JKW-KABUM-23-'A-001-046

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 23, sde tshan 1, Text 46, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 23: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

མགོན་རྒྱལ་བ་ཡོངས་ཀྱི་ཞེས་པའི་གླུ། ཨ་ཧོ། མགོན་རྒྱལ་བ་ཡོངས་ཀྱི་སྤྱི་མེས་སུ་གྱུར་ཀྱང་། །བློ་ཚུར་མཐོང་གདུལ་བྱར་མི་གཟུགས་སུ་བྱོན་པའི། །མགོན་ཁྱབ་བདག་འཁོར་ལོའི་མགོན་པོ་ལ་འདུད་དོ། །ཡང་དྲེད་པོའི་བློ་སྣ་ཆོས་ཕྱོགས་སུ་སྒྱུར་ཐོང་། །དུས་དེང་སང་སྟོན་པ་སངས་རྒྱས་ཀྱི་བསྟན་པ། །དཔེ་ནུབ་རིར་གཟིམ་པའི་ཉི་མ་ལྟར་མཐོང་ནས། །ཡིད་སྐྱོ་ཤས་ངེས་འབྱུང་ཟླ་བ་ཡི་ཕོ་ཉས། །ལས་བྱས་པ་དོན་ལྡན་འོད་དཀར་དེ་སྤྲོའོ། ཁོང་ཁ་སང་ལང་ཚོ་མཚར་སྡུག་རང་རྒྱས་པའི། །མི་རྣམ་རིག་བཀྲ་བ་དེ་རིང་གི་དུས་སུ། །ལུས་དུར་ཁྲོད་ཆེན་པོར་གཅེར་བུ་རུ་སོང་ཞིང་། །འཁོར་ཤ་ཟན་མང་པོས་བསྐོར་བ་དེ་མཐོང་ངོ་། ཁང་སྟེང་ན་གདུགས་དཀར་བླ་བྲེ་རུ་བྲེས་ཤིང་། །འོག་ཁྲི་དང་གཟི་བྱིན་རྒྱས་པ་ཡི་བླ་དཔོན། །དུས་དེ་རིང་སྦྱིན་སྲེག་ཐལ་བ་རུ་སོང་ཞིང་། །རླུང་ངར་མའི་ཞགས་པས་བཏབ་པ་དེ་ཐོས་སོ། །དེ་མཐོང་ཐོས་ཡིད་ཀྱི་སྐྱོ་གྲོགས་སུ་ཕེབས་པས། །ལས་ཅིས་ཀྱང་དགོས་མེད་ལྷ་ཆོས་དེ་དྲན་ཡང་། །དུས་དེང་སང་གློ་བུར་བདུད་རིགས་ཀྱི་ཕོ་ཉས། །དབང་མེད་པར་གློ་བུར་འཁྲིད་པ་ལ་འཇིགས་སོ། །ཨ་ཧོ། རང་རིག་གི་གཤིས་ལུགས་གཞོན་ནུ་དེ་བུམ་སྐུ། །ཡིད་དཔྱོད་དང་ཚིག་བྲལ་མངོན་སུམ་གྱི་གཞི་དབྱིངས། །རྟོག་ཚོགས་ཀྱི་འགྱུ་འཕྲོ་ཤར་གྲོལ་གཉིས་དུས་མཉམ། །འཁོར་འདས་ཀྱི་རྩ་བ་བདེན་གྲུབ་དང་བྲལ་ཏེ། །སྣང་སྟོང་གི་དབྱིངས་སུ་རིག་སྟོང་དེ་ཞུགས་པས། །གྲགས་སྟོང་གི་ངང་ནས་གླུ་དབྱངས་འདི་བླངས་སོ། །ཚོར་སྟོང་གི་མཁའ་རུ་ཉེར་ལེན་ཀུན་ཐིམ་པས། །གློ་བུར་གྱི་འཁྲུལ་ཆོས་ཀ་དག་ཏུ་ཞིག་སོང་། །འདི་དྲང་དོན་སྐྱོ་གླུའི་བདེན་གཏམ་ཡིན། །ངེས་དོན་སྒྲོ་བཏགས་རྫུན་ཚིག་ཡིན། །གང་ཤར་ཐོལ་བྱུང་བྲིས་པ་ཡིན། །ཡིན་ལུགས་གསུམ་པོ་རྟོགས་གྱུར་ཅིག ། ༈

[edit]

mgon rgyal ba yongs kyi zhes pa'i glu/__ a ho/__mgon rgyal ba yongs kyi spyi mes su gyur kyang /__/blo tshur mthong gdul byar mi gzugs su byon pa'i/__/mgon khyab bdag 'khor lo'i mgon po la 'dud do/__/yang dred po'i blo sna chos phyogs su sgyur thong /__/dus deng sang ston pa sangs rgyas kyi bstan pa/__/dpe nub rir gzim pa'i nyi ma ltar mthong nas/__/yid skyo shas nges 'byung zla ba yi pho nyas/__/las byas pa don ldan 'od dkar de spro'o/__khong kha sang lang tsho mtshar sdug rang rgyas pa'i/__/mi rnam rig bkra ba de ring gi dus su/__/lus dur khrod chen por gcer bu ru song zhing /__/'khor sha zan mang pos bskor ba de mthong ngo /__khang steng na gdugs dkar bla bre ru bres shing /__/'og khri dang gzi byin rgyas pa yi bla dpon/__/dus de ring sbyin sreg thal ba ru song zhing /__/rlung ngar ma'i zhags pas btab pa de thos so/__/de mthong thos yid kyi skyo grogs su phebs pas/__/las cis kyang dgos med lha chos de dran yang /__/dus deng sang glo bur bdud rigs kyi pho nyas/__/dbang med par glo bur 'khrid pa la 'jigs so/__/a ho/__rang rig gi gshis lugs gzhon nu de bum sku/__/yid dpyod dang tshig bral mngon sum gyi gzhi dbyings/__/rtog tshogs kyi 'gyu 'phro shar grol gnyis dus mnyam/__/'khor 'das kyi rtsa ba bden grub dang bral te/__/snang stong gi dbyings su rig stong de zhugs pas/__/grags stong gi ngang nas glu dbyangs 'di blangs so/__/tshor stong gi mkha' ru nyer len kun thim pas/_/glo bur gyi 'khrul chos ka dag tu zhig song /__/'di drang don skyo glu'i bden gtam yin/__/nges don sgro btags rdzun tshig yin/__/gang shar thol byung bris pa yin/_/yin lugs gsum po rtogs gyur cig__/_!