JKW-KABUM-20-WA-001-062

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 20, sde tshan 1, Text 62, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 20: . Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

62 19-125	ས་སྐྱོང་ཆོས་རྒྱལ་ཆེན་པོ་སེ་ནཱ་ཤུ་བྷར་ལེགས་འབུལ་གྱི་ཡི་གེ། sa skyong chos rgyal chen po se nA shu b+har legs 'bul gyi yi ge Official Letters - chab shog	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ས་སྐྱོང་ཆོས་རྒྱལ་ཆེན་པོ་སེ་ནཱ་ཤུ་བྷར་ལེགས་འབུལ་གྱི་ཡི་གེ། ས་སྐྱོང་ཆོས་རྒྱལ་ཆེན་པོ་སེ་ནཱ་ཤུ་བྷར་ལེགས་འབུལ་གྱི་ཡི་གེ་པུཎྜརཱི་ཀའི་དོ་ཤལ་ཅེས་བྱ་བ། ཀ༷ལྱཱ༷ཎ༷ཾནཱམཾསུངལནམྲྀཏཾཀརྞྞཀིཤྲཱིཥབཱནཻཿ ཀ༷ལྱཱཎ༷ཾཧིཏྱཾསུཁཔྲཾཡབནཾཔུཎཾབུཎྜརཱིཀཔྲབརྡྷཾ། མེ་ཏོག་གཡོ་བའི་འཁྲི་ཤིང་ཞེས་བྱ་བའི་པྲ་སྟཱ་རའོ། །ཀ༷ལྱཱཎ༷ཾཤཱཏྟིབྷབཡཤསིབྷཱཤྲཱིསུདཱནཏྲིརཏྣཻཿ ཀ༷ལྱཱ༷ཎ༷ཤྲེཡོབྷུབཔབརཡོཿ པུཥྤཾབྲྀཥྚཔྲཡཙྪ། བཀྲ༷་ཤི༷ས་མཚན་གྱི་བདུད་རྩིའི་བཅུད་ལེན་ཐོས་འཛིན་དཔྱིད་དུ་བཏུང་ཙམ་གྱིས། བཀྲ༷་ཤི༷ས་ཕན་བདེའི་པུཎྜཱ་རཱི་ཀའི་དགའ་ཚལ་རབ་ཏུ་རྒྱས་མཛད་ཅིང་། བཀྲ༷་ཤི༷ས་སྲིད་དང་ཞི་བའི་དཔལ་སྟེར་དཀོན་ཅོག་གསུམ་ཞེས་གྲགས་འབར་བས། བཀྲ༷་ཤི༷ས་ས་ཡི་ཚངས་པ་མཆོག་ལ་དགེ་ལེགས་མེ་ཏོག་ཆར་དུ་བསྙིལ། ༡ །ནོ༷མྲྀ༷ཏྱ྄ུ༷སིདྡྷབྡྷིཙརཱདྡྷབཱནཱཾ ནོ༷མྲྀ༷ཏྱུནིཏྱཱམྲྀཏནབྱཀཱམྱཾ། ཤློཀ་གཉིས་སྡེབ་སྦྱོར་དབང་པོ་རྡོ་རྗེའོ། །ནོ༷མྲྀ༷ཏྱ྄ུ༷ནཱཐེནྡུཀརུཎྱཛཱིབཾ ནོ༷མྲྀ༷ཏྱུཙཛྙཱནསཏགྲདེཉི། །འཆི༷་མེ༷ད་གྲུབ་པའི་ཆུ་གཏེར་གཡོ་བ་ལས་བྱུང་བའི། །འཆི༷་མེ༷ད་རྟག་པའི་བདུད་རྩི་སར་པས་མཛེས་བྱས་པ། །འཆི༷་མེད༷་མགོན་པོའི་ཐུགས་རྗེའི་ཤར་གྱི་ཐིག་ལེ་ཡིས། །འཆི༷་མེ༷ད་ཚེ་དང་ཡེ་ཤེས་དམ་པའི་མཆོག་སྩོལ་ཅིག ༢ །ལཀྵྨཱིམཙཏུཿ ཤྲཱིཙསུབྷཱུཏིསེནཱལཀྵྨཱིདཤཾཤོབྷནདཱཔྟཤུཀླཻཿ ལཀྵྨཱིཏྲིདྷཱུམྱཱབྲྀཡབཱརདཱནཾལཀྵྨཱིམཎིརཱསནཙིཏྲམཱུལཾ། །ཕུན་ཚོགས་སྡེ༷་བཞིའི་དཔལ་གྱི་འབྱོར་པ་དང་། །ཕུན་ཚོགས་དགེ༷་བཅུའི་སྣང་བ་དཀར་པོ་ཡིས། །ཕུན་ཚོགས་ས་གསུམ་ཀུན་དགའི་མཆོག་སྦྱིན་པའི། །ཕུན་ཚོགས་ཞབས་སྟེགས་ནོར་བུས་བཀྲ་བའི་དྲུང་། ༣ །ཁྱོད་ཚུལ་ཤིན་ཏུ་བསྔགས་པར་འོས་པ་དཔྱིད་དཔལ་ཇི་བཞིན་དར་བབས་པས། །ཀུན་ཏུ་དགའ་བའི་ཡིད་ཀྱི་རྟོག་པ་པདྨོ་ལྟ་བུར་རྒྱས་པའི་རླབས། །རྨད་བྱུང་བསྔགས་པའི་སྦྲང་རྩིའི་ཐིག་པ་འགོགས་པ་མེད་པར་འཇོ་བ་ཡིས། །ས་སྤྱོད་སྤྱན་གྱི་འབབ་སྟེགས་གསར་པ་གཅིག་ཏུ་མཛེས་པའི་གོ་སྐབས་སྒྲུབས། ༤ །བསོད་ནམས་དཔག་ཡས་ཆུ་གཏེར་གཡོ་བ་སྙིང་རྗེའི་སྲུབས་ཐག་གིས་བསྐུལ་བས། །སྡེ༷་བཞིའི་འཆར་ཀའི་དམར་བས་ཉེར་དྲངས་དགེ༵་ལེགས་བདུད་རྩིའི་དོ་ཤལ་ཅན། །ཆོ༵ས་སྲིད་རྒྱལ༵་ཐབས་ཡན་ལག་བདུན་ལྡན་ཆེ་དགུའི་རལ་པའི་རི་དབང་སྤོར། །ཞབས་ཀྱི་རྡུལ་ཕྲེང་མཛེས་པ་འབར་བས་སྔོན་མེད་ཟླ་ཤེལ་གཞོན་ནུར་གྱུར། ༥ །དེ་ཚེ་རང་སྡེ་བྱམས་པས་སྐྱོང་ཡང་མི་སྲུན་སྙིང་ལ་གདུང་བ་སྟེར། །ལྷར་བཅས་ཀུན་དགའི་དཔལ་དུ་གྱུར་ཀྱང་ཡིད་སྲུབས་སྡེར་བཅས་བརྟན་པ་འཕྲོག །གྲགས་དང་ཤེས་རབ་འབྱོར་པ་འཕེལ་ཡང་ཚུལ་མིན་རྒུད་པ་རིང་བཅད་པའི། །རྣམ་ཐར་ཡི་གེ་ལི་ཁྲིའི་ཚོན་རིས་ཕྱོགས་ཀྱི་བུ་མོའི་མཁུར་ཚོས་བྱིན། ༦ །ཨེ་མ་ཤར་རིའི་ཕྲག་པས་བསྟེན་བྱས་ཉིན་མོར་བྱེད་པའི་གཟི་བྱིན་གྱིས། །ལུགས་གཉིས་ཨུཏྤལ་ནགས་ཀླུང་ཉམས་དགའ་གཅིག་ཏུ་དབྱེ་བའི་སྐབས་སྲིད་ན། །བསྐལ་མང་ཚོགས་ཟུང་བྱེད་པོས་ལེགས་བསྐྲུན་མཐོང་ན་མི་མཐུན་མེད་པ་ཡི། །ཁྱོད་ཞལ་དག་པའི་དཔེ་ཟླར་འོས་ཞེས་གཟུར་གནས་ངག་གི་གླིང་བུ་འཁྲོལ། ༧ །ཚུལ་དང་ཚུལ་མིན་རྣམ་པར་འབྱེད་མཁས་ཚངས་པའི་བློ་ཡི་སྤུན་ཟླ་ཅན། །སྐལ་བཟང་རྣ་བར་ཀུན་དགའི་སིམ་སྟེར་བདེ་འཐུང་རྦ་རླབས་གསར་པའི་རོ། །དྲེགས་ལྡན་ཡིད་ཀྱི་བརྟན་པ་འཇིལ་ལ་འཕྲོག་བྱེད་ངག་གིས་མཚོན་མིན་པའི། །གང་གསུངས་དབྱངས་བདུན་ཡོངས་སུ་རྫོགས་འདིས་སྙན་པ་གཞན་གྱི་ཁེངས་པ་ཟུམ། ༨ །དཔྱོད་ལྡན་ཕལ་གྱིས་རྟོགས་པར་དཀའ་བའི་ཆོས་སྲིད་ཤེས་བྱའི་རི་མོ་འབུམ། །གཅིག་ཅར་འཆར་བའི་ནོར་བུའི་མེ་ལོང་ཁྱོད་ཐུགས་ཉིད་ལ་རྫོགས་གྱུར་པས། །འཇམ་དཔལ་དཔའ་བོའི་བྱིན་རླབས་འོད་རྡུལ་ཡང་ནས་ཡང་དུ་བཏབ་པ་ཡིས། །བློ་མཆོག་པུཎྜ་རཱི་ཀའི་འཁྲི་ཤིང་ཆེས་ཆེར་དར་བར་བྱས་པ་བཞིན། ༩ །བསོད་ནམས་བྱེ་བའི་གདེངས་ཅན་གྱིས་བཟུང་ཡོན་ཏན་ནོར་བུའི་སྤྲིན་ཆེན་ལས། །འདོད་དགུའི་གྲུ་ཆར་ལྷུག་པར་འབེབས་པས་བསྟན་དང་འགྲོ་ལ་ཕན་བདེའི་དཔལ། །ཅི་དགར་སྦྱིན་པའི་ངལ་འཚོ་སྟེར་སླད་རྒྱལ་སྲས་བྱང་ཆུབ་སེམས་དཔའ་ཞེས། །གྲགས་པའི་བ་དན་རྣམ་པར་དཀར་བས་འཛམ་གླིང་ཐ་གྲུར་ཡོངས་སུ་ཁྱབ། ༡༠ །སྙིགས་མར་སྤྱོད་པའི་དུས་ཀྱི་ཚ་གདུང་ལྷག་མ་མེད་པར་འཇིལ་བ་དང་། །རྫོགས་ལྡན་གཞོན་ནུའི་དཔྱིད་དཔལ་ཡིད་འོང་མགྲོན་དུ་འབོད་པའི་བྱེད་པོ་རུ། །གང་འདུལ་ཕྲིན་ལས་བདུད་རྩིའི་བརླན་གྱིས་ས་གསུམ་ཀུན་དགར་བྱས་པའི་ཕྱིར། །སྔོན་བྱོན་ཆོས་རྒྱལ་མེས་དབོན་ཚོགས་རྣམས་སླར་ཡང་ཕྱོགས་འདིར་འོངས་པ་བཞིན། ༡༡ །དེ་སོགས་བསྔགས་འོས་སྲིད་ན་མངོན་མཐོ་གང་གི་གསང་གསུམ་སུ་མེ་རུཿ །དམ་པའི་ཡོན་ཏན་ཉི་ཟླའི་རྣ་ཆས་ལྷག་པར་མཛེས་དང་ཆབ་གཅིག་པར། །མིག་གི་བདུད་རྩིར་བཏུང་བ་ཙམ་ནས་དགེ་མཚན་དུས་སྟོན་རྒྱས་གྱུར་པའི། །བཀའ་དྲིན་ཕ་མཐས་མཚོན་ནུས་མིན་ཕྱིར་དངོས་པོས་གཞལ་བྱ་མ་ཡིན་ཡང་། ༡༢ །ལྷག་བསམ་དག་པའི་ཆུ་གཏེར་ལས། །བྱུང་བའི་ལེགས་སྐྱེས་མནྡར། །ཅུང་ཟད་ཙམ་གྱིས་བསྙེན་བཀུར་ན། །རྗེས་བརྩེའི་གཟིགས་པ་ལྷུར་མཛད་གསོལ། ༡༣ །སླར་ཡང་སྡེ་བཞིའི་དགེ་ལེགས་བྱེ་བ་ཡིས། །ཆོས་སྲིད་རྒྱལ་ཐབས་མཆོག་ལ་དབང་བསྐུར་བ། །ས་སྤྱོད་བཞེད་པའི་དོན་ཀུན་བདེ་བླག་ཏུ། །འགྲུབ་སླད་བདེན་ཚིག་མེ་ཏོག་འདི་སྐད་འཐོར། །ཤྲཱི་ཤྲཱི་ཤྲཱི་བི་ཛ་ཡནྟུ། གང་ཞིག་སྐྱབས་སུ་སོང་བ་ཙམ་ནས་ཐུགས་རྗེའི་གདུགས་དཀར་སྣུམ་པོའི་གྲིབ། །རྨད་བྱུང་དོན་གཉིས་ངལ་འཚོ་སྦྱིན་མཁས་བསླུ་བ་སྤངས་པའི་སྐྱབས་རྣམས་ཀུན། །དེང་འདིར་ས་ཡི་ཚངས་པ་ཆེན་པོ་མཆེད་ཞལ་བློན་འབངས་བཅས་པ་ཡི། །བཞེད་དོན་ཡིད་བཞིན་འདོད་པ་འཇོ་བའི་དགེ་མཚན་སྣང་བ་རྒྱས་ཕྱིར་སྤྱོན། ༡ །སྲས་བཅས་རྒྱལ་བའི་ཡེ་ཤེས་སྐུ་ཅན་དཔལ་ལྡན་བླ་མའི་བྱིན་རླབས་ནི། །ཉིན་མོར་བྱེད་པ་འཆར་ཀའི་གཟི་ལྟར་ཡིད་དུ་འོང་བའི་འཛུམ་འོད་ཀྱིས། །ས་བདག་ཐུགས་ཀྱི་པདྨོར་རེག་ལས་སྤངས་རྟོགས་ཡོན་ཏན་འདབ་མའི་རྒྱ། །གཅིག་ཅར་འབྱེད་པའི་མཚར་སྡུག་རབ་གཡོ་མཆོག་དངོས་གྲུབ་པས་མཛེས་གྱུར་ཅིག ༢ །གང་ཞིག་མཚན་གྱི་སྤྲིང་ཡིག་གསར་པ་རྣ་ལུང་དཔྱངས་པའི་དེ་མ་ཐག །དུས་མིན་ཉི་བུའི་དཔུང་པ་ཡོངས་བཅིལ་རིང་འཚོའི་དཔལ་ཀུན་སྟེར་མཁས་པ། །ཚེ་དཔག་མེད་དང་རྣམ་པར་རྒྱལ་མ་ཡིད་བཞིན་འཁོར་ལོས་ཐུགས་རྗེས་གཟིགས། །འཆི་མེད་རྟག་པའི་བཅུད་ལེན་གྲུབ་པས་བསྐལ་པ་རྒྱ་མཚོར་འཚོ་གཞེས་ཤོག ༣ །རྣམ་ཀུན་མཆོག་ལྡན་ཡེ་ཤེས་ཉིད་ཕྱིར་སྒྱུ་འཕྲུལ་དྲྭ་བའི་སྤྲིན་བཀོད་པས། །ཤིན་ཏུ་ཞི་བ་ཆོས་སྐུའི་དབྱིངས་ལས་ཁ་སྦྱོར་ཡན་ལག་བདུན་གྱི་གར། །ཡི་དམ་ལྷ་ཚོགས་ཕྲིན་ལས་འཇུག་པ་ལེགས་བྲིས་ཟིལ་དངར་བཏུང་བ་ཡིས། །གྲུབ་གཉིས་བནྡྷུ་ཛཱི་བའི་འཁྲི་ཤིང་ཀུན་ནས་ཀུན་ཏུ་རྒྱས་གྱུར་ཅིག ༤ །རྗེས་ཆགས་དབང་གི་མཆིལ་པ་རྣོན་པོས་ལན་གཅིག་ཙམ་ཞིག་རེག་པས་ཀྱང་། །ལྷར་བཅས་དྲེགས་ལྡན་ཡོངས་ཀྱི་ཐོར་ཚུགས་འཛིན་མའི་ཕངས་པར་བསྙིལ་མཁས་པའི། །རིག་བྱེད་དགའ་མའི་ཐུགས་རྗེའི་སྣང་བ་ཨུཏྤལ་ནགས་སུ་རྣམ་འཕྲུལ་པས། །སྡེ་བཞིའི་དགེ་ལེགས་བུང་བའི་ཚོགས་ཀུན་རང་དབང་ཉིད་དུ་འགུགས་པར་ཤོག ༥ །རྡོ་རྗེ་ཡེ་ཤེས་འབར་བའི་མེ་བུས་ཡི༷ད་སྲུབས་བུད་ཤིང་ཀུན་བསྲེགས་ཀྱང་། །འདོད་དགུའི་གྲུ་ཆར་ལྷུག་པར་འབེབས་ལ་དཔག་བསམ་དབང་པོའི་རྗེས་འགྲོ་བ། །མཐུ་ལྡན་ཆོས་སྲུང་ནོར་ལྷའི་ཚོགས་ཀྱིས་རྣམ་བཞིའི་ཕྲིན་ལས་ཀུན་བསྒྲུབས་པས། །ཕྱོགས་ལས་རྣམ་པར་རྒྱལ་བའི་བ་དན་སྲིད་པའི་རྩེ་མོར་བསྒྲེངས་གྱུར་ཅིག ༦ །དེ་ལྟར་མི་བདག་མཆོག་གི་བཞེད་དོན་ཟླ་ཤེལ་གསར་པའི་འཛུམ་རླབས་ནི། །ཆེས་ཆེར་དར་བའི་མཚར་སྡུག་ལ་བརྟེན་རིས་མེད་བསྟན་པའི་སྟེང་འཐུང་དཀར། །བཤད་སྒྲུབ་ཟུང་གི་འདབ་རྒྱ་གྲོལ་བས་ཐུབ་བསྟན་དབྱར་གྱི་ལང་ཚོ་ཡིས། །ཡིད་སྲུབས་དཔུང་བཅས་མཛེས་པ་ཕམ་བྱས་རྒྱལ་བ་དགྱེས་པའི་དཔལ་ཐོབ་ཤོག ༧ །ཡངས་པའི་རྒྱལ་ཁམས་འདི་ཉིད་ཀྱིས་མཚོན་གངས་རིའི་ཕྲེང་བས་བསྐོར་བའི་ལྗོངས། །སྐྱེ་རྒུ་ཀུན་ཀྱང་བརྒྱད་གཉིས་འཇིགས་བྲལ་དགེ་བཅུའི་ལས་ལ་རྟག་སྤྱོད་མཐུས། །ཆར་ཆུ་དུས་བབས་འབྲུ་ནོར་དཔལ་འཕེལ་མཐོ་རིས་ཡོན་ཏན་བདུན་ལྡན་པའི། །ཆབ་སྲིད་རྫོགས་ལྡན་གཞོན་ནུའི་དགའ་སྟོན་ནུབ་མེད་སྲིད་མཐར་རྒྱས་གྱུར་ཅིག ༨ །མདོར་ན་ཡིད་མཁར་ཤར་བའི་མོད་ནས་ཚུལ་མིན་རྒུད་པ་རིང་བཅད་ཕྱིར། །བསླུ་བ་སྤངས་པའི་ཡི་གེས་རབ་བརྗིད་བླ་མ་མཆོག་གི་ཐུགས་རྗེའི་མཐུས། །གནས་སྐབས་མཐར་ཐུག་འདོད་པའི་དོན་ཀུན་འབད་མེད་ལྷུག་པར་འཇོ་བ་ཡི། །ཕུན་ཚོགས་བཀྲ་ཤིས་སྣང་བ་གསར་པས་སྲིད་ཞིའི་ཁམས་ཀུན་མཛེས་པར་ཤོག ༩ །ཛ་ཡ་ཛ་ཡ་སུ་ཛ་ཡ། །ཞེས་པའང་མཛེས་བྱེད་ལོར་མཁན་ཆེན་རྡོ་རྗེ་འཆང་རྣལ་འབྱོར་འཇམ་དཔལ་བཟང་པོའི་ཞལ་སྔ་ནས་བོད་ཆེན་པོའི་ལྗོངས་སུ་ཐོག་མར་ཕེབས་པའི་ཚེ། ཆོས་རྒྱལ་བྱང་ཆུབ་སེམས་དཔའ་མཆོག་གི་ཞབས་པད་དུ་ལེགས་སྐྱེས་ཕུལ་བའི་བརྗོད་པ་འདི་ལྟ་བུ་ཞིག་སྦྱོར་བར་འོས་སོ་ཞེས་བཀའི་ཅོད་པན་གཙུག་ཏུ་བཀོད་ནས། རིག་པར་སྨྲ་བ་མཁྱེན་བརྩེའི་དབང་པོས་དབྱར་གྱི་སྨན་ལྗོངས་ཉམས་དགའ་བའི་བསྟི་གནས་སུ་བྲིས་པའོ།། །། ༈

[edit]

sa skyong chos rgyal chen po se nA shu b+har legs 'bul gyi yi ge/ sa skyong chos rgyal chen po se nA shu b+har legs 'bul gyi yi ge puN+DarI ka'i do shal ces bya ba/_kaXl+yAXNaXMnAmaMsungalanamr-itaMkar+N+NakishrIShabAnaiH_kaXl+yANaXMhit+yaMsukhapraMyabanaMpuNaMbuN+DarIkaprabar+d+haM/__me tog g.yo ba'i 'khri shing zhes bya ba'i pra stA ra'o/_/kaXl+yANaXMshAt+tib+habayashasib+hAshrIsudAnatrirat+naiH_kaXl+yAXNaXshreyob+hubapabarayoH_puSh+paMbr-iSh+Taprayats+tsha/_bkraX shiXs mtshan gyi bdud rtsi'i bcud len thos 'dzin dpyid du btung tsam gyis/_bkraX shiXs phan bde'i puN+DA rI ka'i dga' tshal rab tu rgyas mdzad cing /_bkraX shiXs srid dang zhi ba'i dpal ster dkon cog gsum zhes grags 'bar bas/_bkraX shiXs sa yi tshangs pa mchog la dge legs me tog char du bsnyil/_1_/noXmr-iXt+yu?Xsid+d+hab+d+hitsarAd+d+habAnAM_noXmr-iXt+yunit+yAmr-itanabyakAmyaM/_sh+loka gnyis sdeb sbyor dbang po rdo rje'o/_/noXmr-iXt+yu?XnAthen+dukaruN+yadzIbaM_noXmr-iXt+yutsadz+nyAnasatagradenyi/_/'chiX meXd grub pa'i chu gter g.yo ba las byung ba'i/_/'chiX meXd rtag pa'i bdud rtsi sar pas mdzes byas pa/_/'chiX medaX mgon po'i thugs rje'i shar gyi thig le yis/_/'chiX meXd tshe dang ye shes dam pa'i mchog stsol cig_2_/lak+Sh+mImatsatuH_shrItsasub+hUtisenAlak+Sh+mIdashaMshob+hanadAp+tashuklaiH_lak+Sh+mItrid+hUmyAbr-iyabAradAnaMlak+Sh+mImaNirAsanatsitramUlaM/_/phun tshogs sdeX bzhi'i dpal gyi 'byor pa dang /_/phun tshogs dgeX bcu'i snang ba dkar po yis/_/phun tshogs sa gsum kun dga'i mchog sbyin pa'i/_/phun tshogs zhabs stegs nor bus bkra ba'i drung /_3_/khyod tshul shin tu bsngags par 'os pa dpyid dpal ji bzhin dar babs pas/_/kun tu dga' ba'i yid kyi rtog pa pad+mo lta bur rgyas pa'i rlabs/_/rmad byung bsngags pa'i sbrang rtsi'i thig pa 'gogs pa med par 'jo ba yis/_/sa spyod spyan gyi 'bab stegs gsar pa gcig tu mdzes pa'i go skabs sgrubs/_4_/bsod nams dpag yas chu gter g.yo ba snying rje'i srubs thag gis bskul bas/_/sdeX bzhi'i 'char ka'i dmar bas nyer drangs dge~X legs bdud rtsi'i do shal can/_/cho~Xs srid rgyala~X thabs yan lag bdun ldan che dgu'i ral pa'i ri dbang spor/_/zhabs kyi rdul phreng mdzes pa 'bar bas sngon med zla shel gzhon nur gyur/_5_/de tshe rang sde byams pas skyong yang mi srun snying la gdung ba ster/_/lhar bcas kun dga'i dpal du gyur kyang yid srubs sder bcas brtan pa 'phrog_/grags dang shes rab 'byor pa 'phel yang tshul min rgud pa ring bcad pa'i/_/rnam thar yi ge li khri'i tshon ris phyogs kyi bu mo'i mkhur tshos byin/_6_/e ma shar ri'i phrag pas bsten byas nyin mor byed pa'i gzi byin gyis/_/lugs gnyis ut+pal nags klung nyams dga' gcig tu dbye ba'i skabs srid na/_/bskal mang tshogs zung byed pos legs bskrun mthong na mi mthun med pa yi/_/khyod zhal dag pa'i dpe zlar 'os zhes gzur gnas ngag gi gling bu 'khrol/_7_/tshul dang tshul min rnam par 'byed mkhas tshangs pa'i blo yi spun zla can/_/skal bzang rna bar kun dga'i sim ster bde 'thung rba rlabs gsar pa'i ro/_/dregs ldan yid kyi brtan pa 'jil la 'phrog byed ngag gis mtshon min pa'i/_/gang gsungs dbyangs bdun yongs su rdzogs 'dis snyan pa gzhan gyi khengs pa zum/_8_/dpyod ldan phal gyis rtogs par dka' ba'i chos srid shes bya'i ri mo 'bum/_/gcig car 'char ba'i nor bu'i me long khyod thugs nyid la rdzogs gyur pas/_/'jam dpal dpa' bo'i byin rlabs 'od rdul yang nas yang du btab pa yis/_/blo mchog puN+Da rI ka'i 'khri shing ches cher dar bar byas pa bzhin/_9_/bsod nams bye ba'i gdengs can gyis bzung yon tan nor bu'i sprin chen las/_/'dod dgu'i gru char lhug par 'bebs pas bstan dang 'gro la phan bde'i dpal/_/ci dgar sbyin pa'i ngal 'tsho ster slad rgyal sras byang chub sems dpa' zhes/_/grags pa'i ba dan rnam par dkar bas 'dzam gling tha grur yongs su khyab/_10_/snyigs mar spyod pa'i dus kyi tsha gdung lhag ma med par 'jil ba dang /_/rdzogs ldan gzhon nu'i dpyid dpal yid 'ong mgron du 'bod pa'i byed po ru/_/gang 'dul phrin las bdud rtsi'i brlan gyis sa gsum kun dgar byas pa'i phyir/_/sngon byon chos rgyal mes dbon tshogs rnams slar yang phyogs 'dir 'ongs pa bzhin/_11_/de sogs bsngags 'os srid na mngon mtho gang gi gsang gsum su me ruH_/dam pa'i yon tan nyi zla'i rna chas lhag par mdzes dang chab gcig par/_/mig gi bdud rtsir btung ba tsam nas dge mtshan dus ston rgyas gyur pa'i/_/bka' drin pha mthas mtshon nus min phyir dngos pos gzhal bya ma yin yang /_12_/lhag bsam dag pa'i chu gter las/_/byung ba'i legs skyes man+dar/_/cung zad tsam gyis bsnyen bkur na/_/rjes brtse'i gzigs pa lhur mdzad gsol/_13_/slar yang sde bzhi'i dge legs bye ba yis/_/chos srid rgyal thabs mchog la dbang bskur ba/_/sa spyod bzhed pa'i don kun bde blag tu/_/'grub slad bden tshig me tog 'di skad 'thor/_/shrI shrI shrI bi dza yan+tu/_gang zhig skyabs su song ba tsam nas thugs rje'i gdugs dkar snum po'i grib/_/rmad byung don gnyis ngal 'tsho sbyin mkhas bslu ba spangs pa'i skyabs rnams kun/_/deng 'dir sa yi tshangs pa chen po mched zhal blon 'bangs bcas pa yi/_/bzhed don yid bzhin 'dod pa 'jo ba'i dge mtshan snang ba rgyas phyir spyon/_1_/sras bcas rgyal ba'i ye shes sku can dpal ldan bla ma'i byin rlabs ni/_/nyin mor byed pa 'char ka'i gzi ltar yid du 'ong ba'i 'dzum 'od kyis/_/sa bdag thugs kyi pad+mor reg las spangs rtogs yon tan 'dab ma'i rgya/_/gcig car 'byed pa'i mtshar sdug rab g.yo mchog dngos grub pas mdzes gyur cig_2_/gang zhig mtshan gyi spring yig gsar pa rna lung dpyangs pa'i de ma thag_/dus min nyi bu'i dpung pa yongs bcil ring 'tsho'i dpal kun ster mkhas pa/_/tshe dpag med dang rnam par rgyal ma yid bzhin 'khor los thugs rjes gzigs/_/'chi med rtag pa'i bcud len grub pas bskal pa rgya mtshor 'tsho gzhes shog_3_/rnam kun mchog ldan ye shes nyid phyir sgyu 'phrul drwa ba'i sprin bkod pas/_/shin tu zhi ba chos sku'i dbyings las kha sbyor yan lag bdun gyi gar/_/yi dam lha tshogs phrin las 'jug pa legs bris zil dngar btung ba yis/_/grub gnyis ban+d+hu dzI ba'i 'khri shing kun nas kun tu rgyas gyur cig_4_/rjes chags dbang gi mchil pa rnon pos lan gcig tsam zhig reg pas kyang /_/lhar bcas dregs ldan yongs kyi thor tshugs 'dzin ma'i phangs par bsnyil mkhas pa'i/_/rig byed dga' ma'i thugs rje'i snang ba ut+pal nags su rnam 'phrul pas/_/sde bzhi'i dge legs bung ba'i tshogs kun rang dbang nyid du 'gugs par shog_5_/rdo rje ye shes 'bar ba'i me bus yiXd srubs bud shing kun bsregs kyang /_/'dod dgu'i gru char lhug par 'bebs la dpag bsam dbang po'i rjes 'gro ba/_/mthu ldan chos srung nor lha'i tshogs kyis rnam bzhi'i phrin las kun bsgrubs pas/_/phyogs las rnam par rgyal ba'i ba dan srid pa'i rtse mor bsgrengs gyur cig_6_/de ltar mi bdag mchog gi bzhed don zla shel gsar pa'i 'dzum rlabs ni/_/ches cher dar ba'i mtshar sdug la brten ris med bstan pa'i steng 'thung dkar/_/bshad sgrub zung gi 'dab rgya grol bas thub bstan dbyar gyi lang tsho yis/_/yid srubs dpung bcas mdzes pa pham byas rgyal ba dgyes pa'i dpal thob shog_7_/yangs pa'i rgyal khams 'di nyid kyis mtshon gangs ri'i phreng bas bskor ba'i ljongs/_/skye rgu kun kyang brgyad gnyis 'jigs bral dge bcu'i las la rtag spyod mthus/_/char chu dus babs 'bru nor dpal 'phel mtho ris yon tan bdun ldan pa'i/_/chab srid rdzogs ldan gzhon nu'i dga' ston nub med srid mthar rgyas gyur cig_8_/mdor na yid mkhar shar ba'i mod nas tshul min rgud pa ring bcad phyir/_/bslu ba spangs pa'i yi ges rab brjid bla ma mchog gi thugs rje'i mthus/_/gnas skabs mthar thug 'dod pa'i don kun 'bad med lhug par 'jo ba yi/_/phun tshogs bkra shis snang ba gsar pas srid zhi'i khams kun mdzes par shog_9_/dza ya dza ya su dza ya/_/zhes pa'ang mdzes byed lor mkhan chen rdo rje 'chang rnal 'byor 'jam dpal bzang po'i zhal snga nas bod chen po'i ljongs su thog mar phebs pa'i tshe/_chos rgyal byang chub sems dpa' mchog gi zhabs pad du legs skyes phul ba'i brjod pa 'di lta bu zhig sbyor bar 'os so zhes bka'i cod pan gtsug tu bkod nas/__rig par smra ba mkhyen brtse'i dbang pos dbyar gyi sman ljongs nyams dga' ba'i bsti gnas su bris pa'o//___//__!