JKCL-KABUM-08-NYA-013-005

First text in volume.Last text in volume.

Wylie title		page=1
Location	chos kyi blo gros bka' 'bum Volume 13, Text 5, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ བདེ་བ་ཆེན་པོའི་རྟོགས་བརྗོད་རྡོ་རྗེའི་རོལ་མོ་ཞེས་བྱ་བ་བཞུགས་སོ། །ན་མོ་ཌཱ་ཀི་མ་ཧཱ་སུ་ཁ་ཡེ། ཀུན་རྟོག་བརྒྱད་ཁྲི་བཞི་སྟོང་ཚང་ཚིང་རྣམས། །བདེ་ཆེན་ཡེ་ཤེས་འབར་བའི་མེ་ཡིས་བསྲེགས། །ཤེས་རབ་རྗེས་ཆགས་སྒྱུ་མའི་རོལ་རྩེད་ཀྱི། །ངོ་མཚར་གྲུབ་པ་ཆེ་ལ་སྦྱོར་འདི་མཚར། །རྣལ་འབྱོར་ཐབས་ལྡན་སྔགས་ཀྱི་ཉེ་ལམ་ལ། །རབ་ཏུ་བརྩོན་པའི་རིག་པ་འཛིན་པ་ནི། །རྡོ་རྗེ་འཆང་ས་མངོན་དུ་བྱེད་པ་ཡི། །མྱུར་ལམ་ཟབ་མོ་རྒྱལ་བས་མཆོག་ཏུ་བསྔགས། །བུད་མེད་མཐོང་བས་དབང་པོའི་སྒོ་འགེགས་ཤིང་། །སྣང་བ་དགྲར་ལངས་སྐྱོན་དུ་བལྟ་བ་འདི། །ཐེག་པ་དམན་ལ་རིགས་ཤིང་འཐད་ན་ཡང་། །གོང་མའི་ལམ་དང་ཤིན་ཏུ་འགལ་བར་འགྱུར། །བྱང་སེམས་རྩི་ཡི་ཉོན་མོངས་ཟིན་པ་ན། །སྤོངས་བདུན་དགེ་འགྱུར་བསྐལ་མང་ཚོགས་ཆེན་རྫོགས། །རྒྱུད་སྡེ་འོག་མ་ལོངས་སྐུའི་དཀྱིལ་འཁོར་ཅན། །བལྟས་དགོད་ལག་བཅངས་བདེ་བའི་རེག་བྱ་ཡི། །ཡེ་ཤེས་དེ་ཉིད་མངོན་དུ་བྱེད་པ་དང་། །རྣལ་འབྱོར་ཆེན་པོ་ཐབས་ཀྱི་ཐེག་པ་ཡི། །བསྐྱེད་རྫོགས་ཟབ་མོའི་རྣལ་འབྱོར་གང་བརྩོན་པ། །བདེ་ཆེན་ཕྱག་རྒྱའི་སྐུ་མཆོག་སྒྲུབ་པ་ཡི། །ཐབས་ཀྱི་རིམ་པ་ཁོ་ནར་གསུངས་པས་ན། །བུད་མེད་སྒྱུ་མ་སྤངས་བར་མི་རིགས་ཤིང་། །གུས་དང་བཅས་པས་དང་དུ་བླང་བར་བྱ། །རིགས་ལྡན་མཆོད་དང་ཚོགས་ཀྱི་འདུ་བ་ལ། །ཆོ་གའི་རིམ་པར་བརྩོན་པར་མ་བྱས་ཀྱང་། །བཟའ་བཏུང་དག་གིས་ཚིམ་པར་བྱེད་པ་དེས། །ཚོགས་ཀྱི་མཆོད་པ་བྱེད་དང་ཁྱད་མེད་གསུངས། །སེམས་ཅན་ཐམས་ཅད་ཤེས་རབ་མ་ལས་སྐྱེད། །འཕགས་བཞིའི་ཚོགས་ཀྱང་སྐྱེད་ཡུམ་ཤེས་ཕར་ཕྱིན། །འཁོར་འདས་ཀུན་ཁྱབ་ཀུན་ཏུ་བཟང་མོ་དང་། །ལམ་གྱི་མཆོག་གྱུར་ཤེས་རབ་སྟོང་པ་ཉིད། །དུས་གསུམ་རྒྱལ་བའི་བཞུགས་གནས་ཡུམ་གྱི་མཁའ། །དེ་ཕྱིར་རྡོ་རྗེ་བཙུན་མོའི་ཆུ་སྐྱེས་ལ། །ཐབས་ལྡན་རྡོ་རྗེས་རེག་པ་གང་ཡིན་དེས། །ལྷན་སྐྱེས་ཡེ་ཤེས་མངོན་སུམ་ཉིད་དུ་བྱེད། །གྲོལ་བའི་ལམ་ལ་གཙོ་བོར་འབད་རྣམས་ཀྱང་། །བདེ་བ་ཆེན་པོའི་རང་རྩལ་འབར་བ་ན། །སྟོང་གཟུགས་དགའ་མར་རྗེས་ཆགས་སྙོམས་ཞུགས་ཤིང་། །དངོས་རིག་བརྟུལ་ཞུགས་སྤྱོད་པས་བོགས་འདོན་པ། །སྙིང་ཐིག་ཆེན་མོ་རྣམས་སུ་མཆོག་ཏུ་བསྔགས། །ཐབས་མི་ལྡན་ལ་སྲེད་པའི་འཆིང་འདི་ཆེ། །ཐབས་ལྡན་རྣམས་ལ་གྲོལ་བ་འདི་མྱུར་ཞིང་། །གསར་རྙིང་བླ་མེད་རྒྱུད་སྡེ་ཆེ་རྣམས་ཀྱི། །མྱུར་ལམ་སྦས་པ་ཕྱག་རྒྱའི་ལམ་འདི་ཡིན། །གང་ཞིག་དད་པས་མོས་བསྟེན་བསྙེན་བཀུར་ན། །གནས་གསུམ་ཌཱ་ཀིའི་བྱིན་གྱིས་རློབས་པ་དང་། །རྩ་རླུང་ཐིག་ལེར་ཡེ་ཤེས་བཅུད་སྨིན་ནས། །ཚེ་འདིའམ་བར་དོར་གྲོལ་བ་ཉིད་དུ་ངེས། །རྒྱ་བོད་གྲུབ་བརྙེས་བྱེ་བ་འབུམ་ཕྲག་ཀྱང་། །རྡོ་རྗེའི་ལམ་གྱི་བསྒྲོད་པ་ལ་བརྟེན་ནས། །མཆོག་ཏུ་མི་འགྱུར་ཁ་སྦྱོར་བདེ་བ་ཆེ། །མི་སློབ་ཆོས་སྐུའི་རྒྱལ་སར་གཤེགས་པ་ཡིན། །དུས་ཀྱི་འཁོར་ལོར་འགྱུར་བཅས་བདེ་བ་ལ། །འགྱུར་མེད་བདེ་བ་དངོས་སུ་རློམ་ནས་ཞེན། །སྨྲ་བ་རྣམས་ལ་རྡོ་རྗེ་འཆང་གིས་བཀག། སྤྱིར་ནི་ཐབས་ལམ་བཀག་པ་མ་ཡིན་ཏེ། །རྗེས་ཏིང་རྣལ་འབྱོར་ཤེས་རབ་སྒྱུ་མ་ལ། །སྙོམས་ཞུགས་བདེ་བའི་ལམ་གྱི་རིམ་པ་བསྟན། །དེ་ཕྱིར་བླ་མེད་ཐེག་པར་མོས་པ་རྣམས། །ཐབས་ཆེན་གསང་བའི་ལམ་འདིར་བརྩོན་པར་བྱོས། །རྡོ་རྗེའི་སར་གཤེགས་རིག་འཛིན་རྒྱལ་བ་རྣམས། བསྒྲོད་པའི་ཤུལ་ལམ་གཅིག་པུར་གྱུར་པ་ཡིན། །མདོ་ལས་བྱང་སེམས་ཆོས་འཕགས་ཆེན་པོ་ནི། །བཙུན་མོའི་ཚོགས་དང་རོལ་པས་བཞུགས་པར་གསུངས། །བླ་མེད་དཀྱིལ་འཁོར་ཁ་སྦྱོར་ཆེན་པོ་ཡི། །བསམ་ཡས་རིགས་བརྒྱའི་ཚོམ་བུ་ཐམས་ཅད་པ། །ཡན་ལག་བདུན་ལྡན་ཧེ་རུ་ཀ་དཔལ་ཆེ། །བདེ་ཆེན་མཆོག་གི་དགྱེས་པའི་གར་གྱིས་རྩེན། །དེས་ན་ཉན་ཐོས་ཞི་བའི་སྡུག་བསྔལ་གྱི། །སྲེད་པས་བཅིངས་ནས་བྱང་ཆུབ་ཆེ་ལས་རིང་། །དེ་བས་སྲེད་པ་ཆགས་པ་ཆེན་པོ་ཡི། །ལམ་དུ་ཁྱེར་བས་ཆགས་བྲལ་བདེ་ཆེན་གྱི། །ཡེ་ཤེས་སྒྱུ་མའི་སྐུ་མཆོག་ཐོབ་པར་འགྱུར། །དགེ་འདིས་བླ་མེད་ཚུལ་ཆེན་མོས་ལྡན་རྣམས། །རྡོ་རྗེ་ཐེག་པའི་རིགས་སུ་ངེས་གྱུར་ནས། །བཙུན་མོའི་ཚོགས་དང་དགྱེས་རྒུར་སྤྱོད་ནས་ཀྱང་། །རྡོ་རྗེ་སེམས་དཔའི་གོ་འཕང་མཆོག་འགྲུབ་ཤོག། །ཅེས་པའང་མེ་ཁྱི་ཟླ་༤ཚེས་༢༣ལ་པདྨ་ཡེ་ཤེས་རྡོ་རྗེས་སྐད་ཅིག་ལ་བྲིས་པ་མཆོག་ཏུ་གསང་བའི་སྡེའོ། །རྒྱ་རྒྱ་རྒྱ།། །།

[edit]

!_bde ba chen po'i rtogs brjod rdo rje'i rol mo zhes bya ba bzhugs so/__/na mo DA ki ma hA su kha ye/__kun rtog brgyad khri bzhi stong tshang tshing rnams/__/bde chen ye shes 'bar ba'i me yis bsregs/__/shes rab rjes chags sgyu ma'i rol rtsed kyi/__/ngo mtshar grub pa che la sbyor 'di mtshar/__/rnal 'byor thabs ldan sngags kyi nye lam la/__/rab tu brtson pa'i rig pa 'dzin pa ni/__/rdo rje 'chang sa mngon du byed pa yi/__/myur lam zab mo rgyal bas mchog tu bsngags/__/bud med mthong bas dbang po'i sgo 'gegs shing /__/snang ba dgrar langs skyon du blta ba 'di/__/theg pa dman la rigs shing 'thad na yang /__/gong ma'i lam dang shin tu 'gal bar 'gyur/__/byang sems rtsi yi nyon mongs zin pa na/__/spongs bdun dge 'gyur bskal mang tshogs chen rdzogs/__/rgyud sde 'og ma longs sku'i dkyil 'khor can/__/bltas dgod lag bcangs bde ba'i reg bya yi/__/ye shes de nyid mngon du byed pa dang /__/rnal 'byor chen po thabs kyi theg pa yi/__/bskyed rdzogs zab mo'i rnal 'byor gang brtson pa/__/bde chen phyag rgya'i sku mchog sgrub pa yi/__/thabs kyi rim pa kho nar gsungs pas na/__/bud med sgyu ma spangs bar mi rigs shing /__/gus dang bcas pas dang du blang bar bya/__/rigs ldan mchod dang tshogs kyi 'du ba la/__/cho ga'i rim par brtson par ma byas kyang /__/bza' btung dag gis tshim par byed pa des/__/tshogs kyi mchod pa byed dang khyad med gsungs/__/sems can thams cad shes rab ma las skyed/__/'phags bzhi'i tshogs kyang skyed yum shes phar phyin/__/'khor 'das kun khyab kun tu bzang mo dang /__/lam gyi mchog gyur shes rab stong pa nyid/__/dus gsum rgyal ba'i bzhugs gnas yum gyi mkha'/__/de phyir rdo rje btsun mo'i chu skyes la/__/thabs ldan rdo rjes reg pa gang yin des/__/lhan skyes ye shes mngon sum nyid du byed/__/grol ba'i lam la gtso bor 'bad rnams kyang /__/bde ba chen po'i rang rtsal 'bar ba na/__/stong gzugs dga' mar rjes chags snyoms zhugs shing /__/dngos rig brtul zhugs spyod pas bogs 'don pa/__/snying thig chen mo rnams su mchog tu bsngags/__/thabs mi ldan la sred pa'i 'ching 'di che/__/thabs ldan rnams la grol ba 'di myur zhing /__/gsar rnying bla med rgyud sde che rnams kyi/__/myur lam sbas pa phyag rgya'i lam 'di yin/__/gang zhig dad pas mos bsten bsnyen bkur na/__/gnas gsum DA ki'i byin gyis rlobs pa dang /__/rtsa rlung thig ler ye shes bcud smin nas/__/tshe 'di'am bar dor grol ba nyid du nges/__/rgya bod grub brnyes bye ba 'bum phrag kyang /__/rdo rje'i lam gyi bsgrod pa la brten nas/__/mchog tu mi 'gyur kha sbyor bde ba che/__/mi slob chos sku'i rgyal sar gshegs pa yin/__/dus kyi 'khor lor 'gyur bcas bde ba la/__/'gyur med bde ba dngos su rlom nas zhen/__/smra ba rnams la rdo rje 'chang gis bkag/__spyir ni thabs lam bkag pa ma yin te/__/rjes ting rnal 'byor shes rab sgyu ma la/__/snyoms zhugs bde ba'i lam gyi rim pa bstan/__/de phyir bla med theg par mos pa rnams/__/thabs chen gsang ba'i lam 'dir brtson par byos/__/rdo rje'i sar gshegs rig 'dzin rgyal ba rnams/__bsgrod pa'i shul lam gcig pur gyur pa yin/__/mdo las byang sems chos 'phags chen po ni/__/btsun mo'i tshogs dang rol pas bzhugs par gsungs/__/bla med dkyil 'khor kha sbyor chen po yi/__/bsam yas rigs brgya'i tshom bu thams cad pa/__/yan lag bdun ldan he ru ka dpal che/__/bde chen mchog gi dgyes pa'i gar gyis rtsen/__/des na nyan thos zhi ba'i sdug bsngal gyi/__/sred pas bcings nas byang chub che las ring /__/de bas sred pa chags pa chen po yi/__/lam du khyer bas chags bral bde chen gyi/__/ye shes sgyu ma'i sku mchog thob par 'gyur/__/dge 'dis bla med tshul chen mos ldan rnams/__/rdo rje theg pa'i rigs su nges gyur nas/__/btsun mo'i tshogs dang dgyes rgur spyod nas kyang /__/rdo rje sems dpa'i go 'phang mchog 'grub shog/__/ces pa'ang me khyi zla 4tshes 23la pad+ma ye shes rdo rjes skad cig la bris pa mchog tu gsang ba'i sde'o/__/rgya rgya rgya//___//