དཔལ་འདོད་པའི་རྒྱལ་པོའི་རྗེས་གནང་གི་ཆོ་ག་འདོད་དགུའི་སྙེ་མ།

🚧 This website is under continued development. We appreciate your patience!

Previous Text Back to Volume PageNext Text

Wylie title	dpal 'dod pa'i rgyal po'i rjes gnang gi cho ga 'dod dgu'i snye ma
Location	mkhyen brtse'i bka' 'bum Volume 11, sde tshan 14, Text 4, Pages 424-439 (Folios 11b3 to 19a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	ངོར་ཆེན་དཀོན་མཆོག་ལྷུན་གྲུབ་ (Ngor mkhan chen, 10th)
Citation	'jam dbyangs mkhyen brtse'i dbang po. dpal 'dod pa'i rgyal po'i rjes gnang gi cho ga 'dod dgu'i snye ma. In 'jam dbyangs mkhyen brtse'i dbang po'i bka' 'bum, Vol. 11: 424-439. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang
Deity	'dod pa'i rgyal po
Colophon	།ཅེས་པའང་རྗེ་ས་སྐྱ་པ་ཆེན་པོའི་གསུང་རབ་ལ་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱིས་མཆན་བུའི་སྒོ་ནས་གསལ་བར་མཛད་པའི་དགོངས་དོན་མཁས་མཆོག་ངག་དབང་བརྟན་པའི་རྡོ་རྗེས་ལེགས་པར་ཕྱེ་བ་གཞིར་བཞག་སྟེ། སྐབས་སུ་བབ་པའི་བསྣོན་འཕྲི་ཅུང་ཟད་བཅས་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བཀླགས་པས་གྲུབ་པར་བསྡེབས་པ་སརྦ་དཱ་ཤྲེ་ཡོ་བྷ་བ་ཏུ།།
	ces pa'ang rje sa skya pa chen po'i gsung rab la thams cad mkhyen pa dkon mchog lhun grub kyis mchan bu'i sgo nas gsal bar mdzad pa'i dgongs don mkhas mchog ngag dbang brtan pa'i rdo rjes legs par phye ba gzhir bzhag ste/__skabs su bab pa'i bsnon 'phri cung zad bcas bya bral ba 'jam dbyangs mkhyen brtse'i dbang pos bklags pas grub par bsdebs pa sarba dA shre yo b+ha ba tu/

1 Texts in this Section (sde tshan or chos tshan)

4 424-439	དཔལ་འདོད་པའི་རྒྱལ་པོའི་རྗེས་གནང་གི་ཆོ་ག་འདོད་དགུའི་སྙེ་མ། dpal 'dod pa'i rgyal po'i rjes gnang gi cho ga 'dod dgu'i snye ma Permission to Invoke (anujñā) - rjes gnang	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །དཔལ་འདོད་པའི་རྒྱལ་པོའི་རྗེས་གནང་གི་ཆོ་ག་འདོད་དགུའི་སྙེ་མ་ཞེས་བྱ་བ་བཞུགས་སོ། །འདོད་པའི་དངོས་གྲུབ་མཆོག་སྩོལ་བ། །བླ་མ་ཁྲོ་བོའི་རྒྱལ་པོ་ལ། བཏུད་ནས་དེ་ཡི་རྗེས་གནང་ནི། །ཕུན་ཚོགས་འདོད་དགུའི་སྙེ་མ་འབྲི། འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། ཟླ་བ་གང་ཡང་རུང་བའི་ཚེས་བརྒྱད་དང་སྐར་མ་རྒྱལ་འཛོམ་པའི་ཚེ། སྣོད་དང་མི་ལྡན་པའི་སྐྱེ་བོས་དབེན་ཞིང་ཡིད་དང་མཐུན་པའི་གནས་སུ་མཎྜལར་རྡུལ་ཚོན་དམར་པོས་ཟླ་གམ་དམར་པོ་སྒོ་གཅིག་པའི་ནང་དུ་པདྨ་འདབ་བརྒྱད་ཀྱི་ལྟེ་བར་ལྕགས་ཀྱུ་བྲི་བའམ་ཚོན་ཕུང་དམར་པོ་བཀོད་ལ་མཉྫིའི་སྟེང་དུ་བཞག །དེའི་མཐར་ཆུ་བཞི་སྔོན་དུ་འགྲོ་བའི་མཆོད་པ་དང་། སྒྲུབ་ཐབས་ནས་བཤད་པ་ལྟ་བུའི་གཏོར་མ་བཤམ། སློབ་དཔོན་གྱི་མདུན་དུ་རྡོ་རྗེ་དྲིལ་བུ་བཞག །གཞན་ཡང་མེ་ཏོག་དམར་པོའི་མཎྜལ་སོགས་དགོས་པའི་ཡོ་བྱད་རྣམས་འདུ་བྱ། མཆོད་པ་ཀྱེ་རྡོར་ཁོ་བོས་བྱས་པའི་རིག་བྱེད་མའི་རྗེས་གནང་གི་ཟིན་བྲིས་ལྟར། ལྟར་བྱིན་གྱིས་བརླབ། རྗེ་དཀོན་མཆོག་ལྷུན་གྲུབ་པས་མཛད་པའི་སྒྲུབ་ཐབས་ནས་འབྱུང་བ་ལྟར་བདག་བསྐྱེད་བསྒོམས་ལ་བཟླས་པ་བྱ། གཞལ་ཡས་ཁང་དང་གདན་རང་ལ་བསྡུས་ནས་མདུན་གྱི་མཎྜལ་བསང་སྦྱང་། །སྟོང་པའི་ངང་ལས་པྃ་ལས་པདྨ་དམར་པོ་ཞེས་པ་ནས། དེ་གསུམ་ཡང་འོད་ཟེར་ཁ་དོག་དམར་པོའི་རྣམ་པར་ཞུ་ནས་སྐུ་གསུང་ཐུགས་དང་དབྱེར་མེད་དུ་གྱུར། ཅེས་པའི་བར་བདག་བསྐྱེད་བཞིན་ལས། རང་ཉིད་ཅེས་པའི་ཚིག་དོར་ལ་མདུན་བསྐྱེད་ཀྱི་ཚུལ་དུ་བསྒྲུབ། ཨོཾ་ཤྲཱི་བཛྲ་ཊཱཀྐི་རཱ་ཛ་ས་པ་རི་ཝཱ་ར་ཞེས་པ་རེ་རེའི་མགོར་སྦྱར་བའི་ཨོཾ་ནི་རཱི་ཧཱུྃ་ཁཾ་སྭཱ་ཧཱ། ཨོཾ་བཛྲ་ནཻ་བི་ཏེ་ཧཱུྃ་ཁྃ་སྭཱ་ཧཱ། ཨོཾ་སརྦ་སཾ་ཤོ་དྷ་ནི་སྭཱ་ཧཱ། ཨོཾ་ཛཿཧཱུྃ་བྃ་ཧོཿཁཾ་རཾ་མ་ཧཱ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་པུཥྤེ་ནས་ཤཔྡའི་བར་སྦྱར་ལ་མཆོད། མཐར་དྷ་རྨཱར་ཎི་ཏས་རོལ་མོ་དབུལ། བསྟོད་པ་རྒྱས་བསྡུས་ཅི་ལྟར་རིགས་པས་བསྟོད། གཏོར་མ་བྱིན་རླབས་རྒྱས་བསྡུས་གང་རུང་ཀྱེ་རྡོར་ལྟར་བྱ། སྤྱན་འདྲེན་མི་དགོས། སྒྲུབ་ཐབས་ལྟར་གཏོར་མ་ཕུལ། ཨོཾ་བཛྲ་པུཥྤེ་ཨཱཿཧཱུྃ་སོགས་ཀྱིས་མཆོད་ཅིང་བསྟོད་ལ་འདོད་དོན་གསོལ། འཇིག་རྟེན་པའི་གཏོར་མ་སྒྲུབ་ཐབས་ལྟར་ཕུལ། ཐུགས་རྒྱུད་བསྐུལ་བར་དམིགས་ལ་བཟླས་པ་ཇི་ལྟར་རིགས་པ་བྱས་མཐར། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་འདེབས་པ་ནི་སློབ་དཔོན་གྱི་བྱ་བའོ། །གཉིས་པ་དངོས་གཞི་སློབ་མ་ལ་བྱ་བའི་རིམ་པ་ནི། སློབ་མ་ཀྱེ་རྡོ་རྗེའམ་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བཞི་རྫོགས་པར་ཐོབ་ཅིང་དམ་ཚིག་དང་ལྡན་པ། རིམ་གཉིས་ཀྱི་རྣལ་འབྱོར་ལ་གནས་ཤིང་། བསྟན་པ་དང་སེམས་ཅན་གྱི་དོན་ཏུ་ཆོས་འདི་དོན་ཏུ་གཉེར་བ་བདུན་ཙམ་ཇི་ལྟར་འོས་པ་ཁྲུས་བྱས། ཕྱག་དང་ཡོན་ཕུལ་ནས་གུས་པས་འཁོད་པ་ལ། མེ་ཏོག་བཀྱེ་བསྡུ་གྲུབ་རྗེས། སློབ་དཔོན་གྱིས་སེམས་བསྐྱེད་གསལ་བཏབ་ནས། དེ་ལ་འདིར་གངས་ཅན་བསྟན་པའི་མངའ་བདག་རྗེ་བཙུན་ས་སྐྱ་པ་ཡབ་སྲས་ལ་མདོ་རྒྱུད་ཀྱི་གདམས་པ་རྒྱ་མཚོ་ལྟ་བུ་ཞིག་ཕྱག་ཏུ་བབས་པའི་ནང་ནས་མཆོག་ཏུ་ཟབ་པ། སྙན་བརྒྱུད་གསེར་ཆོས་བཅུ་གསུམ་གྱི་ཡ་གྱལ། ཐུན་མོང་བསྒྲུབ་པས་མཆོག་ཞར་ལ་འབྱུང་བ་དམར་པོ་སྐོར་གསུམ་ཞེས་གྲགས་པ་ནི། དཔལ་ཀྱེ་རྡོ་རྗེའི་རྩ་བཤད་ཀྱི་རྒྱུད་གསུམ་ནས་གསུངས་པ་ལ་བརྟེན་ནས་སློབ་དཔོན་ཆེན་པོ་ལྷན་ཅིག་སྐྱེས་པའི་རོལ་པ་དང་། ཌོམྦི་ཧེ་རུ་ཀས་བཀྲལ་བའི་རྗེ་བཙུན་མ་ཀུ་རུ་ཀུལླེའི་ཆོས་སྐོར་དང་། བདེ་མཆོག་རྡོ་རྗེ་མཁའ་འགྲོའི་རྒྱུད་ལ་བརྟེན་ནས་མི་དབང་ཨིནྡྲ་བྷཱུ་ཏི་དང་སློབ་དཔོན་ནག་པོ་པ་ལ་སོགས་པས་བཀྲལ་བའི་དཔལ་ཚོགས་ཀྱི་བདག་པོ་དམར་ཆེན་གྱི་ཆོས་སྐོར་དང་། ཡང་དཔལ་འཁོར་ལོ་བདེ་མཆོག་ལ་སོགས་པའི་རྒྱུད་ལ་བརྟེན་ནས་སློབ་དཔོན་རྡོ་རྗེ་གདན་པ་ལ་སོགས་པས་བཀྲལ་བའི་དཔལ་འདོད་པའི་རྒྱལ་པོའི་ཆོས་སྐོར་དང་གསུམ་དུ་ཡོད་ཅིང་། དེ་ནས་རིམ་པ་བཞིན་ཏུ་བརྒྱུད་པའི་མན་ངག་རྒྱལ་བས་ལུང་བསྟན་པའི་སྐྱེས་བུ་རྡོ་རྗེ་འཆང་ཀུན་དགའ་བཟང་པོ་ནས་བརྒྱུད་པ་དང་། ཡར་ཀླུང་པ་སེང་གེ་རྒྱལ་མཚན་ཁུ་དབོན་ནས་བསམ་གཏན་གླིང་པ་ནམ་མཁའ་བསོད་ནམས་སོགས་ལ་བརྒྱུད་པ་དང་། དྭགས་པོ་བཀྲ་ཤིས་རྣམ་རྒྱལ་ནས་བྱང་སེམས་དཀོན་མཆོག་གྲགས་པ་སོགས་ལ་བརྒྱུད་པའི་ལུགས་སྲོལ་གསུམ་ཙམ་ཡོད་པ་ལས། འདིར་རྗེ་བཙུན་ས་སྐྱ་པ་ཡབ་སྲས་ཁུ་དབོན་རྣམས་ཀྱིས་མི་དང་མི་མ་ཡིན་གྱི་ཆེ་དགུ་གྲངས་ལས་འདས་པ་དབང་དུ་བསྡུས་ནས་རྣམ་གྲོལ་ཐར་པའི་ལམ་པོ་ཆེར་དཀྲི་བར་མཛད་པ་ལ་བརྟེན་ནས་རྒྱལ་བོད་ཧོར་གསུམ་དུ་སངས་རྒྱས་ཀྱི་བསྟན་པ་ཡོངས་སུ་རྫོགས་ཤིང་དྲི་མ་མེད་པ་དར་ཞིང་རྒྱས་པའི་ཆ་རྐྱེན་དུ་གྱུར་ལ། རྒྱལ་བ་རྡོ་རྗེ་འཆང་ཀུན་དགའ་བཟང་པོས་ཀྱང་བསྟན་པ་དང་སེམས་ཅན་གྱི་དོན་འབའ་ཞིག་ལ་དགོངས་པའི་ཡི་དམ་གྱི་ལྷ་འདི་དག་གི་སྒྲུབ་པ་ཉམས་གཞེས་ལས་ཚོགས་སོགས་མཛད་པ་ལ་བརྟེན་ནས་བསྟན་པ་སྤྱི་དང་བྱེ་བྲག་དཔལ་ལྡན་ས་སྐྱ་པའི་བསྟན་པ་རྨད་དུ་བྱུང་བ་དེང་སང་གི་བར་དུ་དར་རྒྱས་རྒྱུན་མི་ཆད་པའི་རྟེན་འབྲེལ་ཁྱད་པར་ཅན་དུ་གྱུར་པ་ལ་སོགས་པ་ཡོན་ཏན་གྱི་ཚོགས་བསམ་གྱིས་མི་ཁྱབ་པ་དང་ལྡན་པའི་དམར་པོ་སྐོར་གསུམ་གྱི་ནང་ནས། ད་ལམ་འདིར་ཁམས་གསུམ་དབང་དུ་སྡུད་པར་བྱེད་པ་དཔལ་འདོད་པའི་རྒྱལ་པོའི་ཆོས་སྐོར་ཡིན། དེ་ལའང་རྡོ་རྗེ་གདན་པས་བཀྲལ་བ་ནས་བརྒྱུད་པ་རྗེ་བཙུན་བ་རི་ལོ་ཙཱ་བས་རྒྱལ་གྱི་ལྕགས་ཐང་པ་ཆེན་པོ་ལ་གནང་། དེའི་དྲུང་དུ་ཆོས་རྗེ་ས་སྐྱ་པ་ཆེན་པོས་གསན་ནས་འཕྲང་བྲག་དམར་གཉིས་ཀྱི་དགེ་འདུན་གྱི་ཚོགས་མ་དད་པ་དད་པར་མཛད་ཅིང་དབང་དུ་བསྡུས་ནས་ཐུབ་པའི་བསྟན་པ་ཤིན་ཏུ་དར་བར་མཛད་པའི་ནུས་པ་དང་ལྡན་པའི་བྱིན་རླབས་ཅན་འདི་ཉིད་ལ། ཡབ་རྐྱང་དུ་སྒྲུབ་པ་དང་། ཡུམ་རྐྱང་དུ་སྒྲུབ་པ་དང་། ཡབ་ཡུམ་སྦགས་ཏེ་སྒྲུབ་པ་རྣམས་སུ་ཡོད་པ་ལས། འདིར་ཡབ་ཡུམ་སྦགས་སྒྲུབ་ཀྱི་རྗེས་སུ་གནང་བ་བསྒྲུབ་པ་ལ། སློབ་དཔོན་གྱི་བྱ་བ་རྣམས་སྔོན་ཏུ་སོང་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་སློབ་མའི་བྱ་བ་ལ། ཐོག་མར་སློབ་དཔོན་ལ་སངས་རྒྱས་རྡོ་རྗེ་འཆང་དངོས་ཡིན་སྙམ་པའི་འདུན་པ་དང་ལྡན་པས་རྗེས་གནང་ཟབ་མོ་ཞུ་བའི་ཡོན་ཏུ་མཎྜལ་ཞིག་འབུལ་བར་ཞུ། དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། རྡོ་རྗེ་རྣལ་འབྱོར་དབང་ཕྱུག་གཙོ། །གསང་བའི་ཆོ་ག་བླ་ན་མེད། །དབང་དུ་བྱེད་པའི་རིག་སྔགས་མཆོག །བདག་ལ་ངེས་པར་སྩལ་དུ་གསོལ། །རྒྱུད་དག་པར་བྱ་བའི་སླད་དུ་དམིགས་པ་འདི་བཞིན་མཛོད། མདུན་གྱི་ནམ་མཁར་བླ་མ་དང་གཉིས་སུ་མེད་པའི་ཁྲོ་བོ་འདོད་པའི་རྒྱལ་པོ་ལ་སངས་རྒྱས་དང་བྱང་ཆུབ་སེམས་དཔའ་མཁའ་འགྲོ་སུམ་ཅུ་རྩ་གཉིས་ལ་སོགས་པ་དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་བསྐོར་ནས་བཞུགས་པའི་སྤྱན་སྔར་ཁྱེད་རང་རྣམས་འཁོད་ནས་སྡིག་པ་བཤགས་པ་ལ་སོགས་པའི་ཡན་ལག་བདུན་པ་བགྱིད་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི་སོགས་ལན་གསུམ། ཞེས་པས་རྒྱུད་དག་པར་བྱས་ནས། དཔལ་ས་སྐྱ་པ་ཆེན་པོས་མཛད་པའི་རྩ་བའི་ཡི་གེ་ལས། སློབ་དཔོན་རྡོ་རྗེ་འཆང་དང་ནི། །སློབ་མ་ཁྲོ་བོ་འདོད་རྒྱལ་དུ། རིམ་པ་བཞིན་ཏུ་བསྒོམ་ནས་ནི། ཞེས་གསུངས་པས་དམིགས་པ་འདི་བཞིན་ཏུ་མཛད་པར་ཞུ། སློབ་དཔོན་ཁྲོ་བོ་འདོད་པའི་རྒྱལ་པོའི་སྐུར་གསལ་བ་ལ། ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་ཉིད་གདུལ་བྱ་དབང་དུ་བསྡུས་ནས་སངས་རྒྱས་ཀྱི་བསྟན་པ་ལ་གཞུག་པའི་ཆེད་དུ་ཁྲོ་བོ་འདོད་པའི་རྒྱལ་པོའི་སྐུར་བསྟན་པ་དངོས་ཡིན་སྙམ་པའི་མོས་གུས་དྲག་པོ་མཛད་པའི་རྐྱེན་གྱིས། སློབ་དཔོན་གྱི་ཐུགས་ཀའི་ཧཱུྃ་ཡིག་དམར་པོ་དེ་ལས་འོད་ཟེར་གྱི་ཚོགས་བསམ་གྱིས་མི་ཁྱབ་པ་བྱུང་། ཁྱེད་རང་རྣམས་ཀྱི་ལུས་ལ་ཕོག །ཚེ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ། བག་ཆགས་དང་བཅས་པ་དང་ཕུང་ཁམས་སྐྱེ་མཆེད་དུ་སྣང་བ་ཐམས་ཅད་སྦྱངས་ཏེ་ལུས་འོད་ཀྱི་གོང་བུར་གྱུར་པར་མོས་པ་མཛོད། དེ་ཉིད་ལ་དམིགས་ཏེ་སློབ་དཔོན་གྱིས། ཨོཾ་སྭ་བྷཱ་ཝ་ནས་ཧཾ་ཞེས་བརྗོད་པས་ལུས་འོད་ཕུང་དུ་གྱུར་པ་དང་བཅས་པའི་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་བཞིན་གྱིས་མ་དམིགས་པའི་སྟོང་པ་ཉིད་དུ་གྱུར་པར་མོས་པ་མཛོད། སྟོང་པའི་ངང་ལས་པྃ་ལས་པདྨ་དམར་པོ་འདབ་མ་བརྒྱད་པའི་ལྟེ་བར་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཁྱེད་རང་རྣམས་ཀྱི་སེམས་ཉིད་གཉིས་སུ་མེད་པའི་ཡེ་ཤེས་ཀྱི་ངོ་བོར་གྱུར་པའི་ཧཱུྃ་དམར་པོ། །དེ་ལས་ཞེས་སོགས་དང་། དེ་འོད་དུ་ཞུ་བ་ལས། ཁྱེད་རང་རྣམས་ཁྲོ་ཆེན་འདོད་པའི་རྒྱལ་པོ་ཞེས་སོགས་ནས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་ཡབ་ཀྱི་ཐུགས་ཀར་པདྨ་དང་ཉི་མའི་སྟེང་དུ་ཧཱུྃ་ཡིག་དམར་པོ་དང་བཅས་པ་གསལ་ལམ་སྟེ་ཡོད་པར་མོས་པ་མཛོད། དེ་ནས་སློབ་དཔོན་ལ་མོས་གུས་མཛད་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་འདོད་རྒྱལ་ཡབ་ཡུམ་དང་། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀར་ཕོག་པས། དེ་རྣམས་ཀྱི་ཐུགས་ཀ་ནས་ཁྲོ་བོ་འདོད་པའི་རྒྱལ་པོ་ཡབ་ཡུམ་བསམ་གྱིས་མི་ཁྱབ་པ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས་པ་ལ། སློབ་དཔོན་གྱིས་ཨོཾ་བཛྲ་པུཥྤེ་སོགས་ལྔས་མཆོད། ཞེས་མཆོད་ནས། ཛཿཧཱུྃ་བྃ་ཧོཿ ཞེས་བརྗོད་པས་ཁྱེད་རང་རྣམས་འདོད་རྒྱལ་དུ་གསལ་བ་ལ་གཉིས་སུ་མེད་པར་ཐིམ་པར་མོས་པ་མཛོད། སླར་ཡང་སློབ་དཔོན་གྱི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཞེས་སོགས་ནས། དབང་ལྷ་སྤྱན་དྲང་། སློབ་དཔོན་གྱིས་མཆོད་ཅིང་གསོལ་བ་བཏབ་པས། སངས་རྒྱས་རྣམས་ཀྱིས་སོགས་ནས་དབུ་བརྒྱན་པར་མོས་པ་མཛོད། ཁྱེད་རང་རྣམས་ཀྱི་དཔྲལ་བར་སོགས་ནས། ཞུ་ནས་ཁྱེད་རང་རྣམས་ཀྱི་ལུས་ངག་ཡིད་གསུམ་དང་དབྱེར་མེད་དུ་གྱུར་པར་མོས་པ་མཛོད། དེ་ནི་རྗེས་གནང་གི་གཞི་དགོད་པ་ཡིན། རྗེས་གནང་དངོས་ལ། བརྒྱུད་པའི་མན་ངག་ཡོད་པའི་ལུང་། དེ་ཡི་བླང་ཐབས་མ་ཤེས་ན། །བསྒྲུབས་ཀྱང་དངོས་གྲུབ་བུལ་པའམ། །ཡང་ན་འབྱུང་བར་མི་འགྱུར་གསུངས། །ཞེས་འབྱུང་བས། བཟླས་པའི་སྔགས་ཀྱི་ལུང་བླང་བའི་སླད་དུ་དམིགས་པ་འདི་བཞིན་མཛོད། སློབ་དཔོན་འདོད་པའི་རྒྱལ་པོར་གསལ་བའི་ཐུགས་ཀར་པདྨ་དང་ཉི་མའི་སྟེང་དུ་ཧཱུྃ་ཡིག་དམར་པོའི་མཐར་བཟླ་བྱའི་སྔགས་ཀྱི་ཕྲེང་བ་ཁ་དོག་དམར་པོ་གཡས་སྐོར་དུ་འཁོད་ནས་ཡོད་པར་མོས་པ་བྱས། ཁྱེད་རང་རྣམས་འདོད་རྒྱལ་དུ་གསལ་བའི་སྙིང་གར་པདྨ་དང་ཉི་མའི་སྟེང་དུ་ཧཱུྃ་ཡིག་དམར་པོ་ཞིག་གསལ་བཏབ། ཙནྡན་དམར་པོས་བྱུགས་པའི་མཎྜལར་མེ་ཏོག་དམར་པོའི་ཚོམ་བུ་བཀོད་ནས། སྔགས་ཀྱི་བཟླས་ལུང་ཞུ་བའི་ཡོན་ཏུ་དམིགས་ཏེ་མཎྜལ་ཞིག་མཛད་པར་ཞུ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། དུས་གསུམ་སངས་རྒྱས་ཐམས་ཅད་ཀྱི། །དམིགས་མེད་ཐུགས་རྗེ་ལས་འཁྲུངས་པའི། །ཕྲིན་ལས་དངོས་གྲུབ་འབྱུང་བའི་ཕྱིར། །འདིར་ནི་རྗེས་སུ་གནང་བར་མཛོད། །དེ་ལྟར་གསོལ་བ་འདེབས་པའི་སློབ་མ་ལ་སློབ་དཔོན་གྱིས་སྤྲོ་བ་དྲི་བར་བྱས་པའི་མོས་པ་མཛོད། འགྲོ་བ་སེམས་ཅན་དོན་སླད་དུ། །དུས་གསུམ་སངས་རྒྱས་ཐམས་ཅད་ཀྱི། །དམིགས་མེད་ཐུགས་རྗེ་ལས་བྱུང་བའི། །ཐབས་ཀྱི་ཕྲིན་ལས་ཟབ་མོའི་དོན། །བདེན་ཞིང་བསླུ་བར་མི་འགྱུར་པའི། །གསང་ཆེན་འདི་ལ་ཁྱོད་དད་དམ། །ཞེས་པའི་ལན་བཏབ་པར་མོས་པས་འདིའི་རྗེས་ཟློས་མཛོད། འགྲོ་བ་སེམས་ཅན་སོགས་ནས། །གསང་ཆེན་འདི་ལ་བདག་དད་དོ། །ལན་གཅིག །དེ་ལྟར་ལན་བཏབ་ནས་སློབ་དཔོན་ལ་མོས་གུས་བྱས་པས། སློབ་དཔོན་གྱི་ཐུགས་ཀའི་ཧཱུྃ་ཡིག་སྔགས་ཕྲེང་དང་བཅས་པ་ལས་སྔགས་ཕྲེང་ཁ་དོག་དམར་པོ་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱུང་། སློབ་དཔོན་གྱི་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀར་པད་ཉིའི་སྟེང་དུ་ཧཱུྃ་ཡིག་གི་མཐར་གཡས་སྐོར་དུ་འཁོད་པར་མོས་པ་བྱས་ནས་སྔགས་འདིའི་རྗེས་ཟློས་ལན་གསུམ་གྱི་བར་དུ་གནང་བར་ཞུ་བྱས་ལ་སྔགས་ཡོངས་རྫོགས་ཚར་གསུམ་གྱི་རྗེས་ཟློས་བྱར་གཞུག །དེ་ལྟར་བྱས་པས་དང་པོས་འཁོད། གཉིས་པས་དབྱེར་མེད་དུ་བྱས། གསུམ་པས་བརྟན་པར་བྱས་པར་མོས་པ་མཛོད། སླར་ཡང་སློབ་དཔོན་གྱིས་མེ་ཏོག་གི་ཕྲེང་བ་སྔགས་ཀྱི་ཕྲེང་བར་བྱིན་གྱིས་བརླབས་ཏེ་ཁྱེད་རང་རྣམས་ཀྱི་སྤྱི་བོར་བཞག་པས་སྔགས་ཀྱི་དངོས་གྲུབ་བརྟན་ཅིང་ནུས་ལྡན་དུ་བྱས་པའི་མོས་པ་མཛོད། ཅེས་མེ་ཏོག་སློབ་མའི་མགོར་བཞག་ལ། བདག་ལ་ཇི་ལྟར་ཡོད་པ་བཞིན། །འདི་ལ་འགོ་བར་མཛད་དུ་གསོལ། ཞེས་ལན་གསུམ་ལ་སོགས་པ་བརྗོད། དེ་ནས་སློབ་དཔོན་གྱིས་གཏོར་མ་ལྷར་གསལ་བ་ཁྱེད་རང་རྣམས་ཀྱི་སྤྱི་བོར་བཞག་སྟེ་བཀའ་བསྒོས་ཤིང་ཕྲིན་ལས་ཐམས་ཅད་བསྒྲུབ་པར་རྗེས་སུ་གནང་བ་བྱིན་པའི་མོས་པ་མཛོད། དུས་གསུམ་སངས་རྒྱས་ཐམས་ཅད་ཀྱི། །ཞི་བའི་ཕྲིན་ལས་ཆེན་པོ་ཡིས། །ནད་དང་གནོད་པ་ཞི་བར་མཛོད། །ཚེ་དང་བསོད་ནམས་རྒྱས་པར་གྱིས། །གདུལ་བྱ་དབང་དུ་འདུ་བར་གྱིས། །བསྟན་ལ་གནོད་པ་གསད་པར་གྱིས། །དུས་གསུམ་སངས་རྒྱས་ཐམས་ཅད་ཀྱིས། །བྱིན་གྱིས་བརླབས་ཀྱི་ཁྲོ་བོ་ནི། །དབང་བསྐུར་ཕོ་ཉའི་ལས་མཛད་པ། །ཁྲོ་བོ་འདོད་པའི་རྒྱལ་པོ་ཡིས། །འདི་ཡི་བསྒྲུབ་བྱ་སྒྲུབ་པར་གྱིས། །དུས་གསུམ་སངས་རྒྱས་ཐམས་ཅད་ཀྱིས། །འགྲོ་བ་སེམས་ཅན་གདུལ་བྱའི་ཕྱིར། །མཁའ་འགྲོའི་གཟུགས་སུ་སྣང་མཛད་དེ། །དམ་ཚིག་སྟོང་གྲོགས་མཛད་གྱུར་པའི། །མཁའ་འགྲོ་སུམ་ཅུ་རྩ་གཉིས་ཀྱིས། །འདི་ཡི་བསྒྲུབ་བྱ་སྒྲུབ་པར་གྱིས། ཞེས་སློབ་མ་རེ་རེ་བཞིན་བརྗོད་ཚར་བ་དང་། དེ་ལྟར་བཀའ་བསྒོས་པས་ཁྲོ་བོ་འདོད་པའི་རྒྱལ་པོ་མཁའ་འགྲོ་སུམ་ཅུ་རྩ་གཉིས་འཁོར་དང་བཅས་པས་ཀྱང་དེ་ལྟར་བགྱིའོ་ཞེས་ཕྲིན་ལས་ཐམས་ཅད་བསྒྲུབ་པར་ཞལ་གྱིས་བཞེས་པའི་མོས་པ་མཛོད། ཅེས་བརྗོད་ལ་གཏོར་མ་སྔར་ཤུལ་དུ་བསྒྲིག །དེ་ནས་དམ་ཚིག་བསྒོ་བ་ནི་འདི་ལ་གསན་པས་ཁྱབ་པར་གདའ་སྟེ། དུས་གསུམ་སངས་རྒྱས་ཐམས་ཅད་ཀྱིས། །འགྲོ་བ་སེམས་ཅན་གདུལ་བྱའི་ཕྱིར། །དམིགས་མེད་ཐུགས་རྗེ་ལས་བྱུང་བའི། །ཐབས་ཀྱི་ཕྲིན་ལས་ཟབ་མོའི་དོན། །བདེན་ཞིང་བསླུ་བར་མི་འགྱུར་བའི། །གསང་ཆེན་འདི་ནི་སྒྲུབ་པར་གྱིས། །འདི་ནི་མཆོག་ཏུ་ངོ་མཚར་ཆེ། །ཕྲིན་ལས་སྙིང་པོ་ངོ་མཚར་ཅན། །གསང་བ་ལས་ཀྱང་ཆེས་གསང་ནས། །བསྒྲུབ་ལ་འབད་ན་འགྲུབ་འགྱུར་བས། །ནམ་ཡང་དོར་བར་མི་བྱ་ཞིང་། །སྤེལ་ན་དངོས་གྲུབ་ཉམས་པར་འགྱུར། །དེས་ན་ཁྱོད་ཀྱིས་ནམ་ཡང་ནི། །སྤེལ་ཞིང་བསྒྲག་པར་མི་བྱ་ཞིང་། །སྣོད་ལྡན་གཅིག་ལ་ནུབ་མི་བྱ། །ཞེས་གསུངས་པས་དེ་ལྟ་བུའི་དམ་ཚིག་དང་སྡོམ་པ་ལ་སྲུང་སྡོམ་ཚུལ་བཞིན་དུ་བགྱིའོ་སྙམ་པས་འདིའི་རྗེས་ཟློས་ལན་གསུམ་མཛོད། གཙོ་བོས་སོགས། རིགས་དང་མཐུན་པའི་ཡོན་དབུལ་བྱ། ཞེས་གསུངས་པས། རྗེས་གནང་ཟབ་མོ་ལེགས་པར་ཐོབ་པའི་བཀའ་དྲིན་གཏང་རག་གི་ཡོན་དུ་ཙཎྜན་དམར་པོས་བྱུགས་པའི་མཎྜལར་མེ་ཏོག་དམར་པོ་ལ་སོགས་པའི་ཚོམ་བུ་བཀོད་པ་ཉིད་རི་རབ་གླིང་བཞི་ཉི་ཟླ་ཟུང་གཅིག་ལྷ་མིའི་དཔལ་འབྱོར་མ་ཚང་བ་མེད་པས་ཡོངས་སུ་གང་བར་དམིགས་ཏེ་འབུལ་བར་ཞུ། དེ་ལྟར་མཎྜལ་ཕུལ་ནས་ལུས་ལོངས་སྤྱོད་ཐམས་ཅད་ཀྱང་སློབ་དཔོན་ལ་དྲིན་ལན་ཏུ་འབུལ། ཆ་ཤས་ནས་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས་ལན་གསུམ་མཛོད། དེང་ནས་བརྩམས་ཏེ་སོགས། དེ་ནས་ཤིས་པ་བརྗོད་ཅིང་སྨོན་ལམ་གདབ། །བཀའ་ཡི་རྒྱ་ཡིས་གདབ་བྱས་ལ། །ཞེས་གསུངས་པས། ཁྱེད་རང་རྣམས་ཁམས་གསུམ་གྱི་དབང་ཕྱུག་ཁྲོ་བོ་ཆེན་པོ་འདོད་པའི་རྒྱལ་པོའི་སྐུར་གྱུར་པ་ལ་སློབ་དཔོན་གྱིས་མེ་ཏོག་གི་ཆར་འབེབས་ཤིང་ཤིས་པ་བརྗོད་པའི་ཚིགས་སུ་བཅད་པས་ཀྱང་མངའ་གསོལ་བའི་མོས་པ་མཛོད། ཕུན་སུམ་ཚོགས་པ་སོགས་དང་། །འབད་དང་རྩོལ་བས་མ་གོས་པའི། །ཞེས་སོགས་ཤིས་བརྗོད་ཅི་ལྟར་རིགས་པ་བྱ། དེ་ལྟར་ན་གངས་ཅན་བསྟན་པའི་མངའ་བདག་རྗེ་བཙུན་ས་སྐྱ་པའི་ཟབ་ཆོས་དམར་པོ་སྐོར་གསུམ་གྱི་ནང་ནས་ཁྲོ་བོ་འདོད་པའི་རྒྱལ་པོའི་རྗེས་སུ་གནང་བ་ལེགས་པར་གསན་པ་ཡིན་པས་རང་རང་གིས་གསང་བའི་ཚུལ་གྱིས་ཉམས་སུ་ལེན་པ་དང་། སྣོད་མིན་ལ་བབ་ཅོལ་དུ་མི་སྟོན་ཅིང་། སྣོད་དང་ལྡན་ངེས་པ་ལ་བཀའ་རྒྱས་གདབ་ཅིང་སྤེལ་བ་སོགས་ཀྱི་སྒོ་ནས་རང་གཞན་གྱི་དོན་རྒྱ་ཆེན་པོ་མཛད་པ་དང་། དགེ་བའི་རྩ་བ་ཡོངས་སུ་བསྔོ་བ་དང་སྨོན་ལམ་རྣམ་པར་དག་པས་རྒྱས་གདབ་པ་འདི་ལྷན་ཅིག་ཏུ་གནང་བར་ཞུ། བསོད་ནམས་འདི་ཡིས་སོགས་དང་། །ཚེ་རིང་ནད་མེད་འབྱོར་ལྡན་ཞིང་། །འགྲོ་ཀུན་རྟག་ཏུ་འདུན་པ་དང་། །ཇི་ལྟར་བསམ་པའི་དོན་རྣམས་ཀུན། །ཆོས་བཞིན་འགྲུབ་པ་ཉིད་གྱུར་ཅིག །ཅེས་སོགས་བསྔོ་སྨོན་བྱ། ཚོགས་ཀྱི་ཡོ་བྱད་ཡོད་ན་ནང་མཆོད་ལྟར་བྱིན་གྱིས་བརླབས་ནས། ཕུད་མདུན་བསྐྱེད་ལ་གཏོར་སྔགས་ཀྱིས་འབུལ། དེ་ནས་རང་དང་སློབ་མ་རྣམས་ཀྱིས་ཚིམས་པར་ལོངས་སྤྱད་པའི་ལྷག་མ་སྤྱི་ལྟར་བཏང་། སློབ་མ་རྣམས་རང་གནས་སུ་བཀྱེའོ། །གསུམ་པ་རྗེས་ནི། མཆོད་པ་ཁ་གསོས་ལ། བསང་སྦྱང་བྱིན་བརླབ་མདུན་བསྐྱེད་ལ་མཆོད་བསྟོད་འདོད་དོན་གསོལ། ཡིག་བརྒྱ་ལན་གསུམ་དང་། མ་འབྱོར་པ་སོགས་ཀྱིས་བཟོད་པར་གསོལ། རྟེན་ཡོད་ན་བརྟན་བཞུགས་དང་། མེད་ན་ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། གནས་གསུམ་བསྲུང་། བསྔོ་སྨོན་ཤིས་བརྗོད་རྒྱས་པར་སྤེལ་ཅིང་ལས་ཀྱི་རྗེས་མི་མངོན་པར་བྱའོ། །འདིའི་བསྙེན་པ་བྱེད་ན། འཁོར་ལོ་ལ་བརྟེན་པ་དང་། མ་བརྟེན་པ་གཉིས་ལས། དང་པོ་ནི། གནས་དབེན་པར་ཚེས་བརྒྱད་རྒྱལ་ཕུར་འཛོམ་པའི་དུས་སོགས་དུས་ཚེས་དགེ་བར་མདུན་ཏུ་བྲིས་སྐུ་དང་མཆོད་གཏོར་བཤམ། འཁོར་ལོ་ཚུལ་བཞིན་བྲིས་པ་གཏོར་མའི་རྒྱབ་དང་། ཐ་ཅན་འཁོར་ལོ་བཟླས་པའི་བར་རྐང་པའི་མཐེབ་འོག་ཏུ་གནོན་རྒྱུ་སོགས་སྟ་གོན་བྱ། དེ་ནས་མཚམས་དམ་པར་བཅད་ལ། ཐུན་གསུམ་མམ་བཞིའི་རིམ་པས་བདག་བསྐྱེད་སྒྲུབ་ཐབས་ལྟར་སྔོན་ཏུ་འགྲོ་བས། མདུན་བསྐྱེད་ཀྱི་འཁོར་ལོ་རང་གིས་བསྒོམས་པ་ལྟར་ལྷར་བསྐྱེད་ནས་བསྙེན་སྒྲུབ་སྦྲགས་མའི་ཚུལ་དུ། ཐུན་རེ་རེ་བཞིན་སྔགས་རིང་བཞི་བརྒྱ་རེ་བཟླ། དེ་ལྟ་བུ་ཞག་ཉེར་གཅིག་ཏུ་བགྱིས་པས་ཆོག་པར་གསུངས། ཐུན་གཉིས་སམ་ཕྱི་ཐུན་གྱི་མཇུག་ཏུ་གཏོར་མ་འབུལ་བ་སོགས་སྤྱི་ལྟར་བྱའོ། །གཉིས་པ་ནི། འཁོར་ལོའི་བཅའ་གཞི་དང་མདུན་བསྐྱེད་གསལ་འདེབས་མི་དགོས་པ་མ་གཏོགས་གཞན་གོང་བཞིན་ནོ། །སྤྱིར་འདིའི་མན་ངག་ལ་འཁོར་ལོ་བྲི་བ། རབ་གནས། བསྙེན་པ། སྒྲུབ་པ། ལས་སྦྱོར། འགྲུབ་པའི་རྟགས། གེགས་བསལ་བ། སྤོག་ཆོག །སྦྱིན་སྲེག །རླུང་འཁོར་བསྐོར་བ། ནང་སྒྲུབ། གསང་སྒྲུབ། དྲིལ་སྒྲུབ་ལས་ཚོགས་ཏེ་རྣམ་གྲངས་བཅུ་བཞིའི་སྒོ་ནས་གཏན་ལ་འབེབས་པའི་ཚུལ་ཞིབ་པར་བཀའ་བཞི་པ་དཔལ་ལྡན་བཟང་པོས་མཛད་པའི་བསྙེན་སྒྲུབ་ཆེན་པོ་ནོར་བུ་གསལ་འབར་དང་། ས་སྐྱ་པའི་དབང་གི་རླུང་འཁོར་སོགས་སྦྱར་ཏེ་བརྒྱུད་ལྡན་གྱི་བླ་མའི་ཞལ་ལུང་ལྟར་རྟོགས་པར་བྱ་བ་ཁོ་ནའོ། །འདོད་རྒུའི་དཔལ་སྟེར་ཁྲོ་བོ་ཆེའི། །རྗེས་གནང་དཔག་བསམ་སྙེ་མ་གང་། །གསལ་བར་བཀོད་འདིས་ས་གསུམ་ན། །ཕན་བདེའི་ཆར་ཆེན་འབེབས་གྱུར་ཅིག །ཅེས་པའང་རྗེ་ས་སྐྱ་པ་ཆེན་པོའི་གསུང་རབ་ལ་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱིས་མཆན་བུའི་སྒོ་ནས་གསལ་བར་མཛད་པའི་དགོངས་དོན་མཁས་མཆོག་ངག་དབང་བརྟན་པའི་རྡོ་རྗེས་ལེགས་པར་ཕྱེ་བ་གཞིར་བཞག་སྟེ། སྐབས་སུ་བབ་པའི་བསྣོན་འཕྲི་ཅུང་ཟད་བཅས་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བཀླགས་པས་གྲུབ་པར་བསྡེབས་པ་སརྦ་དཱ་ཤྲེ་ཡོ་བྷ་བ་ཏུ།། །། ༈

[edit]

dpal 'dod pa'i rgyal po'i rjes gnang gi cho ga 'dod dgu'i snye ma/ @#/_/dpal 'dod pa'i rgyal po'i rjes gnang gi cho ga 'dod dgu'i snye ma zhes bya ba bzhugs so/__/'dod pa'i dngos grub mchog stsol ba/__/bla ma khro bo'i rgyal po la/__btud nas de yi rjes gnang ni/__/phun tshogs 'dod dgu'i snye ma 'bri/__'di la gsum/__sbyor ba/__dngos gzhi/__rjes so/__/dang po ni/__zla ba gang yang rung ba'i tshes brgyad dang skar ma rgyal 'dzom pa'i tshe/__snod dang mi ldan pa'i skye bos dben zhing yid dang mthun pa'i gnas su maN+Dalar rdul tshon dmar pos zla gam dmar po sgo gcig pa'i nang du pad+ma 'dab brgyad kyi lte bar lcags kyu bri ba'am tshon phung dmar po bkod la many+dzi'i steng du bzhag__/de'i mthar chu bzhi sngon du 'gro ba'i mchod pa dang /__sgrub thabs nas bshad pa lta bu'i gtor ma bsham/__slob dpon gyi mdun du rdo rje dril bu bzhag__/gzhan yang me tog dmar po'i maN+Dal sogs dgos pa'i yo byad rnams 'du bya/__mchod pa kye rdor kho bos byas pa'i rig byed ma'i rjes gnang gi zin bris ltar/__ltar byin gyis brlab/__rje dkon mchog lhun grub pas mdzad pa'i sgrub thabs nas 'byung ba ltar bdag bskyed bsgoms la bzlas pa bya/__gzhal yas khang dang gdan rang la bsdus nas mdun gyi maN+Dal bsang sbyang /__/stong pa'i ngang las pa~M las pad+ma dmar po zhes pa nas/__de gsum yang 'od zer kha dog dmar po'i rnam par zhu nas sku gsung thugs dang dbyer med du gyur/__ces pa'i bar bdag bskyed bzhin las/__rang nyid ces pa'i tshig dor la mdun bskyed kyi tshul du bsgrub/__oM shrI badz+ra TAk+ki rA dza sa pa ri wA ra zhes pa re re'i mgor sbyar ba'i oM ni rI hU~M khaM swA hA/__oM badz+ra nai bi te hU~M kha~M swA hA/__oM sarba saM sho d+ha ni swA hA/__oM dzaHhU~M ba~M hoHkhaM raM ma hA ar+g+haM pra tIts+tsha swA hA/__de bzhin du puSh+pe nas shap+da'i bar sbyar la mchod/__mthar d+ha rmAr Ni tas rol mo dbul/__bstod pa rgyas bsdus ci ltar rigs pas bstod/__gtor ma byin rlabs rgyas bsdus gang rung kye rdor ltar bya/__spyan 'dren mi dgos/__sgrub thabs ltar gtor ma phul/__oM badz+ra puSh+pe AHhU~M sogs kyis mchod cing bstod la 'dod don gsol/__'jig rten pa'i gtor ma sgrub thabs ltar phul/__thugs rgyud bskul bar dmigs la bzlas pa ji ltar rigs pa byas mthar/__bcom ldan 'das bdag dang sems can thams cad la mchog dang thun mong gi dngos grub ma lus pa stsal du gsol/__zhes gsol ba 'debs pa ni slob dpon gyi bya ba'o/__/gnyis pa dngos gzhi slob ma la bya ba'i rim pa ni/__slob ma kye rdo rje'am 'khor lo bde mchog gi dkyil 'khor du dbang bzhi rdzogs par thob cing dam tshig dang ldan pa/__rim gnyis kyi rnal 'byor la gnas shing /__bstan pa dang sems can gyi don tu chos 'di don tu gnyer ba bdun tsam ji ltar 'os pa khrus byas/__phyag dang yon phul nas gus pas 'khod pa la/__me tog bkye bsdu grub rjes/__slob dpon gyis sems bskyed gsal btab nas/__de la 'dir gangs can bstan pa'i mnga' bdag rje btsun sa skya pa yab sras la mdo rgyud kyi gdams pa rgya mtsho lta bu zhig phyag tu babs pa'i nang nas mchog tu zab pa/__snyan brgyud gser chos bcu gsum gyi ya gyal/__thun mong bsgrub pas mchog zhar la 'byung ba dmar po skor gsum zhes grags pa ni/__dpal kye rdo rje'i rtsa bshad kyi rgyud gsum nas gsungs pa la brten nas slob dpon chen po lhan cig skyes pa'i rol pa dang /__Dom+bi he ru kas bkral ba'i rje btsun ma ku ru kul+le'i chos skor dang /__bde mchog rdo rje mkha' 'gro'i rgyud la brten nas mi dbang in+d+ra b+hU ti dang slob dpon nag po pa la sogs pas bkral ba'i dpal tshogs kyi bdag po dmar chen gyi chos skor dang /__yang dpal 'khor lo bde mchog la sogs pa'i rgyud la brten nas slob dpon rdo rje gdan pa la sogs pas bkral ba'i dpal 'dod pa'i rgyal po'i chos skor dang gsum du yod cing /__de nas rim pa bzhin tu brgyud pa'i man ngag rgyal bas lung bstan pa'i skyes bu rdo rje 'chang kun dga' bzang po nas brgyud pa dang /__yar klung pa seng ge rgyal mtshan khu dbon nas bsam gtan gling pa nam mkha' bsod nams sogs la brgyud pa dang /__dwags po bkra shis rnam rgyal nas byang sems dkon mchog grags pa sogs la brgyud pa'i lugs srol gsum tsam yod pa las/__'dir rje btsun sa skya pa yab sras khu dbon rnams kyis mi dang mi ma yin gyi che dgu grangs las 'das pa dbang du bsdus nas rnam grol thar pa'i lam po cher dkri bar mdzad pa la brten nas rgyal bod hor gsum du sangs rgyas kyi bstan pa yongs su rdzogs shing dri ma med pa dar zhing rgyas pa'i cha rkyen du gyur la/__rgyal ba rdo rje 'chang kun dga' bzang pos kyang bstan pa dang sems can gyi don 'ba' zhig la dgongs pa'i yi dam gyi lha 'di dag gi sgrub pa nyams gzhes las tshogs sogs mdzad pa la brten nas bstan pa spyi dang bye brag dpal ldan sa skya pa'i bstan pa rmad du byung ba deng sang gi bar du dar rgyas rgyun mi chad pa'i rten 'brel khyad par can du gyur pa la sogs pa yon tan gyi tshogs bsam gyis mi khyab pa dang ldan pa'i dmar po skor gsum gyi nang nas/__da lam 'dir khams gsum dbang du sdud par byed pa dpal 'dod pa'i rgyal po'i chos skor yin/__de la'ang rdo rje gdan pas bkral ba nas brgyud pa rje btsun ba ri lo tsA bas rgyal gyi lcags thang pa chen po la gnang /__de'i drung du chos rje sa skya pa chen pos gsan nas 'phrang brag dmar gnyis kyi dge 'dun gyi tshogs ma dad pa dad par mdzad cing dbang du bsdus nas thub pa'i bstan pa shin tu dar bar mdzad pa'i nus pa dang ldan pa'i byin rlabs can 'di nyid la/__yab rkyang du sgrub pa dang /__yum rkyang du sgrub pa dang /__yab yum sbags te sgrub pa rnams su yod pa las/__'dir yab yum sbags sgrub kyi rjes su gnang ba bsgrub pa la/__slob dpon gyi bya ba rnams sngon tu song nas/__khyed rang rnams kyi ngo skal du gyur pa slob ma'i bya ba la/__thog mar slob dpon la sangs rgyas rdo rje 'chang dngos yin snyam pa'i 'dun pa dang ldan pas rjes gnang zab mo zhu ba'i yon tu maN+Dal zhig 'bul bar zhu/__de ltar maN+Dal phul nas gsol ba 'debs pa 'di'i rjes zlos lan gsum mdzod/__rdo rje rnal 'byor dbang phyug gtso/__/gsang ba'i cho ga bla na med/__/dbang du byed pa'i rig sngags mchog__/bdag la nges par stsal du gsol/__/rgyud dag par bya ba'i slad du dmigs pa 'di bzhin mdzod/__mdun gyi nam mkhar bla ma dang gnyis su med pa'i khro bo 'dod pa'i rgyal po la sangs rgyas dang byang chub sems dpa' mkha' 'gro sum cu rtsa gnyis la sogs pa dpa' bo dang rnal 'byor ma'i tshogs bsam gyis mi khyab pas bskor nas bzhugs pa'i spyan sngar khyed rang rnams 'khod nas sdig pa bshags pa la sogs pa'i yan lag bdun pa bgyid snyam pas 'di'i rjes zlos mdzod/__dkon mchog gsum la bdag skyabs mchi sogs lan gsum/__zhes pas rgyud dag par byas nas/__dpal sa skya pa chen pos mdzad pa'i rtsa ba'i yi ge las/__slob dpon rdo rje 'chang dang ni/__/slob ma khro bo 'dod rgyal du/__rim pa bzhin tu bsgom nas ni/__zhes gsungs pas dmigs pa 'di bzhin tu mdzad par zhu/__slob dpon khro bo 'dod pa'i rgyal po'i skur gsal ba la/__yang dag par rdzogs pa'i sangs rgyas rdo rje 'chang nyid gdul bya dbang du bsdus nas sangs rgyas kyi bstan pa la gzhug pa'i ched du khro bo 'dod pa'i rgyal po'i skur bstan pa dngos yin snyam pa'i mos gus drag po mdzad pa'i rkyen gyis/__slob dpon gyi thugs ka'i hU~M yig dmar po de las 'od zer gyi tshogs bsam gyis mi khyab pa byung /__khyed rang rnams kyi lus la phog__/tshe thog ma med pa nas bsags pa'i sdig pa dang sgrib pa/__bag chags dang bcas pa dang phung khams skye mched du snang ba thams cad sbyangs te lus 'od kyi gong bur gyur par mos pa mdzod/__de nyid la dmigs te slob dpon gyis/__oM swa b+hA wa nas haM zhes brjod pas lus 'od phung du gyur pa dang bcas pa'i snang srid 'khor 'das kyis bsdus pa'i chos thams cad rang bzhin gyis ma dmigs pa'i stong pa nyid du gyur par mos pa mdzod/__stong pa'i ngang las pa~M las pad+ma dmar po 'dab ma brgyad pa'i lte bar ra~M las nyi ma'i dkyil 'khor gyi steng du khyed rang rnams kyi sems nyid gnyis su med pa'i ye shes kyi ngo bor gyur pa'i hU~M dmar po/__/de las zhes sogs dang /__de 'od du zhu ba las/__khyed rang rnams khro chen 'dod pa'i rgyal po zhes sogs nas ye shes kyi me 'bar ba'i dbus na bzhugs pa'i yab kyi thugs kar pad+ma dang nyi ma'i steng du hU~M yig dmar po dang bcas pa gsal lam ste yod par mos pa mdzod/__de nas slob dpon la mos gus mdzad pas/__slob dpon gyi thugs ka nas 'od zer 'phros/__mdun bskyed 'dod rgyal yab yum dang /__phyogs bcu'i sangs rgyas dang byang chub sems dpa' thams cad kyi thugs kar phog pas/__de rnams kyi thugs ka nas khro bo 'dod pa'i rgyal po yab yum bsam gyis mi khyab pa oM badz+ra sa mA dzaH__zhes pas spyan drangs pa la/__slob dpon gyis oM badz+ra puSh+pe sogs lngas mchod/__zhes mchod nas/__dzaHhU~M ba~M hoH__zhes brjod pas khyed rang rnams 'dod rgyal du gsal ba la gnyis su med par thim par mos pa mdzod/__slar yang slob dpon gyi thugs ka'i hU~M las 'od zer 'phros pas zhes sogs nas/__dbang lha spyan drang /__slob dpon gyis mchod cing gsol ba btab pas/__sangs rgyas rnams kyis sogs nas dbu brgyan par mos pa mdzod/__khyed rang rnams kyi dpral bar sogs nas/__zhu nas khyed rang rnams kyi lus ngag yid gsum dang dbyer med du gyur par mos pa mdzod/__de ni rjes gnang gi gzhi dgod pa yin/__rjes gnang dngos la/__brgyud pa'i man ngag yod pa'i lung /__de yi blang thabs ma shes na/__/bsgrubs kyang dngos grub bul pa'am/__/yang na 'byung bar mi 'gyur gsungs/__/zhes 'byung bas/__bzlas pa'i sngags kyi lung blang ba'i slad du dmigs pa 'di bzhin mdzod/__slob dpon 'dod pa'i rgyal por gsal ba'i thugs kar pad+ma dang nyi ma'i steng du hU~M yig dmar po'i mthar bzla bya'i sngags kyi phreng ba kha dog dmar po g.yas skor du 'khod nas yod par mos pa byas/__khyed rang rnams 'dod rgyal du gsal ba'i snying gar pad+ma dang nyi ma'i steng du hU~M yig dmar po zhig gsal btab/__tsan+dan dmar pos byugs pa'i maN+Dalar me tog dmar po'i tshom bu bkod nas/__sngags kyi bzlas lung zhu ba'i yon tu dmigs te maN+Dal zhig mdzad par zhu/__gsol ba 'debs pa 'di'i rjes zlos lan gsum mdzod/__dus gsum sangs rgyas thams cad kyi/__/dmigs med thugs rje las 'khrungs pa'i/__/phrin las dngos grub 'byung ba'i phyir/__/'dir ni rjes su gnang bar mdzod/__/de ltar gsol ba 'debs pa'i slob ma la slob dpon gyis spro ba dri bar byas pa'i mos pa mdzod/__'gro ba sems can don slad du/__/dus gsum sangs rgyas thams cad kyi/__/dmigs med thugs rje las byung ba'i/__/thabs kyi phrin las zab mo'i don/__/bden zhing bslu bar mi 'gyur pa'i/__/gsang chen 'di la khyod dad dam/__/zhes pa'i lan btab par mos pas 'di'i rjes zlos mdzod/__'gro ba sems can sogs nas/__/gsang chen 'di la bdag dad do/__/lan gcig__/de ltar lan btab nas slob dpon la mos gus byas pas/__slob dpon gyi thugs ka'i hU~M yig sngags phreng dang bcas pa las sngags phreng kha dog dmar po mar me gcig las gnyis chad kyi tshul du byung /__slob dpon gyi zhal nas thon/__khyed rang rnams kyi zhal du zhugs/__thugs kar pad nyi'i steng du hU~M yig gi mthar g.yas skor du 'khod par mos pa byas nas sngags 'di'i rjes zlos lan gsum gyi bar du gnang bar zhu byas la sngags yongs rdzogs tshar gsum gyi rjes zlos byar gzhug__/de ltar byas pas dang pos 'khod/__gnyis pas dbyer med du byas/__gsum pas brtan par byas par mos pa mdzod/__slar yang slob dpon gyis me tog gi phreng ba sngags kyi phreng bar byin gyis brlabs te khyed rang rnams kyi spyi bor bzhag pas sngags kyi dngos grub brtan cing nus ldan du byas pa'i mos pa mdzod/__ces me tog slob ma'i mgor bzhag la/__bdag la ji ltar yod pa bzhin/__/'di la 'go bar mdzad du gsol/__zhes lan gsum la sogs pa brjod/__de nas slob dpon gyis gtor ma lhar gsal ba khyed rang rnams kyi spyi bor bzhag ste bka' bsgos shing phrin las thams cad bsgrub par rjes su gnang ba byin pa'i mos pa mdzod/__dus gsum sangs rgyas thams cad kyi/__/zhi ba'i phrin las chen po yis/__/nad dang gnod pa zhi bar mdzod/__/tshe dang bsod nams rgyas par gyis/__/gdul bya dbang du 'du bar gyis/__/bstan la gnod pa gsad par gyis/__/dus gsum sangs rgyas thams cad kyis/__/byin gyis brlabs kyi khro bo ni/__/dbang bskur pho nya'i las mdzad pa/__/khro bo 'dod pa'i rgyal po yis/__/'di yi bsgrub bya sgrub par gyis/__/dus gsum sangs rgyas thams cad kyis/__/'gro ba sems can gdul bya'i phyir/__/mkha' 'gro'i gzugs su snang mdzad de/__/dam tshig stong grogs mdzad gyur pa'i/__/mkha' 'gro sum cu rtsa gnyis kyis/__/'di yi bsgrub bya sgrub par gyis/__zhes slob ma re re bzhin brjod tshar ba dang /__de ltar bka' bsgos pas khro bo 'dod pa'i rgyal po mkha' 'gro sum cu rtsa gnyis 'khor dang bcas pas kyang de ltar bgyi'o zhes phrin las thams cad bsgrub par zhal gyis bzhes pa'i mos pa mdzod/__ces brjod la gtor ma sngar shul du bsgrig__/de nas dam tshig bsgo ba ni 'di la gsan pas khyab par gda' ste/__dus gsum sangs rgyas thams cad kyis/__/'gro ba sems can gdul bya'i phyir/__/dmigs med thugs rje las byung ba'i/__/thabs kyi phrin las zab mo'i don/__/bden zhing bslu bar mi 'gyur ba'i/__/gsang chen 'di ni sgrub par gyis/__/'di ni mchog tu ngo mtshar che/__/phrin las snying po ngo mtshar can/__/gsang ba las kyang ches gsang nas/__/bsgrub la 'bad na 'grub 'gyur bas/__/nam yang dor bar mi bya zhing /__/spel na dngos grub nyams par 'gyur/__/des na khyod kyis nam yang ni/__/spel zhing bsgrag par mi bya zhing /__/snod ldan gcig la nub mi bya/__/zhes gsungs pas de lta bu'i dam tshig dang sdom pa la srung sdom tshul bzhin du bgyi'o snyam pas 'di'i rjes zlos lan gsum mdzod/__gtso bos sogs/__rigs dang mthun pa'i yon dbul bya/__zhes gsungs pas/__rjes gnang zab mo legs par thob pa'i bka' drin gtang rag gi yon du tsaN+Dan dmar pos byugs pa'i maN+Dalar me tog dmar po la sogs pa'i tshom bu bkod pa nyid ri rab gling bzhi nyi zla zung gcig lha mi'i dpal 'byor ma tshang ba med pas yongs su gang bar dmigs te 'bul bar zhu/__de ltar maN+Dal phul nas lus longs spyod thams cad kyang slob dpon la drin lan tu 'bul/__cha shas nas longs spyad du gsol snyam pas 'di'i rjes zlos lan gsum mdzod/__deng nas brtsams te sogs/__de nas shis pa brjod cing smon lam gdab/__/bka' yi rgya yis gdab byas la/__/zhes gsungs pas/__khyed rang rnams khams gsum gyi dbang phyug khro bo chen po 'dod pa'i rgyal po'i skur gyur pa la slob dpon gyis me tog gi char 'bebs shing shis pa brjod pa'i tshigs su bcad pas kyang mnga' gsol ba'i mos pa mdzod/__phun sum tshogs pa sogs dang /__/'bad dang rtsol bas ma gos pa'i/__/zhes sogs shis brjod ci ltar rigs pa bya/__de ltar na gangs can bstan pa'i mnga' bdag rje btsun sa skya pa'i zab chos dmar po skor gsum gyi nang nas khro bo 'dod pa'i rgyal po'i rjes su gnang ba legs par gsan pa yin pas rang rang gis gsang ba'i tshul gyis nyams su len pa dang /__snod min la bab col du mi ston cing /__snod dang ldan nges pa la bka' rgyas gdab cing spel ba sogs kyi sgo nas rang gzhan gyi don rgya chen po mdzad pa dang /__dge ba'i rtsa ba yongs su bsngo ba dang smon lam rnam par dag pas rgyas gdab pa 'di lhan cig tu gnang bar zhu/__bsod nams 'di yis sogs dang /__/tshe ring nad med 'byor ldan zhing /__/'gro kun rtag tu 'dun pa dang /__/ji ltar bsam pa'i don rnams kun/__/chos bzhin 'grub pa nyid gyur cig__/ces sogs bsngo smon bya/__tshogs kyi yo byad yod na nang mchod ltar byin gyis brlabs nas/__phud mdun bskyed la gtor sngags kyis 'bul/__de nas rang dang slob ma rnams kyis tshims par longs spyad pa'i lhag ma spyi ltar btang /__slob ma rnams rang gnas su bkye'o/__/gsum pa rjes ni/__mchod pa kha gsos la/__bsang sbyang byin brlab mdun bskyed la mchod bstod 'dod don gsol/__yig brgya lan gsum dang /__ma 'byor pa sogs kyis bzod par gsol/__rten yod na brtan bzhugs dang /__med na ye shes pa gshegs/__dam tshig pa rang la bstim/__gnas gsum bsrung /__bsngo smon shis brjod rgyas par spel cing las kyi rjes mi mngon par bya'o/__/'di'i bsnyen pa byed na/__'khor lo la brten pa dang /__ma brten pa gnyis las/__dang po ni/__gnas dben par tshes brgyad rgyal phur 'dzom pa'i dus sogs dus tshes dge bar mdun tu bris sku dang mchod gtor bsham/__'khor lo tshul bzhin bris pa gtor ma'i rgyab dang /__tha can 'khor lo bzlas pa'i bar rkang pa'i mtheb 'og tu gnon rgyu sogs sta gon bya/__de nas mtshams dam par bcad la/__thun gsum mam bzhi'i rim pas bdag bskyed sgrub thabs ltar sngon tu 'gro bas/__mdun bskyed kyi 'khor lo rang gis bsgoms pa ltar lhar bskyed nas bsnyen sgrub sbrags ma'i tshul du/__thun re re bzhin sngags ring bzhi brgya re bzla/__de lta bu zhag nyer gcig tu bgyis pas chog par gsungs/__thun gnyis sam phyi thun gyi mjug tu gtor ma 'bul ba sogs spyi ltar bya'o/__/gnyis pa ni/__'khor lo'i bca' gzhi dang mdun bskyed gsal 'debs mi dgos pa ma gtogs gzhan gong bzhin no/__/spyir 'di'i man ngag la 'khor lo bri ba/__rab gnas/__bsnyen pa/__sgrub pa/__las sbyor/__'grub pa'i rtags/__gegs bsal ba/__spog chog__/sbyin sreg__/rlung 'khor bskor ba/__nang sgrub/__gsang sgrub/__dril sgrub las tshogs te rnam grangs bcu bzhi'i sgo nas gtan la 'bebs pa'i tshul zhib par bka' bzhi pa dpal ldan bzang pos mdzad pa'i bsnyen sgrub chen po nor bu gsal 'bar dang /__sa skya pa'i dbang gi rlung 'khor sogs sbyar te brgyud ldan gyi bla ma'i zhal lung ltar rtogs par bya ba kho na'o/__/'dod rgu'i dpal ster khro bo che'i/__/rjes gnang dpag bsam snye ma gang /__/gsal bar bkod 'dis sa gsum na/__/phan bde'i char chen 'bebs gyur cig__/ces pa'ang rje sa skya pa chen po'i gsung rab la thams cad mkhyen pa dkon mchog lhun grub kyis mchan bu'i sgo nas gsal bar mdzad pa'i dgongs don mkhas mchog ngag dbang brtan pa'i rdo rjes legs par phye ba gzhir bzhag ste/__skabs su bab pa'i bsnon 'phri cung zad bcas bya bral ba 'jam dbyangs mkhyen brtse'i dbang pos bklags pas grub par bsdebs pa sarba dA shre yo b+ha ba tu//____//__!_