JKW-KABUM-02-KHA-001-001

🚧 This website is under continued development. We appreciate your patience!

First text in section. Back to Volume PageNext Text

སངས་རྒྱས་དང་བྱང་ཆུབ་སེམས་དཔའ་སྲས་དང་སློབ་མར་བཅས་པ་ལ་འཕྲིན་དུ་གསོལ་བའི་གཏམ་ཕྱོགས་ཀྱི་རྣ་རྒྱན།

Wylie title	sangs rgyas dang byang chub sems dpa' sras dang slob mar bcas pa la 'phrin du gsol ba'i gtam phyogs kyi rna rgyan
Location	mkhyen brtse'i bka' 'bum Volume 2, sde tshan 1, Text 1, Pages 2-16 (Folios 1b1 to 8b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. sangs rgyas dang byang chub sems dpa' sras dang slob mar bcas pa la 'phrin du gsol ba'i gtam phyogs kyi rna rgyan. In 'jam dbyangs mkhyen brtse'i dbang po'i bka' 'bum, Vol. 2: 2-16. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam
Colophon	སངས་རྒྱས་དང་བྱང་ཆུབ་སེམས་དཔའ་སྲས་དང་སློབ་མར་བཅས་པ་ལ་འཕྲིན་དུ་གསོལ་བའི་གཏམ་ཕྱོགས་ཀྱི་རྣ་རྒྱན་ཞེས་བྱ་བ་འདི་རིས་མེད་པའི་བསྟན་པ་ཀུན་ལ་མཆོག་ཏུ་གུས་པའི་རྨོངས་རྟུལ་གཞོན་ནུ་ཨ་བྷཱ་ཡ་ཞེས་བགྱི་བས་རང་ལོ་བཅུ་བདུན་པར་རྗེ་བཙུན་ཨེ་ཝཾ་པའི་རིང་ལུགས་འཛིན་པའི་ཆོས་གྲྭ་ཆེན་པོར་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག །སརྦས་མནྟ་མདྒ་ལཾ་ཀུརྦནྟུ།།
	sangs rgyas dang byang chub sems dpa' sras dang slob mar bcas pa la 'phrin du gsol ba'i gtam phyogs kyi rna rgyan zhes bya ba 'di ris med pa'i bstan pa kun la mchog tu gus pa'i rmongs rtul gzhon nu a b+hA ya zhes bgyi bas rang lo bcu bdun par rje btsun e waM pa'i ring lugs 'dzin pa'i chos grwa chen por gsol ba btab pa de de bzhin du 'grub par gyur cig__/sarbas man+ta mad+ga laM kurban+tu//

1 Texts in this Section (sde tshan or chos tshan)

1 2-16	སངས་རྒྱས་དང་བྱང་ཆུབ་སེམས་དཔའ་སྲས་དང་སློབ་མར་བཅས་པ་ལ་འཕྲིན་དུ་གསོལ་བའི་གཏམ་ཕྱོགས་ཀྱི་རྣ་རྒྱན། sangs rgyas dang byang chub sems dpa' sras dang slob mar bcas pa la 'phrin du gsol ba'i gtam phyogs kyi rna rgyan Discourses - gtam	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །སངས་རྒྱས་དང་བྱང་ཆུབ་སེམས་དཔའ་སྲས་དང་སློབ་མར་བཅས་པ་ལ་འཕྲིན་དུ་གསོལ་བའི་གཏམ་ཕྱོགས་ཀྱི་རྣ་རྒྱན་ཅེས་བྱ་བ། ། ཨོཾ་སྭ་སྟི་སིདྡྷཾ། འཇིག་རྟེན་གསུམ་ན་ཡོན་ཏན་གྱི་མངའ་བདག་ཐུགས་རྗེ་ཆེན་པོ་བླ་ན་མེད་པ་དང་ལྡན་པའི་རྣམ་པར་འདྲེན་མཆོག་སྲས་དང་སློབ་མར་བཅས་པ་ལ་གུས་པ་ཆེན་པོས་གསོལ་བ་བཏབ་སྟེ། ཇི་ལྟར་བསམ་པའི་དོན་ཀུན་འཕྲིན་དུ་གསོལ་བ་འདི་ལ་མཁྱེན་པ་དང་བརྩེ་བ་ཟད་མི་ཤེས་པས་ཡུད་ཙམ་དགོངས་པར་མཛད་དུ་གསོལ། །སྤྲིན་ཞོན་གཙུག་ན་ཟླ་བས་མཚན་དང་འདམ་བུའི་ཚལ་དུ་སྐྱེས་ལ་སོགས། །ཡང་དག་ལྟ་ལས་གཞན་དུ་གྱུར་པས་ཞབས་རྡུལ་སྤྱི་བོར་ལེན་པ་དག །ཁྱོད་ཀྱི་མཚན་དཔེའི་འོད་རྣོན་དག་གི་དཔལ་ཡོན་མ་བཟོད་གུས་པ་ཆེའི། །ཆུ་སྐྱེས་ཐལ་མོ་སྙིང་གར་བཀོད་ནས་བསྔགས་བརྗོད་དྲི་བསུང་སྤྲོ་དེར་དད། ༡ །འགྲོ་ལ་ཕན་དགོངས་གང་གི་བསྟན་པ་ལུང་དང་རྟོགས་པའི་བདག་ཉིད་དེ། །རིམ་དང་རིམ་མིན་ཀུན་ཀྱང་མྱ་ངན་འདས་པའི་དགོངས་པར་རོ་གཅིག་ཕྱིར། །རྟོན་པ་བཞི་ཡིས་ཟབ་དོན་འཇལ་ཚེ་ལོག་ལྟའི་མུན་པ་སངས་མོད་དེ། །ཕྱོགས་རིས་བཅས་པའི་གྲུབ་མཐའི་མེ་ཡིས་ཐར་པའི་ལྗོན་ཤིང་བསྲེག་འདིར་དགོངས། ༢ །ཡིད་ཀྱི་སྲུབས་ཤིང་འདོད་འགྲོ་སྦྱོར་ལས་བྱུང་བའི་མི་བཟད་གདུག་པའི་སྡེ། །ཕྲག་དོག་ང་རོས་ཕ་རོལ་བཅིངས་ཤིང་ཀུན་ཏུ་རྨོངས་པ་དེ་རྗེས་སུ། །འཇུག་ལ་རིངས་པའི་འགྲོ་བ་འདི་དག་ཁྱོད་ཀྱི་ཐུགས་རྗེས་སླར་བཏུལ་ཏེ། །དགོངས་གཞི་དགོས་པ་ཁྱད་པར་ལྡན་པའི་ལམ་མཆོག་རྣམས་ལ་རྟག་གུས་མཛོད། ༣ །ཁྱད་པར་སྦྱངས་པའི་ཡོན་ཏན་ཀུན་རྫོགས་རིག་གྲོལ་ཟླ་བའི་འཛུམ་ཕྲེང་གིས། །ཀུན་རྨོངས་མུན་སྟུག་ཡོངས་སུ་བཅོམ་མཛད་འཕགས་པའི་དགྲ་བཅོམ་རྒྱ་མཚོ་དང་། །ལམ་ལྔ་ས་བཅུའི་ཐེམ་སྐས་ལ་འཛེགས་བྱང་སེམས་གྲངས་མེད་རྗེས་བཟུང་ནས། །ཞལ་གྱི་བདུད་རྩི་ཉེ་བར་སྩལ་བཞིན་བདག་ཀྱང་ཐུགས་རྗེ་ཆེན་པོས་སྐྱོངས། ༤ །འཇ༷མ་ཞིང་མཉེན་སོགས་ཡོངས་སུ་དག་པའི་མཚན་དཔེའི་སྣང་བརྙན་ལྷག་པར་འབར། །ཐོས་པས་ཀུན་ཏུ་ཐར་པའི་དཔ༷ལ་སྟེར་མ་འདྲེས་བདེན་གཉིས་འབྱེད་པའི་བདག །སྟོང་དང་སྙིང་རྗེའི་ངོ་བོ་ཉིད་ནི་མི་ཕྱེད་རྡོ༷་རྗེ༷འི་མཚན་དོན་ཅན། །སྲིད་ལམ་མྱ་ངན་འདས་པ་ཀུན་གྱི་སྐྱབས་སུ་གྱུར་ཁྱོད་བདག་ལ་དགོངས། ༥ །ཀྱེ་མ་ཐོག་མེད་དུས་ནས་མངོན་གོམས་འཁྲུལ་བཅས་གཟུང་འཛིན་རྒྱ་མཚོ་ཆེར། །ཀུན་རྨོངས་གདོན་དང་ལྷན་ཅིག་མཛའ་བས་སྲིད་པའི་འཇིགས་སྟེར་འཛིན་ཁྲིའི་ཁྲོད། །སྡུག་བསྔལ་གསུམ་གྱིས་ཉམ་ཐག་གྱུར་ཀྱང་སྐད་ཅིག་སྐྱབས་མེད་འདིར་གཟིགས་ལ། །རྣམ་ཐར་བཞི་ལྡན་མཁྱེན་པའི་རལ་གྲིས་ཡུད་ཙམ་དག་གིས་བཟློག་མཛོད་ཀྱེ། ༦ །ཁྱད་པར་སྤྲོས་པའི་མཐའ་དང་མི་མཛའ་ཟབ་མོ་སྟོང་པ་ཉིད་ཀྱི་དོན། །སྒྲོ་འདོགས་སྐུར་འདེབས་ཁས་ལེན་བྲལ་བའི་ཡང་དག་བསྒྲུབ་བྱའི་མཐར་ཐུག་ལ། །རྟག་ཆད་རྡུལ་གྱིས་ནོངས་པར་བྱས་དེས་ཟུང་འཇུག་ལམ་ལས་རིང་གྱུར་པའི། །སྙིགས་མའི་མཐུས་སྒྲིབ་སྤྱོད་ཚུལ་འདི་ལས་མྱུར་དུ་བཟློག་པར་མཛོད་ཅེས་གསོལ། ༧ །འཕགས་པ་ཉིད་དང་ཐ་མི་དད་ཀྱང་སོ་སོར་དབྱེ་བ་ལྟར་བསྟན་པའི། །ཨཱཪྻ་དེ་ཝ་རྗེས་སུ་བཟུང་ཞིང་ཤེས་རབ་རལ་གྲི་མངོན་དུ་བྱིན། །ཙནྡྲ་གོ་མཱིས་བསྟོད་པའི་དབྱངས་ཀྱིས་ཀུན་ནས་ཁྱེད་ཐུགས་རབ་དགྱེས་པས། །གསུང་གིས་དབུགས་དབྱུང་སྩལ་བ་ཇི་བཞིན་བདག་ཀྱང་དེ་ལྟར་མཛད་དུ་གསོལ། ༨།འཆི་མེད་གྲོང་ཁྱེར་དབུས་སུ་གནས་ཀྱང་འདོད་པའི་རོ་ལ་རྩེན་པས་མིན། །ཅི་ཕྱིར་ཞེ་ན་འཁོར་བའི་གཡུལ་ངོར་ཀུན་ཏུ་མ༷་ཕ༷མ་གྲགས་ལྡན་ཅིང་། །འཇིག་རྟེན་འདིར་ནི་རྣམ་པར་རྒྱལ་ཚེ་ཐབས་དང་འཇུག་པ༷་ལམ་བདེ་བའི། །བླ་མེད་བདེན་པ་ཟབ་མོ་སྒྲོགས་ཞེས་ཡོངས་སུ་གསལ་དེ་མངོན་དགོངས་ཤིག ༩ །དོན་ཀུན་གྲུབ་པའི་སྣང་བརྙན་མིན་ཀྱང་ཁྱོད་གསུང་ཐུབ་པ་ཇི་བཞིན་ཏེ། །ཕྱིར་མི་ལྡོག་པའི་ངེས་དོན་གཏམ་གྱི་སེང་གེའི་སྒྲ་དེ་རབ་སྒྲོག་པས། །འདི་ན་ལོག་ལྟའི་ལུས་སྟོབས་རབ་རྒྱས་གཉིས་འཐུང་ཚོགས་རྣམས་སྙིང་འདར་ཞིང་། །བདག་ལྟའི་སྤུ་ལོངས་མངོན་པར་གཡོ་དེ་སྙིང་རྗེའི་གནས་མཆོག་ཉིད་ཡིན་ཕྱིར།༡༠ །དེས་ན་ཁྱོད་སྐུ་ངུར་སྨྲིག་གིས་བཀླུབས་འཇིག་རྟེན་འདི་རུ་མངོན་བསྟན་ཅིང་། །ལུང་དང་རིགས་པའི་རྗེས་སུ་མཐུན་པར་ཡང་དག་ལྟ་བ་རབ་བཀྲལ་ཏེ། །སྲིད་ལམ་དུབ་པའི་འགྲོ་བ་ཀུན་ཀྱང་ཕྱིར་མི་ལྡོག་པའི་ཤེས་རབ་མཆོག །ལྷུན་གྱིས་གྲུབ་སྟེ་བསྟན་དང་འགྲོ་བའི་ཉེར་འཚོའི་གཞི་རུ་འགྱུར་མཛོད་ཀྱེ།༡༡ །བརྩོན་པའི་མཐུ་ཡིས་ཁྱོད་སྐུ་སྒྲུབ་མཛད་འཇིག་རྟེན་མིག་གཅིག་ཐོགས་མེད་ཞབས། །དེ་ཡིས་བཅོས་མིན་སྙིང་རྗེ་ཆེན་པོས་ཁྱོད་ཐུགས་ཀུན་ནས་བསླུས་གྱུར་ཏེ། །མངོན་སུམ་རྗེས་བཟུང་འཆི་མེད་གྲོང་དུ་ངལ་བསོའི་དབུགས་འབྱིན་མཛད་པ་དང་། །ལྷན་ཅིག་དམ་པའི་ཆོས་སྡེ་ལྔ་སྩལ་དེ་འདྲ་ཇི་བཞིན་བདག་ཀྱང་ཟུངས། ༡༢ །ལྷ་དང་དྲང་སྲོང་གྲུབ་པའི་རིག་འཛིན་གནོད་སྦྱིན་འབྱུང་པོའི་ཚོགས་རྣམས་ཀྱིས། །ཉིན་རེ་བཞིན་ཀྱང་ཁྱོད་ཞབས་པདྨོ་བསྟེན་ཅིང་མཆོད་པས་ཅི་ཞིག་སྟེ། །གས༷ང་ཆེན་མྱུར་འགྲོ་ཀུན་ཏུ་ཐོགས་མེད་རྡོ་རྗེ་ཐེག་པའི་ལམ་མཆོག་ཆེའི། །བད༷ག་ཉིད་གཅིག་གྱུར་གཞན་དུ་སྲིད་ན་དཔའ་བོ་ཁྱོད་ཀྱི་མཐུ་ཁོ་ན། ༡༣ །ཡིད་སྲུབས་འཁྲི་ཤིང་སྙིང་ལ་ཉལ་བས་བསྟན་འགྲོར་གེགས་བྱེད་ལུས་ཅན་དང་། །གདུག་པའི་བསམ་སྦྱོར་ཀུན་ནས་འཆང་བའི་ལུས་མེད་འབྱུང་པོའི་སྡེ་ཚོགས་རྣམས། །ཁྱོད་ཀྱི་ཕྱ༷ག་ན༷་འབར་བའི་རྡོ༷་རྗེ༷་དེངས་པ་དེ་ཡིས་མྱུར་བཅོམ་པ། །སླན་ཆད་དུ་ཡང་བྲལ་བར་མཛོད་ཅིག་ལྷག་པའི་ལྷ་མཆོག་ཧེ་རུ་ཀ ༡༤ །ཁྱད་པར་རིན་ཐང་ཆེས་ཆེར་གཅལ་བའི་ངུར་སྨྲིག་གོས་ཀྱིས་བཀླུབས་བྱས་ཤིང་། །དབུགས་བྲལ་བམ་རོའི་ཐོད་པ་འཆང་ཞིང་རལ་པའི་ལན་བུ་གཡོ་བ་ཡང་། །འཇུག་སྡོམ་ཁྲིམས་དང་རིམ་གཉིས་ལམ་བྲལ་མངོན་པར་ཞེན་པའི་སྟོབས་ལྡན་པས། །འཕོས་པའི་ཚེ་ན་འགྲོ་ཀུན་རྒྱུད་དཀྲུགས་མ་རུངས་གྱུར་རྣམས་འདུལ་མཛོད་ཀྱེ། ༡༥ །བྲམ་ཟེའི་རིགས་འཁྲུངས་བརྟུལ་ཞུགས་སྤྱོད་པས་མདའ་མཁན་མཆོག་གི་ཚུལ་བཟུང་ཞིང་། །རིམ་གཉིས་ཟུང་འཇུག་བདུད་རྩིར་རོལ་པས་སྣོད་དང་ལྡན་པར་རབ་གཟིགས་ཏེ། །མངོན་སུམ་ཉིད་དུ་ཁྱོད་ཀྱིས་རྗེས་བཟུང་སྨིན་དང་གྲོལ་བའི་ལམ་སྟེར་བས། །གྲུབ་པ་མཆོག་གི་ས་ལ་གཤེགས་བཞིན་བདག་ཀྱང་དེ་འདྲར་མཛད་དུ་གསོལ། ༡༦ །རྟག་ཏུ་མཁྱེན་པའི་སྤྱ༷ན་ར༷ས་མི་གཡོ་སྙིང་རྗེས་འགྲོ་ལ་ཉེར་གཟི༷གས་ཏེ། །ལུས་མེད་སྒྲིབ་གཉིས་ཀུན་ནས་བསལ་དང་ལུས་ཅན་རྣམས་ལ་ཕན་བདེ་སྟེར། །ཐར་པའི་ཕྱོགས་སུ་འཛུམ་དཀར་གྲོལ་བའི་ལམ་དང་ལམ་སྟེགས་གཅིག་པུའི་བདག །དེ་རིང་བདག་གིས་གསོལ་བ་འདེབས་སོ་སླར་ཡང་ཐུགས་རྗེས་གཟིགས་པར་མཛོད། ༡༧ ཀྱེ་མ་ཕྱོགས་རྣམས་ཀུན་དང་ཁྱད་པར་གངས་ལྡན་དབྱིག་འཛིན་འདི་དག་ཏུ། །ཁྲག་འཐུང་སྲིན་མོ་ཁྲོས་པའི་ཁ་རླངས་རྡོ་རྗེའི་ཚེར་མའི་སྤྲིན་ཆགས་ཤིང་། །དྲན་པས་སྙིང་ལ་ཟུག་རྔུས་དམ་འཁྱུད་གཡུལ་གྱི་སྤྲིན་སྒྲའི་ང་རོ་སྒྲོགས། །ཤིན་ཏུ་ཉམ་ཐག་བཟའ་བས་ཕོངས་པའི་སྨྲེ་སྔགས་མི་བཟད་ཆར་འབབ་པས། ༡༨ །འགྲོ་འདི་མནར་བ་བཟློག་པར་མཛོད་ཅེས་སྙིང་ནས་མཆི་མ་དཀུ་ཞིང་གསོལ། །གལ་ཏེ་དེ་ལ་དགོངས་པར་མི་མཛད་ཞི་བའི་དབྱིངས་སུ་སླར་མནལ་ན། །གྲངས་མེད་བསྐལ་པར་ལུས་ཅན་ཡོངས་སྒྲོལ་སྙིང་རྗེས་དམ་བཅའི་སྤྲིང་ཡིག་གིས། །འགྲོ་ཀུན་མངོན་སུམ་ཉིད་དུ་བསླུའོ་ཀྱི་ཧུད་དེ་དག་མི་གཟིགས་སམ། ༡༩ །འཕགས་པའི་ཡུལ་དུ་ཙནྡྲའི་མཚན་དང་ཞི་བའི་གོ་ཆས་སྒེག་ལ་སོགས། །སྐལ་བཟང་ཀུན་ལ་དགྱེས་ཞལ་བསྟན་ཏེ་རྣམ་པར་གྲོལ་བའི་ལམ་མཆོག་བྱིན། །ཁྱད་པར་བྷོ་ཊའི་ཡུལ་གྱི་ལྗོངས་འདིར་སྤྲུལ་པའི་སྒྱུ་འཕྲུལ་མཐའ་ཀླས་པས། །འགྲོ་རྣམས་རྗེས་སུ་བཟུང་བར་མཛད་བཞིན་བདག་ཀྱང་ཐུགས་རྗེས་རྟག་ཏུ་སྐྱོངས། ༢༠།མཚོ༷་སྐྱེས༷་གཞོན་ནུའི་འཛུམ་ཕྲེང་ལས་གྲོལ་འཆི་མེད་རྟག་པའི་རྡོ༷་རྗེ༷འི་སྐུའི། འཛམ་གླིང་འགྲོ་ཀུན་གདུལ་བར་མཛད་དང་ལུང་རྟོགས་བསྟན་པ་སླར་སྤེལ་བའི། །སང༷ས་རྒྱས༷་གཉི༷ས་པ༷་པ༷དྨའི༷་ཞབ༷ས་ཁྱོད་གངས་ཅན་འགྲོ་ལ་བཀའ་དྲིན་མཐུ། །ཁུར་དུ་བཟོད་ན་ལྷ་དང་བཅས་པ་འཇིག་རྟེན་ཁམས་ཀྱིས་ག་ལ་ཐེག ༢༡ །དེ་ལྟར་ན་ཡང་འབྱུང་པོས་རྒྱུད་དཀྲུགས་ངན་སོང་མངོན་སྒྲུབ་སྐྱེ་བོ་འགས། །བུས་པ་གཞོན་ནུས་མ་ལ་སྡང་བཞིན་དྲིན་དུ་བཟོ་བ་ཅི་ཞིག་ཀྱང་། །ཐུགས་རྗེ་ཆེན་པོ་འཁྲུགས་པ་ལྟ་ཅི་སླར་ཡང་སྙིང་རྗེ་གསར་པའི་མཐུ། །མངོན་པར་བསྐྱེད་ནས་བྷོ་ཊའི་ལྗོངས་འདིར་སྤྲུལ་པའི་ཟློས་གར་བསྒྱུར་བར་མཛོད། ༢༢ །ལུས་ཅན་མཐའ་དག་བཟའ་བ་དང་ནི་རྒྱན་དུ་བྱེད་པའི་སྲིན་པོའི་ཚོགས། ཁྱོད་ཀྱི་ཐུགས་རྗེས་གདུལ་བར་བཟོད་ན་གངས་ཅན་ལྗོངས་ཀྱི་སྐྱེ་འགྲོ་ཕལ། །ཚུལ་མིན་བདུད་ཀྱིས་མངོན་སུམ་བརླབས་པས་གནག་པའི་ལས་ལ་གོམས་པའི་མཐུ། །མྱུར་དུ་ཞི་བྱེད་ཡེ་ཤེས་འཇུག་པ་ཆེན་པོས་དེང་འདིར་ཁྱབ་པར་མཛོད། ༢༣ །འདི་ན་ཁྱོད་ཀྱི་ཐུགས་རྗེས་སྤྲུལ་པའི་སྐྱེས་བུ་ཆེན་པོ་ཐམས་ཅད་ལ། །སླར་ཡང་ཞལ་གྱི་དཀྱིལ་འཁོར་བསྟན་ཏེ་གསུང་གི་རྗེས་སུ་དབུགས་དབྱུང་ཞིང་། །དབང་བསྐུར་དམ་པའི་རྒྱལ་ཐབས་བྱིན་ཞེས་ལུས་མེད་ཁམས་སུ་གྲགས་འབར་བ། །དེ་བཞིན་བདག་ལ་སྩོལ་བར་མཛད་ཅེས་གུས་དང་སྐྱོ་བའི་ཡིད་ཀྱིས་གསོལ། ༢༤ །གཞན་ཡང་ལམ་ལྔ་ས་བཅུའི་ཐེམ་སྐས་ཤིན་ཏུ་སྤ་པའི་འབབ་སྟེགས་སུ། །ཞུགས་དང་ལམ་གྱུར་འབྲས་བུ་མངོན་རྫོགས་རྒྱལ་དང་དེ་སྲས་བྱང་ཆུབ་སེམས། །སྲིད་པའི་དགྲ་བཅོམ་ཉན་ཐོས་རང་རྒྱལ་རྣལ་འབྱོར་རིག་པ་འཛིན་པའི་སྡེ། །ཧེ་རུ་ཀ་དཔལ་འཁོར་ལོའི་མགོན་སོགས་སྐྱབས་སུ་གྱུར་ཀུན་མངོན་དགོངས་ཤིག ༢༥ །དེང་དུས་ཤིན་ཏུ་སྙིགས་མར་གྱུར་པའི་སྦྲུལ་གདུག་ཁ་རླངས་གཡོ་བའི་ཁྲོད། །འགྲོ་རྣམས་ངན་སྤྱོད་དུག་གིས་རབ་མྱོས་ཚུལ་མིན་དུཿཁའི་ཞགས་པས་བཅིངས། །རྒྱལ་བསྟན་སྒྲོན་མེའི་འོད་ཀྱང་མི་འབྱིན་ཕྱོགས་ཀྱི་ཁོ་ར་ཁོར་ཡུག་ཀུན། །ཡིད་སྲུབས་གདོན་གྱིས་བཏབ་པར་གྱུར་འདིར་ཀྱི་ཧུད་ཅུང་ཟད་མི་གཟིགས་སམ། ༢༦ །འདི་ལྟར་རྩ་བཞི་ཅི་དགར་སྤྱོད་བཞིན་ཕྲ་མོ་སྲུང་ལ་སྡོམ་པར་རློམ། །ཕ་རོལ་རྙེད་སྐུར་དཔལ་ལ་བརྐམས་པའི་རྣམ་གཡེང་བྱང་ཆུབ་སེམས་སུ་བསྒོམ། །སྨིན་བྱེད་དང་བྲལ་ཟབ་དོན་འཆད་ཅིང་ནོར་གྱི་ཕྱིར་དུ་དམ་ཚིག་དོར། །སྦྱང་གཞི་སྦྱོང་བྱེད་དེ་འབྲས་ལས་བརྒལ་མངོན་པར་ཞེན་པའི་ཀུན་བརྟགས་བསྐྱེད་རིམ་དང་། ༢༧ །མཚན་མ་ཡིས་བཅིངས་རགས་པའི་ཡོན་ཏན་ཅུང་ཟད་ལ་རོལ་ཡོངས་གྲུབ་ལམ། རྫོགས་རིམ། །དབང་གི་ཡེ་ཤེས་མཐོང་བ་རིང་སྤངས་ཉམས་ཀྱི་འཛིན་སྟངས་མ་ཞིག་བཞིན། །བྱུང་ཚོར་གནས་ཉམས་ངོ་སྤྲོད་བྱེད་ནས་ཉེར་སྤྱོད་ཉི་ཚེའི་བསམ་གཏན་ལ། །ཟག་པ་བྲལ་བའི་ཡེ་ཤེས་ཆེར་འཛིན་གཏི་མུག་འོད་གསལ་མཆོག་ཏུ་རེ། ༢༨ །འགའ་ཞིག་སྤངས་རྟོགས་ཡོན་ཏན་རང་གཟུགས་ཀུན་གསལ་པདྨོའི་ཟླ་བོ་ཅན། །བླུན་པོས་བཏགས་པའི་གྲགས་སྙན་ལ་བསྙེགས་རང་གཞན་ཕན་བདེའི་འབྲས་བུ་གཅོད། །ཕལ་ཆེར་ལོག་སྤྱོད་རྫུན་གྱི་ཕྲེང་བས་གྲུབ་པའི་གོ་འཕང་ལ་རོལ་ཞིང་། །གཞན་ཡིད་གདུགས་ལྟར་བསྐོར་བའི་ངང་ཚུལ་མིག་སྨན་ལས་ཀྱང་ཆེས་ཆེར་གནག ༢༩ །ཉེ་བར་བཟུང་བའི་གཟི་བྱིན་རྫུ་བག་རྣམ་པར་རེག་པས་སྒྲིབ་པའི་མོད། །འཇིག་རྟེན་དག་གིས་ཆེན་པོར་བརྟགས་ཤིང་འདོད་པའི་འབྲས་བུ་རྒྱུན་མི་འཆད། །སྲོག་དང་སྲུང་དང་སྤེལ་བས་སྡུག་བསྔལ་ཕལ་ལས་བྲེལ་བའི་སྤྱོད་ཚུལ་ཅན། །སྦྱངས་པའི་ཡོན་ཏན་དགྲ་བོར་འཛིན་གྱུར་འདྲེན་པའི་དཔལ་དུ་མངོན་པར་བསྟོད། ༣༠ །ཁྱད་པར་བདེན་གཉིས་གནད་ཀྱི་ངེས་གསང་ཕན་ཚུན་ལྟོས་གྲུབ་འགལ་མེད་པར། །མཐོང་མིན་གང་དེའི་རྟེན་འབྱུང་ཚུལ་ལས་ཤིན་ཏུ་རིངས་པའི་བློ་ཅན་དག །སྒྲོ་སྐུར་རྙོགས་མའི་ཕྲེང་བ་སྤེལ་དང་རང་ལྟ་མཆོག་འཛིན་ཕ་རོལ་རྨོངས། །ལ་ལ་ཐོས་བསམ་དགྲ་ཟླར་གྱུར་པས་སྒོམ་པའི་ལམ་ལས་ཕྱིར་ཕྱོགས་སོགས། ༣༡ །རྨོངས་པ་ལས་ཀྱང་རྨོངས་པར་གྱུར་པས་ཤིན་ཏུ་གདུང་བྱས་འགྲོ་འདི་རྣམས། །ཀྱེ་མ་དེང་དུས་ཁྱེད་རྣམས་མཐུ་ལས་གཞན་དུ་སུ་ཡིས་འདུལ་བར་འགྱུར། །ཚུལ་དེའི་ཕྱིར་ན་བདག་ཡིད་རབ་སྐྱོ་ཡང་ཡང་གདུང་བའི་སྤུ་ལངས་གཡོ། །ངན་སོང་གནས་སུ་རྐང་པ་བཀོད་ལས་མི་ཤེས་བཞིན་དུ་སྨྲེ་སྔགས་ཀྱི།༣༢ །མཆིད་ཚིག་འདི་ནི་ཁྱེད་རྣམས་ལ་གསོལ་ཚུལ་འདིར་བས་པ་གང་མཆིས་པ། །ཐུགས་རྗེ་ཆེན་པོས་བཟོད་པར་མཛད་ནས་མྱུར་དུ་མཁྱེན་དང་བརྩེ་བ་ཡི། །སྤྱན་རས་གསར་པས་ཀུན་ཏུ་གཟིགས་ནས་ཡང་དག་ལམ་གྱི་དེ་ཉིད་ལ། །ཞུགས་དང་འཇུག་ཚོགས་རྣམ་པར་རབ་དད་བྲལ་སྨིན་ཡོན་ཏན་འགྲུབ་མཛོད་ཀྱེ། ༣༣ །ཨེ་མ་རྨད་བྱུང་པད་དཀར་ལྟར་བསྔགས་རྣམ་འདྲེན་བཞི་པ་ཤཱཀྱའི་ཏོག །ཟབ་ཞི་སྤྲོས་བྲལ་དབུ་མའི་དབྱིངས་སུ་མཚན་དཔེའི་སྒྱུ་འཕྲུལ་ཉེར་སྡུད་ཚེ། །ལུང་དང་རྟོགས་པའི་བསྟན་པ་ལེགས་གཏད་སྟོན་པ་གཉིས་པར་དབུགས་དབྱུང་ཞིང་། །འཕ༷གས་པ༷འི་སར་བཞུགས་བརྒྱད་གཉིས་གྲངས་ལྡན་གན༷ས་བ༷རྟན་ཆེ༷ན་པོའི་ཚོགས་རྣམས་དགོངས། ༣༤ །དེང་དུས་ཛམྦུའི་རྐང་འཐུང་གིས་མཚན་ནོར་འཛིན་དགའ་མའི་ཡུལ་གྱི་དབུས། །མ་ག་དྷ་དང་རྡོ་རྗེ་གདན་སོགས་ལོག་པར་སྨྲ་དང་ཀླ་ཀློས་ཁེབས། །བྷོ་ཊའི་ལྗོངས་ཀྱང་དེ་ལ་སྨོད་བཞིན་སྤྱོད་ལམ་དེ་ཡི་སྤུན་ཟླ་རུ། །བོས་པ་འདི་ཀོས་རྒྱལ་བའི་བསྟན་པ་རི་མོའི་ནཱ་དའི་རྗེས་སུ་སོང་། ༣༥ །དེ་འདྲའི་སྙིགས་སྤྱོད་ཚ་གདུང་སྟུག་པོས་ཕན་བདེའི་དགའ་ཚལ་ཉམས་པ་འདིར། །ཁྱེད་རྣམས་ཐུགས་རྗེའི་སྤྲིན་དཀར་ལེགས་བསྐུལ་མཁྱེན་བརྩེའི་བདུད་རྩིའི་ཐིགས་ཕྲེང་གིས། །གཞི་གསུམ་ཆོ་གའི་རྩ་བ་ལེགས་བརྟན་སྨོན་འཇུག་བྱང་སེམས་ཡལ་ག་རྒྱས། །རྡོ་རྗེ་ཐེག་པའི་མེ་ཏོག་མཛེས་འཛིན་ཕན་བདེའི་འབྲས་བུ་འཇོ་གྱུར་ཅིག ༣༦།ཐོས་པའི་ཟླ་ཤེལ་གཞོན་ནུའི་བཏུང་པ་རྣ་བའི་ཨུཏྤལ་དཀར་པོར་རོལ། །བསམ་བྱུང་ཤེས་རབ་འཇོ་སྒེག་རབ་གཡོ་ལེགས་བཤད་གསར་པའི་འཛུམ་ཕྲེང་དགོད། །སྒོམ་སྤང་འཕགས་པའི་གེ་སར་ཁུར་ལྕི་ཞི་བསིལ་མྱང་འདས་རོ་ཡི་གཏེར། །ཡོངས་སུ་རྫོགས་པས་བཤད་སྒྲུབ་བསྟན་འཛིན་སྲིད་མཐའི་བར་དུ་འཕེལ་མཛོད་ཀྱེ།༣༧ །གཞན་ཡང་མགོན་པོ་ཐུགས་རྗེ་ཆེ་ལྡན་སྲས་བཅས་གྲངས་མེད་རྒྱལ་ཀུན་དགོངས། །ལྕགས་སྲེག་འབར་བའི་འོད་ཟེར་གྱིས་འཁྱུད་ཚལ་པར་སོང་གྱུར་དེ་ཡི་ལུས། །རྣག་ཁྲག་རྒྱུན་གྱིས་བརླན་པར་བྱས་དང་རླུང་གི་རེག་བྱས་ཆེར་བཅོམ་པས། །ཨུཏྤལ་ལྟར་གས་སྣང་ཚུལ་སྣ་ཚོགས་དམྱལ་བའི་འགྲོ་འདིར་ཡུད་ཙམ་གཟིགས། ༣༨ །དེ་བཞིན་རབ་ཏུ་རིང་བའི་དུས་ནས་ཆུ་ཐིགས་ཙམ་གྱི་བཏུང་བ་ཡང་། །ཉིན་མཚན་མེད་པར་འབད་པས་བཙལ་ཀྱང་ཅུང་ཟད་རྙེད་མིན་དེ་དག་གིས། །ལྟོ་བ་ཡུལ་ལྗོངས་ཆེན་པོའི་རྗེས་སྙེགས་བརྐམ་ཆགས་སེར་སྣའི་འབྲས་བུ་ཅན། །ཡི་དྭགས་འགྲོ་འདིར་རྨད་བྱུང་ཐུགས་རྗེས་སྤྱན་རས་ཡངས་པོས་བཙའ་བར་མཛོད། ༣༩ །ཕལ་ཆེར་བདག་ཏུ་བཟུང་བས་དམ་བཞག་བཅིངས་དང་བརྡེག་པའི་འཚེ་བས་གཞུར། །འགའ་ཞིག་རྔོན་པའི་སྦྱོར་བ་རྩུབ་མོས་རང་བཞིན་མེད་པར་སྲོག་འཕྲོག་ཅིང་། །ཀུན་ཀྱང་གཏི་མུག་ལམ་གོལ་ལ་འཁྱམས་ཐར་པའི་སྣང་བ་རིང་བྲལ་བའི། །དུད་འགྲོའི་གནས་ཀྱང་སྡུག་བསྔལ་མི་བཟད་སྐད་ཅིག་ཡེ་ཤེས་འཇུག་པས་ཟུངས། ༤༠ །སྐྱེ་བའི་ཆུ་གཏེར་འགྱུར་དང་འདུ་བྱེད་རླབས་ཕྲེང་གཡོ་བའི་སྐ་རགས་ཅན། །རྒ་ན་འཆི་སོགས་འཛིན་ཁྲིའི་གྲོང་ཁྱེར་ཚད་མེད་འཇིགས་པའི་དུཿཁས་མནར། །རྟག་པ་ཉིད་དུ་འབད་པས་བསྒྲུབས་ཀྱང་ཉོན་མོངས་དྲི་བཞོན་དང་འགྲོགས་པའི། །ཉམ་ཐག་མི་ཡུལ་གྲོང་ཁྱེར་འདི་ཡང་མཁྱེན་དང་བརྩེ་བའི་ཞགས་པས་སྐྱོངས། ༤༡ །བསྲན་པར་མི་བཟོད་ཕྲག་དོག་གོ་ཆ་སྟུག་པོར་བགོས་དེའི་ལག་པ་ནི། །རང་གཞན་ཁོང་ཁྲོའི་ཟུག་རྔུའི་དཔལ་སྦྱིན་དགྲ་སྟས་མཚན་པས་བསྣུན་པའི་མོད། །ཐར་པའི་མགོ་བོ་ཚལ་པར་བཀས་ཀྱང་ལྷ་ཡི་བསོད་ནམས་ལས་དམན་པས། །རང་ཉིད་མི་བཟད་སྡུག་བསྔལ་གྱིས་མནར་ལྷ་མིན་ཡུལ་འདིར་སྐད་ཅིག་གཟིགས། ༤༢ །རིང་པོར་འཚོ་བའི་ལེ་ལོའི་དབང་གྱུར་ཞི་བདེའི་བདུད་རྩི་བརྟེན་མི་བགྱིད། །འབྱོར་དང་ལང་ཚོའི་ཡོན་ཏན་ལྡན་ཀྱང་ནམ་ཞིག་ཉིང་མཚམས་སྦྱོར་བའི་ཚེ། །མེ་ཏོག་ཕྲེང་བ་རྣམ་པར་ཉམས་སོགས་འགྱུར་བའི་སྡུག་བསྔལ་བརྒྱ་ཕྲག་གིས། །མྱ་ངན་ཁོང་བུར་ཡུན་རིང་ཚུད་གྱུར་ལྷ་ཡི་གནས་ཀྱང་གཟིགས་པར་འོས། ༤༣ །དེ་སོགས་འཁོར་བའི་ནགས་སུ་རབ་འཁྱམས་སྣང་ཚུལ་མི་བཟད་འདི་ཉིད་ཀུན། །རྟག་པ་ཉིད་དུ་ཁྱེད་ཀྱིས་གཟིགས་མོད་བདག་གིས་བསྐུལ་འདེབས་མི་འཚལ་མོད། །དེ་ལྟར་ན་ཡང་རང་ཉིད་ལས་བྱས་རྣམ་སྨིན་ཁུར་གྱིས་མནར་བ་ཡིས། །མ་བཟོད་སྨྲེ་སྔགས་བར་མེད་སྒྲོགས་འདི་ཉོན་མོངས་པ་ཡི་སྐྱོན་དུ་ཟད། ༤༤ །ཚུལ་དེར་སླར་ཡང་སྙིང༷་རྗེ༷ས་གཟིགས་ནས་བྱ༷མས་པ༷འི་ཆུ་གཏེར་འཕྱུར་བ་དང་། །ཕན་བདེའི་དག༷འ་བ༷འི་འཛུམ་ཕྲེང་ལེགས་སྤྲོ་གཉིས་སྐྱེས་གཞོན་ནུ་ཐོན་པའི་མོད། །ཕྱོགས་རིས་མེད་པར་བཏ༷ང་སྙོ༷མས་མངོན་བརྡལ་གདུང་སེལ་བདུད་རྩི་འཛག་པ་ལས། །ལམ་ལྔ་ས་བཅུའི་ཆ་ཤས་ཀུན་གང་ཐར་པའི་ཀུནྡཱ་བཞད་གྱུར་ཅིག ༤༥ །ངེས་པར་འབྱུང་བའི་སེམས་ཀྱིས་རབ་བསྐུལ་སོ༷་སོ༷ར་ཐ༷ར་པ༷ས་རྒྱུད་བསྡམ་ཞིང་། །གཞན་ལ་ཕན་དགོངས་དམ་བཅའ་གསར་པར་སྨོན་འཇུག་བྱ༷ང་ཆུ༷བ་སེ༷མས་མཆོག་བསྐྱེད༷། །ཐུན་མོང་མ་ཡིན་སྔ༷གས་ཀྱི༷་འཇུག་སྒོ་གཞི་ཡི་སྨིན་བྱེད་ལེགས་བླངས་ནས། །རྟག་ཏུ་ལམ་དབང་དོན་ལ་བསྙེན་ཅིང་སྡོམ་དང་དམ༷་ཚི༷ག་འདའ་མི་བགྱིད།༤༦ །སྐྱེ་གནས་བཞི་ཡི་སྣང་ཞེན་སྦྱོང་བྱེད་རྡོ་རྗེའི་ལམ་མཆོག་གཞིར་བཞག་སྟེ། །ཁམས་དང་ཕུང་པོའི་བྱེད་ལས་བཅིངས་པས་བདེ་སྟོང་ཡེ་ཤེས་མངོན་མཐོང་ལམ། །ཐུན་མོང་མ་ཡིན་ཉེ་རྒྱུ་ལ་བརྟེན་གྲུབ་པའི་ཐེམ་སྐས་ལ་འཛེགས་ཤིང་། །ལྷན་ཅིག་སྐྱེས་པའི་གཉུག་མའི་རང་ཞལ་འདུ་འབྲལ་དབྱེན་དང་མི་མཛའ་བས།༤༧ །ཕྱི་ནང་ཉོན་མོངས་ཤེས་བྱའི་སྒྲིབ་བཅོམ་སྐུ་བཞིའི་འཁོར་ལོ་སྦྱོང་པའི་དཔྱིད། །ཡང་དག་ལམ་གྱི་དེ་ཉིད་ལ་བརྟེན་གནས་སྐབས་མཐར་ཐུག་དོན་རྣམས་ཀུན། །ལྷུན་གྱིས་གྲུབ་པའི་ངོ་མཚར་རྨད་བྱུང་རིས་མེད་འགྲོ་བ་ཐམས་ཅད་ཀྱིས། །རྟག་པ་ཉིད་དུ་ལོངས་སུ་སྤྱོད་ནས་མཆོག་དངོས་ཚེ་འདིར་འགྲུབ་གྱུར་ཅིག ༤༨ །ཁྱད་པར་སྡེ་སྣོད་བྱེ་བའི་གན་མཛོད་ཡོན་ཏན་ནོར་བུའི་ཟ་མ་ཏོག །ཐོས་དང་བསམ་དང་སྒོམ་པའི་འཇོ་སྒེག་རྣམ་པར་གཡོ་བའི་རང་གཟུགས་ནི། །མཚམས་སྤྲིན་གཞོན་ནུའི་རེག་བྱས་མངོན་བཀླུབས་གྲངས་མེད་དགེ་འདུན་འདུས་པའི་སྡེས། །ནོར་འཛིན་ཁམས་འདི་ཡོངས་སུ་ཁྱབ་ནས་བཤད་སྒྲུབ་གླུ་དབྱངས་ལེན་པར་ཤོག ༤༩ །གནས་སྐབས་སུ་ཡང་མི་ངས་ལ་སོགས་འགྲོ་ལ་འཚེ་བའི་དཔལ་བྲལ་ནས། །བཟའ་དང་བཏུང་བའི་ལོངས་སྤྱོད་ཕུན་ཚོགས་དུས་བཞིའི་ཤིང་རྟས་དྲངས་པ་ཡི། །འཚོ་བའི་བདག་པོ་ཡིད་འོང་ཐོབ་ནས་གཡུལ་ངོར་འཇུག་པའི་སྦྱོར་བ་སོགས། །ཕན་ཚུན་འཚེ་བའི་བསམ་པ་ཀུན་བྲལ་རྫོགས་ལྡན་འབྱོར་པས་ཕྱུག་གྱུར་ཅིག ༥༠ །དེ་ལྟར་སྐྱབས་མེད་ཀུན་གྱི་སྐྱོབ་གྱུར་འགྲོ་བའི་བླ་མ་སྲས་བཅས་ལ། །རབ་ཏུ་གུས་པས་གསོལ་བ་གདབ་དང་རྣམ་པར་སྐྱེ་བའི་སྨྲེ་སྔགས་དབྱངས། །བབ་ཅོལ་གོམས་པའི་ཞུ་མཆིད་སྣ་ཚོགས་སྒྲོག་པ་གང་དེར་ལེགས་བྱས་མཐུ། །ཅུང་ཟད་ཙམ་ཡང་མཆིས་པར་གྱུར་ཀུན་འགྲོ་རྣམས་ཀུན་མཁྱེན་ཐོབ་ཕྱིར་བསྔོ། ༥༡ །སངས་རྒྱས་དང་བྱང་ཆུབ་སེམས་དཔའ་སྲས་དང་སློབ་མར་བཅས་པ་ལ་འཕྲིན་དུ་གསོལ་བའི་གཏམ་ཕྱོགས་ཀྱི་རྣ་རྒྱན་ཞེས་བྱ་བ་འདི་རིས་མེད་པའི་བསྟན་པ་ཀུན་ལ་མཆོག་ཏུ་གུས་པའི་རྨོངས་རྟུལ་གཞོན་ནུ་ཨ་བྷཱ་ཡ་ཞེས་བགྱི་བས་རང་ལོ་བཅུ་བདུན་པར་རྗེ་བཙུན་ཨེ་ཝཾ་པའི་རིང་ལུགས་འཛིན་པའི་ཆོས་གྲྭ་ཆེན་པོར་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག །སརྦས་མནྟ་མདྒ་ལཾ་ཀུརྦནྟུ།། །། ༈

[edit]

@#/__/sangs rgyas dang byang chub sems dpa' sras dang slob mar bcas pa la 'phrin du gsol ba'i gtam phyogs kyi rna rgyan ces bya ba/_/ oM swa sti sid+d+haM/_'jig rten gsum na yon tan gyi mnga' bdag thugs rje chen po bla na med pa dang ldan pa'i rnam par 'dren mchog sras dang slob mar bcas pa la gus pa chen pos gsol ba btab ste/_ji ltar bsam pa'i don kun 'phrin du gsol ba 'di la mkhyen pa dang brtse ba zad mi shes pas yud tsam dgongs par mdzad du gsol/_/sprin zhon gtsug na zla bas mtshan dang 'dam bu'i tshal du skyes la sogs/_/yang dag lta las gzhan du gyur pas zhabs rdul spyi bor len pa dag__/khyod kyi mtshan dpe'i 'od rnon dag gi dpal yon ma bzod gus pa che'i/_/chu skyes thal mo snying gar bkod nas bsngags brjod dri bsung spro der dad/_1_/'gro la phan dgongs gang gi bstan pa lung dang rtogs pa'i bdag nyid de/_/rim dang rim min kun kyang mya ngan 'das pa'i dgongs par ro gcig phyir/_/rton pa bzhi yis zab don 'jal tshe log lta'i mun pa sangs mod de/_/phyogs ris bcas pa'i grub mtha'i me yis thar pa'i ljon shing bsreg 'dir dgongs/_2_/yid kyi srubs shing 'dod 'gro sbyor las byung ba'i mi bzad gdug pa'i sde/_/phrag dog nga ros pha rol bcings shing kun tu rmongs pa de rjes su/_/'jug la rings pa'i 'gro ba 'di dag khyod kyi thugs rjes slar btul te/_/dgongs gzhi dgos pa khyad par ldan pa'i lam mchog rnams la rtag gus mdzod/_3_/khyad par sbyangs pa'i yon tan kun rdzogs rig grol zla ba'i 'dzum phreng gis/_/kun rmongs mun stug yongs su bcom mdzad 'phags pa'i dgra bcom rgya mtsho dang /_/lam lnga sa bcu'i them skas la 'dzegs byang sems grangs med rjes bzung nas/_/zhal gyi bdud rtsi nye bar stsal bzhin bdag kyang thugs rje chen pos skyongs/_4_/'jaXm zhing mnyen sogs yongs su dag pa'i mtshan dpe'i snang brnyan lhag par 'bar/_/thos pas kun tu thar pa'i dpaXl ster ma 'dres bden gnyis 'byed pa'i bdag__/stong dang snying rje'i ngo bo nyid ni mi phyed rdoX rjeX'i mtshan don can/_/srid lam mya ngan 'das pa kun gyi skyabs su gyur khyod bdag la dgongs/_5__/kye ma thog med dus nas mngon goms 'khrul bcas gzung 'dzin rgya mtsho cher/_/kun rmongs gdon dang lhan cig mdza' bas srid pa'i 'jigs ster 'dzin khri'i khrod/_/sdug bsngal gsum gyis nyam thag gyur kyang skad cig skyabs med 'dir gzigs la/_/rnam thar bzhi ldan mkhyen pa'i ral gris yud tsam dag gis bzlog mdzod kye/_6_/khyad par spros pa'i mtha' dang mi mdza' zab mo stong pa nyid kyi don/_/sgro 'dogs skur 'debs khas len bral ba'i yang dag bsgrub bya'i mthar thug la/_/rtag chad rdul gyis nongs par byas des zung 'jug lam las ring gyur pa'i/_/snyigs ma'i mthus sgrib spyod tshul 'di las myur du bzlog par mdzod ces gsol/_7_/'phags pa nyid dang tha mi dad kyang so sor dbye ba ltar bstan pa'i/_/AR+Ya de wa rjes su bzung zhing shes rab ral gri mngon du byin/_/tsan+d+ra go mIs bstod pa'i dbyangs kyis kun nas khyed thugs rab dgyes pas/_/gsung gis dbugs dbyung stsal ba ji bzhin bdag kyang de ltar mdzad du gsol/_8/'chi med grong khyer dbus su gnas kyang 'dod pa'i ro la rtsen pas min/_/ci phyir zhe na 'khor ba'i g.yul ngor kun tu maX phaXm grags ldan cing /_/'jig rten 'dir ni rnam par rgyal tshe thabs dang 'jug paX lam bde ba'i/_/bla med bden pa zab mo sgrogs zhes yongs su gsal de mngon dgongs shig__9_/don kun grub pa'i snang brnyan min kyang khyod gsung thub pa ji bzhin te/_/phyir mi ldog pa'i nges don gtam gyi seng ge'i sgra de rab sgrog pas/_/'di na log lta'i lus stobs rab rgyas gnyis 'thung tshogs rnams snying 'dar zhing /_/bdag lta'i spu longs mngon par g.yo de snying rje'i gnas mchog nyid yin phyir/10_/des na khyod sku ngur smrig gis bklubs 'jig rten 'di ru mngon bstan cing /_/lung dang rigs pa'i rjes su mthun par yang dag lta ba rab bkral te/_/srid lam dub pa'i 'gro ba kun kyang phyir mi ldog pa'i shes rab mchog__/lhun gyis grub ste bstan dang 'gro ba'i nyer 'tsho'i gzhi ru 'gyur mdzod kye/11_/brtson pa'i mthu yis khyod sku sgrub mdzad 'jig rten mig gcig thogs med zhabs/_/de yis bcos min snying rje chen pos khyod thugs kun nas bslus gyur te/_/mngon sum rjes bzung 'chi med grong du ngal bso'i dbugs 'byin mdzad pa dang /_/lhan cig dam pa'i chos sde lnga stsal de 'dra ji bzhin bdag kyang zungs/_12_/lha dang drang srong grub pa'i rig 'dzin gnod sbyin 'byung po'i tshogs rnams kyis/_/nyin re bzhin kyang khyod zhabs pad+mo bsten cing mchod pas ci zhig ste/_/gsaXng chen myur 'gro kun tu thogs med rdo rje theg pa'i lam mchog che'i/_/bdaXg nyid gcig gyur gzhan du srid na dpa' bo khyod kyi mthu kho na/_13__/yid srubs 'khri shing snying la nyal bas bstan 'gror gegs byed lus can dang /_/gdug pa'i bsam sbyor kun nas 'chang ba'i lus med 'byung po'i sde tshogs rnams/_/khyod kyi phyaXg naX 'bar ba'i rdoX rjeX dengs pa de yis myur bcom pa/_/slan chad du yang bral bar mdzod cig lhag pa'i lha mchog he ru ka__14__/khyad par rin thang ches cher gcal ba'i ngur smrig gos kyis bklubs byas shing /_/dbugs bral bam ro'i thod pa 'chang zhing ral pa'i lan bu g.yo ba yang /_/'jug sdom khrims dang rim gnyis lam bral mngon par zhen pa'i stobs ldan pas/_/'phos pa'i tshe na 'gro kun rgyud dkrugs ma rungs gyur rnams 'dul mdzod kye/_15__/bram ze'i rigs 'khrungs brtul zhugs spyod pas mda' mkhan mchog gi tshul bzung zhing /_/rim gnyis zung 'jug bdud rtsir rol pas snod dang ldan par rab gzigs te/_/mngon sum nyid du khyod kyis rjes bzung smin dang grol ba'i lam ster bas/_/grub pa mchog gi sa la gshegs bzhin bdag kyang de 'drar mdzad du gsol/_16_/rtag tu mkhyen pa'i spyaXn raXs mi g.yo snying rjes 'gro la nyer gziXgs te/_/lus med sgrib gnyis kun nas bsal dang lus can rnams la phan bde ster/_/thar pa'i phyogs su 'dzum dkar grol ba'i lam dang lam stegs gcig pu'i bdag__/de ring bdag gis gsol ba 'debs so slar yang thugs rjes gzigs par mdzod/_17_kye ma phyogs rnams kun dang khyad par gangs ldan dbyig 'dzin 'di dag tu/_/khrag 'thung srin mo khros pa'i kha rlangs rdo rje'i tsher ma'i sprin chags shing /_/dran pas snying la zug rngus dam 'khyud g.yul gyi sprin sgra'i nga ro sgrogs/_/shin tu nyam thag bza' bas phongs pa'i smre sngags mi bzad char 'bab pas/_18__/'gro 'di mnar ba bzlog par mdzod ces snying nas mchi ma dku zhing gsol/_/gal te de la dgongs par mi mdzad zhi ba'i dbyings su slar mnal na/_/grangs med bskal par lus can yongs sgrol snying rjes dam bca'i spring yig gis/_/'gro kun mngon sum nyid du bslu'o kyi hud de dag mi gzigs sam/_19__/'phags pa'i yul du tsan+d+ra'i mtshan dang zhi ba'i go chas sgeg la sogs/_/skal bzang kun la dgyes zhal bstan te rnam par grol ba'i lam mchog byin/_/khyad par b+ho Ta'i yul gyi ljongs 'dir sprul pa'i sgyu 'phrul mtha' klas pas/_/'gro rnams rjes su bzung bar mdzad bzhin bdag kyang thugs rjes rtag tu skyongs/_20/mtshoX skyesaX gzhon nu'i 'dzum phreng las grol 'chi med rtag pa'i rdoX rjeX'i sku'i/_'dzam gling 'gro kun gdul bar mdzad dang lung rtogs bstan pa slar spel ba'i/_/sangaXs rgyasaX gnyiXs paX paXd+ma'iX zhabaXs khyod gangs can 'gro la bka' drin mthu/_/khur du bzod na lha dang bcas pa 'jig rten khams kyis ga la theg__21_/de ltar na yang 'byung pos rgyud dkrugs ngan song mngon sgrub skye bo 'gas/_/bus pa gzhon nus ma la sdang bzhin drin du bzo ba ci zhig kyang /_/thugs rje chen po 'khrugs pa lta ci slar yang snying rje gsar pa'i mthu/_/mngon par bskyed nas b+ho Ta'i ljongs 'dir sprul pa'i zlos gar bsgyur bar mdzod/_22__/lus can mtha' dag bza' ba dang ni rgyan du byed pa'i srin po'i tshogs/_khyod kyi thugs rjes gdul bar bzod na gangs can ljongs kyi skye 'gro phal/_/tshul min bdud kyis mngon sum brlabs pas gnag pa'i las la goms pa'i mthu/_/myur du zhi byed ye shes 'jug pa chen pos deng 'dir khyab par mdzod/_23_/'di na khyod kyi thugs rjes sprul pa'i skyes bu chen po thams cad la/_/slar yang zhal gyi dkyil 'khor bstan te gsung gi rjes su dbugs dbyung zhing /_/dbang bskur dam pa'i rgyal thabs byin zhes lus med khams su grags 'bar ba/_/de bzhin bdag la stsol bar mdzad ces gus dang skyo ba'i yid kyis gsol/_24__/gzhan yang lam lnga sa bcu'i them skas shin tu spa pa'i 'bab stegs su/_/zhugs dang lam gyur 'bras bu mngon rdzogs rgyal dang de sras byang chub sems/_/srid pa'i dgra bcom nyan thos rang rgyal rnal 'byor rig pa 'dzin pa'i sde/_/he ru ka dpal 'khor lo'i mgon sogs skyabs su gyur kun mngon dgongs shig__25__/deng dus shin tu snyigs mar gyur pa'i sbrul gdug kha rlangs g.yo ba'i khrod/_/'gro rnams ngan spyod dug gis rab myos tshul min duHkha'i zhags pas bcings/_/rgyal bstan sgron me'i 'od kyang mi 'byin phyogs kyi kho ra khor yug kun/_/yid srubs gdon gyis btab par gyur 'dir kyi hud cung zad mi gzigs sam/_26_/'di ltar rtsa bzhi ci dgar spyod bzhin phra mo srung la sdom par rlom/_/pha rol rnyed skur dpal la brkams pa'i rnam g.yeng byang chub sems su bsgom/_/smin byed dang bral zab don 'chad cing nor gyi phyir du dam tshig dor/_/sbyang gzhi sbyong byed de 'bras las brgal mngon par zhen pa'i kun brtags bskyed rim dang /_27__/mtshan ma yis bcings rags pa'i yon tan cung zad la rol yongs grub lam/_rdzogs rim/_/dbang gi ye shes mthong ba ring spangs nyams kyi 'dzin stangs ma zhig bzhin/_/byung tshor gnas nyams ngo sprod byed nas nyer spyod nyi tshe'i bsam gtan la/_/zag pa bral ba'i ye shes cher 'dzin gti mug 'od gsal mchog tu re/_28__/'ga' zhig spangs rtogs yon tan rang gzugs kun gsal pad+mo'i zla bo can/_/blun pos btags pa'i grags snyan la bsnyegs rang gzhan phan bde'i 'bras bu gcod/_/phal cher log spyod rdzun gyi phreng bas grub pa'i go 'phang la rol zhing /_/gzhan yid gdugs ltar bskor ba'i ngang tshul mig sman las kyang ches cher gnag__29__/nye bar bzung ba'i gzi byin rdzu bag rnam par reg pas sgrib pa'i mod/_/'jig rten dag gis chen por brtags shing 'dod pa'i 'bras bu rgyun mi 'chad/_/srog dang srung dang spel bas sdug bsngal phal las brel ba'i spyod tshul can/_/sbyangs pa'i yon tan dgra bor 'dzin gyur 'dren pa'i dpal du mngon par bstod/_30__/khyad par bden gnyis gnad kyi nges gsang phan tshun ltos grub 'gal med par/_/mthong min gang de'i rten 'byung tshul las shin tu rings pa'i blo can dag__/sgro skur rnyogs ma'i phreng ba spel dang rang lta mchog 'dzin pha rol rmongs/_/la la thos bsam dgra zlar gyur pas sgom pa'i lam las phyir phyogs sogs/_31__/rmongs pa las kyang rmongs par gyur pas shin tu gdung byas 'gro 'di rnams/_/kye ma deng dus khyed rnams mthu las gzhan du su yis 'dul bar 'gyur/_/tshul de'i phyir na bdag yid rab skyo yang yang gdung ba'i spu langs g.yo/_/ngan song gnas su rkang pa bkod las mi shes bzhin du smre sngags kyi/32__/mchid tshig 'di ni khyed rnams la gsol tshul 'dir bas pa gang mchis pa/_/thugs rje chen pos bzod par mdzad nas myur du mkhyen dang brtse ba yi/_/spyan ras gsar pas kun tu gzigs nas yang dag lam gyi de nyid la/_/zhugs dang 'jug tshogs rnam par rab dad bral smin yon tan 'grub mdzod kye/_33__/e ma rmad byung pad dkar ltar bsngags rnam 'dren bzhi pa shAkya'i tog__/zab zhi spros bral dbu ma'i dbyings su mtshan dpe'i sgyu 'phrul nyer sdud tshe/_/lung dang rtogs pa'i bstan pa legs gtad ston pa gnyis par dbugs dbyung zhing /_/'phaXgs paX'i sar bzhugs brgyad gnyis grangs ldan gnaXs baXrtan cheXn po'i tshogs rnams dgongs/_34__/deng dus dzam+bu'i rkang 'thung gis mtshan nor 'dzin dga' ma'i yul gyi dbus/_/ma ga d+ha dang rdo rje gdan sogs log par smra dang kla klos khebs/_/b+ho Ta'i ljongs kyang de la smod bzhin spyod lam de yi spun zla ru/_/bos pa 'di kos rgyal ba'i bstan pa ri mo'i nA da'i rjes su song /_35_/de 'dra'i snyigs spyod tsha gdung stug pos phan bde'i dga' tshal nyams pa 'dir/_/khyed rnams thugs rje'i sprin dkar legs bskul mkhyen brtse'i bdud rtsi'i thigs phreng gis/_/gzhi gsum cho ga'i rtsa ba legs brtan smon 'jug byang sems yal ga rgyas/_/rdo rje theg pa'i me tog mdzes 'dzin phan bde'i 'bras bu 'jo gyur cig__36/thos pa'i zla shel gzhon nu'i btung pa rna ba'i ut+pal dkar por rol/_/bsam byung shes rab 'jo sgeg rab g.yo legs bshad gsar pa'i 'dzum phreng dgod/_/sgom spang 'phags pa'i ge sar khur lci zhi bsil myang 'das ro yi gter/_/yongs su rdzogs pas bshad sgrub bstan 'dzin srid mtha'i bar du 'phel mdzod kye/37__/gzhan yang mgon po thugs rje che ldan sras bcas grangs med rgyal kun dgongs/_/lcags sreg 'bar ba'i 'od zer gyis 'khyud tshal par song gyur de yi lus/_/rnag khrag rgyun gyis brlan par byas dang rlung gi reg byas cher bcom pas/_/ut+pal ltar gas snang tshul sna tshogs dmyal ba'i 'gro 'dir yud tsam gzigs/_38_/de bzhin rab tu ring ba'i dus nas chu thigs tsam gyi btung ba yang /_/nyin mtshan med par 'bad pas btsal kyang cung zad rnyed min de dag gis/_/lto ba yul ljongs chen po'i rjes snyegs brkam chags ser sna'i 'bras bu can/_/yi dwags 'gro 'dir rmad byung thugs rjes spyan ras yangs pos btsa' bar mdzod/_39_/phal cher bdag tu bzung bas dam bzhag bcings dang brdeg pa'i 'tshe bas gzhur/_/'ga' zhig rngon pa'i sbyor ba rtsub mos rang bzhin med par srog 'phrog cing /_/kun kyang gti mug lam gol la 'khyams thar pa'i snang ba ring bral ba'i/_/dud 'gro'i gnas kyang sdug bsngal mi bzad skad cig ye shes 'jug pas zungs/_40__/skye ba'i chu gter 'gyur dang 'du byed rlabs phreng g.yo ba'i ska rags can/_/rga na 'chi sogs 'dzin khri'i grong khyer tshad med 'jigs pa'i duHkhas mnar/_/rtag pa nyid du 'bad pas bsgrubs kyang nyon mongs dri bzhon dang 'grogs pa'i/_/nyam thag mi yul grong khyer 'di yang mkhyen dang brtse ba'i zhags pas skyongs/_41_/bsran par mi bzod phrag dog go cha stug por bgos de'i lag pa ni/_/rang gzhan khong khro'i zug rngu'i dpal sbyin dgra stas mtshan pas bsnun pa'i mod/_/thar pa'i mgo bo tshal par bkas kyang lha yi bsod nams las dman pas/_/rang nyid mi bzad sdug bsngal gyis mnar lha min yul 'dir skad cig gzigs/_42__/ring por 'tsho ba'i le lo'i dbang gyur zhi bde'i bdud rtsi brten mi bgyid/_/'byor dang lang tsho'i yon tan ldan kyang nam zhig nying mtshams sbyor ba'i tshe/_/me tog phreng ba rnam par nyams sogs 'gyur ba'i sdug bsngal brgya phrag gis/_/mya ngan khong bur yun ring tshud gyur lha yi gnas kyang gzigs par 'os/_43__/de sogs 'khor ba'i nags su rab 'khyams snang tshul mi bzad 'di nyid kun/_/rtag pa nyid du khyed kyis gzigs mod bdag gis bskul 'debs mi 'tshal mod/_/de ltar na yang rang nyid las byas rnam smin khur gyis mnar ba yis/_/ma bzod smre sngags bar med sgrogs 'di nyon mongs pa yi skyon du zad/_44__/tshul der slar yang snyingaX rjeXs gzigs nas byaXms paX'i chu gter 'phyur ba dang /_/phan bde'i dgaX' baX'i 'dzum phreng legs spro gnyis skyes gzhon nu thon pa'i mod/_/phyogs ris med par btaXng snyoXms mngon brdal gdung sel bdud rtsi 'dzag pa las/_/lam lnga sa bcu'i cha shas kun gang thar pa'i kun+dA bzhad gyur cig__45__/nges par 'byung ba'i sems kyis rab bskul soX soXr thaXr paXs rgyud bsdam zhing /_/gzhan la phan dgongs dam bca' gsar par smon 'jug byaXng chuXb seXms mchog bskyedaX/_/thun mong ma yin sngaXgs kyiX 'jug sgo gzhi yi smin byed legs blangs nas/_/rtag tu lam dbang don la bsnyen cing sdom dang dmaX tshiXg 'da' mi bgyid/46_/skye gnas bzhi yi snang zhen sbyong byed rdo rje'i lam mchog gzhir bzhag ste/_/khams dang phung po'i byed las bcings pas bde stong ye shes mngon mthong lam/_/thun mong ma yin nye rgyu la brten grub pa'i them skas la 'dzegs shing /_/lhan cig skyes pa'i gnyug ma'i rang zhal 'du 'bral dbyen dang mi mdza' bas/47_/phyi nang nyon mongs shes bya'i sgrib bcom sku bzhi'i 'khor lo sbyong pa'i dpyid/_/yang dag lam gyi de nyid la brten gnas skabs mthar thug don rnams kun/_/lhun gyis grub pa'i ngo mtshar rmad byung ris med 'gro ba thams cad kyis/_/rtag pa nyid du longs su spyod nas mchog dngos tshe 'dir 'grub gyur cig_48__/khyad par sde snod bye ba'i gan mdzod yon tan nor bu'i za ma tog__/thos dang bsam dang sgom pa'i 'jo sgeg rnam par g.yo ba'i rang gzugs ni/_/mtshams sprin gzhon nu'i reg byas mngon bklubs grangs med dge 'dun 'dus pa'i sdes/_/nor 'dzin khams 'di yongs su khyab nas bshad sgrub glu dbyangs len par shog__49_/gnas skabs su yang mi ngas la sogs 'gro la 'tshe ba'i dpal bral nas/_/bza' dang btung ba'i longs spyod phun tshogs dus bzhi'i shing rtas drangs pa yi/_/'tsho ba'i bdag po yid 'ong thob nas g.yul ngor 'jug pa'i sbyor ba sogs/_/phan tshun 'tshe ba'i bsam pa kun bral rdzogs ldan 'byor pas phyug gyur cig__50_/de ltar skyabs med kun gyi skyob gyur 'gro ba'i bla ma sras bcas la/_/rab tu gus pas gsol ba gdab dang rnam par skye ba'i smre sngags dbyangs/_/bab col goms pa'i zhu mchid sna tshogs sgrog pa gang der legs byas mthu/_/cung zad tsam yang mchis par gyur kun 'gro rnams kun mkhyen thob phyir bsngo/_51__/sangs rgyas dang byang chub sems dpa' sras dang slob mar bcas pa la 'phrin du gsol ba'i gtam phyogs kyi rna rgyan zhes bya ba 'di ris med pa'i bstan pa kun la mchog tu gus pa'i rmongs rtul gzhon nu a b+hA ya zhes bgyi bas rang lo bcu bdun par rje btsun e waM pa'i ring lugs 'dzin pa'i chos grwa chen por gsol ba btab pa de de bzhin du 'grub par gyur cig__/sarbas man+ta mad+ga laM kurban+tu//___//_!_