DKR-KABUM-11-DA-016-wylie
<div class="wylie-content"
@#/_/stag lha khri btsan mched brgyad kyi gsol mchod phrin las thogs med bzhugs/ oM swa sti/_zas sna gsang gsur sogs 'du byas la byin gyis brlabs te/_kyai/_chos nyid stong pa chen po'i rtsal/_/chos can rten 'byung sgyu ma'i 'phrul/_/'gag med cir yang 'char ba las/_/legs nyes stangs 'dzin phrin las myur/_/srid pa'i lha rabs mthu bo che/_/stag lha khri btsan mched brgyad ni/_/sku mdog bskal pa'i me ltar 'bar/_/spyan bgrad mche gtsigs khro gnyer 'khrugs/_/sku la ber dmar zangs khrab gsol/_/phyag g.yas ba dan dmar po 'phyar/_g.yon pas zhags pa dgra la 'debs/_/dbu la stag zhu bya sgros brgyan/_/sku la stag gzig slog pa gsol/_/rta smug rting dkar rgyan steng 'gyings/_/zhabs gnyis rol pa'i stabs kyis bzhugs/_/me rlung 'tshubs pa'i dbus na brjid/_/'khor du rang 'dra dpag med bcas/_/dad dang gdung bas spyan 'dren na/_/gnas 'dir byon la dgyes par bzhugs/_/thugs dang mthun pa'i dam tshig rdzas/_/cir yang 'char bas dgyes par bskang*/_/'gal 'khrul nyams chags mthol zhing bshags/_/'go ba'i lha mchog chen po rnams/_/gu ru'i rgyal tshab mkhas grub dbang*/_/skal bzang don brgyud nyi ma yi/_/spyan sngar khas blang dam bcas bzhin/_/bstan 'gro'i bde skyid 'phel ba dang*/_/khyad par dpal ldan dbyar rnga pa'i/_/lung rtogs chos kyi rgyal mtshan bsgrengs/_/bstan 'dzin skyes bu'i phrin las sgrubs/_/dge 'dun 'dus pa'i thugs mthun zhing*/_/bshad sgrub spang rtogs gong 'phel mdzod/_/bstan pa'i sbyin bdag mi nor srungs/_/snod bcud dge bcu'i dpal gyis mtho/_/bde skyid dbyar mtsho bzhin du rgyas/_/chos bzhin spyod pa'i gang zag la/_/'gal rkyen phyi nang bar chad srungs/_/mthun rkyen ji ltar bsam pa sgrubs/_/mdor na yid la gang dran pa'i/_/don kun lhun gyis 'grub par mdzod/_/ces brjod las mjug spyi ltar bsdu/_zhes pa'ang 'jam dpal ya ma rA dza'i rnal 'byor pa phyag rdzogs zung 'jug gi rtogs ldan phrin las blo gros nas rten bcas gsung bskul ngor mang+ga la shrI b+hU tis bris pa bzhed don lhun gyis 'grub pa'i rgyur gyur cig
