PJCW-KABUM-06-CHA-008
༄༅། །འཇམ་དབྱངས་མཁྱེན་བརྩེའི་དབང་པོ་ལ་ཕུལ་བའི་བརྟན་བཞུགས་གསོལ་འདེབས།
རྡོ་རྗེ་འཆང་དངོས་རྡོ་རྗེའི་རིག་པ་འཛིན། །པདྨ་ལས་འཁྲུངས་པདྨའི་རྒྱལ་ཚབ་མཆོག །
འཇམ་དཔལ་དབྱངས་དངོས་འཇམ་དབྱངས་མཁྱེན་བརྩེའི་ལྷ། །བསྐལ་བརྒྱར་འཚོ་གཞེས་སྐལ་བཟང་མཐོང་གྱུར་ཅིག །རྒྱལ་ཀུན་རིགས་ཀྱི་བདག་པོ་ཚེ་མཐའ་ཡས། །རྒྱལ་ཀུན་ཕྲིན་ལས་དབང་བསྒྱུར་རྣམ་རྒྱལ་མ། །རྒྱལ་ཀུན་བསྐྱེད་ཡུམ་ཡིད་བཞིན་འཁོར་ལོའི་ཞབས། །ཚེ་ཡི་ལྷ་མཆོག་གསུམ་ལ་གསོལ་བ་འདེབས། །འཆི་བ་མེད་པའི་ཚེ་ལ་མངའ་བརྙེས་ཤིང་། །རྒ་བ་མེད་པའི་ལང་ཚོར་རང་དབང་འབྱོར། །སྐྱེ་འཆི་མེད་པའི་དབྱིངས་དང་རོ་གཅིག་པ། །འཆི་མེད་ལྷ་མཆོག་གསུམ་གྱི་བདེན་སྟོབས་ཀྱིས། །དཔལ་ལྡན་བླ་མའི་སྐུ་ཚེ་རབ་བརྟན་ཞིང་། །
སྐུ་ཡི་དཀྱིལ་འཁོར་འབྱུང་བཞིའི་འདུ་འཁྲུགས་མེད། །གསུང་གི་ཕྲིན་ལས་མཐའ་ཀླས་འགྲོ་བ་འདུལ། །རྒྱལ་བསྟན་རིན་ཆེན་སྲོག་ཤིང་བརྟན་གྱུར་ཅིག །ལས་ངན་བདག་ཀྱང་ལུས་ངན་འདོར་བའི་ཚེ། །གནད་གཅོད་དྲག་པོའི་སྡུག་བསྔལ་མི་འབྱུང་ཞིང་། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །བདེ་བ་ཅན་གྱི་ཞིང་དེར་སྐྱེ་བར་ཤོག །ཤུབྷཾ།
༈ རྡོ་རྗེ་འཆང་ཆེན་རྡོ་རྗེའི་རིག་པ་འཛིན། །འཇམ་དཔལ་གཞོན་ནུ་འཇམ་དབྱངས་མཁྱེན་བརྩེའི་གཏེར། །པད་སྡོང་ལས་འཁྲུངས་པདྨའི་རྒྱལ་ཚབ་ཆེ། །བསྐལ་བརྒྱར་འཚོ་གཞེས་སྐལ་བཟང་མཐོང་གྱུར་ཅིག །རྗེ་བཙུན་བླ་མ་མཆོག་གི་ཞབས་དྲུང་དུ། །ཚེ་མཐའ་ཡས་པའི་སྣང་བརྙན་ཕུལ་བའི་མཐུས། །སྐུ་ལ་བསྙུན་དང་བགྲེས་རྒུད་མེད་པ་རུ། །ཡུན་རིང་སྐུ་ཚེའི་འདུ་བྱེད་བརྟན་པར་ཤོག །ལས་ངན་བདག་ཀྱང་དམ་ཚིག་ཉམས་ཆགས་ཀུན། །བྱང་ནས་ངན་སོང་གནས་སུ་མི་སྐྱེ་ཞིང་། །རྗེ་བཙུན་མི་ལ་ལྟ་བུའི་བརྩོན་འགྲུས་ཀྱིས། །ཟབ་མོའི་ལམ་གྱི་གནད་ཀུན་མངོན་གྱུར་ཤོག །ལྕེ་བཙུན་ཆེ་དང་བཀའ་གདམས་པ་ལྟར་དང་། །རྒྱལ་མཆོག་ལྔ་པ་དྲུག་བརྒྱ་གྲུབ་ཆེན་ལྟར། །བྱ་བྲལ་འདི་ཡང་གདམས་ཟབ་སྒོ་གཅིག་གིས། །
རྗེས་བཟུང་འཕོ་ཆེན་འོད་ལུས་འགྲུབ་པར་ཤོག །
༈ ཤར་ཛཾ་ཐང་གི་གཙང་བ་དགེ་བཤེས་ཀྱི་ཞབས་བརྟན། ན་མོ་མཉྫུ་ཤྲཱི་ཡེ། རྡོ་རྗེ་རྣོན་པོ་རལ་གྲི་ཆེ། །
ཡི་གེ་མཆོག་སྟེ་རྣམ་པར་དག །ཐེག་པ་ཆེན་པོ་སྡུག་བསྔལ་གཅོད། །འཇམ་དཔལ་ཡེ་ཤེས་སེམས་དཔས་སྐྱོངས། །རྒྱལ་བའི་སྒྱུ་མ་སྒྱུ་འཕྲུལ་གར། །སྒྱུ་འཕྲུལ་སྣང་བ་བྲིད་མཁས་པོ། །
འགྲོ་ངོར་ཅིག་ཆར་ཅིར་ཡང་འཆར། །འཆར་ནུབ་བྲལ་བའི་བཀྲ་ཤིས་ཤོག །རྡོ་རྗེའི་རང་བཞིན་རྡོ་རྗེའི་སྐུ། །ལུང་དང་རྟོགས་པའི་སྙིང་པོ་འཛིན། །འགྲོ་ལ་ཕན་བདེའི་ཟེར་སྤྲོ་བ། །རྡོ་རྗེའི་ཁྲི་ལ་ཞབས་བརྟན་གསོལ། །ཟབ་གསང་གདམས་ངག་མཆོག་གི་དབང་བཞིའི་ཆུས། །
སྐལ་ལྡན་སྐུ་བཞིའི་ལམ་དུ་སྨིན་མཛད་ཅིང་། །ལུང་དང་རྟོགས་པའི་ཆོས་རབ་འཕེལ་བའི་གཉེན། །རྗེ་བཙུན་བླ་མ་ཞབས་པད་བརྟན་གྱུར་ཅིག །སངས་རྒྱས་རྟག་པ་བརྟན་པ་འདུས་མ་བྱས། །བསླུ་མེད་དགེ་འདུན་བདེན་པའི་བྱིན་རླབས་ཀྱིས། །གློ་བུར་ཉེར་འཚེའི་སྤྲིན་ཚོགས་ལས་གྲོལ་ནས། །བསྟན་པའི་ཉི་མ་ཕྱོགས་བརྒྱར་གསལ་གྱུར་ཅིག །གང་གསུང་བདུད་རྩིས་སྤྱོད་པའི་སྐལ་ལྡན་རྣམས། །རྣམ་རྟོག་བཅོས་མའི་སྦུབས་རྒྱ་ལས་གྲོལ་ནས། །དོན་དམ་ཆོས་ཉིད་རྟོགས་པའི་གདེང་ཆེན་གྱིས། །གཞི་དབྱིངས་ཆོས་སྐུའི་བླ་མར་དབྱེར་མེད་ཤོག །བླ་མ་སྨོན་ལམ་གྱིས་གསུང་ངོར་གསོལ་བ་བཏབ་པའོ། །འཛམ་ཐང་རྩང་པ་དགེ་སློང་གི་ཞབས་བརྟན་ནོ། །
