JKW-KABUM-11-DA-001-006

🚧 This website is under continued development. We appreciate your patience!

Previous Text Back to Volume PageNext Text

བློ་སྦྱོང་ཐུན་བརྒྱད་མའི་ཟིན་བྲིས་ཉུང་གསལ།

Wylie title	blo sbyong thun brgyad ma'i zin bris nyung gsal
Location	mkhyen brtse'i bka' 'bum Volume 11, sde tshan 1, Text 6, Pages 60-66 (Folios 30b2 to 33b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. blo sbyong thun brgyad ma'i zin bris nyung gsal. In 'jam dbyangs mkhyen brtse'i dbang po'i bka' 'bum, Vol. 11: 60-66. Khams sde dge rdzong sar dgon: Rdzong sar blo gros phun tshogs, 2020.
Genre	Mind Training Texts - blo sbyong  ·  Notes - zin bris
Colophon	ཞེས་པའང་རྗེ་བླ་མ་མཁས་ཤིང་གྲུབ་པའི་དབང་ཕྱུག་དཀོན་མཆོག་བསྟན་པ་རབ་རྒྱས་དཔལ་བཟང་པོའི་ཞལ་སྔ་ནས་ཚུལ་འདིའི་བཀའ་དྲིན་ཐོབ་པ་མཁྱེན་བརྩེའི་དབང་པོས་ཟིན་བྲིས་སུ་བགྱིས་པ་དགེ་ལེགས་སུ་གྱུར་ཅིག
	zhes pa'ang rje bla ma mkhas shing grub pa'i dbang phyug dkon mchog bstan pa rab rgyas dpal bzang po'i zhal snga nas tshul 'di'i bka' drin thob pa mkhyen brtse'i dbang pos zin bris su bgyis pa dge legs su gyur cig

1 Texts in this Section (sde tshan or chos tshan)

6 60-66	བློ་སྦྱོང་ཐུན་བརྒྱད་མའི་ཟིན་བྲིས་ཉུང་གསལ། blo sbyong thun brgyad ma'i zin bris nyung gsal Mind Training Texts - blo sbyong   ·   Notes - zin bris	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

བློ་སྦྱོང་ཐུན་བརྒྱད་མའི་ཟིན་བྲིས་ཉུང་གསལ་བཞུགས་སོ། །ན་མོ་གུ་ར་བེ། འདི་ཐེག་པ་ཆེན་པོའི་བློ་སྦྱོང་གི་མན་ངག་ཐུན་བརྒྱད་མར་གྲགས་པའི་གདམས་པ་ཟབ་མོ་ལ། དང་པོ་ཟས་ལ་བརྟེན་པའི་བློ་སྦྱོང་ནི། སྦྱིན་བདག་གི་བསོད་ནམས་ཀྱི་ཚོགས་རྫོགས་པ་དང་། རང་ཉིད་ལ་ཟས་ཀྱི་བུ་ལོན་མི་འབྱུང་བ་དང་། ཐབས་དེ་ཙམ་ལ་བརྟེན་ནས་ཀྱང་རྫོགས་པའི་སངས་རྒྱས་ཀྱི་སར་བགྲོད་ནུས་པའི་ཕྱིར། སྤྱིར་ལུས་ཀྱི་སྲིན་བུ་གསོ་བ་ལ་སོགས་པའི་འདུ་ཤེས་དང་། ཁྱད་པར་བཟའ་བཏུང་ཁོང་དུ་མིད་པའི་ཚེ། སེམས་ཅན་ཐམས་ཅན་ཀྱི་རྒྱུ་དུས་ཀྱི་སྡིག་པ་དང་། འབྲས་དུས་ཀྱི་སྡུག་བསྔལ་ཐམས་ཅད་རང་སྟེང་དུ་ལེན་པ་དང་། དབུགས་སྤྲོ་བའི་ཚེ་བདེ་དགེ་ཕར་གཏོང་བའི་དམིགས་རྣམ་དང་སྒྲགས་ཏེ་རང་ཤུགས་ཀྱིས་འཆར་འཆར་དུ་བསླབ་པར་བྱའོ། །གཉིས་པ་དབུགས་ལ་བརྟེན་པའི་བློ་སྦྱོང་ནི། ཐོག་མར་རྩ་བའི་མ་ལྟ་བུ་ཡིད་ཡུལ་དུ་བྱས་ཏེ་སྣ་བུག་གཡས་པ་ནས་རླུང་སངས་ཀྱིས་བུས་པ་དང་མཉམ་དུ། རང་གི་བཏང་བྱའི་དགེ་བ་དང་དེའི་འབྲས་བུ་དང་བཅས་པ་འོད་དཀར་པོའི་རྣམ་པར་སོང་ནས་མའི་སྣ་བུག་གཡོན་པ་ནས་ཞུགས་པས་བདེ་བ་ཁྱད་པར་ཅན་དང་ལྡན་པར་བྱས་སོ་སྙམ་དུ་བསམ། ཚུར་རླུང་རྒྱུ་བ་དང་མཉམ་དུ་མ་དེའི་རྒྱུད་ཀྱི་སྡིག་སྒྲིབ་ཐམས་ཅད་དེའི་སྣ་བུག་གཡས་པ་ནས་རླུང་གིས་དྲངས་ཏེ་སྐྱི་གྲིས་སྐྲ་བཞར་བ་ལྟར་ནག་ཕུང་ངེ་བྱུང་ནས་རང་གི་སྣ་བུག་གཡོན་པ་ནས་ཞུགས། སྙིང་གི་ནང་དུ་དང་ང་སྙམ་པའི་གཅེས་འཛིན་གྱི་ཐོག་ཏུ་བབས་པས་ཐུལ་གྱིས་ཟད་པར་བསམ། དེ་འདྲའི་དམིགས་རྣམ་ཉེར་གཅིག་སོགས་གང་མོས་བྱས་ཏེ། དེ་ནས་ཕ་སོགས་སེམས་ཅན་ཐམས་ཅད་ལ་འོད་དཀར་པོ་བསམ་གྱིས་མི་ཁྱབ་པ་སྤྲོས་ཏེ། གཏོང་ལེན་གྱི་དམིགས་པ་དང་། རེས་འགའ་འགྲོ་བ་རིགས་དྲུག་རེ་རེ་ནས་སོ་སོའི་སྡུག་བསྔལ་ལེན་པ་དང་། དེ་དང་དེ་ལ་ཆེད་དུ་ཕན་པའི་བདེ་བ་གཏོང་བ་སོགས་བྱའོ། །གསུམ་པ་ལུས་གངྒཱའི་བྱེ་མ་སྙེད་དུ་སྤྲུལ་ནས་རིགས་དྲུག་གི་སྡུག་བསྔལ་དང་དུ་ལེན་པའི་བློ་སྦྱོང་ནི། རང་གི་ལུས་དཔག་ཏུ་མེད་པ་ནམ་མཁའི་མཐའ་དང་མཉམ་པ་སྤྲོས་ནས། སེམས་ཅན་རེ་རེ་ལ་ལུས་རེ་རེ་བཏང་བས་གང་ལ་གང་འདོད་ཀྱིས་ཚིམ་པར་བསམ་པ་དང་། ཡང་དམྱལ་བ་ནས་བཟུང་སྟེ་ཁམས་གོང་མའི་བར་དང་། དེ་ཙམ་དུ་མ་ཟད་ས་བཅུ་པ་ཚུན་ཆད་ཀྱི་ཡུལ་ལ་རེ་རེ་ཞིང་དམིགས་ནས་དེ་དང་དེའི་སྡིག་པ་དང་སྒྲིབ་པ་ཐམས་ཅད་ལེན་པ་དང་། རང་གི་བདེ་དགེ་ཁོང་རྣམས་ལ་ཕུལ་བའི་མོས་པ་བྱའོ། །བཞི་པ་ཤ་ཁྲག་ལ་བརྟེན་པའི་བློ་སྦྱོང་ནི། རང་དང་སེམས་ཅན་ཐམས་ཅད་ལ་འཚེ་ཞིང་། གྲོགས་ཆོས་མཛད་རྣམས་དང་། ཁྱད་པར་དཔལ་ལྡན་བླ་མ་དམ་པའི་སྐུ་ཚེ་མཛད་ཕྲིན་ལ་གནོད་པར་བྱེད་པའི་རིགས་མདུན་དུ་བཀུག་ནས། ཁྱེད་རྣམས་ཀྱིས་ཐོག་མ་མེད་པ་ནས་བདག་གི་མ་གྲངས་མེད་པ་བྱས། དེའི་དྲིན་ལེན་གཟོ་བའི་ཕྱིར། སྤྱིར་སེམས་ཅན་ཐམས་ཅད་དང་། སྒོས་ཆོས་མཛད་ཀྱི་སྐྱེས་བུ། ཡང་སྒོས་དཔལ་ལྡན་བླ་མ་དམ་པ་རྣམས་ཀྱི་སྐུའི་གླུད་ཀྱི་ཕྱིར་དུ་བདག་གི་ལུས་འདི་ཁྱེད་རྣམས་ལ་སྟེར་བ་ཡིན་པས། ཤ་ལ་དགའ་ན་ཤ་ཟོ། ཁྲག་ལ་དགའ་ན་ཁྲག་འཐུང་། རུས་པ་ལ་དགའ་ན་རུས་པ་མུར། པགས་པ་ལ་དགའ་ན་པགས་པ་ཁྱེར་ལ་བྱོན། རིངས་ན་རྗེན་པར་ཟོ། མི་རིངས་ན་ཚོས་ལ་ཟོ། ལུས་འདི་གང་འདོད་དུ་སྟེར་བས་ཟས་གོས་ཁང་བཟང་སོགས་ཅི་དང་ཅི་འདོད་པའི་རྫས་སུ་ཁྱེར་ཞིག །བདག་གི་ལུས་ལོངས་སྤྱོད་དགེ་རྩ་རྣམས་ལས་གང་ལ་གང་འདོད་ཁྱེར་ཞིག །ཇི་འདོད་བཞིན་དུ་སྤྱོད་ཅིག །སུ་འདོད་པ་ཁྱེར་ཤིག །ཇི་ལྟར་འདོད་བཞིན་དུ་སྤྱོད་ཅིག །ཅེས་རྩི་སྨན་གྱི་སྡོང་པོ་ཇི་ཙམ་བཅད་ཀྱང་བདག་གི་བྱ་བ་དང་རྣམ་རྟོག་མེད་པ་བཞིན་དུ་སེམས་ཅན་ཀུན་གྱི་ཉེ་བར་མཁོ་བའི་གསོས་ཆེན་པོར་བསམས་ལ་རེ་དོགས་མེད་པར་བྱས་ལ་བརྗོད་ཅིང་བཏང་བར་བྱའོ། །ལྔ་པ་གཏོར་མ་ལ་བརྟེན་པའི་བློ་སྦྱོང་ནི། ཕྱི་སྣོད་ཀྱི་འཇིག་རྟེན་རིན་པོ་ཆེའི་གཏོར་སྣོད་དུ་བསམ། དེའི་ནང་དུ་རང་གི་ལུས་དུམ་བུར་གཏུབ་པ། ཨོཾ་ཨཱཿཧཱུྃ་གིས་བདུད་རྩིར་བསྒྱུར། འཇིག་རྟེན་འདས་མ་འདས་ཀྱི་མགྲོན་ཐམས་ཅད་ལ་ནམ་མཁའ་མཛོད་ཀྱི་མཆོད་སྤྲིན་དུ་ཕུལ་བས་ཐུགས་མཉེས་ཤིང་ཚིམ། མཐར་འཁོར་གསུམ་མི་དམིགས་པ་ནམ་མཁའ་ལྟ་བུས་རྒྱས་བཏབ་ལ། དེ་ལས་ལངས་པ་ན་སྒྱུ་མ་ལྟ་བུར་བསྒོམ་པར་བྱའོ། །དྲུག་པ་འབྱུང་བ་ལ་བརྟེན་པའི་བློ་སྦྱོང་ནི། རང་གི་ལུས་ཀྱི་ཤ་དང་རུས་པ་སོགས་ནང་གི་སའི་ཁམས་ཐམས་ཅད་ཕྱི་རོལ་གྱི་འབྱུང་བ་སའི་ཁམས་ལ་ཐིམ། དེ་བཞིན་དུ་ཁྲག་དང་ཆུ་སེར་སོགས་ཕྱིའི་ཆུ། དྲོད་སོགས་ཕྱིའི་མེ་ཁམས་དང་། དབུགས་སོགས་རླུང་ཁམས་ལ་ཐིམ། རང་གི་ལུས་འབྱུང་བ་བཞིར་གྱུར་པས་སེམས་ཅན་ཐམས་ཅད་ཀྱི་ཉེར་འཚེའི་རྟེན་གཞི་བྱེད་པར་མོས། གཞན་ཡང་རེས་འགའ་ལུས་འདི་སེམས་ཅན་ཐམས་ཅད་ཀྱི་གྲངས་དང་མཉམ་པ་དང་། རེས་འགའ་ལུས་གཅིག་པུ་ལས་ཀྱང་གང་འདོད་ཀྱི་དངོས་པོ་བཏང་བ་དང་། རེས་འགའ་ཟས་གོས་གནས་མལ་གྲུ་གཟིང་སོགས་ཀྱི་དངོས་པོར་སྤྲུལ་ནས་གང་ལ་གང་འདོད་དུ་གཏོང་བས་མཚོན་ནས་དམིགས་པའི་འཕྲུལ་ཅིར་ཡང་རྩེ་བར་བྱའོ། །བདུན་པ་ཡིད་བཞིན་གྱི་ནོར་བུ་རིན་པོ་ཆེར་བསྒྱུར་བའི་བློ་སྦྱོང་ནི། རང་གི་ལུས་ཡིད་བཞིན་གྱི་ནོར་བུ་ལྟར་བསམས་ལ། དེ་ལས་ཕ་མ་སེམས་ཅན་ཀུན་ལ་གང་འདོད་པའི་དངོས་པོར་ཆར་བཞིན་དུ་འབབ་པ་དང་། དེ་ཡང་ལམ་ལ་མ་ཞུགས་པ་རྣམས་ལ་ལམ་ཞུགས་པ་དང་། ཞུགས་པ་རྣམས་ཡོན་ཏན་གྱི་ཁྱད་པར་གོང་ནས་གོང་དུ་འཕེལ་བའི་ཕྱིར་དུ། ཆོས་སྟོན་པའི་བླ་མ་དང་། དམ་པའི་ཆོས་ཀྱི་གླེགས་བམ་དང་། ཆོས་སྒྲུབ་པའི་གནས་དང་ཡོ་བྱད་ཕུན་སུམ་ཚོགས་པར་གྱུར་ནས་ངན་སོང་གསུམ་དང་། ཉན་རང་དང་། ས་བཅུའི་བྱང་ཆུབ་སེམས་དཔའི་བར་རྣམས་ལ། རང་རང་དང་འཚམས་པར་ཕན་བདེ་བླ་ན་མེད་པ་བསྒྲུབ་པར་བསམ་མོ། །འདི་ལ་ཡི་གེ་རྙིང་པ་རང་ལུས་ཡིད་བཞིན་གྱི་ནོར་བུ་བཻཌཱུཪྻ་ཟུར་བརྒྱད་པའི་རྣམ་པར་བསྒྱུར་ནས་དམིགས་རྣམ་སྔར་ལྟར་བྱ་བར་གསུངས་པས། ལས་དང་པོ་པས་དམིགས་པ་འཆར་བདེ་བའི་ཕྱིར་དེ་ལྟར་བྱས་ཀྱང་འགལ་བ་མེད་མོད། འོན་ཀྱང་དེའི་བྱེད་ལས་དང་ཆོས་མཐུན་པར་བསྒོམ་པས་དོན་འགྲུབ་པ་ཉིད་དོ། །བརྒྱད་པ་བློ་སྦྱོང་འཆི་ཁ་མའི་མན་ངག་ནི། ཆོས་འདི་བའི་ལུགས་ཀྱིས། ནམ་འཆི་བ་ལ་མངོན་དུ་ཕྱོགས་པའི་ཚེ་ན། ཡོ་བྱད་ཆེ་ཕྲ་ཐམས་ཅད་སྤོང་ཐག་ལ་གཏང་། ཡན་ལག་བདུན་པ་སོགས་གསོག་པའི་སྒོ་དུ་མ་དང་། ཁྱད་པར་དུ་ཕུང་པོ་མཆོད་པ་ཕུལ་ནས་ཞེན་པ་བཅད། འཆི་ཁ། བར་དོ། མངལ་གནས། སྐྱེ་སྲིད་དེ་བརྗེད་པའི་གནས་བཞི་དང་། མི་དང་། མི་མ་ཡིན་དང་། ནད་དང་། ཉོན་མོངས་པ་དྲག་པོ་སྟེ་འཆོར་བའི་གནས་བཞི་རྣམས་ལ་བློ་སྦྱོང་བརྗེད་པ་དང་། འཆོར་བ་མི་འགྱུར་བ་བྱིན་གྱིས་བརླབ་ཏུ་གསོལ། བློ་སྦྱོང་གི་རྟོག་པ་སྔར་མ་སྐྱེས་པ་གསར་དུ་སྐྱེ་བ་དང་། གནས་པ་གོང་ནས་གོང་དུ་འཕེལ་ཞིང་བྱིན་གྱིས་བརླབ་ཏུ་གསོལ། ཞེས་གསོལ་བ་འདེབས་ཤིང་། གཏོང་ལེན་གྱི་སྒོ་ནས་བྱམས་སྙིང་རྗེ་སྔོན་དུ་འགྲོ་བས་བྱང་ཆུབ་སེམས་གཉིས་མངོན་དུ་བྱང་བ་བཞིན་འཆི་བའི་དུས་བྱའོ། །དེ་ལྟ་བུའི་གདམས་པ་ཟབ་མོ་ཉམས་སུ་ལེན་པ་ལའང་། སྔོན་འགྲོ་སྦྱོར་བའི་ཆོས་དྲུག་དང་ཁྱད་པར་བླ་མའི་རྣལ་འབྱོར་བསྒོམས་ལ་གསོལ་བ་དྲག་ཏུ་བཏབ། དངོས་གཞི་སོ་སོའི་དམིགས་རྣམ་རྒྱུད་དང་འདྲིས་ངེས་སུ་ཉམས་སུ་བླངས། རྗེས་ཐུན་ལས་ལྡང་བའི་ཚེ་ནའང་དགེ་རྩ་བསྔོ་ཞིང་། ཐུན་མཚམས་ཐམས་ཅད་དུའང་དངོས་གཞིའི་ཉམས་ལེན་རྩི་དང་མ་བྲལ་བར་དྲན་ཤེས་བསྟེན་པའི་སྒོ་ནས་སྤྱོད་ལམ་དགེ་བའི་བྱ་བས་དུས་འདའ་བར་བྱེད་པ་དང་། ཅུང་ཟད་གོམས་ནས་སོ་སོའི་དུས་དང་། དུས་མིན་པའི་གནས་སྐབས་ཐམས་ཅད་དུ་ལམ་ཁྱེར་ལ་བསླབ་པས་བྱང་ཆུབ་སེམས་གཉིས་ལ་སྐྱེས་བུའི་རྩལ་ཅི་ཡོད་ཀྱིས་སྦྱོང་བ་ནི་དལ་འབྱོར་གྱིས་རྟེན་ལ་སྙིང་པོ་ལེན་པའི་ཐབས་རྨད་དུ་བྱུང་བའོ། །ཞེས་པའང་རྗེ་བླ་མ་མཁས་ཤིང་གྲུབ་པའི་དབང་ཕྱུག་དཀོན་མཆོག་བསྟན་པ་རབ་རྒྱས་དཔལ་བཟང་པོའི་ཞལ་སྔ་ནས་ཚུལ་འདིའི་བཀའ་དྲིན་ཐོབ་པ་མཁྱེན་བརྩེའི་དབང་པོས་ཟིན་བྲིས་སུ་བགྱིས་པ་དགེ་ལེགས་སུ་གྱུར་ཅིག ། ༈

[edit]

blo sbyong thun brgyad ma'i zin bris nyung gsal bzhugs so/__/na mo gu ra be/__'di theg pa chen po'i blo sbyong gi man ngag thun brgyad mar grags pa'i gdams pa zab mo la/__dang po zas la brten pa'i blo sbyong ni/__sbyin bdag gi bsod nams kyi tshogs rdzogs pa dang /__rang nyid la zas kyi bu lon mi 'byung ba dang /__thabs de tsam la brten nas kyang rdzogs pa'i sangs rgyas kyi sar bgrod nus pa'i phyir/__spyir lus kyi srin bu gso ba la sogs pa'i 'du shes dang /__khyad par bza' btung khong du mid pa'i tshe/__sems can thams can kyi rgyu dus kyi sdig pa dang /__'bras dus kyi sdug bsngal thams cad rang steng du len pa dang /__dbugs spro ba'i tshe bde dge phar gtong ba'i dmigs rnam dang sgrags te rang shugs kyis 'char 'char du bslab par bya'o/__/gnyis pa dbugs la brten pa'i blo sbyong ni/__thog mar rtsa ba'i ma lta bu yid yul du byas te sna bug g.yas pa nas rlung sangs kyis bus pa dang mnyam du/__rang gi btang bya'i dge ba dang de'i 'bras bu dang bcas pa 'od dkar po'i rnam par song nas ma'i sna bug g.yon pa nas zhugs pas bde ba khyad par can dang ldan par byas so snyam du bsam/__tshur rlung rgyu ba dang mnyam du ma de'i rgyud kyi sdig sgrib thams cad de'i sna bug g.yas pa nas rlung gis drangs te skyi gris skra bzhar ba ltar nag phung nge byung nas rang gi sna bug g.yon pa nas zhugs/__snying gi nang du dang nga snyam pa'i gces 'dzin gyi thog tu babs pas thul gyis zad par bsam/__de 'dra'i dmigs rnam nyer gcig sogs gang mos byas te/__de nas pha sogs sems can thams cad la 'od dkar po bsam gyis mi khyab pa spros te/__gtong len gyi dmigs pa dang /__res 'ga' 'gro ba rigs drug re re nas so so'i sdug bsngal len pa dang /__de dang de la ched du phan pa'i bde ba gtong ba sogs bya'o/__/gsum pa lus gang+gA'i bye ma snyed du sprul nas rigs drug gi sdug bsngal dang du len pa'i blo sbyong ni/__rang gi lus dpag tu med pa nam mkha'i mtha' dang mnyam pa spros nas/__sems can re re la lus re re btang bas gang la gang 'dod kyis tshim par bsam pa dang /__yang dmyal ba nas bzung ste khams gong ma'i bar dang /__de tsam du ma zad sa bcu pa tshun chad kyi yul la re re zhing dmigs nas de dang de'i sdig pa dang sgrib pa thams cad len pa dang /__rang gi bde dge khong rnams la phul ba'i mos pa bya'o/__/bzhi pa sha khrag la brten pa'i blo sbyong ni/__rang dang sems can thams cad la 'tshe zhing /__grogs chos mdzad rnams dang /__khyad par dpal ldan bla ma dam pa'i sku tshe mdzad phrin la gnod par byed pa'i rigs mdun du bkug nas/__khyed rnams kyis thog ma med pa nas bdag gi ma grangs med pa byas/__de'i drin len gzo ba'i phyir/__spyir sems can thams cad dang /__sgos chos mdzad kyi skyes bu/__yang sgos dpal ldan bla ma dam pa rnams kyi sku'i glud kyi phyir du bdag gi lus 'di khyed rnams la ster ba yin pas/__sha la dga' na sha zo/__khrag la dga' na khrag 'thung /__rus pa la dga' na rus pa mur/__pags pa la dga' na pags pa khyer la byon/__rings na rjen par zo/__mi rings na tshos la zo/__lus 'di gang 'dod du ster bas zas gos khang bzang sogs ci dang ci 'dod pa'i rdzas su khyer zhig__/bdag gi lus longs spyod dge rtsa rnams las gang la gang 'dod khyer zhig__/ji 'dod bzhin du spyod cig__/su 'dod pa khyer shig__/ji ltar 'dod bzhin du spyod cig__/ces rtsi sman gyi sdong po ji tsam bcad kyang bdag gi bya ba dang rnam rtog med pa bzhin du sems can kun gyi nye bar mkho ba'i gsos chen por bsams la re dogs med par byas la brjod cing btang bar bya'o/_/lnga pa gtor ma la brten pa'i blo sbyong ni/__phyi snod kyi 'jig rten rin po che'i gtor snod du bsam/__de'i nang du rang gi lus dum bur gtub pa/__oM AHhU~M gis bdud rtsir bsgyur/__'jig rten 'das ma 'das kyi mgron thams cad la nam mkha' mdzod kyi mchod sprin du phul bas thugs mnyes shing tshim/__mthar 'khor gsum mi dmigs pa nam mkha' lta bus rgyas btab la/__de las langs pa na sgyu ma lta bur bsgom par bya'o/__/drug pa 'byung ba la brten pa'i blo sbyong ni/__rang gi lus kyi sha dang rus pa sogs nang gi sa'i khams thams cad phyi rol gyi 'byung ba sa'i khams la thim/__de bzhin du khrag dang chu ser sogs phyi'i chu/__drod sogs phyi'i me khams dang /__dbugs sogs rlung khams la thim/__rang gi lus 'byung ba bzhir gyur pas sems can thams cad kyi nyer 'tshe'i rten gzhi byed par mos/__gzhan yang res 'ga' lus 'di sems can thams cad kyi grangs dang mnyam pa dang /__res 'ga' lus gcig pu las kyang gang 'dod kyi dngos po btang ba dang /__res 'ga' zas gos gnas mal gru gzing sogs kyi dngos por sprul nas gang la gang 'dod du gtong bas mtshon nas dmigs pa'i 'phrul cir yang rtse bar bya'o/__/bdun pa yid bzhin gyi nor bu rin po cher bsgyur ba'i blo sbyong ni/__rang gi lus yid bzhin gyi nor bu ltar bsams la/__de las pha ma sems can kun la gang 'dod pa'i dngos por char bzhin du 'bab pa dang /__de yang lam la ma zhugs pa rnams la lam zhugs pa dang /__zhugs pa rnams yon tan gyi khyad par gong nas gong du 'phel ba'i phyir du/__chos ston pa'i bla ma dang /__dam pa'i chos kyi glegs bam dang /__chos sgrub pa'i gnas dang yo byad phun sum tshogs par gyur nas ngan song gsum dang /__nyan rang dang /__sa bcu'i byang chub sems dpa'i bar rnams la/__rang rang dang 'tshams par phan bde bla na med pa bsgrub par bsam mo/__/'di la yi ge rnying pa rang lus yid bzhin gyi nor bu baiDUR+Ya zur brgyad pa'i rnam par bsgyur nas dmigs rnam sngar ltar bya bar gsungs pas/__las dang po pas dmigs pa 'char bde ba'i phyir de ltar byas kyang 'gal ba med mod/__'on kyang de'i byed las dang chos mthun par bsgom pas don 'grub pa nyid do/__/brgyad pa blo sbyong 'chi kha ma'i man ngag ni/__chos 'di ba'i lugs kyis/__nam 'chi ba la mngon du phyogs pa'i tshe na/__yo byad che phra thams cad spong thag la gtang /__yan lag bdun pa sogs gsog pa'i sgo du ma dang /__khyad par du phung po mchod pa phul nas zhen pa bcad/__'chi kha/__bar do/__mngal gnas/__skye srid de brjed pa'i gnas bzhi dang /__mi dang /__mi ma yin dang /__nad dang /__nyon mongs pa drag po ste 'chor ba'i gnas bzhi rnams la blo sbyong brjed pa dang /__'chor ba mi 'gyur ba byin gyis brlab tu gsol/__blo sbyong gi rtog pa sngar ma skyes pa gsar du skye ba dang /__gnas pa gong nas gong du 'phel zhing byin gyis brlab tu gsol/__zhes gsol ba 'debs shing /__gtong len gyi sgo nas byams snying rje sngon du 'gro bas byang chub sems gnyis mngon du byang ba bzhin 'chi ba'i dus bya'o/__/de lta bu'i gdams pa zab mo nyams su len pa la'ang /__sngon 'gro sbyor ba'i chos drug dang khyad par bla ma'i rnal 'byor bsgoms la gsol ba drag tu btab/__dngos gzhi so so'i dmigs rnam rgyud dang 'dris nges su nyams su blangs/__rjes thun las ldang ba'i tshe na'ang dge rtsa bsngo zhing /__thun mtshams thams cad du'ang dngos gzhi'i nyams len rtsi dang ma bral bar dran shes bsten pa'i sgo nas spyod lam dge ba'i bya bas dus 'da' bar byed pa dang /__cung zad goms nas so so'i dus dang /__dus min pa'i gnas skabs thams cad du lam khyer la bslab pas byang chub sems gnyis la skyes bu'i rtsal ci yod kyis sbyong ba ni dal 'byor gyis rten la snying po len pa'i thabs rmad du byung ba'o/__/zhes pa'ang rje bla ma mkhas shing grub pa'i dbang phyug dkon mchog bstan pa rab rgyas dpal bzang po'i zhal snga nas tshul 'di'i bka' drin thob pa mkhyen brtse'i dbang pos zin bris su bgyis pa dge legs su gyur cig____/_!