JKW-KABUM-15-BA-024-001-wylie
klong chen snying tig skor la/__sngon 'gro'i dmigs rim zab don bdud rtsi'i nying khu/
- /_/gam+b+hi_rA_r+thA_mr-i_ta_s+ya_ma_N+Do_nA_ma_ma_hA_sa_n+d+hi_ra_ma_hA_r+b+ba_tsi_t+ta_ti_la_ka_s+ya_pU_rbaM_ga_ta_yu_ba_laM_b+hA_nu_kra_ma_ga_r+b+ho_t+sa_da_na_ma_sti/_/
@#/__/rdzogs pa chen po klong chen snying tig gi sngon 'gro'i dmigs rim snying por dril ba zab don bdud rtsi'i nying khu zhes bya ba bzhugs so/__/ na mo gu ru b+h+yaH__de la 'dir rdzogs pa chen po klong chen snying thig gi sngon 'gro'i rim pa rgyun du ji ltar nyams su blang ba'i tshul la/__thog mar tho rangs ldang ba'i dus la bab pa na/__mdun gyi nam mkhar rtsa ba'i bla ma o rgyan rdo rje 'chang gi rnam pa la 'khor dpa' bo dang mkha' 'gro'i tshogs kyis bskor bas DA ma ru'i sgra sngags kyi gdangs su bsgrags pas bskul te gnyid las sad par bsam zhing /__rang nyid gzhi lus zhing khams kyi bkod pa dang bcas pa gsal bzhin pa'i ngang nas ldang ste/__snying ga'i bla ma dbu ma'i lam brgyud spyi bo'i steng gi nam mkhar ye re 'khyil le dgyes bzhin du bzhugs par bsam/__de nas lus gnad legs par bcas te rlung ro dgu phrugs su bus la cung zad ngal gso zhing shes pa rnal du phab pas bsam gtan gyi snod du rung ba na ngag byin gyis brlab pa ni/__oM AHhU~M/__lce dbang ra~M yig las byung mes bsregs nas sogs dang /__spro na bla ma rgyangs 'bod kyi mgor/__gang gi drin gyis bde chen nyid sogs kyi gsol 'debs kyang byas rjes/__sngon 'gro dngos la thun mong dang /__thun mong ma yin pa'i sngon 'gro gnyis kyi/__dang po la'ang dmigs skor drug las/__de thams cad dkyus gcig tu nyams su blang ba ni/__snying dbus dad pa'i ge sar bzhad pa nas/__zhes sogs brjod pa dang chabs cig 'di ltar bsam par bya ste/__de yang ngo bo mi khom pa brgyad kyi ldog cha dal ba brgyad dang /__de'i khyad par gyi chos 'byor pa bcu ste/__dal 'byor gyi chos bco brgyad dang ldan pa'i mi lus rin po che rgyu dang /__dpe dang /__grangs sogs gang gi sgo nas bsams kyang shin tu rnyed dka' zhing /__phan 'dogs bsam gyis mi khyab pa dang ldan pa 'di lta bu zhig rnyed du zin na'ang /__phyi snod kyi 'jig rten sra zhing 'thas pa ltar snang ba rnams kyang mthar me bdun dang chu gcig gis 'jig pa'i tshon thal ba tsam yang lus par mi 'gyur/__nang bcud kyi sems can thams cad kyang skyes nas tshe thar du song ba gcig kyang med pas rang nyid kyang nges par 'chi bar ma zad/__do nub tsam yang mi 'chi ba'i gdengs ni med/__'chi ba'i tshe chos rnam par dag pa kho na ma gtogs gzhan gang gis kyang mi phan/__shi nas cang med du mi 'gro bar las 'ba' zhig gi rjes su 'brangs te/__sdig pa'i las kyis ngan song gsum du skyes na sdug bsngal gyi sdug bsngal bzod pa'i blags med/__zag bcas kyi dge bas mtho ris gsum du skyes kyang 'gyur ba'i sdug bsngal dang /__khyab pa 'du byed kyi sdug bsngal kho na las ma 'das pas/__da res 'khor ba sdug bsngal gyi rgya mtsho chen po 'di las ci nas kyang thar ba zhig bya dgos/__de'i ched du theg pa chen po'i dge ba'i bshes gnyen mtshan nyid dang ldan pa mnyes pa gsum gyis bsten nas/__blang dor gyi gnas ji skad gsungs pa'i don rnams byis dang sdig pa'i grogs po'i gzhan dbang du ma song bar lag len du thebs nges pa'i 'chi chos gsha' ma zhig nyin zhag re re'i khongs su'ang ci nus kyis bsgrub par bgyi'o snyam pa dang /__de ltar sgrub nus par bla ma dang dkon mchog mkhyen snyam pa'i dad pa dang /__nges 'byung gi shugs drag tu bskyed de blo rgyud 'khul nges su bya'o//__// gnyis pa thun mong ma yin pa'i sngon 'gro la'ang drug las/__dang po skyabs su 'gro ba ni/__de lta bu'i 'jigs rung 'khor ba'i sdug bsngal de las rang gzhan sems can thams cad bsgral ba'i phyir bla ma dang dkon mchog gsum la skyabs su 'gro bar bgyi'o snyam pa'i skyes bu chen po'i blos/__rang nyid gang du 'dug pa'i sa phyogs thams cad rin po che sna tshogs las grub pa'i zhing khams mdzes shing yid du 'ong ba'i gzhir/__dpag bsam ljon shing yal ga lnga pa/__lo 'dab dang me tog 'bras bu phun sum tshogs pa la rin po che'i 'phyang 'phrul dril g.yer la sogs pas rnam par brgyan pa nam mkha'i dbyings kun khyab pa'i dbus su seng ges bteg pa'i rin po che'i khri sna tshogs pad+ma nyi zla brtsegs pa'i gdan la sangs rgyas kun 'dus kyi ngo bo rtsa ba'i bla ma o rgyan rdo rje 'chang sku mdog sngon po rdo rje dang dril bu 'dzin pa/__yum mtsho rgyal dkar mo gri gug thod pa 'dzin pa dang mnyam par sbyor ba/__dar dang rus pa'i rgyan gyis brgyan cing /__zhabs rdo rje'i skyil mo krung gis bzhugs pa'i dbu gtsug tu rdzogs chen brgyud pa'i bla ma rnams tho brtsegs su bzhugs shing /__gzhan yang rtsa brgyud kyi bla ma dam pa rnams dang /__rgyud sde chen po drug dang 'brel ba'i yi dam dkyil 'khor gyi lha tshogs/__gnas gsum gyi dpa' bo mkha' 'gro bsam gyis mi khyab pas mtha' nas bskor ba/__mdun gyi yal ga la sangs rgyas shAkya thub pa sogs dus gsum gyi sangs rgyas sprul sku'i rnam pa can rnams dang /__g.yas kyi yal gar nye ba'i sras brgyad la sogs pa theg pa chen po'i dge 'dun/__g.yon gyi yal ga la shA ri'i bu dang /__mo'u gal gyi bu la sogs pa nyan thos kyi dge 'dun 'phags pa'i tshogs/__rgyab kyi yal gar chos dkon mchog glegs bam brtsegs pa'i rnam pa can kha dog dmar po A li kA li'i rang sgra sgrogs pa/__de dag gi bar mtshams thams cad ye shes dang las las grub pa'i chos srung dam can rgya mtsho'i tshogs kyis bar med du gang ba/__thams cad kyang mkhyen brtse nus gsum gyi yon tan dpag tu med pas bdag nyid la rjes su brtse zhing 'dren pa'i ded dpon chen por mngon sum du bzhugs par bsams la/__de'i mdun du rang nyid/__rang gi g.yas su pha/__g.yon du ma/__mdun du gnod byed/__mtha' skor kun tu rigs drug gi sems can thams cad lus gus pa'i thal mo sbyar/__ngag nas skyabs 'gro'i tshig 'ur dir gyis brjod/__yid kyis 'di nas bzung ste byang chub snying po la mchis kyi bar du bla ma la 'dren pa/__yi dam dang sangs rgyas la ston pa/__chos la lam/__mkha' 'gro chos skyong dge 'dun la lam sgrub pa'i zla grogs zhu ba'i tshul gyis bdag cag rnams khyed la brten/__khyed la 'bul/__khyed las gzhan pa'i skyabs dang re sa med pas ci mdzad khyed mkhyen snyam pa'i gdung ba drag pos skyabs su 'gro bar mos te skyabs 'gro ci 'grub tu bya/__mthar skyabs yul rnams kyi thugs ka nas 'od zer 'phros/__bdag dang sems can thams cad kyi lus sems la zhugs/__sgrib gnyis bag chags dang bcas pa thams cad dag__/tshe dang bsod nams lung rtogs kyi yon tan la sogs pa gong nas gong du 'phel zhing rgyas par bsams la sems 'dzin med kyi ngang du cung zad re mnyam par gzhag go/__/gnyis pa sems bskyed ni/__'di ltar mkha' khyab kyi sems can thams cad tshe rabs thog ma med pa nas dgras kyang gnyen byas/__gnyen gyis kyang dgra byas pa sogs dgra gnyen nges pa med cing /__tshe 'di dang ma 'ongs pa na'ang dgra gnyen nges med du 'gyur ba la bsams nas nye ring chags sdang dang bral ba'i sems btang snyoms pa thog mar bskyed cing /__de nas de thams cad rang gi pha ma drin can sha stag yin pa'i phyir/__drin gzo ba'i slad du bde ba dang 'phrad 'dod kyi byams pa/__sdug bsngal dang bral 'dod kyi snying rje/__de lta bu dang mi 'bral bar byung na nga re dga' snyam pa'i dga' ba ste tshad med pa bzhis blo sbyangs pa'i mthar/__skyabs yul rnams dpang por bzhugs pa'i tshul gyis/__sems can thams cad rnam grol gtan gyi bde ba la dgod pa'i slad du bdag gis rdzogs pa'i sangs rgyas kyi go 'phang rin po che de ci nas kyang thob nges pa zhig bya'o snyam pa smon pa dang /__de'i ched du lam zab mo 'di nyid kyis mtshon te byang chub sems dpa'i spyod pa rlabs po che la bslabs nas 'khor ba na sems can gcig kyang mi gnas pa de tsam du brtson 'grus brtsam par bya'o snyam pa 'jug pa ste/__de lta bu'i dmigs rnam dang ma bral bas sems bskyed kyi tshig lan gsum sogs ji ltar rigs pa brjod/__rgyun du de tsam mi lcogs na smon 'jug gi sems bskyed kho nas kyang don 'grub cing /__spro na bar 'dir bdag gzhan mnyam brje'i blo sbyong dang /__khyad par dbugs 'gro 'ong dang bstun te bde sdug gtong len gyi dmigs pa'ang nyams su blang zhing bdag med rnam gnyis kyi nges pas drangs pa'i zhi lhag zung 'jug don dam pa'i byang chub kyi sems kyang ci rigs su bsgom/__mthar bdag dang sems can thams cad skyabs yul rnams la thim/__de rnams kyang dbus kyi bla ma la thim/__de yang chos sku spros bral gdod ma'i dbyings su bstims nas mnyam par bzhag go/__/gsum pa rdor sems sgom bzlas ni/__AH__bdag nyid mal spyi bo ru:__sogs brjod pa dang chabs cig__/rang nyid tha mal du gnas pa'i spyi bor pad dkar 'dab ma brgyad pa sdong bu sor bzhi tsam tshangs bug tu zug pa'i lte bar ze'u 'bru dmar ser gyi tshad dang mnyam pa'i zla dkyil dkar bsil nya gang ba'i steng du hU~M dkar po yongs su gyur pa las skad cig gis bla ma rdo rje sems dpa' sku mdog dkar gsal 'od zer 'phro zhing zhi 'dzum mtshan dpe'i nyams 'gyur yongs su rdzogs pa la/__dar dkar po'i stod g.yogs/__kha dog sna tshogs pa'i smad dkris/__cod pan/__zi ldir/__dar mthing khra'i cod pan ltag pa nas phyir 'phyang ba/__gar gyi phu dung bris cha rnying pa rnams su 'byung ba'i stod khebs lta bu la phu dung thung ngu yod pa ste dar gyi chas gos lnga dang /__rin po che'i dbu rgyan/__snyan rgyan/__mgul rgyan/__phyag gdub/__zhabs gdub/__ska rags/__do shal/__rin po che'i do shal lte 'og yan 'khor ba se mo do/__nu ma'i bar sleb pa'i do shal thung ba/__ste rin po che'i rgyan brgyad kyis brgyan pa/__phyag g.yas rdo rje thugs kar gtod cing /__g.yon dril bu dkur brten pa/__yum rdo rje snyems ma dkar mo gri thod 'dzin pa dang mnyam par sbyor ba/__zhabs gnyis rdo rje dang pad+ma'i skyil krung gis bzhugs pa'i sku can du gsal btab nas/__mos gus gdung shugs drag pos bdag gi shes rgyud kyi sdig sgrib thams cad dag pa zhig khyed mkhyen no snyam pa rten gyi stobs1/__sngar byas kyi sdig pa la 'gyod sems shugs drag tu bskyed pa rnam par sun 'byin pa'i stobs2/__phyin chad srog la bab kyang mi byed snyam pa nyes byas sdom pa'i stobs3/__sngar byas kyi gnyen por rdor sems kyi thugs kar zla dkyil gyi dbus su hU~M yig gi mthar yig brgya'i sngags phreng dkar po spu shad kyis bris pa lta bu g.yas skor du gsal la/__klog pa'i tshul gyis cung zad bzlas pas/__de las bde chen gyi bdud rtsi dkar po 'od zer dang bcas pa dpag tu med pa babs/__yab yum gyi sku'i dbyibs brgyud sbyor mtshams nas byung pad+ma'i sdong bu la 'khril ba'i tshul gyis rang gi tshangs bug nas zhugs te/__shwa 'ud chen po'i sna la sbur mi chags pa ltar nad thams cad rnag khrag__/gdon thams cad srog chags/__sdig sgrib thams cad dud sol khu rlangs kyi rnam pas ba spu'i bu ga dang 'og sgo gnyis nas 'thon/__sa rim pa dgu'i 'og tu 'chi bdag glang dmar po'i rnam par gnas pa'i kha gdangs pa nas zhugs/__lto bar tshud pas dus ma yin pa'i 'chi ba bslus par bsams la yi ge brgya pa rab ci nus/__'bring brgya rtsa/__tha ma'ang nyer gcig la nyung mtha' byas pa bzla ba gnyen po kun tu spyod pa'i stobs te stobs bzhi'i gnad dang ldan pas nyams su blangs pa'i mthar/__'khor lo bzhi'i gnas rnams kyang bdud rtsis skya mer gyis khengs pas sgo gsum cha mnyam gyi sdig sgrib bag chags dang bcas pa dag__/bde stong dga' ba bzhi'i ye shes rgyud la skyes pas lus sems zag med kyi bde bas khyab par bsam/__mjug bshags sdom bya ba ni/__slar yang mos gus gdung shugs drag pos/__mgon po bdag ni sogs skyabs gsol gyi tshig brjod pa dang /__rang rgyud kyi sdig ltung dag pa la bla ma rdo rje sems dpa' thugs dgyes pas zhal 'dzum mdangs su bzhad cing /__rigs kyi bu khyod kyi sdig sgrib nyes ltung thams cad dag pa yin no//__//zhes gsung gis dngos su gnang ba byin pa dang chabs cig bde stong chen po'i ngo bor 'od du zhu nas rang la thim pa'i rkyen las/__rang nyid kyang skad cig gis rdo rje sems dpa' yab yum sku mdog phyag mtshan rgyan cha lugs sogs ma 'dres shing yongs su rdzogs pa snang stong me long nang gi gzugs brnyan lta bur gsal ba'i thugs kar zla dkyil gyi dbus su thugs srog hU~M/__phyogs bzhir/__oM badz+ra satwa'i sngags kyi yig 'bru rnams gsal ba las 'od zer dkar po dpag tu med pa 'phros/__'phags pa mchod/__byin rlabs dang dngos grub thams cad tshur 'dus rang la thim/__slar 'phros sems can thams cad kyi sdig sgrib sbyangs/__phyi snod kyi 'jig rten 'og min mngon par dga' ba'i zhing dang /__nang bcud khams gsum gyi sems can thams cad rdor sems rigs lnga'i go 'phang la bkod/__de thams cad dang rang nyid lhan cig pas bzlas par bsams la yang snying ci nus su bzla ba ni khyad par bskyed rim la brten pa'i sgrib sbyong dang /__mthar thug lha sngags kyi spros pa 'od gsal gnyug ma'i ngang du bsdus te/__sbyang bya sbyang byed kyi rtog tshogs thams cad gzod ma nas rang bzhin gyis ma grub pa'i rig stong don gyi rdo rje sems dpa'i rang zhal blta zhing mnyam par 'jog pa ni don dam rdzogs rim la brten pa'i sgrib pa sbyong tshul bla na med pa'o//__//bzhi pa maN+Dal ni/__mdun gyi nam mkhar tshogs zhing skyabs yul ltar gsal btab ste/__rin po che la sogs pa'i maN+Dal byi dor byas la dri bzang dang ba byung gi chus byugs par me tog gi tshom bu so bdun nam bdun bkod pa'am/__rgyun du ma 'grub na dmigs pas kyang rung ste/__gang ltar yang thun mong sprul sku'i maN+Dal gling bzhi ri rab lha gnas dang bcas pa'i stong gsum 'jig rten gyi zhing khams bye ba phrag brgyar snod bcud kyi 'byor pa phun sum tshogs pas yongs su gang ba dang /__bye brag tu rang gi lus longs spyod dge tshogs dang bcas pa ltos med du 'bul ba/__de'i steng mkhar thun min longs sku'i maN+Dal 'og min stug po bkod pa'i zhing khams sku dang ye shes kyi rnam rol mchod pa'i sprin phung 'byams klas su shar ba/__de'i steng gi dbyings la khyad par chos sku'i maN+Dal skye med gdod ma'i gzhi la 'gags med 'od gsal gyi snang cha rig pa tshad phebs kyi tshom bur bkod pa ste/__de dag kyang rdul phra rab re re'i khongs su rdul snyed kyi zhing khams cir yang 'char ba'i chos nyid bsam gyis mi khyab pa rnam pa thams cad pa'i tshul khong du chud pas phul la/__bdag gzhan sems can thams cad tshogs gnyis rdzogs shing /__sgrib gnyis byang ba dang /__nyams rtogs kyi yon tan phun sum tshogs pa rgyud la skyes nas/__mthar thug sku gsum gyi zhing khams rgya mtshor longs spyod par mdzad du gsol snyam pa'i mos gus kyi gdung ba dang bcas te lan ji ltar rigs pa 'bul lo/__/lnga pa ku sA li'i tshogs gsog ni/__tshogs zhing sngar gsal bzhin pa'i 'og tu gnod byed kyis gtsos pa'i rigs drug gi sems can thams cad skad cig gis gsal btab la/__phaTaH__lus gces 'dzin bor bas lha bdud chomaH__zhes sogs brjod pa dang chabs cig__/rang lus 'dzin sems kyis gces par bzung ba'i zhen pa spangs pas/__rang sems kyi ngo bo thig le dkar po sran ma tsam pa zhig spyi bo nas rgyangs kyis thon pas ye shes kyi mkha' 'gro khros ma nag mo dar dang rus pa'i phyag rgya lngas brgyan pa/__spyi bo phag zhal gyis mtshan pa'i phyag g.yas gri gug nam mkhar 'phyar bas phung po rnying pa'i thod pa smin mtshams nas bregs te stong gsum dang mnyam par gyur pa de nyid thod pa'i sgyed pu ri rab tsam gsum gyi khar bzhag pa'i nang du lus kyi cha shas rnams dum bur bcad de blugs/__'og nas a thung las ye shes kyi me 'bar/__steng du ha~M yig dkar po mgo thur bstan du gnas pa las bdud rtsi'i rgyun 'dzag ste zhu zhing khol/__oM brjod pas ma dag pa'i dngos po thams cad rlangs pa sngo dmar gyi rnam par phyir thon te sbyangs/__AHsa dag pa ye shes kyi bdud rtsi bsam gyis mi khyab par spel/__hU~M gis ngo bo ye shes kyi bdud rtsi la rnam pa 'dod dgu'i longs spyod cir yang 'char ba'i nam mkha' mdzod kyi 'khor lo'i sprin chen por bsgyur bar bsams la/__'bru gsum mang du brjod/__de nas rang gi thugs ka nas mchod pa'i lha mo dpag tu med pa spros te/__phud kyis tshogs zhing rnams la mchod pas thugs rgyud zag med kyi bde bas tshims te rang gzhan sems can thams cad tshogs gnyis rdzogs/__sgrib gnyis byang /__dngos grub rnam pa gnyis thob/__lhag ma rigs drug gi sems can rnams dang /__khyad par gnod byed kyi tshogs rnams la byin pas so sos gang 'dod pa'i yo byad dang /__sha khrag rus pa'i phung por gyur nas longs spyad/__lan chags dang bu lon byang /__gnod 'tshe dang gdug sems zhi/__lus zag med 'ja' tshon gyi sku dang /__sems rtog med chos kyi skur gnas gyur/__mthar mchod bya dang mchod yul sogs kyis mtshon gzung 'dzin gyi rtog tshogs thams cad rang bzhin gyis ma grub pa'i sems kyi gshis lugs 'od gsal rdzogs pa chen po'i dbyings su sbyangs nas 'khor gsum gyi mtshan ma dang bral ba'i ma bcos gnyug ma'i ngang du ngal gso'o/__/drug pa bla ma'i rnal 'byor la gsum las/__dang po skyabs yul gsal gdab pa ni/__e ma hoH__rang snang lhun grub sogs brjod pa dang chabs cig__/'di ltar nam mkhas gar khyab thams cad rang gi snang bas khyab pas/__snang bas khyab tshad kyi zhing khams thams cad la tha mal gyi 'dzin stangs dbyings su thim pa las rang byung lhun grub tu shar ba'i dag pa rab 'byams kyi zhing dbyibs dang /__rgyan dang /__bkod pa tshad med pas mngon par 'phags pa'i 'og min pad+ma 'od kyi pho brang chen por gsal ba'i dbus su/__rang nyid gzhi lus kyi dngos po ngo bo mtsho rgyal la/__rnam pa rdo rje rnal 'byor ma sku mdog dmar mo g.yas gri gug dang /__g.yon thod pa khrag gis gang ba bsnams shing /__gru mo g.yon na kha T+wAM ga 'chang ba/__pad nyi bam ro'i gdan la zhabs g.yas brkyangs shing /__g.yon cung zad bskums pa'i dor stabs kyis bzhugs pa/__dar dang rus pa'i rgyan gyis brgyan cing /__mos gus kyi spyan gsum bla ma'i thugs kar rings pa'i tshul gyis gzigs pa'i spyi bo'i thad mdun gyi nam mkha'i gnas su sna tshogs pad+ma 'dab ma 'bum dang ldan pa/__de'i ze'u 'bru dang tshad mnyam pa'i nyi zla'i dkyil 'khor gyi dbus su skyabs gnas kun 'dus kyi ngo bo rtsa ba'i bla ma la rnam pa o rgyan mtsho skyes rdo rje sku mdog dkar la dmar ba'i mdangs chags pa/__lo brgyad lon pa'i ngang tshul can/__spyan gnyis lta stangs hrig ger gzigs pa/__sku la nang du rdo rje'i gsang gos dkar po dang /__de'i steng du rim par 'dung ma dmar po dang /__sngags kyi phod chen mthing nag dang /__chos gos dmar po gser gyi me tog gi ri mos spras pa dang /__za 'og gi ber dmar smug rnams brtsegs mar gsol ba/__zhal gcig phyag gnyis pa/__phyag g.yas rdo rje rtse lnga pa thugs kar gtod pa'i tshul dang /__g.yon mnyam gzhag gi steng na ka pA la'i dbus su 'chi med ye shes kyi bdud rtsis gang ba'i tshe'i bum pa dang /__gru mo g.yon du yum man+dA ra ba sbas pa'i tshul gyis kha T+wAM rtse gsum gyi rnam par bsnams pa/__dbu la 'dab ma lnga dang ldan pa'i pad+ma'i mnyen zhu gsol zhing khro 'dzum mtshan dpe'i gzi byin mchog tu 'bar ba/__zhabs gnyis rgyal po rol pa'i 'dug stangs kyis bzhugs pa'i mtha' skor kun tu 'ja' tshon gyi gur phub cing /__'od lnga'i zer thag gi drwa ba mig mangs ris su 'brel ba'i nang khongs 'ja' 'od kyi thig le zlum por 'khyil ba'i klong du/__rtsa ba'i bla ma'i thugs ye shes chen po'i rnam rol las shar ba'i rgya gar gyi rig 'dzin brgyad/__rnal 'byor gyi dbang phyug brgyad cu rtsa bzhi/__bod kyi grub chen rje 'bangs nyer lnga sogs rgya bod kyi paN grub rig pa 'dzin pa'i sa la bzhugs pa rnams dang /__rgyud sde chen po drug dang 'brel ba'i yi dam zhi khro rab 'byams/__gnas gsum gyi dpa' bo mkha' 'gro chos skyong srung ma nor lha gter bdag gi tshogs dang bcas pa sprin gyi phung po gtibs pa ltar bzhugs shing /__de thams cad kyang gsal stong zung 'jug chu zla dang 'ja' tshon lta bu tha mal gyi shes pa rang 'gags su 'gro bar gsal btab nas/__hU~M/__o rgyan yul gyi sogs tshig bdun gsol 'debs mos gus kyi gdung shugs drag po dang bcas te bskul bas/__rnga yab dpal ri sprul pa'i zhing nas o rgyan pad+ma thod phreng rtsa gsum rgyal ba rgya mtsho'i tshogs dang bcas pa til gyi gong bu kha bye ba bzhin lho nub kyi mtshams nas yer gyis byon te dam tshig pa dang dbyer med ro gcig tu 'dres par blta'o/__/gnyis pa yan lag bdun pa 'bul ba ni/__rang lus brgya stong grangs med par sprul te de rnams dang lhan cig tu khams gsum gyi sems can thams cad kyang sgo gsum gus pa chen pos phyag 'tshal ba dang /__dngos su bshams pa dang /__yid kyis kun tu bzang po'i mchod sprin mkha' dbyings khyab par spros te mchod pa 'bul ba dang /__tshe 'khor ba thog ma med pa nas sgo gsum gyis bsags pa'i sdig ltung thams cad gnong 'gyod drag pos bshags pas lce thog tu nag phung gis 'dus par/__tshogs zhing rnams kyi sku gsung thugs las 'od zer byung ba phog pas dri ma bkrus pa bzhin dag par bsams la phyis mi byed par gnyen pos bsdams te bshags pa dang /__kun rdzob dang don dam pa'i bden pas bsdus pa'i 'khor 'das lam gsum gyi dge ba'i rtsa ba la dga' zhing phrag dog med par rjes su yi rang ba dang /__phyogs bcu'i rgyal ba sras dang bcas pa la nyan thos dang /__rang rgyal dang /__byang chub sems dpa'i theg pa gsum las brtsams te chos kyi 'khor lo bskor bar bskul ba dang /__'khor ba ma stongs bar du mya ngan las mi 'da' bar gsol ba 'debs pa dang /__de ltar bsags pa'i dge ba'i rtsa bas mtshon dus gsum du bsags pa'i dge ba'i rtsa ba thams cad sems can thams cad sangs rgyas thob pa'i rgyur yongs su bsngo ba ste/__yan lag bdun gyi dmigs pa rnams dran bzhin pas phyag dang bcas yan ji ltar rigs par bya'o/__/gsum pa gsol ba gdab cing dbang blang ba ni/__'di ltar thar pa dang thams cad mkhyen pa'i go 'phang thob pa ni/__rang sems lhan cig skyes pa'i ye shes rtogs pa la rag las shing /__rtogs pa skye ba bla ma'i byin rlabs dang /__byin rlabs 'jug pa mos gus kyi rten 'brel kho na la rag las pas na/__rang gi rtsa ba'i bla ma de nyid yon tan gyi ngos nas sangs rgyas dang mnyam zhing /__bka' drin gyi ngos nas sangs rgyas las kyang ches char lhag par thag bcad/__nges shes bskyed/__blo snying brang gsum ling gis gtad la/__'di nas byang chub ma thob kyi bar du skyid sdug legs nyes ci byung yang khyed kho na mkhyen no snyam pa'i re ltos ling bskyur gyi tshul gyis lus kyi ba spu g.yo ba/__mig nas mchi ma 'khrugs pa/__blo sna bla mas phrogs pa/__bsam rgyu bla ma las med pa/__lus sems tshugs mi thub pa'i mos gus gdung shugs drag pos/__rje btsun gu ru rin po cheH__sogs ci nus dang /__bdag la re sa gzhan na medaH__sogs tshar 'os mtshams kyi rjes su/__gsol 'debs rgyud skul gyi rnal 'byor badz+ra gu ru la chig sgril du bya/__de'i tshe'ang /__oM AHhU~M zhes rdo rje gsum gyi sa bon gyis thog drangs te/__badz+ra ni mtshan rtog gi spros pas miX phyedaX pa'i phyir chos kyi sku dang /__gu ru ni de'i ngang las kha sbyor yan lag bdun dang ldan pa'i yon tan gyi khur gyis lciX baXs na longs sku/__pad+ma ni de'ang so sor rtog pa'i ye shes kyi rig mdangs gsung paXd+maX'i rigs su shar bas na sprul sku ste/__de lta bu'i sku gsum dbyer med pa'i bla ma o rgyan chen po'i yon tan rjes su dran pas/__sems kyi gshis spros pa dang bral ba'i rang rtsal mos gus su dung nge ba'i ngang nas gsol ba gdab cing /__de ltar gsol ba btab pa'i mthu las/__siXd+d+hiX ste mchog thun mong gi dngos grub thams cad hU~M zhes bdag gi shes rgyud la dus da lta nyid du stsol cig snyam pa'i don dran par bya ba dang /__skabs su phyi snod kyi 'jig rten zangs mdog dpal ri'i pho brang /__nang bcud kyi sems can o rgyan dpa' bo mkha' 'gro'i tshom bu/__sgrar grags pa thams cad sngags kyi rang sgra/__gsang ba sems kyi 'phro 'du rang grol bya lam rjes med du shes pa'i ngang nas bzlas pa la 'bad/__mthar rtsa brgyud kyi bla ma rnams kyi yon tan dran bzhin du brgyud pa'i gsol 'debs smon lam dang bcas pa mos gus gdung shugs drag pos byas pas 'khor rnams rtsa ba'i bla ma la thim/__bla ma skyabs gnas kun 'dus kyi ngo bor bzhugs pa las dbang bzhi ngag 'don gyi dkyus nas gsal ba ltar blangs rjes bla ma'i sku gsung thugs dang rang gi sgo gsum dbyer med du bsres te rang sems rig stong rjen pa skad cig ma'i ngang mdangs bskyangs nas bzlas pa bya/__thun bsdu ba na/__nam zhig tshe yi dus byas tsheH__sogs brjod pa dang chabs cig rdzogs rim bsdu ba'i dmigs pa ni/__bla ma la gdung ba drag po'i rkyen gyis bdag nyid la thugs rje'i 'jug pas lhag par dgongs te/__zhal 'dzum pa dang spyan rjes chags su g.yo ba'i ngang thugs ka nas 'od zer dmar po drod tsha lam pa zhig thon/__rang rdo rje rnal 'byor mar gsal ba'i snying gar reg pa'i mod la lus sems bde phril gyis song /__mthar 'od dmar po bde ba chen po'i ngo bor zhu nas/__rlung sems gnyis med kyi rang bzhin 'od kyi gong bu sran ma tsam du gyur/__de nyid kyang mthar me stags yar ba bzhin gu ru rin po che'i thugs kar 'dres pa'i ngang la mnyam par gzhag__/de las ldang ba'i tshe dwangs pa'i chu la nya 'phar ba bzhin gzhi lus zhing khams kyi bkod pa dang bcas sngar bzhin gsal la/__dpal ldan rtsa ba'i bla ma rin po che/__/bdag gi spyi bor pad+ma'i gdan bzhugs la/__/sogs gsol 'debs bsngo smon spyi dang zangs mdog dpal ri'i smon lam dpal ri'i gseng lam kyang gdab/__thun mtshams rnams su/__thun mong khyer so gsum gyi rnal 'byor bzlas dmigs kyi skabs su bshad pa bzhin dang /__khyad par bza' btung gi phud bdud rtsi'i rang bzhin dang /__gos lha rdzas kyi na bzar bsams la spyi bo'i bla ma la 'bul/__tshogs drug gi snang bar bzang ngan legs nyes gang shar yang tha mal gyi rtog pa'i rjes su mi 'brang bar lha sngags ye shes kyi rig mdangs rgyun bskyang /__nub mo nyal ba'i tshe rang gzhan thams cad kyi don du gsol 'debs bsam pa lhun grub ma dang /__khyad par sku gsum zhing khams sbyong ba'i smon lam gyi mthar/__spyi bo'i bla ma tshangs pa'i bu ga nas mar yer gyis byon nas/__rang gi snying pad+ma 'dab bzhi'i rnam par gnas pa'i nang du byon/__de'i 'od zer gyis rang lus kyi nang thams cad gang ba'i gsal lam me ba la sems gtad de/__bla ma'i thugs dang rang sems dbyer med du bsres pa'i ngang nyams len gyi rgyun bskyangs te gnyid log pa'am/__yang na 'od zer des phyi snod kyi 'jig rten gzhal yas khang du gsal ba la phog pas lan tshwa chur bcug pa bzhin 'od du zhu/__nang bcud sems can lhar gsal ba la thim/__de rang la thim/__rang snying ga'i bla ma la thim/__de'ang mi dmigs pa 'od gsal du sbyangs pa'i snang ba nang gsal rig stong rjen pa thim la ma rmugs pa'i ngang du rnam rtog gzhan gyis bar mchod par khams gso/__gal te sad na 'phro rgod rgya 'byams rmi lam sogs bsam gzhig gi 'phro bcad de 'od gsal gyi ngang mdangs khyab brdal du bskyangs pas gnyid kyi 'od gsal dang rmi lam zin par 'gyur la/__slar yang tho rangs ldang ba'i rnal 'byor sogs ji skad bshad pa bzhin thun bzhi sogs su nyams su blang ngo /__/gzhan yang nam 'chi ba'i dus la bab pa'i tshe/__rdzogs rim bsdu ba'i dmigs pa dang bcas dbyings rig bsres te mnyam par bzhag pa ni 'pho ba thams cad kyi rgyal po yin cing /__gal te 'pho ba ma thebs na bar dor khyer so gsum gyi rnal 'byor dran pas grol bar 'gyur la/__mdor na mos gus dang dam tshig rnam par dag pas sngon 'gro'i lam 'di kho na mthar phyin pas kyang dngos gzhi la mi ltos par rnga yab dpal gyi ri bor dbugs dbyung /__dag pa'i zhing khams der rig 'dzin rnam pa bzhi'i lam nyi zla'i bgrod pa las kyang myur bas kun tu bzang po'i sa la phyin par 'gyur ba ni nges pa'o//__//de lta bu'i sngon 'gro'i tshul la nyams myong skyes pa na/__rim gyis dngos gzhir bum dbang gi lam rig 'dzin zhi drag gi bskyed rim/__gsang dbang gi lam rlung dang gtum mo/__sher dbang gi lam sbas don thabs lam/__dbang bzhi pa'i lam khregs chod thod brgal yan lag dang bcas pa rnams la nyams len snying por dril nas tshe gcig gis zung 'jug rdo rje 'dzin pa'i go 'phang mngon du brnyes pa'i thabs la 'bad par bya'o/_/zhes rdzogs pa chen po klong chen snying thig gi sngon 'gro'i ngag 'don rnam mkhyen lam bzang rgyun du nyams su blang ba'i skabs nye bar mkho ba'i dmigs rim nyung gsal snying por dril ba 'di'ang /__lam 'dir 'jug pa'i dang po'i las can rnams la phan pa'i bsam pa kho nas khrid yig le tshan dang bla ma rnams kyi zhal lung ji lta bar/__kun mkhyen bla ma dgyes pa'i 'bangs mkhyen brtse'i dbang pos sbyar ba'i dge bas 'gro kun 'chi med pad+ma thod phreng gi go 'phang myur du thob pa'i rgyur gyur cig/___//__!_
