DKR-KABUM-19-DZA-013-wylie
<div class="wylie-content"
@#/__/yang zab pad+ma tshe yi snying thig gi rgyas pa'i sregs blugs 'chi med grub pa'i dga' ston zhes bya ba bzhugs so// @#/__/na mo gu ru A yur+dz+nyA na ye/_/mi 'gyur rtag brtan 'chi med tshe mtha' yas/_/khyab bdag bla ma pad+ma gar dbang du/_/nges pa rnyed nas spyi bor rtag mchod de/_/tshe dang ye shes rgyas pa'i sregs blugs spel/_/de la yang zab dgongs pa'i gter bcud pad+ma tshe yi snying thig gi las tshogs phrin las gser gyi thig le la brten nas tshe dang ye shes spel ba'i cho ga la gsum las/_rtsa ba'i dgongs pa rgyas pa'i las sgrub pa'i sbyin sreg dang*/_de zhi sreg tu bsgyur tshul/_sgrub pa'i khyad chos so/__/dang por sbyor dngos rjes te/_sbyor bar/_gter gzhung las/_phrin las me rlung la brten nas:_sngags kyi nus pa rgyas pa dang:_rtags mtshan rno ba'i thabs mchog ni:_sa yi cho ga sngon 'gro bas:_stegs bur bris brkos thab bzhengs la:_mtshan nyid ldan pa'i bud shing brtsigs:_rdzas dang mchod pa bshams nas kyang:_byin rlabs cho ga'i rim pa ni:_zhes sogs kyis bstan pa ltar tshe dang ye shes rgyas pa sogs gtso bor sgrub pa'i skabs su gnas dkyil 'khor gyi byang phyogs sam/_chos rje sde dpon gyi gnas sogs tshe bsod dbang rlung dar rgyas su gyur par/_dus ra ba bzhi'i yar tshes la dros chen nas nyin phyed tshun chad du/_phyogs dkyil 'khor ram 'byung ba'i byang du rang gi mdun phyogs par byas te/_gang du bya ba'i gnas der sa'i cho ga rgyas pa'am/_bsdu na dkar gtor gser skyems dang bcas pa 'bru tshom gyi steng du bshams la/_rang nyid skad cig gis pad+ma dbang chen rta mchog rol ba'i skur gyur/_hrIHpad+mAn+ta kr-ita badz+ra kro d+ha h+ya gr-I wa sarba big+h+nAn ha na ha na hU~M phaTa?H_ces brgya'am nyer gcig sogs bzla/_de nas rta sngags kyi bsang chu gtor mar bran te/_raM yaM khaM gis bsregs gtor bkrus/_stong pa'i ngang las rin po che las grub pa'i snod yangs shing rgya che bar gtor ma kha dog dri ro nus pa phun sum tshogs par gyur/_oM AHhU~M lan gsum/_ha ho hrIHsa byin gyis brlabs/_b+hU mi pa ti sa pa ri wA ra badz+ra sa mA dzaHsa spyan drangs/_b+hU mi pa ti sa pA ri wA ra a kA ro mu sogs gsum gyis gtor ma bsngos la/_gang dag 'dir gnas lha dang klu/_/gnod sbyin srin po'am gzhan dag la/_/dkyil 'khor don du sa phyogs 'di/_/bdag zhu khyed kyis bstsal du gsol/_/zhes lan gsum gyis sa blangs/_sa'i gzhir dri bzang dang*/_ba byung gi chag chag gdab/_lag g.yas rdo rje dang bcas sa la bzhag ste rtsa sngags brgya rtsa brgyad dang*/_oM ha na ha na kro d+ha hU~M phaTa?H_ces lan nyer gcig bzlas pas kun rdzob kyi sbyang ba dang*/_chos thams cad stong nyid du mos pa don dam pa'i sbyang ba tsam byas rjes/_zhing sa bzang po dang*/_rgyal po'i bang mdzod kyi 'og sogs bkra shis pa'i sa las brtsigs pa'i stegs bu gru bzhi khod snyoms par byas pa'i steng du thab khung gru bzhi rgyar khru do/__/dpangs su khru gang ngam sor bcu gnyis pa'i steng du gzhi dang mi zlos pa'i tshon ser pos thab khung khru phyed dam mtho do/__/mchu dang kha khyer sor bzhi pa re re ste gsum ka'ang gru bzhir bcad pa'i thab dbus su 'khor lo rtsib brgyad lte bar rin po che ser po sor drug pas mtshan pa/_kha khyer bags kyis gzhol ba la nor bu'i phreng ba dang*/_zur bzhir rin po che 'bar bas mtshan pa bdud rtsi lnga dang dri ser po'i chab kyis phyi rol byugs la me tog ser po gcal du dgram/_brkos thab tu byed na stegs bu'i dbus su mchu dma' ba dang*/_thab kyi zab brkos la/_de nas mchu sor brgyad phyir 'gyed pa nas kha khyer rgya dpang sor brgyad pa bya ba tsam khyad par yin/_bris thab tu byed na stegs bu dri bzang gi ba byung lnga bdud rtsi dang sbyar ba'i chag chag btab la/_tshangs zur gyi thig spyi mthun du btab pa'i dbus nas logs ngos su khru re gzhal ba'i sar gru bzhi par bcad pa'i phyi rol tu sor brgyad pa'i mchu kha khyer gyis bskor/_thab dbus su 'khor lo rtsib brgyad pa'i lte bar sor drug pa'i rin po ches mtshan pa/_mu ran ser po g.yas bskor dang*/_de'i phyi kha khyer la nor bu rin po che'i phreng bas bskor ba bri/_bris brkos brtsig thab gang gi tshe yang bcad tshon sogs kyang ngur smig gis mtshon ji ltar rigs pa las nag po sogs tshon sel gyis ma phog pa gal che'o/_/bud shing tsan+dan dkar po dang*/_star kha kham bu shug pa sogs tsher ma dang*/_srog chags med pa'i 'bras bu can gyi shing 'o mar bcas pa gur gum gyi chab kyis bran pa khru gang tsam du gru bzhir brtsigs pa'i nang du me tshang bzhag_/rang gi g.yon phyogs su mchod stegs rten khebs sam/_dar ras ser po bkab pa'i khar many+dzi sogs kyi steng du 'das ma 'das kyi me gtor gnyis mar dang 'bru phye la mngar gsum rin po che gser sogs bsres pa'i gru bzhi ser po rgyan ldan nor bus mtshan pa so so gral stabs dang*/_g.yas g.yon du sman raka_/mdun du chu gnyis nyer spyod lnga cha gnyis phreng tshar dang*/_me lha'i mchod yon dang*/_zhabs bsil dung zhal gnyis su bshams/_rang gi g.yas su rdzas stegs la dar ras ser po bkab pa'i khar/_yam shing rtsig shing dang 'dra ba la sbom phra mthe bong las mi phra ba/_srid du khru gang ba/_'bras bu chags pa'i shing gi dbus kyi cha las byung ba la dri bzang gis byugs shing*/_mngar gsum dang*/_mar khur nyug pa/_'byor na lo ma 'bras bu dang bcas pa dgos la/_'das par bcu tshan ji ltar rigs pa dang*/_'jig rten par bdun tshan gcig dang*/_rdzas lhag bcas mngar gsum dri bzang dang sbyar ba'i mar khu/_dkar mngar rnam drug 'bru sman rin po che dri bzang dang sbyar ba'i zas mchog_/til dkar/_'bras ma grugs pa/_so ba dang*/_nas gra ma med pa/_sran dkar/_gro/_dUrba/_ku sha/_yungs kar/_shing tog kha ma gshags pa sogs zas sna tshogs pa dang*/_dar ser gyi gos zung*/_rdo thal med pa'i so rtsi rnams kyi snod kha dog ser zhing dbyibs gru bzhi pa 'ba' zhig par 'das ma 'das nyis rim du bsham/_slob dpon dang thab kyi bar du me yol gangs ri baM gyis mtshan pa bris pa dang*/_mdun du nang mchod/_las bum/_rdor dril gyi bar du dgang blugs kha sbyar ba bzhag_/gzhan yang me dar rlung g.yab ngang pa'i gshog pa'am ras ser po la raM ser po bris pa sogs nye bar mkho ba'i yo byad rnams legs par 'du bya/_slob dpon chas gos ser po bgo ste dga' ba'i sems kyis dar zab sogs stan ser po la bzang po'i 'dug stangs kyis phyogs gong du bshad pa ltar la 'khod/_cho ga dngos la/_brgyud 'debs skyabs sems nas bzung bdag bskyed bzlas pa lha ldang yan las byang pad+ma'i phreng ba bzhin mthar chags su byas nas las bum tshul bzhin bsgrub pa'am/_bsdu na bsang chur gong gi rta mgrin gyi sngags bzlas pas rdo rje'i sngags kyi rang bzhin du brlab/_de nas lag g.yas rdo rje gsor zhing snying khar bzung la/_oM ma hA badz+ra hU~M/_g.yon dril bu 'khrol zhing dkur brten la/_oM badz+ra gaN+De aH_thugs kar 'khyud rgyas/_oM sarba ta thA ga ta ma hA a nu rA ga Na badz+ra swa
b+hA wa at+ma ko\u0f85 haMH_zhes dam tshig gsum dran par byas la/_mchod rdzas rnams las byang bzhin byin gyis brlab/_bsreg rdzas rnams la bdud rtsi bran/_rdo rje rtse gcig pa'i rgyas reg la/_oM swA hAs rdzas rnams bkru/_yam shing la/_oM AHswA hA/_zhun mar la/_oM shrIM swA hA/_'bru rnams la/_oM dz+riM swA hA/_rdzas gzhan rnams la/_oM ku ru ku ru swA hA/_stong pa'i ngang las rdzas rnams rang rang gi ming yig dang po thig les brgyan pa las byung ba'i ye shes kyi bdud rtsi'i rang bzhin bsreg rdzas so so'i rnam par gsal bar gyur/_oM AHhU~M zhes 'bru gsum lan re'i mthar/_rdzas sngags/_oM bo d+hi br-ik+Sha ya swA hA/_zhes lan gsum sbrel ba dang*/_de bzhin tu 'bru gsum lan re'i mthar 'og gi rdzas sngags bcu gnyis po snga ma ltar du sbrel ba brjod pas byin gyis brlab par bya ba dang*/_de nas rgyal rigs kyi khyim dang*/_nor bu las byung ba'i me du ba med pa spar la/_oM ag+ne dz+wa la raM zhes thab kyi shar lhor bcug_hU~M hU~M hU~M zhes brjod cing rlung g.yab kyis g.yab la 'bar du gzhug_hrIH_lan bdun dang*/_ag+ne ye swA hA/_brjod pa'i blugs gzar gyi mar khus kyang gso bar bya'o/_/de nas ku sha sngo ljang dri ma med pa las bum gyi chus bran te/_hrIH_pad+mAn+ta kri ta badz+ra kro d+ha h+ya gr-I wa sarba big+h+nAn ha na ha na hU~M phaTa?H_zhes pas bsang la/_oM/_ku sha 'di ni gtsang zhing dge_/tshangs pa lha yi dag byed yin/_/dkon mchog gsum po mnyes byed pa/_/sa las skyes pa 'dab ma'i snying*/_/bdag gi bgegs rnams thams cad ni/_/zhi dang bkra shis mdzad du gsol/_/swA hA/_zhes ku sha rtse mo nyis gshibs rang gi g.yon ngos thab kyi kha khyer la rtse mo byang nas lhor te/_phyogs bzhir bkram pa'i rgyab rtsa non par bya/_slar rtse mo byang du bstan pa'i ba lang gi rna ba ltar ha cang mi ring bas g.yog go_/gnyis pa dngos gzhir 'jig rten pa dang*/_'das pa'i me lha mchod pa las/_dang po thab las sngags kyis bsang*/_swa b+hA was sbyang*/_stong pa'i ngang las mdun du hU~M las rgyas pa'i thab khung kha dog ser zhing dbyibs gru bzhi mu ran kha khyer dang bcas pa'i dbus su 'khor lo rtsibs brgyad pa'i lte bar rin po che ser po dang*/_kha khyer dang zur bzhir rin po ches mtshan pa/_dwangs shing sgrib pa med pa 'od zer kun tu 'phro ba/_rgya dpangs sogs mtshan nyid thams cad yongs su rdzogs pa'i nang du pad nyi la gnas pa'i raM yig yongs su gyur pa las rgyas pa'i me lha sku mdog ser po drang srong gi cha byad can/_gun+d+he dang bgrang phreng 'dzin pa/_ra skyes kyi steng na gnas shing drang srong gi tshogs kyis yongs su bskor bar gyur/_dri'i thig le gnas gsum du bkod tshul byas la/_de'i spyi bor oM dkar po/_mgrin par AHdmar po/_thugs kar hU~M sngon po/_bdag gi thugs ka nas 'od zer lcags kyu lta bu 'phros pas shar lho nas me lha 'khor bcas spyan drangs par mos la/_lag g.yas mi 'jigs pa'i rgya dang bcas pas rna ba'i thad du mthe bong g.yab bzhin par/_kye/_'jig rten tshangs dbang mgon gyi sras:_me lha'i rgyal po drang srong che:_DA kis dbang bskur phrin las bdag:_gnas 'dir da lta gshegs su gsol:_ag+ne de wa a kar+Sha ya dzaH_zhes spyan drangs/_las sngags kyis phyis 'brang gi bgegs bskrad/_oM ag+ne ye de wa sa pa ri wA ra ar+g+haM pra tIts+tsha swA hAs dung zhal gyi mchod yon phul/_de bzhin du pAd+yaM gis zhabs bsil phul/_dzaHhU~M ba~M hoH_oM ag+ne ye de wa sa ma ya tiSh+Tha lhan/_zhes bzhugs su gsol/_de nas nyer spyod rnam lnga/_oM ag+ne ye sa pa ri wA ra puSh+pe pra tIts+tsha swA hA/_de bzhin du/_oM ag+ne ye sa pa ri wA ra d+hU pe sogs sbyar la shab+da bar gyis mchod/_lha yi lha mchog dngos grub tshogs:_thogs med stsol ba'i phrin las bdag:_shar lho'i gdon gyi rgyal po che:_'khor dang bcas la phyag 'tshal bstod:_ces dang*/_de nas/_me lha cung zad 'dzum pa'i ljags dang gzar bu gnyis kyi kha la raM yig gis mtshan pas sregs blugs kyi bdud rtsi'i rgyun drangs te gsol bar bsam la/_lag gnyis khu tshur byas pa'i mtheb mdzub gnyis rtse sprad pa rin po che'i khu tshur gyis dgang blugs bzung nas/_oM ag+ne ye swA hA/_zhes g.yas pas blugs gzar bdun gyis g.yon pa'i dgang gzar bkang ba'i gzar bu kha sbyar pus mo'i nang las phyir mi 'da' bas g.yas su bskor zhing*/_oM ag+ne ye dI bya dI bya bi shud+d+he ma hA shrI ha bya ka bya ba h+na ya hU~M phaTa? swA hA/_zhes dang*/_bdag cag dpon slob bam/_yon mchod/_sogs kha bsgyur bas chog_/gang ltar yang*/_'khor dang bcas pas thog drangs mtha' yas pa'i sems can thams cad kyi tshe dang bsod nams ye shes thams cad puSh+TiM ku ru oM/_zhes spel tshig sbrel bas byon skyems lan gsum 'bul zhing me pra brtag_/dge bar mthong na gzengs bstod cing*/_bgegs dang bcas pa nyid na las sngags kyis me la bsang gtor dang bsrung bar bya'o/_/de nas rdzas rnams rim bzhin 'bul ba las/_khu ba'i rang bzhin rnams zhal dang*/_yam shing dUrba ku sha sogs 'od kyis dkyil 'khor dang*/_zho zan dang til sogs phyag gis mtshon par phul bar mos te/_lag gis bzung du btub pa rnams g.yas pa'i mtheb srin sbyar ba'i mchog sbyin gyi tshul dang*/_de las gzhan pa rnams blugs gzar gyis 'bul zhing*/_'bul sngags dang go rim ni/_yam shing la/_oM b+ho d+hi br-ik+Sha ye swA hA/_gzi brjid phun sum tshogs pa thams cad puSh+TiM ku ru oM/_mar khu la/_oM ag+ne ye swA hA/_'byor ba phun sum tshogs pa thams cad puSh+TiM ku ru oM/_zho zan la/_oM sarba sam+ba de swA hA/_bde ba phun sum tshogs pa thams cad puSh+TiM ku ru oM/_til la/_oM sarba pA paM da ha na badz+ra ye swA hA/_sdig pa med pa phun sum tshogs pa thams cad puSh+TiM ku ru oM/_'bras la/_oM badz+ra puSh+Ta ya swA hA/_bsod nams phun sum tshogs pa thams cad puSh+TiM ku ru oM/_so ba la/_oM badz+ra bi dzA ye swA hA/_nor dang 'bru phun sum tshogs pa thams cad puSh+TiM ku ru oM/_nas la/_oM ma hA be gA ye swA hA/_shugs phun sum tshogs pa thams cad puSh+TiM ku ru oM/_sran ma la/_oM ma hA ba la ya swA hA/_stobs phun sum tshogs pa thams cad puSh+TiM ku ru oM/_gro la/_oM badz+ra g+hasma re swA hA/_nad med pa phun sum tshogs pa thams cad puSh+TiM ku ru oM/_/dUrab la/_oM badz+ra A yu She swA hA/_tshe ring ba phun sum tshogs pa thams cad puSh+TiM ku ru oM/_ku sha la/_oM a pra ti ha ta badz+rA ye swA hA/_mi mthun pa'i phyogs thams cad srung ba phun sum tshogs pa thams cad puSh+TiM ku ru oM/_yungs kar la/_oM badz+ra sid+d+hi ye swA hA/_gdon bgegs 'joms pa phun sum tshogs pa thams cad puSh+TiM ku ru oM/_shing tog sogs zas sna tshogs la/_oM ag+ne ye dI bya dI bya bi shud+d+he ma hA shrI ha bya ka bya ba h+na ya hU~M phaTa? swA hA/_bdag cag dpon slob yon mchod 'khor dang bcas pa'i tshe dang bsod nams ye shes thams cad puSh+TiM ku ru oM/_de ltar lan bdun sogs ji ltar rigs pas phul/_de nas phrin las bcol ba ni/_drang srong chen po 'khor dang bcas pas bsreg rdzas lha'i zhal du stob pa dang me nyid ye shes mer byin gyis brlabs te bdag cag dpon slob bam/_yon mchod gang ltar yang*/_'khor dang bcas pa'i thog drangs mtha' yas pa'i sems can thams cad kyi tshe dang bsod nams dpal dang 'byor ba snyan grags dbang thang gzi brjid lang tsho zas nor longs spyod 'khor 'bangs mnga' ris chus srid la sogs pa dar zhing rgyas par mdzad du gsol/_mkhyen pa dang brtse ba mthu stobs nus rtsal nyams dang rtogs pa sa lam gyi yon tan dkar po'i bsam sbyor thams cad gong nas gong du 'phel par mdzad du gsol/_mdor na 'jig rten dang 'jig rten las 'das pa'i dge legs kyi yon tan ji snyed pa thams cad dbyar gyi chu gter dang*/_yar ngo'i zla ba bzhin du 'phel zhing rgyas par mdzad du gsol/_puSh+TiM ku ru oM/_zhes so/_oM AHhU~M mu~M/_ye shes kyi me lha thab kyi shar lhor gshegs par gyur/_gnyis pa 'das pa'i me lha mchod pa ni/_bud shing la las bum gyi chus bran te cung zad kha gsos nas/_sngar bzhin las sngags kyis bsangs/_oM ma hA shU n+ya ta dz+nyA na badz+ra swa b+hA wa at+ma ko\u0f85 haM gis sbyangs la/_hrIH_dam tshig me lha'i lto ba ru:_rin chen gzhal yas mtshan nyid rdzogs:_phyi gsal nang gsal 'od zer 'bar:_mdog lnga'i rtsig pa yid du 'ong:_pha gu drwa phyed mdzes pas spras:_mda' yab pu shu tog gis brjid:_'dod snam lha mo'i mchod sprin spro:_ye shes snang ba bsam mi khyab:_sgo bzhi rgyu 'bras rta babs brgyad:_chos 'khor ri dwags gdugs kyis brgyan:_ngo mtshar rgyan gyi bkod pa'i tshogs:_blo las 'das pa'i cho 'phrul shar:_sa ma ya maN+Da la b+h+rU~M:_pho brang de yi lte ba la:_pad+ma rin chen rma bya'i khri:_'dab stong ge sar zla ba'i steng:_'chi med mgon po snang mtha' yas:_gsung gi rdo rje tshe dpag med:_ces pa nas/_bsam yas bkod pa 'phro zhing 'du:_zhes pa'i bar gyis lha tshogs gsal btab nas/_hrIH_nub phyogs bde chen dbang gi zhing:_sogs kyis spyan drangs la/_bzhugs gsol nas bzung phyag 'tshal dang*/_mchod pa rgyas bsdus longs skabs dang bstun cing*/_bstod pa'i bar las byang gi dkyus bzhin song nas/_sreg rdzas kyi thog mar dgang blugs 'bul ba la/_dkyil 'khor gyi lha tshogs rnams cung zad 'dzum pa'i ljags rin po che ser po'i rnam pa can dang*/_gzar bu gnyis la b+h+rU~M yig 'od zer gyi phung por 'bar bas mtshan pas sreg blugs bdud rtsi'i rgyun drangs te gsol bar bsam la/_dgang blugs/_oM hU~M trAM hrIHaH_mUM lAM mAM pAM tAM a mA ra Ni dzI wan+ti ye swA hA/_a yur+dz+nyA na puSh+TiM ku ru oM/_zhes rtsa ba'i sgrub sngags rigs lnga spyi dril gyis phul la/_bdag cag dpon slob bam/_yon mchod sogs kha bsgyur bas chog la/_gang ltar yang*/_'khor dang bcas pas thog drangs mtha' yas pa'i sems can thams cad kyi tshe dang bsod nams dpal 'byor snyan grags ye shes yon tan thams cad 'phel zhing rgyas pa'i phrin las mdzad du gsol/_zhes spel tshig sbrel/_de nas yam shing la sogs pa'i rdzas gzhan rnams rtsa sngags rigs lnga spyi dril lan re'i mthar/_oM bo d+hi br-ik+Sha ya swA hA:_sogs rdzas sngags so sor sbyar ba'i bcu tshan re'i mthar spel tshig gong gi 'jig rten pa ltar dang*/_shing tog sogs zas sna tshogs la/_rtsa sngags rigs lnga spyi dril/_spel tshig_bdag cag dpon slob yon mchod 'khor dang bcas pa'i tshe dang bsod nams dpal 'byor ye shes thams cad puSh+TiM ku ru oM/_zhes sbrel ba sogs kyis ji ltar rigs par phul/_tshul de lta bus bcu tshan bcus brgya/_lngas lnga bcu/_gsum gyis sum cu sogs skabs dang sbyar te 'bul ba dang*/_yang khri 'bum la sogs grangs mang gsog dgos skabs rgyas pa kho na lcogs dka' bas/_gong bzhin rgyas pa thog mtha' bar gsum du lan re tsam dang*/_'dir tshe rgyas pa gtso bo'i dbang gis rtsa sngags rigs lnga spyi dril la rdzas sngags/_oM badz+ra A yu She sbyar la/_rdzas kyang dUrba kho nas phul ba dge zhing*/_spel tshig kyang*/_bdag cag dpon slob yon mchod 'khor dang bcas pa'i tshe dang bsod nams dpal 'byor ye shes thams cad puSh+TiM ku ru oM/_zhes sbyar/_yang rdzas thams cad 'bul bar 'dod na sngon du rgyas pa lan gsum sogs ci nus phul te mthar rdzas spungs byas te gong bzhin spyi dril kho nas phul kyang rung*/_mthar rdzas rnams rdzogs nas phrin las bcol ba ni/_bcom ldan 'das mgon po tshe dang ye shes dpag tu med pa'i dkyil 'khor gyi lha tshogs khyed rnams kyis bdag cag dpon slob sogs me lha bzhin 'dod don gsol bas/_lha tshogs kyi thugs ka nas spros pa'i sangs rgyas rnams kyis gser gyi bum pa bdud rtsi dang rin po ches gang ba 'dzin pas zla ba ser po la gnas pa'i bsgrub bya'i steng phyogs nas bdud rtsi dang rin po che'i char phab pas de'i lus dang khyim gang ste tshe dang bsod nams ye shes yon tan thams cad 'phel zhing rgyas par bsam mo/__/slar yang dgang blugs sngar bzhin bdun tshan gsum phul mthar/_oM badz+ra was+t+ra ya swA hA/_zhes gos zung dang*/_oM badz+ra tam+bu lA ya swA hA/_zhes so rtsi 'bul/_gtang rag gi mchod pa/_hrIH_dag pa'i zhing khams rab 'byams zhes pa nas shab+da pU dza AHhU~M bar dang*/_hrIH_dug lnga'i sogs sman raka dang*/_hrIH_'dod yon zhes gtor mchod skabs 'das pa'i me gtor phul/_hrIH_'chi bdag la sogs zhes sh+lau ka gcig dang*/_chos nyid gcig la zhes sh+lau ka bcas kyis bstod/_ma rnyed yongs su ma tshang sogs dang yi ge brgya pa lan gsum gyis nongs pa bshags la/_rlung nang du 'jug pa dang bcas/_dkyil 'khor lha tshogs rang la thim nas mi shigs pa'i thig ler ro gcig tu gyur par bsam zhing*/_oM A da ma ko tiSh+Tha badz+ra hU~M/_zhes 'khyud rgya dang bcas bsdu/_gsum pa rjes ni/_slar yang blugs gzar gyi mar khu gang phul nas/_oM ag+ne dz+wa la raM gyis me gso zhing*/_slar yang me lha cha byad yongs su rdzogs pa skad cig gis gsal bar gyur pa bsam la/_sngar bzhin dgang blugs lan gsum 'bul ba dang*/_yam shing la sogs pa'i rdzas lhag rnams ni smin gling phyag bzhes ltar lnga'am/_gsum/_re res kyang chog cing*/_dkyus kyi spel tshig dor nas rdzas sngags so so'i mthar/_bdag cag dpon slob yon mchod 'khor dang bcas pas thog drangs mtha' yas pa'i sems can thams cad kyis nongs pa'i nyes tshogs zhi ste/_srid zhi'i yon tan thams cad rgyas par gyur cig_/puSh+TiM ku ru oM/_zhes pas 'bul/_oM badz+ra was+t+ra'i sngags sogs kyis gos ser gyi gos zung dang*/_so rtsi bcas 'das pa'i mchod sreg gi skabs bzhin phul nas/_ag+ni ye sa pa ri wA ra puSh+pe pra tIts+tsha swA hA/_zhes dang*/_de bzhin/_d+hU pe sogs nas shab+da bar gyis mchod/_me ste bsreg bya za ba'i lha/_/drang srong chen po gdon gyi bdag_/shar lho me lha'i tshogs bcas la/_/mchod cing bstod de phyag kyang 'tshal/_/zhes pas bstod/_a kA ro'i sngags lan gsum gyis gtor ma bsngos la/_mchod sbyin gtor ma 'di bzhes la/_/zhes sogs kyis phrin las bcol te 'jig rten pa'i me gtor stob/_yi ge brgya pas nongs pa bshags/_bdag gi don dang gzhan gyi don/_/byin za khyed kyis sgrubs kyis gshegs/_/ji bzhin dus su slar byon la/_/bdag gi 'dod pa thams cad sgrubs/_oM ag+ne ye gats+tsha/_zhes rang gnas su gshegs su gsol/_a kA ro brjod cing 'o ma dang dri bzang gi chus me gzhil nas las rjes mi mngon par bya/_ho:_legs spyad dge ba'i sogs kyi dge bsngo dang*/_oM:_gsung gi bdag po sogs bkra shis pa'i tshigs su bcad pa ji rigs pas dge legs kyi snang bas yongs su khyab par bya'o/__/gnyis pa bsnyen pa'i kha skong sogs zhi ba'i sbyin sreg dgos pa'i skabs de nyid kha bsgyur tshul ni/_sa slong sogs rgyas sreg ltar la/_bkra shis pa'i sa la stegs bu gru bzhi thab khung zlum po/_rgyar khru gang*/_dpangs su khru phyed/_thab kyi steng du mu ran nam mchur sor bzhi dor bas rgya dang dpangs sor bzhi pa'i kha khyer bags kyis nang du gzhol ba'i kha khyer la rdo rje'i phreng bas bskor zhing*/_phyi'i gru chad zur gsum pa bzhir zla phyed rdo rjes mtshan pa/_thab kyi dbus su pad+ma 'dab ma brgyad pa'i lte bar sor brgyad tsam gyi rdo rje rtse lnga pa mgo shar bstan bya/_brkos thab la stegs bu'i dbus su mchu dma' ba dang*/_thab kyi zab brkos la/_de nas mchu sor bzhi phyir 'gyed nas kha khyer rgya dpangs sor bzhi pa bya ba tsam khyad par yin/_bris thab byed na tshangs zur gyi thig btab la/_dbus nang khru phyed kyis zlum por bskor ba'i phyir sor bzhi pa'i mchu dang kha khyer te/_zlum skor gsum gyi nang du pad+ma 'dab brgyad thab tshon dang bcas pa/_kha khyer la rdo rje'i phreng ba/_grwa bzhir zla phyed rdo rje dang bcas pa bri/_brtsig thab sogs gang gi tshe yang kha dog dkar po bya zhing*/_bcad tshon kyang dmar skya la tshon ji ltar rigs pa las nag po sogs tshon sel gyis ma phog pa gal che/_phyi rol du khru phyed kyi sar ba'i lci bas byug_/me tog dkar po gcal du dgram mo/__/bal bu sogs 'o ma can gyi shing zlum por brtsig_/stegs bur rdzas gdan dkar po bkab/_bsreg rdzas sngar dang 'dra ba la/_yam shing sor bcu gnyis pa rtse 'o ma dang mar khu nyug pa/_khyad par gyi rdzas til gtso bo dang*/_mchod rdzas me gtor dkar zlum/_rlung g.yab dang*/_stan dkar po/_dus tho rangs sam/_snga dro'i char/_slob dpon chas gos dkar po gyon nas kha shar du phyogs la rdo rje'i 'dug stangs kyis kha dog dkar po'i stan la zhi ba'i sems kyi 'khod pa dang*/_cho ga rgyas pa ltar la/_zhi ba'i thab khung kha dog dkar po dbyibs zlum po mu ran kha khyer dang bcas pa'i dbus su sna tshogs pad+ma'i lte bar rdo rje dang*/_kha khyer rdo rjes mtshan pa dwangs shing sgrib pa med pa'i 'od zer kun tu 'phro ba/_rgya dpangs sogs mtshan nyid thams cad yongs su rdzogs pa'i nang du pad nyi la gnas pa'i raM yig yongs su gyur pa las zhi ba'i me lha dkar po drang srong sogs dkyus ltar dang*/_'jig rten pa'i byon skyems dgang blugs skabs/_me lha zhal 'dzum pa'i ljags dang gzar bu gnyis kyi khar raM yig 'od zer gyi phung po 'bar bas mtshan pas sregs blugs kyi bdud rtsi drangs te gsol bar bsam pa dang*/_'das pa'i byon skyems dgang blugs skabs/_dkyil 'khor kyi lha rnams zhal sogs gong ltar la/_gnyi gar spel tshig_bdag cag dpon slob 'khor dang bcas pas thog drangs mtha' yas pa'i sems can thams cad kyi nad gdon sdig sgrib bar chad mi mthun pa'i phyogs thams cad shan+tiM ku ru swA hA/_zhes so/__yang na 'das par/_bdag sgrub pa po'i sngags chad lhag gi nyes pa dang*/_nad gdon zhes kha bsgyur kyang chog cing*/_rdzas zho zan gyi gong du til bya ba dang*/_yam shing sogs bsreg rdzas la/_gzi brjid phun sum tshogs pa la bar du gcod pa thams cad shin+tiM ku ru swA hA/_zhes sogs kun la rigs 'gre ba dang*/_shing tog sogs zas sna tshogs skabs kyi spel tshig kyang dgang blugs ltar dang*/_las 'chol ba'i tshe 'jig rten pa'i skabs/_drang srong chen po khyed rnams kyis las thams cad byed pas bsreg rdzas lha'i zhal du 'bul ba dang*/_me nyid ye shes kyi mer byin gyis brlabs nas bdag cag dpon slob yon mchod 'khor dang bcas pa'i thog drangs mtha' yas pa'i sems can thams cad kyi nad gdon sdig sgrib 'gal rkyen mi mthun pa'i phyogs thams cad zhi ba'i phrin las mdzad du gsol/_zhes 'dod don gsol/_'das pa'i skabs/_bcom ldan 'das mgon po tshe dang ye shes dpag tu med pa'i dkyil 'khor gyi lha tshogs khyed rnams kyis bdag cag dpon slob bam/_yon mchod sogs kha bsgyur/_gang ltar yang*/_'khor dang bcas pa'i thog drangs mtha' yas pa'i sogs gong ltar/_rdzas rdzogs pa dang*/_lha rnams kyi thugs ka nas spros pa'i sangs rgyas rnams kyis zla ba chu shel gyi bum pa bdud rtsi dkar pos gang ba 'dzin pa bsgrub bya'i steng phyogs nas khrus byas nas sdig sgrib dang nad gdon la sogs pa thams cad dag cing zhi bar bsam mo/_/zhes sogs bsgyur ba las gzhan thams cad rgyas pa ltar bya bas grub bo/__/gsum pa sgrub pa'i khyad chos ni/_sgrub chen 'dra 'bag gam/_sgrub mchod dkyus ma tsam la'ang rung ste/_nub tha ma dngos grub zhus zin pa'i rjes sogs su gter gzhung gi las tshogs phrin las gser gyi thig le la brten nas tshe dang ye shes spel ba'i cho ga bya bar gsungs te/_sngar kho bos bris pa'i sgrub khog tu de dag gi tshul gud du byung ba las shes par bya zhes kha 'phangs pa/_'di lta ste/_nyin snga ma'i dgong thun gyi gtang rag mchod bstod dag gi dbur las rdor nas maN+Dal gyi gzhi dri bzang dang bcas pa rdo rje slob dpon la phul te/_gang des gtso 'khor yongs rdzogs kyi sngags re re bzhin brjod la tshom bu lha grangs dang mnyam pa 'god cing*/_stegs khebs many+dzi dang bcas gzhi'i dkyil 'khor gyi byang shar du bkod la/_mchod bstod sogs mthong brgyud phyag len ltar bya ba sngon du 'gro ba dang*/_nyin phyi ma'i skabs sbyor ba gong du bshad pa'i sa'i cho ga dang*/_bris brkos brtsig thab gsum gang rigs thog_/rdul tshon gyi dkyil 'khor rgyas pa'i bsreg blugs ltar 'du byas la/_tshom bu'i dkyil 'khor dang*/_rgyan bkod shong ba'i phyir mchod stegs gu yangs tsam bya ba las/_mchod pa dang*/_bsreg rdzas sogs rgyas bsreg ltar bshams shing*/_cho ga dngos gzhir tshig bdun gsol 'debs dang*/_rje gter chen pad+ma gar dbang 'od gsal mdo sngags gling pa'i rnam thar gsol 'debs sam/_'khrungs rabs gsol 'debs gang rigs sngon du btang nas/_bdag bskyed dor te/_rtsa sngags rigs lnga spyi dril la/_phaTa? dzaH_btags pa brjod pas/_rang nyid dkyil 'khor gyi gtso bo las mar me gcig las gnyis mched kyi tshul du las kyi lha gnyis pa'i rnam par thon nas sbyin sreg gi las rim la 'jug par mos la/_rdor dril byin rlabs sogs nas/_'jig rten pa'i me lha'i mchod bsreg rgyas pa ltar bstabs la/_'das pa'i mchod bsreg_oM ma hA shUn+ya ta sogs nas/_dam tshig me lha'i lto ba ru:_rin chen gzhal yas mtshan nyid rdzogs:_sogs nas las gzhung gi_sa ma ya maN+Dal b+h+rU~M/_zhes pa'i bar dang*/_de nas spyan 'dren/_hrIH_nub phyogs bde chen dbang gi zhing:_zhes pa'i tshig dang bstun las rdor gyi rtsa sngags rigs lnga spyi dril bzla bzhin du sgrub dkyil las tshom bu spyan drangs pa rol 'og sgrub khang nas dung dkar/_spos sne/_rgyan bkod dang tshom bu bcas thab dkyil la bskor te mthar/_tshom bu slob dpon la phul nas/_bdag 'jug gi lha dbang ltar gtso bo nas bzung lha bcu bdun gyi sngags re re brjod bzhin du tshom bu'i rtse'am me tog so so thab dkyil du bstabs zin pa dang*/_pho brang de yi lte ba la:_pad+ma rin chen rma bya'i khri:_'dab stong ge sar zla ba'i steng:_'chi med mgon po snang mtha' yas:_gsung gi rdo rje tshe dpag med:_ces pa nas/_bsam yas bkod pa 'phro zhing 'du:_zhes pa'i bar gyi rten pa'i lha tshogs gsal 'debs tsam bya ba ni gter rnying bka' brgyad bde 'dus kyi rgyas sreg ltar smin gling gter sras pad+ma 'gyur med rgya mtsho'i bka' srol bzhin dang*/_yang smin gling gter gsar thugs chen bde kun sogs kyi phyag len yig cha ltar na/_gong gi las rim rnams snga ma ltar las/_dam tshig me lha'i lto ba ru:_rin chen gzhal yas mtshan nyid rdzogs:_zhes pa nas/_bsam yas bkod pa 'phro zhing 'du:_zhes pa'i bar dkyus bzhin dam tshig pa'i gzhal yas khang lha dang bcas pa bskyed la/_ye shes pa ste/_hrIH_nub phyogs bde chen dbang gi zhing:_zhes pa'i skabs su tshom bu spyan drangs la/_rdor slob rnam pa'i bya ba gong ma ltar mdzad pa'i bzhed rgyun te/_de dag so so gang mos ltar mdzad pas chog gam snyam zhing*/_gang ltar yang bzhugs gsol/_hrIH_dbyings nas spyan drangs ye shes pa:_sogs nas phyag 'tshal dang*/_mchod pa rgyas bsdus longs skabs dang bstun te/_bstod pa nas bzung 'das pa'i sregs blugs dkyus ltar phul nas/_gtang rag gi mchod bstod mthar/_nongs bshags mjug_dkyil 'khor gyi lha tshogs rnams sgrub pa'i dkyil 'khor la gshegs par gyur/_zhes dang*/_las rdor gyi rtsa sngags bzla bzhin par tshom bu sgrub dkyil du sngar bzhin bkod/_oM A da ma ko tiSh+Tha badz+ra hU~M/_gzhal yas khang gdan dang bcas pa rang la thim par gyur/_zhes bsdu rgya dang bcas brjod/_de nas 'jig rten pa'i me lha'i sregs blugs dkyus ltar ro/__/yang 'di'i sgo nas rab tu gnas pa'i dus sogs skabs 'ga' zhig tu bkra shis pa'i bza' ba 'o thug bsgrub par 'dod na/_nag po min pa'i snod gtsang ma dris byug cing*/_me tog gi phreng bas brgyan pa many+dzi sogs kyi steng du bkod la/_der slob dpon gyis blugs gzar du chu/_'o ma/_'bras/_mar/_ka ra lnga rang gi 'dod lha'i sa bon las byung ba bdud rtsi'i rang bzhin du bltas la/_rtsa sngags rigs lnga spyi dril la/_oM dI pya a naM sa ma d+hid+d+h+yA na shri Na ye swA hA/_zhes btags pa rdzas re sngags re rol mo re sbrags te btab/_yang sngags de kha shas bzla zhing slob dpon gyis blugs gzar gyis dkrug tshul dang bcas thab tu bskol la/_thog mar dkyil 'khor la dbul/_de nas chos skyong dang 'jig rten skyong ba la btab ste/_bdag dang slob ma sbyin pa'i bdag por bcas pas longs spyad/_slong ba'i sems can gzhan dag la'ang sbyin nas/_dge ba'i rtsa ba bla na med pa'i byang chub tu bsngo ba las byang gi bsngo smon dang*/_shis brjod kyis mtha' rgyas par bya/_sbyin sreg gi me rang zhi'am/_dri bzang gi chus bcil la thab sa bum par blugs te mdzod du sba bar bya'o/_/tshe yi yum mchog na bza' dkar mor brten/_/'chi med dkyil 'khor lha tshogs dgyes bskyed pa/_/'gro ba'i 'chi bdag tshang tshing mthar byas te/_/'chi med tshe lha'i ljon bzang cher rgyas shog_/ces pa'ang rang nyid zab mo'i lam 'di'i bsnyen sgrub skal bzang du spyod pa'i tshe na/_zab gter 'di nyid kyi 'khor los sgyur ba chen po dkyil 'khor rgya mtsho'i khyab bdag bka' drin mnyam med dil mkhyen rdo rje 'chang pad+ma gar dbang mdo sngags gling pa tshe mchog grub pa'i sde chen po mchog nas 'jam dbyangs mkhyen brtse'i dbang po'i bal po a hU~M gi yang gter dzam lha'i srog 'khor dang bcas 'di ltar du gyis shig ces bka'i me tog spyi bor lhung ba gus pas mchod nas rigs mthun gyi khungs tshad ma las btus te/_dge sbyong ngag dbang chos kyi blo gros su 'bod pas thun mong gi lo dbyug zla'i dkar phyogs kyi dga' ba gsum pa'i nyin rang gnas thub bstan mdo sngags chos gling gi dben spyil 'chi med dga' tshal du sug bris su btab pa las/_slar yang rang lo bdun cu rtsa gcig pa'i shing khyi lo bka' 'bum bka' bsdu tshogs pa'i gtso bo mkhas dbang bla ma pad+ma bkra shis mchog nas sgrub chen sogs kyi tshe sregs blugs kyi sbyor dngos phyag bzhes kha 'phangs pa rnams dkyus su 'god gal che zhes gsung bskul gnang ba bzhin slar yang bris brkos brtsig thab sogs phyag len rgyas pa'i lugs bzhin cung zad gsal bar byas nas bkod pa'i yi ge ba ni thub dge ngag dbang blo gros te/_dge bas bstan 'dzin gyi skyes bu spyi bye rnams kyi zhabs zung mi shigs rdo rje'i khams su brtan zhing*/_'gro kun 'chi med rtag pa dam pa'i dpal la ngal 'tsho ba'i rgyur gyur cig_/sarba mang+ga laM/_dge'o//__//
