆོས་པའི་གཟུགས་ཀྱིས་ཆོས་མིན་བྱེད་སྲིད་པས། །དུས་རྣམ་ཀུན་ཏུ་རང་གི་འཁྲུལ་བ་ལ། །བརྟགས་ནས་སྤོང་བ་རྒྱལ་སྲས་ལག་ལེན་ཡིན། །ཞེས་དང་། སྤྱོད་འཇུག་ལས། བདག་གིས་སྤྱོད་པ་འདི་འདྲས་ནི། །མི་ལུས་ཀྱང་ནི་ཐོབ་མི་འགྱུར། །མི་ལུས་ཐོབ་པར་མ་གྱུར་ན། །སྡིག་པ་འབའ་ཞིག་དགེ་བ་མེད། །ཅེས་གསུངས་པ་ལྟ་བུ་ལས་དོན་ནམ་ཡང་མི་གྲུབ་སྟེ། དཔེར་ན་འཇིག་རྟེན་ནའང་བརྩོན་འགྲུས་དང་ཐབས་ཆེ་བ་དང་ཤེས་རབ་ཆེ་བ་ཞིག་གིས་བྱ་བ་གང་དང་གང་ཡིན་ཡང་རུང་མི་འགྲུབ་པ་མེད་པ་ལྟ་བུ་འབྱུང་བ་དང་། བརྩོན་འགྲུས་མ་བྱས་ན་འཇིག་རྟེན་པའི་བྱ་བ་སྣ་རེ་ཙམ་ཡང་འགྲུབ་དཀའ་བའི་རང་བཞིན་ལས་མ་འདས་ན་དམ་པའི་ཆོས་ལ་ལྟ་ཅི་སྨོས་པས། དེས་ན་དད་པ་དང་དོན་གཉེར། དཀའ་སྤྱད་དང་བརྩོན་འགྲུས་ཁྱད་འཕགས་ལྷག་པར་བསྐྱེད་པ་ནི་གལ་ཤིན་ཏུ་ཆེ་བའི་རང་བཞིན་ཏེ། སྤྱོད་འཇུག་ལས། བདག་གིས་བྱང་ཆུབ་ག་ལ་ཞེས། །སྒྱིད་ལུག་པར་ནི་མི་བྱ་སྟེ། །འདི་ལྟར་དེ་བཞིན་གཤེགས་པ་ནི། །བདེན་པ་གསུངས་པས་བདེན་འདི་གསུངས། །སྦྲང་བུ་ཤ་སྦྲང་བུང་བ་དང་། །དེ་བཞིན་སྲིན་བུར་གང་གྱུར་པ། ། དེས་ཀྱང་བརྩོན་པའི་སྟོབས་བསྐྱེད་ན། །བྱང་ཆུབ་ཐོབ་དཀའ་བླ་མེད་འཐོབ། །བདག་ལྟ་རིགས་ཀྱི་མིར་སྐྱེས་ལ། །ཕན་དང་གནོད་པ་ངོ་ཤེས་པས། །བྱང་ཆུབ་སྤྱོད་པ་མ་བཏང་ན༑ །བདག་གིས་བྱང་ཆུབ་ཅིས་མི་འཐོབ། །ཅེས་དང་། ཡུམ་བར་མ་ལས། རབ་འབྱོར་བྱང་ཆུབ་སེམས་དཔའ་གང་དག་བདག་ཀྱང་དགེ་ལ་སྤྱོད་ཅིང་། གཞན་ཡང་དེ་ལ་བསྐུལ་བ་ནི་དལ་འབྱོར་སྙིང་པོ་བྱེད་པ་སྟེ་སངས་རྒྱས་ཐམས་ཅད་ཀྱིས་བསྔགས་སོ། །བསྟོད་དོ། །བཀུར་རོ། །ཞེས་དང་། མདོ་ལས། བདག་གི་ནོར་ནི་བཏང་ལ་ལུས་བསྲུང་ངོ་། །ནོར་དང་ལུས་ཀྱང་བཏང་ལ་སྲོག་སྲུང་སྟེ། །ནོར་དང་ལུས་དང་དེ་བཞིན་སྲོག་རྣམས་ཀྱང་། །ཐམས་ཅད་བཏང་ལ་ཡང་དག་ཆོས་སྒྲུབས་ཤིག །ཅེས་དང་། ཇི་སྐད་དུ། བརྩོན་འགྲུས་ལྡན་པ་འཇིག་རྟེན་ཀུན་གྱིས་བསྟོད། །བརྩོན་འགྲུས་ལྡན་པ་ཡོན་ཏན་ཚོགས་འཕེལ་ཞིང་། །བརྩོན་འགྲུས་ལྡན་པས་བསམ་པ་མ་ལུས་འགྲུབ། །བརྩོན་འགྲུས་ལྡན་པ་མྱུར་དུ་མྱ་ངན་འདས། །ཞེས་དང་། ཇི་སྐད་དུ། ཐམས་ཅད་བརྩོན་འགྲུས་སྟེང་ན་གདའ། །དད་ལྡན་གཡོ་མེད་གང་ཟག་གིས། །སྒྲུབ་ལ་ནན་ཏན་གཙོར་འདོན་ན། །དེ་ཡི་ལག་ན་བྱང་ཆུབ་འདུག །ཅེས་དང་། ས་པཎ་གྱིས། རྒྱུན་ཆགས་བརྩོན་པ་མ་བཏང་བར། །བགས་ཀྱིས་བསྒྲུབས་ན་ཅི་ཡང་འགྲུབ། །ཆུ་བོ་དལ་གྱིས་བབ་པ་ཡིས། །ཡངས་པའི་ས་ཆེན་བསྐོར་ནས་འགྲོ། །ངང་ཐུང་འབད་པས་མཐར་མི་ཕྱིན། །བྱ་བ་ཆེན་པོ་ཡུན་གྱིས་སྒྲུབས། །ཞེས་དང་། ཆོས་བཅུ་པ་ལས། ཇི་ལྟར་བདག་སེམས་ཅན་ཐམས་ཅད་བསྒྲལ་ཕྱིར་དང་། སྒྲོལ་ཕྱིར་དང་། དུལ་བ་དང་། ཞི་བར་འགོད་པའི་ཕྱིར་བརྩོན་པར་བྱེད་ན་བདག་ཉིད་མ་དུལ་བ་དང་། མ་ཞི་བ་དང་མ་བསྲུངས་པ་ནི་བདག་གི་ཆ་མ་ཡིན་པས། ཞི་བ་དང་། དུལ་བ་དང་། བསྲུང་བར་བྱའོ། །ཞེས་གསུངས་པ་ལྟར་དང་པོ་དད་པ་དང་དོན་གཉེར་དཀའ་སྤྱད་དང་སྙིང་རུས། ཞི་དུལ་དང་བག་ཡོད་སོགས་ལེགས་པར་འབྱོངས་པའི་སྒོ་ནས་ཆོས་སྒྲུབ་དགོས་ཚུལ་གྱི་རང་བཞིན་རྣམས་ལོ་རྒྱུས་དྲི་མ་མེད་པས་མཚམས་སྦྱར་ཏེ་ངེས་ཤེས་ཁྱད་པར་ཅན་རྒྱུད་ལ་འབྱོར་ངེས་པར་སྔོན་དུ་བྱས་ལ། དེ་ནས་བརྒྱུད་ལྡན་གྱི་བླ་མའི་ཞལ་རྒྱུན་དང་ཕྱག་བཞེས་ཟབ་མོ་དང་མཐུན་ངེས་པར་སྒོ་གསུམ་ཐུགས་ཉམས་ཤིན་ཏུ་བག་ཕེབས་པའི་ངང་ནས། དང་པོ་ངག་གི་འདོན་བྱ་གང་ཡིན་པ་དེ་དག་བློ་རུ་བྱང་ཆུབ་པར་འཛིན་ཅིང་། དེ་ནས་ཟླ་བ་ཁ་ཤས་ལ་སྐྱབས་ཡུལ་རྣམས་མ་འདྲེས་པ་སོ་སོར་གསལ་བཏབ་ལ་བརྟན་ཆ་གཅིག་ཏུ་ཆེ་བ་མ་བྱུང་གི་བར་དུ་བསྒོམས་ནས་ཡིད་ཆེས་ཀྱི་དད་པ་རྩེ་གཅིག་འདྲོངས་ངེས་པར་གྱུར་པའི་སྤྱན་སྔར། མཆོད་པ་སོགས་ཀྱང་དངོས་སུ་བཤམས་པ་དེས་མཚོན་ནས་ཡིད་ཀྱི་སྤྲུལ་པའི་ཏིང་ངེ་འཛིན་གྱིས་མཁའ་ཁྱབ་ཏུ་སྤེལ་བའི་དམིགས་འདུན་རྩེ་གཅིག་ཏུ་དྲིལ་ནས་བསྒོམ་པར་མཛད་པ་ལས། གཞན་སའམ་རྡོའམ། བར་སྣང་སྟོང་པ་ལ་འབུལ་བྱ་འབུལ་བྱེད་གྱུར་པ་ལྟ་བུར་སླ་ཆོས་སུ་ནམ་ཡང་མ་བྱེད་པར་དཀའ་བ་དང་དུ་བླངས། སླ་བ་རྒྱབ་ཏུ་དོར་ནས་སྦྱོར་བ་སེམས་བསྐྱེད་དམ་པ། དངོས་གཞི་དམིགས་མཚན་མེད་པ། རྗེས་རྨི་ལམ་དང་སྒྱུ་མ་ལྟ་བུའི་བསྔོ་བ་སྟེ་དམ་པ་གསུམ་ཀ་ཚང་བའི་སྒོ་ནས་ལག་ལེན་ཚད་ལྡན་རེ་རིམ་གྱིས་ངེས་པར་བཏབ་མཛད་དགོས་པ་ཡིན་མ་གཏོགས། དད་པ་དང་དོན་གཉེར་ཅི་ཡང་མེད་པའི་ངང་ནས་འགོ་ཆད་གཞུག་རྡུམ་ལྟ་བུའི་སྒོམ་བཟླས་འགའ་རེ་སོང་ན་ཚོགས་རྫོགས་རྒྱུ་དང་སྒྲིབ་པ་བྱང་རྒྱུ་མ་དགོས་པར་ཆོས་ལ་བརྟེན་ནས་ཚོགས་ངན་ཚབས་པོ་ཆེ་བསགས་པའི་རྒྱུ་རུ་མི་འགྱུར་བའི་ངེས་པ་འགའ་ཡང་མེད་དེ། དྭགས་པོ་ལྷ་རྗེས། ཆོས་ཆོས་བཞིན་དུ་མ་སྤྱད་ན། སླར་ངན་སོང་དུ་འགྲོ་བའི་རྒྱུ་བྱེད། ཅེས་གསུངས་པ་ལྟར། དེ་ལྟ་བུ་ལ་ངེས་པ་ཅན་གྱི་གོ་བ་ལོན་དགོས་པ་དང་། ལར་ནི་ཚེ་རབས་ནས་བསགས་པའི་སྡིག་སྒྲིབ་བག་ཆགས་མཐའ་ཡས་པ་རྣམས་དངོས་པོའི་གཟུགས་སུ་མཆིས་ན་རི་བོའི་དཔངས་དང་། རྒྱ་མཚོའི་གཏིང་དང་། ཐང་གི་མཐའ་རྒྱ་ལྟ་བུ་ཟབ་ཅིང་རྒྱ་ཆེ་བ་མཐའ་ཡས་པ་འགའ་ཞིག་ཡོད་ཤག་རེད་པས། དེ་དག་སྐྱོན་མེད་ལྟ་བུ་བཏང་སྙོམས་སུ་འཇོག་ན་རང་གིས་རང་བསླུས་བཞག་པ་ལྟ་བུ་ལས་ནམ་ཡང་མི་ཡོང་བས་དད་བརྩོན་དྲག་པོ་དང་ལྡན་པའི་སྒོ་ནས་ཡོངས་སུ་ངེས་པ་ཅན་གྱིས་སྦྱང་དགོས་ཏེ། ཐབས་ཕུན་སུམ་ཚོགས་པའི་སྐབས་འདིར་ཡོངས་སུ་སྦྱང་བར་མ་ནུས་ན། ཚེ་འདི་དང་ཕྱི་མའི་འཇིགས་པ་དང་སྡུག་བསྔལ་དཔག་ཏུ་མེད་པ་རྣམས་སེལ་བའི་ཐབས་དང་དམིགས་འདུན་ཙམ་སུ་ལ་གཏད་པས། དང་པོ་ནས་ཆོས་གང་སྒྲུབ་ན་ཕྱི་མའི་གཏན་དོན་རང་ལ་བསམ་བློ་འཁོར་ངེས་རེ་བཏང་སྟེ་སྤང་བླང་གི་རིམ་པ་རྣམས་ངེས་ཤེས་བརྟན་པོ་རེའི་གཞི་གཟུང་བ་འདི་ཙམ་གལ་ཆེ་བའི་རང་བཞིན་སྔོན་དུ་བྱ་དགོས་སོ།། ༈ །།དེ་ནས་རྒྱུད་ལས་སུ་རུང་བར་བྱེད་པ་སྐྱབས་འགྲོའི་རིམ་པ་ལ། དཀོན་མཆོག་གསུམ་ཞེས་པའི་དོན་ནི་འཇིག་རྟེན་ན་ཤིན་ཏུ་འབྱུང་བར་དཀའ་བས་ན་དཀོན། འཇིག་རྟེན་ཀུན་གྱི་རྒྱན་བླ་ན་མེད་པ་དང་། དྲི་མ་མེད་པ་དང་། མཐུ་དང་ལྡན་པ་དང་། འགྱུར་བ་མེད་པ་སོགས་ཀྱི་མཆོག་རབ་ཡིན་པས་ན་དཀོན་མཆོག་ཅེས་པ་དང་། གསུམ་ནི་དོན་གཉིས་མཐར་ཕྱིན་སངས་རྒྱས་དང་གཅིག །སྒྲིབ་གཉིས་མུན་སེལ་དམ་ཆོས་དང་གཉིས། རིག་གྲོལ་གཉིས་ལྡན་དགེ་འདུན་ཏེ་དཀོན་མཆོག་གསུམ་ཞེས་པའི་ཚིག་དོན་དེ་ལྟར་དང་། སྐྱབས་འགྲོ་ནི་སེམས་ཅན་ཐམས་ཅད་སྲིད་ཞིའི་འཇིགས་པ་མཐའ་དག་ལས་སྐྱོབ་ཕྱིར་དུ་ཡང་དག་པའི་ལམ་ལ་འགྲོ་བའི་གཞི་རྩོམ་པར་བྱེད་པས་ན་སྐྱབས་འགྲོ་ཟེར་བ་ཡིན་ཏེ། དཔེར་ན་བྱིས་པ་ཁྱིས་དེད་པ་མི་ཆེན་པོ་ལ་སྐྱབས་སུ་འགྲོ་བ་ལྟར་རམ་ཉེས་ཆེན་གྱི་མི་རྒྱལ་པོ་ཆེན་པོ་ལ་མགོ་བཏགས་པ་དང་འདྲ་ཞིང་། དེ་ལྟར་ཆོས་ལ་འཇུག་པའི་སྒོ་དང་པོ་སྐྱབས་གནས་དཀོན་མཆོག་གསུམ་ལ་སྐྱབས་སུ་འགྲོ་བ་ནི་གལ་གནད་ཤིན་ཏུ་ཆེ་བའི་རང་བཞིན་ཏེ་སྐྱབས་སུ་མ་སོང་བས་སྡོམ་པ་ཙམ་ཡང་མི་ཐོབ་ལ། སྡོམ་པས་མ་བསྡོམས་པའི་ལམ་ནི་གཏན་ནས་མེད་པས་ན། དེའི་ཕྱིར་ལམ་ཐམས་ཅད་ཀྱི་རྟེན་གཞི་མཆོག་རབ་རྩེ་མོ་ཡིན་པར་བཤད་དེ། སྐྱབས་འགྲོ་ལྔ་བཅུ་པ་ལས། སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་བ་ལ་མེད། །ཅེས་གསུངས་པ་ལྟར། སྐྱབས་འགྲོ་ནི་ཆོས་ལ་འཇུག་པའི་གཞི་མ་སྒོ་ཡིན་པའི་ཕྱིར་ཡོད་ན་དེས་ཆོག་མེད་ན་ཐབས་ཆག་པའི་རང་བཞིན་དང་། གཞན་ཡང་དགོངས་འདུས་ལས། གང་འདིར་མུན་པར་འཁྱམས་པ་ལ། །བདེ་ཆེན་སྣང་བའི་ལམ་སྟོན་མཁན། །སྐྱབས་ཆེན་བླ་མ་དེ་ཉིད་ལས། །གཞན་གྱིས་སྐྱོབས་པར་ནུས་མ་ཡིན། །ཞེས་དང་། ཨོ་རྒྱན་རིན་པོ་ཆེས། འཁོར་བའི་དཔོན་ནི་ཇི་ལྟར་བཟང་ཡང་བསླུ། །སྐྱབས་གནས་དཀོན་མཆོག་གསུམ་ལ་བསླུ་བ་མེད། །ཅེས་དང་། དཀོན་བརྩེགས་ལས། དགེ་སློང་དག་ཁྱོད་ཀྱི་རང་ངམ་གཞན་གྱི་ཕྱིར་ཡང་རུང་སྟེ་འཇིགས་པ་དང་འཚེ་བ་དེ་དག་ལས་ཐར་བར་བྱ་བའི་ཕྱིར་སྐྱབས་སུ་སོང་ཞིག་དང་ཁྱོད་ཀྱི་འདོད་པའི་རེ་བ་དེ་དང་དེར་ཡོངས་སུ་རྫོགས་པར་འགྱུར་རོ། །ཞེས་དང་། མདོ་རྒྱལ་མཚན་དམ་པ་ལས། དགེ་སློང་དག་ཁྱེད་དགོན་པ་དང་། རི་ཁྲོད་དང་། འབྲོག་སྟོང་ལ་སོགས་པར་འདུག་ཀྱང་རུང་། གསུམ་ལ་སྐྱབས་སུ་སོང་ཞིག་དང་། འཇིགས་པ་དང་སྡུག་བསྔལ་མེད་པར་འགྱུར་རོ། །ཞེས་གསུངས་པ་ལྟར་དུ་ཆོས་ལ་འཇུག་པའི་སྒོ་མ་ནོར་བ་དང་པོར་བྱེད་ནས་ལམ་སྣེ་ཡོངས་སུ་ཟིན་པ་དང་། འདི་ཕྱི་ཀུན་ཏུ་འཇིགས་པའི་སྒོ་དུ་མ་ལས་སྐྱོབས་པ་དང་། ཕན་བདེ་ཚད་མེད་པའི་ལམ་ལ་སྦྱོར་ནས་མཐུན་རྐྱེན་ཕུན་སུམ་ཚོགས་པ་འབྱུང་བའི་གནས་གཅིག་པུར་ཡིན་པ་སོགས་ཕན་ཡོན་མཐའ་ཡས་པ་གསུངས་པ་ལྟར་ཡིད་ཆེས་ཁུངས་བཙུན་སྤྲོ་བ་ལྷག་པར་བསྐྱེད་པ་སྔོན་དུ་སོང་བའི་ངང་ནས། ལམ་ཉམས་སུ་ལེན་པའི་སྐབས་འདིར་དད་པ་རྣམ་པ་གསུམ་གྱིས་གཞི་བཟུང་དགོས་པ་ཡིན་ཞིང་། དེ་ཡང་མཆོག་གསུམ་གྱི་རྟེན་དང་བླ་མ་སོགས་མཇལ་ཡོང་བའི་ཚེ་འཕྲལ་དུ་དད་པ་ལྷང་ལྷང་སྐྱེས་པ་ནི་མདོར་ན་དང་བའི་དད་པ་ཡིན། དེ་རྣམས་ཀྱིས་གནས་སྐབས་དང་མཐར་ཐུག་གི་ཡོན་ཏན་རྣམས་ཕྱོགས་ལམ་མཐོང་ནས་རང་རྒྱུད་དེ་ལ་དེ་ལྟ་བུ་འབྱོར་ན་ཅི་མ་རུང་སྙམ་པ་ནི་འདོད་པའི་དད་པ་ཡིན། དེ་བཞིན་སྙིང་ནས་སྐྱབས་སུ་སོང་བ་ལ་འདི་ཕྱི་ཀུན་ཏུ་མི་བསླུ་བའི་བདག་ཉིད་ཆེན་པོ་གཅིག་ཏུ་ཡིན་བཞིན་ངེས་ཤེས་གཏན་པོ་རྙེད་པ་ནི་ཡིད་ཆེས་པའི་དད་པ་ཡིན་ཏེ། ཨོ་རྒྱན་རིན་པོ་ཆེའི་ཞལ་ནས། ཡིད་ཁྱེད་ཤེས་ཀྱི་དད་པས་བྱིན་རླབས་འཇུག །བློ་ཐེ་ཚོམ་དང་བྲལ་ན་ཅི་བསམ་གྲུབ། །ཅེས་དང་། ཇི་སྐད་དུ། དད་པ་འཁོར་ལོ་རིན་པོ་ཆེ། །ཉིན་མཚན་དགེ་བའི་ལམ་ལ་སྦྱོར། །དད་པ་སྔོན་འགྲོ་མ་ལྟར་སྐྱེད་པ་སྟེ། །ཆོས་རྣམས་ཀུན་གྱི་རྩ་བ་དད་པ་འོ། །ཞེས་གསུངས་པ་ལྟར་དད་པ་དང་མོས་གུས་རབ་འབྲིང་ཐ་མ་གང་ཡོད་ན་ཐུགས་རྗེ་དང་བྱིན་རླབས་ཀྱང་དེ་ལྟར་ཐོགས་རྡུགས་མེད་པར་འཇུག་པ་ཡིན་ཏེ། ཅི་ཕྱིར་སྙམ་ན། རང་གིས་དད་པ་དང་མོས་གུས་ཡང་དག་པས་མཚམས་སྦྱོར་བྱ་བར་ནུས་ན། རྒྱལ་བ་རྣམས་ཀྱི་དགོངས་པ་ལ་གཤེགས་བཞུགས་ཀྱི་ཁྱད་པར་མི་མངའ་བ་རྒྱལ་བའི་ཡོན་ཏན་དང་། མཁྱེན་པའི་ཡེ་ཤེས་ལ་གསལ་འགྲིབ་དང་འཕོ་འགྱུར་མེད་པ་རྒྱལ་བའི་ཡོན་ཏན་དང་། བརྩེ་བ་ཆེན་པོས་སེམས་ཅན་གྱི་འགྲོ་དོན་ལས་གཞན་མཛད་རྒྱུ་ཅུང་ཟད་ཙམ་ཡང་མེད་པ་རྒྱལ་བའི་ཡོན་ཏན་དང་། དེ་བཞིན་དུ་ནུས་པས་གང་ལ་གང་འདུལ་གྱི་ཐུགས་རྗེ་དང་ཕྲིན་ལས་ཀྱི་རྣམ་པ་སྣ་ཚོགས་ཐོགས་རྡུགས་མེད་པར་སྒོ་དུ་མ་ནས་འཇུག་ཅིང་སྐད་ཅིག་གཅིག་གིས་བྱེ་བྲག་ཕྱེད་པ་སོགས་རྒྱལ་བའི་ཡོན་ཏན་ཁྱད་པར་དུ་མས་འཕགས་པ་དེ་ལྟར་ཡིན་པས་ན། གསོལ་བ་སྙིང་ནས་བཏབ་པ་ཙམ་གྱིས་ཆོས་ཉིད་ཀྱི་དབྱིངས་ནས་བྱིན་རླབས་དང་དངོས་གྲུབ་ཐམས་ཅད་ཐོགས་པ་མེད་པ་ངམ་ངམ་ཤུགས་ཀྱིས་འབྱུང་བའི་ཕྱིར་ཏེ། དཀོན་བརྩེགས་ལས། གང་ཞིག་རྒྱལ་བ་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །རྟག་ཏུ་བྱིན་གྱིས་རློབ་པ་དང་། །ཉེས་པ་ཀུན་ལས་རྣམ་པར་ཐར། །ཞེས་དང་། ཨོ་རྒྱན་ཆེན་པོས། དད་པ་ཅན་གྱི་གང་ཟག་ཕོ་མོ་ལ། །སོགས། ཞེས་དང་། ངལ་གསོ་ལས། ནམ་མཁའི་གནས་སུ་ནམ་མཁའ་གང་བ་ཡི། །རྒྱལ་བ་སྲས་བཅས་རྒྱ་མཚོའི་སྤྲིན་ཕུང་བསམ། །འདི་ནི་རང་གི་དད་སྟོབས་དྲི་མེད་དང་། །མཁྱེན་བརྩེའི་དབང་ཕྱུག་རྣམས་ཀྱི་ཐུགས་རྗེ་ཡིས། །ཇི་ལྟར་བསམ་པ་དེ་བཞིན་འགྲུབ་པ་ཡིན། །ཞེས་གསུངས་པ་ཇི་བཞིན་རྒྱལ་བ་སྲས་བཅས་ཀྱིས་ནམ་མཁའི་གར་ཁྱབ་ཀྱི་སེམས་ཅན་ཐམས་ཅད་ལ་མ་ཡིས་བུ་གཅིག་པུ་ལ་བརྩེ་བ་བཞིན་སྙིང་རྗེ་ཆེན་པོས་གཟིགས་པ་དམ་པ་ནི་དུས་དང་ཕྱོགས་རིས་མེད་པ་ཞིག་ཡིན་པ་ནི་གཞིར་བཅས་རུང་། འོ་ན་སེམས་ཅན་ཉམ་ཐག་རྣམས་འཁོར་བའི་གནས་ན་ད་དུང་ཅིའི་ཕྱིར་ལྷག་པ་ཡིན་སྙམ་ན་དེ་ནི་རང་རང་དད་པ་སོ་སྐྱེའི་དབང་དུ་སོང་སྟེ་ལས་ངན་བསགས་པའི་དབང་གིས་རྒྱལ་བའི་ཐུགས་རྗེ་འཇུག་པ་དང་དངོས་གྲུབ་སྟེར་བའི་ཐབས་དེ་ཙམ་དབེན་པ་ལྟ་བུ་མཆིས་པ་ཡིན་ཏེ། ཨོ་རྒྱན་ཆེན་པོས། དད་མེད་ཕུག་པ་བྱང་ལྟས་ལྟ་བུ་ལ། །ཐུགས་རྗེའི་ཉི་མ་ནམ་ཡང་འཆར་དུས་མེད། །དད་མེད་ཆུ་དཀྱིལ་རྡོ་རིལ་ལྟ་བུ་ལ། །ཐུགས་རྗེའི་ལྕགས་ཀྱུས་ནམ་ཡང་ཟིན་དུས་མེད། །ཅེས་གསུངས་པ་ལྟར་ཡིན་པས། དེས་ན་རང་རང་སོ་སོའི་དད་པ་དག་སྣང་དང་མོས་གུས་ཀྱི་རྩལ་ཁྱད་པར་ཅན་འབྱོངས་པ་སོགས་ལ་རག་ཁོ་ན་ལས་པར་ཡིན་འདུག་པས་ལྷག་པར་དད་པ་དང་དག་སྣང་ཕལ་དང་ཕལ་ལས་ཁྱད་པར་དུ་མས་འཕགས་པ་ཞིག་བསྐྱེད་པ་ཅི་ནས་གལ་ཆེ་ཤོས་ལགས་པས་ཁ་ཙམ་དུ་མ་ལུས་པར་ངེས་པར་བྱས་ཏེ། དེ་ནས་ཐེག་པ་ཆེ་འབྲིང་ཆུང་གསུམ་གྱི་སྐྱབས་སུ་འགྲོ་བའི་དོན་དང་། དུས་ཀྱི་ཚད་དང་། ཡུལ་གྱི་རྣམ་དབྱེ་བཅས་མདོ་ཙམ་ཞིག་བཤད་ན། ཐེག་གསུམ་གྱི་སྐྱབས་སུ་འགྲོ་བའི་དོན་ཡང་སེམས་བསྐྱེད་ཆེ་འབྲིང་ཆུང་གསུམ་སྟེ། ཆུང་ངུའི་མངོན་མཐོ་ལྷ་མིའི་བདེ་འབྲས་འདོད་ནས་ངན་སོང་གི་འཇིགས་པ་ལ་བསམ་སྟེ་སྐྱབས་སུ་འགྲོ་བས་ན་བསམ་པ་མ་དག་པས་སྐྱེས་བུ་ཆུང་ངུར་བཞེད་པ་དང་། ཉན་རང་གི་རིགས་ཅན་རྣམས་རིགས་དྲུག་འཁོར་བའི་འཇིགས་པ་ཀུན་ལ་སྐྲག་ནས་ཞི་བ་རང་དོན་ཁོ་ན་ཚོལ་བའི་ཕྱིར་སྐྱབས་སུ་འགྲོའང་རང་དོན་གྱི་བསམ་པ་ལས་མེད་པས་སྐྱེས་བུ་འབྲིང་དུ་བཞེད་པ་དང་། ཆེན་པོ་ནི་རང་རྒྱུད་ཀྱི་སྡུག་བསྔལ་རྟོགས་པས་རང་དོན་ཞི་བདེའི་འདོད་པ་ཡོངས་སུ་སྤངས་ནས་གཞན་དོན་ཁོ་ནའི་ཕྱིར་དུ་སྐྱབས་སུ་འགྲོ་བས་ན་སྐྱེས་བུ་མཆོག་རབ་ཏུ་བཞེད་དེ། སྐྱབས་སུ་འགྲོ་བའི་དུས་ཀྱི་ཚད་ཀྱང་གསུམ་སྟེ། ཕལ་པ་དག་རང་རང་གི་ལྷ་ལ་འདོད་དོན་འགྲུབ་ཀྱི་བར་དུ་འགྲོ་ཞིང་ཁྱད་པར་དུ་མཐོ་རིས་ཐོབ་ཀྱི་བར་དུ་སྐྱབས་སུ་འགྲོ་བ་ལས་མེད་པས་ཆུང་ངུར་བཞེད། འབྲིང་ནི་གནས་སྐབས་ཇི་སྲིད་འཚོ་ཡི་བར་དུ་དང་། མཐར་ཐུག་དགྲ་བཅོམ་པའི་གོ་འཕང་མ་ཐོབ་བར་དུ་སྐྱབས་སུ་འགྲོ་བ་ལས་མེད་པས་འབྲིང་དུ་བཞེད། ཆེན་པོ་ནི་སྙིང་པོ་བྱང་ཆུབ་ལ་མཆིས་ཀྱི་བར་དུའམ་སངས་རྒྱས་ཀྱི་ཡེ་ཤེས་མ་ཐོབ་བར་དུ་སྐྱབས་སུ་འགྲོ་བས་མཆོག་རབ་ཏུ་བསྔགས་སོ། །བསྐྱབ་བྱའི་ཡུལ་ལའང་ཐུན་མོང་དང་ཐུན་མིན་གཉིས་ཏེ། ཐེག་པ་ཆུང་ངུའི་སངས་རྒྱས་ནི་མཆོག་གི་སྤྲུལ་སྐུ་དང་། ཆོས་ནི་ལུང་དང་རྟོགས་པའི་བདག་ཉིད་གསུང་རབ་ཡན་ལག་བཅུ་གཉིས་དང་། སོ་སོའི་རྒྱུད་ཀྱི་ལམ་དང་། ཏིང་ངེ་འཛིན་ལ་སོགས་པ་དང་། དགེ་འདུན་ལའང་སོ་སྐྱེ་དང་འཕགས་པ་གཉིས་ཏེ། སོ་སྐྱེ་ནི་དགེ་བསྙེན་ཕ་མ་གཉིས། དགེ་ཚུལ་ཕ་མ་གཉིས། དགེ་སློང་ཕ་མ་གཉིས། དགེ་སློབ་མ་སྟེ་སོ་སོར་ཐར་པ་རིས་བདུན་དང་། འཕགས་པ་ལ་རྒྱུན་ཞུགས། ཕྱིར་འོང་བ། ཕྱིར་མི་འོང་བ། དགྲ་བཅོམ་པ་དང་བཞི། དེ་རེ་རེ་ལ་ཞུགས་པ་དང་འབྲས་གནས་གཉིས་སུ་དབྱེ་བས་ཟུང་བཞི་ཡ་བརྒྱད་རྣམས་ཡིན་པར་གསུངས། ཐེག་ཆེན་གྱི་སངས་རྒྱས་སྐུ་གསུམ་གྱི་བདག་ཉིད་དག་པ་གཉིས་ལྡན་ཅན་དང་། ཆོས་ནི་སྨྲ་བསམ་བརྗོད་དུ་མེད་པའི་རང་བཞིན་སངས་རྒྱས་སུ་འགྲོ་བའི་བདག་ཉིད། རྣམ་པ་ལམ་བདེན་ལུང་གི་ཆོས་དང་འགོག་བདེན་རྟོགས་པའི་ཆོས་གཉིས་ཀྱི་མཚན་ཅན། རྗོད་བྱེད་ཐེག་ཆེན་གྱི་ཟབ་ཅིང་རྒྱ་ཆེའི་མདོ་སྡེ་རྣམས་སོ། །དགེ་འདུན་ནི་སེམས་ཀྱི་རང་བཞིན་འོད་གསལ་བའི་དོན་མངོན་སུམ་དུ་མཐོང་བ་འཕགས་པའི་ཚོགས་རྣམས་ཏེ་དེ་དག་ནི་ཀུན་རྫོབ་དང་། མཐར་ཐུག་དོན་དམ་པའི་དབང་དུ་བྱས་ན་སེམས་ཀྱི་རང་བཞིན་འོད་གསལ་ཆོས་ཀྱི་སྐུ་མངོན་དུ་བྱེད་པར་ཤེས་པའོ། །དེ་ཡང་། དྲིན་ལན་བསབ་པའི་མདོ་ལས། ཚེ་དང་ལྡན་པ་དགའ་བོས་གསོལ་པ། སངས་རྒྱས་གང་ལ་སྐྱབས་སུ་འགྲོ་ལགས། བཀའ་སྩལ་པ་ཆོས་སྐུ་ལ་སྐྱབས་སུ་འགྲོ་ཡི་གཟུགས་ཀྱི་སྐུ་མ་ཡིན་ནོ། །གསོལ་པ་ཆོས་གང་ལ་སྐྱབས་སུ་འགྲོ་བ་ལགས། བཀའ་སྩལ་པ་དོན་དམ་པའི་ཆོས་ལ་སྐྱབས་སུ་འགྲོ་ཡི་ཀུན་རྫོབ་ཀྱི་ཆོས་ནི་མ་ཡིན་ནོ། །གསོལ་པ་དགེ་འདུན་གང་ལ་སྐྱབས་སུ་འགྲོ་བ་ལགས། བཀའ་སྩལ་པ་དོན་དམ་པའི་དགེ་འདུན་ལ་སྐྱབས་སུ་འགྲོ་ཡི་ཀུན་རྫོབ་ཀྱི་དགེ་འདུན་ནི་མ་ཡིན་ནོ། །ཞེས་གསུངས་པ་ལྟར་ཐུན་མོང་དང་། ཐུན་མིན་གཉིས་ཀའི་སྐྱབས་ཡུལ་གྱི་རྣམ་དབྱེ་རབ་ཏུ་ལུང་འདིས་རྣམ་པར་ཕྱེད་པ་དང་། ཡང་གསང་དེ་ཁོ་ན་ཉིད་ཀྱི་སྐྱབས་འགྲོ་ནི་དཀོན་མཆོག་གསུམ་ཀ་རང་སེམས་ལྷུན་གྲུབ་སྟེ་ངོ་བོ་རང་བཞིན་ཐུགས་རྗེའི་བདག་ཉིད་ཅན་གཞན་དུ་མི་སྨོན་འབྲས་བུའི་མཐར་ཐུག་ཉིད་དུ་ཤེས་པ་ནི་བསྐྱབ་བྱ་སྐྱོབ་བྱེད་སྐྱབས་འབྲས་ཡོངས་སུ་རྫོགས་པའི་ཕྱིར་སྟེ། ཡེ་ཤེས་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ཀུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་དང་། ཡུམ་བར་མ་ལས། རབ་འབྱོར། གང་ལ་སངས་རྒྱས་ཀྱང་མི་དམིགས་པ། ཆོས་དང་དགེ་འདུན་མི་སེམས་ན། འདི་ནི་ཡང་དག་པའི་སྐྱབས་སུ་འགྲོ་བའོ། །ཞེས་དང་། རྒྱུད་བླ་མ་ལས། སྐྱབས་ནི་སངས་རྒྱས་ཉག་གཅིག་པུ། །ཐུབ་པ་ཆོས་ཀྱི་སྐུ་ཅན་ཏེ། །ཚོགས་ཀྱང་དེ་ཡི་མཐར་ཐུག་གོ། །ཞེས་གསུངས་པ་ལྟར་སྐྱབས་ཡུལ་ནི་ཆོས་སྐུ་ཐིག་ལེ་ཉག་གཅིག་སྟེ། དེ་ཡང་རང་གི་སེམས་ཉིད་རང་བྱུང་གི་ཡེ་ཤེས་དཀོན་མཆོག་གསུམ་གྱི་ངོ་བོར་ཡེ་ནས་དབྱེར་མེད་རང་ཆས་ལྷུན་གྲུབ་ཏུ་གནས་ཡོད་པའི་དབང་གིས་གཞན་དུ་མི་སྨོན་པ་ནི་འབྲས་བུས་སྐྱབས་ཡུལ་མཐར་ཐུག་ཉིད་ཡིན་པས་དེ་ལྟར་འགྲུབ་པ་ལ་བླང་དོར་བཅོས་བསླད་མེད་པར་རྩེ་གཅིག་ཏུ་མཉམ་པར་བཞག་པས་བསྐྱབ་བྱ་སྐྱོབ་བྱེད་སྐྱབས་འབྲས་དང་བཅས་པའི་སྙིང་པོ་ཡང་ཟབ་མཆོག་ཏུ་གྱུར་པ་ཡིན་པར་ཤེས་པར་བྱས་ལ། དེ་ལྟ་བུ་སྒྲུབ་པའི་མཐུན་རྐྱེན་དུ་ལས་དང་པོ་པའི་གནས་སྐབས་སུ་ཕྱིའི་དཀོན་མཆོག་གསུམ་ལ་སྐྱེལ་མའི་ཚུལ་དུ་སྐྱབས་སུ་འགྲོ་བར་བྱ་དགོས་ཚུལ་སོགས་རྣམ་དབྱེ་སྤྱི་དང་བྱེ་བྲག་མང་ཡང་། ད་ལན་སྙིང་པོའི་དོན་རྣམས་མདོར་བསྡུས་ཏེ་ལག་ལེན་བཏབ་ཚུལ་སྙིང་པོ་དྲིལ་ནས་འཆད་ན། སེམས་ཅན་གྱི་རྟེན་གཞི་མ་དག་པའི་སྣང་བ་འདི་དག་གང་ལ་ཡང་མི་དམིགས་པ་སྟོང་པ་ཉིད་དུ་སྦྱངས་ནས། རང་གི་མདུན་མཁར་ལ་ལུང་དང་། གཤང་གཤོང་དང་། འབའ་འབུར་གྱི་རྣམ་པ་མེད་པ། གསེར་གྱི་ས་གཞི་མེ་ལོང་གི་ངོས་ལྟར་འཇམ་ཤིང་དྭངས་པ། མནན་ན་ནེམ་པ། བཏེགས་ན་འཕར་བ། རྒྱ་རབ་ཏུ་ཡངས་པ་བཻཌཱུརྻའི་མིག་མང་རིས་དང་བཅས་ཞིང་ཁམས་ཀྱི་མཚན་ཉིད་ཡོངས་སུ་ཚང་བའི་མཐིལ་དུ་རྒྱ་མཚོ་ཆེན་པོ་བསིལ་དྲོད་སྙོམས་པ། རོ་མངར་བ། ལྗིད་ཡང་པ། རེག་བྱ་འཇམ་པ། དྲི་མ་མེད་པ། རྙོག་པ་མེད་པར། རབ་ཏུ་དྭངས་པ། མགྲིན་པ་ནས་འཇུག་བདེ་བ། ལྟོ་བ་འཇུ་བདེ་བ་སྟེ་ཆུ་བོ་ཡན་ལག་བརྒྱད་ཀྱི་ཡོན་ཏན་དང་ལྡན་པའི་རྒྱ་མཚོ་ཆེན་པོ་འཁྱིལ་བ་རུ་བྱ་ངང་པ་དང་ཁྲུང་ཁྲུང་། ཀ་ལ་པིང་ཀ །མཐིང་རིལ་ལ་སོགས་ཆུ་གནས་མང་པོས་སྐད་སྙན་སྒྲོགས་པས་བརྒྱན་པ་མཛེས་ཤིང་ཡིད་རབ་ཏུ་འཕྲོག་པའི་དབུས་སུ་དགོས་འདོད་འབྱུང་བའི་དཔག་བསམ་གྱི་སྡོང་པོ་རྒྱ་ཆེ་བ། དཔངས་མཐོ་བ། ཡལ་ག་ལྔ་པ་ཅན་ནམ་མཁའི་ཁམས་སུ་གྱེས་པ་ལོ་མ་དང་། མེ་ཏོག་འབྲས་བུ་ཕུན་སུམ་ཚོགས་པ། དར་དང་རིན་ཆེན་རིགས་ཀྱི་དྲྭ་བ་དང་དྲྭ་ཕྱེད་ཀྱིས་མཐའ་རུ་དྲིལ་གཡེར་གྱིས་བརྒྱན་པ་དེ་དག་གིས་ཀྱང་ཆོས་སྐད་ལྷང་ལྷང་སྒྲོགས་པ་མཛེས་ཤིང་ཡིད་དུ་འོང་བའི་པད་སྡོང་དབུས་མའི་སྟེང་ན་མི་འཇིགས་པའི་སེང་གེ་ཆེན་པོ་བརྒྱད་ཀྱིས་ཕྱོགས་བཞི་ནས་བཏེགས་པ་རིན་པོ་ཆེ་སྣ་ཚོགས་ལས་གྲུབ་པའི་ཁྲི་རྒྱ་ཆེ་བ། དཔངས་མཐོ་བའི་ཁར་སྣ་ཚོགས་པདྨ་འབུམ་བདལ་བའི་དབུས་སུ་ཟེའུ་འབྲུ་དམར་སེར་གྱི་སྟེང་དུ་ཉི་མ་དང་ཟླ་བའི་དཀྱིལ་འཁོར་དྭངས་གསལ་དྲི་མ་མེད་པའི་གདན་ལ་ངོ་བོ་ནི་སངས་རྒྱས་ཐམས་ཅད་ཀྱི་ཐུགས་ཡེ་ཤེས་ཆེན་པོ་དང་གཉིས་སུ་མ་མཆིས་པར་ཕྲིན་ལས་ཀྱི་ཕོ་ཉ་གདུལ་བྱའི་སྣང་ངོར་གང་ཟག་མིའི་གཟུགས་སུ་བྱོན་པ་ཇི་ལྟ་ཇི་སྙེད་ཀྱི་མཁྱེན་པའི་གཏིང་མཐའ་མི་མངོན་པར་མངའ་བ། བརྩེ་བ་ཆེན་པོས་ཁམས་གསུམ་གྱི་སྐྱེ་འགྲོ་ཡོངས་ལ་བུ་གཅིག་པུའི་མ་ལྟར་བརྩེ་བའམ་གཟིགས་པ། ནུས་པའི་སྐུ་གསུང་ཐུགས་དང་ཡོན་ཏན་ཕྲིན་ལས་ཟབ་མོས་འབྲེལ་ཚད་སྨིན་གྲོལ་གྱི་ལམ་ཡངས་པོར་བཀོད་པས་བཀའ་དྲིན་མཚུངས་ཟླ་མེད་པ་རང་རང་གི་རྩ་བའི་བླ་མ་ཉིད་ཡིན་པ་ལ། རྣམ་པ་ནི་སྤྱིར་ལྷོ་འཛམ་གླིང་ལྷག་པར་བོད་གངས་ཅན་གྱི་ལྗོངས་འདིར་རྒྱལ་བའི་བསྟན་པ་རིན་པོ་ཆེའི་སྲོལ་འབྱེད་འགྲན་ཟླ་ཀུན་དང་བྲལ་བ་སངས་རྒྱས་གཉིས་པ་ཨོ་རྒྱན་མཚོ་སྐྱེས་རྡོ་རྗེ་འཆང་ཡིན་པ་ལ། དེ་ཡང་སྐུ་མདོག་དཀར་ལ་དམར་བའི་མདངས་ཅུང་ཟད་ཆགས་པ། ཞལ་གཅིག་སྤྱན་གཉིས་ནམ་མཁར་གཟིགས་པ། ཞལ་ཅུང་ཟད་ཁྲོ་འཛུམ་ཆགས་པའི་ཉམས་ཅན། ཕྱག་གཡས་པས་སྣང་སྲིད་ཟིལ་གྱིས་གནོན་པའི་གསེར་གྱི་རྡོརྗེ་རྩེ་ལྔ་པ་ཐུགས་ཀ་ནས་སྡིགས་པའི་ཚུལ་དུ་འཛིན་པ། གཡོན་མཉམ་བཞག་གི་སྟེང་ན་ཀ་པཱ་ལ་འཆི་མེད་ཡེ་ཤེས་ཀྱི་བདུད་རྩིས་གང་བའི་དབུས་སུ་ཡོ་ག་ཚེའི་དངོས་གྲུབ་བརྙེས་པའི་རྟགས་སུ་ཚེ་བུམ་ལྗོན་ཤིང་གིས་བརྒྱན་པ། ནང་ནས་རིམ་གྱིས་སྐུ་ལ་གསང་གོས་དཀར་པོ། མདུང་མ་དམར་པོ། ཕོད་ཆེན་མཐིང་ག །ཆོས་གོས་དམར་པོ་གསེར་གྱི་ཧ་རིས་ཅན། ཟ་འོག་གི་བེར་ཆེན་དམར་སྨུག་བཅས་བརྩེགས་མར་མནབས་པ། དབུ་ལ་པད་ཞུ་གསོལ་བ། ཡུམ་ཡེ་ཤེས་མཚོ་རྒྱལ་དཀར་མོ་གྲི་ཐོད་འཛིན་ཅིང་ཞབས་གཉིས་པདྨའི་སྐྱིལ་ཀྲུང་གིས་ཡབ་ལ་འཁྱུད་པ་ཡབ་ཡུམ་གཉིས་ཀ་སྐུ་གཟི་བརྗིད་རབ་ཏུ་འབར་བ་ལྟ་བས་ཆོག་མི་ཤེས་པར་བཞུགས་པའི་དབུ་སྟེང་ན། སྙིང་ཐིག་བརྒྱུད་ལུགས་ལྟར་ན་བདག་ཅག་གི་རྩ་བའི་བླ་མ་བཀའ་དྲིན་སུམ་ལྡན་གྲུབ་པའི་དབང་ཕྱུག་ཤཱཀྱ་ཤྲཱི་ཛྙཱ་ན་དེ་ཉིད་སྐུ་མདོག་དཀར་གསལ་དབུ་སྐྲ་ཐོར་ཚུགས་ལ་པུཎྜ་རི་ཀས་བརྒྱན་པ་ཕྱག་གཡས་ཐོད་པ་བདུད་རྩིས་གང་བ་ཚེ་བུམ་དང་ལྡན་པར་བསྣམས་པ་གཡོན་ཐབས་ཤེས་ཀྱི་མདའ་གཞུ་འཛིན་པ། རུས་པའི་ཕྱག་རྒྱ་དྲུག་གིས་བརྒྱན་པ། དར་འཕུར་མའི་ཨང་རག་དང་སྒོམ་ཐགས་གསོལ་བ་ཞབས་ཕྱེད་སྐྱིལ་གྱིས་བཞུགས་པ། དེའི་སྟེང་ན་ཁམས་སྤྲུལ་བསྟན་པའི་ཉི་མ་རྡོ་རྗེ་སློབ་དཔོན་གྱི་ཆས་ཅན། དབུ་ལ་པད་ཞུ་གསོལ་བ། ཕྱག་གཡོན་མཉམ་བཞག་ཐོད་པ་དང་། གཡས་རྡོ་རྗེ་འཕྱར་སྟབས་སུ་འཛིན་པ། དེ་སྟེང་པདྨ་འོད་གསལ་མདོ་སྔགས་གླིང་པ་སྔ་འགྱུར་པཎ་གྲུབ་ཀྱི་ཆས་ཅན། ཕྱག་གཡས་མཆོག་སྦྱིན་གྱིས་རྡོ་རྗེ་དང་པད་སྡོང་རྩེར་བུམ་པ་དང་། གཡོན་མཉམ་བཞག་གིས་དྲིལ་བུ་དང་པད་སྡོང་པོད་རལ་བཅས་འཛིན་པ། དེ་སྟེང་འཇིགས་མེད་རྒྱལ་བའི་མྱུ་གུ་རྡོ་རྗེ་སློབ་དཔོན་གྱི་ཆས་ཅན། ཕྱག་གཉིས་མཉམ་བཞག་གི་སྟེང་དུ་གསེར་གྱི་འཁོར་ལོ་བསྣམས་པ། དེ་སྟེང་རིག་འཛིན་འཇིགས་མེད་གླིང་པ་ན་བཟའ་དཀར་ཆས་དབུ་རལ་གྱི་གླེགས་བམ་བཅིང་བ་ཅན། ཞབས་ཕྱེད་སྐྱིལ་དུ་བཞུགས་ཤིང་། ཕྱག་གཡས་མཆོག་སྦྱིན་དང་གཡོན་གདན་བརྟེན་པད་སྡོང་པོད་རལ་འཛིན་པ། དེ་སྟེང་ཀློང་ཆེན་རབ་འབྱམས་པཎ་གྲུབ་ཆས་ཅན་ཞབས་སྐྱིལ་ཀྲུང་དང་། ཕྱག་གཉིས་ངལ་གསོ་ཕྱག་རྒྱས་པད་སྡོང་པོད་རལ་འཛིན་པ། དེ་སྟེང་དབུས་སུ་ཆོས་རྒྱལ་ཁྲི་སྲོང་ལྡེའུ་བཙན་དབུ་ལ་དར་ཐོད་དཀར་པོ་བཅིངས་ནས་ཕྱག་མཉམ་བཞག་གི་སྟེང་དུ་གསེར་གྱི་འཁོར་ལོ་བསྣམས་པ། གཡས་སུ་ལོ་ཆེན་བཻ་རོ་ཙ་ན་པཎ་གྲུབ་ཀྱི་ཆས་ཅན། ཕྱག་གཡས་སྐྱབས་སྦྱིན་དང་གཡོན་མཉམ་བཞག་པོ་ཏི་བསྣམས་པ། གཡོན་དུ་མཁའ་འགྲོ་ཡེ་ཤེས་མཚོ་རྒྱལ་ལོངས་སྤྱོད་རྫོགས་པའི་རྒྱན་ཆས་ཅན་ཏེ། ཕྱག་གཡས་མཆོད་སྦྱིན་དང་གཡོན་ཀ་པཱ་ལ་བདུད་རྩིའི་གང་བ་དཀུར་བརྟེན་པ། རྒྱལ་པོའི་སྤྱི་གཙུག་ཏུ་ཨོ་རྒྱན་རིན་པོ་ཆེ་པདྨ་འོད་འབར་ལྟར་དང་། དེ་སྟེང་དྲི་མེད་བཤེས་གཉེན་པཎ་གྲུབ་ཀྱི་ཆས་ཅན་ཕྱག་གཉིས་མཉམ་གཞག་གི་སྟེང་དུ་ཐོད་པ་བདུད་རྩིས་གང་བར་བསྣམས་པ། དེ་སྟེང་ཛྙཱ་ན་སུ་ཏྲ་ཕྱག་གཡས་སྐྱབས་སྦྱིན་དང་གཡོན་མཉམ་གཞག་པོ་ཏི་བསྣམས་པ། དེ་སྟེང་ཤྲཱི་སིངྷ་ཕྱག་གཡས་རྡོ་རྗེ་དང་བཅས་སྡིགས་མཛུབ་ནམ་མཁར་གཏད་དེ་གཡོན་ཀ་པཱ་ལ་དཀུར་བརྟེན་པ། དེ་སྟེང་འཇམ་དཔལ་བཤེས་གཉེན་ཕྱག་གཡས་ཆོས་འཆད་དང་གཡོན་མཉམ་བཞག་པོ་ཏི་བསྣམས་པ། དེ་གསུམ་ཀའང་ཧེ་རུ་ཀའི་ཆས་ཀྱིས་ཡོངས་སུ་སྤྲས་པ་ཅན་གསལ། དེ་སྟེང་དགའ་རབ་རྡོ་རྗེ་ཞབས་སྐྱིལ་ཀྲུང་གིས་ཕྱག་གཡས་ཆོས་འཆད་དང་གཡོན་མཉམ་བཞག་མཛད་པ། དེ་སྟེང་རྡོ་རྗེ་སེམས་དཔའ་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་གྱིས་སྤྲས་པ་ཕྱག་གཉིས་རྡོར་དྲིལ་འཛིན་པ། དེ་སྟེང་ཀུན་ཏུ་བཟང་པོ་རྒྱན་མེད་ཡབ་རྐྱང་བཅས་གོང་མའི་གདན་ལ་འོག་མའི་དབུ་མ་རེག་ཙམ་ཡེ་ཤེས་ལྔའི་རང་བཞིན་མཁྱེན་བརྩེ་ནུས་གསུམ་གྱི་བདག་ཉིད་འོད་དང་འོད་ཟེར་དཔག་ཏུ་མེད་པ་འཕྲོ་བཞིན་དུ་བཞུགས་པར་གསལ་ཡང་ཡང་འདེབས། དེ་བཞིན་མདུན་གྱི་ཡལ་གར་པད་ཟླའི་སྟེང་དུ་སྤྲུལ་སྐུ་ཤཱཀྱ་ཐུབ་པ་གསེར་བཙོ་མའི་མདོག་ལྟ་བུ་ཕྱག་གཡས་ས་གནོན་དང་གཡོན་མཉམ་གཞག་གི་སྟེང་དུ་ལྷུང་བཟེད་བསྣམས་ནས་བཞུགས་པའི་གཙོས་བསྐལ་བཟང་གི་སངས་རྒྱས་སྟོང་རྩ་གཉིས་སོགས་སྐུ་ལ་ཆོས་གོས་རྣམ་གསུམ་གསོལ་ཞིང་དབུ་ལ་གཙུག་ཏོར་དང་ཞབས་ལ་འཁོར་ལོ་སོགས་མཚན་བཟང་དཔེ་བྱད་ཀྱིས་བརྒྱན་པ་ཞབས་རྡོ་རྗེ་སྐྱིལ་ཀྲུང་གིས་བཞུགས་པ། གཡས་ཀྱི་ཡལ་ག་ལ་རིགས་གསུམ་མགོན་པོའི་གཙོས་ཉེ་སྲས་རྣམས་དང་དུས་གསུམ་གྱི་བྱང་ཆུབ་སེམས་དཔའི་ཚོགས་ལ་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་གྱིས་སྤྲས་ཤིང་ཞབས་གཉིས་མཉམ་པའི་སྟབས་དང་སེམས་དཔའི་སྐྱིལ་ཀྲུང་གིས་བཞུགས་པ། རྒྱབ་ཀྱི་ཡལ་གར་འོད་ལྔའི་དྲྭ་མིག་རྒྱ་ཡངས་པའི་ཀློང་ན་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་གཙོས་མདོ་སྔགས་ཀྱི་ཆོས་རྣམས་གདོང་དར་རང་ཕྱོགས་ལ་བསྟན་ཏེ་ཨཱ་ལི་ཀཱ་ལིའི་སྒྲ་སྙན་པར་སྒྲོགས་ནས་བརྩེགས་མར་བཞུགས་པ། གཡོན་གྱི་ཡལ་ག་ལ་ཉན་ཐོས་མཆོག་ཟུང་གཉིས་ཀྱི་གཙོས་ཉན་ཐོས་དགྲ་བཅོམ་པའི་ཚོགས་ཞབས་བཞེངས་སྟབས་དང་ཆོས་གོས་རྣམ་གསུམ་གསོལ་ཞིང་ཕྱག་ལ་མཁར་གསིལ་དང་ལྷུང་བཟེད་བསྣམས་པ། དེའི་སྟེང་གི་ཕྱོགས་མཚམས་རྣམས་སུ་རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་ཀྱི་ཁོངས་སུ་གཏོགས་པའི་རྒྱ་བོད་ཀྱི་པཎ་གྲུབ་བྱོན་ནོ་ཅོག་ཀུན་བཞུགས་པ་དང་། མཐའ་སྐོར་བར་མཚམས་རྣམས་སུ་རྒྱུད་སྡེ་བཞི་དྲུག་གིས་བསྡུས་པའི་ཡི་དམ་ཞི་ཁྲོའི་ལྷ་ཚོགས་དཔའ་བོ་མཁའ་འགྲོ་རྣམས་དང་། རྡོ་རྗེ་ཆོས་སྲུང་ཕོ་རྒྱུད་ཐམས་ཅད་ཀྱི་ཞལ་ཕྱིར་གཟིགས་ནས་ཕྱིའི་བར་ཆད་ནང་དུ་མི་བཏང་བའི་ཕྲིན་ལས་མཛད་པ། ཆོས་སྲུང་མོ་རྒྱུད་ཐམས་ཅད་ཞལ་ནང་དུ་གཟིགས་ནས་ནང་གི་དངོས་གྲུབ་ཕྱིར་མི་བཏང་བའི་ཕྲིན་ལས་མཛད་ཅིང་། དེ་དག་ཀྱང་སྐུ་མདོག །ཞལ་ཕྱག །རྒྱན་ཆས། ཉམས་འགྱུར་གྱི་རྣམ་པ་སྣ་ཚོགས་གཅིག་ཏུ་མ་ངེས་པ་དུ་མར་སྟོན་པར་མཛད་པ་སོགས། མདོར་ན་ནམ་མཁའ་ལ་སྤྲིན་ཕུང་འཁྲིགས་པ་བཞིན་དུ་ལེགས་པར་གསལ་ཅི་ཐེབས་བྱས་ལ། དེ་དག་ཀྱང་ངོ་བོ་ཆོས་ཀྱི་དབྱིངས་སུ་རོ་གཅིག་ཏུ་བཞུགས་ཀྱང་རྣམ་པ་ཞི་དྲག་གི་སྐུ་གང་ལ་གང་འདུལ་སྟོན་པའི། མཆོག་གསུམ། རྩ་གསུམ། སྐུ་གསུམ་འདུས་པའི་བདག་ཉིད། ཐུགས་རྗེ་བྱིན་རླབས་ཀྱི་ཕུང་པོ། ཡོན་ཏན་ཕྲིན་ལས་ཀྱི་རྣམ་རོལ། ཕ་མཐའ་ཡས་པར་མངའ་བའི་རང་བཞིན་ཅན་དུ་ངེས་ཤེས་ཡང་ཡང་བརྟན་པོར་བསྐྱེད་པའི་ངང་ནས་རང་གཞན་སེམས་ཅན་ཐམས་ཅད་ཚེ་འདིའི་ནད་གདོན། རྐྱེན་ངན་འདྲེ་གདོན་འབྱུང་པོའི་འཚེ་བའི་རིགས་ཏེ། དགྲ་ཡི་མཚོན་ཆ་ཟས་དུག་དུག་སྦྲུལ་གཅན་གཟན་གཡང་དང་འཕྲང་། མེ་ཆུ་དང་ཆད་པའི་འཇིགས་པ་སོགས་དང་། ཤི་འཕོས་ནས་བར་དོའི་འཁྲུལ་སྣང་གི་འཇིགས་སྐྲག་རྣམས་དང་། ངན་སོང་གསུམ་གྱི་ཚ་གྲང་བཀྲེས་སྐོམ་བཀོལ་སྤྱོད་སོགས་ཀྱི་སྡུག་བསྔལ་དང་། གནས་དང་། དུས་མཐའ་དག་ལས་སྐྱོབས་པར་བྱ་བའི་ཕྱིར་དུ་དེང་ནས་བཟུང་སྟེ་སྐྱབས་ཡུལ་ཁྱེད་རྣམས་རང་རྒྱུད་དུ་ངེས་པར་མ་གྲུབ་ཀྱི་བར་དུ་རྩེ་གཅིག་ཏུ་སྐྱབས་སུ་མཆིའོ། །སྒོ་གསུམ་ཁྱེད་ལ་འབུལ་ལོ། །འདི་ཕྱིའི་ཚེ་རབས་ཀུན་ཏུ་སྐྱིད་སྡུག་ལེགས་ཉེས་ཅི་མཛད་ན་ཁྱེད་རྣམས་མཁྱེན་སྙམ་པའི་དད་འདུན་རྩེ་གཅིག་པའི་ངང་ནས་མོས་གུས་ཀྱི་རྩལ་ཡང་ཡང་བསྐྱེད་དེ། ཕྱག་འཚལ་བའི་རིམ་པ་ལ་ལེགས་པར་འཇུག་དགོས་པ་ཡིན་ཞིང་། དེ་ཡང་ཕྱག་འཚལ་ལུགས་ཀྱི་རིམ་པ་སྤྱིར་མང་ཡང་བསྡུ་ན་འདི་ལྟ་སྟེ། ཐར་མདོ་ལས། པདྨ་ཁ་འབུས་ཕྱེ་འདྲ་བ། །ལག་གཉིས་སྤྱི་བོར་ཐལ་སྦྱར་ཏེ། །ལུས་དཔག་མེད་པའི་སྤྲིན་ཚོགས་ཀྱིས། །ཕྱོགས་བཅུའི་སངས་རྒྱས་ལ་ཕྱག་འཚལ། །ཞེས་པ་ལྟར་ལག་གཉིས་ཕྱག་རྒྱ་གནས་གསུམ་ལ་ལེགས་པར་བཅའ་ཞིང་དཔྲལ་བ་དང་ལག་མཐིལ་པུས་མོ་བཅས་ས་ལ་ཕབ་ནས་འཚལ་བ་ནི་ཡན་ལག་ལྔ་ལྡན་གྱི་ཕྱག་ཞེས་པ་དེ་ཡིན་ཞིང་། རང་གི་གཡས་སུ་སྐྱེ་བ་ད་རེས་ཀྱི་ཕ་དང་། གཡོན་དུ་མ། མདུན་དུ་གང་གནོད་གྱི་དགྲ་བགེགས་དང་མཐའ་བསྐོར་རིགས་དྲུག་གི་སེམས་ཅན་ཐམས་ཅད་ས་གཞིའི་ངོས་ལ་ཁྲོམ་ཆེན་པོ་ཚོགས་པ་ལྟར་གཅིག་ཏུ་འདུས་པར་དམིགས་ནས་རང་གཞན་འདུན་པ་གཅིག་པའི་སྒོ་ནས་ལུས་གུས་པས་ལོ་ཐོག་གི་སྙེ་མ་རླུང་གིས་བསྐྱོད་པ་ལྟ་བུར་ཁྱབ་གཅིག་གིས་ཕྱག་འཚལ་བ་དང་། ངག་གུས་པས་སྐྱབས་འགྲོའི་ཚིག་གང་ཡིན་པ་དེ་དག་བུང་བ་ཚང་ནས་ཞིག་པ་ལྟ་བུ་འུར་དིར་རི་འདོན་པ་དང་། ཡིད་གུས་པའི་སྒོ་ནས་སྐྱབས་དང་རེ་ས་གཞན་ན་མེད་པས་འདི་ཕྱི་ཀུན་ཏུ་སྐྱིད་སྡུག་ལེགས་ཉེས་ཆེ་ཕྲ་ཅི་དང་ཅི་བྱུང་ཡང་ཁྱེད་རྣམས་མཁྱེན་སྙམ་པའི་བློ་དུང་ངེ་བ་དང་ནམ་ཡང་མི་འབྲལ་བར་བུ་ཤི་བའི་མ་ལྟར་དྲན་རྒྱུ་སྐྱབས་ཡུལ་གྱི་དཀོན་མཆོག་གསུམ་ལས་མེད་པར་བྱས་ནས་སྐྱབས་འགྲོའི་ངག་འདོན་གང་ཡིན་པ་དང་ཕྱག་གི་གྲངས་ཀ་དང་ཆབས་ཅིག་འབྲེལ་ནས་དཀའ་ཚེགས་ཐམས་ཅད་ཁྱད་དུ་སྤྱད་པས་སྡིག་སྒྲིབ་བྱང་ངེས་པར་འགྱུར་བའི་ན་ཚ་དང་གཟེར་ཟུག །ལྟོགས་སྐོམ་དང་འཁྱག་སྡུག་སོགས་ལུས་ལ་དཀའ་སྣང་སེམས་ལ་འཚེར་སྣང་ཇི་ལྟར་བྱུང་རུང་། ཚེ་རབས་སྡིག་སྒྲིབ་ཀྱི་གཉེན་པོར་ད་རེས་འགྲོ་ཆས་འདུག་སྙམ་ནས་ཁྱད་པར་ཅན་གྱི་དགའ་སྤྲོ་དང་བཅས་ཏེ་ཞིབ་པར་གསོག་དགོས་པ་ཡིན། དེ་ནས་མཐར་ཐུན་བསྡུ་བའི་སྐབས་སུ་སླར་མོས་གུས་ཡང་ཡང་བསྐྱེད་པའི་རྐྱེན་གྱིས་ཡོལ་བ་བསྡུ་བ་ལྟ་བུ་སྐྱབས་ཡུལ་རྣམས་རིམ་གྱིས་གཡས་བསྐོར་གྱི་ཚུལ་དུ་འོད་དུ་ཞུ་བ་དང་དེ་བཞིན་བརྒྱུད་པའི་བླ་མ་རྣམས་ཀྱང་རིམ་པར་རྩྭ་འགོའི་ཟིལ་པ་ཧྲིལ་གྱིས་འགྲིལ་ནས་གཅིག་གཉིས་ལ་དབྱེར་མེད་ཐིམ་པ་ལྟར་འོད་དུ་ཞུ་བ་དང་བཅས་རྩ་བའི་བླ་མ་ཡབ་ཡུམ་ལ་ཡོངས་སུ་ཐིམ་པའི་སྟོབས་ཀྱིས་ལྷག་པར་སྐུ་ལས་འོད་ཟེར་དཔག་མེད་ཆེས་ཆེར་འཕྲོས་པས་ཉི་མ་གཅིག་གིས་མུན་པ་ཐ་དག་ཆབས་ཅིག་ཏུ་སེལ་བ་ལྟར་རང་གཞན་སེམས་ཅན་ཐམས་ཅད་ལ་ཕོག་པའི་མོད་ལ་ཚེ་བསོད་དཔལ་འབྱོར་ཤེས་རབ་སོགས་རྒྱས་པ་དང་། ནད་གདོན་སྡིག་སྒྲིབ་བར་ཆད་ཐམས་ཅད་ཞི་ཞིང་ཐམས་ཅད་འོད་ཀྱི་རྣམ་པར་གྱུར་པའི་སྟོབས་ཀྱིས་བྱ་ཚོགས་འུར་རྡོས་དཀྲོག་པ་བཞིན་བླ་མའི་ཐུགས་ཀ་ལ་ཡར་ཐིམ། བླ་མ་ཡང་ཆོས་སྐུ་སྤྲོས་བྲལ་གདོད་མའི་ངང་ལ་བསྟིམ་པའི་ངང་ནས་ཅི་ཡང་མི་དམིགས་པར་སྟོང་ཉིད་ལ་མཉམ་པར་ཡུད་ཙམ་བཞག་ཅིང་། དགེ་བ་འདི་ཡིས་སོགས་བསྔོ་བ་དང་སྨོན་ལམ་ཅི་རིགས་པས་མཐའ་ལེགས་པར་བརྒྱན་པར་བྱའོ། །དེ་ལྟར་དཀོན་མཆོག་རིན་པོ་ཆེ་རྣམ་གསུམ་ལ་སྐྱབས་སུ་སོང་ནས་བཟུང་སྟེ་སླར་ཕྱིན་ཆད་སྤང་བྱ་དང་བླང་བྱ་དང་ཆ་མཐུན་གྱི་རིམ་པ་རྣམས་ཚུལ་བཞིན་སྲུང་སྡོམ་བྱ་བ་གལ་ཆེ་བའི་རང་བཞིན་ཏེ། བཅོམ་ལྡན་འདས་ཀྱིས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུ་ཡང་ནི་ལྷ་གཞན་ལ། །སྐྱབས་སུ་འགྲོ་བ་མ་ཡིན་ཏེ། །དམ་པའི་ཆོས་ལ་སྐྱབས་སོང་ནས། །འཚེ་ཞིང་གནོད་པའི་སེམས་དང་བྲལ། །འཕགས་པའི་དགེ་འདུན་སྐྱབས་འགྲོ་བ༑ །མུ་སྟེགས་ཅན་དང་འགྲོགས་མི་བྱ། །ཞེས་གསུངས་པ་ལྟར་སངས་རྒྱས་ལ་སྐྱབས་སུ་སོང་ནས་བཟུང་འཇིག་རྟེན་པའི་ལྷ་རྣམས་ལ་སྐྱབས་སུ་ནམ་ཡང་མི་འཚོལ་ཕྱག་ཀྱང་འཚལ་མི་རུང་བས་ངེས་པར་སྤང་བར་བྱ། ཆོས་ལ་སྐྱབས་སུ་སོང་ནས་བཟུང་སྟེ་སེམས་ཅན་ཆེ་ཕྲ་ཀུན་ལ་གནོད་འཚེའི་རིགས་གཏན་ནས་བྱ་མི་ཉན་པས་ངེས་པར་སྤང་བར་བྱ། དགེ་འདུན་ལ་སྐྱབས་སུ་སོང་ནས་དམ་པའི་ཆོས་ཕྱོགས་ལ་ལོག་ལྟ་ཅན་དང་སྡིག་སྤྱོད་རྣམས་དང་གཏན་ནས་འགྲོགས་པར་མི་བྱའོ། །དེ་བཞིན་དུ་བསྒྲུབ་བྱ་ལ་རང་གཞན་སུས་ཡིན་རུང་སྐུ་རྟེན་ཆེ་ཕྲ་དང་། རྒྱུ་བཟང་ངན། གསར་རྙིང་། ཡག་སྡུག་ཐམས་ཅད་ལ་ལེགས་ཉེས་ཀྱི་ཁྱད་པར་མི་ཕྱེད་པར་ཀུན་ལ་སངས་རྒྱས་དངོས་ཀྱི་འདུ་ཤེས་བསྐྱེད་ནས་སྐུ་དང་གྲིབ་མ་མི་འགོམ་ཤིང་ཕྱག་སྐོར་དང་མཆོད་པའི་རྟེན་གྱི་གཙོ་བོར་བྱ་དགོས། དེ་བཞིན་སངས་རྒྱས་ཀྱི་བསྟན་པ་མི་ནུབ་པའི་རྩ་བ་ཡིན་པས་གསུང་རབ་གླེགས་བམ་རྣམས་དང་ཐ་ན་ཡི་གེའི་རས་མ་ལ་ཚིག་བཞི་འམ་འབྲུ་གཅིག་ཡོད་པ་ཚུན་ཆད་ལ་གུས་པར་བྱ་ཞིང་ས་རྗེན་སྟེང་དང་སྨད་གཡོགས་སོགས་མི་གཙང་བའི་སྟེང་དུ་ནམ་ཡང་མི་བཞག་པར་གཙང་སར་བཏེགས་ཏེ་ཆོས་དཀོན་མཆོག་དངོས་ཀྱི་འདུ་ཤེས་བཞག་ནས་ཕྱག་མཆོད་པའི་རྟེན་དུ་བྱ། དེ་བཞིན་དགེ་འདུན་བཞི་སྡེ་ལོང་པ་ཡན་ཆད་ལ་དགེ་འདུན་དཀོན་མཆོག་དངོས་ཀྱི་འདུ་ཤེས་བཞག་སྟེ་གུས་པ་ཆེན་པོས་ཕྱག་མཆོད་བཀུར་སྟི་བྱེད་ཅིང་ཐ་ན་ལྷན་པ་དམར་སེར་ཚུན་ཆད་གཙང་སར་བཏེགས་ཏེ་དད་པ་དང་དག་སྣང་བསྐྱེད་དགོས་པ་ཡིན། དེ་བཞིན་ཆ་མཐུན་ལའང་སངས་རྒྱས་བྱང་སེམས་ཀྱི་སྐུ་བཞེངས་པ། གསུང་རབ་ཀློག་པ་དང་བཞེངས་པ། དགེ་འདུན་གྱི་ཚོགས་ལ་བཀུར་སྟི་ཞབས་ཏོག་བྱ་བ་དང་། ཁྱད་པར་རྡོ་རྗེ་ཐེག་པའི་སྐབས་སུ་ད་ལྟ་རང་ལ་བླང་དོར་གྱི་གནད་སྟོན་པའི་བླ་མ་རང་ལ་སྐྱབས་གནས་མ་ལུས་འདུས་པའི་བདག་ཉིད་སངས་རྒྱས་དངོས་ཀྱི་འདུ་ཤེས་བཞག་ནས་ཐ་ན་སྐུའི་གྲིབ་མ་ཙམ་ཡང་མི་འགོམ་པར་ཞབས་ཏོག་དང་བསྙེན་བཀུར་ཅི་དྲག་ལ་འབད་དགོས་པ་དང་། དེ་བཞིན་བཀའ་ཇི་ལྟར་སྩལ་བ་ཐམས་ཅད་ཆོས་དཀོན་མཆོག་དངོས་ཀྱི་འདུས་ཤེས་བཞག་ནས་ཅི་གསུང་དང་དུ་བླངས་ནས་སྒྲུབས། བླ་མའི་ཉེ་འཁོར་དང་རང་གི་གྲོགས་མཆེད་རྣམས་ལ་དགེ་འདུན་དཀོན་མཆོག་དངོས་ཀྱི་འདུ་ཤེས་བཞག་སྟེ་སྒོ་གསུམ་གུས་འདུད་ཆེན་པོ་དང་བཅས་ཏེ་འགྲོགས་ཤིང་མི་མཉེས་པར་སྐད་ཅིག་ཙམ་བྱ་མི་ཉན་ཏེ། སྔོན་བཤད་མ་ཐག་པའི་ཚུལ་བཞིན་གཙོ་ཆེར་གསང་སྔགས་རྡོ་རྗེ་ཐེག་པའི་སྐྱབས་ཡུལ་གྱི་གཙོ་བོ་ནི་བླ་མ་རང་ཡིན་ཏེ། དེའི་ཐུགས་ཆོས་ཀྱི་སྐུ་སངས་རྒྱས་ཐམས་ཅད་ཀྱི་ངོ་བོ། གསུང་ལོངས་སྤྱོད་རྫོགས་པའི་སྐུ་ཆོས་ཐམས་ཅད་ཀྱི་ངོ་བོ། སྐུ་སྤྲུལ་པའི་སྐུ་དགེ་འདུན་ཐམས་ཅད་ཀྱི་ངོ་བོ། དེ་བཞིན་ཡོན་ཏན་ནོར་ལྷ་གཏེར་བདག །ཕྲིན་ལས་ཆོས་སྐྱོང་སྲུང་མ་དང་བཅས་པ་སྐྱབས་གནས་ཀུན་འདུས་ཀྱི་ངོ་བོ་ཡེ་ནས་ཡིན་པ་ལ་ཡིན་པར་ཤེས་པའི་དད་འདུན་བརྟན་པོར་བསྐྱེད་ནས་སྐྱིད་སྡུག་ལེགས་ཉེས་ཅི་བྱུང་ཡང་འཕྲལ་ཡུན་རྣམ་པ་ཀུན་ཏུ་བློ་གཏད་ལིང་གིས་བཀལ་ཏེ་མོས་གུས་རྩེ་གཅིག་བསྐྱེད་ནས་གསོལ་བ་འདེབས་པ་དང་། ཕྱག་སྐོར་དང་། མཆོད་བསྟོད་སོགས་ཅི་ནུས་སུ་བརྩོན་དགོས་པ་ཡིན་ཞིང་། གལ་ཏེ་རང་གི་ཉེས་སྤྱོད་ཀྱིས་བླ་མའི་ཐུགས་སུན་དབྱུང་བར་གྱུར་ན་ངོ་བོ་གཅིག་པའི་ཕྱིར་མགོ་ཆད་ན་གསོ་མི་རུང་བཞིན་སྐྱབས་ཡུལ་ཐམས་ཅད་དུས་གཅིག་ལ་སྤང་འགྲོ་བ་ཡིན་པས་ཚིག་དང་ཚུལ་འཆོས་ཙམ་མ་ཡིན་པར་དོགས་གཟབ་སྙིང་ནས་བྱ་བ་གལ་གཅིག་ཏུ་ཆེ་བའི་རང་བཞིན་ངེས་པར་མཛད་དགོས་སོ། །དེ་ལྟ་བུ་སྐྱབས་སུ་སོང་ཞིང་བསླབ་བྱ་རྣམས་སྤེལ་བ་དང་བསྲུང་སྡོམ་ཚུལ་བཞིན་ལྡན་པའི་ཕན་ཡོན་སོགས་མདོར་བསྡུས་ཙམ་བཤད་ན། ཚེ་འདི་ལ་ནད་གདོན་བར་ཆད་ཉོན་མོངས་ཐམས་ཅད་ཞི་ཞིང་། ཚེ་བསོད་ཉམས་རྟོགས་ཡོན་ཏན་ཐམས་ཅད་གང་བསམ་འབད་མེད་ལྷུན་གྱིས་གྲུབ་པ་དང་། མ་ཟད་ཕྱི་མ་ངན་འགྲོའི་འཇིགས་པ་ཐ་དག་ལས་སྐྱོབས་ཤིང་ཕན་བདེ་ཚད་མེད་པའི་ལམ་ལ་ངེས་པར་ཚེ་རབས་ཀུན་ཏུ་གོང་ནས་གོང་འཕེལ་ལ་སྦྱོར་ནས་མཐར་ཐུག་ཏུ་སངས་རྒྱས་ཀྱི་སྐུ་འགྲུབ་པ་དང་། ཆོས་ཀྱི་འཁོར་ལོ་བསྐོར་བ་དང་། དགེ་འདུན་རྒྱ་མཚོ་ལྟ་བུ་འདུ་བ་སོགས་ཕན་ཡོན་མཐའ་ཡས་པར་ཡོད་དེ། མདོ་སྡེ་རྒྱན་ལས། རྟག་ཏུ་ཉོན་མོངས་ཚོགས་ཀུན་དང་། །ཉེས་པར་སྤྱོད་པ་ཐམས་ཅད་དང་། །རྒ་དང་འཆི་བ་དག་ལས་ཀྱང་། །སངས་རྒྱས་ཉིད་ཀྱིས་ཡོངས་སུ་སྐྱོབས། །འཚེ་བ་དག་ནི་ཐམས་ཅད་དང་། །ངན་སོང་དང་ནི་གནས་མིན་དང་། །འཇིགས་ཚོགས་ཐེག་པ་དམན་དག་ལས། །སྐྱོབས་ཕྱིར་སྐྱབས་ཀྱི་དམ་པ་ཡིན། །ཞེས་དང་། མདོ་ལས། སྐྱབས་སུ་སོང་བའི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ཡང་། །དེ་ནི་དེ་བས་ལྷག་པར་འགྱུར། །ཞེས་དང་། ཕར་ཕྱིན་བསྡུས་པ་ལས། སྐྱབས་སོང་བསོད་ནམས་གཟུགས་མཆིས་ན། །ཁམས་གསུམ་འདི་ཡང་སྣོད་དུ་ཆུང་། །རྒྱ་མཚོ་ཆེན་པོ་ཆུ་ཡི་གཏེར། །ཕུལ་གྱིས་གཞལ་བར་ག་ལ་ནུས། །ཞེས་དང་། མདོ་ཉི་མའི་སྙིང་པོ་ལས། སངས་རྒྱས་སྐྱབས་སུ་སེམས་ཅན་སུ་འགྲོ་བ། །བདུད་རྣམས་བྱེ་བས་བསད་པར་མི་ནུས་ཏེ། །ཚུལ་ཁྲིམས་ཉམས་ཞིང་བློ་ནི་འཁྲུགས་གྱུར་ཀྱང་། །དེ་ནི་ངེས་པར་སྐྱེ་བའི་ཕ་རོལ་འགྲོ། །ཞེས་སོགས་ཕན་ཡོན་གྱི་དཔེ་དང་ལུང་འདྲེན་རྣམས་མཐའ་ཡས་པར་གསུང་པས་མདོར་བསྡུས་ཙམ་བསྟན་པ་ཡིན་ནོ།། ༈ །།དེ་ནས་བྱང་ཆུབ་མཆོག་ཏུ་སེམས་བསྐྱེད་པའི་རིམ་པ་ལ། དེའི་མཚན་དོན་འབྲེལ་ཆགས་ཙམ་བཤད་ན། ཀུན་གཞི་བདེ་གཤེགས་སྙིང་པོ་ལ་དྲི་མ་ཡེ་ནས་མེད་པས་ན་བྱང་བ་དང་། དེ་ནི་བཟང་ངན་གཉིས་སུ་མེད་པའི་ཡོན་ཏན་ལྷུན་གྱིས་གྲུབ་པའམ། མངོན་པར་ཆུབ་པས་ན་བྱང་ཆུབ་ཅེས་དང་། དེ་ནི་སངས་རྒྱས་ཐམས་ཅད་ཀྱིས་བསྒྲུབ་བྱ་མཐར་ཐུག་མཆོག་དང་རབ་ཏུ་ཡིན་པས་ན་མཆོག་ཏུ་ཞེས་པ་དང་། དེ་ལྟ་བུ་ལ་དེ་སྔོན་རང་རེའི་སེམས་འཁྲུལ་བའི་དབང་གིས་ཐོག་མ་མེད་པ་ནས་ལས་དང་ཉོན་མོངས་པའི་དབང་དུ་སོང་བས་མ་རིག་པའི་རྒྱུ་བྱས་པ་ལས་བྱུང་བའི་རྟོག་པ་ཐམས་ཅད། ད་ལན་བྱང་ཆུབ་ཏུ་བསྐྱེད་པར་བྱ་བའི་རིམ་པ་ལ་འཇུག་པས་ན་སེམས་བསྐྱེད་ཟེར་བ་ཡིན་གྱི། དེ་ལྟར་སེམས་བསྐྱེད་པ་ལ། སྐྱབས་ཡུལ་རྣམས་དཔང་པོའི་ཚུལ་དུ་བྱས་ཏེ་ཆོས་ཐེག་པ་ཆེན་པོའི་ལམ་ལ་ཞུགས་ནས་བཟུང་སྟེ་སྐྱེས་བུ་ཆེན་པོའི་སེམས་བསྐྱེད་ཡང་རབ་ཀྱི་ཐབས་ཟབ་མོ་དང་ངེས་པར་མ་ལྡན་ན། བྱ་ཡིན་ཡང་གཤོག་པ་མེད་པ་དང་འདྲ་ཞིང་དགེ་སྡིག་གི་རྣམ་དབྱེ་གཞི་ནས་ཕྱེད་མཁན་དང་། ཆོས་ཟབ་མོ་དང་གང་ཟག་མཚམས་སྦྱོར་མཁན་དང་། དགེ་རྩའི་འགྱུར་སྐྱེད་ཀྱི་རྩལ་བཏོན་མཁན་དང་། གཞན་དོན་རླབས་ཆེ་ཆུང་དང་། ས་ལམ་མྱུར་ཞན་དང་། འབྲས་བུ་རབ་འབྲིང་ཐ་མ་ཐོབ་ལུགས་སོགས་ནི་ཀུན་སློང་བཟང་ངན་ཁོ་ན་ལ་རག་ལས་པ་ཡིན་ཏེ། བྱང་ཆུབ་སེམས་འགྲེལ་ལས། བྱང་ཆུབ་སེམས་ནི་མ་བསྐྱེད་པར། །སངས་རྒྱས་ནམ་ཡང་མི་ཐོབ་ཅིང་། །འཁོར་བ་བདག་ཞན་དོན་འགྲུབ་པའི། །ཐབས་གཞན་ཡོད་པ་མ་ཡིན་ནོ། །ཞེས་དང་། ཞི་བ་ལྷས། ཐུབ་པའི་གཞན་དོན་མཛད་པ་དང་། །བྱིས་པས་རང་དོན་སྒྲུབ་པ་གཉིས། །འདི་གཉིས་ཀྱི་ནི་ཁྱད་པར་ལྟོས། །ཞེས་དང་། ལུང་ལས། སྐྱེ་བོ་རྨོངས་པས་རང་གི་བདེ་དོན་གཉེར། །དེ་མ་ཐོབ་པས་རྟག་ཏུ་སྡུག་བསྔལ་རྒྱུ། །སྟོན་པས་རྟག་ཏུ་གཞན་དོན་བརྩོན་པས་ན། །གཉིས་ཀའི་དོན་དུ་མྱ་ངན་འདའ་བར་གྱུར། །ཞེས་དང་། སྤྱོད་འཇུག་ལས། འདི་ཉིད་དེ་བཞིན་གཤེགས་པ་མཉེས་བྱེད་ཡིན། །རང་དོན་ཡང་དག་འགྲུབ་པའང་འདི་ཉིད་དོ། །འཇིག་རྟེན་སྡུག་བསྔལ་སེལ་བའང་འདི་ཉིད་དོ། །དེ་བས་བདག་གིས་རྟག་ཏུ་འདི་ཉིད་བྱ། །ཞེས་དང་། ཕན་པར་བསམ་པ་ཙམ་གྱིས་ཀྱང་། །སངས་རྒྱས་མཆོད་པ་ལས་འཕགས་ན། །སེམས་ཅན་མ་ལུས་ཐམས་ཅད་ཀྱི། །བདེ་དོན་བརྩོན་པ་སྨོས་ཅི་དགོས། །ཞེས་དང་། གསེར་འགྱུར་རྩི་ཡི་རྣམ་པ་མཆོག་ལྟ་བུ། །མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་བྲལ་བར་འགྱུར་བས་ན། །བྱང་ཆུབ་སེམས་ཞེས་བྱ་བ་རབ་བརྟན་ཟུང་། །ཞེས་དང་། རིག་འཛིན་འཇིགས་མེད་གླིང་པས། བསམ་པ་བཟང་ན་ས་དང་ལམ་ཡང་བཟང་། །བསམ་པ་ངན་ན་ས་དང་ལམ་ཡང་ངན། །ཐམས་ཅད་བསམ་པ་དག་ལ་རག་ལས་པས། །རྒྱུན་དུ་བསམ་པ་བཟང་ལ་འབད་པར་བྱའོ། །ཞེས་གསུངས་པ་ལྟར་མདོར་བསྡུ་ན་རང་རེ་རྣམས་དེ་སྔོན་རང་འདོད་ངན་པ་ཁོ་ནའི་བསམ་སྦྱོར་གྱི་དབང་དུ་སོང་བའི་ལེ་ལན་གྱིས་འཁོར་བ་ངན་སོང་གི་གནས་སུ་མུ་མཐའ་མེད་པར་ལས་ངན་ལུས་ངན་འབྲས་བུ་ངན་པ་མྱོང་ནས་འཁྱམས་བསྡད་པ་ཡིན་འདུག་པས། ད་ནི་དེའི་གཉེན་པོ་ཆོས་ཤིག་སྒྲུབ་ན་རང་དོན་ཡིད་བྱེད་ཀྱི་བློ་ངན་འདི་དག་གཏད་ནས་དྲུངས་འབྱིན་ཏེ་གཞན་ཕན་གྱི་བསམ་སྦྱོར་བསླད་མེད་རང་ལ་གཙོར་བཏོན་པ་ནི་གལ་གནད་ཤིན་ཏུ་ཆེ་ཤོས་ཡིན་པས། དེས་ན་ད་ལྟའི་སྐབས་འདིར་ཁ་ཤས་ལ་དགྲ་གཉེན་རིས་སུ་བཅད་དེ་དགྲ་ལ་ནི་འདྲེ་རུ་བཟུང་ནས་ཤིན་ཏུ་སྡང་ཞིང་སྨོད། གཉེན་ལ་ནི་ལྷ་རུ་བཟུང་ནས་ཤིན་ཏུ་བྱམས་བརྩེས་བསྐྱང་ཁུལ་བྱེད། ཕལ་ཆེར་ནི་ལུང་མ་བསྟན་དུ་ལྷག་བསྡད་པའི་སེམས་ཅན་དེ་དག་ཐམས་ཅད་ནི་དོན་དུ་སྔ་ཕྱི་དང་ཆ་ཡོད་མེད་ཀྱི་ངོ་ཤེས་མ་ཤེས་ཙམ་མ་གཏོགས་རང་ཅག་རྣམས་དང་ཚེ་རབས་ཀུན་ཏུ་འབྲེལ་བའི་ཕ་མ་དྲིན་ཅན་ཤ་སྟག་ཡིན་པ་ནི་ལུང་རིགས་ཚད་མས་མངོན་སུམ་དུ་གྲུབ་འདུག་མོད། དེ་ལྟར་ནམ་མཁས་གར་ཁྱབ་སེམས་ཅན་གྱིས་ཁྱབ། སེམས་ཅན་གར་ཡོད་ཕ་མ་དྲིན་ཅན་གྱིས་ཁྱབ། ཕ་མ་དྲིན་ཆེན་གྱི་སེམས་ཅན་གར་ཡོད་བདེ་སྡུག་ལ་རག་མི་ལས་པ་མེད་བཞིན་ལས་ངན་སྡུག་བསྔལ་གྱིས་ཁྱབ་པས་དེ་དག་ལ་སྙིང་རྗེ་ཕྱོགས་རིས་མེད་པར་ཆབས་ཅིག་ཏུ་སྐྱེ་དགོས་པ་ཡིན་མ་གཏོགས། རང་བཞིན་དགྲ་གཉེན་གཉིས་ལ་སྙིང་རྗེ་དང་ཞེ་སྡང་མི་སྐྱེ་བ་ཙམ་གྱིས་མི་ཡོང་སྟེ། ཕན་མེད་གནོད་མེད་གཏི་མུག་བཏང་སྙོམས་ལུང་མ་བསྟན་ཞེས་པས་གོ་ག་ལ་ཆོད་པས། དེས་ན་མར་ཤེས་པ། དྲིན་དྲན་པ། དྲིན་ལན་འཇལ་དགོས་པའི་ཚུལ་རྣམས་མདོར་བསྡུས་ཏེ་ཅུང་ཟད་མ་བཤད་ན་དེའང་མི་གོ་བས། དང་པོ་མར་ཤེས་པ་ནི། ད་ལྟའི་སྣང་བ་ལྟར་ལ་ལ་ནི་ཚུར་སྐྱེ། ལ་ལ་ནི་ཕར་འཆི་ནས་སྐྱེ་འཆི་རེས་མོས་ཀྱིས་ལུས་གྲངས་མེད་བླང་བའི་རང་བཞིན་ཏེ། དཔེར་ན་རྒྱ་གར་གྱི་གྲོང་ཁྱེར་རྒྱ་ཆེ་བ་རྣམས་སུ་ཉིན་རེའི་ཁོངས་སུའང་མི་བརྒྱ་སྟོང་ཁྲི་འབུམ་ཚུར་སྐྱེས་པ་དང་བརྒྱ་སྟོང་ཁྲི་འབུམ་ཕར་འཆི་བ་ནི་མཐོང་ཐོས་མྱོང་གྱུར་དུ་ཡོད་པ་དང་། དེ་བཞིན་འདི་ཕྱོགས་ཡུལ་གྲུ་རེའི་མི་རྣམས་སྐྱེ་འཕོས་གྲངས་མེད་འབྱུང་བ་དང་ལོ་ཟླ་དང་ཞག་རེའི་ཁོངས་སུ་ཟོག་ལུག་དང་རི་དྭགས། བྱ་དང་འབུ་སྲིན་སོགས་སྐྱེ་ཤིའི་རྣམ་གྲངས་ཚད་བཟུང་དུ་མི་བཏུབ་པ་སོགས་མཐོང་ཆོས་མྱོང་གྱུར་དུ་ཡོད་པ་ཇི་བཞིན་གནས་ངེས་མེད། ཚེ་ངེས་མེད། ལུས་གྲངས་མེད། རིགས་འདྲ་མིན་སྣ་ཚོགས་ཁམས་གསུམ་རིགས་དྲུག་ཏུ་བླང་བའི་ཚེ་དམྱལ་བ་དང་ལྷ་ཕལ་ཆེར་མ་གཏོགས་ཕ་མ་ལ་མ་བརྟེན་པ་ཆེར་མེད་པས་ན་སེམས་ཅན་ཐམས་ཅད་མ་རུ་མ་གྱུར་པ་གཅིག་ཙམ་ཡང་མེད་པའི་དོན་ནི་དེ་ལྟར་ཡིན་པ་དང་། དེའང་བསྐལ་པ་ཐོག་མ་མེད་པ་ནས་སེམས་ཅན་ཀུན་འཁྲུལ་བའི་རྒྱུད་འབྱམས་ནས་བཟུང་སྟེ་ད་ཕན་ཆད་ལ་སེམས་ཅན་གཅིག་གིས་མ་བྱས་པའི་གྲངས་ཀྱང་ལན་རེའམ་བརྒྱ་སྟོང་ཁྲི་འབུམ་ཙམ་མ་ཡིན་པར་བགྲང་བའི་ཕ་མཐའ་ལས་འདས་ཤིང་། ཚད་དང་མུ་མེད་པས་ན་སྤྱིར་ཕ་མ་མ་བྱས་པ་མེད་པ་དང་། བྱེ་བྲག་ཏུ་ས་ལག་མཐིལ་ཙམ་ཞིག་གི་སྟེང་ནའང་ལན་གྲངས་སྐྱེས་མ་མྱོང་བ་དང་། འཆི་མ་མྱོང་བ་མེད་པས་ན་གྲངས་མེད་བླང་བའི་ཚུལ་ནི་དེ་ལྟར་དུ་ཤེས་དགོས་པ་དང་། དེའང་དྲིན་ཆེ་བའི་ལས་ཀྱང་། སྐྱེ་འགྲོ་རྣམས་ལས་ངན་ལུས་ངན་འདྲ་མིན་སྣ་ཚོགས་བླངས་ནས་ཉེ་རིང་བར་མ་དོར་སོགས་གྱུར་པའི་སྐྱོན་དང་། རང་རེ་སྡིག་སྒྲིབ་ཆེ་བ་དང་སྐྱེ་འཆི་ཁ་བརྒྱུད་པའི་དབང་གིས་སྔོན་ཆགས་ཕྱི་འདེང་མི་ཕོག་པ་མ་ཟད་ད་ལྟ་ཚེ་སྟོད་སྨད་ཀྱི་བར་ནས་ཀྱང་དྲིན་ཆེ་བའི་ལས་རྣམས་བརྗེད་གྲབས་སུ་འགྲོ་བ་འདི་བཞིན་དུ་དེ་དག་རྣམས་ཕ་མའི་སྐྱེ་བ་དང་དྲིན་ཆེན་རེད་པ་ངོ་མ་ཤེས་པ་ལས། དོན་དུ་མཐོང་ཆོས་མྱོང་གྱུར་དུ་གྲུབ་པ་ད་ལྟའི་ཕ་མ་རྣམས་དང་སྔ་ཕྱི་དང་། རང་གི་ངོ་ཤེས་མི་ཤེས་དང་། ཆ་ཡོད་མེད་ཙམ་ལས་ཁྱད་པར་ཅུང་ཟད་ཙམ་ཡང་མེད་པ་མ་ཟད་ཚད་མེད་པའི་དྲིན་གྱིས་བསྐྱངས་པས། ཚེ་རབས་ཀུན་ཏུ་འབྲལ་མི་ཕོད་བཞིན་དུ་འབྲལ་བའི་ཕ་མ་དྲིན་ཆེན་ལས་རིང་ཤ་སྟག་ཡིན་པ་ནི་གཞིར་བཅས་ཏེ། དེའང་ཅུང་ཟད་བཤད་ན་རང་རེ་རྣམས་གནམ་ནས་ཐོག་ལྷུང་བའམ་ས་ནས་མེ་ཏོག་སྐྱེས་པ་ལྟ་བུ་མ་ཡིན་ཏེ་ཁྲ་དང་སྤྱང་ཀུ་སོགས་གཅན་གཟན་གཏུམ་པོ་གདུག་པ་ཅན་གྱི་བུར་གྱུར་དུས། མ་དྲིན་མི་ཆེ་བ་གཅིག་ཙམ་མེད་བཞིན་མས་དང་པོ་བུ་རྒྱུད་རྣམས་བར་དོའི་རྣམ་ཤེས་འཁྱམས་པོ་གང་ནས་འོང་གང་ནས་ཐོན་སུ་ཡིན་མི་ཤེས་པ་དེ་ལུས་ཡོངས་སུ་མ་གྲུབ་བར་དུ་ནད་ཆེན་གདོན་ཆེན་དང་སྡུག་བསྔལ་གྱི་ཁུར་པོ་རི་བོ་ལྟ་བུས་ནོན་པ་ལྕི་བཞིན་དུ་ཟླ་དགུ་ངོ་བཅུ་མ་རྫོགས་ཀྱི་བར་དུ། ཁོངས་སུ་བསྐྱང་བའི་དྲིན་ཁོ་ན་ལ་བརྟེན་པས་དང་པོ་ལུས་ཀྱི་རྣམ་པ་མ་ལུས་པ་ཐམས་ཅད་ཡོངས་སུ་སྦྱིན་པ་དང་། དེ་ནས་སྲོག་ཡལ་བར་དོར་ནས་བཙས་པའི་ཚེ་ན་སྒོ་ང་ཁ་གས་མ་ཐག་པའི་བྱེའུ་ཕྲུག་ལྟ་བུ་ཤིན་ཏུ་ཉམ་ཐག་པ་གསོན་པོ་རེད་ཟེར་ན་མགོ་མི་ཆོག །ཤི་བ་རེད་ཟེར་ན་སྲོག་དང་དབུགས་ཡོད་ཙམ་ལུས་ཉམ་ཞན་པ་ཉ་རེ་ཉོ་རེ་དེ་རུལ་མ་བཅུག་སྐམ་མ་བཅུག་འཁྱག་ལྟོགས་ཀྱིས་འཆི་ན་འཆི་མ་བཅུག་སྟེ་འཇམ་པའི་སྟན་ལ་བཞག་ནས་འཛུམ་པའི་མདངས་ཕྱུང་། སྙན་པའི་མིང་ནས་བོས་ཏེ་ཁ་ཡིས་སྣབས་ཕྱིས། འགྲང་ལྟོགས་ལག་གིས་ཉུལ། ཚ་གྲང་མཛུབ་མོས་ཚད་བཟུང་། ལག་གིས་མི་གཙང་བ་གཅིན་རྟུག་སོགས་བྱབ་ཅིང་། ལུས་ཀྱི་དྲོད་དང་བཅུད་ཁོ་ན་ལ་བརྟེན་པས་ཡོངས་སུ་གསོས་པར་བྱས་པ་སོགས་བྱམས་སྐྱོང་ཚད་མེད་པ་ཁོ་ནས་ཉིན་མཚན་གོ་འབྲེལ་བར་འཚོས་ཤིང་བསྐྱངས་ནས་རང་སྲོག་ལས་ཀྱང་ཤིན་ཏུ་དམར་བར་བྱས། གནོད་པ་སྒོ་དུ་མ་ནས་སྐྱོབས། ཕན་པ་ཚད་མེད་པ་བཏགས་ཏེ་ཞག་དང་ཟླ་བ་ལོ་གྲངས་མང་པོའི་བར་དུ་ལུས་ཀྱི་སྐྱེད་ཕྲ་མོ་ནས་རིམ་པར་བསྲིང་བས་ན། བར་དུ་སྲོག་ཡོངས་སུ་སྦྱིན་པ་དང་། མཐར་ཁ་ན་ཟས་མེད། ལག་ན་ནོར་མེད། རྒྱབ་ན་གོས་མེད་ཕར་ངོ་ཕར་ཚུར་ངོ་ཚུར་མི་ཤེས་པ་ཉམ་ཐག་པ་དེ་ལ་ཡར་དཀོན་མཆོག་ལ་མཆོད་མ་བྲ། མར་ངན་སློང་ལ་སྦྱིན་མ་བྲ། ཤི་ཕོའི་རྒྱབ་ལ་གཏོང་མ་བྲ། གསོན་པོའི་ཁ་ལ་ཟ་མ་བྲ། རྒྱབ་ལ་གྱོན་མ་བྲ་བ་རྣམས་ཁ་ཟས་མེད་ལ་ཟས་བྱིན། ལག་ནོར་མེད་ལ་ནོར་སྤྲད། རྒྱབ་གོས་མེད་ལ་གོས་ལྷམ་སོགས་ཀྱིས་ལེགས་པར་གཡོགས་ཏེ་སྡིག་སྡུག་གཏམ་ངན་སྲོག་ལ་མ་བལྟས་པར་སྒྲུབ་པའི་ཁང་པ། ས་ཞིང་། ཕུའི་འབྲོག་པ། ཟས་གོས། རྒྱན་ནོར་ལོངས་སྤྱོད་ཡོད་རིགས་གཅེས་དགུ་དམར་དགུ་ཐམས་ཅད་སྦྱིན་ནས། ཟས་ཟ་ཚུལ། གོས་གྱོན་ཚུལ། སྐེ་རག་དམ་ལྷོད་དང་ལྷམ་སྒྲོག་བཅིང་ཚུལ། འགྲོ་མི་ཤེས་པ་ལ་འགྲོ་ཚུལ། སྨྲ་མི་ཤེས་པ་ལ་ཨ་གྱིས་མ་གྱིས། ཨ་གྱིས་ཕ་གྱིས་སོགས་རིམ་གྱིས་བསླབ་པས། བྱིས་པ་གཞོན་པར་གྱུར། གཞོན་པ་དར་ལ་བབ་པར་གྱུར་ཏེ། བླང་དོར་གྱི་གནད་མ་མཐོང་བ་མཐོང་དུ་བཅུག །མ་གོ་བ་གོ་རུ་བཅུག །མ་ཤེས་པ་ཤེས་སུ་བཅུག །མ་ཐོབ་པ་ཐོབ་ཏུ་བཅུག །མི་མཚུངས་པ་མཚུངས་པར་བཅུག་པ་སོགས་དང་མ་ཟད་ཆོས་ཀྱི་ཕྱོགས་ནས་ཀྱང་ཀ་ཁ་སོགས་རིམ་པར་བསླབ་པ་དང་དལ་འབྱོར་བཅོ་བརྒྱད་ལྡན་པ་དང་། བྱང་ཆུབ་ཀྱི་སེམས་རིན་པོ་ཆེ་བསྐྱེད་ནུས་པ་དང་། རྒྱལ་བའི་སྲས་ཀྱི་སྤྱོད་ཚུལ་ལ་འཇུག་ནུས་པ་དང་། རང་གཞན་གྱི་དོན་རླབས་པོ་ཆེ་སྒྲུབ་ནུས་པ་དང་མདོར་ན་རང་གིས་རབ་ཏུ་བྱུང་ན་སྲིད་ཞི་གཉིས་ཀྱི་མཐའ་ལ་མི་གནས་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཡང་བདེ་མྱུར་དུ་སྒྲུབ་ཆོག་པའི་རྟེན་བཟང་ཕུན་སུམ་ཚོགས་པ་འདི་ནི། དཔེར་ན་འཇིག་རྟེན་ན་དཀོན་པའི་མཆོག་ཡིད་བཞིན་གྱི་ནོར་བུ་རིན་པོ་ཆེ་དགོས་འདོད་འབྱུང་བའི་གཏེར་ཆེན་པོ་ཞིག་རྙེད་པ་ལས། འབུམ་འགྱུར་གྱི་ལྷག་པར་སྟེར་བའི་དྲིན་ཆེན་མ་རྒན་རྣམས་ཀྱིས་ཁེ་དང་རྒྱལ་ཁ་ཐམས་ཅད་བུ་ལ་སྦྱིན། གྱོང་དང་བུབ་ཁ་ཐམས་ཅད་རང་གིས་བླངས། བདེ་སྐྱིད་ཐམས་ཅད་བུ་ལ་སྒྲུབ། སྡིག་སྡུག་གཏམ་ངན་ཐམས་ཅད་རང་གིས་བཟོད་ནས་བུ་རྒྱུད་རང་རེ་རྣམས་ན་དོགས། ཤི་དོགས། སྡུག་དོགས། འཁྱག་ལྟོགས་ཀྱི་རེ་དོགས་སོགས་ཀྱི་ཆེད་དུ་ངག་གིས་ཚིག་བརྗོད། ལུས་ཀྱིས་ལས་བྱས། སེམས་ཀྱིས་བྱ་ར་ཁོ་ན་བྱས་པས་ཉིན་མཚན་མེད་པར་རྣམ་གཡེང་གི་དབང་དུ་དུས་འདས་ཏེ། རང་ལ་ཡོང་ངེས་འཆི་བ་མ་ཚོར་ཞིང་དགོས་ངེས་དམ་ཆོས་གང་ཡང་སྒྲུབ་མ་ཁོམ་པར་སྡིག་པ་ཚབས་ཅི་ཆེ་སྣ་ཚོགས་བསགས་ཤོར་བའི་ལན་གྱིས་འཁོར་བ་མཐའ་མེད་དུ་འཁྱམས་ནས་གནས་སྐབས་དང་མཐར་ཐུག་གི་བདེ་སྐྱིད་འབྱུང་བའི་རྒྱུ་དང་འབྲས་བུ་ལ་རྒྱབ་རིང་གིས་ཕྱོགས་ཏེ། ལ་ལ་ནི་སྡུག་བསྔལ་གྱི་འབྲས་བུ་ལ་དངོས་སུ་སྤྱོད་པ་དང་། ལ་ལ་ནི་སྡུག་བསྔལ་གྱི་རྒྱུ་མི་དགེ་བ་རྔམ་པོ་ཆེ་ལ་ལོངས་སུ་སྤྱོད་དེ་སྡུག་བསྔལ་གྱི་གསོག་འཇོག་སྡུག་བསྔལ་གྱི་བསུ་སྐྱེལ། སྡུག་བསྔལ་གྱི་ཡོ་ལང་འཁྲུགས་པའི་བར་དུ་ཚུད་ཅིང་། ཡོང་ངེས་འཆི་བ་དང་ཕན་ངེས་དམ་ཆོས་ནི་ཆེར་དྲན་ནས་སྒྲུབ་མི་ཤེས་པར་ཚེ་འདིའི་འདོད་དོན་ཨེན་ཙམ་ལ་ཆགས་ཤིང་འཁྲུལ་བས་རྒྱུད་ཤིན་ཏུ་བསྡམས་ཏེ། མགོ་འཁོར་སོང་བ་མ་རྒན་ཉམ་ཐག་རྣམས་ཡལ་བར་དོར་ནས་རང་ཉིད་གཅིག་པུར་ཞི་བདེ་དོན་དུ་གཉེར་ན་ནི། དཔེར་ན་རྩ་བའི་མ་དེ་གཡང་ས་དྲག་པོ་ནས་ལྷུང་རན་པའམ། ཡང་ན་ཆུས་ཁྱེར་བ་མཐོང་ཞིང་དེ་འདོན་པའི་ཐབས་ཡོད་བཞིན་དུ་མ་འདོན་པར་རང་ཉིད་སྐམ་ས་ན་ཡིད་བདེ་བར་གནས་པ་དང་ངེས་པར་འདྲ་བས་ན། དེ་བས་འཇིག་རྟེན་གྱི་ཁམས་ན་ངོ་ཚ་བ་དང་། ཁྲེལ་མེད་པ། ཐབས་རྡུགས་པ། བླུན་ཆེ་བ་ནི་ཅི་ཡོད་སྙམ་ནས་ཞིབ་ཀྱིས་དཔེར་བླངས་ཏེ། ད་ལན་ནི་ལུས་བསྐྱེད་པའི་དྲིན། སྲོག་འཚོས་པའི་དྲིན། ཡོ་བྱད་སྟེར་བའི་དྲིན། ཆོས་དང་འཇིག་རྟེན་བསླབ་པའི་དྲིན་སོགས་ཞིབ་པར་དྲན་ནས་ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་པ་བཤེས་མེད་ལོང་བ་ཐང་སྟོང་དུ་འཁྱམས་པ་ལྟ་བུའི་སེམས་ཅན་ཡིན་པས། རང་རེས་ད་ལན་མཚན་ལྡན་གྱི་བླ་མ་དང་མཇལ། ཆོས་ཐེག་པ་ཆེན་པོ་ཉམས་ལེན་བྱེད། ཁེ་ཉེས་ཐམས་ཅད་ལེགས་པར་ཤེས་ནས་བཟུང་། དྲིན་ལན་དུ་དྲིན་དྲན་ཤེས་པའི་ངང་ནས་ཕན་ལན་དུ་ཕན་ཞིག་ངེས་པར་འཇལ་དགོས་པ་ཡིན་ཞིང་། དེའང་ད་ལྟའི་བར་སྐབས་འདིར་ཚེ་འདིའི་ལོངས་སྤྱོད་དང་ལྟ་རྟོག །བྱམས་སྐྱོང་སོགས་བརྩེ་བས་ཅི་ལྟར་བསྐྱང་ཁུལ་བྱས་ཀྱང་གནས་སྐབས་ཀྱི་བྱ་བ་ཕྱོགས་རེ་ལན་རེ་ནས་དྲིན་ལན་གྱི་ཆ་ཙམ་གཞལ་བ་ཡིན་གྱི་མ་གཏོགས། ཚེ་རབས་ཐོག་མ་མེད་པ་ནས་མ་བྱས་པའི་དྲིན་དང་སྡུག་བསྔལ་གྱི་ཁུར་ལྕི་བའི་དྲིན་ལན་སོབ་པ་ནི་ཆ་ཙམ་ལས་ཅང་མི་ཡོངས་ཏེ། དཔེར་ན་རྒྱ་མཚོ་ཆེན་པོ་སྐྲ་རྩེས་གཞལ་བ་ལྟ་བུ་ལས་དོན་ཆུང་བས། དེས་ན་མྱུར་དུ་ཕན་ངེས་པའི་ཐབས་གང་གིས་བྱེད་སྙམ་ན། དངོས་སུ་སྡུག་བསྔལ་དང་བྲལ་ཏེ་སླད་ནས་སྡུག་བསྔལ་གྱི་རྒྱུ་མི་དགེ་བ་དང་བྲལ་ཞིང་བདེ་བའི་རྒྱུ་འབྲས་ལ་ལོངས་སུ་སྤྱོད་པ་ཞིག་བྱུང་ན། དེས་ནི་གནས་སྐབས་དང་མཐར་ཐུག་འཕྲལ་ཡུན་ཀུན་ལ་དྲིན་ལན་ཡང་དག་པར་སོབ་པར་འགྱུར་ཏེ། འབད་པ་དོན་དང་ལྡན་པ་ཡིན། བྱ་བ་རླབས་ཆེ་བ་ཡིན། ཕན་པ་མཆོག་ཏུ་གྱུར་པ་ཡིན། དྲིན་ལན་ཡང་དག་པར་འཇལ་བ་ཡིན་པའི་ཕྱིར་ན་ལྷག་ཏུ་ཤེས་པར་བྱས་ལ་སྡུག་བསྔལ་གྱི་རྒྱུ་དང་བྲལ་བའི་གཉེན་པོའམ། བཟློག་པའི་ཐབས་ཟབ་མོ་བླ་ན་མེད་པ་ནི་རང་གཞན་ཀུན་གྱིས་དམ་པའི་ཆོས་སྒྲུབ་པ་ཁོ་ན་ཉིད་གལ་ཆེ་བའི་རང་བཞིན་སྟེ་སྤྱིར་མི་ལུས་ཐོབ་པ་དང་། ནང་པ་སངས་རྒྱས་པའི་མིང་དོན་གྱི་སྙིང་པོ། བྱེ་བྲག་སེར་གཟུགས་འཆང་བའི་དོན་སྒོ། ཁྱད་པར་དུས་གསུམ་རྒྱལ་བའི་ལམ་དང་། གཤེགས་ཤུལ་དང་། བསྒྲུབ་བྱའི་རིམ་པ་དེ་དག་ཁོ་ན་ཡིན་གཤིས་གལ་ཆུང་ངུ་ནམ་ཡང་མི་འཇོག་པར། ད་ལྟའི་ཕ་མ། ཉེ་འབྲེལ་ཡུལ་མི་གཉེན་གྲོགས་རྣམས་ཀྱིས་གཙོས་བློ་ལུས་ངག་ཡིད་གསུམ་ཆོས་ཕྱོགས་སུ་བསྐུལ་མ་དངོས་བརྒྱུད་བར་གསུམ་ནས་གདབ་ཅི་ཐུབ་གང་ཐུབ་བྱ་དགོས་པ་དང་། གཤིན་པོ་རྣམས་ལ་ནི་ཐབས་གཞན་གྱིས་བྱ་ཐབས་བྲལ་བས་སྙིང་རྗེ་ཤུགས་དྲག་པོ་ཚད་མེད་པས་རམ་མདའ་སྦྲན་ནས་དགེ་བ་བསྔོ་སྨོན་གྱི་རིམ་པས་རྒྱས་འདེབས་ཡོངས་སུ་བྱ་རྒྱུ་དང་། དེ་ཡང་མཐོ་རིས་ཚངས་དང་བརྒྱ་བྱིན་སོགས་ཀྱི་གོ་འཕང་ཐོབ་རུང་སླར་སྡུག་བསྔལ་ལས་མ་འདས། ཞི་བ་ཉན་རང་གི་གོ་འཕང་ཐོབ་རུང་། བྱང་སེམས་ཀྱི་ས་དང་སངས་རྒྱས་ཀྱི་ཡོན་ཏན་མི་ལྡན། དེས་ན་མཐའ་གཉིས་ལ་མི་གནས་པ་དོན་གཉིས་ལྷུན་གྱིས་གྲུབ་པ་ཡང་དག་པར་རྫོགས་པའི་སངས་རྒྱས་ཀྱི་ས་ལ་དེ་དག་རྣམས་འགོད་པའི་ཕྱིར། མཐོང་ཐོས་དྲན་རེག་ཙམ་གྱིས་དངོས་བརྒྱུད་བར་གསུམ་ནས་སེམས་ཅན་གྱི་འགྲོ་དོན་དཔག་མེད་བདེ་བླག་ཏུ་སྒྲུབ་ནུས་མཁན་མཚུངས་པ་མེད་པ་རྫོགས་པའི་སངས་རྒྱས་ཁོ་ནར་ཡིན་ཞིང་། དེ་ལྟ་བུའི་གོ་འཕང་དམ་པ་དེ་བདག་གིས་ལུས་རྟེན་འདི་ཐོག་ནས་ཐོབ་པར་བྱའོ་སྙམ་པའི་བློ་བཟོད་མེད་དུང་ངེ་བ། དཔེར་ན་སྐོམ་པས་ཆུ་འདོད་པ་ལྟར་དང་། མི་འབྲལ་བའི་སྒོ་ནས་ཆོས་ལ་བརྩོན་འགྲུས་རིམ་གྱིས་སྤར་ནུས་པ་ཞིག་དགོས་པ་ཡིན་ནོ། །འོན་ཀྱང་བཤད་མ་ཐག་པའི་ཚུལ་ལྟར་རང་རེ་རྣམས་ཚེ་རབས་ནས་གཞན་དག་ལ་སྲོག་དམར་པོ་བཅད་ཀྱང་སྡུག་བསྔལ་མྱོང་གི་མེད་ཆགས་དང་། རང་ཉིད་ལ་སྡུག་བསྔལ་གྱི་ཕྱོགས་ཕྲ་མོ་རེ་མྱོང་ཆིས་ཙམ་ཡང་བཟོད་མི་ནུས་པར་ཆགས་སྡང་གི་ལས་དང་ཚིག་དང་བསམ་པ་སོགས་རང་འདོད་ངན་པ་ཁོ་ནའི་དབང་དུ་སོང་བའི་རྐྱེན་གྱིས་གཞན་ཕན་གྱི་བསམ་སྦྱོར་ཡང་དག་པ་ཆེར་མི་འབྱོངས་པས་ན་སངས་རྒྱས་ཀྱི་ས་ལ་ཕྱོགས་ཙམ་མི་ཉེ་བར་ཉོན་མོངས་ཞེ་སྡང་། ཕྲག་དོག་ང་རྒྱལ། འགྲན་སེམས་འཐབ་རྩོད་སོགས་མི་དགེ་བའི་ལས་ཁོ་ནའི་དབང་དུ་སོང་ཚར་བ་དང་ཤུགས་འབྱུང་དུ་འགྲོ་བཞིན་པ་འདི་དག །སེམས་ཅན་ཐམས་ཅད་ཕ་མར་མ་མཐོང་སྟེ་བྱམས་སྙིང་རྗེ་སྒོམ་མ་ཤེས་པའམ་ཤེས་ཀྱང་སྙིང་རྗེ་གོ་ཡུལ་དུ་ཤོར་བས་ལན། རང་གིས་འཁོར་བར་འཁྱམས་ནས་ལས་ངན་ལུས་ངན་རྒྱུན་ཆད་མེད་པར་བླང་ནས་སྡུག་བསྔལ་དུ་མར་མྱོང་དགོས་པ་ཡིན་འདུག་པས། ད་ལན་དེའི་གཉེན་པོ་ཆོས་སྒྲུབ་པ་ལ་མེད་དུ་མི་རུང་བ་ཡང་དག་པར་བློ་སྦྱང་བའི་རིམ་པ་ཚད་མེད་བཞི་ལ་འཇུག་པར་བྱེད་ན་འདི་ལྟར་བློ་འཆོས་པར་བྱ་དགོས་ཏེ། ཡུམ་བར་མ་ལས། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། གཏང་སྙོམས་ཆེན་པོ་བསྒོམ་པར་བྱའོ་ཞེས་གསུངས་པ་ལྟར། དཔེར་ན་བྱ་མས་བྱིའུ་གསོ་བ་ལྟར་ཞེས་བྱམས་སྐྱོང་ཁོ་ནས་འཚོ་ཞིང་ཕན་ཐོགས་པར་བྱ་དགོས་པ་ཡིན་པས། རང་གིས་གང་འདོད་པ་དེ་ལྟར་སེམས་ཅན་ཐམས་ཅད་ཀྱི་འདོད་པ་གཅིག་ཀྱང་ཐབས་ལ་མི་མཁས་པའི་དབང་དུ་སོང་ནས་ལས་ངན་ལུས་ངན་བླངས་ཏེ་སྡུག་བསྔལ་གྱིས་མནར་བ་རྣམས་ལ་ལྷག་པར་སྙིང་རྗེ་བསྐྱེད་དེ་ལུས་ངག་ཡིད་གསུམ་དང་རྒྱུ་ནོར་ལོངས་སྤྱོད། ཐབས་དང་རྣམ་པ་ཅི་དྲག་གང་དྲག་གི་སྒོ་ནས་འཕྲལ་ཡུན་ཕན་བདེའི་གནས་ལ་འགོད་ཅི་ཐུབ་གང་ཐུབ་དངོས་བརྒྱུད་བར་གསུམ་ནས་བྱ་དགོས་པ་ཡིན་ཏེ། ཟླ་བ་སྒྲོན་མའི་མདོ་ལས། བྱེ་བ་ཕྲག་ཁྲིག་གཏམས་པའི་ཞིང་དག་ན། །མཆོད་པ་རྣམ་མང་དཔག་མེད་ཇི་སྙེད་པས། །སྐྱེས་མཆོག་རྣམས་ལ་དེ་ཡིས་རྟག་མཆོད་ཀྱང་། །བྱམས་པའི་སེམས་ཀྱི་གྲངས་དང་ཆར་མི་ཕོད། །ཅེས་དང་། མདོ་ལས། བྱམས་པའི་ལུས་ཀྱི་ལས་དང་། བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་སོགས་གསུངས་པ་ལྟར། སེམས་ཅན་ཆེ་ཕྲ་ཀུན་གྱི་ལུས་སྲོག་དང་སེམས་ལ་གནོད་འཚེ་ཅུང་ཟད་ཙམ་ཡང་མི་བྱེད་པར་བཟོད་པའི་གོ་ཆ་ཡོངས་སུ་བསྒོས་ཏེ་གང་ལ་གང་འདོད་ཀྱིས་བྱམས་སྐྱོང་ལ་འབད་ཤིན་ཏུ་ནས་ཀྱང་མཁས་པར་བྱས་ལ། དེ་ཡང་བཟང་ལན་རེ་བ་དང་གཞན་ལ་འགྲན་སེམས་དང་འཇིག་རྟེན་ཆོས་བརྒྱད་སོགས་ཀྱི་ཚུལ་འཆོས་བྱེད་མཁན་དེང་སང་ཤིན་ཏུ་མང་བས་དེ་འདྲ་གཏན་ནས་མ་ཡིན་པར་སྙིང་ཐག་པ་ནས་ཕ་མ་རྒན་ཁོག་དང་། ཐག་རིང་གི་མགྲོན་པོ། ཡུན་རིང་གི་ནད་པ་དང་། སྒོ་ཁྱི་སྒོ་ཟོག་རྣམས་དང་། ཤན་ལག་གི་དུད་འགྲོ། ཁྲིམས་ཕོག་གི་མི། སྡིག་ཤས་ཆེ་བ་འོན་ལྐུགས་དབུལ་ཕོངས། ཐ་ན་ཤིག་འབུ་སྲིན་ཕྲ་མོའི་ཕྲ་མོ་ཚུན་ཆད་ལའང་ཞིབ་པར་རང་གི་ལུས་སེམས་འདི་ཐོག་ལ་དཔེ་ངེས་པར་བླངས་ནས་བྱམས་སྐྱོང་ཅི་དྲག་གང་དྲག་ཆེ་ཕྲ་མ་ལྟོས་པར་འབད་ཤེས་དགོས་པ་ཡིན་ཞིང་། འབྱོངས་རྟགས་སུ་ཀུན་ལ་བྱམས་པས་བུ་གཅིག་གི་མ་ལྟར་ཤིན་ཏུ་བརྩེ་བ་ཆེན་པོའི་རང་བཞིན་ངམ་ངམ་ཤུགས་ཀྱིས་འབྱུང་ངོ་། །དེ་ནས་སྙིང་རྗེ་ནི་མ་ལག་ལྡུམ་མའི་བུ་ཆུས་ཁྱེར་བ་ལྟར་ཞེས་སྙིང་རྗེ་ཚད་མེད་པ་སྐྱེ་དགོས་པ་ཡིན་ཏེ། རྒྱལ་བ་བྱམས་པས། བཀྲེན་ལ་སྙིང་བརྩེ་མ་རུངས་པ་ལ་བརྩེ། །ཀུན་འཁྲུགས་ལ་བརྩེ་བག་མེད་རྣམས་ལ་བརྩེ། །ཡུལ་གྱི་གཞན་དབང་ཅན་ལ་སྙིང་བརྩེ་ཞིང་། །ལོག་པ་མངོན་ཞེན་ཅན་ལ་སྙིང་བརྩེ་འོ། །ཞེས་གསུངས་པ་ལྟར་དུ། དེ་ལ་དང་པོ་ཟས་གོས་ཀྱི་དབུལ་བ། ནད་གདོན་གྱིས་མནར་བ། ཁྲིམས་ཕོག་གི་མི། ཤན་ལག་གི་དུད་འགྲོ་སོགས་སྡུག་བསྔལ་དྲག་པོས་གདུང་བ་རྣམས་བློ་ཡུལ་དུ་ངེས་པར་གསལ་བའམ། མཐོང་ཐོས་རིག་པར་བྱུང་ཚེ་དེ་དག་རང་ཉིད་ཡིན་པའི་འདུ་ཤེས་དེ་ཚུག་ནས་བཞག་སྟེ་བྲོས་གབ་བྱེད་པའི་དབང་ནི་མེད། གནམ་ལ་འཕུར་བའི་གཤོག་པ་དང་ས་ལ་འཛུལ་བའི་སྡེར་མོ་ནི་མེད། ལན་གྱིས་རྒོལ་ནི་མི་ཐུབ། སྐྱབས་དང་མགོན་དང་སྙིང་རྗེ་མཁན་མེད་པས་ཅི་དྲག་གི་བསམ་བློ་ཞིབ་ཀྱིས་བསྐོར་ནས་འཇིགས་སྣང་ལྷང་ལྷང་རེ་སྐྱེས་མ་བྱུང་གི་བར་དུ་བློ་སྦྱོངས། དེ་བཞིན་ད་ལྟའི་ཕ་མ་དང་ཉེ་འབྲེལ་སྙིང་དམར་ཆེ་བ་ཅན་རྣམས་ལ་སྦྱར་ཏེ་སྒོམས། རིམ་གྱིས་མཐོང་ཐོས་རིག་པའི་སྐྱེ་འགྲོ་འབྲེལ་ཐོགས་རྣམས་དང་མ་ཟད་ཚེ་རབས་ནས་འབྲེལ་བའི་ཕ་མ་སེམས་ཅན་ངན་སོང་གི་གནས་སུ་སྡུག་བསྔལ་བདོས་དྲག་པོས་མནར་བ་རྣམས་ལ་སྙིང་རྗེ་ཚད་མེད་ཡང་ཡང་བསྐྱེད་དེ་རང་ཐོག་ཏུ་དཔེ་ཞིབ་ཀྱིས་བླངས་ནས་དཔྱད་པས་ད་ལྟའི་མི་དང་དུད་འགྲོ་འབུ་སྲིན་སོགས་ལ་མི་འདོད་པའི་རིགས་ཅུང་ཟད་རེ་བྱུང་བ་མཐོང་ཐོས་རིག་པའི་ཡུལ་དུ་གྱུར་པ་ཙམ་གྱིས་དེ་ཡང་རང་རྒྱུད་ལ་འབྱུང་བ་དང་ཁྱད་པར་མེད་པའི་བློ་བཟོད་མེད་དྲག་པོ་རེ་རྒྱུད་ལ་མ་སྐྱེས་ཀྱི་བར་དུ་བསྒོམས་ནས་དེ་དག་ལས་སྐྱོབ་པའི་ཐབས་བླ་མ་དཀོན་མཆོག་གསུམ་ལ་གསོལ་བ་སྙིང་ནས་ཡང་ཡང་འདེབས་ཏེ་ཆོས་ལ་བརྩོན་འགྲུས་ལྷག་པར་དུ་བསྐྱེད་དགོས་པ་ཡིན་ཞིང་། སྙིང་རྗེ་འབྱོངས་རྟགས་སུ་ཕ་རོལ་གྱི་སྡུག་བསྔལ་དེ་རང་ལ་བྱུང་བ་ལས་མི་བཟོད་པའི་སྙིང་རྗེ་དང་འགྱོད་པ་ངམ་ངམ་ཤུགས་ཀྱིས་སྐྱེ་ཡོང་བ་ཡིན་ནོ། །དེ་ནས་དགའ་བ་ནི་རྔ་མོང་གི་རྔེའུ་རྙེད་པ་ལྟ་བུར་ཞེས་སེམས་ཅན་རྣམས་སྡུག་བསྔལ་རྒྱུ་འབྲས་གཉིས་དང་བྲལ་ཞིང་། བདེ་བའི་རྒྱུ་འབྲས་དང་ལྡན་པར་གྱུར་ན་ཅི་མ་རུང་སྙམ་ནས་དངོས་སུ་བདེ་སྐྱིད་དང་ལྡན་པ་སོགས་ལ་དགའ་བ་ཁྱད་པར་ཅན་སྐྱེ་དགོས་པ་ཡིན་ཏེ། སྤྱོད་འཇུག་ལས། བདག་ཉིད་མཐོ་བར་འདོད་པ་དེས། །ངན་འགྲོ་ངན་དང་གླེན་པར་འགྱུར། །དེ་ཉིད་གཞན་ལ་སྤོ་བྱས་ན། །བདེ་འགྲོར་རིམ་གྲོ་ཐོབ་པར་འགྱུར། །གཞན་གྱི་དོན་དུ་བདག་བསྐྱེད་ན། །རྗེ་དཔོན་ཉིད་སོགས་མྱོང་བར་འགྱུར། །ཞེས་གསུངས་པ་ལྟར་དུ། ཚེ་རིང་གཟུགས་བཟང་གཟི་བརྗིད་ཆེ་བ་དང་རིགས་རུས་སྟོབས་འབྱོར་མངའ་ཐང་སྙན་གྲགས་ཅན། ཤེས་རབ་རྣོ་བ་དང་ཡོན་ཏན་ཆེ་བ། མཛད་ཕྲིན་རྒྱས་པ་བྱ་བ་ལམ་དུ་སློང་བ་ཅན་རྣམས་ཡང་ཡང་དམིགས་ཡུལ་དུ་གསལ་ལེགས་པར་བཏབ་སྟེ། དེ་ཡང་ཕྲག་དོག་གི་བློ་ངན་ཡོངས་སུ་སྤོང་ལ་རྗེས་སུ་ཡི་རངས་ཆེན་པོ་བསྒོམས་ཤིང་ད་ལྟའི་དགྲ་བོ་དང་འགྲན་སེམས་ཆེ་བ་ཅན་རྣམས་ཀྱིས་གཙོས་སེམས་ཅན་ཐམས་ཅད་ལ་དེ་ལྟ་བུའི་འབྱོར་བ་དང་ལྡན་ནས་མི་ཉམས་པ་གོང་ནས་གོང་དུ་འཕེལ་བ་ཞིག་བྱུང་ན་ཅི་མ་རུང་སྙམ་ནས་དགའ་བ་སྐྱེ་དགོས་པ་ཡིན་ཏེ་མའི་བདེ་སྐྱིད་ལ་བུས་དགའ་བ་སྒོམ་དགོས་པ་ལྟར་རམ། རྒྱལ་སྲས་བྱང་ཆུབ་སེམས་དཔའ་རྣམས་ཀྱི་རྗེས་འཇུག་རང་རྣམས་ཡིན་བཞིན་གཞན་གྱི་བདེ་སྐྱིད་དང་ཡོན་ཏན་སོགས་ལ་ཕྲག་དོག་སྐྱེས་ན་དེ་ལས་ངོ་ཚ་བ་དང་ཐབས་རྡུགས་པ་དང་བློ་རྨོངས་པའི་ལས་ཅི་ཡོད་པས་དུས་རྟག་ཏུ་ངོས་བཟུང་སྟེ་ཕྲག་དོག་དང་འགྲན་སེམས་ཀྱི་བློ་ངན་དྲུངས་ནས་འབྱིན་ཏེ་རྗེས་སུ་ཡི་རངས་ཀྱི་བློ་རྒྱ་རབ་ཏུ་ཡངས་པར་མ་གྱུར་གྱི་བར་དུ་བསྒོམ་དགོས་ཤིང་འབྱོངས་རྟགས་སུ་གཞན་འབྱོར་ཇི་ཙམ་མཐོང་རུང་ཕྲག་དོག་སོགས་གཏན་ནས་མེད་པ་རང་ལ་འབྱོར་བ་ལས་ལྷག་ཏུ་དགའ་བའི་རང་བཞིན་སྐྱེ་ཡོང་བ་ཡིན་ནོ། །དེ་ནས་བཏང་སྙོམས་ནི་དྲང་སྲོང་གིས་མགྲོན་འགྱེད་པ་ལྟ་བུ་ཞེས་བྱ་སྟེ་བྱམས་པ་སྙིང་རྗེ་དགའ་བ་སོགས་དགྲ་གཉེན་ཆགས་སྡང་གི་ཕྱོགས་སུ་ཅུང་ཟད་ཙམ་ཡང་མི་ལྷུང་བར་དཔེར་ན་རྩིང་ཧྲུབ་རྣམས་བཏུལ་ནས་ཚགས་རྒྱབ་པ་ལྟ་བུ་ཡིན་པས་ཀུན་ལ་ཡོངས་སུ་སྙོམས་པར་བྱ་དགོས་པ་ཡིན་ཏེ། སྤྱོད་འཇུག་ལས། གང་ཚེ་བདག་དང་གཞན་གཉིས་ཀ །བདེ་བ་འདོད་དུ་མཚུངས་པ་ལ། །བདག་དང་ཁྱད་པར་ཅི་ཡོད་ན། །གང་ཕྱིར་བདག་ཅག་བདེ་བར་བརྩོན། །གང་ཚེ་བདག་དང་གཞན་གཉིས་ཀ །སྡུག་བསྔལ་མི་འདོད་མཚུངས་པ་ལ། །བདག་དང་ཁྱད་པར་ཅི་ཡོད་ན། །གང་ཕྱིར་གཞན་མིན་བདག་སྲུང་བྱེད། །ཅེས་གསུངས་པ་ལྟར་དུ་རང་གཞན་བར་མ་དོར་གསུམ་ཀ་ལ་བསམ་སྦྱོར་གཉིས་ཀས་ཡོངས་སུ་མཉམ་ཞིང་ཁྱབ་དགོས་པ་ཡིན་པའི་ཕྱིར། ད་ལྟའི་ལུས་རྟེན་འདིའི་སྐབས་ན་དགྲ་དང་གཉེན་དུ་ཁ་ཤས་ཤིག་ངོས་བཟུང་བ་དང་། ཕལ་ཆེར་ནི་ལུང་མ་བསྟན་དུ་ལྷག་བསྡད་ཡོད་པ་དེ་དག་ཐམས་ཅད། དོན་དུ་ནི་སྔོན་ཚེ་རབས་ཐོག་མེད་ཀྱི་ཕ་མ་མ་གྱུར་པ་ནི་གཅིག་ཙམ་མེད་པར་ནི་བཤད་མ་ཐག་པའི་ཚུལ་ལྟར་ཡིན་པས། དེ་འདྲ་བ་རྣམས་ལ་ད་སྐབས་ཆགས་སྡང་གི་རིས་ཤིག་ཕྱེ་བའི་དགོས་པ་ཅི་ཡོད་དེ་ཐ་ན་ངོ་ཡང་ཚ་བ་མ་ཟད། རང་གི་ཆོས་ལམ་དུ་མི་སློང་ཞིང་གང་གྲུབ་རྣམས་ཆུད་ཟོས་སུ་གཏོང་བ་དང་། ཕྱི་མ་རྣམ་སྨིན་གྱི་ཁུར་པོ་ལྕི་བ་ལས་མ་མཆིས་པས་ན་སྙིང་རྗེ་དང་། བྱམས་པ་དགའ་བ་སོགས་ཕྱོགས་རིས་ཆེ་ཕྲའི་དབང་དུ་ནམ་ཡང་མ་སོང་བར་ནམ་མཁའ་ལྟ་བུ་ཀུན་ལ་ཡོངས་སུ་སྙོམས་པའི་བློ་རྒྱ་ཡང་ཡང་བསྐྱེད་ཅིང་བསམ་སྦྱོར་གང་བྱས་ཐམས་ཅད་ཀུན་སློང་བཟང་པོ་ཚད་ལྡན་རེ་རྒྱུད་ལ་འབྱངས་པར་བྱ་དགོས་ཤིང་། དེ་ལྟར་ཚད་མེད་བཞི་པོའི་མདོ་དོན་ཀྱང་ཡོངས་སུ་བསྡུ་ན་དུས་རྟག་ཏུ་བསམ་པ་བཟང་པོ་ཁོ་ན་བྱེད་པ་ལ་འདུས་ཏེ། དྲུང་གཟིན་ཅན་གྱིས་གདམས་ངག་གཅིག་གིས་ཆོག་པ་ཞུ་ཟེར་བ་ལ་དམ་པས་ཁྱེད་རང་གིས་གང་འདོད་པ་དེ་ལྟར་གཞན་དག་ལ་སྦྱོར་ཅིག་གསུངས་པ་ལྟར་དཔེ་དོན་ཤིན་ཏུ་གོ་བདེ་བས་དུས་རྣམ་ཀུན་ཏུ་བསམ་སྦྱོར་དེ་ལྟར་དུ་མི་ལྷོད་པ་གལ་ཆེ་ཞིང་། དེ་དག་ཀྱང་བདེན་མེད་སྒྱུ་མའི་རང་བཞིན་ཤེས་རབ་ཟབ་མོས་རྩིས་ཤུགས་འབྱུང་དུ་ཟིན་པ་གལ་ཆེའོ། །ལར་ནི་ཚད་མེད་བཞིའི་བློ་སྦྱོང་དང་སྨོན་འཇུག་གི་བསླབ་བྱ་སོགས་ཡོངས་སུ་ཤེས་ཀྱང་བཟང་ངན་གྱི་རྐྱེན་ཆེ་ཕྲ་རྣམས་དང་འཕྲད་དུས་གཉེན་པོའི་བཟོད་བསྲན་ཅུང་ཟད་ཙམ་ཡང་མེད་པར། རང་གི་རྣམ་རྟོག་ལ་དགྲ་མཐོང་། མེ་སྟག་སྟེང་དུ་གྲི་འདོན། བན་རྒན་ཕྲེང་མའི་ལྕག་ཚན། ཆོས་གོས་ཞབས་ཀྱི་དུག་མདའ་ཟེར་བའི་དཔེ་ལྟར་རང་རེ་ཆོས་པ་རྣམས་ཀྱིས་མི་བྱེད་པའི་ངེས་པ་ཆེར་མི་འདུག་ཅིང་། ཀུན་བཟང་བླ་མའི་ཞལ་ལུང་དུ་གསུངས་པ་ལྟར་སྲུང་སྡོམ་སྣ་རེ་དག་པའམ། ཡོན་ཏན་ཕྲན་བུ་རེ་ཡོད་པའི་དབང་གིས་རྒྱུད་རྟག་ཏུ་ང་རྒྱལ་གྱིས་ཁེངས་ནས་ཕ་རོལ་པོས་ལྟ་ལུགས་མཐོ་དམན་ནམ། ཚིག་གཅིག་གི་སྨྲ་ལུགས་ལེགས་ཉེས་ལའང་ང་ལ་བརྙས་བྱུང་སྙམ་ནས་ཚིག་ལན་ངན་པ་ཅི་གནོད་གང་གནོད་སྤྲད་དེ་མིའི་ཤེས་རྒྱ། སོ་ཐར་གྱི་སྡོམ་པ། བྱང་སེམས་ཀྱི་བསླབ་པ། གསང་སྔགས་ཀྱི་ལྟ་སྒོམ་སོགས་གཉེན་པོ་གང་ཡང་དྲན་ཙམ་མི་ནུས་པ་དང་། མ་ཟད་ཡོན་བདག་དང་སློབ་མས་བསྟོད་ཙ་ན། རང་རྒྱུད་ཞིབ་ཀྱིས་མི་བརྟག་པར་ང་ནི་འདི་དང་འདི་ལྟ་བུའོ་སྙམ་ནས་ང་རྒྱལ་གྱིས་རྒྱུད་སྦོས་ཤིང་སྣང་བ་འུར་ལངས་ནས། ངས་གང་བྱས་དང་གང་ལབ་ཆོག་པ་ཡིན་སྙམ་ནས་སྣང་བ་མཐོ་ལིང་ངེ་ཤེས་པ་རྩུབ་ཧྲག་གེ་གྱུར་པ་ནི་ཆོས་པ་རྣམས་བདུད་ཀྱིས་མངོན་སུམ་བསླུས་པ་ཡིན་ཅེས་པ་ལྟར་དང་། དགེ་བཤེས་སྤྱན་སྔ་བས། འུ་ཅག་ཐོས་བསམ་བྱེད་བཞིན་ང་རྒྱལ་ཇེ་ཆེར་དུ་སོང་ནས། བཟོད་བསྲན་ཤ་བུ་ལས་ཆུང་། ཀོ་ལོང་གཙང་བཙན་ལས་དམ་པར་འདུག་པ་དེ་ཚོ་ཐོས་བསམ་སྒོམ་གསུམ་དང་གང་ཟག་གི་ཤེས་རྒྱུད་ལོག་པར་སོང་བའི་རྟགས་ངེས་པར་ཡིན་ནོ། །ཞེས་དང་། དགེ་སློང་བཟང་སྟེ་ཁོང་ཁྲོ་ཆེ་ཟེར་འཇིག་རྟེན་གྱི་ཁམས་འདིར་ཁོང་ཁྲོ་ལས་ཐུ་བའི་སྡིག་པ་མེད་དོ། །ཞེས་དང་། ཕ་དམ་པའི་ཞལ་ནས། འདོད་ཆགས་དང་གཏི་མུག་གི་ལས་བརྒྱ་ལས་ཞེ་སྡང་གིས་ལས་སྐད་ཅིག་མ་སྡིག་པ་ཆེ་བར་བཤད་པ་རྣམས་མ་གོའམ། ཞེས་གསུངས་པ་ལྟར་དུ། སྤྱོད་འཇུག་ལས། ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། །དེ་བས་བཟོད་ལ་ནན་ཏན་དུ། །སྣ་ཚོགས་ཚུལ་གྱིས་བསྒོམ་པར་བྱ། །ཞེས་དང་། ཞེ་སྡང་སློང་བ་ལ་ཁོང་མ་ཁྲོ། །ཞེས་སྡང་སློང་བ་ལ་ཁོང་ཁྲོ་ན། །བཟོད་པ་བྱ་བ་དེ་ནམ་ཞིག་བསྒོམ། །ཞེས་དང་། དེ་བས་རབ་ཏུ་སྡང་སེམས་ལ། །བརྟེན་ནས་བཟོད་པ་སྐྱེ་བས་ན། །དེ་ཉིད་བཟོད་པའི་རྒྱུ་ཡིན་པས། །དམ་པའི་ཆོས་བཞིན་མཆོད་པར་འོས། །ཞེས་དང་། འདི་ལྟར་ཕར་གནོད་མ་བྱས་ན། །འགའ་ཡང་གནོད་པ་མི་བྱེད་དོ། །དེ་བས་ངལ་བས་མ་བསྒྲུབས་པའི། །ཁྱིམ་དུ་གཏེར་ནི་བྱུང་བ་ལྟར། །བྱང་ཆུབ་སྤྱོད་པའི་གྲོགས་གྱུར་པས། །བདག་གིས་དགྲ་ལ་དགའ་བར་བྱ། །ཞེས་དང་། གྲགས་པའི་དོན་དུ་ནོར་གཏོང་ཞིང་། །བདག་ཉིད་ཀྱང་ནི་གསོད་བྱེད་ན། །ཚིག་འབྲུ་རྣམས་ཀྱིས་ཅི་ཞིག་བྱ། །ཤི་ན་དེ་ཀོ་སུ་ལ་རེ། །བྱེ་མའི་ཁང་བུར་རྡིབ་གྱུར་ན། །བྱིས་པ་རྣམས་ནི་ག་ཆད་ངུ་། །དེ་བཞིན་བསྟོད་དང་གྲགས་ཉམས་ན། །རང་གི་སེམས་ནི་བྱིས་པ་བཞིན། །ཞེས་དང་། བདག་ནི་གྲོལ་བ་དོན་གཉེར་བས། །རྙེད་དང་བཀུར་སྟིས་འཆིང་མི་དགོས། །གང་དག་བདག་བཅིངས་གྲོལ་བྱེད་པ། །དེ་ལ་བདག་ནི་ཇི་ལྟར་ཁྲོ། །གལ་ཏེ་བདག་ནི་རང་སྐྱོན་གྱིས། །འདི་ལ་བཟོད་པར་མི་བྱེད་ན། །བསོད་ནམས་རྒྱུ་ནི་ཉེར་གནས་པས། །འདི་ལ་བདག་གེགས་བྱེད་འགྱུར་རམ། །ཞེས་སོགས་གསུངས་པས་ན་གཞན་དག་གིས་ཇི་ལྟར་གཤེ་ཡང་སླར་ཕར་མི་གཤེ། ཁྲོས་ཀྱང་སླར་ཕར་ལ་མི་ཁྲོ། བརྡེགས་ཀྱང་སླར་ཕར་ལ་མི་བརྡེག །མཚང་བྲུས་ཀྱང་སླར་ཕར་ལ་མི་འབྲུ་བར་དགེ་སྦྱོང་གི་ཆོས་བཞི་ཞེས་པ་དེ། དུས་རྣམས་ཀུན་ཏུ་ཐུགས་ཉམས་སུ་ལེགས་པར་བསྟར་ཏེ། གཞན་དག་གིས་ཚིག་ངན་དང་བརྙས་བཅོས། རྡུང་རྡེག་དང་བཀོལ་སྤྱོད་འཕྲོག་བཅོམ་དང་རྐུ་བ། མཐོ་དམའ་དང་འབྱོར་རྒུད། གྱོང་དང་བུབ་ཁ་ཆེ་ཕྲ་བར་མ་དོ་ཇི་ལྟར་བསྐལ་བྱུང་རུང་དེ་དུས་དགའ་སྤྲོ་དང་ལྡན་པས་རྟག་ཏུ་བཟོད་པར་བྱ་དགོས་ཏེ། རྒྱལ་སྲས་ཐོགས་མེད་ཀྱིས། སུ་དག་འདོད་ཆེན་དབང་གིས་བདག་གི་ནོར། །ཐམས་ཅད་འཕྲོག་གམ་འཕྲོག་ཏུ་འཇུག་ན་ཡང་། །ལུས་དང་ལོངས་སྤྱོད་དུས་གསུམ་དགེ་བ་རྣམས། །དེ་ལ་བསྔོ་བ་རྒྱལ་སྲས་ལག་ལེན་ཡིན། །བདག་ལ་ཉེས་པ་ཅུང་ཟད་མེད་བཞིན་དུ། །གང་དག་བདག་གི་མགོ་བོ་གཅོད་བྱེད་ནའང་། །སྙིང་རྗེ་དབང་གིས་དེ་ཡི་སྡིག་པ་རྣམས། །བདག་ལ་ལེན་པ་རྒྱལ་སྲས་ལག་ལེན་ཡིན། །འགའ་ཞིག་བདག་ལ་མི་སྙན་སྣ་ཚོགས་པ། །སྟོང་གསུམ་ཁྱབ་པར་སྒྲོགས་པར་བྱེད་ན་ཡང་། །བྱམས་པའི་སེམས་ཀྱིས་སླར་ཡང་དེ་ཉིད་ཀྱི། །ཡོན་ཏན་བརྗོད་པ་རྒྱལ་སྲས་ལག་ལེན་ཡིན། །འགྲོ་མང་འདུས་པའི་དབུས་སུ་འགའ་ཞིག་གིས། །མཚང་ནས་བྲུས་ཤིང་ཚིག་ངན་སྨྲ་ན་ཡང་། །དེ་ལ་དགེ་བའི་བཤེས་ཀྱི་འདུ་ཤེས་ཀྱིས། གུས་པར་འདུད་པ་རྒྱལ་སྲས་ལག་ལེན་ཡིན། །བདག་གི་བུ་བཞིན་གཅེས་པར་བསྐྱང་བའི་མིས། །བདག་ལ་དགྲ་བཞིན་ལྟ་བར་བྱེད་ན་ཡང་། །ནད་ཀྱིས་བཏབ་པའི་བུ་ལ་མ་བཞིན་དུ། །ལྷག་པར་བརྩེ་བ་རྒྱལ་སྲས་ལག་ལེན་ཡིན། །རང་དང་མཉམ་པའམ་དམན་པའི་སྐྱེ་བོ་ཡིས། །ང་རྒྱལ་དབང་གིས་བརྙས་ཐབས་བྱེད་ན་ཡང་། །བླ་མ་བཞིན་དུ་གུས་པས་བདག་ཉིད་ཀྱི། །སྤྱི་བོར་ལེན་པ་རྒྱལ་སྲས་ལག་ལེན་ཡིན། །འཚོ་བས་ཕོངས་ཤིང་རྟག་ཏུ་མི་ཡིས་བརྙས། །ཚབས་ཆེན་ནད་དང་གདོན་གྱིས་བཏབ་ཀྱང་སླར། །འགྲོ་ཀུན་སྡིག་སྡུག་བདག་ལ་ལེན་བྱེད་ཅིང་། །ཞུམ་པ་མེད་པ་རྒྱལ་སྲས་ལག་ལེན་ཡིན། །སྙན་པར་གྲགས་ཤིང་འགྲོ་མང་སྤྱི་བོས་བཏུད། །རྣམ་ཐོས་བུ་ཡི་ནོར་འདྲ་ཐོབ་གྱུར་ཀྱང་། །སྲིད་པའི་དཔལ་འབྱོར་སྙིང་པོ་མེད་གཟིགས་ནས། །ཁེངས་པ་མེད་པ་རྒྱལ་སྲས་ལག་ལེན་ཡིན། །ཉོན་མོངས་དབང་གིས་རྒྱལ་སྲས་གཞན་བདག་གི། །ཉེས་པ་གླེང་ན་བདག་ཉིད་ཉམས་འགྱུར་བས། །ཐེག་པ་ཆེ་ལ་ཞུགས་པའི་གང་ཟག་གི། །ཉེས་པ་མི་སྨྲ་རྒྱལ་སྲས་ལག་ལེན་ཡིན། །རྙེད་བཀུར་དབང་གིས་ཕན་ཚུན་རྩོད་འགྱུར་ཞིང་། །ཐོས་བསམ་སྒོམ་པའི་བྱ་བ་ཉམས་འགྱུར་བས། །མཛའ་བཤེས་ཁྱིམ་དང་སྦྱིན་བདག་ཁྱིམ་རྣམས་ལ། །ཆགས་པ་སྤོང་བ་རྒྱལ་སྲས་ལག་ལེན་ཡིན། །རྩུབ་མོའི་ཚིག་གིས་གཞན་སེམས་འཁྲུགས་འགྱུར་ཞིང་། །རྒྱལ་བའི་སྲས་ཀྱི་སྤྱོད་ཚུལ་ཉམས་འགྱུར་བས། །དེ་ཕྱིར་གཞན་གྱི་ཡིད་དུ་མི་འོང་པའི། །ཚིག་རྩུབ་སྤོང་བ་རྒྱལ་སྲས་ལག་ལེན་ཡིན། །ཉོན་མོངས་གོམས་ན་གཉེན་པོས་བཟློག་དཀའ་བས། །དྲན་ཤེས་སྐྱེས་བུས་གཉེན་པོའི་མཚོན་བཟུང་ནས། །ཆགས་སོགས་ཉོན་མོངས་དང་པོ་སྐྱེས་མ་ཐག །འབུར་འཇོམས་བྱེད་པ་རྒྱལ་སྲས་ལག་ལེན་ཡིན། །ཞེས་སོགས་གསུངས་པ་ལྟར་སྐྱེ་བོ་མ་རིག་པས་སྒྲིབ་པ་བླུན་རྨོངས་རྣམས་ཀྱིས་མ་དག་པས་མ་དག་པའི་སྣང་བ་ལས་ཅི་མཐོང་འཁྲུལ་པས་འཁྲུལ་གཏམ་ལས་ཅི་ཡོད། དྲན་ཤེས་བག་ཡོད་ཀྱི་གཉེན་པོ་ཅུང་ཟད་ཙམ་ཡང་མེད་པའི་རང་འདོད་ངན་པའི་གཏམ་ལ་ཡིད་རྟོན་ཕེར་བ་ཅི་ཡོད་སྙམ་ནས་བཟོད་པར་རིགས་སོ། །ཡུལ་ནི་རིང་བའི་མཆེད་སེམས་ཅན་ཐམས་ཅད། ཉེ་བའི་མཆེད་སངས་རྒྱས་བསྟན་པའི་སྒོར་ཞུགས་ཚད། ནང་གི་མཆེད་ཆོས་བརྒྱུད་གྲུབ་མཐའ་གཅིག་པ་རྣམས། གསང་བའི་མཆེད་བླ་མ་གཅིག་གིས་དཀྱིལ་འཁོར་གཅིག་ཏུ་བསྡུས་པའི་དམ་ཚིག་ལྡན་པ་རྣམས་ཡིན་པས། དེ་དག་ཀུན་ལ་ལྷག་ཏུ་བཟོད་པར་རིགས་སོ། །ཚིག་ངན་དྲག་པོ་ཅི་གནོད་སྣ་ཚོགས་ལབ་བྱུང་རུང་ལག་གིས་བརྡུང་རྒྱབ་བྱེད་པ་ནི་མིན་ཅི་སྐྱོན་སྙམ་ནས་བཟོད་པར་རིགས་སོ། །འཆི་བ་ལས་མ་འདས་པ་ཞིག་བརྡུང་བྱུང་རུང་རང་གིས་བཟོད་པ་ལ་ཟོལ་མི་འདུག་པས་ངན་སོང་གི་གནས་རིས་ལ་ནི་སྐྱེ་ཐབས་མེད་སྙམ་ནས་ལྷག་ཏུ་བཟོད་པར་རིགས་སོ། །གཞན་ཡང་ཚེ་འདིའི་སྣང་ངོར་སྙན་གྲགས་དང་འབྱོར་ཚོགས་བདེ་སྐྱིད་དང་ཐོབ་ཐང་སོགས་ཆུང་བར་གྱུར་རུང་མི་ངོ་དང་རྒྱུ་ངོ་ལ་ནམ་ཡང་མི་ཕྱོགས་པར་ཆོས་གང་འགྲུབ་དེ་དམ་ཚིག་རྣམ་པར་དག་པས་སྲུང་བ་གལ་གནད་ཆེ་བས་ན་བཟོད་པར་རིགས་སོ། །ཐོས་བསམ་སྒོམ་པ་ཕྱོགས་རེ་བས་རྒྱུད་ཁེངས་ནས་རྩོད་པའི་བརྙས་བཅོས་སྣ་ཚོགས་ཅི་ལྟར་བྱས་བྱུང་རུང་ཐ་སྙད་ཚིག་ལ་མཁས་པ་རྣམས་ལ་ང་རྒྱལ་གྱི་ཁེངས་དྲེགས་དང་། སེམས་ཀྱི་གནས་ལུགས་རྟོགས་པ་ལ་ཞི་དུལ་དང་བག་ཡོད་རེ་ལོས་ཡོད་སྙམ་ནས་ཤིན་ཏུ་ཉམ་ཆུང་གི་ངང་བསྐྱངས་ཏེ་ལྷག་པར་བཟོད་པར་རིགས་སོ། །རྐྱེན་བཟང་ངན་ཆེ་ཕྲ་རྣམས་དང་དངོས་བརྒྱུད་བར་གསུམ་ནས་བྱུང་ཞིང་འཕྲད་པའི་དུས་གཉེན་པོ་རྩོལ་བཅས། རྩོལ་མེད་གང་རུང་གིས་བཟོད་པའི་ཁུར་མ་ཐེག་ན་སེམས་རྒྱུད་ཆོས་དང་མ་འདྲེས་པའི་ཕྱིར་ཆོས་པའི་མཚང་རྟགས་གཅལ་དུ་བཀྲམ་ཡོང་བས་ན་བཟོད་པར་རིགས་སོ། །བདེ་བའི་རྒྱུ་དགེ་རྩ་གང་གྲུབ་རྣམས་ཆུད་ཟོས་སུ་འགྲོ་ཉེན་ཡོད་པ་དང་། ད་ལྟའི་དགེ་བ་སྒྲུབ་པ་ལམ་དུ་མི་ཕྱིན་པ་དང་། ཕྱིས་ནས་དགེ་བ་སྒྲུབ་པའི་སྣོད་དུ་མི་རུང་བ་དང་། ཞེ་སྡང་གིས་བསྐྱེད་པའི་སྡུག་བསྔལ་ཆེ་ཤོས་དམྱལ་བ་ཡིན་པས་དེར་ལྷུང་གིས་དོགས་ནས་སྲོག་ལ་ཐུག་ཀྱང་བཟོད་པར་རིགས་སོ། །དེ་ལྟར་དུག་ལྔའི་ནང་ནས་ཀྱང་ཁོང་ཁྲོ་ངན་པ་འདི་གློ་བུར་དུ་གློག་ཞགས་འཁྱུགས་པ་བཞིན་དུ་ལྡང་ནས་དགེ་བ་གང་འགྲུབ་རྣམས་ཆུད་ཟོས་སུ་གཏོང་བའི་ཉེན་ཁ་ཆེ་ཤོས་ཡིན་པས་རབ་འབྲིང་ཐ་མ་ཕལ་ཆེས་ལྷག་པར་དུའང་བཟོད་པའི་རིགས་ཀྱི་གོ་ཆ་འདི་དག་གྱོན་ནས། བྱང་ཆུབ་ཀྱི་སེམས་རིན་པོ་ཆེ་མ་སྐྱེ་པ་བསྐྱེད་པར་བྱེད་དེ་སྐྱེས་པ་མ་ཉམས་པར་སྲུང་བ་ལ། ཤིན་ཏུ་ནས་ཀྱང་གཟབ་པ་གལ་ཆེ་བའི་རང་བཞིན་ཡིན་ནོ། །ད་ནི་སྨོན་འཇུག་གི་སེམས་བསྐྱེད་དངོས་ལ། སྤྱོད་འཇུག་ལས། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པར་བྱོས། །ཞེས་གསུངས་པ་ལྟར་གཏན་བདེ་བླ་ན་མེད་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ལ་མཁའ་ཁྱབ་ཀྱི་སེམས་ཅན་ཐམས་ཅད་མྱུར་བ་ཉིད་དུ་ད་ནི་འགོད་པར་བྱའོ་སྙམ་པ་ནི་སྨོན་སེམས་དང་། དེའི་ཕྱིར་དུ་མདོ་སྔགས་ཀྱི་ཆོས་སྔོན་འགྲོ་དངོས་གཞི་རྗེས་ཀྱི་བྱ་བ་སོགས་གང་དང་གང་ཡིན་པ་དེ་དག་རྩེ་གཅིག་ཏུ་ཉམས་སུ་བླངས་ནས་མཐར་ཕྱིན་པར་བྱའོ་སྙམ་པ་ནི་འཇུག་པ་སེམས་བསྐྱེད་ཡིན་པས་ཆོས་དང་གང་ཟག་ཡང་དག་པར་ཟུང་དུ་འཇུག་པའི་མཚམས་སྦྱོར་བར་བྱེད་པའི་མཁན་པོ་འདི་དག་ནི་ཐེག་ཆེན་གྱི་ལུགས་སུ་ཅི་ནས་གལ་ཆེ་ཤོས་ཡིན་པས་རྒྱུན་དུ་ཤེས་པར་བྱོས་ཤིག །ད་སྐབས་སེམས་བསྐྱེད་པའི་དམ་བཅའ་ཁྱད་པར་ཅན་དང་བཅས་ངག་དོན་རྣམས་དེ་བཞིན་ཚིག་རྗེས་དོན་དྲན་གྱི་ངང་ནས་འབུམ་ཐེར་ཁ་བསྐང་དང་བཅས་ལེགས་པར་གསོག་གོ། །དེ་ལྟར་སེམས་བསྐྱེད་ཟབ་མོའི་ལམ་ལ་འཇུག་ནས་བཟུང་སྟེ་སླད་ཀྱང་སྐྱེས་པ་ཉམས་པ་མེད་པ་མི་ཉམས་པར་གོང་ནས་གོང་དུ་འཕེལ་བའི་ཐབས་ལ་སྨོན་འཇུག་གི་བསླབ་བྱ་གཉིས་ཏེ། དེའང་ཚིག་དང་བསམ་པ་ཙམ་དང་ཕྱོགས་ལམ་སྒྲུབ་མདོག་བྱས་པས་མི་ཡོང་བར་རྒྱལ་སྲས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ཡང་དག་པ་ལ་རིམ་གྱིས་འབད་པར་བྱ་དགོས་ཏེ། སྤྱོད་འཇུག་ལས། བླ་ན་མེད་པའི་བདེ་བ་ལ། །བསམ་པ་ཐག་པས་མགྲོན་གཉེར་ནས། །འགྲོ་བ་ཐམས་ཅད་བསླུས་བྱས་ན། །བདེ་འགྲོར་ཇི་ག་འགྲོར་འགྱུར་རམ། །ཞེས་དང་། གལ་ཏེ་དེ་ལྟར་དམ་བཅས་ནས། །ལས་ཀྱིས་བསྒྲུབ་པར་མ་བྱས་ན། །སེམས་ཅན་དེ་དག་ཀུན་བསླུས་པས། །བདག་གི་འགྲོ་བ་ཅི་འདྲར་འགྱུར། །ཞེས་གསུངས་པ་ལྟར་ལས་མི་ཡོང་བས། དེས་ན་སྨོན་པའི་བསླབ་བྱ་ལ། དང་པོ་རང་གིས་གནས་སྐབས་ཉི་མ་དྲོད་མོ་ཞིག་འདེ་ནས་བཟུང་རྫོགས་པའི་སངས་རྒྱས་བར་བདེ་སྐྱིད་ཆེ་ཞིང་ཆེ་བ་ནས་ཕྲ་ཞིང་ཕྲ་བར་འདོད་པ་དང་། མེ་སྟག་ཕྲ་མོ་ནས་འཁོར་བ་ངན་སོང་གི་སྡུག་བསྔལ་ཆེ་ཞིང་ཆེ་བ་ནས་ཕྲ་ཞིང་ཕྲ་བར་མི་འདོད་པ་ཇི་བཞིན་སེམས་ཅན་གྱི་རིགས་འདྲ་མིན་སྣ་ཚོགས་ཆེ་ཕྲ་ཕྱི་ནང་བར་མ་དོ་ཐམས་ཅད་ཀྱིས་ཀྱང་དེ་ལྟར་དུ་འདོད་ལུགས་གཅིག་པ་ཡིན་བཞིན་ལྷག་པར་ཤེས་པས་བསམ་སྦྱོར་གང་བྱས་རུང་རང་གཞན་ཡོངས་སུ་མཉམ་དགོས་པ་ཡིན་ཏེ་དཔེར་ན་རྫི་བོ་རྣམས་ལ་ཕྱིང་གོས་གཅིག་ལས་མེད་ཀྱང་མཉམ་དུ་གྱོན་པ་ལྟ་བུའི་རིགས་འགྲེ་ནས་བསྒྲུབ་པར་བྱའོ། །དེ་ནས་རང་གི་དབུགས་ནང་དུ་རྔུབ་དུས་ནམ་མཁས་གར་ཁྱབ་ཀྱི་སེམས་ཅན་གྱི་ལུས་ཀྱི་ན་ཚ། སེམས་ཀྱི་སྡུག་བསྔལ་བསམ་པའི་བར་ཆད། སྡིག་ལྟུང་། སྒྲིབ་པ་སྡུག་བསྔལ་གྱི་རྒྱུ་དུག་གསུམ་འབྲས་བུ་ངན་སོང་གསུམ་སོགས་ཐམས་ཅད་རླུང་ནག་པོའི་རྣམ་པ་བྱུང་ནས་རང་ལ་ཐིམ་ནས་སྨིན་པར་བསམ། དབུགས་ཕྱིར་བཏང་དུས་རང་གི་བདེ་བའི་རྒྱུ་དད་པ་ངེས་འབྱུང་བྱང་སེམས་འབྲས་བུ་མངོན་མཐོ་ཉན་རང་སངས་རྒྱས་ཀྱི་ཡོན་ཏན་དང་། བདག་གི་ཚེ་བསོད་ནམས་ཁ་རྗེ་དབང་ཐང་ལུས་ལོངས་སྤྱོད་བདེ་སྐྱིད་སོགས་བདེ་བའི་དངོས་པོ་ཐམས་ཅད་རླུང་དཀར་པོའི་རྣམ་པ་བསང་དུད་མཆེད་པ་ལྟ་བུ་བྱུང་། གཞན་དག་སེམས་ཅན་ཐམས་ཅད་ལ་ཐོབ་པར་བསམ་པ་ནི་བརྗེ་བ་ཡིན། འོན་ཀྱང་དེ་ལྟ་བུ་རྒྱངས་འཕོ་རྒྱངས་འཕེན་བྱེད་པ་ལྟ་བུས་མི་ཡོང་བཞིན་དངོས་སུ་བདེ་སྐྱིད་བདེ་བའི་དངོས་པོ་ཐམས་ཅད་གཞན་དག་ལ་སྦྱིན། གཞན་གྱི་སྡུག་བསྔལ་ཐམས་ཅད་རང་གིས་བླང་དགོས་ཏེ་དཔེར་ན་ཁ་བའི་ནང་ནས་གཞན་ལ་ལྷམ་ཡ་གཡར་ནུས་པ་ལྟ་བུའི་རིགས་འགྲེ་ནས་ཤེས་པར་བྱའོ། །དེ་ནས་ངན་སོང་དུ་སྐྱེས་པའི་སེམས་ཅན་ཐམས་ཅད་བདེ་བ་དང་ལྡན་ན། དེ་དག་གི་ཚབ་ཏུ་བདག་ངན་སོང་དུ་སྐྱེས་ནས་ལུས་ལ་ན་ཚ་སེམས་ལ་སྡུག་བསྔལ་ཅི་བྱུང་ཡང་བཟོད་པར་བྱ་སྙམ་ནས་སླར་སྙིང་སྟོབས་ཡང་ཡང་བསྐྱེད་པ་ནི་གཞན་གཅེས་པར་བཟུང་བ་ཡིན་ཞིང་། དཔེར་ན་རང་འཁྱགས་ནས་ཤི་རུང་མདོ་འདྲ་བྱེད་དེ་གཞན་ལ་གོས་སོགས་སྦྱིན་པ་ལྟ་བུའི་རིགས་འགྲེ་ནས་བསྒྲུབ་པར་བྱའོ། །དེ་ཡང་ཚིག་ཙམ་མ་ཡིན་པ་སེམས་ཐོག་ཏུ་ཡང་ཡང་བསྒོམས་ནས་དང་པོ་བཅོས་མའི་སྙིང་རྗེ། བར་དུ་བཅོས་མ་དགོས་པ་ངམ་ངམ་ཤུགས་ཀྱིས་སྙིང་རྗེ། མཐར་ངེས་ཤེས་བཟོད་གླགས་མེད་པ་དུང་ངེར་རྒྱུན་ཆགས་སུ་སྐྱེས་པ་ཞིག་གི་སྒོ་ནས་ད་ལྟའི་རྐྱེན་བཟང་ངན་རྣམ་པ་སྣ་ཚོགས་དངོས་སུ་འཕྲད་དུས་ལག་ལེན་འཛོལ་མེད་རེ་ཐོན་ངེས་དང་། ཕུགས་སུ་བསམ་སྦྱོར་དེ་འདྲའི་གདེང་ཡོངས་སུ་ཚུད་པ་ཞིག་མེད་ན་རང་གཞན་ལ་ཕན་ཐོགས་ངེས་པར་འབྱུང་དཀའ་བས་ཚིག་དང་ཚུལ་འཆོས་ཀྱི་སྒོམ་ལོ་ཙམ་དུ་མ་ལུས་པ་ཅི་ནས་གལ་ཆེའོ། །ད་ནི་འཇུག་པའི་བསླབ་བྱ་བྱང་ཆུབ་སེམས་དཔའི་སྤྱོད་པ་ཕར་ཕྱིན་དྲུག་ནི། དང་པོ་སྦྱིན་པ་ལའང་གསུམ་སྟེ། ཟས་དང་གོས་དང་ནོར་རྫས་ཀྱི་རིགས་ཕྲ་མོ་ཚུན་ཆད་དབུལ་ཕོངས་ཉམ་ཐག་རྣམས་ལ་སྦྱིན་པ་ནི་གཏོང་བ་ཆུང་ངུ་ཞེས་པ་དང་། རྟ་དང་གླང་ཆེན་བུ་དང་བུ་མོ་སོགས་རང་ལ་ལྷག་པར་གཅེས་ཤིང་དམར་ལ་དཀོན་པའི་རིགས་རྣམས་སྦྱིན་པ་ནི་གཏོང་བ་ཆེན་པོ་ཞེས་པ་དང་། རང་གི་ལུས་དང་སྲོག་དང་ཡན་ལག་སོགས་བྱ་དཀའ་བའི་རིགས་སྦྱིན་པ་ནི་ཤིན་ཏུ་གཏོང་བ་ཆེན་པོ་ཞེས་བྱ་སྟེ་ཟང་ཟིང་གི་སྦྱིན་པ་དང་གཅིག །དེ་ནས་ཆོས་ཀྱི་སྦྱིན་པ་ནི། དབང་བསྐུར་བ༑ ཆོས་བཤད་པ། ལུང་འབོག་པ་དང་། སྨྱུ་གུ། སྣག་ཚ། ཤོག་གུ། གླེགས་བམ་སྦྱིན་པ་དང་། དཀར་དམར་གྱི་གསུར་དང་ཆུ་གཏོར་ལུས་སྦྱིན་སོགས་ནི་ཆོས་ཀྱི་སྦྱིན་པ་དང་གཉིས། སེམས་ཅན་སྐྱབས་མགོན་དཔུང་རེ་ས་མེད་པ་ལ་མགོན་སྐྱབས་དང་གནས་གཡར་མཐུན་རྐྱེན་སྦྱར་བ་དང་། རི་རྒྱ་ཀླུང་རྒྱ་ཆུ་རྒྱ་སྡོམ་པ་དང་སྲོག་བསླུ་འཆི་བསླུ་ཚེ་སྒྲུབ་བྱེད་དགོས་པ་སོགས་ནི་མི་འཇིགས་པ་སྐྱབས་ཀྱི་སྦྱིན་པ་དང་གསུམ་སྟེ། ཕན་ཡོན་ནི་རང་གི་སེར་སྣའི་ཚོགས་འཇོམས་ཤིང་ཡི་དྭགས་སྐྱེ་རྒྱུན་གཅོད་པ་དང་། བསོད་ནམས་ཀྱི་ཚོགས་རྫོགས་ཤིང་གཞན་དོན་འབྱུང་བ་ཡིན་པས་ལྷག་པར་ཤེས་དགོས། དེ་ནས་ཚུལ་ཁྲིམས་ལའང་གསུམ་སྟེ། ལུས་ངག་ཡིད་གསུམ་གྱི་སྒོ་ནས་མི་དགེ་བ་བཅུ་སོགས་ཕར་ཡོངས་སུ་སྤོང་བ་ནི་ཉེས་སྤྱོད་སྡོམ་པའི་ཚུལ་ཁྲིམས་ཞེས་པ་དང་གཅིག །དགེ་བ་བཅུ་པོ་སོགས་དུས་དང་རྣམ་པ་ཐམས་ཅད་དུ་རང་རྒྱུད་དུ་ཚུར་ཅི་འགྲུབ་བྱེད་པ་ནི་དགེ་བ་ཆོས་སྡུད་ཀྱི་ཚུལ་ཁྲིམས་དང་གཉིས། བསྡུ་བའི་དངོས་པོ་བཞི་ལ་བརྟེན་ནས་སེམས་ཅན་གྱི་དོན་དུ་གནས་སྐབས་མངོན་མཐོའི་འབྱོར་ཚོགས་དང་མཐར་ཐུག་ངེས་ལེགས་ཀྱི་ས་བོན་འདེབས་ཤིང་། གཞན་དོན་ལྷུར་ལེན་ནས་དངོས་བརྒྱུད་བར་གསུམ་དུ་ཅི་འགྲུབ་འབད་པ་ནི་སེམས་ཅན་དོན་བྱེད་པའི་ཚུལ་ཁྲིམས་དང་གསུམ་སྟེ་སྡོམ་པའི་ཚུལ་ཁྲིམས་ཀྱིས་ནི་སྒྲིབ་གཉིས་བག་ཆགས་དང་བཅས་པ་སྤང་བ་ཕུན་སུམ་ཚོགས་པར་བྱེད། དགེ་བ་ཆོས་སྡུད་ཀྱི་ཚུལ་ཁྲིམས་ཀྱིས་ཇི་ལྟ་ཇི་སྙེད་མཁྱེན་པས་རྟོགས་པ་ཕུན་སུམ་ཚོགས་པར་བྱེད། སེམས་ཅན་དོན་བྱེད་ཀྱི་ཚུལ་ཁྲིམས་ཀྱིས་གང་ལ་གང་འདུལ་གྱི་ཕྲིན་ལས་ཕུན་སུམ་ཚོགས་པར་བྱེད་པས་ལྷག་པར་ཤེས་དགོས། དེ་ནས་བཟོད་པ་ལའང་གསུམ་སྟེ། གཞན་གྱིས་རང་ལ་དངོས་སུ་རྡུང་རྡེག །འཕྲོག་བཅོམ་ཚིག་ངན་སྨྲ་བ་དང་། ལྐོག་ནས་མི་སྙན་པ་བརྗོད་པ་སོགས་ཀྱི་ཚེ་དེ་དག་ལ་ཞེ་སྡང་ཁོང་ཁྲོ་མི་བྱེད་པར་སླར་བྱམས་པ་དང་སྙིང་རྗེ་བསྐྱེད་པར་བྱ་བ་ནི་ལོག་སྒྲུབ་ཀྱི་བཟོད་པ་དང་གཅིག །དམ་པའི་ཆོས་སྒྲུབ་པའི་དུས་དཀའ་ཚེགས་ཚ་གྲང་བཀྲེས་སྐོམ་སོགས་ཅི་བྱུང་ཡང་ཆེད་དུ་བཟོད་ནས་བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུགས་གྲོགས་སྟོང་ལ་གཏད་དེ་ཆོས་སྒྲུབ་པ་ནི་ཆོས་ཕྱིར་དཀའ་སྤྱད་ཀྱི་བཟོད་པ་དང་གཉིས། ཆོས་དང་བླ་མ་གྲུབ་མཐའ་ཐམས་ཅད་ལ་ལོག་ལྟ་དང་ཕྱོགས་རིས་གཏན་ནས་མི་བྱ་བར་དག་སྣང་ཚད་མེད་པ་འབྱོངས་དགོས་པ་དང་། ཁྱད་པར་ཟབ་མོ་སྟོང་པ་ཉིད་ཀྱི་གནས་ལུགས་ལ་བློ་ཆུང་ཉན་ཐོས་ཀྱི་རིགས་ཅན་གྱིས་སྐྲག་ནས་སྤང་བ་ལྟར་མི་བྱ་བར་དགོངས་པ་ཕྱིན་ཅི་མ་ལོག་པར་རྟོགས་པའི་ཐབས་ལ་འབད་པར་བྱ་དགོས་པ་ནི་ཟབ་མོའི་དོན་ལ་མི་སྐྲག་པའི་བཟོད་པ་སྟེ། དགེ་བའི་ཚོགས་ནམ་ཡང་ཆུད་མི་ཟ་བར་ལམ་དུ་སློང་བ་དང་། ཞེ་སྡང་གི་འབྲས་བུ་དམྱལ་བར་མི་སྐྱེ་བ་སོགས་ཕན་ཡོན་ཆེ་བས་ལྷག་པར་ཤེས་པར་བྱ། དེ་ནས་བརྩོན་འགྲུས་ལའང་གསུམ་སྟེ། སངས་རྒྱས་བྱང་སེམས་དམ་པ་གོང་མ་རྣམས་ཀྱིས་དང་པོ་ཐོས་བསམ་སྒོམ་པས་རང་དོན་སྒྲུབ་པ་དང་། ཡོན་ཏན་མཐའ་ཡས་ཤིང་དཀའ་སྤྱད་སྙིང་སྟོབས་ཚད་མེད་པས། འཆད་རྩོད་རྩོམ་པའི་གཞན་དོན་རྒྱ་ཆེ་རྒྱུན་རིང་རླབས་ཆེན་མཛད་པའི་རྣམ་ཐར་མཐའ་ཡས་པ་རྣམས་ཐོས་རུང་སྤོབས་པ་ནི་མི་ཞུམ་ཞིང་སྒྱིད་མི་ལུག །རང་ལ་མི་བརྙས་པར་ད་རེས་དལ་རྟེན་ཕུན་སུམ་ཚོགས་པའི་གནས་སྐབས་འདིར་བདག་གིས་ཀྱང་དེ་ལྟར་བརྩོན་པར་བགྱིའོ་སྙམ་པའི་བློ་ལྷག་པར་བསྐྱེད་པ་ནི་གོ་ཆའི་བརྩོན་འགྲུས་དང་གཅིག །དེའང་སང་བྱ་གནངས་བྱེད་ཀྱི་ངང་ནས་མི་ཚེ་ཟད་མི་ཤོར་བར་མི་རྟག་པའི་བསྐུལ་མ་མྱུར་དུ་གདབ་སྟེ་ལེ་ལོ་དང་ཕྱི་བཤོལ་གྱི་དབང་དུ་སྐད་ཅིག་ཀྱང་མི་བཏང་བར་འཕྲལ་འཕྲལ་ཉིད་དུ་ཆོས་ལ་འཇུག་དགོས་པ་ནི་སྦྱོར་བའི་བརྩོན་འགྲུས་ཞེས་པ་དང་གཉིས། དེའང་མཚམས་དང་བསྙེན་སྒྲུབ་ཁ་བཏོན་དགེ་སྦྱོར་ཞག་དང་ཟླ་བ་ལོ་ཤས་ཙམ་ལ་སོགས་ཅུང་ཟད་འགྲུབ་པ་དང་རྟགས་མཚན་ཉམས་མྱོང་ཕྲན་བུ་ཕྱོགས་རེ་ཙམ་ལ་ཆོག་ཤེས་མི་བྱ་བར་ཚེ་དང་སྒྲུབ་པ་མཉམ་པའི་དམ་བཅའ་བླངས་ནས་རྫོགས་པའི་སངས་རྒྱས་ཀྱི་གོ་འཕང་མ་ཐོབ་བར་དུ་བརྩོན་འགྲུས་རྒྱུན་རིང་ལ་ཤུགས་དྲག་པ་ཆུ་བོའི་རྒྱུན་བཞིན་ཉིན་མཚན་བར་མེད་དུ་འབད་དགོས་པ་ནི་ཆོག་པར་མི་འཛིན་པའི་བརྩོན་འགྲུས་དང་གསུམ་སྟེ་ཕན་ཡོན་ཀྱང་འཇིག་རྟེན་ཀུན་གྱིས་མཆོད་ཅིང་བསྟོད་པ་དང་། རང་གི་བསམ་པ་མ་ལུས་པ་འགྲུབ་པ་དང་། ཡོན་ཏན་ཚོགས་རྣམས་ངང་གིས་འཕེལ་ཞིང་མྱུར་དུ་མྱ་ངན་ལས་འདས་པར་བྱེད་པས་ལྷག་པར་ཤེས་དགོས། དེ་ནས་བསམ་གཏན་ལའང་གསུམ་སྟེ། དེའང་འཇིག་རྟེན་འདིར་སྣང་གི་ཕ་མ་གཉེན་གྲོགས་དང་ཕུ་འབྲོག་པ་མདའ་ས་ཞིང་དགྲ་འདུལ་གཉེན་སྐྱོང་ཟས་གོས་དོན་གཉེར་འགྲོ་འདུག་བྱ་བཞག །འདུ་འཛིའི་གཡེང་བ་སོགས་ཐམས་ཅད་སྤངས་ནས། མི་མེད་ལུང་སྟོང་དུ་མི་ཚེ་བསྐྱེལ་ཏེ་གནས་དབེན་ས་རུ་འདུག །གྲོགས་རི་དྭགས་དང་འགྲོགས། གྱོང་ལྟོ་གོས་གཏམ་གསུམ་ལ་བསྐུར་ཏེ་དབེན་པའི་གནས་བརྟེན་ནས་ལུས་ངག་ཡིད་གསུམ་ཤིན་ཏུ་བག་ཕེབས་པའི་ངང་ནས་ལུས་གནད་དང་རླུང་གནད་ཡིད་ཀྱི་གནད་རྣམས་ལེགས་པར་གཅུན་ནས་བླ་མའི་རྣལ་འབྱོར་སོགས་སྒོམ་པ་གལ་གནད་ཆེ་བའི་རང་བཞིན་དུ་བྱས་ནས། དང་པོ་བདེ་གསལ་མི་རྟོག་པ་ལ་ཞེན་ཅིང་ཆགས་ནས་དེ་ལ་སྒོམ་པའི་དུས་ནི་བྱིས་པ་ཉེར་སྤྱོད་ཀྱི་བསམ་གཏན་ཞེས་པ་དང་གཅིག །དེ་ནས་ཉམས་ཀྱི་ཞེན་པ་དང་བྲལ་ནས་སྟོང་འཛིན་གཉེན་པོའི་ཕྱོགས་ལ་ཞེན་ནས་སྒོམ་པའི་དུས་དོན་རབ་འབྱེད་ཀྱི་བསམ་གཏན་ཞེས་པ་དང་གཉིས། དེའང་སྟོང་འཛིན་གཉེན་པོའི་བློ་དང་བྲལ་ཏེ་ཆོས་ཉིད་རྣམ་པར་མི་རྟོག་པའི་ངང་ལ་གནས་པ་ནི་དེ་བཞིན་གཤེགས་དགེའི་བསམ་གཏན་ཞེས་པ་དང་གསུམ་སྟེ། དེ་ལྟར་དབེན་པའི་གནས་བརྟེན་ལུས་ངག་བག་ཕེབས་ནས་སྒོམ་པའི་བསམ་གཏན་སོགས་ཀྱིས་འདོད་ཡོན་དང་ཉོན་མོངས་ཚོགས་རྣམས་མགོ་སྙོམས། སེམས་ལ་དབང་འབྱོར། སྤྱན་དང་མངོན་ཤེས་འཆར། རྫུ་འཕྲུལ་དུ་མ་འགྲུབ། ཉམས་རྟོགས་གོང་ནས་གོང་དུ་འཕེལ་ཏེ་བྱེ་བྲག་ཤེས་རབ་ལའང་གསུམ་སྟེ་མདོར་ན། ཐོས་པའི་ཤེས་རབ་ཀྱིས་ཕྱི་ཡི་སྒྲོ་འདོགས་རྣམས་ལེགས་པ་གཅོད་ཅིང་། བསམ་པའི་ཤེས་རབ་ཀྱིས་ནང་གི་ཐེ་ཚོམ་རྣམས་བཟློག་པ་དང་། སྒོམ་པའི་ཤེས་རབ་ཀྱིས་འཆད་རྩོད་རྩོམ་པ་གང་ལའང་ཐོགས་རྡུགས་མེད་པར་དགོངས་པའི་ཀློང་རྡོལ་ནས་རང་གཞན་གྱི་དོན་རྣམས་མངོན་དུ་གྱུར་ནས་ཤེས་རབ་ཀྱི་ཕ་རོལ་ཏུ་ཡོངས་སུ་ཕྱིན་པའི་དགོས་ཆེད་སོགས་དུ་མར་ཡོད་པས་ཚུལ་བཞིན་ཉམས་སུ་ལེན་པ་ལྷག་པར་གལ་ཆེ་ཞིང་། དེ་ལྟར་ཕར་ཕྱིན་དྲུག་ལྡན་གྱི་ལམ་ལ་གཞི་བཅོལ་ཏེ་ཆོས་སྒྲུབ་དགོས་པ་ཡིན་ཞིང་། དེ་དག་ཀྱང་བདེན་མེད་སྟོང་པའི་ཤེས་རབ་ཟབ་མོས་རྩིས་ཡོངས་སུ་ཟིན་པར་བྱེད་པ་ནི་གལ་གནད་ཆེ་བའི་ཆོས་སུ་ཤེས་པར་བྱ་དགོས། དེ་ལྟར་སྨོན་འཇུག་གི་སེམས་བསྐྱེད་ནས་བསླབ་བྱ་རྣམས་ཚུལ་དང་ལྡན་པའི་ཕན་ཡོན་ནི་མཐའ་ཡས་པར་གསུངས་ཏེ། ངལ་གསོ་ལས། སྐད་ཅིག་སྦྱོར་བས་ཁྱབ་པའི་སེམས་མཆོག་གིས། །བསྐལ་པ་མང་པོའི་ཚོགས་གཉིས་ཟླུམ་པར་གསུངས། །དེ་ལྟར་གྲངས་མེད་གསུམ་སོགས་གསུངས་པ་ཀུན། །མྱུར་དུ་རྫོགས་དང་རིང་དུ་རྫོགས་པ་དང་། །ཚེ་གཅིག་གྲོལ་བ་བློ་ཡི་སྟོབས་ལ་རག །དེ་ཡང་ཐབས་དང་ཤེས་རབ་བརྩོན་འགྲུས་མཆོག །གསུམ་གྱིས་བསྒྲུབས་ན་བླ་མེད་སྟོབས་ཆེའོ། །ཞེས་དང་། སྤྱོད་འཇུག་ལས། མི་ལྡོག་པ་ཡི་སེམས་འདིས་ནི། །སེམས་དེ་ཡང་དག་བླངས་གྱུར་ན། །དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པར་དུ་མ་ཞིག །ནམ་མཁའ་མཉམ་པ་རབ་འབྱུང་ངོ་། །ཞེས་དང་། ཡོན་ཏན་མཛོད་ལས། སྦྱིན་སོགས་ཕ་རོལ་ཕྱིན་པ་རྣམ་པ་ལྔས། །ངོ་བོ་ལུང་དུ་མ་བསྟན་ལྕགས་ཁམས་སུ། །རྣམ་པར་ཉམས་པ་ཐབས་ཤེས་གསེར་འགྱུར་རྩིས། །ཐེབས་པའི་མོད་ལ་རིན་ཐང་ཆེན་པོ་བྱེད། །ཅེས་དང་། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་ནས་མི་ཟད་འཕེལ་བར་འགྱུར། །ཞེས་དང་། སྡོང་པོ་བཀོད་པ་ལས། རིགས་ཀྱི་བུ་བྱང་ཆུབ་མཆོག་ཏུ་སེམས་བསྐྱེད་པ་གང་དང་ལྡན་པ་དེའི་ལུས་དང་ངག་དང་། སེམས་ཀྱིས་རྩོམ་པ་ཐམས་ཅད་དོན་ཡོད་པ་སྟེ། རྟག་ཏུ་དགེ་བ་འབའ་ཞིག་ཏུ་རོ་གཅིག་པར་འགྱུར་རོ། །ཞེས་གསུང་པ་ལྟར། མདོར་བསྡུ་ན། ཐེག་ཆེན་གྱི་རྩ་བ་སེམས་བསྐྱེད་དུ་འགྲོ་བ་དང་། དགེ་བ་སྣ་གཅིག་སྤྱོད་རུང་སངས་རྒྱས་ཀྱི་ཡོན་ཏན་སེམས་ཅན་གྱི་གྲངས་དང་མཉམ་ཞིང་། དགེ་རྩ་ནམ་ཡང་ཆུད་མི་ཟ་བར་གོང་ནས་གོང་དུ་འཕེལ་བ་དང་། བསོད་ནམས་རྒྱ་ཆེ་བ་ཐོབ་ཅིང་སངས་རྒྱས་ཀྱི་གདུང་འཛིན་པ་དང་གཞན་དོན་རླབས་པོ་ཆེ་འགྲུབ་པ་སོགས་དང་། མཚམས་མེད་ཀྱི་ལས་བསགས་ནས་དམྱལ་བར་སྐྱེས་རུང་དར་གྱི་ཕོ་ལོང་བརྡབ་པ་ཙམ་ལས་གནས་མི་དགོས་པ་དང་། གཞན་སྡིག་བྱས་ཐམས་ཅད་དུས་མཐའི་མེ་ལྕེས་རྩྭ་སྦུར་བསྲེགས་པ་ལྟར་འཇོམས་པ་དང་། འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་ཀྱི་རྩ་བའམ། ལམ་ཐམས་ཅད་ཀྱི་སྙིང་པོར་གྱུར་ནས་སེམས་ཅན་ཐམས་ཅད་ཀྱི་འདྲེན་པ་མཆོག་སྟེ་མྱུར་དུ་བླ་ན་མེད་པའི་ཁང་བཟང་དུ་བགྲོད་པའི་བཞོན་པ་བཟང་པོ་ལྟ་བུ་ཡིན་པ་སོགས་ཕན་ཡོན་ཚད་མེད་པས་ལྷག་པར་ཤེས་དགོས་སོ།། ༈ །།དེ་ནས་རྡོར་སེམས་སྒོམ་བཟླས་ཀྱི་རིམ་པ་ནི། དང་པོ་དཔལ་རྡོ་རྗེ་སེམས་དཔའི་མཚན་དོན་ནི། ལོངས་སྐུ་ནི་ངེས་པ་ལྔ་དང་ལྡན་པས་ན་དཔལ། དེ་ནི་འཕོ་འགྱུར་བགྲེས་རྒུད་གཞོམ་གཞིག་ལས་འདས་པས་ན་རྡོ་རྗེ། དེའི་ངང་ལས་སྤྲུལ་པ་སྣ་ཚོགས་འབྱུང་བས་ན་སེམས་དཔའ་ཞེས་བྱ་སྟེ། དེ་ནི་རིགས་ཐམས་ཅད་ཀྱི་བདག་པོ། དཀྱིལ་འཁོར་ཀུན་གྱི་གཙོ་བོ། རྒྱལ་བ་ཐམས་ཅད་ཀྱི་སྤྱི་གཟུགས་ཡིན་པར་བཤད་དེ། ལྷ་ཐམས་ཅད་ཞི་ཁྲོ་དམ་པ་རིགས་བརྒྱ་རུ་འདུས་པ་དང་། དེའང་རིགས་ལྔའི་ཁོངས་སུ་གཏོགས་པ་དང་། དེའང་གསང་ཆེན་གྱི་ལྷ་རིགས་ཀུན་ཁྱབ་བདག་དཔལ་ལྡན་རྡོ་རྗེ་སེམས་དཔའ་ལ་ཡོངས་སུ་འདུས་པའི་རང་བཞིན་ཅན་ཏེ། བཀྲ་ཤིས་རིག་པ་ཁུ་བྱུག་གི་རྒྱུད་ལས། ཆོས་སྐུ་རོ་གཅིག་འགྲོ་དོན་བྱེད་མཉམ་སྟེ། །མོས་པའི་བློ་ལ་སོ་སོ་ཉིད་དུ་སྣང་། །ཡེ་ཤེས་དབྱིངས་སུ་ཕྱག་རྒྱ་ཀུན་གཅིག་ཕྱིར། །བདེ་གཤེགས་གཅིག་སྒོམ་རྒྱལ་བ་ཀུན་གྱི་ངང་། །ཞེས་དང་། རྒྱུད་གསང་སྙིང་ལས། མཁའ་དཀྱིལ་དྭངས་པའི་དབྱིངས་ཉི་ཟླར། །ཡེ་ཤེས་རྒྱལ་པོ་སྟེང་དཀྱིལ་བསྒོམ། །རྒྱལ་བའི་དཀྱིལ་འཁོར་མ་ལུས་པ། །གང་ཟག་དེ་ཡིས་བསྒོམ་པར་འགྱུར། །ཞེས་གསུངས་པ་ལྟར་རིགས་ཀུན་རིགས་གཅིག་ཏུ་འདུས་པ་དང་། མ་ཟད་སྔོན་གྱི་ཐུགས་བསྐྱེད་པས་བདག་གི་མཚན་ཙམ་འཛིན་པ་ཐམས་ཅད་ཀྱི་སྡིག་ལྟུང་བྱང་བར་ཤོག་ཅེས་སྨོན་ལམ་བཏབ་པས་ཡོངས་སུ་འགྲུབ་ནས་སངས་རྒྱས་པ་ཡིན་པས་ན་ཕྱོགས་བཅུའི་སངས་རྒྱས་རེ་རེའི་མདུན་དུ་ཕྱིན་ནས་བཤགས་པའི་ཐབས་ལ་འབད་པ་བས། གོང་དུ་བཤད་པ་བཞིན་དཀྱིལ་འཁོར་ཐམས་ཅད་ཀྱི་སྤྲོ་དང་སྡུད་པའི་བྱེད་པོ་དཔལ་རྡོ་རྗེ་སེམས་དཔའ་བསྒོམས་ནས་བཤགས་པ་བྱེད་པ་འདི་ཉིད་འགྱུར་སྟོབས་ཆེ་སྟེ། དེའི་ངོ་བོ་ནི་ད་ལྟའི་རྩ་བའི་བླ་མ་ཉིད་ཡིན་པར་ཤེས་པས་བྱིན་རླབས་ལྷག་པར་འཇུག་མྱུར་བའི་དགོས་ཆེད་ཡོད་པ་སོགས་དག་བྱེད་རྒྱལ་བའི་ཡོན་ཏན་དེ་དང་དེའི་རང་བཞིན་དུ་ཤེས་པར་བྱས་ནས། དེ་ནས་དག་བྱ་རང་རྒྱུད་ཀྱི་ཉོན་མོངས་སྡིག་སྒྲིབ་རྣམས་ཕྱོགས་ཙམ་ངོས་བཟུང་བའི་ཕྱིར་དུ་མདོ་ཙམ་མ་བཤད་ན་རང་རེ་རྣམས་ཐོག་མ་མེད་པ་ནས་འཁྲུལ་བ་རྒྱ་འབྱམས་ཤིང་གཉེན་པོ་ཤུགས་ཆུང་སྡིག་ལ་འགྲོགས་ཡུན་རིང་བས་སྒྲིབ་པ་གཏིང་ཟབ་པའི་དབང་གིས་ལས་དང་པོ་པའི་སྐབས་སུ་ངོ་ཤེས་མཁན་དང་སྒྲིབ་སྦྱོང་བྱ་དགོས་དོན་ཙམ་ཧ་གོ་དཀའ་བ་ལྟ་བུར་མཐོང་བས། ངོས་ཙམ་མ་ཟིན་ན་ཅི་བཤགས། བླང་དོར་ཅི་བྱ། བླང་དོར་དང་བཤགས་པ་མ་བྱས་ན་ཉེས་ལྟུང་ཕ་མཐའ་ཡས་པ་རང་ཤུགས་ཀྱིས་འགོས་ཤག་རེད་པས་ན། དེ་ཕྱིར་སྦྱང་བྱ་སྡིག་པའི་སྒོ་དྲུག་ཅེས་པ་ནི། དང་པོ་ཀུན་སློང་གི་སྒོ་ནི་འདོད་ཆགས་དང་ཞེ་སྡང་དང་གཏི་མུག་གསུམ་གྱིས་ཀུན་ནས་བསླངས་པ་དང་། གཉིས་པ་རྟེན་གྱི་སྒོ་ནི་ལུས་ངག་ཡིད་གསུམ་གྱི་སྒོ་ནས་ལས་བསགས་པ་དང་། གསུམ་པ་ཡུལ་གྱི་སྒོ་ནི་བླ་མ་དང་མཁན་པོ་མཆེད་གྲོགས་སོགས་ཡུལ་ཁྱད་པར་ཅན་དང་། ཕ་མ་རྒན་ཁོག་དང་། ཡུན་རིང་གི་ནད་པ། ཐག་རིང་གི་ཨར་སྐྱོ་སོགས་དམན་པ། བཞི་པ་ངོ་བོའི་སྒོ་ནི་མི་དགེ་བཅུ་དང་། མཚམས་མེད་ལྔ་སོགས་དང་བཅས་པའི་ལྟུང་བ་སྡོམ་པ་གསུམ་དང་འགལ་བའི་རིགས་དང་། ལྔ་པ་དུས་ཀྱི་སྒོ་ནི་འཁོར་བ་ཐོག་མ་མེད་པ་ནས་ཉི་མ་དེང་གི་བར་དུ་ལོ་ཟླ། ཉི་མ་དུས་ཚོད་དེ་དག་དང་། དྲུག་པ་བྱེད་ལས་ཀྱི་སྒོ་ནི་ཚེ་འདིར་ནད་མང་། ནོར་དབུལ་དགྲས་འཇིག་པ་སོགས་དང་། ཕྱི་མ་ངན་འགྲོ་མུ་མཐའ་མེད་པའི་རྒྱུར་གྱུར་པ་སོགས་ཀྱི་སྒོ་ནས་བཤགས་དགོས་ཤིང་། དེའང་ཅུང་ཟད་སྤྲོ་ན། རང་རེ་རྣམས་ཚེ་རབས་ཐོག་མ་མེད་པ་ནས་དེང་གི་ཕན་ཆད་སྤྱིར་མ་རིག་པས་བསྒྲིབས། སྒོས་ཉོན་མོངས་ཤུགས་དྲག་པོ་གསུམ་གྱིས་ཀུན་ནས་བསླངས་པས། ལས་མི་དགེ་བ་བཅུ། མཚམས་མེད་ལྔ། ཉེ་བ་ལྔ། ལྕི་བ་བཞི། ལོག་པ་བརྒྱད་ལ་སོགས་པ་རང་གིས་སྤྱོད་པའམ། གཞན་ལ་བྱེད་དུ་འཇུག་པའམ། བྱེད་པ་ལ་རྗེས་སུ་ཡི་རངས་སྐྱེས་པ་ཚུན་ཆད་དང་། ཐ་ན་ལག་གིས་ལས་དང་འགྲོ་འདུག་བབ་ཅོལ་དུ་བྱས་པ་དང་། ཟས་གོས་ལ་རྒྱུན་ཆད་མེད་པ་ལོངས་སྤྱོད་པ་དང་། གཉིད་དུ་ཡོལ་བའི་སྐབས་འཁྲུལ་སྣང་དྲག་པོ་སྣ་ཚོགས་དང་། ངག་གི་དོན་ཡོད་ལ་མེད་ཆགས་སྡང་བར་མ་དོའི་གཏམ་ལབ་པ་དང་། ཡིད་ཀྱི་དྲན་འཁྲུལ་ཆེ་ཞིང་ཆེ་བ་ཕྲ་ཞིང་ཕྲ་བ་སོགས་ངོས་ཕྱོགས་ཙམ་ཟིན་ལ་མི་ཟིན་ལ་སྡིག་པ་མི་དགེ་བའི་ལས་གྲངས་མེད་པ་ཞིག་ད་ལྟ་ཉིན་ཞག་རེའི་ཁོངས་སུ་ཆུའི་གཉེར་མ་བཞིན་བསགས་དང་གསོག་བཞིན་པ་འདི་ལྟར་དུ་སྐྱེ་འཆི་ཁོར་མོ་ཡུག་ཏུ་སྡུག་བསྔལ་བར་མ་ཆད་པར་བསྐལ་པ་ཡེ་གདོད་མ་ནས་ད་ལྟའི་བར་སྐད་ཅིག་ཀྱང་དལ་ཁོམ་མེད་པར་སྡིག་པའི་ཡོ་ལང་འཁྲུགས་པ་ཁོ་ན་ལ་ལོངས་སྤྱོད་བཞིན་དེ་དག་ལ་བཤགས་པའི་གཉེན་པོ་གཞི་ནས་མེད་པས་དགེ་བ་སྟོབས་ཤུགས་ཆུང་བ་དང་། དེ་བཞིན་སྡིག་ལྟུང་གི་རིམ་པ་ཆེས་ཆེར་འཕེལ་ནས་ཞག་ཟླ་ལོ་གྲངས་ཀྱི་སྐྱེ་བ་ཚེ་རབས་དུ་མར་སོང་བའི་ཉེས་ལྟུང་ནི་ཕ་མཐའ་ཡས་པ་ཞིག་ཡོད་པའི་རང་བཞིན་ནི་གཞིར་བཅས་མངོན་སུམ་དུ་གྲུབ་འདུག་མོད། རུ་ཏྲའི་སྨྲེ་བཤགས་ལས། གདོས་བཅས་ལུས་བླང་གྲངས་མེད་གཤེགས་གྱུར་ཀྱང་། །ཤ་རུས་བསགས་ན་འཇིག་རྟེན་གཏོས་དང་མཉམ། །རྣག་ཁྲག་བསགས་ན་རྒྱ་མཚོ་ཆེན་པོ་ཙམ། །ལས་འཕྲོ་བསགས་ན་བསམ་འདས་བརྗོད་མི་ལང་། །ཞེས་པ་ལྟར་ཡིན་པས། དེས་ན་གང་ཟག་རབ་འབྲིང་ཐ་མ་གསུམ་ཀས། ད་ལྟ་ཐབས་རྣམས་དང་ལྡན་རང་དབང་ཡོད་དུས་འདིར། བཤགས་པས་སོར་ཆུད་ངེས་རེ་མཛད་པ་ཅི་ནས་གལ་ཆེ་བའི་རང་བཞིན་དང་། ཁྱད་པར་དུའང་རང་རེ་བླ་མ་གྲྭ་པ་ཆོས་པ་རྣམས་ཆོས་ཀྱི་སྒོར་ཡོངས་སུ་ཞུགས་ཀྱང་། ཕྱི་སོ་ཐར་གྱི་སྡོམ་པ། ནང་བྱང་སེམས་ཀྱི་བསླབ་པ། གསང་བ་གསང་སྔགས་ཀྱི་དམ་ཚིག་མཐའ་ཡས་པ་ལས། སྤང་བླང་གི་རིམ་པའི་ཆ་རྒྱས་འབྲིང་བསྡུས་ཙམ་གང་ཡིན་ཡང་རུང་ཚིག་ཙམ་མི་ངེས་པར་ཅི་ཡིན་གང་ཡོད་ཅི་འདྲ་བྱ་དགོས་ཕྱོགས་ཙམ་མི་ཤེས་པར་ཉིན་རེའི་ཁོང་ན་མི་དགེ་བཅུ་པོ་ཆ་ཚང་རེ་གསོག་བཞིན་པ་དང་། བྱེ་བྲག་ཏུ་ས་དགེ་རྙིང་མ་ཀར་འབྲུག་སོགས་ཀྱི་བསྟན་པ་སྤྱི་དར་ཆེ་བའི་དབང་གིས་དེང་སང་ཆུང་བྱིས་པ་ནས་རྒན་རབས་ཕལ་པ་རྣམས་དང་བླ་མ་གྲྭ་པ་ཆོས་པ་སོགས་ལ་དབང་དང་སྡོམ་པ། སྐྱབས་འགྲོ་དང་སེམས་བསྐྱེད། ཁྲིད་ལུང་སོགས་ལན་གྲངས་ཐོབ་མཁན་མང་བ་དང་ཆོས་འབྲེལ་སྣ་རེ་མ་ཐོབ་པ་མེད་པ་ལྟ་བུར་འདུག་རུང་། དོན་དུ་དབང་སྲོག་དམ་ཚིག་དང་། སྐྱབས་སེམས་ཀྱི་དོན་དང་བསླབ་བྱ། ཁྲིད་ལུང་ཐོབ་པའི་སྒོམ་ཉམས་ལེན་བྱ་དགོས་སྙམ་པའི་ཆགས་འཇོག་ཙམ་མི་བྱེད་པ་དང་། སེམས་བསྐྱེད་དང་། བསྐྱེད་རྫོགས་མི་ལྡན་པ་དང་། ཆོ་ག་ཆད་ལྷག་སོགས་སོང་བ་དང་། བླ་མ་རྣམས་ལ་གཤིན་པོའི་རྣམ་ཤེས་ཀྱི་ཁག་འཁྲི་བ་དང་། གྲྭ་པ་རྣམས་ལ་གསོན་པོའི་སྐུ་རིམ་གྱི་ཁག་འཁྲི་བ་དང་། གྲྭ་པའི་དཀོར་ནོར་རྣམས་ཁྱིམ་པ་ལ་ཁག་འཁྲི་བ་དང་། གཞན་ཡང་བཟོ་ཤེས་རིག་ལ་མཁས་པ་རྣམས་ཀྱང་། ལྷ་བཟོ་བྲིས་པ་སོགས་ཀྱི་བྲིས་བཞིན་མི་ལེགས་པ་དང་ཆད་ལྷག་བྲིས་ཤིང་། གཡོ་ལས་བྱེད་པ་དང་། སྔགས་པ་རྣམས་ཀྱིས་རྩིས་གཏོ་མདོས་སོགས་ཀུན་སློང་དང་བསྐྱེད་རྫོགས་མི་ལྡན་པའི་ཉེས་པ་དང་། སྨན་པས་སྨན་ལོག་པར་འཆོལ་བ་དང་། དེ་དག་གིས་ནི་དོན་དུ་གླ་ཡོན་ཟས་ལ་རྔམ་པ་གཙོ་བོར་འཛིན་ནས་ཕལ་པའི་ཉོ་ཚོང་བྱེད་པ་ལྟ་བུ་ལས། ལྷག་བསམ་དང་སེམས་བསྐྱེད་བཟང་པོ་ནི་ཕལ་ཆེས་ཅུང་མི་འབྱོངས་པ་དང་། མ་ཟད་མི་རུང་བའི་འདོད་ཞེན། རེ་འཁོན་ཆགས་སྡང་། ང་རྒྱལ་ཕྲག་དོག་སོགས་མི་དགེ་བའི་ལས་ངན་ཤུགས་ཀྱིས་གསོག་པ་ཐམས་ཅད་ཉེས་པའི་རང་བཞིན་དེ་ཁོ་ན་ལས་མ་འདས་པའི་ཚུལ་ཁྲིད་ཡིག་རྣམས་སུ་རྒྱས་ཤིང་རྒྱས་པ་ཕྲ་ཞིང་ཕྲ་བ་དུ་མར་གསུངས་འདུག་པ་དེ་ལྟར་རང་ཐོག་ཏུ་དཔེ་བླང་ནའང་གསུང་ཟབ་མོ་གནད་དུ་ཁེལ་བ་ཁོ་ན་བྱུང་བས་ཁྱེད་སྐྱ་སེར་ཕོ་མོ་ཐམས་ཅད་ཀྱིས་ཀྱང་ཉམས་ཕབ་ནས་དཔྱད་པ་ཁ་བསྐོར་ཏེ་ཤེས་མི་ཤེས་དབང་གིས་སྡིག་པ་བསགས་ཤོར་ཚད་གནོང་འགྱོད་དྲག་པོས་བཤགས་ཤིང་སོར་ཡོངས་སུ་ཆུད་པར་མཛད་དགོས་པ་ཡིན་མ་གཏོགས། ཉེས་ལྟུང་བསགས་པའི་སྡིག་སྒྲིབ་བག་ཆགས་ཀྱི་དྲི་མ་མཐུག་པོས་རང་རེ་རྣམས་དུས་དང་རྣམ་པ་ཀུན་ཏུ་གཡོགས་ནས་སྒྲིབ་བསྡད་ཡོད་པ་ནི་ད་ལྟའི་ཉིན་མཚན་གཅིག་གི་དགེ་སྡིག་གི་ལས་ཤས་ཆེ་ཆུང་དང་ཆོས་ལ་མོས་པ་སྐྱེས་དཀའ་བ་དང་འགྲུབ་དཀའ་བ་སོགས་ཀྱི་ཤུགས་ཀྱིས་མངོན་ཞིང་། དཔེར་ན་མེ་ལོང་ཞིག་ཡིན་རུང་བདག་ཏུ་མ་བཟུང་བའི་ལན་གྱིས། བཙའ་གཡའི་སྐྱོན་ཆེན་གྱིས་བཟུང་ཡུན་རིང་བ་ལྟ་བུར་ཡིན་ཞིང་། ད་རེས་བདག་ཏུ་བཟུང་སྟེ་དགེ་སྡིག་གི་སྐྱོན་ཡོན་ཕྱོགས་ཙམ་ཤེས་ནས་དེ་ལ་དོན་དམ་ཡེ་ཤེས་ཀྱི་གཟུགས་བརྙན་ཡོད་པ་བཞིན་དུ་འཆར་བར་རྩོམ་པ་ན་སྒྲིབ་སྦྱོང་དང་ཚོགས་བསགས་ཀྱི་རིམ་པས་བྱི་དོར་ལེགས་པར་བྱེད་པ་རང་ལས་ཐབས་གཞན་ནི་ཅི་ཡང་མ་མཆིས་ཏེ། ཨོ་རྒྱན་རིན་པོ་ཆེས། བྱིན་རླབས་དངོས་གྲུབ་ཀུན་གྱི་བགེགས། །སྒྲིབ་པ་རྣམ་གཉིས་ཡིན་པའི་ཕྱིར། །དེ་དག་རབ་ཏུ་སྦྱང་བར་གཅེས། །ཞེས་གསུངས་པ་ལྟར་དུ་དཔེར་ན་ཕྱི་མཛེས་ནང་རུལ་ཤིང་ཐོག་ཀུན་མན་ད་དང་མཚུངས་པའམ། མཛེ་ཅན་འབུས་གཡེངས་ལ་ཕྱི་ནས་གོས་རྒྱན་གྱིས་སྤྲས་པ་ལྟར་རམ། སྡིག་བྱས་ཀྱི་ལས་རྣམས་ནི་བཙན་དུག་ཧ་ལ་ནག་པོ་ཁོང་དུ་ཤོར་བ་ལས་ཀྱང་བརྒྱ་འགྱུར་གྱི་མཐུ་ཆེ་སྟེ། དེས་ན་ད་ལྟའི་སྐབས་འདིར་ལུས་ན་བ་དང་འཆི་རྐྱེན་བྱེད་པ་ཙམ་ལས། ཚེ་རབས་ཀུན་ཏུ་སྡུག་བསྔལ་ལ་སྦྱོར་བར་ག་ལ་ནུས་ཏེ། ལས་ངན་མི་དགེ་བས་ནི་ཚེ་འདིར་མི་བདེ་བར་རྐྱེན་ངན་རྣམ་པ་སྣ་ཚོགས་འབྱུང་བ་དང་། ཕྱི་མར་བར་དོའི་འཁྲུལ་སྣང་གི་མཚམས་སྦྱར་ནས་ངན་སོང་གི་གནས་སུ་སྐྱེ་ནས་སྡུག་བསྔལ་བཟོད་དཀའ་བ། ཤུགས་དྲག་པ། རྒྱ་ཆེ་བ། ཡུན་རིང་བ། མཐོང་མི་མངོན་པར་འབའ་ཞིག་གིས་མནར་ནས་ཚེ་རབས་ཐམས་ཅད་དུ་འཁོར་བའི་གནས་ལས་ནམ་ཡང་མི་ཐར་བ་བྱེད་པས་ཤིན་ཏུ་ནས་ཀྱང་ཕུང་ཚབ་ཆེ་བའི་རང་བཞིན་ཏེ། དེ་དག་སྐྱོན་མེད་ལྟ་བུར་འཇོག་ག་ལ་རུང་སྟེ་སྨན་དུ་རེ་ནས་དུག་ཟས་ནོར་བ་དང་འདྲ་བར་དེ་ཚུག་ནས་བསྐྱུར་བཏང་བ་བཞིན། གནོང་འགྱོད་དྲགས་པོས་སྡིག་སྒྲིབ་ལྷག་མེད་དུ་སྦྱང་བ་རབ་ལ་འབད་པ་ཅི་ནས་གལ་ཆེ་བ་ཡིན། དེ་ལྟར་སྦྱོང་བ་ལ་སྤྱིར་རྒྱལ་བ་རྣམས་ཐབས་མཁས་ལ་ཐུགས་རྗེ་ཆེ་བས་གང་ཟག་རྣམས་ཀྱི་བློ་རིམ་དང་བསྟུན་ཏེ་སྒྲིབ་སྦྱོང་གི་རྣམ་གྲངས་ས་གཞིའི་རྩི་ཤིང་དང་ནམ་མཁའི་སྐར་ཚོགས་ལྟ་བུ་དཔག་མེད་གསུངས་པའི་ནང་ཚན་སྙིང་པོ་མཆོག་ཏུ་གྱུར་པ་ནི། རང་ལུགས་གསང་ཆེན་གྱི་ལྷ་རིགས་རྣམས་ཀུན་འདུས་བླ་མ་རྡོ་རྗེ་སེམས་དཔའི་སྒོམ་བཟླས་འདི་ཉིད་རང་ཡིན་ཏེ། དགོངས་པ་ཚིག་གསུམ་གྱི་རྒྱུད་ལས། རྡོ་རྗེ་སེམས་དཔའ་བསྒོམས་ནས་ནི། །སྔགས་ཀྱང་རབ་ཏུ་བཟླ་བྱེད་པ། །དེ་ཡིས་སྡིག་སྒྲིབ་ཀུན་བྱང་ནས། །རྡོ་རྗེ་སེམས་དཔའ་འདྲ་བར་འགྱུར། །ཞེས་དང་། སྙིང་པོ་རྒྱན་ལས། པད་དཀར་ཟླ་བའི་གདན་སྟེང་དུ། །རྡོ་རྗེ་སེམས་དཔའ་ལེགས་དམིགས་ནས། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་རེ་བཟླས་གྱུར་ན། །ལྟུང་སོགས་བྱིན་གྱིས་བརླབ་པར་གྱུར། །འབུམ་ཕྲག་གཅིག་ཏུ་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་དང་། ལས་རྣམ་འབྱེད་ལས། ཤིན་ཏུ་མི་བཟད་ལས་རྣམས་བྱས་པ་ཡང་། །ཁྱེད་ལ་གསོལ་བ་བཏབ་པས་བསྲབ་པར་འགྱུར། །རབ་ཏུ་བཤགས་ན་ཉེས་བྱས་ཐམས་ཅད་ཀུན། །ཤིན་ཏུ་རྩ་བ་ནས་ནི་བཏོན་པ་བཞིན། །ཞེས་དང་། སྤྱོད་འཇུག་ལས། སྡིག་པ་ཤིན་ཏུ་མི་བཟད་བྱས་ན་ཡང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བརྟེན་ནས་ཡུད་ཀྱིས་གྲོལ་འགྱུར་བ། །དེ་ལ་བག་ཅན་རྣམས་ཀྱིས་ཅིས་མི་བརྟེན། །ཞེས་གསུངས་པ་ལྟར་དུ་ཡིད་ཁྱེད་ཤེས་ཀྱིས་ངེས་ཤེས་ལྷག་པར་བསྐྱེད་པ་སྔོན་དུ་སོང་ནས། ཉམས་ལེན་དངོས་གཞིའི་སྐབས་སུ་གཉེན་པོ་སྟོབས་བཞི་ཚང་བའི་སྒོ་ནས་ངེས་པར་བཤགས་པའི་ཐབས་ལ་འབད་དགོས་པ་ཡིན་གྱི། དེ་ཡང་ལས་གཞུང་གི་ངག་འདོན་གང་ཡིན་པ་རྣམས་དང་རིམ་པར་འགྲེལ་ཞིང་མདོར་བསྡུ་ན་འདི་ལྟ་སྟེ། དང་པོ་དཀོན་མཆོག་གསུམ་གྱི་རྟེན་ལ་བརྟེན་པས་སྡིག་པ་ཟད་ཅིང་བསྲབ་པར་བྱེད་པས་ན་རྟེན་གྱི་སྟོབས་ཞེས་བྱ་སྟེ། དེས་ན་རང་གི་སྤྱི་བོར་མདའ་གང་གི་སྡོང་པོའི་སྟེང་ན་པད་དཀར་འདབ་སྟོང་བཞད་པའི་ཟེའུ་འབྲུ་དམར་སེར་ཚད་དང་ལྡན་པའི་དབུས་སུ་ཟླ་བའི་དཀྱིལ་འཁོར་ཉ་གང་བའི་སྟེང་ན་ཧཱུྃ་ཡིག་དཀར་པོ་འོད་ཟེར་འབར་བ་ཅན་གནས་འགྱུར་བའི་ཚུལ་དུ་ངོ་བོ་ནི་མཁྱེན་བརྩེ་ནུས་གསུམ་གྱི་རང་བཞིན་རྩ་བའི་བླ་མ་ཡིན་པ་ལ། རྣམ་པ་ནི་བཅོམ་ལྡན་འདས་རྡོ་རྗེ་སེམས་དཔའ་ཉིད་གསལ་བཏབ་དགོས་ཤིང་། དེའང་ཅུང་ཟད་སྤྲོས་ན། ཉེས་པའི་སྐྱོན་གྱིས་མ་གོས་པར་མེ་ལོང་ལྟ་བུའི་ཡེ་ཤེས་ཀྱི་སྐུ་ཡིན་པའི་ཕྱིར་སྐུ་མདོག་དཀར་གསལ་དྲི་མ་མེད་པ་གངས་རིའི་ལྷུན་པོ་ལ་ཟླ་གཞོན་བྱེ་བས་འཁྱུད་པ་ལྟ་བུར་གཟི་འོད་རབ་ཏུ་འབར་བ། དེ་ཡང་ཆོས་སྐུ་ཐིག་ལེ་ཉག་གཅིག་གི་བརྡར་ཞལ་གཅིག་པ། ཐབས་དང་ཤེས་རབ་ཀྱི་མཚོན་བྱེད་ཕྱག་གཉིས་སྟེ། ཕྱག་གཡས་པ་ཐབས་རིག་སྟོང་གི་རྡོ་རྗེ་ཐུགས་ཀར་འཛིན་པ། གཡོན་ཤེས་རབ་སྣང་སྟོང་གི་དྲིལ་བུ་དཀུར་བརྟེན་ཅིང་། སྲིད་ཞིའི་མཐའ་ལ་མི་གནས་པའི་བརྡར་ཞབས་གཉིས་རྡོ་རྗེ་སྐྱིལ་ཀྲུང་། དབུ་སྐྲ་ཟུར་ཕུད་བཅིངས་པ་ནི་རིགས་ཐམས་ཅད་ཀྱི་འགྲན་ཟླ་དང་བྲལ་བའི་བརྡ། གདུལ་བྱའི་ཉོན་མོངས་པའི་གདུང་བ་སེལ་བའི་བརྡར། སྐུ་ལ་ལྷ་རྫས་ལས་གྲུབ་པའི་དར་གྱི་ཆས་གོས་ལའང་དར་མཐིང་ཁྲའི་ཟི་ལྡིར་དབུ་རྒྱབ་ནས་འཕྱང་བ་དང་གཅིག །སྙན་གོང་ནས་དར་དཔྱངས་སྣ་ལྔ་འཕྱར་བ་ཕྱག་དཔུང་གཡས་གཡོན་ནས་འཁྱུད་དེ་སྣེ་མོ་ཅུང་ཟད་ཡར་འཁྱིལ་བ་དང་གཉིས། གར་གྱི་སྟོད་ཐུང་དཀར་པོ་དཔུང་པའི་ཕྱེད་ཙམ་དུ་སླེབ་པ་དང་གསུམ། དེ་སྟེང་སྟོད་ལེ་སྔོན་པོ་ལ་ལྗང་གུས་སྦབ་ལེ་ཕྱེད་པ་དང་བཞི། ཚིག་གུ་ཞེས་ཁ་དོག་སྣ་ཚོགས་པའི་སྨད་དཀྲིས་དང་ལྔ་ཡིན་ཞིང་། དེ་བཞིན་འདོད་ཡོན་མ་སྤངས་རྒྱན་དུ་རྫོགས་པས་འགྲོ་བའི་རེ་བ་སྐོང་བའི་བརྡར་རིན་པོ་ཆེའི་རྒྱན་བརྒྱད་ནི། རིན་པོ་ཆེའི་དབུ་རྒྱན་ཟེ་སྲོག་ཁང་པ་ནོར་བུའི་རྩེ་ཕྲན་འབར་བ་ཅན་དང་གཅིག །སྙན་རྒྱན་གཉིས་རིན་པོ་ཆེའི་གཞི་བྱས་པ་ལ་ནོར་བུའི་ཕྲ་ཚོམ་བཀྲ་བ་དང་གཉིས། རིན་པོ་ཆེ་སྣ་ཚོགས་སྤེལ་མར་བརྒྱུས་པའི་མགུལ་རྒྱན་ཐུང་ངུ་དང་གསུམ། རྒྱུ་དེ་དང་མཚུངས་པའི་ནུ་སྟེང་དུ་སླེབ་པ་སེ་མོ་དོ་དང་བཞི། ཡང་དེ་བས་རིང་ཙམ་ལྟེ་འོག་སླེབ་པའི་དོ་ཤལ་དང་ལྔ། དཔུང་རྒྱན་དང་ཕྱག་གདུབ་སོར་གདུབ་གཡས་གཡོན་རྣམས་ཆབས་ཅིག་ཏུ་རྩིས་པ་དང་དྲུག །ཞབས་ཀྱི་གདུབ་བུ་དང་བཅས་རྒྱུ་དང་བཟོ་དབྱིབས་བཀོད་པ་ཕྱོགས་མཚུངས་པ་དང་བདུན། དེ་བཞིན་སྐ་རགས་རིན་པོ་ཆེའི་ཕྲ་ཚོམ་གྱིས་བརྒྱན་པ་དྲ་བ་དང་དྲྭ་བ་ཕྱེད་པའི་མཛེས་པ་སྤྲས་པ་བརྒྱད་དང་ལྡན་པ་སྟེ་ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་ཞེས་པ་དེ་ལྟར་ཡིན། དེའང་སྤྲོས་པ་དང་མཛེས་ཆོས་ཏེ་རྒྱན་རང་ག་མ་ལྟ་བུ་མ་ཡིན་པར་ནང་གི་ཡོན་ཏན་རྣམས་ཕྱི་རོལ་དུ་མངོན་པར་འཆར་བ་སྟེ་དཔེར་ན་སྨན་གྱི་ཁ་བྱང་འདོགས་པ་ལྟ་བུར་ཤེས་པར་བྱེད་པ་ལས། ནང་གི་ཡོན་ཏན་རྣམས་མི་ཤེས་པར་ཕྱིའི་གཟུགས་བརྙན་ཙམ་སྒོམ་ལོ་བྱས་ན་དཔེར་ན་སྐུ་འདྲ་ནང་གཞུག་མེད་པ་དང་འདྲ་བས། དེས་ན་རྒྱན་ཆས་སྐུ་མདོག་ཞལ་ཕྱག་གར་སྟབས་སོགས་བརྡའ་དོན་རྟགས་ཀྱིས་རྩིས་ཡོངས་སུ་ཟིན་པ་གལ་ཆེ་བའི་རང་བཞིན་དང་། དེ་ལྟར་ཐབས་ཤེས་དབྱེར་མེད་ཀྱི་བརྡར་ཡུམ་སྙེམས་མ་དཀར་མོས་ཕྱག་གཡས་གྲི་གུག་འཛིན་པས་མགུལ་ནས་འཁྱུད་པ་གཡོན་ཐོད་པ་བདུད་རྩིས་གང་བར་བསྣམས་པ་ཞབས་གཉིས་པདྨའི་སྐྱིལ་ཀྲུང་གིས་གཉིས་མེད་དུ་འཁྲིལ་ནས་བཞུགས་པར་གསལ། དེ་དག་ཀྱང་སྣང་ལ་རང་བཞིན་མ་གྲུབ་པ་ཆུ་ཟླ་ལྟ་བུ་ཡེ་ཤེས་ཀྱི་སྐུ་མངོན་སུམ་རང་བཞིན་དུ་གྲུབ་པ། རིགས་དང་དཀྱིལ་འཁོར་རྒྱ་མཚོའི་སྤྱི་དཔལ་བླ་ན་མེད་པ་ཆེན་པོར་བཞུགས་པའི་སྤྱན་སྔར་དུ། མི་དགེ་བ་ལ་འགྱོད་པ་མང་བས་ན་རྣམ་པ་སུན་འབྱིན་པའི་སྟོབས་ཞེས་བྱ་སྟེ། དེས་ན་རང་གཞན་སེམས་ཅན་ཐམས་ཅད་ཀྱི་ཚེ་རབས་ཐོག་མ་མེད་པ་ནས་བཟུང་སྟེ་དེང་གི་ཕན་ཆོད་རྒྱུ་དུག་གསུམ་དུག་ལྔས་བསྐྱེད་པའི་ལུས་ངག་ཡིད་གསུམ་གྱི་སྒོ་ནས་ལས་མི་དགེ་བའི་རིགས་རྣམས་མདོར་ན་སྡོམ་པ་གསུམ་གྱི་གནས་ལ་འགལ་ཉམས་འདས་རལ་དུ་གྱུར་པ་ཤེས་དང་མི་ཤེས་ཅི་མཆིས་པ་ཐམས་ཅད་ངོ་ཚ་དང་འཇིགས་སྐྲག་གནོང་འགྱོད་དྲག་པོས་སྙིང་ནས་བཤགས་པར་བྱ་ན༑ དུས་ད་ལྟ་མྱུར་བ་ཉིད། འདུག་ས་འདི་དང་རྟེན་འདི་ཐོག་ཏུ་བྱང་ཞིང་དག་པའི་ཐུགས་རྗེ་རེ་མ་ཆུང་སྙམ་ནས་གསོལ་བ་དྲག་ཏུ་ཡང་ཡང་འདེབས་དགོས་པ་ཡིན། དེ་ནས་སླར་སྡོམ་པ་བླངས་ནས་སྡིག་པ་མི་བྱེད་པས་ན་སྡོམ་པའི་སྟོབས་ཞེས་བྱ་སྟེ་སྔོན་ཆད་བདག་མི་ཤེས་རྨོངས་པའི་དབང་དུ་གྱུར་པས་ལས་ངན་ཚབ་ཆེན་དེ་དག་རྣམས་བསགས་ཤོར་བ་རེད། ད་ནི་བླ་མའི་བཀའ་དྲིན་ལ་བརྟེན་པས་སྤང་བླང་གི་གནད་རྣམས་ཚུལ་བཞིན་ཤེས་ནས་བཟུང་སྟེ་ཤེས་བཞིན་དུ་དུག་འཐུང་བ་དང་། མཐོང་བཞིན་དུ་གཡང་ལ་མི་མཆོང་བར་ལུས་དང་སྲོག་ལ་ཐུག་ཀྱང་། སྡིག་པའི་ལས་ཆེ་ཕྲ་ཀུན་གཏན་ནས་མི་བགྱིད་པའི་རྒྱལ་བ་ཁྱེད་ཀྱི་སྤྱན་སྔར་དེང་འདིར་དམ་བཅའ་དྲག་པོ་ངེས་པར་ཕུལ་དགོས་པ་ཡིན་ཞིང་། ངག་འདོན་གྱི་འདོད་གསོལ་ཀྱང་དེ་ལྟར་འགྲེལ་བར་བྱ། དེ་ནས་དགེ་བའི་ལས་ལ་བརྩོན་པས་ན་གཉེན་པོ་ཀུན་ཏུ་སྤྱོད་པའི་སྟོབས་ཞེས་པ་ཏེ། རྡོར་སེམས་ཡབ་ཡུམ་གཉིས་མེད་ཀྱི་ཐུགས་ཀར་ཟླ་དཀྱིལ་སྲན་མ་ཕྱེད་པའི་ཚད་ཀྱི་སྟེང་དུ་ཧཱུྃ་ཡིག་དཀར་པོ་སྤུས་བྲིས་པ་ལྟ་བུའི་མཐར་ཡིག་བརྒྱའི་སྔགས་འཁོར་རིམ་པ་ཕྱེད་གསུམ་དུ་བཀོད་པར་དམིགས་ནས་མ་ཡེངས་པར་གསོལ་འདེབས་ཀྱི་ཚུལ་དུ་རྩེ་གཅིག་བཟླས་པའི་རྐྱེན་གྱིས་ཐུགས་སྲོག་ཡིག་འབྲུ་རྣམས་ལས་ཐུགས་རྗེ་ཡེ་ཤེས་ཀྱི་ངོ་བོར་རྣམ་པ་བདུད་རྩི་དཀར་པོ་དངུལ་ཆུ་འདྲིལ་བ་ལྟར་ཆེས་ཆེར་བབ་ནས་སྐུ་ཡི་དབྱིབས་བརྒྱུད་རིམ་པར་སྦྱོར་མཚམས་ནས་ཐོན་ཏེ་རང་གཞན་སེམས་ཅན་ཐམས་ཅད་ཀྱི་སྤྱི་བོ་ནས་ཞུགས་པའི་སྟོབས་ཀྱིས་ངོ་བོ་ནི་ལུས་ནང་གི་ནད་ཐམས་ཅད་དེ་རྣམ་པ་ནི་རྣག་ཁྲག་དང་རླངས་པ་སྤྲིན་པའི་ཚོགས་དང་། ངོ་བོ་ནི་གདོན་ཐམས་ཅད། རྣམ་པ་ནི་སྡོམ་སྡིག་ཉ་སྦལ་དང་སྲེ་མོང་སོགས་སེམས་ཅན་གྱི་རིགས་དང་། ངོ་བོ་ནི་སྡིག་སྒྲིབ་ཐམས་ཅད་དེ་རྣམ་པ་ནི་དུ་བ་སོལ་ཁུ་རྡུལ་དང་རླངས་པའི་རྣམ་པར་གྱུར་ཏེ་བདུད་རྩིའི་རྒྱུན་གྱིས་ཤག་གེ་དེད་པས། རང་གི་འོག་སྒོ་གཉིས་དང་རྐང་མཐིལ་བ་སྤུའི་བུ་ག་རྣམས་ནས་ནག་ཉིལ་ལི་ལི་ཕྱིར་ཐོན་པའི་ངབ་ཀྱིས་ས་རིམ་པ་དགུ་ཤག་གེ་གས་པའི་འོག་ན་འཆི་བདག་གཤིན་རྗེའི་རྒྱལ་པོ་གླང་དམར་པོའི་རྣམ་པ་ཅན་འཇིགས་སུ་རུང་བ་དང་ལས་མཁན་འཁོར་ཚོགས་དང་བཅས་པའི་ཁ་ལག་བཟེད་པའི་ནང་དུ་སོང་བས་ཡོངས་སུ་ངོམས་ཤིང་ཚིམ་པར་གྱུར། ཤ་འཁོན་བུ་ལོན་ལན་ཆགས་ཐམས་ཅད་བྱང་ཞིང་དག་ནས་རང་གཞན་རྣམས་དུས་མ་ཡིན་པའི་འཆི་བའི་འཇིགས་པ་ལས་གྲོལ་ཞིང་དེ་དག་ཀྱང་བྱང་ཆུབ་སེམས་དང་ལྡན་པར་གྱུར་ནས་མཐར་ས་གས་པའང་སུམ་པར་གྱུར་ཐལ་བསམ་མོ། །དེ་ནས་རང་ལུས་ཀྱི་རྩ་གསུམ་འཁོར་ལོ་བཞི་སོགས་བདུད་རྩིའི་རྒྱུན་གྱིས་ཡོངས་སུ་གང་བས་དཔེར་ན་ཤེལ་བུམ་འོ་མས་གང་བ་ལྟར་ཕྱི་གསལ་ནང་གསལ་འོད་ཀྱི་རང་བཞིན་ཅན་དུ་གྱུར་ནས་དབང་བཞི་ཐོབ། སྒྲིབ་བཞི་དག །དགའ་བཞིའི་ཡེ་ཤེས་སྐྱེས། སྐུ་བཞིའི་གོ་འཕང་ཐོབ་པའི་རྒྱུ་གྱུར་པར་བསམས་ནས་ངེས་ཤེས་བསྐྱེད་ཅིང་། མགོན་པོ་བདག་ནི་མི་ཤེས་རྨོངས་པ་སྟེ། །ཞེས་སོགས་འགྱོད་བཤགས་བརྗོད་མ་ཐག་བུའི་བྱ་བ་བཟང་པོ་བྱེད་པ་ལ་མས་ལྷག་པར་རྗེས་སུ་ཡི་རང་བ་བསྐྱེད་པ་ལྟར་རྡོར་སེམས་ཉིད་ཐུགས་དགྱེས་བཞིན་པ་ནས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉམས་ཆགས་ཐམས་ཅད་དག་པ་ཡིན་ནོ་ཞེས་གསུང་གིས་དབུགས་དབྱུང་ཞིང་ཐུགས་ཐིག་ལེའི་རྣམ་པར་འོད་དུ་རིམ་གྱིས་ཞུ་ནས་རང་ལ་དབྱེར་མེད་དུ་ཐིམ་པའི་རྐྱེན་གྱིས་རང་ཉིད་དཔལ་རྡོ་རྗེ་སེམས་དཔའ་ཇི་བཞིན་གནས་གྱུར་པའི་ཐུགས་ཀར་ཟླ་དཀྱིལ་ཡུངས་འབྲུའི་ཚད་ཀྱི་དབུས་སུ་ཧཱུྃ་མཐིང་གི་མདུན་དུ་ཨོཾ་དཀར་པོ། གཡས་སུ་བཛྲ་སེར་པོ། རྒྱབ་ཏུ་ས་དམར་པོ། གཡོན་དུ་ཏྭ་ལྗང་གུ་བཅས་གསལ་ཞིང་ངག་ནས་དེ་ལྟར་བཟླས་པའི་རྐྱེན་གྱིས་ཡིག་འབྲུ་ལྔ་པོ་ལས་འོད་ལྔའི་ཟེར་འཕྲོ་བའི་རྩེ་མོར་འདོད་ཡོན་གྱི་ལྷ་མོ་བསམ་གྱིས་མི་ཁྱབ་པས་མཆོད་རྫས་དུ་མ་ཐོགས། ཕྱོགས་བཅུའི་རྒྱལ་བ་སྲས་དང་བཅས་པ་ལ་ཐུགས་མཉེས་པའི་མཆོད་པ་ཕུལ་བས་རང་གཞན་སེམས་ཅན་ཐམས་ཅད་ཚོགས་རྫོགས་ཤིང་སྒྲིབ་པ་བྱང་ནས་ཐུགས་རྗེ་བྱིན་རླབས་ཀྱི་ངོ་བོ་འོད་ལྔའི་རྣམ་པ་ཆར་ལྟར་བབ་སྟེ་རང་ལ་ཐིམ་པས་མཆོག་ཐུན་གྱི་དངོས་གྲུབ་ཐམས་ཅད་ཡོངས་སུ་ཐོབ་པར་བསམ་པ་ནི་མདོར་ན་རང་དོན་ཆོས་སྐུ་རྟེན་འབྲེལ་བསྒྲིགས་པ་ཡིན་པར་གསུངས། ཡང་འོད་ཟེར་སྣ་ལྔ་མར་འཕྲོས་པས་རིགས་དྲུག་གི་སེམས་ཅན་ཐམས་ཅད་ལ་ཕོག་པས་སྡུག་བསྔལ་སྡིག་སྒྲིབ་བག་ཆགས་དང་བཅས་པ་བྱང་ཞིང་དག་སྟེ་ཕྱི་སྣོད་ཐམས་ཅད་མངོན་པར་དགའ་བའི་ཞིང་ཁམས་སུ་གྱུར། ནང་བཅུད་ཐམས་ཅད་རྡོ་རྗེ་སེམས་དཔའ་རིགས་ལྔར་གྱུར་པའི་ཞལ་ནས་སྔགས་ཀྱང་འུར་དི་རི་རི་སྒྲོགས་པར་བསམ་པ་ནི་གཞན་དོན་གཟུགས་སྐུའི་རྟེན་འབྲེལ་བསྒྲིགས་པ་ཡིན་པའི་ངེས་ཤེས་ལྷག་པར་བསྐྱེད་དོ། །དེ་ནས་མཐར་ཐུན་བསྡུ་བའི་སྐབས་སུ་གཞལ་ཡས་ཁང་ནང་བཅུད་ལ། ནང་བཅུད་གཙོ་བོ་ལ། གཙོ་བོ་ཨོཾ་ནས་རིམ་པར་ཐུགས་སྲོག་ཧཱུྃ་ལ་ཧཱུྃ་ཞབས་ཀྱུ་ལ། ཞབས་ཀྱུ་འ་ཆུང་ལ། འ་ཆུང་ཧ་ཁོག་ལ། ཧ་ཁོག་མགོ་བོ་ལ། མགོ་བོ་ཟླ་ཚེས་ལ། ཟླ་ཚེས་ཐིག་ལེ། ཐིག་ལེ་ན་དཱའི་བར་རིམ་གྱིས་རྗེས་ཞིག་གི་ཚུལ་དུ་བསྡུས་ནས་མཐར་ནམ་མཁའི་འཇའ་ཚོན་གནས་མེད་དུ་ཡལ་བ་བཞིན་དུ་གང་ལའང་མི་དམིགས་པ་སྤྲོས་བྲལ་གདོད་མའི་ངང་དུ་ཡུན་ཅི་རིང་དུ་མཉམ་པར་བཞག་པར་བྱ་ཞིང་། དེ་ནི་སྤྲོས་མེད་དོན་དམ་པའི་སྒོམ་བཟླས་མཐར་ཐུག་ཡང་ཟབ་མཆོག་ཏུ་གྱུར་པ་ཉིད་ཡིན་པས་རིམ་གྱིས་ཤེས་པར་བྱ་དགོས་ཏེ། རྡོར་སེམས་མངོན་བྱང་ལས། ཡེ་སྲུང་ཐིག་ལེ་ཉག་གཅིག་པུ། །སྤང་བླང་ཡོང་གྲོལ་ཕྱལ་བ་ཆེ། །རང་བྱུང་ལྷུན་གྲུབ་ཆོས་ཀྱི་སྐུ། །དེ་ལྟར་རྟོགས་ན་བཤགས་པའི་རྒྱལ། །ཞེས་དང་། ཇི་སྐད་དུ། དྲང་པོ་འདུག་ལ་ཡང་དག་བལྟ། །འདི་ནི་འགྱོད་ཚངས་རྒྱལ་པོ་ཡིན། །ཞེས་གསུངས་པ་ལྟར་དང་། ཆོས་ཀྱི་རྒྱལ་པོའི་མདོ་ལས། སེམས་ཅན་གཅིག་སྟེ་གཉིས་སུ་མེད་པར་ཤེས་ན། སྒྲིབ་པ་ཐམས་ཅད་རྣམ་པར་སྦྱང་སྟེ། དཔེར་ན་མེ་ལོང་གི་སྟེང་དུ་ལོ་སྟོང་གི་རྡུལ་ཆགས་པའང་གོས་ཀྱིས་ཕྱིས་པས་རྡུལ་མེད་པ་དང་མཚུངས་སོ། །ཞེས་དང་། ཁང་སྟོང་གི་མུན་ནག་ལོ་སྟོང་སོང་བའང་གསལ་བའི་མར་མེ་གཅིག་གིས་སེལ་བ་ལྟར་སེམས་ལ་ངོ་བོ་ཉིད་མེད་པ་ཡང་དག་པའི་བདེན་པ་མཐོང་བས་བསྐལ་པ་གྲངས་མེད་ཀྱི་སྡིག་པ་སྐད་ཅིག་མ་ལ་སྦྱོང་བར་འགྱུར་རོ། །ཞེས་དང་། དོན་དམ་པར་འཇུག་པའི་མདོ་ལས། ལྷའི་བུ་པདྨ་དཀར་པོས་གསོལ་པ། འཇམ་དཔལ་ལས་ཀྱིས་སྒྲིབ་པ་ཇི་ལྟར་སྦྱང་བར་བྱ་སྨྲས་པས། ལྷའི་བུ་ལས་ཀྱི་སྒྲིབ་པ་ནི་ལས་ཉིད་ཡེ་ནས་དངོས་པོ་མེད་པར་ཤེས་ན་ཚེགས་མེད་པར་འདག་པར་འགྱུར་ཏེ། དུང་ལ་སོལ་བས་གོས་པ་ན་རས་ཀྱིས་ཕྱིས་པ་དང་མཚུངས་སོ། །ཞེས་གསུངས་པ་ལྟར་དགོངས་པའི་སྐྱེལ་སོ་ངོ་མ་དེ་ལྟ་བུ་ལ་རིམ་གྱིས་ཤེས་པ་གལ་གནད་ཤིན་ཏུ་ཆེ་བ་དང་། གཞན་ཡང་སྒོམ་བཟླས་འདི་ལ་བརྩོན་འགྲུས་ལྷག་པར་བསྐྱེད་པའི་སྟོབས་ཀྱིས་ཉེས་ལྟུང་ཕྲ་མོ་རྣམས་ནི་རྩ་བ་ནས་འབྱིན་ཅིང་འབྲིང་པོ་རྣམས་ཁ་བྲི་ཞིང་མྱུར་དུ་རྩ་བ་ནས་དག་པར་བྱེད་པ་དང་། ཆེན་པོ་རྣམས་མི་འཕེལ་ཞིང་མགོ་མནན་ཏེ་རིམ་གྱིས་ལྷག་མ་མེད་པར་བྱང་བར་འགྱུར་ཏེ། དཔེར་ན་ཉི་མས་ཁ་བའམ་འཁྱག་ཞུ་བ་ལྟར་རམ་མུན་པ་སེལ་བ་ཇི་བཞིན་སྡིག་པ་བྱང་བཏུབ་ན་བཤགས་སུ་བཏུབ་པའི་ཕྱིར་ཏེ། དྲི་མེད་བཤགས་པའི་རྒྱལ་པོ་ལས། དུས་གསུམ་བདེ་གཤེགས་ཐམས་ཅད་ཀྱི༔ ཡང་སྙིང་ཡི་གེ་བརྒྱ་པ་འདི༔ བདུན་ནམ་ཉི་ཤུ་རྩ་གཅིག་གམ༔ བརྒྱ་དང་རྩ་བརྒྱད་བརྗོད་གྱུར་ན༔ མཚམས་མེད་ལྔ་ཡི་སྡིག་པ་བྱང་༔ ཉམས་ཆགས་ཀུན་ཀྱང་བྱང་གྱུར་ནས༔ དུས་གསུམ་སངས་རྒྱས་ཐམས་ཅད་ཀྱི༔ སྲས་ཀྱི་དམ་པར་དགོངས་པར་འགྱུར༔ ཞེས་དང་། ལུང་རྣམ་དབྱེ་ལས། གང་གིས་སྡིག་པའི་ལས་བྱེད་པ། །དགེ་བ་ཡིས་ནི་མཐར་བྱེད་དོ། །ཉི་ཟླ་སྤྲིན་ལས་གྲོལ་བ་བཞིན། །འཇིག་རྟེན་འདིར་ནི་དེར་སྣང་འགྱུར། །ཞེས་དང་། བཤེས་སྤྲིངས་ལས། གང་ཞིག་སྔོན་ཆད་བག་མེད་གྱུར་པ་ལས། །ཕྱིས་ནས་བག་དང་ལྡན་པ་གྱུར་དེ་ཡང་། །ཟླ་བ་སྤྲིན་བྲལ་ལྟ་བུར་རྣམ་མཛེས་ཤིང་། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་སོགས་ཕན་ཡོན་གྱི་ལོ་རྒྱུས་དང་ལུང་འདྲེན་མཐའ་ཡས་པར་གསུངས་པ་ལྟར། ངེས་ཤེས་ལྷག་པར་རྙེད་པ་ནི་གལ་ཆེ་བའི་རང་བཞིན་དུ་བྱ་དགོས་ཤིང་། སླར་ཡང་སྣོད་བཅུད་ཐམས་ཅད་རྡོ་རྗེ་སེམས་དཔའ་གཙོ་འཁོར་ལམ་གྱིས་གསལ་ནས། དགེ་བ་འདི་ཡིས་སོགས་བསྔོ་སྨོན་གྱིས་རྒྱས་ཡོངས་སུ་ཐེབ་པར་བྱའོ། །དེ་ལྟར་དམིགས་པ་ཐམས་ཅད། དང་པོ་ཤེས་པ་གཅིག་གི་ཐོག་ནས་འཆར་དཀའ་བས་རེས་འགའ་རྡོར་སེམས་ཡབ་ཡུམ་ཞལ་ཕྱག་རྒྱན་ཆས་དང་བཅས་པ་རིམ་གྱིས་གསལ་ནས་བཟླས། རེས་འགའ་འགྱོད་པ་དང་སྡོམ་སེམས་དྲག་པོ་ཡང་ཡང་བསྐྱེད་དེ་སྔགས་འཁོར་བསྐོར་ཞིང་བདུད་རྩི་འབེབས་སྦྱང་བྱ། རེས་འགའ་རང་ཉིད་རྡོར་སེམས་གནས་འགྱུར་གྱིས་དོན་གཉིས་བྱེད་པའི་དམིགས་པ་སྤྲོ་བསྡུ་སོགས་ལ་སེམས་རྩེ་གཅིག་ཏུ་གཏད་དེ་བཟླས་པར་བྱ་དགོས་པ་ཡིན་མ་གཏོགས། རང་ཡིད་རང་ལ་ཆེས་པ་ཞིག་ངེས་པར་མ་འགྲུབ་ཕྱིན་ཆོད་སྡིག་སྒྲིབ་དག་པ་ལ་ཕྱོགས་ཙམ་ག་ལ་ཉེ་བས། དེས་ན་བླ་མ་ལྷའི་ལེགས་སོ་ཞེས་གནང་བ་ཐོབ་པ་དང་། རི་རྩེར་ཕྱིན་པ་དང་། ནམ་མཁར་འཕུར་བ་དང་། ཉི་ཟླ་ཤར་བ་དང་། མེ་ཏོག་གི་ཚལ་དང་། ཁྲུས་བྱས་པ་དང་། གོས་དཀར་གྱོན་པ་དང་། ཤེལ་གྱི་མཆོད་རྟེན་རྙེད་པ་དང་། ལུས་ནས་མི་གཙང་བ་དང་འབུ་སྲིན་རྡོལ་བ་སོགས་དངོས་ཉམས་རྨི་ལམ་དུ་བྱང་བའི་རྟགས་མཚན་རྣམས་མངོན་དུ་མ་གྱུར་གྱི་བར་དུ་ཤུགས་དྲག་ལ་རྒྱུན་རིང་པོར་འབད་པ་གལ་ཤིན་ཏུ་ཆེ་སྟེ། ད་དུང་ཅི་ཡི་ཕྱིར་སྙམ་ནས་ཐེ་ཚོམ་འདྲ་སྐྱེས་ན་ཚེ་འདིའི་རྒྱལ་པོ་དང་བཙན་པོ། གཉེན་ཉེ་འབྲེལ་དང་ཡུལ་མི་སོགས་ཀྱི་ཕྱིར་རམ། ཡང་ན་ཁེ་གྲགས་གཏམ་སྙན་གྱི་ཕྱིར་རམ། ཡང་ན་དགྲ་འདུལ་གཉེན་སྐྱོང་གི་ཕྱིར་རམ། ཡང་ན་རང་གི་ཟས་གོས་རྒྱུ་ནོར་སོགས་ཀྱི་ཆེད་དུ་སྡིག་པ་ཆེ་ཕྲ་ཇི་ལྟར་བསགས་ཀྱང་རང་འཆི་དུས་བཞག་ས་མེད། བགོ་ས་མེད། གཞན་གྱི་ཁུར་རོགས་མི་བྱེད། དངོས་བརྒྱུད་བར་གསུམ་ནས་བསགས་པའི་སྡིག་པ་ཆེ་ཕྲ་ཐམས་ཅད་ཚེགས་མེད་རང་ཐོག་ཏུ་འོང་ནས་ལས་འབྲས་ངན་སོང་གི་སྡུག་བསྔལ་བཟོད་དཀའ་བ་དུ་མ་བར་མེད་ཡུན་རིང་པོར་མྱོང་ནས་ཉམ་ཤིན་ཏུ་ཐག་པར་འགྱུར་བའི་དུས་དེར་སྔར་གྱི་རྒྱལ་བློན་ཉེ་འབྲེལ་སོགས་ཀྱི་སེམས་ཀྱིས་ཤེས་མཁན་མེད། རྣ་བས་ཐོས་མཁན་མེད། ལྟ་རྟོག་ཅུང་ཟད་ཙམ་ཡང་ཕེར་མཁན་མེད། རྒྱུ་ནོར་སྙན་གྲགས་ཐོབ་ཐང་སོགས་ཀྱིས་ཕན་པ་དང་སྐྱོབས་མཁན་སྐྲ་རྩེ་ཙམ་ཅང་མི་ཡོང་བར་ཐ་ན་རང་གི་མཐོང་ཕྱོགས་དང་ཐོས་ཕྱོགས་ཀྱི་ཡུལ་གྲུ་ཙམ་དུའང་དེ་དུས་མི་འོང་སྟེ། དེ་རྣམས་ཀྱི་ངན་གཡོ་ཆེན་པོས་རང་ཉིད་ཆེད་དུ་བསླུས་བཞག་པ་ལྟ་བུར་གྱུར་ནས། སྡིག་པ་ཆེ་ཕྲ་གང་བྱས་ཐམས་ཅད་ཀྱི་འབྲས་བུ་ནི་རང་རྐྱང་པའི་ཁུར་ཆེན་རི་བོ་ལྟ་བུར་ཁུར་ཏེ་ལྷག་མ་མེད་པ་སྦྱང་དགོས་ཤག་རེད་པས་དེས་ན་ད་ལྟ་ཐབས་ཤེས་གཉིས་ཀ་ལྡན་པའི་དུས་འདིར་དང་པོ་ནས་སྡིག་པས་མ་གོས་པའི་ཐབས་ལ་འབད་པ་ཅི་ནས་བྱ་དགོས་ཏེ། དཔེར་ན་རྫི་བོས་ཕྱུགས་ལུག་རྣམས་དགྲ་རྐུན་གཅན་གཟན་སོགས་ཀྱིས་བརླག་དོགས་ཀྱིས་ཉིན་མཚན་ཀུན་ཏུ་འཚོ་སྐྱོང་ཁོ་ནར་བྱེད་ཅིང་སྔ་དགོང་ཉིན་རེ་བཞིན་བསྔོ་བགྲང་དུ་མར་བྱེད་པ་ལྟར་དུ། རང་རེ་ནས་དྲན་དང་ཤེས་བཞིན་ལྡན་པའི་སྒོ་ནས་སྡིག་སྤང་དགེ་སྒྲུབ་རྣམས་འཆོལ་ཉོག་རེད་ཀྱིན་ཨེ་འདུག་མི་འདུག་དྲན་ཤེས་བག་ཡོད་ཀྱིས་བརྟག་དཔྱད་རྒྱུན་དུ་བྱ་ཞིང་། གལ་ཏེ་མི་དགེ་བའི་ལས་ཀྱི་རིགས་རྐྱེན་ངན་གློ་བུར་བས་བསགས་ཤོར་ཚེ་ལྟུང་བ་དེ་དང་འགྲོགས་ནས་ལེ་ལོ་སོགས་བྱས་ན་དུག་མདའ་ངན་པས་ཟིན་པ་ལྟར་རྒྱུད་འབྱམས་ནས་ཉེས་ལྟུང་སྣ་རེས་དམྱལ་བར་བསྐྱུར་ནུས་པར་གསུངས་པས། དེས་ན་ལྟུང་བ་དང་ཞག་ཏུ་ལན་གཅིག་གམ་སྐད་གཅིག་ཙམ་ཡང་མི་འགྲོགས་པར། དཔེར་ན་ཟས་དང་དུག་ནོར་དུས་ལ་འུར་སྐད་ཅིག་གཅིག་གིས་སྨན་པ་བོས་ཏེ་བཤལ་སྐྱུགས་གང་དྲག་གཏོང་དགོས་པ་ལྟར་སྡིག་བྱས་ལ་འགྱོད་པ་དྲག་པོས་མྱུར་དུ་བཤགས་ནས་ཡོངས་སུ་བྱང་བར་བྱ་དགོས་ཤིང་། མ་ཟད་ཕྱིན་ཆད་སྡིག་པ་མི་དགེ་བའི་རིགས་གཏན་ནས་མི་བྱ་བར་བསྡམས་པས་འཕྲོ་རྦད་ཀྱིས་ཆོད་ངེས་པར་བྱ་དགོས་པ་ཡིན་ཏེ། དཔེར་ན་སྔར་དུག་ནད་དྲག་པོས་མནར་བའི་མི་དེས། ཕྱིས་དུག་གི་སྒྲ་ཙམ་ཐོས་ནའང་ཤིན་ཏུ་འཇིགས་དངངས་དྲག་པོ་ལྷང་གི་སྐྱེས་ནས། ཟས་དང་སྤྱོད་ལམ་ལ་དུག་འདྲེས་དོགས་ཀྱིས་ཕྱོགས་དང་དུས་རྣམས་ཀུན་ཏུ་གཟབ་ཆ་རྩེ་གཅིག་བྱེད་པ་ལྟར་སྡིག་པའི་འཁྲུན་ཡོངས་སུ་ཆོད་པར་བྱེད་པ་ལས། སྐུད་པ་ཡར་སྒྲིམ་ཕྱིར་སྒྲིམ་བྱས་པ་ལྟ་བུས་སྡིག་པ་འདག་པ་དང་དགེ་བའི་དོན་འགྲུབ་པ་ཅིའང་མི་ཡོང་བས་ན་བླང་དོར་གྱི་གནས་མི་བརྗེད་པའི་དྲན་པ་བརྟེན། ཤེས་བཞིན་པའི་བྱ་ར་བྱེད། བག་ཡོད་ཀྱི་ཚུལ་བཞིན་གནས་དགོས་པ་སོགས་ཡང་དག་པའི་དགེ་བ་འགྲུབ་འདོད་རྣམས་ཀྱིས་ཐོག་མཐའ་བར་གསུམ་སྡིག་པ་ཡོངས་སུ་སྦྱང་བའི་ཐབས་ཁོ་ན་དེ་ལྟར་ཐུགས་ལ་གཅིག་ཏུ་ཞོག་མཛོད།། ༈ །།དེ་ལྟར་འགལ་རྐྱེན་སྡིག་སྒྲིབ་གྱི་ཉེས་ཚོགས་ཆེས་ཆེར་ཕར་བསལ་བར་བྱས་ནས། དག་པ་ཡེ་ཤེས་ཀྱི་ཆོས་སྐུ་མངོན་དུ་གྱུར་པའི་རྒྱུ་བསོད་ནམས་ཀྱི་ཚོགས་བསགས་པ་མཎྜལ་གྱི་རིམ་པ་ནི། དེའང་དང་པོ་ཚོགས་རྫོགས་པ་མཎྜལ་ཅེས་པའི་དོན་ནི་འབུལ་ཡུལ་དང་། འབུལ་བྱ་དང་། འབུལ་བྱེད་ཀྱི་རྣམ་པ་ཕུན་སུམ་ཚོགས་པས་ན་ཚོགས་ཞེས་པ་དང་། བསོད་ནམས་ཀྱི་ཚོགས་བསགས་པའི་རིམ་པ་ཐམས་ཅད་མཎྜལ་གྱིས་ཁོངས་སུ་ཅིག་ཆར་དུ་རྫོགས་པར་བྱེད་པས་ན་རྫོགས་ཞེས་པ་དང་། དེ་ལྟར་ལག་ཏུ་ལེན་པར་བྱེད་པའི་ཐབས་མཎྜལ་མཆོག་ཏུ་འཕགས་པ་ཡིན་པས་ན་རྫོགས་པར་བྱེད་པ་ཞེས་བྱ་སྟེ། རྒྱ་སྐད་དུ་མཎྜལ་ཅེས་པའི་དོན་ནི་བོད་སྐད་དུ་དཀྱིལ་འཁོར་ཞེས་ཟེར་བ་ཡིན་གྱི། དེ་ལྟ་བུ་བླ་མ་དང་དཀྱིལ་འཁོར་གྱི་ལྷ་ཚོགས་ལ་འབུལ་བས་ན་འབུལ་ཞེས་བྱ་སྟེ། དེ་ལྟར་འབུལ་དགོས་པའི་དོན་སོགས་ནི། ཐ་ན་ད་ལྟ་འབྱོར་བ་ཡོད་མེད་རྣམས་ལ་དཔྱད་པ་རེ་གཏོང་ན། འདི་ལྟར་འཇིག་རྟེན་ན་ཕྱི་ཡུལ་གྱི་ས་ཞིང་ཆུ་ཤིང་ལོ་འབྲས་སྤང་ལྗོངས་བྲག་རི་ཡིད་འོང་སོགས་དང་། ནང་བཅུད་ཀྱི་སྐྱེ་འགྲོ་འཁོར་སློབ་འབངས་དང་སྒོ་ཟོག་དུད་འགྲོའི་རིགས་དང་། རིན་པོ་ཆེའི་རིགས་དང་རྒྱུ་ནོར་རྫས་བཟའ་བཏུང་ཟས་གོས་ལོངས་སྤྱོད་ཀྱི་འབྱོར་བ་ཕུན་སུམ་ཚོགས་པ་དང་། གསང་བ་རང་ལུས་ལ་དབང་པོ་སྒོ་ལྔ་དང་། སེམས་ལ་ཤེས་རབ་ཀྱི་འབྱོར་ཚོགས་དང་བཅས་པའང་སྔོན་རྣམ་དཀར་གྱི་ཚོགས་ཆེ་ཕྲ་ཇི་ལྟར་བསགས་པའི་འབྲས་བུ་ཁོ་ན་ལས་འབྱུང་བ་དང་། དེ་བཞིན་དཔྱད་ན་དབུལ་པོ་རྣམས་ལ་བདག་ཏུ་འཛིན་པའི་ས་དང་ཁང་ཁྱིམ་དང་། ཟས་གོས་སོགས་ཅུང་ཟད་ཙམ་ཡང་མེད་པར་ལུས་ལ་དབང་པོ་མ་ཚང་བ་དང་། ཤེས་པ་ལྐུགས་པ་དང་། མཐོང་བ་ཙམ་གྱིས་སྡུག་པ་དང་། འཁྱག་ལྟོགས་སྐོམ་གསུམ་དང་། ནད་གདོན་རྐྱེན་ངན་སྣ་ཚོགས་ཀྱིས་དུས་རྟག་ཏུ་ཤིན་ཏུ་མནར་ཏེ་ཕན་པའི་ཐབས་དང་འབྱོར་བའི་རྣམ་པ་གང་གིས་ཀྱང་དབུལ་བ་དེ་དག་ནི་སྔོན་བསོད་ནམས་ཀྱི་ཚོགས་མ་བསགས་པས་ན། ད་ལྟ་འབྲས་བུ་བདེ་སྐྱིད་ཀྱི་འབྱོར་བས་དབུལ་བ་ལས། གཞན་གང་གིས་ལན་པ་མ་ཡིན་ནོ། །དེ་བཞིན་སྔོན་བསྐལ་པ་བཟང་དུས་ལྟར་རྒྱལ་བློན་དང་སྡེ་འབངས་རྣམས་ནི་དེང་སང་བསོད་ནམས་ཀྱི་ཚོགས་རྒྱ་ཆེ་བ་དང་ཡང་དག་པ་གསོག་མཁན་མེད་པའི་དབང་གིས་འབྲས་བུ་ཕལ་ཆེར་དབུལ་པོའི་རང་བཞིན་ཆབས་ཅིག་ཏུ་བྱུང་དང་འབྱུང་ལ་ཉེ་བ་ཤ་སྟག་སྟེ། དཔེར་ན་ས་བོན་རུལ་བའི་མྱུ་གུ་ལྟར་རམ། ཤུལ་རིང་མགྲོན་པོའི་ལམ་བརྒྱག་ཟད་པ་ལྟར་རམ། ལྟག་ཆུ་བསྐམས་པའི་རང་འཐག་བཞིན་དུ་འགྱུར་བ་དང་། མ་ཟད་རང་རེ་བླ་མ་གྲྭ་པ་ཆོས་བྱེད་རྣམས་ནི་རང་གཞན་གཉིས་དོན་གྱི་ཕྱིར་དུ་བསོད་ནམས་ཀྱི་ཚོགས་རླབས་པོ་ཆེ་གསོག་མཁན་གྱི་གཙོ་བོ་ཡིན་རུང་། དེས་ཀྱང་དངོས་སུ་རྒྱུ་སྦྱོར་འབྱོར་བ་རྒྱ་ཆུང་བ་དང་ཁྱད་པར་སེམས་བསྐྱེད་དང་བསྐྱེད་རྫོགས་སོགས་ཀྱི་དོན་གཉེར་ཡང་དག་པ་ལྡན་མཁན་ཆེས་ཆེར་དཀོན་པ་དང་། མི་དགོས་པ་ཚེ་འདིའི་འཇིག་རྟེན་ཆོས་བརྒྱད་ཀྱི་དབང་དུ་འཆོར་ནས་བསོད་ནམས་ཀྱི་ཚོགས་ཡང་དག་པ་གསོག་མཁན་མཆོད་ཡོན་གང་ལའང་དཀོན་པའི་ཕྱིར། དེའི་མཐུ་ལས་ད་ལྟ་ཕལ་ཆེར་ལ་ཡར་དཀོན་མཆོག་ལ་མཆོད་པ་དང་མར་ངན་སློང་ལ་སྦྱིན་པ་གཏོང་རྒྱུ་སོགས་ཆེར་མེད་ཐོག་ཐ་ན་རང་གི་ལོངས་སྤྱོད་རྒྱུ་ཟས་གོས་གཉིས་པོ་ཙམ་ཡང་དབུལ་གྲབས་ཀྱིས་དབྱར་ལྡོམ་སྟོན་ལྡོམ་རྒྱུན་དུ་བྱེད་དགོས་པ་མ་ཟད་ཚོང་ཁེ་སྤོག་དང་སྡིག་པའི་ལས་ལ་ཕལ་ཆེར་འབག་པ་ལས་ཐབས་ཅི་བྱ་མེད་པ་ལྟ་བུར་གྱུར་ནས་དགེ་བ་སྒྲུབ་པའི་ལོང་ཁོམ་ཆེར་མི་ཡོང་བ་རེ་དོགས་རྩོལ་སྒྲུབ་རྣམ་གཡེང་ཁོ་ནའི་དབང་དུ་ཚེ་ཟད་དགོས་པ་དེ་ཚོ་ཡང་རྒྱུ་བསོད་ནམས་ཀྱི་ཚོགས་ལེགས་པར་མ་བསགས་པའི་ལན་གྱིས་འབྲས་བུ་བདེ་སྐྱིད་ཀྱི་འབྱོར་ཚོགས་གང་གིས་ཀྱང་དབུལ་བ་ཡིན་འདུག་མོད་དེས་ན་འབད་རྩོལ་རི་བོ་ཙམ་བཟོ་བ་ལས། བསོད་ནམས་མེ་སྟག་ཙམ་གསོག་པ་དགའ་བའི་རང་བཞིན་ཡིན་ཏེ། རྒྱལ་བའི་བཀའ་བླ་མའི་ལུང་རང་རེའི་རིགས་པ་ཚད་མ་སོགས་ཀྱིས་ད་ལྟར་མཐོང་ཆོས་མྱོང་གྱུར་དུ་མངོན་སུམ་གྲུབ་འདུག་པས་ན་ཚོགས་བསགས་པའི་རིམ་པ་ལ་འབད་པ་ལྷག་པར་དུ་གལ་ཆེ་བ་དང་། བྱེ་བྲག་ཏུ་རང་རྒྱུད་ཀྱི་དགེ་བའི་བག་ཆགས་ཀྱི་རིགས་ཡོངས་སུ་སད་པ་དང་། དངོས་གཞིའི་ཉམས་མྱོང་འཕྲལ་དུ་སྐྱེ་སླ་ཞིང་གེགས་དང་གོལ་ས་རྣམས་ཆུང་བ་དང་ཁྱད་པར་རང་རེ་རྣམས་ཀྱིས་བསྒྲུབ་བྱ་དོན་དུ་གཉེར་བ་མཐར་ཐུག་རང་དོན་དུ་རྟོགས་པ་ཕུན་སུམ་ཚོགས་པ་ཆོས་ཀྱི་སྐུ་དང་། གཞན་དོན་དུ་ཐུགས་རྗེ་ཕུན་སུམ་ཚོགས་པ་གཟུགས་ཀྱི་སྐུ་སྟེ་དོན་གཉིས་ལྷུན་གྱིས་གྲུབ་པའི་ཕྱིར་སྐུ་གཉིས་ཐོབ་པར་བྱེད་པ་སོགས་ཀྱི་དགོས་ཆེད་དུ་མ་ཡོད་པས་ན་ཚོགས་ལེགས་པར་གསོག་དགོས་ཏེ། མཎྜལ་གྱི་མདོ་ལས། འདི་ལ་ལུས་ཀྱི་ལས་བྱས་ན། །ཁ་དོག་གསེར་ལྟར་འབྱུང་བ་དང་། །ནད་རྣམས་ཀུན་ལས་རྣམ་པར་གྲོལ། །ལྷ་དང་མི་ལས་ཆེས་ལྷག་ཅིང་། །ཟླ་བ་ལྟ་བུར་གཟི་བྱིན་ལྡན། །ནོར་དང་གསེར་སོགས་ཕུན་སུམ་ཚོགས། །རྒྱལ་པོའི་རིགས་དང་སངས་རྒྱས་པ། །མཆོག་གི་ཁྱིམ་དུ་སྐྱེ་བར་འགྱུར། །ཞེས་དང་། སློབ་དཔོན་དབྱིག་གཉེན་གྱིས། ཚེ་རིང་དེ་བཞིན་ནད་མེད་དང་། །གཟུགས་དང་སྐལ་པ་བཟང་དང་རིགས། །ནོར་དང་ཤེས་རབ་དག་དང་བདུན། །ཡོན་ཏན་མདོ་སྡེ་དག་ལས་གསུངས། །ཞེས་དང་། རྒྱུད་ལས་ཀྱང་། ཚོགས་མ་བསགས་ལ་དངོས་གྲུབ་མེད། །བྱེ་མ་བཙིར་བས་མར་མི་འབྱུང་། །ཚོགས་བསགས་པ་ལ་དངོས་གྲུབ་འབྱུང་། །ཏིལ་ལམ་འོ་མའི་མར་བཞིན་ནོ། །ཞེས་དང་། མདོ་ལས། ཇི་སྲིད་ཚོགས་གཉིས་དམ་པ་དེ་ནི་མ་རྫོགས་བར། །དེ་སྲིད་སྟོང་ཉིད་དམ་པ་དེ་ནི་རྟོགས་མི་འགྱུར། །ཞེས་གསུངས་པ་ལྟར་རྒྱལ་བ་རྣམས་ཐབས་མཁས་ལ་ཐུགས་རྗེ་ཆེ་བས་ལུས་ངག་ཡིད་གསུམ་དང་ཕྱི་ནང་གསང་བའི་འབྱོར་བ་ཅི་རིགས་པའི་སྒོ་ནས་ཚོགས་བསགས་པའི་རིམ་པ་མཐའ་ཡས་པར་གསུངས་པའི་ནང་ཚན་མཆོག་ཏུ་གྱུར་པ་ནི་མཎྜལ་ཕུལ་བའི་རིམ་པ་འདི་ཉིད་རང་ཡིན་ཏེ། ཅི་ཕྱིར་སྙམ་ན་དངོས་པོའི་རྒྱུ་ནོར་རྫས་ལོངས་སྤྱོད་ཀྱི་འབྱོར་བ་ནི་རྒྱ་ཆུང་ཞིང་སྡིག་ཚོགས་དང་སེར་སྣའི་དྲི་མས་ཐོག་མཐའ་བར་དང་དངོས་བརྒྱུད་བར་གསུམ་ནས་མ་གོས་པ་ནི་ཇི་ལྟར་བྱས་ཀྱང་འབྱུང་དཀའ་ཞིང་། དེས་ན་གླིང་བཞི་གླིང་ཕྲན་སྟོང་གསུམ་འཇིག་རྟེན་གྱི་ཞིང་རབ་འབྱམས་མཐའ་དང་མུ་མེད་པ་རྣམས་དང་། ཐ་ན་བདག་ལུས་ལོངས་སྤྱོད་དང་བཅས་པ་སྒོ་གསུམ་འདུན་པ་གཅིག་དྲིལ་གྱི་བློ་ཡིས་ཡོངས་སུ་འཁྱུད་དེ་འབུལ་བ་ནི་བྱ་སླ་ལ་ཆོད་ཆེ་བའི་རང་བཞིན་གསང་སྔགས་ཐབས་ཀྱི་ཁྱད་ཆོས་དུ་མས་འཕགས་པ་ཉིད་ཡིན་ཏེ། གསང་འདུས་ལས། ཞིང་འདིར་རྒྱལ་སྲིད་སྣ་བདུན་གྱིས། །མཁས་པ་དག་གིས་ཡོངས་བཀང་སྟེ། །དངོས་གྲུབ་འདོད་པ་འཇོ་བའི་གཞི། །ཉིན་བཞིན་ཤེས་རབ་ཅན་གྱིས་ཕུལ། །ཞེས་དང་། ཏཻ་ལོས། བུ་སྣང་བ་རྟེན་ཅིང་འབྲེལ་འབྱུང་ཡིན། །དོན་སྐྱེ་བ་མེད་པ་མ་རྟོགས་བར། །ཚོགས་གཉིས་ཤིང་རྟའི་འཕང་ལོ་དང་། །འབྲལ་བར་མ་བྱེད་ནཱ་རོ་པ། །ཞེས་དང་། ཁྱེའུ་སྣང་བྱེད་ཀྱི་ཞུས་མདོ་ལས། འཇིག་རྟེན་དག་ན་བདེ་ཞིང་སྐྱིད་པ་ཀུན། །དེ་ཀུན་དཀོན་མཆོག་མཆོད་ལས་བྱུང་བས་ན། །རྟག་ཏུ་དཀོན་མཆོག་མཆོད་ལ་བརྩོན་པར་བྱ། །དེ་ཡང་ཐབས་མཆོག་བླ་མེད་མཎྜལ་ཡིན། །ཞེས་སོགས་ཕན་ཡོན་མཐའ་ཡས་པ་དུ་མར་གསུངས་པ་ལྟར་ངེས་ཤེས་ཁྱད་འཕགས་ལྷག་པར་རྒྱུད་ལ་འབྱོར་བར་སྔོན་དུ་བྱས་ཏེ་ལག་ལེན་དངོས་སུ་བཏབ་པའི་སྐབས་སུ་མཎྜལ་གྱི་རྒྱུ་ནི་རབ་རིན་པོ་ཆེའི་རིགས་དང་། འབྲིང་འཁར་བ་དང་། ཟངས་ལ་སོགས་པ་དང་། བཀོད་རྒྱུའི་ཚོམ་བུ་ལའང་། རབ་རིན་པོ་ཆེའི་རིགས། འབྲིང་སྨན་སྣ་འབྲུ་རིགས་སོགས་ཅི་འབྱོར་རྣམས་རྡོ་ཐལ་དང་ཕུབ་མ་བྱ་བྲུན་སོགས་ཞིབ་པར་བསལ་ལ་ཆུས་བཀྲུ་ཞིང་། དྲི་བཟང་གིས་ཁ་དོག་བསྒྱུར་ནས་བ་བྱུང་གི་ཆུས་བྱུག་པ་དང་བཅས་ཚོགས་པར་བྱས་ནས་གནས་ཁང་བྱི་དོར་བྱས་ཆག་ཆག་བཏབ། མཆོད་པ་རྣམ་ལྔ་སོགས་རྒྱུ་བཟང་བ། སྤུས་གཙང་བ། བཀོད་ལེགས་པ་གསུམ་གྱི་སྒོ་ནས་རྒྱུན་མི་འཆད་པར་འབུལ། ཁྱད་པར་དངོས་སུ་སྟོན་པའི་སྐུ་དང་། སྡུད་པ་དང་གསང་སྙིང་རྩ་བ་གསུང་དང་། བཀའ་གདམས་མཆོད་རྟེན་སོགས་མཆོད་སྟེགས་ལ་བཀོད་ནས་སྒྲུབ་པའི་མཎྜལ་ནི་ཚོམ་བུ་ལྔ་འགོད་དེ་མཆོད་པའི་བྱེ་བྲག་གིས་བསྐོར་ཏེ་མདུན་སྟེགས་ཁར་བཞག་ལ་དམིགས་རྟེན་བྱས་ནས། ཨུ་རྒྱན་རྡོ་རྗེ་འཆང་སོགས་རྟེན་དང་བརྟེན་པའི་ཚོགས་ཞིང་རྣམས་ཁྲ་ལམ་མེར་སྤྱི་ལྟར་གསལ་བའི་སྤྱན་སྔར། མཆོད་པའི་མཎྜལ་དེ་མེ་ཏོག་ཅུང་ཟད་དང་བཅས་ལག་གཡོན་གྱིས་བཏེགས་ཏེ་སེམས་ཀྱི་དྲི་མ་མེད་པ་མཚོན་ཕྱིར་མཎྜལ་དེ་གཡས་ཀྱི་མཁྲིག་མས་ཕྱི་ནང་ལན་གསུམ་རེ་རེར་ཕྱིས་ནས་ཡན་ལག་བདུན་པ་བརྗོད་ཅིང་ཚིག་རྗེས་དོན་དྲན་བྱས་པའི་ངང་ནས་ས་སྐྱ་འགྲོ་མགོན་འཕགས་པས་མཛད་པའི་ལུགས་མཎྜལ་སོ་བདུན་མ་ཞེས་པ་འདི་གསར་རྙིང་ཀུན་ལ་ཡོངས་གྲགས་ཡིན་པས་དེ་ལྟར་ལག་ལེན་བཏབ་པ་ལ། ཨོཾ་བཛྲ་བྷཱུ་མི་ཨཱཿཧཱུྃ། ཞེས་པ་ནི་ས་གཞི་བྱིན་རླབས་ཀྱི་སྔགས་ཏེ་བོད་སྐད་དུ་རྡོ་རྗེའི་ས་གཞི་ཟེར་བ་ཡིན་པས་དེའི་ཚེ་བྱང་ཆུབ་སེམས་ཀྱི་རྒྱུན་བརླན་པའི་ཕྱིར་བ་བྱུང་དང་དྲི་བཟང་གིས་ཆག་ཆག་གདབ་སྟེ་འོག་གཞི་འབྱུང་བ་ནམ་མཁའ་སྔོན་པོ་དབྱིབས་གྲུ་གསུམ་པའི་སྟེང་དུ་རླུང་གི་རྡོ་རྗེ་རྒྱ་གྲམ་ལྗང་ཁུ་རྒྱ་ཡངས་པ། དེའི་སྟེང་ཆུའི་དཀྱིལ་འཁོར་དཀར་པོ་ཟླུམ་པོ་ཚད་གོང་དང་མཉམ་པ་ཞིག་འཁྱིལ་ནས་ཡོད་པའི་ཟུར་བཞི་ནས་འོག་གི་རླུང་ཅུང་ཟད་གཡོ་བའི་རྐྱེན་གྱིས་རྒྱ་མཚོའི་སྟེང་དུ་རིམ་པར་སྤྲིན་མ་ལྟ་བུ་ཞིག་ཆགས་ཏེ་མཐར་དབང་ཆེན་གསེར་གྱི་ས་གཞི་ཁོད་སྙོམས་པ་རྒྱ་ཁྱོན་རབ་ཏུ་ཡངས་པ་མཛེས་ཤིང་ལྟ་ན་སྡུག་པ་སྤོས་ཆུས་ཡོངས་སུ་གང་བ་མེ་ཏོག་སྣ་ཚོགས་བཅལ་དུ་བཀྲམ་པ་བཅས་གསལ་བར་དམིགས་ལ། དེ་ནས་གཡས་མཐེབ་སྲིན་གྱིས་མེ་ཏོག་གི་ཚོམ་བུ་བཟུང་སྟེ་ཨོཾ་བཛྲ་རེ་ཁེ་ཨཱཿཧཱུྃ་ཞེས་པ་ནི་སྣོད་ཀྱི་ཡུལ་བྱིན་གྱིས་རླབས་པ་སྟེ་བོད་སྐད་དུ་རྡོ་རྗེའི་ལྕགས་རི་ཟེར་བ་ཡིན་པས་དེའི་ཚེ་གཞིའི་གཡས་སུ་བསྐོར་ནས་དབུས་སུ་བཞག་སྟེ་ཧཱུྃ་ཞེས་བགེགས་བསལ་ཞིང་། གླིང་བཞིའི་ཕྱི་རིམ་ལྕགས་རི་ནག་པོས་བསྐོར་བར་བསམ་ལ། དངོས་སུ་ལྕགས་རི་ཡོད་ན་ཕྱི་མ་དེ་རུ་རང་འགོད། སླར་ཡང་དེའི་སྟེང་དུ་ཚོམ་བུ་ཆེ་བ་ཞིག་འགོད་དེ་གསེར་གྱི་ས་གཞིའི་དཀྱིལ་དུ་རྒྱ་མཚོ་ཆེན་པོ་ཞིག་གི་དབུས་ན་རིའི་རྒྱལ་པོ་རི་རབ་གྲུ་བཞི་པ་འོག་མ་དང་པོ་གཡུའི་རྡོ་རྗེ་ཅན། གཉིས་པ་རྣམ་དཔུང་། གསུམ་པ་ཤེལ་འོད་འབར་བ། བཞི་པ་འཁོར་ལོ་རྣམས་བརྩེགས་ཞེས་པ་དང་། བུམ་ལྟེ་ཟླུམ་པོ་དང་བཅས་པ་ཤར་ཤེལ་ལས་གྲུབ་པའི་དཀར་པོ། ལྷོ་བཻཌཱུརྻ་ལས་གྲུབ་པའི་སྔོན་པོ། ནུབ་པད་རག་ལས་གྲུབ་པའི་དམར་པོ། བྱང་གསེར་ལས་གྲུབ་པའི་སེར་པོ་སྟེ་ཤིན་ཏུ་མཛེས་ཤིང་ལྷུན་ཆགས་པས་ན་རི་དབང་ལྷུན་པོ་ཞེས་པ་ཡིན་ཞིང་། དེའི་མཐའ་སྐོར་དུ་གཉའ་ཤིང་འཛིན་ལ་སོགས་པ་གསེར་གྱི་རི་བདུན་ཏེ། གཉའ་ཤིང་འཛིན་ཞེས་པ་ནི་ཤིང་རྟའི་གཉའ་ཤིང་ལྟར་རྩེ་མོ་དྲང་བ། བཤོལ་མདའ་འཛིན་ཞེས་བཤོལ་མདའ་ལྟར་དྲང་བ། སེང་ལྡེང་ཅན་ཞེས་རྩེ་མོ་ན་ནགས་ཚལ་ཡོད་པ། ལྟ་ན་སྡུག་ཅེས་རྩེ་མོ་མཛེས་པ། རྟ་རྣ་ཅན་ཞེས་སྟེང་ན་བྲག་རྟའི་རྣ་བ་ལྟ་བུ་ཡོད་པ། རྣམ་འདུད་ཅེས་རྩེ་མོ་ནང་དུ་འདུད་པ། མུ་ཁྱུད་འཛིན་ཞེས་ཐམས་ཅད་ཀྱི་མཐའ་ནས་བསྐོར་བས་ན་དེ་སྐད་ཟེར་བ་ཡིན་འདུག །དེ་བཞིན་རོལ་མཚོ་ཡན་ལག་བརྒྱད་ལྡན་གྱིས་བསྐོར་བའང་བསིལ་དྲོད་སྙོམས་པ། ལྗིད་ཡང་པ། རེག་བྱ་འཇམ་པ། རྙོག་པ་མེད་པ། རབ་ཏུ་དྭངས་པ། དྲི་མ་མེད་པ། མགྲིན་པ་ནས་འཇུག་བདེ་བ། ལྟོ་ལ་འཇུ་བདེ་བས་ན་ཡན་ལག་བརྒྱད་དང་ལྡན་པའི་རོལ་མཚོ་བདུན་གྱིས་བསྐོར་བ་མ་ཟད། རི་རབ་ཀྱི་སྟེང་ཕྱོགས་སུམ་ཅུ་རྩ་གསུམ་ལྷའི་གྲོང་ཁྱེར་ན་བརྒྱ་བྱིན་གྱི་ཕོ་བྲང་ཕྱོགས་ལས་རྣམ་རྒྱལ་དང་། སྐྱེད་མོའི་ཚལ་ཁྲུས་ཀྱི་རྫིང་བུ། དཔག་བསམ་གྱི་ཤིང་། ལྷའི་རྡོ་ཨར་མོ་ནིག །ནོར་བུའི་ཕུང་པོ། མེ་ཏོག་རྙིང་པ་དོར་ཞིང་གསར་པ་བཅལ་དུ་བཀྲམ་པ༑ ལམ་སྲང་རྣམས་སུ་གསེར་གྱི་ཕྱེ་མ་བརྡལ་བ་ཙནྡན་གྱི་ཆུས་ཆག་ཆག་གདབ་པ་སོགས་འབྱོར་ཚོགས་བསམ་གྱིས་མི་ཁྱབ་པ་དང་། རི་རབ་ཀྱི་བང་རིམ་དང་གསེར་གྱི་རི་བདུན་ལ་རྒྱལ་ཆེན་རིགས་བཞིའི་ལྷ་དང་རོལ་མཚོ་བདུན་ཀླུ་རིགས་བཞི་སོགས་འདོད་དགུའི་ལོངས་སྤྱོད་བསམ་གྱིས་མི་ཁྱབ་པ་དང་བཅས་གསལ་ལ། དེ་ནས་ཤར་རང་ཕྱོགས་ནས་རྩིས་པས་ཚོམ་བུ་རེར་རིམ་པར་བཀོད་ལ་འཛམ་གླིང་གི་མི་ལས་བདུན་འགྱུར་གྱི་ལུས་དཔངས་མཐོ་བས་ན་ལུས་འཕགས་གླིང་ཞེས་བྱ་སྟེ་རྒྱུ་ནི་ཆུ་ཤེལ་ལས་གྲུབ་པ་དབྱིབས་ཟླ་གམ་སྟེ་ཟླ་བ་ཕྱེད་པ་ལྟ་བུ་དང་། རྒྱ་མཚོའི་ནང་ཤིང་འཛམ་བུ་བྲྀཀྵའི་ལོ་མ་ལྷུང་དུས་འཛམ་བུ་ཞེས་སྒྲ་གྲགས་པས་ན། ལྷོ་འཛམ་གླིང་ཞེས་བྱ་སྟེ་རྒྱུ་ནི་བཻཌཱུརྻ་ལས་གྲུབ་པ་དབྱིབས་སོག་ཁ་ཡིན། ནུབ་ཕྱོགས་ཀྱི་མི་རྣམས་ཀྱིས་བ་བཞོ་ཞིང་གླང་ལ་ཞོན་པས་ན། ནུབ་བ་གླང་སྤྱོད་ཞེས་བྱ་སྟེ་རྒྱུ་ནི་པད་རག་ལས་གྲུབ་པ་དབྱིབས་ནི་ཟླུམ་པོ་ཡིན། བྱང་ཕྱོགས་ཀྱི་མི་རྣམས་ཚེའི་དུས་ལ་བབ་བོ་ཞེས་དཔག་བསམ་གྱི་ཤིང་ལས་སྒྲ་མི་སྙན་པར་གྲགས་པས་ན། བྱང་སྒྲ་མི་སྙན་ཞེས་བྱ་སྟེ་རྒྱུ་ནི་གསེར་ལས་གྲུབ་པ་དབྱིབས་གྲུབ་བཞི་པ་བཅས་དམིགས་ལ་ཚོམ་བུ་སོ་སོར་བཀོད། དེ་ལྟར་ལྷུན་པོ་གསེར་རི་མུ་ཁྱུད་གླིང་བཞི་རྣམས་ནི་བསྐལ་པ་དང་པོ་ཆགས་པའི་དུས་རླུང་གིས་འབྱེད་སྡུད་རབ་འབྲིང་ཐ་མས་རིམ་གྱིས་གྲུབ་པར་བཤད་ཅིང་། དེ་བཞིན་ཤར་གྱི་རིའི་གཡས་སུ་ལུས་དང་། གཡོན་དུ་ལུས་འཕགས་དང་། ལྷོ་རིའི་གཡས་སུ་རྔ་ཡབ་དང་། གཡོན་དུ་རྔ་ཡབ་གཞན། ནུབ་རིའི་གཡས་སུ་གཡོ་ལྡན་དང་། གཡོན་དུ་ལམ་མཆོག་འགྲོ། བྱང་གི་གཡས་སུ་སྒྲ་མི་སྙན་དང་། གཡོན་དུ་སྒྲ་མི་སྙན་གྱི་ཟླ་ཞེས་གླིང་གཡོག་གཉིས་རེ་འགོད་ནས་རང་རང་གི་རྒྱུ་ནོར་དབྱིབས་དང་བཀོད་པ་སོགས་གཙོ་བོ་དང་ཉེ་བར་མཚུངས་པ་དང་རི་རབ་ཀྱི་ཕྱེད་ཆར་གླིང་བཞིའི་རིས་སླེབ་པ། གླིང་བཞིའི་རིའི་ཕྱེད་ཆར་གླིང་གཡོག་བརྒྱད་པོས་སླེབ་པ་གླིང་གཡོག་བརྒྱད་པོས་ཕྱེད་ཆར་ཕྱི་ལྕགས་རིས་སླེབ་པ་དེ་ལྟར་རྒྱ་དང་དཔངས་ལ་དཔག་ཚད་དུ་མ་དང་ལྡན་པ་གླིང་དེ་དག་གི་ཡུལ་ལྗོངས་ཆེན་པོ་ན་གནས་པའི་མི་དང་། དུད་འགྲོའི་རིགས་རྒྱུ་ནོར་ལོངས་སྤྱོད་བསམ་གྱིས་མི་ཁྱབ་པ་ཐམས་ཅད་ཀྱང་ཡོངས་སུ་དབུལ་བར་དམིགས་པ་དང་། དེ་ནས་ཤར་གླིང་གི་ནང་དུ་རིན་པོ་ཆེའི་སྣ་ཚོགས་ཀྱི་རི་བོ་རྒྱ་དང་དཔངས་ཚད་མེད་པ་གང་འདོད་ཡིད་བཞིན་དུ་འབྱུང་བ་དང་། དེ་བཞིན་ལྷོ་གླིང་དུ་དཔག་བསམ་གྱི་ཤིང་སྡོང་པོ་ཡལ་ག་ལོ་མ་མེ་ཏོག་འབྲས་བུ་ཐམས་ཅད་ཕུན་སུམ་ཚོགས་ཤིང་དགོས་འདོད་ཡིད་བཞིན་དུ་འབྱུང་བ་དང་། ནུབ་གླིང་དུ་འདོད་འཇོའི་བ་མདོག་དམར་སེར་གཟུགས་བཟང་ཞིང་ལྟ་ན་སྡུག་པ་འདོད་དགུ་འབད་མེད་དུ་འབྱུང་བ། བྱང་གླིང་དུ་མ་རྨོས་པ་ཡི་ལོ་ཏོག་ནངས་བརྔས་ན་ནུབ་སྐྱེས་པ་ནུབ་བརྔས་ན་ནངས་སྐྱེས་པ་སྙེ་མ་རེ་ལས་ཕུབ་མ་མེད་པ་འབྲས་བྲེ་བོ་ཆེ་དྲུག་རེ་འབྱུང་ཞིང་རོ་བཅུད་ནུས་པ་ཕུན་སུམ་ཚོགས་པ་ཅན་སོགས་ཡོད་པ་དང་། དེ་དག་ནི་གླིང་བཞིའི་ལོངས་སྤྱོད་ཁྱད་པར་འཕགས་པ་ཡིན་པས་གཅིག་ཙམ་མ་ཡིན་པར་གླིང་སོ་སོའི་ས་གཞི་གང་བ་ཙམ་དུ། གྲངས་མང་བ་རྒྱ་ཆེ་བ་མཐའ་ཡས་པར་གསལ་ནས་འབུལ་བར་དམིགས། དེ་བཞིན་ཤར་རིའི་མདུན་གྱི་སྟེང་དུ་འཁོར་ལོས་སྒྱུར་བའི་རྒྱལ་པོའི་བསོད་ནམས་ཀྱི་སྟོབས་ལས་བྱུང་བའི་འཛམ་བུའི་གསེར་ལས་གྲུབ་པའི་འཁོར་ལོ་རྩིབས་སྟོང་མུ་ཁྱུད་དང་ལྡན་པ་ཉི་བཞིན་འོད་ཟེར་འཕྲོ་བ། ཉིན་གཅིག་ལ་རྫུ་འཕྲུལ་གྱིས་དཔག་ཚད་འབུམ་ཕྲག་གི་ལམ་གཅོད་ཅིང་ནམ་མཁའ་ནས་གླིང་བཞི་དང་སུམ་ཅུ་རྩ་གསུམ་སོགས་བགྲོད་ནུས་མཁན་དང་། དཔག་བསམ་ཤིང་མདུན་ནོར་བུ་རིན་པོ་ཆེ་བཻཌཱུརྻ་ལས་གྲུབ་པ་ཟུར་བརྒྱད་པ་འོད་ཟེར་གྱིས་དཔག་ཚད་བརྒྱའི་ཁོར་ཡུག་ཉིན་མཚན་མེད་པར་གསལ་ལ། ཚ་གྲང་ཤིན་ཏུ་སྙོམས་ཞིང་དེ་ཕྱོགས་ཀྱི་ནད་དང་དུས་མིན་གྱི་འཆི་བ་སེལ་ཞིང་གང་བསམ་པ་ཕལ་ཆེར་འགྲུབ་པར་བྱེད་ནུས་པ། འདོད་འཇོའི་མདུན་བཙུན་མོ་རིན་པོ་ཆེ་གཞན་སེམས་པ། སེར་སྣ། མི་རིགས་པར་ཆགས་པ། མི་རིགས་པའི་གནས་ལ་དགའ་བ། ཁྱིམ་ཐབས་ཀྱི་སྲོག་གཅོད་པ་སྟེ་བུད་མེད་ཀྱི་སྐྱོན་ལྔ་དང་བྲལ་བ། བསམ་པ་མཐུན་པ། བུ་མང་པོ་བཙའ་བ། རིགས་མཐུན་པ། སྲིད་མཐོ་བ། ཕྲག་དོག་མེད་པ། ཚིག་ཀྱལ་མི་སྨྲ་བ། ལོག་ལྟ་མེད་པ། ཁྱིམ་ཐབས་མེད་ཀྱང་འདོད་ཡོན་གྱི་དབང་དུ་མི་འགྲོ་བ་སྟེ། ཡོན་ཏན་བརྒྱད་དང་ལྡན་པ་མཛེས་ཤིང་ལྟ་ན་སྡུག་པ། འདོད་པའི་སྒྱུ་རྩལ་དྲུག་ཅུ་རྩ་བཞི་ལ་མཁས་པ་རེག་པ་ཙམ་གྱིས་བདེ་བའི་མཆོག་དམ་པར་སྩོལ་ནུས་པ། མ་རྨོས་པའི་མདུན་བློན་པོ་རིན་པོ་ཆེ་སའི་བདག་པོའི་ཡིད་ལ་གང་བསམ་མ་སྨྲས་པར་ཤེས་ནས་སྒྲུབ་ལ་མཁས་པ། གཟུགས་བཟང་བ་དང་རྒྱུད་དྲང་ཞིང་བརླིང་བ་དང་སྟོབས་དང་དཔའ་རྩལ་ལྡན་པ་དཔུང་རྣམས་འགྲོ་གནས་ལྡོག་པ་ལ་མཁས་པ། དར་དང་རིན་པོ་ཆེ་སྣ་ཚོགས་ཀྱིས་བརྒྱན་པ་བཅས་སོ་སོར་གསལ། དེ་བཞིན་ཤར་ལྷོའི་གླིང་ཕྲན་བར་གླང་པོ་ཆེ་ཐལ་དཀར་མཆེ་བ་དྲུག་ལྡན་སྤྱི་གཙུག་དམར་ཞིང་མཐོ་བ་གདོང་ལ་ནོར་བུ་རིན་པོ་ཆེའི་དྲྭ་བས་གཡོགས་པས་གླང་ཆེན་ཕལ་པ་སྟོང་གི་སྟོབས་དང་ལྡན་པ་གཡུལ་ལས་རྒྱལ་བར་བྱེད་པ། ལྷོ་ནུབ་གླིང་ཕྲན་གཉིས་ཀྱི་བར་རྟ་མཆོག་རིན་པོ་ཆེ་མདོག་སྔོན་པོ་རྨ་བྱའི་མགྲིན་པའི་སྤུ་ལྟར་ཡིད་དུ་འོང་བ། ནད་མེད་ཅིང་གཟི་བརྗིད་ཆེན་པོ་དང་ལྡན་པ་ཁོ་ལག་ཡོངས་སུ་རྫོགས་ཤིང་མགྱོགས་པའི་བང་རྩལ་ཆེ་བས་འགྲོ་ན་འཛམ་གླིང་ལན་གསུམ་ཉིན་གཅིག་གིས་འཁོར་བའི་ཤུགས་འགྲོས་དང་ལྡན་པ། ནུབ་བྱང་གི་གླིང་ཕྲན་གཉིས་ཀྱི་བར་དམག་དཔོན་རིན་པོ་ཆེ་སྟོབས་དང་ལྡན་པ་སྒྱུ་རྩལ་དང་དམག་གི་འགྲོ་ལྡོག་དང་གཡུལ་གྱི་བྱ་བ་ལ་མཁས་པ། གོ་ཞུབ་ཀྱིས་སྤྲས་ཤིང་གཟི་བརྗིད་དང་ལྡན་པ་རིན་པོ་ཆེ་དང་གསེར་དངུལ་གྱི་བང་མཛོད་ནམ་ཡང་ཟད་པ་མེད་པས་སྐྱེ་བོ་རྣམས་རབ་ཏུ་དགའ་བར་བྱེད་པ། བྱང་ཤར་གྱི་གླིང་ཕྲན་གཉིས་ཀྱི་བར་གཏེར་གྱི་བུམ་པ་བཟང་པོ་བྲམ་ཟེ་དང་དྲང་སྲོང་རྣམས་ཀྱིས་རིགས་སྔགས་ཀྱི་མཐུ་ལས་གྲུབ་པ་ཟད་མི་ཤེས་པའི་དགོས་འདོད་ཡིད་བཞིན་དུ་འབྱུང་བ་བཅས་རྒྱལ་སྲིད་སྣ་བདུན་གསལ་ལ་ལྕགས་རི་ཡོད་ན་བར་མ་འདི་རུ་འགོད་པར་བྱ། དེ་བཞིན་ཤར་འཁོར་ལོའི་མདུན་སྒེག་མོ་མ་དཀར་མོ་མཛེས་ཤིང་ལྟ་ན་སྡུག་པ་ལང་ཚོ་རྒྱས་པའི་རྣམ་འགྱུར་ཅན་བསམ་གྱིས་མི་ཁྱབ་པར་སྟོན་ཅིང་ཤེལ་གྱི་མེ་ལོང་ཐོགས་ནས་འགྱིང་བ། ནོར་བུའི་མདུན་ཕྲེང་བ་མ་སེར་མོས་རིན་པོ་ཆེའི་ཕྲེང་བ་འཛིན་པ། བཙུན་མོའི་མདུན་གླུ་མ་དམར་མོས་སྙན་འགྱུར་དུ་མ་དང་ལྡན་པའི་གླུ་ལེན་ཅིང་ཕྱག་གིས་ཏིང་ཤག་འཛིན་པ། བློན་པོའི་མདུན་གར་མ་ལྗང་གུས་རྣམ་འགྱུར་དཔག་ཏུ་མེད་པ་མིག་འཕྲུལ་ལྟ་བུའི་གར་རྩེ་བ་སྟེ་ནང་སྒེག་བཞི་དང་། ཤར་ལྷོའི་གླང་ཆེན་མདུན་མེ་ཏོག་མ་དཀར་སེར་འགྱིང་སྟབས་ཀྱིས་མེ་ཏོག་སྣ་ཚོགས་འཛིན་པ། རྟ་མཆོག་མདུན་བདུག་སྤོས་མ་སྔོན་མོས་རང་བྱུང་གི་གདུག་སྤོས་འཛིན་པའི་དྲི་ངད་ཀྱིས་སྟོང་གསུམ་ཁྱབ་པ། དམག་དཔོན་མདུན་སྣང་གསལ་མ་དམར་མོས་ཏིལ་མར་དང་རྩི་མར་གྱི་མར་མེ་འཛིན་པས་ཉིན་བཞིན་འོད་ཀྱིས་གསལ་བར་བྱེད་པ། བུམ་པའི་སྟེང་དུ་དྲི་ཆབ་མ་ལྗང་གུས་དྲི་ཆབ་ཀྱི་དུང་ཞལ་འཛིན་པ་སྟེ་ཕྱི་སྒེག་བཞི་དང་། ཡང་སྒེག་མོའི་སྟེང་གི་ནམ་མཁར་ཉི་མའི་དཀྱིལ་འཁོར་འོག་གཞི་མེ་ཤེལ་དང་མཐའ་ཆགས་གསེར་ལས་གྲུབ་པ་དཔག་ཚད་ལྔ་བཅུ་ང་གཅིག་གི་རྒྱ་ཚད་མཉམ་པ་འོད་ཟེར་གྱིས་གླིང་བཞིའི་མུན་པ་སེལ་ཞིང་དྲོ་བའི་རེག་བྱ་དང་ལྡན་པ། གླུ་མའི་མདུན་མཁར་ཟླ་བའི་དཀྱིལ་འཁོར་ཆུ་ཤེལ་ལས་གྲུབ་པ་ལ་དངུལ་གྱི་མཐའ་ཆགས་ཅན་དཔག་ཚད་ལྔ་བཅུའི་ཚད་དང་ལྡན་པ་དྭངས་ཤིང་གསལ་བས་མུན་པ་སེལ་ཞིང་བསིལ་བའི་རང་བཞིན་དང་ལྡན་པ། གར་མའི་མདུན་རིན་པོ་ཆེའི་གདུགས་དཀར་པོ་གསེར་གྱི་ཡུ་བ་ཅན་གཡས་བསྐོར་དུ་དལ་བུས་རང་བཞིན་འཁོར་བ། ཕྲེང་བའི་མདུན་མཁར་ཕྱོགས་ལས་རྣམ་པར་རྒྱལ་བའི་རྒྱལ་མཚན་དྲང་ཞིང་ལྡེམ་པ་དར་སྣ་ཚོགས་ཀྱི་ཤམ་བུ་ཅན་བཅས་ཞིབ་པར་གསལ་ལ་སོ་སོར་མེ་ཏོག་བཀྲམ་ཞིང་ལྕགས་རི་གསུམ་པ་འགོད་ཏེ་མཐར་དེ་དག་གི་དབུས་དང་བར་མཚམས་རྣམས་སུ་ལྷ་མིའི་འབྱོར་བ་ཕུན་སུམ་ཚོགས་པ་མ་ཚང་བ་མེད་པས་ཕྱུར་བུར་བཀང་སྟེ་འབུལ་བའི་དམིགས་འདུན་རྣམས་ངེས་པར་གསལ་བཞིན་མེ་ཏོག་ཕྱུར་བུར་བཀང་ལ་ཏོག་འཛུག་ཅིང་། གུ་རུ་ཨི་དཾ་མཎྜལ་ཀཾ་ནིརྻ་ཏ་ཡཱ་མི། ཞེས་སོགས་བརྗོད་ཅིང་དེ་ནི་བོད་སྐད་དུ་བླ་མ་མཆོད་པའི་དཀྱིལ་འཁོར་འདི་དང་བདག་ཉིད་འབུལ་ལོ་ཞེས་པ་ཡིན། དེ་ལྟར་ལེགས་པར་ཕུལ་ནས་མཐར་སྨོན་ལམ་གདབ་པའི་རིམ་པ་ནི། མཉེས་བྱེད་མཎྜལ་བཟང་པོ་འདི་ཕུལ་བས། །ཞེས་སོགས་བརྗོད་ཅིང་དེའི་དོན་ནི། རྒྱལ་བ་མཉེས་བྱེད་ཀྱི་མཎྜལ་བླ་མེད་འདི་ཕུལ་བའི་མཐུས་བདག་གི་བྱང་ཆུབ་སྒྲུབ་པའི་བར་ཆད་མི་འབྱུང་བ་དང་། མཐུན་རྐྱེན་ཕུན་སུམ་ཚོགས་པ་དང་དུས་གསུམ་རྒྱལ་བ་ཐམས་ཅད་ཀྱི་ཐུགས་དགོངས་ཟབ་མོ་ཡོངས་སུ་རྫོགས་པ་དང་། བདག་གཞན་རྣམས་ཀྱང་སྲིད་པར་མི་འཁྲུལ་བར་རང་དོན་འགྲུབ་ནས་ཞི་བར་མི་གོལ་བར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་སྒྲོལ་ནུས་པར་ཤོག་ཅེས་སྨོན་ལམ་བཏབ་པ་ཡིན་པས་ཚིག་རྗེས་དོན་ཡོངས་སུ་འདྲེས་པར་བྱ་བའི་ངང་ནས་ཞིབ་པར་འབུལ་ཞིང་། དེ་ནས་གཡས་སུ་མཎྜལ་གྱི་འབྲུ་རྣམས་རིམ་གྱིས་དལ་བུས་བསྡུ་ནས་དེ་ལྟ་བུར་ལན་ལྔའམ་བདུན་སོགས་གང་རུང་འབུལ་བར་བྱའོ། །དེ་ནས་ཀློང་ཆེན་སྙིང་ཐིག་ལུགས་ལྟར་ན་སྐུ་གསུམ་གྱི་མཎྜལ་ལ། སྔར་ཚོམ་བུ་བཀོད་པའི་སྐབས་སུ་བཤད་པ་བཞིན་གཅིག་ཏུ་བརྩི་བས་སྟོང་གསལ་བ་ནི་སྟོང་དང་པོ་སྤྱི་ཕུད་ཀྱི་འཇིག་རྟེན་ཞེས་བྱ། དེ་འདྲ་བ་ཡང་སྟོང་སོང་བའི་ཚེ་སྟོང་གཉིས་པ་བར་མའི་འཇིག་རྟེན་ཞེས་བྱ། ཡང་དེ་འདྲ་བ་སྟོང་སོང་བའི་ཚེ་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཞིང་ཁམས་ཞེས་བྱ་བ་ཡིན་ཏེ། དེ་དག་ནི་སངས་རྒྱས་ཤཱཀྱ་ཐུབ་པའི་འདུལ་ཞིང་མི་མཇེད་འཇིག་རྟེན་གྱི་ཁམས་ཞེས་སྤྲུལ་སྐུ་གཅིག་གི་འདུལ་ཞིང་ཡིན་པར་གསུངས། དེ་ལྟ་བུའི་ཞིང་ཁམས་བསམ་གྱིས་མི་ཁྱབ་པ་དག་ན་ལྷ་མིའི་ཡོ་བྱད་དཔལ་འབྱོར་ཇི་སྙེད་ཡོད་པའི་སྟེང་དུ་རང་གི་ལུས་ལོངས་སྤྱོད་བསོད་ནམས་ཁ་རྗེ་དབང་ཐང་དང་དུས་གསུམ་དུ་བསགས་པའི་དགེ་རྩ་དང་བཅས་ཆགས་ཞེན་ཏིལ་འབྲུ་ཙམ་མེད་པར་སྤུངས་ཏེ་བླ་མ་སྤྲུལ་པའི་སྐུའི་ལྷ་ཚོགས་ལ་འབུལ་བར་དམིགས་ཏེ་ཚོམ་བུ་བསྡུས་པ་དགུ་ཙམ་བཀོད་པ་ནི་ཐུན་མོང་སྤྲུལ་སྐུའི་མཎྜལ་ཡིན་ནོ། །དེའི་སྟེང་ན་བཀོད་པ་ཆེན་པོ་ལྔའི་ཞིང་ཁམས་ན་སྒེག་སོགས་འདོད་ཡོན་ལྷ་མོ་གྲངས་མེད་པས་བརྒྱན་པ་མཆོད་པའི་སྤྲིན་མཐའ་ཀླས་པ་བཅས་ལོངས་སྐུའི་ལྷ་ཚོགས་ལ་འབུལ་བར་དམིགས་ནས་ཚོམ་བུ་བསྡུས་པ་ལྔ་ཙམ་བཀོད་པ་སོགས་ནི་ཐུན་མིན་ལོངས་སྐུའི་མཎྜལ་ཡིན། དེའི་སྟེང་ན་ཆོས་དབྱིངས་སྐྱེ་བ་མེད་པ་མཎྜལ་གྱི་ཚུལ་དུ་བཞག་ནས་སྣང་བཞི་ལ་སོགས་གང་ཤར་ཐམས་ཅད་ཚོམ་བུའི་ཚུལ་དུ་བཀོད་དེ་བླ་མ་ཆོས་སྐུའི་ལྷ་ཚོགས་ལ་འབུལ་བར་དམིགས་ནས་ཚོམ་བུ་བསྡུས་པ་གསུམ་ཙམ་བཀོད་པ་སོགས་ནི་ཁྱད་པར་ཆོས་སྐུའི་མཎྜལ་ཉིད་ཡིན་ཞིང་། དེ་ལྟར་སྐུ་གསུམ་གྱི་མཎྜལ་གྲངས་ཅི་འགྲོ་བྱ་བའམ། རྒྱུན་དུ་གྲངས་གསོག་པའི་ཚེ་མཎྜལ་ཚོམ་བུ་བདུན་པ་ཞེས་བྱ་བ་ས་གཞི་སྤོས་ཆུ་སོགས་བརྗོད་ནས་གླིང་བཞི་རི་རབ་ཉི་ཟླ་བཅས་ཚོམ་བུ་བདུན་དུ་བཀོད་དེ་དམིགས་པའང་དེ་ལྟར་རགས་པའི་ཁོངས་སུ་གཏོགས་པའི་ཕྱིར་བསྡུས་ཙམ་གསལ་ནས་འབུལ་བར་བྱས་ཤིང་གྲངས་སོགས་ཆད་ལྷག་མ་སོང་བར་ཞིབ་ཀྱིས་གསོག་པར་བྱའོ། །ཕུལ་ཟིན་པའི་འབྲུ་རྣམས་ཀྱང་ཐུན་མཚམས་ནས་རྟེན་དྲུང་དུ་སྤུངས་པའམ་བྱ་སྤྲང་ལ་སྦྱིན་པ་སྟེར་ནའང་ལྷག་ཏུ་ལེགས་ཤིང་། མིན་ཀྱང་དམིགས་རྟེན་དུ་བསྐྱར་ནའང་རུང་ཞིང་དོན་དུ་འབུལ་ཡུལ་དང་འབུལ་རྒྱུ་སོགས་སེམས་ཀྱི་དམིགས་པ་ཟབ་མོ་རང་ལ་གཙོ་བོར་བཏོན་ཏེ་ཚོགས་ཡོངས་སུ་རྫོགས་དགོས་པ་ཡིན་པས་ན། དེའི་ཕྱིར་ཚོགས་རྫོགས་པའི་རྟགས་སུ་ཆོས་མང་དུ་ཤེས་ཤིང་སྔར་བརྗེད་པའང་དྲན་པ་དང་། ཉི་ཟླ་ཤར་ཞིང་མེ་ཏོག་གི་ཚལ་དུ་འགྲོ་བ་དང་། གོས་གསར་པ་གྱོན་ཞིང་རྒྱན་བཏགས་པ་དང་། མཎྜལ་མེ་ལོང་ཕྱི་ཞིང་བལྟ་བ་དང་། དུང་འབུད་རོལ་མོ་དཀྲོལ་ཅིང་། རྔ་བོ་ཆེ་བརྡུང་བ་དང་། ལྷ་ཁང་མཐོང་བ་སོགས་དངོས་ཉམས་རྨི་ལམ་གྱི་རིམ་པ་མ་བྱུང་གི་བར་དུ་དད་འདུན་རྣམ་པར་དག་པའི་སྒོ་ནས་གཙང་སྦྲ་དང་ལྡན་པས་འབུལ་བར་བྱ་དགོས་ཤིང་། དེ་ལྟ་བུ་ལེགས་པར་ཕུལ་བས་གནས་སྐབས་མཐར་ཐུག་གི་ཕན་ཡོན་གྱི་རིམ་པ་ནི། རྒྱུད་ལས། སངས་རྒྱས་ཞིང་ཁམས་ཐམས་ཅད་ལ། །སྟོང་གསུམ་ཞིང་ཁམས་མ་ལུས་པ། །འདོད་པའི་ཡོན་ཏན་བརྒྱན་པ་ཡིས། །མཆོད་པ་སངས་རྒྱས་ཡེ་ཤེས་རྫོགས། །ཞེས་དང་། རི་ཆོས་ལས། སྐྱེ་བ་འདི་ནས་ཚེ་རབས་ཀུན། །བདེ་སྐྱིད་འབྱུང་བའི་རྒྱུ་གཅིག་པུ། །བསོད་ནམས་ཚོགས་ནི་བསགས་དགོས་ཏེ། །མཐར་ཐུག་སངས་རྒྱས་ཐོབ་དུས་ཀྱང་། །མཚན་དང་དཔེ་བྱད་བརྒྱན་པའི་སྐུ། །བསོད་ནམས་ཚོགས་ལས་བྱུང་བ་ཡིན། །ཞེས་དང་། རིན་ཆེན་ཕྲེང་བ་ལས། གཟུགས་ཀྱི་སྐུ་ནི་མདོར་བསྡུ་ན། །བསོད་ནམས་ཚོགས་ལས་འཁྲུངས་པ་སྟེ། །ཆོས་ཀྱི་སྐུ་ནི་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་དང་། ཀླུ་སྒྲུབ་ཀྱིས། བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག །ཅེས་སོགས་མཐའ་ཡས་པར་གསུངས་པ་ལྟར། མདོར་བསྡུ་ན་གནས་སྐབས་སུ་ཚེ་དང་བསོད་ནམས་འབྱོར་ཚོགས་ཐམས་ཅད་རྒྱས་པ་དང་བསམ་དོན་ལྷུན་གྱིས་འགྲུབ་ཅིང་མཐའ་རུ་ཕྱིན་པ་དང་། མཐར་ཐུག་ས་ལམ་གྱི་ཡོན་ཏན་ཐམས་ཅད་གོང་ནས་གོང་དུ་འཕེལ་ཞིང་སངས་རྒྱས་ཀྱི་སྐུ་གཉིས་མངོན་དུ་འགྱུར་བར་བྱེད་པ་སོགས་ཕན་ཡོན་བསམ་གྱིས་མི་ཁྱབ་པ་གསུངས་པ་དག་ལས་མདོ་དོན་ཡོངས་སུ་བསྡུས་པ་ཡིན་པས་ན་ཚིག་དོན་ཙམ་ནི་ལྷག་པར་ཤེས་པར་བྱ་དགོས་སོ།། ༈ །།དེ་ནས་བླ་མའི་རྣལ་འབྱོར་གྱི་རིམ་པ་ནི། དེའི་མཚན་དོན་འབྲེལ་ཙམ་ཞིག་འགོད་ན། རྒྱལ་བ་སྲས་བཅས་ཀྱི་ཕྲིན་ལས་ཀྱི་ཕོ་ཉ་གདུལ་བྱའི་དཔལ་དུ་ཤར་བས་ན་བླ། ཉམ་ཐག་སེམས་ཅན་ཐམས་ཅད་འཕྲལ་ཡུན་ཕན་བདེའི་ལམ་ཁོ་ན་ལ་བཀྲི་བས་ན་མ་ཞེས་པ་དང་། དེ་ལྟར་ཐུགས་རྗེ་བྱིན་རླབས་ཡོན་ཏན་གྱི་རང་བཞིན་བླ་མའི་སྐུ་སྒོམ་ཞིང་མཚན་བསྙེན་བཟླས་པ་དང་གསོལ་བ་རྩེ་གཅིག་ཏུ་བཏབ་པའི་སྟོབས་ཀྱིས་ཐུགས་རྒྱུད་ཀྱི་བྱིན་རླབས་རྣམས་ཉེ་བར་འཕོས་ནས་རྣལ་མའི་གནས་ལུགས་ཀྱི་ཡེ་ཤེས་འཁྲུལ་བྲལ་རང་གི་རྒྱུད་ལ་མྱུར་དུ་འབྱོར་བར་བྱེད་པས་ན་བླ་མའི་རྣལ་འབྱོར་ཅེས་པ་ཡིན་ཞིང་། དེ་ལྟ་བུའི་ལམ་སྟོན་མཁན་ནི་འགྲོ་བ་ལྷ་དང་བཅས་པ། སྐྱེ་དགུའི་བདག་པོ་ཚངས་པ་སོགས་ཀྱིས་སྟོན་མི་ནུས་པ་དང་། རང་ཉིད་ལ་བརྩེ་བའི་ཕ་མ་དང་། གཉེན་བཤེས་གྲོགས་དགའ་མཛའ་ལ་སོགས་ཀྱིས་སྟོན་མི་ནུས་ཏེ། འཁོར་ལོ་བདེ་བའི་རྒྱུད་ལས། དེ་ཕྱིར་ཆོས་ཀུན་རྩ་བ་ནི། །བླ་མ་རྡོ་རྗེ་འཛིན་པ་བཤད། །བླ་མ་དག་ལས་མ་བྱུང་བའི། །དངོས་གྲུབ་རྣམས་ནི་འབྱུང་མི་སྲིད། །བླ་མ་ཉིད་ལས་མ་བྱུང་བའི། །སངས་རྒྱས་ཞེས་བྱ་འབྱུང་མི་སྲིད། །སྲིད་པའི་ཁ་ལོ་གྱེན་དུ་ནི། །བླ་མ་མཚན་ཉིད་ལྡན་པས་བསྒྱུར། །ཞེས་དང་། དགོངས་འདུས་ལས། གང་དག་མུན་པར་འཁྱམས་པ་ལ། །བདེ་ཆེན་སྣང་བའི་ལམ་སྟོན་མཁན། །སྐྱབས་ཆེན་བླ་མ་དེ་ཉིད་ལས། །གཞན་གྱིས་སྐྱོབ་པར་ནུས་མ་ཡིན། །ཞེས་དང་། ཇི་སྐད་དུ། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ཅེས་དང་། ཀྱེ་རྡོ་རྗེ་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མས་དུས་ཐབས་བསྟན་པ་དང་། །བདག་གི་བསོད་ནམས་ལས་ཤེས་བྱ། །ཞེས་གསུངས་པ་ལྟར་དཔེར་ན་གྲུ་པ་མེད་ན་ཆུའི་ཕ་རོལ་དུ་ཕྱིན་མི་ནུས་བཞིན་བླ་མ་མེད་ན་འཁོར་བའི་རྒྱ་མཚོ་ལས་མི་སྒྲོལ། དེ་བཞིན་ལོང་ཁྲིད་བྱེད་མཁན་མེད་ན་ལམ་དུ་ཕྱིན་མི་ནུས་བཞིན་བླ་མ་མེད་ན་ཐར་པའི་ལམ་མི་རྙེད། དེ་བཞིན་ཉི་ཟླ་མེད་ན་མུན་ཚོགས་མི་སེལ་བ་བཞིན་བླ་མ་མེད་ན་ཉོན་མོངས་པའི་སྒྲིབ་པ་མི་སེལ། མིག་ཡོད་པས་མ་བསྟན་ན་མི་ཤེས་བཞིན་བླ་མས་ཆོས་མ་བསྟན་ན་ཆོས་ངོ་མི་ཤེས་བཞིན་འཇིག་རྟེན་གྱི་རྒྱལ་པོ་ཕ་མ་སོགས་ཀྱིས་སྟོན་མི་ནུས་པའི་འཕྲལ་ཡུན་ཀུན་ཏུ་བདེ་ཞིང་དོན་གཉིས་འགྲུབ་པ་དང་། དགེ་སྡིག་བླང་དོར་གྱི་མིག་འབྱེད་པ་དང་། ཐར་པའི་ལམ་ཡང་དག་པ་སྟོན་པའི་བླ་མ་ནི་ལྷག་ཏུ་བརྩེ་གདུང་འབྲལ་མེད་ཀྱི་སྒོ་ནས་བསྟེན་པར་འོས་པའི་རང་བཞིན་ཅན་ཏེ་ཕྱི་རོལ་པའི་མེ་ལྔ་སོགས་ལ་བསྟེན་ཏེ་དཀའ་བ་དཔག་ཏུ་མེད་པ་སྤྱད་པས་ན། བདེ་བ་ནས་བདེ་བར་ཁྲིད་པའི་བླ་མ་དེར་བདག་གིས་གུས་པ་དང་བསྙེན་བཀུར་ཅིའི་ཕྱིར་མི་བྱེད་སྙམ་དུ་བློ་རྒྱ་བསྐྱེད་དེ་བསྟེན་པར་རིགས་སོ། །ཚེ་འདིའི་རྒྱལ་པོ་ལའང་རྒྱུ་ནོར་གཅེས་དགུ་དམར་དགུ་ཐམས་ཅད་འབུལ་བ་དང་། འཇིག་རྟེན་པའི་བཟོ་རིགས་ལ་བསྙེན་བཀུར་བྱེད་པ་དང་། འདུ་བ་སྙོམས་པའི་སྨན་པ་ལའང་མཆོད་ཅིང་བསྟོད་ནས་དྲིན་ཆེ་བར་རློམ་ན། སེམས་ཅན་སངས་རྒྱས་སུ་བསྒྲུབས་དུས་ཡུན་གྱི་གཏན་སྲིད་སྟེར། དུག་ལྔའི་གཅོང་ནད་རྩ་བ་ནས་འབྱིན་པའི་བླ་མ་དེ་བདག་གིས་གུས་པ་དང་བསྙེན་བཀུར་ཅིའི་ཕྱིར་མི་བྱེད་སྙམ་དུ་བློ་རྒྱ་བསྐྱེད་དེ་བསྟེན་པར་རིགས་སོ། །ཉིན་ཞག་རེའི་འཇིགས་པ་སྐྱོབ་ཕྱིར་སྐྱེལ་བསུ་བྱེད་པ་དང་། ཟས་གོས་ནོར་སོགས་ཕྲན་བུ་ཐོབ་ཕྱིར་རྩོལ་སྒྲུབ་དང་དཀའ་སྤྱད་རི་ཙམ་ནུས་མཁན་དང་། གཉེན་འདུན་གྲོགས་ལའང་དགའ་སྤྲོ་ལྡན་པས་རྒྱུ་ནོར་ཐམས་ཅད་བསྔོ་བར་ནུས་ན། བདུད་བཞིའི་དགྲ་ལས་སྐྱོབ། དགོས་འདོད་ནོར་བུ་སྟེར། གཏན་བདེའི་གྲོགས་མཆོག་དམ་པའི་ཆོས་ཟབ་མོ་རང་ངོར་སྤྲོད་པའི་བླ་མ་དེར་གུས་པ་དང་བསྙེན་བཀུར་ཅིའི་ཕྱིར་མི་བྱེད་སྙམ་དུ་བློ་རྒྱ་བསྐྱེད་དེ་བསྟེན་པར་རིགས་སོ། །མདོར་ན་གནས་སྐབས་ཚེ་འདིའི་ཟས་གོས་ནོར་དང་འཇིགས་པ་ཕྲན་བུ་སྐྱོབ་པ་ལའང་བཀའ་དྲིན་ཤིན་ཏུ་ཆེ་བས་དྲིན་ལན་འཇལ་དགོས་སྙམ་པ་ཀུན་གྱིས་བྱེད་དར་ན། འཁོར་བ་སྡུག་བསྔལ་མཐའ་དག་ལས་རིང་དུ་བསྒྲལ་ཏེ་གཏན་གྱི་བདེ་བ་ཕུན་སུམ་ཚོགས་པ་སྟེར་བའི་བཀའ་དྲིན་ནི་སྟོང་གསུམ་གསེར་གྱིས་བཀང་ནས་འབུལ་ཡང་གཞལ་བར་ག་ལ་ནུས་ཏེ། དེ་ལྟ་བུའི་བླ་མ་དེ་བསྟེན་ནས་བྱིན་རླབས་འཇུག་པར་བྱ་བ་ལ་དད་པ་དང་དག་སྣང་གི་སྒོ་ནས་ལྷག་ཏུ་ཤེས་པར་བྱ་བ་ལ་ལྔ་སྟེ། བླ་མའི་གསང་བ་གསུམ་སངས་རྒྱས་སྐུ་དངོས་སུ་མཐོང་བ་དང་གཅིག །ཆོས་དང་འཇིག་རྟེན་བཟང་ངན་གྱི་རྣམ་པ་ཇི་མཛད་ཐམས་ཅད་སངས་རྒྱས་ཀྱི་མཛད་ཕྲིན་རོ་གཅིག་ཏུ་ཤེས་པ་དང་གཉིས། ཡོན་ཏན་སངས་རྒྱས་དང་མཉམ་ཡང་རང་ངོར་སངས་རྒྱས་ལས་ཀྱང་བཀའ་དྲིན་ལྷག་ཏུ་ཆེ་བར་ཤེས་པ་དང་གསུམ། བཀའ་དྲིན་ཅན་གྱི་བླ་མ་དེ་སྐྱབས་གནས་ཀུན་འདུས་ཀྱི་སྤྱི་གཟུགས་ཡིན་པར་ཤེས་པ་དང་བཞི། ལམ་རྐྱེན་གཞན་ལ་རག་མ་ལུས་པར་གསོལ་བ་སྙིང་ནས་འདེབས་མཁན་ལ་རྟོགས་པ་ཡེ་ཤེས་གཅིག་ཆར་དུ་འཕོ་བར་ཤེས་དགོས་པ་དང་ལྔའོ། །དེ་བཞིན་དོན་དུ་སེམས་ཅན་མོས་པ་ཐ་དད་སྣ་ཚོགས་འདུལ་ཕྱིར་ཞི་བས་འདུལ་བ་ལ་ཞི་བའི་ཆོས་འདོམས་པ་དང་། སྦྱིན་པས་འདུལ་བ་ལ་ཡོ་བྱད་འགྱེད་པ་དང་། དབང་གིས་འདུལ་བ་ལ་དབང་དུ་བསྡུ་བ་དང་། དྲག་པོས་འདུལ་བ་ལ་སྡིགས་འཚེ་རྔམ་པོ་ཆེ་མཛད་ནས་འདུལ་བ་དང་། དེ་བཞིན་རྡོ་རྗེའི་རིགས་རྣམས་གསང་བ་གསུམ་སྤྲོས་མེད་ཤིན་ཏུ་ཞི་བ་དང་། རིན་ཆེན་རིགས་རྣམས་སྒེག་ཆོས་དང་རྒྱན་ནོར་སྣ་ཚོགས་ལ་ལོངས་སྤྱོད་པ་དང་། པདྨའི་རིགས་རྣམས་འགྲོ་བ་གང་ལ་གང་འདུལ་སྟོན་ཅིང་ཡུམ་དང་བཅས་པ་དང་། ལས་ཀྱི་རིགས་རྣམས་དྲག་ཤུལ་གཏུམ་རྔམ་ཆེ་བ་སོགས་མདོར་ན་འགྲོ་བ་གང་ལ་གང་འདུལ་གྱི་ཕྲིན་ལས་གཅིག་ཏུ་མ་ངེས་པར་བཟང་ངན་བར་མ་དོ་རྣམ་པ་སྣ་ཚོགས་སྟོན་པས་ན་ནོར་རྫས་ལ་སྲེད་པ་ཆེ་སྙམ་པ་དང་། རང་དོན་ང་རྒྱལ་སེར་སྣ་ཆེ་བ་དང་། བརྣབ་སེམས་ཁོང་ཁྲོ་ཉོན་མོངས་ཧྲག་ཡུམ་དང་བཅས་པ་དང་། རིགས་གཟུགས་ངན་ཅི་ཡང་མི་ཤེས་སྙམ་པ་སོགས་སྐད་ཅིག་ཙམ་ངག་ཏུ་བརྗོད་པའམ། དེ་ལྟར་མ་གུས་པའི་རྣམ་པ་ལུས་ཀྱི་སྤྱོད་པ་ལྟ་ཞོག །སྐད་ཅིག་ཙམ་ཡིད་ཀྱིས་དྲན་པའམ་རྨི་ལམ་དུའང་རྨིས་པར་མི་བྱ་སྟེ་ཉེས་པ་ལས་ཀྱང་ཉེས་པ་ཤིན་ཏུ་ལྕི་བའི་ཕྱིར་ཡོངས་སུ་ཟླུམ་ནས་ལུས་ངག་ཡིད་གསུམ་འདུན་པ་ཆིག་དྲིལ་གྱི་སྒོ་ནས་ལེགས་པར་བསྟེན་དགོས་པའི་རང་བཞིན་སྟེ། དང་པོ་ལུས་ཀྱི་སྒོ་ནས་མ་གུས་པའི་རྣམ་པ་སྤང་བྱ་ནི་མདོར་ན་བླ་མའི་སྐུ་དང་གྲིབ་མ། བཞུགས་གདན་ན་བཟའ་སོགས་མི་འགོམ། མདུན་དུ་སྐྱིལ་ཀྲུང་བཅའ་བ་དང་། སྒེག་ཆོས་དང་ཆེ་ཚུལ་གྱི་རིགས་ཉམས་སྟོན་པ་དང་། རྒྱབ་བསྟན་པ། གཞོགས་སྔས་བྱེད་པ། རྐང་པ་བརྐྱང་པ་སོགས་མདོར་ན་མ་གུས་པའི་རྣམ་པ་སྐུའི་གྲིབ་མ་འགོམ་པ་ཚུན་ཆོད་ཡོངས་སུ་ཟླུམ་སྟེ་གུས་འདུད་ཆེན་པོའི་སྒོ་ནས་བསྟན་དགོས་པའི་རང་བཞིན་ཏེ། དགོངས་འདུས་ལས། སློབ་མར་གྱུར་ནས་ངས་སེམས་ཀྱིས། །དམ་པ་དེ་ལ་བརྙས་བྱེད་གང་། །སངས་རྒྱས་ཀུན་ལ་བརྙས་པས་ན༑ །དེ་དག་སྤྱི་གཙུག་དམྱལ་བར་འགྲོ། །བཀའ་བཅག་སྐུ་བརྙས་ཐུགས་དཀྲུགས་ན། །མི་བཟད་སྡུག་བསྔལ་མྱོང་བར་འགྱུར། །ཚེ་འདིར་རྒྱལ་པོའི་ཆད་པ་སོགས། །ཉེས་པ་ཐམས་ཅད་དེ་ལས་འབྱུང་། །ཞེས་པ་ལྟར་ཉེས་པ་ལྕི་བའི་རིགས་དེ་དག་ཐམས་ཅད་སྤང་སྟེ། ཕན་ཡོན་གྱི་མཆོག་རབ་ཤེས་པའི་སྒོ་ནས་གུས་འདུད་ཆེན་པོའི་ལེགས་པར་བསྟེན་དགོས་ཏེ། ཡེ་ཤེས་རྒྱ་མཚོའི་རྒྱུད་ལས། གང་གིས་བླ་མའི་བྱ་བ་ལ། །མཁས་པའི་སྐལ་ལྡན་གང་ཡིན་དེ། །དུས་གསུམ་སངས་རྒྱས་ཐམས་ཅད་ལ། །བསྐལ་པ་བྱེ་བ་དྲུག་འབུམ་དུ། །ཕྱག་བྱས་པས་ནི་འདི་དོན་ཆེ། །ཞེས་གསུངས་པ་ལྟར་ལུས་ཀྱི་ལས་གཞན་དུ་མངགས་པ་དང་། ཉེར་མཁོ་གང་དགོས་ཀྱི་རིགས་དང་མེ་ཆུ་གཡང་དང་། གཅན་གཟན་ནམ་དགྲ་རྐུན་གྱི་འཇིགས་པ་ཐམས་ཅད་ལས་སྲུང་ཞིང་ཕེབས་སྐྱེལ་དང་བསུ་བ་བྱེད་པ་དང་ཕྱག་དང་སྐོར་བ་སོགས་བྱེད་ནས་གཞན་སྐུ་ཡི་བཞུགས་སྟངས་ཚུན་སློབ་ཤེས་པས་བསྟེན་དགོས་སོ། །ངག་གི་རྫུན་དང་ཕྲ་མ་ཚིག་རྩུབ་དང་ངག་འཁྱལ། བཀའ་བཅོག་པ་དང་གདོང་བཟློག་པ་ལྐོག་ནས་གཤེ་བ་དང་ཐ་ན་ཀུ་རེ་རྩེ་མོ་སོགས་སྤངས་ཏེ་ངག་རབ་ཏུ་གུས་པར་བྱ་དགོས་ཏེ། གསང་བ་རོལ་པ་ལས། བླ་མ་མཆོག་ལས་རང་ཉིད་ནི། །ཆེས་མཆོག་རློམ་སེམས་སྨྲ་བའམ། །ལྐོག་འཕྱའི་སྨྲ་བ་གང་བྱེད་པ། །རྡོ་རྗེ་དམྱལ་བ་ཉིད་དུ་ཚུད། །ཀུ་རེ་ཙམ་ཡང་སྨོས་མི་བྱེད། །ངག་གི་ཉེས་བྱས་ཡང་དག་བསྡོམ། །ཞེས་གསུངས་པ་ལྟར་ཉེས་པ་ལྕི་བའི་རིགས་དེ་དག་ཐམས་ཅད་སྤང་སྟེ་ཕན་ཡོན་གྱི་མཆོག་རབ་ཤེས་པའི་སྒོ་ནས་ངག་གུས་པ་ཆེན་པོ་བྱ་དགོས་ཏེ། དགོངས་འདུས་ལས། བཀའ་ཟུར་མ་བཅག་ཆོས་བསྒྲུབ་ན། །ཆོས་སྐྱོང་སྲུང་མ་མཐུ་ཆེན་རྣམས། །བུ་བཞིན་རྟག་ཏུ་སྲུང་བྱེད་ནས། །འདོད་པའི་དངོས་གྲུབ་ཡིད་བཞིན་འབྱུང་། །ཞེས་གསུངས་པ་ལྟར་གསོལ་འདེབས་དང་ཞབས་བརྟན་བསྟོད་པ་དང་སྐྱབས་འགྲོ་སོགས་རྒྱུན་དུ་དབྱངས་སྙན་པོས་འདོན། ཚིག་ཆེ་ཕྲ་ཐམས་ཅད་དྲང་གཏམ་ཁོ་ནའི་འཇམ་པོ་དང་སྙན་པོ་གསོང་པོར་སྨྲ། ཅི་གསུང་གི་བཀའ་ཐམས་ཅད་སྒྲུབ་པའི་ལན་སྙན་པོར་འབུལ་ཞིང་གསུང་ཚིག་གཅིག་བསྟན་པ་ཚུན་དུས་ནམ་ཡང་ཆུད་མི་གཟན་པར་ཞིབ་ཀྱིས་བསྒྲུབ་པར་བྱ་དགོས་སོ། །ཡིད་ཀྱི་སྒོ་ནས་མ་དད་པ་ལོག་པར་ལྟ་བ་དང་ཁོང་ཁྲོ་བ་སྐྱོན་དུ་བཏགས་པ་དང་། བརྙས་སེམས། འགྲན་སེམས། བརྣབ་སེམས། གནོད་སེམས། ང་རྒྱལ་སྐྱེད་པ་ལྟ་ཅི་ཐ་ན་རྨི་ལམ་དུའང་སྐྱོན་མཐོང་བ་སོགས་ཀྱི་རིགས་སྤངས་ཏེ་ཡིད་རབ་ཏུ་གུས་པར་བྱ་དགོས་ཏེ། དཔུང་བཟློག་པའི་རྒྱུད་ལས། བླ་མ་དང་ནི་དེ་ཡི་འཁོར། །ཁྲོ་བའི་ཞེ་འགྲས་སུན་འབྱིན་པ། །བསྐལ་པ་ཞིང་གི་རྡུལ་སྙེད་དུ། །མནར་མེད་གནས་སུ་ཚུད་པར་འགྱུར། །ཞེས་པ་ལྟར་ཉེས་པ་ལྕི་བའི་རིགས་དེ་དག་ཡོངས་སུ་སྤངས་ཏེ་ཕན་ཡོན་ཆེ་བར་ཤེས་པའི་སྒོ་ནས་ཕལ་པ་གཞན་དག་ལས་འབུམ་འགྱུར་གྱིས་ལྷག་པར་མདོག་ནག་པོ་ཞིག་དཀར་པོ་ཡིན་གསུངས་ན་དེ་ལྟར་མངོན་སུམ་མཐོང་བའི་དོན་གཉེར་དང་དག་སྣང་། དད་པ་དང་མོས་གུས་ཀྱི་ངང་ནས་བླ་མའི་ཕྱི་ནང་གསང་གསུམ་གྱི་ཡོན་ཏན་རྣམས་ཤེས་བཞིན་དུ་སྐུ་སྒོམ་པ་དང་མཐའ་ན་མུན་པར་གློག་འཁྱུག་པའམ་ཉི་མས་ཚིག་པ་ལ་རླུང་སེར་བུ་འགྱུ་བ་སོགས་ཀྱང་ཐུགས་རྗེ་ཡིན་པ་དང་། བཀའ་དྲིན་ཆེ་བ་རྣམས་ལྷག་ཏུ་དྲན་ནས་དུས་དང་རྣམ་པ་ཀུན་ཏུ་ཡིད་ཁྱེད་ཤེས་ཀྱི་མོས་གུས་དུང་ངེ་བ་དང་མ་འབྲལ་བའི་སྒོ་ནས་བསྟེན་དགོས་ཏེ། དད་པ་འཁོར་ལོ་རིན་པོ་ཆེ། །ཉིན་མཚན་དགེ་བའི་ལམ་ལ་སྦྱོར། །ས་དང་ལམ་གྱི་རིམ་པ་རྣམས། །བླ་མའི་མོས་གུས་ཁོ་ནས་འདུམ། །ཞེས་གསུངས་པ་སྟེ་རྒྱུ་ནོར་རྫས་དང་ཟས་གོས་ཀྱི་རིགས་ཆེ་ཞིང་ཆེ་བ་ཕྲ་ཞིང་ཕྲ་བ་གང་ཡོད་ཐམས་ཅད་ཀྱང་བླ་མ་དང་ཆོས་ཕྱོགས་སུ་གཏོང་གང་འགྲུབ་བྱས་ན་ཕན་ཡོན་མཆོག་ཏུ་ཆེ་བའི་རང་བཞིན་ཏེ། ཡེ་ཤེས་རྒྱ་མཚོའི་རྒྱུད་ལས། ཇི་ལྟར་དགེ་སློང་ཁྲིམས་ལྡན་པ། །འབུམ་ཕྲག་དྲུག་ཅུ་རྩ་གཉིས་ལ། །སྟོན་མོ་ལན་བདུན་བྱས་པ་བས། །བླ་མའི་ཞལ་དུ་འབྲས་ཆེན་འབྲུ། །རྡོག་མ་བདུན་དྲང་བསོད་ནམས་ནི། །བརྒྱ་སྟོང་ཁྲི་འབུམ་ཆར་མི་ཕོད། །ཅེས་དང་། གསང་འདུས་ལས། ཕྱོགས་བཅུ་དུས་གསུམ་གྱི་སངས་རྒྱས་མཆོད་པ་བས། བླ་མའི་བ་སྤུའི་ཁུང་བུ་གཅིག་མཆོད་པ་བསོད་ནམས་ཆེའོ། །ཞེས་དང་། དགོངས་འདུས་ལས། ཆོས་ཀུན་མི་ཤེས་མ་རྟོགས་ཀྱང་། །མཚན་ཉིད་བཟང་ལྡན་བླ་མ་ལ། །བཀུར་སྟི་རིམ་གྲོ་ཆེར་བྱས་ན། །འཁོར་བའི་རྒྱ་མཚོ་བརྒལ་བར་འགྱུར། །དཔེར་ན་ཞིང་རབ་གཤིན་པོ་ལ། །ས་བོན་གང་བཏབ་རྒྱས་འཕེལ་བཞིན། །ཞེས་སོགས་གསུངས་པ་ལྟར་དགེ་བའི་འབྲས་བུ་ཡང་སྔོན་བསྐལ་པ་བཟང་ལྡན་གྱི་དུས་རྣམ་རྟོག་ཤས་ཆུང་བས་ན། དགེ་སྡིག་དལ་བའི་ཚེ་འབྲས་བུ་ནམ་ཞིག་གཞན་དུ་སྨིན་པ་གཞི་ཆེ་ཞིང་། དེང་སང་དུས་སྙིགས་མ་རྟོག་པ་ཧྲག་པས་ཚེ་འདི་གར་ལས་ཀྱི་མཐོང་ཆོས་སུ་སྤྱིར་སྨིན་ལ། ཡུལ་མཆོག་དང་འབྲེལ་ན་ཟླ་བས་མ་ཆོད་པར་དངོས་སུ་སྨིན་པ་མདོ་སྡེ་དག་ལས་གསུངས་པ་བཞིན་ལྷག་ཏུ་ཤེས་པར་བྱ་བ་དང་། དེ་དག་ལས་ཀྱང་རབ་སྒྲུབ་པའི་ཞབས་ཏོག་ཅེས་བླ་མའི་བསྟན་བྱ་གཅིག་པུ་སློབ་མའི་བསྒྲུབ་བྱའི་གཙོ་བོ་ཡིན་གཤིས་དབེན་པའི་གནས་སུ་དཀའ་སྤྱད་དང་བརྩོན་འགྲུས་ཤེས་རབ་ཕུན་སུམ་ཚོགས་པ་དང་ལྡན་པའི་སྒོ་ནས་རང་དོན་ཉམས་མྱོང་རྟོགས་པས་ཡོངས་སུ་ཕྱུག་པར་བྱ་དགོས་པ་དང་། གཞན་དོན་དུ་སེམས་ཅན་གང་ལ་གང་འདུལ་གྱི་ཆོས་ཀྱི་འཁོར་ལོ་བསྐོར་བ་དང་། རྒྱལ་བའི་སྐུ་གསུང་ཐུགས་རྟེན་བཞེངས་པ་སོགས་མདོར་ན་རྩ་བའི་བླ་མའི་ཐུགས་དགོངས་ཟབ་མོ་མཉེས་ཤིང་རྫོགས་པའི་ཕྱིར་དུ་སྒྲུབ་པ་ལ་དུས་འདའ་བ་བྱས་ནས། མཉེས་པ་གསུམ་གྱི་སྒོ་ནས་བསྟེན་མཁས་པར་བྱ་དགོས་ཏེ། དགའ་རབ་རྡོ་རྗེས། བླ་མ་མཆོག་གིས་བཀའ་སྩལ་པ། །གལ་ཏེ་ཉེས་པའི་སྐྱོན་རིགས་ཀྱང་། །ཇི་སྐད་སྨྲས་པ་དེ་བཞིན་བྱ། །དེ་བཞིན་བླ་མའི་བྱ་བ་ལ། །ལུས་ཀྱི་སྡུག་བསྔལ་ཅི་བྱུང་ཡང་། །རང་གི་གང་ནུས་འབད་པར་བྱ། །བླ་མའི་ཐུགས་ནི་སྐད་ཅིག་ཙམ། །དཀྲུགས་པར་བྱ་བ་མ་ཡིན་ནོ། །བླ་མའི་རྫས་དང་ནོར་རྣམས་ལ། །རང་གི་སྲོག་ལ་ཕངས་པ་བཞིན། །རྣལ་འབྱོར་པས་ནི་རྟག་ཏུ་བྱ། །གལ་ཏེ་བླ་མའི་ཞིང་ཁམས་སུ། །ཆོས་བཤད་དབང་བསྐུར་རབ་གནས་དང་། །བསམ་གཏན་སྒོམ་པར་བྱ་བ་རྣམས། །རྗེས་མ་གནང་བར་མི་བྱའོ། །མདོར་ན་ལུས་དང་ངག་ཡིད་ཀྱི། །བྱ་བའི་རྣམ་པ་ཅི་སྤྱད་ཀྱང་། །བླ་མར་མ་ཞུས་མ་གནང་བར། །ཅུང་ཟད་ཙམ་ཡང་མི་བྱའོ། །ཞེས་དང་། དགོངས་འདུས་ལས། སྐྱོ་དུབ་མེད་པའི་དད་པ་དང་། །གྱོང་འཁེང་མེད་པའི་མཉེན་ལྕུག་དང་། །སེར་སྣ་མེད་པའི་ཟང་ཟིང་དང་། །སོམ་ཉི་མེད་པའི་སྲི་ཞུ་དང་། །གཡོ་སྒྱུ་མེད་པའི་དྲང་སྐད་དང་། །དྲི་མ་མེད་པའི་ལྷག་བསམ་སོགས། །དམ་པ་དེ་ལ་རྫོགས་པར་འབུལ། །ཞེས་དང་། ཡོན་ཏན་མཛོད་ལས། བླ་མའི་འཁོར་དང་རྡོ་རྗེའི་སྤུན་ལ་བསྙེན། །རྫིང་བུ་མཆོག་ལ་བརྟེན་པའི་ངང་པ་དང་། །བུང་བས་མེ་ཏོག་བཅུད་ལ་རོ་མྱོང་བཞིན། །རྟག་ཏུ་འགྲོགས་པའི་སྤྱོད་པ་ངོ་མཚར་ཅན། །སྐྱོ་ངལ་མེད་པ་བླ་མའི་ཐུགས་བཟུང་ནས། །དད་པའི་ཉེ་བར་ལེན་པས་ཡོན་ཏན་འགོ། །ཞེས་གསུངས་པ་ལྟར་ལེགས་པར་བསྟེན་པར་བྱའོ། །དེ་ལྟར་བླ་མ་ཚུལ་བཞིན་བསྟེན་པའི་ཕན་ཡོན་ཀྱང་ཚད་མེད་དེ་ཡང་དག་པའི་ལམ་དུ་ཁྲིད་པ་དང་། ཐེ་ཚོམ་ཐམས་ཅད་སེལ་བ་དང་། རྟོགས་པ་རྒྱུད་ལ་འཆར་བ་དང་། སྡུག་བསྔལ་གྱི་རིམ་པ་ཞི་བ་དང་། འཁོར་བའི་འདམ་ལས་འབྱིན་པ་དང་། མ་རིག་པའི་མུན་ཚོགས་སེལ་བ་དང་། ཡོན་ཏན་གྱི་གཏེར་རྡོལ་བ་དང་། དངོས་གྲུབ་ཀྱི་བཅུད་འགེང་བ་དང་། བླང་དོར་གྱི་མིག་འབྱེད་པ་དང་། དག་པའི་ཞིང་སོགས་ལ་བགྲོད་ནུས་པ་དང་། ཚེ་རབས་ཀུན་ཏུ་དགེ་བའི་བཤེས་གཉེན་ཡང་དག་པས་རྗེས་སུ་བཟུང་བ་སོགས་ཕན་ཡོན་མཆོག་ཏུ་ཆེ་བས་ལྷག་པར་ཤེས་པར་བྱ་བ་སྔོན་དུ་སོང་ནས། དེ་ལྟར་རྟོགས་པའི་ཡེ་ཤེས་རང་རྒྱུད་དུ་བཙན་ཐབས་སུ་འཕོ་བའི་མན་ངག་ཀུན་གྱི་མཐར་ཐུག་པ་ནི་བླ་མའི་རྣལ་འབྱོར་གྱི་རིམ་པ་ཉིད་མཆོག་ཏུ་ཟབ་པ་ཡིན་ཏེ། ཅི་ཕྱིར་ཞེ་ན་བྱིན་རླབས་དང་དངོས་གྲུབ་ཐམས་ཅད་ཀྱི་འབྱུང་གནས་ཆེན་པོ་ནི་སྤྲོས་བྲལ་བདེ་བར་གཤེགས་པའི་སྙིང་པོ་ཉིད་ཡིན་ལ། དེ་ལྟ་བུ་དབྱེར་མེད་རྟོགས་ཤིང་མཆོག་ཐུན་མོང་གི་དངོས་གྲུབ་ཡོངས་སུ་བརྙེས་པས་བྱིན་རླབས་ཀྱི་ཚན་ཁ་འབར་བ་ནི་བླ་མ་རང་ལས་གཞན་འོས་སུ་ནམ་ཡང་མ་མཆིས་ཤིང་། བྱིན་རླབས་དེ་ལྟ་བུ་གང་ཟག་སོ་སོའི་སྐྱེ་བོའི་རང་རྒྱུད་ལ་འཇུག་པར་བྱ་བའི་ཐབས་ཟབ་མོ་ནི་དད་པ་དང་མོས་གུས་ཀྱི་ཉེར་ལེན་ཁོ་ནའི་ལམ་ནས་དྲངས་དགོས་པ་ཡིན་ཞིང་། དགོས་ཆེད་ནི་རང་གནས་ཀྱི་ཡེ་ཤེས་ངོ་མ་འཕྲོད་པའམ་མ་སྨིན་པ་སྨིན་པར་བྱེད་པའི་བྱིན་རླབས་ཀྱི་སྙིང་པོ་ཡོངས་སུ་ཐོབ་ཡོང་བའི་ཕྱིར་དཔེར་ན་མཆན་ལ་ཕབ་བཏབ་པའི་རྐྱེན་གྱིས་རོ་བཅུད་ནུས་པ་ཐམས་ཅད་དུས་མྱུར་བ་ཉིད་དུ་མངོན་སུམ་སྟོན་ཡོང་བ་ལྟར་རམ། ཉི་མའི་ཟེར་མེ་ཤེལ་གྱིས་མཚམས་སྦྱོར་བས་སྤྲ་བ་ལ་མེ་ཐོགས་མེད་འབྱུང་བ་ལྟར་ཡིན་ཏེ། ཇི་སྐད་དུ། བརྗོད་བྲལ་ལྷན་ཅིག་སྐྱེས་པའི་ཡེ་ཤེས་དེ། །ཚོགས་བསགས་སྒྲིབ་པ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བསྟེན་པ་རྨོངས་པ་ཤེས་པར་བྱ། །ཞེས་དང་། ཨཱ་ལི་ཀཱ་ལིའི་རྒྱུད་ལས། དུས་རྣམས་ཀུན་ཏུ་བླ་མའི་རྣལ་འབྱོར་ལ། །ཡུན་དུ་བསྲིང་སྟེ་འབུང་བར་མ་གཏོགས་པར། །བསྐྱེད་རྫོགས་ལ་སོགས་བྱ་བ་མང་པོས་ཀྱང་། །དག་པའི་སྣང་བ་ལམ་དུ་འབྱོང་བར་དཀའ། །ཞེས་དང་། ཇི་སྐད་དུ། གཡོ་མེད་མོས་གུས་ཟླ་དྲུག་གིས། །རྡོ་རྗེ་འཆང་གི་ས་ཐོབ་འགྱུར། །ས་དང་ལམ་གྱི་རིམ་པ་རྣམས། །བླ་མའི་མོས་གུས་ཁོ་ནས་འདུམ། །ཞེས་དང་། འབྲི་གུང་སྐྱོབས་པས། བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་རྒྱུན་མི་འབེབ་པས། །སེམས་མོས་གུས་འདི་ལ་ནན་ཏན་མཛོད། །ཅེས་དང་། འཇིགས་གླིང་པས། སྒོམ་བསྲན་པ་འཇིག་རྟེན་པའི་བསམ་གཏན་ལས་ན་མི་འཕར། མོས་གུས་ཅན་ལ་གནས་ལུགས་ཀྱི་གསང་ལ་ཐེབ་པ་ཤ་སྟག་འབྱུང་། ཞེས་སོགས་དུ་མ་མཐའ་ཡས་པར་གསུངས་པ་ལྟར་ངེས་ཤེས་ཁྱད་འཕགས་ལྷག་པར་བསྐྱེད་དེ། སྒོམ་པ་དངོས་ཀྱི་སྐབས་སུ། དེ་ལྟར་དད་པ་དང་མོས་གུས་ཀྱི་སྒོ་ནས་བླ་མ་སྒྲུབ་པའི་བྱིན་རླབས་ཀྱི་རིམ་པ་དབང་བཞི་ཞུ་བ་ལ། རྣམ་པ་བསྒྱུར་བ་དང་མི་བསྒྱུར་བ་གཉིས་ཡོད་དེ། གང་ཟག་རབ་དད་པ་དག་སྣང་ཆེ་བ་རྣམས་ཀྱིས་རྣམ་པ་བསྒྱུར་མི་དགོས་ཏེ་བླ་མའི་སྐུ་དང་ན་བཟའ་རྒྱན་ཆས་སོགས་ཇི་ལྟར་འདུག་པ་དེ་ལྟར་བསྒོམས་པས་མཆོག་ཏུ་ཟབ་པ་ཡིན། གཞན་ལས་དང་པོ་པ་རྣམས་ཀྱིས་ཐ་མལ་མིའི་རྣམ་པར་སྒོམ་ན་ལོག་རྟོག་གིས་བྱིན་རླབས་འཇུག་པའི་གེགས་བྱེད་པ་ཡིན་པས་རྣམ་པ་མ་བསྒྱུར་བས་སངས་རྒྱས་སྐུ་དངོས་སུ་མི་མཐོང་བས་བསྒྱུར་དགོས་པར་གསུངས་པས། དེ་ལྟར་བསྒྱུར་བ་ལ་སྣང་སྲིད་དག་པ་རབ་འབྱམས་གཞིར་བཞུགས་སུ་ཡོད་པའི་དཀྱིལ་འཁོར་དེ། ལམ་གྱི་དུས་འདིར་གཞིར་བཞེངས་སུ་གསལ་འདེབས་དགོས་པ་ཡིན་པས། སེམས་ཅན་ཐམས་ཅད་ཀྱི་འགྲོ་འདུག་བྱ་བའི་ཡུལ་རྟེན་གཞི་མ་དག་པའི་སྣང་བ་རྣམས་གང་ལའང་མི་དམིགས་པས་སྟོང་པ་ཉིད་དུ་སྦྱངས་ནས་པདྨ་འོད་ཀྱི་ཕོ་བྲང་རྒྱ་ཁྱོན་མཚན་ཉིད་བཀོད་པ་ཡོངས་སུ་རྫོགས་པ་ལེགས་པར་གསལ་བའི་དབུས་སུ་རང་ཉིད་དབང་གི་ཡེ་ཤེས་སྐྱེ་བའི་རྟེན་མཆོག་ཏུ་གྱུར་པ་དང་གུ་རུ་རིན་པོ་ཆེས་རྗེས་སུ་འཛིན་པའི་རྟེན་འབྲེལ་གྱི་ཁྱད་པར་དུ། ངོ་བོ་ཡེ་ཤེས་མཚོ་རྒྱལ་ལ་རྣམ་པ་རྗེ་བཙུན་རྡོ་རྗེ་རྣལ་འབྱོར་མ་སྟེ་ཤེས་རབ་མཚོན་བྱེད་སྐུ་མདོག་དམར་གསལ་གཅེར་བུ་དབྱིངས་ཡེ་དབྱེར་མེད་རྟོགས་པའི་བརྡར་སྤྱན་གསུམ་རིངས་པའི་ཚུལ་གྱིས་གཟིགས་པ། ཕྱག་གཡས་པས་འགྲོ་བ་རྣམས་གཏི་མུག་གི་གཉིད་ལས་སློང་བའི་ཕྱིར་ཐོད་རྔ་འཁྲོལ་བ། གཡོན་དུག་གསུམ་རྩད་གཅོད་ཀྱི་གྲི་གུག་དཀུར་བརྟེན་པ། རུས་པའི་རྒྱན་ལྔ་དང་མེ་ཏོག་གི་ཆུན་འཕྱང་གིས་བརྒྱན་ཅིང་དར་དཔྱངས་འཕྱང་བ་མཛེས་ཤིང་ལྟ་ན་སྡུག་པ་བཅུ་དྲུག་ལོན་པའི་ན་ཚོད་ཅན་སྣང་ལ་རང་བཞིན་མེད་པ་ནམ་མཁའི་འཇའ་ཚོན་ལྟར་གསལ་ལེགས་པར་བཏབ་ནས། སྤྱི་བོར་མདའ་གང་གི་ནམ་མཁར་རིན་པོ་ཆེ་སྣ་ཚོགས་ལས་གྲུབ་པའི་པདྨ་འབུམ་བདལ། དེ་སྟེང་སྲིད་ཞིའི་དྭངས་བཅུད་ཐབས་ཤེས་མཚོན་བྱེད་ཉི་ཟླའི་དཀྱིལ་འཁོར་གྱི་དབུས་ན། དུས་གསུམ་སངས་རྒྱས་ཐམས་ཅད་འདུས་པའི་ངོ་བོ། མཁྱེན་བརྩེ་ནུས་གསུམ་གྱི་བདག་ཉིད། དཔལ་ལྡན་རྩ་བའི་བླ་མ་ཉིད་ཡིན་པ་ལ། རྣམ་པ་ཨོ་རྒྱན་རྡོ་རྗེ་འཆང་ཆེན་པོར་བདེ་སྟོང་འདུ་འབྲལ་མེད་པས་རྟག་ཏུ་མྱོས་པའི་ཕྱིར་སྐུ་མདོག་དཀར་ལ་དམར་མདངས་ཅུང་ཟད་ཆགས་པ། ན་བཟའ་ལའང་བྱང་སེམས་ཀྱི་ཐེག་པ་རྫོགས་པའི་རྟགས་སུ་གསང་གོས་དཀར་པོ་དང་འདུང་མ་དམར་པོ། སྔགས་ཀྱི་ཐེག་པ་རྫོགས་པའི་རྟགས་སུ་སྔགས་པའི་ཆས་གོས་ཕོད་ཆེན་མཐིང་ག །སོ་ཐར་གྱི་ཐེག་པ་རྫོགས་པའི་རྟགས་སུ་ཆོས་གོས་དམར་སེར་གསེར་གྱི་ཧ་རིས་ཏེ་རི་མོ་ཕྱི་ནང་མ་བསྒྲིབས་པ་ཅན། ཐེག་པ་མ་ལུས་པ་ཡོངས་སུ་སྐུ་ལ་རྫོགས་པའི་རྟགས་སུ་ཟ་འོག་གི་བེར་དམར་སྨུག་དང་བཅས་པ་བརྩེགས་མར་གསོལ་བ། དབུ་ལ་ནི་ཟ་ཧོར་རྒྱལ་པོས་ཕུལ་བའི་པད་ཞུ་མནབས་པ་སྟེ་དེའང་བསྐྱེད་རྫོགས་ཟུང་འཇུག་གི་བརྡར་ཕྱི་ནང་གཉིས། སྐུ་གསུམ་མཚོན་བྱེད་ཡར་རྩེ་གསུམ། སྐུ་ལྔའི་འགྲོ་དོན་མཛད་པའི་བརྡར་ཁ་དོག་ལྔའི་མཐའ་ཆགས། ཐབས་ཤེས་དབྱེར་མེད་ཀྱི་བརྡར་གསེར་དངུལ་གྱི་ཉི་ཟླས་བརྒྱན་པ། དམ་ཚིག་མུ་མཐའ་མེད་པའི་བརྡར་མུ་ཁྱུད་མཐིང་གའི་སྒྲིལ། ཏིང་ངེ་འཛིན་གཡོ་བ་མེད་པའི་བརྡར་གསེར་གྱི་རྡོ་རྗེ་ཕྱེད་པའི་ཏོག །ལྟ་བའི་ཡང་རྩེར་ཕྱིན་པའི་རྟགས་རྒོད་ཀྱི་རྩེ་སྒྲོ་དང་རྨ་བྱའི་སྒྲོ་མདོངས་ཀྱིས་བརྒྱན་པ། ཕྱག་གཡས་གསེར་གྱི་རྡོ་རྗེ་ཐུགས་ཀ་ན་སྡིགས་མཛུབ་ཀྱི་ཚུལ་དུ་འཛིན་པ། གཡོན་མཉམ་བཞག་གི་སྟེང་ན་ཀ་པཱ་ལ་ཚེ་རིལ་གྱིས་གང་བའི་སྟེང་དུ་འཆི་མེད་བདུད་རྩིའི་བཅུད་ཀྱིས་གཏམས་པའི་ཚེ་བུམ་དཔག་བསམ་གྱིས་ཁ་རྒྱན་ཅན་འཛིན་པ། ཞབས་གཉིས་སག་ལྷམ་གསོལ་ཞིང་རྒྱལ་པོ་རོལ་པའི་སྟབས་སུ་བརྗིད་ཆགས་པར་བཞུགས་པ། མཆན་ཁུང་གཡོན་ན་ཡུམ་མནྡཱར་བ་སྦས་པའི་ཚུལ་གྱི་ཁ་ཊྭཱཾ་ག་འཛིན་པ། དེ་ཡང་ངོ་བོ་རང་བཞིན་ཐུགས་རྗེ་གསུམ་གྱི་མཚོན་བྱེད་ཡར་གྱི་རྩེ་གསུམ། སྐུ་གསུམ་གྱི་མཚོན་བྱེད་པ་སྐམ་རློན་རྙིད་གསུམ། རྭ་ལ་ཐེག་དགུའི་མཚོན་བྱེད་ལྕགས་ལུང་དགུ །ཡེ་ཤེས་ལྔའི་མཚོན་བྱེད་དར་ཚོན་སྣ་ལྔ། དུར་ཁྲོད་ཆེན་པོ་བརྒྱད་དུ་བརྟུལ་ཞུགས་ཀྱིས་མ་མོ་མཁའ་འགྲོ་ཐམས་ཅད་དབང་དུ་སྡུད་པའི་རྟགས་ཤི་སྐྲ་དང་གསོན་སྐྲས་བརྒྱན་པ་སོགས་དེ་དག་རྣམས་མ་འདྲེས་པ་ཡོངས་སུ་རྫོགས་པ་གསལ་གདབ་ཅིང་། དེའི་མཐའ་སྐོར་དུ་འོད་ལྔའི་དྲྭ་བ་མིག་མང་རིས་ཀྱི་གཟེབ་ཏུ་འཇའ་འོད་ཟླུམ་འཁྱིལ་ཁྲ་སྤུང་ངེ་བའི་དབུས་ན། རྒྱ་གར་གྱི་རིག་འཛིན་བརྒྱད་དང་བོད་ཀྱི་རྗེ་འབངས་ཉེར་ལྔ་སོགས་བཀའ་གཏེར་གྱི་བླ་མ་རྣམས་དང་། རྩ་གསུམ་དམ་ཅན་རྒྱ་མཚོ་ཁྲོམ་མང་ཚོགས་པ་ལྟ་བུར་མངོན་སུམ་བཞུགས་པར་གསལ་ལ་ངག་འདོན་གང་ཡིན་པ་དང་རིམ་པར་འབྲེལ་ནས་མོས་གུས་གདུང་ཤུགས་དྲག་པོ་ཡང་ཡང་བསྐྱེད་ནས་ཚིག་བདུན་གསོལ་འདེབས་སོགས་བརྗོད་པའི་རྐྱེན་གྱིས་ཨོ་རྒྱན་རིན་པོ་ཆེ་གཙོ་འཁོར་རྟེན་བརྟེན་པ་དང་བཅས་མངོན་སུམ་ཉིད་དུ་བྱོན་ནས་བསྐྱེད་པའི་དམ་ཚིག་པ་དང་གཉིས་སུ་མེད་པར་ཆུ་ལ་ཆུ་འདྲེས་པ་ལྟ་བུར་གྱུར་ཅིང་བཞུགས་པའི་སྤྱན་སྔར། ཚོགས་བསགས་པའི་སྒོ་མཐའ་ཡས་པ་ཡན་ལག་བདུན་པ་འདིར་འདུས་ཤིང་། དེ་ལྟར་ཕུལ་བ་ལ་དང་པོ་ང་རྒྱལ་གྱི་གཉེན་པོ་ཕྱག་འཚལ་བའི་རིམ་པ་ནི། བཟང་སྤྱོད་ལས། བཟང་པོ་སྤྱོད་པའི་སྨོན་ལམ་སྟོབས་དག་གིས། །སོགས་ཞེས་གསུངས་པ་ལྟར་ཕྱག་འཚལ་བའི་ཚུལ་དངོས་ནི། ཐར་མདོ་ལས། པདྨ་ཁ་འབུས་བྱེ་འདྲ་བས། །སོགས་ཞེས་གསུངས་པ་ལྟར་རང་གཞན་སེམས་ཅན་ཐམས་ཅད་ལུས་གྲངས་མེད་ལ་མགོ་གྲངས་མེད། མགོ་གྲངས་མེད་ལ་ལྕེ་དཔག་མེད། ལྕེ་དཔག་མེད་ཀྱིས་བསྟོད་པའི་དབྱངས་གྲངས་མེད་སྤྲུལ་ནས་ཆབས་ཅིག་ཏུ་ཕྱག་འཚལ་བ་དང་། ངག་གིས་འུར་དིར་རེ་སྐྱབས་འགྲོའི་ཚིག་དབྱངས་སྙན་པོ་དང་བཅས་ཏེ་འདོན་པ་དང་། ཡིད་ཀྱིས་བློ་གཏད་ལིང་སྐྱུར་གྱི་གསོལ་བ་བཏབ་པ་སོགས་རང་གཞན་སྒོ་གསུམ་འཇུག་པ་གཅིག་པས་དམིགས་པ་དང་བཅས་ཏེ་ཕྱག་འཚལ་དགོས་ཏེ། ངལ་གསོའི་འགྲེལ་བ་ལས། ས་འདི་རིར་བཅས་རྒྱ་མཚོའི་རྡུལ་སྙེད་དུ། །བསོད་ནམས་དེ་འདྲ་འཇིག་རྟེན་གསུམ་ན་མེད། །ལུས་བཏུད་དབང་ཆེན་ས་ཡི་རྡུལ་རྣམས་དང་། །མཉམ་པའི་གྲངས་སྙེད་འཁོར་ལོའི་སྒྱུར་རྒྱལ་འགྲོ། །མཐར་ཐུག་ཞི་བ་མཆོག་གི་གོ་འཕང་ཐོབ། །ཅེས་གསུངས་པ་ལྟར་ཕན་ཡོན་མཆོག་ཏུ་ཆེའོ། །གཉིས་པ་འདོད་ཆགས་དང་སེར་སྣའི་གཉེན་པོ། མཆོད་པ་འབུལ་བ་ནི། བཟང་སྤྱོད་ལས། མེ་ཏོག་དམ་པ་ཕྲེང་བ་དམ་པ་དང་། །སོགས་གསུངས་པ་ལྟར་དང་། ངལ་གསོ་ལས། མེ་ཏོག་སྤོས་དང་མར་མེ་ཞལ་ཟས་ཆུ། །བླ་བྲེ་འཕན་ལྡིང་གདུགས་དང་རོལ་མོའི་སྒྲ། །རྒྱལ་མཚན་རྔ་ཡབ་རྫ་རྔ་ལ་སོགས་པ༑ །ལུས་དང་ལོངས་སྤྱོད་མཁོ་དགུའི་ཡོ་བྱད་ཀྱིས། །འགྲོ་བའི་བླ་མ་དཀོན་མཆོག་སྲས་བཅས་མཆོད། །ཅེས་གསུངས་པ་ལྟར་མཆོད་རྫས་ཅི་འབྱོར་བའི་རིགས་གྱ་ནོམ་པ་རྣམས་ཤིན་ཏུ་གཙང་སྦྲ་དང་ཡིད་དུ་འོང་བར་བཤམ་བཀོད་མཛེས་པར་བྱས་ལ་དངོས་སུ་འབུལ་བར་བྱ་བ་དང་། ཡིད་སྤྲུལ་སོགས་ནི། མཆོད་པའི་ལྷ་མོ་བརྒྱད་ཀྱིས་མཆོད་རྫས་སྣ་ཚོགས་སོ་སོར་ཐོགས་པ་དང་། རྒྱལ་སྲིད་སྣ་བདུན་བཀྲ་ཤིས་རྫས་བརྒྱད་དང་། ལྷམ། སྟན། བཞོན་པ། མལ་ཆ། ཁྲི། རལ་གྲི། ལྤགས་པ་སྟེ་ཉེ་བའི་རིན་ཆེན་བདུན་དང་། གཞན་ཡང་གཞལ་ཡས་ཁང་རིན་པོ་ཆེའི་དྲྭ་ཕྱེད་དང་། གླུ་གར་དང་། སིལ་སྙན། པི་ཝཾ་དང་བསྟོད་པའི་དབྱངས་སྙན། མེ་ཏོག་གི་རིགས་སྣ་ཚོགས་པའི་ཆར་འབབ་པ་དང་། རིན་པོ་ཆེའི་རིགས་དང་། སྨན་ཤིང་ནགས་ཀྱི་ཚལ་ཆེན་པོ། རྒྱ་མཚོ་ངང་པས་བརྒྱན་པ། སྨན་རིགས་སྤོས་རིགས་དྲི་ཞིམ་ངད་ལྡན་ཅན་རོ་བཅུད་ནུས་པར་ལྡན་པ། བྲག་རི། སྤང་ལྗོངས། ཆུ་བསིལ། རྫིང་བུ། ནམ་མཁའ་དྭངས་པ། ཉི་ཟླ་གཟའ་སྐར་བཀྲ་བ་དང་བཅས་པ་ནམ་མཁའི་ཁམས་ཐམས་ཅད་གང་བར་དམིགས་ཏེ་འབུལ་བར་བྱ་དགོས་ཏེ། སངས་རྒྱས་མང་བྱེད་ཀྱི་མདོ་ལས། གང་ཞིག་རྒྱལ་བ་རྣམས་འདྲེན་ལ། །བྱ་བ་ཆུང་ངུར་སྤྱད་གྱུར་པ། །དེ་དག་མཐོ་རིས་སྣ་ཚོགས་དག །བགྲོད་ནས་བྱང་ཆུབ་ཐོབ་པར་གྱུར། །ཞེས་གསུངས་པ་ལྟར་ཕན་ཡོན་མཆོག་ཏུ་ཆེའོ། །གསུམ་པ་ཞེ་སྡང་གི་གཉེན་པོ་སྡིག་པ་བཤགས་པ་ནི། བཟང་སྤྱོད་ལས། འདོད་ཆགས་ཞེ་སྡང་གཏི་མུག་དབང་གིས་ནི། །སོགས་ཅེས་གསུངས་པ་ལྟར་སྡིག་པ་བསགས་པའི་སྒོ་དྲུག་སྟེ་ལུས་ངག་ཡིད་གསུམ་དང་། ཉོན་མོངས་དུག་གསུམ་དང་། ཡུལ་ནི་ཕ་མ་དང་། བླ་མ་མཁན་པོ། སློབ་དཔོན། མཆེད་གྲོགས་སོགས་ལ། ངོ་བོ་ནི་མི་དགེ་བཅུ། མཚམས་མེད་ལྔ། ཉེ་བ་ལྔ། ལྕི་བ་བཞི། ལོག་པ་བརྒྱད་ལ་སོགས་པ་རང་གི་དངོས་སུ་སྤྱོད་པའམ། གཞན་ལ་བྱེད་དུ་བཅུག་པའམ། བྱེད་པ་ལ་བློ་ཡིས་རྗེས་སུ་ཡི་རང་བ་དང་བཅས་ཏེ། དུས་ཀྱང་ཐོག་མ་མེད་པ་ནས་དེང་གི་ཕན་ཆད་དུ་བསགས་པའི་མི་དགེ་བའི་རིགས་སུ་གྱུར་པ་ཀུན་བཤགས་པས་སོར་ཆུད་པར་བྱེད་པ་གལ་ཅི་ནས་ཆེ་བས། དེ་ལྟར་སྔར་བྱས་ཐམས་ཅད་ལ་དུག་ཁོང་དུ་སོང་བ་ལྟར་ཕྱི་འགྱོད་དྲག་པོ་བྱས་པས་སྡིག་པ་སུན་འབྱིན་པའི་སྟོབས་དང་། སྡིག་སྒྲིབ་ཀྱི་རྣམ་པ་མ་ལུས་པ་ནག་ཕུང་ངེར་ལྕེ་ཐོག་ཏུ་འདུས་ནས། བླ་མའི་མཛོད་སྤུ་ལས་ཡེ་ཤེས་ཀྱི་མེ་ལྕེ་འཕྲོས་པས་ཡོངས་སུ་བསྲེགས་ཐལ་སྙམ་པ་ནི་གཉེན་པོ་ཀུན་ཏུ་སྤྱོད་པའི་སྟོབས་དང་། ཕྱིན་ཆད་སྡིག་པ་གཏན་ནས་མི་བྱེད་པར་ཡོངས་སུ་སྡོམ་པའི་དམ་བཅའ་བྱེད་པ་ནི་སོར་ཆུད་པའི་སྟོབས་དང་། སྡིག་པ་ཡོངས་སུ་དག་པར་གྱུར་སོང་སྙམ་པའི་ངེས་ཤེས་དང་བཅས་པ་ནི་རྟེན་གྱི་སྟོབས་ཏེ་གཉེན་པོ་སྟོབས་བཞི་ཚང་བའི་སྒོ་ནས་ལེགས་པར་བཤགས་དགོས་པ་དང་། ཁྱད་པར་སྡིག་པའི་ངོ་བོར་ཇི་ལྟར་གནས་འདུག་ཞིབ་པར་དཔྱད་དེ་ངོ་བོ་ཆེར་མ་རྙེད་པ་ནམ་མཁའ་ལྟ་བུ་རྟོགས་པའི་ངང་དེར་ཡོངས་སུ་མཉམ་པར་བཞག་པས་སྡིག་པ་ལྷག་མེད་དུ་ཤུགས་ཀྱིས་སངས་འགྲོ་སྟེ། མདོ་ལས། དྲང་པོར་འདུག་ལ་ཡང་དག་བལྟ། །སོགས་ཞེས་གསུངས་པ་ལྟར་ཏེ། ཇི་སྐད་དུ། སྡིག་པ་ལ་ཡོན་ཏན་མེད་ཀྱང་བཤགས་པས་འདག་པ་སྡིག་པའི་ཡོན་ཏན་ཡིན། ཞེས་གསུངས་པ་ལྟར་ཕན་ཡོན་མཆོག་ཏུ་ཆེའོ། །བཞི་པ་ཕྲག་དོག་གི་གཉེན་པོ་རྗེས་སུ་ཡི་རང་བ་ནི། བཟང་སྤྱོད་ལས། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །སོགས་ཞེས་གསུངས་པ་ལྟར་འཇིག་རྟེན་ཕལ་དང་། ཉན་ཐོས་དང་། རང་སངས་རྒྱས་བྱང་སེམས་འཕགས་པའི་ཚོགས་དང་། རྒྱལ་བ་རྫོགས་པའི་སངས་རྒྱས་སྲས་དང་སློབ་མར་རྗེས་འཇུག་དང་བཅས་པས་དུས་གསུམ་ན་བསགས་པའི་རྣམ་དཀར་གྱི་དགེ་ཚོགས་ཆེ་ཕྲ་མ་ལྟོས་པར་ཡོད་དོ་ཅོག་ཀུན་ལ་བསམ་པ་རྣམ་པར་དག་པས་རྗེས་སུ་ཡི་རང་ཆེན་པོས་བློ་རྒྱ་བསྐྱེད་དེ་རབ་ཏུ་དགའ་བ་བསྒོམས་ན། དེའི་སྟོབས་ཀྱིས་རང་གི་དགེ་བ་གང་བསགས་པ་རྣམས་ནམ་ཡང་ཆུད་མི་ཟ་ཞིང་། དགེ་རྩ་འགྱུར་སྐྱེད་ཐོན་པ་དང་། བསོད་ནམས་ཚད་མེད་པ་མཉམ་པོར་ཐོབ་པ་སོགས་ཀྱི་གནད་འགག་དུ་མ་ཡོད་དེ། སྡུད་པ་ལས། སྟོང་གསུམ་རི་རབ་གསེར་གྱིས་བཀང་ཡང་ནི། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །ནོར་བུ་མཆིང་བུའི་ཕུང་པོ་ཆེན་པོར་གྱུར་པ་ཡང་། །རིན་ཆེན་བཻཌཱུརྻ་གཅིག་དེ་ཀུན་ཟིལ་གྱིས་གནོན། །དེ་བཞིན་འགྲོ་ཀུན་སྦྱིན་པའི་ཕུང་པོ་རྒྱ་ཆེན་ཀུན། །རྗེས་སུ་ཡི་རང་བྱང་ཆུབ་སེམས་དཔའི་ཟིལ་གྱིས་གནོན། །ཞེས་གསུངས་པ་ལྟར་ཕན་ཡོན་མཆོག་ཏུ་ཆེའོ། །ལྔ་པ་གཏི་མུག་གི་གཉེན་པོ་བསྐུལ་མ་གདབ་པ་ནི། བཟང་སྤྱོད་ལས། གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །སོགས་ཞེས་གསུངས་པ་ལྟར། རྒྱལ་བ་སྲས་བཅས་ཀྱིས་དམ་པའི་ཆོས་མ་གསུངས་ན་བསྟན་དང་འགྲོ་བ་ཉམ་ཐག་ཡོངས་ལ་འཕྲལ་གྱི་བདེ་སྐྱིད་འབྱོར་ཚོགས་དང་། མཐར་ཐུག་ངེས་ལེགས་ཀྱི་གོ་འཕང་དམ་པ་སོགས་ཐོབ་ཐབས་དང་བྲལ་ནས་ཐར་པའི་ལམ་སྟོན་མཁན་མེད་པར་འཇིག་རྟེན་གྱི་ཁམས་ཐམས་ཅད་མུན་གླིང་གཅིག་ཏུ་འགྱུར་ཉེན་ཡོད་པས་ན། དེ་ཕྱིར་སྔོན་སྟོན་པ་ལ་ཚངས་པས་གསེར་གྱི་འཁོར་ལོ་སོགས་ཕུལ་ནས་ཆོས་འཁོར་བསྐོར་བའི་བསྐུལ་མ་གདབ་པ་ཇི་བཞིན་དུ་རང་གིས་ཀྱང་ཕྱོགས་དང་རིས་མེད་ཀྱི་བསྟན་འཛིན་སྐྱེས་བུ་ཆེན་པོ་རྣམས་ཀྱིས་གང་ལ་གང་འདུལ་གྱི་ཆོས་འཁོར་རྒྱུན་མི་ཆད་པར་བསྐོར་བའི་བསྐུལ་མ་གདབ་པའི་ཕྱིར་དངོས་སུ་འབྱོར་ཚོགས་ཀྱི་སྦྱོར་བ་དང་བཅས་ཆོས་རྔ་བརྡུང་། ཆོས་དུང་འབུད། ཆོས་ཀྱི་སྒྲོན་མེ་སྦར། ཆོས་ཀྱི་དར་ཕྱར། ཆོས་ཀྱི་རྒྱལ་མཚན་བསྒྲེང་དུ་གསོལ་ཞེས་སྨོན་འདུན་རྩེ་གཅིག་ཏུ་བྱ་དགོས་ཏེ། ཇི་སྐད་དུ། ཕྱོགས་རྣམས་ཀུན་གྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ནི། །སེམས་ཅན་སྡུག་བསྔལ་མུན་འཐོམ་ལ། །ཆོས་ཀྱི་སྒྲོན་མེ་སྦར་དུ་གསོལ། །ཞེས་དང་། སྙིང་ཁུང་རྒྱུད་ལས། དཀོན་མཆོག་གསུམ་དང་ལྷ་རྣམས་ལ། །གུས་དང་བཅས་པའི་གསོལ་འདེབས་ན། །ཞི་སོགས་དོན་ཀུན་གང་འདོད་པ། །དེ་ཡི་མོད་ལ་འགྲུབ་པར་འགྱུར། །ཞེས་གསུངས་པ་ལྟར། དེས་ནི་ཆོས་སྤང་བའི་སྡིག་པ་གང་བྱས་དག་ཅིང་། ཚེ་རབས་ནས་ཚེ་རབས་ཐམས་ཅད་དུ་ཆོས་ཀྱི་བརྒྱུད་པ་འཛིན་པ་སོགས་ཀྱི་ཕན་ཡོན་མཆོག་ཏུ་ཆེའོ། །དྲུག་པ་ལོག་ལྟའི་གཉེན་པོ་བཞུགས་སུ་གསོལ་བ་ནི། བཟང་སྤྱོད་ལས། མྱ་ངན་འདའ་སྟོན་གང་བཞེད་དེ་དག་ལ། །སོགས། ཞེས་གསུངས་པ་ལྟར་འཇིག་རྟེན་གྱི་ཁམས་འདིར། སངས་རྒྱས་བྱང་སེམས་ཉན་རང་དགྲ་བཅོམ་དང་། མཁན་པོ་དང་། སློབ་དཔོན། མཆེད་གྲོགས་སོགས་མདོར་ན་བསྟན་དང་འགྲོ་བ་ཡོངས་ལ་དངོས་བརྒྱུད་བར་གསུམ་ནས་ཕན་པར་མཛད་པའི་སྐྱེས་བུ་གང་ན་སུ་བཞུགས་ཐམས་ཅད། སེམས་ཅན་གྱིས་ལོག་སྒྲུབ་སྙིགས་དུས་ངན་པས་སྐྱོ་ངལ་སོགས་ལ་མི་ལྟོས་པར་ཇི་སྲིད་འཁོར་བ་མ་སྟོངས་ཀྱི་བར་དུ་སྐུ་མྱ་ངན་ལས་མི་འདའ་བ་བཞུགས་པའི་ཞབས་བརྟན་དངོས་བརྒྱུད་བར་གསུམ་ནས་འབུལ་ཞིང་གསོལ་བ་རྩེ་གཅིག་འདེབས་དགོས་ཏེ། ཇི་སྐད་དུ། རྒྱལ་བ་མྱ་ངན་འདའ་བཞེད་ལ། །ཐལ་མོ་སྦྱར་ཏེ་གསོལ་བ་ནི། །འགྲོ་འདི་ལྡོང་པར་མི་འགོད་ཕྱིར། །བསྐལ་པ་གྲངས་མེད་བཞུགས་སུ་གསོལ། །ཞེས་དང་། ཁྱད་པར་རྒྱུད་མདོ་ལས། ཉོན་ཅིག་ཚངས་པའི་རྒྱལ་པོ་ཁྱོད། །བཅོམ་ལྡན་འདས་ལ་གསོལ་བ་འདེབས། །བསོད་ནམས་དེ་ནི་ཁྱད་པར་འཕགས། །སངས་རྒྱས་མྱ་ངན་འདས་མི་མངའ། །ཞེས་གསུངས་པ་ལྟར། དེས་ནི་སེམས་ཅན་ཐམས་ཅད་ཐར་པའི་ལམ་སྟོན་པའི་དེད་དཔོན་དམ་པ་རྣམས་དང་མི་འབྲལ་བ་དང་། རང་ཡང་ཚེ་རིང་བར་ཐོབ་པ་དང་། སྲོག་གཅོད་བྱས་པའི་སྡིག་པ་རྣམས་བྱང་བ་སོགས་ཕན་ཡོན་མཆོག་ཏུ་ཆེའོ། །བདུན་པ་ཐེ་ཚོམ་གྱི་གཉེན་པོ་དགེ་རྩ་བྱང་ཆུབ་ཏུ་བསྔོ་བ་ནི། བཟང་སྤྱོད་ལས། ཕྱག་འཚལ་བ་དང་མཆོད་ཅིང་བཤགས་པ་དང་། །སོགས་ཞེས་གསུངས་པ་ལྟར་བསྔོ་རྒྱུ་ནི་རང་གཞན་དུས་གསུམ་དུ་བསགས་པའི་རྣམ་དཀར་གྱི་དགེ་བའི་རྩ་བ་གང་མཆིས་པ་ཐམས་ཅད་དེ། ཡུལ་ནི་གཏན་བདེ་བླ་ན་མེད་པ་ཐར་པ་དང་ཐམས་ཅད་མཁྱེན་པའི་གོ་འཕང་དྲི་མ་མེད་པ་སངས་རྒྱས་ཀྱི་ས་ཁོ་ན་ལ། དོན་ནི་ནམ་མཁའི་མཐས་གཏུགས་པའི་སེམས་ཅན་ཐམས་ཅད། དུས་མྱུར་བ་ཉིད་དུ་འགོད་པའི་ཕྱིར་ན་ཡོངས་སུ་བསྔོ་བར་བྱའོ་སྙམ་པས་འདུན་པ་རྩེ་གཅིག་ཏུ་བྱ་དགོས་ཤིང་། བློ་གྲོས་རྒྱ་མཚོའི་ཞུས་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་ཟད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་ཟད། །ཅེས་དང་། དེ་ལྟར་ཡན་ལག་བདུན་པ་ཕུལ་བའི་བསོད་ནམས་ནི། དཔལ་སྦས་ཀྱི་ཞུས་མདོ་ལས། གང་གིས་ཕྱོགས་བཅུའི་སངས་རྒྱས་ལ། །དམིགས་ནས་ཐལ་མོ་སྦྱར་བྱས་ནས། །ཕྱག་འཚལ་དེ་བཞིན་མཆོད་བྱེད་དམ། །བསོད་ནམས་གང་ལ་ཡི་རང་ངོ་། །སྡིག་པ་དག་ཀྱང་བཤགས་པར་བགྱིད། །བསྐུལ་དང་གསོལ་བ་འདེབས་གྱུར་ན། །དེ་ཡི་བསོད་ནམས་ཕུང་པོ་ནི། །ནམ་མཁར་གང་བ་རྟག་ཏུ་གནས། །ཞེས་གསུངས་པ་ལྟར་མདོར་ན། རས་དྲི་མ་ཅན་རྣམས་ཆུས་ཡོངས་སུ་བཀྲུས་ཏེ་ཚོས་རྒྱབ་པ་དང་ཉེ་བར་མཚུངས་ཏེ་གློ་བུར་གྱི་འཁྲུལ་བས་བསགས་པའི་སྡིག་སྒྲིབ་ཉེས་ལྟུང་རགས་པ་རྣམས་སངས་ནས་གཞིའི་གནས་ལུགས་རྟོགས་སླ་བ་སོགས་དགོས་ཆེད་དུ་མ་ཡོད་པས་དོན་གཉེར་ལྷག་པར་བསྐྱེད་པ་གལ་ཆེ་བཞིན་དམིགས་འདུན་རྩེ་གཅིག་ཏུ་བྱས་ནས། བཟླས་པ་དངོས་བཛྲ་གུ་རུ་སོགས་གང་ཡིན་པ་རྣམས་བཟླས་ཚུལ་གྱིས་རིམ་པ་ལ་ལེགས་པར་འཇུག་དགོས་ཏེ། དང་པོ་སྔགས་ཀྱི་སྒྲ་དོན་ནམ་ངོ་བོ་ནི། ཨོཾ་ཞེས་པ་ནི་སངས་རྒྱས་ཀྱི་སྐུ་འགྱུར་བ་མེད་པ། ཨཱཿནི་གསུང་འགག་པ་མེད་པ། ཧཱུྃ་ནི་ཐུགས་འཁྲུལ་བ་མེད་པ་སྟེ་རྡོ་རྗེ་གསུམ་གྱི་ས་བོན་དང་། གུ་རུ་ནི་བླ་མ། སུ་ཁ་ནི་བདེ་བ། མ་ཧཱ་ནི་ཆེན་པོ། སིདྡྷི་ནི་དངོས་གྲུབ། སརྦ་ནི་ཐམས་ཅད། ཧཱུྃ་ནི་སྩོལ་ཞེས་པ་སྟེ། དེ་ཡང་བསྡུ་ན་རྡོ་རྗེ་བླ་མའི་པདྨར་དངོས་གྲུབ་སྩོལ་ཞེས་པའམ། ཡང་ན་བླ་མ་བདེ་བ་ཆེན་པོའི་དངོས་གྲུབ་ཐམས་ཅད་སྩོལ་ཞེས་པ་ཡིན་གྱི་དེ་ལྟར་སྔགས་སྤྱིའི་སྒྲ་དོན་ཀྱང་ལ་ལ་ནི་མཚན་ནས་འབོད་པ་དང་། ལ་ལ་ནི་ཐུགས་དམ་གནད་ནས་བསྐུལ་བ་དང་། ལ་ལ་ཡོན་ཏན་བརྗོད་ཅིང་བསྟོད་པར་བྱ་བ་ཡིན་པས། དེ་ལྟར་བཟླས་པའི་རྐྱེན་གྱིས་ཡེ་ཤེས་པ་བྱོན་ནས་བྱིན་རླབས་དང་དངོས་གྲུབ་ཐམས་ཅད་ཐོགས་རྡུགས་མེད་པར་ངེས་པར་སྟེར་བ་ནི་གདོན་མི་ཟ་བ་ཡིན་ཏེ། གུར་ལས། སངས་རྒྱས་བྱང་ཆུབ་སེམས་དཔའ་དང་། །མཁའ་འགྲོ་མ་དང་བཙུན་མོ་དག །མངོན་པར་ཕྱོགས་པ་བྱ་ཕྱིར་ཏེ། །དཔེར་ན་སྐྱེས་ཆེན་འགའ་ཞིག་ལ། །ཆེ་ལ་མྱུར་བའི་སྒྲས་འབོད་ན། །ཐོས་པ་ཙམ་གྱིས་འོང་བ་ལྟར། །སངས་རྒྱས་སྐད་ཅིག་དེ་ལ་འབྱོན། །ཞེས་དང་། རྒྱུད་ལས། རྫས་དང་སྔགས་ཀྱི་སྦྱོར་བ་ལ། །དཔྱད་ན་དངོས་གྲུབ་མི་འབྱུང་ཏེ། །གལ་ཏེ་ཡིད་གཉིས་ཟ་འགྱུར་རམ། །བསམ་པ་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་ལྡོག་འགྱུར་བ་གདོན་མི་ཟ། །དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་ཉེ། །ཡང་ན་བླུན་པོ་དད་པ་ཅན། །དེ་ལ་སྦྱོར་བའི་དངོས་གྲུབ་ཉེ། །ཞེས་སོགས་གསུངས་པ་ལྟར་ཡིད་ཆེས་ཀྱིས་ངེས་ཤེས་ལྷག་པར་བསྐྱེད་པ་སོགས་སྔོན་དུ་སོང་བའི་རྗེས་ལ། བཟླ་ཚུལ་དངོས་ནི། ཨོ་རྒྱན་ཆེན་པོས། མ་ཡེངས་ཏིང་འཛིན་ལྡན་པས་བཟླ། །གཞན་དུ་ཡེངས་པར་གྱུར་པ་ནི། །བསྐལ་པར་བཟླས་ཀྱང་འབྲས་མི་འབྱིན། །ཞེས་དང་། རྔམ་གློག་ལས། སྒྲ་ཆེན་མ་ཡིན་སྒྲ་ཆུང་མིན། །མགྱོགས་པར་མ་ཡིན་བུལ་བར་མིན། །དྲག་པོར་མ་ཡིན་ཞན་པར་མིན། །ཡིག་འབྲུ་ཡན་ལག་ཉམས་པ་མིན། །ཡེངས་པར་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པ་མིན། །ཞེས་སོགས་གསུངས་པ་ཇི་བཞིན་ཆད་ལྷག་སོགས་ཀྱི་དབང་དུ་མ་སོང་བར་ངག་གི་སྒྲ་དག་པར་འདོན་ནས་རྣ་བས་ཉན། རིང་མིན་སེམས་ཀྱི་ཤེས་པས་དཔྱད་དེ་གཞན་དག་ལ་མ་ཡེངས་པར་དད་མོས་ལྷག་པར་རྩེ་གཅིག་ཏུ་བསྐྱེད་བཞིན་དུ་བཟླས་ནས། ལྷག་པར་འཕྲོ་འདུ་ཕྲིན་ལས་ཀྱི་དམིགས་པ་ནི། རང་ཉིད་རྣལ་འབྱོར་མའི་ཐུགས་ཀར་ཟླ་དཀྱིལ་སྲན་མ་བཀས་པ་ཙམ་གྱི་སྟེང་དུ། ཧཱུྃ་ཡིག་དཀར་པོ་ཕྲ་མོའི་མཐར་སྔགས་ཕྲེང་རྣམས་གཡས་སུ་བཀོད་ལ་གཡོན་དུ་འཁོར་བ་ལས། འོད་ཟེར་ཁ་དོག་ལྔ་ལྡན་གྱི་རྩེར་མཆོད་པའི་ལྷ་མོ་དཔག་ཏུ་མེད་པས་མཆོད་རྫས་ནམ་མཁའ་གང་བར་སྤྲོས་ཏེ། ཆོས་ཀྱི་དབྱིངས་ན་བཞུགས་པའི་སྐུ་གསུམ་རྒྱལ་བ་རྒྱ་མཚོ་སྲས་དང་སློབ་མར་བཅས་པ་ལ་ཐུགས་མཉེས་པའི་མཆོད་པ་འབུལ་བས་ལྷ་རྣམས་ཟག་མེད་བདེ་བ་ཆེན་པོས་ཐུགས་ཡོངས་སུ་མཉེས་ནས། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད། སྐུ་ཞི་དྲག །གསུང་ཡིག་འབྲུའི་རིགས། ཐུགས་ཕྱག་མཚན་གྱི་རྣམ་པ་དཔག་ཏུ་མེད་པ་དང་། འོད་ཟེར་དཀར་དམར་མཐིང་གསུམ་སོགས་བཀྲག་ལ་དྭངས་པ་བཅུད་ལ་སྣུམ་པ་ཆར་ལྟར་འབབས་ནས་རང་གཞན་ཐམས་ཅད་ཀྱི་སྒོ་གསུམ་ལ་ཕོག་ནས་ནང་དུ་ཞུགས་ཤིང་ཐིམ་པར་གྱུར་པའི་མོད་ལ་སྡུག་བསྔལ་སྡིག་སྒྲིབ་རྣམས་ཆེས་ཆེར་བསལ་བའི་སྟོབས་ཀྱིས་ངན་སོང་དུ་མ་སྐྱེས་པ་རྣམས་སྐྱེ་སྒོ་འགེག །སྐྱེས་ཚར་བ་རྣམས་སྡུག་བསྔལ་གྱི་ཐག་བསྲིང་། ཅུང་ཟད་ལས་སྲབ་པ་རྣམས་དེ་མ་ཐག་ཚེ་འཕོས་ནས་མི་ལུས་ཆོས་ལྡན་གྱི་རིགས་རྒྱུད་དུ་སྐྱེས། ཆོས་ལ་འཇུག་མ་ཟིན་པ་རྣམས་བློ་རྒྱུད་ཆོས་ལ་མྱུར་དུ་བསྐུལ། ཞུགས་ཚར་བ་རྣམས་བར་ཆད་ཀྱི་རིམ་པ་ཞི་ཞིང་མཐུན་རྐྱེན་ལེགས་པར་ཚོགས་ནས་ས་ལམ་གོང་ནས་གོང་འཕེལ་དུ་བགྲོད། བགྲོད་བཞིན་པ་རྣམས་ཆོས་མཐར་ཕྱིན་ནས་ལུས་མ་སྨིན་པ་སྨིན་པར་གྱུར་ནས་ལུས་ལ་གཟི་བརྗིད་ཆགས། ངག་མ་སྨིན་པ་སྨིན་པར་གྱུར་ནས་ངག་ལ་བདེན་པ་གྲུབ། ཡིད་མ་སྨིན་པ་སྨིན་པར་གྱུར་ནས་ཉམས་རྟོགས་ཀྱི་རྩལ་ཡོངས་སུ་རྫོགས། ཡོན་ཏན་མ་རྫོགས་པ་རྫོགས་པར་གྱུར་ནས་ཤེས་བྱའི་གནས་ལ་ཆགས་ཐོགས་མེད་པར་གྱུར། ཕྲིན་ལས་མ་རྒྱས་པ་རྒྱས་པར་གྱུར་ནས་ལས་བཞིའི་ཕྲིན་ལས་ཐམས་ཅད་ལྷུན་གྱིས་གྲུབ་ནས། ཉན་རང་རྣམས་འགོག་པ་ལས་བསླང་། བྱང་སེམས་རྣམས་ཤེས་སྒྲིབ་ལས་གྲོལ་སོང་སྙམ་པའི་ངང་ནས་མཚན་བསྙེན་ནམ། དུས་བསྙེན་ནམ། གྲངས་བསྙེན་སོགས་གང་རུང་ཚད་དང་ལྡན་པ་བཟླས་པར་བྱའོ། །དེ་ལྟར་དམིགས་བཟླས་ལེགས་པར་བྱས་པའི་ཕན་ཡོན་ནི། ཚེ་འདིའི་བགེགས་དང་བར་ཆད་རྣམས་ཞི་ཞིང་། ངག་ལ་བདེན་པའི་ནུས་སྟོབས་འབྱུང་། ལྷ་རྣམས་མཉེས་པས་བྱིན་རླབས་དངོས་གྲུབ་ཐོབ། སྒྲིབ་གཉིས་བྱང་བ་དང་ཚོགས་གཉིས་རྫོགས། ལས་བཞིའི་དཀྱིལ་འཁོར་རབ་འབྱམས་ལ་དབང་། ཚེ་རབས་ཀུན་ཏུ་བླ་མ་ལྷག་པའི་ལྷ་ཡིས་རྗེས་སུ་འཛིན་ནས། མཐར་ཐུག་རིགས་ཀྱི་བདག་པོའི་ཐུགས་ཀློང་དུ་མངོན་པར་བྱང་ཆུབ་པ་སོགས་དགོས་ཆེད་དུ་མར་ཡོད་པས་དེ་ལྟར་ངེས་ཤེས་ལྷག་པར་སྐྱེད་དེ་སེམས་གཞན་དུ་མ་ཡེངས་པར་རྩེ་གཅིག་ཏུ་བཟླས་བཞིན་མོས་གུས་གདུང་ཤུགས་དྲག་པོས་གསོལ་བ་ཡང་ཡང་བཏབ་ཅིང་བསྙེན་པའི་གྲངས་ཟིན་ནས་མཐར་ཐུན་བསྡུ་རན་པའི་སྐབས་སུ། གཞི་དབང་ཐོབ་པ་ཉིད་མི་ཉམས་པ་མཐར་ཐུག་གི་འབྲས་དབང་མངོན་དུ་གྱུར་ཕྱིར་ལམ་དབང་བཞི་པོ་རྒྱུན་དུ་འདི་ལྟར་ཞུ་བར་བྱ་སྟེ། གུ་རུ་རིན་པོ་ཆེའི་སྨིན་མཚམས་ཀྱི་ཨོཾ་ཡིག་ལས་ཟླ་བའི་ཟེར་ལྟར་འོད་ཟེར་དཀར་གསལ་འཕྲོས་པ་རང་གི་དཔྲལ་བར་ཐིམ་པའི་སྟོབས་ཀྱིས་སྐུ་བུམ་པའི་དབང་ཐོབ། ལུས་ཀྱི་མི་དགེ་བ་གསུམ་དང་རྩ་ཡི་སྒྲིབ་པ་བཅས་དག །ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་སྐུའི་ས་བོན་ཐེབས་པར་སྙམ། དེ་ནས་མགྲིན་པའི་ཨཱཿལས་འོད་ཉི་ཟེར་ལྟར་དམར་སེར་འཕྲོས་པ་རང་གི་མགྲིན་པར་ཐིམ་པའི་སྟོབས་ཀྱིས་ངག་གསང་བའི་དབང་ཐོབ། ངག་གི་མི་དགེ་བ་བཞི་དང་རླུང་གི་སྒྲིབ་པ་དག །ལམ་རྫོགས་རིམ་བསྒོམ་པ་ལ་དབང་། འབྲས་བུ་ལོངས་སྐུའི་ས་བོན་ཐེབས་ཐལ་སྙམ། དེ་ནས་ཐུགས་ཀའི་ཧཱུྃ་ལས་འོད་ཟེར་སྤོས་ཀྱི་དུ་བ་ལྟར་སྔོན་པོ་འཕྲོས་པ་རང་གི་སྙིང་ཁར་ཐིམ་པའི་སྟོབས་ཀྱིས་ཐུགས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་ལས་མི་དགེ་བ་གསུམ་དང་ཐིག་ལེའི་སྒྲིབ་པ་བཅས་དག །ལམ་བདེ་སྟོང་བསྒོམ་པ་ལ་དབང་། འབྲས་བུ་ཆོས་སྐུའི་ས་བོན་ཐེབས་ཐལ་སྙམ། སླར་ཡང་ཐུགས་ཀའི་ཧཱུྃ་ལ་ཧཱུྃ་ཡིག་གཉིས་པ་ཞིག་སྐར་མདའ་ཆད་པ་བཞིན་དུ་བྱུང་བ། རང་སེམས་དང་དབྱེར་མེད་འདྲེས་པའི་སྟོབས་ཀྱིས་ཚིག་དབང་རིན་པོ་ཆེ་ཐོབ། སྒོ་གསུམ་རྟེན་གཞི་བག་ཆགས་དང་ཤེས་བྱའི་སྒྲིབ་པ་ཡོངས་སུ་དག །ལམ་ཀ་དག་ཁྲེགས་ཆོད་བསྒོམ་པ་ལ་དབང་། འབྲས་བུ་ངོ་བོ་ཉིད་སྐུའི་ས་བོན་རྒྱུད་ལ་ཐེབས་ཐལ་སྙམ་ནས་ལྷག་པར་གསོལ་བ་རྩེ་གཅིག་བཏབ་པས་གུ་རུ་རིན་པོ་ཆེའི་ཐུགས་བརྩེ་བ་ཆེན་པོ་དང་ལྡན་པའི་ངང་ནས་ཞལ་འཛུམ་ཞིང་སྤྱན་རྗེས་ཆགས་གཡོ་བ་དང་བཅས་ཏེ། སླར་ཡང་ཐུགས་ཀའི་ཧཱུྃ་ལས་འོད་ཟེར་དམར་པོ་དྲོད་ཚ་ལམ་མེར་འབར་བ་ཞིག་ཐོན་ནས་རང་གི་སྙིང་གར་ཐིམ་པའི་མོད་ལ་ལུས་འོད་ཀྱི་གོང་བུ་སྲན་མ་ཙམ་དུ་གྱུར་ཅིང་དེ་ཡང་མེ་སྟག་ཡར་བ་བཞིན་དུ་གུ་རུའི་ཐུགས་ཀ་ལ་ཐིམ་པའི་ངང་དུ་ཅི་གནས་སུ་མཉམ་པར་བཞག་གོ། །དེ་ལྟར་བླ་མའི་རྣལ་འབྱོར་ལེགས་པར་བསྒོམ་པའི་ཕན་ཡོན་ནི། དམ་ཚིག་བཀོད་པ་ལས། རྫོགས་པའི་རིམ་པ་བསྐལ་པའི་བར་དུ་ནི། །འདུ་འཛིའི་གཡེང་བ་སྤངས་ཏེ་བསྒོམས་པ་བས། །བླ་མ་རང་སེམས་དཀྱིལ་དུ་དར་གཅིག་ཤར་བ་ཙམ། །འབུམ་ཕྲག་ཉི་ཤུའི་ཆར་ཡང་མི་ཕོད་དོ། །ཞེས་དང་། མཚན་དང་དཔེ་བྱད་ལྡན་པའི་སྐུ། །བསྐལ་པ་འབུམ་དུ་བསྒོམས་པ་བས། །སྐད་ཅིག་བླ་མ་དྲན་པ་མཆོག །བསྙེན་སྒྲུབ་བཟླས་པ་ས་ཡ་བས། །བླ་མའི་གསོལ་འདེབས་ལན་གཅིག་མཆོག །ཅེས་དང་། དྲིན་དང་ལྡན་པའི་བླ་མ་དེ། །སྤྱི་བོའི་གཙུག་གམ་སྙིང་གི་དཀྱིལ། །ཡན་ལག་མཐིལ་དུ་གང་སྒོམ་པ། །སངས་རྒྱས་སྟོང་གི་དངོས་གྲུབ་ཀྱང་། །གང་ཟག་དེ་ཡིས་འཛིན་པར་བྱེད། །ཅེས་དང་། ཀུན་འདུས་རིན་པོ་ཆེའི་རྒྱུད་ལས། གང་གིས་བསྐལ་པ་འབུམ་ཕྲག་ཏུ། །ལྷ་སྐུ་འབུམ་ཕྲག་བསྒོམས་པ་ལས། །བླ་མ་ཅུང་ཟད་དྲན་པ་མཆོག །བསོད་ནམས་དེ་ནི་ཕ་མཐའ་ཡས། །ཞེས་སོགས་ཕན་ཡོན་མཐའ་ཡས་པར་གསུངས་པ་ལྟར་བསྡུ་ན། བླ་མ་འགྲུབ་པའི་རྟགས་མཚན་དུ། ཞལ་མཇལ་ཞིང་དབང་བསྐུར་བ་དང་། ཆོས་གསུང་བ་དང་། ལུང་བསྟན་པ་དང་། འོད་ཟེར་སྤྲོ་བསྡུས་བྱིན་རླབས་འཇུག་པ་སོགས་རྨིས་ཞིང་། དངོས་སུ་དྲན་པ་ཙམ་གྱིས་ཉམས་འབར་བ་དང་། ཕྱིའི་སྣང་བ་བན་བུན་ལང་ལོང་དུ་འགྲོ་བ་དང་། ནང་གི་ཤེས་པ་གསལ་རྗེན་འཆར་བ་དང་། བར་གྱི་རྟོག་པ་རྒྱུན་ཆད་པ་དང་། བླ་མ་རྩ་ན་བཞུགས་ཀྱང་མིང་འབོད་མི་བྲ་བ་དང་འབྲལ་མི་བྲ་བ་ལྟ་བུ་དངོས་ཉམས་རྨི་ལམ་གྱི་རྟགས་མཚན་རྣམས་འབྱུང་ཞིང་ཐར་པའི་ལམ་མ་ནོར་བར་ཚུད་ཅིང་ས་ལམ་གྱི་བར་ཆད་རྣམས་ཞི། དངོས་གཞིའི་ཉམས་མྱོང་རྒྱུད་ལ་འབྱོར་སླ་ཞིང་གནས་ལུགས་མ་ནོར་བར་རྟོགས་པའི་རྩལ་ཆེན་རྫོགས། མཆོག་ཐུན་མོང་གི་དངོས་གྲུབ་མྱུར་དུ་ཐོབ་པར་བྱེད་པ་སོགས་ཕན་ཡོན་ཚད་མེད་པས་ལྷག་པར་ཤེས་པར་བྱས་ལ། སླར་རྗེས་སུའང་སྣང་བ་བླ་མའི་སྐུ། གྲགས་ཚད་གསུང་། དྲན་རྟོགས་ཐུགས་ཀྱི་རང་བཞིན། སྣང་སྲིད་བླ་མའི་སྐུ་གསུང་ཐུགས་ཀྱི་རོལ་པར་ཡོངས་སུ་ཤེས་པའི་ངང་ནས་སོ།། ༈ །།ད་ནི་དེ་དག་ཐམས་ཅད་དང་འབྲེལ་དགོས་ངེས་རྗེས་ཀྱི་བྱ་བ་བསྔོ་སྨོན་གྱི་རིམ་པ་ནི། དགེ་བ་འདི་ཡིས་མྱུར་དུ་བདག །ཅེས་སོགས་གསུངས་པ་ལྟར་བརྗོད་དེ་དགེ་བ་གང་འགྲུབ་བསྔོ་སྨོན་གྱིས་རྒྱས་ཡོངས་སུ་ཐེབས་པར་བྱ་དགོས་པ་ཡིན་ཏེ། རྗེ་ལྷ་རྩེ་བས། འགྲོ་དྲུག་གི་དོན་དུ་ཐུགས་བསྐྱེད་ནས། །ལས་དཀར་པོ་དགེ་བཅུས་དུས་འདའ་བར། །དེ་འཁོར་གསུམ་ཡོངས་སུ་དག་ན་རབ། །དེ་མིན་ཡང་བྱང་ཆུབ་ཡོངས་བསྔོ་འཚལ། །ཞེས་དང་། རྗེ་འབྲི་གུང་པས། ཚོགས་གཉིས་ཡིད་བཞིན་ནོར་བུ་ལ། །སྨོན་ལམ་གྱི་བྱི་དོར་མ་བྱས་ན། །དགོས་འདོད་ཀྱི་འབྲས་བུ་མི་སྨིན་པས། །རྗེས་བསྔོ་བ་འདི་ལ་ནན་ཏན་མཛོད། །ཅེས་གསུངས་པ་ལྟར་གལ་ཆེ་ཞིང་། དེའང་བསྔོ་སྨོན་ཅེས་པའི་དོན་ནི། འགྲེལ་བའི་རྣམ་པ་ཕྲའང་བཀོད་པ་དོན་ཆེ་བའི་ཕྱིར། འོག་ཏུ་འཆད་འགྱུར་ལྟར་བསྡུ་ན་སེམས་ཅན་ཐམས་ཅད་སངས་རྒྱས་ཀྱི་གོ་འཕང་དམ་པ་ཐོབ་ཕྱིར་དུ་དགེ་བའི་རྩ་བ་རྣམས་སྦྱིན་པ་གཏོང་བའི་བསྔོ་བར་བྱ་བ་ཡིན་པས་ན་བསྔོ་བ་ཞེས་དང་། དེའི་དོན་བྱེ་བྲག་ཏུ་རང་གཞན་དོན་གཉིས་སམ། བསྟན་དང་འགྲོ་བའམ་མདོར་ན་ཚེ་རབས་ཀུན་ཏུ་ལེགས་སྤེལ་ཉེས་སེལ་གྱི་ཕྱིར་དུ། དེ་ལྟར་འགྲུབ་པར་ཡིད་ཀྱིས་སྨོན་ནས་བདེན་པའི་ཚིག་དང་བཅས་ཀྱིས་ལམ་ཕྱིན་ཅི་མ་ལོག་པའི་རིམ་པ་ལ་སྦྱོར་བས་ན་སྨོན་ལམ་ཞེས་པའམ། ཡང་ན་རང་གཞན་འཕྲལ་ཡུན་ཀུན་ཏུ་ལེགས་སྤེལ་ཉེས་སེལ་གྱི་འདོད་པའི་དོན་ལ་སྨོན་པའི་གནས་སམ། ལམ་ཡང་དག་པས་ན་སྨོན་ལམ་ཞེས་དང་། དེ་ལྟར་འགྲུབ་པའི་ཕྱིར་དུ། བདག་གི་དགེ་བའི་རྩ་བ་ཐམས་ཅད་ཡོངས་སུ་བསྔོས་པའི་མཐུ་ཟབ་མོ་ལ་བརྟེན་ནས་དུས་མྱུར་བ་ཉིད་དུ་དེ་དེ་བཞིན་དུ་འགྲུབ་པར་ཤོག །ཅེས་པས་ན་སྨོན་ལམ་དང་བསྔོ་བ་གསུངས་པའི་དོན་སོགས་གོ་དགོས་པ་ཡིན་པར་འདུག །དེ་ལྟར་ཚིག་དོན་ཟུང་དུ་འབྲེལ་བའི་སྒོ་ནས། འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་སོགས་བསྔོ་སྨོན་གྱི་རིམ་པ་ཡང་དག་པས་མཚམས་སྦྱོར་བྱེད་པ་དེས། དགེ་འབྲས་གོང་འཕེལ་དུ་འགྱུར་ཞིང་དགེ་རྩ་གནད་ལ་ཐེབས་པའི་དགོས་གནད་སོགས་གལ་པོ་ཆེ་རུ་ཡོད་པས་ཤེས་པར་བྱེད་པ་ལས། བསྔོ་བྱ་བསྔོ་བྱེད་སོགས་དམིགས་བཅས་དམིགས་མེད་གང་གིས་རྩིས་མ་ཟིན་པ་ནི་གཏི་མུག་བཏང་སྙོམས་ལུང་མ་བསྟན་ཞེས་ཕན་གནོད་གང་ཡང་མེད་པར་དགེ་རྩ་གང་འགྲུབ་རྣམས་བར་མ་དོར་ཆུད་ཟོས་སུ་འགྲོ་ཉེན་ཡོད་པས། བསྔོ་བྱ་སོགས་རྣམ་པ་དང་ངོ་བོ་ཡང་དག་པས་རྩིས་ཟིན་པ་གལ་ཆེ་སྟེ། ཕལ་པོ་ཆེ་ལས། འགྲོ་ཀུན་དགེ་བ་ཇི་སྙེད་ཡོད་པ་དང་། །བྱས་དང་བྱེད་འགྱུར་དེ་བཞིན་བྱེད་པ་དག །བཟང་པོ་ཇི་བཞིན་དེ་འདྲའི་ས་དག་ལ། །ཀུན་ནས་ཀུན་ཀྱང་བཟང་པོ་རེག་གྱུར་ཅིག །ཅེས་དང་། བློ་གྲོས་རྒྱ་མཚོའི་ཞུས་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་ཟད། །དེ་བཞིན་བྱང་ཆུབ་ཡོངས་བསྔོའི་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་ཟད། །ཅེས་དང་། སློབ་དཔོན་དཔའ་བོས། ཇི་ལྟར་དགེ་བའི་རྩ་བ་དེ་ཀུན་ཀྱང་། །གྲགས་དང་སྙན་དང་ལྷ་མིའི་བདེ་འབྲས་དང་། །རེ་བཅས་འཁོར་བའི་སེམས་པ་ཀུན་བྲལ་ཏེ། །འཇིག་རྟེན་འདས་པ་ཉིད་ཀྱི་རྒྱུ་རུ་བསྔོ། །ཞེས་ཕན་ཡོན་དང་བཅས་ཏེ་གསུངས་པ་ཇི་བཞིན་བསྔོ་བར་བྱ་དགོས་ཤིང་། དེས་ན་ཇི་ལྟར་བསྔོ་སྙམ་ན། རྒྱུ་ནི་ད་ལན་རང་གི་ས་ལམ་བསྐྱེད་རྫོགས་ཀྱི་རིམ་པ་གང་ལ་བརྩོན་པའི་དགེ་བ་དེ་དག་དམིགས་རྟེན་མཚོན་བྱེད་དུ་བྱས་ནས། རྒྱལ་བ་སྲས་དང་སློབ་མར་བཅས་པས་དུས་གསུམ་ན་བསགས་པའི་རྣམ་དཀར་གྱི་དགེ་ཚོགས་གང་མཆིས་པ་ཐམས་ཅད་མཚོན་བྱར་བྱས་ལ་དེ་དག་ཐམས་ཅད་གཅིག་ཏུ་བསྡོམས་པའི་བློ་འདུན་གྱིས་ཡོངས་སུ་འཁྱུད་བཞིན་པའི་ངང་ནས། ཡུལ་གང་དུ་བསྔོ་སྙམ་ན། ལྷ་མིའི་བདེ་བ་ཙམ་དང་། ཉན་རང་དང་། བྱང་སེམས་ཀྱི་གོ་འཕང་ཐོབ་ཕྱིར་ཙམ་དུ་མ་ཡིན་ཏེ་དགེ་འབྲས་ཆེ་ཕྲ་དང་ལམ་ཉེ་རིང་ལ་མ་ལྟོས་པར་གོལ་འགྲོ་བ་ཡིན་པའི་ཕྱིར། དེས་ན་ཡུལ་གྱི་མཆོག་མཐར་ཐུག་པ་དུས་གཏན་གྱི་བདེ་བ་བླ་ན་མེད་པའི་གནས་དོན་གཉིས་ལྷུན་གྱིས་གྲུབ་པའི་རྒྱལ་ས། སྐུ་བཞི་ཡེ་ཤེས་ལྔ་ཡི་ངོ་བོ། ཁྱབ་བདག་རྒྱལ་བ་རྡོ་རྗེ་འཆང་གི་གོ་འཕང་དྲི་མ་མེད་པ་ཉིད་ལ་ཚད་འཛུགས་དགོས་ཏེ། དོན་སུའི་ཆེད་དུ་བསྔོ་སྙམ་ན། རང་དོན་དང་། གཉེན་ཉེ་འབྲེལ་དང་། འབྲེལ་ཐོགས་སོགས་ཕྱོགས་རེ་བ་ཙམ་གྱི་ཕྱིར་དུ་ཡང་མ་ཡིན་པར། ནམ་མཁའི་གར་ཁྱབ་སེམས་ཅན་གྱིས་ཁྱབ། སེམས་ཅན་གྱི་གར་ཁྱབ་ཕ་མ་དྲིན་ཆེན་གྱིས་ཁྱབ། ཕ་མ་དྲིན་ཆེན་གྱིས་གར་ཁྱབ་བདེ་སྡུག་གི་ལས་ཀྱིས་ཁྱབ་པས་ན། དེ་དག་ཐམས་ཅད་སངས་རྒྱས་ཀྱི་གོ་འཕང་དམ་པ་དེ་རུ། དུས་མྱུར་བ་ཉིད་དུ་ཕྱམ་གཅིག་འགོད་པའི་ཆེད་དུ་བསྔོ་དགོས་པ་ཡིན། དེའང་འཁོར་གསུམ་དམིགས་པ་མེད་པའི་ཤེས་རབ་ཟབ་མོས་རྩིས་ཟིན་ན་ཁྱད་པར་དུ་མས་འཕགས་པ་ཉིད་དུ་གསུངས་སྟེ། དཀོན་མཆོག་སྤྲིན་མདོ་ལས། གང་ལ་དགེ་བ་མི་དམིགས་པ་དང་། ཇི་ལྟར་བྱ་བ་མི་དམིགས་པ་དང་། ཡོངས་སུ་འབད་པ་མི་དམིགས་པའི་ཚུལ་གྱིས་བསོད་ནམས་དང་ཡེ་ཤེས་ཀྱི་ཚོགས་གསོག་པར་བྱའོ། །ཞེས་དང་། དཀོན་བརྩེགས་ལས། ཇི་ལྟར་ཕ་རོལ་ཏུ་ཕྱིན་པའི་དགེ་བ་དྲུག་གིས་བསྡུས་པའི་དགེ་བ་གང་ལའང་བྱེད་པ་པོ་བདག་ཉིད་དང་། བྱ་བའི་ཡུལ། བྱས་པའི་དགེ་བ་གསུམ་བྱེད་དུས་ནས་བདེན་ཞེན་མེད་པར་སྤྲུལ་པ་ལྟ་བུའམ། སྒྱུ་མ་ལྟ་བུས་སྤྱད་ན་མྱུར་དུ་སངས་རྒྱས་ཐོབ་པར་འགྱུར་རོ། །ཞེས་དང་། མདོ་སྡུད་པ་ལས། ཇི་ལྟར་དུག་དང་འདྲེས་པའི་ཁ་ཟས་བཟང་བཟའ་བ། །དཀར་པོའི་ཆོས་ལའང་དམིགས་པ་རྒྱལ་བས་དེ་སྐད་གསུང་། །ཅི་སྟེ་མཚན་མ་ཡོད་ན་བྱང་ཆུབ་བསྔོ་བ་མིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཞེས་དང་། དོ་ཧ་མཛོད་ལས། སྙིང་རྗེ་དང་བྲལ་སྟོང་པ་ཉིད་ཞུགས་གང་། །དེས་ནི་ལམ་མཆོག་རྙེད་པ་མ་ཡིན་ནོ། །འོན་ཏེ་སྙིང་རྗེ་འབའ་ཞིག་བསྒོམས་ན་ཡང་། །སྲིད་པར་དེ་གནས་ཐར་པ་ཐོབ་མི་འགྱུར། །གལ་ཏེ་གཉིས་པོ་སྦྱོར་བར་ནུས་པ་ཡིས། །སྲིད་པར་མི་གནས་ཞི་བར་དེ་མི་གོལ། །ཞེས་གསུངས་པ་ལྟར་ཏེ། ལམ་ཤེས་རབ་སྙིང་རྗེས་མ་ཟིན་པའི་དགེ་བཅུ་ལྟ་བུ་ནི་དམན་པ་སྟེ་དཔེར་ན་ཆུ་ཤིང་གི་འབྲས་བུ་ལན་གཅིག་སྨིན་ནས་ཡོངས་སུ་སྐམ་པ་ལྟར། གཏི་མུག་གི་ས་པས་བསྡུས་པའི་ཕྱིར་དགེ་རྩ་རྐྱེན་གྱིས་འཇོམས་པ་དང་སྐྱེད་མི་འཕེལ་བར་མངོན་མཐོ་ལྷ་མིའི་བདེ་འབྲས་བསྐྱེད་ནས་ཟད་པར་འགྱུར་བས་ན་བསོད་ནམས་ཆ་མཐུན་གྱི་དགེ་བ་ཞེས་པ་དང་། ལམ་ཤེས་རབ་ཟབ་མོས་ཟིན་ནས་བཟུང་དགེ་རྩ་རྐྱེན་གྱིས་མི་ཤིག་པ་དང་། གོང་ནས་གོང་དུ་འཕེལ་ཏེ་བྱང་ཆུབ་ཐོབ་པའི་རྒྱུ་བྱེད་པས་ན་ཐར་པ་ཆ་མཐུན་གྱི་དགེ་བ་ཞེས་བྱ་སྟེ་དཔེར་ན་ལྕགས་ལ་གསེར་འགྱུར་གྱི་རྩིས་ཡོངས་སུ་ཐེབས་པ་དང་ཉེ་བར་མཚུངས་ཏེ་གནས་སྐབས་མངོན་མཐོ་དང་མཐར་ཐུག་ངེས་ལེགས་གཉིས་ཀའི་རྒྱུ་བྱེད་པས་ན་དགེ་རྩ་སོགས་བདེན་མེད་སྟོང་པའི་ཤེས་རབ་ཀྱིས་རྩིས་ཡོངས་སུ་ཟིན་ན་ནི་ཁྱད་པར་དུ་མས་འཕགས་པ་ཉིད་དུ་བཞེད་འདུག་པ་དེ་ལྟ་ལར་ནི་འབྱོང་བ་གལ་ཆེ་བའི་རང་བཞིན་དང་། འོན་ཀྱང་ད་ལྟ་རང་རེ་ལས་དང་པོ་པའི་སྐབས་སུ་འཁོར་གསུམ་བདེན་མེད་དུ་མཉམ་པར་བཞག་ཀྱང་དམིགས་བཅས་ལས་ནམ་ཡང་མི་འདའ་ཞིང་། ནམ་ཞིག་སྟོང་ཉིད་ཀྱི་ཤེས་རབ་ཟབ་མོ་རྟོགས་པའི་ཚེ་རྣམ་པ་དམིགས་བཅས་སུ་ཇི་ལྟར་བསྒོམ་རུང་ངོ་བོ་ཤེས་རབ་སྟོང་པའི་རྩིས་རང་ཤུགས་ཀྱིས་ཟིན་ནས་དུས་མཉམ་དུ་ཁྱབ་པ་ཞིག་ཡོང་རྒྱུ་ཡོད་པ་ཡིན་པས། དེ་ལྟ་བུར་མ་རྟོགས་ཀྱི་བར་དུ་རེ་ཞིག་ལྷག་བསམ་གྱི་འདུན་པ་ཁོ་ན་ལ་རག་ལས་ཤིང་དེ་སྟོབས་ཆེ་བ་ཡིན་པས་ཤེས་པར་བྱ་དགོས་སུ་ཐུག་སྟེ། ཇི་སྐད་དུ། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་ནི་དེ་བཞིན་ཉིད་དུ་འགྲུབ། །རང་བཞིན་བདེན་མེད་སྒྱུ་མ་དང་། །རྨི་ལམ་ལྟ་བུར་བློ་བཞག་བྱ། །ཞེས་དང་། ལྟུང་བཤགས་ལས། ཇི་ལྟར་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོས་པ་དང་། ཇི་ལྟར་མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་འགྱུར་བ་དང་། ཇི་ལྟར་ད་ལྟར་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་མཛད་པ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ། །ཞེས་དང་། བཟང་སྤྱོད་ལས། དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །ཞེས་གསུངས་པ་དང་ཉེ་བར་མཚུངས་པ་གོང་དུ་བཤད་མ་ཐག་པའི་ཚུལ་ལྟར། མཁའ་ཁྱབ་ཀྱི་ཕ་མ་སེམས་ཅན་ཐམས་ཅད། དུས་མྱུར་བ་ཉིད་དུ་སངས་རྒྱས་ཀྱི་ས་ལ་འགོད་པའི་ཕྱིར་དུ། དུས་གསུམ་གྱི་རྒྱལ་བ་སྲས་དང་བཅས་པས་ཇི་ལྟར་བསྔོས་པ་དེ་དེ་བཞིན་བདག་གིས་ཀྱང་རྗེས་སུ་སློབ་ནས་དགེ་བའི་རྩ་བ་རྣམས་ཡོངས་སུ་བསྔོ་བར་བགྱིའོ་སྙམ་པས་འདུན་པ་རྩེ་གཅིག་པའི་ངང་དུ་དོན་རྣམས་ཧྲིལ་གྱིས་འདུས་ཡོད་པས་ཚིག་རྗེས་དོན་དྲན་ཀྱི་ངང་ནས་བསྔོ་སྨོན་གྱི་བདེན་ཚིག་ཟབ་མོ་རྣམས་ཆད་ལྷག་མ་སོང་བར་དལ་ཆགས་པ་ཞིབ་ཀྱིས་འདོན་པར་བྱའོ། །དེ་ལྟར་སྔོན་འགྲོའི་ཁྲིད་ཡིག་ཕལ་ཆེར་ནི་རྒྱས་ཆེ་བའི་དབང་གིས་དཔེ་དང་ལུང་འདྲེན་ཕན་ཡོན་སོགས་ཀྱི་གསུང་ཚིག་རྣམས་གོ་བས་མ་ཆུན་ཏེ། དོན་ཉམས་སུ་སྙིང་པོར་ལེན་འདོད་རྣམས་ལ་བཤད་བདེ། ཉན་བདེ་སྒྲུབ་བདེའི་ཕྱིར་ན་སྙིང་པོ་འདི་ཙམ་དུ་ཡོངས་སུ་འདུས་པར་བྱས་ཏེ། ཡི་གེའི་གཟུགས་སུ་སྲས་མིང་པ་ཨཱརྻ་ཏིཥྛ་བཛྲས་ལྷ་བྲག་ཡང་མཛོད་ཀྱི་སྒྲུབ་གནས་དབེན་པར་གནས་པའི་སྐབས། ཐུན་གྱི་བར་བར་ལ་ལྷག་བསམ་ཤིན་ཏུ་དྭངས་པའི་ངོགས་ནས་བཀོད་པ་ཡིན་པས་དོན་ཉམས་སུ་ལེན་མཁན་དང་ལྡན་པར་ཤོག་ཅིག་བླ་མ་མཁྱེན་ནོ། །སླར་སྨྲས་པ། ད་རེས་དལ་འབྱོར་ཕུན་སུམ་ཚོགས་པའི་སྐབས། །ཐར་པ་མཆོག་གི་བཙན་ས་མ་བཟུང་ན། །ཚེ་འདི་གློ་བུར་ཕལ་ཆེར་འཆི་ནས་འགྲོ། །ངན་སོང་གནས་སུ་འཁྱམས་དུས་འགྱོད་ཀྱང་འཕྱི། །དོན་ནི་ཡོད་ལ་མེད་པའི་བྱ་བཞག་དོར། །སྙིང་པོ་ཆོས་ལ་དྲིལ་ཅིག་གྲོགས་མཆེད་རྣམས། །བདེ་གཤེགས་ཁམས་ཀྱི་མེ་ལོང་ཡེ་དྭངས་ཀྱང་། །གློ་བུར་གཡའ་ཡིས་ཚེ་རབས་ཀུན་ཏུ་བསྒྲིབས། །དེ་ཕྱིར་རྒྱལ་བ་ཐུགས་རྗེ་ཐབས་མཁས་པའི། །འཇུག་པ་འདི་ལ་སུ་ཞིག་བརྩོན་བྱས་ན། །མཆོག་གསུམ་རྗེས་བཟུང་བྱང་ཆུབ་སེམས་མཆོག་འབྱོངས། །སྒྲིབ་ཚོགས་བྱང་ཞིང་བསོད་ནམས་ཚོགས་རབ་རྫོགས། །ཁྱད་པར་བླ་མའི་རྣལ་འབྱོར་ལ་བརྟེན་ཚེ། །རང་བྱུང་གཉུག་མའི་ཡེ་ཤེས་མངོན་གྱུར་ཏེ། །སྐུ་བཞིའི་གོ་འཕང་མྱུར་དུ་རེག་པས་ན། །གཞན་དོན་ཐུགས་བསྐྱེད་ཡར་ཟླའི་དཔལ་བཞིན་རོལ། །ཕྱོགས་ཀྱི་གྲུབ་པའི་འདབ་མ་གྱེས་པར་མཛོད། །སརྦ་མངྒ་ལཾ།། །།
