JKW-KABUM-23-'A-002-003

🚧 This website is under continued development. We appreciate your patience!

Previous Text Back to Volume PageLast text in section.

ཟབ་དོན་ཉམས་སུ་ལེན་ཚུལ་གྱི་ཟིན་བྲིས་སྐལ་བཟང་ཡིད་ཀྱི་ཨུཏྤལ།

Wylie title	zab don nyams su len tshul gyi zin bris skal bzang yid kyi ut+pala
Location	mkhyen brtse'i bka' 'bum Volume 23, sde tshan 2, Text 3, Pages 173-193 (Folios 18a3 to 28a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. zab don nyams su len tshul gyi zin bris skal bzang yid kyi ut+pala. In 'jam dbyangs mkhyen brtse'i dbang po'i bka' 'bum, Vol. 23: 173-193. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

Tibetan Text

Wylie

[edit]

༄༅། །ཟབ་མོའི་དོན་ཉམས་སུ་ལེན་ཚུལ་གྱི་ཟིན་བྲིས་སྐལ་བཟང་ཡིད་ཀྱི་ཨུཏྤལ་ཞེས་བྱ་བ་བཞུགས་སོ། །ན་མཿཤྲཱི་མཱཾ་གུ་ར་ཝེ། རིགས་དང་དཀྱིལ་འཁོར་ཐམས་ཅད་ཀྱི། །ཁྱབ་བདག་དཔལ་ལྡན་བླ་མའི་ཞབས། །བྱང་ཆུབ་བར་དུ་སྙིང་དབུས་སུ། །བཞུགས་ནས་བྱིན་རླབས་སྣང་བ་སྩོལ། །ཁྱེད་དད་པ་དང་དམ་ཚིག་ལྡན་པའི་རྡོ་རྗེའི་སློབ་མ་རྣམས་ཀྱིས་ཟབ་མོའི་དོན་ཉམས་སུ་ལེན་པ་ལ་འཇུག་པའི་ཐོག་མར། འཁོར་བ་ལ་ངེས་འབྱུང་དང་བཅོས་མིན་སྙིང་རྗེ་ཆེན་པོའི་བློས་དྲངས་ཏེ། ལུས་གནད་ལེགས་པར་བཅའ། རླུང་རོ་དགུ་ཕྲུགས་སུ་འབུད། འབྲུ་གསུམ་རྡོ་རྗེའི་བཟླས་པ་ཅུང་ཟད་བྱ། དེ་ནས་སྤྱི་བོར་བླ་མ་བསྒོམ། གསོལ་བ་ཕུར་ཚུགས་སུ་གདབ། དབང་བཞི་བླང་ཞིང་ཐུགས་ཡིད་བསྲེས་པའི་ངང་ལ་ཁོང་ལྷོད་ཀྱིས་ཀློད་དེ་བཞག །དེའི་ཚེ་རྣམ་རྟོག་སྔ་མ་ནི་ཡལ། ཕྱི་མ་ནི་མ་སྐྱེས། ད་ལྟའི་ཤེས་པ་སྐད་ཅིག་མ་དེ་རང་གི་ངོ་བོ་ལ་ཅེར་གྱིས་བལྟས་པས་ཉམས་སུ་མྱོང་བཞིན་དུ་བསམ་བརྗོད་ཐམས་ཅད་ལས་འདས་པ་ཞིག་འཆར་བ་ནི་རིག་པ་གཞི་གནས་ཀྱི་ཡེ་ཤེས་ཞེས་བྱ་སྟེ། སྒྲ་གཅན་འཛིན་གྱིས་ཡུམ་ལ་བསྟོད་པ་ལས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །ཞེས་དང་། འཕགས་པ་མཚན་མ་བཟང་པོའི་མདོ་སྡེ་ལས། འདས་ལ་རྗེས་སུ་ཕྲད་མི་བྱེད། །མ་འོངས་པ་ལ་རེ་བ་མེད། །འདས་པ་གང་ཡིན་དེ་འགགས་ཏེ། །མ་འོངས་པ་ནི་མ་ཕྱིན་པའོ། །གང་དག་ད་ལྟར་བྱུང་བའི་ཆོས། །དེ་ཡང་དེ་ལ་རབ་བལྟས་ན། །རྣམ་པར་རྟོག་པས་མི་འཕྲོག་པར། །དེ་དག་ཐམས་ཅད་ཁོང་དུ་ཆུད། །ཅེས་དང་། འཁོར་ལོ་བདེ་མཆོག་ལས། གང་ཚེ་དེ་ཉིད་ལ་རེག་པས། །བསམ་པ་ཐམས་ཅད་བསམ་དུ་མེད། །གང་ཚེ་བསམ་དུ་མེད་བསམ་པ། །དེ་ཚེ་བསམ་མི་ཁྱབ་པར་འགྱུར། །ཞེས་དང་། དཔལ་ཀྱེ་རྡོ་རྗེ་རྩ་བའི་རྒྱུད་ལས། དེ་ལ་ཐོག་མ་དབུས་མཐའ་མེད། །སྲིད་མེད་མྱ་ངན་འདས་པ་མེད། །འདི་ནི་མཆོག་ཏུ་བདེ་ཆེན་ཉིད། །བདག་མེད་གཞན་ཡང་མེད་པའོ། །ཞེས་དང་། འོད་གསལ་རྫོགས་པ་ཆེན་པོ་སྒྲ་ཐལ་འགྱུར་རྩ་བའི་རྒྱུད་ལས། རང་བཞིན་དག་པ་ཆེན་པོའི་མཐའ། །ཆོས་རྣམས་རང་སར་བཞག་པ་སྟེ། །རྣམ་ཤེས་ཆོས་ཉིད་ཟུང་འཇུག་པས། །ཡེ་གྲོལ་ཅོག་གཞག་ཉིད་ལ་ཐུག །དགོངས་པ་བློ་ལས་འདས་པ་དང་། མཚན་མ་རང་སར་དག་པ་དང་། །སྟོང་པ་དངོས་པོའི་མཐའ་གྲོལ་དང་། །འགྱུ་ཟད་རྟོག་པ་ཟད་པ་དང་། །བློ་ཟད་ཡིད་ལས་འདས་པའོ། །ཞེས་སོ། །དེ་ལྟ་བུའི་གནས་ལུགས་ངོ་འཕྲོད་ཕྱིན་ཆད་གཤིས་བཅོས་བསླད་མེད་པའི་ངང་མདངས་བསྐྱང་ཞིང་། རྣམ་པར་རྟོག་པ་ཞིག་ཐོལ་གྱིས་སྐྱེས་ན་གཉེན་པོ་གཞན་མི་བསྟེན་པར་རིག་པའི་ངང་ཚུགས་མ་ཤོར་བར་བྱས་པས། ལན་ཚྭ་ཆུར་ཐིམ་པ་བཞིན་རང་ཡལ་དུ་འགྲོ། དེ་ཙམ་ན་ཉམས་ལེན་གྱི་སྣེ་ཟིན་པ་ཡིན་པས་ལུས་གནད་སོགས་ལ་ལྟོས་མིན་ཇི་ལྟར་ཡང་གནས་ལུགས་མ་བཅོས་པ་ཁོ་ནའི་རྒྱུན་སྐྱོང་བ་ལ་མཉམ་རྗེས་ཀུན་ཏུ་འབད། དུས་ནམ་དུའང་ཡེངས་འཁྲུལ་བརྗེད་འབྱམས་སུ་སོང་བའི་ཚེ་སྐབས་ཤིག་དྲན་པས་ཧྲིག་གིས་སླེབས་པ་ན། ང་ཡེངས་འདུག་སྙམ་པའི་འགྱོད་པ་དང་། རྣམ་རྟོག་ལུ་གུ་རྒྱུད་ཀྱི་ཕྲེང་བ་གཞན་མི་སྤེལ་བར་རིག་པའི་ངང་ཚུགས་མ་ཤོར་བར་བྱས་པས། སྐད་ཅིག་མ་གཉིས་པ་ནས་བཟུང་བློ་བྲལ་གྱི་ཡེ་ཤེས་ལྷུག་པར་འཆར་ཞིང་། རྟོག་ཚོགས་གང་ཤར་ཡང་གཉེན་པོ་གཞན་བསྟེན་མི་དགོས་པར་གསལ་རིག་རྗེན་ནེ་བའི་ངང་དུ་ཆམ་གྱིས་ཞི་འགྲོ་བ་འདི་ཁོ་ན་ཉམས་ལེན་གྱི་སྲོག་ཏུ་བཟུང་སྟེ། ཤེར་ཕྱིན་བརྒྱད་སྟོང་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་ནི་མི་བསྒོམ་པའི་ཚུལ་གྱིས་བསྒོམ་པར་བྱའོ། །ཞེས་དང་། བློ་གྲོས་རྒྱ་མཚོས་ཞུས་པའི་མདོ་ལས། །ཆོས་རྣམས་ཡིད་ལ་མི་བྱ་སྟེ། །ལྷག་པར་བྱེད་པ་རྣམ་པར་སྤང་། །ཆོས་རྣམས་ཐམས་ཅད་མཉམ་ཉིད་དུ། །ཡང་དག་ཉིད་དུ་ཁོང་དུ་ཆུད། །ཅེས་དང་། དཔལ་གསང་བ་འདུས་པ་ལས། དངོས་པོ་མེད་ལ་བསྒོམ་པ་མེད། །བསྒོམ་པར་བྱ་བ་སྒོམ་པ་མིན། །དེ་ལྟར་དངོས་པོ་དངོས་མེད་པས། །སྒོམ་པ་དམིགས་སུ་མེད་པའོ། །ཞེས་དང་། དངོས་པོ་མེད་པའི་ཆོས་ཉིད་ཆོས། །ནམ་མཁའ་ལྟ་བུར་དྲི་མེད་པ། །སྟོང་ཉིད་ཡེ་ཤེས་རྡོ་རྗེ་ཡིས། །སྟོང་པ་ཉིད་དུ་རྣམ་པར་བསམ། །ཞེས་དང་། དགྱེས་པ་རྡོ་རྗེ་ལས། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་རང་ཡང་ནི་དེ་ཡི་ཕ། །ཞེས་དང་། འོད་གསལ་རྫོགས་པ་ཆེན་པོ་ཀུན་བྱེད་རྒྱལ་པོའི་རྒྱུད་ལས། ཇི་བཞིན་མ་བཅོས་རྒྱལ་བའི་དགོངས་པ་ལ། །སེམས་དང་སེམས་བྱུང་རྟོག་པ་ཅི་སྐྱེས་ཀྱང་། །དེ་ཉིད་སྐྱེ་མེད་ངང་དུ་གནས་ཤེས་པས། །བྱ་རྩོལ་མཚན་མའི་འདུ་ཤེས་ཀུན་དང་བྲལ། །ཞེས་དང་། སྒྲ་ཐལ་འགྱུར་ཆེན་པོ་རྩ་བའི་རྒྱུད་ལས། ཡེ་ནས་གྲོལ་བས་བསྐྱར་གཞི་མེད། །རང་གིས་གྲོལ་བས་གཉེན་པོ་མེད། །ཅེར་གྱིས་གྲོལ་བས་མཐོང་སར་ཡལ། །ཡོངས་སུ་གྲོལ་བས་འབད་མེད་པའོ། །ཞེས་དང་། མགོན་པོ་བྱམས་པས། འདི་ལ་བསལ་བར་བྱ་བ་དང་། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་དང་། འཕགས་པ་ཀླུས་དབུ་མ་རྩ་བ་ལས། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མིན། །དེ་ནི་དེ་ཡི་མཚན་ཉིད་དོ། །ཞེས་དང་། རྒྱལ་སྲས་ཞི་བ་ལྷས། གང་ཚེ་དངོས་དང་དངོས་མེད་པ། །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་དང་། གྲུབ་ཆེན་ཨིནྡྲ་བྷཱུ་ཏིས། ཇི་སྲིད་ཇི་སྲིད་རྣམ་རྟོག་པ། །དེ་སྲིད་ཐམས་ཅད་ཀུན་ནས་བརྫུན། །གང་ཞིག་དེ་ཉིད་མ་བརྟགས་པ། །དེ་ནི་ཡང་དག་དེ་རེ་བདེན། །ཞེས་དང་། དཔལ་ས་ར་ཧས། བསམ་དང་བསམ་བྱ་ཡོངས་སུ་དོར་ནས་སུ། །བུ་ཆུང་བཞིན་དུ་ལྷུག་པར་གནས་པར་བྱ། །བླ་མའི་ལུང་ལ་བསྒྲིམས་ཏེ་གུས་འབད་ན། །ལྷན་ཅིག་སྐྱེས་པ་འབྱུང་བར་ཐེ་ཚོམ་མེད། །ཅེས་དང་། རིག་འཛིན་དགའ་རབ་རྡོ་རྗེས། ཡིན་པར་གྲུབ་པ་མེད་པའི་རིག་པ་འདི། །རང་སྣང་འཆར་ཚུལ་ཅིར་ཡང་མ་འགགས་པས། །སྣང་སྲིད་ཐམས་ཅད་ཆོས་སྐུའི་ཞིང་དུ་ཤར། །ཤར་བ་དེ་ཉིད་རང་གི་ཐོག་ཏུ་གྲོལ། །ཞེས་དང་། སློབ་དཔོན་ཤྲཱི་སེང་ཧས། །རང་སེམས་ཡེ་ཤེས་རྡོ་རྗེ་འདི། །ཡོད་མེད་དབུས་སུ་མི་དམིགས་ཤིང་། །རྟག་ཆད་མཐའ་ལ་མི་གནས་པ། །སྒྲོ་སྐུར་མེད་པའི་ཆོས་ཉིད་ལ། །བླང་དོར་མེད་པར་བློ་བཞག་སྟེ། །འདི་ཤེས་བསྒོམ་པའི་འདུ་ཤེས་བྲལ། །དེ་ནི་དགོངས་པའི་མཐར་ཐུག་གོ །ཞེས་དང་། པཎ་ཆེན་བི་མ་ལས། །ཅིར་སྣང་ངོ་བོའི་རོལ་པར་གང་ཤར་བ། །རང་གྲོལ་གཉེན་པོ་གཉིས་མེད་རང་སར་གྲོལ། །ཤར་གྲོལ་དུས་མཉམ་གཉིས་མེད་རོལ་པ་ཆེར། །དགག་སྒྲུབ་བཟོ་བཅོས་རེ་དོགས་མ་བྱེད་ཅིག །ཅེས་དང་། དུས་གསུམ་མཁྱེན་པ་ཨོ་རྒྱན་ཆེན་པོས། རང་བྱུང་རང་ཤར་སྒོམ་གྱི་མཆོག །བྱ་རྩོལ་བྲལ་བའི་ངང་ལ་ཞོག །བྱར་མེད་ལྷུག་པ་འདི་ཀ་རང་། །སྒོམ་པ་རང་བྱུང་རང་ཤར་ཡིན། །ཞེས་དང་། བླ་མའི་དྲིན་གྱིས་དེ་ཉིད་མ་ནོར་ངོ་འཕྲོད་ནས། །བསམ་གཞིག་ཡིད་བྱེད་བློ་ཡི་དྲི་མས་མ་བསླད་པར། །རང་ཤར་མ་བཅོས་རང་བབས་ལྷུག་པར་སྐྱོང་བ་ནི། །མ་ནོར་ཐར་པའི་ལམ་མཆོག་ཟབ་མོ་དེ་ཉིད་ཡིན། །ཞེས་དང་། གྲུབ་ཆེན་བིཪྺ་པས། ཀུན་གྱི་ངོ་བོ་ཡིད་ཀྱི་གཞི་རྩ་གང་ཡིན་ལྟོས། །བལྟས་པས་མ་མཐོང་ཡིད་དང་བྲལ་ན་ངེས་པར་གྲོལ། །སེམས་ཀྱི་ཆོས་ཉིད་དབྱིངས་ལ་འདི་ཞེས་མེད་པས་ན། །དེ་ལ་སྒོམ་དང་བསྒོམ་པར་བྱ་བ་གཉིས་སུ་མེད། །ཡོད་མེད་ཅིར་ཡང་མི་རྟོག་ངང་ལ་རྩེ་གཅིག་བཞག །ཅེས་དང་། དཔལ་ཏཻ་ལོ་པས། བློ་ཡི་ཆོས་ཀྱིས་བློས་འདས་དོན་མི་མཐོང་། །བྱས་པའི་ཆོས་ཀྱིས་བྱར་མེད་སངས་མི་རྒྱ། །བློ་འདས་བྱར་མེད་དོན་དེ་རྟོགས་འདོད་ན། །རང་སེམས་རྩད་ཆོད་རིག་པ་གཅེར་བུར་ཞོག །རྟོག་པ་དྲི་མའི་ཆུ་དེ་དྭངས་སུ་ཆུག །སྣང་བ་དགག་སྒྲུབ་མི་བྱ་རང་སོར་ཞོག །སྤང་བླང་མེད་ན་ཕྱག་རྒྱ་ཆེན་པོར་གྲོལ། །ཞེས་དང་། གྲུབ་ཆེན་ནཱ་རོ་པས། སྣ་ཚོགས་སྣང་བ་དཀར་དམར་དང་། །བརྗོད་དུ་མེད་པའི་ཡེ་ཤེས་གཉིས། ཤེས་པས་རིག་ན་གཅིག་པའི་ངང་། །བསྒོམ་པའི་ཟུང་འཇུག་དེ་ལ་མཛོད། །ཅེས་དང་། རྗེ་མཻ་ཏྲི་པས། ཕྱི་ནང་ཐམས་ཅད་ལྷན་ཅིག་སྐྱེས་པ་ཉིད། །མི་རྟོག་རྣལ་འབྱོར་ཆུ་བོའི་རྒྱུན་དང་འདྲ། །དེ་ཡང་སེམས་ལས་གཞན་དུ་ཚོལ་བ་མེད། །ཡིད་ལ་མི་བྱེད་ཕྱག་རྒྱ་ཆེན་པོའི་ལམ། །ཞེས་དང་། འཕགས་པ་སྤྱན་རས་གཟིགས་དབང་ཕྱུག་གིས་གྲུབ་ཆེན་མི་ཏྲ་ཛོ་ཀི་ལ་གདམས་པ་ལས། རང་སེམས་གདོད་ནས་མ་སྐྱེས་པ། །འཁོར་དང་འདས་པའི་བྱེད་རྒྱུ་ཅན། །གཞན་མིན་རང་གི་སྙིང་དབུས་ནས། །བླ་མའི་ཞལ་ལས་ཤེས་པར་འགྱུར། །གང་སྐྱེས་གཉུག་མ་ཉིད་ཡིན་ཕྱིར། །གང་ཤར་དྲན་པས་མ་བརྗེད་ན། །དེ་ཤར་སྟོང་པ་ཉིད་བདག་ཏུ། །རྣལ་འབྱོར་རྒྱལ་པོ་གདོན་མི་ཟ། །ཞེས་དང་། གྲུབ་ཆེན་དམ་པ་སངས་རྒྱས་ཀྱིས། གཞི་མ་བཅོས་གཉུག་མའི་སྟེང་དུ་བློ་མི་གཡོ་རང་ལུགས་སུ་བཞག་པས་ཉམས་གཏོང་བཞག་མེད་པར་འཆར་བ་འདི་ནི་ཀོ་ཥ་པཱ་དའི་གདམས་པ་ཡིན། །ཞེས་སོགས་དང་། སྟོང་པའི་ངང་དུ་རིག་པའི་མདུང་སྐོར་གྱིས། །ལྟ་བ་ཐོག་རྡུགས་མེད་དོ་དིང་རི་བ། དྲན་མེད་ངང་དུ་ཡེངས་མེད་བྱ་བ་ཐོངས། །སྒོམ་ལ་བྱིང་རྒོད་མེད་དོ་དིང་རི་བ། །ཤུགས་འབྱུང་ངང་ལས་འགགས་མེད་རྩལ་སྦྱོངས་ཀྱིས། །སྤྱོད་པ་བླང་དོར་མེད་དོ་དིང་རི་བ། །ཞེས་དང་། ཡེ་ཤེས་མཁའ་འགྲོ་ནི་གུ་མས། སྒོམ་མེད་ཡེངས་མེད་གོམས་ཤིང་བརྟན་པ་ལས། །ས་ལམ་རིམ་པ་དུས་འདིར་བགྲོད་བྱེད་དེ། །ཡིད་ལ་མི་བྱེད་སྒྲིབ་པ་རང་སར་དག །སྐུ་གསུམ་འབྲས་བུ་རང་ཤར་ལྷུན་གྲུབ་འབྱུང་། །ཞེས་དང་། མཉམ་མེད་ཇོ་བོ་དཱི་པཾ་ཀཱ་རས། རྟོག་མེད་ཚུལ་གྱིས་རྟོགས་པ་ན། །སྟོང་ཉིད་མཐོང་ཞེས་ཐ་སྙད་གདགས། །མ་མཐོང་བ་ཉིད་དེ་མཐོང་བར། །ཤིན་ཏུ་ཟབ་པའི་མདོ་ལས་གསུངས། །ཞེས་དང་། ཤེས་པ་ཅིར་ཡང་མི་རྟོག །ཅིར་ཡང་མི་འཛིན། དྲན་པ་དང་ཡིད་ལ་བྱེད་པ་ཐམས་ཅད་སྤངས་ཏེ། ཇི་སྲིད་དུ་མཚན་མའམ། རྣམ་པར་རྟོག་པའི་དགྲའམ། ཆོམ་རྐུན་ལ་སོགས་པ་མ་ལང་གི་བར་དུ་དེ་ལྟ་བུ་ཤེས་པ་ལ་གནས་པར་བྱའོ། །ཞེས་དང་། ཐམས་ཅད་མཁྱེན་པ་བཻ་རོ་ཙ་ནས། བསྒོམ་དུ་མེད་པའི་ཆོས་དབྱིངས་རྗེན་པ་ལ། །བསམ་དུ་མེད་པའི་རིག་པ་མ་ཡེངས་ཞོག །རྟོག་པ་སྐྱེས་ན་རང་ཤར་རང་གིས་གྲོལ། །ལྟ་སྒོམ་མན་ངག་རྩ་བ་དེ་ལས་མེད། །ཅེས་དང་། རོང་ཟོམ་པཎྜི་ཏ་ཆོས་ཀྱི་བཟང་པོས། ཆོས་རྣམས་ཀུན་གྱི་རྩ་བ་ནི། །ལས་རྣམས་གང་ཡང་བཀག་པ་མེད། །བཅིངས་གྲོལ་མེད་པའི་ཆོས་ཀྱི་སྐུ། །རང་གི་སེམས་ཉིད་གཉུག་མ་ཡིན། །རང་སེམས་ཨ་ཏིར་མ་རྟོགས་ན། །གང་ལྟར་བྱས་ཀྱང་འཆིང་བའི་རྒྱུ། །ཞེས་དང་། ཧེ་རུ་ཀ་དངོས་ཟུར་ཆེན་ཤཱཀྱ་འབྱུང་གནས་ཀྱིས། །ལྟ་བ་ཞེས་མིང་དུ་བཏགས་པ་དེ། །ལྟ་རྒྱུ་བྱུང་ན་ལྟ་བ་མིན། །བལྟ་རྒྱུ་མེད་པའི་དོན་ལ་བལྟ། །ཆོས་ཉིད་བརྗོད་མེད་ལམ་དུ་ཁྱེར། །ཞེས་སོགས་དང་། རྗེ་བཙུན་འཇམ་དཔལ་དབྱངས་ཀྱིས་བླ་མ་ས་སྐྱ་པ་ཆེན་པོ་ལ་གདམས་པ་ལས། འཛིན་པ་བྱུང་ན་ལྟ་བ་མིན། །ཞེས་དང་། དེའི་དོན་རྗེ་བཙུན་གྲགས་པས། ཡོད་པར་འཛིན་ལ་ཐར་པ་མེད། །མེད་པར་འཛིན་ལ་མཐོ་རིས་མེད། །གཉིས་ཀར་འཛིན་པ་མི་ཤེས་པས། །གཉིས་མེད་ཀྱི་ངང་ལ་གང་དགར་ཞོག །ཅེས་དང་། དཔལ་བརྩེ་བ་ཆེན་པོས། རྣམ་པར་རྟོག་པ་ཡེ་ཤེས་ཀྱི། །དབང་དུ་གྱུར་ན་འཁོར་བ་མེད། །ཡེ་ཤེས་རྣམ་པར་རྟོག་པ་ཡི། །དབང་དུ་གྱུར་ན་གྲོལ་བ་མེད། །བསྐྱེད་རིམ་རྟོག་པ་ཡིན་མོད་ཀྱང་། །རྟོག་པའི་ངོ་བོ་སེམས་ཉིད་དེ། །སེམས་ཀྱི་རང་བཞིན་གསལ་རིག་ཡིན། །གསལ་རིག་རང་བཞིན་སྟོང་པ་ཉིད། །སྟོང་པ་གདོད་ནས་ཆོས་ཀྱི་དབྱིངས། །འཁྲུལ་པ་ཆོས་ཀྱི་དབྱིངས་ཉིད་དུ། །ཤེས་པས་རྟོག་པ་ཐམས་ཅད་ཀྱང་། །ཇི་ལྟར་བསྒོམ་ཀྱང་མི་རྟོག་ཉིད། །བཙལ་ཀྱང་འཁྲུལ་པ་ག་ལ་རྙེད། །ཡིད་ལ་འགྱུ་བ་མ་ལུས་ཀུན། །ཆོས་ཀྱི་དབྱིངས་སུ་ཡོངས་ཤེས་ན། །མི་རྟོག་ཡེ་ཤེས་ཆེན་པོ་ཡི། །འཁྲུལ་པ་ལོགས་སུ་གྲུབ་པ་མེད། །ཅེས་དང་། རྗེ་བཙུན་གྲགས་པས། སྐྱེ་དང་འགགས་དང་གནས་པ་ཡོད་མིན་པ། །བརྗོད་བྲལ་འདི་ལ་ཅི་ཞིག་བསམ་པར་བྱ། །བརྗོད་མེད་བརྗོད་པ་འདི་ལ་དོན་མེད་ཅིང་། །བསམ་མིན་བསམ་པར་བྱ་བའི་གནས་མིན་ལ། །བསྒོམ་དུ་མེད་པ་འདི་ལ་ཅི་ཞིག་བསྒོམ། །དེ་ལྟར་ཤེས་ན་འཛིན་པ་མེད་པར་འགྱུར། །ཞེས་དང་། འཇམ་མགོན་ས་སྐྱ་པཎྜི་ཏས། ཀུན་རྫོབ་སྣང་བ་རྨི་ལམ་སྒྱུ་མ་འདྲ། །གང་ཤར་སྟོང་པ་སེམས་ཀྱི་ཁྱེར་སོ་ཡིན། །བཅོས་མེད་ཕྱག་རྒྱ་ཆེན་པོའི་གནས་ལུགས་ལྟོས། །སེམས་ཀྱི་དྲན་འཛིན་གཅེས་སོ་ལོ་ཙཱ་བ། །ཞེས་དང་། རྗེ་བཙུན་མར་པ་ལོ་ཙཱ་བ་ལ་དཔལ་ས་ར་ཧས་གདམས་པ། རྣམ་པར་ཤེས་པ་ཕྱི་མ་ཡིས། །སེམས་ལ་ལྷན་པ་གདབ་ཏུ་མེད། །སྣང་སྲིད་སེམས་ཀྱི་རང་བཞིན་ཤེས། །གཉེན་པོས་བཅོས་ཏེ་བསྒོམ་དུ་མེད། །སེམས་ཀྱི་གནས་ལུགས་དྲན་དུ་མེད། །དེ་ཡང་མ་བཅོས་ངང་ལ་བཞག །ཅེས་དང་། འཁོར་བར་སྐྱོན་དུ་མི་ལྟ་ཞིང་། །མྱ་ངན་འདས་པ་ཐོབ་བྱར་མེད། །ཐ་མལ་ཤེས་པ་རང་ལུགས་དེ། །མ་བཅོས་སོ་མའི་ངང་དུ་བཞག །ཅེས་དང་། རྗེ་ཉིད་ཀྱི་ཞལ་ནས། སྐྱེ་ཤི་གཉིས་ཀྱི་བར་དོ་ལ། །རྣམ་རྟོག་སྣང་བ་ཅི་ཤར་ཡང་། །སྣང་བ་རང་བཞིན་མེད་པ་སྟེ། །འཁྲུལ་པ་བྱུང་ན་ལོག་གནོན་ཐོབ། །ལོག་གནོན་རང་གི་སེམས་ལ་ལྟོས། །བལྟས་པས་དངོས་མེད་རང་སར་གྲོལ། །ཞེས་དང་། རྣལ་འབྱོར་གྱི་དབང་ཕྱུག་མི་ལ་རས་པས། མཐར་ཐུག་དོན་ལ་དགག་སྒྲུབ་མེད། །ཡང་དག་དོན་ལ་བསམ་དུ་མེད། །བསམ་དུ་མེད་པར་བསྒོམ་ཤེས་ན། །ཉོན་མོངས་གྲི་ཟད་བརྡར་ཟད་ཡིན། །བསམ་བློ་མང་པོ་སྐྱེས་ཕྱིན་ཆད། །ཇི་ལྟར་བསྒོམས་ཀྱང་གྲོལ་མི་ནུས། །བསམ་མེད་རྟོག་པ་ཟད་པ་ན། །སྡིག་པའི་རྣམ་སྨིན་ཟད་པ་ཡིན། །ཞེས་དང་། ཆོས་རྗེ་དྭགས་པོ་རིན་པོ་ཆེས། མ་བཅོས་བཞག་པའི་སེམས་ནི་སངས་རྒྱས་ཡིན། །འགྲོ་འཆག་ཉལ་འདུག་ཀུན་ཏུ་ལྷུག་པར་ཞོག །དེ་ལྟར་བཞག་པའི་སེམས་ནི་ནམ་མཁའ་འདྲ། །ནམ་ཡང་ཕྱོགས་སུ་མ་ལྷུང་ལྟ་བ་ཡིན། །ཞེས་དང་། མ་གཅིག་ལབ་ཀྱི་སྒྲོལ་མས། ཆོས་དབྱིངས་ཀློང་ཆེན་རང་གསལ་ངང་། །དྲན་རྟོག་ཅིར་སྣང་འཆར་བ་ཡིན། །དཔེར་ན་རྒྱ་མཚོ་ཆེན་པོ་ལ། །རྦ་རླབས་ལ་སོགས་འབྱུང་བ་བཞིན། །དེ་ལྟར་རྟོགས་པའི་སྐྱེས་བུ་ཡིས། །བཅས་བཅོས་མི་དགོས་རང་སར་ཞོག །ཕན་གནོད་མི་འབྱུང་དབྱིངས་སུ་གྲོལ། །ཅེས་དང་། གྲུབ་ཆེན་ཨོ་རྒྱན་པས། ཕྱོགས་མེད་ཀྱི་རིག་པ་རྟེན་མེད་དེ། །ཚོགས་དྲུག་གི་རྐྱེན་ཁར་མི་གཏོང་བར། །དོན་སྤྲོས་བྲལ་ཆེན་པོའི་ངང་ལ་འབྱམས། །དེ་གཡོ་བ་མེད་པ་ལྟ་བའི་མཆོག །ཅེས་དང་། ལྷོ་བྲག་གྲུབ་ཆེན་ནམ་མཁའ་རྒྱལ་མཚན་ལ་དཔལ་གསང་བའི་བདག་པོས་གདམས་པ། །བལྟ་རུ་མེད་པའི་བྱང་ཆུབ་སེམས། །སྟོང་ཉིད་སྙིང་རྗེའི་སྙིང་པོ་ཅན། །སྨྲ་བསམ་བརྗོད་མེད་ངང་ལ་ཞོག །བློ་ལས་འདས་པའི་ངང་ལ་ཞོག །བྱར་མེད་ལྷུག་པའི་ངང་ལ་ཞོག །ཞོག་ཅེས་བྱ་བ་བློ་ཡི་ཚིག །བཞག་དང་མ་བཞག་ཐ་སྙད་མེད། །མིང་མེད་བརྗོད་མེད་བརྟག་གཞི་བྲལ། །བརྟག་སྣང་བློ་ནི་དབྱིངས་སུ་ཞི། །དགག་སྒྲུབ་སྤོང་ལེན་དབྱིངས་སུ་ཡལ། །སྤྲིན་ཚོགས་མཁའ་ལ་དེངས་པ་འདྲ། །རྣམ་རྟོག་མ་སྤང་རང་སར་དག །ཅེས་དང་། ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་གྱིས། གདོད་མའི་ངང་འདིར་བརྗོད་འདས་བཞི་རྩ་བྲལ། །སྤང་བླང་རྩོལ་སྒྲུབ་རེ་དོགས་ཕྱོགས་རིས་མེད། །གནས་དེར་གནས་པ་ཀུན་ཀྱང་ཆོས་ཀྱི་སྐུ། །ཅོག་གཞག་རང་གྲོལ་འབད་མེད་གང་གི་ཡུལ། །གནས་ལུགས་མཐོང་ལ་གཞི་རྩ་གང་ཡང་མེད། །ཆིག་ཆོད་མཐོང་ལ་སྒོམ་པ་རྡུལ་ཙམ་མེད། །སྙེམས་དང་བྲལ་ལ་སྤྱོད་པ་ཡོད་མ་ཡིན། །ཁྲེགས་ཆོད་མཐོང་ལ་དྲན་འཛིན་གཉེན་པོ་མེད། །ཐོད་རྒལ་མཐོང་ལ་སེམས་འཛིན་བསྒོམ་པ་མེད། །རྣམ་རྟོག་བྱུང་ན་གང་ཤར་རང་གྲོལ་ཡིན། །རྩོལ་སྒྲུབ་མ་བྱེད་རང་བབས་ལྷུག་པར་ཞོག །སོ་མ་གཉུག་མ་མ་བཅོས་ཟང་ཐལ་ངང་། །ཅིར་སྣང་ཐམས་ཅད་ཆོས་སྐུའི་ཞིང་དུ་འཆར། །ཞེས་སོགས་རྒྱ་ཆེར་བཀའ་སྩལ་བ་དང་། མངའ་རིས་པཎྜི་ཏ་ཆེན་པོ་པདྨ་དབང་གི་རྒྱལ་པོའི་ཞལ་སྔ་ནས། རྟོག་པ་ཐམས་ཅད་ཡོངས་སྤངས་ནས། །མཉམ་གཞག་ཆོས་བདུན་ངང་དུ་ཀློད། །དེ་ཚེ་གཟུང་འཛིན་གཉིས་མེད་ཀྱི། །ཡེ་ཤེས་གསལ་སྟོང་འཛིན་མེད་འཆར། །དེ་ལ་སྒོམ་སྐྱོན་དང་བྲལ་ན། །ཁྲེགས་ཆོད་ལམ་གྱི་དམ་པ་ཡིན། །དྲོད་སོགས་མ་ཐོབ་བར་དུ་ནི། །རིམ་ཅན་པ་ཡི་ཚུལ་དུ་འབྱུང་། །དྲོད་སོགས་ཐོབ་ནས་གཅིག་ཅར་དུ། །འབྱུང་བ་འདི་ལ་ཐེ་ཚོམ་མེད། །ཅེས་དང་། རྗེ་བཙུན་པྲཛྙཱ་རསྨིས། གདོད་ནས་གཞི་ཡི་བཞུགས་ཚུལ་འཁྲུལ་མེད་ནི། །ཡོད་པ་མ་ཡིན་ངེས་བཟུང་ཀུན་དང་བྲལ། །མེད་པ་མ་ཡིན་འཁོར་འདས་གང་དུའང་སྣང་། །གཉིས་ཀ་མ་ཡིན་བརྗོད་པའི་ཡུལ་ལས་འདས། །སྨྲ་བསམ་བརྗོད་མེད་གཞི་ཡི་བཞུགས་ཚུལ་ལགས། །ཡེ་ནས་གཞི་ལ་བཅོས་བསྒྱུར་མི་བྱེད་པར། །ལྟ་བའི་གནས་ལུགས་རང་བབས་ཁོ་ན་ཉིད། །འགྲོ་འོང་དང་བྲལ་རང་རིག་ཡེ་ཤེས་འདི། །གཉེན་པོས་མ་བསླད་རྩོལ་བས་མ་བསྒྲིབས་ཤིང་། །ཐ་མལ་ཡེངས་མ་ལམ་དུ་མ་སོང་བར། །ངང་བཞག་ངང་གནས་ཉིད་ལས་མ་གཡོས་བཞག །ཅེས་དང་། ཀུན་མཁྱེན་བླ་མས། གདོད་ནས་གྲོལ་བའི་རིག་པ་ཀ་དག་ནི། །སྟོང་པ་ངོ་བོ་ཉིད་མེད་བསམ་བརྗོད་འདས། །མཚན་ཉིད་བློ་ཡི་བརྗོད་པས་ཐུག་པ་སྤངས། །སྨོན་པ་མེད་ལ་རིག་པའི་ཡོན་ཏན་རྫོགས། །རིག་པ་ཤེས་བྱའི་ཡུལ་ལ་མི་གནས་པས། །ང་དང་ང་ཡིར་འཛིན་པའི་ཆོས་དང་བྲལ། །དེ་ལ་སྒོམ་དང་བསྒོམ་པར་བྱ་བ་མེད། །མ་བཅོས་རྣལ་མར་བཞག་ན་རྗེན་པར་མཐོང་། །རང་གི་ངོ་བོ་གཞན་དུ་མི་འགྱུར་ན། །མ་རིག་འཛིན་པས་སྲིད་པར་འཁྲིད་མི་ནུས། །ཕྱི་རོལ་ཡུལ་དང་བདག་ཏུ་ཞེན་པ་རྣམས། །བྱེད་པོས་མ་བྱས་སེམས་རྟོག་བརྟན་ལས་གྲུབ། །གཞི་དང་རྩ་བ་མེད་ལས་ཐམས་ཅད་སྐྱེས། །སྐྱེས་ཙམ་ཉིད་ནས་སྐྱེ་བ་མེད་པར་རྟོགས། །དེ་ལས་གཞན་པའི་རྟོག་པ་ཡོད་མི་དགོས། །ཀློག་དང་འཛིན་དང་བསྒོམ་དང་བསྟན་བཅོས་སེམས། །མཐའ་དག་བློ་ཡི་གྲུབ་མཐར་ཞིག་གྱུར་ན། །ཡིད་སྨོན་མེད་པའི་སངས་རྒྱས་དེ་ཉིད་དོ། །ཞེས་པ་ལ་སོགས་པས་མཚོན་ཏེ་མདོ་རྒྱུད་བསྟན་བཅོས་ཀུན་ནས་རྒྱ་ཆེར་བཀའ་སྩལ་ཏོ། །དེ་ལྟར་རིག་པར་ཕ་མ་ལ་ནས་མ་གཡོས་པའི་ཚེ་ན། གཟུགས་ལམ་མེ་བ་དང་། སྒྲ་ལྷང་ངེ་བ་དང་དྲི་ཆིལ་ལེ་བ་སོགས་ཚོགས་དྲུག་གི་རྟོག་པ་གང་ཤར་ཡང་ཕྱིར་མི་དཔྱད། ནང་དུ་མི་འཛིན། ཤར་ས་དེ་ཀར་ཅོག་གེར་བཞག་པས་སྣང་ཡུལ་མ་འགགས་ལ་དེར་འཛིན་གྱི་རྟོག་པ་དང་བྲལ་བ་དྭངས་བའི་རྫིང་བུར་ཟླ་བའི་གཟུགས་བརྙན་ཤར་བ་ལྟ་བུ་ཞིག་འབྱུང་བས་སྟོང་པ་དང་རྟེན་འབྲེལ་དབྱེར་མེད་པའི་དོན་ལ་ངེས་ཤེས་མཆོག་ཏུ་འདྲོངས་ཤིང་། ཤེས་རབ་སྙིང་པོ་ལས། གཟུགས་སྟོང་པའོ། །སྟོང་པ་ཉིད་ཀྱང་གཟུགས་སོ། །གཟུགས་ལས་ཀྱང་སྟོང་པ་ཉིད་གཞན་མ་ཡིན་ནོ། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཞེས་དང་། འཕགས་པ་ཀླུས། རྟེན་ཅིང་འབྲེལ་འབྱུང་གང་ལགས་པ། །དེ་ནི་སྟོང་པ་ཉིད་དུ་བཤད། །དེ་ནི་བརྟེན་ནས་གདགས་པ་སྟེ། །དེ་ནི་དབུ་མའི་ལམ་ཡིན་ནོ། །ཞེས་གསུངས་པ་དག་གི་དོན་ལ་ཁ་ཕྱིར་བལྟས་ཀྱི་དཔྱད་པ་རྣོན་པོའི་འཛིན་སྟངས་ཉི་ཚེ་བས་གཞལ་བ་ཙམ་མ་ཡིན་པར་རང་རྒྱུད་ལ་མངོན་སུམ་དུ་ཉམས་སུ་མྱོང་བའི་སྒོ་ནས་འབྱོར་བ་ཡིན་ནོ། །མདོར་ན་ལམ་གྱི་རྩ་བ་དལ་འབྱོར་རྙེད་དཀར་ཤེས་པས་རྟེན་ལ་སྙིང་པོ་ལེན་པ་དང་། ཚེ་མི་རྟག་པར་ཤེས་པར་སྒྲུབ་པ་ལ་ཕྱི་བཤོལ་མི་བྱེད་པ་དང་། བདེ་སྡུག་སྔོན་ལས་སུ་ཤེས་པས་དགེ་སྡིག་བླང་དོར་ལ་བརྩོན་པ་དང་། འཁོར་བ་སྡུག་བསྔལ་དུ་ཤེས་པས་སྲིད་པ་ལ་མངོན་པར་སྐྱོ་བ་དང་། ཡོན་ཏན་བླ་མ་ལས་འབྱུང་བས་དགེ་བའི་བཤེས་གཉེན་ལ་བསྟེན་པ་དང་། མྱང་འདས་མཆོག་ཏུ་བདེ་བས་ཞི་བའི་བྱང་ཆུབ་སྒྲུབ་པ་དང་། ལམ་གྱི་དངོས་གཞི་དགེ་བའི་རྩ་བ་ཆེ་ཕྲ་ཇི་ལྟ་བུ་ཞིག་བསྒྲུབ་ཀྱང་ཐེག་ཆེན་སྙིང་རྗེ་ལ་རགས་ལས་པས་སྦྱོར་བ་སེམས་བསྐྱེད་ཀྱིས་རྩིས་ཟིན་པ་དང་། ཐམས་ཅད་ངོ་བོ་ཉིད་མེད་པས་དངོས་གཞི་དམིགས་མེད་ཀྱི་རྒྱས་གདབ་པ་དང་། དགེ་ཚོགས་ཟད་མེད་དུ་འཕེལ་ཕྱིར་རྗེས་བསྔོ་བ་སྨོན་ལམ་གྱིས་མཚམས་སྦྱོར་བ་དང་། ལམ་གྱི་སྙིང་པོ་འཁོར་འདས་རིག་པ་ལས་བྱུང་བས་རིག་པ་ངོ་ཤེས་པར་བྱས་ནས། མཉམ་རྗེས་ཀུན་ཏུ་ཐ་མལ་གྱི་ཤེས་པ་སྐད་ཅིག་མ་འདི་ཀའི་རྒྱུན་རྗེན་ནེ་ཡེར་རེ་སྐྱོང་བ་དང་། ཁྱད་པར་རྟོགས་པ་སྐྱེ་བ་བྱིན་གྱིས་བརླབས་ལ་རགས་ལས་ཤིང་། བྱིན་རླབས་མོས་གུས་ལ་རགས་ལས་པས་ལམ་གྱི་གེགས་སེལ་དང་བོགས་འདོན་མོས་གུས་བླ་མའི་རྣལ་འབྱོར་ཁོ་ན་ལ་འབད་པ་ནི་ཟབ་དོན་ཐམས་ཅད་ཀྱི་མཐར་ཐུག་པ་ཡིན་ཏེ། ཇི་སྐད་དུ། མདོ་སྡུད་པ་ལས། བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅིའི་ཕྱིར་ཞེ་ན་མཁས་པའི་ཡོན་ཏན་དེ་ལས་བྱུང་། །ཞེས་དང་། སྡོང་པོ་བཀོད་པ་ལས། དགེ་བའི་བཤེས་གཉེན་ཡིད་ལ་བྱེད་པ་དང་མ་བྲལ་བས་དོན་ཐམས་ཅད་འགྲུབ་པར་འགྱུར་རོ། །ཞེས་དང་། དཔལ་ཀྱེ་རྡོ་རྗེ་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟེན་པ་དང་། །རང་གི་བསོད་ནམས་ལས་ཤེས་བྱ། །ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། བླ་མ་སངས་རྒྱས་ཐམས་ཅད་ཀྱི། །དབང་ཕྱུག་ལོངས་སྤྱོད་ལྔས་མཆོད་ན། །དཀྱིལ་འཁོར་ཐམས་ཅད་མཆོད་པར་འགྱུར། །ཉེ་བའི་དཀྱིལ་འཁོར་སྨོས་ཅི་དགོས། །ཞེས་དང་། སྒྲ་ཐལ་འགྱུར་རྩ་བའི་རྒྱུད་ལས། བླ་མ་སངས་རྒྱས་ཀུན་དང་མཉམ། །བསྟེན་པ་དེ་ལས་ཡོན་ཏན་ནི། །དཔག་བསམ་ཤིང་དང་ཡིད་བཞིན་ནོར། །འདོད་འཇོའི་བ་དང་འདྲ་བ་ཡི། །ཡོན་ཏན་དཔག་ཏུ་མེད་པ་ཐོབ། །དེ་ལ་དམིགས་ནས་བླ་མ་བསྟེན། །འཁོར་བའི་གཡུལ་ངོ་བཟློག་ཕྱིར་རོ། །ཞེས་པ་ལ་སོགས་པས་མཚོན་མདོ་རྒྱུད་ཀུན་ལས་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་མཆོག་ཏུ་བསྔགས་པ་ལ་དགོངས་ནས། ཨོ་རྒྱན་ཆེན་པོས། བྱིན་རླབས་དངོས་གྲུབ་ཀུན་གྱི་རྩ་བ་སྟེ། །བླ་མ་མཆོག་ལ་མོས་གུས་གནད་དུ་བསྣུན། །ཞེས་དང་བདེ་གཤེགས་ཀུན་འདུས་ཐར་པའི་ལམ་མཁན་མཆོག །མཆོད་ཡུལ་གཙོ་བོ་བླ་མར་གསོལ་གདབ་བྱ། །ཞེས་སོགས་ཟབ་མོའི་ལམ་ཐམས་ཅད་ཀྱི་རྩ་བར་གསུངས་པ་དང་། གྲུབ་ཆེན་བིཪྺ་པས་ལམ་འབྲས་རྡོ་རྗེའི་ཚིག་རྐང་དུ། ལམ་ཟབ་བླ་མ་ཞེས་དབང་པོ་རབ་བླ་མའི་ལམ་ཁོ་ནས་དཀྲི་བར་བཞེད་ཅིང་། གཤེད་དམར་སྤྲོས་མེད་ལས་ཀྱང་། བླ་མ་དང་ནི་རྡོ་རྗེ་སེམས། །ཐ་དད་པར་ནི་མི་བྱ་སྟེ། །བླ་མ་སངས་རྒྱས་ཆོས་དང་ནི། །དེ་བཞིན་དགེ་འདུན་བླ་མ་སྟེ། །དངོས་གྲུབ་གོ་འཕང་མཆོག་འདོད་པས། །ཀུན་ནས་བླ་མ་མཉེས་པར་བྱ། །ཞེས་གསུངས། རྣལ་འབྱོར་གྱི་དབང་ཕྱུག་ཏཻ་ལོ་པས་དཔལ་ནཱ་རོ་པ་ལ་གདམས་པ། ཞིང་དང་དངོས་པོ་བསམ་པ་གསུམ། །གཅིག་ཏུ་དྲིལ་ནས་གསོལ་བ་ཐོབ། །གང་འདོད་འབྲས་བུ་འབྱུང་བར་ངེས། །ལྟེམ་རྐྱང་མ་བྱེད་རྣལ་འབྱོར་པ། །གེགས་སེལ་ཀུན་གྱི་ཆོས་གཅིག་པུ། །བླ་མ་ཡིན་ནོ་རྣལ་འབྱོར་པ། །བོགས་འདོན་ཀུན་གྱི་ཆོས་གཅིག་པུ། །བླ་མ་ཡིན་ནོ་རྣལ་འབྱོར་པ། །ཞེས་གདམས་པས་མཚོན་བཀའ་བརྒྱུད་གོང་མ་ཐམས་ཅད་ཀྱིས་ཀྱང་འདི་ཁོ་ན་ཐུགས་དམ་གྱི་མཐིལ་དུ་མཛད། ལྷ་གཅིག་དཱི་པཾ་ཀ་རས། ཐེག་ཆེན་གྱི་ཡོན་ཏན་ཆེ་སྐྱེས་ཆུང་སྐྱེས་ཐམས་ཅད་བླ་མའི་མོས་གུས་ལ་བརྟེན་ནས་སྐྱེ་དགོས་ཞེས་དང་། རྗེ་བཙུན་བློ་བཟང་གྲགས་པས། དེ་ནས་འདི་ཕྱིའི་ལེགས་ཚོགས་ཐམས་ཅད་ཇི་སྙེད་པའི། །རྟེན་འབྲེལ་ལེགས་པར་འགྲིགས་པའི་རྩ་བ་ནི། །ལམ་སྟོན་དགེ་བའི་བཤེས་གཉེན་འབད་པ་ཡིས། །བསམ་དང་སྦྱོར་བས་ཚུལ་བཞིན་བསྟེན་པ་རུ། །མཐོང་ནས་སྲོག་གི་ཕྱིར་ཡང་མི་བཏང་བར། །བཀའ་བཞིན་སྒྲུབ་པའི་མཆོད་པས་མཉེས་པར་བྱེད། །ཅེས་སོགས་གསུངས་ནས་བཀའ་གདམས་གསར་རྙིང་རྣམས་ཀྱིས་ཀྱང་ལམ་རིམ་གྱི་ཐོག་མར་བཤེས་གཉེན་བསྟེན་ཚུལ་ནས་འཁྲིད་པར་མཛད། གཞན་ཡང་གྲུབ་ཆེན་དམ་པ་སངས་རྒྱས་ཀྱིས། །སྐྱབས་གནས་བསླུ་བ་མེད་པ་བླ་མ་ཡིན། །འབྲལ་མེད་གཙུག་ཏུ་ཁུར་ཅིག་དིང་རི་བ། །བླ་མས་བསྐྱལ་ན་གང་འདོད་ས་རུ་སླེབ། །རྐང་གླར་མོས་གུས་ཕུལ་ཅིག་དིང་རི་བ། །ཞེས་དང་། ཡེ་ཤེས་ཀྱི་མཁའ་འགྲོ་ནི་གུ་མས་སྒྱུ་མ་ལམ་རིམ་ལས། ལམ་ལྔ་ས་བཅུའི་རིམ་པ་རྣམས། །མོས་གུས་སྟོབས་ཀྱིས་བགྲོད་པར་བྱེད། །བླ་མའི་སྣང་བ་མ་བྲལ་ན། །རྒྱུད་སྡེའི་དགོངས་པ་གནད་ཀྱི་མཆོག །ཅེས་དང་། ལམ་ཁྱེར་རྣམ་གསུམ་ལས། ཉིན་མཚན་མཉམ་རྗེས་ཐམས་ཅད་དུ། །ཅིར་སྣང་ཐམས་ཅད་བླ་མར་ཤེས། །བླ་མ་དེ་ཉིད་རང་གི་སེམས། །སྣང་སེམས་བླ་མ་དབྱེར་མེད་པའི། །གསལ་སྟོང་ཆེན་པོ་རང་ཤར་འབྱུང་། །ཞེས་སོགས་མཁས་ཤིང་གྲུབ་པའི་སློབ་དཔོན་རྣམས་ཀྱིས་ཀྱང་མགྲིན་གཅིག་ཏུ་བསྔགས་པར་མཛད་དོ། །དེ་བས་ན་ཤིན་ཏུ་དབེན་པའི་ནགས་ཀྱི་སྨན་ལྗོངས་ཉམས་དགའ་བར་རིགས་ཐམས་ཅད་ཀྱི་བདག་པོའི་ཞབས་སེན་སྤྱི་བོར་འབྲལ་མེད་དུ་བསྒོམས་ཤིང་རིག་སྟོང་རྗེན་པ་སྐད་ཅིག་མ་འདི་ཀའི་ངང་དུ་འཁོར་འདས་ཀྱི་ཆོས་ཐམས་ཅད་ནམ་མཁའ་ལ་སྤྲིན་དེངས་པ་ལྟར་རང་སར་གྲོལ་བའི་ཉམས་ལེན་ལ་མཉམ་རྗེས་དབྱེར་མེད་ཆུ་བོའི་རྒྱུན་བཞིན་དུ་བརྩོན་པ་ནི་རྒྱལ་བ་སྲས་དང་བཅས་པ་དགྱེས་པའི་ལམ་མཐར་ཐུག་པ་ཡིན་པས། ཕྱག་རྒྱ་ཆེན་པོའི་ཡེ་ཤེས་ཚེ་འདི་ཉིད་ལ་བརྙེས་པར་འདོད་པའི་སྐལ་བཟང་རྣམས་ཀྱིས་སྙིང་གི་ཐིག་ལེ་གཅིག་ཏུ་འཛིན་འཚལ། །ཞེས་མཆོག་ཏུ་གདམས་པར་བྱས་སོ། །ཇི་ལྟར་དཔྱིད་ཀྱིས་བཟུང་བ་ཡིས། །ཨུཏྤལ་དགའ་ཚལ་དར་བབས་ལྟར། །འདིས་ཀྱང་དད་དང་བློ་ལྡན་རྣམས། །ངེས་དོན་ལང་ཚོ་རྒྱས་གྱུར་ཅིག །ཨིཏྤ་སེ་མཉྫུ་གྷོ་ཥ་སྱ་ཀྲྀ་ཏཾ་སརྦ་དཱ་ཤུབྷཾ།། །།

[edit]

zab don nyams su len tshul gyi zin bris skal bzang yid kyi ut+pal/_ @#/_/zab mo'i don nyams su len tshul gyi zin bris skal bzang yid kyi ut+pal zhes bya ba bzhugs so/__/na maHshrI mAM gu ra we/__rigs dang dkyil 'khor thams cad kyi/__/khyab bdag dpal ldan bla ma'i zhabs/__/byang chub bar du snying dbus su/__/bzhugs nas byin rlabs snang ba stsol/__/khyed dad pa dang dam tshig ldan pa'i rdo rje'i slob ma rnams kyis zab mo'i don nyams su len pa la 'jug pa'i thog mar/__'khor ba la nges 'byung dang bcos min snying rje chen po'i blos drangs te/__lus gnad legs par bca'/__rlung ro dgu phrugs su 'bud/__'bru gsum rdo rje'i bzlas pa cung zad bya/__de nas spyi bor bla ma bsgom/__gsol ba phur tshugs su gdab/__dbang bzhi blang zhing thugs yid bsres pa'i ngang la khong lhod kyis klod de bzhag__/de'i tshe rnam rtog snga ma ni yal/__phyi ma ni ma skyes/__da lta'i shes pa skad cig ma de rang gi ngo bo la cer gyis bltas pas nyams su myong bzhin du bsam brjod thams cad las 'das pa zhig 'char ba ni rig pa gzhi gnas kyi ye shes zhes bya ste/__sgra gcan 'dzin gyis yum la bstod pa las/__smra bsam brjod med shes rab pha rol phyin/__/ma skyes mi 'gags nam mkha'i ngo bo nyid/__/so so rang rig ye shes spyod yul ba/__/zhes dang /__'phags pa mtshan ma bzang po'i mdo sde las/__'das la rjes su phrad mi byed/__/ma 'ongs pa la re ba med/__/'das pa gang yin de 'gags te/__/ma 'ongs pa ni ma phyin pa'o/__/gang dag da ltar byung ba'i chos/__/de yang de la rab bltas na/__/rnam par rtog pas mi 'phrog par/__/de dag thams cad khong du chud/__/ces dang /__'khor lo bde mchog las/__gang tshe de nyid la reg pas/__/bsam pa thams cad bsam du med/__/gang tshe bsam du med bsam pa/__/de tshe bsam mi khyab par 'gyur/__/zhes dang /__dpal kye rdo rje rtsa ba'i rgyud las/__de la thog ma dbus mtha' med/__/srid med mya ngan 'das pa med/__/'di ni mchog tu bde chen nyid/__/bdag med gzhan yang med pa'o/__/zhes dang /__'od gsal rdzogs pa chen po sgra thal 'gyur rtsa ba'i rgyud las/__rang bzhin dag pa chen po'i mtha'/__/chos rnams rang sar bzhag pa ste/__/rnam shes chos nyid zung 'jug pas/__/ye grol cog gzhag nyid la thug__/dgongs pa blo las 'das pa dang /__mtshan ma rang sar dag pa dang /__/stong pa dngos po'i mtha' grol dang /__/'gyu zad rtog pa zad pa dang /__/blo zad yid las 'das pa'o/__/zhes so/__/de lta bu'i gnas lugs ngo 'phrod phyin chad gshis bcos bslad med pa'i ngang mdangs bskyang zhing /__rnam par rtog pa zhig thol gyis skyes na gnyen po gzhan mi bsten par rig pa'i ngang tshugs ma shor bar byas pas/__lan tshwa chur thim pa bzhin rang yal du 'gro/__de tsam na nyams len gyi sne zin pa yin pas lus gnad sogs la ltos min ji ltar yang gnas lugs ma bcos pa kho na'i rgyun skyong ba la mnyam rjes kun tu 'bad/__dus nam du'ang yengs 'khrul brjed 'byams su song ba'i tshe skabs shig dran pas hrig gis slebs pa na/__nga yengs 'dug snyam pa'i 'gyod pa dang /__rnam rtog lu gu rgyud kyi phreng ba gzhan mi spel bar rig pa'i ngang tshugs ma shor bar byas pas/__skad cig ma gnyis pa nas bzung blo bral gyi ye shes lhug par 'char zhing /__rtog tshogs gang shar yang gnyen po gzhan bsten mi dgos par gsal rig rjen ne ba'i ngang du cham gyis zhi 'gro ba 'di kho na nyams len gyi srog tu bzung ste/__sher phyin brgyad stong pa las/__shes rab kyi pha rol tu phyin pa ni mi bsgom pa'i tshul gyis bsgom par bya'o/__/zhes dang /__blo gros rgya mtshos zhus pa'i mdo las/__/chos rnams yid la mi bya ste/__/lhag par byed pa rnam par spang /__/chos rnams thams cad mnyam nyid du/__/yang dag nyid du khong du chud/__/ces dang /__dpal gsang ba 'dus pa las/__dngos po med la bsgom pa med/__/bsgom par bya ba sgom pa min/__/de ltar dngos po dngos med pas/__/sgom pa dmigs su med pa'o/__/zhes dang /__dngos po med pa'i chos nyid chos/__/nam mkha' lta bur dri med pa/__/stong nyid ye shes rdo rje yis/__/stong pa nyid du rnam par bsam/__/zhes dang /__dgyes pa rdo rje las/__ye shes 'di ni ches phra zhing /__/rdo rje nam mkha'i dkyil lta bu/__/rdul bral mthar phyin zhi ba nyid/__/khyod rang yang ni de yi pha/__/zhes dang /__'od gsal rdzogs pa chen po kun byed rgyal po'i rgyud las/__ji bzhin ma bcos rgyal ba'i dgongs pa la/__/sems dang sems byung rtog pa ci skyes kyang /__/de nyid skye med ngang du gnas shes pas/__/bya rtsol mtshan ma'i 'du shes kun dang bral/__/zhes dang /__sgra thal 'gyur chen po rtsa ba'i rgyud las/__ye nas grol bas bskyar gzhi med/__/rang gis grol bas gnyen po med/__/cer gyis grol bas mthong sar yal/__/yongs su grol bas 'bad med pa'o/__/zhes dang /__mgon po byams pas/__'di la bsal bar bya ba dang /__/bzhag par bya ba cung zad med/__/yang dag nyid la yang dag blta/__/yang dag mthong na rnam par grol/__/zhes dang /__'phags pa klus dbu ma rtsa ba las/__gzhan las shes min zhi ba dang /__/spros pa rnams kyis ma spros pa/__/rnam rtog med don tha dad min/__/de ni de yi mtshan nyid do/__/zhes dang /__rgyal sras zhi ba lhas/__gang tshe dngos dang dngos med pa/__/blo yi mdun na mi gnas pa/__/de tshe rnam pa gzhan med pas/__/dmigs pa med par rab tu zhi/__/zhes dang /__grub chen in+d+ra b+hU tis/__ji srid ji srid rnam rtog pa/__/de srid thams cad kun nas brdzun/__/gang zhig de nyid ma brtags pa/__/de ni yang dag de re bden/__/zhes dang /__dpal sa ra has/__bsam dang bsam bya yongs su dor nas su/__/bu chung bzhin du lhug par gnas par bya/__/bla ma'i lung la bsgrims te gus 'bad na/__/lhan cig skyes pa 'byung bar the tshom med/__/ces dang /__rig 'dzin dga' rab rdo rjes/__yin par grub pa med pa'i rig pa 'di/__/rang snang 'char tshul cir yang ma 'gags pas/__/snang srid thams cad chos sku'i zhing du shar/__/shar ba de nyid rang gi thog tu grol/__/zhes dang /__slob dpon shrI seng has/__/rang sems ye shes rdo rje 'di/__/yod med dbus su mi dmigs shing /__/rtag chad mtha' la mi gnas pa/__/sgro skur med pa'i chos nyid la/__/blang dor med par blo bzhag ste/__/'di shes bsgom pa'i 'du shes bral/__/de ni dgongs pa'i mthar thug go__/zhes dang /__paN chen bi ma las/__/cir snang ngo bo'i rol par gang shar ba/__/rang grol gnyen po gnyis med rang sar grol/__/shar grol dus mnyam gnyis med rol pa cher/__/dgag sgrub bzo bcos re dogs ma byed cig__/ces dang /__dus gsum mkhyen pa o rgyan chen pos/__rang byung rang shar sgom gyi mchog__/bya rtsol bral ba'i ngang la zhog__/byar med lhug pa 'di ka rang /__/sgom pa rang byung rang shar yin/__/zhes dang /__bla ma'i drin gyis de nyid ma nor ngo 'phrod nas/__/bsam gzhig yid byed blo yi dri mas ma bslad par/__/rang shar ma bcos rang babs lhug par skyong ba ni/__/ma nor thar pa'i lam mchog zab mo de nyid yin/__/zhes dang /__grub chen biR+Wa pas/__kun gyi ngo bo yid kyi gzhi rtsa gang yin ltos/__/bltas pas ma mthong yid dang bral na nges par grol/__/sems kyi chos nyid dbyings la 'di zhes med pas na/__/de la sgom dang bsgom par bya ba gnyis su med/__/yod med cir yang mi rtog ngang la rtse gcig bzhag__/ces dang /__dpal tai lo pas/__blo yi chos kyis blos 'das don mi mthong /__/byas pa'i chos kyis byar med sangs mi rgya/__/blo 'das byar med don de rtogs 'dod na/__/rang sems rtsad chod rig pa gcer bur zhog__/rtog pa dri ma'i chu de dwangs su chug__/snang ba dgag sgrub mi bya rang sor zhog__/spang blang med na phyag rgya chen por grol/__/zhes dang /__grub chen nA ro pas/__sna tshogs snang ba dkar dmar dang /__/brjod du med pa'i ye shes gnyis/__shes pas rig na gcig pa'i ngang /__/bsgom pa'i zung 'jug de la mdzod/__/ces dang /__rje mai tri pas/__phyi nang thams cad lhan cig skyes pa nyid/__/mi rtog rnal 'byor chu bo'i rgyun dang 'dra/__/de yang sems las gzhan du tshol ba med/__/yid la mi byed phyag rgya chen po'i lam/__/zhes dang /__'phags pa spyan ras gzigs dbang phyug gis grub chen mi tra dzo ki la gdams pa las/__rang sems gdod nas ma skyes pa/__/'khor dang 'das pa'i byed rgyu can/__/gzhan min rang gi snying dbus nas/__/bla ma'i zhal las shes par 'gyur/__/gang skyes gnyug ma nyid yin phyir/__/gang shar dran pas ma brjed na/__/de shar stong pa nyid bdag tu/__/rnal 'byor rgyal po gdon mi za/__/zhes dang /__grub chen dam pa sangs rgyas kyis/__gzhi ma bcos gnyug ma'i steng du blo mi g.yo rang lugs su bzhag pas nyams gtong bzhag med par 'char ba 'di ni ko Sha pA da'i gdams pa yin/__/zhes sogs dang /__stong pa'i ngang du rig pa'i mdung skor gyis/__/lta ba thog rdugs med do ding ri ba/__dran med ngang du yengs med bya ba thongs/__/sgom la bying rgod med do ding ri ba/__/shugs 'byung ngang las 'gags med rtsal sbyongs kyis/__/spyod pa blang dor med do ding ri ba/__/zhes dang /__ye shes mkha' 'gro ni gu mas/__sgom med yengs med goms shing brtan pa las/__/sa lam rim pa dus 'dir bgrod byed de/__/yid la mi byed sgrib pa rang sar dag__/sku gsum 'bras bu rang shar lhun grub 'byung /__/zhes dang /__mnyam med jo bo dI paM kA ras/__rtog med tshul gyis rtogs pa na/__/stong nyid mthong zhes tha snyad gdags/__/ma mthong ba nyid de mthong bar/__/shin tu zab pa'i mdo las gsungs/__/zhes dang /__shes pa cir yang mi rtog__/cir yang mi 'dzin/__dran pa dang yid la byed pa thams cad spangs te/__ji srid du mtshan ma'am/__rnam par rtog pa'i dgra'am/__chom rkun la sogs pa ma lang gi bar du de lta bu shes pa la gnas par bya'o/__/zhes dang /__thams cad mkhyen pa bai ro tsa nas/__bsgom du med pa'i chos dbyings rjen pa la/__/bsam du med pa'i rig pa ma yengs zhog__/rtog pa skyes na rang shar rang gis grol/__/lta sgom man ngag rtsa ba de las med/__/ces dang /__rong zom paN+Di ta chos kyi bzang pos/__chos rnams kun gyi rtsa ba ni/__/las rnams gang yang bkag pa med/__/bcings grol med pa'i chos kyi sku/__/rang gi sems nyid gnyug ma yin/__/rang sems a tir ma rtogs na/__/gang ltar byas kyang 'ching ba'i rgyu/__/zhes dang /__he ru ka dngos zur chen shAkya 'byung gnas kyis/__/lta ba zhes ming du btags pa de/__/lta rgyu byung na lta ba min/__/blta rgyu med pa'i don la blta/__/chos nyid brjod med lam du khyer/__/zhes sogs dang /__rje btsun 'jam dpal dbyangs kyis bla ma sa skya pa chen po la gdams pa las/__'dzin pa byung na lta ba min/__/zhes dang /__de'i don rje btsun grags pas/__yod par 'dzin la thar pa med/__/med par 'dzin la mtho ris med/__/gnyis kar 'dzin pa mi shes pas/__/gnyis med kyi ngang la gang dgar zhog__/ces dang /__dpal brtse ba chen pos/__rnam par rtog pa ye shes kyi/__/dbang du gyur na 'khor ba med/__/ye shes rnam par rtog pa yi/__/dbang du gyur na grol ba med/__/bskyed rim rtog pa yin mod kyang /__/rtog pa'i ngo bo sems nyid de/__/sems kyi rang bzhin gsal rig yin/__/gsal rig rang bzhin stong pa nyid/__/stong pa gdod nas chos kyi dbyings/__/'khrul pa chos kyi dbyings nyid du/__/shes pas rtog pa thams cad kyang /__/ji ltar bsgom kyang mi rtog nyid/__/btsal kyang 'khrul pa ga la rnyed/__/yid la 'gyu ba ma lus kun/__/chos kyi dbyings su yongs shes na/__/mi rtog ye shes chen po yi/__/'khrul pa logs su grub pa med/__/ces dang /__rje btsun grags pas/__skye dang 'gags dang gnas pa yod min pa/__/brjod bral 'di la ci zhig bsam par bya/__/brjod med brjod pa 'di la don med cing /__/bsam min bsam par bya ba'i gnas min la/__/bsgom du med pa 'di la ci zhig bsgom/__/de ltar shes na 'dzin pa med par 'gyur/__/zhes dang /__'jam mgon sa skya paN+Di tas/__kun rdzob snang ba rmi lam sgyu ma 'dra/__/gang shar stong pa sems kyi khyer so yin/__/bcos med phyag rgya chen po'i gnas lugs ltos/__/sems kyi dran 'dzin gces so lo tsA ba/__/zhes dang /__rje btsun mar pa lo tsA ba la dpal sa ra has gdams pa/__rnam par shes pa phyi ma yis/__/sems la lhan pa gdab tu med/__/snang srid sems kyi rang bzhin shes/__/gnyen pos bcos te bsgom du med/__/sems kyi gnas lugs dran du med/__/de yang ma bcos ngang la bzhag__/ces dang /__'khor bar skyon du mi lta zhing /__/mya ngan 'das pa thob byar med/__/tha mal shes pa rang lugs de/__/ma bcos so ma'i ngang du bzhag__/ces dang /__rje nyid kyi zhal nas/__skye shi gnyis kyi bar do la/__/rnam rtog snang ba ci shar yang /__/snang ba rang bzhin med pa ste/__/'khrul pa byung na log gnon thob/__/log gnon rang gi sems la ltos/__/bltas pas dngos med rang sar grol/__/zhes dang /__rnal 'byor gyi dbang phyug mi la ras pas/__mthar thug don la dgag sgrub med/__/yang dag don la bsam du med/__/bsam du med par bsgom shes na/__/nyon mongs gri zad brdar zad yin/__/bsam blo mang po skyes phyin chad/__/ji ltar bsgoms kyang grol mi nus/__/bsam med rtog pa zad pa na/__/sdig pa'i rnam smin zad pa yin/__/zhes dang /__chos rje dwags po rin po ches/__ma bcos bzhag pa'i sems ni sangs rgyas yin/__/'gro 'chag nyal 'dug kun tu lhug par zhog__/de ltar bzhag pa'i sems ni nam mkha' 'dra/__/nam yang phyogs su ma lhung lta ba yin/__/zhes dang /__ma gcig lab kyi sgrol mas/__chos dbyings klong chen rang gsal ngang /__/dran rtog cir snang 'char ba yin/__/dper na rgya mtsho chen po la/__/rba rlabs la sogs 'byung ba bzhin/__/de ltar rtogs pa'i skyes bu yis/__/bcas bcos mi dgos rang sar zhog__/phan gnod mi 'byung dbyings su grol/__/ces dang /__grub chen o rgyan pas/__phyogs med kyi rig pa rten med de/__/tshogs drug gi rkyen khar mi gtong bar/__/don spros bral chen po'i ngang la 'byams/__/de g.yo ba med pa lta ba'i mchog__/ces dang /__lho brag grub chen nam mkha' rgyal mtshan la dpal gsang ba'i bdag pos gdams pa/__/blta ru med pa'i byang chub sems/__/stong nyid snying rje'i snying po can/__/smra bsam brjod med ngang la zhog__/blo las 'das pa'i ngang la zhog__/byar med lhug pa'i ngang la zhog__/zhog ces bya ba blo yi tshig__/bzhag dang ma bzhag tha snyad med/__/ming med brjod med brtag gzhi bral/__/brtag snang blo ni dbyings su zhi/__/dgag sgrub spong len dbyings su yal/__/sprin tshogs mkha' la dengs pa 'dra/__/rnam rtog ma spang rang sar dag__/ces dang /__kun mkhyen chos kyi rgyal po dri med 'od zer gyis/__gdod ma'i ngang 'dir brjod 'das bzhi rtsa bral/__/spang blang rtsol sgrub re dogs phyogs ris med/__/gnas der gnas pa kun kyang chos kyi sku/__/cog gzhag rang grol 'bad med gang gi yul/__/gnas lugs mthong la gzhi rtsa gang yang med/__/chig chod mthong la sgom pa rdul tsam med/__/snyems dang bral la spyod pa yod ma yin/__/khregs chod mthong la dran 'dzin gnyen po med/__/thod rgal mthong la sems 'dzin bsgom pa med/__/rnam rtog byung na gang shar rang grol yin/__/rtsol sgrub ma byed rang babs lhug par zhog__/so ma gnyug ma ma bcos zang thal ngang /__/cir snang thams cad chos sku'i zhing du 'char/__/zhes sogs rgya cher bka' stsal ba dang /__mnga' ris paN+Di ta chen po pad+ma dbang gi rgyal po'i zhal snga nas/__rtog pa thams cad yongs spangs nas/__/mnyam gzhag chos bdun ngang du klod/__/de tshe gzung 'dzin gnyis med kyi/__/ye shes gsal stong 'dzin med 'char/__/de la sgom skyon dang bral na/__/khregs chod lam gyi dam pa yin/__/drod sogs ma thob bar du ni/__/rim can pa yi tshul du 'byung /__/drod sogs thob nas gcig car du/__/'byung ba 'di la the tshom med/__/ces dang /__rje btsun pradz+nyA rasmis/__gdod nas gzhi yi bzhugs tshul 'khrul med ni/__/yod pa ma yin nges bzung kun dang bral/__/med pa ma yin 'khor 'das gang du'ang snang /__/gnyis ka ma yin brjod pa'i yul las 'das/__/smra bsam brjod med gzhi yi bzhugs tshul lags/__/ye nas gzhi la bcos bsgyur mi byed par/__/lta ba'i gnas lugs rang babs kho na nyid/__/'gro 'ong dang bral rang rig ye shes 'di/__/gnyen pos ma bslad rtsol bas ma bsgribs shing /__/tha mal yengs ma lam du ma song bar/__/ngang bzhag ngang gnas nyid las ma g.yos bzhag__/ces dang /__kun mkhyen bla mas/__gdod nas grol ba'i rig pa ka dag ni/__/stong pa ngo bo nyid med bsam brjod 'das/__/mtshan nyid blo yi brjod pas thug pa spangs/__/smon pa med la rig pa'i yon tan rdzogs/__/rig pa shes bya'i yul la mi gnas pas/__/nga dang nga yir 'dzin pa'i chos dang bral/__/de la sgom dang bsgom par bya ba med/__/ma bcos rnal mar bzhag na rjen par mthong /__/rang gi ngo bo gzhan du mi 'gyur na/__/ma rig 'dzin pas srid par 'khrid mi nus/__/phyi rol yul dang bdag tu zhen pa rnams/__/byed pos ma byas sems rtog brtan las grub/__/gzhi dang rtsa ba med las thams cad skyes/__/skyes tsam nyid nas skye ba med par rtogs/__/de las gzhan pa'i rtog pa yod mi dgos/__/klog dang 'dzin dang bsgom dang bstan bcos sems/__/mtha' dag blo yi grub mthar zhig gyur na/__/yid smon med pa'i sangs rgyas de nyid do/__/zhes pa la sogs pas mtshon te mdo rgyud bstan bcos kun nas rgya cher bka' stsal to/__/de ltar rig par pha ma la nas ma g.yos pa'i tshe na/__gzugs lam me ba dang /__sgra lhang nge ba dang dri chil le ba sogs tshogs drug gi rtog pa gang shar yang phyir mi dpyad/__nang du mi 'dzin/__shar sa de kar cog ger bzhag pas snang yul ma 'gags la der 'dzin gyi rtog pa dang bral ba dwangs ba'i rdzing bur zla ba'i gzugs brnyan shar ba lta bu zhig 'byung bas stong pa dang rten 'brel dbyer med pa'i don la nges shes mchog tu 'drongs shing /__shes rab snying po las/__gzugs stong pa'o/__/stong pa nyid kyang gzugs so/__/gzugs las kyang stong pa nyid gzhan ma yin no/__/stong pa nyid las kyang gzugs gzhan ma yin no/__/zhes dang /__'phags pa klus/__rten cing 'brel 'byung gang lags pa/__/de ni stong pa nyid du bshad/__/de ni brten nas gdags pa ste/__/de ni dbu ma'i lam yin no/__/zhes gsungs pa dag gi don la kha phyir bltas kyi dpyad pa rnon po'i 'dzin stangs nyi tshe bas gzhal ba tsam ma yin par rang rgyud la mngon sum du nyams su myong ba'i sgo nas 'byor ba yin no/__/mdor na lam gyi rtsa ba dal 'byor rnyed dkar shes pas rten la snying po len pa dang /__tshe mi rtag par shes par sgrub pa la phyi bshol mi byed pa dang /__bde sdug sngon las su shes pas dge sdig blang dor la brtson pa dang /__'khor ba sdug bsngal du shes pas srid pa la mngon par skyo ba dang /__yon tan bla ma las 'byung bas dge ba'i bshes gnyen la bsten pa dang /__myang 'das mchog tu bde bas zhi ba'i byang chub sgrub pa dang /__lam gyi dngos gzhi dge ba'i rtsa ba che phra ji lta bu zhig bsgrub kyang theg chen snying rje la rags las pas sbyor ba sems bskyed kyis rtsis zin pa dang /__thams cad ngo bo nyid med pas dngos gzhi dmigs med kyi rgyas gdab pa dang /__dge tshogs zad med du 'phel phyir rjes bsngo ba smon lam gyis mtshams sbyor ba dang /__lam gyi snying po 'khor 'das rig pa las byung bas rig pa ngo shes par byas nas/__mnyam rjes kun tu tha mal gyi shes pa skad cig ma 'di ka'i rgyun rjen ne yer re skyong ba dang /__khyad par rtogs pa skye ba byin gyis brlabs la rags las shing /__byin rlabs mos gus la rags las pas lam gyi gegs sel dang bogs 'don mos gus bla ma'i rnal 'byor kho na la 'bad pa ni zab don thams cad kyi mthar thug pa yin te/__ji skad du/__mdo sdud pa las/__bla ma mkhas pa rnams la rtag tu bsten par bya/__/ci'i phyir zhe na mkhas pa'i yon tan de las byung /__/zhes dang /__sdong po bkod pa las/__dge ba'i bshes gnyen yid la byed pa dang ma bral bas don thams cad 'grub par 'gyur ro/__/zhes dang /__dpal kye rdo rje las/__gzhan gyis brjod min lhan cig skyes/__/gang du yang ni mi rnyed de/__/bla ma'i dus thabs bsten pa dang /__/rang gi bsod nams las shes bya/__/zhes dang /__rdo rje sems dpa' sgyu 'phrul drwa ba las/__bla ma sangs rgyas thams cad kyi/__/dbang phyug longs spyod lngas mchod na/__/dkyil 'khor thams cad mchod par 'gyur/__/nye ba'i dkyil 'khor smos ci dgos/__/zhes dang /__sgra thal 'gyur rtsa ba'i rgyud las/__bla ma sangs rgyas kun dang mnyam/__/bsten pa de las yon tan ni/__/dpag bsam shing dang yid bzhin nor/__/'dod 'jo'i ba dang 'dra ba yi/__/yon tan dpag tu med pa thob/__/de la dmigs nas bla ma bsten/__/'khor ba'i g.yul ngo bzlog phyir ro/__/zhes pa la sogs pas mtshon mdo rgyud kun las sangs rgyas thams cad kyi bgrod pa gcig pa'i lam mchog tu bsngags pa la dgongs nas/__o rgyan chen pos/__byin rlabs dngos grub kun gyi rtsa ba ste/__/bla ma mchog la mos gus gnad du bsnun/__/zhes dang bde gshegs kun 'dus thar pa'i lam mkhan mchog__/mchod yul gtso bo bla mar gsol gdab bya/___/zhes sogs zab mo'i lam thams cad kyi rtsa bar gsungs pa dang /__grub chen biR+Wa pas lam 'bras rdo rje'i tshig rkang du/__lam zab bla ma zhes dbang po rab bla ma'i lam kho nas dkri bar bzhed cing /__gshed dmar spros med las kyang /__bla ma dang ni rdo rje sems/__/tha dad par ni mi bya ste/__/bla ma sangs rgyas chos dang ni/__/de bzhin dge 'dun bla ma ste/__/dngos grub go 'phang mchog 'dod pas/__/kun nas bla ma mnyes par bya/__/zhes gsungs/__rnal 'byor gyi dbang phyug tai lo pas dpal nA ro pa la gdams pa/__zhing dang dngos po bsam pa gsum/__/gcig tu dril nas gsol ba thob/__/gang 'dod 'bras bu 'byung bar nges/__/ltem rkyang ma byed rnal 'byor pa/__/gegs sel kun gyi chos gcig pu/__/bla ma yin no rnal 'byor pa/__/bogs 'don kun gyi chos gcig pu/__/bla ma yin no rnal 'byor pa/__/zhes gdams pas mtshon bka' brgyud gong ma thams cad kyis kyang 'di kho na thugs dam gyi mthil du mdzad/__lha gcig dI paM ka ras/__theg chen gyi yon tan che skyes chung skyes thams cad bla ma'i mos gus la brten nas skye dgos zhes dang /__rje btsun blo bzang grags pas/__de nas 'di phyi'i legs tshogs thams cad ji snyed pa'i/__/rten 'brel legs par 'grigs pa'i rtsa ba ni/__/lam ston dge ba'i bshes gnyen 'bad pa yis/__/bsam dang sbyor bas tshul bzhin bsten pa ru/__/mthong nas srog gi phyir yang mi btang bar/__/bka' bzhin sgrub pa'i mchod pas mnyes par byed/__/ces sogs gsungs nas bka' gdams gsar rnying rnams kyis kyang lam rim gyi thog mar bshes gnyen bsten tshul nas 'khrid par mdzad/__gzhan yang grub chen dam pa sangs rgyas kyis/__/skyabs gnas bslu ba med pa bla ma yin/__/'bral med gtsug tu khur cig ding ri ba/__/bla mas bskyal na gang 'dod sa ru sleb/__/rkang glar mos gus phul cig ding ri ba/__/zhes dang /__ye shes kyi mkha' 'gro ni gu mas sgyu ma lam rim las/__lam lnga sa bcu'i rim pa rnams/__/mos gus stobs kyis bgrod par byed/__/bla ma'i snang ba ma bral na/__/rgyud sde'i dgongs pa gnad kyi mchog__/ces dang /__lam khyer rnam gsum las/__nyin mtshan mnyam rjes thams cad du/__/cir snang thams cad bla mar shes/__/bla ma de nyid rang gi sems/__/snang sems bla ma dbyer med pa'i/__/gsal stong chen po rang shar 'byung /__/zhes sogs mkhas shing grub pa'i slob dpon rnams kyis kyang mgrin gcig tu bsngags par mdzad do/__/de bas na shin tu dben pa'i nags kyi sman ljongs nyams dga' bar rigs thams cad kyi bdag po'i zhabs sen spyi bor 'bral med du bsgoms shing rig stong rjen pa skad cig ma 'di ka'i ngang du 'khor 'das kyi chos thams cad nam mkha' la sprin dengs pa ltar rang sar grol ba'i nyams len la mnyam rjes dbyer med chu bo'i rgyun bzhin du brtson pa ni rgyal ba sras dang bcas pa dgyes pa'i lam mthar thug pa yin pas/__phyag rgya chen po'i ye shes tshe 'di nyid la brnyes par 'dod pa'i skal bzang rnams kyis snying gi thig le gcig tu 'dzin 'tshal/__/zhes mchog tu gdams par byas so/__/ji ltar dpyid kyis bzung ba yis/__/ut+pal dga' tshal dar babs ltar/__/'dis kyang dad dang blo ldan rnams/__/nges don lang tsho rgyas gyur cig__/it+pa se many+dzu g+ho Sha s+ya kr-i taM sarba dA shub+haM//__//