JKW-KABUM-12-NA-001-010-wylie
dpal sam+bu Ta'i rgyud las gsungs pa'i sher phyin dkar mo'i 'khor lo'i man ngag shes rab snang ba/__
@#/_/dpal sam+bu Ta'i rgyud las gsungs pa'i sher phyin dkar mo'i 'khor lo'i man ngag shes rab snang ba zhes bya ba bzhugs so/__/oM swa sti/__'phags bzhi'i skyed dang rol pa'i yum/__/bla ma shes rab lha mo la/__/btud nas rig pa'i 'khor lo ni/__/blo gros snang ba rgyas phyir dbye/__/'di la gsum/__rtsa ba'i khungs dgod pa/__man ngag lag tu blang tshul/__de'i phan yon bstan pa'o/__/dang po ni/__dpal kyai rdo rje'i cha mthun gyi rgyu sum+bu Ta'i brtag pa gnyis pa'i rab byed bzhi pa las/__'khor lo 'dab ma brgyad pa 'di/__/kha dog dkar po shin tu mdzes/__/mnyam nyid gzugs su bsams nas ni/__/khams gsum gyi ni rang bzhin gyis/__/sngar gsungs mtshan nyid yang dag ldan/__/gong du gsungs pas bsgrub par bya/__/shes rab 'bar ba'i las rnams ni/__/'di yi 'khor lo bsgom par bya/__/oM pradz+nye ma hA pradz+nye hU~M swA hA/__dngos po'i ngo bos bsgom par bya/__/'od zer 'bar ba du ma yi/__/zla ba'i dkyil 'khor dbus gnas par/__/shes rab bdag nyid rnam par sprul/__/phyag gnyis sems dpa'i skyil mo krung /__/rgyan rnams kun gyis rnam par brgyan/__/kha dog dkar po 'od gsal ma/__/shes rab bdag nyid gzung bar bya/__/'di yi sa bon bzlas nas ni/__/shes rab 'dab ma rab tu 'phel/__/dpe gcig tu lta bur zhes pa'ang yod/__/gud pa'am blo ni dman pa yi/__/shes rab 'phel ba'i rnal 'byor ro/__/zhes pa ste/__'khor lo dang /__sngags dang /__ting nge 'dzin dang /__de'i phan yon bstan pa rnams rim par 'khor lo sogs dang /__oM pradz+nye sogs dang /__dngos po'i sogs dang /__'di'i sa bon sogs kyis bstan pa'i tshul slob dpon rin po che dpal ldan rtse mo'i zhabs kyis kyang /__shes rab 'phel ba'i pha rol tu phyin ma'i sgrub thabs la bzhi las/__dang po 'khor lo'i bya ba ni 'khor lo zhes sh+lo ka gnyis te/__sgrol ma'i skabs su bstan pa bzhin no/__/oM zhes bya ba la sogs pa ni sngags bstan pa'o/__/dngos po'i ngo bos bsgom par bya/__zhes bya ba la sogs pas ni bdag gi rnal 'byor ston te/__sngar brjod pa'i tshul gyis tshogs gnyis dang /__srung ba'i 'khor lo byas la pad+ma dang zla ba'i dkyil 'khor gyi dbus su pra~M las sam de las pad+ma la ste/__snying po'am cho ga gsum las bskyed par bya'o/__/'di la'ang smos pa'i bye brag gis yan lag rdzogs par bya ste/__dbu rgyan la ni snang ba mtha' yas so/__/de nas thugs kar sngags kyi phreng ba bkod de bzla bar bya zhes bya ba'i don no/__/'di'ang 'bum phrag bcu las brgyad 'gyur ni grangs kyi bsnyen pa'o/__/de ltar bsgoms na 'dis las ci 'grub pa de bstan pa'i phyir shes rab 'dab ma zhes bya ba la sogs pa ste/__'dis shes rab 'phel ba kho na 'grub bo/__/zhes gsungs so/__/gnyis pa la bdun/__rnal 'byor gang gis 'bri ba/__thabs ji lta bus bri ba/__gzhi gang la bri ba/__snag tsha dang smyu gu gang gis 'bri ba/__rnam pa ji lta bur bri ba/__bris nas ji ltar bsgrub pa/__bsgrubs zin nas ji ltar bya ba'o/_/dang po ni/__rnal 'byor pa dbang dang rjes su gnang ba thob cing dam tshig dang ldan pa/__bsnyen sogs dag par byas pas/__'di nyid las gsungs pa'i mngon rtogs sgrub thabs brgya rtsa nas 'byung ba ltar ram/__gur gyi rgyud dang cha mthun par gsungs pas de nyid las gsungs pa'i sher phyin dkar mo'i bsgom bzlas ji skad bshad pa bzhin bsgrubs pas bdag nyid nus ldan du bya'o/__/gnyis pa ni/__'di nyid shes rab 'phel bar byed pa rgyas pa'i las yin pas/__rgyal phur 'grub sbyor sogs rnam par dge ba'i nyin nyi shar gyi dus su rgyas pa'i bsam pas rgyan gos ser po dang bcas te kha byang du phyogs la bri'o/__/gsum pa ni/__/gzhung du dmigs bsal ma gsungs pas gro ga'am ras sam shog bu dkar po dri ma dang bug brdol sogs kyi skyon med pa che chung ji ltar 'tshams pa la bri'o/__/bzhi pa ni/__gzhung du dmigs kyis ma gsal yang /__rgyas pa'i las la bsngags pa'i dri bzang po'i chu dang bcas pa'i mtshal gyis snag tsha dang /__'bras bu dang bcas pa'i shing gi smyu gus bri bar bya'o/__/lnga pa ni/__'khor lo lte ba dang bcas pa'i mu khyud rim pa gnyis kyi dbus su pra~M/__de'i mdun nas brtsams te g.yas skor gyis/__oM 'chang ba po ming 'di zhes bya ba'i shes rab rgyas par mdzod cig hA zhes pa'am/__oM d+hA ra ka s+ya pradz+nyA puSh+tiM ku ru hA/__mu khyud dang po la 'dab ma brgyad du byas pa'i pra~M gyi mdun shar nas brtsams te g.yas skor du/__pra/__dz+nye/__ma/__hA/__pra/__dz+nye/__hU~M/__swA/__zhes pa'i yig 'bru re dgod/__/gnyis pa la/__A li bcu drug g.yon skor du dgod/__de'i phyi rol du nor 'dzin pa tra 'od zer 'phro bas bskor na'ang rung ngo /__/sngag gi 'bri tshul gong ltar byed pa phyag len gyi zin bris las 'byung zhing /__bu ston rin po ches yi ge g.yon skor du 'bri bar gdan bzhi rtsa 'grel du bshad do zhes gsungs pa ltar na spel tshig dang 'dab ma'i sngags kyang dbu phyir bstan g.yon skor du dgod par bya'o/__/mu khyud gnyis par bu ston rin po ches dbyangs yig kho na dgod par gsungs pa ltar bris kyi/__gzhan du dbyangs gsal gnyis ka dgod par gsungs pa ltar na mu khyud gnyis byas pa'i nang ma la dbyangs g.yon skor dang /__phyi mar gsal byed g.yas skor du bya'o/__/drug pa ni/__de ltar legs par bris nas dri bzang pos byugs pa'i 'khor lo stegs bu'i dbus su me tog sil ma bkram pa'i khar zhal rang la bstan te bzhag pa'i mdun du gtor ma dang /__mchod pa bsham/__bdag gi rnal 'byor sngon du 'gro bas 'khor los sbyong khrus rgyas bsdus gang rigs bya/__bsang sbyangs/__stong pa'i ngang las pa~M las pad+ma dang a las zla ba'i gdan la sngags kyi yig 'bru rnams pra~M las pad+ma dkar po pra~M gyis mtshan pa/__de las 'od zer 'phros 'dus yongs su gyur pa las 'phags ma shes rab kyi pha rol tu phyin ma sku mdog dkar mo zhal gcig ma/__phyag gnyis thugs kar chos 'chad kyi phyag rgya mdzad pa'i mtheb mdzub bar du me tog pad+ma'i sdong bu 'dzin pa/__'dab ma snyan g.yas g.yon gyi thad kar kha bye ba'i ze'u 'brur shes rab kyi pha rol tu phyin pa'i pu stis mtshan pa/__zhi zhing 'dzum la rgyas pa'i nyams can/__dar dang rin po ches brgyan pa/__zhabs gnyis sems ma'i skyil mo krung gis bzhugs pa/__de'i dpral bar oM dkar po/__mgrin par AHdmar po/__thugs kar hU~M sngon po/__de las 'od zer 'phros pas phyogs bcu'i de bzhin gshegs pa thams cad shes rab kyi pha rol tu phyin ma'i rnam par oM badz+ra sa mA dzaH__dzaHhU~M ba~M hoH__gnyis su med par thim/__slar yang rang gi thugs ka nas 'od zer 'phros pas dbang gi lha rigs lnga 'khor dang bcas pa oM badz+ra sa mA dzaH__de bzhin gshegs pa thams cad kyis 'di la mngon par dbang bskur ba stsal du gsol/__zhes gsol ba btab pas oM badz+rI b+ha wa ab+hi Shiny+tsa hU~M/__zhes gsung zhing bum pa'i chus spyi bo nas dbang bskur/__sku gang dri ma dag__/chu'i lhag ma yar lud pa las snang ba mtha' yas kyis dbur brgyan par bsam/__sgrub thabs brgya rtsa dang /__bu ston rin po ches 'grel chen las rigs bdag mi bskyod par gsungs na'ang 'dir dpal ldan rtse mo'i zhabs kyi bzhed pa ltar bkod pa'o/__/de nas mchod bstod mdor bsdus dang /__spyan ma'i phyag rgya'am rdo rje rtse lnga pa'i phyag rgyas mig thur ram ma 'byor na rdo rje bzung la/__kun mkhyen ye shes spyan ldan skyon bral yang /__/gus pas 'phags pa'i spyan ni dbye bgyis pas/__/nam mkha'i mthas gtugs gyur pa'i sems can rnams/__/sangs rgyas ye shes spyan ni thob par shog__/oM tsak+Shu tsak+Shu sa man+ta tsak+Shu bi sho d+ha ni swA hA/__ye shes kyi spyan rnam par dag pa dang ldan zhing /__sems can gyi don la gzigs pa 'jug pa'i mthu phun sum tshogs pa dang ldan par gyur cig__/ces lan gsum brjod pas spyan dbye/__mchod pa bsang sbyangs byin rlabs spyi ltar dang /__mtshan sngags sngon du 'gro ba'i chu gnyis nyer spyod rol mo dang bcas pas mchod/__bstod pa rgyas bsdus gang rung gis bstod/__bcom ldan 'das mas bdag dang 'chang ba po la blo gros kyi mthu phun sum tshogs pa stsal du gsol/__zhes 'dod don gsol/__ming spel nyid bsgrub bya'i rnam pa ji lta ba gos rgyan gzabs 'phyor phun sum tshogs pa dang bcas te zla ba'i gdan la bcom ldan 'das ma la gus pa'i tshul gyis gdong phyogs te 'khod par bsams la lcags kyu'i phyag rgya dang bcas te/__oM badz+ra satwa hU~M dzaHzhes yang yang brjod pas bsgrub bya nyid bkug ste bstims pas dngos su gyur par bsams la/__oM pradz+nye ma hA pradz+nye hU~M d+hA ra kas+ya pradz+nya puSh+tiM ku ru swA hA/__zhes dang dbyangs gsal rten snying bcas ci nus bzla/__gtor ma bsang sbyangs byin rlabs spyi ltar dang /__mtshan sngags la a kA ro btags pa lan gsum gyis phul/__mchod bstod 'dod don gsol bas/__mdun bskyed kyis kyang de de bzhin du bgyi'o zhes dgyes pa chen pos zhal gyis bzhes te 'od du zhu ba las byung ba'i bris pa'i 'khor lo'i rnam pa ji lta ba dang /__bsgrub bya'ang ming spel gyi rnam par gyur ces brjod cing bsam/__rten 'brel snying po bzlas pa'i me tog thogs te/__phyogs bcu na bzhugs pa'i sogs spyi ltar la bye brag tu rig pa'i 'khor lo 'di nyid la bskyed cing spyan drangs pa'i bcom ldan 'das ma ji srid 'byung ba bzhi'i gnod pas ma zhig gi bar du brtan par bzhugs su gsol/__brtan par bzhugs nas kyang bdag dang 'chang ba pos thog drangs mtha' yas pa'i sems can thams cad la blo gros kyi mthu phun sum tshogs pa stsal du gsol/__oM su pra tiSh+Tha badz+rA ya swA hA/__zhes mang du brjod cing me tog 'thor/__bkra shis ji ltar rigs pa brjod do/__/bdun pa ni/__rab gnas grub nas bdag bskyed kyi mjug gi bya ba bya zhing /__'khor lo lte ba ma nyams par bltab/__tshon skud kyis dkri ba'am/__gang ltar yang na bza' ser po dang bcas te mchod pa'i gral du bzhag la lha dngos su mos pas mchod bstod 'dod don gsol/__yang na spyi bo'am mgul du btags la gsol ba gdab par bya'o/__/gsum pa ni/__rgyud las bsgom bzlas kyi phan yon ji ltar gsungs pa bzhin/__rmongs pa'i mun pa zhi ba dang /__shes rab 'grib pa'i gegs sel ba dang /__yang dag pa'i shes rab pad+ma'i 'dab ma ltar rab tu rgyas pas/__gu ba ste lkugs pa'am blo gros shin tu dman pa yin kyang /__rig pa'i sngags kyi byin rlabs la brten nas dri ma med pa'i shes rab phun sum tshogs pa rgyas par 'gyur pa ni nges pa'o/__/zhar byung tshul 'di'i bsgom bzlas dang bsnyen pa bgyid par 'dod na/__sgrub thabs brgya rtsa las byung ba'i rjes su gnang ba legs par nod de/__skyabs sems tshad med bzhi bsgom pa sngon du 'gro bas/__oM swA b+hA wa sogs/__stong pa'i ngang las pa~M las pad+ma dang a las zla ba'i dkyil 'khor gyi steng du/__rang gi sems nyid pra~M dkar po/__de las 'od zer 'phros/__'phags pa mchod/__sems can gyi don byas/__slar 'dus yongs su gyur pa las bdag nyid 'phags ma sogs nas/__chu'i lhag ma yar lud pa las zhes pa'i bar gong ltar las/__'di la zhes par bdag la zhes bsgyur/__mi bskyod pas dbur brgyan zhes brjod/__thugs kar zla ba'i dkyil 'khor gyi steng du pra~M yig dkar po'i mthar sngags kyis bskor ba las 'od zer dkar po 'phros pas 'phags pa mchod/__sems can gyi don byas/__sangs rgyas byang sems rnams kyi thugs rje byin rlabs nus mthu thams cad dang /__khyad par mkhyen pa'i ye shes thams cad 'od zer gyi rnam par spyan drangs te rang la gnyis su med par thim pas ma rig pa'i mun pa bsal/__shes bya thams cad la thogs pa med pa'i blo gros kyi mthu phun sum tshogs pa rgyas par gyur pa'i mos pas/__oM pra~M swA hA/__/zhes dang /__oM pradz+nye ma hA pradz+nye hU~M swA hA/__zhes dang /__oM pradz+nye pradz+nye ma hA pradz+nye hU~M swA hA/__zhes pa ci nus bzla/__thun bsdu ba na 'dod don la gsol ba gdab/__rang gi snying ga nas 'od zer 'phros pas gdan 'od zer gyi rnam par gyur te rang la thim/__rang gi dpral bar oM dkar po/__mgrin par AHdmar po/__thugs kar hU~M sngon po/__dge ba 'di yis myur du bdag__/shes rab phar phyin 'grub gyur nas sogs bsngo smon gyis mtshams sbyar te spyod lam la 'jug__/gtor ma 'bul na/__gtor mgron mdun gyi nam mkhar yan lag bzhi rdzogs kyis bskyed pa'am/__spyan drangs la gong ltar dbul/__bsnyen pa byed na sngags gzhan gnyis ci rigs pa dang /__gtso bor yi ge bcu pa 'bum phrag bcu'am/__brgyad cu bzlas pas las thams cad 'grub pa yin no/__/shes rab pha rol phyin ma yi/__/rig pa'i 'khor lo'i snang ba ches/__/'gro kun rmongs pa'i mun sel zhing /__/blo mchog pad+mo rgyas gyur cig__/ces pa'ang rgyud kyi rgyal po chen po 'jam mgon sa paN gyi gsung mtshan bcas dang /__slob dpon rin po che bsod nams rtse mos mdzad pa'i rnam bshad gnad kyi gsal byed/__kun mkhyen bu ston rin po che'i rgya cher bshad pa snying po'i de kho na nyid gsal ba rnams dang /__lo tsA ba ma Ni ga shri'i zin bris sogs la brten nas 'jam dbyangs bla ma dgyes pa'i 'bangs mkhyen brtse'i dbang pos bris pa sarba sat+tA nAM pradz+nyA la k+Sh+mIM s+phu TaM b+hU yA tra//___//__!_
