JKCL-KABUM-08-NYA-011-012-wylie
!_gdams pa rin chen phreng mdzes zhes bya ba/__rje bla ma rnams la phyag 'tshal lo/__/tshe mi rtag ston ka'i sprin dang 'dra/__/dus da lta yod pa da lta med/__/lus 'di ni chu yi chu bur bzhin/__/dbugs rgyu ba rlung gseb mar me mtshungs/__/grogs bzang po lha bu 'dra ba yang /__/shul du bskyur nas 'grogs dbang med/__/rgyu nor rdzas ri ltar spungs yod kyang /__/khab tsam zhig khyer ba'i dbang ni med/__/kho 'chi bdag gshin rje zhes bya bas/__/dbang ma ster phyi ma'i yul du khrid/__/lus mdzes pa'i lang tsho bkrag la gsal/__/mtshar sdug gi me tog 'dra na yang /__/dus nam zhig mi rtag sad kyis khyer/__/dgra 'chi bdag gshin rje mche ba gtsigs/__/las ngan pa'i zhags pas dbang med bsdam/__/rgyob sod kyi gnam sa gang ba'i dus/__/skyabs bla ma dkon mchog gsum las med/__/dus da lta rang dbang yod pa'i dus/__/blo dam pa'i chos la phyogs pas na/__/las byas pa don dang ldan par 'gyur/__/rang sems 'di rta rgod dang 'dra bas/__/nges 'byung lcag gis brab pa dang /__/tshe 'dir snang 'khrul pa'i zhen pa thongs/__/'gro ba kun pha mar shes byas nas/__/byams snying rje byang chub sems gnyis bsgom/__/theg chen gyi blo sbyong 'byong bar mdzod/__/drin che ldan rtsa ba'i bla ma de/__/dus nam yang ma brjed snying dbus bsgom/__/gsol btab dang dbang blang thugs yid bsre/__/sems gdod nas skye med chos sku'i gshis/__/gdangs rang bzhin 'od gsal 'gags pa med/__/rtsal sna tshogs shar ba sprul pa'i sku/__/de sku gsum dbyer med lhun gyis grub/__/rang rig pa'i gnas lugs de yi ngang /__/blos bcos slang ma byed phyam brdal thong /__/rnam rtog gi rjes su ma 'brang zhog/__gang snang kun rang grol 'gro bar gyis/__/thun mtshams su kha 'don bzlas brjod dang /__/bzang spyod sogs smon lam yang yang gdab/__/tshul de skad gdams pa'i phreng ba 'di/__/tshe ring gi dam chos sgron ma la/__/bsam pa bzang pos gdams pa dge/__dge bas byang chub myur thob shog/__ces pa'ang chos kyi blo gros pas so//___//
