DKYD-DZINDROL-030
ཡང་གསང་འཛིན་པ་རང་གྲོལ་ལསཿ བཀའ་དང་གཏེར་སྲུང་མཆོད་ཐབས་བཞུགསཿ བཀའ་དང་གཏེར་སྲུང་མཆོད་ཐབས་ནིཿ བ་ལིཾ་གཏོར་མ་ཤ་ཁྲག་བརྒྱནཿ ཁྱད་པར་རིན་ཆེན་སྣ་ལྔ་དངཿ ཇ་ཆང་ལ་སོགས་མཐུན་རྫས་རྣམསཿ ལེགས་པར་བཤམས་ལ་འདི་སྐད་དོཿ ཧཱུྃཿ འཇིགས་རུང་སྲིན་པོའི་གྲོང་ཁྱེར་དཔལ་གྱི་རིཿ རྩ་གསུམ་རྒྱལ་བའི་ཞིང་ཁམས་པདྨ་འོདཿ སྲིན་པོའི་རྒྱལ་པོ་གཟའ་བདུད་རཱ་ཧུ་ལཿ སྐུ་མདོག་དམར་སྨུག་འཇིགས་རུང་བྱིན་ཆགས་པའིཿ སྤྱན་སྟོང་སྡང་མིག་འབར་བས་དགྲ་ལ་གཟིགསཿ ཞལ་ནས་གདུག་པ་དུག་གི་ཁ་ཕྲུ་འཐོརཿ འདིར་གཤེགས་དམ་རྫས་བརྒྱན་པའི་གཏོར་མ་བཞེསཿ འཛིན་པ་རང་གྲོལ་བཀའ་ཡི་བྱ་ར་མཛོདཿ དམ་ལྡན་སྒྲུབ་པ་པོ་ལ་དངོས་གྲུབ་སྩོལཿ དམ་མེད་ལོག་ལྟ་ཅན་གྱི་སྙིང་ཁྲག་བཞེསཿ གཟུགས་ཅན་གཟུགས་མེད་ལོག་འདྲེན་ཚར་བཅད་ནསཿ བསམ་དོན་ལྷུན་གྱིས་གྲུབ་པའི་ཕྲིན་ལས་མཛོདཿ བྷྱོཿ ཁཾ་ལས་རྒྱ་མཚོ་འཁྱིལ་པའི་ཀློང་དཀྱིལ་དབུསཿ གདུག་པའི་སྲས་མཆོག་སྨྱོ་ཁ་ནག་པོ་ཆེཿ སྨུག་ནག་ཁྲོ་ཉམས་སྲིན་པོའི་གཟུགས་འཆང་བཿ དམ་ལྡན་རྣལ་འབྱོར་དཔའ་བོས་འབོད་ལགས་ནཿ དམ་ཚིག་ཅན་གྱི་ལྷ་མཆོག་གཤེགས་སུ་གསོལཿ དམ་རྫས་བ་ལིཾ་རྒྱན་ལྡན་བདུད་རྩིའི་སྐྱེམསཿ རིན་ཆེན་ལྔ་དང་གསེར་སྐྱེམས་གཡུ་སྐྱེམས་སོགསཿ འབུལ་ལོ་དགྱེས་བསྐངས་ཕྲིན་ལས་ཐོགས་མེད་སྒྲུབསཿ ཁྱེད་ལ་ལས་ཀྱི་གཉེར་ཁ་གཏད་པ་ནིཿ འཛིན་པ་རང་གྲོལ་བཀའ་ཡི་བྱ་ར་མཛོདཿ ཁྱད་པར་བླ་མའི་བཀའ་ལ་མི་བརྩི་ཞིངཿ གདམས་ངག་རང་གར་སྤྱོད་པའི་དམ་མེད་རྣམསཿ སྙིང་ནང་ཁྲག་གི་ཐིག་ལེ་དྭངས་མ་ནིཿ ཐང་དུ་ཕོབ་ཅིག་བཛྲ་ས་མ་ཡཿ མ་གཡེལ་དམ་ཚིག་ཅན་གྱི་ལྷ་མཆོག་ཁྱོདཿ ཉིན་མཚན་དུས་དྲུག་ཀུན་ཏུ་མེལ་ཚེ་མཛོདཿ ཁྱད་པར་རྣལ་འབྱོར་བདག་ཅག་སྒྲུབ་པ་པོཿ གཞིས་ལམ་བྱེས་གསུམ་གར་འགྲོ་གར་འདུག་ཀྱངཿ ཁ་མགོན་རོགས་དན་མཐུ་དཔུང་མ་གཡེལ་བརཿ བསམ་དོན་འབད་མེད་ལྷུན་གྲུབ་ཕྲིན་ལས་མཛོདཿ དྲི་མ་མེད་པའི་གསུང་གི་བདུད་རྩིའི་རྒྱུནཿ གནད་བྱང་མཁའ་འགྲོའི་བརྡ་འགྲོལ་ཆེན་མོ་ལསཿ བདག་ཉིད་ཁྲག་འཐུང་ལས་ཀྱི་དཔའ་བོ་ཡིསཿ ཡང་གསང་ཐུགས་ཀྱི་ཐིག་ལེའི་མཐའ་རྟེན་དུཿ ཡི་གེ་ཉེ་གནས་འོད་ཟེར་མིང་གིས་བགྱིསཿ མངྒ་ལཾ། ཤུ་བྷཾ།། །།
