JKCL-KABUM-08-NYA-012-053

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 12, Text 53, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ སྐྱབས་བཀའ་དྲིན་འཁོར་མེད་བླ་མ་རྗེ། །མི་བདག་གི་བདེ་ཆེན་རྒྱན་དུ་བཞུགས། །སྐྱིད་མཆོག་གསུམ་ཉི་མ་དགུང་ལ་འཆར། །དུས་བསྟན་པ་མདོ་སྔགས་དམ་ཆོས་དར། །དེ་སྟོན་མཛད་བཤེས་གཉེན་མཁས་གྲུབ་ཚོགས། །ཆེས་མ་ཉམས་རྒྱས་སྐབས་སྐྱེ་བ་ལེན། །བུ་སྐལ་ངན་མ་ཡིན་སྐལ་བ་བཟང་། །གཞི་སངས་རྒྱས་བསྟན་ལ་ཞུགས་བྱས་ནས། །བཀའ་མདོ་རྒྱུད་མན་ངག་རྒྱ་ཆེར་ཐོས། །བདག་བསོད་ཆུང་མ་ཡིན་བསོད་ནམས་ཆེ། །ཆོས་སོ་ཐར་འདུལ་བའི་ཁྲིམས་ནོས་པ། །སེམས་མ་ཞི་བག་མེད་སྤྱོད་པ་ཡི། །ཡན་ལག་གི་ལྟུང་བ་ཆར་བཞིན་བབ། །སྡོམ་རྩ་་བ་བཞི་དང་མ་འགལ་ཙམ། །དུས་དེང་སང་བཀའ་བའི་ཆད་པས་ནོན། །སྐྲ་ཙམ་པ་ཀ་ལྟར་གྱུར་པ་ན། །འདོད་བུད་མེད་ཀྱི་སྒྲོག་ཏུ་ཚུད་གྱུར་ཀྱང་། །བུ་དགེ་བའི་བཤེས་ཀྱི་ཟིན་པ་ལས། །དོན་ཟབ་མོར་ངེས་ཤེས་སྐྱེས་པ་ན། །སྡོམ་གསུམ་དེ་ཡར་ལྡན་ཉིད་དུ་རྫོགས། །གཏོང་ཟོབ་ཀྱི་ས་མཚམས་འཁྲུལ་མེད་སྤྱོད། །བློ་གཞན་ཕན་བསམ་པ་བཟང་པོ་ཡི། །རྒྱལ་བསྟན་ལ་སྨན་པའི་འདུན་པ་བསྐྱེད། །ཆེས་རྣལ་འབྱོར་གྲུབ་པ་མ་ཡིན་ཀྱང་། །སྔགས་རྡོ་རྗེའི་རིག་པ་འཛིན་པའི་གཟུགས། །ཤེས་རབ་ཀྱི་དགའ་མར་མ་སྨད་ཅིང་། །ཐབས་གསང་ཆེན་རྡོ་རྗེའི་སྒྱུ་རྩལ་ངོམ། །སེམས་གནས་ལུགས་རྡོ་རྗེའི་རང་ཞལ་བལྟས། །དོན་འཕོ་བྲལ་འགྱུར་མེད་གདེངས་ཞིག་རྙེད། །ཀུན་རྫོབ་ཀྱི་ཁམས་སྙིགས་ཕྱིར་འཛག་ཀྱང་། །ཆེས་དྭངས་མའི་དོན་དམ་ཐིག་ལེ་ནི། །འཕོ་མེད་འོད་གསལ་ཆེན་པོར་བཅིངས། །དེ་བཅིངས་པས་གཟུང་འཛིན་རླུང་དག་ཅིང་། །རླུང་ཟད་པས་འཁྲུལ་སྣང་རང་སར་དྭངས། །དུས་ད་ལྟ་སྣང་བ་སང་མ་སེང་། །གཏད་མེད་ཀྱི་ངང་དུ་འབྱམས་ནས་གདའ། །གང་ལའང་མི་རྟོག་ཅིར་མི་འཛིན། །འགྱུར་འཕྲོ་རྣམས་བྱ་ལམ་རྗེས་མེད་འདྲ། །དྲན་པ་ནི་དྲན་གཞིའི་དབྱིངས་སུ་ཐིམ། །དྲན་གཞི་ཡང་སྟོར་ནས་སྒོམ་མ་རྙེད། །སྒོམ་བྱ་དང་སྒོམ་བྱེད་ཀུན་ལས་འདས། །ད་ཅི་བྱ་ང་ནི་གར་ན་འདུག། གཞི་གྲོལ་གྱི་རིག་པ་རྒྱ་ཡན་དུ། །ཀློང་ཆེན་པོར་འབྱམས་ཀླས་ཕྱོགས་ལྷུང་བྲལ། །ལྷུན་གྱིས་ནི་མཉམ་ཡངས་ཆེན་པོའི་ངང་། །དུས་བཞི་ནི་མཉམ་པ་ཆེན་པོར་ཨཿ། ང་སྐྱེ་འཆིའི་རྟོག་པས་གཙེས་གཙེས་ནས། །ད་སྐྱེ་འཆི་མེད་པ་རྡོ་རྗེའི་སྐུ། །ཚེ་འདི་ལ་འགྲུབ་པའི་སྨོན་ལམ་ཞིག། དུས་གསུམ་དང་དུས་མེད་རྟག་ཏུ་འདེབས། །ཕ་ལྔ་བརྒྱའི་གཙུག་རྒྱན་བི་མ་ལ། །རྗེ་ཁྱེད་བཞིན་འགྲུབ་པར་བྱིན་གྱིས་རློབས། །ཅེས་པའང་ས་གླང་ཆོ་འཕྲུལ་ཟླ་བའི་ཚེས་ལྔ་ལ་གང་ཤར་གླུར་བླངས་པ། ས་མ་སྟི།། །།

[edit]

!_skyabs bka' drin 'khor med bla ma rje/__/mi bdag gi bde chen rgyan du bzhugs/__/skyid mchog gsum nyi ma dgung la 'char/__/dus bstan pa mdo sngags dam chos dar/__/de ston mdzad bshes gnyen mkhas grub tshogs/__/ches ma nyams rgyas skabs skye ba len/__/bu skal ngan ma yin skal ba bzang /__/gzhi sangs rgyas bstan la zhugs byas nas/__/bka' mdo rgyud man ngag rgya cher thos/__/bdag bsod chung ma yin bsod nams che/__/chos so thar 'dul ba'i khrims nos pa/__/sems ma zhi bag med spyod pa yi/__/yan lag gi ltung ba char bzhin bab/__/sdom rtsa ba bzhi dang ma 'gal tsam/__/dus deng sang bka' ba'i chad pas non/__/skra tsam pa ka ltar gyur pa na/__/'dod bud med kyi sgrog tu tshud gyur kyang /__/bu dge ba'i bshes kyi zin pa las/__/don zab mor nges shes skyes pa na/__/sdom gsum de yar ldan nyid du rdzogs/__/gtong zob kyi sa mtshams 'khrul med spyod/__/blo gzhan phan bsam pa bzang po yi/__/rgyal bstan la sman pa'i 'dun pa bskyed/__/ches rnal 'byor grub pa ma yin kyang /__/sngags rdo rje'i rig pa 'dzin pa'i gzugs/__/shes rab kyi dga' mar ma smad cing /__/thabs gsang chen rdo rje'i sgyu rtsal ngom/__/sems gnas lugs rdo rje'i rang zhal bltas/__/don 'pho bral 'gyur med gdengs zhig rnyed/__/kun rdzob kyi khams snyigs phyir 'dzag kyang /__/ches dwangs ma'i don dam thig le ni/__/'pho med 'od gsal chen por bcings/__/de bcings pas gzung 'dzin rlung dag cing /__/rlung zad pas 'khrul snang rang sar dwangs/__/dus da lta snang ba sang ma seng /__/gtad med kyi ngang du 'byams nas gda'/__/gang la'ang mi rtog cir mi 'dzin/__/'gyur 'phro rnams bya lam rjes med 'dra/__/dran pa ni dran gzhi'i dbyings su thim/__/dran gzhi yang stor nas sgom ma rnyed/__/sgom bya dang sgom byed kun las 'das/__/da ci bya nga ni gar na 'dug/__gzhi grol gyi rig pa rgya yan du/__/klong chen por 'byams klas phyogs lhung bral/__/lhun gyis ni mnyam yangs chen po'i ngang /__/dus bzhi ni mnyam pa chen por aH/__nga skye 'chi'i rtog pas gtses gtses nas/__/da skye 'chi med pa rdo rje'i sku/__/tshe 'di la 'grub pa'i smon lam zhig/__dus gsum dang dus med rtag tu 'debs/__/pha lnga brgya'i gtsug rgyan bi ma la/__/rje khyed bzhin 'grub par byin gyis rlobs/__/ces pa'ang sa glang cho 'phrul zla ba'i tshes lnga la gang shar glur blangs pa/__sa ma sti//___//_