JKCL-KABUM-12-NA-041-wylie
na maHshrIHma hA ka la ya/__bdud dpung 'joms mdzad he ru ka yi thugs las sprul pa'i dpa' bo stobs ldan nag po che/__/snying rje'i ngang las khros pa'i rang gzugs sgyu ma'i gar gyis sa gsum rab tu g.yo mdzad pa/__ha ha hU~M dang phaT phaT la sogs drag po'i nga ros dbang phyug la sogs 'dar byed cing /__/rnam kun mchog ldan stong nyid bde ba'i phyag rgyas rab 'khyud thugs kyi mgon pos shis pa stsol/__/ces pa'i tshig gis drangs te/__kho bo 'jam dbyangs mkhyen brtse'i skye bar sgro btags pa smar khams ljongs su rab byung zhes pa 'bar byed ces bya me pho 'brug lor bstan 'gro'i don du bskyed skabs dpal sa skya pa'i ring lugs dri ma med pa 'dzin pa gtsang sar phun tshogs dar rgyas gling gi chos grwa chen por gangs ljongs tsam na 'byon par dka' ba'i 7'jam dbyangs mkhyen brtse'i dbang po'i mdun chab mdo rgya sprul rin po ches phul zhing /__rje rang gis thugs dam thang ka'i gras nas thugs rtsis che bar gnang zhing sku gshegs rjes rten gyi nang gzhug dang /__bla sprul sogs la 'bul bar ma thang shing /__'jam mgon kong sprul rdo rje 'chang chen pos mkhyen brtse'i bla brang gi rten dkar chag tu zin pa'i ma hA kA la lha brgyad kyi zhal thong shin tu zab sgros dpe byar 'os pa 'di nyid ji srid bar du rten dgon sde ris dang bcas pa srung ba'i don du de ga nas stsal ba yin pas/__sgrub mchod chen po'i skabs sogs la mchod 'bul snyan shal nan tan dang /__rgyun bar bkur bsti dang bcas te dben par bzhugs su gsol dgos pas thugs nges 'tshal/__slar smras pa/__'dzam gling phan bde'i nyi ma gling bzhi'i mkha' la rtag tu 'char ba na/__lta ngan mun pas thib dang 'byung bya 'ug pa'i tshogs rnams mkha' la 'ja' bzhin yal/__/gzhan 'phrul dbang du byed cing yid srubs lha min tshogs ni dum bur 'thor/__/bstan pa rin chen ri dbang ltar brtan rdo rje'i chos bdun rdo rje'i rwa bas bskor gyur cig__/ces pa'ang nag po chen po'i dus chen tshes dgu bzang por 'jam dbyangs chos kyi blo gros ris med bstan pa'i rgyal mtshan du 'bod pas bris pa dge legs rnam par rgyal bar gyur cig__/sarba dza ga taM dA su shre yo b+ha wan+tu//___//
