JKW-KABUM-23-'A-001-050

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 50, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

རང་ཚུལ་དྲང་པོར་བརྗོད་པའི་གླུ་བདེན་མེད་སྒྱུ་མའི་རོལ་མོ། རང་ཚུལ་དྲང་པོར་བརྗོད་པའི་གླུ་དབྱངས་བདེན་མེད་སྒྱུ་མའི་རོལ་མོ་ཞེས་བྱ་བ། ཨ་ཧོ། གཅིག་པུ་ཡང་མ་ཡིན་འཁོར་འདས་ཀུན་ཁྱབ་ཅིང་། །དུ་མར་ནི་མི་གནས་བློ་བྲལ་གྱི་གཤིས་ལུགས། །བསམ་བརྗོད་ལས་རྣམ་གྲོལ་གཉུག་མ་ཡི་སྦུབས་སུ། །ངང་བཞག་གི་རིག་པས་ཅེར་མཐོང་དུ་འདུད་དོ། །སྔོན་སྨོན་གྱི་ས་བོན་རྣམ་དཀར་ལ་བཤེས་པས། །དུས་འདི་རུ་དལ་འབྱོར་མི་ལུས་མཆོག་ཐོབ་ཅིང་། །རང་གཞན་གྱི་གྲུབ་མཐའི་གནད་གསང་ཀུན་མ་ལུས། །སོ་སོ་རུ་འབྱེད་པའི་བློ་གྲོས་ཀྱང་ཐོབ་བོ། །རིས་མེད་ཀྱི་དམ་པའི་རྣམ་ཐར་ལ་བསམ་ཚེ། །ཕྱོགས་མེད་ཀྱི་དག་སྣང་ཁྱབ་བརྡལ་དུ་སྐྱེས་ནས། །བཟོད་མེད་ཀྱི་དད་གསུམ་སྙིང་དབུས་ནས་འབར་ཚེ། །དོན་མེད་ཀྱི་སྒྲོ་སྐུར་རང་ས་རུ་ཞིག་སོང་། །དགྲ་གཉེན་ལ་ཆགས་སྡང་རྟོག་པ་ཀུན་སྤངས་ཏེ། །གཟའ་གཏད་དང་བྲལ་བའི་དབུ་མ་རུ་གནས་པས། །རང་གཞན་གྱི་འགྲོ་བས་བྱམས་པ་འདི་མཐོང་ཚེ། །ཉམས་དགའ་ཡི་ཤེས་པ་རྩིས་གདབ་དང་བྲལ་ལོ། །ཁྱད་པར་དུ་ཡེ་ཤེས་སྐུ་ཅན་གྱི་བླ་མ། །རིག་འཛིན་གྱི་དབང་ཕྱུག་འཇིགས་མེད་ཀྱི་གླིང་པའི། །བྱིན་རླབས་ཀྱི་རོལ་བ་སྙིང་དབུས་སུ་ཐིམ་པས། །ཟབ་གསང་གི་ལམ་གནད་ཐོལ་བྱུང་དུ་ཤར་རོ། །ཡིད་ཆེས་པའི་ཆོས་ཀྱི་གཏེར་མཛོད་དུ་སོང་ཞིང་། །མགྲིན་པ་འདི་གླུ་ཡི་རོལ་མོ་རུ་འཁྲོལ་བས། །ཡང་དག་གི་ལམ་མཆོག་ལྷུག་པ་རུ་འཇོ་ཚེ། །སྐལ་བཟང་ཀུན་དགའ་བའི་དགའ་སྟོན་པ་སྦྱར་རོ། །དེ་སྐད་དུ་གང་ཤར་རང་གྲོལ་གྱི་གླུ་དབྱངས། །བདེན་རྫུན་དང་བྲལ་བར་བླངས་པ་ཡི་དགེ་བས། །འབྲེལ་ཐོགས་དང་མོས་གུས་ལྡན་པ་ཡི་ཚོགས་ཀུན། །རང་སྣང་གི་ཡེ་ཤེས་མངོན་གྱུར་དུ་བརྙེས་ཤོག །ཅེས་པའང་དད་དམ་གྱི་སྣང་བ་མི་ཕྱེད་བའི་བརྟུལ་ཞུགས་དགེ་བ་ཅན་ཨོ་ཌི་ཡཱ་ནའི་ཆེད་དུ་བརྗོད་པའོ། ། ༈

[edit]

rang tshul drang por brjod pa'i glu bden med sgyu ma'i rol mo/__ rang tshul drang por brjod pa'i glu dbyangs bden med sgyu ma'i rol mo zhes bya ba/__a ho/__gcig pu yang ma yin 'khor 'das kun khyab cing /__/du mar ni mi gnas blo bral gyi gshis lugs/__/bsam brjod las rnam grol gnyug ma yi sbubs su/__/ngang bzhag gi rig pas cer mthong du 'dud do/__/sngon smon gyi sa bon rnam dkar la bshes pas/__/dus 'di ru dal 'byor mi lus mchog thob cing /__/rang gzhan gyi grub mtha'i gnad gsang kun ma lus/__/so so ru 'byed pa'i blo gros kyang thob bo/__/ris med kyi dam pa'i rnam thar la bsam tshe/__/phyogs med kyi dag snang khyab brdal du skyes nas/__/bzod med kyi dad gsum snying dbus nas 'bar tshe/__/don med kyi sgro skur rang sa ru zhig song /__/dgra gnyen la chags sdang rtog pa kun spangs te/__/gza' gtad dang bral ba'i dbu ma ru gnas pas/__/rang gzhan gyi 'gro bas byams pa 'di mthong tshe/__/nyams dga' yi shes pa rtsis gdab dang bral lo/__/khyad par du ye shes sku can gyi bla ma/__/rig 'dzin gyi dbang phyug 'jigs med kyi gling pa'i/__/byin rlabs kyi rol ba snying dbus su thim pas/__/zab gsang gi lam gnad thol byung du shar ro/__/yid ches pa'i chos kyi gter mdzod du song zhing /__/mgrin pa 'di glu yi rol mo ru 'khrol bas/__/yang dag gi lam mchog lhug pa ru 'jo tshe/__/skal bzang kun dga' ba'i dga' ston pa sbyar ro/__/de skad du gang shar rang grol gyi glu dbyangs/__/bden rdzun dang bral bar blangs pa yi dge bas/__/'brel thogs dang mos gus ldan pa yi tshogs kun/__/rang snang gi ye shes mngon gyur du brnyes shog__/ces pa'ang dad dam gyi snang ba mi phyed ba'i brtul zhugs dge ba can o Di yA na'i ched du brjod pa'o/___/__!