JKCL-KABUM-08-NYA-012-019

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 8, sde tshan 12, Text 19, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: . Bir, H.P.: Khyentse Labrang, 2012.
Genre	Vajra Songs - rdo rje'i glu

1 Texts in this Section (sde tshan or chos tshan)

19 443-445	འཁོར་འདས་དབྱེར་མེད་ཀྱི་ལྟ་བའི་མགུར་གླུ་ཀུན་བཟང་མཆོད་སྤྲིན། 'khor 'das dbyer med kyi lta ba'i mgur glu kun bzang mchod sprin Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༈ འཁོར་འདས་དབྱེར་མེད་ཀྱི་ལྟ་བའི་མགུར་གླུ་ཀུན་བཟང་མཆོད་སྤྲིན་ཞེས་བྱ་བ། ཨ་ཧོ། འཁོར་འདས་ཞེས་བྱའི་སྒྲ་བོ་ཆེ། །བཙལ་ན་རང་བཞིན་ཅིར་ཡང་མེད། །མ་དཔྱད་སེང་གེའི་གསོབ་དང་མཚུངས། །དོན་དུ་ཇི་ལྟར་སྣང་བ་ཀུན། །རང་གི་སེམས་ཀྱི་སྣང་བ་ནི། །དག་དང་མ་དག་སྣང་བ་ཡིན། །མ་དག་སེམས་ཅན་ལ་སྣང་བ། །ནང་དུ་ལུས་ལ་རབ་ཏུ་ཚང་། །དེ་ཡི་རྩ་བ་སེམས་ལ་ཚང་། །འཁོར་ཆོས་སེམས་ཀྱི་མཚན་ཉིད་དང་། །ལམ་ཆོས་སེམས་ཀྱི་ཡོན་ཏན་དང་། །འབྲས་ཆོས་གནས་འགྱུར་ཚུལ་དུ་ཚང་། །ཀུན་གཞི་རྒྱུ་ཡི་རྒྱུད་ཅེས་བྱ། །མྱོང་རིག་བྱེ་བྲག་ལ་ཕྱེད་ཅིང་། །འཁོར་འདས་གཉིས་ཀའི་གཞི་རུ་གྱུར། །ངོ་བོ་སྟོང་པ་ཉིད་ཡིན་ནོ། །རྒྱུ་ཡི་ལྷན་སྐྱེས་ཆོས་གསུམ་དང་། །ལམ་དང་འབྲས་བུའི་ལྷན་སྐྱེས་རྣམས། །སྦྱང་གཞི་སྦྱོང་བྱེད་སྦྱངས་འབྲས་ཀྱི། །མ་དག་དག་དང་རྣམ་དག་གི །རིམ་པ་ཀུན་གཞིའི་སྟེང་དུ་འཇོག། ཐབས་རིག་གསལ་ལ་མ་འགགས་པ། །སེམས་ཅན་ནས་བརྩམས་སངས་རྒྱས་བར། །རྒྱུན་མི་ཆད་པས་རྒྱུད་དུ་འཇོག། རིག་པའི་གསལ་བ་དེ་ཉིད་ནི། །སེམས་ཀྱི་མཚན་ཉིད་ངོ་བོ་སྟོང་། །བཅོས་མིན་ཟུང་འཇུག་སེམས་ཀྱི་གཤིས། །དེ་ཡི་དོན་ལ་སྒྲོ་འདོགས་བཅད། །རྡོ་རྗེའི་ལུས་ལ་གནད་བསྣུན་པ། །བསྐྱེད་རྫོགས་དབང་བཞིའི་རིམ་པ་ཡི། །ཆུ་བོའི་རྒྱུན་ལྟར་བརྩོན་པ་ལས། །དཀྱིལ་འཁོར་བཞི་པོ་རབ་སྨིན་ནས། །ས་ལམ་ཡོན་ཏན་ཀུན་རྫོགས་འགྱུར། །འབྲས་རྒྱུད་ཀུན་གཞི་རྟེན་བརྟེན་པ། །གནས་ཡོངས་གྱུར་དང་ཟག་བཅས་བྲལ། །ཤིན་ཏུ་ཕྲ་བའི་རླུང་དང་བཅས། །ངོ་བོ་ཉིད་སྐུར་བྱང་ཆུབ་པ། །ཁ་སྦྱོར་བདུན་ལྡན་རྡོ་རྗེ་འཆང་། །མཆོག་གི་གོ་འཕང་མངོན་སུམ་བརྙེས། །གཞི་ལམ་འབྲས་གསུམ་དབྱེར་མེད་པ། །གསུང་ངག་སྙིང་པོའི་དོན་གྱི་བཅུད། །ལྟ་བའི་གླུ་དབྱངས་འདི་ཉིད་ནི། །བློ་གྲོས་རྒྱ་མཚོའི་དཔལ་ལས་ཐོན། །བླ་མའི་ཐུགས་དགོངས་རྫོགས་པར་ཤོག། ས་མསྟ་ཨི་ཐི། ས་ཟླའི་ཚེས་ཉེར་ལྔ་ལའོ།། །།

[edit]

!_'khor 'das dbyer med kyi lta ba'i mgur glu kun bzang mchod sprin zhes bya ba/__a ho/__'khor 'das zhes bya'i sgra bo che/__/btsal na rang bzhin cir yang med/__/ma dpyad seng ge'i gsob dang mtshungs/__/don du ji ltar snang ba kun/__/rang gi sems kyi snang ba ni/__/dag dang ma dag snang ba yin/__/ma dag sems can la snang ba/__/nang du lus la rab tu tshang /__/de yi rtsa ba sems la tshang /__/'khor chos sems kyi mtshan nyid dang /__/lam chos sems kyi yon tan dang /__/'bras chos gnas 'gyur tshul du tshang /__/kun gzhi rgyu yi rgyud ces bya/__/myong rig bye brag la phyed cing /__/'khor 'das gnyis ka'i gzhi ru gyur/__/ngo bo stong pa nyid yin no/__/rgyu yi lhan skyes chos gsum dang /__/lam dang 'bras bu'i lhan skyes rnams/__/sbyang gzhi sbyong byed sbyangs 'bras kyi/__/ma dag dag dang rnam dag gi__/rim pa kun gzhi'i steng du 'jog/__thabs rig gsal la ma 'gags pa/__/sems can nas brtsams sangs rgyas bar/__/rgyun mi chad pas rgyud du 'jog/__rig pa'i gsal ba de nyid ni/__/sems kyi mtshan nyid ngo bo stong /__/bcos min zung 'jug sems kyi gshis/__/de yi don la sgro 'dogs bcad/__/rdo rje'i lus la gnad bsnun pa/__/bskyed rdzogs dbang bzhi'i rim pa yi/__/chu bo'i rgyun ltar brtson pa las/__/dkyil 'khor bzhi po rab smin nas/__/sa lam yon tan kun rdzogs 'gyur/__/'bras rgyud kun gzhi rten brten pa/__/gnas yongs gyur dang zag bcas bral/__/shin tu phra ba'i rlung dang bcas/__/ngo bo nyid skur byang chub pa/__/kha sbyor bdun ldan rdo rje 'chang /__/mchog gi go 'phang mngon sum brnyes/__/gzhi lam 'bras gsum dbyer med pa/__/gsung ngag snying po'i don gyi bcud/__/lta ba'i glu dbyangs 'di nyid ni/__/blo gros rgya mtsho'i dpal las thon/__/bla ma'i thugs dgongs rdzogs par shog/__sa masta i thi/__sa zla'i tshes nyer lnga la'o//___//