PJCW-KABUM-03-GA-004
༄༅། །ཤེས་རབ་བསྡུས་པའི་སྡོམ་བྱང་དང་བསྡུས་འགྲེལ་ཉུང་ངུ་བཞུགས་སོ། །
བླ་མ་ལ་ཕྱག་འཚལ་ལོ། །ཐོས་དང་བསམ་དང་སྒོམ་པའི་ཤེས་རབ་གསུམ། །ཐོས་པ་གང་ལ་གང་གིས་གང་ཞིག་སྟེ། །གང་ལས་གང་གིས་བརྟགས་བསྟེན་དགོངས་སྤྱོད་བསླབ། །
གང་ཞིག་ཤེས་ནས་སྤང་དང་བླང་བྱ་བ། །དང་པོ་ཕྱི་རོལ་གྲངས་ཅན་བྱེ་བྲག་སྤྱོད། །གཅེར་བུ་ཕུར་བུ་ལྔ་ཡིན་གཉིས་པ་ནི། །ཐེག་དམན་བྱེ་མདོ་ཐེག་ཆེན་དབུ་སེམས་སོ། །བསམ་བྱ་རྙེད་དཀའ་མི་རྟག་རྒྱུ་འབྲས་དད། །རྙེད་དཀའ་ངོ་བོ་ཁྱད་པར་དཔེ་གྲངས་བཞི། །མི་རྟག་ཕྱི་ནང་དམ་པ་སྐྱེ་དགུའི་བདག །ནམ་འཆི་ཆ་མེད་དཔེ་དོན་སྣ་ཚོགས་དྲུག །རྒྱུ་འབྲས་དགེ་དང་མི་དགེ་སྤྱི་བྱེ་བྲག །རྒྱུ་ལ་བཅུ་སྟེ་འབྲས་སྤྱིར་མི་དགེར་དྲུག །དགེ་བར་གསུམ་ཡིན་བྱེ་བྲག་བཞི་རེའོ། །དད་པ་དྭངས་དང་འདོད་པ་མི་ལྡོག་གསུམ། །བསྒོམ་པ་ཐུན་མོང་ཐུན་མོང་མ་ཡིན་
པ། །མཚན་ཉིད་གསང་སྔགས་གཉིས་ཡིན་རིམ་པ་བཞིན། །དང་པོ་ཐོབ་བྱ་ཉམས་ལེན་འབྲས་བུ་སྟེ། །ཐོབ་བྱ་སྦྱོར་དངོས་རྗེས་ཡིན་སྦྱོར་བ་ལ། །གདམས་ངག་ཡུལ་རྟེན་ཐབས་བཞི་ཁྱད་པར་ཅན། །དངོས་གཞི་བློ་སྦྱོང་བ་དང་དམ་བཅའ་གཉིས། །རྗེས་ལ་རང་གཞན་དགའ་བ་བསྒོམ་པའོ། །ཉམས་ལེན་ཚུལ་ཁྲིམས་ཏིང་འཛིན་ཤེས་རབ་བསླབ། །ཚུལ་ཁྲིམས་སྡོམ་སྡུད་དོན་བྱེད་རིམ་པ་ལྟར། །རྩ་ལྟུང་ཉི་ཤུ་ཕྱིན་དྲུག་བསྡུ་དངོས་བཞི། །ཏིང་འཛིན་བྱང་ཕྱོགས་ཤེས་རབ་འདིར་བཤད་དོ། །འབྲས་བུ་གནས་སྐབས་མཐར་ཐུག་སློབ་མི་སློབ། །ཐུན་མིན་སྔགས་ལ་སྨིན་གྲོལ་འབྲས་བུ་གསུམ། །སྨིན་བྱེད་དངོས་དང་ཡན་ལག་གཉིས་ཡིན་ཏེ། །དང་པོ་ཐུན་མོང་བུམ་དབང་འཁོར་བཅས་དང་། །ཐུན་མིན་གསང་ཤེར་ཚིག་དབང་ཟབ་མོའོ། །
ཡན་ལག་དམ་ཚིག་ཐུན་མོང་རིགས་ལྔ་དང་། །ཐུན་མིན་གསར་རྙིང་ལུང་དང་མན་ངག་སྟེ། །དང་པོ་རྩ་ལྟུང་བཅུ་བཞི་ཡན་ལག་བརྒྱད། །གཉིས་པ་རྩ་བ་ལྔ་དང་ཡན་ལག་བཅུ། །
གསུམ་པ་རྩ་གསུམ་ཡན་ལག་ཉི་ཤུ་ལྔ། །བཞི་པ་བསྲུང་དུ་ཡོད་དང་མེད་པའོ། །གྲོལ་བྱེད་བསྐྱེད་རྫོགས་གཉིས་ཡིན་དང་པོ་ལ། །སྦྱང་བྱ་སྦྱོང་བྱེད་སྦྱངས་འབྲས་རིམ་པ་བཞིན། །འཆི་བར་སྐྱེ་དང་སྐྱེ་གནས་བཞི་སྦྱང་བྱ། །ཏིང་འཛིན་གསུམ་དང་བསྐྱེད་རིམ་བཞི་སྦྱོང་བྱེད། །སྐུ་གསུམ་འཕྲིན་ལས་བཅས་པ་སྦྱངས་འབྲས་སོ། །རྫོགས་རིམ་དམིགས་བཅས་དམིགས་མེད་དང་པོ་ལ། །ཕ་རྒྱུད་རིམ་ལྔ་མ་རྒྱུད་ཆོས་དྲུག་དང་། །གཉིས་མེད་སྦྱོར་དྲུག་ཡིན་ཏེ་དང་པོ་ནི། །
རྡོར་བཟླས་སེམས་ལ་དམིགས་དང་བདག་བྱིན་རླབས། །འོད་གསལ་ཟུང་དུ་འཇུག་དང་རིམ་པ་ལྔ། །གཉིས་པ་ལམ་གྱི་རྩ་བ་གཞི་སྙིང་པོ། །དྲོད་ཚད་སུན་མ་བློ་ཆོད་རིམ་པ་ལྟར། །
གཏུམ་མོ་སྒྱུ་ལུས་འོད་གསལ་རྨི་བར་འཕོ། །གསུམ་པ་སོར་བསམ་སྲོག་འཛིན་རྗེས་ཏིང་ངོ་། །
དམིགས་མེད་རྫོགས་ཆེན་གཞི་ལམ་འབྲས་བུའོ། །འབྲས་བུ་གནས་སྐབས་རིག་འཛིན་མཐར་འབྲས་ཆོས། །དང་པོ་རྣམ་སྨིན་ཚེ་དབང་ཕྱག་རྒྱ་ཆེ། །ལྷུན་གྲུབ་བཞི་ཡིན་གཉིས་པ་སྐུ་གསུང་ཐུགས། །ཡོན་ཏན་འཕྲིན་ལས་ལྔ་ལྔ་ཉེར་ལྔ་སྟེ། །རྒྱལ་བའི་ཆོས་མཛོད་རྒྱ་མཚོ་འདི་ཁོ་ནར། བག་ཡངས་ཤྲཱི་ལྷོད་པོས་བསྡུས་པ་ཡིན། །དགེའོ། །དགེའོ། །དགེའོ།། །།
