DKYD-KABUM-06-CHA-010

🚧 This website is under continued development. We appreciate your patience!

Previous Text Back to Volume Page Next Text

Wylie title
Location	mdo mkhyen brtse bka' 'bum Volume 6, Text 10, Pages (Folios to )
Author	མདོ་མཁྱེན་བརྩེ་
Less details More details
Tertön	མདོ་མཁྱེན་བརྩེ་ (Mdo mkhyen brtse)
Citation
Genre
Cycle	འཕགས་མཆོག་གར་དབང་སྒྲུབ་སྐོར་ ('phags mchog gar dbang sgrub skor)
Deity	thugs rje chen po

[edit]

ཧྲི།ཿ འཕགས་མཆོག་གར་དབང་སྒྲུབ་སྐོར་ལས༔ གསང་བ་ཐབས་ཀྱི་ལམ་མཆོག་བཞུགསཿ ༑༑༑༑༑༑༑༑ །བདེ་ཆེན་ཆགས་པ་ཆེན་པོའི་སྐུརཿ ཡོངས་ཤར་དབང་གི་ལྷ་ལ་འདུདཿ བགྲངས་ཡས་བསྐལ་པ་རྒྱ་མཚོ་རུཿ སྦྱང་མཐར་བྱང་ཆུབ་ཐོབ་འདོད་པཿ ཤིན་ཏུ་ཉམ་ཐག་དཀའ་ཚེགས་གནས༔ སྐྱེ་བ་ལྔ་བདུན་གསུམ་དག་ལས༔ གྲོལ་བར་འདོད་པའང་སྲིད་མཐའ་སྟེཿ ཇི་སྲིད་བར་མ་དོ་ཉིད་དུ༔ འཚང་རྒྱ་གསུངས་པའང་ཡུན་རིང་ཕྱིརཿ ཐབས་ཀྱི་ལམ་མཆོག་ལ་བརྟེན་ནསཿ སྐད་ཅིག་གཅིག་གིས་རྣམ་གྲོལ་ཆེརཿ སངས་རྒྱས་ཐོབ་པའི་མན་ངག་བསྟནཿ དེ་ལ་འདིར་གསང་བ་ལས་ཀྱང་ཆེས་གསང་བ་ཡང་གསང་བླ་ན་མེད་པ་ཐབས་ཀྱི་ལམ་ལ་བརྟེན་ནས་སྐད་ཅིག་གཅིག་གིས་གྲོལ་བར་བྱེད་པའི་མན་ངག་ཉམས་སུ་ལེན་པ་ལཿ ཐོག་མར་རྩ་འབྱོང་ཿ རླུང་ཆུནཿ ཐིག་ལེ་ལས་སུ་རུང་བར་བྱེད་ནས་ཆུ་སྲིན་གྲེ་འགགས་ཀྱི་ཕྱག་རྒྱའི་སྟོབསཿ ཐེམ་བུའི་མན་ངག་ལ་བརྟེན་ནས་རང་ལུས་ཐབས་ལྡན་འབྱོང་བར་བྱེད་པཿ སྒྲ་གཅན་བཤུད་རང་གི་ཤུ་ཏ་ཊས་མེའི་རྩ་བ་ནས་ཨིག་གི་སྒས་རྨ་བྱའི་སྟངས་ཀྱིས་བཟུང་ལཿ ཧིག་གི་སྒྲས་གོ་ལྡོག་ནམ་མཁའི་འཁོར་ལོར་བསྲེས་ཤིང་ཿ བྷ་ཧའི་བསྒྲམ་པའོཿ དེའང་ཉམས་ལེན་གྱི་མཐར་ཕྱིན་ན་རང་ལུས་ཐབས་ལྡན་གྱི་དྲོད་རྟགས་ཐོབ་བོཿ ས་མ་ཡཱཿ རྒྱ་རྒྱ་རྒྱཿ གཉིས་པ་གཞན་ལུས་ཐབས་ལྡན་ནིཿ དམ་ཚིག་དང་ལྡན་པའི་རྣལ་འབྱོར་པསཿ གསང་སྔགས་ཀྱི་དཀྱིལ་འཁོར་ཆེན་པོར་དབག་ནོད་ཅིང་ཿ བསྐྱེད་རྫོགས་ལ་དྲོད་རྟགས་ཐོབ་པའི་མཐརཿ རྡོ་རྗེ་སློབ་དཔོན་ལས་གནང་བ་ཐོབ་ཅིང་གསང་བའི་དབང་ནོད་པར་བྱས་ནས་བདེ་སྟོང་གི་ཡེ་ཤེས་ཉམས་སུ་ལེན་པར་བྱེད་དོཿ དེ་ལ་ཐོག་མར་ཕྱག་རྒྱ་བརྟག་པའི་རིམ་པ་པདྨ་ཅནཿ དུང་ཅན་མཿ རི་དྭགས་མིགཿ རི་མོ་ཅནཿ གླང་སྣ་མཿལྔ་སྟེ་རིགས་ལྔའི་མཚན་བརྟག་ཐུན་མོང་ལྟར་དུའོཿ ཐུན་མོང་མ་ཡིན་པ་ནི་ཡེ་ཤེས་མཁའ་འགྲོའི་མཚན་བརྟག་གནས་ལྔར་སྨེ་བས་མཚན་ཅིང་གཟུགས་མཛེས་ཡིད་དུ་འོང་བ་ལཿ ལུས་ཆེ་ཆུང་རན་ཞིང་དཀར་ལ་དམར་བའི་མདས་ཆགས་སྣུམ་བག་ཅན་ཅུང་ཟད་ཤ་རྩ་སྨུག་པའོཿ རྩའི་འབྲས་བུ་མིག་ཡིན་ལ་ཕྲ་ཞིང་མཛེས་པ༔ གདངས་སྐད་ཡིན་པས་སྙན་ཞིང་རྣ་བར་འཇེབ་པཿ དྲི་ཞིམ་ཞིང་རྣལ་འབྱོར་ལ་བརྩེ་བའོ༔ ནང་གི་རྟགས་ནི་བློ་ཆོས་ལ་ཕྱོགས་ཤིང་བྱང་ཆུབ་ཀྱི་སེམས་དང་ལྡན་པ་མིག་བཙུན་ཞིང་ཡིད་སྒོམ་པཿ བློ་གྲོས་ཆེ་ཞིང་གཏོར་ཕོད་ལ་དགའ་བཿ འཁོར་བ་ལ་ངེས་འབྱུང་ཤུགས་ཀྱིས་སྐྱེ་བའོཿ གསང་བའི་རྟགས་ནི་པདྨ་དོག་ཤིང་དྲོད་ཆེ་བཿ ཆགས་པ་རྒྱས་ཤིང་བདེ་བ་རྒྱས་པཿ རྣལ་འབྱོར་པ་ལ་མོས་ཤིང་མིག་ཟུར་གཡོ་བཿ གསང་སྤྱོད་དགའ་ཞིང་གསང་ཐུབ་པཿ རྣལ་འབྱོར་པ་དགྱེས་པར་སྐོང་ནུས་པའོཿ གཞན་ཡང་སྤྱི་དང་བྱེ་བྲག་གི་བརྟག་ཐབས་སྤྱི་བཞིན་ནོཿ དེ་ཡང་བྱེ་བྲག་གི་བརྟག་ཐབས་དམ་ཚིག་ལྡན་པའི་རྣལ་འབྱོར་པསཿ ཕྱག་རྒྱ་བླ་མའི་ལུང་དུ་བསྟན་པ་དང་ཿ མིན་ཀྱང་བླ་མ་ཡི་དམ་མཁའ་འགྲོས་ཚོགས་མཚོད་བྱཿ ཆོས་སྐྱོང་ལ་གཏོར་མ་གཏོང་ཿ རྟེན་འབྲེལ་དང་རྨི་ལམ་བརྟགས་ཤིང་བདེན་ཚིག་དམོད་པ་བོར་བས་ཇི་བཞིན་གསལ་བར་འགྱུར་རོཿ དེ་ཡང་ཐེ་ཚོམ་མེད་པར་གལ་ཆེ་ཞིང་ཿ ཐེ་ཚོམ་མང་ན་བདུད་ཀྱི་འཇུག་པའི་བསླུ་བ་ཡོད་དོཿ དེ་ལྟར་ལེགས་པར་བརྟགས་པའི་རིགས་མ་དེ་ཉིད་འགུགས་པའི་ཐབས་ཆོས་ཉིད་བསྲེ་ཞིང་དམིགས་པས་འགུགས་པ་དང་ཿ སྣ་ཚོགས་ཐབས་ཀྱིས་འགུགས་པར་བྱ་བའོཿ ཇི་བཞིན་ཁུག་ནས་དབང་གིས་སྨིན་པར་བྱེད་པ་དག་ནི་གལ་ཆེ་སྟེ་མ་སྨིན་པ་དང་ལྷག་པར་དད་པ་མེད་པ་དག་ནི་ཤིན་ཏུ་བསྟེན་མི་རུང་བར་སྤང་པར་བྱའོཿ དེ་ཉིད་ཇི་ལྟར་བསྟེན་པའི་ཚུལ་ནི་དབེན་པའི་གནས་སུ་བཅུད་ཅན་གྱི་ཟས་བརྟེན་ཞིང་ཿ ཁམས་འཕེལ་བའི་ཐབས་ལ་འབད་པ་ཆགས་པའི་གཏམ་དང་འོ་དང་འཁྱུད་རྒྱ་ནུ་མ་མཉེ་པ་སོགས་ཀྱིས་ཆགས་པ་རབ་ཏུ་རྒྱས་པར་བྱེད་ཅིང་མི་བཟོད་པར་གྱུར་ཚེ་རྡོ་རྗེ་དང་པདྨ་ལ་བལྟ་རེས་བྱས་པས་ཆགས་ཆུ་བྱུང་བ་འཇིབ་པས་ཁམས་ཤིན་ཏུ་རྒྱས་པར་འགྱུར་ལཿ དེ་ནས་གདན་པདྨ་ཉི་ཟླ་བསྒོམས་པའི་སྟེང་དུཿ རྣལ་འབྱོར་པ་ཕོ་མོ་རྟ་མགྲིན་ཡབ་ཡུམ་དུ་གསལ་བ་ལྷའི་འདུ་ཤེསཿ མཁའ་གསང་རྡོ་རྗེ་དང་པདྨ་གསལ་བ་ཕྱག་རྒྱའི་འདུ་ཤེསཿ ཐབས་དེ་ལ་བརྟེན་ནས་བདེ་བ་ཆེན་པོའི་ཡེ་ཤེས་ཉམས་སུ་མྱོང་བར་བྱེད་པ་ཆོས་ཀྱི་འདུ་ཤེས་ཏེཿ དེ་ལྟར་འདུ་ཤེས་གསུམ་ལྡན་གྱི་ཐ་མལ་ལས་ལྡོག་ཅིང་ཟབ་གསང་གི་ལམ་དུ་འཇུག་པའོཿ བློ་ཆགས་པའི་ངར་དང་བཅས་རྡོ་རྗེས་པདྨར་བསྣུན་ལ་ཡུམ་གྱིས་མི་བཟོད་པར་སྐད་གདངས་བྱུང་ན་རྩ་བཟང་བ་སྟེཿ དལ་བུའི་བསྐྱོད་པས་ལུས་བདེ་བས་ཚིམ་གྱིས་ཁྱབ་པ་སྟེཿ སྤྱི་བོ་ནས་ཁམས་གཡོས་པས་དགའ་བའི་ཡེ་ཤེས་ཞེས་བྱ་བའོཿ ཡང་བསྲུབ་པའི་རྐྱེན་གྱིས་ལུས་ཀུན་ལ་བདེ་བ་རབ་ཏུ་གཡོས་པས་མཆོག་ཏུ་དགའ་བའི་ཡེ་ཤེས་ཞེས་བྱ་བའོཿ མགྲིན་པར་བབ་པ་སྟེ་ཅུང་ཟད་ཆགས་པའི་སྟོབས་ཀྱིས་ཆེར་བསྐྱེད་པའི་བདེ་བར་མི་བཟོད་པའི་སྐད་གདངས་ཕྱུང་བ་སྙིངགར་ཐིག་ལེ་གཡོས་པས་དགའ་བྲལ་ཅེས་པའོཿ དེ་ནས་ཆགས་པ་ཤིན་ཏུ་མི་བཟོད་པའི་རྐྱེན་གྱིས་འདར་ཞིངརབ་ཏུ་བསྐྱོད་པའི་རྐྱེན་གྱིས་བདེ་བ་མི་བཟོད་པར་སྐྱེསཿ ཐིག་ལེ་ལྟེ་བར་གཡོས་པས་རྟོག་པ་རང་འགག་ཏུ་གྱུར་པས་རིག་པ་ཧ་ཕྱེད་དེ་བ་ལྷན་ཅིག་སྐྱེས་པའི་ཡེ་ཤེས་ངོས་བཟུང་དང་བྲལ་བ་ཧ་ཕྱེད་དེ་བ་མ་བཅོས་པཿ མ་འགགས་བཿ གསལ་ལ་དྭངས་པཿ བརྗོད་མེད་རང་གྲོལ་ཆེན་པོར་ངོ་འཕྲོད་པའི་ཚེཿ ཐིག་ལེ་གསང་གནས་སུ་གཡོས་པ་སྟེཿ བསམ་གྱིས་མི་ཁྱབ་པའི་དགའ་བའོཿ དེར་ཟམ་བུའི་མན་ངག་འོག་རླུང་བསྡམཿ བར་རླུང་བརྒྱངཿ རྒྱབ་རླུང་འཐེནཿ སྟེང་རླུང་ཕྱི་ཕྱུང་ལཿ སྙིང་གའི་ཨ་ལ་ཤེས་པ་གཏད་ཅིངཿ ཐིག་ལེ་བསྐྱིལ་ལོཿ དེ་ཡང་འགྲན་ལྡོག་གི་མན་ངག་གླིང་བཞི་སྡུདཿ ཉི་ཟླ་གྱེན་དུ་བཟློགཿ དར་དམར་གྱེན་དུ་བསྒྲེངཿ ཧིག་གི་སྒྲས་རྒྱ་མཚོ་བྲག་ལ་བཅརཿ རིག་པ་སྤྱི་བོའི་ཧཾ་དང་འགྲོགས་ཤིང་ཿ ཧིག་གི་སྒྲས་སྟོང་འདྲེན་ལན་གསུམ་རེས་རྩ་འཁོར་རེ་རེ་ནས་དྲངས་ཤིང་སྤྱི་བོའི་ཧཾ་དང་བསྲེས་ལ་ཀ་དག་གི་ངང་དུ་དར་གཅིག་འཇོག་གོཿ ལར་བསྒྲམ་པའི་མན་ངག་ཟབ་མོ་ནིཿ སྟག་མོའི་སྐྱུགས་སྟངས་གསུམ་གྱིས་རླུང་ཕྱིར་ཕྱུངཿ ཉ་མོའི་འཇིབ་སྟངས་གསུམ་གྱི་ཆགས་ཆུ་བླངསཿ ཝ་མོའི་སྣུམ་སྟངས་གསུམ་གྱིས་རླུང་ནང་དུ་རྔུབཿ གཡང་མོའི་སྤྲུག་སྟངས་གསུམ་གྱི་དམིགས་གནད་དང་བཅས་ཐིག་ལེཿཀློང་དུ་དཀྲམ་པའོ༔ དེ་ལྟར་འདོད་པ་མ་རྫོགས་ཀྱི་བར་དུ་ཡང་ནས་ཡང་དུ་བསྐྱར་ཞིང་མཐར་ལུས་གན་རྐྱལ་དུ་ཅི་བདེ་བར་དུར་ཁྲོད་ཀྱི་མི་རོ་བཞིན་དུ་བཞག་ལཿ སེམས་ཆོས་ཉིད་ཀྱི་ངང་དུ་ཐུན་གཅིག་ངལ་བསོ་བ་ནི་ཆོས་ཉིད་གནད་ཀྱི་མན་ངག་ཁྱད་པར་ཅན་ནོཿ དམ་ཚིག་དང་ལྡན་པའི་རྣལ་འབྱོར་པ་མྱུར་དུ་ཆོས་ཉིད་ཀྱི་བདེན་པ་མཐོང་ཞིང་ས་ལམ་ཉི་ཟླའི་བསྒྲོད་པ་ལྟར་མངོན་འཚང་རྒྱ་བར་འདོད་ན་བསྐྱེད་རྫོགས་ངལ་དུབ་ཅན་དག་གི་རྗེས་སུ་མ་འབྲང་བར་གསང་སྔགས་གནད་ཀྱི་གདམས་པ་མཁའ་འགྲོའི་ཁ་རླངས་ཆིལ་ལེ་བ་འདི་ཉིད་ཉམས་སུ་ལོངས་ཤིགཿ མྱུར་དུ་གྲོལ་བར་ཐེ་ཚོམ་ཡོད་རེ་ཀན༔ ས་མ་ཡཱཿ རྒྱ་རྒྱ་རྒྱཿ དེ་ཡང་རྒྱུན་དུ་བཅུད་ཅན་གྱི་ཟས་སོགས་ཁམས་གསོ་བའི་ཐབས་ལ་འབད་ཅིང༔ རྡོ་རྗེ་སློབ་དཔོན་ཡབ་ཡུམ་སྲོག་གི་དྭངས་མ་ལྟར་བཟང་ཞིང་ལོག་པར་ལྟ་བ་དང་མི་མཉེས་པར་སྐད་ཅིག་ཀྱང་མི་བྱ་བར་དག་སྣང་མོས་གུས་སྦྱང་བ་དང་ཤེས་རབ་ལས་ཀྱིས་འབྲེལ་བའི་ཕྱག་རྒྱ་ཡང་མིག་གི་འབྲས་བུ་ལྟར་བརྩེ་ཞིང་དམ་ཉམས་ཀུན་གྱི་མ་གོས་བར་བྱ་ཞིང་ཿ མིག་སེར་སླངཿ མཁའ་འགྲོ་མ་ལ་ཚོགས་གཏོར་རྒྱུན་མི་ཆད་པར་གཏོང་ཞིང་བུད་མེད་ཀྱི་རིགས་སུ་ལའང་ཚོགས་བསགས་དང་བཀུར་སྟི་དག་སྣང་མོས་གུས་བྱེད་པ་ལས༔ སུན་འབྱིན་དང་བརྙས་པ་སྤུ་ཙམ་ཡང་མི་བྱཿ ཁམས་ཀྱི་ཐིག་ལེ་དྭངས་མའི་སྣོད་དུ་མ་གཏོགས་པཿ གནས་མིན་དུ་ཡུངས་འབྲུ་ཙམ་ཡང་ཆུད་ཟ་བར་མི་བྱཿ ལུས་རྒུད་དུ་མི་འཇུགཿ བཟའ་བཏུང་ཚོགས་འཁོར་དུ་མོསཿ ཐབས་ལམ་པ་ལ་སྨད་མི་བྱཿ གསང་སྤྱོད་གཞན་དུ་མི་བསྒྲགསཿ ལོག་ལྟ་ཅན་གྲོགས་སུ་མི་བརྟེནཿ སྔགས་ཀྱི་དམ་རྫས་མི་སྤངསཿ རྟག་ཏུ་སྟོང་ཉིད་སྙིང་རྗེ་དང་མི་འབྲལ་བར་བྱའོཿ མདོར་ན་གསང་སྔགས་ཀྱི་རྩ་བ་ནི་དམ་ཚིག་ཡིན་པས་དམ་ཚིག་ལ་སྐྱོན་མ་ཞུགས་པ་ཤིན་ཏུ་གལ་ཆེ་ཞིངཿ ཕྲན་བུ་ཙམ་རེ་ཉམས་པར་གྱུར་ཀྱང་ཕྱིར་བཅོས་ལ་འབད་པ་གནད་དམ་པའོཿ ཨེ་མ་ཧོཿ མདོ་སྔགས་རྒྱུད་སྡེ་རྒྱ་མཚོའི་གསང་བའི་གནསཿ ཐབས་ཀྱི་ལམ་མཆོག་ཚེ་འདིར་གྲོལ་བའི་ཆོསཿ ཡང་གསང་བླ་མེད་མཁའ་འགྲོའི་སྙིང་ཁྲག་བཅུདཿ པདྨ་བདག་གི་སྙིང་ཕྱུང་ལག་མཐིལ་བཀྲམཿ རིན་ཆེན་གསང་བའི་བརྡ་རིས་ཆེན་མོར་ཐོབཿ མནྡར་བའི་མཁའ་དབྱིངས་ཀློང་དུ་སྦས༔ མ་འོངས་ང་སྤྲུལ་ཁྲག་འཐུང་ཧེ་རུ་ཀཿ ཁྲག་འཐུང་ཆགས་པའི་རྡོ་རྗེ་དང་འཕྲད་ནསཿ འབྲེལ་ཚད་དོན་ལྡན་སྐལ་ལྡན་སྨིན་པར་ཤོགཿ གསང་བའི་བཀའ་སྲུང་ཌཱཀྐི་མཆེད་གཉིས་དང་ཿ སྔགས་ཀྱི་སྲུང་མ་ཞིང་སྐྱོང་ཡབ་ཡུམ་གྱིསཿ གཡེལ་མེད་སྲུངས་ཤིག་དམ་ཚིག་སྙིང་གི་རྒྱཿ དམ་ཚིག་ལྡན་ཀྱང་གཅིག་བརྒྱུད་མ་གཏོགས་པཿ སྤེལ་ན་ཧུར་ཐུམ་སྙིངཁྲག་ཐང་དུ་འཕོསཿ བསྟན་པར་འཕང་བའི་དམ་ཚིག་ས་མ་ཡཱཿ སྐུའི་རྒྱཿ གསུང་གི་རྒྱཿ ཐུགས་ཀྱི་རྒྱཿ ས་མ་ཡཱཿ རྒྱ་རྒྱ་རྒྱཿ གུ་ཧྱཿ དམ་ཚིག་གི་རྒྱཿ ཁྲག་འཐུང་ལས་ཀྱི་དཔའ་བོས་མཁའ་གསང་ཆགས་པ་ཆེན་པོའི་ཀློང་ནས་སྤྱན་དྲངས་ཤིན་ཏུ་གསང་བའི་མན་ངག་བཀའ་རྒྱ་མའོཿ ཡི་གེའི་རིགས་བྱེད་དམ་ལྡན་དཔལ་གྱི་སེངྒེས་བགྱིས་པའོ།།