PJCW-KABUM-06-CHA-029
༄༅༎ ཨཽཌིཡཱནཱབྷཱཡདྷརྨསྱེནྡྲབིམོཀྵཤྲདྡྷཱསྨཧིཏཱམྲྀཏསྱགྷཊསུརནཱམབིཧརཏིསྨ༎
༄༅། །ཨཽ ཌི ཡཱ ནཱ བྷཱ ཡ དྷ རྨ སྱེ ནྡྲ བི མོ ཀྵ ཤྲ དྡྷཱ སྨ ཧི ཏཱ མྲྀ ཏ སྱ གྷ ཊ སུ ར ནཱ མ བི ཧ ར ཏི སྨ། །
༄༅། །ཨོ་རྒྱན་འཇིགས་མེད་ཆོས་ཀྱི་དབང་པོའི་རྣམ་ཐར་དད་པའི་གསོས་སྨན་བདུད་རྩིའི་བུམ་བཅུད་ཅེས་བྱ་བ་བཞུགས་སོ། །
ན་མོ་གུ་རུ་ཨཽ་ཌི་ཡཱ་ན་ཨ་བྷྱ་དྷརྨ་ཨིནྡྲཱ་ཡ། རྒྱལ་བ་རྒྱ་མཚོའི་སྤྲོ་དང་བསྡུ་བའི་དཔྱིད། །
ཀུན་བཟང་ཧེ་རུ་ཀ་དཔལ་རྡོ་རྗེ་འཆང་། །དཀོན་མཆོག་རྩ་གསུམ་རྒྱ་མཚོའི་སྤྱི་དཔལ་ཆེ། །
བརྒྱུད་གསུམ་རིག་འཛིན་རྒྱ་མཚོའི་ཚོགས་རྣམས་རྒྱལ། །གདོད་ནས་རྣམ་གྲོལ་ཀུན་བཟང་དགོངས་པ་མངོན་དུ་གྱུར། །མཁའ་ཁྱབ་ཞིང་དུ་གང་འདུལ་སྒྱུ་འཕྲུལ་དྲྭ་བའི་གར། །དབྱིངས་རིག་དབྱེར་མེད་རྟག་ཏུ་འོད་གསལ་འདུས་མ་བྱས། །ཨོ་རྒྱན་འཇིགས་མེད་ཆོས་ཀྱི་དབང་པོས་རྟག་ཏུ་སྐྱོངས། །གང་མཚན་ལན་གཅིག་ཐོས་པས་ཀྱང་། །སྲིད་ཞིའི་རྒུད་པ་དྲུང་འབྱིན་པའི། །མཚུངས་མེད་བླ་མའི་རྣམ་ཐར་ཉིད། །སྲིད་མཐར་མི་ཉམས་འཕེལ་ཕྱིར་སྤྲོ། །དེ་ལ་འདིར་གདོད་མའི་མགོན་པོ་མི་ཡི་རྫུ་ལ་ཞུགས་པ་ཨོ་རྒྱན་འཇིགས་མེད་ཆོས་ཀྱི་དབང་པོ་ཞེས་མཚན་སྙན་གྱི་གྲགས་པས་མཁའ་ཁྱབ་ཀྱི་ཞིང་ཀུན་འགེངས་པའི་རྣམ་པར་ཐར་པ་ལས། དད་པའི་གསོས་སུ་རྩ་རྩེའི་ཟིལ་པ་ཙམ་བརྗོད་པ་ལ། ཁྱབ་བདག་རྡོ་རྗེ་འཆང་དང་རྣམ་དབྱེར་མ་མཆིས་པའི་ཀུན་མཁྱེན་འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པས་དཔལ་སྤྲུལ་རིན་པོ་ཆེར་ཚེ་རབས་རྗེས་འཛིན་བསྟོད་སྨོན་བཀྲ་ཤིས་བིརྺའི་ལྗོན་བཟང་ཀུན་ཏུ་དགའ་བའི་ཚལ་ཞེས་བྱ་བ་འདི་ཉིད་ཟག་པ་མེད་པའི་ཡེ་ཤེས་ཀྱི་སྤྱན་གྱིས་ཇི་ལྟར་གཟིགས་པའི་རྣམ་པར་ཐར་བར་དོན་གྱིས་གྲུབ་པས་འདིས་ཁོག་དབུབ་ན་སྒྲོ་སྐུར་ཕྱོགས་ཞེན་གྱི་ཉེས་པ་དང་བྲལ་བས་ཡིད་ཆེས་ཁུངས་བཙུན་གྱི་གནས་སུ་འགྱུར་ཕྱིར། དེ་དང་ཕན་ཚུན་ལྟོ་སྦྱར་ཏེ་བཤད་ན་རྒྱས་བསྡུས་གང་ལ་དགའ་བའི་བློ་དང་འཚམ་པར་གནད་དོན་ཟིན་པས་དེ་ལྟར་བཤད་པ་ལ། བསྡུས་ཏེ་བསྟན་པ་དང་རྒྱས་པར་བཤད་པའོ། །
དང་པོ་ལ། མཚན་སྨོས་པ་དང་། མཆོད་པར་བརྗོད་པ་དང་། རྣམ་པར་ཐར་པ་བརྗོད་པ་དང་གསུམ་ལས། དང་པོ་ནི། རྒྱ་གར་སྐད་དུ། ཛ་ཡདྐུ་ར་ངྷརྨེནྡྲ་སྟུ་ཏེ། བོད་སྐད་དུ། རྒྱལ་བའི་མྱུ་གུ་ཆོས་ཀྱི་དབང་པོ་ལ་བསྟོད་པ། གཉིས་པ་ནི། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཞེས་ལྷག་པའི་ལྷ་ལ་མཆོད་པར་བརྗོད་པ་དང་། ཨོ༵་རྒྱ༵ན་མཚོ་སྐྱེས་རྡོ་རྗེའི་རིང་ལུགས་འཆད་དང་སྒྲུབ་པས་འཛིན་པ་ལ། འཇི༵གས་མེ༵ད་སྨྲ་བའི་སེང་གེ་ཉིད་ཅེས་འཇིག་རྟེན་ཀུན་ཏུ་གྲགས་འབར་བ། ཆོ༵ས་ཀྱི༵་དབ༵ང་པོ༵་དཔལ་ལྡན་བླ་མའི་ཞབས་སེན་ཉིན་མོར་བྱེད་པའི་གཟིས། བྱང་ཆུབ་བར་དུ་ཤིས་པའི་སྣང་བས་རྟག་ཏུ་དགེ་ལེགས་མཛད་གྱུར་ཅིག །ཅེས་ཤིས་པ་བརྗོད་དེ་རྗེས་དྲན་གྱི་བསྟོད་སྨོན་དོན་གྱི་རྣམ་ཐར་འདི་མཛད་དོ། །གསུམ་པ་རྣམ་པར་ཐར་པ་བརྗོད་པ་ལ། ཆེ་བའི་ཡོན་ཏན་བརྗོད་པའི་སྒོ་ནས་བསྟོད་ཅིང་བསྔགས་པ་དང་། ཡོན་ཏན་དེ་ལྡན་གྱི་ཐུགས་རྒྱུད་བསྐུལ་ཞིང་འདོད་དོན་ལ་གསོལ་བ་བཏབ་པ་གཉིས། དང་པོ་ནི། དེ་ལ་འདིར་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨོས་ན། ཨོ་རྒྱན་འཇིགས་མེད་ཆོས་ཀྱི་དབང་པོ་ཞེས་མཚན་གྱི་བ་དན་སྲིད་ན་མངོན་པར་མཐོ་བ་དེ་ཉིད་ཐོག་མ་མེད་པའི་དུས་ག༷ང་གི་ཚེ༷་ཤེས་དང་ཤེས་བྱ་རོ་གཅིག་གདོད་མའི་དབྱིངས་སུ་བྱང་ཆུབ་སྟེ་ཀུན་ཏུ་བཟང་པོའི་དགོངས་སྤྱོད་ལས་གཡོ་བ་མེད་པར་བཞུགས་ཀྱ༷ང་། དམི༷གས་མེ༷ད་སྙིང༷་རྗེ༷འི་རྫོ༷གས་ལྡ༷ན་སྤྲིན༷་ཆེ༷ན་རྒྱས༷་པ༷ར་དཀྲི༷གས་པ༷འི་འཛུམ་དཀ༵ར་ལས༷། ཞེས་ཆོས་སྐུའི་ངང་ལས་ལོངས་སྐུར་བཞེངས་པ་དང་། དེ་ལས་མཆོ༷ག་གི༷་སྤྲུལ་སྐུ་སོགས་གང་འདུལ་གྱི་སྤྲུ༷ལ་སྐུ༷འི་སྒྱུ་འཕྲུ༷ལ་རོ༷ལ་མོ༷ས་རྟག་ཁྱབ་ལྷུན་གྲུབ་ཀྱི་མཛད་པས་ཡིད་ཅ༷ན་གདུལ་བྱའི་འདོ༷ད་པ༷་འཇོ༷་བའི་ཕུལ༷་དུ་གྱུར་པ་རྒྱལ༷་བའི་མྱུ༷་གུ༷་ཆོས༷་ཀྱི༷་དབ༷ང་པོ༷ས་བྱ༷ང་ཆུ༷བ་བ༷ར་དུ༷་རྗེ༷ས་སུ༷་ཟུ༷ངས་ཞེས་སྨོན་ཞིང་བསྐུལ་པའོ། །དེ་ལས་ཡུལ་དུས་གནས་སྐབས་འདིར་རིགས་རུས་ཆོ་འབྲང་མ་སྨད་པ་ལས་རྒྱལ་བའི་མྱུ་གུའི་མཚ༷ན་དཔེ༷འི་ཟླ༷་བ༷་བདུད༷་རྩི༷འི་འོད༷་ཅན༷་ཐོག༷་མར༷་བསྟན་འགྲོའི་དཔལ་དུ་འཆ༷ར་ཞིང་འཁྲུངས་པ་དང་ལྷན་ཅིག༷་པར༷་རི༷གས་དང་བརྩེ་སོགས་སྣང༷་ཆེན༷་དཀར༷་པོ༷ས་དཔྱོ༷ད་ལྡན་མཁ༷ས་པའི་ཡི༷ད་ཀྱི༷་ཀུ་མུ༷ད་ཅི་དག༷ར་བཞ༷ད་པའི་ངལ༷་འཚོ༷་སྟེར༷་ལས་བསྟོད་ཅིང་བསྔ༷གས་པའི༷་ཆུ༷་གཏེར༷་འབུམ༷་གཡོ༷་བ༷་གང་ཉིད་དཔལ་དགེའི་བླ་མའི་སྐྱེ་སྲིད་དུ་གྲུབ་ཆེན་རིན་པོ་ཆེས་ངོས་འཛིན་གནང་བ་ལྟར་གདན་སར་འཁོད་པའི་རྒྱལ་བའི་མྱུ་གུ་ཞེས་དང་། ཆུང་ངུ་ནས་ཐེག་པ་ཆེན་པོའི་རིགས་སད་ཅིང་སྐྱེས་ཐོབ་ཀྱི་མཁྱེན་རབ་ཕུལ་དུ་གྱུར་པ་དང་། ལྷག་པའི་ལྷས་བྱིན་གྱིས་བརླབས་པའི་མཐུས་གདུལ་བྱའི་ཁམས་དབང་བཞིན་འདུལ་བའི་ཐབས་མཁས་ཀྱི་མཛད་པས་ཐོས་བསམ་སྒོམ་གསུམ། མཁས་བཙུན་བཟང་གསུམ། འཆད་རྩོད་རྩོམ་གསུམ་གྱི་རྣམ་ཐར་དང་བཞེས་མཛད་པ་སྟེ། མངོན་པ་མཛོད་ལས། ཚུལ་གནས་ཐོས་དང་བསམ་ལྡན་པས། སྒོམ་པ་ལ་ནི་རབ་ཏུ་སྦྱོར། །
ཞེས་གསུངས་པ་བཞིན་ཡོངས་འཛིན་དགེ་བའི་བཤེས་གཉེན་ལས་མང་དུ་ཐོས་པ་རྣམས་ཚེགས་ཆུང་ངུས་མཁྱེན་པས་མཁས་པ་དང་། བླང་དོར་གྱི་གནས་ལ་འགལ་བ་མི་མངའ་བས། ཚུལ༷་གནས༷་ཁྲིམ༷ས་ཀྱི༷་མཐོ༷་རིས༷་ཚ༷ལ་དུ་མ༷ང་པོ༷ར་གས༷ན་པ༷འི་ཡོ༷ངས་འ༷དུས་དབ༷ང་ཞེས་ལྷག་པ་ཚུལ་ཁྲིམས་ཀྱི་བསླབ་པ་དང་། ཇི༷་བཞི༷ན་བས༷མ་པ༷འི་མེ༷་ཏོ༷ག་མ༷ཛེས་འབ༷ར་ཞེས་ལྷག་པ་སེམས་དང་། སྒོ༷མ་བྱུ༷ང་ཤེས༷་རབ༷་འབྲ༷ས་དུད༷་པས༷་ཞེས་ལྷག་པ་ཤེས་རབ་ཀྱི་བསླབ་པ་ལ་གནས་པས་འཕ༷གས་ད༷ང་མཁ༷ས་དབ༷ང་མ༷ང་པོའི༷་བློ༷་མཆོ༷ག་གི༷་ཟུར་མིག་ཕྱོ༷གས་དེར༷་གཅི༷ག་ཆ༷ར་ལྷུ༷ང་སྟེ་དད་པའི་ཡིད་དབང་འཕྲོག་པའི་ཞབས་པད་ལ་བསྟེན་པར་གྱུར༷་པ༷་རྒྱ༷ལ་བ༷འི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུང༷ས་ཞེས་པ་འདིས་ཐོས་བསམ་སྒོམ་གསུམ་ཡང་བསྟན་ཏོ། །སྒོམ་པ་དེ་ཡང་འཇིག་རྟེན་ཆོས༷་བརྒྱད༷་ཀྱི་འཁྲུ༷ལ་བ༷འི་རྫུན༷་རིས༷་མ༷་ལུ༷ས་པ་འོ༷ད་གས༷ལ་ཞི༷་བ༷འི་དབྱི༷ངས་སུ༷་སིམ༷་པ་དང་། བསྟན་འགྲོ་ལ་སྨན་པའི་མཛད་བཟང་ཆོ༷ས་བཞི༷ན་སྤྱོ༷ད་པ༷འི་ཕྱི༷ར་དབེ༷ན་པའི༷་རི༷་སུལ༷་ངེས་མེད་རྣམས་ལྷ༷་ཡི༷་ཁ༷ང་བཟ༷ང་བཞི༷ན་བ༷སྟེན་ནས༷་ཀུན་སྤང་གི་སྤྱོད་པས་ཆོ༷ས་ཀྱི༷་སྙི༷ང་པོ༷་ཐེ༷ག་ཆེ༷ན་སྤྱི་དང་ཁྱད་པར་འོད་གསལ་རྡོ་རྗེ་རྩེ་མོའི་ལམ༷་ལ༷་རྩེ༷་གཅི༷ག་ཏུ་སྒྲུ༷བ་པ་ལྷུར༷་བཞེ༷ས་པ༷་རྒྱ༷ལ་བ༷འི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུང༷ས་ཞེས་དང་། གཟོ༷ད་ནས༷་རྣམ༷་གྲོལ༷་ཡེ༷་ཤེས༷་ཆོ༷ས་སྐུ་བརྙེས༷་ཀྱང༷་གདུལ་བྱའི་ངོར་ཚོ༷གས་ཟུ༷ང་བྱེ༷་བ༷ས་རྒྱུད༷་སྦྱང༷ས་ཏེ༷་ཟག༷་མེད༷་སྦྱོར༷་བས༷་འབྲ༷ས་བུ༷་ལས༷་སྐྱེས༷་བདེ༷ན་པ༷་མངོན༷་སུམ༷་ཉིད༷་དུ་མཐོ༷ང་བའི་ཕྱིར༷་སྤོབ༷ས་པ༷འི་གཏེར༷་མཛོ༷ད་མཐ༷འ་ཀླས༷་འཇོ༷་སྒེག༷་འཕགས༷་བཞིའི༷་དབུས༷་སུ་ཆེས༷་རྔམ་པའི་ཚུལ་མཛད་པ༷། རྒྱ༷ལ་བ༷འི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུ༷ངས་ཞེས་པ་དེ་དག་གིས་བསླབ་པ་གསུམ། ཐོས་བསམ་སྒོམ་གསུམ། མཁས་བཙུན་བཟང་གསུམ་རྣམས་དངོས་ཤུགས་ཀྱིས་བསྟན་ཏོ། །སྐལ་ལྡན་རྗེས་སུ་འཛིན་པའི་འཆད་པ་ལ་ཤིང༷་རྟ༷་ཆེན༷་པོ་རྣམས་ཀྱི་ལམ་སྲོལ༷་འཆ༷ད་པ་ལ༷་དགོ༷ས་པ༷འི་དོན༷་གྱི༷ས་མདུ༷ན་བསུ༷ས་ཏེ༷། བསྡུས༷་པའི་དོན་གྱི་ཚོམས་སུ་ལེགས༷་པར༷་བཅ༷ད་ཅིང་། ཚི༷ག་གི༷་སྦྱོ༷ར་བ༷་ཤིན་ཏུ་མཛེས་ཤིང་སྙན་འཇེ༷བས་ཀྱིས༷་ཚིག་དོན་སྔ་ཕྱི༷འི་མཚ༷མས་སྦྱོར༷་དང་། ཕན་ཚུན་བརྒ༷ལ་ལ༷ན་དང༷་བཅ༷ས་པས་འཆད་པ་མ༷་ཕ༷མ་དགྱེ༷ས་པ༷འི་གཟུ༷གས་ག༷ཞན་པ༷་བྱམས་མགོན་གཉིས་པ་ལྟ་བུ་རྒྱ༷ལ་བ༷འི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུངས་ཞེས་དང་། ལོག་སྨྲ་ཚར་གཅོད་པའི་རྩོད་པ་ལ། གཞལ༷་བྱ༷་མངོ༷ན་སུམ༷་དང༷་། མངོ༷ན་སུམ༷་མི༷ན་པ་ལྐོ༷ག་གྱུ༷ར་དང༷་། ཤིན༷་ཏུ༷་ལྐོག༷་གྱུ༷ར་ཇི༷་སྙེ༷ད་པ༷། རིམ་པར་མངོན་སུམ་ཚད་མ་དང་། རྗེས་དཔག་ཚད་མ། ལུང་ཚད་མ༷་གསུམ༷་གྱི༷ས་གཏན༷་ལ༷་ཕབ༷ས་ནས༷་དངོས༷་སྟོབ༷ས་ཀྱི་རིགས༷་པ༷འི་མཚོ༷ན་རྣོ༷ན་པོ༷ས་ཕ༷ས་རྒོལ༷་གྱི་བརྟན༷་པ༷་གཅི༷ག་ཆ༷ར་འཕྲོ༷ག་པ་ལ་མཁ༷ས་པ་དཔལ་ཆོས༷་ཀྱི་གྲ༷གས་པའི་རྗེས་སུ་འགྲོ་ཞིང་འདྲ་བ༷་རྒྱ༷ལ་བ༷འི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུ༷ངས། ཞེས་དང་། ཐུབ་བསྟན་ཡུན་དུ་གནས་པའི་རྩོམ་ལ་མཁས་པ་མགུ་བ་བསྐྱེད་པའི་བརྗོད་བྱེད་ཀྱི་ཚི༷ག་སྙན༷་པ། རྒྱན༷་གསུ༷མ་གྱི་ལམ༷་ལས༷་དྲང༷ས་ཤིང༷་སྡེབ༷་ལེགས༷་པ། སྦྱོ༷ར་བ༷་མཛེས་པ་འབུམ༷་གྱིས་བཅི༷ང་པ། བརྗོད་བྱའི་དོན༷་བཟང༷་པོ་རི༷ན་ཆེ༷ན་ཐང༷་མར་བརྡལ༷་བས༷་སྐལ་བཟང་དཔྱོད་ཤེས༷་ཡི༷ད་ཀྱི༷་འདོ༷ད་དགུ༷ར་འཇོ༷་བ་ཐུབ༷་བ༷སྟན་སྲོག་ཤིང༷་བསྐལ༷་བརྒྱར་བརྟན་ཞིང་གནས་པ༷ར་མཛ༷ད་པའི་ལེགས༷་བཤད་རྩོམ་པ་ལ༷་དཔ༷འ་བོའི་ཞབ༷ས་ཏེ་སློབ་དཔོན་དཔའ་བོ་དངོས་དང་འདྲ་བ་རྒྱ༷ལ་བ༷འི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུང༷ས་ཞེས་དང་། མཁྱེ༷ན་པས༷་ཤེས༷་དང་ཤེས༷་བྱ༷་ཀུན༷་མངོན་སུམ་གཟི༷གས་པ། འཇམ༷་དཔ༷ལ་གཞོ༷ན་ནུའི༷་རྗེས༷་སུ་འགྲོ༷་ཞིང་མཉམ་པ་དང་། བརྩེ༵་བས༵་སེམ༷ས་ཅ༷ན་གྱི་ཁམ༷ས་ཀུན༷་ལ་ཁྱབ༷་ཅིང་འ༷ཇུག་པ་ཕྱག༷་ན༷་པ༷དྨོའི༷་གཟུ༷གས་ཀྱི༷་ཟླ༷་བོ་གཉིས་པ་དང་། ནུས༷་པས༷་ཡི༷ད་སྲུ༷བ་བདུད་སྡེར༷་བཅས༷་པ་བསྙིལ༷་ཞིང་གཞོམ་པར་མཛ༷ད་པ་གས༷ང་བའི་བདག༷་པོའི༷་སྙེམ༷ས་འཆ༷ང་བ༷་སྟེ་གསང་བདག་གཉིས་པ་ལྟ་བུའི་རྒྱ༷ལ་བ༷འི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུ༷ངས། ཞེས་སོ། །བདག་ཉིད་ཆེན་པོ་འདིའི་རྣམ་པར་ཐར་པ་ཤིན་ཏུ་མ༷དོར་བསྡུ་ན། སྲས༷་དང་བཅ༷ས་པའི་རྣམ་འདྲེ༷ན་རྒྱལ་བ་ཡོ༷ངས་ཀྱི༷་ཡེ༷་ཤེ༷ས་སྒྱུ་འཕྲུལ་དྲྭ་བ༷འི་ཚུལ། རྣམ༷་པ༷་ཉི་ཤུའི༷་མངོ༷ན་པ༷ར་བྱང་ཆུབ༷་སྟེ། སྙིང༷་རྗེ༷་ཆེན་པོས༷་ལོངས་སྤྱོད་རྫོགས་པའི་སྐུ་དང་། མཆོག་གི་སྤྲུལ་སྐུ་སོགས་གང་འདུལ་གྱི་ལུས༷་སམ་གཟུགས་སུ་སྣང་ཞིང་བཟུང་སྟེ་རྒྱལ༷་བ་སྐུ་གསུམ་གྱི་མཛད་པས་སྙིགས༷་མའི༷་མཐ༷ར་ཡ༷ང་རྟག་ཁྱབ་ལྷུན་གྲུབ་གྱིས་བསྟན་འགྲོ་ལ་སྨན་པའི་མཛད་པ་མཁའ་དང་མཉམ་པས་རྒྱལ་བསྟན་སྤྱི་དང་། ཁྱད་པར་ཀུན༷་མཁྱེ༷ན་གཉིས༷་པ་ཨོ་རྒྱན་རྡོ་རྗེ་འཆང་བརྒྱུད་པ་དང་བཅས་པ༷འི་ཕྲི༷ན་ལས༷་འཆད་ཉན་གྱིས་ས༷་གསུ༷མ་འགེངས་ཤིིང་རྒྱས༷་པ༷ར་མཛ༷ད་པ༵་རྒྱལ༷་བའི༷་མྱུ༷་གུ་ཆོས༷་ཀྱི༷་དབ༷ང་པོས༷་བྱང༷་ཆུབ༷་བར༷་དུ༷་རྗེ༷ས་སུ༷་ཟུངས༷། ཞེས་སོ། །གཉིས་པ་ཡོན་ཏན་དེ་ལྡན་གྱི་ཐུགས་རྒྱུད་བསྐུལ་ཞིང་འདོད་པའི་དོན་ལ་གསོལ་བ་འདེབས་པ་ནི། དེ༷་ལྟ༷ར་ང༷ག་གི༷་ནོ༷ར་བུའི༷་རྒྱུ༷ད་མ༷ང་དད་པ་གསུམ་གྱི་སོ༷ར་མོ༷ས་བསྒྲེང་བ༷་དང་བཅ༷ས་རྣམ༷་ཀུན༷་གུས༷་པས༷་ཁྱོ༷ད་ཉི༷ད་ཀྱི་ཐུགས་དམ་གནད་ནས་བསྐུལ་ཞིང་འདོད་པའི་དོན་ལ་གསོལ་འདེབས་ཀྱི་འབོ༷ད་ན༷་གེགས་མེད་ཅིང་མཐུན་རྐྱེན་ཚངས་པས་མཐ༷ས་ཡ༷ས་པའི་འགྲོ༷་བ༷འི་གཉེ༷ན་གཅི༷ག་པུ༷་ཅི༷་སླ༷ད་བ༷དག་ཉིད་ཆེན་པོ་ཁྱེད་ཀྱི་གསང་བ་གསུམ་གྱི་རྣམ་ཐར་བདག་སོགས་འགྲོ་བའི་སྙིང༷་ལ༷་རྫོགས་པའི་ཐུག༷ས་བརྩེར༷་ཅིས་མི༷་མཛ༷ད་དེ་མཛད་དགོས་ཏེ། གཟུངས་དང་ཏིང༷་ངེ་འཛི༷ན་རྫུ༷་འཕྲུལ༷་མཐའ་ཡས༷་པའི་གཏེར༷་དུ་གྱུར་པ་ཡིན་པའི་ཕྱིར་རྒྱལ་བའི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུངས་ཞེས་དང་། དེ་བཞིན་དུ། ཨེ་མ་འཕགས་ཁྱོད་བྱིན་རླབས་བདུད་རྩིས་ཡང་ཡང་ཡིད་ལ་བཤེས་བྱས་པས། །སྲིད་ལས་ངེས་འབྱུང་ཨུཏྤལ་ནགས་ཀླུང་ཐར་པའི་ཕྱོགས་སུ་རབ་གྲོལ་བར། །དད་སོགས་འཕགས་ནོར་འབྲས་བུའི་ཁུར་གྱིས་ཤིན་ཏུ་ལྕི་དང་ལྷན་ཅིག་པར། །རྒྱལ་བའི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུངས། །
ཇི་ལྟར་ཁས་བླང་ཁྲིམས་ཀྱིས་རྒྱུད་སྦྱངས་དབེན་པའི་བྲག་རིའི་ཁང་བཟང་དུ། །མང་ཐོས་བསམ་པས་གཏན་ལ་ཕབ་ཅིང་རྩེ་གཅིག་མཉམ་པར་བཞག་པ་ལས། །ལུས་སེམས་ཤིན་སྦྱངས་བདེ་བས་རབ་བརླན་ཤེས་རབ་ཟབ་མོའི་གཟུངས་ཐོབ་བཞིན། །རྒྱལ་བའི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུངས། །སྙིང་རྗེ་ཆེན་པོའི་མ་མས་རབ་བསྐྱེད་ཕར་ཕྱིན་དྲུག་གི་མཆོད་སྦྱིན་ཅན། །བསྡུ་དངོས་བཞི་ཡི་ཚང་སྐུད་འཁྲིགས་ཆགས་འཕགས་རྣམས་དགྱེས་པའི་དྲང་སྲོང་ཆེ། །སྤྱོད་ཚུལ་ནམ་ཡང་མཚུངས་པ་སྤང་བས་འཇིག་རྟེན་དགེ་བའི་མཐུ་ཐོབ་བཞིན། །རྒྱལ་བའི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུངས། །སྙིང་ནི་བདེ་སྟོང་བདུད་རྩིས་རོས་སིམ་སྣང་སྤྱོད་ཐམས་ཅད་ལྷ་སྐུར་ཤར། །སྲོག་རྩོལ་དྷཱུ་ཏིའི་ཕྱག་རྒྱར་དབང་བྱས་གཞོམ་མེད་འོད་གསལ་ཐིག་ལེ་ཆེར། །རྡོ་རྗེ་གསུམ་གྱི་དགའ་བས་སྙེམས་གྱུར་རིག་འཛིན་ཚོགས་དང་ལྷན་གཅིག་ཏུ། །རྒྱལ་བའི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུངས། །གནས་སྐབས་ཆོས་བཞིན་སྤྱོད་པའི་འགལ་ཟླ་ཡིད་སྲུབ་རྒྱུར་བཅས་མཚོན་རྣོན་པོ། །དབང་གཞུ་གསར་བས་རྗེས་སུ་སོན་པས་མཐུན་པའི་རྐྱེན་ཀུན་ཕུན་ཚོགས་ཏེ། །ཕན་དང་བདེ་བའི་ལེགས་བྱས་ཇི་སྙེད་ཉིན་རེ་བཞིན་ཡང་འཕེལ་བཞིན་དུ། །རྒྱལ་བའི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུངས། །མདོར་ན་རྒྱལ་བའི་མྱུ་གུའི་ཁྱུ་མཆོག་ཆོས་ཀྱི་དབང་པོའི་གསང་གསུམ་དང་། །རྣམ་དཀར་མཛད་པའི་ངོ་མཚར་མ་ལུས་འགྲོ་ཀུན་སྙིང་ལ་རྫོགས་གྱུར་པས། །སྲིད་དང་ཞི་བའི་ཕ་མཐར་མི་གནས་དགེ་མཚན་བྱེ་བའི་མནྡ་རས། །དེ་ནས་བཟུང་སྟེ་འཇིག་རྟེན་གསུམ་ན་རྟག་ཏུ་བཀྲ་ཤིས་སྣང་གྱུར་ཅིག །
ཅེས་འདོད་དོན་ལ་གསོལ་བ་བཏབ་པ་རྣམས་ཤེས་སླའོ། །དེ་ལྟར་ན་དོན་གྱི་རྣམ་པར་ཐར་པ་འདིས་ཁོག་དབུབ་ཅིང་འབེལ་གཏམ་སྣ་ཚོགས་ཀྱིས་རྣམ་པར་ཐར་པ་རྒྱས་པར་བསྟན་པ་དེ་གཉིས་གཅིག་གིས་གཅིག་མཚོན་ཏེ་གསལ་བར་བྱས་པ་གཅིག་གྲོགས་སུ་གཅིག་འགྲོ་བས་འགགས་བསྡམས་ཏེ་རྟོགས་པར་བྱ་དགོས་པས་སྔ་མ་མདོར་བསྡུས་སུ་བསྟན་ཟིན་ལ། ཕྱི་མ་རྒྱས་པར་བསྟན་པ་ནི་འདི་ལྟར། གདོད་མའི་མགོན་པོ་དང་རྣམ་དབྱེར་མེད་པས་དཔལ་ཀུན་ཏུ་བཟང་པོ་ཉིད་འཁོར་འདས་ཀུན་གྱི་སྤྱི་དཔལ་དུ་ཡེ་ནས་མངོན་པར་བྱང་ཆུབ་པའི་ཡེ་ཤེས་ཀྱི་རང་རྩལ་འགག་པ་མེད་པ་ལས། རང་སྣང་ལོངས་སྤྱོད་རྫོགས་པའི་ཞིང་དུ་མི་ཟད་པའི་རྒྱན་འཁོར་ལྔའི་བཀོད་པ་རྟག་པར་འབྱམས་སུ་ཀླས་ཤིང་། དག་དང་མ་དག་གི་གདུལ་བྱ་རང་རང་གི་སྐལ་བ་དང་འཚམ་པར། བཟོ་དང་སྐྱེ་བ་མཆོག་གི་སྤྲུལ་པའི་སྐུ་ཞི་ཁྲོ་སོགས་གང་འདུལ་གྱི་རོལ་པ་ཚད་མེད་པ་ཆོས་ཀྱི་དབྱིངས་དང་ནམ་མཁའི་མཐའ་ཀླས་པ་ལས། ཁྱད་པར་དུ་བདག་ཅག་གི་འདྲེན་མཆོག་དམ་པ་འདི་ནི་ཕྱོགས་ཞེན་གྱིས་རང་བསྟོད་མ་ཡིན་པར། རྒྱལ་བ་ཀུན་གྱི་མཁྱེན་པའི་ཡེ་ཤེས་འཇམ་དཔལ་དབྱངས་དང་། བརྩེ་བའི་ཐུགས་རྗེ་སྤྱན་རས་གཟིགས་དང་། ནུས་པའི་མཐུ་སྟོབས་གསང་བའི་བདག་པོ་གསུམ་དང་རྣམ་དབྱེར་མ་མཆིས་པ་ཉིད། སྙིགས་མའི་དུས་འདིར་རྒྱལ་བསྟན་རིན་པོ་ཆེ་འཛིན་སྐྱོང་སྤེལ་བའི་བྱེད་པོར་བསམ་བཞིན་དགེ་བའི་བཤེས་སུ་བསྟན་པ། གང་ཚེ་ཤེས་དང་ཤེས་བྱ་སོགས་གསུངས་བཞིན་ནོ། །དེས་ན་སྔོན་གྱི་སྐྱེས་རབས་དང་ཐུན་མིན་གྱི་རྣམ་ཐར་སོགས་ནི་སངས་རྒྱས་ཁོ་ནའི་སྤྱོད་ཡུལ་ལས་འཕགས་ཆེན་རྣམས་ཀྱིས་ཀྱང་ཇི་བཞིན་གཞལ་དཀའི་གནས་སུ་གྱུར་ན། བདག་འདྲའི་སོ་སྐྱེའི་རྨོངས་རྟུལ་ཞིག་གིས་ལྟ་ཅི་སྨོས་ཏེ། དེས་ན་རེ་ཞིག་ད་ལྟའི་གདུལ་བྱ་ཐུན་མོངས་ཀྱི་ངོ་སྐལ་དུ་ཇི་ལྟར་སྣང་བ་ཙམ་རང་གིས་གང་ཐོས་སྒྲོ་སྐུར་དང་བྲལ་བར་མདོ་ཙམ་བརྗོད་པ་ལ། འཕགས་པའི་ཡུལ་དུ་ཞི་བ་ལྷ་དང་། གྲུབ་ཆེན་ཤ་བ་རི། བོད་དུ་ཨ་རོ་ཡེ་ཤེས་འབྱུང་གནས་ལ་སོགས་པའི་འཁྲུངས་རབས་ཀྱི་ཕྲེང་བ་དུ་མ་ཞིག་རྗེ་བླ་མ་ཐམས་ཅད་མཁྱེན་གཟིགས་ཆེན་པོ་འཇམ་དབྱངས་མཁྱེན་བརྩེའི་དབང་པོ་དང་། གཏེར་ཆེན་བདུད་འདུལ་རྡོ་རྗེ་སོགས་ཀྱི་གཏེར་ལུང་ལས་ཀྱང་བསྟན་པ་དང་། དབོན་རིན་པོ་ཆེས་པད་དཀར་ནང་དྲི་བ་ཞིག་ཞུས་ཚེ་ཁོང་རིག་འཛིན་འཇིགས་གླིང་ཡིན་པའི་མངོན་རྟགས་གསལ་ལོ་ཞེས་གསུངས་ཤིང་། སྤྲུལ་པའི་གཏེར་སྟོན་བདུད་འཇོམས་རྡོ་རྗེས་ཀྱང་དེ་ཡིན་པར་གསུངས། དེ་ལྟར་ན་སྤྱན་རས་གཟིགས་དངོས་འཇིགས་མེད་གླིང་པའི་རྣམ་འཕྲུལ། སྐུ་ཡི་སྤྲུལ་པ་འཇམ་དབྱངས་མཁྱེན་བརྩེའི་དབང་པོ། གསུང་གི་སྤྲུལ་པ་དཔལ་སྤྲུལ་རིན་པོ་ཆེ། ཐུགས་ཀྱི་སྤྲུལ་པ་མཁྱེན་བརྩེ་ཡེ་ཤེས་རྡོ་རྗེ་ཡིན་པར་གྲགས་པ་བཞིན་ཐུགས་རྒྱུད་གཅིག་པར་མངོན་ཞིང་། དེ་ལ་སོགས་པ་སྐྱེ་བའི་ཕྲེང་བ་དུ་མ་ཞིག་ལས། དཔལ་དགེའི་བླ་མ་བསམ་གཏན་ཕུན་ཚོགས་ཞེས་བྱ་བ་འཕགས་པ་འཇམ་དཔལ་ལ་ཐུགས་དམ་གྱི་ལྷར་མཛད་ཅིང་མཚན་བརྗོད་འབུམ་ཕྲག་ལྷག་ཞལ་འདོན་དུ་མཛད་པ་དེ་ཉིད་ཀྱིས་དུང་ཆུ་བར་མ་ཞེས་པར་དགོན་ས་བཏབ་སྟེ་བཞུགས་པས་དཔལ་དགེ་བླ་བྲང་ཞེས་བྱ། ཀཿཐོག་རྨོག་སྟོན་རིན་པོ་ཆེ་རྫ་སྟོད་མ་མོའི་ཐང་དུ་བྱོན་སྐབས། ས་ཕྱོགས་འདིར་འཕགས་པ་ཐུཊ་རྗེ་ཆེན་པོའི་སྤྲུལ་པའི་སྐྱེས་བུ་ཞིག་གིས་དམ་ཆོས་ཡི་གེ་དྲུག་མའི་རྡོ་འབུམ་ངོ་མཚར་ཅན་ཞིག་བཞེངས་པར་འགྱུར་ཞེས་ལུང་བསྟན་པ་དང་། ཡང་ངོར་མཁན་ཆེན་སྡེ་དགེའི་དབུ་བླ་ཞིག་གིས་ཀྱང་དེ་དང་མཚུངས་པར་ལུང་བསྟན་པར་ཡང་བཤད། ཡང་ཤིན་ཏུ་སྔ་མོ་ཞིག་ལ། སྡེ་སྟོད་དཔོན་མོ་ཞེས་པ་ས་དཔྱད་ཤིན་ཏུ་མཁས་པ་ཞིག་ལྷ་ལྡན་དུ་འགྲོ་བའི་སྐབས། མ་མོའི་མདོར་ཞག་མལ་ཕོག །ས་འདི་ལ་ནི། ཤར་ཉི་ཟླ་གཉིས་ཀྱི་སྒྲོན་མེ། ལྷོ་ཙནྡན་ནགས་ཀྱི་བདུག་སྤོས། ནུབ་གངས་དཀར་ཤེལ་གྱི་ལྷ་བཤོས། བྱང་རྫ་ཆབ་སིལ་མའི་ཡོན་ཆབ་ཡོད་པ་སོགས་ཀྱི་ས་དཔྱད་ལེགས་པས་རྟེན་ཆེན་པོ་སོགས་བཞེངས་ན་འགྲོ་དོན་དང་། ས་བཅུད་ཡུལ་བཅུད་ལ་དེ་ལས་ལྷག་པ་མི་འདུག་ཅེས་པའི་ངག་རྒྱུན་ཡོད་པར་ངེས། དཔལ་དགེའི་བླ་མ་བསམ་གཏན་ཕུན་ཚོགས་ཉིད་ཁྲོམ་ཟ་གོང་མའི་ནང་ཞིག་ཏུ་བྱོན་སྐབས་ཆིབས་དྲིལ་རྫ་མ་མོའི་མདོར་ཉལ་ནས། དེར་ཅུང་ཟད་བཞུགས་པའི་གཟིགས་སྣང་དུ་མ་ཎིའི་རང་སྒྲ་སྒྲོགས་གསུངས་ཤིང་། དེར་ལེགས་པའི་རྟེན་འབྲེལ་གྱི་སྒོ་འཕར་བཟང་པོ་བླ་ན་ལྷག་པ་ལྟ་བུར་གྱུར་པ་བཞིན་རྡོ་མཁར་ཆོས་ཀྱི་ཕུང་པོ་འདིའི་གཞི་བཏིང་ནས་བསྟན་འགྲོའི་སྤྱི་དཔལ་ལྷ་དང་བཅས་པའི་མཆོད་སྡོང་།
ས་ཡི་བཅུད་ཆེན་སྐྱེ་དགུའི་གཡང་འཕེལ་དུ་ལེགས་པར་བཞེངས་གྲུབ་སྟེ། ཞི་བར་གཤེགས་པའི་གདུང་རྟེན་དེར་བཞེངས་པ་མཆོད་རྟེན་དཀར་རིས་མར་གྲགས་པ་དང་། དེའི་ཡང་སྲིད་རྒྱ་སྡེའི་ནང་ར་ལོ་ཟེར་བར་འཁྲུངས་པ། རྫོགས་སྤྲུལ་གསུམ་པ་ངེས་དོན་བསྟན་འཛིན་བཟང་པོས་ངོས་འཛིན་གནང་བ་བཞིན། དཔལ་དགེའི་བླ་མ་དབུ་མཛད་ཅེས་པས་དཔལ་དགེ་བླ་མའི་གདན་ཁྲིར་བཀོད་པ། སྤྲུལ་སྐུ་ཀུན་བཟང་ཞུ་བའི་ངོ་མཚར་ཅན་ཞིག་བཞུགས། དེ་ཉིད་ཀྱིས་ཀྱང་རྡོ་འབུམ་རིན་པོ་ཆེ་བདག་གིར་མཛད་ཅིང་གོང་འཕེལ་དུ་ཅུང་ཟད་བཞེངས་ཏེ་འགྲོ་དོན་མཛད། ཁྲོམ་ཟ་གོང་མའི་ནང་ཁྲོམ་དབང་ཞིག་མཛད་སྐབས། དབུ་ཞྭ་བུ་མོ་ཆུང་བ་ཞིག་གི་པང་དུ་ལྷུང་བ་ལ། ང་རང་སྐྱེ་བ་ཕྱི་མར་འདིའི་བུར་སྐྱེ་བར་འགྱུར་གསུངས། སྤྲུལ་སྐུ་དེ་དགུང་ལོ་ཉེར་ལྔའི་དུས་སུ་ལྷ་ལྡན་དུ་ཕེབས་ཁར་རྒྱལ་ཏོག་སར་ཕེབས། དེ་གར་མཆོད་ཆ་ཞིག་ལུས་པ་ཡར་ཕུལ་ཡང་ད་སྐབས་ང་ལ་མི་དགོས་གསུངས་ཏེ་ཚུར་གནང་སྟེ་ལྷ་ལྡན་དུ་ཕེབས་ནས་སེ་ལོ་རྒོད་ཚང་གི་ཉེ་འདབས་སུ་མྱ་ངན་ལས་འདས། དེར་སྐུ་གདུང་བཞུས་སར་དགུན་ཡིན་ཡང་མེ་ཏོག་མང་པོ་སྐྱེས། དེར་བོད་པ་རྣམས་ཀྱིས་ཁམས་པའི་བླ་མ་ཞིག་འདས་ཤུལ་རེད་ཅེས་གླེང་ནས་མཆོད་རྟེན་ཞིག་བརྩིགས་པ་ད་དུང་མཇལ་དུ་ཡོད་ཅིང་། སྟག་ལུང་མ་རིན་པོ་ཆེར་ཡང་སྤྲུལ་ངོས་འཛིན་ཞུས་པ་ན། རང་ཡུལ་གྱི་སྦྲ་སྒོ་ཤར་ལ་བསྟན་པ་སོགས་ཀྱིས་ངོས་འཛིན་གསལ་པོར་གནང་བ་བཞིན་དུ། མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨྲོས་ན། ཨོ་རྒྱན་འཇིགས་མེད་ཆོས་ཀྱི་དབང་པོ་ཞེས་པ་འདི་ཉིད་གང་དུ་འཁྲུངས་པའི་ཡུལ་ནི། སྐལ་བཟང་རྣམ་འདྲེན་བཞི་པ་བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་བྱོན་པའི་གནས་ལྷོ་འཛམ་བུའི་གླིང་གི་ནང་ཚན། མདོ་ཁམས་སྒང་དྲུག་གི་ཡ་གྱལ། ཆོས་རྒྱལ་སྡེ་དགེའི་ཆབ་འོག་རོང་འབྲོག་གཉིས་ལས། ལྷ་མིང་མི་ལ་ཆགས་པ་བྱང་སྡེ་རྫ་ཆུ་ཁ་པ་ཞེས་པ། ས་གཞི་ཁ་རྒྱ་ཆེ་བ། ལུང་པ་ཕུ་ཐག་རིང་པ། ས་དཔྱད་བཟང་དགུ་འཛོམ་པ། བདེ་སྐྱིད་ཆོས་ཀྱི་ཡུལ་གྲུ་དཀར་ཆུང་སྐོ་འོར་ཞེས་པར། རིགས་ནི་འོད་གསལ་ལྷ་ནས་བྱོན་པར་གྲགས་པའི་ས་སྐྱོང་སྡེ་དགེ་རྒྱལ་པོའི་བློན་རིགས་གདོང་ཞྭ་དཀར་ཅན་གྱི་བརྒྱུད་པ། དཔོན་ཐོབ་སོ་ལྔའི་ནང་ཚན། སྨུག་པོ་གདོང་གི་བརྒྱུད་པ་དགེ་རྩེ་གོང་མ་ཞེས་པའི་སྡེ་ལས། ཡབ་རྒྱལ་ཏོག་ལྷ་དབང་ཟེར་བ་དང་། ཡུམ་ཁྲོམ་ཟ་རྗེས་དངོས་བུ་མོ་སྒྲོལ་མ་ཟེར་བའི་སྲས་སུ་རབ་བྱུང་བཅུ་བཞི་པ་གསར་ཚེས་ཀྱི་རབ་ཡིད་རྣམ་བྱུང་ཞེས་པ་ས་ཕོ་འབྲུག་གི་ལོར་སྐྱེ་བའི་མྱུ་གུ་འཁྲུངས་པའི་དུས་སུ་འོད་དཀར་པོ་ཞིག་གིས་ཁྱིམ་ཀུན་ཁྱབ་ཅིང་དེ་ནུབ་ངག་ནས་ཨ་དང་ཨོ་ཆ་མ་ཆོད་པ་འགའ་དང་། ཨོཾ་ངོ་མ་ཞིག་ལན་འགའ་རེར་གསུངས་ཤིང་། ཕྱིར་ནུབ་ནས་དང་པོ་མི་གསལ་ལ། རྗེས་ནས་ཇེ་གསལ་དུ་རིམ་བཞིན་ཞག་ལྔ་ལ་མ་ཎི་པདྨེ་ཧཱུྃ་གསུངས་ཤིང་། དེ་རྗེས་ཞག་གཉིས་གསུམ་ཙམ་ལ་མ་ཎི་གསུངས། ཕྱག་སྐེ་ལ་མ་ཎི་འབྲུ་དྲུག་གསལ་བར་དོད་པ་དང་། ལྕེ་ལ་དྷཱིཿདམར་པོ་ཞིག་དོད་པ་མཇལ་དུ་ཡོད་ཀྱང་། མོ་རང་ནས་མ་ཁ་མཁས་མས་བུ་སྤྲུལ་སྐུ་ཟེར་བའི་དཔེ་ལྟར་དང་། སྐྱེ་བཟང་དེ་ཡིན་ན་བར་ཆད་སོགས་འོང་གིས་དོགས་ཏེ་ཕ་ལྷ་དབང་ལའང་ཟེར་མ་མྱོང་ཞེས་བཤད་པར་ངེས་པས། ཞལ་ནས་ང་རང་གི་ཨ་མ་དེ་ནི་ཆོས་ལ་དཀར་བ་དང་། ངང་རྒྱུད་བཟང་ཞིང་ཁོག་ཡངས་ཤིང་ཚིག་བཙུན་པ་ཞིག་ཡིན། ཁོང་དང་པོ་ཆོས་ལམ་ལ་ཞུགས་པ། བར་དུ་བླ་ཆེན་དང་དཀོར་ལ་མི་འབགས་པ། ཐ་མ་འགྲོ་དོན་ལ་བར་ཆད་མི་བྱེད་པ་ལ་སོགས་པའི་དྲིན་ཅན་མ་ཞིག་ཡིན་གསུངས། གཞན་ཡང་། དབུ་གདུགས་ལྟར་འདུག་པ་དང་། ཞལ་རས་པདྨ་ལྟར་རྒྱས་པ། སྐྱེ་མཆེད་ཤིན་ཏུ་དྭངས་ཤིང་། རང་བཞིན་གྱིས་སྙུན་ཉུང་བ། ཆུང་ངུ་ཉིད་ནས་རིག་པ་གསལ་ཞིང་། མཁྱེན་པའི་ཤེས་རབ་ཆེ་བ་དང་། བཤའ་ལུག་ཁྲིད་པ་དང་བསད་པ་སོགས་ཉེ་རིང་གང་དུ་མཐོང་ན་སྤྱན་བརླན་ཞིང་བཟའ་བཏུང་མི་གསོལ་བ་སོགས་སྙིང་རྗེ་ཆེ་བ་དང་། ཝ་སྤྲེ་སོགས་གསོད་པ་ཉིད་ཀྱིས་བཀག་ཀྱང་མ་ཉན་པ་ལ་གསོད་པར་མི་ནུས་པར་བྱས་པས་ནུས་པ་ཆེ་བ་དང་། སྙིང་སྟོབས་ཆེས་ཆེ་བ་སྤོབས་པའི་གཟེངས་མཐོ་ཞིང་སྨྲ་མཁས་པ་སོགས་ཡོན་ཏན་གྱི་འབྱོར་བ་ཚད་མེད་པས་མཐོ་བའི་གྲགས་པས་ཀུན་གྱིས་ཡི་རངས་ཤིང་བསྔགས་པའི་ཡུལ་དུ་གྱུར་པ་སྟེ། མཚན་དཔེའི་ཟླ་བ་བདུད་རྩིའི་འོད་ཅན་སོགས་གསུངས་པ་བཞིན་ནོ། །
རྡོ་བླ་འཇིགས་མེད་སྐལ་བཟང་ནས་དཔལ་དགེའི་བླ་མའི་ཡང་སྲིད་དུ་ངོས་བཟུང་ཞིང་། ཁྱད་པར་རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་གྱིས་དཔལ་དགེ་བླ་མའི་སྤྲུལ་སྐུར་འཁྲུལ་མེད་དུ་ངོས་བཟུང་སྟེ། ངས་ཀློང་ཆེན་སྙིང་ཐིག་གི་བསྟན་པ་ཡོངས་རྫོགས་དགོངས་གཏད་སྨོན་ལམ་དང་བཅས་པས་དེ་ལ་གཏད་ཅིང་། ཨོ་རྒྱན་འཇིགས་མེད་ཆོས་ཀྱི་དབང་པོར་མཚན་གསོལ་བ་ཡིན་ཞེས་ཕྱི་མཐའ་གཟིགས་པའི་ལུང་བསྟན་སྩལ། ཡང་བོ་དོད་ཨ་བུའི་སྤྲུལ་སྐུ་ཡིན་ཞེས་གཞན་གྱིས་ངོས་བཟུང་བ་བཞིན། སྐུ་བདག་ཏུ་གྲྭ་དཔོན་གཡོག་འགའ་ཞིག་ཁ་རྗེ་མངའ་ཐང་ཆེ་བར་རྒྱལ་ཏོག་སར་ཕེབས་ཏེ་བཞུགས་པ་དང་། དེར་ནང་སྔ་མོར་དཔལ་དགེའི་བླ་མར་དབུ་མཛད་ཞེས་པའི་གྲྭ་རྒན་ཞིག་རྒྱལ་ཏོག་ཏུ་སྤྲུལ་སྐུའི་བདག་ཏུ་འོང་བ་ན། མ་ཡུམ་གྱིས་བུ་ཆུང་འཁྱག་ལྟོག་ཏུ་སེམས་ནས་རུམ་དུ་བླང་སྟེ་ནུ་མ་བསྣུན་པ་ན་ནུར་མ་བཏུབ་པར་ཕྱིར་བལྟས་ཏེ། ཨ་ཁུ་བདེའམ་རྒས་འདུག་ཅེས་ངོས་བཟུང་བས་གཞན་སྐུ་བདག་རྣམས་རང་ཡུལ་དུ་ཐེག་སོང་། དེ་དག་ལ་བརྟེན་ནས་དཔལ་དགེ་གོང་མའི་དཔོན་པོ་དཀོན་མཆོག་གིས་བླ་བྲང་དུ་སྤྱན་དྲངས་ཏེ་སྤྲུལ་པའི་སྐུར་མངའ་གསོལ། འབྲི་ཀློག་དཀའ་བ་མེད་པར་མཁྱེན་ཞིང་ལུགས་གཉིས་གང་ལའང་འགྲན་ཟླ་དང་བྲལ་བ། ཆུང་དུས་ནས་ཐེག་པ་ཆེན་པོའི་རིགས་སད་ཅིང་། སྐྱེས་ཐོབ་ཀྱི་མཁྱེན་རབ་ཕུལ་དུ་བྱུང་བ་མངའ་བ་དང་། ལྷག་པའི་ལྷས་བྱིན་གྱིས་བརླབས་པའི་མཐུས་ཡོངས་འཛིན་དགེ་བའི་བཤེས་གཉེན་དག་ལས་དམ་པའི་ཆོས་ཀྱི་བདུད་རྩི་ཐོབ་པ་རྣམས་ཚེགས་ཆུང་ངུས་མཁྱེན་ཅིང་། ཁྱད་པར་རིག་འཛིན་འཇིགས་མེད་གླིང་པའི་ཐུགས་སྲས་འཇིགས་མེད་རྒྱལ་བའི་མྱུ་གུ་ཞེས་འབྲེལ་ཚད་དོན་ལྡན་གྱི་སྐྱེས་བུ་དམ་པ་དེ་ཉིད་དཔལ་དགེ་བླ་བྲང་དུ་སྤྱན་དྲངས་པ་སོགས་སྔ་ཕྱིར་ཀློང་ཆེན་སྙིང་ཐིག་གི་སྔོན་འགྲོའི་ཟབ་ཁྲིད་ཁོ་ནའང་ཚར་ཉི་ཤུ་རྩ་ལྔ་གསན་ཅིང་། ཁྲིད་སྦྱངས་ཡང་དེ་སྙེད་གྲུབ་པར་མཛད། གཞན་ཡང་རྩ་རླུང་དང་རྫོགས་ཆེན་གྱི་ཁྲིད་སོགས་ཤིན་ཏུ་གནད་སྨིན་དང་། སྔ་འགྱུར་བཀའ་མའི་ཆོས་སྐོར་སོགས་མང་དུ་གསན། བླ་མ་མཚམས་པས། ཁོང་རྫ་སྟོད་དུ་བཞུགས་དོན་དཔལ་དགེ་སྤྲུལ་སྐུ་གཅིག་པོ་འདིའི་དོན་ཡིན་ཞེས་མཚམས་པའི་སློབ་རྒན་དབུ་མཛད་སངས་རྒྱས་དཔལ་བཟང་ལ་གསུངས། གཞན་ཡང་། འཇིགས་མེད་སྐལ་བཟང་དང་། ཀུན་མཁྱེན་གྱི་དངོས་སློབ་རྗེ་བླ་མ་འཇིགས་མེད་ངོ་མཚར། རྒྱལ་སྲས་གཞན་ཕན་མཐའ་ཡས་སོགས་ལས་ཀྱང་། ངལ་གསོ་སྐོར་གསུམ། སྤྱོད་འཇུག །
རྩ་རྒྱུད་གསང་བ་སྙིང་པོ། རིག་གནས་སྐོར་འགའ་ཞིག་སོགས་དང་། ཞེ་ཆེན་དཔོན་སྤྲུལ་མཐུ་སྟོབས་རྣམ་རྒྱལ་ལས་བཀའ་འགྱུར་གྱི་ལུང་དང་སྒྲ་རིག་གསན། གང་གསན་དེ་དག་ལན་རེ་ཙམ་གྱིས་ཐུགས་སུ་ཆུད་པས་མདོ་རྒྱུད་རིག་གནས་དང་བཅས་པའི་གཞུང་ལ་གཞན་དྲིང་མི་འཇོག་པའི་རྣམ་དཔྱོད་རྣམ་པར་དག་པས་ལེགས་བཤད་སྨྲ་བ་ལ་མི་ཟད་པའི་སྤོབས་པ་ཐོབ་ཅིང་། འཇིག་རྟེན་ཆོས་བརྒྱད་ཀྱི་ཞེན་འཁྲིས་གཏན་ནས་ལོག་པས་སྐུ་ཚེ་ཧྲིལ་པོར་ཟོལ་མེད་ཀྱི་བྱ་བཏང་ཡང་དག་པའི་རྩེ་མོར་སོན་ནས་གཙོ་བོར་བཀའ་དང་བསྟན་བཅོས་འགྱུར་རོ་ཅོག་དང་། རྗེ་ཉིད་ཀྱི་གསུངས་ལས། ལྔ་རིག་སྨྲ་བའི་ཉིན་བྱེད་ས་པཎ་རྗེ། །མདོ་སྔགས་ལེགས་བཤད་འབྱུང་གནས་ཙོང་ཁ་པ། །ཡོངས་རྫོགས་བསྟན་པའི་མངའ་བདག་ཀློང་ཆེན་ཞབས། །གངས་ལྗོངས་འཇམ་པའི་དབྱངས་དངོས་རྣམ་གསུམ་ཡིན། །ཞེས་བསྔགས་པར་མཛད་པའི་ཀུན་མཁྱེན་ཡབ་སྲས། ས་པཎ། རྗེ་ཙོང་ཁ་པ་སོགས་རིས་མེད་ཀྱི་སྐྱེས་ཆེན་རྣམས་ཀྱི་ལེགས་བཤད་ལ་དཔེ་གཟིགས་ཁོ་ན་རྟག་ཏུ་བརྩོན་པར་མཛད་ནས་ཉིན་རེ་བཞིན་མཁྱེན་རྟོགས་ཟླ་བ་ཡར་ངོ་ལྟར་གོང་འཕེལ་དུ་གྱུར། ཀུན་མཁྱེན་མཆོག་སྤྲུལ་རིན་པོ་ཆེ་ཧེ་རུ་ཀ་དཔལ་སྐུ་ཞབས་མཁྱེན་བརྩེ་འཇིགས་མེད་ཡེ་ཤེས་རྡོ་རྗེས་རིག་པ་བརྟུལ་ཞུགས་ཀྱི་སྤྱོད་པ་མཛད་ཅིང་ཕེབས་སྐབས་ཤིག །རྗེ་འདིའི་ཉེ་སྐོར་དུ་བྱོན་ནས། དཔལ་དགེ་ཞེས་བོས་ཏེ། ཁྱེད་དཔའ་སྙིང་ཅི་འདྲ་བཟང་ན་འདིར་ཤོག་གསུངས་ནས། སྐུ་རྩར་བྱོན་པ་དང་སྐྲ་ནས་བཟུང་སྟེ་ས་ལ་བརྡབས་ཤིང་དྲུད་དེ་བྱོན་པས་མཚམས་ཤིག་ན་ཆང་གི་དྲི་ཞིག་ཆིལ་གྱིས་བྱུང་། དེར་འོ་ཁོང་གིས་ཆང་གསོལ་ཡོད་པ་འདྲ། གྲུབ་ཐོབ་ཆེན་པོ་འདི་འདྲ་ཡང་ཆང་བཟིས་འཆོལ་སྤྱོད་འདི་མཛད་པས་བཅོམ་ལྡན་འདས་ཀྱིས་ཆང་གི་ཉེས་དམིགས་མང་པོ་བཀའ་སྩལ་པ་ཐོག་ཏུ་བབས་སྙམ་པ་ཅིག་བྱུང་བའི་མོད་ལ་ཕྱག་གིས་བཏང་སྟེ། ཁྱོད་ཚོ་རྟོག་གེ་པ་བྱ་བ་འདི་འདྲའི་རྣམ་རྟོག་ངན་པ་འཆར་བ་ཕའུ། ཁྱོད་ཁྱི་རྒན་རེད་ཅེས་གདོང་ལ་ཞལ་མཆིལ་བཏབ། མཛུ་གུ་ཆུང་བསྟན་ནས་བཞུད། དེ་འཕྲལ་ག་རེ་ང་འཁྲུལ་ཏེ་ངོ་སྤྲོད་ཅིག་ཡིན་པར་འདུག་སྙམ་ནས་ལུས་གནད་བཅོས་ཏེ་བཞུགས་པས་ཟང་ཐལ་གྱི་རིག་པ་ནམ་མཁའ་གཡའ་ཐག་ཆད་པ་ལྟ་བུ་ཞིག་མངོན་དུ་གྱུར་ཏེ། སྔོན་ནས་འཇིགས་མེད་རྒྱལ་བའི་མྱུ་གུས་རིག་པ་ངོ་སྤྲད་པ་དེ་ནམ་ལངས་པའི་སྟེང་དུ་ཉི་མ་ཤར་བ་བཞིན་དུ་སོང་། ཕྱིས་སུ་ཡང་ཁྱི་རྒན་ཟེར་བ་འདི་སྐུ་ཞབས་མཁྱེན་བརྩེས་ང་ལ་གསང་མིང་བཏགས་པ་ཡིན་ཞེས་ཞལ་རྩེད་གནང་། གཞན་ཡང་སྐུ་ཞབས་མཁྱེན་བརྩེའི་མདུན་ནས་གཅོད་ཁྲིད་གསན་ནས་གཉན་སར་ཕེབས་ཚེ་ཚད་སློང་དུས་གཅིག་ལ་རྫོགས་པ་དང་། བདུད་བཞི་སྟན་ཐོག་གཅིག་ཏུ་བཅད་པར་བཤད། སྦས་པའི་རྣལ་འབྱོར་བ་བསོད་ནམས་དཔལ་དགེ་དང་ལྷན་གཅིག་ཏུ་ཀློང་སྙིང་རྩ་རླུང་གི་ཁྲིད་ཤིན་ཏུ་ཡུན་རིང་སྦྱངས། ཁོང་གིས་སྡེ་དགེ་ནས་བཟང་ཇ་བག་བརྒྱད་ཀྱི་རིན་གྱིས་ཤོག་སྲབ་ཉོས་ནས་འདྲ་མིན་སྣ་ཚོགས་བྲིས་ཏེ་ཟད་སོང་གསུངས། དགུང་ལོ་ཉེར་ཐམ་ཡན་ཡིན་ནོ། །དེ་ཕྱིར་ཤེར་ཕྱིན་སྤྱི་དོན་སོགས་གཞུང་བཤད་མིན་པ་འདྲ་མིན་བྲི་མ་མྱོང་གསུངས། དཔལ་དགེ་དཔོན་པོ་འདས་ནས་གཤེགས་རྗེས་ཀྱི་བྱ་བ་རྣམས་རྫོགས་འཕྲལ་བླ་བྲང་བསྡུས་ནས་ཇི་སྐད་དུ། །ཉིད་ཀྱི་བཀའ་ལས། སྐྱིད་ན་མི་དགའ་སྡུག་ན་དགའ། །སྐྱིད་ན་ཉོན་མོངས་དུག་ལྔ་འབར། །སྡུག་ན་སྔོན་བསགས་ལས་ངན་འཛད། །སྡུག་བསྔལ་བླ་མའི་ཐུགས་རྗེ་ཡིན། །བསྟོད་ན་མི་དགའ་སྨད་ན་དགའ། །བསྟོད་ན་ང་རྒྱལ་ཁེངས་སེམས་ཆེ། །སྨད་ན་རང་སྐྱོན་ཐེར་ལ་འབུད། །མི་ཁ་ལྷ་ཡི་ཕ་འབབ་ཡིན། །མཐོ་ན་མི་དགའ་དམའ་ན་དགའ། །མཐོ་ན་ཕྲག་དོག་ང་རྒྱལ་སྐྱེ། །དམའ་ན་བག་ཡངས་དགེ་སྦྱོར་འཕེལ། །དམན་ས་གོང་མའི་གདན་ས་ཡིན། །འབྱོར་ན་མི་དགའ་རྒུད་ན་དགའ། །འབྱོར་ན་གསོག་སྲུང་སྡུག་བསྔལ་ཆེ། །རྒུད་ན་དཀའ་སྤྱད་ལྷ་ཆོས་འགྲུབ། །སྤྲང་ལུས་ཆོས་པའི་གཏད་སོ་ཡིན། །བྱིན་ན་མི་དགའ་འཕྲོག་ན་དགའ། །བྱིན་ན་ལན་ཆགས་ཁུར་པོ་འཕེལ། །འཕྲོག་ན་ཚེ་རབས་བུ་ལོན་སོད། །ཆོག་ཤེས་འཕགས་པའི་སྤྱི་ནོར་ཡིན། །གཉེན་ལ་མི་དགའ་དགྲ་ལ་དགའ། །གཉེན་གྱིས་ཐར་ལམ་བར་དུ་གཅོད། །དགྲ་བོ་བཟོད་པའི་ཡུལ་དུ་བྱེད། །རོ་སྙོམས་ཉམས་ལེན་གནད་འགགས་ཡིན། །ཆོས་བཞིན་མཛད་ན་དེ་འདྲ་དགོས། །བློ་ཐག་ཆོད་ན་དེ་འདྲ་དགོས། །རི་ཁྲོད་འཛིན་ན་དེ་འདྲ་དགོས། །རྒྱལ་ཁམས་འགྲིམ་ན་དེ་འདྲ་དགོས། །གདམས་ཟབ་གནད་ཀྱི་མདོ་འགགས་དྲུག །ཕ་གཅིག་བླ་མའི་ཞལ་རྒྱུན་ཡིན། །བུ་གཅིག་སེམས་ཀྱི་གཏད་སོ་ཡིན། །སྙིང་གི་སྙིང་པོ་ཚིག་དྲུག་འདི། །གྲོགས་གཅིག་ཁྱོད་རང་མ་ལགས་པ། །གཞན་ལ་ཚིག་ཟུར་ཕུད་པ་མེད། །ཅེས་གསུངས་པ་ཇི་ལྟ་བ་བཞིན་འཁྲུལ་བ་མེད་པར་ལག་ལེན་དུ་བསྟར་བས་བདག་ཉིད་ཆེན་པོ་འདིས་ཀུན་སྤང་ཀུན་ཏུ་རྒྱུའི་ཚུལ་གྱིས་དབེན་པའི་གནས་སོགས་ངེས་མེད་དུ་ཕེབས་ཏེ། རྫོགས་ཆེན་གདན་སར་ཡུན་རིང་བཞུགས་ཏེ་སྐྱབས་མགོན་རྫོགས་ཆེན་མི་འགྱུར་ནམ་མཁའི་རྡོ་རྗེ་དང་། སྐུ་ཞབས་གཞན་ཕན་མཐའ་ཡས་འོད་ཟེར་ལས་སྙིང་ཐིག་གོང་འོག་སོགས་དམ་པའི་ཆོས་ཀྱི་བདུད་རྩི་མཐའ་ཡས་པ་བཞེས་ཤིང་། མཁན་སེང་ཕྲུག་པདྨ་བཀྲ་ཤིས་མདུན་ནས་བཀའ་མའི་དབང་ལུང་ཕལ་ཆེར་གསན་པ་དང་། རབ་ཏུ་བྱུང་སྟེ་མཚན་འཇིགས་མེད་དགེ་བའི་འབྱུང་གནས་སུ་གསོལ་ནས་མཁན་པོ་བདེ་གཤེགས་ཚང་གསུངས་ཏེ་ཐུགས་རྩིས་ཆེན་པོར་མཛད། རུ་དམ་ཡང་དབེན་གཤིན་རྗེའི་སྒྲུབ་ཕུག་དང་ཚེ་རིང་ཕུག་སོགས་རི་ཁྲོད་དུ་བཞུགས་སྐབས་ཐུགས་དམ་མཛད་པས། བྱང་ཆུབ་སེམས་གཉིས་དང་། ཁྱད་པར་རང་བཞིན་རྫོགས་པ་ཆེན་པོའི་གནས་ལུགས་ཀྱི་རྟོགས་པ་ནམ་མཁའ་དང་མཉམ་པ་བརྙེས། ཀློང་ཆེན་སྙིང་ཐིག་གི་སྔོན་འགྲོའི་ཁྲིད་ཡིག་ཆེན་མོ་དང་། ཐེག་ཆེན་མདོ་སྡེ་མཐོང་བའི་ཕན་ཡོན་སོགས་ལེགས་བཤད་ཀྱི་རྩོམ་པ་མང་དུ་མཛད། དགུང་ལོ་སུམ་ཅུའི་ནང་ཤེད་ཨ་མདོ་ཞབས་དཀར་པ་ཚོགས་དྲུག་རང་གྲོལ་གྱི་སྙན་པ་གསན་ནས་མཇལ་དུ་བྱོན་ཚེ་ཞབས་དཀར་གཤེགས་ཚར་བའི་སྐད་ཆ་ལམ་བར་དུ་གསན་ནས་གདུངས་དབྱངས་ཀྱིས། གང་གིས་ཐོག་མེད་བསྐལ་པའི་དུས་རིང་ནས། །ཞེས་པ་ལ་སོགས་པས་སྤྲུལ་སྐུ་མྱུར་འབྱོན་ཡང་མཛད། དེ་ནས་གསེར་ཐལ་ཕྱོགས་ཡར་ལུང་པདྨ་བཀོད་དུ་ཕེབས་ཏེ་དགེ་མང་སྐུ་ཞབས་རིན་པོ་ཆེས་གསང་རྙིང་རྒྱུད་བཤད་རྒྱས་པར་གནང་སྐབས་རྗེ་འདིའི་ཁྲིད་དཔོན་མཛད་ཅིང་། དེ་རྗེས་ཀྱང་གནས་དེར་ལོ་གཉིས་ཙམ་ལ་ཞག་ཞེ་ལྔ་རེའི་རིང་ལ་རྒྱུད་བཤད་ཤིན་ཏུ་རྒྱས་པ་བཀའ་དྲིན་དུ་སྩལ་བས་སྔ་འགྱུར་རྡོ་རྗེ་ཐེག་པའི་བསྟན་པ་སྤྲིན་མཐོངས་ཀྱི་ཉི་ཞུར་ཙམ་གསལ་བར་བྱུང་བས། ཡུལ་གསེར་སྟོད་དུ་སྙིང་པོའི་བསྟན་པ་དར། །ཞེས་པའི་ལུང་བསྟན་ཐོག་ཏུ་ཁེལ་བར་གླེང་། ཝ་ཤུལ་སྟོབས་རྒྱས་སོགས་ཀྱིས་སྤྱན་དྲངས་ཏེ་ཝ་ཤུལ་ཁག་གསུམ། གསེར་ཐལ་ཚོ་མ་ལག་བཅོ་བརྒྱད་ཕལ་མོ་ཆེ་དང་བཅས་པ་ལ། སྤྱོད་འཇུག །
མ་ཎི་བཀའ་འབུམ་སོགས་ཆོས་ཀྱི་སྦྱིན་པ་གྲངས་མེད་པ་སྩལ་ཞིང་བདེ་སྨོན་དང་ཡི་གེ་དྲུག་མའི་ཕྲིན་ལས་ཁྱབ་བརྡལ་དུ་སྤེལ། གསོན་རིམ་དང་གཤིན་ཆོག་ལ་སྐམ་ལུག་མང་པོ་བསད་དེ། དགེ་འདུན་ལ་དམར་སྟོན་བྱེད་པའི་སྲོལ་ངན་རྒྱུན་བཅད་ཅིང་། ཇག་རྒྱ་རྐུ་ཁྲིམས་བཞག་སྟེ་ཕན་བདེའི་ལམ་སྲོལ་ཆེན་པོ་བཏོད། རིམ་གྱིས་རྡོ་ཡུལ་དུ་ཕེབས་ནས་ཤུག་ཆུང་དགོན་སོགས་སུ་ཆོས་ཅི་རིགས་བསྟན། ཤུག་ཆེན་སྟག་མགོར་ཡུན་རིང་བཞུགས་ནས་བཀའ་འགྱུར་རིན་པོ་ཆེ་ཞིབ་ཏུ་གཟིགས་ཤིང་བཀླག་པས་མདོ་སྡེ་མང་པོ་ཐུགས་ལ་ཟིན་གསུངས། དྷི་ཆུང་ནགས་སམ་ཨ་རིའི་ནགས་སུ་ཁོང་དང་ལུང་རྟོགས་གཉིས་བཞུགས་སྐབས་རྩམ་པ་ཁུག་མ་གང་ཡོད་པ་གསོལ་ཚིགས་དུས་ཅུང་ཟད་གསོལ་ནས་རྩམ་ཁུག་དེ་ཤིང་ལ་བཏེགས། ཁོང་ལ་སྤྱོད་འཇུག་ཚིག་བཞི་རེ་གཉིས་གསུངས། ལྭ་བ་དཀར་པོ་ཞིག་ལས་མནབས་རྒྱུ་མེད་དབྱུག་པ་ཞིག་བསྣམས་ནས་ཧ་ཧ་ཞེས་པའི་འུར་སྒྲ་ཆེན་པོ་མཛད་དེ་ནགས་ནང་དུ་བྱོན་བཞུགས་མཛད། ཡང་ཕྱི་ཉིན་དེ་ལྟར་མཛད་པར་ལུང་རྟོགས་གསུངས། དེ་འདྲའི་ཚུལ་གྱིས་ཟླ་བ་ཁ་ཤས་བཞུགས་ཏེ། ནགས་ཚལ་ས་ཕྱོགས་དབེན་ཞིང་ཉམས་དགའ་དང་། ཞེས་པ་དེ་འདི་འདྲ་ལ་ཟེར་བ་ཡིན་ཞེས་ཐུགས་སྤྲོ་ཉམས་མཛད། དེར་གཞི་ཆེན་སྤྲུལ་སྐུ་སོགས་དོན་གཉེར་ཅན་མང་པོ་ལ། སེམས་ཉིད་ངལ་གསོ་དང་ཡོན་ཏན་མཛོད་སོགས་ཀྱི་བཤད་ཁྲིད་རྒྱུན་རིང་བསྐྱངས། དེ་སྐབས་ཤིག་ལ་བོང་ཆུང་རྟ་ཤུལ་གྱི་རྒད་པོ་ཞིག་ཚོང་ལ་འགྲོ་བའི་ལམ་དུ་ཆུས་ཁྱེར་ནས་ཤི་བ་ཟླ་བོ་རྣམས་ཀྱིས་རོ་བཀལ་ནས་ཕུག་པ་དང་ཉེ་བའི་ཕྱོགས་སུ་ཕྱིན་ཏེ་འཕོ་བ་ཞུས་པས་ཆོས་ཞུ་མང་པོ་དང་བཅས་པས་འཕོ་ལུང་གསུངས། མཚམས་ཤིག་ནས་རྗེ་བླ་མ་ཉིད་རྒྱ་ཆེར་བཞད་དེ་འཕོ་ལུང་གསུང་འཕྲོར་ལུས་ཀྱང་འཁོར་རྣམས་ཀྱིས་མཇུག་རྫོགས་པར་བཏོན། དེ་སྐབས་ཅི་ཡང་མི་གསུངས། ཕྱིས་སུ་རུ་དམ་གཤིན་རྗེའི་སྒྲུབ་ཕུག་འོག་མར་རྗེ་བླ་མ་ཉིད་བཞུགས་ཤིང་། ཕུག་པ་གོང་མར་རྒྱལ་མོ་རོང་པའི་ཆོས་པ་གླེན་ནེ་བ་ཞིག་ཡོད་སྐབས། ཉིན་གཅིག་རྗེའི་ཞལ་ནས། འདི་ལྟར་དབེན་པའི་གནས་སུ་དགེ་སྦྱོར་བྱས་ཏེ་བསྡད་ན་རྣམ་གཡེང་མེད་ཅིང་རིག་པ་ངང་གིས་དངས་པས་སྔོན་གནས་རྗེས་དྲན་སོགས་འོང་བ་ལ་ཚེགས་མེད། ཁྱོད་ལ་དེ་འདྲ་ཅང་ཨེ་བྱུང་གསུངས་པར། ཁོས་ཅི་ཡང་མ་བྱུང་ཟེར། ངས་ནི་རེས་འགའ་སྔ་མའི་ཚེ་རབས་བརྒྱ་ཕྲག་ལྷག་པ་ཡང་དྲན་པར་བྱུང་། སྔོན་དུས་གྲུབ་ཆེན་ནག་པོ་སྤྱོད་པ་གྲོང་ཁྱེར་ཞིག་ཏུ་བྱོན་དུས། ང་རང་གྲོང་ཁྱེར་གྱི་སྨད་འཚོང་མར་གྱུར་པས་གསེར་གྱི་གདུ་བུ་ཞིག་ཕུལ་བས། དེ་ཚུན་ཆད་བླུན་རྨོངས་ཕག་ཐོམ་ལྟ་བུར་ནམ་ཡང་མ་སྐྱེས་པ་ཞིག་ཀྱང་དྲན་གསུངས་སྐད། འདི་ལྟར་མངོན་པར་ཤེས་པ་མངའ་བའི་གསུང་སྒྲོས་སུ་གཏོགས་པ་གཞན་ཡང་། དེ་དུས་རྒད་པོ་ཤི་བ་དེའི་བར་སྲིད་སུམ་བཅུ་རྩ་གསུམ་པའི་ལྷ་ཡུལ་དུ་སྐྱེས་ཏེ་ལྷའི་བྱིས་པའི་གཟུགས་ཀྱིས་སླེབ་པ་ཞིག་མཐོང་ནས་མདུན་དེར་རྒད་པོའི་རོ་མགོ་སེ་ཡེ་རེ་བ་འདུག །དེ་ལ་བལྟས་པས་རྒད་པོ་སེ་བོ་འདིའི་མགྱོགས་པ་ལ་ཨང་སྙམ་ནས། ང་དགོད་ཁ་ཤོར་ཏེ་འཕོ་ལུང་འདོན་འཕྲོ་ཆད་པ་ཞིག་བྱུང་ཞེས་གསུངས་པ་ལྟ་བུ་འགའ་རེ་ཡོད་ཚོད་འདུག །ཡང་དྷི་ཆུང་ཕུག་སོགས་སྨད་ཅིག་ཏུ་བཞུགས་སྐབས། ཁྲོམ་མང་པོ་ལ་ཆོས་ཁྲིད་རྒྱ་ཆེན་ཞིག་གསུང་། དེ་དུས་དངུལ་རྡིལ་ཚད་ཅིག་ཕུལ་བ་སྤྲང་པོ་ཞིག་གིས་མཐོང་། དགོང་མོ་རི་ཁྲོད་དུ་ཕེབས། དེ་ནུབ་སྤྲང་པོ་དངུལ་དོན་གཉེར་གྱིས་བཀྲོང་དུ་སོང་བ་ལ། དགོངས་ཏེ་ང་རང་གསོད་མི་དགོས། དངུལ་ནི་དེ་གར་བསང་ཁྲི་མཐོན་པོ་ཡོད་པའི་གསེབ་ཏུ་བཅུག་ཡོད། སུ་ལ་རིག་མ་བཅུག་ཁྱོད་རང་གསོད་དོ་གསུངས། རྗེས་སུ་གཞན་གྱིས་གོ་ནས་སྤྲང་པོ་བརྡུང་བརྡེག་བྱེད་པ་སོགས་གསན་པ་ན། དེ་ལ་གནོད་པ་བྱས་ན་ཁོང་ང་རང་གསོད་པ་དང་ཁྱད་མེད་གསུངས་ཏེ་སྲོག་བསྐྱབས་ནས་དངོས་སུ་བདག་གཞན་བརྗེ་བར་མཛད། འཛི་དཀར་ཡང་ཕེབས་ཏེ་མ་ཎི་བཀའ་འབུམ་སོགས་གསུངས་ཤིང་ཡིག་དྲུག་གི་ཕྲིན་ལས་རྒྱས་པར་མཛད། འཛམ་ཐང་དུ་ཀུན་མཁྱེན་དོལ་པོའི་འགྲེལ་བའི་སྟེང་ནས་རྒྱུད་བླ་མ་རྒྱས་པར་བཤད་ཅིང་བསྡུས་དོན་བརྩམས། གཙང་པ་དགེ་སློང་ངག་དབང་ཆོས་འབྱོར་ལས་སྦྱོར་དྲུག་གསན། མི་ཉག་ཏུ་བྱོན་ཏེ་འདྲ་པ་དགེ་བཤེས་ཚུལ་ཁྲིམས་རྣམ་རྒྱལ་མདུན་ཕར་ཕྱིན་སྐོར་སོགས་ཀྱི་དྲི་བ་མང་པོ་ཞུས་པས། ཁྱོད་སུ་ཡིན། གང་ནས་འོང་གསུངས་པར། དཔལ་དགེ་ཟེར་བ་ཁམས་རྫ་ཆུ་ཁ་པ་ཞིག་ཡིན་ཞུས་ནས་ཕྱིར་ཕེབས་རྗེས། ཉེར་གནས་ལ་ཁོང་དཔལ་དགེ་བྱ་བ་ཡིན་ཟེར་ཏེ། མདོ་ཕྱོགས་ལ་ང་རང་མཁས་སྙམ་ཡང་། ད་ལྟ་འཛམ་གླིང་ན་མདོ་སྔགས་གཉིས་ལ་ཁོང་ལས་མཁས་པ་མི་འདུག་པས་སྐྱེས་བུ་དམ་པ་ཞིག་ཏུ་སྣང་ངོ་ཞེས་གསུངས་སྐད། རྒྱལ་ཕག་དགོན་དུ་ཀུ་ལུ་ཀུན་བཟང་སོགས་ལ་ཀློང་ཆེན་སྙིང་ཐིག་གི་དབང་ཁྲིད་ཡོངས་རྫོགས་གསུངས་པ་སོགས་སྐལ་ལྡན་རྣམས་ལ་འོད་གསལ་རྡོ་རྗེ་སྙིང་པོའི་དབང་ལུང་ལག་ལེན་དམར་ཁྲིད་ལྐོག་ཆོས་སུ་གནང་བ་མང་པོ་ཡོད་པར་ངེས་སོ། །མགོ་ལོག་སྨར་སྟོད་སྨད། རྨ་ཁོག་སོགས་སུ་ཡང་མ་ཎི་བཀའ་འབུམ་གཙོ་བོར་གྱུར་པའི་དམ་པའི་ཆོས་ཀྱི་ཆར་ཕབ་སྟེ་བ་ལང་ལྟ་བུའི་སྐྱེ་བོ་བླུན་པོ་རྣམས་ལའང་ཐར་པ་དང་ཐམས་ཅད་མཁྱེན་པའི་ས་བོན་བསྐྲུན། དད་པ་དང་སྙིང་རྗེ་ཆུང་བ་དཀར་ཕྱོགས་ལ་སྡང་ཞིང་སྡིག་ལ་འཛེམ་མེད་དུ་སྤྱོད་པའི་མི་དཔོན་དང་ཇག་དཔོན་ང་རྒྱལ་ཅན་ཤིན་ཏུ་གདུལ་དཀའ་བ་རྣམས་ཀྱང་། སྙིང་རྗེའི་དཀའ་ཐུབ། གྲུབ་པའི་གསུང་གི་མཚམས་ལས་འདའ་བར་མ་ནུས་ཏེ། རྐུན་རྒྱ་ཇག་ཁྲིམས་དང་རྔོན་པ་མང་པོའི་སྡིག་འཕྲོ་གཅོད་པ་སོགས་ཀྱི་སྒོ་ནས་ཡུལ་ཁམས་དཀར་པོར་བསྒྱུར། སྨར་རོང་གི་ཡུལ་མཐའ་སྔོན་ཆད་ཡིག་དྲུག་འདོན་པ་ལྟ་ཅི་བགྲང་ཕྲེང་ལག་ཏུ་འཛིན་སྲོལ་ཙམ་ཡང་གཏན་མེད་པའི་ཕྱོགས་སུ་ཡང་ཆོས་བསྟན་ཏེ། མ་ཎི་འདོན་པའི་སྲོལ་ལམ་པོ་ཆེ་བཞིན་དུ་བཟང་ཞིང་ཡངས་པོར་བཏོད་པས་མཚོན་གདུལ་དཀའ་འདུལ་བའི་ཕྲིན་ལས་བསམ་གྱིས་མི་ཁྱབ་སྟེ། དགེ་དབོན་རིན་པོ་ཆེས་གསུང་བའི་དཔལ་སྤྲུལ་རིན་པོ་ཆེ་སྐུ་བསྟོད་ལས། རྗེ་ཁྱེད་མཇལ་དང་མཚན་ཙམ་ཐོས་ཀྱང་དགེ་ཞེས་དང་། བྱང་ཆུབ་སེམས་བསྐྱེད་ལས། འགྲོ་བའི་དོན་མེད་མི་འགྱུར་ཁྱོད་དང་རྒྱལ་བ་ཁོ་ནའི་ཆོས། ཞེས་པ་ལྟར་རོ། །སླར་ཡང་རྡོ་ཡུལ་དུ་བྱོན་ནས་དྷི་ཆུང་ཕུག་ཏུ་བཞུགས་སྐབས། སྐུ་ཞབས་མཁྱེན་བརྩེ་རིན་པོ་ཆེའི་སྒར་པ་དར་རྩེ་མདོ་ཕྱོགས་ནས་ཡར་བཏེགས་ཏེ། གཉན་པོ་གཡུ་རྩེའི་གནས་མདུན་སྔོ་མཚོའི་ཁར་ཕེབས་པ་གསན་ནས་དེར་ཆེད་གཏད་ཀྱིས་བྱོན། སྐུ་ཞབས་ཀྱང་ཤིན་ཏུ་དགྱེས་ནས་ཆོས་ཀྱི་གསུང་གླེང་མང་དུ་མཛད་ཅིང་། མཁའ་འགྲོ་བདེ་ཆེན་རྒྱལ་མོའི་དབང་ཞིག་གནང་བར་ཞུས་པས། དེ་ངས་གསང་རྒྱས་བཏབ་ནས་སུ་ལའང་མ་བྱིན་པར་ལོ་མང་པོ་སོང་བ་ཡིན་ཏེ། ད་རེས་ཁྱེད་ལ་སྟེར་ཞེས་དགྱེས་བཞིན་དུ་གནང་། ལོ་བརྒྱད་ཅུར་འཚོ་བའི་ལུང་བསྟན་དང་འབྲེལ་ཚད་དོན་ལྡན་གྱིས་དབུགས་དབྱུང་། སྔགས་ཕྱི་ནང་གསང་བའི་བཀའ་ལུང་མང་པོ་ཐོབ་ནས་སླར་ཡང་རྡོ་ཡུལ་དུ་ཆག་ཕེབས་ནས་སྟོད་སྨད་ཕན་ཚུན་གྱི་སའི་ཆ་དུ་མར་སྤྱོད་འཇུག་གཙོ་བོར་གྱུར་པའི་ཆོས་སྦྱིན་རྒྱ་ཆེར་མཛད། དེ་ནས་མི་རིང་བར་སྟོད་ཕྱོགས་སུ་ཞབས་པད་བཀོད་དེ། རྫོགས་ཆེན་ཤྲཱི་སིདྷའི་ཆོས་གྲྭ་དང་། པདྨའི་ཐང་དང་། ནགས་ཆུང་མའི་རི་ཁྲོད་སོགས་སུ་མངོན་རྟོགས་རྒྱན་དང་རྩ་བ་ཤེས་རབ། མདོ་སྡེ་རྒྱན། མངོན་པ་མཛོད། སྒྱུ་འཕྲུལ་གསང་བ་སྙིང་པོ། ཡོན་ཏན་མཛོད། སྡོམ་གསུམ་རྣམ་ངེས་སོགས་མང་དུ་བཤད། ལོ་སྔ་ཕྱིར་དུ་མར་སྤྱོད་འཇུག་གསུངས་སྐབས། ས་ཕྱོགས་དེར་མེ་ཏོག་སེར་ཆེན་འདབ་མ་སུམ་ཅུ་དང་ལྔ་བཅུ་ཡོད་པ་སོགས་སྔར་མེད་མང་དུ་སྐྱེས་པ་ལ་སྤྱོད་འཇུག་མེ་ཏོག་ཏུ་གྲགས་པ་བྱུང་། མངོན་རྟོགས་རྒྱན་ལ་ལེགས་བཤད་གསེར་ཕྲེང་གི་རྗེས་སུ་འབྲང་བའི་སྒོམ་རིམ་བརྩམ་པ། ཕྱིས་སུ་མི་ཕམ་པས་འདི་ལས་ངོ་མཚར་ཆེ་བ་མ་མཐོང་ཞེས་ཆེད་དུ་བསྔགས། སྡེ་དགེ་ལྷ་སྲས་འཆི་མེད་རྟག་པའི་རྡོ་རྗེ་སྐུ་མཆེད་ཉག་རྐེད་ཀྱི་འོག་ནས་ཐར་ཏེ་རྒྱལ་སར་འཁོད་དུས་རྫོགས་ཆེན་བླ་བྲང་ནས་གདན་ཞུས་དགའ་སྟོན་ཕུལ། དེ་སྐབས་རྗེ་འདིས་ཀྱང་བཟང་པོ་སྤྱོད་པའི་ཆོས་འབྲེལ་དགྱེས་བཞིན་གནང་། འདི་སྐབས་མཆོག་གྱུར་བདེ་ཆེན་གླིང་པ་རྫོགས་ཆེན་དགོན་དུ་བྱོན་ཏེ་རུ་དམ་གངས་ཁྲོད་ནས་བདེ་མཆོག་སངས་རྒྱས་མཉམ་སྦྱོར་གྱི་གཏེར་བཞེས། ཆོས་སྐོར་དེ་དང་རིགས་གསུམ་སྙིང་ཐིག་སོགས་ཀྱི་ཆོས་བདག་ཏུ་ངོས་འཛིན་གནང་བ་ལྟར་རྗེ་འདིས་ཀྱང་ཐུགས་དད་ཆེན་པོས་དབང་ལུང་ཁྲིད་གསུམ་ཡོངས་རྫོགས་མནོག་ཆོས་སུ་གསན། སླར་ཡང་ཚོགས་མང་ལ་དགོངས་འདུས་སྒྲུབ་ཐབས་སྐོར་གྱི་ལུང་གནང་བར་རྗེ་འདིས་གསོལ་བ་བཏབ་པ་དེ་བཞིན་སྩལ་བའི་མཇུག་རྫོགས་མཚམས་སུ་གསུང་མཐོན་པོས། འོ་དེ་རིང་རང་རེ་རྣམས་ཀྱིས་གཏེར་སྟོན་སངས་རྒྱས་གླིང་པའི་མདུན་ནས་བླ་མ་དགོངས་འདུས་ཐོབ་པའི་སྐལ་བཟང་བྱུང་བ་རེད་པས་ཀུན་གྱིས་བསྙེན་སྒྲུབ་རེ་གྱིས་ཞེས་གསུངས། ཀཿཐོག་རྡོ་རྗེ་གདན་དུའང་ཞབས་ཀྱིས་བཅགས་ཏེ་དམ་གཙང་བྱམས་གསུམ་གྱི་གདུང་རྟེན་སྐུ་འབུམ་ལ་ཕྱག་སྐོར་མཛད་སྐབས། སྐུ་ཞོག་མཁྱེན་བརྩེ་མདོ་རིན་པོ་ཆེ་ལ་སློབ་གཉེར་བསླབ་དགོས་གསུངས་པའི་ཡི་གེ་དང་བཅས་ཁོང་སྐུ་འབུམ་གྱི་ཤར་སྒོར་ཕེབས་པ་དང་མཉམ་དུ་མདོ་རིན་པོ་ཆེ་དེར་ཕེབས་པ་དང་། ཁོང་གིས་མཚན་བརྗོད་ཞལ་འདོན་བྱེད་པའི་དུས་དེར་རྟེན་འབྲེལ་བརྟགས་པས། ཤེས་རབ་ཆེན་པོས་སྐད་ཅིག་ལ། །ཆོས་ཀུན་ཁོང་དུ་ཆུད་པ་འཆང་། །ཞེས་པའི་ཚིག་མཚམས་ལ་བབས་པས། ཁོང་གི་ཐུགས་དགོངས་ལ་ཇི་འདྲའི་མཁས་པ་ཞིག་ཡོང་བསམ། ང་རང་མིན་པ་ཞིག་ཡིན་ན་ལུང་བསྟན་ཡིན་བྱས་ཀྱང་ཆོག་གསུངས་པ་བཞིན་མཁས་པ་ཆེན་པོར་གྱུར་ཏོ། །
སྐབས་དེར་དམ་གཙང་བྱམས་གསུམ་དང་འབུམ་པ་རྣམ་གསུམ་གྱི་གསོལ་འདེབས་ཀྱང་གསུངས། སི་ཏུ་མཆོག་སྤྲུལ་དམ་པ་ཆོས་ཀྱི་བློ་གྲོས་སོགས་ཀྱིས་གསོལ་བ་བཏབ་པ་ལྟར། གཙུག་ལག་ཁང་དུ་འདུས་སྡེ་ཡོངས་ལ་སྤྱོད་འཇུག་རྒྱས་པ་སོགས་གསུངས། ཞིང་སྐྱོང་རིན་པོ་ཆེས་ཀྱང་ཆོས་ཐུན་གསན། ཡང་གཤིན་རྗེའི་སྒྲུབ་ཕུག་ཏུ་བཞུགས་སྐབས་ཤིག་ལ་གཞན་འགའ་རེས། ཁྱོད་ཀྱི་ཤ་མདོག་སོགས་ལ་བལྟས་ནས་མཛེ་ནད་ཀྱི་དོགས་པ་ཞིག་འདུག་ཟེར། རང་ལའང་ཀླུ་གདོན་གྱི་རྟགས་མཚན་འགའ་རེ་བྱུང་བ་ལ། རཏྣ་གླིང་པའི་གཏེར་ཁའི་རྟ་ནག་དེའི་སྒོམ་བཟླས་བྱས་པས་རང་གི་ལུས་ལས་སྦྲུལ་ཆེན་པོ་ཞིག་ཕྱིར་ཐོན་པ་རལ་གྲིས་དུམ་བུར་བཅད་པ་སོགས་རྨི་ལྟས་ཡ་མཚན་ཆེ་བ་དང་བཅས་ཞག་བདུན་ཁོ་ནས་ནད་དེ་ཡུལ་ཕུད་གསུངས། ཡང་མཆོག་གྱུར་གླིང་པའི་རིག་གསུམ་སྙིང་ཐིག་གི་འཇམ་དཔལ་རྫོགས་ཆེན་དེ་ལ་ངས་བསྙེན་སྒྲུབ་ཅིག་བྱས་པས་དེའི་གཞུང་ལས་བཤད་པའི་རྨི་རྟགས་ཚོ་གསལ་པོ་བྱུང་། མཆོག་གྱུར་བདེ་ཆེན་གླིང་པ་དེ་གཏེར་སྟོན་བདེན་པ་ཞིག་རེད་གསུངས་པ་སོགས་ལས་དཔག་ན་བསྙེན་སྒྲུབ་ཀྱི་རིགས་གཞན་ཡང་མང་པོ་མཛད་ཚོད་སྣང་ཡང་ཕྱིར་མི་མངོན་པས་ཤེས་དཀའ། ཡང་རྫོགས་ཆེན་རི་ཁྲོད་དུ་བཞུགས་སྐབས། ཕ་བོང་ཞིག་གི་རྩར་སླེབས་ཚེ་བྱང་ཆུབ་ཀྱི་སེམས་དྲན་དགོས་ཞེས་དྲན་རྟེན་དུ་བཞག་སྟེ་ཕ་བོང་ཆེན་པོ་ཞིག་གི་སྟེང་དུ་བཞུགས་ནས་ཆོས་ཁྲིད་གསུངས། རླུང་དང་རྫི་ཆར་དྲག་པོ་ཇི་ལྟར་བྱུང་ཡང་བསྒུལ་སྐྱོད་ཙམ་ཡང་མི་མཛད། ཕྱི་དྲོ་སོགས་སུ་སྐུ་གཅེར་བུར་བཞུགས་ཏེ་ཤ་སྦྲང་གིས་བར་མཚམས་མེད་པར་སྐུ་ལུས་གཟར་བཅུག་པ་སོགས་དགེ་དཔོན་རིན་པོ་ཆེས་གསུངས། དགེ་རྩེ་སེར་ཤུལ་དགོན་དང་། ལབ། ཁྲི་འདུ། སྒྲུབ་བརྒྱུད་དགོན་སོགས། ས་དགེ་བཀའ་རྙིང་གི་དགོན་སྡེ་ཆེ་ཕྲ་མང་པོར་བྱོན་ནས། སྤྱོད་འཇུག་དང་ཞིང་སྒྲུབ་སོགས་ཀྱི་བཤད་པ་རྒྱ་ཆེར་སྩལ་བ་ཕལ་ཆེར་ད་ལྟའི་བར་དུ་མ་ཉམས་པར་གནས་ལ། ཁྱད་པར་སེར་ཤུལ་དགོན་དུའང་རྒྱུད་བླ་མ་བདེ་གཤེགས་སྙིང་པོ་སྐུ་དང་ཡེ་ཤེས་སོགས་སྒྲ་ཇི་བཞིན་པར་རྒྱས་པར་གནང་སྟེ་མདོ་སྔགས་མཚམས་སྦྱོར་ལྟ་བུ་ཡིན་ཞེས་དགེ་བཤེས་ལྷ་རམ་པ་ཆེན་པོ་སོགས་མཁས་པ་དང་བློ་གསལ་མང་པོའི་དབུས་སུ་གསུངས་གསང་མཐོན་པོའི་གནང་ཡང་ཕྱག་ཐལ་སྦྱར་གྱིས་དང་ལེན་མཛད་པར། སྐུ་བསྟོད་ལས། རྒྱལ་བའི་བཀའ་འཁོར་བར་དང་ཐ་མ་དག །བྱིས་བློའི་ཡུལ་དུ་འགལ་བ་ཁོ་ནར་སྣང་། །འཕགས་ལམ་བརྙེས་པ་གང་གི་གཟིགས་ངོ་ན། །འགལ་མིན་ཕྱིར་ན་གཉིས་ཆར་ངེས་དོན་ཞེས། །རྗེ་ཁྱོད་གསུངས་གསང་མཐོན་པོའི་བཀའ་སྩལ་བ། །ལེགས་ཕྱེ་ལྡེམ་པོར་གསུང་ཞེས་ལག་བརྡར་བའི། །དགེ་བཤེས་འབུམ་ཕྲག་ཚོགས་ཀྱང་ཞུམ་པའི་བློས། །རང་གི་གྲུབ་མཐའ་སྨྲས་བཞིན་གུས་པར་ཉན། །ཞེས་སོ། །དེར་ཡང་། སྤྱོད་འཇུག་ཆོས་ཐུན་ཞག་ཉི་ཤུའི་སྲོལ་དང་དངུལ་རྡིལ་ཚད་དང་ཞིང་ཐང་གནང་ནས་རྗེ་རིན་པོ་ཆེའི་བདེ་སྨོན་ཕུལ་བྱུང་མའི་བཤད་ཁྲིད་དང་ཕྱག་སྦྱངས་སོགས་ཀྱི་སྲོལ་གནང་བར་མཛད། རྫ་དགོན་དུ་ལོ་རེར་སྤྱོད་འཇུག་ཟླ་ཁྲིད་གསུམ་རེ་དང་། ཞིང་ཐང་གནང་ནས་ཞིང་སྒྲུབ་ཉིན་བདུན་རེ་ལ་བཤད་ཁྲིད་དང་ཕྱག་སྦྱངས་སོགས་ཀྱི་སྲོལ་བཏོད། དགེ་གོང་དུ་སྤྱོད་འཇུག་དང་ཞིང་སྒྲུབ་ཀྱི་སྲོལ་བཙུགས་པ་ད་ལྟའི་བར་དུ་མ་ནུབ་པར་གནས་པ་འདིའོ། །དགེ་མང་། དགེ་འགབ་སོགས། རྫ་རྒྱུད་སྟོད་སྨད། གསེར་ཐལ། རྡོ་འཛི་སྨྲར་གསུམ། ཞེ་རྫོགས། གླིང་ཚང་སོགས་ཀྱི་དགོན་གནས་ཡུལ་འབྲོག་ཕལ་ཆེར་ཞབས་ཀྱིས་བཅགས་ཤིང་བསྟན་འགྲོ་ལ་སྨན་པའི་བཤད་སྒྲུབ་ཀྱི་སྐལ་བཟང་དུ་མཛད་དེ་ཡོངས་རྫོགས་བསྟན་པའི་མངའ་བདག་ཏུ་གྱུར་པ་ཡང་། གསར་རྙིང་གི་གཞུང་གང་བཤད་ཐམས་ཅད་དེ་དག་གི་ལུགས་ལྟར་མ་འདྲེས་པར་བཤད་པ་དང་། ཁྱད་པར་སྤྱོད་འཇུག་ནི། ས་སྐྱ་པའི་ནང་དུ་རྗེ་བཙུན་བསོད་ནམས་རྩེ་མོའི་འགྲེལ་པ་ལྟར་དང་། དགེ་ལུགས་པ་ལ་ཟིན་བྲིས་དང་དར་ཊཱིཀ་ལྟར། བཀའ་རྒྱུད་པ་ལ་དཔའ་བོ་གཙུག་ལག་ཕྲེང་བའི་འགྲེལ་པ་ལྟར་དང་། རྙིང་མའི་ནང་ཤེར་འབྱུང་བློ་གྲོས་ཀྱི་འགྲེལ་ཆེན་དང་། ཐོག་འགྲེལ་ལྟར་བཤད་པར་མཛད་ལ། དེ་དག་གི་ཚེ་ཡང་གསར་རྙིང་གི་གྲུབ་མཐའི་ཕྱོགས་འཛིན་དང་། དགག་བཞག་གི་ཟེར་མཆུ་རང་བསྟོད་གཞན་སྨད་སོགས་སྐབས་སུ་མ་བབས་པ་དང་། དུས་ཀྱི་དབང་ལས་ཆགས་སྡང་གི་རྒྱུར་འགྲོ་བའི་གཏམ་རྣམས་ཆ་ཤས་ཙམ་ཡང་མ་འདྲེས་པར་འགྲེལ་པ་མཁན་པོའི་ལུགས་ལྟར་བཤད་པ་དེ་དང་དེའི་རང་བཞེད་ཁ་གཙང་གསལ་ཞིང་། དག་ལ་ཟུར་ཕྱིན་པ། དོན་གྱི་གནད་ཐོག་ཏུ་འདྲིལ་ཞིང་། ཧ་ཅང་རྒྱས་བསྡུས་ཀྱི་མཐར་མ་ལྷུང་བ་ཉམས་ལེན་གྱི་སྟེང་དུ་བསྐོར་ནས་གསུངས་པས་ལྷ་ལྡན་སྨོན་ལམ་རབ་འབྱམས་པ་མང་པོས་ཀྱང་ཡི་རངས་ཀྱི་མེ་ཏོག་འཐོར་ཞིང་གུས་པས་བཏུད། ཧོར་ཁང་གསར་སྐྱབས་མགོན་བྱོན་ནས་གདོལ་བའི་དྲང་སྲོང་གི་གཏམ་དུ་གྲགས་པ། གང་གིས་ཁམས་གསུམ་ཁམ་ཟས་སུ། །ཞེས་པའི་དབུ་ཅན་དེ་བཤད་ཁྲིད་ཀྱི་ལུགས་སུ་གསུངས་པར་ཞུས་པས་སྤྱི་དོན་བཀོད་ནས་བཀྲལ་ཏེ་གསུངས། འདན་པདྨ་རི་མཐོའི་ཤེལ་དཀར་ཕུག་ཏུ་ཡུན་རིང་ཙམ་བཞུགས་སྐབས། སྡེ་དགེའི་གཟིམས་དཔོན་བཀྲ་ཤིས་དགེ་ལེགས་ཀྱིས་ཞུས་ངོར་ལྷ་ཆོས་དང་མཐུན་པའི་གཏམ་པདྨའི་ཚལ་གྱི་ཟློས་གར་ཞེས་བྱ་བའི་ཡ་མཚན་ཅན་དེ་དང་། སྐུ་ཞབས་མཁྱེན་བརྩེའི་གསོལ་འདེབས་ཆེན་མོ་བཀྲ་ཤིས་དགེ་ལེགས་མ་མཛད། ཕྱིས་སུ་གཙོ་བོར་བླ་མ་སྤྱན་རས་གཟིགས་ཀྱི་གདན་ས་རྫ་རྒྱལ་དགོན་དང་། དེའི་ཉེ་སྐོར་ཉིད་དུ་བཞུགས་ཤིང་བྱམས་ཆོས་དང་། རྩ་ཤེས་བུདྡྷ་པཱ་ལི་ཏ། སྤྱོད་འཇུག །ཡོན་ཏན་མཛོད། བཟང་སྤྱོད་སོགས་ཀྱི་བཤད་པ་ཅི་རིགས་པར་གནང་། སྔོན་དུས་དཔལ་དགེ་བསམ་གཏན་ཕུན་ཚོགས་ཀྱིས་རྡོ་འབུམ་ཆེན་མོ་བཞེངས་སྐབས་ད་དུང་སྐྱེ་བ་ཕྱི་མར་ད་ལྟའི་འདི་ལས་རྒྱ་མི་ཆུང་བའི་རྡོ་འབུམ་ཁ་གསོ་བྱེད་རྒྱུ་ཡིན་ཞེས་ཞལ་གྱིས་བཞེས་པར་གྲགས་པ་ལྟར། ཨ་ཐུབ་ཚང་དཔོན་ཆེན་པོའི་རིགས་ལས་བྱུང་བའི་དད་ལྡན་འཇམ་དབྱངས་བློ་གྲོས་སོགས་ཀྱིས་བསྐུལ་ཞིང་ལོ་བཞི་ལྔ་ཙམ་དུ་མཆོག་དམན་སུས་དད་འབུལ་ཆེ་ཕྲ་བྱུང་ཚད་སྔར་དུས་དང་མི་འདྲ་བར་བརྩེ་བཞེས་མཛད་དེ། རྡོ་རྐོ་བཟང་ལ་མང་བ་བསགས་ནས་སྔོན་གྱི་རྡོ་འབུམ་ལས་ཀྱང་རྒྱ་ཆེ་ཞིང་དཔང་མཐོ་བའི་ཁ་གསོ་གནང་ཞིང་། རྡོ་བརྐོས་འབུར་ཐམས་ཅད་རྩིས་ལན་ཞིབ་གཟིགས་ནན་ཏན་དུ་མཛད་པས་ཤིན་ཏུ་དབྱིབས་ལེགས་ཤིང་སྤུས་གཙང་བ་མཐའ་རྒྱས་སུ་གྲུབ། དེ་སྐབས་སྡེ་མཐའ་ཉུལ་བའི་སྤྲང་པོ་མཐོང་དུ་མེད་པ་ལྟ་བུར་གྱུར། བཀའ་ལས། རྟེན་བཞེངས་ཀྱི་རིགས་འདི་སེམས་ཅན་མང་པོ་ལ་ཕན་ཐོགས་ཆེ་བར་འདུག་ཀྱང་། ས་འབུམ་དང་ས་སྐུ་སོགས་ནི་ཆར་ཆུས་འཇིག །ཟངས་གསེར་སོགས་ལས་བྱས་པ་ནི་བདག་པོ་ངན་ན་ཆོམ་རྐུན་ཡང་ལྡང་། ལོགས་རིས་དང་ཐང་ཀ་ཡང་རྐྱེན་ཁྱག་ཆུང་། གཙུག་ལག་ཁང་བཞེངས་ན་ནི། ཐིགས་ཚགས་སོགས་ཉར་ཚགས་ལེགས་པོ་བྱེད་པའི་དཀོར་གཉེར་དང་དེའི་ཟས་གོས་སོགས་འབད་རྩོལ་བརྒྱ་ཕྲག་དགོས་ཤིང་། དེ་བྱས་ཀྱང་དཀོར་གཉེར་བཟང་པོ་བརྒྱུད་མར་རྙེད་དཀའ། གསུང་རྟེན་གླེགས་བམ་ཡང་འཐོར་བརླག་ཆུད་ཟོས་སུ་འགྲོ་སླ་ཞིང་སྤར་རྐོ་དུས་སྤར་ཡིག་ལ་ཞུ་དག་ལན་དགུ་རེ་སོགས་བྱས་ཀྱང་ད་དུང་མི་དག་པ་མང་དུ་སྣང་ཟེར་འདུག་པས་ཆད་ལྷག་འཁྲུལ་གསུམ་གྱིས་མ་གོས་པ་དཀའ་ཚོད་རེད། རྡོ་འབུམ་འདི་ནི་བཞེངས་ཚར་ནས་དབྱར་དུས་ཐིགས་ཚགས་དང་། དགུན་དུས་ཁ་བ་ཕྱགས་སྤྲུགས། ཕུག་རོན་དང་བྱི་བ་སྲུང་བ། དཀོར་གཉེར་བསྐོ་འཇོག་སོགས་གང་ཡང་མི་དགོས། ཡིག་འབྲུ་དྲུག་པོ་དེ་མ་ནོར་ཕན་ཆད་ཞུ་དག་བྱ་མི་དགོས་ཤིང་། དེ་རྡོ་རྐོ་མི་ནག་པ་རྣམས་ཀྱང་བློ་ལ་ཡོད་པས་དཔེ་གཞན་ལ་མི་ལྟོས་མ་ཎི་འདི་སངས་རྒྱས་ཉིད་ཀྱི་ཆོས་ཕུང་བརྒྱད་ཁྲི་བཞི་སྟོང་གི་ནང་བཅུད་ཡིག་འབྲུ་དྲུག་ཏུ་བསྡུས་ནས་བྱིན་གྱིས་བརླབས་པ་ཡིན་པས་རྟེན་བཞེངས་གཞན་མང་པོ་ནི་ཡལ་ག་ལ་འཇུས་པ་དང་། ངས་འདི་ནི་ལྗོན་ཤིང་གི་རྩ་བའི་གནད་ནས་བཟུང་བ་དང་འདྲ། ལུང་པ་དམག་གིས་ཁེང་ཡང་འདི་ལ་ཆོམ་རྐུན་ཡོད་དོགས་མི་དགོས་པས་མི་རབས་མང་པོའི་མཐར་ཡང་གནས་ཆོག །གནའ་མིའི་ཁ་སྲོལ་དག་ལས། མ་ཎིའི་རྡོ་ལ་གདན་བཏིང་ན་ད་གཟོད་གཤིན་རྗེ་ཆོས་རྒྱལ་གྱི་དྲུང་དུ་དགེ་སྡིག་རྒྱ་མ་ལ་བཀྱག་དུས་གདན་གྱི་ལྗིད་དེ་དགེ་བའི་ཁ་སྣོན་ལ་བཀྱག་ཆོག་ཟེར། གང་ལྟར་ཡང་འདི་ལ་ནི་འཛམ་བུའི་ཆུ་གསེར་གྱི་གདན་བཏིང་ཡང་འོས་པ་ལས་ལྷག་ཀྱང་ཡིན་ཏེ་འཁོས་ཀྱིས་མི་ལྕོགས། འོན་ཀྱང་ངས་ནི་ས་ཆེན་པོ་འདི་རྡོ་གདན་ལ་བཞག་པ་ཡིན་ཞེས་ངག་ཡིད་གཉིས་ཀས་བསྔོས་ཡོད་པའི་ངའི་དགེ་བ་རྒྱ་མ་ལ་བཀྱག་ན་ཨེ་མི་ལྗིད་སྙམ་ཞེས་གསུངས་ཏེ། རྡོ་འབུམ་འདི་ནི་ཕྱི་རབས་ནས་ཕྱི་རབས་སུ་མཐོང་ཐོས་དྲན་རེག་གི་འགྲོ་བ་གྲངས་མེད་པའི་དོན་དུ་རྗེ་ཉིད་ཀྱི་ཞལ་ཚབ་ཏུ་བྱིན་གྱིས་བརླབས་པ་ཡིན་པར་སྣང་ངོ་། །རྫོགས་ཆེན་མཆོག་སྤྲུལ་ལྔ་པ་དང་། སྐུ་ཞབས་དགེ་མང་མཆོག་སྤྲུལ། མཁན་ཆེན་རྡོ་རྗེ་འཆང་པདྨ་བཛྲ་དང་། མཁན་པོ་དཀོན་མཆོག་འོད་ཟེར་སོགས་གྲྭ་སྟོང་ཕྲག་ཙམ་ལ་ཁྲ་མ་ལུང་དུ་གསང་རྙིང་རྒྱུད་བཤད་སོགས་གནང་ནས་ཕྱིར་བྱོན་སྐབས་རྡོ་འབུམ་ལ་རབ་གནས་དངོས་ཏེ་ཞག་གཉིས་ལ་མཛད་དུ་བཅུག །
སླར་ཡང་རྫོང་གསར་དུ་ཀུན་མཁྱེན་བླ་མ་རྡོ་རྗེ་འཆང་འཇམ་དབྱངས་མཁྱེན་བརྩེའི་ཞབས་ཀྱི་སྤྱན་སྔར་དར་ནང་མཛོད་དང་། དངུལ་རྟ་རྨིག་གི་ཞུ་རྟེན་བཅས་རབ་གནས་ཀྱི་ཆེད་དུ་ཕྲིན་གྱིས་གསོལ་འདེབས་མཛད་པས་ཆུ་སྟོད་ཟླ་བའི་ཚེས་བཅུར་རབ་གནས་མཛད་རྒྱུའི་ཞལ་བཞེས་གནང་བ་ལྟར་དུས་ཚོད་དེ་ནས་བརྩམ་པའི་ཉིན་ཞག་གསུམ་ཙམ་གྱི་རིང་རྡོ་འབུམ་གྱི་སྟེང་ཤོད་བར་གསུམ་ཡོངས་རྫོགས་སུ་ལྷག་པར་གནས་པའི་མེ་ཏོག་གི་ཆར་བབས་པ་ཀུན་གྱིས་མཐོང་ཞིང་ལེན་དུ་ཡོད་པས་ངོ་མཚར་བར་མཛད་པ་དང་། ཁྱད་པར་ལྕེ་བཙུན་སྙིང་ཐིག་གཟིགས་པ་སོགས་ཀྱིས་ཐུགས་དྲངས་ཏེ། དེའུ་སྤྲུལ་ཚང་འདི་ནི་རྒྱ་གར་གྱི་གྲུབ་ཆེན་ལྟ་བུའི་ཚོད་དུ་འདུག་ཅེས་དང་། སློབ་མ་མང་པོ་ལའང་ཁོང་ཀུན་མཁྱེན་ཀློང་ཆེན་པ་དངོས་ཡིན་ཚོད་རེད། ད་ལྟ་ས་སྟེང་ན་ཁོང་ཆེ། དེའི་ཞལ་གཅིག་མཐོང་ན་ཁྱེད་ཚོའི་དཔྲལ་བ་ན་མིག་ཅིག་ཡོད་པ་དེ་ལ་དོན་འབྲས་བྱུང་བ་ཡིན། ཞེས་སོགས་ལན་གཅིག་མིན་པར་ཡང་ཡང་བསྔགས། སླད་ནས་ཞབས་དྲུང་རིན་པོ་ཆེའི་མདུན་དུ་སྐུ་ཚེ་སྔ་མ་རིག་འཛིན་འཇིགས་མེད་གླིང་པ་ལ་སངས་རྒྱས་མ་ཆགས་པདྨ་ཅན་གྱི་ལུང་བསྟན་ནང་དུ་སྐུ་ཚེ་བརྒྱད་ཅུ་གྱ་ལྔ་གསུངས་པ་དེར་བཞུགས་པའི་རྟེན་འབྲེལ་དུ་དར་ནང་མཛོད་བཅས། རྒྱལ་བའི་རྒྱལ་ཚབ་རིག་འཛིན་བླ་མ་མཆོག །ཅེས་པའི་དབུ་ཅན་སོགས་ཞབས་བརྟན་ཚིགས་བཅད་རེ་དང་ཚེ་དཔག་མེད་ཀྱི་སྐུ་ལི་མ་དགུ་དང་བླུག་མ་དྲུག་སྟེ་རྟེན་དང་སྦྲག་པ་བཅུ་གསུམ་ཕུལ་སྙམ་ཡང་ད་ནི་བཅོ་ལྔ་རེད་སོང་ཞེས་ཞལ་ནས་གསུངས། དེ་ལས་ཚིགས་བཅད་བདུན་ཙམ་ད་ལྟ་བཀའ་འབུམ་གྱི་ཁྲོད་ན་བཞུགས། གཞན་ཡང་། གོ་འཇོ་བླ་མ་ལ་གསུངས་པ་དད་པའི་རྣམ་དབྱེ་སོགས་ལས་གསུངས་མཆོག་ཡི་གེ་དྲུག་མའི་རྡོ་མཁར་ཆོས་ཀྱི་ཕུང་པོ་འདི་ལ་ཕྱག་མཆོད་བཀུར་སྟི། བསྐོར་བ། ཞིག་གསོས་སོགས་མཐོང་ཐོས་དྲན་རེག་གི་འགྲོ་བ་མི་དང་མི་མིན། ཐ་ན་རླུང་གིས་ཕོག་པ་ཡན་ཆད་ཕྱིར་མི་ལྡོག་པ་ཐོབ་པར་འགྱུར་རོ་ཞེས་རྒྱལ་བའི་བཀའ་སོགས་ལས་བསྔགས་པ་བཞིན་ཡང་ཡང་གཙོ་བོར་གསུངས་སོ། །རྫ་མ་མོའི་ཁ་མདོར་རྒྱ་བོད་གཉིས་འཁྲུགས་སྐབས་མ་ཎི་ལ་གནོད་པ་མེད་པར་མི་ལྔ་བཅུ་སོགས་བསད་ཀྱང་དེར་གྲི་ཤི་ཙམ་ཡང་གྲགས་རྒྱུ་མེད་པ་ནི་མ་ཎིའི་ཐུགས་རྗེ་ཡིན་ཞེས་ཐམས་ཅད་ཀྱིས་གླེང་བ་ལྟར་ངེས་པའོ། །བདག་ཉིད་ཆེན་པོ་འདིས་འདུལ་བའི་ཡུལ་ཁམས་ཀུན་ཏུ་རི་རྒྱ། རྔོན་རྒྱ། ཇག་རྐུས། རྐྱང་ཤ་ཁྱི། ཁ་དུད། སྣ་དུད། མེ་མདའ་བཅག་པ་སོགས་ཀྱིས་སྡིག་རྒྱུན་གཅོད་པ་དང་། ཕྱག་དང་སྐོར་བ་མ་ཎི་སོགས་ཁ་ཏོན་དགེ་སྦྱོར་ལྷ་བྲི་རྟེན་བཞེངས་མཆོད་སྦྱིན་སོགས་དགེ་བཅུ་སྒྲུབ་ཏུ་བཅུག་པ་དང་། སྲོག་གཅོད་སོགས་མི་དགེ་བ་བཅུ་སྤང་དུ་བཅུག་པ་གྲངས་ཀྱིས་མི་ཆོད་པ་དང་། ཆོས་འདོད་ཀྱི་གང་ཟག་བརྩོན་འགྲུས་ཅན་ཡིན་ན་གཅིག་གི་ཕྱིར་ཡང་དཀའ་བ་བརྒྱ་ཕྲག་གིས་བསླབ་དགོས་ཀྱང་སྐྱོ་ངལ་མི་མཛད། དེར་མ་ཟད་ཆོས་འདོད་དེའི་ཅུང་ཟད་ཤེས་ཚེ་ཁོའི་སེམས་དགའ་བ་ལས་ལྷག་པར་ཁོང་གི་ཐུགས་དགྱེས་ལ། དུས་རྟག་ཏུ་སྐྱོ་ཤེས་དང་ངེས་འབྱུང་བསྐྱེད་པའི་གཏམ་ཁོ་ནས་གཞན་སྣང་དགེ་བ་ལ་བསྒྱུར་བའི་ཐབས་མཁས་ཀྱིས་གདུལ་བྱའི་རྒྱུད་ཆུད་མི་གསན་པར་མ་སྨིན་པ་སྨིན་པར་མཛད་པ་དང་། ཅུང་ཟད་སྨིན་པ་རྣམས་བྱང་ཆུབ་ཀྱི་སེམས་དང་ཤེས་རབ་རྣམ་པ་གསུམ་གྱི་བསྔགས་པ་བརྗོད་དེ་ལམ་གོལ་ལམ་ལོག་གི་གཡང་ས་ལས་འདྲེན་པ་དང་། དབང་པོ་མཆོག་དགེ་དབོན་རིན་པོ་ཆེ་སོགས་ལ། རྒྱུད་རྒྱལ་གསང་བ་སྙིང་པོ་དང་། སེམས་ཉིད་ངལ་གསོ། ཡོན་ཏན་མཛོད་སོགས། འོད་གསལ་རྡོ་རྗེ་སྙིང་པོའི་རྒྱུད་དང་ལམ་རིམ་དང་། ཁྱད་པར་འཇིགས་མེད་རྒྱལ་བའི་མྱུ་གུར་རྫ་ཁྲ་མ་བླ་མ་ཞེས་བཞུགས་གནས་ལས་མཚན་ཆགས་པའི་ཁྲ་མ་ལུང་དུ་སྣོད་ལྡན་མཆོག་གི་འཁོར་འགའ་ཞིག་དང་ལྷན་ཅིག་འཁོར་འདས་རུ་ཤན་ནས་བཟུང་རྫོགས་ཆེན་ཐུན་མིན་གྱི་སྔོན་འགྲོ་དང་། དངོས་གཞི་ཁྲེགས་ཆོད་ཐོད་རྒལ་ཡོངས་རྫོགས་ཀྱི་མྱོང་ཁྲིད་ཀྱིས་ཤིན་ཏུ་སྨིན་པར་མཛད་པ་དང་སྦྲགས་ནས་རྗེ་རང་གིས་ཀྱང་ཁྲིད་སྦྱང་ཡུན་རིང་དུ་གནང་། དེ་སྐབས་ཉིན་གཅིག་སྤྲུལ་སྐུ་མི་ར་ཚང་ལ། ང་ལ་དེ་རིང་བཟའ་རྒྱུ་ཆུ་ར་ཕྲན་བུ་ཞིག་ཡོད་ཀྱང་། ཁྱིས་ཁྱེར་བའམ་ལག་ནོར་ནས་གཞན་ལ་བྱིན་པ་གང་ཡིན་ཡང་མི་འདུག་པས་ཁྱོད་ཀྱི་བཟའ་ཁུག་དེ་ང་ལ་ཁྱེར་ཤོག་གསུངས། ཁོང་དགའ་ནས་སྐུ་མདུན་དུ་ཕུལ། དགོང་མོ་དེ་རིང་ང་ལ་མར་དང་ཆུ་ར་ཅུང་ཟད་ཅིག་བྱིན་བྱུང་བས་དགོས་མ་བྱུང་། གསུངས་ནས་ཕྱིར་གནང་ཞེས་མི་རས་གསུངས། དགེ་མང་དབོན་རིན་པོ་ཆེའི་ཞལ་ནས། སྔོན་ཆད་ངེད་ཚོ་རྫོགས་ཆེན་འདི་ལ་ཐོས་ལོ་དང་བཤད་མདོག་བྱས་ཚད་ཚིག་སྤྱི་ཡམ་མེ་བ་ཙམ་ལས་ཆེར་ཤེས་པ་མ་བྱུང་། ཁྲ་མ་ལུང་དུ་ཉམས་ཁྲིད་བཀའ་དྲིན་བསྐྱང་བ་ནས་བཟུང་ཆོས་འདི་ལ་གོ་རྟོགས་མཐིལ་ཕྱིན་པ་ཞིག་ཐོབ་སྙམ་བྱུང་ཞེས་གྲུབ་ཆེན་སྤྲུལ་སྐུ་ལ་གསུངས། རྫོགས་ཆེན་གྱི་ལམ་སྒྲུབ་པ་པོ་གཉིས་ལས་རིག་པ་རང་སྣང་གི་བློ་ཅན་ཡིན་ཡང་བརྟུལ་ཞུགས་རུ་ཤན་གྱི་སྤྱོད་པ་དང་མོས་གུས་བླ་མའི་རྣལ་འབྱོར་དང་སྦྲེལ་ནས་ཉམས་སུ་བླང་ན་བོགས་ཆེ་བས་སྔ་གོང་རུ་དམ་དུ་བཞུགས་དུས་ཀྱང་གངས་ཁྲོད་དང་ཉེ་བའི་རྫ་གསེབ་ཏུ་རུ་ཤན་མཛད་པར་གྲགས་ཤིང་ཕྱིས་སྐུ་ན་ཆེས་མཐོན་པོར་ཕེབས་དུས་ཀྱང་མཚན་མོའི་རིང་ཀློང་སྙིང་བླ་མའི་རྣལ་འབྱོར་ལ་ཐུགས་དམ་མཛད་དེ། སྲོད་དང་ནམ་གུང་དུས་མང་པོར། རྗེ་བཙུན་ཆེན་པོ་པད་འབྱུང་མཁྱེན། །ཞེས་གདུང་དབྱངས་མཛད་པ་ལྕང་མ་ལུང་དུ་སྡོད་སྐབས་བདག་ཅག་གིས་ཀྱང་མངོན་སུམ་དུ་གྱུར་ཞེས་གྲུབ་ཆེན་གསུངས། སྒྲུབ་འབྲས་ཀྱི་གཙོ་བོ་ནི་སྒོམ་རྟགས་ཉོན་མོངས་ཆུང་བ་ཞེས་པ་ལྟར་སྨྱོ་ཤུལ་ལུང་རྟོགས་ཞབས་པད་ཡུན་རིང་བསྟེན་པའི་ཐུགས་ཟིན་གྱི་སློབ་མ་ཡིན་པས་ཆོས་དབྱིངས་མཛོད་ཀྱང་གསུངས། ལན་གཅིག་ཁོང་ལ་ཁྱོད་བླ་མ་སུ་ལ་གསོལ་བ་འདེབས་ཀྱིན་ཡོད་གསུངས་པར། གསོལ་འདེབས་ཀྱང་ཆེར་མི་ཐུབ་འདུག་ཞུས་པ་དང་། མི་ཐུབ་དུས་དེར་ཟད། ཐུབ་དུས་སུ་ལ་འདེབས་གསུངས། ཁྱེད་ལ་གསོལ་བ་རེ་འདེབས་པ་ཡིན་ཞེས་གཅོམ་ཆུང་ངུས་ཞུས་པས། རྒྱལ་ཁམས་ན་བླ་མ་འདིའི་མང་ཉུང་ལ། ང་ལ་གསོལ་བ་འདེབས་པ་ཅི་ཡིན་གསུངས། རང་ལ་དགེ་སེམས་སྐད་ཅིག་མ་རེ་སྐྱེས་ཀྱང་། འོ་ན་དེ་ཅི་ལས་བྱུང་བསམ་ཙ་ན། ཁྱེད་ཀྱིས་ཆོས་རེ་བཤད་ཀྱིན་བསྡད་པའི་མཐུ་ཁོ་ན་རེད་འདུག་པས་དྲིན་ཆེ་སྙམ་པ་ལགས་ཞུས་པས། དེ་ཡིན་ན་ཨ་ཐོ་བདེན་ཐང་། ད་ནི་གསོལ་བ་རེ་བཏབ་ཀྱང་རུང་བ་འདྲ། ངའི་རྒྱུད་འདི་ན་ཉོན་མོངས་པ་ཟེར་རྒྱུ་དེ་ཚོ་གཏན་ནས་འཆར་རྒྱུ་མི་འདུག་ཅེས་གསུང་མཐོན་པོ་བྱོན། རྟག་ཏུ་རྗེས་སུ་བཟུང་བའི་ལྷག་པའི་ལྷ་ནི་རྗེ་བཙུན་འཇམ་པའི་དབྱངས་ཏེ། གསོ་རིག་གི་མན་ངག་དྭངས་མ་འགྲིམ་པའི་རྩ་དགུའི་རྣམ་བཤད་ཁྱད་པར་ཅན་ཞིག་མཛད་པ་ན་མན་ངག་དེ་གཡུ་ཐོག་སྙིང་ཐིག་གི་གསོལ་འདེབས་བསྙེན་པ་མཛད་སྐབས། སྨན་རྒྱལ་གུ་ཎའི་ཞབས་དང་འཇམ་དབྱངས་དབྱེར་མེད་པས་ཞེས་ཞལ་གདམས་དངོས་སུ་གདམས་པ་ཚིག་ཟིན་ལ་ཐོན་ཞིང་། གཞན་དུ་ཡང་། རབ་དཀར་ཀཻ་ལ་ཤ་དཔལ་མཛེས་པ་ལ། །བཻཌཱུར་ཐོར་ཚུགས་བཀོད་དང་ངག་མཚུངས་པ། །འཇམ་དཔལ་དཔའ་བོའི་རྗེས་འཛིན་མཚུངས་མེད་ལྷས། །ཚེ་རབས་ཕྲེང་བ་རྣམས་སུ་སླར་ཡང་སྐྱོངས། །ཞེས་གསུང་པ་འདི་འདྲའི་རིགས་མང་པོ་ཞིག་སྣང་། དེའི་ཕྱིར་སྐུ་ན་ཤིན་ཏུ་གཞོན་ནུ་ནས་ཇི་སྲིད་མྱ་ངན་ལས་འདས་ཀྱི་བར་དུ་ཉིན་མཚན་རྒྱུན་གྱི་འཁོར་ལོ་ཕལ་ཆེ་བར་འཇམ་དཔལ་མཚན་བརྗོད་ཅིག་ཐུགས་དམ་གྱི་མཐིལ་དུ་མཛད། བཀའ་དགོངས་འགྲེལ་གྱི་ཆོས་གང་ཡང་གཟིགས་པ་ཙམ་གྱིས་དོན་ཐུགས་སུ་ཆུད་ཅིང་། སྤྱོད་འཇུག་རྩ་བ་དང་མཚན་བརྗོད་ཀྱི་གླེགས་བམ་རེ། རེས་ཡོད་རེས་གཞན་ལ་གནང་ནས་མེད། དེ་ཙམ་མ་གཏོགས་འགྲེལ་བ་དང་བརྗེད་བྱང་སོགས་ཀྱི་དཔེ་ཆ་ཤོག་ལྡེབ་གཅིག་དང་ཐ་ན་སྣག་སྙུག་ཙམ་ཡང་ཉར་ཚགས་མཛད་པ་མེད་པར་ཀོག་དེ་ལངས་ན་གཞི་རྫོགས་པའི་བྱ་བ་དེ་ཁོ་ནར་བཞུགས། གཞན་རྣམས་ལ་མདོ་སྔགས་རིག་གནས་དང་བཅས་པ་ཕལ་ཆེར་ལན་མང་དུ་གནང་ལ། དེ་དག་གི་ཚེ། དང་པོ་བློ་ཆོས་སུ་འགྲོ་བའི་ཀུན་སློང་རྒྱས་པར་བཅོས་ཏེ། དབུ་ཕར་མངོན་པ་སོགས་གཞུང་གང་འཆད་རུང་དཔེ་ཆ་མང་པོ་བསྡུ་རྩོལ་དང་ཐུགས་གསོལ་སུ་གཟིགས་རྟོག་སྐྱོར་པའི་རིགས་གང་ཡང་མི་དགོས་པར་རལ་གྲི་ཕྱུང་རྒྱབ་ཀྱི་ཚུལ་དུ་ཐོགས་པ་མེད་པར་བཤད་པས་འཕགས་པ་འཇམ་དཔལ་གྱིས་བྱིན་གྱིས་བརླབས་པའི་ཆ་ཤས་ཤིག་ཏུ་མངོན། བཅོམ་ལྡན་འདས་ཀྱིས་མདོ་སྡེ་ལས། དེ་བཞིན་གཤེགས་པའིགསུང་རབ་ནི་ལེགས་པར་མ་བསླབ་པའི་ཉེས་པས་ནུབ་ཚུལ་གསུངས་པ་ཐུགས་ལ་བཞག་ནས་རྟག་ཏུ་དམ་པའི་ཆོས་ཀྱི་འཆད་ཉན་གྱི་བྱ་བ་ལ་གཅེས་སྤྲས་མཛད་ཅིང་། གཞན་འཆད་ཉན་བྱེད་པ་ཀུན་ལ་ཡང་ཐུགས་དགྱེས་པ་ཚད་མེད་པ་གནང་། ཆོས་གང་གསུང་ཡང་མཁས་ངོམ་གྱིས་སྤྲོས་པ་གང་མང་ཙམ་མིན་པར་གདུལ་བྱའི་བློ་ཚོད་དང་བསྟུན་ནས་ཕན་གང་ཆེ་མཛད་པས། མཁས་པས་བརྟགས་ན་དོན་བཟང་བ། བླུན་པོས་ཉན་ན་གོ་སླ་བ། གནད་འདུས་ལ་འཛིན་བདེ་བ། རན་ལ་འབྲེལ་ཆགས་པ། སྙན་ལ་རོ་ཉམས་དང་ལྡན་པ། འཇམ་རྩུབ་ཇི་ལྟར་བཤད་ཀྱང་གདམས་ངག་གི་རོ་གཅིག་ཏུ་མཐུན་པར་འབྱུང་བས་མཁས་རྨོངས་བར་མའི་སྐྱེ་བོ་མཐའ་དག་གི་ཡིད་འཕྲོག་ཅིང་དོན་དང་ལྡན་པར་འགྱུར་བ་དང་། རྫ་ཁོག་ཤེད་འདྲེ་ངན་པ་ཁོག་ཞུགས་སྨྱོན་པ་གཉིས་ཡིད་གཅུགས་པའི་གླེང་མོ་མང་དུ་བྱེད་ཀྱིན་འདུག་པར་གཞན་གཅིག་གིས་ཅི་ཡིན་དྲིས་པས་རྫ་སྟོད་དུ་དཔལ་སྤྲུལ་ཚང་གིས་སྤྱོད་འཇུག་བཤད་དུས་བར་མ་ཟེར་བའི་ལུང་པ་དེའི་མདོ་ཡན་ཆད་གང་པའི་འདྲེའི་ཁྲོམ་ཚོགས་ཀྱིས་ཆོས་ཞུས། དེ་དུས་ངེད་གཉིས་གྲོགས་མཆེད་དུ་གྱུར་པའི་ངོ་ཤེས་ཀྱིས་སྐད་ཆ་ལབ་པ་ཡིན་ཟེར་བ་དང་། གཞན་དམ་སྲི་རྒྱལ་འགོང་གནས་པ་གནོད་འཚེ་ཆེ་བའི་གནས་རྣམས་སུ་སྤྱོད་འཇུག་གསུངས་པས་སྲི་ངན་བཟློག་ཅིང་རྒྱལ་འགོང་ཞི་བའི་གཏམ་གྱིས་མཚོན་ཆོས་སྦྱིན་གྱིས་བསྡུས་ཤིང་བསྐྱང་བའི་མི་མིན་གྱི་འཇིག་རྟེན་ཡང་ཚད་མེད་པ་ཞིག་ཡོད་པར་མངོན་ནོ། །བརྩམ་པའི་བསྟན་བཅོས་ཀྱི་རྣམ་གྲངས་ལ། སྐུ་ན་ཆུང་དུས་ནས་གསུང་རྩོམ་སྣ་ཚོགས་མཛད་པར་འདུག་ཀྱང་རྗེ་ཉིད་ཀྱིས་གཞན་ལ་གནང་བས་ཚགས་མ་མཛད་ལ། གཞན་དག་གིས་ཀྱང་བསྡུ་རྩོལ་བྱེད་པའི་སྐབས་མ་རྙེད་པས་ཕྱོགས་དང་ཕྱོགས་སུ་འཐོར་བ་ལས་རྒྱ་ཆེར་མི་སྣང་ན་ཡང་། བདག་ཉིད་ཆེན་པོ་འདིའི་དངོས་སློབ་ཐུན་མིན་ནང་གི་སྲས་མཆོག་དགེ་མང་དབོན་རིན་པོ་ཆེ་ཨོ་རྒྱན་བསྟན་འཛིན་ནོར་བུས་བསྡུ་རྩོལ་མཛད་པའི་གསུང་འབུམ་ཡོངས་རྫོགས་ལ། ཐུན་མོང་རིག་གནས་ཀྱི་སྐོར་དང་། ཐུན་མིན་ནང་དོན་གྱི་སྐོར་གཉིས་ལས། བརྩམ་པ་ཕྱིན་དྲུག་གི་གྲངས་ལྡན་པོད་དྲུག་ད་ལྟ་བཞུགས། གྲྭ་ས་རྣམ་གསུམ་སོགས་ཁམས་དབུས་གཙང་གསུམ་གྱི་རི་བོ་དགེ་ལྡན་པ་སོགས་ཀྱི་དགེ་བཤེས་ཆེན་པོ་གཟུ་བོར་གནས་པ་དག་གིས་ཁྲིད་ཡིག་ཀུན་བཟང་བླ་མའི་ཞལ་ལུང་ལ་དཔལ་སྤྲུལ་ལམ་རིམ་ཞེས་བཏགས་ཏེ། དཔེ་བམ་རེ་ལྐོག་ཚགས་མཛད་ནས་ཉམས་ལེན་བྱེད་པ་མང་ཞིག་ཡོད་ངེས་པ་དང་། གཞན་ཆགས་སྡང་ཆོས་བརྒྱད་ལ་ཞེན་པས་རང་ལྟ་མཆོག་འཛིན་ཅན་རྣམས་ཀྱིས་ཀྱང་། ཚིག་ཤིན་ཏུ་སྙན་པས་མཚར་ལ་བཞད་གད་ཐོན་པའི་ངག་ལ་དགའ་ནས་དཔེ་ལྟས་བྱེད་པ་མང་དུ་ཡོད་དེ། སྐུ་བསྟོད་ལས། གང་གི་སྙིང་རྗེས་བརྩམ་པའི་བསྟན་བཅོས་ཀྱི། །ཆ་ཙམ་རྣ་བར་སོན་དང་ཆབ་གཅིག་པར། །ངེས་འབྱུང་ཡིད་ཀྱི་ཐར་ལམ་ལ་བརྩོན་པ། །རབ་དགའི་ཚུལ་འདི་རྒྱལ་གསུང་ལས་ཀྱང་ལྷག །
ཅེས་གསུངས་པ་ལྟར་རོ། །སྔོན་དུས་མཚན་ཉིད་ཀྱི་ཆོས་གྲྭ་ཆེ་བ་འདྲ་མ་གཏོགས་གཞན་དུ་སྤྱོད་འཇུག་སོགས་མཚན་ཙམ་ལས་དོན་ཤེས་པ་ལྟ་ཅི། གླེགས་བམ་འཆང་བ་ཙམ་ཡང་དཀོན་པ་ལས་སླད་ནས་རྗེ་བླ་མ་འདི་ཁོ་ནའི་དྲིན་གྱིས་སྟོད་སྨད་བར་གསུམ་ཀུན་ཏུ། དབུ་མ། བྱམས་ཆོས། སྤྱོད་འཇུག །སྡོམ་གསུམ། ཡོན་ཏན་མཛོད་སོགས་ཀྱི་འཆད་ཉན་ས་ལང་རྡོ་ལང་དུ་དར་ཞིང་བཙུན་ཆུང་ལོ་བཅའ་བཅུ་པ་ཡན་ཆད་ཀྱི་ནང་ན་སྤྱོད་འཇུག་གིས་མགྲིན་པ་བརྒྱན་པ་ཆེས་མང་དུ་ཐོན་པ་དང་། དེས་ན་ཐེག་པ་ཆེན་པོའི་ལམ་གྱི་ལུས་ཡོངས་རྫོགས་ལས་དང་པོ་བའི་དུས་ན་ཉམས་སུ་ལེན་པའི་རིམ་པ་ལ་བློ་ཁ་ལེགས་པར་ཕྱོགས་ནས་མོས་པར་བྱེད་པ་ཆེས་མང་བས་ས་འདི་དཔལ་ཡོན་དང་ལྡན་པར་གྱུར་པ་དང་། གསང་སྔགས་རྙིང་མའི་བསྐྱེད་རྫོགས་རྫོགས་པ་ཆེན་པོའི་བསྟན་པ་སྤྱིའི་སྒྲོམ་ཆུ་མགོ་གངས་ལ་ཐུག་པ་ལྟ་བུ་སྒྱུ་འཕྲུལ་གསང་སྙིང་ཡིན་ཡང་། དེའི་ཆོས་རྒྱུན་ཕལ་ཆེར་ནུབ་ལ་ཉེ་ཡང་བདག་ཉིད་ཆེན་པོ་དགེ་མང་གཞན་ཕན་མཐའ་ཡས་དང་དམ་པ་འདི་གཉིས་ཀྱི་བཀའ་དྲིན་ལས་ད་ལྟའི་བར་དུ་མ་ནུབ་པར་བཞུགས་པ་དང་། ཐེག་མཆོག་བསྟན་པའི་ཡང་རྩེ་འོད་གསལ་རྡོ་རྗེ་རྩེ་མོའི་རིང་ལུགས་ཀྱང་བླུན་སྒོམ་ཡིད་དཔྱོད་ཀྱི་དྲི་མས་མང་དུ་བསླད་དེ་གསེར་ལ་གཡའ་ཞུགས་པ་ལྟ་བུར་གྱུར་པ་རྗེ་འདིས་ཀུན་མཁྱེན་དྲི་མེད་འོད་ཟེར་ཡབ་སྲས་ཀྱི་ལེགས་བཤད་ལ་བརྟེན་ནས་བྱི་དོར་བྱས་ཏེ་ཀུན་བཟང་དགོངས་པའི་གནད་གསང་གསལ་བར་མཛད་པའི་བཀའ་དྲིན་གྱི་བདུད་རྩི་ནོད་དེ་རི་སུལ་དུ་གྲུབ་ཐོབ་གོང་མའི་ལུགས་བཞིན་རྫོགས་ཆེན་སྒོམ་པའི་རྣལ་འབྱོར་བ་མང་དུ་བྱུང་བ་དང་། འཇིག་རྟེན་མི་ནག་གི་སྐྱེ་བོ་ཕོ་མོ་རྣམས་ཀྱང་སྤྱོད་འཇུག་བཤད་པའི་ཆོས་གྲལ་དུ་བག་ཙམ་རེ་ཉན་པས། ཐེག་པ་ཆེན་པོའི་ཆོས་ཀྱི་སྲོག་རྩ་བསམ་པ་བཟང་པོ་བྱང་ཆུབ་ཀྱི་སེམས་ཡིན་པའི་འགྲོ་ཕྱོགས་ཤེས་ཤིང་། བདེ་སྨོན་གསུང་པ་རྣམས་ཐོས་ནས་བདེ་བ་ཅན་དུ་སྨོན་ལམ་འདེབས་པ་དང་། སངས་རྒྱས་འོད་དཔག་མེད་ཀྱི་མཚན་བརྒྱ་སྟོང་ཁྲི་འབུམ་སོགས་བརྗོད་པ་ལ་ཡི་དམ་ནར་མར་མཛད་པ་དང་། སྟོབས་བཞི་སྡིག་པ་སྦྱོང་བའི་ཐབས་ཀྱི་སྒོ་མཐོང་ནས་དེ་ལ་ནན་ཏན་བྱེད་པ་སོགས་དབྱར་གྱི་རྩི་ཤིང་ལྟར་མང་བ་བྱུང་བས་སྙིགས་མ་ལས་ཀྱང་ཆེས་སྙིགས་མའི་སྐལ་ངན་གྱི་མུན་རུམ་སྟུག་པོའི་ཁྲོད་དུ་བསྟན་འཛིན་དམ་པའི་ཟླ་བ་སྙིང་རྗེའི་གཟི་བརྗིད་ཅན་འདི་ལྟ་བུའི་རྗེས་སུ་བཟུང་བ་ནི་དུས་མཐའི་འགྲོ་བ་རྣམས་བསོད་ནམས་ཀྱི་བགོ་སྐལ་མི་དམན་པར་སྣང་ངོ་། །དུས་ནམ་ཡང་བྱམས་སྙིང་རྗེ་བྱང་ཆུབ་ཀྱི་སེམས་ཁོ་ན་ཐུགས་དམ་དགེ་སྦྱོར་ཐམས་ཅད་ཀྱི་རྩ་བར་འཛིན་ཞིང་སྐྱེ་བོ་མཆོག་དམན་ཐམས་ཅད་ལ་བསམ་པ་བཟང་པོ་གྱིས་འདི་ལས་གལ་ཆེ་བ་མེད་གསུངས། བསྙེན་སྒྲུབ་བྱེད་པ་ཀུན་ལ་ཡང་སྡེ་སྣོད་མང་པོ་ཤེས་པ་དང་སྟོང་པ་ཉིད་ཀྱི་ལྟ་བའི་ཕྱོགས་མཐོང་ཙམ་ཡོད་པ་དང་། ལྷ་སྒོམ་སྔགས་བཟླས་ཀྱིས་ལོ་ཟླ་མང་པོ་ཕུལ་བ་སོགས་ཀྱང་བསམ་པ་ངན་པའི་དབང་གིས་གདུག་འདྲེར་སྐྱེས་པ་མང་ལ། སྙིང་རྗེ་ཡི་དམ་གྱི་མཐིལ་དུ་འཛིན་པ་ནི་གདུག་འདྲེར་སྐྱེས་པ་གཅིག་ཀྱང་མི་སྲིད་པས་འདི་ཁོ་ན་གད་མེད་གཡང་མེད་ཀྱི་ཆོས་ཡིན་གསུངས། མིང་གནང་བ་རྣམས་ཀྱང་སྙིང་རྗེ་ལས་དྲངས་ཏེ་བཏགས་པར་མཛད། དུས་རྒྱུན་ཐབས་ལ་མཁས་པས་ལས་འབྲས་དང་དཀོར་ལ་བག་ཡོད་པས་ཆོག་ཤེས་མཛད་ཚུལ་ནི། དགེ་དབོན་རིན་པོ་ཆེའི་ཞལ་ནས། འོ་ཅག་ལ་རྒྱུ་འབྲས་ཡིད་ཆེས་ཀྱི་དད་པ་མེད་པས་ཆོས་མི་འགྲུབ་པ་ཡིན། གལ་ཏེ་ལས་འབྲས་ལ་ཡིད་ཆེས་ཤིག་རྙེད་ན་ཁོ་བོའི་བླ་མ་ཨ་བུ་བཀའ་དྲིན་ཅན་ལྟ་བུ་ཞིག་འོང་གི །ཞེས་གསུངས་པ་ལྟར། རྗེ་ཉིད་ཀྱིས་ཀྱང་ངས་ནི་ཆེ་ས་ནས་གསེར་དངུལ་སོགས་དང་། ཆུང་བ་སྔོ་ནི་ཁབ་དང་སྐུད་པ་ཡན་ཆད་དགེ་རྩ་ཞིག་ལ་གཏོང་བ་ལས་གནས་མིན་དུ་གཏོང་མ་མྱོང་གསུངས། སྤོས་ཤེལ་དང་གཟི་བྱུར་སོགས་རྡོ་རྐོ་རྣམས་ཀྱིས་ནོམ་ངོ་མི་ཤེས་པར་ཕམ་ཚོང་བྱེད་པ་རྣམས་ཕལ་ཆེར་གྱིས་མར་ཉོས་ནས་མཚམས་པའི་གདུང་མདུན་སོགས་སུ་མར་མེ་ཁྲི་འབུམ་མང་པོ་ཕུལ། ཕྱིས་དགུང་གྲངས་བདུན་བཅུ་དོན་གཅིག་གཉིས་སྐབས་ཨ་མཆོད་བསོད་ཚེ་སྐུ་མདུན་དུ་བཞུགས། དེ་ཕྱིན་ཇ་བག་རེ་ཙམ་དང་། བཟའ་རྒྱུའི་མར་རྒྱ་དོ་གསུམ། ནས་ཆུར་རྒྱ་མ་བཞི་ལྔ་ཙམ་ལས་ལྷག་པ་ཉར་ཚགས་མི་མཛད། དེ་ཡན་ཁོང་གིས་ཇ་དུམ་ཙམ་གསོག་འཇོག་མ་མྱོང་གསུངས། ཤ་རྐང་རེ་ཙམ་དང་། མར་གྲོག་རེ་ཕུལ་བ་ལ་ཡང་སྐྲག་སྐྲག་མཛད་ནས་སྙིང་བརྩེས་མ་ཎི་གསུངས། བྱང་ཆུབ་སེམས་དཔའ་ཆེན་པོ་དབང་ཐོབ་པ་རྣམས་ལྟར་བདག་ཉིད་ཆེན་པོ་འདི་ཡང་ཤིན་ཏུ་ཕོངས་ཤིང་རྒུད་པ་རྣམས་ལ་ལྷག་པར་ཐུགས་བརྩེ་བར་འགྱུར་ཏེ། རྒྱན་ལས། བཀྲེན་ལ་བརྩེ་དང་མ་རུང་པ་ལ་བརྩེ། །ཀུན་འཁྲུགས་ལ་བརྩེ་བག་མེད་རྣམས་ལ་བརྩེ། །ཡུལ་གྱི་གཞན་དབང་ཅན་ལ་སྙིང་རྗེ་དང་། །ལོག་པར་མངོན་པར་ཞེན་ལ་སྙིང་རྗེའོ། །ཞེས་དང་། རང་ལས་ལྷག་པའི་བྱམས་བརྩེ་ཆེ་བ་ཡང་། །དེ་ལས། ཇི་ལྟར་བློ་ལྡན་སེམས་ཅན་ལ། །ནན་དུ་བྱམས་པར་འགྱུར་བ་ལྟར། །སེམས་ཅན་བདག་དང་ཆུང་མ་དང་། །བུ་བཤེས་གཉེན་ལ་དེ་ལྟ་མིན། །ཞེས་པ་བཞིན། རྡོ་རྐོ་སོགས་ཤིན་ཏུ་ཕོངས་ཤིང་ཉམས་ཐག་པ་རྣམས་འོང་ནས་ཁ་ཟས་མེད་རྒྱབ་གོས་མེད་སོགས་སྡུག་བཤད་སྣ་ཚོགས་ཞུས་ནས་བསླང་བ་ན། ཐུགས་བརྩེ་བས་སྤྱན་རྩ་བརླན་པ་དང་། སྐུ་ཉམས་ལ་ཤ་ཞིག་འགྲོ་བ་ལྟ་བུའི་ཚུལ་མངོན་སུམ་དུ་མཇལ་རྒྱུ་ཡོད། དེ་དག་ལ་སྦྱིན་རྒྱུ་ཡོད་ཚེ་གནང་སྟེ་དེ་ཉིན་ཐུགས་དགའ་བའི་རྣམ་འགྱུར་མཛད། མེད་ཚེ་ད་ཅི་དྲག་ནའང་ཞེས་ཕར་ཚུར་དུ་གཟིགས་ནས་ཐུགས་མི་དགྱེས་པའི་ཚུལ་མཛད། སློང་བ་པོ་མཐོང་ན་མཛེས་སྡུག་གི་སྟོན་མོ་མཐོང་བ་བས་ལྷག་པར་དགའ་བ་དང་། སློང་བའི་སྒྲ་གཏམ་སྙན་ཐོས་པ་ལས་ལྷག་ཅིང་། སློང་བའི་བསམ་པ་རྫོགས་པའི་དགའ་བས་རང་ཉིད་དགའ་བ་ལ་སོགས་པའི་ཚུལ་ཡང་། སྔ་མ་ལས། སློང་བ་མཐོང་རྫོགས་དགའ་བ་དང་། །མི་དགའ་བ་དང་སྨོན་པ་ཡང་། །སྦྱིན་པ་པོར་ནི་བརྩེར་ལྡན་པས། །ལྷག་པར་ལྡན་པས་རྟག་ཟིལ་གནོན། །ཞེས་དང་། སྐྱེ་རབས་ལས། སྐྱེ་བོ་མཛའ་བཤེས་བྱེས་ནས་འོངས་པ་དག །
མཐོང་བར་གྱུར་ནས་དགའ་བའི་མིག་བགྲད་བཞིན། །སློང་བའི་ཚིག་ནི་གཏམ་སྙན་ཐོས་བཞིན་དགའ། །ཕྱིན་ནས་དགའ་བ་སློང་བ་བས་ཀྱང་ལྷག །ཅེས་དང་། ཕར་ཕྱིན་བསྡུས་པ་ལས། སློང་བ་འོངས་པ་མཐོང་ན་ཆེ་བ་རྣམས། །ཉོན་མོངས་མི་དགའ་རྣམ་པར་སྲབ་གྱུར་བས། །དགའ་བའི་སྟོན་མོ་ཆེན་པོ་བྱུང་བ་བས། །སློང་བ་མངོན་དུ་འོངས་ལ་དེ་དག་དགའ། །
ཞེས་གསུངས་པ་རྣམས་དང་ཕན་ཚུན་ཞུས་དག་ཕེར་ངེས་པས་སཙྪ་བརྐོས་ཕོར་ནས་བཏོན་པ་ལྟ་བུ་ཡིན་ནོ། །རྡོ་རྐོ་བུ་རྒོབ་ཞེས་པས་དངུལ་ཞིག་བསླང་པ་ན། ཨ་བུ་ང་ལ་དངུལ་མི་དགོས་ཞེས་བརྗོད་དང་དེ་སྦྱིན་ཞེས་གསུངས་ཀྱང་། ལན་གསུམ་མ་གསུང་བར་མི་དགོས་ཞུ་མ་ཐུབ། དེ་ནས་ཞུས་པས་གནང་བར་མཛད། རྗེས་སོར། དེ་ཅི་ལགས་ཞུས་པས། སྔོན་བདག་ཅག་གི་སྟོན་པ་ཐུགས་རྗེ་ཅན་ལ་ཁྱིམ་བདག་མགོན་མེད་ཟས་སྦྱིན་གྱིས་ལ་དུ་ཞིག་ཕུལ་བ། བྲམ་ཟེའི་ཁྱེའུ་རྟོག་འདོད་ཅན་ཞེས་པས་བདག་ལ་གནང་བར་ཞུས་པ་ལ། གོ་ཏ་མ་བདག་ལ་ལ་དུ་མི་དགོས་སོ་གྱིས་དང་གནང་གསུངས། དེ་ལྟར་ཞུས་པས་གནང་ངོ་། །ཀུན་དགའ་བོས། དེ་ཅི་ལགས་ཞུས་པ། འདིས་ཚེ་རབས་ལྔ་བརྒྱའི་བར་དུ་མི་དགོས་ཞེས་པ་ངག་ནས་ཐོན་མ་མྱོང་བས་དེའི་རྒྱུད་ལ་མི་དགོས་ཞེས་བག་ཆགས་བཞག་པ་ཡིན་གསུངས་པ་དེ་འདྲ་ཨེ་ཡིན་ཅི་ཤེས་གསུངས། ཡང་དབྱར་ཞིག་ལ་རུ་བ་སུ་ཡང་མེད་སྐབས། ནགས་ཤུལ་དགེ་ལེགས་ཉི་མ་དང་། ངེད་དཔོན་གཡོག་གསུམ་ཀར་ཆུང་སྐོ་འོར་ན་བཞུགས། སྒ་ཞེ་ཕུ་མ་སེམས་ཉིད་རྡོ་གྲགས་ཟེར་བའི་ཕྱུག་པོ་དཔོན་གཡོག་འགའ་རེ་མཇལ་དུ་འོང་ནས་དངུལ་རྡིལ་ཚད་གསེར་གཞུང་མ་ཞིག་ཕུལ་བ་ཡར་འཕེན་མར་འཕེན་འགའ་རེ་བྱས་མཐར་རྟ་ཁྱེར་ཏེ་བྲོས་ཤོར། དུས་གཞན་དུ་སྐུ་མདུན་དུ་འོངས་པ་རྣམས་ཀྱི་རྗེས་སྤྲང་པོ་རྣམས་ཀྱིས་དེད་ནས་འོངས་ཀྱང་འདི་དུས་ཞག་གཉིས་གསུམ་བར་སྤྲང་པོ་རྡོ་རྐོ་སུ་ཡང་མ་བྱུང་བས་གཞན་དག་རོས་མནན་པ་ལྟར་དངུལ་དེ་སྦྱིན་ས་མ་ཆུད་པར་ལུས། ཁོ་བོ་གཉིས་ལ་སྤྲང་པོ་ཨེ་འོངས་ལྟོས་གསུངས། དེ་ནས་རྡོ་རྐོ་བཞི་ལྔ་ཞིག་འོངས་པ་ལ། དེ་མ་ཐག་ཏུ་དངུལ་དེ་ཕྱག་གིས་བླངས་ནས་ཨེ་བཟང་ངོ་ཞེས། སྒོར་ཐོན་པ་དང་མཉམ་དུ་འདི་རེད་གསུངས་ནས་དེ་དག་ལ་གནང་། དེ་རིང་རོ་རྒན་དང་འདྲ་བ་དེ་མེད་སོང་བས་ཨ་རེ་དགའ་གསུངས་ཏེ། ཇི་སྐད་དུ། ཇི་ལྟར་བློ་ལྡན་འདི་ནི་ཀུན་གཏོང་བ། །དོན་གཉེར་སྐྱེ་བོ་དགའ་བས་དགའ་བ་ལྟར། །
དེ་ལྟར་སློང་མོ་པ་དག་བླང་བྱ་བ། །འདོད་དགུ་ཐོབ་པ་དག་གིས་དགར་མི་འགྱུར། །ཞེས་
དང་། །བརྟན་པ་བརྩེ་དང་ལྡན་པའི་སྦྱིན་པ་ཡིན། །སྦྱིན་པས་བདེ་བ་བྱེད་པ་གང་ཡིན་པ། །དེ་ལ་ཁམས་གསུམ་ཉེ་བར་སྤྱད་རྣམས་ཀྱི། །བདེ་བ་དེ་ཡི་ཆར་ཡང་མི་ཕོད་དོ། །ཞེས་དང་། །
བཏང་དགའ་ལོངས་སྤྱོད་ཅན་དེ་བྱང་ཆུབ་སེམས་དཔའ་ལས་གཞན་མིན། ཞེས་པ་ལ་སོགས་པའི་སྦྱིན་ཚུལ་མང་པོ་ཡོད་དོ། །གཟན་ཤམས་དང་། ཁྱད་པར་རྡོ་དྲིལ་ནི། བདག་པོ་ནས་རྡོ་ཡོན་ལ་གནང་རོགས་ཞུས་ན་མ་གཏོགས། གྲྭ་ཕྲུག་གམ། གྲྭ་པ་ངོ་མ་རེ་ལ་གནང་བ་ལས་རྡོ་ཡོན་དང་འདོན་གླ་སོགས་ལ་གནང་བར་མི་མཛད། ཡང་རྒྱུན་གྱི་མཛད་སྤྱོད་ནི། སྔ་མོ་དབུ་བཀྱག་དུས་ཕྱག་ཕྲེང་བསྣམས་འདུག་པས་ཡི་དམ་སོགས་གང་གསུངས་མ་ཤེས། སྔ་དྲོ་ང་རང་ནས་བཀའ་ཆོས་འདོན་དུས་དེ་ལ་གསན་ཚུལ་མཛད་ནས་མཉམ་བཞག་ཏུ་བཞུགས་འདུག །ཉིན་གུང་ལ་བསམ་ལྷུན་དང་དཀོན་མཆོག་རྗེས་དྲན་གསུངས། ཁ་ཕུད་དང་བཅས་གུང་ཚིགས་མཛད་རྗེས་འཕྲོག་མ་ལ་ཆངས་བུ་དང་ཡོན་བསྔོ། ལྟུང་བཤགས། ཟབ་མདོ། མ་ཎི་མང་ཉུང་ཅི་རིགས་གསུངས། བསྔོ་ཡིག་ཡོད་ན་དེར་ཞུ། བསྔོ་བ་མཛད། མཚན་བརྗོད་ཚར་གསུམ། གང་བློ་མ་ཕན་ཡོན་དང་བཅས་ཚར་གསུམ། ཕྱི་དྲོ་ངོ་མ་ལ་བཤགས་རྒྱུད་གསུངས་ནས་རྐྱང་ཕྱག་མཛད་པ་རྣམས་ཆགས་མེད་ཡིན། ཡང་སྐོ་འོར་དུ་དབྱར་ཞིག་ལ་ལྷོ་ཁོག་ནས་མཇལ་མི་སྐྱ་སེར་ཇོ་མོ་སོགས་སུམ་ཅུ་ནང་བྱུང་བ་ལ། ནགས་ཤུལ་དགེ་ལེགས་ཉི་མ་དང་ངེད་གཉིས་ཀས་དམ་མཚམས་དང་། སྐུ་ཆམ་ཞིག་བཞེས་པས་མི་ཚུད་བྱས་ཀྱང་ཁོང་སངས་རྒྱས་དངོས་ཡིན་པས་ཚུལ་བསྟན་ལས་བསྙུངས་པ་སོགས་མི་སྲིད་ཟེར་ནས་ཡོན་ཏན་མང་པོ་བཤད་འདུག་པ་སྐུ་མདུན་དུ་མཚར་གཏམ་གྱིས་ཞུས་པས། ང་རང་ངན་དང་ངན་ཏེ་བཤད་ཀྱང་བདེན་དུ་མི་འཛིན་གསུངས། དེ་རྗེས་ཞིག་ལ་ངེད་གཉིས་ཀྱིས་སྐྲག་བཞིན་དུ་མཚར་གཏམ་གྱིས་ཁྱེད་དེ་ཙམ་ངན་ནམ་ཞུས་པས། ངན་དང་ངན་ཏེ་འོན་ཡང་སྤྱོད་འཇུག་དང་ནི་འབྲལ་མ་མྱོང་གསུངས་ཏེ་བཞད་སྒྲ་ཆེན་པོ་མཛད། དུས་རྒྱུན་མཇལ་མི་སུ་མེད་སྐབས། སྐུ་གཅེར་བུར་ཕྱུང་སྟེ་རླུང་བུམ་ཆེན་བཟུང་ནས་བཞུག་པ་དང་། འཁྲུལ་འཁོར་བཅུ་དགུ་པ་ལྟར་ལས་རླུང་དབུ་མར་ཚུད་པའི་རྟགས་དང་། སྙན་རྒྱུད་ཤོག་དྲིལ་ཡིད་བཞིན་ནོར་བུ་ལས། དབུ་མར་ཞུགས་གནས་ཐིམ་གསུམ་གྱི༔ རང་རྩལ་རྫོགས་པའི་རྟེན་འབྲེལ་ལས༔ བུམ་ཅན་རིལ་བ་ཞབས་ཚགས་ཅན༔ མངོན་དུ་སྣང་ཞིང་འོག་རླུང་ལ༔ བཤང་བའི་དྲི་མ་མི་འབྱུང་ཞིང༔ ཞེས་གསུངས་པ་ལྟར་ཐུན་མོང་གི་ཡོན་ཏན་མངོན་སུམ་མིག་གི་དགའ་སྟོན་དུ་མཇལ་བའོ། །ཡང་། འཇམ་རླུང་བུམ་ཅན་བཟུང་ནས་མཚན་བརྗོད་ཚར་གསུམ་རེ་ཙམ་གསུངས་ཚེ་ལ་རླུང་འཕེན་སྡུད་བྱེད་པ་མ་མཇལ་ལ། རེས་འགའ་གཟིམས་ཡུར་ཏེ་རྔུར་བ་ལྟ་བུར་མཛད་ཀྱང་། ང་རང་ཡེངས་ནས་མཚན་བརྗོད་སོགས་འདོན་པ་ཆད་སོང་ཡང་དེ་མ་ཐག་དེ་འཕྲོ་ནས་གསུང་སྐད་ཐོས་པར་ཚིག་ཕྱེད་ཀྱང་མ་ནོར་བར་གསུངས། རང་གིས་ཀྱང་མཚན་བརྗོད་གསུངས་སྐབས་དེར་སོང་ནས་བཏོན་པ་ལ་ཨ་མཆོད་ཐུགས་སྐབས་མིན་སོགས་ཀྱི་ཚེ་གཟིམས་ཡུར་བ་དང་རང་གི་འདོན་པ་ཆད་པ་ན་ཡང་དེ་མ་ཐག་ཚིག་ཕྱེད་ཀྱང་མ་ནོར་བར་གསུངས་པ་སྔ་ཕྱིར་ལན་གྲངས་དུ་མར་བྱུང་བ་འདིས་དུས་རྒྱུན་འོད་གསལ་ལས་མི་གཡོ་བར་མངོན་ནོ་སྙམ། དབུའི་ལྟག་གོང་དུ་སྐྲ་འཁྱིལ་ནག་པོ་འོད་ཅན་ཞིག་དབུ་དཀར་པོའི་དུས་ཀྱང་ནག་འོད་དེ་མཇལ་དུ་ཡོད་པ་མཚན་བཟང་ཞིག་ཡིན་ནམ། ཡང་རྩ་བའི་བླ་མ་སངས་རྒྱས་དངོས་ཀྱི་སྐུ་གདུང་འདི་ནི་ལྷ་སའི་ཇོ་བོ་རིན་པོ་ཆེ་དང་ཁྱད་པར་མེད་པས་སྨོན་ལམ་གང་བཏབ་ཐམས་ཅད་འགྲུབ་ཅིང་། ཚོགས་མཆོད་མར་མེ་ཕྱག་སྐོར་སོགས་གང་བྱས་ཐམས་ཅད་ཀྱིས་ཚེ་འདིར་རྐྱེན་ངན་དང་བར་ཆད་ཞི་ཞིང་། ཕྱི་མ་མངོན་མཐོ་ངེས་ལེགས་ཐམས་ཅད་ཐོབ་པར་འགྱུར་རོ་ཞེས་གསུངས་ཏེ། གཞན་དག་བསྐུལ་ཕྱིར་རང་གིས་ཀྱང་དོན་མཐུན་གྱི་སྤྱོད་པ་ཕྱག་དང་མཆོད་པ་སོགས་མཛད་ཅིང་། གདུང་མདུན་ལ་ནམ་ཕེབས་པ་ན། སྐྱེ་བ་ནས་ཚེ་རབས་ཐམས་ཅད་དུ། ལས་ངན་དང་སྡིག་གྲོགས་དབང་དུ་མི་འགྲོ་བར་ཤོག །སྐྱེ་བ་ནས་ཚེ་རབས་ཐམས་ཅད་དུ། སེམས་ཅན་གཅིག་གི་བ་སྤུའི་ཁོང་བུ་ལ་གནོད་འཚེ་མི་བྱེད་པར་ཤོག །སྐྱེ་བ་ནས་ཚེ་རབས་ཐམས་ཅད་དུ་དམ་པའི་ཆོས་ཀྱི་སྣང་བ་དང་མི་འབྲལ་བར་ཤོག །གང་གིས་བདག་ལས་ལེགས་བཤད་ཐོས་པའམ། །མཐོང་ཐོས་དྲན་རེག་གཏམ་གྱི་འབྲེལ་བ་ཚུན། །མཚམས་མེད་ལས་བྱང་ངན་སོང་སྒོ་ཁེགས་ནས། །ཞིང་མཆོག་པོ་ཏ་ལ་རུ་སྐྱེ་བར་ཤོག །ཅེས་སོགས་གསུངས་སོ། །སྡུད་པ་ལས། གཉའ་ཤིང་གང་ཙམ་ལྟ་ཞིང་འགྲོ་ལ་སེམས་འཁྲུལ་མེད། །ཅེས་གསུངས་པ་ལྟར། དུས་རྒྱུན་བྱོན་པའི་གནས་སྐབས་སུ་དལ་བྲེལ་སྙོམས་ཤིང་རན་པ་དང་། ཞལ་ཕྱིར་གཟིགས་དགོས་ཀྱང་གཡས་ཕྱོགས་སུ་སྐུ་ལུས་ཐམས་ཅད་དལ་བུས་བསྐོར་ནས་གཟིགས་པ་མ་གཏོགས། དབུ་ཕྱིར་ཀྱོག་ཙམ་མཛད་པ་མི་སྲིད་པ་སོགས། མདོར་ན་བདག་དང་བདག་ལྟ་བུ་མ་ཡིན་པ་རྒྱུ་མཚན་ཤེས་པ་དག་གིས་མཇལ་ན་སྐུ་དང་གསུང་དང་ཐུགས་ཀྱི་མཛད་པ་ཐམས་ཅད་ལ་འཁྲུལ་པ་མེད་པར་མདོ་སྡེ་དང་ཞུ་དག་བྱེད་ཆོག་པ་ཡིན་པར་ངེས། དད་མེད་བླུན་པོ་བདག་ཀྱང་སྐུ་མདུན་དུ་མདོ་སྡེ་འདོན་དུས་རེས་འགའ་འདི་ཡང་དེའོ་འདི་ཡང་དེའོ་བསམ་པ་མང་དུ་བྱུང་ངོ་། །དེ་བཞིན་དུ་གསུང་ལའང་འཁྲུལ་བ་མེད་ཅིང་། བརླང་ཚིག་དང་ཀུ་རེ་བཞད་གད་ཀྱི་རྒྱུ་སོགས་ཅུང་ཟད་རེ་མཛད་ཀྱང་བརྟགས་ཤེས་ན་གདུལ་བྱ་འདུལ་བའི་ཐབས་མཁས་ཀྱི་སྤྱོད་པ་འབའ་ཞིག་ཏུ་སྣང་ངོ་། །ཡང་།
གསང་སྔགས་དབང་ཁྲིད་ལུང་རྣམས་མ་གསན་པར་བཤད་ཁྲིད་སོགས་མི་མཛད་པ་ལྟ་ཅི། མདོ་ཕྱོགས་ལའང་བཤད་ལུང་མ་ཐོབ་པར་མི་གསུངས་པར་མངོན་ཏེ། དེ་ཅིས་ཤེས་ན། འབྱེད་གཉིས་དང་བཤེས་སྦྲིངས་ཞུས་པ་ལ་ཁོང་གིས་གསན་མ་མྱོང་བས་མི་ཤེས་ཞེས་མི་གསུངས་པའི་ཕྱིར་རོ། །དེང་དུས་ནི་གང་ནའང་དེ་ལྟར་མཛད་པ་དཀའོ། །རྟོགས་པའི་ཡོན་ཏན་ཡང་། ཀུན་མཁྱེན་ཆོས་ཀྱི་རྒྱལ་པོའི་ཞལ་ནས། སྣ་ཚོགས་རང་གྲོལ་ཆོས་ཉིད་ཟད་པར་ཕྱིན། །མི་འགྱུར་ལྷུན་གྲུབ་འདུན་མ་ལེགས་པའི་རྩེ། །ཞེས་གསུངས་པ་ལྟར་ཉིད་ཀྱི་ཞལ་གསུང་རྟོགས་པའི་སྐྱིད་གླུ་ལས། ཐར་བའི་ལམ་སྣ་ཟིན་པ། འཁྲུལ་བའི་རྟོག་པ་ཟད་པ། ཉམས་མྱོང་རྟོགས་པའི་ཕ་ཕོག་ཐོབ་པ། འཁྲུལ་སྣང་དག་པ། རྩ་བ་གསུམ་གྱིས་བྱིན་གྱིས་བརླབས་པ། འཁྲུལ་བའི་ཨ་འཐས་ཞིག་པ་ལ་སོགས་པ་ལམ་རྟགས་ཀྱི་ཡོན་ཏན་ཐམས་ཅད་རྫོགས་ནས་བྱར་མེད་ཆོས་སྐུའི་ངང་དུ་སྐྱིད་ཉལ་རྒྱབ་ཆོག་པའི་ཨ་བུ་ཧྲལ་པོའི་མཚར་གཏམ་དེ་གོ །ཞེས་གསུངས་པ་ལྟར་ལགས་སོ། །དགེ་དབོན་རིན་པོ་ཆེའི་ཞལ་ནས། ལར་རྒྱལ་སྲས་བྱང་ཆུབ་སེམས་དཔའ་རྣམས་ནི་གདུལ་བྱ་འདུལ་བའི་དགོངས་གཞི་དང་། དགོངས་པ་བསམ་གྱིས་མི་ཁྱབ་པ་དུ་མས་འགྲོ་དོན་མཛད་པ་སྣ་ཚོགས་སུ་སྟོན་ཡང་ཐབས་མཁས་ཁོ་ན་ལས་མི་འདའ་བས་ལོག་པར་མི་ལྟ་མོད། འོན་ཡང་མདོ་རྒྱུད་བསྟན་བཅོས་ཀྱི་གཞུང་དང་མཐུན་པའི་མཛད་པ་སྟོན་པ་ལ་ནི་ཁོ་བོའི་བླ་མ་ཨ་བུ་བཀའ་དྲིན་ཅན་དང་མཚུངས་པ་ཞིག་དེང་སང་གངས་རིའི་ཕྲེང་བས་བསྐོར་བའི་ཡུལ་ལྗོངས་འདིར་མཐོང་བ་དང་ཐོས་པ་ལྟ་ཅི། ཐེ་ཚོམ་ཟ་བའི་ཡུལ་ཙམ་ཡང་མེད་ངེས་ཡིན། ཞེས་པ་ལ་སོགས་པ་གསུངས་སོ། །དགུང་གྲངས་དོན་གཉིས་པ་ས་ཡོས་ལོར་དཀར་ཆུང་སྐོ་འོར་དུ་བཞུགས་ཏེ་དགེ་ལེགས་ཉི་མ་སོགས་དགེ་གོང་ཆ་ཤས་ལ་ལོ་ཆེན་བསྟན་རྩིས་གཞིར་བཞག་གི་ཆོས་འབྱུང་དང་། ཆོ་འཕྲུལ་གྱི་མཛད་པ་རྒྱས་པར་གསུངས། ཁྱད་པར་བཙུན་ཆུང་དགེ་ལེགས་ཉི་མ་ལ་ས་རིས་ཁྲིད་དེ་རི་མོའི་བྱ་བ་རྫོགས་མཐར། མཉམ་མེད་ཐུབ་པའི་དབང་པོ་དགུང་གྲངས་བརྒྱད་ཅུའམ་ངོ་ཐོག་གྱ་གཅིག་པར་འཕགས་ཡུལ་ལྷོ་ཕྱོགས་རྒྱ་མཚོའི་འགྲམ་དྷཱ་ན་ཤྲཱིའི་གླིང་དུ་དཔལ་ལྡན་འབྲས་སྤུངས་ཀྱི་མཆོད་རྟེན་སྟེང་དཔལ་ལྡན་རྒྱུ་སྐར་གྱི་དང་། འོག་ཆོས་དབྱིངས་གསུང་གི་དབང་ཕྱུག་གི་དཀྱིལ་འཁོར་དུ་བཅོམ་ལྡན་འདས་ཉིད་དཔལ་དུས་ཀྱི་འཁོར་ལོའི་སྐུར་བཞེངས་ནས་ཆོས་རྒྱལ་ཟླ་བ་བཟང་པོ་དང་སྤྲུལ་པའི་ཆོས་རྒྱལ་གོ་དྲུག་ལ་སོགས་པ་ལ་དཔལ་གཉིས་སུ་མེད་པའི་རྒྱུད་དུས་ཀྱི་འཁོར་ལོའི་རྩ་བའི་རྒྱུད་སྟོང་ཕྲག་བཅུ་གཉིས་པ་གསུང་བའི་དུས་ཆེན་གནམ་གནོན་ལྕགས་འབྲུག་འདས་ལོར་བྱས་པའི་ངེས་པ་གསར་སྤོས་ཀྱི་ཐོག་མཐའི་ཚིགས་བཅད་དང་བསླབ་སྟོན་མཛད་ནས་ཡི་གེར་བཀོད་པ་སོགས་དང་། དེའི་སྟོན་དུས་རྫ་དགོན་དུ་ཞིང་སྒྲུབ་དང་། བཟང་སྤྱོད་ལ་ས་བཅད་རེའི་མཚམས་སུ་བཅད་དེ་དོན་གསུངས་ནས་འདོན་སྒོམ་སྤྲག་ནས་རྒྱས་པ་ཞིག་ཞག་བདུན་དུ་གསུངས། དེ་དུས་སེར་ཤུལ་དགོན་ནས་དགེ་བཤེས་མང་པོ་དང་གྲྭ་པ་བརྒྱ་རེ་ཙམ་བྱོན་ནས་གསན་པར་མཛད། དགུང་གྲངས་དོན་བཞི་པ་ལྕགས་སྦྲུལ་ལོའི་བསྙུང་གནས་རྗེས་ཟླ་བ་ལྔ་པའི་ཡར་ཚེས་སྐོར་མཚམས་པའི་སྐུ་གདུང་གི་དྲུང་དུ་ཞི་ཁྲོ་ན་རཀ་དོང་སྤྲུགས་ཀྱི་ཆོ་གའི་དབུ་བཙུགས་ནས་ཕྱིར་ལོ་ཆུ་རྟའི་ཟླ་བ་བཅུ་བའི་བར་ཏེ་ཟླ་བ་བཅོ་བརྒྱད་དུ་གསུངས་ཏེ་མཆོག་གི་སྦྱིན་སྲེག་འབུམ་ཁ་བཀང་བཅས་མཐར་རྒྱས་མཛད། དེ་ཕྱིན་སྐུ་མ་གཤེགས་བར་དུ་ཉ་སྟོང་གཉིས་ལ་ཉིན་ཆོག་རེ་མི་ཆགས་པར་གསུངས་ཏེ་གདུལ་བྱ་དཔག་ཏུ་མེད་པའི་སྲིད་པའི་རྒྱ་མཚོ་གཏིང་སྤྲུག་པར་མཛད། ཨོ་རྒྱན་སངས་རྒྱས་གཉིས་པ་སྲིན་ཡུལ་དུ་བྱོན་ཀར་ཞི་ཁྲོ་ན་རཀ་དོང་སྤྲུགས་ཀྱི་ཆོ་གས་བོད་འདིར་སྐུ་དངོས་ཀྱི་གདུལ་བྱའི་འཕྲོ་རྫོགས་པར་མཛད་པ་བཞིན་ནོ། །དེ་སྐོར་སྔ་ཕྱིར་དགེ་དབོན་རིན་པོ་ཆེ་སོགས་ལ་དབུ་མ་རྩ་ཤེས་སོགས་དང་། གཞན་གྲྭ་འགའ་རེ་ལ་སྡོམ་གསུམ་རྩ་འགྲེལ། སྤྱོད་འཇུག །སེམས་ཉིད་ངལ་གསོའི་རྩ་འགྲེལ་སོགས་གསུངས། དེ་སྐབས་སྐུ་མདུན་དུ་བུ་རམ་མང་དུ་ཕུལ་བ་ཉིན་གུང་གསོལ་ཚིགས་དུས་གྲྭ་ཆུང་ཉི་ཤུ་སྐོར་ལ་ཉིན་བཞིན་ཅུང་ཟད་གནང་བ་ཆགས་མེད་མཛད། དེ་ཕྱིན་བསྔོ་རྟེན་དང་རྡོ་ཡོན་རྒྱ་ཆེ་མི་བཞེས་ཀྱང་ཐག་ཉེ་སྐོར་གྱི་རྡོ་ཡོན་མ་བཞེས་ཐབས་མེད་རྣམས། སྐུ་མཆེད་སྟོབས་ལི་དང་ཨ་འཇིག་ལུག་ཅེས་པ་གཉིས་ཀྱིས་ཡོན་དང་མ་ཎི་སྤྲོད་ལེན་བྱེད། བསྔོ་རྟེན་ཕལ་ཆེར་རྫ་དགོན་ལ་གསུངས་ཡོན་དུ་ཕུལ། ཆུ་ལུག༧༦ལོར་རྫ་སྟོད་མ་མོའི་ཐང་དུ་ཁྲོམ་ཚོགས་སྟོང་ཕྲག་སོགས་འདུས་པར་བདེ་སྨོན་དང་མ་ཎི་བཀའ་འབུམ་གྱི་ཁྲིད་རྒྱས་པར་སྩལ། དེ་ཕྱིན་ཆད་ཆོས་ཆེར་མ་གསུངས་ཤིང་། ཆོས་ཞུར་འོང་བ་རྣམས་དབོན་རིན་པོ་ཆེ་བསྟན་འཛིན་ནོར་བུ་སོགས་ཀྱི་དྲུང་དུ་གཏོང་།
ནན་བསྐྱེད་དེ་གདམས་ངག་ཞུ་བ་ཕལ་ཆེར་ལ་བཀའ་བཀྱོན་གནང་། སུ་ལ་ཅི་ཙམ་བཀྱོན་ཡང་ཕྱི་ཕྱིར་དད་གུས་ཇེ་འཕེལ་དུ་འགྲོ་བ་མ་གཏོགས་མི་མཐུན་པར་འཛིན་པ་སུ་ཡང་མེད་པས། རྗེ་ཉིད་ཀྱི་གསུང་ལས། དབེན་པའི་རྣལ་འབྱོར་སྨྱོན་པ་རྒྱལ་ཁམས་ཀྱི་གཅེས་ཕྲུག །
ལྷག་བསམ་བྱང་སེམས་འབྱོང་བ་འགྲོ་ཀུན་གྱི་སྐྱབས་མགོན། ཞེས་གསུངས་པ་ལྟར་སེམས་ཅན་ཐམས་ཅད་དང་མ་བཞིན་དུ་མཐུན། སྤྱིར་གྱང་ཚིག་འཇིགས་ལ་ཟིལ་ཆེ་བ་གནང་ཡང་ཆགས་སྡང་སོགས་ཀྱི་གཏམ་དང་མི་འདྲེ་ཞིང་བརྟགས་ཤེས་ན་དངོས་སམ་བརྒྱུད་ནས་གདམས་ངག་འབའ་ཞིག་ཏུ་ཡོང་། གང་གསུངས་ཐམས་ཅད་བདེན་ཞིང་ངོ་ལྐོག་མེད་ལ། ཟོལ་ཟོག་གི་སླད་དང་གཏན་མི་འགྲོགས་པས་རིན་ཆེན་གསེར་ལྟར་བཙུན་པ་ཁོ་ནར་གནས་པས་མཆོག་དམན་ཐམས་ཅད་ཀྱིས་ཚད་མར་རྩི། མཐོན་པོ་ལ་ངོ་སྲུང་སེམས་འཛིན་དང་། དམན་པ་ལ་བརྙས་བཅོས་ཁྱད་གསོད་མི་མཛད་པར། ཆོས་འགལ་སུས་བྱེད་ཀྱང་། བཅོས་སུ་མི་རུང་བའི་གཤིས་ངན་དུ་གཟིགས་ན་མ་གཏོགས་མཚངས་ནས་རྒོལ་ཞིང་། ཆོས་བཞིན་སྤྱོད་པ་རྣམས་ལ་གཟེངས་བསྟོད་དབུགས་འབྱུངས་མཛད། བསྙེན་པར་དཀའ་བ་ལྟར་སྣང་ཡང་དྲུང་དུ་ཅི་ཙམ་འགྲོགས་ཀྱང་ཕྱོགས་འཛིན་རེ་དོགས་འགྱུར་ལྡོག་འགལ་འཛོལ་སོགས་ཐེངས་གཅིག་ཀྱང་ཡོད་མི་སྲིད་པར་འདྲིས་རྟག་ལ། འགྲོགས་བདེ་བ་ཁོག་ཡངས་ཤིང་ལེགས་ཉེས་ཐམས་ཅད་བཟོད་པའི་ངང་ཚུལ་ཅན་ཡིན་པས་འབྲལ་མི་ཕོད་པ་འབའ་ཞིག་ཏུ་འགྱུར། བསམ་སྤྱོད་གཡོ་སྒྱུ་ཁྲམ་གསུམ་ལ་གོམས་པའི་བྱི་ལའི་བརྟུལ་ཞུགས་ཅན་རྣམས་ལ་གཏིང་ནས་མི་མཉེས་ཤིང་། རྗེ་ཉིད་གཡོ་མེད་དྲང་པོ་གསུངས་པའི་ངང་ཚུལ་ལས་ནམ་ཡང་མི་འདའ་བ་གོང་སྨྲོས་ལྟར་བཞུགས་ཀྱང་ཐུགས་ཀྱི་གཏིང་སུས་ཀྱང་དཔོག་པར་དཀའ་བས་རྒྱ་མཚོ་ལྟར་ཟབ་ཅིང་སྒམ་པའང་ཡིན་པ་དང་། འཇིག་རྟེན་ཡ་རབས་ཀྱི་སྤྱོད་ཚུལ་བཟོ་དང་ལས་ཀྱི་གནས་ཕྲ་མོ་ཡན་ཆད་ཀྱི་རྒྱུས་ཞིབ་མོར་འབྱེད་པའི་བློ་གྲོས་ཀུ་ཤའི་རྩེ་ལྟར་མ་འདྲེས་པ་མངའ་ཡང་། གང་ལའང་ཆེད་འཛིན་རྩིས་གདབ། མི་མཛད་པར་ལྟོས་མེད་བག་ཡངས་སུ་སྤྱོད་པའི་བྱ་བཏང་གི་རྒྱལ་པོར་བཞུགས། རྗེ་ཉིད་ཀྱི་བཀའ་ལས། བརྗོད་གཞི་མེད་པའི་སྟོང་སྐད་བསྟོད་ར་གཅིག །ཕན་པ་མེད་པའི་ཆེ་བཀྱག་བཀུར་སྟི་གཉིས། །རྣམ་སྨིན་ལྕི་བའི་དད་རྫས་འབུལ་ནོར་གསུམ། །སྤངས་ནས་ཁྱི་རྒན་བཞིན་དུ་འཆི་ནུས་ཤོག །ཅེས་ཕེབས་པ་ལྟར་ང་རྒྱལ་དང་ཆེ་ཚུགས་བཤིགས་ཤིང་། གསོལ་ཞལ་དང་འཕྲལ་འཚོ་ཙམ་གྱི་ཟས་གོས་མ་གཏོགས་མངའ་ཐང་གི་གཟི་བྱིན་མཆིལ་མའི་ཐལ་བ་བཞིན་བོར་ཏེ། གདོལ་པའི་བྱིས་པ་སྲང་མདོ་ན་རྒྱུ་བ་ལྟ་བུའི་ཀུན་སྤྱོད་ཀྱིས་བཞུགས་ཀྱང་ཐུགས་བརྟན་ཞིང་སྒམ་ལ་ཆོས་ཀྱི་གཟི་བྱིན་མཚུངས་པ་མེད་པས། ཆེ་བའི་སྟོབས་འབྱོར་གྱིས་དྲེགས་པའི་བླ་དཔོན་ཆེ་དགུ་སོགས་ཀྱང་ཟིལ་གྱིས་མནན་ནས་ཐམས་ཅད་ཀྱིས་གདོང་སྨད་དེ་ཞུམ་ཞིང་འདར་བཞིན་དུ་བཏུད། མདོར་ན་གསེར་ས་འོོག་ཏུ་ཡོད་ན་འོད་ནམ་མཁར་འཕྲོ་བའི་དཔེ་ལྟར་སྐུ་ཚེ་རིལ་པོ་སྦས་པའི་བརྟུལ་ཞུགས་བསྐྱལ་ཡང་། ཅི་མཛད་ཐམས་ཅད་བྱང་ཆུབ་ཀྱི་སྤྱོད་པའི་མཚམས་ལས་མི་འདའ་བའི་ཤུགས་ཀྱིས་གང་ནས་བལྟས་ཀྱང་མཛེས་ཤིང་འཚམ་པ། ཅི་ཙམ་བརྟགས་ཀྱང་དག་ཅིང་གཙང་བ། བསམ་ཤིང་བསམ་ན་དད་པ་འཕེལ་བའི་རྣམ་ཐར་འབའ་ཞིག་ཅན་དུ་བཞུགས་པ་གཟུར་གནས་བློ་གྲོས་དང་ལྡན་པ་ཀུན་གྱིས་མདུན་སར་རླུང་ལྟར་གྲགས་པ་ཡིན་ནོ། །ཤིང་སྤྲེལ་༧༧ལོར་སྐོ་འོར་ནས་བསྙུང་གནས་རྒྱབ་རྫ་དགོན་དུ་ཕེབས་བཞུགས་མཛད། མཚམས་པའི་སྐུ་གདུང་མདུན་བཤགས་རྒྱུད་གསུངས་ཏེ་རྐྱང་ཕྱག་ཐུན་གཉིས་རེ་ལ་རྒྱུན་ཆགས་སུ་ཕུལ། ཉིད་ཀྱི་ཞལ་ནས་སྔ་སོར་དགུང་ལོ་ཤིན་ཏུ་ཉུང་དུས་ཞིག་ནས་བཟུང་སྤྲེལ་ལོ་སྤྲེལ་ཟླའི་ཚེས་བཅུའི་དུས། པདྨ་བཀའ་ཐང་ལས། ཚེས་བཅུ་བྱུང་རེས་ང་ཉིད་བོད་དུ་འོང༔ རླུང་ཁྱེར་རྫས་བཞིན་ཅི་ཡོད་ཚོགས་སུ་ཐོངསཿ ཞེས་གསུངས་པ་ལྟར་སྤྲེལ་ལོ་སྤྲེལ་ཟླ་གཙོ་བོར་གྱུར་པའི་སྤྲེལ་ཟླའི་ཚེས་བཅུ་ཆགས་མ་མྱོང་གསུངས་ནས། ཟླ་བ་འདི་སྟོན་པ་ཐུགས་རྗེ་ཅན་མཛད་ཆེན་ཚེས་བཅོ་ལྔ་ལ་ལྷུམས་སུ་ཞུགས་པ་དང་། ཚེས་བཞི་ལ་ཆོས་ཀྱི་འཁོར་ལོ་བསྐོར་བའི་དུས་ཆེན་དང་ཁྱད་པར་འབྲས་བུ་གསང་སྔགས་རྡོ་རྗེ་ཐེག་པའི་ཉེ་ལམ་ཟབ་མོ་སྟོན་པའི་སླད་དུ་དུས་གསུམ་མཁྱེན་པ་པདྨ་ཀ་ར་ཉིད། ཉེ་སྒྲོལ་ཞེས་པ་ཤིང་སྤྲེལ་ལོའི་སྤྲེལ་ཟླ་ཆུ་སྟོད་ཟླ་བའི་ཚེས་བཅུའི་ཉི་ཤར་དང་པོར་ཨོ་རྒྱན་དྷཱ་ན་ཀོ་ཤའི་མཚོར་ཕ་ཡི་རྒྱུ་ལས་མ་བྱུང་མ་ཡི་རྐྱེན་ལས་མ་བསྐྱེད་པར་རང་བྱུང་པདྨའི་སྡོང་པོའི་ཟེའུ་འབྲུར་རིག་པ་ཐོལ་སྐྱེས་སུ་སྐུ་འཁྲུངས། ཨོ་རྒྱན་གྱི་རྒྱལ་པོ་ཨིནྡྲ་བོ་ངྷིས་སྤྱན་དྲངས་སྲས་སུ་མངའ་གསོལ་ནས་པདྨ་འབྱུང་གནས་སམ། མཚོ་སྐྱེས་རྡོ་རྗེ་ཞེས་མཚན་གསོལ་བའི་དུས་ཆེན་ལ་བབས་ཞེས་གསུངས་ཏེ། ཚོགས་རྫས་ཅུང་ཟད་ཉར་ཚགས་མཛད་ནས་རྫོགས་ཆེན་རིན་པོ་ཆེ་ཐུབ་བསྟན་ཆོས་ཀྱི་རྡོ་རྗེ་རྫ་ཆུ་ཁར་ཕེབས་པ་ཚེས་བཅུར་གདན་དྲངས་པ་ལ་སྤྲེལ་ཟླའི་ཚེས་བཅུ་ཆེན་མོ་ཞེས་ཕྱོགས་ཐམས་ཅད་དུ་གྲགས་པས། སེར་ཤུལ་དགོན་སོགས། དགེ་གསར་རྙིང་གཉིས་ཀའི་བླ་སྤྲུལ་དང་སྐྱ་སེར་སོགས་སྟོང་ལས་ལྷག་པ་ཕེབས་ཏེ་བླ་སེར་རྣམས་ཀྱིས་བླ་མ་རིག་འཛིན་འདུས་པའི་ཚོགས་དང་བླ་མ་མཆོད་པ་སོགས་གསུངས་ཤིང་། གཞན་དག་གིས་ཕྱག་དང་བསྐོར་བ་སོགས་ཉིན་རིང་བྱས། དེ་ཐམས་ཅད་ལ་མང་ཇ་གྲོ་མ་སོགས་དྲངས་པར་མཛད། ཚོགས་རྫས་ཀྱང་སྔ་ཕྱིར་ཀ་ར་བུ་རམ་སོགས་མངར་གསུམ་དང་། ཤ་མར་ཐུད་གསུམ། རྩམ་ཆུར་སོགས་རྒྱ་ཆེ་བ་ཟད་མི་ཤེས་པ་ལྟ་བུར་བྱུང་བ། མི་ཉི་ཤུ་ཙམ་གྱིས་ཚོགས་ཀྱི་ཡོ་བྱད་རྣམས་དེར་འདུས་པ་སྟོང་གཉིས་གསུམ་ཙམ་ཡོད་པར་གྲགས་པ་རྣམས་ལ་རྒྱ་ཆེན་པོས་རབ་ཏུ་མཉེས་པར་བྱས། རིན་པོ་ཆེ་དཔོན་གཡོག་ལ་ཐུགས་དགྱེས་པའི་ཞབས་ཏོག་དང་ཡོན་འབུལ་མཛད། དེའི་ཉིན་མོར་ཆར་བབས་པ་དང་། འབྲུག་གྲགས་པ་འཇའ་འོད་ཀྱི་གུར་ཕུབ་པ་སོགས་དགེ་བའི་ལྟས་མང་པོ་བྱུང་། ལས་དག་པ་འགའ་ཞིག་གིས་དགོང་མོ་ཉི་ཟེར་རི་འགོར་སྡུད་པར་ཉེ་བའི་དུས་འཇའ་འོད་ཀྱི་ཀློང་ནས་གུ་རུ་རིན་པོ་ཆེ་མཇལ་ཟེར་བའང་མང་ཞིག་བྱུང་ངོ་། །དུས་རྒྱུན་དུ་དབྱར་ཆར་ཆུ་འབེབ་པ་ལ་ཐུགས་དགྱེས་པ་དང་། ཁྱད་པར་ཆར་གཅོད་མཁན་རྣམས་ལ་བཀའ་བཀྱོན་མཛད་དེ། དེང་སང་ཆེ་དགུར་རློམ་པ་ཀུན་གྱི་སྙིང་ལ་རྒྱལ་འགོང་གི་ཚང་བཅས་ནས་རྒྱལ་ཁམས་མི་བདེ་བའི་ཐབས་ལ་འབད། དབྱར་གསུམ་ལ་བསིལ་དྲོད་སྙོམས་ཤིང་མེ་ཏོག་བཀྲ་བ་ཅུང་ཟད་སྐྱིད་པར་སྣང་བ་ཙམ་ཡོད་པ་དེ་ཡང་ཐབས་སྣ་ཚོགས་ཀྱིས་མེད་པར་བྱས་ནས་དབྱར་ངོ་ཞག་ཆ་ཤས་འདི་དགུན་དཔྱིད་ལྟ་བུར་བསྒྱུར་དུ་མ་འཇུག་པར་འབྱུང་བའི་འཕོ་འགྱུར་དུས་བཞིའི་རྒྱལ་མོ་ལ་བྱེད་དུ་ཆུག །ཡུལ་འབྲོག་ཀུན་ལ་གནོད་ཚབ་ཆེ་ཞིང་ཉ་སྦལ་ལྕོང་གསུམ་ཡན་ཆད་ཁ་གཏགས་པའི་སྡིག་ལས་ཚབས་པོ་ཆེ་དེ་འདྲ་མ་བྱེད་སོགས་ཆར་གཅོད་པ་པོ་དང་གཅོད་དུ་འཇུག་པ་གཉིས་ཀ་ལ་ཐུགས་མི་དགྱེས་པའི་སྤྲིང་ཡིག་བཀའ་འབུམ་ཁྲོད་ན་བཞུགས། དེ་ནས་མཚམས་པ་བླ་བྲང་གི་ལུང་ཕུར་བྱོན་ནས་ཟླ་བ་དྲུག་ལྷག་ཙམ་དུ་བཞུགས་སྐབས། དཔལ་སྤུངས་བླ་མ་བཀྲ་ཤིས། ཡར་འབྲོག་རྡོ་རྗེ་ཕག་མོ། ཕུ་མ་བུ་ལྷ་དབང་བཀྲ་ཤིས་སོགས་སྡེ་དགེ་མང་པོ་འོང་ནས་དགེ་སྒྲུབ་སྡིག་སྤང་རྒྱ་ཆེར་བྱས་པ་ལ་ཆོས་འབྲེལ་གནང་། ཡང་ཉག་རོང་རྫོང་དཔོན་བོད་པའི་སྐུ་དྲག་སྔ་ཕྱི་གཉིས་དཔོན་གཡོག་མང་པོ་འོངས་ནས་ཞལ་མཇལ་བ་དང་གསུངས་ཐོས་པས་ཡིད་དྲངས་ཏེ་ལུས་ཆས་རྡིལ་ཚད་གཉིས་གསུམ་གྱི་ཚོད་ཕུལ་ཞིང་སྲོག་གཅོད་དང་ཁ་སྣའི་དུད་པ་སྤང་བ་དང་། ཆང་རག་མི་བཏུང་བ་སོགས་དགེ་སྒྲུབ་སྡིག་སྤོང་རྒྱ་ཆེན་བྱས་པར་ཆོས་འབྲེལ་གནང་བ་ལ་དད་ནས་འབྲལ་མི་ཕོད་པ་ལྟ་བུར་གྱུར་ནས་སོང་། ཡང་དེ་སྐབས་ཤིག་ལ། སྤོ་ཀ་ནམ་སྡེ་པ་མ་ཡུམ་སྲས་སྐུ་འཁོར་སོགས་ཀྱིས་སྐྱབས་རྟེན་བསྔོ་ཞུས་སོགས་ཀྱི་ཞུ་ཡིག །ཀོང་པོའི་ནོམ་པ་ཇོ་བོ་རིན་པོ་ཆེའི་ཞལ་གསེར་མང་པོ་བཅས་འོང་། ཡང་ལྕགས་པོ་རིའི་བླ་སྨན་གྲྭ་ཚང་སྤྱི་སྒེར་གྱིས། གིའུ་ཝཾ། ཁ་གུར་དོམ་མཁྲིས་དག་མ་ཇོ་བོའི་ཞལ་གསེར་སོགས་སྐྱབས་རྟེན་མང་པོ་བྱུང་། ཡང་ཉིན་གཅིག་མཚམས་སྤྲུལ་རིན་པོ་ཆེ་གདན་དྲངས་ནས་ཉིན་རིང་བཞུགས་པ་ལ། ཁོང་ནམ་འདས་ཐག་ཆོད་གསུང་དགོས་ཞུས། ལོ་གསུམ་དུ་བཞུགས་གསུངས། ཁོང་འདས་སྐབས། ཉིད་ཐག་རིང་ཐུང་གར་བཞུགས་ཀྱང་བྱོན་དགོས། ཁོང་གི་སྐུ་གདུང་ལ་ཕྱག་གིས་མ་རེག །མཆོད་རྟེན་བཞེངས་དགོས་གསུངས་མི་ཉན་སོགས་ཞལ་ཆེམས་དང་། གཞན་ཞལ་ཏ་མང་པོ་གསུངས་ཀྱང་བརྗེད་སོང་ངོ་། །དགུང་ལོ་དོན་བརྒྱད་པ་ཤིང་བྱའི་ལོ་འགོར་སླར་སྐོ་འོར་དུ་ཕེབས་ནས་བཞུགས། དེ་སྐབས་སྡེ་དགེ་མ་ཡུམ་ཚང་གཉེར་ཕྱག་སོགས་མང་པོས་མཇལ་ཏེ་ཉིན་གཅིག་ལ་བདེ་སྨོན་དང་མ་ཎི་བཀའ་འབུམ་གསུངས། དངུལ་སོགས་འབུལ་བ་རྒྱ་ཆེན་པོ་ཕུལ་ཡང་། ཆོས་བཤད་དེ་དངོས་རྫས་དར་ཁ་ཙམ་ཡང་ལེན་མ་མྱོང་གསུངས་ནས་མ་བཞེས། འདི་ལོར་དགེ་གོང་ལ་ཞིང་སྒྲུབ་གསུངས་སྐབས། ཁྱེད་ཅག་གིས་དད་པ་དང་ལོག་ལྟ་ནོར་འདུག་སྟེ། ཆོས་ལ་མི་རྟོན་གང་ཟག་ལ་རྟོན་པ་ནི་ལོག་ལྟ་ཡིན། དད་པ་དམ་པའི་ཆོས་ལ་ཆེ་བར་མཛོད་ཅེས་ལས་རྒྱུ་འབྲས་ལ་ཡིད་ཆེས་པ་ཡིན། ང་རང་ལས་འབྲས་ལ་ཡིད་ཆེས་པས། ཀུན་མཁྱེན་འཇིགས་མེད་གླིང་པས། གསོན་དད་པས་བྱིན་པའི་ཟང་ཟིང་གི་དངོས་པོ། །གཤིན་འགག་ལ་ཐུག་པའི་ཉེར་སྤྱད་ཀྱི་རྣམ་གྲངས། །འདིར་ཐར་བའི་སྲོག་རྩ་བཙན་ཐབས་སུ་གཅོད་པས། །ཁབ་སྐུད་པར་བརྒྱུས་ལ་མཆོད་སྦྱིན་ལ་ཐོངས་མཛོད། །ཅེས་གསུངས་པ་འདི་ལ་སྐྲག་ནས་དད་ཟས་གཤིན་དཀོར་ཆེ་བ་ནས་ཆུང་བ་ཁབ་དང་སྐུད་པ་ཡན་ཆད་དཀོན་མཆོག་གི་ཞིང་སར་གཏོང་བ་ཡིན་པས་ཁྱེད་ཅག་གིས་ང་རང་ལ་ཁ་མིག་ཡར་ལྟོས་རེ་གྱིས་ལ་ལས་རྒྱུ་འབྲས་ལ་གཟབ་པར་གྱིས་ཞེས་གསུངས་པ་ང་རང་གིས་དབོན་རིན་པོ་ཆེ་ལ་ཞུས་པས། སྔོན་ཆད་ང་རང་ལ་མ་ལྟ་ཞེས་པ་ལས་ང་རང་ལ་ལྟོས་ཞེས་གསུང་མི་དར་བས་ད་ཡུན་རིང་མི་བཞུགས་པའི་རྟགས་རེད་གསུངས། བདེ་སྨོན་གྱི་ཆོས་འཁོར་ཐ་མ་དེ་ཡིན་ནོ། །ཡང་ལྕགས་ལའི་རྒྱལ་པོའི་མ་ཡུམ་གྱི་དགོངས་རྫོགས་དང་སྐྱབས་རྟེན་གསེར་གྱི་ལག་གདུབ་ཕྱེད་པོ་སོགས་ཕུལ་ནས་བཀུར་སྟི་ཆེན་པོའི་ཞུ་ཡིག་ཀྱང་ཕེབས། མདོ་རིན་པོ་ཆེ་དྲི་མེད་གྲགས་པས་གསུང་ཤོག་ནང་ཁང་གི་ལོ་རྒྱུས་ཞིབ་ཆ་དང་། མཇུག་རྩོམ་ནང་། ཞབས་བརྟན་དང་སྤྲུལ་སྐུ་མྱུར་འབྱོན་ལྟ་བུ་གཉིས་ཀ་ཡོད་པའི་ངོ་མཚར་ཅན་ཞིག་དང་། རྒྱ་གར་ཏཾ་ཚེ་བཅུ། རྒྱ་ནག་གི་གོས་ཁུག་ཆ། ཕྱིའི་གླིང་ཕྲན་ནས་བྱུང་བའི་འཇའ་ཤེལ་ངོ་མཚར་ཅན་ཞིག་དང་། ལྕགས་སྙུག་བཅས་ཕུལ་བ་འབྱོར། ཁོང་ཐུགས་རྗེ་མ་ཆུང་གསུངས་ཕྱག་དེང་ཙམ་མཛད། དེ་སྐབས་མཆོག་གྱུར་གླིང་པའི་སྲས་ཆུང་བ་ཚེ་དབང་གྲགས་པ་ཕེབས་ནས། དེ་དང་མཁན་ཀུན་དཔལ་སོགས་གྲྭ་པ་བརྒྱད་དགུ་ལ་ཐོག་འགྲེལ་སྟེང་ནས་སྤྱོད་འཇུག་རྒྱས་པ་སྟོན་འབྲིང་པོ་ནས་མེ་ཁྱི་ཟླ་བ་དང་པོའི་ཕྱེད་ཀྱི་བར་ཟླ་ངོ་དྲུག་ཏུ་གསུངས། དེ་ནས་གཟུགས་སྐུ་མ་གཤེགས་བར་སྐོ་མོ་འོ་ལིར་བཞུགས། སྤྱིར་གནས་རི་རྣམས་ལ་རྩ་དབུ་རྐྱང་རོ་གསུམ་མཚོན་པའི་བརྡའ་རྟགས་སོགས་ཚངས་པ་བཞིན་འདིར་ཡང་དེ་ལྟར་ཚངས་པས་གནས་ཞིག་ཡིན་ཞེས་གསུངས་ཤིང་། བཀའ་དྲིན་ཅན་གྱི་མཚན་སྙན་གྱིས་ཁྱབ་ཚད་ས་ཆ་ཡུལ་རིས་ཀྱི་མིང་ཙམ་མི་ཤེས་པ་ཕལ་ཆེར་ལའང་སྐོ་མོ་འོར་གྱི་མིང་གིས་ཁྱབ་ཅིང་། རྗེ་འདི་ཉིད་དང་པོ་འཁྲུངས་པའི་གནས་དང་། བར་དུ་སྐུ་ཚེའི་སྨད་ཕལ་ཆེར་ཡབ་ཚང་དང་ཉེ་ཕྱིར་སྐོ་འོར་དེར་བཞུགས་པ་དང་། མཐར་དགོངས་པ་ཆོས་ཀྱི་དབྱིངས་སུ་བཞུགས་པའི་གནས་ཀྱང་དེ་ཡིན་པས། དད་གུས་ཅན་གྱི་ཤེས་ལྡན་ཕལ་གྱིས་གནས་འདི་བསམ་ཡས་མཆིམ་ཕུ་དང་། གངས་རི་ཐོད་དཀར་སོགས་དང་མཉམ་མོ་ཞེས་གནས་འབྲེལ་དང་། གནས་མཇལ་བྱེད་པ་མང་དུ་ཡོད་དེ། སྐུ་མ་གཤེགས་པའི་སྔ་སོར་ཞིག་ལ་གསོལ་སྨན་དྲངས་བ་པོ་གླིང་བླའི་དཔོན་པོ་ལྷ་རྗེ་འཇམ་དཔལ་ཟེར་བ་དེས་ལན་གཅིག་ཁོང་གི་ཨ་བུ་ཚང་གི་སྔ་ཕྱིའི་གསུངས་སྒྲོས་གང་ལ་བསམས་ཀྱང་། ངེད་རང་ཚོའི་ཚེ་ཕྱི་མའི་དོན་དུ་སྨོནལམ་འདེབས་ས་དེ། ནུབ་ཕྱོགས་བདེ་བ་ཅན་ཁོ་ན་ལ་མཐིལ་གཏད་ན་དགའམ་ཞུས་པས་ཅུང་ཟད་བཞུགས་ནས། འོ། ཁྱོད་ནུབ། ང་ཤར་རེད་ཅེས་གསུངས་ཤིང་། ཡང་། ནངས་སྔ་མོ་ཞིག་ལ་ངེད་ཚོ་གཞན་ལ་བདེ་སྨོན་བཤད་ཀྱང་། དག་པའི་ཞིང་ཁམས་ཡོན་ཏན་མཐའ་ཡས་པ་དང་། སྨོན་ལམ་བཏབ་ན་སྐྱེ་སླ་བ་གཉིས་འཛོམ་པ་ཞིག་ལ་ཤར་ཕྱོགས་མངོན་པར་དགའ་བ་འགྲན་ཟླ་མེད། དེའི་འོག་ན་བདེ་བ་ཅན་ཁྱད་པར་འཕགས་ཞེས་གསུངས་ལ། ང་རང་གིས་ཀྱང་དེར་སྨོན་ལམ་མང་པོ་འདེབས་མདོག་བྱས་ཀྱང་། ཁྱེད་ཅག་ནི་ཨེ་སྐྱེ་མི་ཤེས། ང་རང་ནི་མི་སྐྱེ་ངོ་མ་རེད། མདང་སུམ་ཚོར་ནགས་དང་ཁང་པ་སོགས་རྨིས་པ་དང་སྐོ་འོར་དུ་སྔ་དུས་བཞིན་བསྡད་ཡོད་པའི་ཉིང་འཁྲུལ་ཁོ་ནས་མཚན་ཐོག་ཐག་ཡོལ་བ་བྱུང་བས་ད་དུང་ཡང་དེར་གཅིག་ཡོང་དགོས་པ་ཡིན་ཞེས་གསུངས། ཡང་ཉིན་གཅིག་རིག་འཛིན་འཇིགས་མེད་གླིང་པས་ཁོང་གཤེགས་དུས་ཁྱེད་པདྨ་འོད་ལ་གཤེགས་རན་ནོ། །ཞེས་བརྗོད་ཅིག་གསུངས་པས་དེ་ཚོ་ལ་དེ་འདྲ་ཞུ་དགོས་ན་གཞན་ལ་སྨོས་ཅི་དགོས་གསུངས། ཞལ་ཉམས་ལ་དེ་སེམས་ལ་འཛིན་དགོས་བསམ་ཡང་རྗེས་སོར་ཞུ་བའི་སྤོབས་པ་མ་བྱུང་། ཡང་རེས་འགའ་ལུང་གི་ཡོན་ཏན་ཡོད་པར་གསུངས་ཏེ་མཁས་པར་ཞལ་གྱིས་བཞེས། རྟོགས་པའི་ཡོན་ཏན་མེད་པར་གསུངས་ནས་འདུལ་བ་ལས་གསུངས་པའི་དེ་བཞིན་གཤེགས་པའི་མཆོད་རྟེན་རྣམས་ཐམས་ཅད་རྫོགས་པ་མི་དབང་ཞེས་གསུངས། བནྡེ་རེའི་སྐྱེ་བ་བླང་ན་ཅི་དོན་ཞེས་སྐྱེ་བའམ་སྤྲུལ་སྐུ་ཡོད་པར་གསུངས། ཞི་བ་ལྷས། ས་རབ་དགའ་བ་ཐོབ་པར་དུ། །
རྟག་ཏུ་ཚེ་རབས་དྲན་པ་དང་། །སོགས་གཅོམ་པ་སྐྱུང་ནས་སོ་སྐྱེ་ཡིན་པར་གསུངས་པ་ལྟར། རྗེ་འདིས་ཀྱང་དེ་ལྟར་གསུངས་སོ། །སྐུ་ན་ཤིན་ཏུ་ཕྲ་བ་ནས་སྐུ་མ་གཤེགས་ཀྱི་བར་དུ་བསྟན་འགྲོར་སྨན་པའི་བཤད་སྒྲུབ་ཀྱི་མཛད་བཟང་བསམ་གྱིས་མི་ཁྱབ་པ་དང་། ཀུན་སྤང་བྱ་བྲལ་གྱི་མཛད་པ་འགྲན་ཟླ་དང་བྲལ་བས་མིང་དོན་མཐུན་པ་འདི་ལྟར་གཤེགས་ཁར་མནབས་རྩགས་རྙིང་པ་གཉིས། ཆོས་གོས་ལྷུང་བཟེད། མནབས་གཟན་སེར་པོ། ཤམ་ཐབ་སྣམ་ནག །
ཞག་བཅའ་བཅུའི་གསོལ་ཆས་ཕྲན་བུ་དང་། རྡོ་རྐོ་ལ་གནང་སྦྱིན་མ་གྲུབ་པ་ཊམ་བཅུ། རྒྱ་དངུལ་སྲང་གསུམ། དར་ཆ་ཤས། བྱམས་ཆོས་ཁྲོ་སྤར་མ། དབུ་མ་རྩ་ཤེས་ཙམ་ལས། གཞན་གུར་སྒ་ཆས། རྟ་ཟོག་སེམས་ཅན་སོགས་ཅུང་ཟད་ཀྱང་མེད་པ་ཀུན་གྱི་མཐོང་ཐོས་སུ་གྱུར་པ་ལགས་ལ། དེ་ལྟ་བུ་རྗེས་འཇུག་རྣམས་ཀྱིས་མིག་ལྟོས་ཞུ་བའི་གནས་འདིར་ནི་བཀའ་དྲིན་ཅན་གྱི་རྣམ་ཐར་གྱི་ནང་ན་ཆེ་ཤོས་ཤིག་ཡིན་ནོ། །སྔ་སོར་སེར་ཤུལ་དགོན་གྱི་དགེ་རྩེ་ལྷ་རམ་པ་ཆེན་པོས་བདག་ཉིད་ཆེན་པོ་འདིའི་མཛད་པ་ཐམས་ཅད་སངས་རྒྱས་ཀྱི་མཛད་པ་ལྟ་བུ་ལས་མེད་པས་དགུང་ལོ་ཡང་སངས་རྒྱས་བཞིན་བརྒྱད་ཅུར་བཞུགས་འགྲོ་ཞེས་ཕྱི་མཐའ་གཟིགས་པའི་གསུངས་གནང་བ་བཞིན་དགུང་ལོ་བརྒྱད་ཅུ་བ་རབ་ཚེས་ཐམས་ཅད་འདུལ་ཞེས་པ་མེ་མོ་ཕག་གི་ལོའི་ས་ག་ཟླ་བའི་ཚེས་བཅུ་གསུམ་ནས་སྐུ་ཁམས་ཅུང་ཟད་རྙོག་ཚུལ་བསྟན་པ་ལ་སྔ་སོར་དང་མི་འདྲ་བར་ཅི་ཞུས་ཀྱང་ཁྱེད་ཅག་ཤེས་གསུང་བས་ཡབ་ཚང་ལ་ཆ་བྱས་ནས་གླིང་བླའི་ལྷ་རྗེ་འཇམ་དཔལ་དྲངས། ཞབས་བརྟན་ཞིག་ཀྱང་ཕུལ། ངེད་རང་རྣམས་ཀྱིས་གནས་བརྟན་ཕྱག་མཆོད་ཞིག་བཏོན། ད་ནང་གནས་བརྟན་ཕྱག་མཆོད་འདོན་དགོས་ཟེར་མི་སུ་རེད་གསུངས། ངེད་རང་རྣམས་ཀྱིས་རང་གར་བཏོན་པ་ཡིན་ཞུས། དེ་དུས་ང་རང་གཉིད་མེད་སྣང་ཤར་ཡང་སད་རྒྱུ་ཞིག་འདུག །ཁྱེད་ཅག་གིས། འཕགས་པའི་གནས་བརྟན་ཡན་ལག་འབྱུང་། ཞེས་པའི་ཚིགས་མཚམས་ལ་བབ། ང་རང་གི་རྣ་ལམ་ན་ཁྱོད་ཀྱི་འགྲོ་དོན་ཤར་ཕྱོགས་ན་ཡོད་ཅེས་གྲགས་ཤིང་། དེ་མིན་འགའ་ཞིག་ཀྱང་གྲགས་གསུངས། ཅི་ཡིན་ན་ཞུས། ཇི་ག་ཡིན་ནི་གསུངས། དེ་ལ་སོགས་པ་མ་འོངས་ལུང་བསྟན་སོགས་གཟིགས་སྣང་གི་འཆར་སྒོ་མཐའ་ཡས་པའི་གསུང་གིས་དབྱིབས་དོད་ཀྱང་སྔར་དུས་དེ་འདྲ་ཞུ་བ་ལ་མི་མཉེས་པའི་དབང་གིས་ཞུ་མ་སྤོབས། བཅུ་བདུན་ཉིན་གསོལ་ཚིགས་མཛད། བཤགས་རྒྱུད་གསུངས་ཏེ་རྐྱང་ཕྱག་ཆ་ཤས་ཕུལ། རྩ་རླུང་གི་ཡན་ལག་ལྔ་སྦྱངས་དང་། སྙིང་གི་རྩ་མདུད་གྲོལ་བའི་འཁྲུལ་འཁོར་ཞིག་མཛད། ཚེས་བཅོ་བརྒྱད་ཉིན། སྔ་མོ་ཞོག་ཇ་གསོལ། དེའི་ཉི་དྲོས་ཀྱི་ཆ་ལ་གཟིམས་མལ་ནས་བཞེངས། སྐུ་གཅེར་བུར་མཛད་དེ་ཞབས་སྐྱིལ་ཀྲུང་། ཕྱག་གཉིས་པུས་མོར་བགབ། ང་རང་གིས་ན་བཟའ་གསོལ་ནས་ཅི་ཡང་མི་གསུངས་པར་བཞུགས། ཀུན་རྒྱམ་དང་། ལྷ་རྗེ། ངེད་རང་གསུམ་དེ་གར་བསྡད། རེ་ཞིག་ནས། སྤྱན་གཉིས་ལྟ་སྟངས་དང་། ཕྱག་གཉིས་སེ་གོལ་ཞིག་མཛད་དེ་ན་བཟའ་ནང་མཉམ་བཞག་མཛད་ནས། ཀ་དག་གདོད་མའི་གཞི་དབྱིངས་ནང་གསལ་ཆེན་པོར་རེ་ཞིག་བཞུགས་སོ་ཞེས་ཨ་མཆོད་གསུངས། དེ་ཉིན་ཡབ་ཚང་ནས་དགེ་དཔོན་རིན་པོ་ཆེ་ཕེབས་པར་ཞུས་པ་བཞིན་རྔ་དགོན་ནས་ཕེབས་སྐབས། གཞན་རྣམས་ལ་རེ་ཞིག་མ་འོང་གསུང་། ང་རང་དཔལ་ཤུ་བླ་མ་ཚེས་ལི་གཉིས་ལ་ཁྱེད་གཉིས་ཀྱིས་ཁོང་གི་བཅའ་ལག་ཁྱེར་ནས་ཤོག་གསུངས་པ་བཞིན་སོང་ནས་ཐབ་བཟུང་བ་དང་། མཁན་ཡོན་ཏན་རྒྱ་མཚོ་ཡང་བྱོན། མཚམས་སྤྲུལ་རིན་པོ་ཆེ་དྲངས་མི་གཉིས་མངག་པ་ན་སྔར་ཞུས་བཞིན་མཁྱེན་ནས་ཨ་སེའི་ནང་ནས་ཡར་ཕེབབས་པ་དང་འཕྲད་ནས་ཉི་ཤུ་ཐམ་པ་ཉིན་ཕེབས་ཏེ་ཐུགས་དམ་དཀྲོགས། དཔོན་རིན་པོ་ཆེའི་བཀའ་བཞིན་ངེད་ཅག་རྣམས་ཀྱིས་གདུང་ཆས་ཕུལ་ཏེ་མར་མེ་སོགས་མཆོད་ཚོགས་དང་བཅས་ཏེ་བཤམས་ཤིང་མཇལ་དུ་གནང་། དེ་ནས་མཚམས་སྤྲུལ་རིན་པོ་ཆེ་དང་། གླིང་བླ་དཔོན་གཡོག །དཔོན་རིན་པོ་རྣམས་ཀྱི་གཙོའི་བླ་གྲྭ་མང་པོ་ངེད་རང་གཉིས་བཅས་ཀྱི་ཉེར་ལྔའི་བར་ན་རག་དོང་སྤྲུགས་ཀྱིས་གདུང་མཆོད་ཕུལ། དེའི་རིང་ལ་ཐག་ཉེ་སྐོར་གྱི་དགེ་གསར་རྙིང་གི་དགོན་སྡེ་རྣམས་ཀྱི་མཁན་སྤྲུལ་བླ་གྲྭ་མང་དུ་བྱོན་ཏེ་བླ་མ་མཆོད་པ་སོགས་གསུང་ནས་མཆོད་པ་རྒྱ་ཆེར་ཕུལ་ཞིང་བསྟན་འགྲོ་ལ་སྨན་པའི་བཤད་སྒྲུབ་ཀྱི་མཛད་བཟང་ཐུགས་དམན་དང་ལེན་གྱི་ཞལ་བཞེས་རྒྱ་ཆེར་མཛད་པ་དང་། གཞན་དད་ལྡན་གྱི་སྐྱེ་བོ་སྟོང་ཕྲག་གཉིས་ཙམ་འོང་བ་ལ་ན་བཟའ་ཕྲན་བུ་རེ་དད་རྟེན་དུ་བྱིན་ཞིང་དགེ་སྒྲུབ་སྡིག་སྤང་སོགས་ཁས་ལེན་དམ་བཅའ་རྒྱ་ཆེ་བ་བྱུང་། དེར་གནས་རིང་ལ་ཆགས་སྡང་མེད་པར། སྐྱོ་ཤེས་དང་། ངེས་འབྱུང་གིས་ཉིན་མཚན་དགེ་བས་དུས་འདའ་བར་བྱུང་ངོ་། །ཉེར་ལྔའི་ཉིན་སྐུ་གདུང་རིན་པོ་ཆེ་ཞུགས་འབུལ་བགྱིས་ཏེ་གདུང་ཁང་གི་སྒོ་བསྡམ་ཏེ་བསྲུང་མི་བཞག །དེ་ཚེ་ནམ་མཁའ་དྭངས་ཤིང་འཇའ་འོད་ཀྱིས་ཁེངས་པ་སོགས་རྟགས་མཚན་བཟང་པོ་ཀུན་གྱིས་མཐོང་བར་གྱུར་ཏོ། །རྗེ་བླ་མའི་ཐུགས་བསྐྱེད་ཀྱིས་ཆར་ཆེ་ཞིང་དབྱར་དཀྱིལ་ལྟར་རྩི་ཤིང་མེ་ཏོག་སོགས་བཀྲ་ཞིང་། རྫ་ཆུ་ཡང་ཤིན་ཏུ་རྒྱས་པ་ལ། རྒན་བྱིས་བུད་མེད་སོགས་ཀྱིས་ཚམ་ཚོམ་མེད་པར་བརྒལ་ཡང་ཆུའི་འཇིགས་པ་མ་བྱུང་བ་ནི་ཁོང་གི་ཐུགས་རྗེ་རེད་ཅེས་ཀུན་གྱིས་གླེང་བ་བཞིན་ངེས་པ་ཡིན། ཕྱིས་སུ་ཐན་པ་ཆེན་པོ་ཇི་ལྟར་བྱུང་ཡང་དུས་མཆོད་དུས་ཆར་མི་འབབ་པ་མི་སྲིད་པ་ཡང་ཐུགས་བསྐྱེད་ལས་སོ། །རྫ་སྨད་དུ་སྤྲུལ་སྐུ་མི་ར་ཚང་དགེ་བསྐུལ་དུ་བྱོན་པས་གསན་ནས་ཕེབས་ཏེ་ཐུགས་ཡུས་ཀྱིས་བཤུམས་ཤིང་གཟིམས་ཚང་ནང་ནས་དར་ཅིག་བརྒྱལ། དེ་སངས་པ་དང་། ཨ་ཙེ་ངས། ཁྱེད་འདིར་བཞུགས་མེད་བསམ་གསུངས། དེ་ཕྱིན་ཐུགས་སྡུག་མེད་པར་བཞུགས་པ་ལ་དབོན་རིན་པོ་ཆེས་ཞལ་གཟིགས་ནས་ཐུགས་རྒྱུད་ཀྱི་རྟོགས་པ་འཕོས་པ་རེད་གསུངས། ཉེར་བརྒྱད་ཉིན་གདུང་རུས་བསྡུས་ཤིང་གཟིམས་ཚང་སོགས་ལྷག་མ་མེད་པར་ཡབ་ཚང་དུ་གདན་དྲངས་ནས། དབོན་རིན་པོ་ཆེ་དང་། སྤྲུལ་སྐུ་མི་ར་ཚང་། མཁན་ཡོན་ཏན་རྒྱ་མཚོ། སྐུ་ཚབ་བསམ་ལི། ངེད་རྣམས་ཀྱིས་ཆོ་ག་བཞིན་དུ་གདུང་ཚ་མང་དུ་བཏབ་པ་གསེར་གྱིས་བྱུག་སྟེ་བསྒྲུབས་པར་བྱས། དགོངས་རྫོགས་སུ་སྔ་ཕྱིར་བླ་ཆེན་མང་དུ་དྲངས་པ་དང་། བླ་གྲྭ་བརྒྱ་ཕྲག་ལྷག་ཙམ་གྱིས་ཚོགས་ཆེན་སོགས་གཤེགས་རྗེས་ཀྱི་བྱ་བ་རྣམས་མཐར་རྒྱས་དང་། གདུང་རྟེན་ཡང་དེའི་སྟོན་སོར་དབོན་སྤྲུལ་རྣམ་གཉིས་ཀྱིས། དཔལ་དགེའི་རྡོ་འབུམ་རྩར་ཕྱོགས་རེར་འདོམས་ལྔ་རེ་ཡོད་པའི་ཁང་བུ་བརྩེགས་པའི་མཆོད་རྟེན་ཚད་ལྡན་གདུང་ཚྭ་གཙོ་བོར་གྱུར་པའི་ཟུང་འཇུག་བྱིན་ལྡན་དགོས་རིགས་མ་ཚང་བ་མེད་པ་ཆོ་ག་རྣམ་པར་དག་པས་གཟུངས་སྒྲུབ་དང་གཟུངས་འབུམ་ཕྱག་ལེན་མ་འཁྲུལ་བས་གཏམས་ཤིང་རབ་ཏུ་གནས་པ་བཅས་འབྲེལ་ཚད་དོན་ལྡན་གྱི་གདུང་རྟེན་སྦྱོར་དངོས་རྗེས་གསུམ་འཁྲུལ་བ་མེད་པས་འདི་བཞིན་ལེགས་པར་གྲུབ། མདོ་སྡེ་སྐལ་པ་བཟང་པོ་ལས། སྐུ་གདུང་ནི་རྒྱས་པར་འགྱུར་རོ། །ཞེས་གསུངས་པ་ལྟར། མུ་རའི་མ་ཎིའི་རྡོ་མཁར་རྩར་ཡང་། ཚད་དང་བཀོད་པ་སོགས་སྔ་མ་དང་མཚུངས་པའི་གདུང་རྟེན་མུ་ར་རིན་པོ་ཆེས་བཞེངས་པ་དང་། ཕྱིས་སུ་ཁོ་བོ་ལ་ཞབས་མཐེབ་ཀྱི་སེན་མོ་མཐེབ་མགོ་ཙམ་ཡོད་པ་ཆབ་མདོའི་ཡབ་ཚང་བློ་བཟང་བདེ་ཆེན་གྱིས་ཁང་བརྩེགས་མཆོད་རྟེན་ཕྱོགས་རེར་འདོམས་དགུ་རེ་ཡོད་པ་གཟུངས་འཇུག་ཚད་ལྡན་དང་། སཙྪ་འབུམ་གཉིས་ལྷག་པས་གཏམ་པ་ཆབ་མདོའི་དགོན་ཉེར་ཕྱོགས་བཞེངས་རྒྱུ་དང་། ནས་ཁལ་ཞེ་ཐམ་འགྲོ་བའི་ཞིང་ས་ཚེ་ཐར་བྱས་ཏེ་ས་རྒོད་དུ་བཞག་པའི་ཁས་ལེན་བྱས་པ་ལ་བྱིན་པ་སོགས་གདུང་རྟེན་ཆེ་ཆུང་ལྔ་བརྒྱ་ཙམ་ཕྱོགས་དང་ཕྱོགས་སུ་རྒྱས་པར་གྱུར་ཏོ། །ཟངས་གསེར་ལས་གྲུབ་པའི་གདུང་རྟེན་ཡང་ཆ་ཤས་བྱུང་ངོ་། །བདག་ཉིད་ཆེན་པོ་འདིའི་ཐེག་མཆོག་ཆོས་ཀྱི་དགའ་སྟོན་མྱོང་བའི་སློབ་ཚོགས་བགྲང་ལས་འདས་པ་བྱུང་བའི་ནང་ནས་ཞལ་སློབ་གཙོ་བོ། རྫོགས་སྤྲུལ་བཞི་པ་མི་འགྱུར་ནམ་མཁའི་རྡོ་རྗེ་དང་། ལྔ་པ་ཐུབ་བསྟན་ཆོས་ཀྱི་རྡོ་རྗེ། མཚམས་སྤྲུལ་ཀུན་བཟང་བདེ་ཆེན་རྡོ་རྗེ། དགེ་མང་སྐྱབས་མགོན་ཡང་སྲིད་གཞན་ཕན་ཆོས་ཀྱི་སྣང་བ། སེར་ཤུལ་ལྷ་རམ་པ་དགེ་བཤེས་ཐུབ་བསྟན། ཨ་མྱེའི་གསེར་ཁྲི་རིན་པོ་ཆེ། ལྷ་རམ་པ་དགེ་ལེགས་དར་རྒྱས། ཇོའི་ཁྲི་ཆེན་བློ་བཟང་རྣམ་རྒྱལ། ཨོན་པོའི་བླ་མ་བློ་བཟང་འགྱུར་མེད། གླིང་སྤྲུལ་ཐུབ་བསྟན་རྒྱལ་མཚན། རྒྱ་རོང་ནམ་སྤྲུལ་ཀུན་བཟང་ཐེག་མཆོག་རྡོ་རྗེ། མཁན་པདྨ་རྡོ་རྗེ། རྡོ་གྲུབ་ཡང་སྲིད་འཇིགས་མེད་ཕུན་ཚོགས་འབྱུང་གནས་དང་དྲི་མེད་གྲགས་པ་རྣམ་གཉིས། སྐུ་ཞབས་མཁྱེན་བརྩེའི་སྲས་བདེ་ཆེན་རིག་པའི་རལ་གྲི། རྡོ་གྲུབ་ཡང་སྲིད་གསུམ་པ་འཇིགས་མེད་བསྟན་པའི་ཉི་མ། ཨ་འཛོམ་འབྲུག་སྤྲུལ་འགྲོ་འདུལ་དཔའ་བོ་རྡོ་རྗེ། སྤྲུལ་པའི་གཏེར་སྟོན་ལས་རབ་གླིང་པ། ཀཿཐོག་སི་ཏུ་མཆོག་སྤྲུལ་ཆོས་ཀྱི་བློ་གྲོས། དཔལ་སྤུངས་བླ་མ་བཀྲ་ཤིས་འོད་ཟེར། འབའ་ཕུག་སྤྲུལ་སྐུ་ཆོས་དཔལ་རྒྱ་མཚོ། གནས་གནང་དཔའ་བོ་གཙུག་ལག་ཕྲེང་བའི་ཡང་སྲིད་དང་། ཡར་འབྲོག་རྡོ་རྗེ་ཕག་མོ། གཏེར་སྲས་ཚེ་དབང་གྲགས་པ་སོགས་བགྲང་གིས་མི་ལང་བ་ཡོད་ཀྱང་། ཁྱད་པར་དུ་དམ་པའི་ཆོས་འཆད་ཉན་གྱི་ཕྲིན་ལས་ལྷག་པར་སྐྱོང་བའི་སློབ་མ་ནི། དགེ་མང་རྗེ་དཔོན་བསྟན་འཛིན་ནོར་བུ། མུ་ར་སྤྲུལ་སྐུ་པདྨ་བདེ་ཆེན་བཟང་པོ། མཁས་གྲུབ་ཆེན་པོ་མི་ཕམ་རྣམ་རྒྱལ། རྟོགས་ལྡན་དམ་པ་ལུང་རྟོགས་འཕེལ་རྒྱས་བཟང་པོ། མཁན་ཡོན་ཏན་རྒྱ་མཚོ་སོགས། ཞེ་རྫོགས་ཀཿདཔལ། དཔལ་སྤུངས། སྡེ་དགེའི་དགོན་ཆེན། རེ་སྐོང་སོགས་ས་དགེ་བཀའ་སྙིང་གི་སྤྲུལ་པའི་སྐུ་མཆོག་ཆེན་པོ། གཞུང་ལུགས་རབ་འབྱམས་སྨྲ་བའི་མཁས་པ། བསླབ་པ་གསུམ་ལྡན་གྱི་མཁན་པོ། རིམ་གཉིས་ཀྱི་རྣལ་འབྱོར་ལྡན་པའི་སྔགས་པ། ཚེ་བློས་བཏང་གི་བྱ་བྲལ་རྣམས་དང་། ས་སྐྱོང་སྡེ་དགེ་དང་། གླིང་ཚང་རྒྱལ་པོའི་གཙོས་རྒྱ་བོད་ཧོར་སོག་རྣམས་ཀྱི་རྒྱལ་བློན་ཆེ་དགུ། ཧོར་ལྭ་ཀར་ཚང་སོགས་འབྱོར་ལྡན་བསྟན་པའི་སྦྱིན་བདག་རྣམས་ཀྱིས་མཚོན་ཏེ་ཐུགས་བརྩེ་བས་བཟུང་པ་བགྲང་པ་ལས་འདས་ཤིང་གཞལ་དུ་མ་མཆིས་སོ། །དེ་དག་གི་དྲིན་ལས་མཚུངས་བྲལ་རྗེ་བཙུན་མཆོག་གི་རྣམ་དཀར་ཕྲིན་ལས་ཀྱི་འོད་སྣང་དབྱིག་འཛིན་ཡངས་པའི་རྒྱན་དུ་ད་ལྟ་ནའང་གནས་བཞིན་པ་སྟེ། ད་དུང་ཡང་སྐལ་བཟང་སྒྲོན་མེ་ལྔ་པའི་ཉིན་བྱེད་འཆར་ཀའི་འོད་དམར་སྤྲོ་བ་ལ་ཕྱོགས་པའི་བར་དུ་འཕེལ་རྒྱས་འབྱུང་བར་གྱུར་ཅིག་གུ། རྒྱལ་ཀུན་འདུས་ཞལ་བཀའ་དྲིན་ཅན་གྱི་དུས་དྲན་གདུང་མཆོད་ལ། ཡབ་ཚང་ནས་ལོ་མང་རབས་བླ་མ་མཆོད་པ་ཉིན་གཅིག་གཉིས་ལ་མ་ཆགས་པ་དང་། དགེ་གོང་འདུས་སྡེ་ཞི་བ་ཚོགས་ཀྱིས་ཀློང་སྙིང་བླ་མ་མཆོད་པ་རྒྱས་སྤྲོས་ཉིན་གཉིས་ད་ལྟའི་བར་དུ་ཆགས་མེད་དང་། རྫ་རྒྱལ་དགོན་དང་བ་ཐུར་དགོན་གཉིས་ནས་ཞི་ཁྲོ་ན་རག་དོང་སྤྲུགས་ཀྱི་སྒྲུབ་མཆོད། བདག་ཐུག་སྦྱིན་སྲེག་བཅས་བླ་གྲྭ་ཞིབ་ཚོགས་ཀྱིས་ཉིན་གསུམ་རེར་མི་ཆགས་པ་དང་། དགེ་མང་དགོན་ནས་དཔོན་རིན་པོ་ཆེས་སྒྲུབ་མཆོད་ཀྱི་ཚོགས་རྟེན་དང་ཕྱག་བཞེས་གནང་བ་བཞིན་བླ་གྲྭ་ཞིབ་ཚོགས་ཀྱིས་དོང་སྤྲུགས་ཀྱི་སྒྲུབ་མཆོད་བདག་འཇུག་སྦྱིན་སྲེག་བཅས་ཉིན་བཞི་ཆགས་མེད་དང་། སེར་ཤུལ་དགོན་དུའང་གསར་ལུགས་ཀྱི་བླ་མ་མཆོད་པ་ཉིན་ཆོ་ག་རེ་དང་མར་མེ་སྟོང་མཆོད་རེ་མི་ཆགས་རྒྱུའི་སྤྱི་ཐེབས་ཡབ་ཚང་རྒྱལ་ཏོག་དང་། དཔོན་མགོན་རབ་གཉིས་ཀྱིས་བཞག་པ་བཞིན་ཆད་པ་མེད་པར་གནས་ཤིང་། དེ་དག་ལ་བརྟེན་ནས་དད་ལྡན་གྱི་གང་ཟག་རྣམས་ཀྱིས་དཔལ་སྤྲུལ་རིན་པོ་ཆེའམ་བཀའ་དྲིན་ཅན་ཞེས་གསོལ་འདེབས་སོགས་ལ་བརྩོན་པས་བར་ཆད་ཞི་ཞིང་མཐུན་རྐྱེན་འགྲུབ་པས་ཕྱག་མཆོད་སོགས་ལ་བརྩོན་པ་ཤིན་ཏུ་མང་པོ་ད་ལྟའི་བར་དུ་དར་ཞིང་རྒྱས་པ་དང་། ཕྱིས་ཀྱང་སྲིད་མཐའི་བར་དུ་དར་ཞིང་རྒྱས་པར་སྨོན་ནོ། །དེ་དག་ཐུན་མོང་སྤྱིའི་རྣམ་ཐར་གྱི་ས་བོན་ཙམ་སྟེ་ནང་དང་གསང་བའི་རྣམ་ཐར་ཚུར་མཐོང་གི་ཡུལ་ལས་འདས་པས་འདིར་སྨྲོས་པ་མེད་དོ། །མདོར་ན་བདག་ཉིད་ཆེན་པོ་འདི་ཉིད་གསར་རྙིང་རིས་མེད་ལ་མཁས་ཤིང་གྲུབ་པའི་རྣམ་ཐར་རྩོད་མེད་དུ་གནས་པ་ནི་རྒྱལ་ཁམས་ཀུན་ཏུ་གྲགས་ཤིང་གྲུབ་མོད། ཡང་དག་པའི་དོན་དུ་རྗེ་འདི་ཉིད་འཇམ་པའི་དབྱངས་དང་། སྤྱན་རས་གཟིགས། གསང་བའི་བདག་པོ་སོགས་དང་དགོངས་སྤྱོད་དབྱེར་མེད་ཕྱིར་ལྷའི་ཞལ་གཟིགས་དང་གྲུབ་པའི་ཆོ་འཕྲུལ་མཛད་ཚུལ་སོགས་བདག་ཉིད་ཆེན་པོ་འདི་ལྟ་བུ་ལ་ཡ་མཚན་དུ་རྩི་བའི་འོས་མ་ཡིན་མོད་ཀྱང་། གདུལ་བྱ་ཐུན་མོང་པ་དག་གི་ངོར་གནས་གང་དུ་འཁྲུངས། སྐུ་ཚེ་ཇི་ཙམ་གཞེས། མཛད་པ་ཇི་ཞིག་བསྟན་པ་རྣམས་མ་སྨྲོས་ན་བློ་ཚིམ་པར་མི་འགྱུར་བས་འདིར་རང་གཞན་གྱི་མཐོང་ཐོས་སྒྲོ་སྐུར་དང་བྲལ་བར་བཀོད་པ་ཡིན་ནོ། །དེ་ལྟར་བུའི་རྣམ་ཐར་མཆོག་དང་ལྡན་པའི་ཟབ་རྒྱས་ཆོས་ཀྱི་བདུད་རྩི་མི་ཟད་རིན་པོ་ཆེའི་གཏེར་བཞིན་འཇོ་བས་སྐལ་ལྡན་སྐྱེ་བོའི་རེ་བ་ཡོང་སུ་སྐོང་བར་མཛད་པ་པོ་ཨོ་རྒྱན་འཇིགས་མེད་ཆོས་ཀྱི་དབང་པོ་ཉིད་ལ་བཀའ་དྲིན་རྗེས་སུ་དྲན་པའི་ཕྱག་འཚལ་བ་གསང་བ་གསུམ་གྱི་ཡོན་ཏན་ལ་བསྔགས་པ། རྗེས་དྲན་བསྟོད་སྨོན་རྗེ་བཙུན་བླ་མ་འཇམ་དབྱངས་མཁྱེན་བརྩེའི་དབང་བོའི་ཞལ་སྔ་ནས་སྩལ་བ་འདིས་མཐའ་རྟེན་པར་བྱས་པའི་རྗེ་བླ་མ་མི་ཕམ་ཆོས་རྗེས་བཀའ་འབུམ་གྱི་མཐར་རྟེན་དུ་བཞག་པ་ནི་དོན་གྱི་རྣམ་ཐར་ཡིན་པར་གཟིགས་པས་ཡིན་ནོ། །འདིར་སྨྲས་པ། མཁའ་ཁྱབ་ཞིང་གི་ཕན་བདེ་ཇི་སྙེད་པའི། །སྤྲོ་བསྡུའི་བྱེད་པོ་དཀོན་མཆོག་རྩ་གསུམ་ཉིད། །གདོད་མའི་མགོན་དང་རྣམ་དབྱེར་མ་མཆིས་པའི། །ཁྱབ་བདག་བླ་མ་དང་པོའི་སངས་རྒྱས་དངོས། །
༡གང་གི་སྒྱུ་འཕྲུལ་དྲ་བའི་རོལ་མོ་ལས། །གང་འདུལ་སྤྲུལ་པའི་རྣམ་ཐར་བསམ་ཡས་ཀྱང་། །
གཅིག་ལ་ཀུན་རྫོགས་ཀུན་ལ་གཅིག་འདུས་པས། །མ་འདྲེས་ཡོངས་རྫོགས་ཀུན་བཟང་ཆོས་ཀྱི་སྐུ། །༢ཕྱོགས་དུས་རྒྱལ་བའི་ཡོན་ཏན་རྒྱ་མཚོའི་དཔྱིད། །ཀུན་མཁྱེན་བླ་མའི་གསང་གསུམ་ལས་གཞན་དུ། །མ་དམིགས་མི་དམིགས་དམིགས་པར་མི་འགྱུར་བས། །ཆོས་ཀྱི་དབང་པོའི་རྣམ་ཐར་བསམ་མི་ཁྱབ། །༣དེ་ཕྱིར་གང་ཞིག་མཆོད་བསྟོད་བསྒྲུབས་པས་ཀྱང་། །
རྒྱལ་བའི་དཀྱིལ་འཁོར་མ་ལུས་མཆོད་ཅིང་བསྟོད། །ཚུལ་འདི་གཟིགས་པའི་ཕྲིན་ལས་མཆོག་སྦྱིན་པ། །ཀུན་མཁྱེན་བླ་མའི་རྣམ་འཕྲུལ་ལས་གཞན་སུ། །༤གང་མཚན་དྲན་པ་ཙམ་གྱིས་སྲིད་ཞིའི་སྨག །དྲུང་འབྱིན་ཡེ་ཤེས་ཉི་མ་ཆེན་པོའི་དཔལ། །མཐོང་ཐོས་དྲན་རེག་འབྲེལ་ཚད་དོན་ལྡན་པའི། །རྣམ་ཐར་མཆོག་འདི་བླ་མའི་དྲིན་གྱིས་སྤྲོས། །༥རང་མཐོང་ཕྱོགས་ཞེན་དུག་གིས་མ་བསླད་པར། །དམ་པ་དག་གིས་ཇི་ལྟར་གསུངས་པ་བཞིན། ཕྱོགས་མཐུན་སྡེབ་ལ་དཀྱུས་བཞིན་བཀོད་པ་ལས། །རྙེད་དང་གྲགས་པའི་སྙེམས་པ་མེད་སྙམ་ཡང་། །༦མ་རྟོག་ལོག་པར་རྟོག་པའི་གཞན་དབང་གིས། །མ་ཚངས་མི་དགོས་འགལ་འདུ་ཅི་རིགས་པའི། །
ནོངས་པ་གང་མཆིས་རྩ་གསུམ་བླ་མར་འཆག །འདི་ཕྱིའི་སྒྲིབ་པར་མི་འགྱུར་དག་ཚངས་སྩོལ། །༧དགེ་བ་འདིས་མཚོན་བདག་གཞན་དུས་གསུམ་གྱི། །དགེ་ཚོགས་ཇི་སྙེད་བསྟན་འགྲོར་སྨན་པའི་ཕྱིར། །སྲས་བཅས་རྒྱལ་བས་ཡོངས་བསྔོ་ཇི་བཞིན་དུ། །བསྔོས་པས་མཐུན་འགྱུར་རྩ་གསུམ་བླ་མར་ཞུ། །༨བསྟན་འཛིན་ཞབས་བརྟན་བསྟན་པ་དར་རྒྱས་ཤིང་། སྐྱེ་དགུ་བདེ་ཞིང་ནད་མུག་མཚོན་འཁྲུག་སོགས། །མི་མཐུན་དུས་ཀྱི་རྒུད་པ་ཇི་སྙེད་པ། །འཇིག་རྟེན་ཁམས་སུ་གྲགས་པར་མ་གྱུར་ཅིག །༩ཐུབ་བསྟན་མཛེས་རྒྱན་ཀུན་མཁྱེན་ཡབ་སྲས་དང་། །
བཤད་སྒྲུབ་བསྟན་པའི་མངའ་བདག་ཆོས་ཀྱི་དབང་། །མཚུངས་མེད་བླ་མའི་བསྟན་པ་སྲིད་མཐའི་བར། །མཁའ་ཁྱབ་ཞིང་དུ་འཛིན་ཞིང་སྤེལ་གྱུར་ཅིག །༡༠ཅེས་པའང་ཀུན་མཁྱེན་འཇམ་དབྱངས་མཁྱེན་བརྩེའི་ཡང་སྤྲུལ་མཚུངས་པ་མེད་པ་འཁོར་ལོའི་མ གོན་པོ་མཚན་བརྗོད་པར་དཀའ་བ་ཀུན་གཟིགས་ཆོས་ཀྱི་བློ་གྲོས་ཞེས་སྙན་ པའི་བ་དན་སྲིད་པར་ཡོངས་སུ་གྲགས་པ་དེ་ཉིད་ཀྱི་ཞལ་སྔ་ནས་སྔ་ཕྱི་དུ་མར་བསྟན་འགྲོ་སྤྱི་དང་བྱེ་བྲག་ལ་སྲིད་མཐའི་བར་དུ་ཕན་བདེའི་སྐལ་བཟང་མི་ཉམས་པར་སྤེལ་བའི་ཐུགས་བསྐྱེད་འགྲན་ཟླ་དང་བྲལ་བས། དཔལ་སྤྲུལ་རིན་པོ་ཆེའི་རྣམ་ཐར་རྩོམ་དགོས་ཀྱི་བཀའ་ལུང་གསེར་གྱི་ཅོད་པན་རྟེན་བཅས་སྤྱི་བོར་གནང་བ་ཡིད་ལ་བསྐྱེད་པ་མེད་ཀྱང་། རང་ན་ཚོད་ཤིན་ཏུ་རྒས་ཤིང་བློ་མིག་མི་གསལ་བ་དང་། འཁོས་སྟབས་ཞན་པས་རྣམ་ཐར་ལ་ཕན་པའི་ཡིག་ཆ་མ་མཐོང་བ་དང་། གྲུབ་ཆེན་རིན་པོ་ཆེས་མཛད་པའི་རྣམ་ཐར་དང་། ཨ་མཆོད་བསོད་ཚེས་ཕྱིས་སུ་རང་གཞན་མཐོང་ཐོས་སོགས་ཀྱི་ཟིན་བྲིས་ཀྱང་ད་ལོ་ལས་རང་གི་ལག་ཁར་མ་འབྱོར་པས་ཅི་བྱ་གཏོལ་མེད་ལས་གང་གསུང་ལྟོས་མེད་དུ་མ་བྱས། ད་ལོ་ལག་ཁར་འབྱོར་འཕྲལ་དམ་པ་དེ་གཉིས་ཀྱིས་སྣོན་ཕྲི་བགྱིད་པར་བཀའ་གནང་སྩལ་བ་བཅས། རང་བློ་ཤིན་ཏུ་རྨོངས་ཤིང་མིག་མི་གསལ་བས་སྤྱན་ཚབ་ལ་བསྟེན་ནས་འབྲི་བའི་ཁུར་དང་དུ་བླ ང་བ་ལ་དགེ་མང་མཁན་དམ་པ་བསོད་ནམས་རྡོ་རྗེས་ཀྱང་རྗེས་བསྐུལ་དང་ལེགས་པས་དབུགས་དབྱུང་དར་དང་རིན་ཆེན་དང་པོ་སྩལ་ཞིང་། ཉེ་གནས་དམ་པ་རིས་ལྷ་ནས་ཀྱང་གང་གསུངས་བཞིན་ནན་བསྐུལ་དང་མཐུན་སྦྱོར་བཅས། རྣམ་ཐར་དང་ཟིན་བྲིས་གཉིས་སོར་བཞག་གིས་ཕན་ཚུན་མཐུན་པར་འཁྲུགས་སྡེབ་སོགས་རག་བསྡུས་དཀྱུས་བ ཀོད་དུ་རང་ལོ་དོན་བདུན་པར་རབ་བྱུང་བཅུ་དྲུག་པའི་འབྲུ་མང་པོ་ཞེས་པ་ས་ཕོ་སྟག་གི་ལོ་ཨོ་རྒྱན་སངས་རྒྱས་གཉིས་པའི་ཞབས་པད་བོད་ཡུ ལ་མཐིལ་དུ་བཀོད་པའི་སྨིན་དྲུག་ཟླ་བའི་དཀར་ཕྱོགས་ཀྱི་དུས་ཚེས་དགེ་བ་དགའ་བ་དང་པོར་དགེ་གོང་དགོན་འཆི་མེད་རིག་འཛིན་བཤད་སྒྲུབ་འཕེལ་རྒྱས་གླིང་དུ། སངས་རྒྱས་གཉིས་པ་ལྟ་བུའི་དམ་པ་རྣམས་དང་ཁྱད་པར་བདག་ཉིད་ཆེན་པོ་འདིའི་ཞབས་རྡུལ་ལ་རེག་པའི་སྐལ་བཟང་ཐོབ་ཀྱང་། རང་གཤིས་ངན་པས་ཡོན་ཏན་རྡུལ་ཙམ་མེད་པ་ཐ་མལ་ལས་ཀྱང་ཐ་མལ་པ། ཤཱཀྱའི་རྗེས་འཇུག་གི་གཟུགས་བརྙན་རྨོངས་བརྟུལ་གྱི་ན་བ་བྷུ་སུ་ཀུ་པ་ཐུབ་བསྟན་ཀུན་བཟང་ཆོས་གྲགས་འ བོད་པས་རྫོགས་པར་གྲུབ་པའི་ཡི་གེ་པ་ནི་ཤཱཀྱའི་དགེ་ཚུལ་བློ་གསལ་ཕུར་པ་ཚེ་རིང་དང་། ཞལ་བཤུས་གཉིས་པ་དཀོན་མཆོག་ཆོས་འཕེལ་གྱིས་བགྱིས་པ་ཕྱོགས་དུས་ཀུན་ཏུ་དགེ་ཞིང་བཀྲ་ཤིས་ཕུན་སུམ་ཚོགས་པས་ཀུན་བཟང་ཐུགས་ཀྱི་བསྟན་པ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །ཤུ་བྷཾ། མངྒ་ལཾ། །
