JKW-KABUM-11-DA-014-002-wylie
rig byed ma'i sgrub thabs dang rjes gnang gi skabs su nye bar mkho ba'i zin bris/
@#/_/rig byed ma'i sgrub thabs dang rjes gnang gi skabs su nye bar mkho ba'i zin bris bzhugs so/__/oM swa sti/__ngor chen thams cad mkhyed pa dkon mchog lhun grub kyis mdzad pa'i rig byed ma'i sgrub thabs kyi skabs skyabs sems ni/__skyabs yul mdun gyi nam mkhar seng ge'i khri dang pad nyi la bla ma 'od dpag med longs spyod rdzogs sku dmar po mnyam gzhag can gyi sku dge 'dun/__/gsung dam chos/__thugs bla ma dang sangs rgyas kun 'dus pa la/__bdag dang sems can thams cad 'jigs dad snying rje gsum gyi sgo nas byang chub bar du skyabs su 'gro bar bsam pas/__ngag tu/__bdag dang 'gro ba khams gsum nam mkha'i mtha' dang mnyam pa'i sems can thams cad dus 'di nas bzung ste ji srid byang chub snying po la mchis kyi bar du/__phyogs bcu dus gsum gyi de bzhin gshegs pa thams cad kyi sku gsung thugs yon tan phrin las thams cad kyi ngo bo/__chos kyi phung po stong phrag brgyad cu rtsa bzhi'i 'byung gnas/__'phags pa'i dge 'dun thams cad kyi mnga' bdag__/drin chen rtsa ba dang brgyud par bcas pa'i dpal ldan bla ma dam pa rnams la skyabs su mchi'o/__/rdzogs pa'i sangs rgyas bcom ldan 'das rnams la skyabs su mchi'o/__/dam pa'i chos rnams la skyabs su mchi'o/__/'phags pa'i dge 'dun rnams la skyabs su mchi'o/__/zhes ci nus kyi mthar thal mo sbyar te/__bla ma dang dkon mchog rin po che rnam pa gsum la bdag phyag 'tshal zhing skyabs su mchi'o/__/khyed rnams kyis bdag gi rgyud byin gyis brlab tu gsol/__/zhes lan gcig__/sems can thams cad kyi don du rdzogs pa'i sangs rgyas kyi go 'phang thob par bya/__de'i ched du rje btsun rig byed lha mo'i sgom bzlas nyams su blang bar bgyi'o/__/lan gsum/__rang nyid skad cig sogs dkyus bzhin la/__lha mo brgyad kyis mchod pa ni/__/dkar mo ri dwags mtshan ma 'dzin/__/chom rkun bdud las rgyal ba'i snod/__/ro langs ma ni chu lag ma/___/g+ha sma rI ni sman 'dzin cing /__/puk+ka sI ni rdo rje'i las/__/de bzhin ri khrod ma ro 'dzin/__/gdol pa mo ni cang te'u brdung /__/'di rnams kyis ni gtso bor mchod/__/'dod chags chen pos rjes chags pa'i/__/g.yung mos sku la 'khyud pa nyid/__/bdud rtsi byin rlabs ni/__oM badz+ra a mr-i ta kuN+Da lI ha na ha na hU~M hU~M hU~M phaT swA hAs bsang /__swa b+hA bas sbyang /__stong pa'i ngang las ya~M las rlung gi dkyil 'khor sngon po gzhu bdungs pa lta bu ba dan gyis mtshan pa/__de'i steng du ra~M las me'i dkyil 'khor gru gsum dmar po 'bar bas mtshan pa/__de'i steng du a las thod pa dkar po dum bu gsum pa dpral ba rang la bstan pa/__de'i steng du a las zla ba'i dkyil 'khor/__de'i steng du shar du go las ba glang gi sha__/lhor ku las khyi'i sha__/nub tu da las rta'i sha__/byang du ha las glang po che'i sha__/dbus su na las mi'i sha__/sha de rnams re re'i steng du yang /__shar du b+h+rA~M las dri chen/__lhor A~M las rak+ta/__nub tu dz+rI las byang sems/__byang du kha~M las sha chen gyi dwangs ma/__dbus su hU~M las dri chu/__de rnams kyi steng du shar du b+h+rU~M me long lta bu'i ye shes/__lhor A~M mnyam pa nyid kyi ye shes/__nub tu dz+rI~M so sor rtog pa'i ye shes/__byang du kha~M bya ba grub pa'i ye shes/__dbus su hU~M chos kyi dbyings kyi ye shes/__zla ba'i mthar g.yon skor gyis/__a A/__i I/__sogs nas/__a~M aH__g.yas skor gyis ka kha ga g+ha nga sogs nas/__ha k+ShaH__de rnams kyi steng gi nam mkha' la oM dkar po mgo bo thur du bltas pa/__de'i steng du raM las nyi ma'i dkyil 'khor/__de'i steng du hU~M las rdo rje dkar po rtse lnga pa lte ba la hU~M gis mtshan pa/__rdo rje'i lte ba'i hU~M las 'od zer 'og tu 'phros pas rlung gi ba dan la phog pas rlung g.yos me sbar bas/__sha lnga bdud rtsi lnga rnams bskol zhing 'od du zhu ba'i rlangs pa gyen la song bas oM dang rdo rje'i lte ba'i hU~M las phog pas bdud rtsi'i rgyun 'dzag__/yang hU~M las 'od zer phyogs bcur 'phros pas de bzhin gshegs pa thams cad kyi thugs ka nas yang dag pa'i ye shes kyi bdud rtsi rnams he ru ka phyag gnyis pa'i rnam par byon te rdo rje'i lte ba'i hU~M la thim pas rdo rje ljid dang ldan par gyur/__rdo rje nyi ma oM dang bcas pa thod pa'i nang du lhung ba 'od du zhu nas sngar gyi bdud rtsi rnams dang gnyis su med par gyur te kha dog dang dri dang ro dang nus pa phun sum tshogs pa bdud rtsi'i rgya mtsho chen por gyur/__zhes dang /__lag pa g.yon g.yas gnyis ka bstan pa dang /__gdan bzhi las/__lag pa gnyis ni bkan byas la/__/srin lag gnyis ni phan tshun dkri/__/gung mo dang ni mtheb rtse sbyar/__/khro bo gnyis ni mnan par bya/__zhes pa ltar/__bya khyung gi phyag rgya bcas la/__oM AHhU~M ha ho hrIH__zhes lan gsum brjod pas byin gyis brlabs pa g.yon pa'i srin lag gis blangs te/__oM AHhU~M brjod cing myang bas bde ba chen pos mnyes par bsam mo/__/bzlas pa dkyus ltar bya/__man ngag thob na rang byin rlabs kyi dmigs pa bsgom pa ni/__lus gnad bsam gtan gyi chos bdun dang ldan par bya/__ngag gnad rlung ro dgu phrugs sam lan gsum bsal la rang sor bzhag__/sems kyi gnad/__rang nyid rje btsun mar gsal bzhin pa'i lus kyi nang phru ma phus btab pa ltar dmar seng nge ba'i dbus su lte ba nas spyi bo'i bar la rtsa dbu ma kha dog dmar ser/__de'i g.yas su ro ma dmar mo me'i rang bzhin kha dog dmar smug__/g.yon du rkyang ma dkar mo chu'i rang bzhin kha dog dkar po ste gsum ga gro sog 'bring po tsam/__dbu ma la brten pa'i lte ba sprul pa'i 'khor lo rtsa 'dab drug cu rtsa bzhi pa'i lte ba dbu ma'i mas snar a~M dmar po dbu can gyi shad lta bu'i klad kor dbu ma'i nang du tshud pa me'i rang bzhin kha dog dmar ser mgo gyen du bstan pa/__nang skor 'dab ma brgyad la mdun nas brtsams te/__a ka tsa Ta ta pa ya sha__/phyi skor drug cu rtsa bzhi la mdun nas g.yon skor du/__a A/__i I/__u U/__r-i r-I/__l-i l-I/__e ai/__o au/__a~M AH__a A/__i I sogs nas/__aM aHrnams mgo gyen tu bstan pa/__mdun nas brtsams te g.yas skor du/__ka kha ga g+ha nga /__sogs nas/__ya ra la wa sha Shas rnams mgo gyen du bstan pa/__phyi nang gi yig 'bru rnams kha dog dmar ser/__snying ga chos kyi 'khor lo rtsa 'dab brgyad pa'i dbus su hU~M/__phyogs bzhir b+h+rU~M A~M dz+rIM kha~M/__mtshams bzhir lA~M mA~M pA~M tA~M rnams kha dog sngon po mgo thur du bsten pa/__mgrin pa longs spyod kyi 'khor lo rtsa 'dab bcu drug pa'i dbus su a~M/__rtsa 'dab bcu drug la mdun nas g.yon skor du a A/__i I sogs nas/__a~M aHrnams kha dog dmar po mgo gyen du bstan pa/__/spyi bo bde chen gyi 'khor lo rtsa 'dab sum cu rtsa gnyis kyi dbus su dbu ma'i yar snar ha~M dkar po mgo thur bstan/__klad kor dbu ma'i nang du tshud par 'dab ma sum cu so gnyis la mdun nas g.yon skor du/__a A/__i I sogs nas/__a~M AHg.yas skor du ka kha ga g+ha nga /__tsa tsha dza dz+ha nya/__Ta Tha Da D+ha Na/__ta rnams kha dog dkar po mgo thur du bstan pa/__snying ga'i hU~M gi steng du dbu ma'i nang du hrIHdmar po mgo gyen du bstan pa/__bshang sgor rlung /__sum mdor me/__'og sgo 'byed 'dzum gyi sbyor ba lan gsum byas/__mtha' ma bsdoms pas bshang sgo'i rlung g.yos/__sum mdo'i me sbar te/__lte ba'i aM la bsnun pas a~M las me shin tu cha phra ba g.yas ro ma nas song /__lte ba'i rtsa 'khor gyi yig 'bru rnams kyi khams snyigs ma bsregs/__yang ro ma nas song snying ga'i yig 'bru rnams kyi khams snyigs ma bsregs/__hrIHlas 'od dmar po 'phros pas g.yas kyi me dang lhan cig tu ro ma nas song /__mgrin pa'i rtsa 'dab kyi khams snyigs ma bsregs/__me ro ma'i yas sna nas thon/__thod pa'i nang du mdun nas g.yon skor gyis rna ba g.yas pa'i bu ga nas thon/__phyag g.yas pa'i mda' ltong sbyar ba'i mda'i ltong nas zhugs/__rim par song ste mde'u ut+pal dmar po kha bye nas 'od zer phyir song nas phyogs bcu'i sangs rgyas byang sems dang sems can thams cad ku ru kul+ler gsal ba'i rna ba g.yas pa nas zhugs/__spyi bo mgrin pa snying ga lte ba rnams kyi 'khor lo'i khams kyi dwangs ma rnams bsdus nas rna ba g.yas pa'i bu ga nas thon/__rang gi ut+pa la'i mde'u'i nang du zhugs/__rna ba g.yas nas song /__ltag pa nas g.yas su bskor te spyi bo'i ha~M zhu ba'i byang chub kyi sems dang 'grogs nas g.yon rkyang ma nas thur du babs pas mgrin pa dang snying ga'i 'khor lo rgyas par byas/__lte ba'i a~M la thigs pa gcig phog pas me cher 'bar/__dbu ma'i mas sna kha bye nas dbu ma nas yar song snying ga'i hU~M dang hrIHmgrin pa'i a~M rnams kyi snyigs ma bsregs/__dbu ma'i yar sna kha bye ste/__spyi bo'i ha~M la phog pas/__ha~M las byang sems dkar po babs mgrin pa dang snying ga'i yi ge gsum gsal btab/__lte ba'i gong sor bzhi tsam du 'bar 'dzag la sems gtad pas 'khor 'das thams cad dbang du 'dus zhes brjod cing gsal btab la rlung bum pa can ci thub bzung /__mi thub na rlung dal bus btang zhing ngal gso/__/rlung bzung ba'i tshe 'bar 'dzag la yid drag tu gtad/__mthar byang chub sems kyi bdud rtsis sogs man chad dkyus ltar nyams su blangs te/__de ltar na rje btsun ma'i sku bsgom zhing sngags bzla ba bum dbang gi lam/__rtsa gsum 'khor lo bzhi gsal btab nas 'bar 'dzag la sems 'dzin pa gsang dbang gi lam/__bde ba'i nyams myong la sems gtad pa ni shes rab ye shes kyi lam/__gang la thog ma sogs kyi tshig don la mnyam par 'jog pa ni dbang bzhi pa'i lam mo/__/thun las ldangs pa'i tshe/__gdan bsdus la bsngo smon byas te spyod lam la 'jug go__/'di'i bsnyen pa byed na/__gnas shin tu dben zhing yid dang rjes su mthun par/__dpyid zla ra ba'i tshes brgyad sogs dus khyad par can gyi tshe/__dpal kye rdo rjes mtshon rnal 'byor bla med kyi dbang bzhi yongs su rdzogs pa dang /__'di nyid kyi rjes gnang man ngag dang bcas pa thob cing dam tshig dang sdom par ldan pa'i sgrub pa po gos rgyan dmar pos brgyan te kha nub tu phyogs pa'i mdun mtshan nyid dang ldan pa'i bris sku dgram pa'i spyan sngar mchod gtor sogs zlum gtor dmar po pad 'dab bzhis brgyan pa/__dgos pa'i yo byad rnams 'du byas la/__mtshams dam par bcad/__dgongs mo'i dus nas mgo brtsams te sgrub thabs nas ji skad bshad pa'i rim pa gnyis kyi rnal 'byor thun bzhir bsgoms la dus kyi bsnyen pa zla ba drug bar ma chad pa dang /__grangs kyi bsnyen pa rab bye ba ste 'bum phrag brgya tham pa/__'bring 'bru 'bum brgyad 'gyur te 'bum phrag drug cu rtsa bzhi/___tha ma 'bum phrag bcu'am brgyad/___mtshan ma'i bsnyen pa dngos nyams rmi lam du bcom ldan 'das ma'i sku mthong ba/__gsung thos pa/__bde chen gyi ye shes skye bas mtshon sku gsung thugs 'grub pa'i mtshan ma brtan po rnyed pa'i bar du bzlas par bya'o/__/de'ang sgrub pa dang las sbyor la nges par 'jug na mtshan ma'i bsnyen pa kho na gtso che bar gsungs shing /__spyir btang grangs kyi bsnyen pa tsam phyag len tu mdzad/__thun bzhi ka'am/__phyi thun gyi gong du gnas dang mchod pa'i yo byad byin gyis brlab/__mjug tu gtor ma 'bul/__gzhan mtshams kyi spang blang sogs spyi ltar shes par bya/__sbyin sreg byed na thams cad mkhyen pa dkon mchog lhun grub kyi gsung rab ltar ram/__spyi ltar bgyis pas kyang rung /__de lta bu'i bsnyen pa sngon du song bas/__rang nyid nus ldan du bya ba'i 'khor lo 'chang zhing /__maN+Dal la brten pa'i sgrub pa dang /__bsam gtan dang /__ling+ga dang /__rjes la brten pa'i las sbyor rnams ni rje btsun rin po che'i gsung yig chung gsal byed dang bcas pa sogs las rtogs par bya zhing /__spyir ni bsnyen pa tshad ldan tsam song bas kyang gegs zhi ba dang /__'dod dgu'i dpal gyis 'byor ba dang /__'gro ba spyi dang bye brag rnams 'dun cing dbang du 'du ba sogs/__phun sum tshogs pa'i yon tan mtha' yas pa 'byung ba ni nges pa'o/__/rjes gnang skabs gnas yo byin rlabs ni/__bsang sbyang /__stong pa'i ngang las gnas khang b+h+rA~M las rin po che sna tshogs las grub pa'i thar pa chen po'i gzhal yas khang gru bzhi sgo bzhi rta babs bzhis mdzes shing rgyan thams cad kyis brgyan pa/__mtshan nyid thams cad yongs su rdzogs pa'i nang du mchod rdzas rnams a las byung ba'i ye shes kyi ka pA la yangs shing rgya che ba rnams kyi nang du hU~M zhu ba las byung ba'i lha rdzas las grub pa'i zhabs bsil/__'thor 'thung /__mchod yon/__me tog__/bdug spos/__mar me/__dri mchog__/zhal zas/__rol mo rnams dwangs shing thogs pa med pa/__rgyu 'jig rten dang 'jig rten las 'das pa'i dge ba las grub pa/__ngo bo bzang zhing gtsang ba/__yul nam mkha'i mthar khyab pa/__dus 'khor ba ji srid ma stongs kyi bar du rgyun mi chad par gyur/__zhes dang /__so so'i phyag rgya byas te/__oM nI rI hU~M khaM swA hA/__oM badz+ra nai wi te hU~M khaM swA hA/__oM sarba saM shod+ha ni swA hA/__oM dzaHhU~M ba~M hoHkha~M ra~M ma hA ar+g+haM swA hA/__oM badz+ra puSh+pe AHhU~M/__de bzhin du thog mtha' gnyis 'og ma rnams la'ang sbyar te/__d+hU pe/__A lo ke/__gan+d+he/__nai wid+ya/__shap+da'i bar dang /__mthar rdo rje snying gar bzung dril bu rgyun dkrol la/__oM badz+ra g+haN+Der Ni ta/__pra ra Ni ta/__saM pra ra Ni ta/__sarba bud+d+hak+She tra pra tsA li te/__pradz+nyA pA ra mi ta nA da sam+b+ha we/__badz+ra d+ha rma hr-i da ya san+ta Sha ni/__hU~M hU~M hU~M hoHhoHhoHAHkhaM swA hA/__zhes lan gsum brjod de gnas dang mchod pa'i yo byad rnams sangs rgyas byang sems thams cad kyis kyang byin gyis brlabs par bsam mo/__/mchod pa rnams kyi phyag rgya ni/__/khu tshur kha sbyar gung mo gnyis/__/brkyangs te rtse sbyar chu bzhi'i rgya/__/khu tshur gyen 'thor me tog go/__/thur du gugs pa bdug pa'i 'o/__/mthe bong gyen bsgreng mar me'i ste/__/thal mo phyir bstan dri mchog gi/__/de nyid gyen bkan zhal zas so/__/se gol gtogs pa rol mo'i sgra/__/zhes pa ltar ro/__/de nas skyabs 'gro nas brtsams te gdan bsdu ba'i bar bdag bskyed dkyus ltar grub rjes/__tshom bu bsang sbyang /__stong pa'i ngang las dur khrod brgyad kyis zhes pa nas/__'od dpag tu med pas dbur brgyan/__zhes pa'i bar bdag bskyed ltar la/__bdag nyid ces pa'i tshig dor/__bdag la mngon par dbang bskur ba zhes pa'i tshab tu/__'di la zhes bsgyur/__mchod pa bsang sbyang /__stong pa'i ngang las a las byung ba'i sogs nas/__rol mo rnams dwangs shing thogs pa med pa nam mkha'i mtha' klas par gyur/__oM nI rI hU~M sogs nas shap+da AHhU~M zhes pas byin gyis brlabs la/__oM ku ru kul+le sa pa ri wA ra nI rI hU~M kha~M swA hwa sogs nas/__shap+da'i bar dang /__g+haN+De ra Ni tas phyi mchod/__oM ku ru kul+le sa pa ri wA ra oM AHhU~M gis nang mchod/__dkar mo ri dwags sogs yid byung gi mchod pa phul/__brtse bas rjes chags sogs kyis bstod/__gtor ma bsang sbyang bdud rtsi byin rlabs ltar byin gyis brlab/__mdun bskyed kyi rje btsun ma'i ljags rdo rje'i sbu gus gtor ma gsol bar bsam zhing /__oM ku ru kul+le hrIHswA hA/__oM a kA ro sogs btags pa lan gsum gyis phul/__oM ku ru kul+le oM badz+ra puSh+pe AHhU~M nas shab+da'i bar gyis phyi mchod/__oM AHhU~M gis nang mchod/__dkar mo ri dwags sogs kyis yid byung gi mchod pa phul/__brtse bas rjes chags sogs kyis bstod/__mchod sbyin gtor ma 'di bzhes la sogs kyis 'dod don gsol/__mdun bskyed kyi thugs rgyud bskul bar dmigs te bzlas pa cung zad bya ba rnams slob dpon gyi bya ba'o/__/rjes gnang dngos dkyus su gsal ba ltar la/__mjug tu bdag byin rlabs kyi rim pa 'phogs par 'dod na/__thugs kyi rjes gnang grub mtshams/__des rjes gnang gi dngos gzhi legs par grub nas/__'di'i rdzogs rim bdag byin rlabs kyi rim pa nyams su blang bar 'dod pas/__bdag bskyed bzlas pa dang bcas pa grub rjes/__lus gnad bsam gtan gyi chos bdun sogs nas/__lha'i nga rgyal gyis spyod lam la 'jug ces pa'i bar gong du smos pa dang dkyus su gsal ba ltar sbyar ba dang /__de ltar na rje btsun ma'i sku bsgom sogs nas/__dbang bzhi pa'i lam mo zhes pa'i bar gong ltar brjod pas brda sprad la/__de ltar na de rnams kyi sgo nas rjes su gnang ba man ngag dang bcas pa legs par thob pa yin pas de dag gi gnas skabs su sogs mjug gi chos spyi ltar ro/__/gzhan dag 'di rigs dmigs rnam nges pa'i ched du bsgom lung gi tshul du 'bogs pa'ang mdzad pas/__de ltar na/__'di'i rdzogs rim bdag byin rlabs kyi dmigs pa nyams su blang ba'i slad/__khyed rang rnams lus gnad bsam gtan gyi chos bdun sogs nas/__'khor 'das thams cad dbang du 'dus pa'i mos pas rlung bum pa can thun re 'dzin par zhu zhes brda sbyar la rlung 'dzin du gzhug__/de ltar rlung bzung ba'i tshe 'bar 'dzag la sogs nas lhod kyis klod nas cung zad re mnyam par 'jog par zhu/__de ltar na rje btsun ma'i sku bsgom sogs nas/__bzhi pa'i lam mo zhes ngo sprad do/__/'di gnyis gang ltar 'bogs kyang rung mod/__sngon du rang gis man ngag gi rgyun nges par thob dgos kyi/__rang gis ma thob par gzhan la 'bogs pa ni nam du'ang mi rung ngo /__/des na dkyus su gsal ba ltar slob ma thun mong ba'i rigs la rjes gnang kyang thun mong tsam dang /__de steng bskyed rim tsam nyams su len pa la thun mong ma yin pa dang /__rdzogs rim don du gnyer ba la rang byin rlabs kyi rim pa bcas 'bogs par bya bas mtshon rnam dbye ma 'dres par shes par bya zhing /__dbang lung spyir btang gi rjes gnang gi tshe/__rjes gnang thun mong ma yin par rang byin rlabs kyi dmigs pa bcas 'bogs bar mdzad na/__gdams pa'i rgyun mi 'chad par 'gyur pa'i phyir legs par rtogs so/__/zhes pa'ang phyogs 'dir goms 'dris med pa'i blo dman las dang po pa rdo rje slob dpon gyi khur bzung ba dag la phan pa'i bsam pas 'jam mgon kun dga' blo gros kyi gsung rab sogs tshad ldan gyi gzhung dang zhal lung ltar rmongs brtul many+dzu g+ho Shas zin bris khyugs tsam spel ba ste mkhas pa rnams kyis bzod par mdzad du gsol/__sarba dA shre yo b+ha ba tu//____//__!_
