PJCW-KABUM-02-KHA-035
༄༅། །དཔལ་རྡོ་རྗེ་སེམས་དཔའ་ལ་བསྟོད་པ།
དཔལ་རྡོ་རྗེ་སེམས་དཔལ་ལ་ཕྱག་འཚལ་ལོ། །གངས་ཀྱི་རི་བོ་ལྟ་བུ་རབ་དཀར་སྐུ། །
ཕུན་སུམ་ཚོགས་པ་ཆོས་སུ་སྒྲོག་པའི་གསུངས། །ཟབ་ཡངས་མཁྱེན་གཉིས་རང་བཞིན་ནམ་མཁའི་ཐུགས། །བཅོམ་ལྡན་སེམས་དཔའ་ཁྱོད་ལ་ཕྱག་འཚལ་ལོ། །བསྐལ་པར་བསགས་པའི་ལས་ངན་སྒྲིབ་པའང་། །གང་མཚན་སྐད་ཅིག་དྲན་པས་འཇོམས་མཛད་པ། །མགོན་པོ་ཁྱོད་འདྲ་གཞན་ན་མ་མཆིས་པས། །ཡང་ནས་ཡང་དུ་དད་པས་ཕྱག་འཚལ་ལོ། །རིགས་བརྒྱ་རིགས་ལྔ་རིགས་གསུམ་དཀྱིལ་འཁོར་ལྷ། །རིགས་བདག་དྲུག་པ་ཁྱེད་ལས་གཞན་མེད་དོ། །
གསང་མཛོད་བཀའ་རྣམས་བསྡུ་མཛད་དེ་ཡང་ཁྱེད། །རྒྱལ་ཀུན་ཡོངས་འདུས་ཁྱེད་ལ་ཕྱག་འཚལ་ལོ། །ཆ་ཡིས་ཡོངས་གང་ཟླ་བའི་དཀྱིལ་འཁོར་དང་། །ཉེས་པའི་སྐྱོན་སྤངས་པད་དཀར་འདབ་བརྒྱད་ལ། །སྲིད་ཞིར་མི་གནས་རྫོགས་པའི་སྐྱིལ་ཀྲུང་ཅན། །ནོར་བུའི་ཞབས་གདུབ་འཛིན་ལ་ཕྱག་འཚལ་ལོ། །སྣ་ཚོགས་དར་གོས་དབང་པོའི་གཞུ་བཞིན་མཛེས། །
རིན་ཆེན་རྒྱན་མང་དོ་ཤལ་འཕྱང་འཕྲུལ་གཡོ། །སྣང་སྟོང་དབྱེར་མེད་རྡོར་དྲིལ་ཕྱག་རྒྱ་ཅན། །
རིགས་ལྔའི་དབང་བསྐུར་རྫོགས་ལ་ཕྱག་འཚལ་ལོ། །བདེ་ཆེན་ཡེས་ཤེས་ཁ་སྦྱོར་ཐིག་ལེའི་སྐུ། །དགྱེས་སྤྲིན་བདུད་རྩི་ཨ་བྷི་ཥིཉྩའི་ཆུས། །རྣམ་དག་དབང་ལྔའི་བདུད་རྩི་སྦྱིན་མཛད་པ། །
གཉིས་མེད་སྙེ་མར་རོལ་ལ་ཕྱག་འཚལ་ལོ། །རིག་པའི་རང་བཞིན་སྙིང་པོ་སྔགས་ཀྱི་གནད། །
འོག་མིན་གནས་སུ་གང་གིས་བཀའ་སྩལ་ཞིང་། །བཟླས་དང་དྲན་པས་ཉམ་ཆགས་ཀུན་སྦྱོངས་པའི། །ཡང་སྙིང་ཡི་གེ་བརྒྱ་ལ་ཕྱག་འཚལ་ལོ། །མཚན་ནས་འབོད་དང་ཐུགས་དམ་གནད་བསྐུལ་བ། །རིགས་ལྔའི་རང་བཞིན་སྙིང་པོ་ཡང་སྙིང་སྟེ། །རྒྱུ་རྐྱེན་བཟླས་དང་སྔགས་གསུམ་ཡོངས་སུ་རྫོགས། །མདོར་བསྡུས་ཡི་གེ་དྲུག་ལ་ཕྱག་འཚལ་ལོ། །གདུལ་དཀའ་མ་རུང་ཡོངས་སུ་འཇོམས་པ་དང་། །མཆོག་གི་དངོས་གྲུབ་མཆོག་ཏུ་སྦྱིན་མཛད་ལྷ། །གར་དགུའི་རྣམ་རོལ་མགོན་པོ་རྡོ་རྗེ་སེམས། །ཧེ་རུ་ཀཿདཔལ་ཉིད་ལ་ཕྱག་འཚལ་ལོ། །གསང་བའི་མཛོད་འཛིན་ས་བཅུའི་དབང་ཕྱུག་ཚུལ། །རྡོ་རྗེ་གཏུམ་པོ་བགེགས་ཀྱི་དགྲ་གཅིག་པུར། །
རིགས་ལྔའི་རང་བཞིན་མཁའ་ལྡིང་འཕྲོ་འདུ་ཅན། །གཏི་མུག་ཀླུ་གཤེད་ཁྱོད་ལ་ཕྱག་འཚལ་ལོ། །ལྷ་ཡི་ལྷ་མཆོག་བཅོམ་ལྡན་རྡོ་རྗེ་སེམས། །སྐྱབས་ཀྱི་མཆོག་ཏུ་མགོན་པོ་ཁྱེད་བཟུང་ནས། །ཡང་ནས་ཡང་དུ་སྐུ་གསུང་ཐུགས་དྲན་ན། །བྱིན་གྱིས་རློབས་ཤིག་སེམས་དཔའ་རྡོ་རྗེ་ཆོས། །ཨོཾ་བཛྲ་ས་ཏྭ་ཧཱུྃ། དཔལ་སྤྲུལ་པས་སོ། །དགེའོ། །དགེའོ། །དགེའོ། །
