JKCL-KABUM-08-NYA-011-003-wylie
<div class="wylie-content"
!_zhal gdams gnad kyi phreng ba zhes bya ba/__mkhyen gnyis snang ba'i 'od po ches/__/ma rig mun pa drung 'byin pa/__/bla ma blo ldan mchog sred kyi/__/zhabs kyi pad+mor gus btud nas/__/theg chen lam la 'jug pa'i sgo/__/rgya che zab pa grangs mang yang /__/de yi lam gyi rim pa ni/__/gnad kyi phreng ba 'dir brjod do/__/rnyed dka' dal ba'i rten bzang 'di/__/yun du mi rtag shes pa dang /__/'khor ba'i nyes pa dran byas te/__/las 'bras blang dor rab tu brtson/__/khas blangs tshul khrims gtsang ma'i gzhir/__/skyabs 'gro'i chos kyi gzhi rten bca'/__/lhag bsam bzang po'i byang chub sems/__/bskyed cing ma nyams brtan por bzung /__/phyogs ris med pa'i blo sbyong zhing /__/rkyen ngan byang chub lam du khyer/__/bde sdug thams cad mgo snyoms shing /__/chos brgyad mnyam pa nyid du khyer/__/snang srid sgyu ma'i rang bzhin blta/__/sgyu ma stong nyid brjod bral du/__/bden gnyis zung du 'jug par bsgom /__/rdo rje theg pa'i lam zhugs nas/__/dbang gis rgyud smin dam tshig dag/__rim gnyis lam la rtag gnas shing /__/rdo rje gsum dang 'bral mi bya/__/khyad par mchog gsang rdzogs pa che'i/__/man ngag sems kyi gdar sha bcad/__/chos kun gzhi med rtsa ba bral/__/gdod nas skye med gnas med cing /__/'gro 'ong 'gags med byang chub sems/__/shes rig rgyal po de bzhin gshegs/__/kun tu bzang po rang la bzhugs /__/ye nas 'khrul ma myong pa yi/__/chos sku'i grol gzhi ngos bzung ste/__/spangs thob bral ba'i rig pa la/__/chos kun thig le chen por rdzogs/__/yul dang yul can dbyer med cing /__/shes dang shes bya ro gcig pa/__/ka dag stong pa'i dbyings chen por/__/rang bzhin 'od gsal lhun gyis grub/__/rtsal gdangs ma 'gags cir yang shar/__/shar ba rig pa'i klong du thim/__/bcing grol med pa'i ngang du bzhag/__bzhag ces bya ba'ang ming du zad/__/rang bzhin 'od gsal gseng lam cher/__/sgron drug gnad du bsnun pa las/__/'khor 'das 'od sku chen por grol/__/sku gsum lhun grub rtsal rdzogs nas/__/mi gnas chos sku'i btsan sa zin/__/phyir gsal sku dang ye shes kyi/__/sprin bkod 'gro ba'i don byed 'gyur/__/de skad a bse bya bral bas/__/bskul ngor chos kyi blo gros pas/__/bris pa'i dge bas sems can kun/__/mi gnas myang 'das thob par shog/__//
