JKCL-KABUM-12-NA-066

🚧 This website is under continued development. We appreciate your patience!

Previous Text Back to Volume PageNext Text

བླ་མ་དང་སངས་རྒྱས་བྱང་ཆུབ་སེམས་དཔའ་ཡི་དམ་ཞི་ཁྲོ་སོགས།

Wylie title	bla ma dang sangs rgyas byang chub sems dpa' yi dam zhi khro sogs
Location	chos kyi blo gros bka' 'bum Volume 12, Text 66, Pages 313-316 (Folios 1a1 to 2b2)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. bla ma dang sangs rgyas byang chub sems dpa' yi dam zhi khro sogs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 313-316. Bir, H.P.: Khyentse Labrang, 2012.
Genre	Prayers - smon lam
Colophon	།ཅེས་པའང་ཆུ་སྦྲུལ་ཟླ་༡༠ཚེས་༦ལ་རང་ནས་ཡིད་སྐྱོ་བས་སྨོན་ལམ་དུ་བྲིས་པའོ།།
	/ces pa'ang chu sbrul zla 10tshes 6la rang nas yid skyo bas smon lam du bris pa'o//

1 Texts in this Section (sde tshan or chos tshan)

313-316	བླ་མ་དང་སངས་རྒྱས་བྱང་ཆུབ་སེམས་དཔའ་ཡི་དམ་ཞི་ཁྲོ་སོགས། bla ma dang sangs rgyas byang chub sems dpa' yi dam zhi khro sogs Prayers - smon lam	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

བླ་མ་དང་སངས་རྒྱས་བྱང་ཆུབ་སེམས་དཔའ་ཡི་དམ་ཞི་ཁྲོ་དཔའ་བོ་མཁའ་འགྲོ་ཆོས་སྐྱོང་ནོར་ལྷ་གཏེར་བདག་གི་ཚོགས་དང་བཅས་པ་རྣམས་ལ་ཕྱག་འཚལ་ཞིང་མཆོད་དོ་སྐྱབས་སུ་མཆིའོ། །བྱིན་གྱིས་རློབས་པར་མཛད་དུ་གསོལ། བདག་གི་ཚེ་འཁོར་བ་ཐོག་མ་མེད་པ་ནས་ཐ་མ་ད་ལྟ་ལ་ཐུག་གི་བར་སྡིག་པ་མི་དགེ་བའི་ལས་བཅས་དང་རང་བཞིན་གྱི་ཉེས་པ་དང་། ལྟུང་བར་གྱུར་ཅིང་། ཐར་པ་དང་ཐམས་ཅད་མཁྱེན་པའི་ལམ་ལ་བར་དུ་གཅོད་ཅིང་སྒྲིབ་པར་འགྱུར་བའི་ཚོགས་རང་གིས་བྱས་པ་དང་། གཞན་ལ་བྱེད་དུ་བཅུག་པ་དང་། བྱས་པ་ལ་རྗེས་སུ་ཡི་རངས་བར་བྱས་པ་སོགས་དངོས་དང་བརྒྱུད་ནས་སྒོ་གསུམ་དང་འབྲེལ་བ་ཅི་མཆིས་པ་ཐམས་ཅད་བླ་མ་རྒྱལ་བ་སྲས་དང་བཅས་པ་རྣམས་ཀྱི་སྤྱན་སྔར་མཐོལ་ཞིང་བཤགས་སོ། །གནོང་ཞིང་འགྱོད་དོ། །མི་འཆབ་བོ། མི་སྦུད་དོ། །ཕྱིན་ཆད་ཡང་དག་པར་ལེགས་པར་བསྡམ་མོ། །སྲོག་ལ་བབ་ཀྱང་མི་བགྱིད་དོ། །འཕགས་པ་ཐུགས་རྗེ་ཆེན་པོ་དང་ལྡན་པ་ཁྱེད་རྣམས་ཀྱིས་བདག་གི་འགྱོད་ཚང་གི་བཤགས་པ་འདི་ཡང་དག་པར་བཞེས་ནས་སྒྲིབ་པར་མི་འགྱུར་བའི་དག་ཚངས་ཆེན་པོ་སྩལ་དུ་གསོལ། བརྩེ་བ་ཆེན་པོས་བཟོད་པར་མཛད་དུ་གསོལ། བདག་གིས་དུས་གསུམ་དུ་བསགས་པའི་དགེ་བའི་རྩ་བ་འདིས་མཚོན་ཏེ། སོ་སོའི་སྐྱེ་བོ་དང་། འཕགས་པ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་ལམ་ལ་སློབ་པ་དང་། ཕྱིར་མི་ལྡོག་པ་ཆེན་པོའི་ས་ལ་གནས་པ་རྣམས་དང་། འཕགས་པ་མི་སློབ་པ་མྱ་ངན་ལས་འདས་པའི་ས་ལ་བཞུགས་པའི་སངས་རྒྱས་རྣམས་ཀྱིས་དང་པོ་བྱང་ཆུབ་ཏུ་ཐུགས་བསྐྱེད་པ་ནས་བཟུང་། མཐར་གྱིས་མངོན་པར་རྫོགས་སངས་མ་རྒྱས་ཀྱི་བར་གྱི། ཟག་བཅས་ཟག་མེད་ཀྱི་དགེ་བའི་ཚོགས་བླ་ན་ཡོད་པ་དང་། བླ་ན་མ་མཆིས་པའི་དགེ་ཚོགས་ཐམས་ཅད་གཅིག་ཏུ་བསྡུས་ཤིང་བཟླུམ་སྟེ། མགོན་པོ་ཐུགས་རྗེ་ཆེན་པོ་དང་ལྡན་པ་ཁྱེད་རྣམས་ཀྱི་སྤྱན་སྔར་ཀུན་བཟང་མཆོད་པའི་སྤྲིན་ཕུང་ཆེན་པོར་འབུལ་བར་བགྱིའོ། །དེ་ལྟར་ཕུལ་བ་ལ་བརྟེན་ནས་རྩ་བརྒྱུད་ཀྱི་བླ་མ་དམ་པ་ཕྱོགས་བཅུར་གཤེགས་ཤིང་བཞུགས་པའི་སངས་རྒྱས་བྱང་ཆུབ་སེམས་དཔའ་ཆེན་པོ་ཐམས་ཅད་ཀྱིས་ཇི་ལྟར་ཐུགས་ལ་དགོངས་པའི་དོན་ཐམས་ཅད་གེགས་མེད་ཡོངས་སུ་འགྲུབ་པར་གྱུར་ཅིག །༈ཕྱོགས་བཅུ་དུས་བཞིའི་རྒྱལ་བ་སྲས་བཅས་དང་། །ཁྱད་པར་བླ་མ་ཨོ་རྒྱན་པདྨ་འབྱུང་། །ཨཱརྱཱ་ཏཱ་རེ་རྡོ་རྗེ་གཞོན་ནུ་ཡི། །ཐུགས་རྗེ་བདེ་བ་ཆེན་པོའི་རྩལ་ཕྱུངས་ལ། །བདག་གི་ཤེས་རྒྱུད་བསྲེགས་པར་བྱེད་པ་ཡི། །ཉོན་མོངས་དུག་ལྔའི་མེ་དབལ་དྲག་པོ་དང་། །ཁྱད་པར་འདོད་སྲེད་བརྐམ་པས་གདུང་བ་ཡི། །སླར་ཡང་སྲིད་པར་ཡང་ཡང་འཁོར་ཞིང་མནར། །ད་དུང་འདི་འདྲའི་དབང་དུ་བདག་གྱུར་ན། །ངན་སོང་སྡུག་བསྔལ་དྲག་པོ་མྱོང་བར་ངེས། །དེས་ན་མགོན་པོ་ཁྱེད་རྣམས་ཐུགས་རྗེ་ཡིས། །གནས་ངན་ལེན་གྱི་རྣམ་རྟོག་ངན་པ་རྣམས། །མྱུར་བ་ཉིད་དུ་གཞོམ་པར་མཛད་དུ་གསོལ། །ཕྱིན་ཆད་སླར་མི་སྐྱེ་བར་བྱིན་གྱིས་རློབས། །བློ་སྣ་ཆོས་འགྲོ་དམ་ཆོས་ལམ་དུ་ལོངས། །ལམ་གྱི་འཁྲུལ་ཞི་འཁྲུལ་པ་ཡེ་ཤེས་སུ། །འཆར་བར་བླ་མ་ཡི་དམ་ཐུགས་རྗེས་སྐྱོབས། །སྲིད་པའི་མེ་ཚོགས་ཞི་བར་མཛད་དུ་གསོལ། །ཆོས་མཐུན་བསམ་སྦྱོར་ཡིད་བཞིན་འགྲུབ་པ་དང་། །བྱང་ཆུབ་ལམ་གྱི་བར་ཆད་ཞི་བར་མཛོད། །ཀྱེ་མ་ཀྱི་ཧུད་མགོན་པོ་ཐུགས་རྗེ་ཅན། །ལས་ངན་བདག་ལ་སྤྱན་གྱིས་གཟིགས་སུ་གསོལ། །གཟིགས་ནས་ལས་ངན་དབང་དུ་མི་གཏོང་བར། །ཡང་དག་ལྟ་དང་རྟོགས་པ་ཁྱད་པར་ཅན། །མྱུར་དུ་རྒྱུད་ལ་སྐྱེ་བར་བྱིན་གྱིས་རློབས། །འདི་ནས་ཚེ་འཕོས་ཉིད་དུ་བདེ་ལྡན་ཞིང་། །འདྲེན་མཆོག་འོད་དཔག་མེད་མགོན་ཞབས་དྲུང་དུ། །སྐྱེས་ནས་བྱང་ཆུབ་ལུང་བསྟན་ཐོབ་པར་ཤོག །བདག་ལ་འབྲེལ་དང་མིང་ཙམ་ཐོས་པ་རྣམས། །ངན་སོང་སྡུག་བསྔལ་མཐའ་དག་མི་མྱོང་ཞིང་། །ཞིང་མཆོག་བདེ་བ་ཅན་དུ་སྐྱེ་བར་ཤོག །མདོར་ན་བདག་གི་བྱ་བ་ཅི་བགྱིས་པ། །རང་དོན་རྨི་ལམ་ཙམ་དུའང་མི་སེམས་ཞིང་། །གཞན་ལ་ཕན་པ་ཁོ་ནར་འགྱུར་བ་ལ། །མགོན་པོ་འཇམ་དབྱངས་ཀུན་ཏུ་བཟང་སོགས་ཀྱིས། །ཇི་ལྟར་སྨོན་པ་བཞིན་དུ་འགྲུབ་གྱུར་ཅིག །ཅེས་པའང་ཆུ་སྦྲུལ་ཟླ་༡༠ཚེས་༦ལ་རང་ནས་ཡིད་སྐྱོ་བས་སྨོན་ལམ་དུ་བྲིས་པའོ།། །།

[edit]

bla ma dang sangs rgyas byang chub sems dpa' yi dam zhi khro dpa' bo mkha' 'gro chos skyong nor lha gter bdag gi tshogs dang bcas pa rnams la phyag 'tshal zhing mchod do skyabs su mchi'o/__/byin gyis rlobs par mdzad du gsol/__bdag gi tshe 'khor ba thog ma med pa nas tha ma da lta la thug gi bar sdig pa mi dge ba'i las bcas dang rang bzhin gyi nyes pa dang /__ltung bar gyur cing /__thar pa dang thams cad mkhyen pa'i lam la bar du gcod cing sgrib par 'gyur ba'i tshogs rang gis byas pa dang /__gzhan la byed du bcug pa dang /__byas pa la rjes su yi rangs bar byas pa sogs dngos dang brgyud nas sgo gsum dang 'brel ba ci mchis pa thams cad bla ma rgyal ba sras dang bcas pa rnams kyi spyan sngar mthol zhing bshags so/__/gnong zhing 'gyod do/__/mi 'chab bo/__mi sbud do/__/phyin chad yang dag par legs par bsdam mo/__/srog la bab kyang mi bgyid do/__/'phags pa thugs rje chen po dang ldan pa khyed rnams kyis bdag gi 'gyod tshang gi bshags pa 'di yang dag par bzhes nas sgrib par mi 'gyur ba'i dag tshangs chen po stsal du gsol/__brtse ba chen pos bzod par mdzad du gsol/__bdag gis dus gsum du bsags pa'i dge ba'i rtsa ba 'dis mtshon te/__so so'i skye bo dang /__'phags pa nyan thos dang /__rang sangs rgyas dang /__byang chub sems dpa' lam la slob pa dang /__phyir mi ldog pa chen po'i sa la gnas pa rnams dang /__'phags pa mi slob pa mya ngan las 'das pa'i sa la bzhugs pa'i sangs rgyas rnams kyis dang po byang chub tu thugs bskyed pa nas bzung /__mthar gyis mngon par rdzogs sangs ma rgyas kyi bar gyi/__zag bcas zag med kyi dge ba'i tshogs bla na yod pa dang /__bla na ma mchis pa'i dge tshogs thams cad gcig tu bsdus shing bzlum ste/__mgon po thugs rje chen po dang ldan pa khyed rnams kyi spyan sngar kun bzang mchod pa'i sprin phung chen por 'bul bar bgyi'o/__/de ltar phul ba la brten nas rtsa brgyud kyi bla ma dam pa phyogs bcur gshegs shing bzhugs pa'i sangs rgyas byang chub sems dpa' chen po thams cad kyis ji ltar thugs la dgongs pa'i don thams cad gegs med yongs su 'grub par gyur cig__/!phyogs bcu dus bzhi'i rgyal ba sras bcas dang /__/khyad par bla ma o rgyan pad+ma 'byung /__/Ar+yA tA re rdo rje gzhon nu yi/__/thugs rje bde ba chen po'i rtsal phyungs la/__/bdag gi shes rgyud bsregs par byed pa yi/__/nyon mongs dug lnga'i me dbal drag po dang /__/khyad par 'dod sred brkam pas gdung ba yi/__/slar yang srid par yang yang 'khor zhing mnar/__/da dung 'di 'dra'i dbang du bdag gyur na/__/ngan song sdug bsngal drag po myong bar nges/__/des na mgon po khyed rnams thugs rje yis/__/gnas ngan len gyi rnam rtog ngan pa rnams/__/myur ba nyid du gzhom par mdzad du gsol/__/phyin chad slar mi skye bar byin gyis rlobs/__/blo sna chos 'gro dam chos lam du longs/__/lam gyi 'khrul zhi 'khrul pa ye shes su/__/'char bar bla ma yi dam thugs rjes skyobs/__/srid pa'i me tshogs zhi bar mdzad du gsol/__/chos mthun bsam sbyor yid bzhin 'grub pa dang /__/byang chub lam gyi bar chad zhi bar mdzod/__/kye ma kyi hud mgon po thugs rje can/__/las ngan bdag la spyan gyis gzigs su gsol/__/gzigs nas las ngan dbang du mi gtong bar/__/yang dag lta dang rtogs pa khyad par can/__/myur du rgyud la skye bar byin gyis rlobs/__/'di nas tshe 'phos nyid du bde ldan zhing /__/'dren mchog 'od dpag med mgon zhabs drung du/__/skyes nas byang chub lung bstan thob par shog__/bdag la 'brel dang ming tsam thos pa rnams/__/ngan song sdug bsngal mtha' dag mi myong zhing /__/zhing mchog bde ba can du skye bar shog__/mdor na bdag gi bya ba ci bgyis pa/__/rang don rmi lam tsam du'ang mi sems zhing /__/gzhan la phan pa kho nar 'gyur ba la/__/mgon po 'jam dbyangs kun tu bzang sogs kyis/__/ji ltar smon pa bzhin du 'grub gyur cig__/ces pa'ang chu sbrul zla 10tshes 6la rang nas yid skyo bas smon lam du bris pa'o//___//