JKCL-KABUM-08-NYA-011-022-wylie

!_bla ma la phyag 'tshal lo/__/dal 'byor mi lus thob dus 'dir/__/don med yal bar mi 'dor ba/__/dam pa gsum gyi rtsis zin pa'i/__/dge la brtson pa gal che zhing /__/srid las nges par 'byung ba'i blos/__/'khor bar zhen pa log pa dang /__/pha mar gyur pa'i sems can rnams/__/srid las sgrol 'dod blo chen gyis/__/byams dang snying rje yang yang bsgom/__/chos kun snying po byang chub sems/__/bdag gzhan brje ba'i blo sbyong dang /__/ris su ma chad sems can la/__/lhag bsam bzang po yang yang bskyed/__/zab rgyas chos kyi snying po ni/__/rdo rje theg pa'i lam mchog la/__/zhugs 'di skal ba bzang phyir na/__/dbang thob rtsa ba'i bla ma la/__/dad dam ngo lkog med pa dang /__/mos gus ltem rkyang med par gces/__/tha mal snang zhen rab sdom pa'i/__/bskyed pa'i rim pa rtag tu bsgom/__/de yang gdos bcas ma yin pa/__/bde stong sgyu ma'i rol par blta/__/mtshan 'dzin rtog pa rab sdom pa'i/__/zab mo rdzogs pa'i rim pa ni/__/rlung dang gtum mo'i rnal 'byor bsgom/__/zhen med ye shes chen por bsre/__/chos kun snying po de kho na/__/bzhi pa'i ye shes rtag tu skyong /__/gzung 'dzin rdul dang bral ba yi/__/rig stong 'od gsal zung 'jug gi__/gnas lugs zab mor yengs med skyong /__/rtog tshogs ji ltar shar ba rnams/__/chos nyid ngang du grol ba gces/__/lam gyi snying po bla ma yi/__/rnal 'byor zab mo bsgom byas te/__/dbang bzhi blang zhing gsol gdab la/__/'bad pas 'di dang phyi ma'i don/__/bde blag nyid du 'grub par 'gyur/__/de ltar gdams pa nyung ngu 'di/__/dge ma kun bzang gis bskul ngor/__/'jam dbyangs chos kyi blo gros pas/__/gang shar myur du bris pa dge/__//