དཔལ་ལྡན་བླ་མ་དམ་པ་ཤེས་བྱ་ཀུན་མཁྱེན་ཤྲཱི་ནིརྨ་ཀའི་གསུང་འབུམ་གྱི་བཞུགས་བྱང་འདོད་འབྱུང་རིན་པོ་ཆེའི་ཏོག།

🚧 This website is under continued development. We appreciate your patience!

First text in volume. Back to Volume PageNext Text

Wylie title	dpal ldan bla ma dam pa shes bya kun mkhyen shrI nirma ka'i gsung 'bum gyi bzhugs byang 'dod 'byung rin po che'i tog
Location	dpal sprul bka' 'bum Volume 1, Text 1, Pages (Folios to )
Author	མི་ཕམ་རྒྱ་མཚོ་
Less details More details
Citation
Genre	Catalogue of Contents - dkar chag
Colophon	།ཅེས་པའང་སྡེ་སྣོད་འཛིན་པ་མཁན་པོ་བསོད་ཆོས་ཀྱིས་ཚུལ་འདི་བཞིན་དགོས་ཞེས་གསུང་བསྐུལ་ལྟར་རུ་དམ་ཡང་དབེན་དུ་མི་ཕམ་རྣམ་པར་རྒྱལ་བས་བྲིས་པ་དགེ་ལེགས་འཕེལ།
	/ces pa'ang sde snod 'dzin pa mkhan po bsod chos kyis tshul 'di bzhin dgos zhes gsung bskul ltar ru dam yang dben du mi pham rnam par rgyal bas bris pa dge legs 'phel/

Tibetan Text

[edit]

༄༅། །དཔལ་ལྡན་བླ་མ་དམ་པ་ཤེས་བྱ་ཀུན་མཁྱེན་ཤྲཱི་ནིརྨ་ཀའི་གསུང་འབུམ་གྱི་བཞུགས་བྱང་འདོད་འབྱུང་རིན་པོ་ཆེའི་ཏོག་ཅེས་བྱ་བ་བཞུགས་སོ། །

ཨོཾ་དགེ་ལེགས་རྣམ་པར་རྒྱལ། མཚུངས་མེད་སྟོན་པ་ཆོས་དང་དགེ་འདུན་ཏེ། །སྐྱབས་ཀྱི་མཆོག་གྱུར་རིན་ཆེན་རྣམ་གསུམ་གྱི། །ཞབས་པད་ལྷར་བཅས་གཙུག་གི་རྒྱན་གྱུར་པ། །མི་ཕྱེད་དད་པའི་ཡིད་ཀྱི་དཔལ་དུ་བསྟེན། །བརྒྱུད་པ་གསུམ་ལྡན་རྗེ་བཙུན་བླ་མ་དང་། །རབ་འབྱམས་ཡི་དམ་ལྷ་ཡི་དཀྱིལ་འཁོར་མཆོག །གནས་གསུམ་མཁའ་འགྲོ་དམ་ཅན་ཚོགས་རྣམས་ཀྱིས། །ཕུན་ཚོགས་དགེ་ལེགས་ཤིས་པའི་དཔལ་སྩོལ་ཅིག །གདོད་མའི་མགོན་པོ་རྒྱལ་བ་ཀློང་ཆེན་པ། །མཁྱེན་བརྩེའི་འོད་ཟེར་སྟོང་འབར་འཇིགས་མེད་གླིང་། །རྒྱལ་བ་ཀུན་དངོས་མི་འགྱུར་ནམ་མཁའི་ཞབས། །རྒྱལ་བའི་མྱུ་གུར་བཅས་ལ་གུས་ཕྱག་འཚལ། །ཤེས་བྱ་ཀུན་མཁྱེན་འཇམ་དཔལ་དཔའ་བོ་དང་། །སྙིང་རྗེའི་མངའ་བདག་མགོན་པོ་སྤྱན་རས་གཟིགས། །དབྱེར་མེད་བླ་མ་བསྟན་འགྲོའི་དཔལ་མགོན་མཆོག །འཇིགས་མེད་ཆོས་ཀྱི་དབང་པོའི་ཞབས་ལ་འདུད། །དམ་པ་མཆོག་དེའི་ཞལ་ནས་ལེགས་གསུངས་པའི། །ལེགས་བཤད་རིན་ཐང་བྲལ་བའི་རིན་ཆེན་ཚོགས། །ཕྱོགས་གཅིག་ལེགས་པར་བསྟར་བའི་གླེགས་བམ་གྱི། །བཞུགས་བྱང་དཀར་ཆག་ཡི་གེར་འགོད་པར་བྱ། །དེ་ལ་འདིར་མཁྱེན་རྟོགས་ཀྱི་ཡོན་ཏན་རྨད་དུ་བྱུང་བ་དཔལ་དགེ་སྤྲུལ་པའི་སྐུ་རིན་པོ་ཆེ་ཨོ་རྒྱན་འཇིགས་མེད་ཆོས་ཀྱི་དབང་པོ་ཞེས་མཚན་གྱི་བ་དན་སྲིད་ན་མངོན་པར་མཐོ་བ་གང་ཉིད་སྐུ་ན་ཆུང་ངུའི་དུས་ནས་ཐེག་པ་ཆེན་པོའི་རིགས་སད་ཅིང་སྐྱེས་ཐོབ་ཀྱི་མཁྱེན་རབ་ཕུལ་དུ་བྱུང་བ་མངའ་བ་དང་ལྷག་པའི་ལྷས་བྱིན་གྱིས་བརླབ་པའི་མཐུས་ཡོངས་འཛིན་དགེ་བའི་བཤེས་གཉེན་རྣམས་ཀྱི་ཞལ་ནས་ཆོས་ཀྱི་བདུད་རྩི་ཐོབ་པ་རྣམས་ཚེགས་ཆུང་ངུས་མཁྱེན་པས་མདོ་རྒྱུད་རིག་གནས་དང་བཅས་པའི་གཞུང་ལ་གཞན་དྲིང་མི་འཇོག་པའི་རྣམ་དཔྱོད་རྣམ་པར་དག་པས་ལེགས་བཤད་སྨྲ་བ་ལ་མི་ཟད་པའི་སྤོབས་པ་ཐོབ་ཅིང་། འཇིག་རྟེན་ཆོས་བརྒྱད་ཀྱི་ཞེན་འཁྲིས་གཏན་ནས་ལོག་པས་སྐུ་ཚེ་ཧྲིལ་བོར་ཟོལ་མེད་ཀྱི་བྱ་བཏང་ཡང་དག་པའི་རྩེ་མོར་སོན་ཅིང་། བསྟན་དང་འགྲོ་ལ་རྗེས་སུ་ཆགས་པའི་ཐུགས་ཀྱིས། མདོ་རྒྱུད་རིགས་གནས་དང་བཅས་པའི་འཆད་ཉན་སྣ་ཚོགས་དང་། ཁྱད་པར་ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་ཀྱི་སེམས་རིན་པོ་ཆེའི་གཞུང་ཤིང་བཙུགས་པར་བཞེད་པས། རྒྱལ་སྲས་ཞི་བ་ལྷའི་གསུང་བྱང་ཆུབ་སེམས་དཔའི་སྤྱོད་པ་ལ་འཇུག་པའི་གཞུང་རྩལ་དུ་བཏོན་ཏེ་འཆད་ཉན་གྱི་སྲོལ་བཙུགས་པས། གསར་རྙིང་རིས་མེད་ཀྱི་དགེ་བའི་བཤེས་གཉེན་ཆོས་ཀྱི་སྤྱན་དང་ལྡན་པ་རྣམས་ཀྱིས་བདག་ཉིད་ཆེན་པོ་འདི་ནི་སྔོན་གྱི་བཀའ་གདམས་གོང་མ་རྣམས་ཀྱི་རྣམ་ཐར་དང་ཁྱད་པར་དབྱེ་བ་མེད་པ་ཡོན་ཏན་རྒྱ་མཚོ་ཆེན་པོའི་མཛོད་དུ་གྱུར་པའོ་ཞེས་བསྔགས་པའི་མེ་ཏོག་ཕྱོགས་ཀྱི་ཐ་གྲུ་ཀུན་ནས་འཐོར་ཞིང་ཞབས་པད་གུས་པའི་གཙུག་གིས་ལེན་པར་གྱུར་ཅིང་། དུས་རྒྱུན་དུ་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་ཀྱི་ཉམས་ལེན་ལ་གཞོལ་ཞིང་། ཁྱད་པར་རིག་འཛིན་བླ་མ་གོང་མ་རྣམས་ཀྱི་དོན་བརྒྱུད་བྱིན་རླབས་ཀྱི་རྟོགས་པ་འཕོས་པའི་སྟོབས་ཀྱིས་འོད་གསལ་རྡོ་རྗེ་སྙིང་པོའི་དགོངས་པ་མངོན་དུ་གྱུར་ཏེ་ནང་གི་ཉམས་རྟོགས་ཀྱི་དྲོད་ཚད་ཤིན་ཏུ་མཐོན་པོར་གྱུར་ཀྱང་། ཕྱི་ཚུལ་སྔོན་གྱི་རྒྱལ་སྲས་དེས་པ་ཞེས་པའི་རྣམ་ཐར་དང་མཚུངས་པར། རྟག་ཏུ་རང་གི་ཡོན་ཏན་ལ་མངོན་རློམ་ཅུང་ཟད་མེད་པར་སྦས་ཤིང་བདག་ཉིད་ལ་དམན་པའི་འདུ་ཤེས་ཀྱིས་དམན་ས་འཛིན་པ་ཁོ་ནའི་གནས་པར་མཛད་ཀྱང་། མཁྱེན་བརྩེ་ཉི་མ་ལྟ་བུའི་རང་རྟགས་ཀྱི་འོད་ཟེར་སྒྲིབ་ཏུ་མེད་པ་ཇེ་བས་ཇེ་གསལ་དུ་སྐུ་ཚེའི་མཐར་སོན་པར་གྱུར་ཅིང་། དམ་པ་འདི་ཉིད་གྲུབ་མཐའ་རིས་མེད་ལ་དག་པའི་སྣང་བ་དཀར་འབྱམས་ཡུག་གཅིག་ཏུ་སོང་བ་དང་། སྒྱུ་མེད་པའི་ཚིག་དྲང་པོར་སྨྲ་བ་ཁོ་ནས་དྲག་ཞན་སུ་ལའང་ངོ་བསྟོད་དང་ཟོལ་ཚིག་མེད་པར་སྨྲ་བས། གནས་སྐབས་བརླང་པ་ལྟར་སྣང་བའི་ཚིག་རྣམས་ཀྱང་གཞན་ལ་ཕན་པ་འབའ་ཞིག་ཏུ་གྱུར་པ་དང་། སྐུ་མཐོང་བ་དང་གསུང་ཐོས་པ་དང་གསུང་རྩོམ་གྱི་རྣམ་པ་ཕྲ་མོས་ཀྱང་གདུལ་བྱའི་རྒྱུད་ལ་རྣམ་དཀར་གྱི་ས་བོན་ཐེབ་པ་ཁོང་དང་འདྲ་བ་གཞན་སྙིགས་མའི་དུས་འདིར་འབྱུང་བར་དཀའོ་ཞེས་བློ་ལྡན་གཟུར་གནས་ཐམས་ཅད་ཀྱིས་བསྔགས་ཤིང་དད་པའི་བ་སྤུ་གཡོ་བའི་གནས་སུ་གྱུར་པ་འདི་ཉིད་ལེགས་བཤད་སྨྲ་བའི་སྤོབས་པ་མི་ཟད་པ་ཐོབ་པས་སྐུ་ན་ཆུང་ངུའི་དུས་ནས་བཟུང་སྟེ་ཕྱིས་སྐུ་ཚེ་ན་ཡོལ་ཙམ་གྱི་བར་དུ་གསུང་རྩོམ་སྣ་ཚོགས་པའི་རྣམ་པ་མང་དུ་མཛད་པར་འདུག་ཀྱང་། རྗེ་ཉིད་ཀྱིས་ནི་གཞན་དང་གཞན་ལ་གནང་བ་ལས། རང་རྩོམ་གྱི་དཔེ་ཆ་ཤོག་བྱང་གཅིག་ཀྱང་ཚགས་སུ་མ་མཛད་པས། གཞན་དག་གིས་ཀྱང་རེ་ཞིག་རྩོལ་བསྡུ་བྱེད་པའི་སྐབས་མ་རྙེད་པས། གསུང་རྣམས་ཕྱོགས་དང་ཕྱོགས་སུ་འཐོར་བ་ལས་རྒྱ་ཆེར་མི་སྣང་ན་ཡང་། ཕྱིས་སུ་བདག་ཉིད་ཆེན་པོ་འདི་ཡི་དངོས་སློབ་བླ་མ་ལ་གུས་པ་མཆོག་དང་ལྡན་པ་བསླབ་པ་གསུམ་གྱི་མཛོད་འཛིན་དགེ་མང་དབོན་རིན་པོ་ཆེ་ཨོ་རྒྱན་བསྟན་འཛིན་ནོར་བུས་ཕྱོགས་རྣམས་ནས་ཇི་ལྟར་རྙེད་པ་བསྡུ་རྩོལ་མཛད་དེ་ཕྱོགས་གཅིག་གླེགས་བམ་དུ་བཀོད་ཅིང་། ཡིག་ནོར་ཤིན་ཏུ་མང་བ་རྣམས་ཅི་རིགས་དག་པར་བྱས་ཤིང་ཡོན་སྦྱོར་དང་བཅས་ཏེ་སྐུ་ཞབས་སྤྲུལ་པའི་སྐུ་རིན་པོ་ཆེ་རྒྱལ་སྲས་གཞན་ཕན་ཆོས་ཀྱི་སྣང་བ་ལ་སྤར་དུ་འཁོད་པའི་མགོ་འདྲེན་ཞུས་པ་བཞིན། སྤྲུལ་པའི་སྐུ་དེ་ཉིད་ཀྱིས་སྤར་དུ་ལེགས་པར་བསྒྲུབས་ཤིང་། སྡེ་སྣོད་འཛིན་པ་མཁན་བློ་གསལ་ནས་ཞུས་དག་པ་བགྱིས་ཏེ་རུ་དམ་ཤྲཱི་སེངྷར་ཆོས་མཛོད་ཀྱི་གྲལ་དུ་བཀོད་པའི་གླེགས་བམ་ཕ་རོལ་ཕྱིན་པའི་གྲངས་ལྡན་བཞུགས་པ་ལས། ༈ གླེགས་བམ་དང་པོ། ཀ་པ་ལ། བཞུགས་བྱང་འདོད་འབྱུང་རིན་པོ་ཆེའི་ཟ་མ་ཏོག་ཅེས་བྱ་བ། སྤྱིར་གསུང་འབུམ་ཡོངས་རྫོགས་ལ། ཐུན་མོང་རིག་གནས་ཀྱི་སྐོར་དང་། ཐུན་མིན་ནང་དོན་གྱི་སྐོར་གཉིས་ལས། དང་པོ་ལ། སྙན་དངགས། སྡེབ་སྦྱོར། སྐར་རྩིས་ཀྱི་བསྟན་བཅོས་གསུམ་སྟེ། དང་པོ་སྙན་དངགས་ཀྱི་ཕྱི་མོ་མེ་ལོང་གི་དཔེར་བརྗོད་རྣ་བའི་གླིང་བུ། བསྟོད་ཚོགས་འདི་དག་གི་བརྗོད་བྱེད་ཀྱང་དནྜི་པའི་གཞུང་གི་ཚིག་དང་དོན་གྱི་རྒྱན་གྱིས་སྤྲས་པ་ཁོ་ནའི་ཕྱིར་ས་བཅད་འདི་ལ་འགོད་པ་མི་འགལ་ཞིང་འཐད་དེ། དེ་ལ་དཔལ་ལྡན་རྡོ་རྗེ་སེམས་དཔའ་ལ་བསྟོད་པ། འཁོར་ལོ་དང་པོའི་དམ་པའི་ཆོས་འདུལ་བ་ལ་བསྔགས་པ་མེ་ཏོག་གི་སྐྱེད་མོའི་ཚལ། སྟོན་པ་མཆོག་གི་གསུང་ཐེག་པའི་བྱེ་བྲག་སོ་སོ་ལ་བསྔགས་པ་ཆུན་འཕྱང་བརྒྱད་དེ། དང་པོ་གསུང་གསང་བ་བསམ་གྱིས་མི་ཁྱབ་པ་ལ་བསྔགས་པ་པདྨ་དཀར་པོའི་ཆུན་འཕྱང་། གཉིས་པ་གསུང་རྣམ་པ་ཐམས་ཅད་པ་ལ་བསྔགས་པ་ཨུ་དུམ་ཝ་རའི་ཆུན་འཕྱང་། གསུམ་པ་གསུང་དམ་པའི་ཆོས་ལ་བསྔགས་པ་ཨུཏྤལ་གཞོན་ནུའི་ཆུན་འཕྱང་། བཞི་པ་གསུང་ཡི་གེའི་ཕྲེང་བ་ལ་བསྔགས་པ་ཀུ་མུད་དཱའི་ཆུན་འཕྱང་། ལྔ་པ་གསུང་གསང་སྔགས་ཀྱི་ཚུལ་ལ་བསྔགས་པ་མེ་ཏོག་གི་ཆུན་འཕྱང་། དྲུག་པ་གསུང་ཟབ་དོན་གསང་བ་ལ་བསྔགས་པ་ཟླ་བ་ཐིག་ལེའི་ཆུན་འཕྱང་། བདུན་པ་གསུང་ཡོན་ཏན་རྒྱ་མཚོའི་ཆེ་བ་ལ་བསྔགས་པ་མུཀྟི་ཀའི་ཆུན་འཕྱང་། བརྒྱད་པ་གསུང་ཡེ་གྲོལ་རྫོགས་ཆེན་ལ་བསྔགས་པ་བཻ་ཌཱུརྱའི་ཆུན་འཕྱང་རྣམས་དང་། ཀུན་མཁྱེན་བླ་མའི་གསུང་རབ་ལ་བསྔགས་པ་ཡོངས་རྫོགས་བསྟན་པའི་པད་ཚལ་ཞེས་བྱ་བ་དང་། བསྔགས་པའི་ཡུལ་དེར་འཇལ་བའི་ཡོན་ཏན་ལ་བསྔགས་པའི་སྒོ་ནས་བལྟ་བར་བསྐུལ་བ་རྣམས་དཔེ་བམ་གཅིག་གོ །རྗེ་བླ་མ་བཀའ་དྲིན་ཅན་འཇིགས་མེད་རྒྱལ་བའི་མྱུ་གུའི་གསང་གསུམ་ཡོན་ཏན་མི་ཟད་རྒྱན་གྱི་འཁོར་ལོ་ལ་ཤར་ཕྱོགས་གོ་ཌཱ་བའི་ལུགས་ཀྱི་བྱ་དཀའི་ཚིག་རྒྱན་ཀུན་བཟང་འཁོར་ལོ་བཞི་ལྡན་གྱི་སྒོ་ནས་བསྔགས་པ། སྐྱབས་རྗེ་རྒྱལ་བའི་སྲས་པོ་གཞན་ཕན་མཐའ་ཡས་ལ་རོ་དྲུག་སྨན་གྱི་བྱེད་པས་ནད་དྲུག་སྦྱོང་བའི་དཔེས་ཕྱིན་དྲུག་གི་ཡོན་ཏན་དང་ལྡན་པར་བསྔགས་པ་ན་མོ་གུ་རུ་བཻ་ཥ་ཛྱ་སོགས། ཐབས་ལམ་མཆོག་གི་སྤྱོད་པ་ལ་དབང་བའི་ཡོན་ཏན་བསྐུལ་བའི་ཟོལ་གྱིས་བསྔགས་པ། གཞན་ཕན་ཐུགས་བསྐྱེད་སོགས། སྣང་བཞི་ཚད་དུ་ཕེབས་པ་སོགས་རང་དོན་མངོན་དུ་གྱུར་ཅིང་སྡེ་སྣོད་གསུམ་སྟོན་པ་སོགས་གཞན་དོན་མཛད་པའི་ཡོན་ཏན་ལ་བསྔགས་པ། གཉིས་ཀྱི་གཉིས་པ་སོགས། བཤད་སྒྲུབ་གསེར་གྱི་འཁོར་ལོ་སོགས་ཆོས་ཀྱི་རྒྱལ་སྲིད་དང་ལྡན་པར་བསྔགས་པ། རིམ་རྩོལ་སྤྲོས་པས་སོགས། གཞན་ཡང་ལྟ་བ་ཆོས་སྐུའི་དབྱིངས་ལས་མ་གཡོས་བཞིན་སྤྱོད་པ་གཟུགས་སྐུའི་འགྲོ་དོན་མཛད་པ་ལ་བསྔགས་པ་རིང་ནས་མཐའ་ཀླས་སོགས་རྒྱ་ནག་ལྕང་སྐྱ་ལ་སྤྲིངས་བ། སྒྲུབ་པའི་རྒྱལ་མཚན་འཛིན་བཞིན་སྐལ་ལྡན་སློབ་ཚོགས་ལ་ཟབ་རྒྱས་བདུད་རྩིའི་དགའ་སྟོན་འགྱེད་པ་ལ་བསྔགས་པ་མཐའ་ཀླས་འགྲོ་ལ་སོགས་རྒྱ་ནག་ཆོས་བཟང་ལ་སྤྲིངས་བ། དཔོན་སློབ་བཤེས་པའི་ངང་ཚུལ་གྱིས་བརྩེ་བའི་ཡོན་ཏན་ལ་བསྔགས་པ་ཟླ་གཞོན་ཐིག་ལེའི་སོགས་རྒྱ་རོང་དཔོན་པོ་ལ་སྤྲིང་བ་སྟེ་འདི་རྣམས་སྐྱབས་རྗེ་དབུས་སུ་བཞུགས་སྐབས་སོགས་སུ་སྤྲིངས་ཡིག་ཕུལ་བའི་འཚམ་གསོལ་ཡིན་ཡང་དོན་ལ་གང་དེའི་གསང་གསུམ་དམ་པའི་ཚུལ་དགུའི་ཡོན་ཏན་ལ་རབ་བརྟགས་ཙམ་མིན་པ་ཚུལ་བཞིན་བསྔགས་པའི་ཚིག་རྒྱན་འཇེབས་མཛེས་ཀྱིས་སྤྲས་པས་བསྟོད་ཚོགས་སུ་སྡེབ་པར་འོས་པ་དང་། སྐྱབས་རྗེའི་གསན་ཡིག་གི་མགོ་རྒྱན་འདི་ཡང་རྒྱལ་བསྟན་རིས་མེད་ལགས་ན་བསམ་བཞེས་པ་བསྟན་འཛིན་དམ་པའི་རྣམ་ཐར་མཆོག་གི་ཆེ་བས་བསྔགས་པ་རྣམས་དཔེ་བམ་གཅིག་གོ །དེ་ནས་གཏམ་ཚོགས་ཀྱི་སྐོར་ལ། ངེས་འབྱུང་སྐྱོ་ཤས་ཀྱི་བློ་བསྐྱེད་པའི་གཏམ་པདྨའི་ཚལ་ཞེས་བྱ་བ་ཆོས་དང་མཐུན་པའི་ཟློས་གར་དུ་བསྒྱུར་བ། ངེས་འབྱུང་དང་བརྩོན་འགྲུས་ལ་བསྐུལ་བའི་གཏམ་སྔོན་ཤཱཀྱའི་ཁྱེའུ་གཞོན་ནུ་ཟུང་གི་གཏམ་རྒྱུད་དང་སྦྱར་བ། བསོད་ནམས་ཀྱི་ཚོགས་ལ་བསྐུལ་བའི་གཏམ་གུ་རུའི་སྐུ་ཚབ་གཙོ་བོར་གྱུར་པའི་རྟེན་གསུམ་ལ་གུས་པ་བྱ་ཚུལ་ལེགས་ལམ་དམ་པའི་གསོས་སྨན་ཞེས་བྱ་བ། ཆོས་དང་འཇིག་རྟེན་རྟོགས་པར་བྱེད་པའི་གཏམ་གདོལ་བའི་དྲང་སྲོང་གི་བསྟན་བཅོས་ཐར་བའི་ཐེམ་སྐས་ཞེས་བྱ་བ། ལུགས་ཟུང་ཕུན་སུམ་ཚོགས་པའི་ཚོགས་བཤད་འབེལ་བའི་གཏམ་ལྷའི་སིལ་སྙན་ཞེས་བྱ་བ། ལུགས་ཟུང་ཚོགས་གཏམ་གྱི་ལྷན་ཐབས་རིན་ཆེན་ཕྲ་ཚོམ། ཚོགས་ཀྱི་གཏམ་མཎྜལ་རྣམ་བཤད་ཚོགས་གཉིས་ལམ་བཟང་། ངོ་མཚར་བསྐྱེད་པ་བཞད་གད་ཀྱི་གཏམ་ཆུ་གྲུ་ལུས་ཀྱི་རྣམ་བཤད་བརྒལ་བའི་ལན་དང་བཅས་པ། འདུ་འཛི་སྤངས་ཏེ་དབེན་པར་བསྐུལ་བ་ཐེག་པ་མཆོག་གི་ཚུལ་དང་མཐུན་པ་དབེན་པའི་གཏམ་ལྷའི་རྔ་སྒྲ། སྐྱེལ་འཕོ་སོགས་ཀྱི་འདུ་འཛིས་ཀློག་སྤོང་ལ་གཡེང་བའི་རྒྱུ་སྤོང་བར་བསྐུལ་བའི་གཏམ་རྫ་དགོན་ལ་སྤྲིངས་བ། མ་དཔེ་མི་གསལ། རྡོ་གྲུབ་ལ་སྤྲིངས་བ། བཟོད་པའི་གོ་ཆས་ཚིག་རྩུབ་ཀྱི་མདའ་བསྲུང་བ་མེད་ན་བླ་མ་དང་མཆེད་ཀྱི་དམ་ལ་འགལ་ཏེ་དམྱལ་བར་འགྲོ་བའི་ཉེས་སྤྱོད་སྤོང་བར་བསྐུལ་བའི་གཏམ་ཀུན་བསྟན་ལ་སྤྲིངས་བ། དབྱར་དུས་སུ་བབས་པའི་ཆར་པ་ཡིད་ཅན་དགའ་བའི་གསོས་སུ་གྱུར་པ་ཉིད་གཅོད་པ་རང་གཅིག་པུའི་དོན་དུ་གཞན་མང་པོ་ལ་འཚེ་བ་སྤོང་བར་བསྐུལ་བའི་གཏམ་ཆར་གཅོད་མཁན་ལ་སྤྲིངས་བ། གཞན་ནོར་མཐུས་ལེན་པའི་ལས་འབྲས་བསྟན་ཏེ་སྤོང་བར་བསྐུལ་བའི་གཏམ་ཨར་ཇག་སྤྱི་ལ་སྤྲིངས་བ། པདྨའི་རྒྱལ་ཚབ་སྤྲུལ་པའི་གཏེར་ཆེན་མཆོག་གྱུར་གླིང་པ་ལ་ཕུལ་བའི་འབུལ་ཡིག་རྣམས་སོ། །གཉིས་པ་ནི། སྡེབ་སྦྱོར་གྱི་མན་ངག་ངོ་མཚར་རྟོགས་བྱེད་རིན་ཆེན་ཕྲེང་བ་ཞེས་བྱ་བའོ། །གསུམ་པ་ལ། རྩིས་གཞུང་ཉིན་བྱེད་སྣང་བའི་འདས་ལོ་སོགས་ངེས་པ་གསར་སྤོས་མཛད་པ་དགེ་ལེགས་ཉི་མ་ཞེས་བྱ་བ། ཉིན་སྣང་བུ་ཡིག་བསྟན་རྩིས་ལ་ཆོས་འབྱུང་རགས་པ་མཆན་དུ་སྟོན་པ་ངོ་མཚར་ཕྲེང་བ། རྩིས་སྐར་ནག་ཟུང་འཇུག་གི་ལིའུ་ཐུའི་རྣམ་བཤད་གོ་ལའི་རྣ་རྒྱན། ཡུལ་དུས་ལོངས་སྤྱོད་བསྒྲིག་ཐབས་ཀྱི་མན་ངག་དང་། དུས་གཟེར་འགོད་པའི་ལག་ལེན་དང་རྩིས་འབྲས་མདོར་བསྡུས་སྤང་བླང་འདོད་པའི་སྙེ་མ། ལིའུ་ཐུའི་མགོ་རྒྱན་དཔྱོད་ལྡན་མཁས་པའི་ཡིད་འཕྲོག །ཕྱི་ནང་གཞན་གསུམ་དག་པར་བསྟན་པའི་དོན་འགྲེལ་བླང་དོར་གསལ་བའི་རེ་མིག་གི་མགོ་རྒྱན་རྣམས་དང་། ཞར་ལ་གསོ་བ་རིག་པའི་བྱེ་བྲག་ཕྲན་ཚེག་འབམ་བཅོས་ཀྱི་ལག་ལེན་གོ་བདེར་བསྡུས་པ་བཅས་བཞུགས་སོ། ། ༈ གླེགས་བམ་གཉིས་པ། ཁ་པ་ལ། གཉིས་པ་ཐུན་མོང་མ་ཡིན་པ་ནང་དོན་རིག་པ་ལ། ཆོས་གང་ཞིག་འཆད་བྱེད་ཀྱི་ཡན་ལག་དང་། འཆད་བྱའི་གཞུང་གཉིས་ལས། དང་པོ་མདོ་སྔགས་ཐེག་པ་རྒྱ་མཚོའི་ཆོས་ཚུལ་གང་ཡང་གཞན་ལ་སྟོན་ཅིང་འཆད་པ་ལ། འཆད་བྱེད་ཀྱི་ཐབས་ཚུལ་མེད་དུ་མི་རུང་བ་ནི། དཀྱུས་ཀྱི་ས་གཅོད་པ་སྟག་མོའི་མཆོང་སྟབས་ལྟ་བུ་ཞེས། གཞུང་དོན་ཚན་རེ་རེ་བཞིན་གྱིས་བསྟན་པའི་དོན་བསྡུས་ཏེ་སོ་སོར་མ་འདྲེས་པར་འཆད་ཤེས་པ་འཆད་ཚུལ་གྱི་མན་ངག་མཆོག་ཏུ་གྱུར་པ་སྟེ། བསྡུས་དོན་ས་བཅད་སྣ་ཚོགས་ཀྱི་སྐོར་ཕྱོགས་གཅིག་ཏུ་འགོད་པ་ལ། བཀའ་བསྟན་སྤྱིའི་བཤད་བྱའི་ཡན་ལག་ཀུན་མཁྱེན་དྲི་མེད་འོད་ཟེར་གྱིས་མཛད་པའི་བསྟན་བཅོས་ཡིད་བཞིན་རིན་པོ་ཆེའི་མཛོད་ལ་དཔེར་མཚོན་པ་དང་། འཁོར་ལོ་དང་པོ་གཙོ་ཆེ་བའི་བསྟན་བཅོས་མངོན་པ་མཛོད་ཀྱི་ས་བཅད། འཁོར་ལོ་བར་བ་གཙོ་ཆེར་སྟོན་པའི་བསྟན་བཅོས་དབུ་མ་རྩ་བ་ཤེས་རབ་ཀྱི་ས་བཅད། ཤེར་ཕྱིན་མངོན་རྟོགས་རྒྱན་གྱི་ས་བཅད། འཁོར་ལོ་ཐ་མ་གཙོ་ཆེར་འགྲེལ་བའི་བསྟན་བཅོས་རྒྱུད་བླ་མའི་ས་བཅད། སྤྱོད་ཕྱོགས་གཙོ་ཆེ་བ། བྱང་ཆུབ་སེམས་དཔའི་སྤྱོད་པ་ལ་འཇུག་པའི་ས་བཅད། མདོ་སྡེའི་རྒྱན་གྱི་ས་བཅད། ཐེག་པ་གསུམ་དང་རིག་འཛིན་གྱི་སྡེ་སྣོད་དང་བཅས་པའི་ཉམས་ལེན་བསྟན་པའི་བསྟན་བཅོས་སྡོམ་གསུམ་རྣམ་པར་ངེས་པའི་ས་བཅད། རྒྱུད་ཐམས་ཅད་ཀྱི་རྒྱལ་པོ་སྒྱུ་འཕྲུལ་གསང་བ་སྙིང་པོའི་འཆད་ཐབས་བརྒྱུད་པ་གསུམ་གྱི་ལོ་རྒྱུས་དང་མ་ཧཱ་ཡོ་གའི་རྒྱན་བདུན་བཤད་པ། གསང་སྔགས་གཙོ་ཆེར་སྟོན་པའི་བསྟན་བཅོས་ཡོན་ཏན་རིན་པོ་ཆེའི་མཛོད་ཀྱི་འཆད་ཐབས་ཡིད་ཀྱི་མེ་ལོང་། ཡོན་ཏན་མཛོད་ཀྱི་བསྡུས་དོན་ས་བཅད་ཨུཏྤལ་གསར་བའི་ཕྲེང་བ། ཡོན་མཛོད་ས་བཅད་འབྲིང་པོ་ལྟར་བྱས་པ་མུ་ཏིག་དཀར་པོའི་ཕྲེང་བ། ཡོན་མཛོད་ཀྱི་ས་བཅད་རྒྱས་པ་འབྱེད་འགྲེལ་མེ་ཏོག་གི་ཕྲེང་བ་རྣམས་དང་། རྫོགས་པ་ཆེན་པོ་གཙོ་ཆེར་སྟོན་པའི་བསྟན་བཅོས་ངལ་བསོ་སྐོར་གསུམ་གྱི་འཆད་ཐབས་མན་ངག་གསལ་བ། སེམས་ཉིད་ངལ་གསོའི་བསྡུས་དོན་ས་བཅད་པདྨ་དཀར་པོའི་ཟིལ་མངར། ཀུན་མཁྱེན་འཇིགས་མེད་གླིང་པའི་གསུང་གུ་རུའི་གསོལ་འདེབས་བསམ་པ་མྱུར་འགྲུབ་མའི་ས་བཅད། དམ་པའི་རིགས་ཅན་དྲྭ་མ་ལྔ་དང་རིག་འཛིན་འདུས་པའི་འཁོར་གྱི་གསུང་སྤྱི་བཤགས་དུས་གསུམ་བདེ་གཤེགས་མའི་ས་བཅད། སངས་རྒྱས་ཕལ་པོ་ཆེའི་མདོ་ལས་བྱུང་བ་བཟང་པོ་སྤྱོད་པའི་སྨོན་ལམ་གྱི་ས་བཅད་བསྡུས་པ་སྡོམ་དུ་བསྟན་པ། མཁས་གྲུབ་ཀརྨ་ཆགས་མེད་ཀྱིས་གསུངས་པའི་བདེ་སྨོན་ས་བཅད། རྗེ་རིན་པོ་ཆེ་བློ་བཟང་གྲགས་པའི་དཔལ་གྱིས་གསུངས་པའི་བདེ་སྨོན་ཞིང་མཆོག་སྒོ་འབྱེད་ཀྱི་འདོན་འགྲིགས་ས་བཅད། གཏེར་ཆེན་འགྱུར་མེད་རྡོ་རྗེས་གསུངས་པའི་སྨོན་ལམ་སྤྱི་འགྲོ་བླ་མ་ཡི་དམ་མའི་ས་བཅད། སློབ་གསར་རྣམས་ཀྱི་བློ་གྲོས་རྩལ་སྦྱོང་བ་ཚོགས་བཤད་འབུལ་བའི་མགོ་བསྐུལ་དང་མཇུག་གི་མཚམས་སྦྱོར་བཅས་སོ། །གཉིས་པ་འཆད་བྱའི་གཞུང་ལ། རྒྱུ་མཚན་ཉིད་ཀྱི་ཐེག་པ་དང་། འབྲས་བུ་གསང་ཆེན་ངེས་པའི་ཐེག་པར་གཏོགས་པ་གཉིས་ལས། དང་པོ་ལ། འཁོར་ལོ་གསུམ་སོ་སོ་བ་དང་། ཐུན་མོང་བ་རིག་འཛིན་གྱི་སྡེ་སྣོད་བཅས་འདུས་པའི་སྡེ་སྟེ་གཉིས་སོ། །དང་པོ་ལ། འཁོར་ལོ་དང་པོར་གཏོགས་པ། བདེན་པ་བཞི་སོགས་ཀྱི་ཟིན་བྲིས། དགེ་སློང་གིས་བསྒྲུབ་པའི་བསླབ་བྱ་གཞི་བཅུ་བདུན་གྱི་ཟིན་བྲིས་ཆེ་ཆུང་ཚན་གཉིས། སྤྱིར་དུས་ཁྲིམས་ཡན་ལག་བརྒྱད་པ་འདུལ་བར་གཏོགས་ཀྱང་འདི་ཐེག་ཆེན་གསོ་སྦྱོང་ཡིན་པར་མ་ཟད་གསང་སྔགས་བྱ་བའི་རྒྱུད་ཀྱི་དཀའ་ཐུབ་ཀྱི་ཡན་ལག་ཀྱང་ཡིན་མོད། དེ་ལྟ་ནའང་བསྲུང་བྱ་དུས་ཁྲིམས་ཀྱི་རྣམ་པ་དབང་བཙན་དུ་འདིར་འགོད་པ་ལ། བསྙེན་གནས་དང་འབྲེལ་བའི་ཐེག་ཆེན་གསོ་སྦྱོང་སྦྱིན་པའི་མཚམས་སྦྱོར་འཆད་ཚུལ་ཐ་དད་པ་གཉིས་དང་། བཀའ་འཁོར་ལོ་བར་ཐ་ཐུན་མོང་གི་དང་པོའི་འཇུག་སྒོ་བྱང་ཆུབ་སེམས་བསྐྱེད་ཀྱི་སྡོམ་པ་འབོགས་ཆོག་རྒྱལ་སྲས་ཤནྟཱ་དེ་ཝའི་སྤྱོད་འཇུག་གི་ལུགས་ཀྱི་མཚམས་སྦྱོར། སེམས་བསྐྱེད་རྒྱུན་ལྡན་གྱི་གང་ཟག་བློ་དམན་གྱིས་བསྲུང་ཚུལ་གྱི་ཟིན་བྲིས་མདོར་བསྡུས་ལེ་ཚན་གསུམ། སྐྱབས་འགྲོ་དང་སེམས་བསྐྱེད་ཀྱི་ཟིན་བྲིས། བསླབ་པ་ཀུན་ལས་བཏུས་པ་ཞི་བའི་ལྷས་གསུངས་པ་ལ་མཆན་འགྲེལ་མཛད་པ། བྱང་སེམས་ཀྱི་བློ་སྦྱོང་གི་སྤྱོད་པ་གཙོ་བོར་སྟོན་པ་སྤྱོད་འཇུག་གི་སྒོམ་རིམ་རབ་གསལ་ཉི་མ་ཞེས་བྱ་བ། རྒྱལ་བའི་སྲས་ཀྱི་བསླབ་བྱ་མདོར་བསྡུས་པ་ཉམས་ལེན་སྙིང་པོ་ཞེས་བྱ་བ། ཐེག་པ་ཆེན་པོ་མདོ་སྡེའི་རྒྱན་གྱི་དོན་བསྡུས་པ། བསླབ་པ་ཐམས་ཅད་ཀྱི་བསྲུང་ཐབས་དྲན་ཤེས་བག་ཡོད་བསྟེན་ཚུལ་གྱི་ཟིན་བྲིས། ཐེག་ཆེན་ལམ་གྱི་རྩ་བ་དམ་པ་གསུམ་གྱི་ཟིན་བྲིས་ཚན་གཉིས་བསྐུལ་བ་པོ་སོ་སོ་ལ་གསུངས་པ་དང་། བྱང་ཆུབ་སེམས་དཔས་སེམས་ཅན་གྱི་དོན་སྤྱོད་པའི་ཚེ་རང་གཞན་གྱི་འབྱོར་བའི་གནས་སྐབས་དགུ་ལ་བརྟགས་པའི་ཚུལ། ཐེག་ཆེན་གྱི་ལྟ་བ་ངོ་སྤྲོད་པའི་ཁྲིད། དཀོན་མཆོག་བསྡུས་པའི་སྡོམ་བྱང་། བྱང་ཆུབ་སེམས་དཔའི་འགལ་རྐྱེན་བདུད་ཀྱི་བར་ཆད་བརྟགས་ནས་སྤོང་ཚུལ་གྱི་མན་ངག །བྱང་ཆུབ་སེམས་ཀྱི་མཐུན་རྐྱེན་ཐེག་ཆེན་མདོ་སྡེ་མཐོང་བའི་ཕན་ཡོན་རྣམས་བཞུགས་སོ། ། ༈ གླེགས་བམ་གསུམ་པ། ག་པ་ལ། འཁོར་ལོ་བར་བའི་དགོངས་འགྲེལ་གྱི་བསྟན་བཅོས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་སྤྱི་དོན་དང་། འབྲུ་འགྲེལ། ཐེག་ཆེན་དགེ་འདུན་ཉི་ཤུའི་ཟུར་བཀོལ། ཤེས་རབ་བསྡུས་པའི་སྡོམ་བྱང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོམ་རིམ། ཤེས་རབ་ཁྲི་བའི་ལུང་འགྲེལ་དང་དོན་བསྡུས་རྣམས་བཞུགས་སོ། ། ༈ གླེགས་བམ་བཞི་པ། ང་པ་ལ། འཁོར་ལོ་ཐ་མ་གཙོ་བོར་གྱུར་པའི་ཐེག་གསུམ་སྔགས་དང་བཅས་པའི་ཉམས་ལེན་གྱི་ཕྱོགས་ཏེ། ཕྱི་ནང་གྲུབ་མཐའི་དབྱེ་ཚུལ་ས་བོན། སྡོམ་གསུམ་རྣམ་ངེས་ཀྱི་ལེའུ་དང་པོའི་སྐབས་ཀྱི་ཐེག་རིམ་དགུའི་རྣམ་བཞག །ལེའུ་གསུམ་པ་བྱང་སེམས་ཀྱི་འབྲུ་འགྲེལ། ཉེས་བྱས་ཕྲ་བ་བརྒྱད་ཅུའི་རེ་མིག །འབྲས་བུ་སྐུད་དང་ཡེ་ཤེས་ཀྱི་ཟིན་བྲིས། སྡོམ་པ་གསུམ་གྱི་གནད་བསྡུས་པ། རྒྱལ་དབང་ལྔ་བ་ཆེན་པོས་གསུངས་པའི་སྡོམ་གསུམ་སྨོན་ལམ་གྱི་ཚིག་འགྲེལ། ཡོན་ཏན་རིན་པོ་ཆེའི་མཛོད་ཀྱི་བཀའ་འགྲེལ་ཉིན་བྱེད་སྣང་བ། དེའི་ཞིབ་དཔྱོད་ས་ལམ་བྱེ་བྲག་ཏུ་བཤད་པ་གསུང་རྒྱུན་གྱི་ཟིན་བྲིས། བྱང་ཆུབ་སྤྱོད་པའི་སྨོན་ལམ་ཕན་བདེའི་ལྗོན་པའི་དཀའ་འགྲེལ་ས་ལམ་རྣམ་བཞག་དང་མཚམས་སྦྱོར་གྱི་ངག་བཀོལ། གསང་བ་སྔགས་ཀྱི་སྨོན་ལམ་འདོད་འཇོའི་དགའ་སྟོན་གྱི་དོན་འགྲེལ་དང་། དེའི་སྨད་ཆའི་རྫོགས་ཆེན་སྡེ་གསུམ་གྱི་ཚིག་འགྲེལ་རྣམས་སོ། །གཉིས་པ་འབྲས་བུ་སྔགས་ཀྱི་ཐེག་པའི་ཕྱོགས་ཀྱི་དགོངས་འགྲེལ་ལ། འཇུག་སྒོ་དབང་གི་གསལ་བྱེད་དང་། དབང་ཐོབ་པའི་གང་ཟག་གིས་སྔགས་ལ་སློབ་ཚུལ་གྱི་རིམ་པ་གཉིས་སོ། །དང་པོ་ལ། བླ་མེད་སྤྱིའི་དབང་བཞིའི་རྣམ་བཤད་རིན་ཆེན་ཕུང་པོ། ཀར་གླིང་ཞི་ཁྲོའི་མཚོན་ནས་མ་ཧཱ་ཡོ་ག་གཙོ་བོར་གྱུར་པའི་དབང་གི་མཚམས་སྦྱོར་པཎྜ་རི་ཀའི་དོ་ཤལ། དེ་དང་འབྲེལ་བ་ཀར་གླིང་ཞི་ཁྲོའི་བསྙེན་ཡིག་དང་ཆོ་གའི་ལས་འགྲིགས། བླ་སྒྲུབ་རིག་འཛིན་འདུས་པའི་ལས་འགྲིགས། ལུང་ཨ་ནུ་ཡོ་ག་འདུས་པ་མདོ་དབང་གི་ལས་འགྲིགས། མན་ངག་རྫོགས་པ་ཆེན་པོ་སྙིང་ཐིག་ཡ་བཞིའི་མཁའ་འགྲོ་སྙིང་ཐིག་སོགས་ཀྱི་དབང་གི་ཟིན་བྲིས་ལས་འགྲིགས་བཅས་སོ། །གཉིས་པ་ལ་བུམ་དབང་གི་ལམ་བསྐྱེད་རིམ་ཡན་ལག་དང་བཅས་པ། གསང་ཤེར་དབང་གི་ལམ་རྫོགས་རིམ་དུ་གཏོགས་པ། དབང་བཞི་པའི་ལམ་ཕྱག་རྫོགས་ཀྱི་ཉམས་ལེན་སྟོན་པ། དེ་དག་གི་ཆ་ལག་ངག་འདོན་ཐོར་བུའི་སྐོར། ལམ་ཉམས་སུ་ལེན་ཚུལ་གྱི་མན་ངག་སྐལ་བ་དང་མཚམས་པར་གདམས་པའི་ཞལ་གདམས་སྣ་ཚོགས་ཀྱི་སྐོར་ཏེ་ལྔ་ལས། དང་པོ་ལ། བླ་མེད་སྤྱིའི་བསྐྱེད་རིམ་ལྷའི་ཁྲིད་འོག་མིན་བགྲོད་པའི་ཐེམ་སྐས་ཀྱི་དཀའ་འགྲེལ། སྲོག་སྡོམ་གཟེར་བཞི་བཤད་པ་ཚངས་པའི་སྒྲ་དབྱངས། རྫོང་འཕྲང་སྲོག་གསུམ་གྱི་བཤད་པ་རྣམས་དང་། ལམ་གྱི་ཡན་ལག་དམ་ཚིག་གི་རྟེན་རྡོར་དྲིལ་རྣམ་བཤད་རྒྱལ་བའི་དགོངས་པ་གསལ་སྟོན། དཔལ་ལྡན་དུས་ཀྱི་འཁོར་ལོའི་སྙིང་པོ་སྔགས་ཀྱི་དཀྱིལ་འཁོར་རྣམ་བཅུ་དབང་ལྡན་གྱི་ཐིག་དང་དོན་བཤད་བཅས་སོ། །གཉིས་པ་ལ། ཐབས་གྲོལ་ལམ་གྱི་ཁྱད་པར་སྤྱི་བཤད་པ། རྫོགས་རིམ་གྱི་ཆོས་དྲུག་བསྡུས་ཏེ་བསྟན་པ་འདའ་ཁའི་ཉམས་ལེན་བར་དོའི་ངོ་སྤྲོད། རྫོགས་རིམ་གྱི་འབྲས་བུ་འཕོ་མེད་མི་འགྱུར་བའི་སྐུའི་དོན་བཤད་པ་སྐྱབས་རྗེ་གཞན་ཕན་མཐའ་ཡས་ཀྱི་བརྟན་བཞུགས་ཚིག་འགྲེལ་རྡོ་རྗེའི་ཚིག་གི་ཁ་འབྱེད་ཅེས་བྱ་བ་རྣམས་སོ། །གསུམ་པ་ལ། གནས་ལུགས་ཕྱག་རྒྱ་ཆེན་པོ་གཅིག་ཆར་དུ་སྟོན་པའི་ཁྲིད་ཡིག་མངའ་བདག་མར་པ་ལོ་ཙྭ་སོགས་ཀྱི་གསུང་གི་གནད་བསྡུས་པ་གེགས་སེལ་དང་བོགས་འདོན་གྱི་མན་ངག་དང་བཅས་པ། བསྐྱེད་རྫོགས་ཀྱི་འབྲས་བུ་གསང་སྔགས་ནང་ལྟར་ས་བཅུ་ལམ་ལྔ་བྱང་ཆུབ་ཕྱོགས་ཆོས་སོ་བདུན་གྱིས་བགྲོད་ཚུལ་མཚུངས་མེད་བླ་མའི་ཡོན་ཏན་དང་སྦྱར་ནས་བརྒྱུད་གསུམ་བླ་མ་རྒྱང་འབོད་ཀྱི་ཚུལ་དུ་བཤད་པ་བླ་མ་རྒྱང་འབོད་རྩ་འགྲེལ་དཀྱུས་སུ་བཀོད་པ་མོས་གུས་གདུང་བའི་རྒྱངས་གླུ་བརྒྱུད་གསུམ་བླ་མའི་བྱིན་རླབས་རང་རྒྱུད་ལ་ལེན་པའི་ཕོ་ཉ་ཞེས་བྱ་བ། རྫོགས་པ་ཆེན་པོ་སེམས་སྡེ་ཨ་རོའི་ལུགས་ཀྱི་ཁྲིད་ཡིག་སྙིང་པོར་བསྡུས་ཏེ་གང་ཟག་བློ་རིམ་དགུ་ལ་སོ་སོར་འཁྲིད་ཚུལ་རྗེ་བཙུན་བླ་མ་དམ་པའི་ཞལ་ཤེས་དང་བཅས་པ། རྫོགས་པ་ཆེན་པོ་མན་ངག་སྡེ་གསང་བ་སྙིང་ཐིག་གི་འཕྱོང་དང་རྣམ་དབྱེ་སྟོན་པ་མུན་ཁང་སྒྲོན་མེ། སེམས་ཉིད་ཀྱི་རང་ངོ་གཅིག་ཐོག་ཏུ་ལྟ་ཞིང་རྟེན་བསླབ་གསུམ་ལ་གནས་པར་གདམས་པ་ངོ་སྤྲོད་གནད་ཀྱི་མེ་བཙའ། མཚུངས་མེད་བླ་མ་འཇིགས་མེད་རྒྱལ་བའི་མྱུ་གུའི་འདས་རྗེས་ཐུགས་སྲས་འཁོར་ལོའི་དབང་ཕྱུག་རྫོགས་སྤྲུལ་བཞི་བ་ལ་བབས་པ་རྫོགས་པ་ཆེན་པོའི་ཉམས་ལེན་མཐར་ཐུག་གི་འགྲེལ་པ་འོད་གསལ་གྱི་སྣང་ཆ་ཞེས་བྱ་བ། དགའ་རབ་དཔའ་བོའི་འདས་རྗེས་ཚིག་གསུམ་གནད་དུ་བརྡེག་པའི་མན་ངག་རྩ་འགྲེལ་སྡེབ་པ་མཁས་པ་ཤྲཱི་རྒྱལ་པོའི་ཁྱད་ཆོས་རྣམས་དང་། རྫོགས་ཆེན་རྟོགས་པའི་རྣལ་འབྱོར་པས་རོ་སྙོམ་བརྟུལ་ཞུགས་སྤྱོད་པའི་ལམ་ཁྱེར་གཅོད་ཡུལ་མཁའ་འགྲོའི་གད་རྒྱངས་ཀྱི་དམིགས་གནད་སྟོན་པའི་འགྲེལ་བཤད། རྫོགས་པ་ཆེན་པོ་ལ་ལོག་པར་རྟོག་པ་སེལ་བ་བརྒལ་ལན་སྨྲ་ངན་ཞི་བྱེད་ཅེས་བྱ་བ་རྣམས་བཞུགས་སོ། ། ༈ གླེགས་བམ་ལྔ་པ། ཅ་པ་ལ། རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཐུན་མོང་དང་། ཁྱད་པར་གྱི་སྔོན་འགྲོའི་ཁྲིད་ཡིག་རྗེ་བླ་མ་དམ་པ་མཚུངས་མེད་རྒྱལ་བའི་མྱུ་གུའི་གསུང་རྒྱུན་ཇི་བཞིན་པར་བཀོད་པ་ཀུན་བཟང་བླ་མའི་ཞལ་ལུང་ཞེས་བྱ་བ། དེ་ལས་ཁྱད་པར་གྱི་སྔོན་འགྲོའི་དམིགས་རིམ་རྣམས་ཟུར་བཀོལ་བགྱིས་པ། ཞར་བྱུང་ཤ་ཆང་གི་ཉེས་དམིགས་བསྟན་པ་ལེགས་བཤད་ཀུན་ལས་བཏུས་པ་བཅས་བཞུགས་སོ། ། ༈ གླེགས་བམ་དྲུག་པ། ཆ་པ་ལ། བཞི་བ་ངག་འདོན་ཐོར་བུའི་སྐོར་ཏེ། སངས་རྒྱས་ཕལ་པོ་ཆེའི་མདོའི་དགོངས་པ་བཞིན་བྱང་ཆུབ་སེམས་དཔའི་སྤྱོད་ཡུལ་རྣམ་བཞི་ཐམས་ཅད་ཡོངས་སུ་དག་པར་བྱེད་པའི་སེམས་བསྐྱེད་ཀྱི་གསོལ་འདེབས་སྨོན་ལམ། མདོ་དེ་ཉིད་དུ་བསྟན་པའི་རྒྱལ་སྲས་བྱང་ཆུབ་སེམས་དཔའ་ནོར་བཟང་གིས་ཐོག་མར་རྗེ་བཙུན་འཇམ་དཔལ་ལས་བྱང་ཆུབ་མཆོག་ཏུ་ཐུགས་བསྐྱེད་ནས་རྒྱལ་སྲས་ཀྱི་སྤྱོད་པའི་ཆོས་ཚོལ་ཏེ་དགེ་བའི་བཤེས་གཉེན་བྱང་ཆུབ་སེམས་དཔའ་སེམས་མ་ཆེན་པོ་ལྔ་བཅུ་རྩ་གཅིག་བསྟེན་པ་དེ་རྣམས་ལ་ཕྱག་འཚལ་ནས་དེ་དག་གིས་ནོར་བཟང་ལ་བསྟན་པའི་རྒྱལ་བའི་སྲས་ཀྱི་ཀུན་ཏུ་སྤྱོད་པའི་ཏིང་ངེ་འཛིན་རྒྱུད་ལ་སྐྱེ་བར་སྨོན་ལམ་གདབ་པ། ཡང་དེ་ལས་ཁྱིམ་བདག་སེམས་དཔའ་ཆེན་པོ་ནན་ཞུགས་བྱ་བས་ནོར་བཟང་ལ་ལྷོ་ཕྱོགས་དཔལ་གྱི་ཆུ་རྒྱལ་ཆེན་པོའི་དབུས་ན་རི་མཆོག་གྲུ་འཛིན་གྱི་ཕོ་བྲང་དུ་བསྟན་པ་སྤྱན་རས་གཟིགས་དབང་ཕྱུག་གི་དྲུང་དུ་སོང་ལ་རྒྱལ་སྲས་ཀྱི་སྤྱོད་པའི་ཆོས་ཞུས་ཞེས་ལུང་བསྟན་པའི་ཚིག་ཕྲད་སྨོན་ལམ་དུ་བསྒྱུར་བ། བྱང་ཆུབ་སེམས་དཔའི་སྤྱོད་པ་ལ་འཇུག་པའི་གཞུང་བཤད་ཀྱི་བརྒྱུད་པའི་གསོལ་འདེབས། བླ་མ་འཇའ་ལུས་རྡོ་རྗེའི་མཚན་དོན་གསོལ་འདེབས། བླ་མ་བཀའ་དྲིན་ཅན་འཇིགས་མེད་རྒྱལ་བའི་མྱུ་གུའི་གསོལ་འདེབས་སྨོན་ལམ་དང་བཅས་པ། ཡང་བླ་མ་ལ་གསོལ་བ་འདེབས་པ་སྐྱབས་གནས་བསླུ་མེད་ཅེས་པའི་དབུ་ཅན། རྒྱལ་སྲས་ཞི་བའི་ལྷ་དང་ཀཿཐོག་པ་དམ་གཙང་བྱམས་གསུམ་གྱི་གསོལ་འདེབས། འཕགས་པ་འཇམ་དཔལ་དབྱངས་ཀྱི་རྒྱུན་ཁྱེར་བསྡུས་པ། རྗེ་བཙུན་བླ་མ་བཀའ་བབས་བདུན་ལྡན་པདྨའི་རྒྱལ་ཚབ་འཇམ་དབྱངས་མཁྱེན་བརྩེའི་དབང་པོ་ལ་ཕུལ་བའི་བརྟན་བཞུགས་གསོལ་འདེབས་ཚན་པ་བདུན། རྗེ་བླ་མ་མཚམས་པ་རིན་པོ་ཆེའི་ཡང་སྲིད་ཀྱི་བརྟན་བཞུགས་གསོལ་འདེབས། ཤར་ཛམ་ཐང་གི་གཙང་བ་དགེ་བཤེས་ཀྱི་ཞབས་བརྟན། ཞབས་དཀར་ཚོགས་དྲུག་རང་གྲོལ་གྱི་ཡང་སྲིད་མྱུར་འབྱོན་གསོལ་འདེབས། དཔལ་སྤུངས་ཟླ་བཟང་སྤྲུལ་སྐུའི་ཡང་སྲིད་མྱུར་འབྱོན། སྒྲོལ་མའི་མཎྜལ་བཞི་ཆོག་མདོར་བསྡུས་གཏོང་ཚུལ། སྤུངས་གཏོར་ཆ་བཞིའི་ཆོ་ག་བསྡུས་པ། གསུར་མཆོད་བདུད་རྩིའི་ཆར་འབེབས། དེ་ལས་སྙིང་རྗེའི་མགྲོན་དམིགས་བསལ་ལ་བསྔོ་བའི་ཁོལ་བཏོན་ལེ་ཚན། བློ་སྦྱོང་ལུགས་ཀྱི་ལུས་སྦྱིན་ཚོགས་གཉིས་ཟུང་འཇུག །བདེ་མཆོག་བཀའ་བསྲུང་དུར་ཁྲོད་བདག་པོའི་བསང་མཆོད། གནོད་སྦྱིན་ཙིའུ་དམར་པོའི་བསང་མཆོད་བྱ་ཚུལ། ཆོས་སྐྱོང་གི་འཁུ་ལྡོག་ཞི་བ་ཟ་ངུའི་ཕྲིན་བཅོལ། མཐུ་ལྡན་དྲེག་པའི་ཚོགས་ལ་ཞི་རྒྱས་ཀྱི་ཕྲིན་ལས་བཅོལ་བ་བཀྲ་ཤིས་དགེ་ལེགས་ཀུན་འབྱུང་། དྲག་པོ་མངོན་སྤྱོད་ཀྱི་ཕྲིན་ལས་བཅོལ་བ་དམོན་ངན་དུག་གི་མེ་ཏོག །ཚེ་རབ་ཀུན་ཏུ་མཆོག་གསུམ་དང་མི་འབྲལ་ཞིང་མདོ་སྔགས་ལམ་གྱི་རིམ་པ་ཡོངས་རྫོགས་ལ་སློབ་པའི་སྨོན་ལམ། ན་མོ་གུ་རུ་བསྐལ་མང་གོང་ནས་སོགས། ཀུན་མཁྱེན་ཡབ་སྲས་ཀྱི་བསྟན་པ་ལ་ཐོས་བསམ་བཤད་སྒྲུབ་ཀྱི་བྱ་བས་མི་ནུབ་པར་འཛིན་པའི་བསྟན་རྒྱས་སྨོན་ལམ། ཐུབ་བསྟན་མཛེས་པའི་རྒྱན་གཅིག་སོགས་སོ། །ལྔ་པ་སྐལ་བཟང་སློབ་མའི་ཚོགས་ལ་རང་སྐལ་དང་མཚམས་པར་གདམས་པའི་མན་ངག་ཞལ་གདམས་སྣ་ཚོགས་ཀྱི་སྐོར་ལ། ཐོག་མར་དགེ་བ་ངེས་འབྱུང་ཆོས་ལ་བསྐུལ་བའི་གཏམ་གྱིས་ཡང་དག་པའི་ཆོས་ལ་བློ་འདུན་པར་གདམས་ཏེ། བར་དུ་དགེ་བ་ལྟ་སྒོམ་གཏན་ལ་དབབ་པའི་གཏམ་གྱིས་སྣང་སྤྱོད་ཐམས་ཅད་ལྷ་མཆོག་ཐུགས་རྗེ་ཆེན་པོའི་རང་བཞིན་དུ་ཤེས་ཤིང་བསྒོམ་ལ་ཆོས་ཀྱི་སྙིང་པོ་ཡི་གེ་དྲུག་མ་བགྲང་བར་གདམས་ནས། ཐ་མར་དགེ་བ་སྙིགས་མའི་སྤྱོད་ཚུལ་ལ་སྐྱོ་བའི་གཏམ་གྱིས་བསླུ་བྲིད་འཁྲུལ་བའི་བདུད་དབང་དུ་མི་བཏང་བར་ལྷ་ཆོས་མཐར་ཕྱིན་པར་བྱེད་ཚུལ་གདམས་པའི་མན་ངག་ཐོག་མཐའ་བར་དུ་དགེ་བའི་གཏམ་ལྟ་སྒོམ་སྤྱོད་གསུམ་ཉམས་ལེན་དམ་པའི་སྙིང་ནོར་ཞེས་བྱ་བ། རང་གི་བློ་གྲོས་ཀྱིས་རང་ལ་གདམས་པའི་བརྡར་བརྟགས་པ་བྱར་མེད་རྫོགས་ཆེན་གྱི་ངང་སྒོམ་ཉལ་ཆོག་གི་གདམས་པ་གླང་ཉལ་མ། འདི་སྣང་ཚུལ་འཆོས་སོགས་སྙིང་པོ་མེད་པའི་ཆོས་དང་ཆོས་འདྲའི་ཤན་འབྱེད་ལ་གདམས་པ། གང་ཞིག་འཁོར་བར་སོགས། རང་ལ་གྲོས་འདེབས་ཀྱི་རྣམ་པས་བརྗེད་མི་ཉན་པ་གསུམ་སོགས་གསུམ་ཚན་ཉེར་གཅིག་གི་གདམས་པ་ཆིག་བརྒྱུད་མན་ངག་གི་ཡི་གེ་རིན་པོ་ཆེའི་མཛོད་ཅེས་བྱ་བ། ངེས་འབྱུང་བྱང་སེམས་ཡང་དག་པའི་ལྟ་བ་སོགས་ཆོས་ཀྱི་ལུས་ཚང་བར་ཉམས་སུ་ལེན་ཚུལ་ཀུན་བཟང་ཆོས་རྒྱལ་ལ་གདམས་པ། ཐོས་བསམ་སྒོམ་གསུམ་ཡུལ་དང་བཅས་པའི་རིམ་པ་མ་ནོར་བར་སློབ་ཚུལ་ལྷུན་གྲུབ་རྡོ་རྗེ་ལ་གདམས་པ། སྐྱབས་སེམས་ཀྱི་རྟེན་གཞི་མ་འཆོལ་བར་ངེས་འབྱུང་སོགས་ལ་སློབ་ཚུལ་གདམས་པ། བཀའ་དྲིན་མཚུངས་པ་མེད་པའི་སོགས། ས་གཡོས་ཀྱིས་དགོན་སྡེ་སོགས་ཐལ་བར་བཏང་བའི་མི་རྟག་པ་མངོན་གྱུར་གྱིས་དཔེར་མཚོན་ནས་འདུ་འཛི་སྤང་ལ་དབེན་པ་བསྟེན། འདི་སྣང་སྤང་ལ་ལྷ་ཆོས་བསྒྲུབ་དགོས་པར་བླ་མ་སངས་རྒྱས་ཚེ་རིང་ལ་གདམས་པ། ཡུལ་སྣང་དཔེ་རུ་མཚོན་ནས་ཆོས་ལ་བསྐུལ་བའི་གདམས་པ། ན་མོ་གུ་རུ་སྐྱེ་མེད་ཆོས་སྐུའི་སོགས། ཕྱི་ནང་གི་དབེན་པ་ཡ་མ་བྲལ་བར་བསྟེན་ཚུལ་སོགས་འཇའ་བ་མདོ་སྔགས་ལ་གདམས་པ། འདུ་འཛི་སྤང་ནས་དབེན་པར་བསྐུལ་བའི་གདམས་པ། འཇིག་རྟེན་འཁྲུལ་སྣང་སོགས། དུས་མཐའི་སྙིགས་སྤྱོད་ལ་དཔྱད་དེ་སྤོང་བར་གདམས་པ། མཚུངས་མེད་བླ་མ་སོགས། འདི་སྣང་ཆོས་བརྒྱད་ཀྱི་ཕྱོགས་སྤང་ནས་ཉིད་ཀྱི་རྣམ་ཐར་ལྟར་སློབ་པར་གདམས་པ། བླ་མའི་ཞབས་ལ་སོགས་སློབ་མ་རྡོ་དེད་མ་ཞེས་བྱ་བ། སྨྲར་ཁོག་ནས་རྡོ་ཁོག་ཏུ་ཕེབ་ཁར་གསུངས་པའི་ཡུལ་ཤེས་ཀྱི་ཞེན་འབྲེལ་གཅོད་པར་གདམས་པ། སྣང་བ་སྒྱུ་མའི་སོགས། མཚན་ལྡན་བླ་མ་ཚུལ་བཞིན་བསྟེན་ནས་གདམས་ངག་ཉན་ཚུལ་གདམས་པ། སྐྱབས་གསུམ་ཀུན་འདུས་སོགས། འདི་སྣང་གི་ཞེན་པ་སྤང་ནས་དོན་གཉིས་བསྒྲུབ་ཚུལ་གདམས་པ། ན་མོ་གུ་རུ། གང་ལ་བསྟེན་ན་སོགས། ལམ་མཆོག་ཚང་ལ་མ་ནོར་བ་མཛོད་ཆེན་བདུན་དང་ཤིང་རྟ་གསུམ་བཞིན་སློབ་པར་གདམས་པ། སྟོབས་བཅུ་མངའ་བ་སོགས། ལམ་བཟང་སྡོམ་པ་གསུམ་གྱི་བསྟན་བཅོས་སོགས་ལ་འཆད་ཉན་གྱི་ཉིན་སྣང་འཆར་བའི་དུས་སུ་འཇུག་དགོས་པར་གདམས་པ། ངེས་འབྱུང་སོ་ཐར་སོགས། གྲོགས་ཀྱི་ཀུན་སྤྱོད་འགོ་བར་ཤེས་ནས་སྤང་བླང་ལ་གདམས་པ། གྲོགས་བཟང་པོའི་སོགས་བླ་མ་རིག་འཛིན་རྒྱ་མཚོ་ལ་གནང་བ། གཞོན་པའི་དུས་ནས་ཐོས་པ་བྱ་བ་སོགས་ལམ་ལ་འཇུག་ཚུལ་མ་འཆོལ་བར་གཞོན་ནུ་པདྨ་དཔལ་བཟང་ལ་གདམས་པ། ན་མོ་མཉྫུ་ཤྲཱི་ཡེ་སོགས། བྱ་བ་མང་པོའི་བློ་སྣ་སྤང་སྟེ་དབེན་པར་རང་རྒྱུད་འདུལ་བ་ལ་གདམས་པ། བསྐལ་བཟང་ཐུབ་པ་སོགས། སྙིགས་དུས་ཀྱི་བསམ་སྤྱོད་གཡོ་སྒྱུས་གཞན་བསླུ་ཐབས་ཀྱི་བསམ་སྦྱོར་མེད་པར་བློ་ཆེན་ངང་རིང་རྒྱལ་སྲས་ཀྱི་སྤྱོད་པ་ལ་སློབ་ཚུལ་སྡེ་དགེའི་ཆོས་བློན་ལ་གདམས་པ། སྐྱབས་གསུམ་རྒྱལ་བ་སོགས། ཆོས་ལ་གྱ་ཚོམ་མིན་པ་སེམས་ལ་ངེས་པ་ཐོབ་ནས་རིམ་པར་འཇུག་ཚུལ་སོགས་ཐོས་ཆུང་རྣམས་ལ་གདམས་པ། ཤར་རྒྱལ་མོ་རོང་པ་སོགས། མཉམ་པ་གཉེན་དུ་སྡེབ་པའི་བག་སྟོན་ལ་ཕྱུགས་ལུག་མི་གསོད་པར་གདམས་པ་འདྲེ་མོ་ལྟས་བརྒྱ་མ་བྱ་བ། ཇི་སྐད་དུ་སོགས། སྒྲུབ་བརྩོན་གཅོད་པ་པདྨ་ཚེ་བརྟན་གྱིས་གསོལ་བའི་ཚོགས་གླུའི་ལན་གནང་བ། བརྟུལ་ཞུགས་རྣལ་འབྱོར་སོགས། ཚོགས་གླུ་སྔོན་གནས་རྗེས་དྲན་གྱི་ཚུལ་བརྡའ་ཙམ་བསྟན་པ། མཁའ་སྤྱོད་མངོན་དགའི་སོགས། རྟོགས་པའི་སྐྱིད་གླུ་ཆེད་དུ་བརྗོད་པ་ཉིན་བྱེད་སྣང་བ་སོགས། རང་བཞིན་རྫོགས་པ་ཆེན་པོའི་དོན་ཉམས་སུ་ལེན་ཚུལ་གདམས་པ། བླ་མ་ལ་ཕྱག་འཚལ་ལོ། །བསམ་གྱིས་མི་ཁྱབ་སོགས། བླ་མ་བསྟེན་ནས་ཆོས་ཀྱི་བདུད་རྩི་ཐོབ་སྟེ་རང་གནས་སུ་འགྲོ་བ་དོན་འགྲུབ་མགྲོན་པོའི་དཔེས་བསྔགས་ཤིང་དེའི་རྒྱུན་བསྐྱངས་ཏེ་གནས་པར་ཚ་ཁོ་བ་འོད་གསལ་ལ་གདམས་པ། མཐོན་མཐིང་ཟུར་ཕུད་སོགས། སྙིགས་མའི་བསམ་སྦྱོར་སྨྲ་བ་ཕྱིན་ཅི་ལོག་ལ་སྐྱེ་བོ་ཕལ་ཆེར་གནས་པ་ལྡོག་ཕྱིར་རྒྱལ་བ་སྲས་དང་བསྲུང་མར་བཅས་པའི་ཐུགས་རྗེ་གནད་ནས་བསྐུལ་ཏེ་གསོལ་བ་གདབ་པ་ལྟ་བུའི་ཟོལ་ཚིག་ཉམས་ལྡན་གྱི་གདམས་པ། ན་མོ་གུ་རུ་ལོ་ཀི་ཤྭ་ར་ཡ་སོགས་སོ། །དྲན་ཤེས་ཀྱི་གཉེན་པོས་ཉོན་མོངས་ཀྱི་རྟོག་པ་གདོང་བཟློག་བྱས་ཏེ་འདི་སྣང་ལ་ཞེན་པ་སྤང་ཞིང་ཕྱི་མའི་ལྷ་ཆོས་བསྒྲུབས་ནས་རྙེད་ཕྱིར་རྒྱུ་འགྲུལ་སོགས་སྤོང་བ་ལྷ་པ་བློ་ལྡན་ཉི་མ་ལ་གདམས་པ་ཚིག་ལྷུག་མ། གོ་འཇོ་བླ་མ་པདྨ་རྡོ་རྗེ་ལ་གདམས་པ་ཚིག་ལྷུག་མ་ཚན་གཉིས། ལམ་ཡོངས་རྫོགས་ཀྱི་གདམས་པ། རྒྱལ་བ་ཀུན་གྱི་ཡེ་ཤེས་གཅིག་བསྡུས་སོགས། དེ་ལྟ་བུའི་ཟབ་རྒྱས་ཆོས་ཀྱི་བདུད་རྩི་མི་ཟད་རིན་པོ་ཆེའི་གཏེར་བཞིན་འཇོ་བས་སྐལ་ལྡན་སྐྱེ་བོའི་རེ་བ་ཡོངས་སུ་བསྐོང་བར་མཛད་པ་པོ་ཉིད་ལ་བཀའ་དྲིན་རྗེས་སུ་དྲན་པའི་ཕྱག་འཚལ་བ་གསང་བ་གསུམ་གྱི་ཡོན་ཏན་ལ་བསྔགས་པ། རྗེ་བཙུན་བླ་མ་འཇམ་དབྱངས་མཁྱེན་བརྩེའི་དབང་པོའི་ཞལ་སྔ་ནས་བསྩལ་བས་མཐའ་རྟེན་པར་བྱས་པའོ། །དེ་ལྟར་གླེགས་བམ་རྣམས་ཀྱི་བཞུགས་བྱང་སྨྲོས་ནས་ཕྱོགས་འདིར་འབྲེལ་བའི་རྣམ་དཀར་གྱི་བགྱི་བ་རྣམས་དོན་ཡོད་པར་བྱ་བའི་ཕྱིར་ཡོངས་སུ་བསྔོ་ཞིང་སྨོན་པའི་ཚིགས་སུ་བཅད་པ་ནི། སྒྲིབ་མེད་གཟིགས་མངའ་རྒྱལ་བ་མཆོག་དང་རྒྱལ་སྲས་རིག་པ་འཛིན་པའི་ཚོགས། །ཕྱོགས་བཅུ་ཀུན་ནས་ལྷམ་མེར་གསལ་བ་དྭངས་པའི་ཡིད་ཀྱིས་མངོན་བྱས་ཏེ། །མཁྱེན་བརྩེའི་རྒྱུས་བྱུང་དམ་པའི་གསུང་རབ་ལེགས་པར་བཤད་པ་རིན་ཆེན་མཛོད། །བསྟན་བགྲོའི་གསོས་སུ་སྤར་དུ་བསྒྲུབས་པའི་དགེ་ཚོགས་ཟླ་འོད་ཀུནྡ་ལྟར། །རབ་དཀར་གང་དེས་རྒྱལ་བསྟན་སྣང་བ་འཕེལ་བྱེད་ཅིང་། །བསྟན་འཛིན་ཚོགས་ཀྱང་བདུད་ལས་རྣམ་རྒྱལ་བཞེད་པ་འགྲུབ། །མ་ལུས་འགྲོ་ཀུན་བདེ་སྐྱིད་ཆོས་ལྡན་དཔལ་གྱིས་འབྱོར། ། རྫོགས་ལྡན་དུས་ཀྱི་དགའ་སྟོན་མགྲོན་དུ་འགུག་པར་སྨོན། །ཆོས་སྡེ་འདིར་ནི་བཤད་སྒྲུབ་ཆོས་ཆར་གྱིས། །རྟག་ཏུ་གང་བའི་མཚོ་བཞིན་རྣམ་པར་འཕེལ། །ཆོས༵་ཀྱི༵་དབ༵ང་པོ༵་དང་མཚུངས་ཆོས་འཛིན་པ། །དུ་མས་འཇིག་རྟེན་ཁམས་འདི་མཛེས་གྱུར་ཅིག །རབ་དཀར་དགེ་བའི་ཕུང་པོས་མཁའ་ཁྱབ་ཀྱི། འགྲོ་རྣམས་བླ་མེད་ཐེག་པར་རབ་ཞུགས་ཏེ། །གནས་སྐབས་ཕུན་ཚོགས་བདེ་བའི་དཔལ་ལྡན་ཞིང་། །མཐར་ཐུག་རྒྱལ་བའི་གོ་འཕང་འགྲུབ་པར་ཤོག ། ཤེས་རབ་ཉིན་མོར་བྱེད་པས་ཡིད་དགེ་ཞིང་། །ཚུལ་ཁྲིམས་པདྨའི་རྒྱན་གྱིས་ལུས་མཛེས་ལ། ། རྟག་ཏུ་ཆོས་དང་དཔལ་གྱིས་མངོན་མཐོ་བའི། །བཀྲ་ཤིས་སྣང་བས་འཛམ་གླིང་ཁྱབ་གྱུར་ཅིག །ཅེས་པའང་སྡེ་སྣོད་འཛིན་པ་མཁན་པོ་བསོད་ཆོས་ཀྱིས་ཚུལ་འདི་བཞིན་དགོས་ཞེས་གསུང་བསྐུལ་ལྟར་རུ་དམ་ཡང་དབེན་དུ་མི་ཕམ་རྣམ་པར་རྒྱལ་བས་བྲིས་པ་དགེ་ལེགས་འཕེལ། །