DKYD-DZINDROL-063
རྒྱལ་གསུངས་འཁོར་ལོ་བར་པར་བསྟན་པའི་དོན། །ངོ་བོ་རྒྱུ་འབྲས་དོན་དམ་སྟོང་པའི་དབྱིངས། །རྣམ་ཀུན་མཆོག་ལྡན་ཤེས་རབ་ཕར་ཕྱིན་གྱི། །དགོངས་པའི་སྙིང་པོ་འཛིན་པ་རང་གྲོལ་འདི། །བལ་ཡུལ་ཞེ་ཆེན་བླ་སློབ་ཐུགས་བསྐྱེད་དང་། །རྒྱལ་བསྟན་སྤྱི་དང་འགྲོ་ཕན་རིགས་གཞུང་ལ། །གཙིགས་ཅན་ཙ་འདྲ་ཐེབས་རྩའི་(Tsadra foundation)མཐུན་རྐྱེན་ལས། །མི་ཟད་དུ་མར་འཆར་བའི་པར་དུ་བསྒྲུབས། །དེ་ལས་བྱུང་བའི་དགེ་ཚོགས་བདུད་རྩིའི་ཆུས། ཁམས་གསུམ་འགྲོ་བའི་ཡིད་ལ་མངོན་ཞུགས་པའི། །འཁྲུལ་སྣང་དངོས་པོར་ཞེན་པའི་དྲི་མ་ཀུན། །རབ་བསལ་རྒྱལ་བའི་མཚན་དཔེ་ཐོབ་གྱུར་ཅིག །རྒྱལ་ཀུན་གསང་བའི་མཛོད་འཛིན་རྡོ་རྗེ་ཆོས། །ཆོས་སྐུའི་སྟོན་པ་དགའ་རབ་དཔའ་བོའི་ཞབས། །དགོངས་པའི་དོན་བརྒྱུད་ལས་ཅན་བརྡར་སྣང་བའི། །ཡང་གསང་བླ་མེད་གདམས་པ་འདི་ཁོ་ན། །བསྟན་པའི་སྙིང་པོ་རྡོ་རྗེ་ཐེག་པའི་ཆོས། །གདམས་པའི་མཐར་ཐུག་གདན་ཐོག་གཅིག་མའི་ལམ། །ཟབ་ལས་ཡང་ཟབ་རིག་འཛིན་དགོངས་པའི་བཅུད། །ཕྱོགས་དུས་ཀུན་ཏུ་མི་ཉམས་རྒྱས་གྱུར་ཅིག །ཕན་བདེའི་འབྱུང་གནས་རྒྱལ་བསྟན་ཡུན་དུ་གནས། །བསྟན་འཛིན་དགེ་བའི་བཤེས་རྣམས་ཞབས་པད་བརྟན། །ཡངས་པའི་རྒྱལ་ཁམས་ཀུན་ཏུ་དགེ་ཞིང་ཤིས། །ཕུན་ཚོགས་མཆོག་གསུམ་སྣང་བས་མཛེས་གྱུར་ཅིག །གཞི་དབྱིངས་མི་འགྱུར་འདུས་མ་བྱས་ཀློང་ཀ་དག་ཆོས་སྐུར་མངོན་བྱང་ཆུབ། །རང་སྣང་རྣམ་དག་ལྔ་ལྡན་ཞིང་དུ་ཟག་མེད་ཁ་སྦྱོར་བདུན་གྱི་བདག །སྒྱུ་འཕྲུལ་དྲྭ་བའི་ཡེ་ཤེས་སྐུ་ནི་ཞིང་ཁམས་རྒྱ་མཚོར་དུ་མར་སྣང་། །དཀྱིལ་འཁོར་དབང་ཕྱུག་སྐུ་གསུམ་ངོ་བོ་བླ་མ་མཆོག་གི་བཀྲ་ཤིས་ཤོག །སརྦ་དཱ་ཀ་ལྱཱ་ཎཾ་བྷ་ཝནྟུ།། །། ༈ རྒྱལ་བ་ཀུན་གྱི་ཉེ་ལམ་གཅིག་པུ་རུ། །རྒྱལ་བས་ཡོངས་བསྔགས་ཐེག་མཆོག་རྫོགས་པ་ཆེ། །རྒྱལ་དབང་པདྨའི་རིང་ལུགས་སྔ་འགྱུར་བའི། །རྒྱལ་བསྟན་ཕྱོགས་མཐར་ཁྱབ་པའི་བཀྲ་ཤིས་ཤོག ༈ །ས་ལ་འོག་མིན་ཨོ་རྒྱན་མཁའ་འགྲོའི་གནས། །གཉིས་པ་སྨིན་ཅིང་གྲོལ་བ་ཨ་ཏིའི་གླིང་། །ངེས་པ་དོན་གྱི་དགའ་བའི་ཚལ་ཆེན་པོ། །ཕྱོགས་དུས་ཀུན་ཏུ་དར་ཞིང་རྒྱས་གྱུར་ཅིག ༈ །མདོ་སྔགས་ལུང་རྟོགས་བསྟན་པ་གཉིས་ལྡན་གྱི། །བཤད་དང་སྒྲུབ་པ་དར་ཞིང་རྒྱས་མཛད་པའི། །བསླབ་གསུམ་ངུར་སྨྲིག་འཆང་བའི་ཆོས་སྡེ་ཆེའི། །ཕྲིན་ལས་གླིང་བཞི་ཡོངས་ལ་ཁྱབ་གྱུར་ཅིག ༈ །ཐུབ་བསྟན་མཛེས་པའི་རྒྱན་གཅིག་ཀློང་ཆེན་པ། །བཤད་སྒྲུབ་བསྟན་པའི་མངའ་བདག་འཇིགས་མེད་གླིང་། །མཚུངས་མེད་བླ་མའི་བསྟན་པ་སྲིད་མཐའི་བར། །བཤད་སྒྲུབ་ཐོས་བསམ་སྒོམ་པས་འཛིན་གྱུར་ཅིག ༈ །སྔ་འགྱུར་བསྟན་པ་རྒྱ་མཚོའི་འཁོར་ལོས་བསྒྱུར། །འགྲོ་ལ་ཐེག་ཆེན་སྒྲ་སྒྲོག་རྫོགས་ཆེན་པ། །དོན་ཀུན་གྲུབ་པ་འཇིགས་མེད་གླིང་པ་ཡི། །བསྟན་པ་དར་ཞིང་རྒྱས་པའི་བཀྲ་ཤིས་ཤོག། ཅེས་དང་། ༈ །ངོ་བོ་འགྱུར་མེད་རང་བྱུང་རྡོ་རྗེའི་སྐུ། །རང་གདངས་འགག་མེད་བྱང་ཆུབ་རྡོ་རྗེའི་གསུང་། །སྤྲོས་བྲལ་དབུ་མ་འཇའ་ལུས་རྡོ་རྗེའི་ཐུགས། །རྡོ་རྗེ་གསུམ་གྱི་བསྟན་པ་དར་རྒྱས་ཤོག །རྒྱལ་དབང་ཉི་མས་བྲིས་སོ། །སརྦ་མངྒ་ལཾ། དགེའོ། །དགེའོ། །དགེའོ།། །།
