མ་ཧཱ་ཙི་ནའི་རྒྱལ་ཁབ་ཏུ་ལྕང་སྐྱ་ཧུ་ཐོག་ཐུའི་ཞབས་པད་དུ་ཕུལ་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	ma hA tsi na'i rgyal khab tu lcang skya hu thog thu'i zhabs pad du phul ba
Location	mkhyen brtse'i bka' 'bum Volume 20, sde tshan 1, Text 3, Pages 8-11 (Folios 4b3 to 6a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. ma hA tsi na'i rgyal khab tu lcang skya hu thog thu'i zhabs pad du phul ba. In 'jam dbyangs mkhyen brtse'i dbang po'i bka' 'bum, Vol. 20: 8-11. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog
Colophon	།ཞེས་པའང་རྨོག་སྟོན་གསང་བདག་ཆེན་པོའི་དགོངས་བཞེད་བསྐང་བའི་ཆེད་དུ་བྲིས་པའོ།
	zhes pa'ang rmog ston gsang bdag chen po'i dgongs bzhed bskang ba'i ched du bris pa'o

1 Texts in this Section (sde tshan or chos tshan)

3 8-11	མ་ཧཱ་ཙི་ནའི་རྒྱལ་ཁབ་ཏུ་ལྕང་སྐྱ་ཧུ་ཐོག་ཐུའི་ཞབས་པད་དུ་ཕུལ་བ། ma hA tsi na'i rgyal khab tu lcang skya hu thog thu'i zhabs pad du phul ba Official Letters - chab shog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

མ་ཧཱ་ཙི་ནའི་རྒྱལ་ཁབ་ཏུ་ལྕང་སྐྱ་ཧུ་ཐོག་ཐུའི་ཞབས་པད་དུ་ཕུལ་བ། པཱུཛསྠཱཔྲམཧཱཛ་ཊབནཾ། ཙནྡྲཾཕཏྣཁམཱུཧཤཽབྷནཻཿ སྡེབ་སྦྱོར་དག་པའི་སྣང་བའོ། །མོཀཱསྱཱམྲྀཏསཽཁྱདཱིཔྟདཱ ཏྲཻལོཀྱེཥུསདེབཛཱིཡཏཱཾ། མཆོད་འོས་ཆེ་དགུའི་རལ་པའི་སྨན་ལྗོངས་སུ། །ཞབས་སེན་ཟླ་རིས་བཀོད་པའི་དགེ་མཚན་གྱིས། །ཕན་བདེའི་བདུད་རྩི་ཐར་པའི་སྣང་སྟེར་བ། །ལྷར་བཅས་འཇིག་རྟེན་གསུམ་ན་རྒྱལ་གྱུར་ཅིག ༡ །ཇི་ལྟར་ཉི་མའི་རིགས་སུ་སྟོན་མཆོག་དང་། །དགེ་བའི་དཔལ་ལས་མགོན་ཁྱོད་སྣང་བའི་གཏམ། །ཐོས་པའི་རྣ་བ་ཙམ་ཡང་དོན་ལྡན་ཕྱིར། །མི་ཕྱེད་གུས་པ་མཆོག་གིས་མཆིད་འདི་གསོལ། ༢ །གཟོད་ནས་ཞི་བའི་ཆུ་གཏེར་ལ་ཆགས་ཀྱང་། །སྙིང་རྗེའི་འབིགས་བྱེད་རི་བོས་བསྲུབས་པ་ལས། །ཡིད་ཅན་རྒྱ་མཚོའི་གདུང་བ་སེལ་བའི་སླད། །སྔོན་མེད་དཔག་བསམ་དབང་པོ་ཁྱོད་གཅིག་འཁྲུངས། ༣ །དེ་ཚེ་རྒྱལ་ཀུན་ཕྲིན་ལས་བདུད་རྩིའི་བཅུད། །རྫོགས་པར་བཟུང་བའི་མཁྱེན་བརྩེའི་སྤྲིན་མཛེས་ལས། །དོན་གཉིས་ཡིད་བཞིན་གྲུ་ཆར་འབེབས་མཁས་པས། །བསྟན་འགྲོའི་འདོད་དགུ་རྫོགས་ལྡན་བཞིན་དུ་བྱས། ༤ །ཁྱད་པར་རིས་བྲལ་གྲུབ་མཐའི་གཟུགས་བརྙན་ཀུན། །དྲི་མེད་བློ་མཆོག་ནོར་བུའི་མེ་ལོང་ངོགས། །ཤར་བས་ཐུབ་བསྟན་ཉེ་འཁོན་མེད་སྦྱར་བའི། །བཀའ་དྲིན་ཚངས་པའི་བློས་ཀྱང་གཞལ་མི་ནུས། ༥ །མདོར་ན་ཉེས་པ་ཆ་བཅས་རྣམ་སྤངས་ཤིང་། །ཡོན་ཏན་མཐའ་དག་འབྱོར་པའི་ཞབས་སེན་ནི། །བསྟན་འདིར་སྟོན་པ་གཉིས་པའི་རྒྱལ་ཐབས་ལ། །འཚོ་གཞེས་བྱང་ཆུབ་སྤྱོད་པས་མཛེས་བཞིན་དུ། ༦ །ཤིན་ཏུ་བརྩེ་བས་དྲངས་པའི་ལེགས་གསུངས་ཀྱི། །བཀའ་གླེགས་བྱིན་རླབས་གཟི་འོད་འབར་བ་དང་། །གྱ་ནོམ་བདོག་པའི་སྐྱེས་བཅས་སྤྱི་བོ་རུ། །ཐོབ་པས་དད་སྤྲོའི་དགའ་སྟོན་ཉིན་བཞིན་འཕེལ། ༧ །འདི་ན་མགོན་པོ་གང་གི་ཡེ་ཤེས་ཀྱི། །གཟིགས་པ་ནོར་བུའི་རྔ་ཡབ་གསར་པ་ཡིས། །ཡང་ཡང་དབུགས་འབྱིན་ཐོབ་པའི་དགེ་སྦྱོང་ཡང་། །ཉེར་འཚེའི་ཚ་གདུང་སྐབས་ཙམ་བྲལ་དང་བཅས། ༨ །དབེན་ཞིང་ཉམས་དགའི་བསམ་གཏན་ཁང་བུ་རུ། །རྩ་གསུམ་རྒྱ་མཚོ་བསྙེན་ཅིང་སྒྲུབ་པ་ཡིས། །ཁྱོད་ཞབས་རྡོ་རྗེ་ལྟ་བུར་འཚོ་གཞེས་སླད། །གསོལ་འདེབས་མགྲིན་པའི་རྒྱུད་ཡང་བསྒྲེང་བཞིན་མཆིས། ༩ །སླར་ཡང་གང་དུ་སྣང་ཙམ་གྱིས། །སྲིད་ཞིའི་དགེ་མཚན་བྱེ་བའི་ཕུལ། །གསང་གསུམ་བསྐལ་བརྒྱར་བརྟན་པའི་ཚིག །སྨོན་འདུན་དགེ་བས་འདི་སྐད་གསོལ། ༡༠ ། ཤྲཱི་ཤྲཱི་ཤྲཱི་བི་ཛ་ཡནྟུ། ཤིན་ཏུ་དག་པ་རྡོ་རྗེ་དྷཱུ་ཏིའི་དབྱིངས། །གཟུང་འཛིན་རྩ་ཡི་མདུད་པ་ཞིག་གྱུར་པས། །མི་ཟད་མཚན་དཔེའི་ལང་ཚོ་འབར་བཞིན་དུ། །རྟག་པ་རྒྱུན་གྱི་འཁོར་ལོར་འཚོ་གཞེས་གསོལ། ༡༡ །ཐབས་ཤེས་ཉི་ཟླའི་རྒྱུ་བ་ཇི་སྙེད་ཀུན། །ནཱ་ད་སྒྲ་གཅན་འཇུག་པས་དབང་བྱས་ནས། །ཡན་ལག་དྲུག་ཅུའི་དབྱངས་སུ་འབབས་པའི་དཔྱིད། །འགྲོ་འདིའི་རྣ་བར་རྟག་ཏུ་སྙན་གྱུར་ཅིག ༡༢ །ཞུ་བདེས་ཟོས་པའི་ཆར་ཡང་འཕོ་མེད་པ། །སྟོང་ཉིད་ཡུལ་དང་གཉིས་སུ་མི་ཕྱེད་པའི། །རྣམ་མང་ཏིང་འཛིན་སྒོ་བརྒྱར་རོལ་བཞིན་དུ། །འཆི་མེད་གྲུབ་པའི་དགེ་མཚན་སྟོན་པར་གསོལ། ༡༣ །བྲལ་དང་སྨིན་པའི་ཡོན་ཏན་མཐའ་ཀླས་པ། །ཕུན་ཚོགས་ནོར་བུའི་དོ་ཤལ་བྱེ་བ་ཡིས། །ལྷུག་པར་གཡོགས་པའི་ངོ་མཚར་རྨད་བྱུང་བའི། །རྣམ་ཐར་སྲིད་ཞིའི་ཁམས་ན་གསལ་གྱུར་ཅིག ༡༤ །ཕྲིན་ལས་རོལ་མོ་སྲས་བཅས་རྒྱལ་ཀུན་དང་། །འཇུག་པ་གཅིག་པའི་དགེ་མཚན་དར་བབས་པས། །ས་གསུམ་ཕན་བདེའི་དགའ་སྟོན་རྒྱས་པའི་སླད། །ཞབས་པད་རྡོ་རྗེའི་ཁམས་སུ་བརྟན་པར་གསོལ། ༡༥ །མདོར་ན་ཡོངས་རྫོགས་བསྟན་དང་འགྲོ་བ་ཡི། །ཅོད་པན་མཚུངས་བ་མེད་པའི་ཞབས་པདྨོ། །བསྐལ་པ་རྒྱ་མཚོར་འཚོ་གཞེས་ཆོས་སྟོན་པར། །རྩེ་གཅིག་སྨོན་པའི་འབྲས་བུ་མངོན་གྱུར་ནས། ༡༦ །ནམ་ཡང་ཐུགས་རྗེའི་ཕྱག་གིས་མི་བཏང་བའི། །ལེགས་གསུང་སྤྱི་བོར་སྩོལ་བའི་སྐལ་བཟང་གིས། །རྣམ་ཀུན་ཤིས་པའི་སྣང་བ་ནུབ་མེད་པ། །སྤྲིན་བྲལ་ཉིན་མོའི་དཔལ་བཞིན་རྒྱས་པར་གསོལ། ༡༧ །ཞེས་པའང་རྨོག་སྟོན་གསང་བདག་ཆེན་པོའི་དགོངས་བཞེད་བསྐང་བའི་ཆེད་དུ་བྲིས་པའོ། ། ༈

[edit]

ma hA tsi na'i rgyal khab tu lcang skya hu thog thu'i zhabs pad du phul ba/ ma hA tsi na'i rgyal khab tu lcang skya hu thog thu'i zhabs pad du phul ba/__pUdzas+thApramahAdza TabanaM/___tsan+d+raMphat+nakhamUhashaub+hanaiH__sdeb sbyor dag pa'i snang ba'o/___/mokAs+yAmr-itasaukhyadIp+tadA_trailokyeShusadebadzIyatAM/___mchod 'os che dgu'i ral pa'i sman ljongs su/___/zhabs sen zla ris bkod pa'i dge mtshan gyis/___/phan bde'i bdud rtsi thar pa'i snang ster ba/___/lhar bcas 'jig rten gsum na rgyal gyur cig__1__/ji ltar nyi ma'i rigs su ston mchog dang /___/dge ba'i dpal las mgon khyod snang ba'i gtam/___/thos pa'i rna ba tsam yang don ldan phyir/___/mi phyed gus pa mchog gis mchid 'di gsol/__2__/gzod nas zhi ba'i chu gter la chags kyang /___/snying rje'i 'bigs byed ri bos bsrubs pa las/___/yid can rgya mtsho'i gdung ba sel ba'i slad/___/sngon med dpag bsam dbang po khyod gcig 'khrungs/____3__/de tshe rgyal kun phrin las bdud rtsi'i bcud/___/rdzogs par bzung ba'i mkhyen brtse'i sprin mdzes las/___/don gnyis yid bzhin gru char 'bebs mkhas pas/___/bstan 'gro'i 'dod dgu rdzogs ldan bzhin du byas/___4__/khyad par ris bral grub mtha'i gzugs brnyan kun/___/dri med blo mchog nor bu'i me long ngogs/____/shar bas thub bstan nye 'khon med sbyar ba'i/___/bka' drin tshangs pa'i blos kyang gzhal mi nus/_5__/mdor na nyes pa cha bcas rnam spangs shing /___/yon tan mtha' dag 'byor pa'i zhabs sen ni/___/bstan 'dir ston pa gnyis pa'i rgyal thabs la/___/'tsho gzhes byang chub spyod pas mdzes bzhin du/___6__/shin tu brtse bas drangs pa'i legs gsungs kyi/_/bka' glegs byin rlabs gzi 'od 'bar ba dang /___/gya nom bdog pa'i skyes bcas spyi bo ru/___/thob pas dad spro'i dga' ston nyin bzhin 'phel/___7_/'di na mgon po gang gi ye shes kyi/___/gzigs pa nor bu'i rnga yab gsar pa yis/___/yang yang dbugs 'byin thob pa'i dge sbyong yang /___/nyer 'tshe'i tsha gdung skabs tsam bral dang bcas/___8__/dben zhing nyams dga'i bsam gtan khang bu ru/___/rtsa gsum rgya mtsho bsnyen cing sgrub pa yis/___/khyod zhabs rdo rje lta bur 'tsho gzhes slad/___/gsol 'debs mgrin pa'i rgyud yang bsgreng bzhin mchis/___9__/slar yang gang du snang tsam gyis/___/srid zhi'i dge mtshan bye ba'i phul/___/gsang gsum bskal brgyar brtan pa'i tshig__/smon 'dun dge bas 'di skad gsol/___10__/_shrI shrI shrI bi dza yan+tu/___shin tu dag pa rdo rje d+hU ti'i dbyings/___/gzung 'dzin rtsa yi mdud pa zhig gyur pas/___/mi zad mtshan dpe'i lang tsho 'bar bzhin du/___/rtag pa rgyun gyi 'khor lor 'tsho gzhes gsol/___11_/thabs shes nyi zla'i rgyu ba ji snyed kun/___/nA da sgra gcan 'jug pas dbang byas nas/___/yan lag drug cu'i dbyangs su 'babs pa'i dpyid/___/'gro 'di'i rna bar rtag tu snyan gyur cig__12__/zhu bdes zos pa'i char yang 'pho med pa/___/stong nyid yul dang gnyis su mi phyed pa'i/___/rnam mang ting 'dzin sgo brgyar rol bzhin du/___/'chi med grub pa'i dge mtshan ston par gsol/___13__/bral dang smin pa'i yon tan mtha' klas pa/___/phun tshogs nor bu'i do shal bye ba yis/___/lhug par g.yogs pa'i ngo mtshar rmad byung ba'i/___/rnam thar srid zhi'i khams na gsal gyur cig__14_/phrin las rol mo sras bcas rgyal kun dang /___/'jug pa gcig pa'i dge mtshan dar babs pas/___/sa gsum phan bde'i dga' ston rgyas pa'i slad/___/zhabs pad rdo rje'i khams su brtan par gsol/___15__/mdor na yongs rdzogs bstan dang 'gro ba yi/___/cod pan mtshungs ba med pa'i zhabs pad+mo/___/bskal pa rgya mtshor 'tsho gzhes chos ston par/___/rtse gcig smon pa'i 'bras bu mngon gyur nas/___16__/nam yang thugs rje'i phyag gis mi btang ba'i/___/legs gsung spyi bor stsol ba'i skal bzang gis/__/rnam kun shis pa'i snang ba nub med pa/___/sprin bral nyin mo'i dpal bzhin rgyas par gsol/___17__/zhes pa'ang rmog ston gsang bdag chen po'i dgongs bzhed bskang ba'i ched du bris pa'o/____/_!_