JKW-KABUM-22-ZA-012-009-wylie
<div class="wylie-content"
kun mkhyen dri med 'od zer la gsol 'debs rdo rje'i thol glu 'od gsal dpyid kyi thig le/__ rang bzhin rdzogs pa chen po'i shing rta pa kun mkhyen chos kyi rgyal po dri med 'od zer la gsol ba 'debs pa'i rdo rje'i thol glu 'od gsal dpyid kyi thig le ces bya ba/__a ho/__gzod nas byang chub snying po'i thig le ru gshegs kyang /__/nges don bstan pa spel phyir ngur smrig gi sgyu 'phrul/__/kun mkhyen chos kyi rgyal po snying dbus nas dran pa'i/__/gsol 'debs rdo rje'i glu yi rol mo zhig 'khrol lo/__/skye gnas rnam bzhi'i 'dra 'bag kun brtags kyi rim pas/__/tha mal snang ba'i zhen rtog dkyil 'khor du shar ba'i/__/sna tshogs gzugs can 'chang ba sprul sku yi rnam rol/__/kun mkhyen chos kyi rgyal po snying dbus nas dran byung /__/phung khams lha skur dag par byin gyis rang rlobs shig__/kha sbyor rdo rje'i lam gyi thabs mkhas kyi pho nyas/__/'gro 'ong srog rtsol rgyu ba dbu ma ru bcings pa'i/__/e wa~M gnyis su med pa longs sku yi rnam rol/__/kun mkhyen chos kyi rgyal po snying dbus nas dran byung /__/rlung khams yi ger rdzogs par byin gyis rang rlobs shig__/lugs ldog dga' ba rnam bzhi'i nye rgyu yis reg pas/__/lugs 'byung 'pho ba'i bag chags gtsug tor du bcom pa'i/__/'od gsal rnam kun mchog ldan chos sku yi rnam rol/__/kun mkhyen chos kyi rgyal po snying dbus nas dran byung /__/'bar 'dzag dbu mar thim par byin gyis rang rlobs shig__/ka dag lhun grub dbyer med zung 'jug gi snang bas/__/sems dang sems byung rgyu ba chos zad du dag pa'i/__/sku dang ye shes rgya mtsho'i ngo bo ru bzhugs pa/_/kun mkhyen chos kyi rgyal po snying dbus nas dran byung /__/snang bzhi'i pha rol son par byin gyis rang rlobs shig__/de skad gus pas gsol 'debs rdo rje yi thol glu/__/dpa' bo DA ki 'du ba'i dga' tshal gyi ngogs su/__/kun rmongs rnal 'byor gzhon nu'i mgrin pa nas blangs pas/__/gdod ma'i gtan srid zin pa'i smon lam zhig zhu'o/__/zhes gangs ri'i khrod kyi 'od gsal rdo rje snying po'i shing rta chen po kun mkhyen dri med 'od zer la don gyi rtogs pa brjod pa dang mthun pa'i gsol 'debs 'di'ang rje nyid kyis byin gyis brlabs pa'i gnas mchims phu nags kyi dur khrod kyi brag ri'i ba gam can du tshogs kyi mchod pa bgyis pa'i tshe gang shar gyi snang cha glur blangs pa'o//____//__!