DKYD-KABUM-06-CHA-011

🚧 This website is under continued development. We appreciate your patience!

Previous Text Back to Volume Page Next Text

Wylie title
Location	mdo mkhyen brtse bka' 'bum Volume 6, Text 11, Pages (Folios to )
Author	མདོ་མཁྱེན་བརྩེ་
Less details More details
Tertön	མདོ་མཁྱེན་བརྩེ་ (Mdo mkhyen brtse)
Citation
Genre
Cycle	འཕགས་མཆོག་གར་དབང་སྒྲུབ་སྐོར་ ('phags mchog gar dbang sgrub skor)
Deity	thugs rje chen po

[edit]

ཧྲི།ཿ འཕགས་མཆོག་གར་དབང་སྒྲུབ་སྐོར་ལས༔ སྤྲོས་བཅས་སྤྲོས་མེད་སྒྲུབ་ཐབས་བཞུགསཿ ༑༑༑༑༑༑༑ སྟོན་པ་འོད་མི་འགྱུར་བ་ལ་ཕྱག་འཚལ་ལོཿ འཕགས་མཆོག་ཐུགས་རྗེ་ཆེན་པོ་གར་གྱི་དབང་ཕྱུག་འཁོར་བ་ཡོངས་གྲོལ་སྒྲུབ་པ་ལཿ སྤྲོས་བཅས་དང་སྤྲོས་མེད་གཉིས་སུ་ཡོད་པ་ལསཿ དང་པོ་སྤྲོས་བཅས་ཀྱི་ལུགས་ལྟར་ནཿ བཀྲ་ཤིས་ཡིད་མཐུན་གྱི་གནས་སུ་སྟེགས་བུ་གཙང་མའི་ཁར་རྡུལ་ཚོན་རས་བྲིས་སམ་ཚོམ་བུའི་དཀྱིལ་འཁོར་གང་རུང་གི་དབུས་སུཿ མན་ཤེལ་སྐུ་རྟེན་ཐོད་པ་མཚན་ལྡན་དང་བཅས་པ་བཤམས་ལཿ གཏོར་མ་སྨན་རཀ་ཕྱི་ནང་གསང་མཆོད་སོགས་ཚོགས་གཏོར་མཆོད་པས་མཐའ་བསྐོར་ཞིང་ཿ ཕྱི་རྒྱུད་འཇིག་རྟེན་པ་ལ་གཏོར་མ་སྦྱིནཿ སྐྱབས་སེམས་དང་ཡན་ལག་བཅུ་བ་སྔོན་དུ་འགྲོ་བས་ལྷའི་བསྐྱེད་རིམ་ལ་འཇུག་ཅིང་ཿ དེའང་དེ་བཞིན་ཉིད་ཀྱི་ཏིང་ངེ་འཛིན་གྱི་རོལ་རྩལ་སྙིང་རྗེའི་སྒྱུ་མའི་རང་གདངས་ལསཿ རྒྱུའི་རིག་པའི་ངོ་བོ་ཡི་གེ་ཧྲིཿདམར་པོ་རིང་ཆ་ཚེག་དྲགས་དང་བཅས་པ་འོད་ལྔའི་ཟེར་མདངས་ལྡན་པར་བསྐྱེད་ལཿ དེའི་འོད་ཀྱིས་སྣོད་བཅུད་སྦྱང་ཿ སླར་ཡང་ཕྱི་སྣོད་རི་བོ་པོ་ཊ་ལ་ཕྱི་ཤེལ་དཀར་གྱི་མཆོད་རྟེན་གྱི་རྣམ་པ་ལཿ སྒོ་གྲུ་རྟ་བབས་ཆོས་འཁོར་རི་དྭགསཿ འདོད་སྣམ་ཕ་གུ་དྲྭ་ཕྱེད་མདའ་ཡབ་ཆོས་འཁོར་གདུགས་ཏོག་སོགས་རྒྱན་བཀོད་ཕུན་སུམ་ཚོགས་པཿ ནང་རང་བྱུང་སྤྲུལ་པའི་གཞལ་ཡས་ཁང་མཚན་ཉིད་ཡོངས་སུ་རྫོགས་པའི་དབུས་སུ་འཁོར་བའི་སྐྱོན་གྱི་མ་གོས་པའི་པདྨ་དཀར་པོ་འདབ་མ་སྟོད་དང་ལྡན་པའི་སྟེང་དུ་འཁོར་བའི་མ་རིག་པའི་མུན་པ་བསལ་ཕྱིར་ཉི་མའི་གདན་དང་ཿ ཉོན་མོངས་པའི་ཚ་གདུང་སེལ་ཕྱིར་ཟླ་བའི་གདན་ཡངས་པའི་ཁརཿ རྒྱུའི་རིག་པ་ཧྲཱི༔ཡིག་དམར་པོ་བབསཿ འོད་ཟེར་ཡར་འཕྲོསཿ འོད་ཟེར་དཔག་ཏུ་མེད་པའི་རྩེ་མོ་ལས་མཆོད་པའི་ལྷ་མོ་ཕྱི་ནང་གསང་མཆོད་ཐོགས་པ་དཔག་ཏུ་མེད་པ་འཕྲོས་པས་ཕྱོགས་བཅུའི་རྒྱལ་བ་སྲས་དང་བཅས་པ་མཆོདཿ སྐུ་གསུང་ཐུགས་མཉེས་ཤིང་ཚིམ་ནས་སླར་ཡང་སྐུ་གསུང་ཐུགས་ཀྱི་བྱིན་རླབས་དངོས་གྲུབ་ཐབས་ཅད་འོད་ཟེར་གྱི་རྣམ་པར་བསྡུས་ནས་ཧྲཱིཿཡིག་ལ་ཐིམཿ སླར་ཡང་འོད་ཟེར་མར་འཕྲོས་པས་འགྲོ་བའི་ལས་ཉོན་སྡིག་སྒྲིབ་སྡུག་བསྔལ་དང་བཅས་པ་སྦྱང་ཿ འབྱུང་ལྔའི་དྭངས་བཅུད་བསྡུས་ནས་ཧྲཱི༔ཡིག་ལ་ཐིམཿ བཀྲག་མདངས་གཟི་བརྗིད་རབ་ཏུ་རྒྱསཿ ཧྲཱིཿཡིག་འོད་དུ་ཞུ་བ་ལས་སྐད་ཅིག་གིས་འཕགས་མཆོག་ཐུགས་རྗེ་ཆེན་པོ་གར་གྱི་དབང་ཕྱུག་དཀར་ལ་དམར་པའི་མདངས་ཆགས་པ་དར་གྱི་སྟོད་གཡོགས་སྨད་དཀྲིས་ཅནཿ རུས་པ་དང་རིན་པོ་ཆེའི་རྒྱན་ཆས་བརྒྱན་ཅིང་སེམས་ཉིད་ངལ་བསོའི་བཞུགས་སྟངས་ཅནཿ ཤེལ་དཀར་གྱི་ཕྲེང་བ་དང་པདྨ་དཀར་པོའི་ཡུ་བ་བསྣམས་པ་དབུ་གཙུག་ན་རིགས་བདག་ཨ་མི་དྷེ་ཝས་བརྒྱན་ཅིངཿ རི་དྭགས་པགས་པས་ནུ་མ་གཡོན་པ་བཀབ་པར་བསྐྱེདཿ དེའི་ཕྱོགས་བཞིར་པདྨ་དཀར་པོ་འདབ་བཞིའི་སྟེང་དུ་པདྨ་ཕྱོགས་མདོག་འདབ་བརྒྱད་ཀྱི་ཁར་ཟླ་བའི་དཀྱིལ་འཁོར་ཡངས་པའི་དབུས་སུ་ཧཾ་དཀར་སེར་དམར་ལྗང་བཞི་འོད་དུ་ཞུ་བ་ལས་རྗེ་བཙུན་སྒྲོལ་མ་རིགས་བཞི་དཀར་སེར་དམར་ལྗང་མདོག་ཅན་དར་གྱི་སྟོད་གཡོགས་སྨད་དཀྲིས་ཅན་རིན་པོ་ཆེའི་རྒྱན་གྱི་བརྒྱན་པཿ ཕྱག་གཡས་མཆོག་སྦྱིན་དང་ཿ གཡོན་དཀོན་མཆོག་གསུམ་མཆོད་ཀྱི་ཕྱག་རྒྱས་པདྨའི་ཡུ་བ་བསྣམས་པཿ ཞབས་གཉིས་བརྐྱང་བསྐུམ་དཔའ་མོའི་བཞུགས་སྟངས་ཅནཿ རིན་པོ་ཆེའི་སྲོག་ཞུས་མཛེས་པར་བརྒྱན་པའོཿ དེའི་ཕྱིར་རྩ་གསུམ་རིག་འཛིན་དཔའ་བོ་ཌཱཀྐིའི་ཚོགས་དང་ཿ ནམ་མཁར་སངས་རྒྱས་བྱང་སེམས་སྤྲིན་ཕུང་གཏིབ་པ་ལྟར་བཞུགས་བར་བསམས་ལཿ གཙོ་བོའི་གནས་གསུམ་ཨོཾ་དཀར་ཨཱཿདམར་ཧཱུྃ་མཐིང་གསུམ་ལས་འོད་ཟེར་འཕྲོས་པསཿ ཕྱོགས་བཅུའི་ཞིང་ཁམས་རབ་འབྱམས་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་དང་ཿ ཁྱད་པར་པོ་ཊ་ལ་ནས་ཐུགས་རྗེ་ཆེན་པོའི་ལྷ་ཚོགས་སྤྱན་དྲངས་ནས་གཉིས་སུ་མེད་བར་བསྟིམཿ སྤྱན་འདྲེན་བཞུགས་གསོལ་ཕྱག་འཚལ་མཆོད་བསྟོད་བྱཿ རང་གི་ཐུགས་ཀར་ཡེ་ཤེས་སེམས་དཔའ་དམར་གསལ་པདྨ་རཱ་གའི་མདངས་དང་ལྡན་པཿ ཞགས་རྡོ་རྗེའི་སྐྱིལ་ཀྲུང་དུ་བཞུགས་པ་ཕྱག་གཉིས་ཐུགས་ཀར་ཐལ་མོ་སྦྱར་བའི་ཐུགས་ཀར་པདྨ་དཀར་པོ་འདབ་མ་བརྒྱད་པའི་ལྟེ་བར་ཉི་ཟླའི་གའུ་ཁ་སྦྱོར་བའི་དབུས་སུུ་ཧྲཱི༔ ཡིག་དཀར་པོ་བཀྲག་མདངས་ལྡན་པ་རིང་ཆ་ཚེག་དྲག་དང་བཅས་པའི་མཐར༔ ཨོཾ་མ་ཎི་པདྨེ་ཧཱུྃཿ ཞེས་འབྲུ་དྲུག་ཡིག་མགོ་ནང་བསྟན་གཡས་སུ་བཀོད་པ་སྔགས་ཀྱི་རང་སྒྲ་དང་བཅས་པ་དམིགས་ལ་ལྷ་སྔགས་ཏིང་འཛིན་གསུམ་གསལ་ཐེབས་བར་བཟླས་པ་ལ་འབད༔ གསལ་སྣང་ཐོན་པའི་ཚེ་ཡིག་དྲུག་གཡས་སུ་བཀོད་པ་གཡོན་དུ་དྲག་ཏུ་འཁོར་བའི་རྐྱེན་གྱིས་ཧྲཱིཿ ལས་འོད་ཟེར་འཕྲོས་པས་རྒྱལ་བ་སྲས་དང་བཅས་པ་ལ་མཉེས་མཆོད་ཕུལ་སྐུ་གསུང་ཐུགས་ཀྱི་བྱིན་རླབས་བསྡུས་ནས་ཧྲཱི༔ ལ་ཐིམ་པར་བསམ་ཞིང་བཟླཿ སླར་ཡང་འོད་ཀྱི་འཕྲོ་འདུ་ལས་སྣང་བ་ལྷཿ སྒྲ་གྲགས་སྔགསཿ དྲན་རྟོག་ཐུགས་ཀྱི་ལམ་ཁྱེར་གནད་དུ་ཕྱིན་བར་བཟླའོཿ སླར་ཡང་གནད་ཀྱི་ཉམས་ལེན་སྒྱུ་མ་ལམ་ཁྱེར་དང་གཟུང་འཛིན་དབྱིངས་གྲོལ་ལྟ་བའི་ངང་ནས་བཟླས་པ་སྒྲུབ་པའི་གཞུང་ངོ་ཿ གཞན་ཡང་ལས་བཞིའི་འགྲོ་དོན་མཐའ་སྡུད་དང་༔ ལས་སྦྱོར་དམིགས་པས་ཁ་བསྒྱུར་བའོ༔ ཁྱད་བར་ཆོས་ཉིད་སྤྲོས་པ་དང་བྲལ་བའི་དབྱིངས་འོད་གསལ་འདུས་མ་བྱས་པའི་རང་གདངས་སྐྱོང་བ་གནད་དོཿ མཐར་བདག་དབང་ལེན་པ་དང་བསྐང་བ་ཚོགས་མཆོད་རྒྱས་པར་བྱཿ བཀའ་གཏེར་གྱི་སྲུང་མ་རྣམས་ལ་གཏོར་མ་སྦྱིན་པར་བྱའོཿ ༈ གཉིས་པ་སྤྲོ་པ་མེད་པའི་ཉམས་ལེན་ནིཿ ཡུལ་དུས་གནས་དང་དཀྱིལ་འཁོར་སྒྲུབ་རྫས་ལ་མ་ལྟོས་པར་རིག་པ་ཡེ་ནས་རྣམ་པར་དག་པ་ཐུགས་རྗེ་ཆེན་པོའི་སྐུར་རྫོགས་པ་སྟེཿ དེའི་རང་གདངས་སྙིང་རྗེ་ཆེན་པོས་འགྲོ་བའི་དོན་འབད་མེད་དུ་སྒྲུབ་པ་སྟེཿ སྤྲོས་བཅས་ལ་མ་ལྟོས་པར་རང་ཉིད་ལྷ་ལ་ལྷ་ཉིད་རང་གི་ངོ་བོར་རྫོགས་པ་ཡུལ་ལྔའི་སྣང་ཆ་མཆོད་པའི་རྫས་དང་བྱ་བྱེད་ཆོས་ཉིད་ཀྱི་རོལ་གར་དུ་ཤེས་པས་སྤྲོས་བཅས་ཀྱི་འཛིན་པ་ལས་གྲོལ་ཞིང་སྤྲོས་མེད་རྒྱུན་གྱི་རྣལ་འབྱོར་ཞེས་བྱ་བའོཿ དེའང་སྙིང་རྗེ་ཆེན་པོ་ནི་ཉམས་ལེན་གྱི་གཞུང་དངོས་གཞི་སྟེ་འབྱོང་བར་བྱའོཿ དེ་ལྟར་བསྒྲུབས་པས་རབ་དངོསཿ འབྲིང་ཉམསཿ ཐ་མ་རྨི་ལམ་དུ་འཕགས་པས་ཞལ་གཟིགས་ཤིང་ལུང་སྟོནཿ དབང་དང་བྱིན་རླབས་ཐོབ་པར་ཐེ་ཚོམ་མེད་ཅིང་སྐྱེ་འདིར་འཛིན་ཞེན་གྲོལ་ཞིང་ཿ སྙིང་རྗེ་ཆེན་པོས་རྒྱུད་བརླན་ཞིང་པོ་ཊ་ལའམ་པདྨ་འོད་དུ་གྲོལ་བར་ཐེ་ཚོམ་མེད་དོཿ གཞན་ཡང་ཚེ་རབས་དྲན་པ་དང་ཿ མངོན་ཤེས་རྫུ་འཕྲུལ་ཐུན་མོང་གི་ཡོན་ཏན་བརྗོད་ཀྱིས་མི་ལོངས་པར་ཐོབཿ ཤིན་ཏུ་ཟབ་པའི་མཐར་ཐུག་པདྨ་བདག་གི་སྙིང་དང་འདྲ་བའི་གདམས་ངག་སྟེཿ ད་ལྟ་རྗེ་འབངས་ཚོགས་ལ་གཏདཿ མ་འོངས་ང་སྤྲུལ་སྙིང་གི་བུ་དང་འཕྲད་ནས་སེམས་ཅན་ཐསམ་ཅད་ཡང་དག་ལམ་དུ་འགོད་པར་ཤོགཿ ས་མ་ཡཱཿ རྒྱ་རྒྱ་རྒྱཿ གཏེར་རྒྱཿ སྦས་རྒྱཿ ཟབ་རྒྱཿ ཨི་ཐིཿ གུ་ཧྱཿ རིག་འཛིན་མཐུ་སྟོབས་བདུད་འདུལ་རྩལ་གྱིས་མཁའ་དབྱིངས་རཀྟའི་མཚོ་ཀློང་ནས་སྤྱན་དྲངས་པའོཿ ཡི་གེ་པ་ནི་རང་སློབ་དཔལ་གྱི་སེངྒེས་སོ།།