JKW-KABUM-16-MA-024-005

🚧 This website is under continued development. We appreciate your patience!

Previous Text Back to Volume PageLast text in section.

Wylie title
Location	mkhyen brtse'i bka' 'bum Volume 16, sde tshan 24, Text 5, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 16: . Khams sde dge rdzong sar dgon: Rdzong sar blo gros phun tshogs, 2020.
Genre
Cycle	ཇོ་ལུགས་སྒྲོལ་དཀར་ (jo lugs sgrol dkar)

1 Texts in this Section (sde tshan or chos tshan)

5 209-218	སྒྲོལ་དཀར་ཡིད་བཞིན་འཁོར་ལོའི་ལས་ཚོགས་ཉེར་མཁོ། sgrol dkar yid bzhin 'khor lo'i las tshogs nyer mkho Activity Practices - las tshogs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སྒྲོལ་དཀར་ཡིད་བཞིན་འཁོར་ལོའི་ལས་ཚོགས་ཉེར་མཁོ། སྒྲོལ་དཀར་ཡིད་བཞིན་འཁོར་ལོའི་ལས་ཚོགས་ཉེར་མཁོ་བཞུགས་སོ། །ཨོཾ་སྭ་སྟི། འདིར་རྗེ་བཙུན་སྒྲོལ་མ་དཀར་མོའི་རྣལ་འབྱོར་ལ་བརྩོན་པས་རང་གཞན་ལ་ཕན་གདགས་པའི་སླད་ལས་ཚོགས་ཉེར་མཁོ་བྱ་ཚུལ་ལ་གསུམ། བཅུད་ལེན་གྱི་ཚེ་རྫས། རིག་པའི་འཁོར་ལོ། ཁྲུས་ཀྱི་ཆོ་གའོ། །དང་པོ་ལ་གཉིས། སྦྱར་ཞིང་བསྒྲུབ་པ་དང་། ཇི་ལྟར་བསྟེན་ཚུལ་ལོ། །དང་པོ་ནི། སློབ་དཔོན་ཆེན་པོ་ངག་གི་དབང་ཕྱུག་གྲགས་པས་མཛད་པའི་འཆི་བདག་བསླུ་བའི་རྟོགས་པ་ལས་བཅུད་ལེན་གྱི་རྣམ་གྲངས་མང་དུ་གསུང་པའི་ནང་ནས་སྦྱར་སླ་བ་ལ། འབྲས་བུ་གསུམ་ནི་སྤྱིར་བསྡུས་པའམ། སོ་སོར་བྷྲྀངྒ་རཱ་ཛར་བཅས། །རྣལ་འབྱོར་པ་ཡི་རྟག་སྤྱད་ན། །ཕན་ཞིང་བདུད་རྩིར་འགྱུར་བ་སྟེ། །གཉེར་མ་སྐྲ་དཀར་རྣམས་དང་བྲལ། །རྡོ་རྗེའི་ལུས་ནི་གཟུངས་བཟང་ལྡན། །བསྐལ་པ་ཡི་ནི་གྲངས་སྙེད་དུ། །འཆི་བ་ངེས་པར་བཟློག་པ་ཡིན། །ཞེས་གསུངས་པ་ལྟར་འབྲས་བུ་གསུམ་ཀའམ། སོ་སོ་དང་བྷྲྀངྒ་རཱ་ཛ་སྟེ་བུང་བའི་རྒྱལ་པོའམ་སྐྲ་ཚོས་སུ་གྲགས་པ་མོན་ཡུལ་ཕན་ཆད་དུ་སྐྱེ་ཞིང་ཕལ་སྐད་དུ་བྷོང་གར་འབོད་པ་སྐྲ་དཀར་པོ་ནག་པོར་བསྒྱུར་བའི་རྫས་ཁྱད་པར་ཅན་ཏེ། དེ་མ་རྙེད་ན་ཚབ་རུང་ར་མ་ཤག་གིས་བྱ་བར་གསུངས་པས། དེས་ན་ལག་ཏུ་ལེན་པའི་ཚེ་ཨ་རུ་གསེར་མདོག་ཞོ་བཅོ་ལྔ་ལ་མཚོན་ན། བ་རུ་ར་སྲང་གང་། སྐྱུ་རུ་ར་ཞོ་ལྔ། སྟོན་དུས་སུ་བསྐོས་པའི་ར་མོ་ཤག་གི་རྩ་བ་ཆུ་གྲང་གི་ཡང་ཡང་བཤལ། བྱུང་ན་ཁཎྜ་ལེགས་པར་བསྡུས་པ་སྲང་གང་རྣམས་ནི་རྩ་བའི་སྨན་ཡིན་ལ། གཞན་ཡང་དཔལ་ལྡན་རྒྱུད་ནས་གསུངས་པའི་རྩི་བཞི། དྭངས་མ་ལྔ། སྤྱིར་བཏང་བཟང་པོ་དྲུག་བཅས་ཁ་ཚར་གྱི་ཚུལ་དུ་གདབ་སྟེ། དེ་ལ་དྭངས་མ་ལྔ་ནི། བྲག་ཞུན་སླད་མེད། ཅོང་ཞི་མཛོ་འོར་འདམ་བཏགས་སོ་མི་སེགས་པར་བྱས་པ། བུ་རམ། སྦྲང་རྩི། མར་དཀར་རོ། རྩི་བཞི་ནི། ཤུག་པའི་འབྲས་བུ། བ་ལུའི་མེ་ཏོག །མཚེ་ཤུག །འཁན་པ་དཀར་པོའོ། །བཟང་པོ་དྲུག་ནི། ཛཱ་ཏི། ཅུ་གང་། གུར་གུམ། ལི་ཤི། སུག་སྨེལ། ཀ་ཀོ་ལའོ། །དེ་རྣམས་ནད་ཁམས་དང་བསྟུན་པའི་གཏོང་ལུགས་བྱ་བའམ། སྤྱིར་བཏང་ཙམ་དུ་གཞན་རྣམས་ཞོ་གསུམ་རེ། བུ་རམ་སྦྲང་མར་དཀར་རྣམས་རོ་འགྱུར་བ་ཙམ་སྟེ། དེ་ལྟ་བུའི་སྨན་རྣམས་ཞིབ་བཏགས་དར་ཚག་ལ་དྲངས་བ། བུར་སྦྲང་ཀ་རས་མགོ་བསྡུས་ཏེ་རིལ་བུ་སྲན་འཕོས་ཙམ་དྲིལ་བ་རིལ་ཆགས་འཐེམ་པར་བྱ། སྐམ་པ་དང་དཀར་དང་ཀ་ར་འམ་ཟར་མའི་ཁུ་བ་སྦྱར་བ་རྩི་དཀར་པོ་གསོལ། དེ་ནི་བཅུད་ལེན་གཙོ་བོར་བྱས་ཏེ་སྦྱར་བའི་ཚུལ་ཡིན་ལ། ཚེ་རྫས་དཀྱུས་མ་ལ་གོང་གི་སྨན་སྣ་རྣམས་ཇི་ཙམ་འབྱོར་པ་ལ། འབྲས་སམ་ནས་དཀར་གྱི་རྩམ་པས་བུངས་བསྐྱེད་དེ་སྦྱར་ནའང་རུང་ངོ་། །གང་ལྟར་ཡང་རང་གི་མདུན་དུ་སྟེགས་བུའི་ཁར་བུམ་པའི་ནང་དུ་བླུག །མདུན་དུ་གཏོར་མ་དང་། མཆོད་པ་བཤམ། མཚམས་དམ་པར་བཅད། བདག་བསྐྱེད་སྔོན་དུ་འགྲོ་བས་བུམ་པ་བསྒྲུབ་པའི་ཚུལ་ལྟར་རིལ་བུའི་སྟེང་དུ་སྒྲོལ་དཀར་བསྐྱེད་བསྟིམ་མཆོད་བསྟོད་བཅས་བྱས་ལ། བུམ་པའི་ལྷའི་ཐུགས་ཀར་ཟླ་བའི་རང་བཞིན་གྱི་འཁོར་ལོ་དཀར་པོ་རྩིབས་བརྒྱད་པའི་ལྟེ་བར་ཏཱྃ། དེའི་མདུན་ནས་བརྩམས་ཏེ་གཡས་བསྐོར་དུ་མ་མ་ཨ་ཡུར་པུཎྱེ་ཛྙཱ་ན་པུཥྟིཾ་ཀུ་རུ་ཞེས་པས་བསྐོར་བའི་མདུན་དུ་ཨོཾ། རྒྱབ་ཏུ་ཧཱ། རྩིབས་བརྒྱད་ལ་ཏཱ། རེ། ཏུཏ། ཏཱ། རེ། ཏུ། རེ། སྭཱ་ཞེས་པའི་ཡིག་འབྲུ་རེ་ཡོད་པ། རང་གི་ཐུགས་ཀ་ནས་སྔགས་ཀྱི་ཕྲེང་བ་བྱུང་། གཟུངས་ཐག་ལ་འཁྲིལ་ཏེ་བུམ་པའི་ནང་དུ་སོང་བས་ཐུགས་བརྒྱུད་བསྐུལ། ཐུགས་ཀའི་འཁོར་ལོ་དང་སྐུའི་ཆ་ཐམས་ཅད་ལས་འཆི་མེད་བདུད་རྩིའི་རྒྱུན་བབས་པ་རིལ་བུ་ལ་ཐིམ་པས། ཚེ་དང་ཡེ་ཤེས་ཀྱི་དངོས་གྲུབ་སྟེར་བའི་འཆི་མེད་བདུད་རྩིའི་བཅུད་ལེན་མཆོག་ཏུ་གྱུར་པར་བསམ་ལ་སྔགས་བཟླ། ཐུན་བསྡུ་བ་ན་དབྱངས་གསལ་རྟེན་སྙིང་དང་། མཆོད་བསྟོད་བྱ། བཅོམ་ལྡན་འདས་མ་ཡིད་བཞིན་འཁོར་ལོ་ཡིས། །བདག་དང་མཐའ་ཡས་སེམས་ཅན་ཐམས་ཅད་ཀྱི། །དུས་མིན་འཆི་བའི་འཇིགས་པ་ཞི་བ་དང་། །ཚེ་དང་ཡེ་ཤེས་དངོས་གྲུབ་སྩལ་དུ་གསོལ། །ཞེས་འདོད་པའི་དོན་ལ་གསོལ་བ་གདབ། ནོངས་པ་བཤགས། བདག་བསྐྱེད་ཀྱི་མཇུག་གི་བྱ་བ་རྣམས་དཀྱུས་ལྟར་བྱ། དེ་ལྟ་བུའི་རིམ་པས་ཐུན་བཞི་སོགས་སུ་བཅད་ལ། རྟགས་མཚན་དགེ་བ་མ་བྱུང་གི་བར་རམ། ཞག་བདུན་སོགས་སུ་ཐུན་སྔ་མ་རྣམས་ལ་མདུན་བསྐྱེད་སྔར་ཡོད་གསལ་གདབ་ཀྱི་ཚུལ་དུ་བསྒྲུབ། གྲོལ་རྒྱུའི་ཐུན་རྗེས་མ་བསྡུ་བ་ན། ནོངས་བཤགས་རྗེས། བུམ་ལྷ་འོད་དུ་ཞུ་བ་བཅུད་ལེན་གྱི་རིལ་བུ་ལ་ཐིམ་པས་མཐོང་ཐོས་དྲན་རེག་ཐམས་ཅད་ལ་ཚེ་དང་ཡེ་ཤེས་ཀྱི་དངོས་གྲུབ་ཐོགས་པ་མེད་པར་སྟེར་བའི་སྨན་གྱི་རིལ་བུ་འོད་འབར་བའི་རྣམ་པར་གྱུར། ཅེས་དང་བརྟན་བཞུགས་བྱ། ཡེ་དྷ་རྨཱ་བརྗོད་ཅིང་མེ་ཏོག་གི་ཆར་དབབ། སྨོན་ལམ་དང་བཀྲ་ཤིས་རྒྱས་པར་བྱའོ། །དེ་ཙམ་མི་ནུས་ན་བདག་བསྐྱེད་སྔོན་དུ་འགྲོ་བས། རིལ་བུའི་སྟེང་དུ་ཟླ་བ་ལ་ཏཱྃ་ཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། འཁོར་འདས་ཀྱི་དྭངས་བཅུད་མ་ལུས་པ་བསྡུས་ནས་སྔགས་ཕྲེང་ས་བོན་དང་བཅས་པ་ལ་ཐིམ། དེ་ལས་འཆི་མེད་བདུད་རྩིའི་རྒྱུན་སོགས་གོང་ལྟར་བརྗོད་ལ་སྔགས་བཟླ་ཐུན་བསྡུ་བ་ན། སྔགས་ཕྲེང་གདན་དང་བཅས་པ་རིལ་བུ་ལ་ཐིམ་པས་སོགས་གོང་ལྟར་མཐར་ཡེ་དྷརྨཱའི་སྔགས་ཀྱིས་བརྟན་པར་བྱ་ཞིང་། སྨོན་ལམ་དང་བཀྲ་ཤིས་བརྗོད་པས་ཀྱང་རུང་སྟེ། རྒྱ་གཞུང་ཁུངས་མ་ལུས་གྲུབ་པའི་རྫས་བྱིན་གྱིས་བརླབས་ཚུལ་འདི་ལྟར་མང་དུ་འབྱུང་བ་ལས། །གཉིས་པ་བསྟེན་ཚུལ་ནི། དེ་ལྟར་ལེགས་པར་བསྒྲུབས་པའི་རིལ་བུ་རླུང་མི་འཆོར་བའི་སྣོད་བཟང་པོར་བཅང་། བཅུད་ལེན་གཙོ་བོར་བྱེད་ན་ཡར་ངོའི་ཚེས་གཅིག་ལྟ་བུ་གཟའ་སྐར་བཟང་པོའི་སྔ་དྲོ་ནས་བརྩམས་དགོས་པའི་ཁ་ཟས་སྤངས་ལ་རིལ་བུ་བདུན་སོགས་ཆུ་བསྐོལ་གྱིས་ཕུལ་གཏང་། སྒོམ་བཟླས་དང་རླུང་སྦྱོར་སོགས་ལ་འབད་པས་གོང་དུ་གསུངས་པའི་ཕན་ཡོན་རྣམས་འབྱུང་བར་འགྱུར་ལ། དེ་ཙམ་མ་གྲུབ་ཀྱང་། ཐོ་རེངས་རླུང་རིགས་དྭངས་པའི་སྐབས་སུ་རིལ་བུ་རེ་རེ་སོགས་ཚེ་བསྙེན་བཟླ་བཞིན་དམ་རྫས་ཀྱི་ཚུལ་དུ་མྱང་པས་ཀྱང་ཚེ་གེགས་ཞི་བ་དང་། རིང་འཚོའི་དངོས་གྲུབ་ཐོབ་པ་སོགས་ཕན་ཡོན་དཔག་ཏུ་མེད་པ་ཡོད་དོ། །གཉིས་པ་འཁོར་ལོ་བྲིས་ཚུལ་ནི། རྒྱ་ཤོག་ལྟ་བུའི་གཞི་ལ་མཚལ་ལམ་རྒྱ་སྣག་གི་ཆོས་འཁོར་རྩིབས་བརྒྱད་མུ་ཁྱུད་ལྔ་དང་ལྡན་པའི་ལྟེ་བར་ཏཱྃ། དེའི་མདུན་ནས་གཡས་བསྐོར་གྱིས་རང་གིས་འཆང་ན། མ་མ་ཨཱ་ཡུར་པུཎྱེ་ཛྙཱ་ན་པུཥྟིཾ་ཀུ་རུ་ཞེས་པའམ། གཞན་ལ་སྟེར་ན་སྒྲུབ་བྱའི་མིང་སྤེལ། སྤྱིར་བཏང་དུ་མ་མའི་མལ་དུ་དྷཱ་ར་ཀ་སྱ། འཆང་བ་པོའི། ཞེས་བྲིས་ཀྱང་རུང་། དེའི་མདུན་དུ་ཨོཾ། རྒྱབ་ཏུ་ཧཱ། རྩིབས་བརྒྱད་ལ་ཏཱ་རེ་སོགས་ཡིག་འབྲུ་བརྒྱད། མུ་ཁྱུད་དང་པོ་ལ་ཨ་ལི་གཡོན་བསྐོར། གཉིས་པར་ཀཱ་ལི་གཡས་བསྐོར། གསུམ་པར་ཡེ་དྷརྨཱ་གཡས་བསྐོར། བཞི་པར་རྡོ་རྗེའི་ཕྲེང་བ། ལྔ་པར་འོད་ཟེར་པ་ཏྲ་རྩེ་མོ་གཡས་སུ་ཕྱོགས་པ་བྲི། ཚེ་རྫས་དང་དྲི་བཟང་གིས་བྱུག །མདུན་དུ་སྟེགས་བུའི་ཁར་བཞག །གཏོར་མ་དང་མཆོད་པ་བཤམ། བདག་བསྐྱེད་སྔོན་དུ་འགྲོ་བས། འཁོར་ལོ་མདུན་བསྐྱེད་ལྟར་གསལ་གདབ། དེའང་མུ་ཁྱུད་རྣམས་ཡོངས་སུ་གྱུར་པ་ལས་ནོར་བུ་ཆུ་ཤེལ་གྱི་གཞལ་མེད་ཁང་དང་། སྔགས་ཀྱི་ཡིག་འབྲུ་རྣམས་ཡོངས་སུ་གྱུར་པ་ལས་སྒྲོལ་མ་དཀར་མོ་བསྐྱེད་པའི་མདུན་དུ། མིང་སྤེལ་ཡོངས་སུ་གྱུར་པ་ལས་བསྒྲུབ་བྱ་དངོས་ཀྱི་རྣམ་པ་གུས་པའི་ཚུལ་དུ་འཁོད་པར་གསལ་བཏབ་ཅིང་མཆོད་བསྟོད་བཟླས་པ་བཅས་བྱ། མཐར་འཁོར་ལོ་བཀོད་པའི་དབྱངས་གསལ་རྟེན་སྙིང་མང་དུ་བཟླ། མཆོད་བསྟོད་དང་འདོད་དོན་གསོལ། ནོངས་པ་བཤགས། བསྐྱེད་པའི་གཞལ་ཡས་ཁང་ཡོངས་སུ་གྱུར་པ་ལས་འཁོར་ལོའི་མུ་ཁྱུད་དང་། ལྷ་མོ་ཡོངས་སུ་གྱུར་པ་ལས་སྔགས་ཀྱི་ཡིག་འབྲུ་འོད་འབར་བའི་རྣམ་པ་དང་བསྒྲུབ་བྱ་ཉིད་མིང་སྤེལ་གྱི་ཡི་གེར་གྱུར་པར་བསམས་ལ། འདིར་ནི་རྟེན་དང་སོགས་བརྟན་བཞུགས་ནན་ཏན་བྱ། དེ་ནས་བདག་བསྐྱེད་ཀྱི་མཇུག་གི་ཉེར་བསྡུ་བསྔོ་སྨོན་ཤིས་བརྗོད་སོགས་བྱས་ལ། འཁོར་ལོ་ལྟེ་བ་མ་ཉམས་པར་བལྟབ། ཚོན་སྐུད་སྣ་ལྔས་བཅིངས་ལ་ན་བཟའ་དཀར་པོ་དང་བཅས་མགུལ་དུ་བཏགས་པས་ཚེ་གེགས་སྲུང་བ་དང་། ཚེ་བསོད་རྒྱས་པའི་མཆོག་ཏུ་འགྱུར་རོ།། །། ༈ གསུམ་པ་ཁྲུས་ཀྱི་ཆོ་ག་ནི། བདག་བསྐྱེད་སྔོན་དུ་འགྲོ་བས་བུམ་པ་སྤྱི་ལྟར་བསྒྲུབ་བྱ་མདུན་དུ་འཁོད་པ་ལ་སྦྱོང་ཆས་བཤམ། འོ་ཁྱེད་རང་རྣམས་ཀྱི་འགལ་རྐྱེན་ནད་གདོན་སྡིག་སྒྲིབ་གྲིབ་དང་མི་གཙང་བ་ཐམས་ཅད་ཞི་བ་དང་། མཐུན་རྐྱེན་བཀྲ་ཤིས་པའི་ལེགས་ཚོགས་མཐའ་དག་རྒྱས་པར་བྱ་བའི་སླད་དུ་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་ཁྲུས་ཀྱི་ཆོ་གས་རྗེས་སུ་འཛིན་པ་ལའང་བགེགས་ཞི་བའི་ཕྱིར་སྦྱོང་བ་བྱ་བ་དང་། བཀྲུ་བྱབས་སྲུང་གསུམ་བྱ་བ་དང་། བདེན་པའི་སྟོབས་བརྗོད་པ་དང་། ཤིས་པར་བྱ་བ་རྣམས་སུ་ཡོད་པ་ལས་ཐོག་མར་གདོན་བགེགས་ལ་གཏོར་མ་བྱིན་ནས་སྦྱོང་བ་བྱས་པའི་མོས་པ་མཛོད། གཏོར་མ་གསུམ་གཡས་སུ་བསྐོར་ཞིང་། ཨོཾ་སརྦ་བིགྷྣཱན་ན་མ་སརྦ་ཏ་ཐཱ་ག་ཏེ་བྷྱོ་བི་ཤྭ་མུ་སོགས་གསུམ་གྱིས་ཞི་བའི་སྦྱོང་བ། ཏིང་ལོ་ཆངས་བུ་གསུམ་གཡོན་དུ་བསྐོར་ཞིང་། སུམྦྷ་བརྗོད་པས་ཕྱེད་མའི་སྦྱོང་བ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན་གྱི༴ གསང་སྔགས་དང་རིག་སྔགས་ཀྱི་རྒྱལ་པོ་ཁྲོ་བོ་ཁྲོ་མོ་རྣམས་ཀྱི༴ ཁྱད་པར་དུ་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་བཀའ་བདེན་པ་དང་། བདེན་པ་ཆེན་པོའི་བྱིན་བརླབས་ཀྱིས་དེང་འདིར་བསྒྲུབ་བྱ་རྣམས་ལ་གནོད་ཅིང་འཚེ་བའི་གདོན་བགེགས་འབྱུང་པོའི་ཚོགས་ཐམས་ཅད་གཏོར་མ་འདིས་ཚིམ་པར་བགྱིས་ལ། དཔག་ཚད་དང་རྒྱང་གྲགས་སུ་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་ཁྲོ་བོའི་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བས་མགོ་བོ་ཚལ་བ་བརྒྱས་འགས་པར་འགྱུར་རོ། །ཞེས་བརྗོད་ཅིང་གཏོར་མ་ཕྱིར་དོར། སུམྦྷ་བརྗོད་ཅིང་གུ་གུལ་བདུག །ཡུངས་ཀྱིས་བྲབ་པ་ནི་དྲག་པོའི་སྦྱོང་བའོ། །གཉིས་པ་བཀྲུ་བྱབས་སྲུང་གསུམ་ལ། ཐོག་མར་བཀྲུ་བའི་སླད་དུ་སློབ་དཔོན་སྒྲོལ་མ་དཀར་མོར་གསལ་བའི་ཕྱག་ན་བུམ་པ་ཡེ་ཤེས་བདུད་རྩིས་གང་བ་ཐོགས་ཏེ་ཁྱེད་རང་རྣམས་ལ་ཁྲུས་བགྱིས་པ་ལ་བརྟེན་ནས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ། དེས་བསྐྱེད་པའི་ནད་གདོན་གྲིབ་དང་མི་གཙང་བ་ཐམས་ཅད་བྱང་ཞིང་དག་པའི་མོས་པ་མཛོད། ཅེས་དང་། ཇི་ལྟར་བལྟམས་པ་སོགས་མཐར། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། རྡོ་རྗེ་སློབ་མའམ་སྦྱིན་པའི་བདག་པོའི་སརྦ་པཱ་པཾ་བྷྱཿཤཱནྟིཾ་ཀུ་རུ་སྭཱ་ཧཱ། སརྦ་བིགྷྣཱན་བྷྱ༴ སརྦ་ར་གེ༴ སརྦ་དུཥྟཱ་ན༴ སརྦ་གྲ་ཧེ༴ སརྦ་ཛྭ་རེ༴ སརྦ་བྱཱ་དྷི༴ སརྦ་ཨུ་པ་དྲ་བྱེ༴ སརྦ་ཨ་ཀཱ་ལ་མྲྀ་ཏྱུ༴ སརྦ་དུསྶཱ་པྣི༴ སརྦ་དུརྨི་ཏི༴ སརྦ་ཙིཏྟ་ཀུ་ལེ་བྷྱཿ ཤཱནྟིཾ་ཀུ་རུ་སྭཱ་ཧཱ། ཞེས་བཀྲུ། སྤྲོ་ན། འདི་ནི་ཁྲུས་མཆོག་སོགས་དང་། འདི་ནི་སྦྱིན་པའི་སོགས་ཕ་རོལ་ཏུ་ཕྱིན་པ་དྲུག་གི་ཚིགས་བཅད་དང་སྤེལ། བྱབས་པའི་སླད་དུ། རྨ་བྱའི་མདོངས་ཀྱི་ཐིག་ལེའི་དབུས་སུ་ཟླ་བའི་གདན་ལ་ཏཱྃ་ཡིག་དཀར་པོའི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས་པས་བཀྲུས་པས་མ་དག་པའི་ནད་གདོན་ཉེར་འཚེའི་ལྷག་མ་ཐམས་ཅད་རྒྱ་མཚོ་ཆེན་པོར་ཕྱིར་དོར་བའི་མོས་པ་མཛོད། ཅེས་དང་། སྔགས་གོང་བཞིན་ལ་ཤཱནྟིཾ་ཀུ་རུ་ཞེས་པའི་མལ་དུ། ཨ་པ་ན་ཡ་ཞེས་བཏགས་པས་བྱབས། བསྲུང་བར་བྱ་བའི་སླད་དུ། སློབ་དཔོན་གྱིས་ཕྱག་གི་རྡོ་རྗེ་སྤྱི་བོ་ལ་སོགས་པའི་གནས་རྣམས་སུ་རྒྱ་གྲམ་དུ་རེག་པ་ལ་བརྟེན་ནས་དེ་ལས་དེ་འདྲ་བའི་རྡོ་རྗེའི་རིགས་ཅན་བསམ་གྱིས་མི་ཁྱབ་པ་བྱུང་སྟེ་ལུས་ལ་རྡོ་རྗེའི་གོ་ཁྲབ་བཞུ་བླུགས་སུ་གྱུར་བས་ཕྱིན་ཆད་ནད་གདོན་ཉེར་འཚེ་གང་གིས་ཀྱང་མ་ཚུགས་པར་སྲུང་བ་བྱས་པའི་མོས་པ་མཛོད། སྔགས་གོང་ལྟར་ལ་རཀྵ་རཀྵ་བཏགས་པ་སྤྱི་བོ། མདུན་རྒྱབ། དཔུང་མགོ་གཉིས། པུས་མོ་གཉིས་རྣམས་སུ་རྡོ་རྗེ་རྒྱ་གྲམ་དུ་རེག །གསུམ་པ་བདེན་པའི་སྟོབས་བརྗོད་པ་ནི། སླར་ཡང་སློབ་དཔོན་གྱིས་ཕྱག་གི་རྡོ་རྗེ་ཁྱེད་རང་རྣམས་ཀྱི་སྤྱི་བོར་བཞག་ཅིང་སྔགས་དང་བདེན་པའི་ཚིག་གིས་ཀྱང་བྱིན་གྱིས་བརླབས་པའི་མོས་པ་མཛོད། ཅེས་དང་། རྩ་སྔགས་ལན་གསུམ་སོགས་ཀྱི་མཐར། རྒྱལ་བ་སྲས་བཅས་བདེན་པའི་བྱིན་རླབས་དང་། །རྗེ་བཙུན་ཡིད་བཞིན་འཁོར་ལོའི་ནུས་མཐུ་དང་། །འགྲོ་བ་འདི་ནི་བདག་གིས་བསྲུངས་ཟིན་གྱི། །འདི་ལ་སུས་ཀྱང་གནོད་པར་མ་བྱེད་ཅིག །ཅེས་བརྗོད་ལ། བཞི་པ་ཤིས་པར་བྱ་བའི་སླད་དུ། ནམ་མཁའ་གང་བའི་དེ་བཞིན་གཤེགས་པ་རྣམས་དང་སློབ་དཔོན་ལྷན་ཅིག་པས་མེ་ཏོག་གི་ཆར་འབེབས་ཤིང་བཀྲ་ཤིས་པའི་ཚིགས་སུ་བཅད་པས་ཀྱང་མངའ་གསོལ་བའི་མོས་པ་མཛོད། ཕུན་སུམ་ཚོགས་པ་མངའ་བའམ༴ ཆེ་བའི་ཆེ་མཆོག་ལྟ་བུ་མདོ་རྒྱུད་ལས་བཀྲ་ཤིས་ཀྱི་ཚིགས་སུ་བཅད་པ་ཅི་ཤེས་བརྗོད་ཅིང་མེ་ཏོག་འཐོར་བས་བདེ་ལེགས་སུ་བྱའོ། །རྗེས་གནང་དང་ཁྲུས་ཆོག་སྦྲེལ་ན། དེས་རྗེས་གནང་གི་དངོས་གཞི་གྲུབ་ནས། མཐའ་རྟེན་དུ་ཁྱེད་རང་རྣམས་ཀྱི་ཞེས་སོགས་གོང་ལྟར་སྦྱོང་བ་ནས་བཀྲ་ཤིས་ཀྱི་བར་བྱ་བ་ཡིན་ནོ། །དེ་རྣམས་ནི་ཉེར་མཁོའི་ལས་ཚོགས་མདོ་ཙམ་སྟེ། གཞན་ཡང་ཕན་བྱའི་ལས་ཇི་སྙེད་ཅིག་འབྱུང་བ་ཇོ་བོ་ལུགས་ཀྱི་ཡིག་རྙིང་གསལ་བྱེད་དང་བཅས་པ་ལས་ཤེས་པར་བྱའོ། །ཞེས་པའང་དོན་གཉེར་ཅན་དག་ལ་སྨན་པའི་བསམ་པས་རིག་འཛིན་གྱི་བཙུན་པ་མཉྫུ་གྷོ་ཥས་བྲིས་པའི་དགེ་བས་བསྟན་འཛིན་མཆོག་རྣམས་ཞབས་པད་བསྐལ་བརྒྱར་བརྟན་ཅིང་། འགྲོ་ཀུན་ཕན་བདེའི་འདོད་རྒུ་ལ་དུས་རྟག་ཏུ་ལོངས་སྤྱོད་པའི་རྒྱུར་གྱུར་ཅིག། །།དགེའོ།།

[edit]

sgrol dkar yid bzhin 'khor lo'i las tshogs nyer mkho/ sgrol dkar yid bzhin 'khor lo'i las tshogs nyer mkho bzhugs so/__/oM swa sti/__'dir rje btsun sgrol ma dkar mo'i rnal 'byor la brtson pas rang gzhan la phan gdags pa'i slad las tshogs nyer mkho bya tshul la gsum/__bcud len gyi tshe rdzas/__rig pa'i 'khor lo/__khrus kyi cho ga'o/__/dang po la gnyis/__sbyar zhing bsgrub pa dang /__ji ltar bsten tshul lo/__/dang po ni/__slob dpon chen po ngag gi dbang phyug grags pas mdzad pa'i 'chi bdag bslu ba'i rtogs pa las bcud len gyi rnam grangs mang du gsung pa'i nang nas sbyar sla ba la/__'bras bu gsum ni spyir bsdus pa'am/__so sor b+hr-ing+ga rA dzar bcas/__/rnal 'byor pa yi rtag spyad na/__/phan zhing bdud rtsir 'gyur ba ste/__/gnyer ma skra dkar rnams dang bral/__/rdo rje'i lus ni gzungs bzang ldan/__/bskal pa yi ni grangs snyed du/__/'chi ba nges par bzlog pa yin/__/zhes gsungs pa ltar 'bras bu gsum ka'am/__so so dang b+hr-ing+ga rA dza ste bung ba'i rgyal po'am skra tshos su grags pa mon yul phan chad du skye zhing phal skad du b+hong gar 'bod pa skra dkar po nag por bsgyur ba'i rdzas khyad par can te/__de ma rnyed na tshab rung ra ma shag gis bya bar gsungs pas/__des na lag tu len pa'i tshe a ru gser mdog zho bco lnga la mtshon na/__ba ru ra srang gang /__skyu ru ra zho lnga/__ston dus su bskos pa'i ra mo shag gi rtsa ba chu grang gi yang yang bshal/__byung na khaN+Da legs par bsdus pa srang gang rnams ni rtsa ba'i sman yin la/__gzhan yang dpal ldan rgyud nas gsungs pa'i rtsi bzhi/__dwangs ma lnga/__spyir btang bzang po drug bcas kha tshar gyi tshul du gdab ste/__de la dwangs ma lnga ni/__brag zhun slad med/__cong zhi mdzo 'or 'dam btags so mi segs par byas pa/__bu ram/__sbrang rtsi/__mar dkar ro/__rtsi bzhi ni/__shug pa'i 'bras bu/__ba lu'i me tog__/mtshe shug__/'khan pa dkar po'o/__/bzang po drug ni/__dzA ti/__cu gang /__gur gum/__li shi/__sug smel/__ka ko la'o/__/de rnams nad khams dang bstun pa'i gtong lugs bya ba'am/__spyir btang tsam du gzhan rnams zho gsum re/__bu ram sbrang mar dkar rnams ro 'gyur ba tsam ste/__de lta bu'i sman rnams zhib btags dar tshag la drangs ba/__bur sbrang ka ras mgo bsdus te ril bu sran 'phos tsam dril ba ril chags 'them par bya/__skam pa dang dkar dang ka ra 'am zar ma'i khu ba sbyar ba rtsi dkar po gsol/__de ni bcud len gtso bor byas te sbyar ba'i tshul yin la/__tshe rdzas dkyus ma la gong gi sman sna rnams ji tsam 'byor pa la/__'bras sam nas dkar gyi rtsam pas bungs bskyed de sbyar na'ang rung ngo /__/gang ltar yang rang gi mdun du stegs bu'i khar bum pa'i nang du blug__/mdun du gtor ma dang /__mchod pa bsham/__mtshams dam par bcad/__bdag bskyed sngon du 'gro bas bum pa bsgrub pa'i tshul ltar ril bu'i steng du sgrol dkar bskyed bstim mchod bstod bcas byas la/__bum pa'i lha'i thugs kar zla ba'i rang bzhin gyi 'khor lo dkar po rtsibs brgyad pa'i lte bar tA~M/__de'i mdun nas brtsams te g.yas bskor du ma ma a yur puN+ye dz+nyA na puSh+tiM ku ru zhes pas bskor ba'i mdun du oM/__rgyab tu hA/__rtsibs brgyad la tA/__re/__tuta/__tA/__re/__tu/__re/__swA zhes pa'i yig 'bru re yod pa/__rang gi thugs ka nas sngags kyi phreng ba byung /__gzungs thag la 'khril te bum pa'i nang du song bas thugs brgyud bskul/__thugs ka'i 'khor lo dang sku'i cha thams cad las 'chi med bdud rtsi'i rgyun babs pa ril bu la thim pas/__tshe dang ye shes kyi dngos grub ster ba'i 'chi med bdud rtsi'i bcud len mchog tu gyur par bsam la sngags bzla/__thun bsdu ba na dbyangs gsal rten snying dang /__mchod bstod bya/__bcom ldan 'das ma yid bzhin 'khor lo yis/__/bdag dang mtha' yas sems can thams cad kyi/__/dus min 'chi ba'i 'jigs pa zhi ba dang /__/tshe dang ye shes dngos grub stsal du gsol/__/zhes 'dod pa'i don la gsol ba gdab/__nongs pa bshags/__bdag bskyed kyi mjug gi bya ba rnams dkyus ltar bya/__de lta bu'i rim pas thun bzhi sogs su bcad la/__rtags mtshan dge ba ma byung gi bar ram/__zhag bdun sogs su thun snga ma rnams la mdun bskyed sngar yod gsal gdab kyi tshul du bsgrub/__grol rgyu'i thun rjes ma bsdu ba na/__nongs bshags rjes/__bum lha 'od du zhu ba bcud len gyi ril bu la thim pas mthong thos dran reg thams cad la tshe dang ye shes kyi dngos grub thogs pa med par ster ba'i sman gyi ril bu 'od 'bar ba'i rnam par gyur/__ces dang brtan bzhugs bya/__ye d+ha rmA brjod cing me tog gi char dbab/__smon lam dang bkra shis rgyas par bya'o/__/de tsam mi nus na bdag bskyed sngon du 'gro bas/__ril bu'i steng du zla ba la tA~M yig gi mthar sngags kyi phreng bas bskor ba las 'od zer 'phros/__'phags pa mchod/__sems can gyi don byas/__'khor 'das kyi dwangs bcud ma lus pa bsdus nas sngags phreng sa bon dang bcas pa la thim/__de las 'chi med bdud rtsi'i rgyun sogs gong ltar brjod la sngags bzla thun bsdu ba na/__sngags phreng gdan dang bcas pa ril bu la thim pas sogs gong ltar mthar ye d+harmA'i sngags kyis brtan par bya zhing /__smon lam dang bkra shis brjod pas kyang rung ste/__rgya gzhung khungs ma lus grub pa'i rdzas byin gyis brlabs tshul 'di ltar mang du 'byung ba las/__/gnyis pa bsten tshul ni/__de ltar legs par bsgrubs pa'i ril bu rlung mi 'chor ba'i snod bzang por bcang /__bcud len gtso bor byed na yar ngo'i tshes gcig lta bu gza' skar bzang po'i snga dro nas brtsams dgos pa'i kha zas spangs la ril bu bdun sogs chu bskol gyis phul gtang /__sgom bzlas dang rlung sbyor sogs la 'bad pas gong du gsungs pa'i phan yon rnams 'byung bar 'gyur la/__de tsam ma grub kyang /__tho rengs rlung rigs dwangs pa'i skabs su ril bu re re sogs tshe bsnyen bzla bzhin dam rdzas kyi tshul du myang pas kyang tshe gegs zhi ba dang /__ring 'tsho'i dngos grub thob pa sogs phan yon dpag tu med pa yod do/__/gnyis pa 'khor lo bris tshul ni/__rgya shog lta bu'i gzhi la mtshal lam rgya snag gi chos 'khor rtsibs brgyad mu khyud lnga dang ldan pa'i lte bar tA~M/__de'i mdun nas g.yas bskor gyis rang gis 'chang na/__ma ma A yur puN+ye dz+nyA na puSh+tiM ku ru zhes pa'am/__gzhan la ster na sgrub bya'i ming spel/__spyir btang du ma ma'i mal du d+hA ra ka s+ya/__'chang ba po'i/__zhes bris kyang rung /__de'i mdun du oM/__rgyab tu hA/__rtsibs brgyad la tA re sogs yig 'bru brgyad/__mu khyud dang po la a li g.yon bskor/__gnyis par kA li g.yas bskor/__gsum par ye d+harmA g.yas bskor/__bzhi par rdo rje'i phreng ba/__lnga par 'od zer pa tra rtse mo g.yas su phyogs pa bri/__tshe rdzas dang dri bzang gis byug__/mdun du stegs bu'i khar bzhag__/gtor ma dang mchod pa bsham/__bdag bskyed sngon du 'gro bas/__'khor lo mdun bskyed ltar gsal gdab/__de'ang mu khyud rnams yongs su gyur pa las nor bu chu shel gyi gzhal med khang dang /__sngags kyi yig 'bru rnams yongs su gyur pa las sgrol ma dkar mo bskyed pa'i mdun du/__ming spel yongs su gyur pa las bsgrub bya dngos kyi rnam pa gus pa'i tshul du 'khod par gsal btab cing mchod bstod bzlas pa bcas bya/__mthar 'khor lo bkod pa'i dbyangs gsal rten snying mang du bzla/__mchod bstod dang 'dod don gsol/__nongs pa bshags/__bskyed pa'i gzhal yas khang yongs su gyur pa las 'khor lo'i mu khyud dang /__lha mo yongs su gyur pa las sngags kyi yig 'bru 'od 'bar ba'i rnam pa dang bsgrub bya nyid ming spel gyi yi ger gyur par bsams la/__'dir ni rten dang sogs brtan bzhugs nan tan bya/__de nas bdag bskyed kyi mjug gi nyer bsdu bsngo smon shis brjod sogs byas la/__'khor lo lte ba ma nyams par bltab/__tshon skud sna lngas bcings la na bza' dkar po dang bcas mgul du btags pas tshe gegs srung ba dang /__tshe bsod rgyas pa'i mchog tu 'gyur ro//___//__!_gsum pa khrus kyi cho ga ni/__bdag bskyed sngon du 'gro bas bum pa spyi ltar bsgrub bya mdun du 'khod pa la sbyong chas bsham/__'o khyed rang rnams kyi 'gal rkyen nad gdon sdig sgrib grib dang mi gtsang ba thams cad zhi ba dang /__mthun rkyen bkra shis pa'i legs tshogs mtha' dag rgyas par bya ba'i slad du rje btsun sgrol ma dkar mo yid bzhin 'khor lo'i khrus kyi cho gas rjes su 'dzin pa la'ang bgegs zhi ba'i phyir sbyong ba bya ba dang /__bkru byabs srung gsum bya ba dang /__bden pa'i stobs brjod pa dang /__shis par bya ba rnams su yod pa las thog mar gdon bgegs la gtor ma byin nas sbyong ba byas pa'i mos pa mdzod/__gtor ma gsum g.yas su bskor zhing /__oM sarba big+h+nAn na ma sarba ta thA ga te b+h+yo bi shwa mu sogs gsum gyis zhi ba'i sbyong ba/__ting lo changs bu gsum g.yon du bskor zhing /__sum+b+ha brjod pas phyed ma'i sbyong ba/__rje btsun rtsa ba dang brgyud par bcas pa'i dpal ldan bla ma dam pa rnams kyi bka' bden pa dang /__sangs rgyas kyi=__chos kyi=__dge 'dun gyi=__gsang sngags dang rig sngags kyi rgyal po khro bo khro mo rnams kyi=__khyad par du rje btsun sgrol ma dkar mo yid bzhin 'khor lo'i bka' bden pa dang /__bden pa chen po'i byin brlabs kyis deng 'dir bsgrub bya rnams la gnod cing 'tshe ba'i gdon bgegs 'byung po'i tshogs thams cad gtor ma 'dis tshim par bgyis la/__dpag tshad dang rgyang grags su ma gnas par gzhan du dengs shig__/gal te mi 'gro na khro bo'i ye shes kyi rdo rje me rab tu 'bar bas mgo bo tshal ba brgyas 'gas par 'gyur ro/__/zhes brjod cing gtor ma phyir dor/__sum+b+ha brjod cing gu gul bdug__/yungs kyis brab pa ni drag po'i sbyong ba'o/__/gnyis pa bkru byabs srung gsum la/__thog mar bkru ba'i slad du slob dpon sgrol ma dkar mor gsal ba'i phyag na bum pa ye shes bdud rtsis gang ba thogs te khyed rang rnams la khrus bgyis pa la brten nas tshe 'khor ba thog ma med pa nas bsags pa'i sdig pa dang sgrib pa/__des bskyed pa'i nad gdon grib dang mi gtsang ba thams cad byang zhing dag pa'i mos pa mdzod/__ces dang /__ji ltar bltams pa sogs mthar/__oM tA re tut+tA re tu re swA hA/__rdo rje slob ma'am sbyin pa'i bdag po'i sarba pA paM b+h+yaHshAn+tiM ku ru swA hA/__sarba big+h+nAn b+h+ya=__sarba ra ge=__sarba duSh+tA na=__sarba gra he=__sarba dz+wa re=__sarba byA d+hi=__sarba u pa dra bye=__sarba a kA la mr-i t+yu=__sarba dus+sA p+ni=__sarba durmi ti=__sarba tsit+ta ku le b+h+yaH__shAn+tiM ku ru swA hA/__zhes bkru/__spro na/__'di ni khrus mchog sogs dang /__'di ni sbyin pa'i sogs pha rol tu phyin pa drug gi tshigs bcad dang spel/__byabs pa'i slad du/__rma bya'i mdongs kyi thig le'i dbus su zla ba'i gdan la tA~M yig dkar po'i mthar sngags kyi phreng bas bskor ba las 'od zer 'phros pas bkrus pas ma dag pa'i nad gdon nyer 'tshe'i lhag ma thams cad rgya mtsho chen por phyir dor ba'i mos pa mdzod/__ces dang /__sngags gong bzhin la shAn+tiM ku ru zhes pa'i mal du/__a pa na ya zhes btags pas byabs/__bsrung bar bya ba'i slad du/__slob dpon gyis phyag gi rdo rje spyi bo la sogs pa'i gnas rnams su rgya gram du reg pa la brten nas de las de 'dra ba'i rdo rje'i rigs can bsam gyis mi khyab pa byung ste lus la rdo rje'i go khrab bzhu blugs su gyur bas phyin chad nad gdon nyer 'tshe gang gis kyang ma tshugs par srung ba byas pa'i mos pa mdzod/__sngags gong ltar la rak+Sha rak+Sha btags pa spyi bo/__mdun rgyab/__dpung mgo gnyis/__pus mo gnyis rnams su rdo rje rgya gram du reg__/gsum pa bden pa'i stobs brjod pa ni/__slar yang slob dpon gyis phyag gi rdo rje khyed rang rnams kyi spyi bor bzhag cing sngags dang bden pa'i tshig gis kyang byin gyis brlabs pa'i mos pa mdzod/__ces dang /__rtsa sngags lan gsum sogs kyi mthar/__rgyal ba sras bcas bden pa'i byin rlabs dang /__/rje btsun yid bzhin 'khor lo'i nus mthu dang /__/'gro ba 'di ni bdag gis bsrungs zin gyi/__/'di la sus kyang gnod par ma byed cig__/ces brjod la/__bzhi pa shis par bya ba'i slad du/__nam mkha' gang ba'i de bzhin gshegs pa rnams dang slob dpon lhan cig pas me tog gi char 'bebs shing bkra shis pa'i tshigs su bcad pas kyang mnga' gsol ba'i mos pa mdzod/__phun sum tshogs pa mnga' ba'am=__che ba'i che mchog lta bu mdo rgyud las bkra shis kyi tshigs su bcad pa ci shes brjod cing me tog 'thor bas bde legs su bya'o/__/rjes gnang dang khrus chog sbrel na/__des rjes gnang gi dngos gzhi grub nas/__mtha' rten du khyed rang rnams kyi zhes sogs gong ltar sbyong ba nas bkra shis kyi bar bya ba yin no/__/de rnams ni nyer mkho'i las tshogs mdo tsam ste/__gzhan yang phan bya'i las ji snyed cig 'byung ba jo bo lugs kyi yig rnying gsal byed dang bcas pa las shes par bya'o/__/zhes pa'ang don gnyer can dag la sman pa'i bsam pas rig 'dzin gyi btsun pa many+dzu g+ho Shas bris pa'i dge bas bstan 'dzin mchog rnams zhabs pad bskal brgyar brtan cing /__'gro kun phan bde'i 'dod rgu la dus rtag tu longs spyod pa'i rgyur gyur cig/__//dge'o//