JKCL-KABUM-10-THA-070-wylie
oM swasti/__rgyal bas chos tshul ji snyed gsungs pa gang /__/dpal ldan rgyud kyi rgyal po 'di la dgongs/__/lung gi spyi chen theg pa kun gyi 'grel/__/'di ni srid zhi kun gyi tog tu gyur/__/rim gyis 'jug pa'i sa rnams bkod pa ni/__/gsang ba'i snying por 'gro ba'i lam po che/__/'dir gzhol 'dir 'babs rgya mtsho chen po la/__/'dzam gling chu klung ji snyed 'bab dang mtshungs/__/kun tu bzang po rdo rje sems dpa' yi/__/thugs kyi gsang ba'i brnag pa 'di kho na/__/'di med rgyud rnams kun gyi snying dang bral/__/de phyir tan+ta kun gyi srog snying dngos/__/dngos po'i rang bzhin gshis kyi gnas tshul dang /__/ma rtogs 'khrul tshul thugs rjes ji ltar gzigs/__/de nyid skye dang 'gro don mdzad tshul bcas/__/spyi don lnga yi bdag nyid gsang ba snying /__/rgyal ba rig 'dzin gang zag so so la/__/dgongs rig rna bar brgyud pa'i rgyud chen 'di/__/che ba brgyad ldan dbang rab rnams kyi yul/__/'di nyid snang ba bzhi dang rgyud gsum gnas/__/rgyu shes lta dang rkyen 'jug ting nge 'dzin/__/'bras mthar phyin te mtshan nyid gsum du 'chad/__/dbang rim mtshan bstan rnam dbye 'bru gnyer dgrol/__/shes bya'i rgyud don lta spyod dkyil 'khor dbang /__/dam tshig phrin las bsgrub pa ting nge 'dzin/__/mchod 'ching zlos sngags phyag rgya rnam bcu ste/__/zab mo'i rgyud kyi bsdus don 'di lta bus/__/legs par 'chad pa'i bka' srol rnam gnyis las/__/'phur 'gro'i slob dpon pad+ma rgyal po yis/__/rgyal ba mchog dbyangs rma gnyags sogs la bshad/__/bka' srol khyad 'phags man ngag snyan brgyud kyis/__/rgyud don 'grel pa kha 'bab rnam bzhi'i rgyun/__/bde ldan zhing na sems dpa' blo gros snying /__/ma 'ongs rgyal ba tshe dpag med ces grags/__/kha ba can du chos rje kaHthog pa/__/dam pa bde bar gshegs kyi thugs mtshor bskyil/__/de'i gsung bdud rtsis lus stobs rab rgyas pa/__/rdo rje rgyal mtshan rgyal ba'i sras chen des/__/phyi rabs 'gro la brtse ba chen po yis/__/mngon par snang byas rgyud kyi 'grel chen 'di/__/dus kyi dbang gis nub pa ltar gyur kyang /__/kun tu bzang po'i phrin las 'gog med mthus/__/thams cad mkhyen gzigs chos kyi rgya mtsho la/__/pu sti glegs bam dbang bskur thob pa dang /__/ring brgyud tshogs slob gang+gA sin+d+hU klung /__/gang thugs dpal gyi be'ur 'khyil ba dang /__/nye brgyud byin rlabs gzi 'od stong 'phro bas/__/snga 'gyur chos kyi snying po gsal bar byas/__/de phyir gcig tu rin thang lci ba yi/__/nor bu bsam 'phel gyis kyang mi mtshon pa'i/__/glegs bam 'di nyid spar du bskrun pa'i dges/__/kun mkhyen bla ma'i zab dgongs rdzogs par shog__/'dir brtson bdag gzhan sgyu 'phrul drwa ba yi/__/de kho na nyid mngon du rtogs pa'i mthus/__/nges pa'i lam mchog bgrod nas rdo rje sems/__/mi bskyod rgyal po'i go 'phang thob gyur cig__/bstan 'dzin skyes rnams zhabs pad yun du brtan/__/bstan la gnod byed ming tsam med par gyur/__/bstan pa'i snying po bshad dang sgrub pa 'phel/__/bstan pa phyogs bcur rgyas pa'i bkra shis shog__/gzhi yi rang bzhin mngon sum rtogs pa dang /__/lam gyi snang ba ma lus bgrod byas te/__/'bras bu bde gshegs snang ba'i 'od chen gyis/__/srid gsum mun pa drung nas 'byin gyur cig__/chos 'di'i phrin las 'dzad med bskal pa'i tha mar yang /__/rig 'dzin rnams kyis legs bzungs skal ba can la snang /__/ma nor rtogs shing yang dag lam mchog snang bar byas/__/dam ldan chos skyong srung mas 'di yi gnyer mdzod cig__/ces pa'ang khams gsum chos kyi rgyal po 7'jam dbyangs mkhyen brtse'i dbang po'i byin rlabs kyi cha shas tsam thob pa rnam dkar sgrub pa po 'jam dbyangs blo gros rgya mtsho rang nyid kyi spar byang smon tshig tu bris pa dge legs rnam par rgyal bar gyur cig/___//
