JKW-KABUM-01-KA-002-099

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 2, sde tshan 99, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

བྱམས་པ་ཀུན་དགའ་བསྟན་འཛིན་གྱི་རྣམ་ཐར་གསོལ་འདེབས་བྱིན་རླབས་བདུད་རྩིའི་སྤྲིན་མཛེས། མཁན་ཆེན་ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན་གྱི་རྣམ་ཐར་གསོལ་འདེབས་བྱིན་རླབས་བདུད་རྩིའི་སྤྲིན་མཛེས་ཞེས་བྱ་བ་བཞུགས་སོ། །རྡོ་རྗེ་འཆང་དབང་ཡེ་ཤེས་ལས་བྱུང་བའི། །བྱམ༷ས་པའི༷་ཐུགས་རྗེས་འགྲོ་རྣམས་སྒྲོལ་བའི་སླད། །ཀུན་དག༷འི་མཚན་དཔེར་ཤར་བའི་སྒྱུ་འཕྲུལ་གྱིས། །བསྟན༷་པའི་རྒྱལ་མཚན་འཛིན༷་ལ་གསོལ་བ་འདེབས། །མགོན་ཁྱོད་གདོད་ནས་ཞི་བ་མཆོག་བརྙེས་ཀྱང་། །རྨད་བྱུང་སྙིང་རྗེ་བདུད་རྩིའི་དཔྱིད་དཔལ་གྱིས། །དམ་པས་བསྔགས་པའི་རིགས་ཀྱི་དགའ་ཚལ་དུ། །གཟུགས་སྐུའི་ལྗོན་བཟང་རབ་བྱུང་བཅུ་གསུམ་པའི་མེ་སྤྲེལ་ལོར། འཁྲུངས་ལ་གསོལ་བ༴ ཐོག་མ་ཉིད་ནས་ངེས་པར་འབྱུང་བ་དང་། །རིགས་དང་བརྩེ་བའི་མེ་ཏོག་མཛེས་འབར་བས། །ཕྱོགས་བྲལ་དཔྱོད་ལྡན་འདུས་པའི་ཚོགས་རྣམས་ཀྱི། །བརྟན་པ་གཅིག་ཅར་འཕྲོག་ལ༴ རྡོ་རྗེ་འཆང་དངོས་ནམ་མཁའི་མཚན་ཅན་ལས། །སྡོམ་པ་གསུམ་གྱི་བཀའ་དྲིན་ལེགས་ནོས་ཤིང་། །ཟབ་རྒྱས་སྡེ་སྣོད་རྒྱུད་སྡེ་རྒྱ་མཚོ་ཡིས། །སྨིན་གྲོལ་ལམ་བཟང་གསན་ལ༴ གཞན་ཡང་རིས་མེད་དགེ་བའི་བཤེས་གཉེན་མཆོག །ཉི་ཤུ་རྩ་བཞི་གུས་པས་ཉེར་བསྟེན་ནས། །མང་དུ་ཐོས་དང་བསམ་པའི་ཤེས་རབ་ཀྱིས། །མཁས་རྣམས་དགྱེས་པ་བསྐྱེད་དེར་གསོལ་བ་འདེབས། །དམ་པས་བྱིན་རླབས་དབེན་པའི་སྒྲུབ་གནས་སུ། །ཐུན་མོང་ལམ་གྱི་རིམ་པས་རྒྱུད་སྦྱངས་ནས། །བསྐྱེད་རྫོགས་རྣམ་འབྱོར་ཟབ་མོས་ལྷན་སྐྱེས་ཀྱི། །ཡེ་ཤེས་རྒྱས་པར་མཛད་ལ༴ རྒྱལ་བས་ལུང་བསྟན་ཀུན་མཁྱེན་ཨེ་ཝྃ་པའི། །ཆོས་ཀྱི་ཁྲི་ལ་བགྲང་བྱ་བཅུ་ཕྲག་བར། །ངོ་མཚར་མཁས་པའི་བགྱི་བས་ཐུབ་པའི་བསྟན། །ཉིན་བཞིན་གསལ་བར་མཛད་ལ༴ སླར་ཡང་བོད་ཆེན་ལྗོངས་ཀྱི་འཁོར་ལོས་བསྒྱུར། །སྡེ་བཞི་དགེ་བཅུའི་ནོར་བུའི་ཅོད་པན་རྩེར། །ཞབས་སེན་བཀྲ་ཤིས་རེ་ཁཱ་བཀོད་མཛད་ནས། །བསྟན་འགྲོའི་ཕན་བདེ་སྤེལ་ལ༴ ཁྱད་པར་རྣལ་འབྱོར་དབང་ཕྱུག་ས་སྐྱ་པའི། །སྙན་བརྒྱུད་ཚད་མ་བཞི་ལྡན་གདམས་པས་མཚོན། །ཟབ་རྒྱས་དམ་པའི་ཆོས་ཀྱིས་རིགས་ཅན་གསུམ། །རྣམ་གྲོལ་གོ་འཕང་བཀོད་ལ༴ ཡོངས་རྫོགས་བསྟན་པའི་མངའ་བདག་ཐམས་ཅད་མཁྱེན། །དཔལ་ལྡན་ས་སྐྱའི་འཇམ་མགོན་ཡབ་སྲས་སོགས། །གངས་ཅན་མཁས་གྲུབ་ཀུན་གྱིས་ཕྱག་བྱས་ཤིང་། །གསུང་གི་བདུད་རྩི་བཞེས་ལ༴ བརྟན་མཁས་ཚུལ་ཁྲིམས་དྲི་ཡིས་ཕྱོགས་ཀུན་ཁྱབ། །གཞན་ཕན་བྱང་ཆུབ་སེམས་གཉིས་གཏིང་ནས་འབྱོངས། །ཐ་མལ་འཁྲུལ་སྣང་ལྷ་དང་ཡེ་ཤེས་སུ། །ཡོངས་ཤར་གྲུབ་པའི་དབང་པོར༴ བརྩེ་ཆེན་བརྙེས་པ་བཟང་པོའི་རིང་ལུགས་ལ། །གཞན་དྲིང་མི་འཇོག་ཤེས་ནས་དད་ཐོབ་བཞིན། །རིས་མེད་བསྟན་ལ་དག་པའི་སྣང་བ་ཡིས། །བསྔགས་པའི་མེ་ཏོག་འཐོར་ལ༴ རབ་འབྱམས་ལྷག་པའི་ལྷ་ཡིས་རྗེས་བཟུང་ཞིང་། །ཇི་ལྟ་ཇི་སྙེད་ཤེས་བྱ་ཀུན་མཁྱེན་ཀྱང་། །ཡོན་ཏན་སྦས་པའི་ངང་ཚུལ་ལྷུར་མཛད་ཕྱིར། །རྣམ་ཐར་བསམ་མི་ཁྱབ་ལ༴ སླར་ཡང་ཇི་སྲིད་བསྐལ་པ་རྒྱ་མཚོའི་བར། །ཞབས་པད་རྡོ་རྗེའི་ཁམས་སུ་འཚོ་གཞེས་ཤིང་། །ཆོས་ཀྱི་འཁོར་ལོ་རྟག་ཏུ་བསྐོར་བ་ཡི། །སྐལ་བཟང་ནུབ་པ་མེད་པར་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་གཞན་དེང་ནས་བྱང་ཆུབ་སྙིང་པོའི་བར། །རྡོ་རྗེ་འཆང་དངོས་བླ་མས་རྗེ་བཟུང་ཞིང་། །ཡེ་ཤེས་གཟིགས་པས་རྟག་ཏུ་སྐྱོང་བར་ཤོག །གང་གི་དྲིན་གྱིས་མངོན་མཐོ་ངེས་ལེགས་ཀྱི། །དགེ་ལེགས་མཐའ་དག་གཅིག་ཅར་རྫོགས་པ་ལས། །རྒྱལ་བ་སྲས་བཅས་དགྱེས་པའི་ཕྲིན་ལས་ཀྱིས། །རང་གཞན་དོན་གཉིས་འགྲུབ་པར་བྱིན་གྱིས་རློབས། །ཅེས་ཀུན་མཁྱེན་ཨེ་ཝྃ་པའི་ཆོས་ཀྱི་ཁྲི་ལ་འཁོར་ལོས་སྒྱུར་བའི་མཁན་རབས་བཞི་བཅུ་རྩ་དྲུག་པ་བྲང་ཏི་མཁས་པའི་རིགས་འཁྲུངས་ཐར་རྩེ་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོའི་ཞབས་ཀྱི་ཐུན་མོང་གི་རྣམ་པར་ཐར་པ་ལ་སྒྲོ་འདོགས་སྐུར་འདེབས་ཀྱི་མཐའ་སྤངས་ཏེ། མ་བཅོས་པ་ཉིད་རྒྱན་གྱི་དམ་པར་བྱས་ནས་ཅུང་ཟད་བསྔགས་པའི་ཚིགས་སུ་བཅད་པ་འདིའང་། །རྗེ་དེ་ཉིད་ཀྱི་བཀའ་འབངས་ཐ་ཤལ་འཁོས་མེད་ཀྱི་བྱ་བྲལ་མ་ཎི་བ་འཇམ་དབྱངས་མཁྱེན་བརྩེའི་དབང་པོས་ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ཨེ་ཝཾ་ཆོས་ལྡན་གྱི་བླ་བྲང་ཐར་པ་རྩེར་ཞི་བ་ཞེས་པ་ས་མོ་བྱའི་ལོའི་ཆོ་འཕྲུལ་གྱི་ཟླ་བའི་དཀར་ཕྱོགས་ཀྱི་རྒྱལ་བ་གཉིས་པར་བྲིས་ཏེ་མངོན་པར་ཤེས་བཞིན་དུ་གསོལ་བ་བཏབ་པ་དགེ་ལེགས་སུ་གྱུར་ཅིག །

[edit]

byams pa kun dga' bstan 'dzin gyi rnam thar gsol 'debs byin rlabs bdud rtsi'i sprin mdzes/__ mkhan chen thams cad mkhyen pa byams pa kun dga' bstan 'dzin gyi rnam thar gsol 'debs byin rlabs bdud rtsi'i sprin mdzes zhes bya ba bzhugs so/__/rdo rje 'chang dbang ye shes las byung ba'i/_/byamaXs pa'iX thugs rjes 'gro rnams sgrol ba'i slad/__/kun dgaX'i mtshan dper shar ba'i sgyu 'phrul gyis/__/bstanaX pa'i rgyal mtshan 'dzinaX la gsol ba 'debs/__/mgon khyod gdod nas zhi ba mchog brnyes kyang /__/rmad byung snying rje bdud rtsi'i dpyid dpal gyis/_/dam pas bsngags pa'i rigs kyi dga' tshal du/__/gzugs sku'i ljon bzang rab byung bcu gsum pa'i me sprel lor/__'khrungs la gsol ba=__thog ma nyid nas nges par 'byung ba dang /_/rigs dang brtse ba'i me tog mdzes 'bar bas/__/phyogs bral dpyod ldan 'dus pa'i tshogs rnams kyi/__/brtan pa gcig car 'phrog la=__rdo rje 'chang dngos nam mkha'i mtshan can las/__/sdom pa gsum gyi bka' drin legs nos shing /__/zab rgyas sde snod rgyud sde rgya mtsho yis/__/smin grol lam bzang gsan la=__gzhan yang ris med dge ba'i bshes gnyen mchog__/nyi shu rtsa bzhi gus pas nyer bsten nas/__/mang du thos dang bsam pa'i shes rab kyis/__/mkhas rnams dgyes pa bskyed der gsol ba 'debs/__/dam pas byin rlabs dben pa'i sgrub gnas su/__/thun mong lam gyi rim pas rgyud sbyangs nas/__/bskyed rdzogs rnam 'byor zab mos lhan skyes kyi/__/ye shes rgyas par mdzad la=__rgyal bas lung bstan kun mkhyen e wa~M pa'i/__/chos kyi khri la bgrang bya bcu phrag bar/_/ngo mtshar mkhas pa'i bgyi bas thub pa'i bstan/__/nyin bzhin gsal bar mdzad la=__slar yang bod chen ljongs kyi 'khor los bsgyur/__/sde bzhi dge bcu'i nor bu'i cod pan rtser/__/zhabs sen bkra shis re khA bkod mdzad nas/__/bstan 'gro'i phan bde spel la=__khyad par rnal 'byor dbang phyug sa skya pa'i/__/snyan brgyud tshad ma bzhi ldan gdams pas mtshon/__/zab rgyas dam pa'i chos kyis rigs can gsum/__/rnam grol go 'phang bkod la=__yongs rdzogs bstan pa'i mnga' bdag thams cad mkhyen/__/dpal ldan sa skya'i 'jam mgon yab sras sogs/__/gangs can mkhas grub kun gyis phyag byas shing /__/gsung gi bdud rtsi bzhes la=__brtan mkhas tshul khrims dri yis phyogs kun khyab/__/gzhan phan byang chub sems gnyis gting nas 'byongs/__/tha mal 'khrul snang lha dang ye shes su/__/yongs shar grub pa'i dbang por=__brtse chen brnyes pa bzang po'i ring lugs la/__/gzhan dring mi 'jog shes nas dad thob bzhin/__/ris med bstan la dag pa'i snang ba yis/__/bsngags pa'i me tog 'thor la=__rab 'byams lhag pa'i lha yis rjes bzung zhing /__/ji lta ji snyed shes bya kun mkhyen kyang /__/yon tan sbas pa'i ngang tshul lhur mdzad phyir/__/rnam thar bsam mi khyab la=__slar yang ji srid bskal pa rgya mtsho'i bar/__/zhabs pad rdo rje'i khams su 'tsho gzhes shing /__/chos kyi 'khor lo rtag tu bskor ba yi/__/skal bzang nub pa med par gsol ba 'debs/__/de ltar gsol ba btab pa'i byin rlabs kyis/__/bdag gzhan deng nas byang chub snying po'i bar/__/rdo rje 'chang dngos bla mas rje bzung zhing /__/ye shes gzigs pas rtag tu skyong bar shog__/gang gi drin gyis mngon mtho nges legs kyi/__/dge legs mtha' dag gcig car rdzogs pa las/__/rgyal ba sras bcas dgyes pa'i phrin las kyis/__/rang gzhan don gnyis 'grub par byin gyis rlobs/__/ces kun mkhyen e wa~M pa'i chos kyi khri la 'khor los sgyur ba'i mkhan rabs bzhi bcu rtsa drug pa brang ti mkhas pa'i rigs 'khrungs thar rtse rdo rje 'chang byams pa kun dga' bstan 'dzin bkra shis grags pa'i rgyal mtshan dpal bzang po'i zhabs kyi thun mong gi rnam par thar pa la sgro 'dogs skur 'debs kyi mtha' spangs te/__ma bcos pa nyid rgyan gyi dam par byas nas cung zad bsngags pa'i tshigs su bcad pa 'di'ang /__/rje de nyid kyi bka' 'bangs tha shal 'khos med kyi bya bral ma Ni ba 'jam dbyangs mkhyen brtse'i dbang pos yon tan rin po che du ma'i 'byung gnas dpal e waM chos ldan gyi bla brang thar pa rtser zhi ba zhes pa sa mo bya'i lo'i cho 'phrul gyi zla ba'i dkar phyogs kyi rgyal ba gnyis par bris te mngon par shes bzhin du gsol ba btab pa dge legs su gyur cig__/