JKW-KABUM-01-KA-002-029

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 2, sde tshan 29, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

བདེ་བ་ཅན་གྱི་ཞིང་ཁམས་རྟེན་དང་བརྟེན་པར་བཅས་པ་ལ་བསྟོད་པ་དད་པའི་ཆུ་སྐྱེས། བདེ་བ་ཅན་གྱི་ཞིང་ཁམས་རྟེན་དང་བརྟེན་པར་བཅས་པ་ལ་བསྟོད་པ་དད་པའི་ཆུ་སྐྱེས་ཞེས་བྱ་བ། ན་མོ་ཨ་མི་ཏ་བྷཱ་ཡ། གང་ཞིག་སློབ་དང་མི་སློབ་འཕགས་པ་དང་། །ཉན་རང་སོ་སྐྱེའི་ཚོགས་ཀྱི་སྤྱི་བོ་ཡིས། །མཛེས་པར་བཏེག་པའི་གདེངས་ཀ་དམ་པ་ནི། །ཕུལ་བྱུང་བསྔགས་འོས་རྣམ་ཐར་བརྗོད་མི་ལང་། ༡ །འཇིག་རྟེན་དབང་ཕྱུག་ཐུགས་རྗེའི་བདུད་རྩི་དང་། །ཆོས་ཀྱི་འབྱུང་གནས་སྨོན་པའི་གྲུ་ཆར་གྱིས། །གནས་ངན་ལེན་གྱི་རྡུལ་ཕྲན་བཀྲུས་པའི་ཞིང་། །ཡོན་ཏན་བཀོད་པ་མཐའ་ཀླས་དགའ་ཚལ་ཆེར། ༢ །ལག་མཐིལ་གཞོན་ཤ་ཆགས་པའི་འཇོ་སྒེག་ལྟར། །སྣ་ཚོགས་རིན་ཆེན་གཅལ་དུ་བཀྲམ་པའི་གཞི། །མཉམ་པར་བརྡལ་བའི་བཞིན་རས་མནྡཱ་རས། །མངོན་བསྲུངས་མནན་ནེམ་བཏེགས་ན་འཕར་བའི་ཉམས། ༣ །རྫིང་བུ་ཡན་ལག་བརྒྱད་དང་ལྡན་པ་ཡང་། །སྙིང་པོའི་དབེན་པ་མ་ཡིན་ལུང་རྟོགས་ཀྱི། །དམ་ཆོས་ཇི་སྙེད་སྟོན་པའི་དམ་བཅའ་ནི། །རྒྱལ་ཀུན་གསུང་གི་གསང་བ་བྱིན་པ་བཞིན། ༤ །དེ་ན་རིན་ཆེན་སྣ་ཚོགས་ལྗོན་པ་ཆེ། །ལྟ་ན་ལྷུན་སྡུག་མཛེས་པའི་རོལ་སྒེག་གིས། །བསླབ་གསུམ་མངོན་རྟོགས་ངོམས་པའི་བཞིན་རས་མཆོག །ལོ་འདབ་མེ་ཏོག་འབྲས་བུ་དུད་པས་སྟོན། ༥ །ཡལ་གའི་ལྕུག་ཕྲན་གཞོན་ནུའི་སོར་མོ་ཡིས། །ཉེར་བཟུང་ཛམྦུ་ནཱ་དའི་དྲ་བའི་ཕྲེང་། །དྲི་བཞོན་ཕོ་ཉས་བསྐུལ་བའི་རོལ་མོའི་སྒྲ། །ཆོག་མི་ཤེས་པ་ཀུན་ཏུ་སྒྲོག་པར་བྱེད། ༦ །དེ་ན་བསྟི་བའི་གཉིས་སྐྱེས་འཁོར་ལོའི་ལག །མ་རྒད་གཤོག་ཅན་ཤཱ་རི་ཀ་ནི་སོགས། །ཀུན་ཏུ་སྒེག་ལྡན་འདབ་ཆགས་གཞོན་ནུའི་ཚོགས། །ཕན་ཚུན་ཆོས་ཀྱི་རོས་ཚིམས་གར་སྟབས་བསྒྱུར། ༧ །ཕྱོགས་རྣམས་མེ་ཏོག་འབྲས་བུ་མཛེས་གྱུར་པའི། །ལྷུན་སྡུག་ཁང་བཟང་ཡིད་འོང་སྐྱེད་ཚལ་ལས། །བསྟི་གནས་ཕལ་པའི་སྣང་བ་ཟད་པའི་ཕྱིར། །སྙིང་དང་མིག་ལ་དགའ་བ་མི་བཟད་སྟེར། །རཏྣའི་བ་གམ་བརྩེགས་པའི་གཞལ་ཡས་ཁང་། །སྣ་ཚོགས་བཀོད་པས་ཁྱད་པར་འཕགས་པ་སོགས། །ཡིད་འོང་འདོད་པའི་ཆོ་ག་འབད་མེད་པར། །བསྒྲུབ་པའི་ངང་ཚུལ་གཞན་གྱིས་བསྐྲུན་ནུས་མིན། ༩ །ཐོས་འཛིན་བཅུད་དུ་གཡོ་བའི་ཇི་སྙེད་སྒྲ། །ཚད་མེད་བཞི་དང་ཕ་རོལ་ཕྱིན་པ་དྲུག །རྣམ་པར་ཐར་པ་གསུམ་སོགས་ལུང་རྟོགས་ཀྱི། །དམ་ཆོས་རྒྱ་མཚོའི་གན་མཛོད་གཅིག་ཏུ་གྱུར། ༡༠ །གང་ན་འཚོ་གཞེས་བརྟན་པའི་རྒྱལ་བ་ནི། །རབ་དམར་བྱེ་རུའི་ཕུང་པོ་བཞུ་བའི་རྡུལ། །སྟོང་ཕྲག་ཉི་གཞོན་འཆར་ཀས་འཁྱུད་པ་ཡིས། །མཚུངས་ཟླར་མི་འོས་མཚན་དཔེའི་འཛུམ་ཕྲེང་དགོད། ༡༡ །གངྒཱའི་ཀླུང་རྒྱུན་གྱིས་འདྲེན་བྱེ་སྙེད་ཀྱི། །རབ་འབྱམས་དེ་བཞིན་གཤེགས་པའི་གཙུག་ཏོར་ནི། །མཐོན་མཐིང་ཟོལ་དུ་གཡོ་བས་བསྟེན་བྱས་ཏེ། །རྟག་ཏུ་བསྔགས་པའི་རོལ་མོ་རྣམ་པར་དཀྲོལ། ༡༣ ། འདི་ན་གཞན་ཕན་རྗེས་སོང་དམ་བཅའི་ཁུར། །སློབ་པ་ལམ་གྱི་གནས་སྐབས་འཛིན་པའི་གཟུགས། །མིག་མི་འཛུམ་དང་གསང་བ་འཛིན་པ་སོགས། །བྱང་ཆུབ་སེམས་དཔའི་ཁྱུ་མཆོག་ཡོངས་ཀྱིས་བསྟེན། ༡༣ །སྡུག་བསྔལ་དྲྭ་བ་བཀྲལ་ནས་འགོག་པའི་དབྱིངས། །སྙོམས་འཇུག་དགྲ་བཅོམ་ཚོགས་ཀྱང་ཐེག་ཆེན་གྱི། །བདུད་རྩིའི་བགོ་བཤར་འགྱེད་པའི་དེ་མ་ཐག །བླ་མེད་བྱང་ཆུབ་གོ་འཕང་ལ་རེག་འགྱུར། ༡༤ །མཚན་དཔེའི་འོད་ཟེར་བྱེ་བ་བརྒྱ་ཕྲག་གིས། །གང་ལ་རེག་ན་རྨོངས་པའི་མུན་པ་ཀུན། །ཡོངས་སུ་བཅོམ་སྟེ་ཕན་བདེའི་སྣང་བ་ཡིས། །ངེས་ལེགས་གྲོང་ཁྱེར་མཆོག་ཏུ་དབུགས་རབ་འབྱིན། ༡༥ །གང་སྐུ་དངོས་སུ་མཐོང་བ་ལྟ་ཞོག་གི །མཚན་གྱི་ནོར་བུ་རྣ་བར་དཔྱོངས་པས་ཀྱང་། །བརྒྱད་གཉིས་འཇིགས་པའི་དབུལ་བ་བསལ་བྱས་ཏེ། །ཕན་བདེའི་དགའ་སྟོན་སྤྲོ་ལ་རྣམ་པར་བྲེལ། ༡༦ །ཁྱད་པར་ལན་གཅིག་ཡོན་ཏན་ཉི་གཞོན་ལ། །དད་གསུམ་ཨུཏྤལ་འཛུམ་པའི་ཟུར་མིག་གིས། །ཚད་མེད་བདེ་ལྡན་ཞིང་གི་ཀེ་ས་ར། །མཛའ་བར་བགྱིད་པའི་དཔལ་སྦྱིན་གང་ལས་སུ། ༡༧ །ཕྱག་མཐིལ་འཁོར་ལོའི་རེ་ཁཱས་མཚན་པའི་རྡུལ། །སྤྱི་བོར་རེག་པ་ཙམ་ནས་ཚོགས་གཉིས་ཀྱི། །དཔུང་པས་བོས་པའི་རྫོགས་པའི་སངས་རྒྱས་ཀྱང་། །མྱུར་དུ་སྦྱིན་པའི་སྐལ་བཟང་མཆོག་ལ་སྦྱོར། ༡༨ །ཞལ་གྱི་ཆུ་སྐྱེས་འཛུམ་པའི་འོད་རླབས་ལས། །སྐད་ཅིག་རེར་བསྟན་ལུང་རྟོགས་བདུད་རྩིའི་བཅུད། །བགྲང་བར་མི་བཟོད་སྒོ་འཕར་དབྱེ་བ་ཡིས། །གྲངས་མེད་ཏིང་འཛིན་མཆོག་ལ་དབུགས་དབྱུང་མཛད། ༡༩ །མདོར་ན་དག་པའི་ཡེ་ཤེས་ཀྱིས་སྦྱངས་པའི། །རྡུལ་བྲལ་ཀུན་མཁྱེན་སྤྱན་གྱིས་བཙལ་བྱས་ཀྱང་། །མཚུངས་ཟླས་དབེན་པའི་ཡོན་ཏན་མཆོག་གཟིགས་ནས། །རབ་ཏུ་བསྔགས་པའི་མེ་ཏོག་འཐོར་ལ་ལྟོས། ༢༠ །དེ་ཕྱིར་སོ་སྐྱེའི་བློ་ལས་རིང་འདས་པའི། །རྨད་བྱུང་ཐུགས་རྗེའི་ཙིནྟཱ་མ་ཎི་མཆོག །དད་གུས་གདུགས་དཀར་རྩེ་མོས་འཐོབ་པའི་མོད། །གྲངས་མེད་བསྐྲུན་འོས་འབྱོར་པས་ལྷག་ཅིག་བསྩལ། ༢༡ །གང་མཚན་དཔལ་གྱི་དུམ་བུ་སིམ་པ་ལས། །རབ་ལྷག་ཟླ་ཤེལ་བཞུ་བའི་འོད་ཆེས་ནི། །སྙིང་དབུས་ཀུནྡཱའི་བཅུད་ལེན་ལ་བཏུད་ནས། །ཕན་བདེའི་འདབ་མའི་འཛུམ་ཕྲེང་གྲོལ་བར་ཤོག ༢༢ །གནས་སྐབས་སྡེ་བཞིའི་བསིལ་བའི་རེག་བྱ་དང་། །རབ་འགྲོགས་ནོར་བུའི་རྔ་ཡབ་གཡོབ་པ་ཡིས། །ཚེ་དཔལ་འབྱོར་བའི་ངལ་བསོ་བསྟེན་གྱུར་ནས། །ཕུན་ཚོགས་ལང་ཚོའི་མཛེས་པ་ཐོབ་གྱུར་ཅིག ༢༣ །ནམ་ཞིག་འཚོ་བའི་འདུ་བྱེད་བཏང་བའི་ཚེ། །གང་གི་ཐུགས་རྗེའི་དཔྱོང་ཐག་ལ་བརྟེན་ནས། །དག་པའི་ཞིང་དུ་དབུགས་འབྱིན་ཐོབ་པའི་མོད། །མགོན་པོ་དགྱེས་པའི་ཞལ་བཟང་མཐོང་བར་ཤོག ༢༤ །མཐར་ཐུག་སྟོབས་བཅུ་མི་འཇིགས་རྣམ་པ་བཞི། །མ་འདྲེས་བཅོ་བརྒྱད་ལ་སོགས་སྤངས་རྟོགས་ཀྱི། །ཆ་ཤས་ཡོངས་སུ་གང་བའི་གཉིས་སྐྱེས་དབང་། །བྱང་ཆུབ་མཆོག་གི་མཁའ་ལ་རོལ་གྱུར་ཅིག ༢༥ །དེ་ལྟར་བདེ་བ་ཅན་གྱི་ཞིང་གི་བཀོད་པ་རྟེན་དང་བརྟེན་པར་བཅས་པ་ལ་བསྔགས་བརྗོད་ཉུང་ངུར་བསྡུས་པ་འདིའང་གཞོན་ནུ་ཨ་བྷཱ་ཡས་རང་ལོ་བཅུ་དྲུག་པར་གང་ཤར་བརྗོད་པ་ཛ་ཡནྟུ།། །། ༈

[edit]

bde ba can gyi zhing khams rten dang brten par bcas pa la bstod pa dad pa'i chu skyes/__ bde ba can gyi zhing khams rten dang brten par bcas pa la bstod pa dad pa'i chu skyes zhes bya ba/__na mo a mi ta b+hA ya/__gang zhig slob dang mi slob 'phags pa dang /__/nyan rang so skye'i tshogs kyi spyi bo yis/__/mdzes par bteg pa'i gdengs ka dam pa ni/__/phul byung bsngags 'os rnam thar brjod mi lang /__1__/'jig rten dbang phyug thugs rje'i bdud rtsi dang /__/chos kyi 'byung gnas smon pa'i gru char gyis/__/gnas ngan len gyi rdul phran bkrus pa'i zhing /__/yon tan bkod pa mtha' klas dga' tshal cher/__2__/lag mthil gzhon sha chags pa'i 'jo sgeg ltar/__/sna tshogs rin chen gcal du bkram pa'i gzhi/__/mnyam par brdal ba'i bzhin ras man+dA ras/__/mngon bsrungs mnan nem btegs na 'phar ba'i nyams/__3__/rdzing bu yan lag brgyad dang ldan pa yang /__/snying po'i dben pa ma yin lung rtogs kyi/__/dam chos ji snyed ston pa'i dam bca' ni/__/rgyal kun gsung gi gsang ba byin pa bzhin/__4_/de na rin chen sna tshogs ljon pa che/__/lta na lhun sdug mdzes pa'i rol sgeg gis/__/bslab gsum mngon rtogs ngoms pa'i bzhin ras mchog__/lo 'dab me tog 'bras bu dud pas ston/__5__/yal ga'i lcug phran gzhon nu'i sor mo yis/__/nyer bzung dzam+bu nA da'i dra ba'i phreng /__/dri bzhon pho nyas bskul ba'i rol mo'i sgra/__/chog mi shes pa kun tu sgrog par byed/__6__/de na bsti ba'i gnyis skyes 'khor lo'i lag__/ma rgad gshog can shA ri ka ni sogs/__/kun tu sgeg ldan 'dab chags gzhon nu'i tshogs/__/phan tshun chos kyi ros tshims gar stabs bsgyur/__7__/phyogs rnams me tog 'bras bu mdzes gyur pa'i/__/lhun sdug khang bzang yid 'ong skyed tshal las/__/bsti gnas phal pa'i snang ba zad pa'i phyir/__/snying dang mig la dga' ba mi bzad ster/__/rat+na'i ba gam brtsegs pa'i gzhal yas khang /__/sna tshogs bkod pas khyad par 'phags pa sogs/__/yid 'ong 'dod pa'i cho ga 'bad med par/__/bsgrub pa'i ngang tshul gzhan gyis bskrun nus min/__9_/thos 'dzin bcud du g.yo ba'i ji snyed sgra/__/tshad med bzhi dang pha rol phyin pa drug__/rnam par thar pa gsum sogs lung rtogs kyi/__/dam chos rgya mtsho'i gan mdzod gcig tu gyur/__10__/gang na 'tsho gzhes brtan pa'i rgyal ba ni/__/rab dmar bye ru'i phung po bzhu ba'i rdul/__/stong phrag nyi gzhon 'char kas 'khyud pa yis/__/mtshungs zlar mi 'os mtshan dpe'i 'dzum phreng dgod/__11_/gang+gA'i klung rgyun gyis 'dren bye snyed kyi/__/rab 'byams de bzhin gshegs pa'i gtsug tor ni/__/mthon mthing zol du g.yo bas bsten byas te/__/rtag tu bsngags pa'i rol mo rnam par dkrol/__13_/_'di na gzhan phan rjes song dam bca'i khur/__/slob pa lam gyi gnas skabs 'dzin pa'i gzugs/__/mig mi 'dzum dang gsang ba 'dzin pa sogs/__/byang chub sems dpa'i khyu mchog yongs kyis bsten/__13__/sdug bsngal drwa ba bkral nas 'gog pa'i dbyings/__/snyoms 'jug dgra bcom tshogs kyang theg chen gyi/__/bdud rtsi'i bgo bshar 'gyed pa'i de ma thag__/bla med byang chub go 'phang la reg 'gyur/__14__/mtshan dpe'i 'od zer bye ba brgya phrag gis/__/gang la reg na rmongs pa'i mun pa kun/__/yongs su bcom ste phan bde'i snang ba yis/__/nges legs grong khyer mchog tu dbugs rab 'byin/__15__/gang sku dngos su mthong ba lta zhog gi__/mtshan gyi nor bu rna bar dpyongs pas kyang /__/brgyad gnyis 'jigs pa'i dbul ba bsal byas te/__/phan bde'i dga' ston spro la rnam par brel/_16_/khyad par lan gcig yon tan nyi gzhon la/__/dad gsum ut+pal 'dzum pa'i zur mig gis/_/tshad med bde ldan zhing gi ke sa ra/__/mdza' bar bgyid pa'i dpal sbyin gang las su/_17_/phyag mthil 'khor lo'i re khAs mtshan pa'i rdul/__/spyi bor reg pa tsam nas tshogs gnyis kyi/__/dpung pas bos pa'i rdzogs pa'i sangs rgyas kyang /__/myur du sbyin pa'i skal bzang mchog la sbyor/__18__/zhal gyi chu skyes 'dzum pa'i 'od rlabs las/_/skad cig rer bstan lung rtogs bdud rtsi'i bcud/__/bgrang bar mi bzod sgo 'phar dbye ba yis/__/grangs med ting 'dzin mchog la dbugs dbyung mdzad/_19__/mdor na dag pa'i ye shes kyis sbyangs pa'i/__/rdul bral kun mkhyen spyan gyis btsal byas kyang /__/mtshungs zlas dben pa'i yon tan mchog gzigs nas/__/rab tu bsngags pa'i me tog 'thor la ltos/__20__/de phyir so skye'i blo las ring 'das pa'i/__/rmad byung thugs rje'i tsin+tA ma Ni mchog___/dad gus gdugs dkar rtse mos 'thob pa'i mod/__/grangs med bskrun 'os 'byor pas lhag cig bstsal/__21___/gang mtshan dpal gyi dum bu sim pa las/__/rab lhag zla shel bzhu ba'i 'od ches ni/__/snying dbus kun+dA'i bcud len la btud nas/__/phan bde'i 'dab ma'i 'dzum phreng grol bar shog__22__/gnas skabs sde bzhi'i bsil ba'i reg bya dang /__/rab 'grogs nor bu'i rnga yab g.yob pa yis/__/tshe dpal 'byor ba'i ngal bso bsten gyur nas/__/phun tshogs lang tsho'i mdzes pa thob gyur cig__23__/nam zhig 'tsho ba'i 'du byed btang ba'i tshe/__/gang gi thugs rje'i dpyong thag la brten nas/__/dag pa'i zhing du dbugs 'byin thob pa'i mod/__/mgon po dgyes pa'i zhal bzang mthong bar shog__24__/mthar thug stobs bcu mi 'jigs rnam pa bzhi/__/ma 'dres bco brgyad la sogs spangs rtogs kyi/__/cha shas yongs su gang ba'i gnyis skyes dbang /__/byang chub mchog gi mkha' la rol gyur cig__25__/de ltar bde ba can gyi zhing gi bkod pa rten dang brten par bcas pa la bsngags brjod nyung ngur bsdus pa 'di'ang gzhon nu a b+hA yas rang lo bcu drug par gang shar brjod pa dza yan+tu//___//__!