DKR-KABUM-02-KHA-020-wylie
<div class="wylie-content"
@#/__bla ma'i rnal 'byor byin rlabs mchog gter bzhugs/__e ma ho/__phyi snod bla ma'i zhing khams pad+ma 'od/__/nang bcud dpa' bo mkha' 'gro bla ma'i 'khor/__/rang lus 'dzin med spyi bor bla ma rje/__/phyogs dus skyabs gnas kun 'dus pad+ma 'byung*/__/sku yis bkod pas rab 'byams zhing kun khyab/__/zhing khams rab 'byams rdo rje'i sku la rdzogs/__/'chi med 'ja' lus rdo rje'i mtshan dpe can/__/gang 'dul sgyu 'phrul drwa ba ci yang ston/__/zab rgyas gsung ni grags stong tshangs pa'i dbyangs/__/mtha' yas chos sgo mdzad med rtag tu sgrog__/ye shes thugs ni 'gyur med 'od gsal ngang*/__/rtag tu bde chen dbyings la bri gang bral/__/yon tan dpag yas sangs rgyas kun dang mnyam/__/sras bcas 'dren pa'i rnam thar yongs su rdzogs/__/phrin las rmad byung rtag khyab lhun gyis grub/__/nam mkha' ji srid 'gro don rgyun chad med/__/bla ma gcig la skyabs gnas thams cad rdzogs/__/de nyid gsol btab don gnyis yid bzhin 'grub/__/bla mar gsol btab mdo sngags lam kun tshang*/__/gcig chog blo bde'i ngang nas gsol ba 'debs/__/srid las nges 'byung rgyu 'bras blang dor brtson/__/dran shes bla mas gsos btab dad mos dang*/__/snying rje'i gtan bde'i lam sna zin pa zhig__/ji ltar gsol ba btab bzhin myur 'grub shog__/bla mar yid ches skyabs 'gro'i snying po ste/__/bla ma'i rnam thar rjes slob sems bskyed mchog__/'gro kun bla ma'i go 'phang 'god 'dod blos/__/bsags sbyangs brtson pas bla mar gsol ba 'debs/__/bla ma'i gsang ba gsum gyi byin rlabs kyis/__/dbang bzhis rgyud smin bla ma'i sku bsgoms pas/__/rigs kun khyab bdag bskyed rim mthar thug phyir/__/brtan g.yo snang stong sgyu mar lhar 'char shog__/bla ma'i gsol 'debs gsang sngags thams cad 'dus/__/grags stong dzapa kyis brtan g.yo'i sgra kun khyab/__/yid kyis dran rtog ye shes rol pa che/__/dpal ldan bla ma'i thugs su shes par shog__/tshe 'di'i bde skyid gang 'dod bla mas stsol/__/phyi mar bar do'i 'khrul snang bla mas skyob/__/skye 'chi thams cad bla ma sku gsum du/__/ngo shes ngang nas sa lam mthar phyin shog__/chos brgyad 'ching grol tshe 'di blo yis btang*/__/gzhan phan sems 'byong tshogs gnyis rdzogs smin sbyangs/__/bka' gdams bla ma'i rnam thar rgyud 'byongs te/__/theg chen lam kun rdzogs par byin gyis rlobs/__/dbang bzhi'i chu bos rigs khams nus pa gsos/__/phyi nang gsang ba'i lam gyi rten 'brel gyis/__/mi slob mngon gyur bla ma sa skya pa'i/__/lam 'bras grub mtha' 'byong bar byin gyis rlobs/__/zhen log mos gus snying rus go cha che'i/__/rdo rje'i lam rdzogs 'od gsal chos sku'i klong*/__/phyag chen don rtogs bka' brgyud bla ma rje'i/__ngo mtshar rnam thar 'byong bar byin gyis rlobs/__/dbang gis rgyud smin dam tshig sdom pa dag__/bskyed pa'i rim pas snod bcud lhar shar zhing*/__/rdzogs rim mthar son sku gsum bla ma rje'i/__/don gyi rnam thar 'byong bar byin gyis rlobs/__/dgongs brgyud lta bas rig pa rjen la bud/__/blo 'das sgom pas 'od gsal lam mthar son/__/'khrul pa gzhi grol dpal mgon bla ma bzhin/__/snang bzhi mtha' ru 'khyol bar byin gyis rlobs/__/srid zhi'i 'ching ba chos nyid klong du grol/__/ye shes rol pas dgongs pa'i gdeng tshud nas/__/mthar thug rig 'dzin bla ma chen po dang*/__/dbyer med tshom bu gcig tu grol bar shog__/mdor na rigs kun khyab bdag bla ma dang*/__/skad cig 'du 'bral med pa'i nges shes kyis/__/thugs yid gcig 'dres don gnyis lhun grub pa'i/__/mthar thug grub mtha' 'byong bar mdzad du gsol/__/ces pa'ang dad mos rnam par dkar ba sde dge smad shod phu ma rin rnam nas lha rdzas kyi rten bcas bskul ngor dpal mgon bla ma dgyes pa'i 'bangs mang+ga la shrI b+hU tis rang 'dra'i skal mnyam la phan pa'i blos bris pa don dang ldan par gyur cig__sarba mang+ga laM//__//
